52011DC0712

WERREJ

1........... Introduzzjoni................................................................................................................... 3

2........... X’inhi t-taxxa doppja?.................................................................................................... 4

3........... It-taxxa doppja hija problema?....................................................................................... 6

4........... Ir-risposti attwali u l-limitazzjoni tagħhom sabiex isolvu l-problemi ewlenin........................ 8

5........... Soluzzjonijiet possibbli.................................................................................................... 9

5.1........ Tisħiħ tal-istrumenti eżistenti.......................................................................................... 10

5.2........ Estensjoni tal-kopertura u l-ambitu tal-konvenzjonijiet dwar it-taxxa doppja................... 10

5.3........ Passi meħuda bil-għan li jinkisbu interpretazzjoni u applikazzjoni aktar konsistenti tad-dispożizzjonijiet tad-DTC bejn l-Istati Membri tal-UE........................................................................................... 10

5.4........ L-iffaċilitar u t-tħaffif tas-soluzzjoni tat-tilwim fl-UE........................................................ 10

6........... Passi u konklużjonijiet ulterjuri....................................................................................... 11

1. Introduzzjoni

Il-promozzjoni ta’ ekonomija iżjed kompetittiva bħala mutur ta’ tkabbir intelliġenti u sostenibbli hija ħtieġa reali b’mod partikolari f’dan il-perjodu ta’ kriżi li wera b’mod ċar kemm huma interdipendenti l-ekonomiji tal-Istati Membri. Il-Kummissjoni ssottolinjat dan bħala parti mill-istrateġija tagħha Ewropa 2020[1], fejn qalet ukoll li l-firxa sħiħa ta’ politiki tal-UE, u b’mod partikolari s-suq uniku, iridu jintużaw b’mod aktar effettiv, billi jitneħħew l-ostakoli li jifdal sabiex jinkisbu dawn l-għanijiet.

B’mod partikolari, il-konklużjonijiet tal-Kunsill Ewropew tal-24/25 ta’ Marzu u tal-24 ta’ Ġunju 2011 enfasizzaw il-ħtieġa għal koordinazzjoni pragmatika tal-politiki fiskali bħala element ta’ koordinazzjoni aktar b’saħħitha tal-politiki ekonomiċi fiż-żona tal-euro sabiex ikunu appoġġjati l-konsolidament fiskali u t-tkabbir ekonomiku.

It-tkabbir jiddependi l-aktar fuq swieq f’saħħithom, fejn il-kompetizzjoni tistimola n-negozju. Għad iridu jiġu indirizzati diversi ostakoli sabiex jissaħħaħ is-suq uniku, inklużi l-ostakoli għall-attività transkonfinali u l-kumplessità legali li jirriżultaw mill-fatt li hemm 27 sett ta’ regoli differenti għal uħud mit-tranżazzjonijiet.

Is-sistemi fiskali fl-UE ma jikkontribwux għas-simplifikazzjoni tal-qafas legali preżenti. Kważi 20 sena wara l-ħolqien tas-suq uniku, in-negozju u l-individwi li joperaw fis-suq tal-UE jirriskjaw li jkunu intaxxati minn aktar minn Stat Membru wieħed fuq l-istess dħul hekk kif jaqsmu l-konfini interni filwaqt li, f’xi każijiet, jistgħu jevitaw it-taxxi kollha[2]. F’perjodu fejn l-Istati Membri qed ifittxu dħul sikur u addizzjonali mit-taxxi, huwa importanti għall-kredibbiltà tagħhom f’għajnejn il-kontribwenti li jieħdu l-miżuri neċessarji sabiex ineħħu t-taxxa doppja u l-eżenzjoni mill-ħlas ta' taxxa doppja. Barra minn hekk, iż-żewġ sitwazzjonijiet jistgħu jqiegħdu f’riskju l-idea ġenwina tas-suq uniku u għaldaqstant, mingħajr l-ebda dubju huma inaċċettabbli.

L-eżerċitar tal-libertajiet fundamentali min-negozji u ċ-ċittadini għall-attivitajiet transkonfinali fis-suq intern tal-UE, qatt ma għandu jwassal għal żieda fit-taxxa meta mqabbla mat-taxxa ta’ kontribwenti simili fl-Istat Membru tagħhom stess. It-taxxa doppja f’kuntest transkonfinali bħala konsegwenza ta’ interazzjoni inkonsistenti ta’ sistemi fiskali nazzjonali differenti hija ta' xkiel kbir u tikkostitwixxi sfida reali għas-suq intern[3]. Il-prinċipju tat-tneħħija tat-taxxa doppja li tirriżulta minn politiki fiskali mhux koordinati għandu jkun element importanti għal kull strateġija fit-tul tal-Kummissjoni.

Kemm ir-rwol negattiv tat-taxxa doppja kif ukoll il-ħtieġa għal titjib fil-funzjonament tas-suq intern permezz ta’ koordinazzjoni mtejba tal-politika fiskali ġew enfasizzati bosta drabi[4]. Barra minn hekk, il-provi[5] juru li ħafna kontribwenti tal-UE huma mħassba dwar kwistjonijiet relatati mat-taxxa doppja.

Kif tħabbar preċedentement[6], din il-Komunikazzjoni tidentifika l-problemi tat-taxxa doppja transkonfinali[7] u l-impatt tagħhom fuq is-suq intern, hija tispjega liema huma s-soluzzjonijiet li diġà ġew mistħarrġa mill-Istati Membri u mill-istituzzjonijiet tal-UE, u liema huma l-oqsma li jeħtieġu azzjonijiet iżjed koordinati, l-ewwel nett sabiex jipprevjenu każijiet ta’ taxxa doppja u t-tieni, sabiex jiżguraw metodu effettiv, veloċi u li ma jiswiex wisq flus sabiex isolvi t-tilwim f’kunflitti dwar it-taxxa doppja.

Azzjonijiet li jirnexxu bħal dawn jagħmlu lill-UE post aktar attraenti fejn wieħed jopera n-negozju tiegħu, u tiżdied il-kompetizzjoni ġusta fis-suq intern. Dan jikkontribwixxi għall-objettiv ta’ sfruttament tal-potenzjal kollu ta’ Suq integrat tal-UE kif sostnut fl-Att dwar is-Suq Uniku[8] u għat-tneħħija tal-ostakoli għall-eżerċitar effettiv tad-drittijiet taċ-ċittadini tal-UE hekk kif ġie enfasizzat fir-Rapport tal-2010 dwar iċ-Ċittadinanza tal-UE[9].

2. X’inhi t-taxxa doppja?

It-taxxa doppja, fis-sens diskuss hawnhekk, tista’ tiġi spjegata bħala impożizzjoni ta’ taxxi komparabbli minn żewġ ġurisdizzjonijiet fiskali (jew aktar) fir-rigward tal-istess dħul jew kapital taxxabbli[10]. Għalkemm it-taxxa doppja tista’ sseħħ ukoll f’sitwazzjonijiet purament nazzjonali, b’mod partikolari f’dak li jirrigwarda t-taxxa doppja ekonomika, din il-Komunikazzjoni tiffoka fuq sitwazzjonijiet transkonfinali biss.

F’kuntest internazzjonali, it-taxxa doppja tista’ tirriżulta bħala konsegwenza ta’ residenza doppja jew ta’ taxxa kemm fl-Istat ta’ residenza kif ukoll fl-Istat tas-sors.

L-eżempji li ġejjin juru ż-żewġ sitwazzjonijiet.

Eżempju 1. Rigward ir-residenza fiskali doppja, it-taxxa doppja tista’ tiġi ġġenerata mill-applikazzjoni ta’ kriterji diverġenti. Pereżempju, kumpanija tista’ titqies bħala residenti għal raġunijiet ta' taxxa fl-Istat Membru li fih tkun legalment reġistrata u, b’mod simultanju, anki fi Stat Membru differenti li fih tiżviluppa l-attività ewlenija tagħha. F’dik is-sitwazzjoni, il-kumpanija tista’ tkun potenzjalment obbligata tħallas it-taxxa korporattiva fuq bażi globali fiż-żewġ Stati Membri u konsegwentement, tħallas it-taxxa darbtejn fuq l-istess dħul.

Eżempju 2. Ġeneralment, l-Istati Membri jintaxxaw kontribwenti li ma jkunux residenti fir-rigward tad-dħul minn sorsi f’dak l-Istat. Din it-taxxa minn ras il-għajn tista’ tissovrapponi mat-taxxa globali fl-Istat ta’ residenza tal-kontribwent. Pereżempju, artist li jkun residenti ta’ Stat Membru, jiffirma kuntratt komprensiv sabiex jagħmel kunċerti f’diversi Stati Membri, u jawtorizza x-xandiriet bir-radju tal-kunċerti kif ukoll il-wiri ta’ album live mit-tournée tiegħu. Id-dħul li jkun ġej minn dak il-kuntratt jista’ jiġi intaxxat darbtejn jew aktar (fl-Istat ta’ residenza u fl-Istati fejn isiru l-kunċerti) u anki r-royalties tad-drittijiet tal-awtur tal-artist jistgħu jiġu intaxxati darbtejn.

Ġeneralment, l-Istati Membri diġà jeżentaw lill-kontribwenti mit-taxxa doppja permezz ta’ miżuri unilaterali[11], bilaterali[12] jew anki multilaterali[13]. Madankollu, bħala regola ġenerali, fl-istadju preżenti tal-liġi tal-UE, dawn mhumiex obbligati jeżentaw lill-kontribwenti mit-taxxa doppja. Huwa veru li r-regoli tal-Istati Membri li jagħtu preferenza lis-sitwazzjonijiet nazzjonali minflok lis-sitwazzjonijiet transkonfinali, pereżempju fil-qasam tat-taxxa doppja ekonomika, huma kuntrarji għal-libertajiet fundamentali, fin-nuqqas ta’ ġustifikazzjonijiet rilevanti[14]. Madankollu, it-taxxa doppja ma tmurx kontra t-trattati, sakemm din tkun tirriżulta mill-eżerċizzju parallel tas-sovranità fiskali mill-Istat Membru kkonċernat[15].

Bħala konklużjoni, fl-istat preżenti tal-liġi tal-UE, fin-nuqqas ta’ inizjattiva tal-UE, l-Istati Membri mhumiex obbligati jipprevjenu taxxa doppja ta’ dan l-aħħar tip, li wieħed jista’ jsejħilha wkoll taxxa doppja “mhux diskriminatorja”, peress li dan il-fenomenu jaqa’ barra mill-ambitu tal-libertajiet fundamentali[16]..

Mr Damseaux, resident Belġjan, irċieva dividendi mill-2005 sal-2007 minn kumpanija Franċiża. Fi Franza, dawn id-dividendi kienu soġġetti għal taxxa ta’ 15 %. L-ammont li jifdal wara dik it-taxxa (85 % tad-dividendi) kien soġġett għal 15 % taxxa minn ras il-għajn fil-Belġju. Għaldaqstant, it-taxxa totali ta’ dawn id-dividendi kienet ta’ 27,75 %.

Min-naħa l-oħra, id-dividendi mħallsa mill-kumpaniji Belġjani lil resident Belġjan kienu intaxxati biss 15 % skont il-liġi Belġjana.

Il-QEĠ (“Qorti Ewropea tal-Ġustizzja”) ddeċidiet li, sakemm il-liġi tal-UE ma tistabbilixxi l-ebda kriterji ġenerali għall-attribuzzjoni ta’ oqsma ta’ kompetenza bejn l-Istati Membri rigward l-eliminazzjoni tat-taxxa doppja fi ħdan il-Komunità, l-Istati Membri mhumiex obbligati jipprevjenu t-taxxa doppja ġuridika li tirriżulta[17].

3. It-taxxa doppja hija problema?

L-Istati Membri jifhmu l-importanza tal-eliminazzjoni tat-taxxa doppja u fil-fatt jevitawha f’ħafna mill-każijiet. Madankollu, xi taxxa doppja għadha teżisti u toħloq xkiel għall-istabbiliment, l-attività u l-investiment transkonfinali fl-UE li fl-interess tan-negozji u ċ-ċittadini għandu jitneħħa, kif intqal riċentement fir-rapport Monti[18].

It-taxxa doppja hija waħda mill-aktar kwistjonijiet li jħassbu liċ-ċittadini u lin-negozji tal-UE. Fir-Rapport tal-2010 dwar iċ-Ċittadinanza tal-UE, il-problemi relatati mat-taxxa doppja ġew identifikati bħala ostakoli ewlenin li ċ-ċittadini jiffaċċjaw f'kuntest transkonfinali. L-evidenza tissuġġerixxi li, skont l-opinjoni pubblika, it-taxxa doppja hija kwistjoni urġenti[19]. Barra minn hekk, it-taxxa doppja minnha nnifisha hija sors ta’ inċertezza legali għall-kontribwenti kif stqarrew diversi drabi l-assoċjazzjonijiet tan-negozji u r-rappreżentanti tal-kontribwenti[20].

Fil-fatt, ir-riżultati tat-tliet konsultazzjonijiet pubbliċi riċenti tal-Kummissjoni[21] jikkonfermaw li l-kontribwenti tal-UE għadhom imħassba ħafna dwar il-kwistjonijiet relatati mat-taxxa doppja.

B’mod partikolari, fil-konsultazzjoni pubblika speċifika dwar it-taxxa doppja, intqal li l-problema kienet sinifikanti: bejn wieħed u ieħor aktar minn 20 % tal-każijiet irrappurtati kienu jammontaw għal aktar minn miljun (1) EUR għall-kontribwenti korporattivi u aktar minn 35 % kienu jammontaw għal aktar minn 100,000 EUR għal individwi.

Huwa importanti wkoll li jiġi żgurat li s-sett ta’ regoli maħsuba għall-prevenzjoni tat-taxxa doppja jkunu trasparenti, sabiex jiġu evitati interpretazzjonijiet diverġenti u għaldaqstant, sabiex jinkiseb ir-riżultat maħsub. Barra minn hekk, minnha nnifisha, in-nuqqas ta’ trasparenza tista’ tkun ta’ ħsara għall-attività transkonfinali[22].

In-nuqqas ta’ eżenzjoni mill-ħlas tat-taxxa doppja jżid il-piż globali tat-taxxa u għaldaqstant, jista’ jkollu impatt negattiv fuq l-investiment kapitali. Riċerka empirika tissuġġerixxi li t-taxxa korporattiva għandha impatt li mhuwiex negliġibbli fuq id-deċiżjonijiet dwar il-post tal-investiment dirett barrani[23]. Dan jissuġġerixxi li t-taxxa doppja ġewwa l-UE tista’ tiskoraġġixxi l-investimenti minn barra l-UE u xxekkel il-kompetittività tal-intrapriżi tal-UE.

Fin-nuqqas ta’ dejta attwali dwar it-taxxa pprovduta mill-amministrazzjonijiet nazzjonali, huwa diffiċli li jinkisbu stimi kompletament affidabbli tal-impatt dirett tat-taxxa doppja[24]. Fil-fatt, il-kontribwenti, jekk ikollhom l-għażla, jevitaw it-taxxa doppja billi jadattaw l-imġiba tagħhom għaċ-ċirkostanzi attwali. Għaldaqstant, it-taxxa doppja ma tkunx mhux biss piż iżda ssir anki ta' xkiel għall-attività ekonomika[25].

Dan l-impatt indirett huwa aktar diffiċli biex jiġi mkejjel. Madankollu, pubblikazzjoni riċenti tistma li wara l-adozzjoni ta’ konvenzjoni dwar it-taxxa doppja (DTC – “Double Tax Convention”), il-flussi bilaterali ta’ investimenti tal-portafoll bejn il-pajjiżi tat-trattat jistgħu jiżdiedu b'mhux aktar minn 50 %. Id-DTC huma assoċjati wkoll ma’ żieda fil-valutazzjoni tal-ekwità, u jidhru li huma fattur li jikkontribwixxi għat-tnaqqis tal-ispejjeż tal-kapital ta’ ekwità fil-pajjiżi tat-trattat b’madwar 0,24 % fis-sena[26].

Xi kultant, l-eliminazzjoni tat-taxxa doppja, anki meta din tkun legalment possibbli, timplika piż eċċessiv kemm f'termini ta' żmien kif ukoll f'termini ta' spejjeż amministrattivi. Ir-riżultati tal-istħarriġ tal-2007 imwettaq minn ditta rinomata fil-qasam tat-taxxa[27] wrew spiża medja ta’ konformità fiskali għat-taxxa fuq id-dħul tal-kumpaniji ta’ 2,2 % tat-taxxi mħallsa. Madwar 15 % taż-żmien meħud fuq attivitajiet ta’ konformità kien jikkonċerna l-aspetti internazzjonali tat-taxxa korporattiva. Barra minn hekk, 14,6 % tal-kumpaniji u 31,0 % tal-individwi li wieġbu l-Konsultazzjoni Pubblika dwar it-Taxxa Doppja għal dak il-piż għażlu li ma jfittxu l-ebda rimedju biex jeliminaw it-taxxa doppja.

Ir-Rapport tal-2010 dwar iċ-Ċittadinanza tal-UE jsemmi l-inadegwatezza tal-“mekkaniżmi eżistenti sabiex tkun evitata t-taxxa doppja”.

Jista’ jiġi osservat ukoll li l-akkumulazzjoni tat-taxxi imposti minn aktar minn Stat wieħed tista’ twassal għal riżultati li, għall-inqas f’xi Stati Membri, ikunu kkunsidrati bħala konfiskatorji u għaldaqstant meqjusa li jkunu kontra l-liġi, sakemm dawn ir-riżultati jkunu ġew ikkawżati mid-dispożizzjonijiet ta’ dak l-Istat waħdu.

Xi eżempji speċifiċi jindikaw is-sitwazzjoni preżenti fejn iċ-ċittadini u n-negozji aktarx jiltaqgħu ma’ ostakoli prattiċi sinifikanti għall-eżerċitar effettiv tad-drittijiet tagħhom u għall-funzjonament mingħajr problemi tas-suq intern.

F’petizzjoni indirizzata lill-Parlament Ewropew[28] ċittadin Ġermaniż irrapporta li kien joqgħod fi Franza u li kien jaħdem fil-Ġermanja bħala ħaddiem indipendenti għal xi sptarijiet Ġermaniżi. Minħabba interpretazzjonijiet diverġenti tad-DTC bejn Franza u l-Ġermanja hu ġie intaxxat miż-żewġ Stati Membri. Kellu jmur joqgħod il-Ġermanja sabiex isolvi l-problema tiegħu.

Ċittadin Taljan[29] joqgħod il-Ġermanja u jaħdem għal kumpanija Taljana tat-trasport. Isuq trakk madwar diversi pajjiżi tal-Unjoni Ewropea. Minħabba interpretazzjonijiet diverġenti tad-DTC bejn l-Italja u l-Ġermanja hu ġie intaxxat kemm mill-Ġermanja kif ukoll mill-Italja. Il-proċedura ta’ ftehim reċiproku, li nbdiet fl-2005, ma ntemmitx qabel l-2010, iżda l-problemi tiegħu għadhom ma spiċċawx.

4. Ir-risposti attwali u l-limitazzjoni tagħhom biex isolvu l-problemi ewlenin

It-taxxa doppja diġà ġiet indirizzata fil-livell tal-UE. Id-Direttiva dwar is-Sussidjarji Prinċipali[30], id-Direttiva dwar l-Imgħax u r-Royalties[31], il-Konvenzjoni ta’ Arbitraġġ (AC – “Arbitration Convention”)[32], il-kisbiet tal-Forum Konġunt dwar il-Prezzijiet ta' Trasferiment (l-aktar il-Kodiċi tal-Kondotta dwar l-implimentazzjoni effettiva tal-AC)[33], u r-Rakkomandazzjoni dwar proċeduri għall-ħelsien mit-taxxa minn ras il-għajn[34] huma eżempji rilevanti ta’ dawn l-isforzi.

Riċentement, il-Kummissjoni pproponiet direttiva għal Bażi Komuni Konsolidata tat-Taxxa Korporattiva (BKKTK)[35]. Ladarba tkun adottata, din se ssolvi l-problemi tat-taxxa doppja, fil-livell tal-UE, għal gruppi multinazzjonali li jiddeċiedu li jużaw dan l-istrument.

Madankollu, peress li l-ambitu ta’ din il-proposta huwa limitat, mhux se jkunu indirizzati l-każijiet kollha tat-taxxa doppja: dawk il-kumpaniji eliġibbli li jagħżlu s-sistema biss ikunu jistgħu jibbenefikaw mir-reġim tal-BKKTK (l-Artikoli 2 u 6 tal-Proposta)[36].

L-istrumenti eżistenti mhumiex biżżejjed sabiex jindirizzaw ħafna mis-sitwazzjonijiet ta’ taxxa doppja li jifdal, b’mod partikolari: id-Direttiva dwar l-Imgħax u r-Royalties hija limitata fl-ambitu; id-DTC ma tkoprix it-taxxi kollha rilevanti mill-perspettiva tas-Suq Uniku (eż. id-dazji tar-reġistrazzjoni), ma jipprovdux għall-eliminazzjoni kompluta tat-taxxa doppja u, b’mod partikolari, ma jipprovdu l-ebda soluzzjoni uniformi għal relazzjonijiet trijangulari u multilaterali bejn l-Istati Membri; kemm fl-AC kif ukoll fid-DTC, iż-żmien meħtieġ sabiex jiġu konklużi proċeduri ta’ ftehim reċiproku f’każ ta’ tilwim dwar it-taxxa doppja, huwa twil wisq u dawn il-proċeduri spiss ma jirnexxilhomx isolvu l-problemi sottomessi.

Barra minn hekk, l-istrumenti eżistenti għall-eżenzjoni mit-taxxa doppja mhux dejjem jaħdmu b’mod effettiv, b’mod partikolari: id-dispożizzjonijiet tad-DTC mhumiex interpretati u implimentati b’mod konsistenti mill-Istati Membri kkonċernati. Prattiki kunfliġġenti bħal dawn jikkonċernaw l-aktar id-definizzjoni ta’ kunċetti bħar-royalties, id-dħul tan-negozju, id-dividendi, l-istabbiliment permanenti. Konsegwentement, il-kontribwenti jistgħu jġarrbu taxxa doppja, sitwazzjoni li tmur kontra l-objettiv segwit mid-DTC.

Barra minn hekk, iċ-ċittadini tal-UE li jirċievu wirt b’mod transkonfinali jistgħu jiffaċċjaw żvantaġġ ukoll, li huwa piż ta’ taxxa fuq il-wirt ogħla minn dak li seta' kellhom f’sitwazzjoni purament interna fi kwalunkwe Stat Membru kkonċernat.

Hemm aspettattivi kbar li dawn il-problemi, li spiss ikunu kumplessi mill-perspettiva tal-kontribwenti, jiġu indirizzati permezz ta’ soluzzjonijiet fil-livell tal-UE, fejn dan ikun possibbli. Min-naħa tagħha, l-OECD (li 21 Stat Membru tal-UE huma membri tagħha) tirrikonoxxi b’mod espliċitu l-ħtieġa li jiġu indirizzati l-ostakoli li jirriżultaw mit-taxxa doppja[37]. Barra minn hekk, ir-Rapport Monti jirrakkomanda ħidma ulterjuri għall-eliminazzjoni tax-xkiel fiskali kkawżat mit-taxxa doppja mġarrba mill-individwi. Għaldaqstant, jidher li hemm xewqa ġenwina fost il-kontribwenti u anki fost l-Istati Membri sabiex tiġi indirizzata t-taxxa doppja transkonfinali.

5. Soluzzjonijiet possibbli

Il-problemi li ġew identifikati jistgħu jiġu indirizzati billi l-istrumenti eżistenti jittejbu sabiex jindirizzaw is-sitwazzjonijiet ta’ taxxa doppja jew billi jiġu proposti strumenti u soluzzjonijiet ġodda.

Problemi differenti ta’ taxxa doppja jistgħu jiġu indirizzati b’modi differenti, uħud permezz ta’ konvenzjonijiet bilaterali dwar it-taxxa, uħud forsi permezz tal-leġiżlazzjoni tal-UE (fi ħdan il-limiti tal-bażi legali disponibbli fit-TFUE), jew b’modi oħrajn permezz ta’ soluzzjonijiet u strumenti speċifiċi.

Dawn is-soluzzjonijiet possibbli jinkludu:

5.1. Tisħiħ tal-istrumenti eżistenti

Proposta għal tfassil mill-ġdid tad-Direttiva dwar l-Imgħax u r-Royalties hija ppreżentata b’mod simultanju ma’ din il-Komunikazzjoni. L-emendi proposti għat-test eżistenti għandhom l-għan li jnaqqsu n-numru ta’ każijiet fejn it-taxxa doppja tista’ sseħħ bħala konsegwenza ta’ Stat Membru wieħed li japplika taxxa minn ras il-għajn fuq ħlas filwaqt li Stat Membru ieħor jintaxxa dak l-istess ħlas.

5.2. Estensjoni tal-kopertura u tal-ambitu ta’ konvenzjonijiet ta’ taxxa doppja

Il-Kummissjoni tqis li hemm il-ħtieġa li jitlesta l-qafas tad-DTC bejn is-27 Stat Membru[38] u se tinkoraġġixxi djalogu bejn l-Istati Membri f’każ ta’ tilwim li jxekkel il-konklużjoni ta’ DTC.

Il-Kummissjoni beħsiebha teżamina, flimkien mal-Istati Membri u l-esperti, modi ta' kif jistgħu jiġu indirizzati sitwazzjonijiet trijangulari[39], u ta' kif jiġu ttrattati entitajiet u taxxi li mhumiex koperti minn DTC fi ħdan l-UE. Se tieħu l-inizjattivi xierqa, b’mod partikolari fir-rigward tat-taxxi fuq il-wirt.

5.3. Passi maħsubin sabiex jaslu għal interpretazzjoni u applikazzjoni aktar konsistenti tad-dispożizzjonijiet tad-DTC bejn l-Istati Membri tal-UE

It-taxxa doppja spiss tirriżulta minn kunflitti fl-interpretazzjoni. Hemm bżonn li, fejn possibbli, tiġi evalwata l-possibbiltà li jiġi żviluppat fehim komuni fl-UE ta’ xi kunċetti li jinsabu fid-DTC applikabbli bejn l-Istati Membri (eż. royalties, dħul tan-negozju, dividendi, stabbilimenti permanenti, residenza fiskali, ħaddiema transkonfinali...). Skont il-każ, jista’ jiġi indikat li jiġu kkunsidrati kunċetti identiċi jew simili li jinsabu fil-liġi tal-UE, bħala dimensjoni speċifika tal-UE għall-problema. Minħabba l-importanza tagħhom għas-suq intern, huwa fundamentali li dawn il-kwistjonijiet jiġu diskussi fil-livell tal-UE. Madankollu, koordinazzjoni bħal din tista’ tikkontribwixxi wkoll għad-diskussjonijiet ta’ korpi internazzjonali bħall-OECD u n-NU, anki f’dak li jirrigwarda l-iżvilupp ta’ standards internazzjonali usa'. Billi wieħed jibni fuq l-esperjenza pożittiva tal-JTPF (“Joint Transfer Pricing Forum”), hemm l-ambitu sabiex jiġu eżaminati l-benefiċċji potenzjali tat-twaqqif ta’ forum għar-rappreżentanti tal-Istati Membri (Forum tal-UE dwar it-taxxa doppja). Fuq il-bażi tad-diskussjonijiet li għandhom isiru f’dan il-forum, il-Kummissjoni se tikkunsidra l-elaborazzjoni tal-Kodiċi ta’ Kondotta dwar it-taxxa doppja.

5.4. L-iffaċilitar u t-tħaffif tas-soluzzjoni tat-tilwim fl-UE

L-AC ġiet imfassla sabiex tipprovdi metodu għas-soluzzjoni ta’ tilwim li jirriżulta l-aktar mill-prezzijiet ta' trasferiment. Madankollu, minkejja l-adozzjoni (u r-reviżjoni) ta’ Kodiċi ta’ Kondotta, il-funzjonament xieraq tal-AC xorta jista’ jittejjeb, kif jidher mit-tul, b’mod ġenerali, tal-Proċeduri ta’ Ftehim Reċiproku (MAP – “Mutual Agreement Procedures”)[40]. Fir-rigward tal-AC, matul l-aħħar 5 snin li għalihom huma disponibbli ċ-ċifri, nofs it-tilwim pendenti fi tmiem kull sena kien tilwim li kien ilu għaddej għal aktar minn sentejn[41].

Il-kontribuzzjonijiet għall-konsultazzjonijiet pubbliċi tal-2010 jikkritikaw il-fatt li d-DTC ma tippermettix li jkun hemm soluzzjonijiet tat-tilwim f'waqthom. Ġeneralment, il-kontribwenti jiddependu biss fuq il-mekkaniżmu ta’ soluzzjoni tat-tilwim li huwa pprovdut mid-DTC rilevanti, abbażi tal-Artikolu 25 antik tal-Mudell ta’ Konvenzjoni dwar it-Taxxa tal-OECD. Madankollu, dan mhuwiex kompletament effiċjenti minħabba li l-Istati kontraenti sempliċement jintalbu jippruvaw isibu soluzzjoni. Il-kontribwent ma għandu l-ebda garanzija li t-taxxa doppja se tiġi eliminata, u lanqas li l-amministrazzjonijiet tat-taxxa se jseħħu b’mod veloċi. L-OECD tirrikonoxxi n-numru ta’ każijiet mhux solvuti (żieda ta’ 21,3% mill-2008 sal-2009) bħala wieħed ta’ tħassib kbir[42].

Għaldaqstant, mill-perspettiva tal-UE, in-nuqqas ta’ proċedura vinkolanti globali għas-soluzzjoni tat-tilwim hija kwistjoni li trid tiġi indirizzata, kemm għal raġunijiet tas-suq uniku kif ukoll minħabba motivazzjonijiet ta’ kompetittività globali usa’ (relatati mal-fatt li l-investituri barranin huma attratti lejn l-UE). L-AC u d-DTC tal-Istati Membri ma jipprovdu l-ebda metodu kompletament ta’ suċċess.

Soluzzjoni possibbli tinsab fl-aħħar verżjoni tal-Artikolu 25 tal-Mudell ta’ Konvenzjoni dwar it-Taxxa tal-OECD (2008), li jipprovdi għal proċedura ta’ ftehim reċiproku bi proċedura vinkolanti għas-soluzzjoni tat-tilwim għall-każijiet kollha mhux solvuti ta’ taxxa doppja, jekk il-kontribwent jitlob li jsir hekk. Madankollu, sa issa, dispożizzjonijiet bħal dawn ġew inklużi biss f’numru żgħir ta’ DTC konklużi bejn l-Istati Membri[43].

Il-Kummissjoni tara l-bżonn li tanalizza x’titjib jista’ jsir fil-proċeduri għas-soluzzjoni tat-tilwim dwar it-taxxa doppja fi ħdan l-UE. Għandha tiġi esplorata wkoll, b’mod partikolari, il-possibbiltà ta’ mekkaniżmu sabiex jiġi solvut b’mod effettiv u malajr it-tilwim imsemmi fl-oqsma kollha tat-taxxa diretta.

6. Passi u konklużjonijiet ulterjuri

Il-Kummissjoni hija determinata li tindirizza l-problemi rilevanti tat-taxxa doppja fl-UE u li tippreżenta xi inizjattivi. Żewġ proposti huma prevalenti. Dawn huma:

· Il-proposta għal bażi komuni konsolidata tat-taxxa korporattiva – adottata f’Marzu 2011;

· Il-proposta għal tfassil mill-ġdid tad-Direttiva dwar l-Imgħax u r-Royalties, ippreżentata b’mod simultanju ma’ din il-Komunikazzjoni.

Minbarra dawn il-proposti, il-Kummissjoni se:

· Tippreżenta dalwaqt soluzzjonijiet possibbli sabiex tindirizza l-ostakoli transkonfinali relatati mat-taxxa fuq il-wirt fi ħdan l-UE

· Tkompli tagħmel użu mill-JTPF li ġie rinnovat riċentement sabiex tindirizza l-kwistjonijiet ta’ taxxa doppja relatata mal-prezzijiet ta' trasferiment;

· Tippreżenta soluzzjonijiet fl-2012 dwar it-taxxa transkonfinali doppja fuq dividendi mħallsa lil investituri tal-portafolli;

· Tiżviluppa aktar l-ideat stabbiliti f’din il-Komunikazzjoni, b’mod partikolari l-possibbiltà li jinħoloq Forum dwar it-taxxa doppja għal kwistjonijiet purament relatati mat-taxxa tal-UE, sabiex tiżviluppa kodiċi ta’ kondotta dwar it-taxxa doppja u sabiex tikkunsidra mekkaniżmu effiċjenti ta’ soluzzjoni tat-tilwim, bil-għan li jiġu ddeterminati l-aktar mezzi effettivi għat-tneħħija tat-taxxa doppja

· Rigward l-eżenzjoni tal-ħlas tat-taxxa doppja, bħalissa l-Kummissjoni qed tgħarbel kif tista’ tniedi proċedura ta’ konsultazzjoni għal ġbir ta’ informazzjoni sabiex tistabbilixxi skala sħiħa ta’ dan il-fenomenu. Ir-riżultati ta’ din il-konsultazzjoni se jintużaw sabiex jiġi identifikat u żviluppat rispons politiku xieraq.

Barra minn hekk, il-Kummissjoni għandha l-għan li tiddiskuti ma’ esperti mill-Istati Membri tal-UE dwar x’inhu l-aqwa mod sabiex jiġu indirizzati dawn il-kwistjonijiet qabel ma tieħu l-inizjattivi xierqa.

Il-Kummissjoni tistieden lill-Parlament Ewropew, lill-Kunsill u lill-Kumitat Ekonomiku u Soċjali Ewropew sabiex jiddiskutu u jappoġġjaw dawn l-orjentazzjonijiet.

Il-partijiet interessati kollha huma mistiedna jesprimu l-opinjonijiet tagħhom dwar din l-inizjattiva u jinfurmaw lill-Kummissjoni bl-azzjonijiet speċifiċi li jirrakkomandaw.

[1]               COM(2010) 2020, 3.3.2010.

[2]               Il-Kummissjoni hija mħassba dwar is-sitwazzjonijiet preżenti ta’ eżenzjoni mill-ħlas tat-taxxa doppja ġewwa l-UE. Il-Kummissjoni qed tikkunsidra konsultazzjoni pubblika fil-qasam tal-eżenzjoni mill-ħlas tat-taxxa doppja korporattiva, kif suġġerit riċentement mill-MPE, is-Sinj. Bowles, President tal-Kumitat għall-Affarijiet Ekonomiċi u Monetarji tal-Parlament tal-UE (Forum dwar it-Taxxa tal-2011 fi Brussell).

[3]               COM(2006)823, 19.12.2006, punt 1.

[4]               Ara, pereżempju, il-Konklużjonijiet tal-Kapijiet ta’ Stat jew tal-Gvern tal-pajjiżi taż-Żona tal-Euro tal-11 ta’ Marzu 2011.

[5]               Ara l-konsultazzjoni pubblika tal-Kummissjoni http://ec.europa.eu/taxation_customs/common/consultations/tax/2010_04_doubletax_en.htm u n-noti ta’ qiegħ il-paġna numri 25 u 26.

[6]               COM(2010)769, 20.12.2010, punt 4.1.

[7]               It-taxxa doppja purament nazzjonali, kull meta sseħħ, għandha tiġi rregolata mil-leġiżlatur nazzjonali.

[8]               COM(2011)206, 13.4.2011.

[9]               Ir-Rapport tal-2010 dwar iċ-Ċittadinanza tal-UE 'It-tneħħija tal-ostakoli għad-drittijiet taċ-ċittadini tal-UE' COM(2010)603, 27.10.2010.

[10]             Ara, fl-IBFD Tax Glossary, id-daħla "double taxation".(taxxa doppja). Tradizzjonalment, hija maqsuma f’żewġ tipi, taxxa doppja ġuridika u taxxa doppja ekonomika. Fil-każ ta’ taxxa doppja ġuridika, żewġ taxxi komparabbli jiġu applikati għall-istess kontribwent fir-rigward tal-istess dħul jew kapital. Ġeneralment, l-espressjoni taxxa doppja ekonomika tintuża meta kontribwenti differenti jiġu intaxxati fir-rigward tal-istess dħul jew kapital.

[11]             Eż. billi jiġi eżentat id-dħul barrani ta’ kontribwent residenti jew billi jingħata kreditu barrani ta’ taxxa.

[12]             Miżuri bilaterali pprovduti permezz ta’ konvenzjonijiet dwar it-taxxa doppja (DTC – “double tax conventions”) li fuq il-bażi tagħhom żewġ pajjiżi jiftiehmu dwar kif u kemm titnaqqas it-taxxa doppja bejn ir-residenti tagħhom.

[13]             Eż. il-Konvenzjoni bejn il-Pajjiżi Nordiċi sabiex tiġi evitata t-taxxa doppja fir-rigward tat-taxxi fuq id-dħul u fuq il-kapital jew l-hekk imsejħa “Konvenzjoni dwar l-Arbitraġġ” (AC – “Arbitration Convention”): Konvenzjoni dwar l-eliminazzjoni tat-taxxa doppja b’rabta mal-aġġustament ta' intrapriżi assoċjati (90/436/KEE), ĠU L 225, 20.8.1990 [Mhux disponibbli bil-Malti].

[14]             Eż. QEĠ, it-12 ta’ Diċembru 2002, C-324/00 (Lankhorst-Hohorst), para. 32; QEĠ, l-14 ta’ Diċembru 2006, C-170/05 (Denkavit Internationaal), para. 39; QEĠ, it-8 ta’ Novembru 2007, C-379/05 (Amurta), para. 28; QEĠ, l-1 ta’ Lulju 2010, C‑233/09 (Dijkman), para. 23; QEĠ, it-22 ta’ Diċembru 2010 C-287/10 (Tankreederei I), para 15.

[15]             QEĠ, l-14 ta’ Novembru 2006 (Kerckhaert-Morres); it-12 ta’ Frar 2009 (Block); is-16 ta’ Lulju 2009 (Damseaux).

[16]             Opinjoni tal-A.G. Geelhoed f’Kerckhaert-Morres, para.38.

[17]             QEĠ, Damseaux, cit.

[18]             Rapport lill-President tal-Kummissjoni Ewropea (mill-eks Kummissarju tal-UE Monti), “Strateġija Ġdida għas-Suq Uniku”, id-9 ta’ Mejju 2010, para.3.5., 83.

[19]             Pereżempju, matul il-Laqgħa tal-Kumitat għall-Petizzjonijiet tal-Parlament Ewropew li saret fl-14 u fil-15 ta’ Ġunju 2011, 4 mill-11-il Petizzjoni inklużi fil-Kapitolu dwar it-Taxxa kienu jirreferu għat-taxxa doppja. Ara wkoll l-istudju tal-Ewrobarometru ta' Settembru 2011 dwar l-ostakoli li jiffaċċjaw iċ-ċittadini fis-Suq Intern, http://ec.europa.eu/public_opinion/archives/quali/ql_obstacles_en.pdf

[20]             Il-kummenti tal-MEDEF (“Mouvement des Entreprises de France”) dwar Proposed changes in article 15 § 2 of the OECD model convention, 2007, (“Bidliet proposti fl-Artikolu 15(2) tal-Mudell ta’ Konvenzjoni tal-OECD”) fuq http://www.oecd.org/dataoecd/14/62/39547932.pdf.

[21]             http://ec.europa.eu/taxation_customs/common/consultations/tax/2010_04_doubletax_en.htm;

                http://ec.europa.eu/taxation_customs/common/consultations/tax/2010_06_inheritance_en.htm;

                http://ec.europa.eu/taxation_customs/common/consultations/tax/2010_08_royalty_en.htm.

[22]             OECD. Tax Effects on Foreign Direct Investment, 2007, 33. (“Effetti tat-Taxxa fuq l-Investiment Dirett Barrani”).

[23]             Ara, pereżempju, Hajkova, D. et al., “Taxation, Business Environment and FDI Location in OECD Countries”, Dokumenti ta’ Ħidma tad-Dipartiment tal-Ekonomija tal-OECD, Nru 502, 2006, fuq http://dx.doi.org/10.1787/874058477248. (“Taxxa, Ambjent tan-Negozju u Post tal-FDI fil-pajjiżi tal-OECD”).

[24]             Valutazzjoni tal-Impatt tal-proposta għal Direttiva tal-Kunsill dwar BKKTK, 16.3.2011.

[25]             Id-distinzjoni bejn piż u xkiel fir-rigward tat-taxxa doppja diġà ssemmiet fl-1923 mil-League of Nations. Ara pereżempju, Economic and Financial Commission, Report on Double Taxation submitted to the Financial Committee, (“Kummissjoni Ekonomika u Finanzjarja, "Rapport dwar it-Taxxa Doppja sottomessa lill-Kumitat Finanzjarju") Dokument E.F.S.73. F.19, p.11, il-5 ta’ April 1923.

[26]             Parkih, Jain u Spahr, The impact of Double Taxation on Cross Border Equity Flows, Valuations and Cost of Capital (“L-impatt tat-Taxxa Doppja fuq il-Flussi Transkonfinali tal-Ekwità, il-Valutazzjonijiet u l-Kost tal-Kapital”), 2011, EFMA, Laqgħa ta’ Braga.

[27]             PWC LLP, Total Tax Contribution ("Kontribuzzjonijiet Totali tat-Taxxa"), Stħarriġ tal-2007 tal-Hundred Group of Finance UK Directors tar-Renju Unit (l-assoċjazzjoni tal-akbar 100 kumpanija elenkati bħala kumpaniji tar-Renju Unit).

[28]             PE, Kumitat għall-Petizzjonijiet, Petizzjoni 1404/2010.

[29]             PE, Kumitat għall-Petizzjonijiet, Petizzjoni 1053/2010.

[30]             Id-Direttiva tal-Kunsill tat-23 ta’ Lulju 1990 dwar is-sistema komuni tat-taxxa li tapplika fil-każ tal-kumpaniji prinċipali u sussidjarji ta' Stati Membri differenti (90/435/KEE).

[31]             Direttiva tal-Kunsill tat-3 ta’ Ġunju 2003 dwar sistema komuni ta' taxxa applikabbli għall-pagamenti ta' mgħax u ta' royalties bejn kumpaniji assoċjati ta' Stati Membri differenti (2003/49/KE).

[32]             Konvenzjoni dwar l-eliminazzjoni tat-taxxa doppja b’konnessjoni mal-aġġustament tal-intrapriżi assoċjati (90/436/KEE), ĠU L 225, 20.8.1990.

[33]             http://ec.europa.eu/taxation_customs/taxation/company_tax/transfer_pricing/index_en.htm

[34]             C/2009/7924, http://ec.europa.eu/taxation_customs/resources/documents/common/whats_new/c(2009)7924_en.pdf

[35]             COM(2011)121; 16.3.2011.

[36]             Il-Proposta ta' direttiva ma tistabbilixxi xejn ħlief sistema għal bażi komuni għat-taxxa ta’ ċerti kumpaniji u gruppi ta’ kumpaniji (Artikolu 1 tal-Proposta).

[37]             Ara iktar ’il fuq, in-nota 3.

[38]             Fl-1.1.2011, 10 relazzjonijiet bilaterali bejn l-Istati Membri tal-UE ma kinux koperti mid-DTC.

[39]             Fil-qasam tal-prezzijiet ta' trasferiment, sar xi xogħol mill-JTPF; ara n-nota tal-qiegħ li ġejja.

[40]             http://ec.europa.eu/taxation_customs/resources/documents/taxation/company_tax/transfer_pricing/forum/jtpf/2010/

/jtpf_2010_06_08_number_open_cases_en.pdf

[41]             http://ec.europa.eu/taxation_customs/resources/documents/taxation/company_tax/transfer_pricing/forum/jtpf/2010/

/jtpf_2010_06_08_number_open_cases_en.pdf

[42]             http://www.oecd.org/document/11/0,3746,en_2649_33747_46499831_1_1_1_1,00.html; żieda ta’ 63,4 % meta mqabbla mal-2006.

[43]             eż. bejn Franza u r-Renju Unit (19/6/2008), bejn il-Pajjiżi l-Baxxi u r-Renju Unit (26/9/2008), bejn il-Ġermanja u r-Renju Unit (30/3/2010).