52012DC0660

RAPPORT TAL-KUMMISSJONI LILL-PARLAMENT EWROPEW U LILL-KUNSILL

Rapport li jivvaluta l-implimentazzjoni u l-impatt tal-miżuri meħuda skont id-Direttiva 2009/16/KE dwar il-Kontroll tal-Istat tal-Port

(Test b'rilevanza għaż-ŻEE)

1.           DAĦLA

Wieħed mill-aktar elementi importanti tas-sikurezza marittima huwa l-Kontroll tal-Istat tal-Port (Port State Control - PSC) li jista' jiġi ddefinit bħala l-ispezzjoni ta' vapuri barranin f'portijiet nazzjonali oħra sabiex jiġi vverifikat li l-kompetenza tal-kaptan u l-uffiċjali abbord, il-kundizzjoni tal-vapur u t-tagħmir tiegħu jikkonformaw mar-rekwiżiti tal-Konvenzjonijiet internazzjonali u li l-bastiment huwa mmaniġġat u mħaddem skont il-liġi internazzjonali applikabbli.

Ir-reġim tal-PSC tal-UE huwa bbażat fuq id-Direttiva 2009/16/KE[1], li fasslet mill-ġdid u rinfurzat il-leġiżlazzjoni preċedenti f’dan il-qasam li ġie introdott fl-1995. Ir-reġim tal-UE huwa bbażat fuq l-istruttura li kienet teżisti qabel tal-Memorandum ta' Qbil ta' Pariġi dwar il-Kontroll tal-Istat tal-Port (PMoU). L-Istati Membri kostali kollha tal-UE kif ukoll il-Kanada, ir-Russja, il-Kroazja, l-Islanda u n-Norveġja huma membri tal-PMoU. Il-Kummissjoni u l-Aġenzija Ewropea għas-Sigurtà Marittima (EMSA) jaħdmu mill-qrib mal-PMoU.

Id-Direttiva 2009/16/KE introduċiet reġim ġdid ta' spezzjoni (New Inspection Regime - NIR) għall-PSC mill-1 ta' Jannar 2011. Minbarra l-azzjonijiet meħuda mill-Istati Membri, id-Direttiva ġiet implimentata fil-livell tal-UE permezz tat-twaqqif ta' sistema għar-rapportar tar-riżultati ta' spezzjonijiet tal-PSC (il-bażi tad-dejta THETIS). Is-sistema THETIS ġiet żviluppata mill-Kummissjoni b'kooperazzjoni mill-qrib mal-EMSA, l-EMSA tħaddem is-sistema THETIS f’isem il-Kummissjoni.

Id-Direttiva 2009/16/KE tipprovdi għal bosta rekwiżiti ġodda fil-qasam tal-PSC kif ukoll għal kriterji komuni u proċeduri armonizzati għall-kontroll tal-vapuri u timmira għall-ispezzjoni tal-vapuri kollha, skont il-profil ta' riskju tagħhom, sabiex il-vapuri li jirrappreżentaw riskju akbar jiġu spezzjonati aktar ta' spiss.

Fl-Artikolu 35 huwa previst li l-Kummissjoni għandha tirrapporta lill-Parlament Ewropew u lill-Kunsill sat-30 ta’ Ġunju 2012, dwar l-implimentazzjoni tad-Direttiva u b'mod partikolari dwar l-issodisfar tal-impenn ġenerali ta' spezzjoni tal-Komunità u l-impenn min-naħa ta' kull Stat Membru (l-Artikoli 5, 6, 7 u 8). L-Artikolu 35 jesiġi wkoll li l-Kummissjoni tirrapporta dwar l-għadd ta' spetturi tal-PSC f'kull Stat Membru, l-għadd ta' spezzjonijiet imwettqa u jekk jitqies bħala neċessarju, min-naħa tal-Kummissjoni, li tipproponi Direttiva ta' emendar jew leġiżlazzjoni ulterjuri f'dan il-qasam.

2.           Metodu ta' evalwazzjoni

L-implimentazzjoni tad-Direttiva mill-Istati Membri tikkonsisti f’implimentazzjoni legali, operazzjonali u teknika.

· L-implimentazzjoni legali tinkiseb permezz tat-traspożizzjoni formali tad-Direttiva u tal-infurzar tal-leġiżlazzjoni nazzjonali li tirriżulta.

· L-implimentazzjoni operazzjonali tintlaħaq billi jiġi żgurat li l-vapuri kollha li jżuru l-portijiet u l-ankraġġi fi ħdan l-UE jkunu spezzjonati regolarment u billi jiġu segwiti l-proċeduri u r-rekwiżiti tad-Direttiva.

· L-implimentazzjoni teknika tinvolvi t-twaqqif u tħaddim tal-bażi tad-dejta THETIS u l-infrastruttura tal-kompjuter meħtieġa għar-reġistrazzjoni tal-informazzjoni dwar iż-żjarat tal-vapuri[2] meħtieġa mill-Artikolu 24 tad-Direttiva.

Biex tabbozza dan ir-rapport, il-Kummissjoni talbet lill-Istati Membri biex jipprovdu informazzjoni dwar it-traspożizzjoni u l-implimentazzjoni tad-Direttiva. Barra minn hekk, il-Kummissjoni nkarigat l-EMSA biex twettaq sensiela ta’ spezzjonijiet fl-Istati Membri sabiex jgħinuha fil-valutazzjoni tal-implimentazzjoni tad-Direttiva.

3.           Tibdiliet introdotti permezz tad-Direttiva 2009/16/KE.

Id-Direttiva 2009/16/KE introduċiet it-tibdiliet ewlenin li ġejjin fir-reġim tal-PSC tal-UE:

3.1.        Kopertura sħiħa ta’ spezzjoni

Id-Direttiva 2009/16/KE tistipula li huma spezzjonati l-bastimenti kollha li jikkwalifikaw li jżuru l-portijiet tal-UE, dan jitbiegħed mir-rekwiżit preċedenti (skont id-Direttiva 95/21/KE kif emendata) li kien jesiġi li l-awtoritajiet nazzjonali tal-PSC jispezzjonaw 25 % tal-vapuri individwali li jżuru l-portijiet tagħhom. Taħt l-NIR, l-immirar isir permezz ta' skema elaborata tal-Profili tar-Riskju ta’ Vapuri individwali (Ship Risk Profiles - SRPs). Kull vapur huwa deżinjat bħala ta' “riskju għoli”, “riskju baxx” jew “riskju standard”.

Il-frekwenza tal-ispezzjoni tiddependi fuq l-SRP:

· għandhom jitwettqu spezzjonijiet perjodiċi fuq vapuri ta' “riskju għoli” kull 5-6 xhur,

· għandhom jitwettqu spezzjonijiet perjodiċi fuq vapuri ta' “standard riskju” kull 10-12 xhur/-il xahar u

· għandhom jitwettqu spezzjonijiet perjodiċi fuq vapuri ta' "riskju baxx" kull 24-36 xahar.

Meta vapur partikolari isir eliġibbli għal spezzjoni (pereżempju fil-każ ta' vapuri ta' riskju standard, 10 xhur wara l-aħħar spezzjoni) skont il-frekwenzi stabbiliti hawn fuq, il-vapur jiġi deżinjat bi status ta' Prijorità II u jista' jiġi spezzjonat. Meta l-limitu ta' żmien ibbażat fuq l-SRP jiskadi (fil-każ ta' vapuri ta' "riskju standard", 12-il xahar wara l-aħħar spezzjoni), dan isir vapur ta’ Prijorità I u għandu jiġi spezzjonat.

L-SRP huwa stabbilit billi jitqiesu 7 kriterji, dawn huma (i) it-tip ta’ vapur, (ii) l-età tal-vapur, (iii) il-bandiera (Lista Sewda, Griża jew Bajda kif iddefiniti fil-PMoU) (iv) l-organizzazzjoni rikonoxxuta, (v) il-prestazzjoni tal-kumpanija, (vi) l-għadd ta' nuqqasijiet irreġistrati waqt kull spezzjoni li tinvolvi l-vapur fis-36 xahar preċedenti u (vii) l-għadd ta’ detenzjonijiet fis-36 xahar preċedenti.

Ikunu jistgħu jitwettqu tliet tipi ta' spezzjoni, "inizjali", “aktar dettaljata" jew "estiża". Bħala regola, vapuri b’riskju għoli jgħaddu minn spezzjoni estiża filwaqt li vapuri ta' riskju standard u riskju baxx jgħaddu minn spezzjoni inizjali jew aktar dettaljata.

3.2.        Prestazzjoni tal-Istat tal-Bandiera

Wieħed mill-kriterji li jiddetermina l-SRP ta' bastiment huwa l-prestazzjoni tal-Istat tal-Bandiera. Ir-Regolament tal-Kummissjoni (UE) Nru 801/2010[3] tat-13 ta’ Settembru 2010 jimplimenta l-Artikolu 10(3) tad-Direttiva 2009/16/KE fir-rigward tal-kriterji tal-Istat tal-bandiera. Taħt din is-sistema, l-Istati tal-bandiera jiġu kklassifikati f’listi suwed, griżi jew bojod, abbażi tal-ispezzjonijiet u detenzjonijiet totali ta' vapuri li jtajru l-bandiera tagħhom u li joperaw fir-reġjun tal-PMoU fuq perjodu ta’ tliet snin. Il-klassifikazzjoni hija aġġornata kull sena.

3.3.        Prestazzjoni tal-Kumpanija

Il-parametru tal-prestazzjoni tal-kumpanija (li ma ġietx ikkunsidrata taħt ir-reġim ta’ spezzjoni preċedenti) huwa bbażat fuq l-għadd ta' spezzjonijiet, detenzjonijiet u nuqqasijiet irreġistrati kontra vapuri li jappartjenu lill-istess kumpanija [responsabbli għall-Ġestjoni Internazzjonali tas-Sikurezza (International Safety Management - ISM) tal-vapur]. Il-kumpaniji jistgħu jiġu kklassifikati bħala: “Għolja”, “Medja”, “Baxxa” u “Baxxa ħafna”. Ir-Regolament tal-Kummissjoni (UE) Nru 802/2010[4] tat-13 ta' Settembru 2010 ġie adottat sabiex jistabbilixxi l-kriterji li bihom hija stabblita l-prestazzjoni tal-kumpanija. L-effettività operazzjonali ta' dan ir-Regolament fil-preżent qiegħda tiġi vvalutata.

3.4.        Informazzjoni dwar il-ħinijiet attwali tal-wasla u tat-tluq ta’ vapuri li jżuru l-portijiet u l-ankraġġi tagħhom

Id-Direttiva tipprovdi li l-bażi tad-dejta THETIS tirċievi informazzjoni dwar iż-żjarat ta' vapuri mis-sistema SafeSeaNet li tippermetti l-ippjanar u l-ipprogrammar ta’ spezzjonijiet tal-PSC. Din il-karatteristika ma ġietx ipprovduta mill-bażi tad-dejta preċedenti tal-ispezzjonijiet (SIRENAC). SafeSeaNet ġiet stabbilita[5] bħala pjattaforma Ewropea ċentralizzata għal skambju ta' dejta marittima li permezz tagħha l-Istati Membri tal-UE, in-Norveġja u l-Islanda, ikunu jistgħu jipprovdu u jirċievu l-informazzjoni dwar il-vapuri, iċ-ċaqliq tal-vapuri, u l-merkanziji perikolużi.

L-importanza ta' din il-karatteristika għar-reġim ġdid tal-PSC hija kritika peress li l-ippjanar għall-impenn ta' spezzjoni tagħhom u l-konformità miegħu mill-Istati Membri huma bbażati fuq għarfien immedjat u komplet tal-informazzjoni tal-SRP ta’ vapuri li jżuru l-portijiet tagħhom.

3.5.        Spezzjonijiet fuq ankraġġi

Element ieħor ġdid introdott permezz tad-Direttiva 2009/16/KE huwa li l-vapuri jistgħu jiġu spezzjonati f'ankraġġ fejn isseħħ "interfaċċja vapur/port". Dan jesiġi arranġamenti u riżorsi addizzjonali għall-ispezzjoni.

3.6.        Ċaħda ta' aċċess

Skont id-Direttiva 2009/16/KE ir-regola taċ-ċaħda ta’ aċċess (projbizzjoni) għal detenzjonijiet multipli ġiet imwessa' biex tinkludi l-Istati tal-bandiera fil-lista griża u t-tipi ta' vapuri kollha. L-NIR jipprovdi li jekk vapur "fil-lista s-sewda" li jtajjar bandiera ikun ġie miżmum għal aktar minn darbtejn fis-36 xahar preċedenti, dan se jkun ipprojbit. Fil-każ ta’ vapur "fil-lista l-griża" li jtajjar bandiera, jekk ikollu aktar minn żewġ detenzjonijiet fl-24 xahar preċedenti dan se jwassal biex ikun ipprojbit ukoll. Taħt l-arranġamenti ġodda tal-PSC, huma introdotti termini minimi ta' projbizzjoni: 3 xhur għall-ewwel projbizzjoni, 12-il xahar għat-tieni projbizzjoni u 24 xhar għat-tielet projbizzjoni. It-tielet projbizzjoni tista' titneħħa biss jekk ikun hemm konformità ma' ċerti kondizzjonijiet u l-ispezzjoni mill-ġdid titwettaq waqt il-perjodu ta' projbizzjoni ta' 24 xahar. Kwalunkwe detenzjoni wara t-tielet projbizzjoni twassal biex il-vapur ikun ipprojbit b'mod permanenti minn kwalunkwe port fi ħdan l-UE.

4.           IMPLIMENTAZZJONI TAD-DIRETTIVA

4.1.        Implimentazzjoni legali - Traspożizzjoni fil-leġiżlazzjoni nazzjonali

Id-Direttiva 2009/16 daħlet fis-seħħ fis-17 ta' Ġunju 2009; L-Istati Membri kellhom jittrasponu d-Direttiva fil-leġiżlazzjoni nazzjonali tagħhom sal-1 ta’ Jannar 2011.

Stati Membri mhux kostali ma kinux obbligati li jittrasponu d-Direttiva. Is-Slovakkja biss implimentat id-Direttiva[6], erba’ Stati Membri (l-Ungerija, il-Lussemburgu, l-Awstrija u r-Repubblika Ċeka) ddikjaraw formalment li ma kinux se jittrasponuha.

Fost it-23 Stat Membru, madwar nofshom biss innotifikaw il-miżuri ta' traspożizzjoni kollha tagħhom, bejn wieħed u ieħor, fil-ħin – jiġifieri fi żmien 3 xhur mid-data tal-iskadenza tat-traspożizzjoni. Ir-riżultat kien li l-NIR ma setgħax jipproduċi l-effetti sħaħ tiegħu mill-1 ta’ Jannar 2011. Il-Kummissjoni fetħet proċeduri ta' ksur kontra l-Istati Membri kollha li ma kinux ikkonformaw mal-iskadenza tat-traspożizzjoni u issa kważi nkisbet it-traspożizzjoni sħiħa.

Is-servizzi tal-Kummissjoni bħalissa qed janalizzaw il-miżuri nnotifikati għall-konformità mal-liġi tal-UE. Barra minn hekk, l-EMSA bdiet twettaq aktar żjarat fl-Istati Membri biex tivverifika l-implimentazzjoni (madwar 5 żjarat fis-sena).

4.2.        Miżuri ta' traspożizzjoni, leġiżlazzjoni tal-UE

Minbarra r-Regolamenti tal-Kummissjoni[7] adottati fir-rigward tal-prestazzjoni tal-Istat tal-bandiera u l-kriterji tal-prestazzjoni tal-kumpaniji tal-Profil tar-Riskju ta’ Vapur, ġie adottat wkoll ir-Regolament tal-Kummissjoni (UE) Nru 428/2010[8] tal-20 ta’ Mejju 2010 li jimplimenta l-Artikolu 14 tad-Direttiva 2009/16/KE dwar l-elementi li għandhom jiġu vverifikati waqt spezzjoni estiża.

4.3.        Implimentazzjoni operazzjonali

L-NIR għandu l-għan li jelimina t-tbaħħir substandard billi tiżdied il-frekwenza tal-ispezzjoni ta’ vapuri substandard, filwaqt li jnaqqas il-frekwenza tal-ispezzjoni ta' vapuri ta' kwalità. Dan jesiġi sistema ta' appoġġ informattiv (THETIS) li mhux biss tiġbor u xxerred dejta relatata nal-PSC iżda tinkludi wkoll il-kapaċità li tikkalkula l-kriterji meħtieġa biex jiggwidaw l-immirar tal-PSC fl-Istati Membri minn tali dejta. Is-sistema SafeSeaNet tipprovdi lil THETIS bl-informazzjoni kollha tal-wasla u tat-tluq tal-vapuri fil-portijiet tal-UE u l-ankraġġi.

4.4.        Implimentazzjoni teknika

Qabel l-1 ta' Jannar 2011, l-EMSA organizzat kampanja ta' sensibilizzazzjoni biex tiżdied il-familjarità mal-obbligi l-ġodda tar-rapportar fi ħdan l-Istati Membri u fl-industrija.

Interfaċċja teknika bejn iż-żewġ sistemi (THETIS u SafeSeaNet), li ppermettiet r-reġistrazzjoni ta' informazzjoni dwar iż-żjarat tal-vapuri f'THETIS, kienet fis-seħħ sa Novembru 2010. THETIS kienet operazzjonali bis-sħiħ fil-15 ta’ Diċembru 2010. Qabel din id-data, l-EMSA pprovdiet taħriġ għall-utenti THETIS.

Wara l-bidu tal-operazzjonijiet THETIS (l-1 ta' Jannar 2011), ġie stabbilit helpdesk u minn dakinhar dan qiegħed jipprovdi appoġġ u assistenza teknika għall-utenti THETIS. Fl-2011, waslu total ta' 2331 talba b'ħin medju biex tiġi indirizzata talba ta’ 1.3 sigħat.

Waqt l-ewwel trimestru tal-2011, il-biċċa l-kbira tal-Istati Membri lestew l-implimentazzjoni nazzjonali tagħhom tas-sistemi ta' żjarat fil-portijiet. Sabiex tivvaluta l-kompletezza tal-informazzjoni dwar iż-żjarat tal-vapuri irreġistrata f'THETIS fl-2011, l-EMSA wettqet eżerċizzju ta' tqabbil taż-żjarat tal-vapuri fejn ġew imqabbla l-għadd ta' żjarat irreġistrati f'THETIS, fis-SafeSeaNet u fil-Lloyd’s List Intelligence (fornitur ta' servizz kummerċjali). Ġew innutati s-sejbiet li ġejjin:

· Il-biċċa l-kbira tal-Istati Membri lestew l-implimentazzjoni nazzjonali tagħhom tal-interfaċċja THETIS - SafeSeaNet waqt l-ewwel trimestru tal-2011. Għalhekk minn April 2011 'il quddiem, ġiet innutata prestazzjoni aktar konsistenti dwar it-trasferiment ta' informazzjoni lil THETIS mis-SafeSeaNet għall-biċċa l-kbira tal-Istati Membri;

· Il-Finlandja lestiet l-implimentazzjoni nazzjonali tal-interfaċċja THETIS-SafeSeaNet f'nofs Ġunju tal-2011;

· Sa tmiem l-2011, ir-Renju Unit kienu għadu ma lestiex l-implimentazzjoni nazzjonali tiegħu tal-interfaċċja THETIS – SafeSeaNet. Konsegwentement, l-informazzjoni tar-Renju Unit dwar iż-żjarat tal-vapuri li hemm f'THETIS għall-2011 hija limitata biss għal entrati li ddaħħlu manwalment u ma tirriflettix is-sitwazzjoni reali.

5.           KWISTJONIJIET PRINĊIPALI FL-IMPLIMENTAZZJONI TAD-DIRETTIVA

Dan ir-rapport janalizza u jivvaluta l-kwistjonijiet li ġejjin f'iktar dettall.

5.1.        L-impenn kumplessiv ta' spezzjoni mill-UE

Skont l-Artikolu 5 tad-Direttiva 2009/16/KE, kull Stat Membru għandu jikkonforma mal-impenn annwali ta’ spezzjoni billi:

(a) jispezzjona l-vapuri kollha ta’ Prijorità I li jżuru l-portijiet u l-ankraġġi tiegħu, kif ukoll

(b) iwettaq għadd ta' spezzjonijiet (Prijorità I u Prijorità II) kull sena, li jikkorrispondu mill-inqas għas-sehem tiegħu tal-għadd totali ta’ spezzjonijiet li għandhom jitwettqu annwalment fi ħdan l-UE u r-reġjun tal-PMoU.

L-għadd ta' spezzjonijiet li għandhom jitwettqu minn awtoritajiet nazzjonali (is-sehem ġust) jinkiseb skont il-mekkaniżmu interim stabbilit mill-PMoU. Mill-1 ta’ Jannar 2014 din l-informazzjoni se tkun kompletament bbażata fuq l-informazzjoni fil-bażi tad-dejta THETIS. It-Tabella 1 fl-Anness tippreżenta s-sehem ta’ spezzjoni ta’ kull Stat tal-PMoU għall-2011.

Abbażi tal-informazzjoni li tinsab fil-bażi tad-dejta THETIS il-Kummissjoni tista’ tikkonkludi li kumplessivament intlaħaq l-impenn ta’ spezzjoni.

5.2.        Il-konformità ta' Stat Membru mal-impenn annwali ta’ spezzjoni u analiżi tal-implimentazzjoni tal-Artikoli 6, 7 u 8 tad-Direttiva 2009/16/KE

Filwaqt li l-Artikolu 5 tad-Direttiva 2009/16/KE jistipula l-impenn ta’ spezzjoni, l-Artikoli 6, 7 u 8 jipprovdu għal modalitajiet ta' konformità għall-Istati Membri.

5.2.1      Impenn ta' spezzjoni u spezzjonijiet ta' Prijorità I maqbuża(Artikolu 6)

L-Artikolu 6 tad-Direttiva fih dispożizzjonijiet applikabbli għall-Istati Membri li jonqsu milli jwettqu l-ispezzjonijiet meħtieġa mill-Artikolu 5(2)(a) (l-ispezzjoni tal-vapuri kollha ta' Prijorità I li jżuru l-portijiet u l-ankraġġi tagħhom). Stat Membru f'din is-sitwazzjoni jikkonforma mal-impenn tiegħu sakemm tali spezzjonijiet maqbuża ma jissuperawx:

(a) 5 % tal-għadd totali ta' spezzjonijiet ta' Vapuri ta' Riskju Għoli (High Risk Ships - HRS) ta' Prijorità I u

(b) 10 % għal vapuri oħra ta' Prijorità I li jżuru l-portijiet u l-ankraġġi.

Fl-2011, 12-il[9] Stat Membru (minn 22) tal-UE[10] kienu f'din is-sitwazzjoni. It-Tabella 2 tippreżenta l-impenn u l-għadd ta' spezzjonijiet imwettqa mill-Istati Membri li għalihom japplika l-Artikolu 6.

Bħala osservazzjoni preliminari l-Kummissjoni tinnota li filwaqt li ntlaħaq l-impenn kumplessiv ta' spezzjoni, jidher li jeżistu għadd ta' problemi ta' implimentazzjoni f’xi Stati Membri li jeħtieġu li jiġu indirizzati. L-għadd ta’ spezzjonijiet ta’ Prijorità I maqbuża f'xi Stati Membri jagħti lok għal tħassib partikolari.

5.2.2      L-għadd Totali ta' żjarat ta' Prijorità I jaqbeż is-sehem ta' spezzjoni tal-Istat Membru (Artikolu 7.1)

L-Artikolu 7(1) tad-Direttiva jikkonċerna l-hekk imsejħa Stati Membri “mgħobbija żżejjed”, fejn l-għadd ta' żjarat ta' Prijorità I jaqbeż is-sehem ta’ spezzjoni. Fl-2011, 5[11] Stati Membri tal-UE kienu f'din is-sitwazzjoni. F’dan il-każ, fl-Artikolu huwa previst li Stat Membru jitqies bħala konformi mal-impenn tiegħu jekk:

(a) l-għadd ta' spezzjonijiet ta' Prijorità I imwettqa minn dak l-Istat Membru jikkorrispondi mill-inqas għas-sehem ta’ spezzjoni, u;

(b) l-Istat Membru ma jaqbiżx aktar minn 30 % tal-għadd totali ta’ vapuri ta’ Prijorità I li jżuru l-portijiet u l-ankraġġi tiegħu.

It-Tabella 3 tippreżenta l-impenn u l-għadd ta' spezzjonijiet imwettqa minn dawn l-Istati Membri "mgħobbija żżejjed". F'dan ir-rigward il-Kummissjoni tinnota mill-ġdid l-għadd ta' spezzjonijiet ta' Prijorità I maqbuża.

5.2.3      L-għadd totali ta' żjarat ta’ Prijorità I u ta’ Prijorità II huwa inqas mis-sehem ta' spezzjoni tal-Istat Membru (Artikolu 7.2)

L-Artikolu 7(2) jikkonċerna l-hekk imsejħa Stati Membri "mhux mgħobbija biżżejjed", fejn l-għadd totali ta' żjarat ta' Prijorità I u Prijorità II huwa inqas mis-sehem ta’ spezzjoni. Fl-2011, 5[12] Stati Membri tal-UE kienu f'din is-sitwazzjoni. F'dan il-każ l-Istat Membru għandu jitqies bħala konformi mal-impenn tiegħu meta:

(a) jispezzjona l-vapuri kollha ta’ Prijorità I, u

(b) jispezzjona mill-inqas 85 % tal-vapuri ta' Prijorità II.

It-Tabella 4 tippreżenta l-impenn u l-għadd ta' spezzjonijiet imwettqa minn dawn l-Istati Membri "mhux mgħobbija biżżejjed". F'dan ir-rigward il-Kummissjoni tinnota li dawn l-Istati Membri wettqu l-impenn meħtieġ ta' spezzjonijiet ta' Prijorità I u li kważi kollha wettqu l-għadd meħtieġ ta' spezzjonijiet ta' Prijorità II.

Fir-rigward tal-ispezzjonijiet ta' Prijorità I maqbuża identifikati hawn fuq, il-Kummissjoni/l-EMSA se jaħdmu mal-Istati Membri kkonċernati biex janalizzaw ir-raġunijiet għal dawn il-problemi billi jitqies l-addattament għall-NIR. Kull Stat Membru irid iwettaq l-għadd ta’ spezzjonijiet assenjati lilu, inkella jkun mhedded il-prinċipju ta' sehem ġust.

5.2.4      Posponiment ta’ spezzjonijiet u cirkostanzi eċċezzjonali (Artikolu 8)

Fl-Artikolu 8(1) huwa previst li l-Istati Membri jitħallew jipposponu t-twettiq ta' spezzjoni ta' Prijorità I jew sal-wasla li jmiss tal-vapur fl-istess Stat Membru (sakemm iż-żjara tkun fi żmien 15-il jum u dak il-vapur ma jżurx kwalunkwe port ieħor fl-UE) jew sa port ieħor tal-UE (sakemm iż-żjara tkun fi żmien 15-il jum, u dak l-Istat fejn jinsab il-port li jmiss ikun aċċetta li jwettaq l-ispezzjoni).

Fl-2011, 190 talba bħal din ġew irreġistrati f'THETIS minn 18-il Stat Membru. 153 (80.5 %) minn fost dawn it-talbiet kienu aċċettati mill-Istati Membri riċeventi u tlestiet l-ispezzjoni.

Barra minn hekk, fl-Artikolu 8(2) huma previsti ċirkostanzi eċċezzjonali fejn spezzjonijiet ta' Prijorità I maqbuża jistgħu jkunu ġġustifikati. Dawn iċ-ċirkostanzi jseħħu meta, fil-fehma tal-awtorita kompetenti, it-twettiq tal-ispezzjoni tista' toħloq riskju għas-sikurezza tal-ispetturi, tal-vapur, tal-ekwipaġġ, tal-port u l-ambjent tal-baħar, u meta ż-żjara tal-vapur issir biss matul il-lejl.

Mill-1614-il spezzjoni ta' Prijorità I maqbuża ġġustifikati rreġistrati f'THETIS fl-2011 mill-Istati Membri tal-PMoU, 121 (7.5 %) kienu attribwiti għar-riskju, 582 (36 %) kienu relatati ma' żjarat tal-vapuri bil-lejl, 799 (49,5 %) kienu attribwiti għal żjarat ta' żmien qasir f'ankraġġ u 112 (7.0 %) minħabba “inkorrettezza teknika ”. L-"inkorrettezza teknika" ġiet introdotta fil-fażi inizjali tat-tħaddim tat-THETIS għal problemi relatati mal-introduzzjoni gradwali tas-sistema u/jew raġunijiet oħra mhux stabbiliti. Din l-opzjoni ma teżistix iżjed.

5.3.        L-għadd u t-tip ta' spezzjonijiet li għandhom jitwettqu

It-Tabella 5 tipprovdi rappreżentazzjoni grafika tax-xejriet fuq it-tipi ta' spezzjonijiet (Inizjali – Aktar Dettaljata – Estiża) fir-reġjun tal-PMoU tul il-perjodu 2009-2011. L-għadd ogħla ta' spezzjonijiet estiżi jissuġġerixxi li taħt l-NIR jitwettqu kontrolli aktar fil-fond.   

5.4.        L-għadd ta' Spetturi tal-PSC f'kull Stat Membru

L-Artikolu 4 tad-Direttiva jesiġi li l-Istati Membri ikollhom awtoritajiet kompetenti xierqa bl-għadd meħtieġ ta’ spetturi kkwalifikati għall-ispezzjoni ta' vapuri. It-Tabella 6 turi l-għadd ta' spetturi tal-PSC f'kull Stat Membru. Iċ-ċifri jvarjaw bejn l-Istati Membri billi mhux kollha huma karigi bl-ekwivalenti ta' waħda full time. Il-Kummissjoni tinnota li, b'mod ġenerali, l-Istati Membri għandhom għadd xieraq ta’ spetturi biex iwettqu l-ispezzjonijiet meħtieġa.

5.5.        Ċaħda ta' aċċess

Matul l-2011, 18-il ordni ta' ċaħda ta' aċċess kienu imposti mill-Istati Membri tal-UE. Minn 18, 16 kienu imposti għal detenzjonijiet multipli, 1 għal nuqqas ta' żjara fit-tarzni indikati għat-tiswija, u 1 minħabba detenzjoni mhux rispettata[13].

5.6.        Spezzjonijiet fl-ankraġġi

Fid-Direttiva 2009/16/KE huwa previst li vapur jista' jiġi spezzjonat f'ankraġġ fi ħdan il-ġurisdizzjoni tal-port. It-Tabella 7 fl-Anness tipprovdi informazzjoni rigward l-implimentazzjoni ta' dan ir-rekwiżit fl-2011. Ta' tħassib partikolari f'ċerti Stati huwa l-livell għoli ta' spezzjonijiet ta' Prijorità I maqbuża fl-ankraġġi. Din il-kwistjoni trid tiġi ċċarata mal-Istati Membri.

5.7.        Problemi/kwistjonijiet li tqajmu mill-Istati Membri

Bħala parti mill-evalwazzjoni tagħha, il-Kummissjoni bagħtet kwestjonarju lill-Istati Membri fejn stiednet lill-awtoritajiet nazzjonali biex jindikaw nuqqasijiet jew titjib possibbli fid-Direttiva. Bosti Stati Membri użaw din il-possibbiltà.

Il-punti ewlenin li tqajmu kienu:

· Id-Direttiva tippermetti li spezzjonijiet ta' Prijorità I ikunu posposti f'ċirkostanzi eċċezzjonali; din il-possibilità ma teżistix għal spezzjonijiet ta' Prijorità II li mhumiex obbligatorji. Madankollu jekk Stat Membru "mhuwiex mgħobbi biżżejjed" fis-sens tal-Artikolu 7(2) tad-Direttiva jkollu (fil-fatt) jittratta spezzjonijiet ta' Prijorità II bħala obbligatorji. Bosta Stati Membri qed jitolbu li l-possibbiltà li jiġu posposti l-ispezzjonijiet tkun applikata wkoll għall-ispezzjonijiet "obbligatorji" ta' Prijorità II.

· L-Artikolu 8(3)(b) jippermetti li tinqabeż spezzjoni f'ankraġġ jekk iż-żjara tal-vapur hija "qasira wisq". L-Istati Membri talbu li din il-possibbiltà tiġi estiża għall-portijiet.

· L-Artikolu 15 tad-Direttiva 2002/59/KE jippermetti lill-Istati Membri li jeżentaw servizzi skedati li jsiru bejn portijiet li jinsabu fit-territorju tagħhom mir-rekwiżit li jinnotifikaw l-oġġetti perikolużi jew li jniġġsu li jinġarru abbord, l-Istati Membri ssuġġerew li din l-eżenzjoni tkun estiża għall-PSC.

· L-Istati Membri indikaw li r-rekwiżiti tad-Direttivi 2002/59/KE u 2009/20/KE dwar l-assigurazzjoni tas-sidien tal-vapuri għal pretensjonijiet marittimi ma jkunux inklużi fi ħdan it-THETIS u li dan ikun ikkunsidrat.

· Fis-sitwazzjoni fejn l-istatus prijoritarju tal-bastimenti jinbidel waqt li jkunu fil-port, l-Istati Membri pproponew li THETIS javża lill-Istat ikkonċernat u l-Istat ikollu perjodu ta' konċessjoni sabiex l-ispezzjoni maqbuża ma tingħaddx kontra tiegħu.

· L-Anness III tad-Direttiva jinkludi lista ta' informazzjoni li għandha tkun ipprovduta fin-notifika tal-wasla ta' vapur. L-Istati Membri pproponew li r-rekwiżit (f) "data tal-aħħar spezzjoni estiża fir-reġjun tal-MOU ta’ Pariġi" jitħassar billi din l-informazzjoni diġà hija inkluża fit-THETIS.

Il-Kummissjoni bħalissa qed teżamina l-problemi identifikati waqt l-implimentazzjoni kif ukoll kwistjonijiet enfasizzati mill-Istati Membri u jekk l-emendi għad-Direttiva 2009/16/KE humiex meħtieġa. B'mod partikolari, il-Kummissjoni (mal-EMSA) se tara jekk dawn humiex anomaliji statistiċi relatati mal-ewwel sena ta’ implimentazzjoni jew huma inerenti għas-sistema u jekk dawn se jkollhom impatt fuq l-istess Stati Membri kull sena.

6.           KONKLUŻJONIJIET

6.1.        L-eżitu tal-azzjonijiet ta’ implimentazzjoni

L-implimentazzjoni tad-Direttiva kienet tesiġi ħidma u riżorsi finanzjarji sostanzjali mill-Istat Membru u fil-livell tal-UE. B'riżultat ta' din il-ħidma, id-Direttiva, fil-biċċa l-kbira, ġiet implimentata kmieni fl-2011. L-impressjoni ġenerali tal-Kummissjoni hija li d-Direttiva qed tiġi sostanzjalment implimentata. Kwalunkwe nuqqasijiet legali, tekniċi u operazzjonali identifikati se jkunu indirizzati mill-Kummissjoni meta jasal il-waqt.

6.2.        L-impatt fuq is-sikurezza marittima, fuq l-effiċjenza tat-trasport marittimu u fuq il-prevenzjoni tat-tniġġis

L-NIR jistabbilixxi kopertura sħiħa ta’ spezzjoni fuq vapuri li jżuru l-portijiet u l-ankraġġi tal-UE u sistema bbażata aktar fuq ir-riskju tal-immirar tal-vapuri għal spezzjoni filwaqt li informazzjoni fil-ħin reali dwar iż-żjarat tal-vapuri tipprovdi kapaċitajiet imtejba għat-teħid tad-deċiżjonijiet dwar il-vapuri li għandhom jiġu spezzjonati.

Kumplessivament, l-impenn ta’ spezzjoni għall-Istati Membri tal-UE ġie milħuq. Fl-2011, meta mqabbel mas-snin ta’ qabel, l-għadd totali ta' spezzjonijiet li għandhom jitwettqu naqas. Bħala riżultat, saru spezzjonijiet ta' kwalità ogħla, ikkonċentrati fuq vapuri substandard. Dan ifisser li r-riżorsi tal-PSC huma kkonċentrati fuq l-ispezzjonijiet fuq bastimenti ta' kwalità aktar baxxa u li l-ispezzjonijiet imwettqa jkunu aktar fil-fond.

6.3.        Żviluppi fil-futur

Kif imsemmi qabel, fid-dawl tal-kwistjonijiet identifikati matul l-implimentazzjoni u kkomunikati lill-Kummissjoni mill-Istati Membri, il-Kummissjoni bħalissa qed tevalwa jekk humiex meħtieġa tibdiliet għad-Direttiva.

Fis-snin li ġejjin huwa mistenni li r-reġim tal-PSC tal-UE ikun adattat għal rekwiżiti futuri li jistgħu jinqalgħu inter alia minn konvenzjonijiet internazzjonali meta dawn jidħlu fis-seħħ u jsiru strumenti rilevanti għall-finijiet tad-Direttiva 2009/16/KE.

Id-dħul fis-seħħ li ġej tal-Konvenzjoni dwar ix-Xogħol Marittimu, 2006 (MLC 2006) u d-Direttiva 2009/13/KE[14] relatata se jkollhom ikunu appoġġati mit-THETIS. Proposta tal-Kummissjoni biex timmodifika d-Direttiva 2009/16/KE f’dan ir-rigward bħalissa qed tiġi diskussa fil-Parlament Ewropew u l-Kunsill[15].

Barra minn hekk, bid-dħul fis-seħħ tal-Konvenzjoni Konvenzjoni dwar il-Ġestjoni tal-Ilma tas-Saborra tal-IMO (BWM 2004) huwa mistenni li l-infurzar jitwettaq fil-kuntest tad-Direttiva 2009/16/KE u t-THETIS.

Anness

It-tabelli msemmija fir-rapport*

Billi d-Direttiva tirreferi għar-reġjun tal-PMoU, id-dettalji relatati mal-Istati li mhumiex Membri tal-UE huma inklużi f'din it-tabella kif xieraq.

Tabella 1 – Impenji ta' spezzjoni tal-Istati Membri tal-PMoU

|| Żjarat totali ta' vapuri fit-THETIS għall-2011 || Vapuri Individwali fit-THETIS għall-2011 2011 || Proporzjon 2011 || Impenn għall-2011 skont l-Art 5.2b

Il-Belġju || 23233 || 5255 || 6.30% || 1168

Il-Bulgarija || 2909 || 1277 || 1.69% || 313

Il-Kanada || 913 || 872 || 3.48% || 645

Il-Kroazja || 1927 || 624 || 1.10% || 203

Ċipru || 2410 || 800 || 1.20% || 223

Id-Danimarka || 8387 || 2053 || 3.18% || 588

L-Estonja || 5096 || 1507 || 1.77% || 328

Il-Finlandja || 12727 || 1170 || 1.75% || 324

Franza || 27654 || 5447 || 7.04% || 1305

Il-Ġermanja || 27503 || 4941 || 6.35% || 1177

Il-Greċja || 20314 || 3295 || 3.18% || 590

L-Islanda || 1935 || 322 || 0.31% || 58

L-Irlanda || 9528 || 1139 || 1.45% || 268

L-Italja || 31810 || 5049 || 6.49% || 1203

Il-Latvja || 7149 || 1965 || 2.32% || 430

Il-Litwanja || 4080 || 1605 || 1.87% || 347

Malta || 2607 || 819 || 1.80% || 333

Il-Pajjiżi l-Baxxi || 42686 || 7235 || 8.24% || 1527

In-Norveġja || 14391 || 1514 || 3.08% || 570

Il-Polonja || 11034 || 2380 || 2.86% || 531

Il-Portugall || 3683 || 1536 || 3.10% || 574

Ir-Rumanija || 4087 || 1703 || 2.32% || 430

Il-Federazzjoni Russa || 16728 || 3403 || 3.34% || 618

Is-Slovenja || 1417 || 612 || 0.88% || 163

Spanja || 31865 || 6234 || 10.58% || 1960

l-Isvezja || 24680 || 2567 || 3.28% || 608

Ir-Renju Unit || 4266 || 2231 || 11.04% || 2046

Total || 345019 || 67555 || 100% || 18530

*(Sors it-tabelli kollha EMSA)

Tabella 2 Impenn u spezzjonijiet skont l-Artikolu 6 tad-Direttiva 2009/16/KE

|| Impenn għall-2011 || Żjarat ta' PI || Spezzjonijiet ta' PII || Żjarat ta' PII || Spezzjonijiet imwettqa ta' PII || Spezzjonijiet imwettqa ta' PI u PII ||

Il-Belġju || 1168 || 521 || 475 || 1082 || 496 || 971 ||

Il-Bulgarija || 313 || 290 || 273 || 310 || 255 || 528 ||

Ċipru || 223 || 207 || 52 || 232 || 73 || 125 ||

Il-Finlandja || 324 || 94 || 78 || 527 || 238 || 316 ||

Il-Ġermanja || 1177 || 559 || 517 || 964 || 887 || 1404 ||

L-Islanda || 58 || 22 || 19 || 55 || 43 || 62 ||

Malta || 333 || 194 || 185 || 303 || 45 || 230 ||

Il-Pajjiżi l-Baxxi || 1527 || 1456 || 1026 || 1964 || 557 || 1583 ||

In-Norveġja || 570 || 374 || 234 || 811 || 360 || 594 ||

Il-Portugall || 574 || 263 || 239 || 397 || 206 || 445 ||

Ir-Rumanija || 430 || 374 || 339 || 467 || 437 || 776 ||

Is-Slovenja || 163 || 98 || 97 || 149 || 143 || 240 ||

l-Isvezja || 608 || 166 || 130 || 650 || 226 || 356 ||

Ir-Renju Unit || 2046 || 1634 || 765 || 1773 || 776 || 1541 ||

Total || 9514 || 6252 || 4429 || 9684 || 4742 || 9171 ||

Tabella 3 Impenn u spezzjonijiet skont l-Artikolu 7(1) tad-Direttiva 2009/16/KE

|| Impennn għall-2011 || Żjarat ta' PI || Spezzjonijiet imwettqa ta' PI || Żjarat ta' PII || Spezzjonijiet imwettqa ta' PII || Spezzjonijiet imwettqa ta' PI+PII ||

Franza || 1305 || 1314 || 492 || 2300 || 733 || 1225 ||

Il-Greċja || 590 || 1469 || 656 || 2836 || 334 || 990 ||

L-Irlanda || 268 || 562 || 81 || 475 || 153 || 234 ||

L-Italja || 1203 || 1464 || 1084 || 3440 || 622 || 1706 ||

Spanja || 1960 || 2513 || 1216 || 3537 || 511 || 1727 ||

Totali || 5326 || 7322 || 3529 || 12588 || 2353 || 5882 ||

Tabella 4 Impenn u spezzjonijiet skont l-Artikolu 7(2) tad-Direttiva 2009/16/KE

|| Impenn għall-2011 || Żjarat ta' PI || Spezzjonijiet imwettqa ta' PI || Żjarat ta' PII || Spezzjonijiet imwettqa ta' PII || Spezzjonijiet imwettqa ta' PI+PII ||

Id-Danimarka || 588 || 196 || 173 || 320 || 209 || 382 ||

L-Estonja || 328 || 68 || 65 || 134 || 120 || 185 ||

Il-Latvja || 430 || 71 || 66 || 187 || 180 || 246 ||

Il-Litwanja || 347 || 66 || 62 || 125 || 120 || 182 ||

Il-Polonja || 531 || 156 || 139 || 324 || 293 || 432 ||

Total || 2224 || 557 || 505 || 1090 || 713 || 1427 ||

Tabella 5 Xejra ġenerali tal-ispezzjonijiet u t-tibdiliet fit-tipi ta’ spezzjonijiet f’reġjun tal-PMoU

Tabella 6 – Għadd ta' spetturi tal-PSC f'kull Stat

|| Għadd ta' spetturi tal-PSC

Il-Belġju || 9

Il-Bulgarija || 14

Ċipru || 11

Id-Danimarka || 27

L-Estonja || 9

Il-Finlandja || 23

Franza || 84

Il-Ġermanja || 40

Il-Greċja || 51

L-Islanda || 2

L-Irlanda || 22

L-Italja || 111

Il-Latvja || 9

Il-Litwanja || 12

Malta || 3

Il-Pajjiżi l-Baxxi || 29

In-Norveġja || 79

Il-Polonja || 16

Il-Portugall || 11

Ir-Rumanija || 13

Is-Slovenja || 4

Spanja || 96

l-Isvezja || 44

Ir-Renju Unit || 113

Total || 832

Tabella 7 - Żjarat u spezzjonijiet fl-ankraġġi

|| Żjarat totali || Żjarat fl-ankraġġi || Spezzjonijiet fl-ankraġġi || Żjarat ta' PI fl-ankraġġi || Spezzjonijiet ta' PI fl-ankraġġi || Detenzjonijiet ta' PI fl-ankraġġi

Il-Belġju || 18649 || - || || - || - || -

Il-Bulgarija || 2633 || 283 || 62 || 18 || 13 || -

Ċipru || 2304 || 147 || 3 || 25 || - ||

Id-Danimarka || 8920 || 1 || 1 || 1 || 1 || -

L-Estonja || 3754 || - || || - || - || -

Il-Finlandja || 18229 || 17 || 1 || 1 || - || -

Franza || 29204 || 148 || 10 || 14 || - || -

Il-Ġermanja || 23330 || - || || - || - || -

Il-Greċja || 18080 || 2446 || 210 || 294 || 47 || -

L-Islanda || 1567 || 3 || || - || - || -

L-Irlanda || 7450 || 5 || || - || - || -

L-Italja || 73290 || 15541 || 421 || 5682 || 53 || -

Il-Latvja || 5318 || - || || - || - || -

Il-Litwanja || 3439 || 22 || || - || - || -

Malta || 2942 || - || || - || - || -

Il-Pajjiżi l-Baxxi || 47686 || 382 || 17 || 26 || 2 || -

In-Norveġja || 14201 || 130 || 82 || 12 || 11 || -

Il-Polonja || 8570 || 294 || 23 || 3 || 1 || -

Il-Portugall || 3189 || 7 || 4 || 3 || 1 || -

Ir-Rumanija || 3886 || 829 || 113 || 15 || 4 || -

Is-Slovenja || 1248 || 22 || 11 || - || - || -

Spanja || 38490 || 1916 || 113 || 363 || 29 || 1

L-Isvezja || 30168 || 2 || || - || - || -

Ir-Renju Unit || 3851 || 245 || 36 || 182 || 13 || -

[1]               Id-Direttiva 2009/16/KE tal-Parlament Ewropew u tal-Kunsill tat-23 ta' April 2009 dwar il-Kontroll tal-Istat tal-Port (ĠU L 136, 28.05.2009, p. 57).

[2]               L-Artikolu 24(2) tad-Direttiva 2009/16/KE jipprovdi li l-Istati Membri għandhom jiżguraw li informazzjoni dwar iż-żjarat fil-port tiġi trasferita fi żmien raġonevoli lil-bażi tad-dejta THETIS permezz tas-sistema Komunitarja għall-iskambju ta' tagħrif marittimu “SafeSeaNet” msemmija fl-Artikolu 3(s) tad-Direttiva 2002/59/KE sabiex tippermetti l-awtorità tal-PSC li tagħżel il-vapuri għal spezzjoni.

[3]               ĠU L 241, 14.09.2010, p. 1

[4]               ĠU L 241, 14.09.2010, p. 4

[5]               Permezz tad-Direttiva 2002/59/KE tas-27.06.2002, kif emendata

[6]               Għalkemm is-Slovakkja ttrasponiet id-Direttiva, billi ma għandhiex portijiet marittimi ma hemm l-ebda informazzjoni dwar l-implimentazzjoni. Dan ir-rapport għalhekk jirreferi għall-implementazzjoni mit-22 Stat Membru kostali tal-UE u/jew (fejn xieraq) għas-27 Stat tal-PMoU.

[7]               Ir-Regolamenti (UE) 801/2010 u 802/2010

[8]               ĠU L 125 tal-21.05.2010, p.2

[9]               Il-Belġju, il-Bulgarija, Ċipru, il-Finlandja, il-Ġermanja, Malta, il-Pajjiżi l-Baxxi, il-Portugall, ir-Rumanija, is-Slovenja, l-Isvezja u r-Renju Unit.

[10]             Japplika wkoll għall-Kroazja, l-Islanda, in-Norveġja u l-Federazzjoni Russa

[11]             Franza, il-Greċja, l-Irlanda, l-Italja u Spanja

[12]             Id-Danimarka, l-Estonja, il-Latvja, il-Litwanja u l-Polonja.

[13]             L-Artikolu 21(4) tad-Direttiva.

[14]             ĠU L 124, 20.05.2009, p. 30

[15]             COM (2012) 129 tat-23.3.2012.