This document is an excerpt from the EUR-Lex website
Document 52012PC0460
Proposal for a COUNCIL DECISION Amending Decision 2007/641/EC concluding consultations with the Republic of Fiji Islands under Article 96 of the ACP-EC Partnership Agreement and Article 37 of the Development Cooperation Instrument, and extending the period of application thereof
Proposta għal DEĊIŻJONI TAL-KUNSILL Li temenda d-Deċiżjoni 2007/641/KE dwar il-konklużjoni ta’ konsultazzjonijiet mar-Repubblika tal-Gżejjer tal-Fiġi skont l-Artikolu 96 tal-Ftehim ta’ Sħubija AKP-KE u l-Artikolu 37 tal-Istrument ta’ Kooperazzjoni fl-Iżvilupp, u testendi l-perjodu ta' applikazzjoni tagħha
Proposta għal DEĊIŻJONI TAL-KUNSILL Li temenda d-Deċiżjoni 2007/641/KE dwar il-konklużjoni ta’ konsultazzjonijiet mar-Repubblika tal-Gżejjer tal-Fiġi skont l-Artikolu 96 tal-Ftehim ta’ Sħubija AKP-KE u l-Artikolu 37 tal-Istrument ta’ Kooperazzjoni fl-Iżvilupp, u testendi l-perjodu ta' applikazzjoni tagħha
/* COM/2012/0460 final - 2012/0225 (NLE) */
Proposta għal DEĊIŻJONI TAL-KUNSILL Li temenda d-Deċiżjoni 2007/641/KE dwar il-konklużjoni ta’ konsultazzjonijiet mar-Repubblika tal-Gżejjer tal-Fiġi skont l-Artikolu 96 tal-Ftehim ta’ Sħubija AKP-KE u l-Artikolu 37 tal-Istrument ta’ Kooperazzjoni fl-Iżvilupp, u testendi l-perjodu ta' applikazzjoni tagħha /* COM/2012/0460 final - 2012/0225 (NLE) */
MEMORANDUM TA’ SPJEGAZZJONI 1. Il-kolp ta' stat militari li
seħħ f'Diċembru 2006 wassal għal konsultazzjonijiet skont
l-Artikolu 96 tal-Ftehim rivedut ta' Cotonou. F'April 2007, dawn wasslu
għal impenji miftiehma dwar id-drittijiet tal-bniedem, il-prinċipji
demokratiċi u l-istat tad-dritt. Fl-1 ta' Ottubru 2007
il-Kunsill, fid-Deċiżjoni 2007/641/KE tiegħu, iddeċieda fuq
miżuri xierqa fir-rigward tal-Fiġi biex jiġi stabbilit grad ta'
parallelliżmu bejn ir-rispett tal-Fiġi għall-impenji miftiehma u
l-kooperazzjoni għall-iżvilupp. 2. Fl-10 ta' April 2009,
il-President tal-Fiġi abroga l-Kostituzzjoni, neħħa
l-imħallfin kollha u ddikjara li kienu se jsiru elezzjonijiet mhux aktar
tard minn Settembru 2014. B'dan, il-Fiġi unilateralment kisret impenji
ewlenin li kienet tat lill-UE f'April 2007. Dan seħħ jum wara li
l-Qorti tal-Appell kienet iddeċidiet li l-ħatra ta' gvern immexxi
mill-forzi militari, wara l-kolp ta' stat fl-2006, kienet illegali. Fiġi
kienet imqiegħda wkoll taħt stat ta' emerġenza u l-libertà tal-espressjoni
tnaqqset b'mod sostanzjali. 3. Bħala segwitu għal
dawn l-iżviluppi negattivi, fl-24 ta' Settembru 2009,
fid-Deċiżjoni 2009/735/KE tiegħu, il-Kunsill iddeċieda li
jestendi sal-31 ta' Marzu 2010, il-validità tal-miżuri xierqa
fir-rigward tal-Fiġi stabbiliti fid-Deċiżjoni 2007/641/KE, li
kienet se tiskadi fl-1 ta' Ottubru 2009. Minħabba dewmien
addizzjonali fl-implimentazzjoni tal-impenji miftiehma mal-UE, il-Kunsill
iddeċieda, fid-29 ta' Marzu 2010 fid-Deċiżjoni
tiegħu 2010/208/UE, li jestendi sal-1 ta' Ottubru 2010,
il-validità tal-miżuri xierqa għall-Fiġi stabbiliti
fid-Deċiżjoni 2007/641/KE u mbagħad mill-ġdid fis-27 ta' Settembru 2010
fid-Deċiżjoni tiegħu 2010/589/UE sal-31 ta' Marzu 2011,
fil-31 ta’ Marzu 2011 fid-Deċiżjoni tiegħu 2011/219/UE
sat-30 ta' Settembru 2011 u fis-26 ta’ Settembru 2011
fid-Deċiżjoni tiegħu 2011/637/UE sat-30 ta' Settembru 2012.
4. Filwaqt li l-biċċa
l-kbira tal-allokazzjoni tal-2010 tal-Fiġi taħt il-miżuri
akkumpanjanti għall-eks pajjiżi tal-Protokoll taz-Zokkor, li
tiddependi fuq il-progress li sar fit-tkomplija tal-proċess demokratiku,
ġiet ikkanċellata f’Mejju 2010, parti mill-allokazzjoni nżammet
biex tipprovdi assistenza diretta permezz tad-Delegazzjoni tal-UE f'Suva
għall-popolazzjoni li tiddependi b’mod dirett fuq il-produzzjoni
taz-zokkor sabiex ittaffi l-konsegwenzi soċjali negattivi. 5. Għall-perjodu 2011-2013
l-allokazzjoni indikattiva tal-Fiġi ġiet stabbilita għal
EUR 51.094 miljun taħt id-Deċiżjoni tal-Kummissjoni C(2010)8130.
B’riżultat tat-tnaqqis tal-allokazzjonijiet tal-2013
għall-Miżuri Akkumpanjanti għall-Pajjiżi tal-Protokoll
taz-Zokkor, l-allokazzjoni tal-Fiġi tnaqqset għal EUR 2.438 miljun.
Id-disponibilità ta' din l-allokazjoni (sħiħa jew parzjali),
madankollu, tiddependi fuq il-progress li jsir fil-proċess ta'
konsultazzjoni ta’ Cotonou taħt l-Artikolu 96 (Artikolu 37 DCI),
fin-nuqqas ta' tali progress qed jiġu meqjusa biss interventi ta'
mitigazzjoni soċjali. 6. Fid-dawl tad-deterjorazzjoni
soċjo-ekonomika kontinwa fil-Fiġi fl-2011 l-UE reġgħet
bdiet assistenza mmirata għall-iżvilupp lill-Fiġi
b'appoġġ tal-popolazzjonijiet vulnerabbli. Din l-asssisenza ma
tgħaddix mingħand il-Gvern. 7. Minn kmieni fl-2012
jistgħu jkunu nnutati xi żviluppi pożittivi, prinċipalment
it-tneħħija tar-Regolamenti ta’ Emerġenza Pubblika fis-7 ta’ Jannar 2012
u l-varar tal-proċess politiku fid-9 ta’ Marzu 2012 li se
jġib miegħu kostituzzjoni ġdida sa Marzu 2013 u
l-isttabiliment mill-ġdid tad-demokrazzija kostituzzjonali permezz
tal-elezzjonijiet parlamentari sa Settembru 2014. Madanakollu, baqa’
restrizzjonijiet fuq ċerti drittijiet tal-bniedem u libertajiet
fundamentali. 8. Filwaqt li jiġu meqjusa
l-kunsiderazzjonijiet ta’ hawn fuq, f’dan l-istadju l-Unjoni Ewropea
għandha testendi l-politika attwali u l-miżuri xierqa. 9. Għaldaqstant,
il-Kummissjoni qed tipproponi lill-Kunsill biex temenda l-miżuri xierqa
sabiex tinkoraġġixi lill-Fiġi biex tkompli fi triqitha lejn
ir-restawr tad-demokrazzija, l-istat tad-dritt u r-rispett tad-drittijiet umani
u d-drittijiet fundamentali u biex testendi l-perjodu ta’ applikazzjoni
tagħhom għal 12-il xahar ieħor li jintemmu fit-30 ta' Settembru 2013.
10. L-UE għandha tkompli
żżomm djalogu regolari u impenn politiku permanenti mal-Fiġi, u
għalhekk id-Deċiżjoni għandha tinżamm taħt
reviżjoni kostanti. 11. Huwa propost li din
id-Deċiżjoni tkun notifikata lill-Gvern interim tal-Fiġi,
abbażi tal-abbozz tal-ittra lill-President Nailatikau annessa, u biex
tinfurmah li (a) l-UE tilqa' l-iżviluppi pożittivi riċenti
fil-Fiġi għar-ritorn lejn tmexxija demokratika u
tinkoraġġixxi passi ulterjuri prinċipalment rigward
ir-restrizzjonijiet li baqa’ fuq id-drittijiet tal-bniedem u l-libertajiet
fundamentali. (b) li l-UE se tibqa' impenjata li ssegwi d-djalogu politiku
msaħħaħ skont l-Artikolu 8 tal-Ftehim ta' Cotonou, (c) li
l-evalwazzjoni tal-progress li sar lejn ir-ritorn għal tmexxija
kostituzzjonali se tkompli tiggwida lill-UE fid-deċiżjonijiet li
jridu jittieħdu dalwaqt dwar koperazzjoni għall-iżvilupp, u li
f’dan l-ispirtu l-UE hija lesta li timpenja ruħha fil-preparazzjoni
tal-proċess ta’ programmazzjoni tal-ħdax-il FEŻ, u biex
tinnotifika fiż-żmien dovut allokazzjoni indikattiva nazzjonali f'dan
il-proċess, waq li l-iffinalizzar, l-iffirmar u l-implimentazzjoni tad-dokumenti
ta' programmazzjoni tal-ħdax-il FEŻ huma maħsuba għal
mal-Gvern elett demokratikament u (d) li missjoni ta’ analiżi skont
l-Artikolu 96 u djalogu formali , għandhom isiru wara
l-konklużjoni b’suċċess ta’ proċess kostituzzjonali
konsultattiv kredibbli, inklużiv u trasparenti, mistenni sa Marzu 2013,
jista' jwassal għal analiżi ulterjuri pożittiva ta' miżuri
xierqa jekk il-progress jippermetti. 12. Il-modifiki
għall–miżuri x-xierqa jirrappreżentaw l-ewwl rispons kawt
għal żviluppi relevanti riċenti u jippermettu b’mod partikolari l-bidu
tad-diskussjonijiet ta’ programmazzjoni għall-ħdax-il FEŻ, u
n-notifika tal-allokazzjoni indikattiva tal-ħdax-il FEŻ tal-Fiġi
ladarba d-deċiżjonijiet neċessarji dwar l-isatbbiliment
tal-FEŻ li jmiss jipermettu dan. Is-sustanza tal-miżuri attawali tibqa’
l-istess. Konklużjoni Fid-dawl ta’ dan kollu, il-Kunsill hu mitlub
li jadotta l-abbozz ta’ proposta mehmuża għal Deċiżjoni
tal-Kunsill li temenda u testendi l-perjodu ta’ applikazzjoni tal-miżuri
xierqa fir-rigward tar-Repubblika tal-Gżejjer tal-Fiġi. 2012/0225 (NLE) Proposta għal DEĊIŻJONI TAL-KUNSILL Li temenda d-Deċiżjoni 2007/641/KE
dwar il-konklużjoni ta’ konsultazzjonijiet mar-Repubblika tal-Gżejjer
tal-Fiġi skont l-Artikolu 96 tal-Ftehim ta’ Sħubija AKP-KE u
l-Artikolu 37 tal-Istrument ta’ Kooperazzjoni fl-Iżvilupp, u testendi
l-perjodu ta' applikazzjoni tagħha IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra l-Ftehim ta’ Sħubija
bejn il-Membri tal-Grupp ta’ Stati Afrikani, tal-Karibew u tal-Paċifiku,
min-naħa l-waħda, u l-Komunità Ewropea u l-Istati Membri tagħha,
min-naħa l-oħra, iffirmat f’Cotonou fit-23 ta’ Ġunju 2000[1], kif rivedut f’Ouagadougou,
il-Burkina Faso fit-22 ta’ Ġunju 2010[2] (minn hawn 'il quddiem
imsejjaħ “il-Ftehim ta’ Cotonou”), u b’mod partikulari l-Artikolu 96
tiegħu, Wara li kkunsidra l-Ftehim Intern bejn
ir-rappreżentanti tal-gvernijiet tal-Istati Membri, li jiltaqgħu fi
ħdan il-Kunsill, dwar miżuri li għandhom jittieħdu u
proċeduri li għandhom ikunu segwiti għall-applikazzjoni
tal-Ftehim ta' Cotonou[3],
u b'mod partikolari l-Artikolu 3 tiegħu, Wara li kkunsidra r-Regolament (KE) Nru 1905/2006
tal-Parlament Ewropew u tal-Kunsill tat-18 ta’ Diċembru 2006 li
jistabilixxi strument ta’ finanzjament ta’ kooperazzjoni
għall-iżvilupp (l-Istrument ta’ Kooperazzjoni
għall-Iżvilupp)[4],
u b’mod partikulari l-Artikolu 37 tiegħu, Wara li kkunsidra l-proposta tal-Kummissjoni
Ewropea, Billi: (1) Id-Deċiżjoni
tal-Kunsill 2007/641/KE[5]
kienet adottata biex tieħu miżuri xierqa wara l-ksur tal-elementi
essenzjali msemmija fl-Artikolu 9 tal-Ftehim ta’ Cotonou, u l-valuri
msemmija fl-Artikolu 3 tal-Istrument ta’ Kooperazzjoni
għall-Iżvilupp. (2) Dawk il-miżuri ġew
estiżi bid-Deċiżjoni tal-Kunsill 2009/735/KE[6] u sussegwentement bid-Deċiżjonijiet
tal-Kunsill 2010/208/UE[7],
2010/589/UE[8],
2011/219/UE[9]
u 2011/637/UE[10]
peress li, mhux talli r-Repubblika tal-Fiġi għadha trid timplimenta
impenji importanti li hi għamlet f’konsultazzjonijiet li saru f’April 2007
dwar elementi essenzjali tal-Ftehim ta’ Cotonou, iżda kien hemm ukoll
żviluppi rigressivi importanti li jikkonċernaw għadd minn dawn
l-impenji, (3) Madanakollu, sa minn kmieni
fl-2012 jistgħu jkunu nnutati xi żviluppi pożittivi lejn
ir-restawr tad-demokrazija fil-Fiġi, li għandhom ikunu rikonoxxuti, u
għalhekk għandu jkun ikkunsidrat bidu mill-ġdid prospettiv lejn
il-programmazzjoni ta' assistenza futura għall-iżvilupp. (4) Id-Deċiżjoni 2007/641/KE
tiskadi fit-30 ta’ Settembru 2012. Huwa xieraq li il-kontenut
tagħha jkun aġġornat u l-validità tagħha tkun estiża
skont dan. ADOTTA DIN ID-DEĊIŻJONI: Artikolu 1 Id-Deċiżjoni tal-Kunsill 2007/641/KE
hija b’dan emendata kif ġej: (1)
Fl-Artikolu 3, it-tieni subparagrafu huwa
sostitwit b’dan li ġej: “Għandha tiskadi fit-30 ta’ Settembru 2013.
Hija għandha tiġi riveduta regolarment tal-anqas darba kull sitt
xhur.”; (2)
L-Anness jiġi sostitwit bl-Anness għal
din id-Deċiżjoni. Artikolu 2 L-ittra fl-Anness għal din
id-Deċiżjoni għandha tiġi indirizzata lir-Repubblika
tal-Fiġi. Artikolu 3 Din id-Deċiżjoni tidħol
fis-seħħ fil-jum tal-adozzjoni tagħha. Magħmul fi Brussell, F’isem
il-Kunsill Il-President
[…] ANNESS Abbozz ta’ ittra
L-Eċċellenza Tiegħu Ratu Epeli NAILATIKAU President tar-Repubblika tal-Fiġi Suva Ir-Repubblika tal-Fiġi
Eċċellenza, L-Unjoni Ewropea(UE) tagħti importanza
kbira lid-dispożizzjonijiet tal-Artikolu 9 tal-Ftehim ta’ Cotonou u
l-Artikolu 3 tal-Istrument ta’ Kooperazzjoni għall-Iżvilupp.
Is-sħubija AKP-UE hija bbażata fuq ir-rispett lejn id-drittijiet
umani, il-prinċipji demokratiċi u t-tmexxija skont il-liġi, li
jiġbru flimkien l-elementi essenzjali tal-Ftehim ta’ Cotonou, u huma
s-sies tar-relazzjonijiet ta’ bejnietna. Fil-11 ta’ Diċembru 2006 l-Kunsill tal-UE
kkundannat il-kolp ta’ stat militari li seħħ fil-Fiġi. Skont l-Artikolu 96 tal-Ftehim ta’
Cotonou, u b’kunsiderazzjoni għall-fatt li l-kolp ta' stat militari li
seħħ fil-5 ta’ Diċembru 2006 ikkostitwixxa ksur
tal-elementi essenzjali elenkati fl-Artikolu 9 ta’ dak il-Ftehim, l-UE
stiednet lill-Fiġi għal konsultazzjonjiet, kif previst fil-Ftehim ta’
Cotonou, sabiex is-sitwazzjoni tiġi eżaminata bir-reqqa u, fejn
neċessarju, jittieħdu passi biex tkun rimedjata. Il-parti formali ta’ dawk
il-konsultazzjonijiet bdew fi Brussell fit-18 ta’ April 2007. L-UE
laqgħet b'sodisfazzjon il-fatt li f'dak iż-żmien il-Gvern
Interim ikkonferma għadd ta’ impenji ewlenin fir-rigward tad-drittijiet
tal-bniedem u l-libertajiet fundamentali, rispett għal prinċipji
demokratiċi u għall-istat tad-dritt, kif imsemmi hawn taħt, u
pproponiet passi pożittivi fir-rigward tal-implimentazzjoni tagħhom. Sfortunatament, minn dak iż-żmien
'il hawn kien hemm sensiela ta’ żviluppi rigressivi, b'mod partikolari
f'April 2009, u dan ifisser li issa l-Fiġi tinsab fi stat ta’ ksur ta’
diversi impenji li daħlet għalihom. Dan jirrigwarda partikolarment
l-abrogazzjoni tal-Kostituzzjoni, id-dewmien sostanzjali ħafna
fiż-żamma ta' elezzjonijiet parlamentari, u l-vjolazzjonijiet
tad-drittijiet tal-bniedem. Minkejja li l-implimentazzjoni tal-impenji ddewmet
b'mod sostanzjali, il-maġġoranza ta’ dawk l-impenji għadhom
rilevanti ħafna għas-sitwazzjoni preżenti tal-Fiġi, u huma
għalhekk mehmuża ma’ din l-ittra. Peress li l-Fiġi
ddeċidiet unilateralment li tikser numru ta’ impenji ewlenin, dan wassal
għal telf għall-Fiġi f'termini ta’ fondi
għall-iżvilupp. Xi passi pożittivi seħħu sa
minn kmieni fl-2012; prinċipalment it-tneħħija tar-Regolamenti
ta’ Emerġenza Pubblika fis-7 ta’ Jannar 2012 u
t-tħabbir ta’ proċess politiku fid-9 ta’ Marzu li se
jġib miegħu kostituzzjoni ġdida sa Marzu 2013 u
l-isttabiliment mill-ġdid tad-demokrazzija kostituzzjonali permezz
tal-elezzjonijiet parlamentari sa Settembru 2014. Madanakollu, baqa’
restrizzjonijiet fuq ċerti drittijiet tal-bniedem u libertajiet
fundamentali. B’rikonoxximent ta’ dawn l-iżviluppi u
s-sħubija li tikkostittwixxi l-pedamenti tal-Ftehim ta' Cotonou, l-UE
tesprimi li hi lesta timpenja ruħha fi djalogu formali ġdid rigward
dawn l-iżviluppi. Tali djalogu jista’ jkun ikkunsidrat fl-okkażjoni
ta' missjoni ta' analiżi skont l-Artikolu 96, wara l-konklużjoni
b’suċċess ta’ konsultazzjoni kostituzzjonali inklużiva,
kredibbli u trasparenti, li mistennija jssir f’Marzu 2013. Skont dan, l-UE ddeċidiet li testendi
l-miżuri xierqa eżistenti għall-Fiġi u li temendhom
bħala l-ewwel reazzjoni għall-passi meħuda mill-Fiġi, biex
partikolarment jippermettu l-varar ta' diskussjonijiet ta' programmazzjoni
għall-ħdax-il FEŻ, u notifika fiż-żmien dovut ta’
allokazzjoni indikattiva għall-Fiġi. L-iffinalizzar, l-iffirmar u
l-implimentazzjoni tad-dokumenti ta' programmazzjoni tal-ħdax-il FEŻ
huma maħsuba għal mal-Gvern futur elett demokratikament
Konsegwentament, huwa ta’ importanza partikolari li l-Gvern Interim jimpenja
ruħu għall-proċess ta’ konsultazzjoni kostituzzjonali
inklużiva, kredibbli u trasparenti u għal djalogu politiku domestiku
u jirrispetta partikolarment l-impenji tiegħu rigward id-drittijiet
tal-bniedem u l-istat tad-dritt u jirrevoka r-restrizzjonijiet li baqa'.
Filwaqt li l-pożizzjoni tal-UE hija ggwidata mill-elementi essenzjali tal-Ftehim
ta’ Sħubija ta' Cotonou kif ukoll mill-prinċipji fundamentali
tiegħu, b'mod notevoli fir-rigward tar-rwol ċentrali ta' djalogu u
t-twettiq ta' obbligi reċiproki, huwa enfasizzat li l-UE ma waslet
għal ebda konklużjoni ppremeditata fir-rigward tal-eżitu ta’ dan
id-djalogu. Jekk l-analiżi u d-djalogu maħsuba
jkollhom eżitu pożittiv, l-UE hija impenjata għal analiżi
pożittiva ulterjuri ta’ dawn il-miżuri xierqa. Bil-maqlub, jekk
is-sitwazzjoni fil-Fiġi ma titjiebx, se jkomplu jintilfu l-fondi tal-UE
għall-iżvilupp tal-Fiġi. B'mod partikolari, il-valutazzjoni ta’
progress ulterjuri li saret għar-ritorn lejn tmexxija kostituzzjonali se
tiggwida lill-UE fid-deċiżjonijiet li jridu jittieħdu dwar
il-Programm Indikattiv Nazzjonali tal-Fiġi skont il-ħdax-il-Fond
Ewropew għall-Iżvilupp. Sakemm ikun sar id-djalogu formali, l-UE
tistieden lill-Fiġi sabiex tkompli u tintensifika d-djalogu politiku
msaħħaħ. Il-miżuri xierqa huma dawn li
ġejjin: –
l-għajnuna umanitarja u s-sostenn dirett
għas-soċjetà ċivili u l-popolazzjonijiet vulnerabbli
jistgħu jitkomplew; –
l-attivitajiet ta’ kooperazzjoni li se jsiru b’mod
partikolari skont it-tmien u d-disa’ FEŻ, tħallew jibqgħu
għaddejjin; –
attivitajiet ta' kooperazzjoni li jistgħu
jgħinu biex tirritorna d-demokrazija u biex tittejjeb it-tmexxija
jistgħu jitkomplew, għajr taħt ċirkustastanzi verament
eċċezzjonali; –
l-implimentazzjoni tal-miżuri ta'
akkumpanjament għall-2006, fir-rigward tar-riforma taz-zokkor, tista'
tipproċedi. Il-Ftehim ta’ Finanzjament ġie ffirmat fil-livell tekniku
mill-Fiġi fid-19 ta’ Ġunju 2007. Hu nnotat li l-Ftehim ta'
Finanzjament jinkludi klawżola ta' sospensjoni; –
l-allokazzjoni taz-zokkor għall-2007 hija
żero; –
id-disponibilità tal-allokazzjoni taz-zokkor
għall-2008 kienet soġġetta għal prova ta’ tħejjija kredibbli
u opportuna ta’ elezzjonijiet skont l-impenji miftiehma, b'mod partikulari dwar
iċ-ċensiment, it-tfassil mill-ġdid tal-konfini u r-riforma
elettorali skont il-Kostituzzjoni, u miżuri li ttieħdu biex
jiżguraw il-funzjonament tal-Uffiċċju Elettorali, li jinkludi
l-ħatra ta’ Kontrollur tal-Elezzjonijiet sat-30 ta’ Settembru 2007
skont il-Kostituzzjoni. Din l-allokazzjoni taz-zokkor għall-2008 ntilfet
fil-31 ta’ Diċembru 2009; –
l-allokazzjoni taz-zokkor għall-2009 ġiet
imħassra f'Mejju 2009 minħabba li l-Gvern Interim iddeċieda li
jittardja l-elezzjonijiet ġenerali sa Settembru 2014; –
L-allokazzjoni għall-2010 ġiet
imħassra qabel l-1 ta' Mejju 2010 peress li ma sar l-ebda progress
fit-tkomplija tal-proċess demokratiku; madankollu, minħabba
s-sitwazzjoni kritika tas-settur taz-zokkor, parti mill-allokazzjoni twarrbet
għal għajnuna diretta lill-popolazzjoni dipendenti direttament fuq
il-produzzjoni taz-zokkor sabiex tnaqqas il-konsegwenzi soċjali
ħżiena. Dawn il-fondi huma ġestiti b’mod ċentral
mid-Delegazzjoni tal-UE f'Suva u ma jiġux mgħoddija lill-Gvern; –
it-tħejjija u l-iffirmar eventwali
tal-programm indikattiv multiannwali għall-miżuri akkumpanjanti
għar-riforma taz-zokkor għall-2011-2013 jistgħu jipproċedu; –
id-disponibilità tal-allokazzjoni indikattiva taħt
il-programm multiannwali għall-miżuri akkumpanjanti fir-rigward ta’
eks pajjiżi tal-Protokoll taz-Zokkor 2011-2013 se tkun tiddependi fuq
ftehim fil-proċess ta’ konsultazzjoni; fin-nuqqas ta' tali ftehim ikunu
biss intervenzjonijiet ta' mitigazzjoni soċjali li jiġu meqjusa
għall-iffinanzjar permezz ta' din l-allokazzjoni; –
il-preparazzjoni tal-programmazzjoni
tal-ħdax-il FEŻ tista’ tkun varata, sabiex il-Fiġi tkun tista’
tistenna li tkun notifikata b’allokazzjoni indikattiva fiż-żmien
dovut. –
appoġġ speċifiku
għat-tħejjija u l-implimentazzjoni ta' impenji ewlenin, b'mod
partikulari b'appoġġ għat-tħejjija u/jew it-twettiq ta'
elezzjonijiet, jistgħu jiġu meqjusa; –
il-kooperazzjoni reġjonali, u
l-parteċipazzjoni tal-Fiġi fiha, m’humiex se jiġu affettwati, –
il-monitoraġġ tal-impenji ser issir
b'konformità amt-termini fl-Annessgħal din l-ittra li tikkonċerna
d-djalogu regolari, u l-kooperazzoni effettiva ma' valutazzjonijiet u
missjonijiet ta' monitoraġġ u rappurtaġġ. Barra minn hekk, l-UE tistenna li l-Fiġi
tikkoopera bis-sħiħ mal-Forum tal-Gżejjer tal-Paċifiku dwar
l-implimentazzjoni tar-rakkomandazzjonijiet mill-Grupp ta’ Persuni Eminenti,
kif approvat mill-Ministri tal-Affarijiet Barranin tal-Forum fil-laqgħa
tagħhom f’Vanuatu fis-16 ta’ Marzu 2007. F’dan il-kunetst
l-UE hija sodisfatta bil-progress riċenti rigward l-ingaġġ
mal-Grupp ta’ Kuntatt Ministerjali tal-Forum tal-Gżejjer tal-Paċifiku
imwaqqaf biex jimmonitorja l-progress tal-preparazzjonijiet tal-Fiġi
għall-elezzjonijiet u r-ritorn agħad-demokrazija. L-Unjoni Ewropea se tkompli ssegwi
s-sitwazzjoni fil-Fiġi mill-qrib. Skont l-Artikolu 8 tal-Ftehim ta'
Cotonou, djalogu politiku msaħħaħ se jitwettaq mal-Fiġi
biex jiġi assigurat ir-rispett għad-drittijiet tal-bniedem,
ir-restawr mill-ġdid tad-demokrazija u r-rispett għall-istat
tad-dritt sakemm iż-żewġ partijiet jikkonkludu li n-natura
msaħħa tad-djalogu serviet l-għan taghħa. Jekk ikun hemm majnar, falliment jew rigress
fl-implimentazzjoni tal-impenji li daħal għalihom il-Gvern
Proviżorju, l-UE żżomm id-dritt li taġġusta
mill-ġdid il-miżuri xierqa. L-UE tenfasizza li l-privileġġi
tal-Fiġi fil-kooperazzjoni tagħha mal-UE jiddipendu fuq ir-rispett
lejn l-elementi essenzjali tal-Ftehim ta' Cotonou u l-prinċipji stabbiliti
fl-Istrument ta' Kooperazzjoni għall-Iżvilupp. Sabiex
tikkonvinċi lill-UE li l-Gvern Interim huwa kompletament ippreparat li
jsegwi l-impenji li ngħataw, huwa essenzjali li jsir progress bikri u
sostanzjali fit-twettiq tal-impenji miftiehma. Dejjem tiegħek, Magħmul fi Brussell, Għall-Kunsill || Għall-Kummissjoni C. ASHTON President || A. PIEBALGS Kummissarju Anness
għall-Anness
IMPENJI MIFTIEHMA MAR-REPUBBLIKA TAL-GZEJJER
TAL-FIĠI
. A. Rispett lejn il-Prinċipji
Demokratiċi Impenn Nru 1 Li jseħħu elezzjonijiet parlamentari
ħielsa u ġusti fi żmien 24 xahar mill-1 ta’ Marzu 2007,
suġġetti għal sejbiet ta’ evalwazzjoni li għandhom isiru
mill-awdituri indipendenti maħtura mis-Segretarjat tal-Forum
tal-Gżejjer tal-Paċifiku. Il-proċessi li jwasslu
għall-elezzjonijiet, u t-twettiq tal-istess elezzjonijiet, għandhom
ikunu, b'mod konġunt, sorveljati, adattati u riveduti kif xieraq fuq
il-bażi ta' parametri maqbula b'mod konġunt. Dan jimplika b'mod
partikulari: –
sat-30 ta' Ġunju 2007 l-Gvern Interim se
jadotta skeda li tistabbilixxi dati għat-tlestija ta' diversi passi li
jridu jittieħdu fir-rigward tat-tħejjija tal-elezzjonijiet
parlamentari l-ġodda, –
l-iskeda tispeċifika ż-żmien ta’
ċensiment, l-abbozz mill-ġdid tal-konfini u r-riforma elettorali, –
Id-deċiżjoni dwar il-konfini u r-riforma
elettorali se tittieħed b'konformità mal-Kostituzzjoni, –
se jittieħdu miżuri sabiex jiġi
assigurat il-funzjonament tal-Uffiċċju Elettorali, inkluż
il-ħatra ta' Kontrollur tal-Elezzjonijiet sat-30 ta' Settembru 2007
b'konformità mal-Kostituzzjoni, –
il-ħatra tal-Viċi-President ser issir
b'konformità mal-Kostituzzjoni. Impenn Nru 2 Li l-Gvern Interim, meta jadotta inizjattivi u
bidliet serji ta’ politika leġiżlattiva, fiskali u oħrajn,
għandu jikkunsidra konsultazzjonijiet mas-soċjetà ċivili u
l-partijiet interessati relevanti l-oħra. B. L-Istat tad-Dritt Impenn Nru 1 Li l-Gvern Interim għandu jagħmel
l-akbar sforzi sabiex ma jħallix li jsiru dikjarazzjonijiet minn
aġenziji ta' sigurtà maħsuba biex jintimidaw. Impenn Nru 2 Li l-Gvern Interim iħares
il-Kostituzzjoni tal-1997, u jiggarantixxi l-ħidma normali u indipendenti
tal-istituzzjonijiet kostituzzjonali bħall-Kummissjoni tal-Fiġi
għad-Drittijiet tal-Bniedem, il-Kummissjoni għas-Servizz Pubbliku, u
l-Kummissjoni tal-Uffiċċji Kostituzzjonali. L-indipendenza
sostanzjali u l-ħidma tal-Kunsill il-Kbir tal-Kapijiet ikunu ppreservati. Impenn
Nru 3 Li l-indipendenza tal-ġudikatura tkun
rispettata bis-sħiħ, li titħalla taħdem liberament u li
d-deċiżjonijiet tagħha jkunu rispettati mill-partijiet kollha
kkonċernati, b’mod partikulari: –
li l-Gvern Interim jimpenja ruħu li
jaħtar it-tribunal skont is-Sezzjoni 138(3) tal-Kostituzzjoni sal-15 ta'
Lulju 2007, –
li kwalunkwe ħatra u/jew tneħħija
ta’ imħallef għandha għalhekk issir b'konformità stretta
mal-proviżjonijiet kostituzzjonali u r-regoli tal-proċedura, –
li ma jkun hemm l-ebda każ ta’ interferenza,
fi kwalunkwe forma, mill-forzi miltari u l-pulizija jew mill-Gvern Interim
fil-proċess ġudizzjarju, inkluż rispett sħiħ
għall-professjoni legali. Impenn Nru 4 Li l-proċeduri kriminali kollha marbuta mal-korruzzjoni
jkunu indirizzati permezz tal-mezzi ġudizzjarji xierqa u li kwalunkwe
korpi oħrajn li jistgħu jitwaqqfu sabiex jinvestigaw każijiet
allegati ta' korruzzjoni joperaw fil-limiti kostituzzjonali. C. Drittijiet tal-Bniedem u
Libertajiet Fundamentali Impenn Nru 1 Il-Gvern Interim jieħu l-passi kollha
meħtieġa sabiex jiffaċilita l-investigazzjoni jew l-indirizzar
tal-allegazzjonijiet kollha ta’ ksur tad-drittijiet tal-bniedem skont
il-proċeduri u l-fora varji taħt il-liġijiet tal-Fiġi. Impenn Nru 2 Il-Gvern Interim biħsiebu
jneħħi r-Regolamenti ta’ Emerġenza Pubblika f'Mejju 2007,
soġġett għal kwalunkwe theddidiet għas-sigurtà nazzjonali,
l-ordni pubbliku jew is-sikurezza. Impenn Nru 3 Il-Gvern Interim hu impenjat li jiżgura
li l-Kummissjoni ta’ Drittijiet tal-Bniedem fil-Fiġi taħdem
b’indipendenza sħiħa u skont il-Kostituzzjoni. Impenn Nru 4 Li l-libertà tal-espressjoni u l-libertà
tal-midja, fil-forom kollha tagħha jkunu rispettati b'mod sħiħ
kif previst fil-Kostituzzjoni. D. Is-segwitu tal-Impenji Impenn Nru 1 Li l-Gvern Interim jimpenja ruħu li
jżomm djalogu regolari biex tkun tista' ssir verifika tal-progress li sar
u jagħti lill-awtoritajiet/rappreżentanti tal-UE u l-Kummissjoni
Ewropea aċċess sħiħ għall-informazzjoni dwar
il-kwistjonijiet kollha relatati mad-drittijiet tal-bniedem, ir-restorazzjoni
paċifika tad-demokrazija u tal-istat tad-dritt fil-Fiġi. Impenn Nru 2 Li l-Gvern Interim jikkoopera
bis-sħiħ ma’ kwalunkwe missjoni mill-UE biex jiġi evalwat u
sorveljat il-progress. Impenn Nru 3 Li mit-30 ta' Ġunju 2007, il-Gvern
Interim jibda jibgħat kull tliet xhur rapporti dwar il-progress li sar
fir-rigward tal-elementi essenzjali tal-Ftehim ta' Cotonou u dwar l-impenji. Hu nnutat li ċerti kwistjonijiet
jistgħu jiġu indirizzati b'mod effettiv biss permezz ta’
approċċ pragmatiku li jagħraf ir-realtajiet tal-preżent u
li jiffoka fuq il-futur. [1] ĠU L 317, 15.12.2000, p. 3. [2] ĠU L 287, 4.11.2010, p. 3. [3] ĠU L 317, 15.12.2000,
p. 376. [4] ĠU L 378, 27.12.2006, p. 41-71 [5] ĠU L 260, 05.10.2007, p. 15. [6] ĠU L 262, 06.10.2009, p. 43. [7] ĠU L 89, 9.4.2010, p. 7. [8] ĠU L 260, 2.10.2010, p.10-15. [9] ĠU L 93, 7.4.2011, p.2-8. [10] ĠU L 252, 28.9.2011, p. 1-7.