52011PC0295

2011/0131 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar il-ħruġ tal-muniti tal-euro

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 133 tiegħu,

Wara li kkunsidraw il-proposta mill-Kummissjoni Ewropea,

Wara li kkunsidraw l-Opinjoni tal-Bank Ċentrali Ewropew,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Filwaqt li jaġixxu skont il-proċedura leġiżlattiva ordinarja,

Billi:

(1) Il-konklużjonijiet tal-Kunsill tat-23 ta' Novembru 1998 u tal-5 ta' Novembru 2002 dwar il-muniti tal-euro maħsuba għall-kollezzjoni, ir-Rakkomandazzjoni tal-Kummissjoni Nru 2009/23/KE tad-19 ta' Diċembru 2008 dwar linji gwida komuni għall-uċuħ nazzjonali u l-ħruġ ta’ muniti tal-euro maħsuba għaċ-ċirkolazzjoni[1], approvata mill-konklużjonijiet tal-Kunsill tal-10 ta' Frar 2009, u r-Rakkomandazzjoni tal-Kummissjoni Nru 2010/191/UE tat-22 ta' Marzu 2010 dwar il-firxa u l-effetti tal-valuta legali tal-karti tal-flus u l-muniti tal-euro[2], jipprovdu għal prattiki rakkomandati fir-rigward tal-muniti tal-euro għall-kollezzjoni, inkluż il-muniti kommemorattivi fiċ-ċirkolazzjoni u l-konsultazzjoni qabel ma jinqerdu l-muniti tal-euro li huma tajbin għaċ-ċirkolazzjoni.

(2) In-nuqqas tad-dispożizzjonijiet mandatorji għall-ħruġ tal-muniti tal-euro jista' jirriżulta fi prattiki differenti fost l-Istati Membri u ma jwassalx għal qafas integrat biżżejjed għall-munita waħdanija. Fl-interess tat-trasparenza u ċ-ċertezza legali, hu għalhekk neċessarju li jiġu introdotti regoli obbligatorji għall-ħruġ tal-muniti tal-euro.

(3) Skont ir-Regolament tal-Kunsill (KE) Nru 974/98 tat-3 ta' Mejju 1998 dwar l-introduzzjoni tal-euro[3], il-muniti denominati fl-euro u ċ-ċenteżmi u li jikkonformaw mad-denominazzjonijiet u l-ispeċifikazzjonijiet tekniċi stipulati mill-Kunsill għandhom l-istatus ta' munita legali fl-Istati Membri parteċipanti kollha kif definit f'dak ir-Regolament. Id-denominazzjonijiet u l-ispeċifikazzjonijiet tekniċi tagħhom huma stipulati fir-Regolament tal-Kunsill (KE) Nru 975/98 tat-3 ta' Mejju 1998 dwar denominazzjonijiet u speċifikazzjonijiet tekniċi tal-muniti tal-euro maħsuba għaċ-ċirkolazzjoni[4].

(4) Barra l-muniti tal-euro fiċ-ċirkolazzjoni regolari, l-Istati Membri jistgħu joħorġu wkoll muniti tal-euro kommemorattivi għaċ-ċirkolazzjoni sabiex jiċċelebraw avvenimenti speċifiċi skont il-limiti ffissati kull sena u li jkunu applikabbli għall-Istati Membri li joħorġu l-muniti għall-għadd ta' muniti li jinħarġu minnhom. Huwa neċessarju li jiġu stabbiliti ċerti limiti fuq il-volumi għall-muniti kommemorattivi għaċ-ċirkolazzjoni biex ikun żgurat li dawn il-muniti jibqgħu perċentwal żgħir mill-għadd totali tal-muniti taż-żewġ euro fiċ-ċirkolazzjoni. Fl-istess ħin, dawn il-limiti fuq il-volumi għandhom jippermettu l-ħruġ ta’ volum ta’ muniti biżżejjed li jiżgura li l-muniti kommemorattivi jistgħu jiċċirkolaw b’mod effettiv.

(5) L-Istati Membri għandhom ikunu jistgħu joħorġu muniti tal-euro għall-kolletturi, li ma jkunux maħsuba għaċ-ċirkolazzjoni u li għandhom ikunu jistgħu jintgħarfu mingħajr diffikultà mill-muniti tal-euro fiċ-ċirkolazzjoni. Il-muniti tal-euro għall-kolletturi għandu jkollhom status legali biss fl-Istat Membru li joħroġhom u ma għandhomx jinħarġu bil-ħsieb li jidħlu fiċ-ċirkolazzjoni.

(6) Sabiex ikun żgurat li ma jkunx hemm tfixkil bejn il-muniti tal-euro għall-kolletturi u l-muniti tal-euro fiċ-ċirkolazzjoni, dawn tal-aħħar għandhom jintgħarfu mingħajr diffikultà. Barra minn hekk, hu xieraq li l-ħruġ tal-muniti tal-euro għall-kolletturi jitqiesu fil-volum ta' muniti li jiġu approvati mill-Bank Ċentrali Ewropew (BĊE), imma dan għandu jsir għall-muniti kollha f'daqqa milli għal kull ħarġa individwali.

(7) Hu xieraq u skont il-prattika komuni fost l-Istati Membri parteċipanti li l-muniti tal-euro fiċ-ċirkolazzjoni, inkluż il-muniti tal-euro kommemorattivi fiċ-ċirkolazzjoni, għandhom jitqiegħdu fiċ-ċirkolazzjoni fil-valur nominali tagħhom, għalkemm proporzjon żgħir tagħhom jista' jinbiegħ għal prezz ogħla jekk ikunu ta' kwalità speċjali jew preżentati f'pakkett speċjali.

(8) Sabiex ikun evitat li l-muniti tal-euro li huma tajbin għaċ-ċirkolazzjoni jinqerdu minn Stat Membru wieħed filwaqt li jista' jkun hemm il-ħtieġa ta' dawn il-muniti fi Stat Membru ieħor, l-Istati Membri għandhom jikkonsultaw lil xulxin qabel jinqerdu dawn il-muniti.

ADOTTAW DAN IR-REGOLAMENT:

Artikolu 1

Suġġett

Dan ir-Regolament jistipula regoli dwar il-ħruġ tal-muniti tal-euro għaċ-ċirkolazzjoni, inkluż il-muniti kommemorattivi għaċ-ċirkolazzjoni, dwar il-ħruġ tal-muniti tal-euro għall-kolletturi, u dwar il-konsultazzjoni qabel il-qerda tal-muniti tal-euro li huma tajbin għaċ-ċirkolazzjoni.

Artikolu 2

Definizzjonijiet

Għall-finijiet ta' dan ir-Regolament, id-definizzjonijiet li ġejjin għandhom japplikaw:

1. "Muniti tal-euro għaċ-ċirkolazzjoni" tfisser muniti tal-euro maħsuba għaċ-ċirkolazzjoni, li d-denominazzjonijiet u l-ispeċifikazzjonijiet tekniċi tagħhom huma stipulati fir-Regolament tal-Kunsill (KE) Nru 975/98 tat-3 ta' Mejju 1998.

2. "Muniti tal-euro kommemorattivi fiċ-ċirkolazzjoni" tfisser muniti tal-euro fiċ-ċirkolazzkoni, li huma maħsuba biex jikkommemoraw avveniment speċjali, kif speċifikat fl-Artikolu 1f tar-Regolament tal-Kunsill (KE) Nru 975/98.

3. "Muniti tal-euro għall-kolletturi" tfisser muniti tal-euro maħsuba għall-kollezzjoni li mhumiex maħsuba li jidħlu fiċ-ċirkolazzjoni.

Artikolu 3

Tip ta' muniti tal-euro

L-Istati Membri jistgħu joħorġu żewġ tipi ta' muniti tal-euro: muniti tal-euro għaċ-ċirkolazzjoni, li jinkludu muniti tal-euro kommemorattivi għaċ-ċirkolazzjoni, u muniti tal-euro għall-kolletturi.

Artikolu 4

Ħruġ tal-muniti tal-euro għaċ-ċirkolazzjoni

1. Iċ-ċirkolazzjoni tal-muniti tal-euro għandhom jinħarġu fil-valur nominali tagħhom.

2. B'deroga mill-paragrafu 1, jista' jinħareġ proporzjon żgħir, li ma jaqbiżx il-5% tal-valur totali u tal-volum tal-muniti tal-euro maħruġa, b'valur nominali ogħla jekk ikun ġustifikat li jkunu ta' kwalità speċjali jew li jkunu preżentati f'pakkett speċjali.

Artikolu 5

Ħruġ tal-muniti tal-euro kommemorattivi għaċ-ċirkolazzjoni

1. Kull Stat Membru parteċipanti jista' joħroġ biss munita tal-euro kommemorattiva għaċ-ċirkolazzjoni kull sena, minbarra fil-każijiet li fihom:

(a) il-muniti kommemorattivi tal-euro għaċ-ċirkolazzjoni jinħarġu b'mod kollettiv mill-Istati Membri parteċipanti kollha;

(b) il-munita kommemorattiva possibbli tal-euro għaċ-ċirkolazzjoni tinħareġ fil-każ ta' post temporanju vakanti jew ta' kariga provviżorja tal-funzjoni ta' Kap tal-Istat.

2. L-għadd totali ta’ muniti fiċ-ċirkolazzjoni għal kull ħarġa individwali ma għandux jaqbeż l-ogħla limitu mit-tnejn li ġejjin:

a) 0,1 % tal-għadd totali tal-muniti taż-żewġ euro mdaħħla fiċ-ċirkolazzjoni mill-Istati Membri parteċipanti kollha sal-bidu tas-sena qabel is-sena ta’ ħruġ tal-munita kommemorattiva; dan il-limitu jista' jogħla għal 2,0 % taċ-ċirkolazzjoni totali tal-muniti taż-żewġ euro tal-Istati Membri parteċipanti kollha jekk ikun ġie kkommemorat suġġett magħruf u ta’ ċertu simbolu sinifikanti. F’każ bħal dan, l-Istat Membru li joħroġ għandu joqgħod lura milli jniedi ħarġa oħra ta’ munita kommemorattiva għaċ-ċirkolazzjoni li tuża l-limitu miżjud matul l-erba’ snin sussegwenti u għandu jagħti r-raġuni għalfejn għażel il-limitu miżjud.

b) 5,0 % tal-għadd totali tal-muniti taż-żewġ euro maħruġa għaċ-ċirkolazzjoni mill-Istat Membru ta' ħruġ ikkonċernat sal-bidu tas-sena qabel is-sena ta' ħruġ tal-munita kommemorattiva.

3. Il-ħruġ tal-muniti tal-euro kommemorattiva għaċ-ċirkolazzjoni maħruġa b'mod kollettiv mill-Istati Membri parteċipanti kollha għandu jiġi approvat mill-Grupp tal-Euro.

Artikolu 6

Ħruġ tal-muniti tal-euro għall-kolletturi

1. Il-muniti tal-euro għall-kolletturi għandu jkollhom status legali biss fl-Istat Membru li joħroġhom.

L-identità tal-Istat Membru li joħroġhom għandha tkun ċara u li tingħaraf faċilment fuq il-munita.

2. Sabiex tkun differenzjata faċilment mill-muniti tal-euro fiċ-ċirkolazzjoni, il-muniti tal-euro għall-kollezzjoni għandhom jissodisfaw il-kriterji li ġejjin:

a) il-valur nominali tagħhom għandu jkun differenti mill-valuri nominali tal-muniti tal-euro fiċ-ċirkolazzjoni;

b) ma għandhomx jużaw immaġni li jkunu simili għan-naħat komuni tal-muniti tal-euro fiċ-ċirkolazzjoni jew għal xi naħa nazzjonali tal-muniti tal-euro fiċ-ċirkolazzjoni.

c) il-lewn, id-dijametru u l-piż tagħhom għandhom ivarjaw b'mod sinifikanti mill-muniti tal-euro fiċ-ċirkolazzjoni mill-anqas f'żewġ karatterstiċi minn dawn; id-differenza għandha titqies bħala sinifikanti jekk il-valuri li jinkludu t-tolleranzi jkunu lil hinn mill-firxiet ta' tolleranzi għall-muniti tal-euro fiċ-ċirkolazzjoni;

d) it-tarf tagħhom ma għandux ikollu forma ta' arzell jew forma ta' 'fjura Spanjola';

3. Il-muniti tal-euro għall-kolletturi jistgħu jinħarġu fil-valur nominali tagħhom jew f'valur ogħla.

4. Il-ħarġiet tal-muniti tal-euro għall-kolletturi għandhom jitqiesu għall-muniti kollha f'daqqa fil-volum tal-ħruġ tal-muniti li għandu jiġi approvat mill-BĊE.

5. L-Istati Membri għandhom jieħdu l-miżuri kollha xierqa sabiex jevitaw l-użu tal-muniti tal-euro għall-kolletturi bħala mezz ta' ħlas, pereżempju billi joħorġuhom f'pakkett speċjali, b'ċertifikat ta' awtentikazzjoni, jew joħorġu avviż minn qabel mill-awtorità tal-ħruġ jew il-muniti jinħarġu b'valur li jkun ogħla mill-valur nominali.

Artikolu 7

Konsultazzjoni qabel il-qerda tal-muniti tal-euro fiċ-ċirkolazzjoni

Qabel jinqerdu l-muniti tal-euro fiċ-ċirkolazzjoni li ma jkunux muniti tal-euro tajbin għaċ-ċirkolazzjoni skont l-Artikolu 2(b) tar-Regolament (UE) Nru 1210/2010[5], l-Istati Membri għandhom jikkonsultaw lil xulxin permezz ta' sottokumitat rilevanti tal-Kumitat Ekonomiku u Finanzjarju u jinformaw lid-Diretturi taz-zekek tal-Istati Membri parteċipanti kif imfisser fir-Regolament tal-Kunsill (KE) Nru 974/98[6].

Artikolu 8

Dħul fis-seħħ

Dan ir-Regolament għandu jidħol fis-seħħ fl-għoxrin jum mill-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri, skont it-Trattati.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU L 9, 14.1.2009, p. 52.

[2]               ĠU L 83, 30.3.2010, p. 70.

[3]               ĠU L 139, 11.5.1998, p. 1.

[4]               ĠU L 139, 11.5.1998, p. 6.

[5]               ĠU L 339, 22.12.2010, p.1.

[6]               ĠU L 139, 11.5.1998, p. 1.