16.12.2011   

MT

Il-Ġurnal Uffiċjali tal-Unjoni Ewropea

C 368/1

1.

L-Impriża Konġunta Artemis, li tinsab fi Brussell, twaqqfet f’Diċembru 2007 (1) għal perjodu ta’ 10 snin.

2.

L-objettiv prinċipali tal-Impriża Konġunta huwa li tiddefinixxi u timplimenta “Aġenda għar-Riċerka” għall-iżvilupp ta’ teknoloġiji ewlenin għas-Sistemi Inkorporati tal-Kompjuter fl-oqsma kollha differenti ta’ applikazzjoni sabiex tissaħħaħ il-kompetittività Ewropea u s-sostenibbiltà, u tippermetti l-ħolqien ta’ swieq ġodda u applikazzjonijiet fis-soċjetà (2).

3.

Il-Membri Fundaturi tal-Impriża Konġunta Artemis huma l-Unjoni Ewropea rrappreżentata mill-Kummissjoni, l-Istati Membri l-Awstrija, il-Belġju, id-Danimarka, l-Estonja, Franza, il-Finlandja, il-Ġermanja, il-Greċja, l-Ungerija, l-Irlanda, l-Italja, il-Pajjiżi l-Baxxi, il-Portugall, ir-Rumanija, is-Slovenja, Spanja, l-Isvezja u r-Renju Unit u l-Artemisia, assoċjazzjoni li tirrappreżenta kumpaniji u organizzazzjonijiet oħra tar-riċerka li huma attivi fil-qasam tas-Sistemi Inkorporati tal-Kompjuter fl-Ewropa. Fl-2009, Ċipru, ir-Repubblika Ċeka, il-Latvja u n-Norveġja saru wkoll membri tal-Impriża Konġunta.

4.

Il-kontribut massimu tal-UE lill-Impriża Konġunta Artemis li jkopri l-ispejjeż operattivi u l-attivitajiet ta’ riċerka huwa ta’ EUR 420 miljun li għandhom jitħallsu mill-baġit tas-Seba’ Programm ta’ Qafas għar-Riċerka (3). L-assoċjazzjoni Artemisia għandha tagħmel kontribut ta’ mhux aktar minn EUR 30 miljun għall-ispejjeż operattivi. L-Istati Membri fl-Artemis għandhom jagħmlu kontributi in natura għall-ispejjeż operattivi (permezz tal-faċilitazzjoni tal-implimentazzjoni tal-proġetti), u jagħmlu kontributi finanzjarji li għandhom jammontaw għal mill-inqas 1,8 darbiet aktar mill-kontribut finanzjarju tal-UE. Kontributi in natura għandhom jingħataw ukoll mill-organizzazzjonijiet tar-riċerka li qegħdin jieħdu sehem fi proġetti.

5.

L-Impriża Konġunta bdiet taħdem b’mod awtonomu fis-26 ta’ Ottubru 2009.

6.

Skont id-diżpożizzjonijiet tal-Artikolu 287(1) tat-Trattat dwar il-Funzjonament tal-Unjoni Ewropea, il-Qorti vverifikat il-kontijiet annwali (4) tal-Impriża Konġunta Artemis li jikkonsistu fir-“rendikonti finanzjarji” (5) u fir-“rapporti dwar l-implimentazzjoni tal-baġit” (6) għas-sena finanzjarja li ntemmet fil-31 ta’ Diċembru 2010 u l-legalità u r-regolarità tat-tranżazzjonijiet li fuqhom huma bbażati dawk il-kontijiet.

7.

Din id-Dikjarazzjoni ta’ Assigurazzjoni hija indirizzata lill-Parlament Ewropew u lill-Kunsill skont l-Artikolu 185(2) tar-Regolament tal-Kunsill (KE, Euratom) Nru 1605/2002 (7).

8.

Bħala uffiċjal li jawtorizza, id-Direttur jimplimenta d-dħul u l-infiq tal-baġit skont ir-regoli finanzjarji tal-Impriża Konġunta li taqa’ taħt ir-responsabbiltà tiegħu u fi ħdan il-limiti tal-approprjazzjonijiet awtorizzati (8). Id-Direttur huwa responsabbli mit-twaqqif (9) tal-istruttura organizzattiva u s-sistemi u l-proċeduri tal-ġestjoni u l-kontroll interni rilevanti biex jiġu ppreparati kontijiet finali (10) li huma ħielsa minn dikjarazzjoni żbaljata materjali, kemm jekk minħabba frodi jew inkella żball, u biex jiżgura li t-tranżazzjonijiet li fuqhom huma bbażati dawn il-kontijiet huma legali u regolari.

9.

Ir-responsabbiltà tal-Qorti hija li tipprovdi, abbażi tal-verifika tagħha, dikjarazzjoni ta’ assigurazzjoni dwar l-affidabbiltà tal-kontijiet annwali tal-Impriża Konġunta u dwar il-legalità u r-regolarità tat-tranżazzjonijiet li huma bbażati fuqhom.

10.

Il-Qorti wettqet il-verifika tagħha skont l-Istandards Internazzjonali tal-Verifika u l-Kodiċi tal-Etika tal-IFAC u tal-ISSAI (11). Dawk l-istandards jitolbu li l-Qorti tikkonforma mar-rekwiżiti tal-etika u li tippjana u twettaq il-verifika biex tikseb assigurazzjoni raġonevoli dwar jekk il-kontijiet humiex ħielsa minn dikjarazzjoni żbaljata materjali u dwar jekk it-tranżazzjonijiet ta’ bażi humiex legali u regolari.

11.

Il-verifika tal-Qorti tinvolvi t-twettiq ta’ proċeduri sabiex tinkiseb evidenza tal-verifika dwar l-ammonti u l-iżvelar fil-kontijiet u dwar il-legalità u r-regolarità tat-tranżazzjonijiet li huma bbażati fuqhom. Il-proċeduri jintgħażlu skont il-ġudizzju tal-awditur, inkluża l-valutazzjoni tar-riskji ta’ dikjarazzjoni skorretta materjali fir-rapporti finanzjarji, sew jekk minħabba frodi u sew jekk minħabba xi żball. Meta tagħmel dawk il-valutazzjonijiet tar-riskju, il-kontroll intern rilevanti għall-preparazzjoni u l-preżentazzjoni tal-kontijiet tal-entità jiġi kkunsidrat sabiex jitfasslu proċeduri tal-verifika li huma xierqa fiċ-ċirkostanzi. Il-verifika tal-Qorti tinkludi wkoll evalwazzjoni tal-adegwatezza tal-politika tal-kontabilità użata, tar-raġonevolezza tal-estimi tal-kontabilità magħmula mill-maniġment u kif ukoll evalwazzjoni tal-preżentazzjoni tal-kontijiet inġenerali.

12.

Il-Qorti tqis li l-evidenza tal-verifika miksuba hija biżżejjed u xierqa biex tipprovdi bażi għall-opinjonijiet t’hawn taħt.

13.

Fl-opinjoni tal-Qorti, il-Kontijiet Annwali tal-Impriża Konġunta Artemis jippreżentaw b’mod ġust fir-rispetti materjali kollha, il-pożizzjoni finanzjarja tagħha fil-31 ta’ Diċembru 2010 u r-riżultati tal-operazzjonijiet tagħha u tal-likwidità tagħha għas-sena li ntemmet, skont id-dispożizzjonijiet tar-Regolament Finanzjarju tagħha.

14.

Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali tal- Impriża Konġunta għas-sena finanzjarja li ntemmet fil-31 ta’ Diċembru 2010, fl-aspetti materjali kollha huma legali u regolari.

15.

Il-kummenti li ġejjin fil-paragrafi 16 sa 26 ma jixtħux f’dubju l-opinjonijiet tal-Qorti.

16.

Għall-kuntrarju tal-Artikoli 29 sa 31 tar-regoli finanzjarji għall-Impriża Konġunta, il-baġit tal-2010 ma ġiex adottat sal-aħħar tas-sena li għaddiet (adottat fit-28 ta’ Jannar 2010). L-istruttura u l-preżentazzjoni tiegħu ma kinux skont id-dispożizzjonijiet tar-regoli finanzjarji.

17.

Il-baġit finali jinkludi l-ħlas ta’ approprjazzjonijiet ta’ EUR 27 miljun. Ir-rata ta’ utilizzazzjoni kienet ta’ 37,7 %. Depożiti f'kontijiet bankarji fl-aħħar tas-sena ammontaw għal EUR 16,6 miljun (60 % tal-approprjazzjonijiet ta’ ħlas disponibbli fl-2010). Skont l-Impriża Konġunta, ir-rata ta’ implimentazzjoni relattivament baxxa ta’ approprjazzjonijiet ta’ ħlas tirrifletti d-dewmien fil-livell ta’ Stat Membru fl-iffirmar ta’ ftehimiet ta’ għoti nazzjonali (12).

18.

L-Impriża Konġunta ma implimentatx b’mod sħiħ il-kontrolli interni tagħha u s-sistemi ta’ informazzjoni finanzjarji matul l-2010. B’mod partikolari, aktar xogħol hu meħtieġ fuq il-verifika operattiva għal klejms ta’ spejjeż, fuq l-assigurazzjoni pprovduta miċ-ċertifikati tal-awtoritajiet nazzjonali u l-istrateġija ex post ta’ verifika. Dawn huma elementi importanti għas-sistema tal-Impriża Konġunta ta’ kontroll intern.

19.

Fil-qasam ta’ verifika ex ante, il-fiduċja titpoġġa b’mod sħiħ kollha fuq iċ-ċertifikati pprovduti mill-awtoritajiet nazzjonali u ma twettqu l-ebda kontrolli oħra biex jiżguraw il-legalità u r-regolarità tal-ispejjeż iddikjarati mill-benefiċjarji.

20.

Il-verifika ex post ta’ klejms ta’ spejjeż relatati mal-proġetti ġiet delegata b’mod sħiħ lill-Istati Membri, mingħajr ma jiġi eżerċitat l-ebda kontroll mill-Impriża Konġunta (13). Dan se jagħmilha diffiċli għall-Impriża Konġunta sabiex tiżgura: i) li l-interessi finanzjarji tal-Membri tagħha jiġu mħarsa adegwatament, kif meħtieġ mir-Regolament tal-Kunsill (14), u ii) il-legalità u r-regolarità tat-tranżazzjonijiet li huma bbażati fuqhom.

21.

L-analiżi limitata tal-kontrolli tal-IT uriet li l-Impriża Konġunta għandha livell adegwata ta’ tmexxija u prattika tal-IT għad-daqs u l-missjoni tagħha, imma l-formalizzazzjoni ta’ politiki u proċeduri, madankollu għadha lura f’ċerti oqsma (15).

22.

L-Uffiċjal tal-Kontijiet tal-Impriża Konġunta vvalida s-sistemi finanzjarji u ta’ kontabilità (ABAC u SAP), imma għadu ma vvalidax l-proċessi tan-negozju ta’ bażi li jipprovdi informazzjoni finanzjarja, partikolarment dak li jipprovdu informazzjoni finanzjarja dwar il-validazzjoni u l-pagamenti tal-klejms ta’ spejjeż li waslu mill-awtoritajiet nazzjonali.

23.

Għall-kuntrarju tal-Artikolu 103 tar-regoli finanzjarji tagħha, l-Impriża Konġunta għadha ma implimentatx proċedura interna għat-tnaqqis tal-interess ġenerat mill-prefinazjamenti mill-pagament tal-bilanċ ta’ ammonti dovuti lill-benefiċjarji.

24.

L-Artikolu 6.2 tar-Regolament tal-Kunsill li jistabbilixxi l-Artemis jistipula li l-Impriża Konġunta għandha jkollha l-kapaċità ta’ verifika interna tagħha. Madankollu, sal-aħħar tal-2010, dan l-element importanti tas-sistema ta’ kontroll intern kien għadu ma ġiex stabbilit.

25.

Fir-rapport preċedenti tagħha, il-Qorti saħqet fuq il-ħtieġa li tiġi kjarifikata d-dispożizzjoni fl-Istatuti tal-Impriża Konġunta dwar l-irwol tal-awditur intern tal-Kummissjoni. Għalkemm ir-regoli finanzjarji tal-Impriża Konġunta għadhom ma ġewx emendati biex jinkludu d-dispożizzjoni li tirreferi għall-poteri tal-awditur intern tal-Kummissjoni, il-Kummissjoni u l-Impriża Konġunta ħadu azzjoni biex jiżguraw li l-irwoli operattivi rispettivi tas-Servizz ta’ Verifika Interna tal-Kummissjoni u l-funzjoni tal-verifika interna tal-Impriża Konġunta huma definiti b’mod ċar.

26.

Kif irrappurtat qabel mill-Qorti, skont ir-Regolament tal-Kunsill li jwaqqaf l-Impriża Konġunta, għandu jiġi konkluż ftehim dwar l-ospitalità bejn l-Impriża Konġunta u l-Belġju dwar l-akkomodazzjoni għall-uffiċċji, il-privileġġi u l-immunitajiet u appoġġ ieħor li għandu jipprovdi l-Belġju. Iżda, sal-aħħar tal-2010, l-ebda ftehim bħal dan kien għadu ma ġie ffirmat.