52011SC0537

DOKUMENT TA’ ĦIDMA MILL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Flimkien mad-dokument ta'

Proposta għal

REGOLAMENT TAL-PARLAMENT EWROPEW U TAL-KUNSILL dwar l-applikazzjoni ta' skema ta’ preferenzi tariffarji ġeneralizzati

1. Definizzjoni tal-problema

1.1 Daħla

Is-Sistema Ġeneralizzata ta' Preferenzi ("l-iskema") tgħin lill-pajjiżi li qegħdin jiżviluppaw, u b'mod partikolari l-Pajjiżi l-Anqas Żviluppati (LDCs), biex inaqqsu l-faqar billi toffrilhom preferenzi għall-importazzjoni biex jiġġeneraw jew jagħtu spinta lid-dħul mill-kummerċ internazzjonali. Barra minn hekk l-iskema tagħti l-inċentivi fil-forma ta' preferenzi addizzjonali fuq it-tariffi lill-pajjiżi li jimpenjaw ruħhom għall-iżvilupp sostenibbli u għaltmexxija tajba. Bħalissa l-iskema qed timmira li tikseb l-għanijiet stipulati fil-Komunikazzjoni mingħand il-Kummissjoni lill-Kunsill, lill-Parlament Ewropew u lill-Kumitat Ekonomiku u Soċjali dwar il-funzjonament tas-Sistema Ġeneralizzata ta' Preferenzi (GSP) għall-għaxar snin ta' bejn l-2006 u l-2015. L-iskema tagħti aċċess preferenzjali għas-swieq tal-UE b'mod ġenerali u mhux diskriminatorju lil 176 pajjiż u territorju eliġibbli. Għandha tliet tipi ta' arranġament:

· l-arranġament ġenerali (ta' sikwit deskritt sempliċiment bħala "GSP");

· l-arranġament inċentiv speċjali għall-iżvilupp sostenibbli u għal tmexxija tajba (deskritt bħala "GSP+") li joffri preferenzi addizzjonali bħala inċentivi li jappoġġaw lill-pajjiżi vulnerabbli li qegħdin jiżviluppaw biex jirratifikaw u jimplimentaw 27 konvenzjoni internazzjonali dwar id-drittijiet tal-bniedem u tax-xogħol, dwar l-ambjent u t-tmexxija tajba.

· l-arranġament Kollox Minbarra l-Armi (EBA), li jipprovdi aċċess mingħajr dazju u mingħajr kwota lil-LDCs.

L-iskema preżenti GSP hija implimentata permezz ta' regolamenti suċċessivi, li kull wieħed minnhom japplika għal tliet snin. Ir-regolament kurrenti GSP se jiskadi fil-31 ta’ Diċembru 2011. Fis-26 ta' Mejju 2010, il-Kummissjoni adottat proposta biex testendi l-validità tar-regolament kurrenti sal-31 ta' Diċembru 2013 biex tagħti ż-żmien għall-preparazzjoni tar-reviżjoni tal-iskema GSP minħabba l-proċeduri itwal imdaħħlin bit-Trattat ta' Lisbona. Reviżjoni reċenti ta' nofs it-terminu turi l-isfond tal-proposta ppjanata tal-Kummissjoni għal regolament rivedut li jieħu post l-iskema eżistenti malli din tiskadi fl-2013. Kemm l-arranġament EBA kif ukoll id-dispożizzjonijiet dwar ir-regoli tal-oriġini ma jidħlux fl-ambitu ta' din ir-reviżjoni: dak tal-ewwel, minħabba li mhuwiex suġġett għal reviżjonijiet perjodiċi; u tal-aħħar għaliex fl-2011 daħlet fis-seħħ leġiżlazzjoni ġdida dwar ir-regoli tal-oriġini.

1.2 Konsultazzjoni u għarfien espert

Din l-istima tal-impatt saret wara konsulti fil-fond mal-Istati Membri u partijiet interessati oħra (inklużi s-soċjetà ċivili, l-industrija, pajjiżi benefiċjarji, il-Parlament Ewropew, u l-membri tad-WTO). L-ideat tal-partijiet interessati tqiesu, kif inhu enfasizzat ħafna drabi fir-rapport ewlieni. Intlaħqu l-istandards minimi tal-Kummissjoni għall-konsulti. Biex jiġi stmat safejn l-iskema tal-UE tilħaq il-ħtiġijiet tal-pajjiżi li qegħdin jiżviluppaw, saret valutazzjoni ta' nofs it-terminu minn konsulent barrani: Centre for Analysis of Regional Integration (iċ-Ċentru għall-Analiżi tal-Integrazzjoni Reġjonali) f'Sussex (CARIS). Ir-rapport finali ġie ppubblikat fis-26 ta' Mejju 2010 fil-websajt tad-DĠ għall-Kummerċ[1]. Ir-riżultati ta' dan l-istudju jidhru fir-rapport ewlieni tal-istima tal-impatt fejn hu relevanti.

1.3 Il-punti sodi u l-punti dgħajfa tal-iskema GSP

Il-valutazzjoni tal-CARIS tal-iskema eżistenti GSP (2010) ikkonkludiet li:

· hemm evidenza ċara li l-preferenzi GSP tal-UE jistgħu jkunu effettivi biex iżidu l-esportazzjonijiet u l-benessri tal-pajjiżi fi stat ta' żvilupp;

· ir-rati tal-użu tal-iskema/i GSP huma għoljin, u kkorrelatati pożittivament mal-marġni tat-tariffi u tal-preferenzi;

· il-pajjiżi esportaturi jaqbdu madwar nofs il-qligħ idderivat mill-marġnijiet ta' preferenza;

· ir-reġim GSP+ kellu impatt pożittiv fuq ir-ratifika tas-27 konvenzjoni internazzjonali mitluba għall-eliġibbiltà, iżda l-progress rigward l-implimentazzjoni tagħhom huwa ħafna inqas ċar.

B'danakollu l-iskema hija soġġetta għal għadd ta' restrizzjonijiet strutturali u ta’ natura oħra (li huma ddettaljati kemm fl-istudju tal-CARIS kif ukoll fir-rapport ewlieni). Hemm ukoll numru ta' kwistjonijiet speċifiċi li hemm bżonn li jiġu indirizzati fil-proċess tar-reviżjoni; taqsira ta' dawn tidher fid-dijagramma analitika tal-problemi fil-paġna segwenti.

Għażla ta' benefiċjarji li mhijiex ideali

Titpoġġa ħafna pressjoni kompetittiva fuq Pajjiżi Anqas Żviluppati minn benefiċjarji oħrajn GSP. Bosta pajjiżi bi dħul għoli (HICs) jibqgħu benefiċjarji fuq il-pretest li ma għandhomx biżżejjed diversifikazzjoni. Dawn il-pajjiżi għandhom ir-riżorsi biex jiksbu livelli ogħla ta' diversifikazzjoni mingħajr l-għajnuna tal-preferenzi tal-UE. L-istess jista' jintqal dwar il-pajjiżi hekk imsejħin bi Dħul Medju Għoli (UMIs). U l-pajjiżi li jibbenefikaw minn preferenzi meħudin minn arranġament mal-UE bilaterali preferenzjali ieħor, ukoll jibqgħu jibbenefikaw mill-iskema GSP. L-użu ta' preferenzi GSP mill-HICs, l-UMIs u pajjiżi li diġà jibbenefikaw minn arranġamenti bilaterali preferenzjali oħra jżid il-pressjoni kompetittiva fuq l-esportazzjonijiet minn pajjiżi li huma ifqar u iżjed vulnerabbli, li l-bżonnijiet tagħhom huma ħafna ikbar u għalhekk jistħoqqilhom iżjed attenzjoni.

Mekkaniżmu ta' gradwazzjoni mhux ideali

Ekonomiji emerġenti li qed jiżviluppaw iġġenerew setturi tal-manifatturi orjentati għall-esportazzjoni li qegħdin jirnexxu ħafna u li huma kompetittivi ħafna f'livell dinji. Dawn is-setturi jirċievu l-benefiċċji taħt l-iskema, allavolja jista' jingħad li ma għadx għandhom bżonn il-preferenzi biex ikollhom preżenza sostanzjali fl-UE. Jagħmlu pressjoni kompetittiva fuq l-industrija tal-UE; u jagħmluha iżjed diffiċli li jidħlu pajjiżi ifqar li, b'konsegwenza ta' dan, iridu jagħmlu sforzi dejjem akbar biex jiddiversifikaw il-bażi ta' esportazzjoni tagħhom. L-iskema GSP għandha mekkaniżmu li jelimina s-setturi kompetittivi minn pajjiżi speċifiċi u jirtira l-preferenzi – il-mekkaniżmu ta' gradwazzjoni. Iżda dan bilkemm intuża bl-iskema kurrenti. Minn total ta' 'l fuq minn 2400 settur marbut ma' pajjiżi, ġew iggradwati 20 biss, li 13 minnhom huma setturi Ċiniżi. Dan juri li l-mekkaniżmu ta' gradwazzjoni attwali mhuwiex sensittiv biżżejjed biex jiżgura l-effikaċja u l-effiċjenza tal-iskema. Dgħufija oħra kbira tal-mekkaniżmu ta' gradwazzjoni hija li l-gradwazzjoni hija bbażata fuq taqsimiet tal-iskeda tat-Tariffi Doganali tal-UE li tant huma kbar u eteroġenji li l-prodotti mhux neċessarjament kompetittivi jiġu esklużi għar-raġuni sempliċi li qegħdin f'kategorija fejn jippredominaw prodotti minn industrija kompletament differenti iżda kompetittiva ħafna.

Kopertura insuffiċjenti tal-prodotti

L-iskema GSP għandha kopertura wiesgħa tal-prodotti, iżda din mhijiex sħiħa. Bħalissa, 9 % tal-linji tariffarji kollha huma barra mill-iskema u soġġetti għal tariffi pożittivi. Il-pajjiżi li huma l-iżjed fil-bżonn xi drabi ma jirnexxilhomx jiksbu l-aċċess għas-suq tal-UE għaliex ikunu jridu jesportaw xi wħud minn dawn il-prodotti. Limitazzjoni oħra de facto fuq il-kopertura tal-prodotti tirriżulta mit-tqassim tal-linji tal-prodotti f'dawk sensittivi u dawk li mhumiex sensittivi: prodotti li mhumiex sensittivi jgawdu l-aċċess mingħajr dazju, iżda l-prodotti sensittivi jiksbu tnaqqis tariffarju ta' 3,5 punti perċentwali fuq id-dazji ad valorem.

Appoġġ insuffiċjenti għad-diversifikazzjoni tal-esportazzjonijiet

L-għan oriġinali tal-iskemi ġeneralizzati ta' preferenzi kien jappoġġja d-diversifikazzjoni permezz tal-industrijalizzazzjoni. Iżda l-valutazzjoni tal-2010 sabet li meta l-benefiċjarji u l-prodotti kollha jitqiesu flimkien, id-diversifikazzjoni hija fil-biċċa l-kbira limitata għall-prodotti esportati mill-ekonomiji emerġenti li għandhom marġni preferenzjali baxxi. L-inklużjoni fl-iskema kurrenti ta' pajjiżi GSP li bilkemm jikkwalifikaw bħala pajjiżi li huma l-iżjed fil-bżonn (HICs u UMIs) u li jagħmlu pressjoni sinifikanti fuq prodotti EBA u GSP+ fl-iskema li jkunu qed jikkompetu magħhom – flimkien mal-mekkaniżmu ta' gradwazzjoni dgħajjef – jagħmilha iżjed diffiċli għall-pajjiżi foqra u vulnerabbli biex jiddiversifikaw għaliex il-pajjiżi GSP jieħdu l-maġġoranza tal-preferenzi.

Inkonsistenza mal-għanijiet ġenerali tal-kummerċ

L-eżistenza ta' benefiċċji GSP tista' ddgħajjef l-inċentivi tal-pajjiżi benefiċjarji li jinnegozjaw il-ftehimiet kummerċjali bilaterali jew multilaterali. B'kuntrast għal dan, l-għan li l-benefiċċji GSP jiġu ffokati fuq dawk il-pajjiżi li l-iżjed għandhom bżonn jista' jkollu l-konsegwenza mhux mistennija li jagħti inċentiv akbar lill-pajjiżi li qed jiżviluppaw li huma aktar żviluppati biex jibdew u jikkonkludu n-negozjati kummerċjali reċiproki mal-UE.

Utilizzazzjoni baxxa tal-preferenzi minn xi pajjiżi

Il-pressjoni kompetittiva magħmula mill-benefiċjarji GSP tista' tbaxxi l-istatus tal-pajjiżi GSP+ u tal-LDCs għal dak ta' fornituri reżidwi u irregolari tas-suq tal-UE. Minħabba l-valur baxx tat-tranżazzjonijiet li jiġu konklużi f'dawn il-kundizzjonijiet, l-importaturi għandhom inqas inċentiva biex iħallsu l-ispejjeż li huma involuti fit-talba għall-preferenzi (pereżempju biex wieħed jikseb jew jamministra ċ-ċertifikati ta' oriġini). Għaldaqstant, ħafna preferenzi ma jiġux utilizzati.

Appoġġ insuffiċjenti tas-sostenibbiltà u l-governanza tajba

Il-kriterji ta' vulnerabbiltà kurrenti li jiddeterminaw l-eliġibbiltà għall-GSP+ huma ristrettivi żżejjed. Dan jillimita kemm il-GSP+ tista' tippromwovi l-iżvilupp sostenibbli u l-governanza t-tajba, fis-sens li rekwiżit għall-eliġibbiltà inqas ristrettiv jista' jkun ta' inċentiv għal numru akbar ta' pajjiżi biex jirratifikaw u jimplimentaw regoli u standards internazzjonali u biex jagħmlu r-riformi interni. Il-kundizzjoni għall-aċċess għall-GSP+ (li l-pajjiż ikun mhux biss irratifika, iżda wkoll "implimenta b'mod effettiv" il-konvenzjonijiet) tagħmel limiti bla bżonn; ma tappoġġjax dan it-tip ta' skema bbażata fuq l-inċentivi. Minħabba li hemm il-perjodi ta' żmien limitati għad-dħul fil-GSP+ (li jkunu miftuħa għad-dħul darba kull 18-il xahar biss) il-benefiċjarji potenzjali ma jkunux jistgħu jidħlu fl-iskema malli jissodisfaw ir-rekwiżiti kollha għad-dħul. Skont l-iskema kurrenti, il-Kummissjoni trid tissorvelja l-istatus ta' ratifikazzjoni u l-implimentazzjoni effettiva tas-27 konvenzjoni speċifikata billi teżamina l-informazzjoni disponibbli li tasal mingħand il-korpi ta' sorveljanza relevanti. Iżda l-mekkaniżmu ta' sorveljanza għall-implimentazzjoni tal-konvenzjonijiet juri għadd ta' dgħufijiet sostanzjali.

Mekkaniżmu ta' ħarsien mhux adegwat

Ġew identifikati bosta dgħufijiet fil-mekkaniżmu ta' ħarsien tal-GSP, partikolarment in-nuqqas ta' definizzjoni tal-kunċetti legali ewlenin; in-nuqqas ta' definizzjoni tad-drittijiet u l-obbligi tal-partijiet involuti f'investigazzjoni; u l-qafas proċedurali mhux iddefinit sew.

2. Analiżi tas-Sussidjarjetà

Il-bażi legali għall-azzjoni tal-Komunità f'din il-kwistjoni hija l-Artikolu 207 tat-Trattat dwar il-Funzjonament tal-Unjoni Ewropea (minn hawn 'il quddiem it-TFUE). Il-prinċipju tas-sussidjarjetà ma japplikax f'dan il-każ. Il-prinċipju tal-proporzjonalità huwa sodisfatt meta jitqies li r-regolament huwa l-uniku tip ta' azzjoni xierqa li tista' tieħu l-Unjoni Ewropea biex tistabbilixxi l-aċċess preferenzjali għas-suq unilaterali u mhux reċiproku għall-pajjiżi li qed jiżviluppaw.

3. Għanijiet

3.1 Għanijiet ġenerali

L-iskema għandha tliet għanijiet ġenerali:

1.           Li tikkontribwixxi għall-qerda tal-faqar billi tkabbar l-esportazzjonijiet minn dawk il-pajjiżi li iżjed huma fil-bżonn (G-1);

2.           Li tippromwovi l-iżvilupp sostenibbli u l-governanza t-tajba (G-2);

3.           Li tiżgura ħarsien aħjar għall-interessi finanzjarji u ekonomiċi tal-UE (G-3).

3.2 Għanijiet speċifiċi u operazzjonali

Għall-perjodu ta' bejn l-2006 u l-2015 il-Komunikazzjoni dwar il-GSP tal-Kummissjoni stabbiliet l-għanijiet li ġejjin għall-iskema:

1.           Li jinżammu preferenzi tariffarji ġenerużi li jkomplu jipprovdu inċentivi veri biex il-pajjiżi li qegħdin jiżviluppaw iżidu l-esportazzjonijiet tagħhom b'mod sostenibbli;

2.           Li l-preferenzi jkunu mmirati lejn il-pajjiżi li l-iżjed għandhom bżonnhom billi jintemm l-aċċess preferenzjali għal dawk il-pajjiżi li ma għadx għandhom bżonnu, u billi jkun żgurat li r-rati preferenzjali GSP jiġu rtirati minn fuq il-prodotti kompetittivi;

3.           Li ssir disponibbli skema ta' preferenzi sempliċi, prevedibbli u faċilment aċċessibbli;

4.           ³Li l-iżvilupp sostenibbli u l-governanza t-tajba jkomplu jkunu mħeġġa;

5.           Li jkun hemm ipprovduti l-mekkaniżmi għall-irtirar u l-istrumenti ta' ħarsien biex ikun żgurat li jkunu mħarsin l-aspetti marbutin mal-iżvilupp sostenibbli u mal-governanza t-tajba tal-GSP u l-interessi finanzjarji u ekonomiċi tal-UE.

Biex ikun aċċertat li l-għażliet politiċi li jitqiesu jkunu dawk l-iżjed adattati biex jilħqu l-għanijiet ġenerali tal-iskema f'ambjent ekonomiku dinji li qed jinbidel, dawn l-għanijiet inbidlu f'għanijiet speċifiċi u operazzjonali:

L-għanijiet speċifiċi huma dawn li ġejjin:

1.           Li l-preferenzi jkunu ffokati aħjar fuq dawk il-pajjiżi li l-iżjed qegħdin fil-bżonn (S-1);

2.           Li jitneħħew id-diżinċentivi għad-diversifikazzjoni għal dawk il-pajjiżi li l-iżjed qegħdin fil-bżonn (S-2);

3.           Li tikber il-konsistenza ma' għanijiet ġenerali tal-kummerċ (bilaterali u multilaterali, S-3);

4.           Li jissaħħaħ l-appoġġ tal-iżvilupp sostenibbli u tal-governanza t-tajba (S-4);

5.           Li tittejjeb l-effiċjenza tal-mekkaniżmi ta' ħarsien li jiżguraw li l-interessi finanzjarji u ekonomiċi tal-UE jkunu mħarsin (S-5);

6.           Li tittejjeb iċ-ċertezza legali, l-istabbiltà u prevedibbiltà tal-iskema (S-6).

L-għanijiet operazzjonali huma dawn li ġejjin:

1.           Li l-lista tal-pajjiżi benefiċjarji tiġi rreveduta billi jiġu ddiferiti l-benefiċċji għal dawk il-pajjiżi li, skont il-bżonnijiet ta' żvilupp, u l-bżonnijiet finanzjarji u kummerċjali, ma għadx għandhom bżonn il-preferenzi;

2.           Li l-gradwazzjoni tkun immirata lejn il-benefiċjarji ewlenin, u b'hekk ikun żgurat li r-rati preferenzjali GSP jiġu rtirati għall-prodotti kompetittivi;

3.           Li t-taqsimiet tal-prodotti jiġu ddefiniti mill-ġdid biex jirriflettu kategoriji aktar omoġenji tal-prodotti;

4.           Li jiġi ssimplifikat il-mekkaniżmu għad-dħul fil-GSP+;

5.           Li jiġi żviluppat mekkaniżmu aktar effettiv u trasparenti għas-sorveljanza u l-valutazzjoni tal-impenn u l-progress tal-pajjiżi fil-GSP+ fl-implimentazzjoni tal-konvenzjonijiet tal-GSP+;

6.           Li jiġu żviluppati proċeduri kredibbli u effiċjenti għall-irtirar temporanju tal-preferenzi u proċeduri għat-tiġdid tal-preferenzi;

7.           Li jittejbu l-proċeduri amministrattivi tal-mekkaniżmi ta' ħarsien.

4.Għażliet politiċi

It-tabella bl-informazzjoni mqassra turi sett ta' għażliet politiċi ewlenin li ġew identifikati bħala rappreżentattivi tat-toroq ewlenin li jistgħu jintgħażlu.

Għażla || Karatteristiċi ewlenin

L-għażla A: Waqfien || Il-preferenzi għall-benefiċjarji tal-GSP u GSP+ jiġu abbandunati. Jibqa' l-arranġament EBA.

L-għażla B: Kollox jibqa’ kif inhu LINJA BAŻI || Il-politika kurrenti tkompli mingħajr tibdil. Din l-għażla għandha żewġ xenarji bażi: B1 (għal żmien qasir) – it-tkomplija tal-iskema filwaqt li jitqiesu l-istatus kurrenti tal-ftehimiet bilaterali u multilaterali. B2 (għal żmien twil) – it-tkomplija tal-iskema bbażata fuq is-suppożizzjoni li n-negozjati multilaterali u bilaterali li għadhom għaddejjin se jkunu ġew konklużi b'suċċess

L-għażla C: Tfassil mill-ġdid parzjali || Din hija maqsuma f'żewġ għażliet sekondarji oħra. It-tnejn għandhom xi elementi komuni u xi differenzi - it-tibdiliet tal-għażla C1 huma inqas minn dawk tal-għażla C2. L-elementi komuni għal dawn iż-żewġ għażliet sekondarji: 1. Il-preferenzi għal ċerti pajjiżi eliġġibbli jiġu ddiferiti: pajjiżi u territorji barranin; pajjiżi li għandhom dħul għoli u dħul medju għoli; il-pajjiżi li għandhom ftehim kummerċjali preferenzjali li fir-realtà jkopri l-preferenzi kollha. 2. Il-prinċipji tal-gradwazzjoni jiġu riveduti: it-taqsimiet tal-prodotti jiġu ddefiniti mill-ġdid il-gradwazzjoni ma tapplikax għall-pajjiżi GSP+. 3. Il-mekkaniżmu għad-dħul fil-GSP+ jiġi ssimplifikat u jsir iżjed flessibbli: il-pajjiżi jridu jirratifikaw, u mhux jimplimentaw bis-sħiħ il-konvenzjonijiet, filwaqt li jintrabtu li jiggarantixxu l-implimentazzjoni il-pajjiżi jistgħu japplikaw għall-GSP+ f' kwalunkwe ħin. 4. il-mekkaniżmu għas-sorveljanza tal-GSP+ jiġi mffassal mill-ġdid biex itejjeb l-implimentazzjoni tal-konvenzjonijiet. 5. Jiġu introdotti proċeduri iżjed trasparenti u effiċjenti għall-irtirar temporanju tal-preferenzi. 6. Il-proċeduri amministrattivi tal-mekkaniżmi ta' ħarsien jittejbu. L-elementi differenti bejn dawn iż-żewġ għażliet sekondarji: 1. Il-limitu minimu tal-gradwazzjoni L-għażla C1 Il-limitu minimu tal-gradwazzjoni jibqa' l-istess. L-għażla C2 Il-limitu minimu tal-gradwazzjoni jitnaqqas għal 7.5% u l-limitu ta' sikurezza ta' 50% jiġi eliminat. 2. l-kriterju ta' vulnerabbiltà tal-GSP+ L-għażla C1 Il-limitu minimu tas-sehem tal-importazzjoni jiħfief (jiżdied minn 1% għal 2%). L-għażla C2 Il-kriterji tal-vulnerabbiltà jitħassru. 3. Lista ta' konvenzjonijiet GSP+ L-għażla C1 Il-lista tal-konvenzjonijiet GSP+ tibqa' l-istess. L-għażla C2 Il-lista tal-konvenzjonijiet GSP+ titwessa'.

L-għażla D: Tfassil mill-bidu nett || Din l-għażla tinkludi u tkompli tibni fuq il-karatteristiċi tal-għażla C. B'mod partikolari, il-kopertura tal-prodotti tal-iskema titfassal mill-ġdid, bi 3 għażliet sekondarji: L-għażla D1 Il-pajjiżi benefiċjarji kollha jieħdu kopertura tal-prodotti sħiħa u l-prodotti kollha jitqiesu li jkunu mhux sensittivi, ma jkunx hemm gradwazzjoni. L-għażla D2 Għadd ta' prodotti industrijali u agrikoli jgħaddu mil-lista tal-prodotti sensittivi għal-lista tal-prodotti mhux sensittivi. L-għażla D3 Il-lista tal-prodotti li huma koperti mill-iskema tiżdied u tinkludi għadd ta' prodotti industrijali u agrikoli.

5. Analiżi tal-impatti

5.1 Ġenerali

L-importazzjonijiet li jibbenefikaw mill-preferenzi jagħmlu inqas minn 5 % tal-importazzjoni totali tal-UE. Dan ifisser li, filwaqt li l-impatti fuq il-benefiċjarji jistgħu jkunu kbar, l-impatti ġenerali fuq l-UE x'aktarx ikunu limitati. L-impatti ġew stmati abbażi tal-analiżi mwettqa mill-CARIS, u analiżi oħra li twettqet fuq mudell SMART[2], u permezz tal-istudju ta' statistiċi dwar l-importazzjonijiet uffiċjali tal-UE, il-produzzjoni, il-konsum u l-impjieg. L-impjieg huwa l-varjabbli ewlieni użat fl-analiżi tal-impatti soċjali. L-impatti ambjentali huma dejjem baxxi, u ġew analiżżati separatament.

5.2 Kummenti dwar il-linji bażi (B1 u B2)

Hemm tnaqqis naturali fil-livell tad-dazji fuq l-importazzjoni (u għaldaqstant, preferenzi) minħabba t-tnaqqir tal-preferenzi bl-impatt ta' ftehimiet ulterjuri kummerċjali bilaterali u multilaterali. It-tnaqqir tal-preferenzi jnaqqas l-importazzjonijiet li jkunu ġejjin minn pajjiżi benefiċjarji tal-GSP; dan huwa l-isfond attwali li fuqu titwettaq din l-istima. Fl-aħħar nett, meta jkunu ġew implimentati bis-sħiħ il-ftehimiet kollha multilaterali u bilaterali, id-dazji x'aktarx li tant ikunu baxxi li l-idea ta' preferenzi tkun kważi irrilevanti – kif ukoll tkun sistema ġeneralizzata ta' preferenzi. Jista' jkun li jkollhom jitfasslu għodod oħrajn, kompletament differenti minnha. Sakemm jasal dak iż-żmien, il-kwistjoni hija x'jista' jsir biex ngħinu lil dawk il-pajjiżi li l-iżjed għandhom bżonn ta' preferenzi.

5.3 L-għażla A: ma titkompliex

L-għażla A twaqqaf l-iskema GSP filwaqt li żżomm l-iskema EBA li jibbenefikaw minnha l-LDCs. L-importazzjonijiet totali tal-UE jonqsu, iżda b'ammont insinifikanti (madwar EUR sitt biljun, jew inqas minn wieħed fil-mija).

Valutazzjoni ġenerali tal-effetti ekonomiċi, soċjali u ambjentali

Dawn li ġejjin huma l-effetti ġenerali relattivi għal B1. L-effetti ekonomiċi u soċjali għall-pajjiżi li l-iżjed qegħdin fil-bżonn mistennija li jkunu negattivi. Jibbenefikaw l-LDCs, iżda dawk il-bosta pajjiżi fi stat ta' żvilupp u s-setturi ekonomiċi li wkoll huma fil-bżonn isofru kif jgħib l-aċċess preferenzjali. Fl-UE jkun hemm tliet elementi li jagħmlu impatt fuq l-effetti ġenerali ekonomiċi u soċjali: surplus għall-produtturi, surplus għall-konsumaturi, u d-dħul mit-tariffi. L-impatti negattivi għall-konsumaturi x'aktarx jiġu kkumpensati bi dħul ogħla mit-tariffi, li huma tal-istess ordni ta’ daqs. L-impatt nett b'hekk ikun iġġenerat mill-benefiċċji għall-produtturi. Kif inhu spjegat hawn fuq, dawn il-benefiċċji ma jkunux, b'mod ġenerali, sinifikanti, iżda b'danakollu jkollhom effetti pożittivi sinifikanti fuq setturi importanti (iz-zokkor, il-frott u l-ħxejjex, id-drappijiet u l-ilbies) – u fuq l-Istati Membri tal-UE fejn dawn is-setturi huma importanti. Għalhekk dawn l-impatti jkunu ġeneralment pożittivi. L-impatti ambjentali fl-UE l-iżjed li jistgħu jkunu pożittivi huwa b'mod negliġibbli, għaliex it-tnaqqis tal-importazzjonijiet ikun minimu. U min-naħa tal-pajjiżi li huma fil-bżonn, hemm il-possibbiltà li jekk jitilfu l-GSP+ jibdew jiddevjaw mill-prattiċi sostenibbli favur l-ambjent. Għaldaqstant, b'mod ġenerali, jista' jinħass impatt minimament negattiv.

A kontra B1. Effetti fuq: || ekonomiċi: || soċjali: || ambjentali:

Pajjiżi li huma l-iżjed fil-bżonn || -- || -- || 0/-

UE || + || + || 0/+

It-tibdiliet mqabblin mal-linja bażi B2 ikunu mistennija li jaqbdu l-istess direzzjoni, iżda jkunu ħafna inqas – tant li ma jinħassux.

5.4 L-għażla C: tfassil mill-ġdid parzjali

L-għażla C hija magħmula minn ħafna elementi. Biex jiġu studjati l-perspettivi differenti ta' dawn l-elementi, ġew studjati żewġ għażliet sekondarji. Id-differenzi ewlenin bejniethom jirrigwardaw il-gradwazzjoni tas-setturi kompetittivi u l-kriterji ta' vulnerabbiltà skont il-GSP+. Rigward il-gradwazzjoni, is-setturi li attwalment se jiġu gradwati mhumiex magħrufin f'dan l-istadju – dan ikun jiddependi fuq il-kalkoli dwar l-importazzjonijiet abbażi tal-iżjed ċifri riċenti disponibbli qabel id-dħul fis-seħħ tar-regolament il-ġdid. Intużaw iċ-ċifri kurrenti b’mod rappreżentattiv. Rigward il-vulnerabbiltà, C1 ittejjeb il-kriterju "ekonomiku" minn wieħed fil-mija għal tnejn fil-mija. Il-pajjiżi li jilħqu l-kriterju mtejjeb f'dan l-istadju għadhom mhumiex magħrufa - dawn il-kalkoli jsiru għal darba oħra abbażi tal-iżjed ċifri riċenti disponibbli qabel id-dħul fis-seħħ tar-regolament il-ġdid. Il-pajjiżi addizzjonali li fil-preżent jkunu kapaċi jilqgħu l-isfida (il-Pakistan, il-Filippini u l-Ukraina) ġew ikkunsidrati bħala rappreżentattivi.

C2 telimina il-kriterji ta' vulnerabbiltà filwaqt li żżid aktar rekwiżiti dwar il-konvenzjonijiet. Bl-istess mod, il-lista reali tal-pajjiżi li jilħqu l-kriterju dwar il-konvenzjonijiet relevanti tkun deċiża kemm jista' jkun qrib iż-żmien tad-dħul fis-seħħ tar-regolament il-ġdid. Bħalissa, nistennew li dawn se jkunu t-tliet pajjiżi C1 u n-Namibja u n-Niġerja (li kollha jkunu diġà rratifikaw il-konvenzjonijiet relevanti), u dawn intużaw bħala rappreżentattivi f'dan l-eżerċizzju. Il-valutazzjoni tibda b'analiżi tal-għażla C1 imbagħad tiddeskrivi d-differenzi ewlenin li joħorġu fl-għażla C2.

5.4.1 L-għażla C1

Valutazzjoni ġenerali tal-effetti ekonomiċi, soċjali u ambjentali

Meta pparagunati mal-linja bażi B1, l-effetti ġenerali tal-għażla C1 huma dawn li ġejjin. L-importazzjonijiet totali tal-UE jonqsu b'madwar EUR erba' biljun (żieda ta' EUR biljun f'importazzjonijiet minn pajjiżi li qatt ma kienu parti mill-iskema, kkumpensati bi tnaqqis ta' EUR ħames biljun fl-importazzjonijiet minn pajjiżi li ma jibqgħux membri tal-iskema. L-effetti ekonomiċi u soċjali fuq il-pajjiżi li l-iżjed qegħdin fil-bżonn huma mistennija li jkunu pożittivi hekk kif l-esportazzjonijiet jiżdiedu u jakkumulaw il-benefiċċji tal-benessri.

Kif jiġri bl-għażla A, l-impatti negattivi għall-konsumaturi tal-UE x'aktarx jiġu kkumpensati bi dħul ogħla mit-tariffi, li jkunu tal-istess ordni ta’ daqs. L-impatt nett b'hekk ikun iġġenerat mill-impatti fuq il-produtturi. Kif inhu spjegat hawn fuq, dawn il-benefiċċji ma jkunux, b'mod ġenerali, sinifikanti, iżda b'danakollu jkollhom effetti negattivi sinifikanti fuq setturi importanti (ir-ross, il-prodotti ta' raba' li jinħadem, iż-żjut u x-xaħmijiet, iz-zokkor, il-frott u l-ħxejjex, id-drappijiet u l-ilbies, u l-ġilda) – u fuq l-Istati Membri tal-UE li dawn is-setturi huma importanti għalihom. Għalhekk dawn l-impatti jkunu ġeneralment negattivi. L-impatti ambjentali fl-UE l-iżjed li jistgħu jkunu pożittivi huwa b'mod negliġibbli, għaliex it-tnaqqis tal-importazzjonijiet ikun minimu. Fil-pajjiżi li huma iżjed fil-bżonn, l-impatt tas-sħubija imkabbra tal-GSP+ ikun, b'mod ġenerali pożittiv b'mod insinifikanti.

C1 kontra B1. Effetti fuq: || ekonomiċi: || soċjali: || ambjentali:

Pajjiżi li huma l-iżjed fil-bżonn || ++ || ++ || 0/+

UE || - || - || 0/+

Meta jitqabblu l-effetti tal-għażla C1 mal-linja bażi B2, it-tibdiliet ikunu mistennija li jkunu fl-istess direzzjoni, iżda jkunu ħafna inqas – u għal darba oħra, tant li ma jinħassux.

5.4.2 L-għażla C2

Hemm differenza importanti bejn is-C2 u s-C1. Limiti aktar baxxi tal-gradwazzjonijiet iżidu l-livell tal-gradwazzjoni b'mod sinifikanti għal ċerti pajjiżi u setturi, b'mod partikolari, għall-Indja. Dan iwassal għal għadd ta' effetti. L-ewwel effett huwa iżjed tnaqqis ta' esportazzjonijiet mill-parteċipanti tal-GSP b'mod ġenerali. It-tieni impatt huwa żieda tal-esportazzjonijiet EBA, hekk kif l-impatti negattivi fuq il-Bangladexx (mistennija bis-C1) jonqsu. Ir-riżultat huwa li, filwaqt li l-effetti pożittivi fuq il-benefiċjarji tal-EBA u tal-GSP+ ma jistgħux jiġu sottovalutati, l-esportazzjonijiet GSP ta' bosta benefiċjarji se jbatu. L-effetti dinamiċi mistennijin li jikkompensaw sew għal dan it-telf statiku, għalhekk l-impatt ġenerali mistenni li jkun pożittiv, iżda żgur li jkun inqas minn tas-C1. Minħabba li l-impatti li jifdal jixbħu ħafna lil tas-C1, it-tabella tal-valutazzjoni ġenerali tas-C2 tkun bħal din ta' hawn taħt:

C2 kontra B1. Effetti fuq: || ekonomiċi: || soċjali: || ambjentali:

Pajjiżi li huma l-iżjed fil-bżonn || + || + || 0/+

UE || - || - || 0/+

5.5 L-għażla D: tfassil mill-bidu nett

Il-biċċa l-kbira tal-komponenti tal-iskema ġew iddefiniti mill-ġdid fl-għażla C. Iżda għadd ta' dawk li ntalbet l-opinjoni tagħhom waqt il-konsulta ssuġġerew twessiegħ kbir taż-żewġ komponenti ewlenin l-oħra fl-iskema: il-medda tal-prodotti koperti u l-marġnijiet ta' preferenza. Għalhekk studjajna wkoll tfassil mill-ġdid komprensiv li jinkludi t-tibdiliet proposti skont l-għażla C, u barra minn dawn tibdiliet għal dawn iż-żewġ komponenti. Biex nissimplifikaw l-analiżi, l-għażliet sekondarji D jiġu kkalkulati bħala inkrementi għas-C2 biss. Huma vvalutati tliet għażliet sekondarji. Id-D1 hija għażla li jkollha effetti mifruxin. Hija tipprovdi t-tkabbir tal-kopertura sħiħa tal-prodotti u l-eliminazzjoni tal-prodotti sensittivi kollha (pereżempju l-estenzjoni tat-trattament ta' bla dazju u bla kwoti tal-pajjiżi EBA) lil dawk il-pajjiżi li l-iżjed għandhom bżonn (kemm jekk huma benefiċjarji tal-GSP jew tal-GSP+). Dan jimplika li l-benefiċjarji li jifdal ma jibqgħux soġġetti għall-gradwazzjoni. Id-D2 u d-D3 ma għandhomx effetti daqshekk mifruxa. Jieħdu l-parametri kollha tas-C2 (inkluża l-gradwazzjoni) u jżidu t-tneħħija parzjali tas-sensittività (D2) u t-twessiegħ parzjali tal-kopertura tal-prodotti (D3).

5.5.1 L-għażla D1: kopertura sħiħa tal-prodotti, tneħħija sħiħa tas-sensittività

Valutazzjoni ġenerali tal-effetti ekonomiċi, soċjali u ambjentali

Meta pparagunati mal-linja bażi B1, l-effetti ġenerali tal-għażla D1 huma kif ġej. Minkejja li l-effetti ekonomiċi u soċjali fuq pajjiżi li huma l-iżjed fil-bżonn huma mistennija li jkunu ġeneralment pożittivi, dawn il-benefiċċji jakkumulaw l-iżjed f'setturi li diġà huma kompetittivi, minn fuq dahar dawk li huma inqas avvanzati. Ikun hemm effetti kbar fid-distribuzzjoni, bis-sehem addizzjonali tal-importazzjonijiet tal-UE maħtuf miċ-Ċina, mill-Indja u minn pajjiżi oħra li qabel kienu soġġetti għall-gradwazzjoni, filwaqt li jkun hemm impatt negattiv fuq bosta pajjiżi li huma l-iżjed fil-bżonn. B'mod partikolari jbatu l-benefiċjarji EBA (l-aqwa eżempju ta' dan ikun il-Bangladexx), u jbatu l-pajjiżi benefiċjarji tal-GSP+ bħall-Pakistan. Il-valutazzjoni pożittiva ġenerali ("+") għalhekk irid ikun fiha gradi ta' differenzi sottili. L-impatti pożittivi għall-konsumaturi tal-UE x'aktarx jiġu kkumpensati bi dħul iżjed baxx mit-tariffi, li jkun tal-istess ordni ta’ daqs. L-impatt nett b'hekk ikun iġġenerat mill-impatti fuq il-produtturi. Kif inhu spjegat fuq, b'mod ġenerali dawn l-impatti ma jkunux sinifikanti, iżda jkollhom effetti negattivi sinifikanti għal setturi importanti – u għall-Istati Membri tal-UE fejn dawn is-setturi huma importanti. Bir-riżultat li dawn l-impatti jkunu ġeneralment negattivi. Minkejja li huma ikbar minn dawk li ġġib magħha l-għażla C, probabbilment ikunu ta' ordni ta’ daqs simili. L-impatti ambjentali fl-UE jkunu minimament negattivi minħabba ż-żieda ġenerali tal-importazzjonijiet. Iż-żieda kbira tal-importazzjonijiet, speċjalment miċ-Ċina jew mill-Indja tista' twassal għal impatti negattivi f'dawn il-pajjiżi wkoll. L-impatt fuq il-pajjiżi GSP+ ikun ġeneralment pożittiv, għaliex minkejja li l-esportazzjonijiet tagħhom jiżdiedu, il-qafas għall-ħarsien ambjentali li jimxu miegħu n-negozji (kollha) jittejjeb billi jżomm mal-konvenzjonijiet ambjentali relevanti. Il-bilanċ ġenerali ta' dawn l-effetti jkun minimament negattiv.

D1 kontra B1. Effetti fuq: || ekonomiċi: || soċjali: || ambjentali:

Pajjiżi li huma l-iżjed fil-bżonn || + || + || 0/-

UE || - || - || 0/-

*Impatti pożittivi ekonomiċi u soċjali għall-pajjiżi li l-iżjed qegħdin fil-bżonn b'mod ġenerali jinnewtralizzaw l-impatti negattivi sinifikanti fuq il-benefiċjarji tal-EBA u l-GSP+.

Meta wieħed jipparaguna l-effetti tal-għażla D1 mal-linja bażi B2, it-tibdiliet ikunu mistennija jmorru fl-istess direzzjoni, biss jiċkienu – iżda xorta waħda li wieħed jinnutahom.

5.5.2 L-għażliet D2 u D3

Dawn l-għażliet jibnu fuq l-għażla C. Biex l-analiżi tkun iżjed sempliċi, waħda biss mill-għażliet, f'dan il-każ is-C2 intużat bħala bażi għad-D2 u d-D3. Ma hemmx raġuni li wieħed jaħseb li jkun hemm differenzi sinifikanti kieku minflok kellha tittieħed bħala bażi s-C1. Billi d-D2 u d-D3 jibdlu l-komponenti wieħed wieħed biss b’paragun mas-C, l-elementi ġodda ewlenin biss jissemmew hawn.

Id-D2 u d-D3 jiġġeneraw it-tnaqqir tal-preferenzi bi żvantaġġ għal-LDCs.

Id-D2 tesplora t-tneħħija tas-sensittività. Kif inhu mistenni, l-impatt immedjat huwa t-tnaqqir tal-preferenzi għall-EBAs, partikolarment fil-konfront tal-kompetituri GSP, li huma r-rebbieħa netti. Billi l-valutazzjoni CARIS għamlitha ċara li l-pajjiżi GSP jagħmlu ħafna pressjoni fuq il-kontropartijiet tagħhom fl-EBA, dan kien mistenni. L-Indja, l-Indoneżja, il-Vjetnam u t-Tajlandja jieħdu l-benefiċċji kważi kollha, filwaqt li l-pajjiżi fl-EBA ma jieħdu kważi xejn. Id-D3 tesplora l-espansjoni tal-prodotti. Huwa previst impatt jixbaħ lil dak li hu deskritt għad-D2: benefiċċji għall-benefiċjarji tal-GSP bil-prezz li jkun hemm tnaqqir tal-preferenzi u telf ta' esportazzjonijiet għall-pajjiżi EBA. Kemm id-D2 u d-D3 b'hekk jikkonfermaw li l-espansjoni tal-prodotti u t-tneħħija tas-sensittività se jiswewlhom prezz li jrid jitħallas minn dawk li huma l-iżjed foqra u li jaggrava t-tnaqqir tal-preferenzi li qegħdin ibatu.

Id-D2 u d-D3 jistgħu jfixklu n-negozjati ta' ftehimiet bilaterali u multilaterali

Mqabblin mal-għażla C, wieħed jista’ jġib l-argument li dawn l-għażliet jistgħu jagħtu sinjal falz lil sħabna fil-kummerċ billi joħolqu l-istennija li jistgħu jinkisbu b'mod awtomatiku mingħand l-UE fin-negozjati bilaterali jew multilaterali, il-konċessjonijiet fuq prodotti li ddaħħlu fl-iskema GSP jew li tneħħitilhom is-sensittività. It-tibdiliet introdotti mid-D2 u d-D3 mhumiex kbar biżżejjed biex ivarjaw l-ordni tal-kobor tal-bqija tar-riżultati tal-għażla C. Iżda l-produtturi tal-UE ta' prodotti ġodda mdaħħlin fl-iskema GSP, u ta' prodotti li jieħdu marġnijiet ta' preferenza ogħla permezz tat-tneħħija tas-sensittività, ibatu aktar pressjoni.

6. Tqabbil tal-għażliet

6.1 Reviżjoni tal-għażliet differenti skont l-għanijiet u l-impatti

It-tabella ta' hawn taħt tqabbel kemm l-għażliet differenti jilħqu sew l-għanijiet mixtieqa permezz ta' reviżjoni tal-iskema. Dan il-paragun huwa bbażat fuq tliet kriterji: l-effettività (in-numru ta' għanijiet li jintlaħqu, sa fejn jintlaħqu); effiċjenza (użu tar-riżorsi meħtieġa biex jintlaħqu l-għanijiet, effetti sekondarji mhux mixtieqa); u l-konsistenza mal-għanijiet tal-UE li jolqtu kwistjonijiet diversi.

Għażliet || A || C1 || C2 || D1 || D2 || D3

L-Effettività || - || ++++ || +++ || -- || ++ || ++

L-Effiċjenza || -- || +++ || ++ || -- || + || +

Il-Konsistenza || ++++ || ++ || ++ || --- || + || +

Issegwi analiżi dettaljata bbażata fuq l-effiċjenza u l-effikaċja relattivi ta' kull waħda mill-għażliet biex jinkisbu l-għanijiet strateġiċi ġenerali.

6.2 L-effikaċja tal-għażliet politiċi fil-kisba tal-għanijiet ġenerali u speċifiċi

L-għażla A:

L-għażla A tilħaq biss parzjalment l-għan ġenerali G-1 (kontribuzzjoni għall-qerda tal-faqar permezz tal-espansjoni tal-esportazzjonijiet minn pajjiżi li huma l-aktar fil-bżonn). Jekk jiġu ffokati l-preferenzi fuq l-LDCs, dan iħalli ħafna pajjiżi oħra bl-istess bżonnijiet kummerċjali, ta' żvilupp, u finanzjarji, mingħajr preferenzi (għan speċifiku S-1) – bil-konsegwenza ta' impatti ekonomiċi u soċjali negattivi. Barra minn hekk, jekk jitneħħew il-preferenzi minn xi pajjiżi li huma l-iżjed fil-bżonn, dan jesponi s-setturi tal-esportazzjoni f'dawk il-pajjiżi għall-kompetizzjoni minn pajjiżi żviluppati. L-għażla A tmur direttament kontra l-għan speċifiku S-4 u l-għan ġenerali G-2 (li jippromwovi l-iżvilupp sostenibbli u l-governanza t-tajba). U ma tgħinx biex tiżgura salvagwardji mtejbin għall-interessi finanzjarji u ekonomiċi tal-UE (għan ġenerali G-3 u għan speċifiku S-5). B'kuntrast għal dan, l-għażla A tista' tagħti iżjed forza lill-UE fin-negozjati bilaterali u multilaterali (għan speċifiku S-3). Ikollha impatti ekonomiċi u soċjali pożittivi għal ċerti setturi f'ċerti Stati Membri fi żmien meta teżisti enfażi kbira fuq l-inkoraġġiment tal-kompetittività, tat-tkabbir u tal-ħolqien tal-impjiegi. U fl-aħħar nett, fi żmien ta' pressjoni kbira fuq il-finanzi pubbliċi, din iżżid id-dħul mit-tariffi.

L-għażla C1

L-għażla C1 tikkontribwixxi tajjeb lejn l-għan ġenerali G-1 (kontribuzzjoni għall-qerda tal-faqar permezz tal-espansjoni tal-esportazzjonijiet minn pajjiżi li huma l-aktar fil-bżonn). B'mod partikolari, tiżgura li l-preferenzi jkunu mmirati sew lejn l-iżjed pajjiżi li għandhom bżonnhom (S-1) u tnaqqas id-diżinċentiv għad-diversifikazzjoni (S-2) li huwa riżultat tal-pressjoni kompetittiva li ssir minn benefiċjarji aktar żviluppati tas-sistema preżenti. L-għaqda ta' mekkaniżmu tad-dħul fil-GSP+ aktar flessibbli, ta' kriterji kummerċjali għall-eliġibbiltà aktar flessibbli, u ebda gradwazzjoni tal-għażla C1 tkun tagħti spinta għall-kontribut tal-iskema li tippromwovi l-iżvilupp sostenibbli u l-governanza t-tajba (G-2 u S-4). Ittejjeb l-effiċjenza tal-istrument ta' ħarsien (S-5) u l-mekkaniżmu ta' rtirar, li t-tnejn li huma jkunu jikkontribwixxu għall-G-3. Tkabbar ukoll id-dħul mit-tariffi. Ikollha l-effetti mhux intenzjonati li tagħti iżjed forza lill-UE fin-negozjati kummerċjali bilaterali u multilaterali (iżda fir-rigward ta' inqas pajjiżi milli bl-għażla A). Iżda jkun hemm ukoll impatti ekonomiċi u soċjali negattivi għal ċerti setturi f'ċerti Stati Membri.

L-għażla C2

Id-differenza ewlenija bejn is-C2 u s-C1 hija li bis-C2 il-limiti iżjed baxxi tal-gradwazzjoni jnaqqsu l-esportazzjonijiet totali tal-pajjiżi li l-iżjed qegħdin fil-bżonn. Barra minn hekk, iżjed ma jidħlu pajjiżi benefiċjarji tal-GSP+ li jidħlu fl-iskema, iżjed tkun il-pressjoni kompetittiva fuq l-LDCs - l-iżjed foqra fost il-pajjiżi li qegħdin fi stat ta' żvilupp. Minħabba dawn l-effetti, is-C2 hija mod inqas effettiv biex jintlaħaq l-għan ġenerali G-1 (li jgħin fil-qerda tal-faqar). Iżda hija aħjar mis-C1 fl-effettività tal-għajnuna tagħha biex jinkiseb il-G-2 (il-promozzjoni tal-iżvilupp sostenibbli) għaliex tipprevedi reviżjoni tal-konvenzjonijiet meħtieġa.

L-għażla D (l-għażla D1 biss ġiet diskussa fis-sommarju eżekuttiv)

L-għażla D1 hija mmirata lejn dawk il-pajjiżi li l-iżjed jinstabu fil-bżonn billi tiddiferixxi l-preferenzi għall-benefiċjarji li huma biżżejjed għonja u għal dawk li jgawdu l-aċċess preferenzjali permezz ta' ftehim bilaterali. Iżda telimina kompletament il-gradwazzjoni, u toffri t-trattament ta' ekwivalenza għall-EBA lill-benefiċjarji kollha (dan jaċċellera t-tnaqqir tal-preferenzi għal dawk li huma l-iżjed foqra). Għaldaqstant, b'mod ġenerali, ma tistax tingħadd bħala waħda li tilħaq l-għan G-1. Bl-istess mod, l-għan G-2 (il-promozzjoni tal-iżvilupp sostenibbli permezz tal-inċentivi tal-GSP+) jintilef kompletament meta t-trattament ta' ekwivalenza għall-EBA jinagħta lill-benefiċjarji kollha. L-għażla D1 ittejjeb l-effiċjenza tal-mekkaniżmu ta' ħarsien (S-5) u tal-mekkaniżmu tal-irtirar (S-6), u b'hekk tikkontribwixxi b'mod pożittiv għall-ħarsien tal-interessi finanzjarji u ekonomiċi tal-UE (l-għan ġenerali G-3). Iżda d-D1 mistennija li tnaqqas id-dħul mit-tariffi fi żmien ta' pressjoni kbira ħafna fuq il-finanzi pubbliċi. Tikkawża wkoll impatti ekonomiċi u soċjali negattivi f'ċerti setturi industrijali u f'ċerti Stati Membri. U tkun iddgħajjef b'mod sinifikanti l-pożizzjoni negozjattiva tal-UE fil-kuntest bilaterali u multilaterali (għan speċifiku S-3).

6.3 L-għażla ppreferita

L-għażla li tilħaq l-għanijiet tal-iskema bl-iżjed mod effikaċi, effiċjenti u koerenti hija l-għażla C, u partikolarment is-C1. Dan ma jinnegax li s-C2 fiha l-aspetti pożittivi (reviżjoni tal-lista ta' konvenzjonijiet) li jistgħu wkoll jiġu meqjusa.

7. Monitoraġġ u Evalwazzjoni

It-tabella ta' hawn taħt tinkludi suġġerimenti għall-indikaturi li jistgħu jintużaw biex jiġi stmat il-progress u l-effikaċja tal-għażla ppreferita fil-kisba tal-għanijiet politiċi ġenerali.

Għanijiet ġenerali || Indikaturi || Sorsi ta’ informazzjoni

Li tikkontribwixxi għall-qerda tal-faqar billi tkabbar l-esportazzjonijiet minn dawk il-pajjiżi li iżjed huma fil-bżonn || - tkabbir tal-esportazzjonijiet għall-UE minn pajjiżi fi stat ta' żvilupp - sehem akbar ta' importazzjonijiet mill-iktar pajjiżi foqra - utilizzazzjoni akbar tal-preferenzi - gradwazzjoni effettiva tas-setturi kompetittivi - diversifikazzjoni dejjem tikber || Dejta tal-Eurostat

Li tippromwovi l-iżvilupp sostenibbli u l-governanza t-tajba || - numru akbar ta' pajjiżi li jimpenjaw rwieħhom għall-iżvilupp sostenibbli u prinċipji ta' governanza tajba fi ħdan l-arranġament GSP+ - titjib ġenerali tal-implimentazzjoni tal-konvenzjonijiet GSP+ mill-benefiċjarji tal-GSP+ - numru ta' revoki || - rapporti ta' korpi internazzjonali ta' monitoraġġ relevanti - DĠ TRADE

Li tiżgura ħarsien aħjar għall-interessi finanzjarji u ekonomiċi tal-UE. || - numru ta' talbiet għas-ħarsien - numru ta' miżuri għall-ħarsien - dħul rinunzjat minħabba l-iskema - numru ta' ftehimiet kummerċjali preferenzjali ffirmati mal-benefiċjarji - numru ta' ftehimiet kummerċjali preferenzjali ffirmati ma' pajjiżi li mhumiex benefiċjarji || - Talbiet għall-ħarsien Dejta tal-Eurostat - DĠ TRADE

L-effikaċja tal-iskema GSP għandha tiġi soġġetta għal valutazzjoni formali u indipendenti qabel kull reviżjoni sussegwenti. Biex tkun effettiva, din il-valutazzjoni x'aktarx li jkollha bżonn minimu ta' dejta ta' tliet snin ta' wara l-implimentazzjoni, dan jimplika li l-iżjed kmieni li tista' ssir il-valutazzjoni ma jistax ikun qabel tmiem l-2017

[1]               http://trade.ec.europa.eu/doclib/docs/2010/may/tradoc_146196.pdf

[2]               Mudell żviluppat mill-Bank Dinji b'kollaborazzjoni ma' diversi organizzazzjonijiet internazzjonali.