This document is an excerpt from the EUR-Lex website
Document 52011SC0819
Recommendation for a COUNCIL RECOMMENDATION on the National Reform Programme 2011 of the Czech Republicand delivering a Council opinionon the updated Convergence Programme of the Czech Republic, 2011-2014
Recommendation for a COUNCIL RECOMMENDATION on the National Reform Programme 2011 of the Czech Republicand delivering a Council opinionon the updated Convergence Programme of the Czech Republic, 2011-2014
Recommendation for a COUNCIL RECOMMENDATION on the National Reform Programme 2011 of the Czech Republicand delivering a Council opinionon the updated Convergence Programme of the Czech Republic, 2011-2014
Recommendation for a COUNCIL RECOMMENDATION on the National Reform Programme 2011 of the Czech Republicand delivering a Council opinionon the updated Convergence Programme of the Czech Republic, 2011-2014
Rakkomandazzjoni għal RAKKOMANDAZZJONI TAL-KUNSILL dwar il-Programm Nazzjonali ta’ Riforma 2011
tar-Repubblika Ċeka
u l-għoti ta’ opinjoni tal-Kunsill
dwar il-Programm ta’ Konverġenza aġġornat tar-Repubblika
Ċeka, 2011 sal-2014 IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikulari l-Artikolu 121(2)
u l-Artikolu 148(4) tiegħu, Wara li kkunsidra r-Regolament tal-Kunsill
(KE) Nru 1466/97 tas-7 ta’ Lulju 1997 dwar
it-tisħiħ tas-sorveljanza ta’ pożizzjonijiet ta’ baġit u
s-sorveljanza u l-koordinazzjoni ta’ politika ekonomika[1], u b’mod partikulari l-Artikolu 9(3)
tiegħu, Wara li kkunsidra r-Rakkomandazzjoni
tal-Kummissjoni Ewropea[2], Wara li kkunsidra l-konklużjonijiet
tal-Kunsill Ewropew, Wara li kkunsidra l-opinjoni tal-Kumitat
tal-Impjiegi, Wara li ġie kkonsultat il-Kumitat
Ekonomiku u Finanzjarju, Billi: (1)
Fis-26 ta’ Marzu 2010, il-Kunsill
Ewropew qabel mal-proposta tal-Kummissjoni Ewropea li tvara strateġija
ġdida għall-impjiegi u t-tkabbir, imsejħa Ewropa 2020, imsejsa
fuq koordinazzjoni msaħħa tal-politiki ekonomiċi, li tiffoka fuq
l-oqsma ewlenin fejn jeħtieġ li tittieħed azzjoni biex
tingħata spinta lill-potenzjal tal-Ewropa għat-tkabbir sostenibbli u
l-kompetittività. (2)
Fit-13 ta’ Lulju 2010, il-Kunsill
adotta rakkomandazzjoni dwar il-linji gwida ġenerali għall-politiki
ekonomiċi tal-Istati Membri u tal-Unjoni (mill-2010 sal-2014) u
fil-21 ta’ Ottubru 2010 huwa adotta deċiżjoni dwar
il-Linji Gwida għall-politika tal-Istati Membri dwar l-impjiegi[3], li flimkien jagħmlu l-“linji gwida
integrati”. L-Istati Membri ġew mistiedna jqisu l-linji gwida integrati
fil-politiki nazzjonali ekonomiċi u tal-impjiegi tagħhom. (3)
Fit-12 ta’ Jannar 2011,
il-Kummissjoni adottat l-ewwel Stħarriġ Annwali dwar it-Tkabbir, li
kien il-bidu ta’ ċiklu ġdid ta’ governanza ekonomika fl-UE u l-ewwel
semestru Ewropew ta’ koordinazzjoni integrata u ex ante ta’ politika,
imsejjes fuq l-istrateġija Ewropa 2020. (4)
Fil-25 ta’ Marzu 2011, il-Kunsill
Ewropew endorsja l-prijoritajiet għall-konsolidazzjoni fiskali u r-riforma
strutturali (bi qbil mal-konklużjonijiet tal-Kunsill
tal-15 ta’ Frar u tas-7 ta’ Marzu 2011 u b’żieda
mal-Istħarriġ Annwali dwar it-Tkabbir adottat mill-Kummissjoni). Hu
saħaq fuq il-ħtieġa li tingħata prijorità lir-restawr ta’
baġits tajbin u s-sostenibilità fiskali, lit-tnaqqis tal-qgħad
permezz ta’ riformi fis-suq tax-xogħol u li jsiru sforzi ġodda biex
jittejjeb it-tkabbir. Talab lill-Istati Membri biex isarrfu dawn
il-prijoritajiet f’miżuri konkreti li għandhom jiġu inklużi
fil-Programmi ta’ Stabilità jew ta’ Konverġenza tagħhom u
fil-Programmi Nazzjonali ta’ Riforma tagħhom. (5)
Fid-29 ta’ April 2011, ir-Repubblika
Ċeka ressqet il-Programm Nazzjonali ta’ Riforma tagħha
għall-2011 u fil-5 ta’ Mejju 2011, hija ressqet il-Programm
ta’ Konverġenza għall-2011 tagħha aġġornat li jkopri
l-perjodu mill-2011 sal-2014. Sabiex jitqiesu l-konnotazzjonijiet bejniethom,
iż-żewġ programmi ġew ivvalutati fl-istess waqt. (6)
Minħabba l-ftuħ kbir fin-negozju
tal-ekonomija Ċeka, il-kriżi finanzjarja dinjija ħalliet effett
negattiv qawwi fuq it-tkabbir tal-PDG u l-qgħad fir-Repubblika Ċeka.
Il-PDG reali naqas b’4,1 % fl-2009, minħabba t-tnaqqis
fl-esportazzjonijiet u fl-investiment domestiku. Ir-rata tal-qgħad
żdiedet b’mod sinifikanti minn 4,4 % fl-2008 għal 7,3 %
fl-2010, u r-rata tal-impjiegi naqset b’żewġ punti perċentwali
bejn l-2008 u l-2010. Madankollu, l-livell għoli ta’ esponiment
għan-negozju internazzjonali u l-irkupru b’rata mgħaġġla
tas-sħab kummerċjali ewlenin tar-Repubblika Ċeka
iffaċilitaw ukoll irkupru ta’ malajr fit-tkabbir tal-PDG reali fl-2010,
biex dan laħaq livell ta’ 2,3 %, u se jkomplu jappoġġaw
irkupru moderat. (7)
Fuq il-bażi tal-valutazzjoni tal-Programm ta’
Konverġenza aġġornat skont ir-Regolament tal-Kunsill (KE) Nru 1466/97,
il-Kunsill huwa tal-fehma li s-suppożizzjonijiet makroekonomiċi li
fuqhom jissejjes il-programm huma plawżibbli għall-ewwel sentejn
tal-programm iżda huma favorevoli wisq għas-snin ta’ wara.
Il-programm jissejjes fuq tbassir ta’ tkabbir għall-2012 li huwa inqas
minn dak imbassar mis-servizzi tal-Kummissjoni fit-tbassir maħruġ
fir-Rebbiegħa tal-2011, l-iktar minħabba aktar tnaqqis kontinwu
fin-nefqa reali tal-gvern fuq il-konsum – ħaġa li mhijiex meqjusa
fit-tbassir tas-servizzi tal-Kummissjoni għall-2012 li huwa msejjes fuq
sitwazzjoni ta’ ebda bidla fil-politika. Il-programm jipprevedi tnaqqis
tad-defiċit tal-amministrazzjoni pubblika għal livell li jkun inqas
minn 3 % tal-PDG fl-2013 u għal livell ta’ 1,9 % tal-PDG fl-2014.
Il-konsolidazzjoni ppjanata hija bbażata l-aktar fuq limitazzjoni
tan-nefqa. Il-miżuri proposta huma ġeneralment biżżejjed
biex tintlaħaq il-mira sal-2013, kif ġie rrakkomandat mill-Kunsill,
iżda hemm riskji marbutin mal-eżitu baġitarju attwali
tal-miżuri kif imressqin fil-programm. Barra minn hekk, il-kisba tal-miri
għall-aħħar snin tal-programm donnhom jiddependu l-aktar fuq
kundizzjonijiet ċikliċi favorevoli u fuq aktar kisbiet
fl-effiċjenza fl-amministrazzjoni pubblika, li jista’ jkun li jsiru dejjem
iktar diffiċli biex jintlaħqu. Il-kisba tal-objettivi baġitarji
ta’ terminu medju hija mbassra għal żmien li jmur lil hinn
mill-perjodu tal-programm. L-isforz fiskali medju annwali fil-perjodu mill-2011
sal-2013 huwa ferm inqas mil-livell ta’ 1 % tal-PDG li ġie
rrakkomandat mill-Kunsill fil-proċedura ta’ żbilanċ
eċċessiv tat-2 ta’ Diċembru 2009. (8)
Il-programm stabbilixxa objettiv ċar sabiex
id-defiċit fil-finanzi pubbliċi jinġieb għal inqas minn
3 % tal-PDG sal-2013. L-isfida se tkun li wieħed jiżgura li
l-miżuri li fuqhom tissejjes it-triq għat-tnaqqis fid-defiċit
mill-2011 sal-2013 u fis-snin ta’ wara ma jikkompromettux it-tkabbir fit-tul,
b’mod partikulari billi tiġi ssalagwardjata n-nefqa fuq l-edukazzjoni u
r-riċerka u l-iżvilupp fil-qasam pubbliku, u li huma jinkludu
lqugħ adegwat għal żidiet fin-nefqa li jiġu minħabba
l-iżviluppi demografiċi. (9)
L-istrateġija għall-konsolidazzjoni
baġitarja tinkludi miżuri li jaffettwaw id-dħul mill-VAT:
ir-rata l-baxxa tal-VAT mistennija tiżdied fl-2012 u fl-2013, filwaqt li
dik li hija ogħla se tonqos fl-2013. Mill-2013 ’il quddiem il-gvern
beħsiebu jżid ukoll l-għadd ta’ ditti li għandhom
iħallsu l-VAT. Skont il-Programm, dawn il-bidliet għandhom iwasslu
għal żieda fir-rikavati mit-taxxa ta’ 0,7 % tal-PDG fl-2012 u
għal 0,1 % ieħor tal-PDG fl-2013. Barra minn hekk, donnu hemm
lok għal iktar żieda fid-dħul mit-taxxi indiretti – dħul li
kien ta’ 11,8 % tal-PDG fl-2010 meta mqabbel mal-livell medju tal-UE li
kien ta’ 13,4 %, u b’hekk jista’ jkun li t-taxxi ma jibqgħux marbutin
daqshekk max-xogħol. Barra minn hekk, huwa stmat li d-differenza bejn
id-dħul reali mill-VAT u l-VAT li għandha titħallas
teoretikament hija ferm iktar mill-medja tal-UE – ħaġa li ssostni
l-ħtieġa għal miżuri li jtejbu l-konformità fil-qasam
tat-taxxi. (10)
Minħabba li l-impatt baġitarju
tat-tixjiħ tal-popolazzjoni huwa mistenni jkun ferm iktar mill-medja
tal-UE, ir-riforma tas-sistema tal-pensjonijiet hija kwistjoni importanti.
Il-gvern ressaq żewġ settijiet ta’ proposti. L-ewwel sett huwa
mistenni jkun approvat mill-Parlament sa Settembru tal-2011 u għandu
fil-mira l-pilastru pubbliku ta’ pagament progressiv (“Pay-As-You-Go”) li ilu
jsofri minn żbilanċ sa mill-2009. Fost miżuri oħrajn, dan
jinkludi żieda fl-età statutarja tal-irtirar, li fl-2041 se titla’
għal 67 sena, kemm għall-irġiel kif ukoll għan-nisa. Dan
is-sett ta’ riformi tal-parametri jindirizza parzjalment il-problema
tas-sostenibbiltà fiskali, iżda jista’ ma jkunx biżżejjed sabiex
jiġu indirizzati l-isfidi maħluqin mit-tixjiħ tal-popolazzjoni.
It-tieni sett ta’ miżuri, li għadhom ma ġewx approvati
formalment mill-gvern, se jkunu magħmulin mill-introduzzjoni ta’ pilastru
ieħor volontarju privat fl-2013, bil-għan li tiżdied
id-diversifikazzjoni tal-introjti tal-pensjonijiet u li tiġi appoġġata
s-suffiċjenza tagħhom fil-ġejjieni billi jkun promoss
l-iżvilupp tat-tfaddil privat. Madankollu, il-forma tal-pilastru li qed
tiġi ssuġġerita ftit toħloq inċentivi sabiex
wieħed jissieħeb fl-iskema u, fil-verità, tista’ tkompli
żżid il-pressjonijiet fit-tul imsemmija hawn fuq. Il-kostijiet biex
jitħaddmu t-tali fondi tal-pensjonijiet ukoll iridu jiġu analizzati
sewwa u jridu jinżammu f’livell li jkun baxx kemm jista’ jkun sabiex ikun
żgurat li l-iskema tkun effikaċi. (11)
Is-suq tax-xogħol huwa meqjus li hu flessibbli
b’mod moderat u ma kien wera l-ebda nuqqas kbir ta’ funzjonament qabel
il-kriżi finanzjarja dinjija. Madankollu hemm xi nuqqasijiet strutturali.
Sfida ewlenija għandha x’taqsam mad-diffikultajiet kbar li jħabbtu
wiċċhom magħhom in-nisa li għandhom it-tfal meta jkunu qed
jerġgħu jidħlu fis-suq wara li jkunu ħarġu bil-liv
tal-maternità. Din il-kwistjoni hija importanti wkoll minħabba
r-riperkussjonijiet ekonomiċi usa’ tagħha: żminijiet itwal
mingħajr xogħol, differenza ikbar bejn in-nisa u l-irġiel
b’rabta mal-impjiegi u l-ogħla differenza fil-pagi tan-nisa u
tal-irġiel meta mqabbla ma’ dawk fl-Istati Membri kollha. Għadu
diffiċli li wieħed imur lura għax-xogħol malajr wara li
jkollu t-tfal, minkejja l-isforz tal-gvern li jagħti għażla ikbar
lill-ġenituri biex jiddeċiedu t-tul taż-żmien tal-liv
tal-ġenituri. Il-problema ġejja, b’mod parzjali, min-nuqqas ta’ rieda
tal-kumpaniji li jipprovdu kuntratti tax-xogħol part-time – kuntratti li
jużaw ħafna drabi l-impjegati bit-tfal żgħar fl-Istati
Membri l-oħra, u, b’mod parzjali, mill-ammont limitat ta’
faċilitajiet għall-indukrar tat-tfal li huma għall-but ta’
kulħadd, l-ikar ta’ faċilitajiet għat-tfal ta’ inqas minn tliet
snin. (12)
Filwaqt li r-rata ġenerali tal-qgħad
għadha ferm inqas mill-medja tal-UE, il-qgħad fit-tul qiegħed
jiżdied, b’mod partikulari fost dawk li għandhom bejn l-20 u d-29
sena. Dawk li għandhom livell baxx ta’ edukazzjoni kif ukoll dawk
l-oħrajn li jaqilgħu pagi baxxi jħabbtu wiċċhom ma’
diffikultajiet konsiderevoli biex isibu x-xogħol. Livell għoli ta’
qgħad fit-tul huwa konsistenti ma’ politiki attivi tas-suq tax-xogħol
li m’għandhomx biżżejjed fondi u li huma fuq skala relattivament
żgħira u ma’ għadd baxx ta’ parteċipanti f’miżuri
regolari t’attivazzjoni. (13)
L-ineffiċjenzi fl-amministrazzjoni pubblika,
li jaffettwaw l-ambjent tan-negozju, jistgħu jiġu indirizzati billi
l-istrateġiji eżistenti jiġu implimentati b’mod komprensiv.
Fl-2007, il-gvern nieda aġenda għal “regolazzjoni aħjar” u
strateġija għal kontra l-korruzzjoni għall-2011 sal-2012. Dawn
jinkludu miżuri li huma importanti sabiex tittejjeb il-kwalità tal-qafas
legali u regolatorju Ċek, li huwa kklassifikat f’livell inqas mill-medja
tal-UE skont stħarriġ internazzjonali, u sabiex
tissaħħaħ il-kunfidenza tan-negozji. Hemm sfida biex l-amministrazzjoni
pubblika ssir stabbli, minħabba li r-ristrutturar ta’ spiss u
b’konsegwenzi kbar tagħha jfixkel l-effiċjenza tagħha. Biex dan
iseħħ, se jkun importanti li jiġi adottat l-Att dwar
il-ħaddiema taċ-ċivil, li ilha żmien tiġi posposta.
Dan l-aħħar il-gvern adotta miżuri sabiex tiżdied
it-trasparenza fil-proċeduri tal-akkwist pubbliku. Madankollu, għad
hemm element tal-qafas regolatorju – li huwa t-tip ta’ ishma
speċifiċi fil-kumpaniji li jippermettu t-trasferiment tal-ġid
b’mod kompletament anonimu – li għad fih ir-riskji u li għalhekk
jixraqlu jingħata iktar attenzjoni. (14)
Il-kriżi mistennija twassal għal impatt
negattiv fuq it-tkabbir potenzjali. Minkejja l-għadd kbir ta’
żgħażagħ li qed isegwu kors fl-università, huwa importanti
li jittejjeb il-kapital uman. Dan qed jixxekkel mill-kwalità insuffiċjenti
tat-taħriġ, kif muri mill-klassifikazzjoni baxxa tal-istituzzjonijiet
tal-edukazzjoni terzjarja tar-Repubblika Ċeka f’diversi stħarriġ
internazzjonali. Barra minn hekk, l-infiq għal kull student, fi
prezzijiet li jistgħu jitqabblu, jinsab fl-aħħar kwart
tal-pajjiżi tal-UE u huwa limitat b’mod speċjali fejn tidħol
l-edukazzjoni primarja. Il-Programm Nazzjonali ta’ Riforma jagħti
miżuri għall-istadji kollha tal-edukazzjoni. Riforma kumplessa tal-edukazzjoni
terzjarja ilha titħejja diversi snin. Sabiex ikun hemm il-kompetittività u
l-kapaċità għall-innovazzjoni, huwa importanti li jiġi
żgurat li l-edukazzjoni terzjarja tkun ta’ kwalità u li din tkun
effiċjenti. (15)
Il-Kummissjoni vvalutat il-Programm ta’
Konverġenza u l-Programm Nazzjonali ta’ Riforma tar-Repubblika Ċeka[4]. Hija qieset mhux biss ir-rilevanza
tagħhom għal politika fiskali u soċjoekonomika sostenibbli
fir-Repubblika Ċeka, imma wkoll il-konformità tagħhom mar-regoli u
l-gwida tal-UE, fid-dawl tal-ħtieġa li tissaħħaħ
il-governanza ekonomika ġenerali tal-Unjoni Ewropea billi jiġi
pprovdut kontribut fil-livell tal-UE għad-deċiżjonijiet
nazzjonali tal-ġejjieni. F’dan il-kuntest, il-Kummissjoni tqis li
l-konsolidazzjoni fiskali għandha tinżamm fil-mira, filwaqt li
għandha titħares in-nefqa li ttejjeb it-tkabbir. Is-sostenibbiltà
fit-tul tal-finanzi pubbliċi tiddependi ħafna fuq il-ħila li
wieħed jimplimenta, dal-ħin stess, ir-riforma meħtieġa
fis-sistema tal-pensjonijiet. Huwa essenzjali li wieħed itejjeb il-livell
ta’ parteċipazzjoni fis-suq tax-xogħol, b’mod partikulari
min-naħa tan-nisa, u li wieħed joħloq iktar opportunitajiet
tax-xogħol għal dawk li ilhom żmien twil bla xogħol.
Għall-kompetittività huwa kruċjali li wieħed jieħu iktar
passi sabiex tittejjeb il-kwalità tas-servizzi pubbliċi u tal-qafas
regolatorju, kif ukoll il-kwalità tal-edukazzjoni terzjarja. (16)
Fid-dawl ta’ din il-valutazzjoni, u filwaqt li
titqies ukoll ir-Rakkomandazzjoni tal-Kunsill
tat- 2 ta’ Diċembru 2009 skont l-Artikolu 126(7)
tat-Trattat dwar il-Funzjonament tal-Unjoni Ewropea, il-Kunsill eżamina
l-aġġornament tal-2011 tal-Programm ta’ Konverġenza
tar-Repubblika Ċeka u l-opinjoni tiegħu[5] tidher b’mod partikulari
fir-rakkomandazzjonijiet tiegħu mogħtija fil-punti (1) u (2)
t’hawn taħt. Filwaqt li jitqiesu l-konklużjonijiet tal-Kunsill
Ewropew tal-25 ta’ Marzu 2011, il-Kunsill eżamina
l-Programm Nazzjonali ta’ Riforma tar-Repubblika Ċeka, JIRRAKKOMANDA li r-Repubblika Ċeka
għandha tieħu azzjoni fil-perjodu mill-2011 sal-2012 sabiex: (1)
Timplimenta l-konsolidazzjoni ppjanata fl-2011 u
tieħu miżuri kumpensatorji ta’ natura permanenti fil-każ ta’
kwalunkwe nuqqasijiet fid-dħul ippjanat jew devjazzjonijiet fin-nefqa.
Hija għandha tadotta l-miżuri fiskali kif ippjanati fil-programm għall-2012
u għandha tibbaża l-mira tal-2013 fuq miżuri iktar
speċifiċi. Għandha tevita li tnaqqas in-nefqa fuq affarijiet li
jtejbu t-tkabbir u għandha tisfrutta l-lok li hemm għal żidiet
fid-dħul mit-taxxa indiretta, għandha ttejjeb il-konformità fil-qasam
tat-taxxi u tnaqqas l-evażjoni tat-taxxa. (2)
Tintroduċi riforma sħiħa tas-sistema
tal-pensjonijiet sabiex ittejjeb is-sostenibbiltà fit-tul tal-finanzi
pubbliċi u tiżgura s-suffiċjenza tal-pensjonijiet
fil-ġejjieni. L-isforzi għandhom
jiffukaw l-ewwel nett fuq iktar tibdil fil-pilastru pubbliku, inkluża
żieda iktar mgħaġġla fl-età statutarja tal-irtirar milli
huwa ppjanat, appoġġata minn miżuri li jippromwovu l-impjieg ta’
ħaddiema iktar imdaħħlin fl-età; u
t-tieni nett fuq l-iżvilupp tat-tfaddil privat. F’dan
il-kuntest għandu jiġi żgurat li l-iskema ffinanzjata prevista
tattira parteċipazzjoni wiesgħa u li din titfassal b’mod li
l-kostijiet amministrattaivi jkunu trasparenti u baxxi. (3)
Tittejjeb il-parteċipazzjoni fis-suq
tax-xogħol billi jitnaqqsu l-ostakli biex il-ġenituri li
għandhom it-tfal żgħar jerġgħu jidħlu fis-suq
tax-xogħol permezz ta’ iktar faċilitajiet għall-indukrar
tat-tfal li huma għall-but ta’ kulħadd u ta’ aċċess akbar
għalihom. Għandha tiżdied l-attrazzjoni u d-disponibbiltà ta’
forom ta’ arranġamenti tax-xogħol li huma iktar flessibbli,
bħall-impjiegi part-time. (4)
Tissaħħaħ il-kapaċità
tas-servizz pubbliku tal-impjiegi sabiex tiżdied il-kwalità u
l-effikaċja tat-taħriġ, tal-għajnuna fit-tfittxija
għal xogħol u tas-servizzi personalizzati, billi l-fondi tal-programmi
jkunu marbutin mar-riżultati. Filwaqt li
jiġu kkonsultati l-partijiet interessati, għandhom
jiddaħħlu programmi speċifiċi tat-taħriġ, li
jkunu adattati għall-ħaddiema li huma mdaħħlin fl-età,
għaż-żgħażagħ, għall-persuni bi ftit
kompetenzi, u għal gruppi vulnerabbli oħrajn. (5)
Tieħu l-miżuri meħtieġa sabiex
tittejjeb il-kwalità tas-servizzi pubbliċi f’oqsma li huma essenzjali
għall-ambjent tan-negozju. F'dan il-kuntest għandha tiġi
implimentata b’rata iżjed mgħaġġla l-istrateġija
għal kontra l-korruzzjoni skont miri identifikati, għandu jiġi
adottat l-Att dwar il-ħaddiema taċ-ċivil sabiex ikunu promossi
l-istabbiltà u l-effikaċja tal-amministrazzjoni pubblika u għandu
jiġi rrivedut il-Kodiċi Kummerċjali sabiex titneħħa
s-sjieda anonima tal-ishma. (6)
Għandha tiġi stabbilita sistema
trasparenti għall-evalwazzjoni tal-kwalità tal-istituzzjonijiet
akkademiċi u din għandha tintrabat mal-finanzjament tagħhom,
sabiex tittejjeb il-prestazzjoni tal-edukazzjoni terzjarja. Magħmul fi Brussell, Għall-Kunsill Il-President [1] ĠU L 209, 2.8.1997,
p. 1. [2] ĠU C , , p. . [3] Miżmuma għall-2011 permezz
tad-Deċiżjoni tal-Kunsill 2011/308/UE
tad-19 ta’ Mejju 2011. [4] SEC(2011) 712. [5] Prevista fl-Artikolu 9(3) tar-Regolament
tal-Kunsill (KE) Nru 1466/97.