52011PC0389

MEMORANDUM TA’ SPJEGAZZJONI

Il-Punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda[1] jippermetti l-mobilizzazzjoni tal-Fond Ewropew ta' Aġġustament għall-Globalizzazzjoni (FEG) permezz ta' mekkaniżmu ta' flessibbiltà, bil-limitu massimu annwali ta' EUR 500 miljun lil hinn mill-intestaturi rilevanti tal-qafas finanzjarju.

Ir-regoli applikabbli għall-kontribuzzjonijiet mill-FEG huma stipulati fir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta’ Aġġustament għall-Globalizzazzjoni[2].

Fl-20 ta' Diċembru 2010, il-Pajjiżi l-Baxxi ressqu l-applikazzjoni EGF/2010/030 NL/Noord-Holland u Flevoland Diviżjoni 18 għal kontribuzzjoni finanzjarja mill-FEG, wara sensji f'26 intrapriża li joperaw fid-Diviżjoni 18 tan-NACE Reviżjoni 2 ("l-Istampar u r-Riproduzzjoni ta' Midja Rrekordjata")[3] fir-reġjun NUTS II ta' Noord-Holland (NL32) u Flevoland (NL23) fil-Pajjiżi l-Baxxi.

Din l-applikazzjoni hija parti minn pakkett ta' erba' applikazzjonijiet interrelatati, li kollha jikkonċernaw sensji f'sitt reġjuni NUTS II differenti fil-Pajjiżi l-Baxxi f'intrapriżi li joperaw fis-settur tal-istampar u r-riproduzzjoni ta' midja rrekordjata.

Wara analiżi fil-fond ta' din l-applikazzjoni, il-Kummissjoni kkonkludiet skont l-Artikolu 10 tar-Regolament (KE) Nru 1927/2006, li l-kundizzjonijiet għal kontribuzzjoni finanzjarja skont dan ir-Regolament ġew issodisfati.

TAQSIRA TAL-APPLIKAZZJONI U ANALIŻI

Dejta ewlenija: ||

Nru ta' Referenza tal-FEG || EGF/2010/030

Stat Membru || Il-Pajjiżi l-Baxxi

Artikolu 2 || (b)

Intrapriżi kkonċernati || 26

Reġjuni NUTS II || Noord-Holland (NL32) Flevoland (NL23)

Taqsima NACE Reviżjoni 2 || 18 ("l-Istampar u r-Riproduzzjoni ta’ Midja Rrekordjata")

Perjodu ta’ referenza || 16.1.2010 – 16.10.2010

Data ta' bidu għas-servizzi personalizzati || 16.1.2010

Data tal-applikazzjoni || 20.12.2010

Sensji matul il-perjodu ta’ referenza || 551

Ħaddiema li ngħataw is-sensja li huma identifikati għall-għajnuna || 551

Nefqa għas-servizzi personalizzati (EUR) || 2 730 959

Nefqa għall-implimentazzjoni tal-FEG[4] (EUR) || 113 789

Nefqa għall-implimentazzjoni tal-FEG (%) || 4,0

Baġit totali (EUR) || 2 844 748

Il-kontribuzzjoni tal-FEG (65 %) (EUR) || 1 849 086

1. L-applikazzjoni tressqet quddiem il-Kummissjoni fl-20 ta’ Diċembru 2010 u ġiet issupplimentata b'informazzjoni addizzjonali sat-3 ta’ Marzu 2011.

2. L-applikazzjoni tissodisfa l-kundizzjonijiet ta' intervent mill-FEG kif stabbilit fl-Artikolu 2(b) tar-Regolament (KE) Nru 1927/2006, u tressqet fil-limitu ta' żmien ta' 10 ġimgħat imsemmi fl-Artikolu 5 ta' dak ir-Regolament.

Ir-rabta bejn is-sensji u l-bidliet strutturali maġġuri fix-xejriet tal-kummerċ dinji minħabba l-globalizzazzjoni jew il-kriżi finanzjarja u ekonomika globali

3. Sabiex jistabbilixxu r-rabta bejn is-sensji u l-kriżi finanzjarja u ekonomika globali, il-Pajjiżi l-Baxxi argumentaw li l-kriżi ekonomika rriżultat fi tnaqqis sostanzjali fid-domanda għall-industrija tal-midja grafika. Bħala riżultat ta' dan, il-fatturat fl-industrija grafika naqas bi 8,6 % fl-2009. L-ordnijiet mingħand setturi ekonomiċi oħrajn għal materjal stampat tar-reklamar, li jirrappreżenta 35 % tal-fatturat totali tas-settur tal-istampar u l-pubblikazzjoni, naqsu b'mod drastiku bejn l-2008 u l-2009 minħabba t-tnaqqis fil-baġits għall-attivitajiet marbutin mal-midja u r-reklamar ikkawżat mill-kriżi ekonomika. L-applikazzjoni ssemmi bosta eżempji. Fl-industrija tal-bini, il-baġit għall-informazzjoni u r-reklamar tnaqqas b'36,8 % wara l-bidu tal-kriżi; fis-settur finanzjarju bi 33,2 % u fl-elettronika għall-konsumatur bi 30,6 %. Barra minn hekk, il-kriżi ekonomika affettwat b'mod negattiv id-domanda għal tipi differenti ta' materjal tal-midja stampata: fl-2009, id-domanda għar-rivisti popolari naqset b'25,7 %, għall-gazzetti b'24,4 %, għall-gazzetti kummerċjali distribwiti mingħajr ħlas b'10,54 % u għar-rivisti professjonali b'23,4 %.

4. Fil-valutazzjoni tagħha ta' applikazzjoni FEG marbuta mal-istess settur u reġjuni[5], il-Kummissjoni diġà kienet iddikjarat l-impatt tal-kriżi ekonomika u finanzjarja fuq l-impriżi li joperaw fid-Diviżjoni 18 tan-NACE Reviżjoni 2 ("L-Istampar u r-Riproduzzjoni tal-Midja Rrekordjata") fir-reġjun NUTS II ta' Noord-Holland.

Turija tal-għadd ta’ sensji u l-konformità mal-kriterji tal-Artikolu 2(b)

5. Il-Pajjiżi l-Baxxi ressqu din l-applikazzjoni skont il-kriterji ta' intervent tal-Artikolu 2(b) tar-Regolament (KE) Nru 1927/2006, li jitlob li jkun hemm mill-anqas 500 sensja fuq perjodu ta' disa' xhur f'intrapriżi li joperaw fl-istess Diviżjoni tan-NACE Reviżjoni 2 f'reġjun wieħed jew f'żewġ reġjuni kontigwi fil-livell tan-NUTS II fi Stat Membru.

6. L-applikazzjoni ssemmi 551 sensja f'26 intrapriża li joperaw fid-Diviżjoni 18 tan-NACE Reviżjoni 2 ("l-Istampar u r-Riproduzzjoni ta’ Midja Rrekordjata")[6] fir-reġjun NUTS II ta' Noord-Holland (NL32) u Flevoland (NL23) matul il-perjodu ta' referenza ta' disa' xhur mis-16 ta' Jannar 2010 sas-16 ta' Ottubru 2010. Tliet mija minn dawn is-sensji ngħataw fi tmien intrapriżi u ġew ikkalkolati skont l-ewwel inċiż tat-tieni paragrafu tal-Artikolu 2 tar-Regolament (KE) Nru 1927/2006. Mitejn u wieħed u ħamsin sensja oħra ngħataw fi 18-il intrapriża u ġew ikkalkolati skont it-tieni inċiż tal-istess paragarfu.

Spjegazzjoni tan-natura mhux prevista ta' dawk is-sensji

7. L-awtoritajiet Olandiżi jargumentaw li l-kriżi finanzjarja u ekonomika u l-impatt tagħha fuq is-settur kienu imprevedibbli. L-applikazzjoni tiddikjara li qabel il-kriżi l-industrija tal-istampar u tal-pubblikazzjoni fil-Pajjiżi l-Baxxi għaddiet minn proċess għali ta' ristrutturar sabiex tkun tista' tibqa' kompetittiva ma' intrapriżi minn barra l-UE. Is-settur inbidel minn industrija mmexxija mid-domanda għal waħda mmexxija mill-provvista u kien jirrikjedi sforz kbir sabiex l-impjegati jitħejjew għal mod il-ġdid ta' ħidma. Il-kriżi attwali ġġib magħha r-riskju li jiġu kkanċellati l-benefiċċji tal-investimenti u sforzi kbar li għamel is-settur.

Identifikazzjoni tal-intrapriżi li taw is-sensji u l-ħaddiema identifikati għall-għajnuna

8. L-applikazzjoni tikkonċerna 551 sensja (li kollha huma identifikati għall-għajnuna) fis-26 intrapriża li ġejjin:

Intrapriżi u għadd ta' sensji

Kwak, Van Daalen & Ronday te Zaandam || 25 || Onkenhout Almere || 3

AKS Grafische Afwerking & Drukveredeling, Amsterdam || 35 || Plantijn Casparie Almere || 85

Boekbinderij Mirenta BV, Amsterdam || 5 || Plantijn Casparie Beheer Almere || 9

Beursdrukkerij Costra, Diemen || 80 || Thieme Grafimedia Groep Flevoland || 24

Multiscreen Zwanenburg BV, Zwanenburg || 7 || Grey Amsterdam || 1

Noordhoek Offset BV, Aalsmeer || 13 || Joh. Enschede Amsterdam || 2

Rotatiedrukkerij Voorburgwal (TMG) Amsterdam || 42 || Persgroep Nederland, Amsterdam || 1

Thieme Rotatie BV Amsterdam || 48 || Remmert Dekker, Wormer || 1

Thieme Amsterdam BV || 70 || Sixtyseven BV, Beverwijk || 2

Thieme Print 4U Amsterdam || 24 || Stadtman BV, Hoorn || 1

Ten Klei DM, Amsterdam || 25 || Stolwijk Grafax BV, Diemen || 27

Drukkerij Raat & De Vries, Amsterdam || 15 || Uitgeverij Buijten & Schipperheijn, Amsterdam || 1

Grafisch Bedrijf W&E BV, Almere || 4 || Indrukwekkend BV, Heiloo || 1

Total ta' Intrapriżi: 26 || Total ta' sensji: 551 ||

9. It-tqassim tal-ħaddiema identifikati huwa kif ġej:

Kategorija || Għadd || Perċentwal

Irġiel || 358 || 65,0

Nisa || 193 || 35,0

Ċittadini tal-UE || 518 || 94,0

Ċittadini mhux tal-UE || 33 || 6,0

Minn 15 sa 24 sena || 99 || 18,0

Minn 25 sa 54 sena || 303 || 55,0

Minn 55 sa 64 sena || 138 || 25,0

Aktar minn 64 sena || 11 || 2,0

10. Tnejn u għoxrin mill-ħaddiema fil-mira għandhom diżabilità.

11. Fir-rigward ta' kategoriji ta’ xogħol, it-tqassim huwa kif ġej:

Kategorija || Għadd || Perċentwal

Maniġers || 39 || 7,1

Professjonisti || 110 || 20,0

Tekniċi || 116 || 21,1

Ħaddiema ta' sostenn klerikali || 66 || 12,0

Ħaddiema fis-settur tas-servizzi u tal-bejgħ || 66 || 12,0

Operaturi tal-impjanti u tal-magni u dawk li jimmuntaw il-magni || 154 || 27,9

12. Skont l-Artikolu 7 tar-Regolament (KE) Nru 1927/2006, il-Pajjiżi l-Baxxi kkonfermaw li ġiet applikata, u se tkompli tiġi applikata, politika ta' ugwaljanza bejn in-nisa u l-irġiel kif ukoll ta' nondiskriminazzjoni matul l-istadji varji tal-implimentazzjoni tal-FEG u, b'mod partikolari, għall-aċċess għall-FEG.

Deskrizzjoni tat-territorju kkonċernat u l-awtoritajiet u l-partijiet interessati tiegħu

13. It-territorju kkonċernat ikopri l-provinċji ta' Noord-Holland u Flevoland. Noord-Holland hija l-provinċja fil-Majjistral tal-Pajjiżi l-Baxxi. B'iktar minn 2,5 miljun ruħ jgħixu f'żona ta' 2 670 km2, Noord-Holland hija t-tieni l-iktar provinċja b'densità tal-popolazzjoni għolja fil-pajjiż. Flevoland, l-iktar provinċja żagħżugħa tal-Pajjiżi l-Baxxi, hija magħmula kważi kompletament minn polders. Hija ġiet stabbilita tul l-aħħar seklu, bl-eċċezzjoni ta' Urk u Schokland li qabel kienu gżejjer. Flevoland tmiss mal-provinċji ta' Friesland u Overijssel u hija konnessa ma' Gelderland, Utrecht u Noord-Holland b'pontijiet u digi.

14. L-awtoritajiet ewlenin ikkonċernati huma l-Ministeru għall-Affarijiet Soċjali u l-Impjiegi (SZW) u l-Fond għat-Taħriġ għas-settur tal-grafika u l-midja (A&O Fonds Grafimedia) f'isem ir-Raad for Overleg in de Grafimedia Branche-ROGB (il-Kunsill għall-konsultazzjoni fis-settur tal-grafika u l-midja). Partijiet interessati rilevanti oħra huma l-Istitut għall-Industrija Kreattiva (GOC); l-organizzazzjoni pubblika li hija responsabbli għall-benefiċċji (UWV werkbedrijf); iċ-ċentru għall-mobbiltà UWV; ROC van Amsterdam (ċentru għat-taħriġ vokazzjonali tal-gvern f'livell reġjonali) u l-Grafisch Lyceum Rotterdam; l-organizzazzjoni għall-SMEs (MKB-ondernemingen); l-organizzazzjonijiet ta’ sħubija soċjali: FNV Kiem (trejdjunjin), CNV Media (trejdjunjin), Koninklijk Verbond van Grafische Ondernemingen-KVGO (organizzazzjoni ta' min iħaddem) għad-distretti Gelderland/Utrecht, Den Haag u Rotterdam; u NUV (organizzazzjoni ta' min iħaddem).

L-impatt mistenni tas-sensji fir-rigward tal-impjiegi lokali, reġjonali jew nazzjonali

15. Is-sitwazzjoni ekonomika taż-żewġ provinċji ddeterjorat fl-2009 u t-tkabbir ekonomiku tiegħu kien negattiv (-3.9 % f'Noord-Holland u-2,8 % fi Flevoland) meta mqabbla mas-sena preċedenti. Fil-Pajjiżi l-Baxxi jeżistu mal-2 000 intrapriża tal-midja grafika, li minnhom 20 % jinsabu f'Noord-Holland u jirrappreżentaw 20 % tal-impjiegi fis-settur tal-midja grafika, filwaqt li fi Flevoland hemm 51 intrapriża tal-midja grafika, li jirrappreżentaw 2,3 % tal-impjiegi fis-settur. Matul l-2008 u l-2009 ix-xogħol fl-intrapriżi tal-midja grafika li jinsabu f'Noord-Holland naqas bi 15,5 %. Fil-provinċja li tmiss magħha ta' Flevoland, it-tnaqqis fl-impjiegi kien ta' 3,2 %. L-awtoritajiet Olandiżi jargumentaw li s-sensji fis-settur tal-grafika se jaggravaw is-sitwazzjoni tal-qgħad, li diġà ddeterjorat bħala riżultat tal-kriżi ekonomika u finanzjarja. Għalhekk bejn Frar tal-2009 u Frar tal-2010, in-numru ta' persuni li kienu qed ifittxu xogħol żdied b'10,1 % f'Noord-Holland u b'10,4 % fi Flevoland. Barra minn hekk, billi hemm kumpaniji u fornituri ta' servizzi li jiddependu ħafna fuq l-industrija tal-midja grafika, ir-riskji ta' falliment huma kbar u jistgħu jikkawżaw iktar problemi fil-ġejjieni, anki wara l-kriżi.

Pakkett ikkoordinat ta' servizzi personalizzati li jridu jiġu ffinanzjati u analiżi tal-ispejjeż stmati, inkluża l-komplimentarjetà tiegħu mal-azzjonijiet iffinanzjati mill-Fondi Strutturali

16. Qegħdin jiġu proposti t-tipi ta’ miżuri li ġejjin, li kollha jingħaqdu biex jiffurmaw pakkett ikkoordinat ta’ servizzi personalizzati mmirati lejn l-integrazzjoni mill-ġdid tal-ħaddiema fis-suq tax-xogħol. Dawn se jiġu offruti lill-ħaddiema li ngħataw is-sensja permezz ta' ċentru ta' mobbiltà, imsejjaħ iċ-Ċentru Kreattiv tal-Karrieri (Creative Career Centre - C3).

Attivitajiet ta' tħejjija

– Dħul u reġistrazzjoni: Din tkopri intervista inizjali sabiex il-ħaddiem li jkun ingħata s-sensja jiġi rreġistrat u jiġu identifikati l-aktar tipi ta' miżuri xierqa.

– Informazzjoni u helpdesk: Dan għandu x'jaqsam ma' laqgħat kollettivi u funzjoni ta' helpdesk biex tiġi pprovduta informazzjoni rigward il-miżuri disponibbli lill-ħaddiema li ngħataw is-sensja.

Konsulenza

– Konsulenza minn xogħol għal xogħol: Dak l-akkumpanjament minn impjieg għal impjieg ieħor ikopri programm individwalizzat li jinkludi l-monitoraġġ, it-twaqqif ta' pjan ta' azzjoni ta' karriera u vokazzjonali, l-orjentazzjoni fis-suq tax-xogħol u konsulenza inizjali fuq il-post tax-xogħol il-ġdid.

– Rikollokament: Dan jipprova jagħti sostenn attiv lill-ħaddiema li ngħataw is-sensja fl-eżaminazzjoni tagħhom ta' opportunitajiet ġodda ta' xogħol.

– Taħriġ għall-intervisti tax-xogħol: Dan ikopri l-analiżi ta' postijiet battala disponibbli, l-għajnuna fit-tfassil ta' CV u ittra ta' applikazzjoni u t-tħejjija għall-intervisti tax-xogħol.

– Gwida biex wieħed jiftaħ kumpanija għal rasu L-akkumpanjament lejn il-ħolqien ta' negozju jipprova jassisti lill-ħaddiema li ngħataw is-sensja li qegħdin jippjanaw joħolqu n-negozju tagħhom stess. Dan ikopri l-għoti ta' parir legali, l-għajnuna għat-tfassil ta' pjan ta' negozju, is-sostenn fir-rigward tar-rekwiżiti amministrattivi.

Taħriġ

– "Edukazzjoni": Din tkopri t-taħriġ vokazzjonali u t-taħriġ mill-ġdid, it-taħriġ fil-maniġment u fil-ħiliet soċjali u t-taħriġ speċifiku tekniku mill-ġdid għall-ħaddiema li t-taħriġ tekniku tagħhom ma jkunx għadu utli.

– Rikonoxximent tal-esperjenza preċedenti (APL): Dan ikopri l-evalwazzjoni tal-għarfien u l-esperjenza preċedenti ta' kull ħaddiem individwali kif ukoll l-identifikazzjoni ta' oqsma fejn ikun meħtieġ taħriġ ulterjuri.

17. In-nefqa għall-implimentazzjoni tal-FEG, li hija inkluża fl-applikazzjoni, skont l-Artikolu 3 tar-Regolament (KE) Nru 1927/2006, tkopri l-attivitajiet ta’ ġestjoni u kontroll, kif ukoll l-informazzjoni u r-reklamar.

18. Is-servizzi personalizzati ppreżentati mill-awtoritajiet Olandiżi huma miżuri attivi tas-suq tax-xogħol fi ħdan l-azzjonijiet eliġibbli stabbiliti fl-Artikolu 3 tar-Regolament (KE) Nru 1927/2006. L-awtoritajiet Olandiżi jistmaw li l-ispejjeż totali ta' dawn is-servizzi huwa ta' EUR 2 730 959 u li n-nefqa għall-implimentazzjoni tal-FEG tkun ta' EUR 113 789 (4 % tal-ammont totali). Il-kontribuzzjoni totali mitluba mill-FEG hija ta’ EUR 1 849 086 (65 % tal-kosti totali).

Azzjonijiet || Għadd stmat ta’ ħaddiema identifikati || Spiża stmata għal kull ħaddiem identifikat (EUR) || Kosti totali (l-FEG u l-kofinanzjament nazzjonali) (EUR)*

Servizzi personalizzati (l-ewwel paragrafu tal-Artikolu 3 tar-Regolament (KE) Nru 1927/2006)

Dħul u reġistrazzjoni || 551 || 193 || 106 456

Informazzjoni u helpdesk || 551 || 86 || 47 314

Konsulenza minn xogħol għal xogħol || 207 || 3 606 || 746 355

Rikollokament || 165 || 4 479 || 738 981

Taħriġ għall-intervisti tax-xogħol || 165 || 1 419 || 234 203

Gwida biex wieħed jiftaħ kumpanija għal rasu || 28 || 4 578 || 128 191

Edukazzjoni || 231 || 2 495 || 576 281

Rikonoxximent tal-esperjenza preċedenti (APL): || 55 || 2 785 || 153 178

Subtotal tas-servizzi personalizzati || || 2 730 959

Spiża għall-implimentazzjoni tal-FEG (it-tielet paragrafu tal-Artikolu 3 tar-Regolament (KE) Nru 1927/2006)

Maniġment || || 28 447

Informazzjoni u reklamar || || 28 447

Attivitajiet ta’ kontroll || || 56 895

Nefqa subtotali għall-implimentazzjoni tal-FEG || || 113 789

Total tal-ispiża stmata || || 2 844 748

Kontribut tal-FEG (65 % tal-ispiża totali) || || 1 849 086

* It-totali ma jaqblux minħabba l-arrotondament

19. Il-Pajjiżi l-Baxxi jikkonfermaw li l-miżuri deskritti hawn fuq huma komplementarji mal-azzjonijiet iffinanzjati mill-Fondi Strutturali. Il-miżuri tal-FSE huma disponibbli biss għall-ħaddiema li jkollhom xogħol, filwaqt li l-azzjonijiet tal-FEG għandhom l-għan li dawk il-ħaddiema li ngħataw is-sensja jerġgħu jsibu impjieg. L-awtorità tal-ġestjoni għall-FEG, li hija wkoll l-awtorità tal-ġestjoni għall-FSE, stabbiliet il-proċeduri tal-kontroll neċessarji biex telimina kwalunkwe riskju ta’ finanzjament doppju.

Data(i) li fiha/fihom bdew jew kienu ppjanati li jibdew is-servizzi personalizzati għall-ħaddiema affettwati

20. Il-Pajjiżi l-Baxxi bdew is-servizzi personalizzati lill-ħaddiema affettwati inklużi fil-pakkett koordinat propost lill-FEG għall-kofinanzjament fis-16 ta’ Jannar 2010. Din id-data, għalhekk, tirrappreżenta l-bidu tal-perjodu ta' eliġibbiltà għal kwalunkwe għajnuna li tista' tingħata mill-FEG.

Proċeduri għall-konsultazzjoni mal-imsieħba soċjali

21. L-imsieħba soċjali ġew ikkonsultati permezz tal-Fond tas-Suq tax-Xogħol u tat-Taħriġ ta' Fondazzjoni għas-settur tal-grafika u l-midja (Arbeids & Opleidingsfonds Grafimedia branche), li fid-dawl tal-kriżi qablu dwar il-ħolqien ta' ċentru għall-mobbiltà għas-settur li jismu C3 (Creative Career Centre). L-għan ta' dan iċ-ċentru ta' mobbiltà huwa li jikkoordina l-miżuri atttivi varji tas-suq tax-xogħol b'konsultazzjoni mal-imsieħba soċjali.

22. L-awtoritajiet Olandiżi kkonfermaw li r-rekwiżiti stipulati fil-leġiżlazzjoni nazzjonali u tal-UE dwar sensji kollettivi ġew issodisfati.

Informazzjoni dwar azzjonijiet li huma obbligatorji skont il-liġi nazzjonali jew il-ftehimiet kollettivi

23. Fir-rigward tat-twettiq tal-kriterji stabbiliti fl-Artikolu 6 tar-Regolament (KE) Nru 1927/2006, l-awtoritajiet Olandiżi fl-applikazzjoni tagħhom:

· ikkonfermaw li l-kontribuzzjoni finanzjarja mill-FEG ma tissostitwixxix miżuri li huma r-responsabbiltà tal-kumpaniji bis-saħħa tal-liġi nazzjonali jew ftehimiet kollettivi;

· taw prova li l-azzjonijiet jipprovdu sostenn lill-ħaddiema individwali u ma għandhomx jintużaw għar-ristrutturar ta' kumpaniji jew setturi;

· ikkonfermaw li l-azzjonijiet eliġibbli msemmija hawn fuq ma jirċevux għajnuna minn strumenti finanzjarji oħra tal-UE.

Sistemi ta’ ġestjoni u ta’ kontroll

24. Il-Pajjiżi l-Baxxi nnotifikaw lill-Kummissjoni li l-kontribuzzjoni finanzjarja se tkun ġestita u kkontrollata mill-istess korpi li jiġġestixxu u jikkontrollaw l-Fond Soċjali Ewropew (FSE) li jiffinanzja lill-Pajjiżi l-Baxxi. L-Aġenzija għall-Affarijiet Soċjali u l-Impjiegi (Agentschap SZW) se tkun il-korp intermedjarju għall-awtorità ta' ġestjoni.

Finanzjament

25. Abbażi tal-applikazzjoni mill-Pajjiżi l-Baxxi, il-kontribuzzjoni proposta mill-FEG għall-pakkett ikkoordinat ta' servizzi personalizzati hija ta' EUR 1 849 086, li tirrappreżenta 65 % tal-ispiża totali. L-allokazzjoni proposta tal-Kummissjoni minn dan il-Fond hija bbażata fuq l-informazzjoni li ngħatat mill-Pajjiżi l-Baxxi.

26. B'kunsiderazzjoni tal-ammont massimu possibbli ta' kontribuzzjoni finanzjarja mill-FEG skont l-Artikolu 10(1) tar-Regolament (KE) Nru 1927/2006, kif ukoll tal-ambitu tal-allokazzjoni mill-ġdid ta' approprjazzjonijiet, il-Kummissjoni tipproponi li timmobilizza l-FEG għall-ammont totali msemmi hawn fuq, li għandu jiġi allokat skont l-intestatura 1a tal-qafas finanzjarju.

27. L-ammont propost ta' kontribuzzjoni finanzjarja jippermetti li aktar minn 25 % tal-ammont annwali massimu allokat għall-FEG jibqa' disponibbli biex ikun allokat matul l-aħħar erba' xhur tas-sena, kif stipulat fl-Artikolu 12(6) tar-Regolament (KE) Nru 1927/2006.

28. Bil-preżentazzjoni ta' din il-proposta sabiex timmobilizza l-FEG, il-Kummissjoni qiegħda tniedi l-proċedura ssimplifikata ta' trijalogu, kif mitlub mill-Punt 28 tal-Ftehim Interistituzzjonali tas-17 ta' Mejju 2006, sabiex tikseb il-qbil taż-żewġ fergħat tal-awtorità baġitarja dwar il-ħtieġa li jintuża l-FEG u l-ammont meħtieġ. Il-Kummissjoni tistieden lill-ewwel waħda miż-żewġ fergħat tal-awtorità baġitarja li tilħaq ftehim dwar l-abbozz tal-proposta għall-mobilizzazzjoni biex, f'livell politiku xieraq, tgħarraf lill-fergħa l-oħra u lill-Kummissjoni bl-intenzjonijiet tagħha. F'każ ta' nuqqas ta' qbil minn xi waħda miż-żewġ fergħat tal-awtorità baġitarja, għandha tissejjaħ laqgħa formali tat-trijalogu.

29. B’mod separat, il-Kummissjoni tippreżenta talba ta' trasferiment sabiex fil-baġit għall-2011 iddaħħal approprjazzjonijiet speċifiċi għall-ħlasijiet, kif jitlob Punt 28 tal-Ftehim Interistituzzjonali tas-17 ta' Mejju 2006.

Sors tal-approprjazzjonijiet għall-ħlasijiet

30. Ammont ta' EUR 2 657 165 għadu disponibbli fil-Linja Baġitarja tal-FEG 04.0501 wara l-adozzjoni miż-żewġ fergħat tal-Awtorità Baġitarja ta' tliet Deċiżjonijiet li flimkien jilħqu total ta' EUR 10 371 321, u meta jitqiesu it-tmien każijiet li bħalissa qegħdin jiġu diskussi mill-Awtorità Baġitarja għal ammont totali ta' EUR 34 580 464. Dan l-ammont disponibbli se jintuża biex ikopri l-ammont ta' EUR 1 849 086 li huwa meħtieġ għal din l-applikazzjoni.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, skont il-punt 28 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda (applikazzjoni EGF/2010/030 NL/Noord-Holland u Flevoland Diviżjoni 18 mill-Pajjiżi l-Baxxi)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja soda[7], u b'mod partikolari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[8], u b'mod partikolari l-Artikolu 12(3) tiegħu,

Wara li kkunsidraw il-Proposta mill-Kummissjoni Ewropea[9],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) twaqqaf biex jipprovdi sostenn addizzjonali għall-ħaddiema li ngħataw is-sensja b’riżultat ta’ bidliet strutturali maġġuri fix-xejriet kummerċjali dinjija minħabba l-globalizzazzjoni u biex jgħinhom fl-integrazzjoni mill-ġdid tagħhom fis-suq tax-xogħol.

(2)       L-ambitu tal-FEG twessa’ għall-applikazzjonijiet ippreżentati mill-1 ta’ Mejju 2009 biex jinkludi sostenn lill-ħaddiema li jitilfu l-impjieg b’riżultat dirett tal-kriżi finanzjarja u ekonomika globali.

(3)       Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-FEG fil-limitu massimu annwali ta’ EUR 500 miljun.

(4)       Il-Pajjiżi l-Baxxi ressqu applikazzjoni biex jimmobilizzaw l-FEG, fir-rigward tas-sensji f'26 intrapriża li joperaw fid-Diviżjoni 18 tan-NACE Reviżjoni 2 ("l-Istampar u r-Riproduzzjoni ta' Midja Rrekordjata") fir-reġjun NUTS II ta' Noord-Holland (NL32) u Flevoland (NL23), fl-20 ta' Diċembru 2010 u ssupplimentawha b'informazzjoni addizzjonali sat-3 ta' Marzu 2011. Din l-applikazzjoni tikkonforma mar-rekwiżiti sabiex jiġu ddeterminati l-kontribuzzjonijiet finanzjarji kif stabbilit fl-Artikolu 10 tar-Regolament (KE) Nru 1927/2006. Il-Kummissjoni għalhekk ressqet proposta biex timmobilizza l-ammont ta' EUR 1 849 086.

(5)       L-FEG għandu, għalhekk, jiġi mmobilizzat sabiex jipprovdi kontribuzzjoni finanzjarja għall-applikazzjoni mressqa mill-Pajjiżi Baxxi.

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2011, il-Fond Ewropew ta' Aġġustament għall-Globalizzazzjoni (FEG) għandu jiġi mmobilizzat biex jipprovdi s-somma ta' EUR 1 849 086 f'approprjazzjonijiet għall-impenji u għall-ħlasijiet.

Artikolu 2

Din id-Deċiżjoni għandha tkun ippubblikata f’Il-Ġurnal Uffiċjali tal-Unjoni Ewropea.

Magħmul fi [Brussell/Strasburgu],

Għall-Parlament Ewropew                           Għall-Kunsill

Il-President                                                    Il-President

[1]               ĠU C 139, 14.6.2006, p. 1.

[2]               ĠU L 406, 30.12.2006, p. 1.

[3]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-klassifikazzjoni tal-istatistika ta’ attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[4]               Skont it-tielet paragrafu tal-Artikolu 3 tar-Regolament (KE) Nru 1927/2006.

[5]               COM(2010)530. Proposta għal Deċiżjoni tal-Parlament Ewropew u tal-Kunsill dwar il-mobilizzazzjoni tal-Fond Ewropew ta' Aġġustament għall-Globalizzazzjoni […] applikazzjoni EGF/2009/026 NL/Noord-Holland u Utrecht Taqsima 18.

[6]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-klassifikazzjoni tal-istatistika ta’ attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[7]               ĠU C 139, 14.6.2006, p. 1.

[8]               ĠU L 406, 30.12.2006, p. 1.

[9]               ĠU C […], […], p. […].