52011DC0638

X'INHU L-APPOġġ BAġITARJU; GħALIEX L-UE TAGħMEL UżU MINN DAN L-ISTRUMENT?

L-appoġġ baġitarju jinvolvi djalogu ta’ politika, trasferimenti finanzjarji lejn kont tat-teżor nazzjonali tal-pajjiż sieħeb, valutazzjoni tar-rendiment u l-iżvilupp tal-kapaċità, ibbażat fuq is-sħubija u responsabbiltà reċiproka. Ma għandux jitqies bħala għan fih innifsu, iżda bħala mezz biex titwassal għajnuna aħjar u jinkisbu għanijiet għall-iżvilupp sostenibbli permezz tat-trawwim ta’ appartenenza fost il-pajjiżi msieħba tal-politiki tal-iżvilupp u riformi, kif ukoll billi jimplimenta l-aġenda dwar l-effettività tal-għajnuna u l-impenji stabbiliti fil-Kunsens ta’ Monterrey (2002), il-Kunsens Ewropew għall-Iżvilupp (2005), id-Dikjarazzjoni ta’ Pariġi dwar l-Effikaċja tal-Għajnuna (2005), u l-Aġenda Accra għall-Azzjoni(2008).

L-appoġġ baġitarju huwa strument importanti fil-politika għall-iżvilupp komprensiv tal-UE lejn pajjiżi msieħba. Il-Kummissjoni se tiżgura li l-appoġġ baġitarju tal-UE[1] jkun konsistenti mal-prinċipji u l-għanijiet ġenerali tal-azzjoni esterna tal-UE (Artikolu 21 TUE) u l-politika għall-iżvilupp (l-Artikolu 208 TFUE).

Wara Komunikazzjoni dwar l-appoġġ baġitarju fl-2000[2], il-Kummissjoni daħħlet approċċ orjentat lejn ir-riżultati bbażat fuq indikaturi tal-eżiti. Il-prevedibbiltà, l-appartenenza u r-responsabbiltà ġew ulterjorment imsaħħa bl-introduzzjoni tal-Kuntratti tal-Għanijiet ta’ Żvilupp tal-Millennju (MDG) fl-2008.

L-apppoġġ baġitarju tal-UE mhuwiex poter bla riżerva, u lanqas ma jiġi pprovdut lil kull pajjiż. Il-“prinċipji ta’ bażi” huma importanti u djalogu ta’ politika huwa parti ewlenija tal-pakkett. Barra minn hekk, il-kriterji tal-eliġibbiltà jridu jintlaħqu qabel u matul il-programm u jeħtieġ li jiġu sodisfatti l-kundizzjonijiet qabel ma jsiru l-ħlasijiet. Dan jiżgura li r-riżorsi huma użati għall-għanijiet maħsuba għalihom, itaffi r-riskji, u joħloq inċentivi għal rendiment u riżultati mtejba. Joħloq ukoll inċentivi għall-pajjiżi msieħba tagħna biex itejbu s-sistemi tal-gvernijiet tagħhom.

Ibbażat fuq għaxar snin ta’ esperjenza fuq l-appoġġ baġitarju u sejħiet għall-partijiet interessati biex ikomplu jtejbu u jirfinaw il-mekkaniżmu tal-appoġġ baġitarju, il-Kummissjoni ddeċidiet li tniedi konsultazzjoni fl-aħħar tal-2010 dwar “Il-futur tal-appoġġ baġitarju tal-UE lil pajjiżi terzi”[3].

F’din il-Komunikazzjoni, il-Kummissjoni stabbiliet politika ġdida dwar l-appoġġ baġitarju u ressqet proposti ta’ politika għal approċċ koordinat tal-UE. Għandha l-għan li tadatta l-politika tal-appoġġ baġitarju għall-ambjent politiku u ta’ politika li jinbidel, inkluż it-Trattat ta’ Lisbona, u tagħmel l-appoġġ baġitarju tal-UE strument aktar effettiv. L-Istati Membri jistgħu ukoll jikkunsidraw dawn bħala rakkomandazzjonijiet fir-rigward tal-appoġġ baġitarju bilaterali tagħhom, sabiex jintlaħaq approċċ koordinat mill-UE bħala entità sħiħa.

APPROċċ MODERN LEJN L-APPOġġ BAġITARJU

Bini fuq is-suċċess

L-appoġġ baġitarju tal-UE għandu jkompli jiżgura livell għoli ta’ prevedibbiltà, biex ipoġġi enfasi qawwija fuq l-istrateġiji ta’ żvilupp li huma proprjetà nazzjonali u biex juża ħlasijiet relatati mar-rendiment. Il-Kummissjoni tibqa’ impenjata lejn operazzjonijiet għall-appoġġ baġitarju ibbażati fuq ir-riżultati u beħsiebha tkompli ssaħħaħ il-valutazzjoni tal-progress u l-monitoraġġ tal-eżiti, anke bl-użu ta’ indikaturi tal-proċess u tal-produzzjoni, sabiex turi u tikkomunika aħjar kif l-appoġġ baġitarju tal-UE jikkontribwixxi għall-iżvilupp ta’ pajjiżi msieħba. It-titjib tal-viżibilità tal-azzjoni tal-UE u tal-komunikazzjoni aħjar tar-riżultati tgħin biex jinżamm l-appoġġ pubbliku għall-iżvilupp.

L-UE għandha tkompli tapplika approċċ dinamiku ma’ kriterji tal-eliġibbiltà, u tiffoka fuq il-progress fl-implimentazzjoni ta’ strateġiji ta’ riforma kredibbli u rilevanti. Il-Kummissjoni beħsiebha ttejjeb il-kriterji tal-eliġibbiltà tagħha u l-valutazzjoni tagħhom u l-allokazzjoni tal-fondi sabiex tiżgura aktar effiċjenza fil-proċess baġitarju lejn il-ksib tal-għanijiet ta’ politika.

Il-Kummissjoni se toqgħod lura milli tistabbilixxi miri globali għall-appoġġ baġitarju tal-UE għal pajjiżi terzi. Tqis li t-taħlita xierqa bejn id-diversi modalitajiet ta’ għajnuna hija deċiża l-aħjar bħala parti minn approċċ tal-portafoll li jinkludi bosta modalitajiet tal-għajnuna b’reazzjoni għal speċifiċitajiet tal-pajjiżi sħab u għanijiet ta' żvilupp maqbula.

Il-Kummissjoni se ssaħħaħ il-qafas tal-ġestjoni tar-riskju tagħha għal appoġġ baġitarju tal-UE skont ir-rakkomandazzjonijiet tal-Qorti tal-Awdituri. Dan se jinkludu l-monitoraġġ mill-qrib tal-progress fil-ġlieda kontra l-korruzzjoni u l-frodi bil-ħsieb li jkunu żgurati benefiċċji għal żvilupp sostenibbli.

Risposti għal sfidi ta’ żvilupp u għanijiet ġodda.

L-approċċ il-ġdid għandu jsaħħaħ is-sħubija kuntrattwali dwar l-appoġġ baġitarju tal-UE bejn l-UE u l-pajjiżi msieħba sabiex jibnu u jikkonsolidaw demokraziji, ifittxu tkabbir ekonomiku sostenibbli u jinqered il-faqar. Dan l-approċċ għandu jkun ibbażat fuq responsabbiltà reċiproka u impenn komuni għall-valuri fundamentali tad-drittijiet tal-bniedem, id-demokrazija u l-istat tad-dritt. Għandu jippermetti differenzi akbar ta’ operazzjonijiet ta’ appoġġ baġitarju, li jippermettu lill-UE biex twieġeb aħjar għall-kuntest politiku, ekonomiku u soċjali tal-pajjiż imsieħeb. Jeħtieġ koordinazzjoni mill-qrib bejn is-servizzi tal-Kummissjoni, is-SEAE u l-Istati Membri.

Il-Kummissjoni hija impenjata li ssaħħaħ it-trasparenza u r-responsabbiltà fl-appoġġ baġitarju tal-UE billi tintroduċi kriterju tal-eliġibbiltà speċifiku dwar it-trasparenza u s-sorveljanza. Il-Kummissjoni hija impenjata wkoll li tippubblika informazzjoni relevanti dwar l-operazzjonijiet għall-appoġġ baġitarju tal-UE.

L-UE għandha tipprovdi appoġġ baġitarju bħala vettur tal-bidla biex tindirizza l-isfidi u l-għanijiet għall-iżvilupp li ġejjin.

Il-promozzjoni tad-drittijiet tal-bniedem u tal-valuri demokratiċi

L-impenn għal valuri fundamentali tad-drittijiet tal-bniedem, id-demokrazija u l-istat tad-dritt huwa essenzjali għall-istabbiliment ta’ kwalunkwe sħubija u kooperazzjoni bejn l-UE u pajjiżi terzi.

L-appoġġ baġitarju ġenerali jidher, min-natura tiegħu, bħala rikonoxximent impliċitu li l-qagħda ta’ politika ġenerali tal-pajjiż sieħeb u l-governanza politika hija fit-triq it-tajba. Għalhekk, l-appoġġ baġitarju ġenerali għandu jiġi provdut meta jkun hemm il-fiduċja u l-kunfidenza li l-għajnuna se tintefaq għall-valuri u l-għanijiet li magħhom timxi l-UE, u li fuqhom il-pajjiżi msieħba jimpenjaw irwieħhom li jimxu biex jilħqu livelli internazzjonali.

Meta jiġi provdut appoġġ baġitarju ġenerali tal-UE, il-Kummissjoni timmira li trawwem responsabbiltà domestika u ssaħħaħ il-mekkaniżmi ta’ kontroll nazzjonali bħala bażi għat-titjib tal-governanza u aderenza għal valuri fundamentali.

F’każijiet fejn l-impenn tal-pajjiż imsieħeb għal valuri fundamentali juri tendenza sinifikanti li qed jiddeterjora, trid tiġi definita u implimentata strateġija ta’ reazzjoni adegwata u kkoordinata fuq livell tal-UE u l-Istati Membri. Sakemm ma jkunx hemm sitwazzjoni ċara fejn l-interessi finanzjarji u r-reputazzjoni tal-UE jeħtieġu li jkunu protetti, f’liema każ l-appoġġ baġitarju ġenerali jista’ jiġi sospiż immedjatament, ir-reazzjoni għad-deterjorazzjoni għandha tkun progressiva u proporzjonata. Fejn hu xieraq, għandhom jiġu mfassla miżuri biex jiġi llimitat l-impatt fuq nies foqra flimkien mal-UE u l-Istati Membri, f’kooperazzjoni ma’ donaturi oħra li mhumiex tal-UE. Dan jista’ jinkludi aġġustamenti li jsiru fid-daqs ta’ kwalunkwe ħlas fiss u/jew jiġu allokati mill-ġdid fondi għal programmi għas-settur, jiġu diretti l-fondi għal gruppi fil-mira permezz ta’ organizzazzjonijiet mhux governattivi jew jiġu rinfurzati modalitajiet oħra tal-għajnuna bħal proġetti.

Sabiex jirrifletti aħjar dawn il-bidliet fundamentali, l-appoġġ baġitarju ġenerali tal-UE għandu jkun imsemmi fil-futur bħala “Kuntratti ta’ Governanza Tajba u Żvilupp” .

Fir-rigward tal-appoġġ baġitarju settorjali tal-UE, il-Kummissjoni għandha t-tendenza li tiffoka fuq setturi fejn il-politiki u r-riformi jippromettu aktar li jippromwovu l-iżvilupp u t-taffija tal-faqar; l-ixpruni għall-bidla huma aktar b’saħħithom u għandhom l-għan li jindirizzaw il-ħtiġijiet bażiċi tal-popolazzjonijiet (eż. servizzi bażiċi bħas-saħħa, l-edukazzjoni, u l-ilma u s-sanità). Ħafna drabi, huwa aktar effiċjenti li jintużaw mekkaniżmi tat-twassil tal-gvern biex tintlaħaq il-popolazzjoni permezz ta’ programmi ta’ appoġġ baġitarju settorjali. Dan joffri wkoll mezz biex tittejjeb is-sostenibbiltà tal-programmi billi tittejjeb l-effiċjenza u l-effettività tal-istruttura tat-twassil settorjali tal-gvern. Għalhekk, l-appoġġ baġitarju settorjali jibqa’ għodda utli anke fejn il-kundizzjonijiet biex tippermetti l-użu ta’ Kuntratt ta’ Governanza Tajba u Żvilupp ma jeżistux, għaliex ta’ spiss jibqa’ l-aqwa mekkaniżmu ta’ twassil, u jista’ jintuża bħala vettur biex itejjeb il-governanza. L-ivvalutar tal-appoġġ baġitarju settorjali tal-UE fid-dawl tal-governanza politika se jkollu bżonn jiġi bbilanċjat kontra l-bżonn li sservi u tipproteġi l-popolazzjoni. Madankollu, fejn il-governanza politika iddeterjorat ħafna, l-UE għandha terġa’ tivvaluta l-kooperazzjoni ġenerali tagħha mal-pajjiż sieħeb, inkluż l-appoġġ baġitarju settorjali.

It-titjib tal-ġestjoni finanzjarja, l-istabbiltà makroekonomika, it-tkabbir inklussiv u l-ġlieda kontra l-korruzzjoni u l-frodi

L-appoġġ baġitarju, partikolarment il-“Kuntratti ta’ Governanza Tajba u Żvilupp”, għandu jintuża biex isaħħaħ sistemi ċentrali tal-gvern, bħall-ġestjoni tal-finanzi pubbliċi u l-amministrazzjoni pubblika. Għandu jippromwovi l-istabbiltà makroekonomika u s-sostenibbiltà fiskali, b’hekk jagħmel is-sistemi aktar effettivi u kontabbli u jwassal għal proċess komprensiv u trasparenti tal-allokazzjoni baġitarja. Għandu jintuża biex jindirizza l-limitazzjonijiet fuq tkabbir sostnut u biex jippromwovi “l-ekonomija ekoloġika”, inkluż il-protezzjoni u l-użu sostenibbli ta’ ġid pubbliku u r-riżorsi naturali, filwaqt li jiżgura li l-benefiċċji tat-tkabbir huma kondiviżi b’mod wiesa’.

Bħala parti mill-għan tagħha biex ittejjeb is-sistemi ċentrali tal-gvern, partikolarment l-akkwist, l-appoġġ baġitarju se jikkontribwixxi għall-ġlieda kontra l-korruzzjoni u r-reati li jinkudu l-frodi. Pajjiżi msieħba għandhom jimpenjaw ruħhom biex jinfurmaw lill-Kummissjoni, u l-imsieħba kollha inġenerali, meta allegazzjonijiet ta’ frodi jew ta’ korruzzjoni possibbli jinġiebu għall-attenzjoni tal-awtoritajiet nazzjonali. Kull meta jkun possibbli u mingħajr preġudizzju għal investigazzjonijiet, is-sejbiet tal-istituzzjoni investigattiva nazzjonali relevanti u kwalunkwe azzjoni proposta għandhom jiġu mgħoddija wkoll lill-Kummissjoni, u inġenerali lill-imsieħba kollha.

Il-promozzjoni ta’ riformi settorjali u t-titjib fit-twassil tas-servizz settorjali

Meta jiġi promoss it-twassil ta’ servizzi jew riformi f’settur speċifiku (jew sett ta’ setturi interkonnessi) fuq il-bażi ta’ strateġija settorjali tal-gvern sieħeb, il-provvediment ta’ appoġġ baġitarju settorjali jista’ jkun deċisiv biex tittejjeb il-kapaċità tal-gvern li jwettaq il-funzjonijiet tiegħu u jwassal għanijiet settorjali.

Għanijiet ċari għandhom jiġu definiti, prinċipalment f’termini ta’ titjib fl-aċċess pubbliku u l-użu ta’ servizzi ta’ kwalità u, partikolarment fil-pajjiżi tal-viċinat, l-appoġġ għall-aġenda ta’ sħubija. Kundizzjonijiet settorjali speċifiċi għandhom iwasslu għal djalogu ta’ politika regolari, inkluż dwar l-allokazzjonijiet baġitarji għas-settur, l-implimentazzjoni tar-riformi, it-tisħiħ tal-istituzzjonijiet u s-sistemi, il-progress lejn l-għanijiet settorjali, u t-twassil effiċjenti tas-servizzi. L-enfasi se tkun fuq kwistjonijiet li jirrigwardaw it-twassil tas-servizz fuq quddiem nett, partikolarment favur il-foqra, kwistjonijiet ta’ sess u ta’ tfal, u l-kapaċità li jassorbu u jużaw ir-riżultati tar-riċerka settorjali, kif ukoll il-ħolqien ta’ kundizzjonijiet għat-tkabbir inklussiv u sostenibbli għall-iżvilupp tal-bniedem.

Approċċi ta’ “Ħlas mal-akkwist" se jiġu esplorati wkoll, mibnija fuq l-esperjenza mal-ħlas varjabbli u meqjusa mal-livell ta’ żvilupp u l-ħtiġijiet ta’ finanzjament ta’ kull pajjiż.

Il-Kummissjoni beħsiebha tagħmel aktar użu tal-appoġġ baġitarju settorjali biex jiġu indirizzati limitazzjonijiet settorjali, jiġu promossi r-riformi u jittejjeb it-twassil tas-servizz għall-popolazzjonijiet. Sabiex jirrifletti aħjar dawn il-bidliet fundamentali, l-appoġġ baġitarju settorjali tal-UE għandu jkun imsemmi fil-futur bħala "Kuntratti ta’ Riforma Settorjali” .

Il-bini tal-Istat fi stati fraġli u l-indirizzar ta’ sfidi ta’ żvilupp tas-SIDS u tal-OCTs

Sitwazzjonijiet ta’ fraġilità jitolbu azzjoni biex jiġu mgħejjuna pajjiżi msieħba biex jiżguraw il-funzjonijiet statali essenzjali, biex jappoġġjaw it-tranżizzjoni lejn l-iżvilupp, biex jippromwovu governanza, id-drittijiet tal-bniedem u d-demokrazija u biex iwasslu servizzi bażiċi lill-popolazzjonijiet. Dawn is-sitwazzjonijiet jeħtieġu reazzjoni globali, koerenti u koordinati li għaliha l-appoġġ baġitarju jista' jkun strumentali. Flimkien ma’ modalitajiet oħra ta’ għajnuna (għajnuna umanitarja, fondi miġbura flimkien, għajnuna tal-proġett, assistenza teknika eċċ), irid ikun akkumpanjat minn djalogu politiku u ta’ politika msaħħaħ.

Id-deċiżjoni biex jiġi pprovdut appoġġ baġitarju tal-UE għandha tittieħed fuq bażi ta’ każ b’każ u sostnuta minn valutazzjoni tal-benefiċċji mistennija u r-riskji potenzjali. Il-Kummissjoni se tiżgura li dawn id-deċiżjonijiet iqisu s-sitwazzjoni politika u ta’ sigurtà ġenerali, ir-riskji finanzjarji, u l-ispiża potenzjali tan-nuqqas ta’ intervent. Id-dinamika tal-bidla għandha tiġi vvalutata fuq il-bażi ta’ analiżi konġunta mill-UE u mill-Istati Membri kull fejn ikun possibbli. Din għandha sservi bħala bażi għal koordinazzjoni mal-imsieħba ewlenin tal-iżvilupp. Għandu jkun privileġġat approċċ gradwali u sekwenzjali għall-appoġġ baġitarju tal-UE, biex dan jiġi adattat bl-aħjar mod għal ċirkustanzi speċifiċi u biex jiġi ġestit ir-riskju.

Dan għandu jkun imsemmi fil-futur bħala " Kuntratti tal-Bini tal-Istat ” biex jirrifletti aħjar dawn l-elementi.

L-UE se tagħti attenzjoni wkoll lis-SIDS (Stati gżejjer żgħar li qed jiżviluppaw) u l-pajjiżi u t-territorji ekstra-Ewropej (OCTs). Hemm, l-appoġġ baġitarju jista’ jkollu impatt importanti, minħabba l-livell qawwi ta’ responsabbiltà u l-impenn biex jiġu indirizzati l-kwistjonijiet tal-vulnerabilità strutturali u l-bidla fil-klima, inkluż it-tnaqqis tad-diversità bijoloġika u xokkijiet ambjentali oħra. Appoġġ baġitarju jista’ joffri mod effiċjenti ta’ kif jiġu indirizzati dawn l-isfidi u t-theddid transversali, strutturali u fit-tul

It-titjib tal-mobilizzazzjoni tad-dħul domestiku u t-tnaqqis tad-dipendenza fuq l-għajnuna

Fl-ipprogrammar tal-appoġġ baġitarju tal-UE, partikolarment il-Kuntratti ta’ Governanza Tajba u Żvilupp, il-Kummissjoni beħsiebha tagħti enfasi akbar għall-mobilizzazzjoni tad-dħul domestiku, inkluż minn riżorsi naturali. Sistemi tat-taxxa ġusti u trasparenti huma ċentrali biex titrawwem iċ-ċittadinanza u l-bini tal-istat, u twassal għal responsabbiltà domestika msaħħa u parteċipazzjoni politika. Filwaqt li l-UE kkommettiet ruħha li tipprovdi assistenza prevedibbli permezz ta’ appoġġ baġitarju, din l-assistenza għandha tikkumplimenta (mhux tissostitwixxi) l-isforzi tal-pajjiż sieħeb stess biex jimmobilizza dħul domestiku.

F’pajjiżi li huma sinjuri fir-riżorsi, l-UE għandha ssaħħaħ l-appoġġ għal programmi komprensivi ta’ riforma li jippromwovu il-governanza msaħħa tar-riżorsi naturali, it-trasparenza u r-responsabbiltà, f’konformità mal-politika tal-UE dwar l-indirizzar tal-isfidi fis-swieq tal-prodotti u dwar il-materja prima[4].

Billi tgħin lill-pajjiżi msieħba jindirizzaw sfidi fil-mobilizzazzjoni tad-dħul domestiku, l-UE tikkontribwixxi biex ittejjeb l-awtodipendenza u tnaqqas id-dipendenza fit-tul fuq l-għajnuna.

APPROċċ KOORDINAT TAL-UE

L-għan primarju għal approċċ koordinat tal-UE lejn appoġġ baġitarju jkun li tiżdied l-effettività ta’ din il-modalità fil-kontribut għall-politiki ta’ żvilupp u ta’ riforma, u li jiġu pprovduti reazzjonijiet koerenti u konsistenti għall-isfidi ffaċċjati. L-UE għandha taħdem mal-Istati Membri b’mod partikolari lejn “Kuntratt Wieħed ta’ Governanza Tajba u Żvilupp tal-UE”. Ħidma flimkien iżżid l-ingranaġġ fuq djalogu politiku u ta’ politika, kif ukoll l-impatt tal-appoġġ baġitarju bilaterali tal-UE u l-Istati Membri dwar l-iżvilupp tal-pajjiżi msieħba. Il-koordinazzjoni għandha tiġi ggwidata mill-prinċipji ewlenin li ġejjin:

- It-teħid sovran ta’ deċiżjonijiet , filwaqt li jiġi rikonoxxut li l-Istati Membri individwali tal-UE jeħtieġu li jżommu awtorità ministerjali matul operazzjonijiet tal-appoġġ baġitarju u li l-UE teħtieġ li tikkonforma mal-ftehimiet li jorbtuha legalment u r-regolamenti finanzjarji tagħha.

- L-iskambju sistematiku tal-informazzjoni bħala minimu, bil-koordinazzjoni tar-reazzjonijiet u l-approċċi komuni għall-mekkaniżmi ta’ appoġġ baġitarju bħala l-għan aħħari.

- Il-koordinazzjoni tal-UE għandha tappoġġja koordinazzjoni akbar tad-donaturi u koordinazzjoni akbar immexxija mill-pajjiżi.

- Il-koordinazzjoni tinvolvi l-parteċipazzjoni kemm fil-kwartieri ġenerali kif ukoll fuq livell lokali u tibni fuq korpi eżistenti, mekkaniżmi ta’ koperazzjoni kif ukoll oqfsa legali eżistenti.

Konformi ma’ dawk il-prinċipji, l-UE għandha:

- taqsam il-valutazzjoni inizjali tal-impenn tal-pajjiż sieħeb mal-valuri fundamentali tal-UE bil-għan li jinstab approċċ komuni;

- taqsam, fejn ikun relevanti, dijanjostiċi u valutazzjonijiet tal-kundizzjonijiet tal-eliġibbiltà;

- tarmonizza, sa fejn ikun possibbli, għodod għall-valutazzjoni tar-riskju u tippromwovi djalogu koordinat fuq azzjonijiet li jtaffu;

- twettaq stimi konġunti fil-livell tal-pajjiż u evalwazzjonijiet konġunti regolari ta’ operazzjonijiet ta’ appoġġ baġitarju;

- tiżgura livell għoli ta’ għarfien għal djalogu ta’ politika effettiv mal-pajjiżi msieħba, inkluż l-użu ta’ kooperazzjoni delegata u arranġamenti għat-trasferimenti;

- timpenja ruħha b’mod konġunt fi djalogu politiku ta’ livell għoli, inkluż il-monitoraġġ tal-valuri fundamentali u l-proprjetà li ssegwi l-kuntratt ta’ governanza tajba;

- konġuntament tikkomunika ma’ partijiet interessati lokali l-iżborżamenti li jkunu saru u l-konformità mal-kundizzjonijiet tal-iżburżar.

DISINN U IMPLIMENTAZZJONI

L-UE għandha tevalwa jekk jeżistux il-prekundizzjonijiet li tafda l-Kuntratti ta’ Governanza Tajba u Żvilupp ma’ pajjiż imsieħeb, jiġifieri; jekk valuri fundamentali tad-drittijiet tal-bniedem, tad-demokrazija u tal-istat tad-dritt jew triq ċara lejn standards internazzjonali jeżistux u jekk Kuntratt bħal dan jistax jaġixxi b'mod ċar bħala xprun biex jaċċellera dan il-moviment.

Sabiex jidħlu fi djalogu ġenwin politiku u ta’ politika ta’ livell għoli mal-pajjiżi eliġibbli għal appoġġ baġitarju b’mod ġenerali, u għal Kuntratt ta’ Governanza Tajba u Żvilupp b’mod partikolari, ir-riżorsi tal-persunal fid-Delegazzjonijiet tal-UE jkollhom jiġu riveduti nazzjonalment u reġjonalment, kemm f’termini tal-livell kif ukoll ta’ għarfien espert. Għal dan il-għan, il-Kummissjoni se twaqqaf timijiet reġjonali superjuri, fil-kwartieri ġenerali u fid-Delegazzjonijiet, bil-parteċipazzjoni ta’ servizzi relevanti tal-Kummissjoni u s-SEAE. Dawn it-timijiet se jikkonsultaw ukoll lill-Istati Membri kif xieraq.

Il-kriterji tal-eliġibbiltà għal appoġġ baġitarju

i) Il-Kummissjoni se tkompli tapplika t-tliet kriterji tal-eliġibbiltà eżistenti filwaqt li ssaħħaħ id-dimensjonijiet li ġejjin ta’ kull wieħed:

Qafas makroekonomiku stabbli : Il-Kummissjoni se tagħti attenzjoni partikolari biex tara jekk il-politika u l-miri fiskali humiex konsistenti mal-istabbiltà makroekonomika u ġestiti skont regoli sodi dwar it-trasparenza fiskali u s-sostenibbiltà tad-dejn. Il-mobilizzazzjoni tad-dħul domestiku hija wkoll dimensjoni importanti li se tissaħħaħ bħala kwistjoni trasversali fl-ambitu tal-kriterja tal-eliġibbiltà makroekonomika (il-politika fiskali) u l-kriterja tal-eliġibbiltà tal-ġestjoni tal-finanzi pubbliċi (l-amministrazzjoni tat-taxxa). Il-valutazzjoni se tkun konformi mal-politika tal-UE dwar it-tassazzjoni u l-iżvilupp[5].

Politiki u riformi nazzjonali/settorjali . Dan għandu jiffoka fuq it-tkabbir sostenibbli u t-tnaqqis tal-faqar f'konformità mal-politika proposta fil-Komunikazzjoni "Il-politika għall-Iżvilupp tal-UE – Aġenda għall- bidla: żieda fl-impatt tal-Politika għall-Iżvilupp tal-UE”[6]. Barra minn hekk, nisġa soċjali tajba teħtieġ livell għoli ta’ ġustizzja u l-ġustizzja fil-ġbir tat-taxxa u l-allokazzjoni tal-infiq (favur il-kwistjonijiet ta’ foqra, sess, u tfal), protezzjoni soċjali effettiva u progress fit-titjib u l-kwalità tal-impjiegi.

Ġestjoni finanzjarja pubblika : Qabel it-tnedija ta’ programm ta’ appoġġ baġitarju, il-Kummissjoni se tivvaluta l-qafas istituzzjonali, leġiżlattiv u regolatorju u s-sistema tal-kapaċità tal-ġestjoni finanzjarja pubblika (PFM) fil-pajjiż sieħeb sabiex tidentifika linja ta’ bażi fuqhiex l-approċċ dinamiku se jkun ibbażat u r-riformi ewlenin se jiġu indirizzati waqt l-implimentazzjoni minn djalogu politiku, il-bini tal-kapaċità u kundizzjonijiet għall-iżburżar.

Il-Kummissjoni tista’ tiddeċiedi, fuq bażi ta’ każ b’każ, jekk f’ambjent ta’ PFM dgħajfa jkunx xieraq li jintalbu xi miżuri ta’ terminu qasir magħżula mill-istrateġija tar-riforma tal-PFM tal-pajjiż imsieħeb innifsu qabel ma jibdew operazzjonijiet għall-appoġġ baġitarju.

Il-ġlieda kontra l-korruzzjoni u l-frodi hija dimensjoni ewlenija li għandha tingħata prominenza akbar taħt dan il-kriterju. Il-Kummissjoni se tagħti importanza partikolari lill-ġlieda kontra l-korruzzjoni u se tippromwovi użu aktar qawwi ta’ proviżjonijiet kontra l-korruzzjoni. Jeħtieġ li l-pajjiżi msieħba jkunu attivament involuti fil-ġlieda kontra l-korruzzjoni u l-frodi u jiġu mgħammra b’mekkaniżmi xierqa u effettivi sabiex jipprevjenu u jinkixfu l-frodi u l-korruzzjoni (inklużi awtoritajiet tal-ispezzjonijiet xierqa u kapaċità ġuridika) kif ukoll sabiex jipprovdu reazzjonijiet xierqa u mekkaniżmi ta’ sanzjoni effettivi. Nuqqas milli jagħmlu hekk jista’ jwassal għal sospensjoni tal-appoġġ baġitarju tal-UE.

ii) Il-Kummissjoni se tintroduċi wkoll kriterju ta’ eliġibbiltà ġdid

It-trasparenza u s-sorveljanza tal-baġit : Id-disponibbiltà pubblika ta’ informazzjoni baġitarja hija essenzjali biex tippromwovi aktar skrutinju tal-baġit. Ibbażata fuq l-aktar informazzjoni rilevanti tal-baġit, il-Kummissjoni se tiddefinixxi “punt ta’ aċċess” biex tevalwa dan il-kriterju ta’ eliġibbiltà. Il-pajjiżi jridu juru li huma qed jipprovdu l-informazzjoni rilevanti lill-pubbliku jew qed jagħmlu progress f’perjodu qasir biex jagħmlu hekk. Dan jista’ jimplika wkoll evalwazzjoni tas-sistema tal-istatistika u b’mod partikolari tal-kwalità tad-dejta tal-baġit. Barra minn hekk, il-Kummissjoni se tapplika approċċ dinamiku billi tiffoka fuq l-implimentazzjoni ta’ riforma kredibbli mmirata lejn l-ilħiq gradwali tal-iżvelar sħiħ tal-informazzjoni baġitarja. Il-Kummissjoni se tqis ukoll il-karatteristiċi speċifiċi tal-Istati Fraġli u s-SIDS/OCTs fl-applikazzjoni ta’ dan il-kriterju.

Il-ġestjoni tar-riskji

Is-servizzi tal-Kummissjoni u, fejn ikun xieraq, is-SEAE se jiżviluppaw qafas imtejjeb għall-ġestjoni tar-riskji adattat għall-profil tar-riskju speċifiku tal-appoġġ baġitarju, li jkopri l-governanza politika, l-istabbiltà makroekonomika, ir-riskju tal-iżvilupp, il-ġestjoni finanzjarja pubblika, il-korruzzjoni u l-frodi. Dan il-qafas se jkun għodda kumplementarja importanti fl-ipprogrammar, fid-disinn u fl-implimentar ta’ programmi u biex jinforma d-djalogu ta’ politika. Se jidentifika, jevalwa u jġestixxi r-riskji konformi mal-livelli ġġudikati bħala aċċettabbli mill-Kummissjoni. Ir-reazzjoni għar-riskju u l-miżuri ta’ mitigazzjoni se jiġu proposti skont il-bilanċ bejn ir-riskji u l-benefiċċji.

Kemm għandu jiġi pprovdut appoġġ baġitarju tal-UE lil pajjiż imsieħeb

Il-Kummissjoni se tagħmel valutazzjoni kwalitattiva wiesa’ tal-kriterji ta’ ħtieġa u ta’ rendiment li ġejjin:

- Il-ħtiġijiet finanzjarji tal-pajjiż imsieħeb evalwati fuq il-bażi tal-qafas fiskali għal perjodu medju tiegħu u/jew l-istrateġiji ta’ żvilupp nazzjonali/settorjali.

- L-impenn tal-pajjiż imsieħeb biex jalloka riżorsi nazzjonali tal-baġit skont l-istrateġija u l-għanijiet ta’ żvilupp.

- L-effettività, il-valur għall-flus u l-impatt tal-valur miżjud speċifiku li l-appoġġ baġitarju se jġib biex jintlaħqu l-għanijiet tal-politika tal-pajjiż imsieħeb.

- Ir-rekord tax-xogħol u l-kapaċità ta’ assorbiment ta’ ħlasijiet imgħoddija u kemm intlaħqu b’mod effettiv l-għanijiet miftiehma ma’ operazzjonijiet għall-appoġġ baġitarju.

- L-orjentazzjoni lejn il-kisba ta’ riżultati fl-istrateġija tal-iżvilupp tal-pajjiż imsieħeb inkluż sistema ta’ monitoraġġ.

Djalogu ta’ politika

Id-djalogu ta’ politika għandu jkun konsistenti mad-djalogu ta’ politika ġenerali tal-UE imwettaq mal-pajjiżi sħab. Il-Kummissjoni se ssaħħaħ id-djalogu ta’ politika biex tiżgura li r-riformi ewlenin huma diskussi u jkollhom ir-riżorsi kollha, l-għanijiet huma identifikati u r-riżultati vvalutati. Il-miżuri ta’ politika u r-riżultati verifikabbli għandhom ikunu fil-qalba ta’ djalogu aktar strateġiku u ffukat.

L-ambitu ta’ djalogu ta’ politika fil-livell tal-pajjiż se jiddependi fuq l-għanijiet speċifiċi ta’ operazzjonijiet għall-appoġġ baġitarju u se jinkludi l-kriterji ta’ eliġibbiltà. Il-Kummissjoni se tkompli twessa’ l-aċċess tagħha għall-ħila meħtieġa għal djalogu ta’ politika effettiv bl-iffirmar ta’ ftehimiet ta’ kooperazzjoni ddelegati u/jew bl-aċċettazzjoni ta’ arranġamenti ta’ trasferimenti finanzjarji mal-Istati Membri.

Inċentivi u kundizzjonijiet ta’ rendiment

L-appoġġ baġitarju għandu jkompli jinvolvi taħlita ta’ ħlasijiet ta’ bażi marbuta mal-eliġibbiltà, u ħlasijiet ta’ rendiment marbuta mal-progress kontra l-indikaturi flimkien mal-kriterji tal-eliġibbiltà. L-indikaturi għandhom jintagħżlu minn fost il-politika ta’ żvilupp nazzjonali u/jew settorjali jew programm ta’ riforma ta’ kull pajjiż u għandhom ġeneralment ikun fihom taħlita ta’ indikaturi ta’ proċess, produzzjonijiet u riżultati. L-indikaturi u l-miri għandhom jiġu riveduti bħala parti minn kull reviżjoni annwali, u jistgħu jiġu adattati fid-dawl tal-lezzjonijiet meħuda. Għall-Kuntratti ta’ Governanza Tajba u Żvilupp, il-kundizzjonijiet jistgħu jiġu annessi mad-drittijiet li jappoġġjaw id-demokrazija u l-bniedem.

Prevedibbiltà

Il-Kummissjoni se tagħmel programmi ta’ appoġġ baġitarju tal-UE prevedibbli billi jiġi żgurat li l-kundizzjonijiet ta’ eliġibbilità, u l-proċessi għall-valutazzjoni tagħhom, huma speċifikati bl-iktar mod ċar possibbli. Barra minn hekk, se tieħu impenji fit-tul f’pajjiżi li wrew rekord b’saħħtu fl-implimentazzjoni tal-appoġġ baġitarju, filwaqt li tqis it-tagħlimiet meħuda mill-Kuntratti tal-MDG.

It-tisħiħ domestiku u r-responsabbiltà reċiproka

Ir-responsabbiltà domestika u reċiproka dwar l-appoġġ baġitarju għandha tkun imsaħħa aktar permezz ta’:

- It-tisħiħ fis-sinċerità, it-trasparenza u r-responsabilità tal-proċess baġitarju;

- L-appoġġ ta’ approċċ parteċipatorju tal-appoġġ baġitarju;

- L-integrazzjoni sistematika ta’ programmi biex jappoġġjaw il-korpi nazzjonali leġislattivi u ta’ sorveljanza, kif ukoll l-awtoritajiet sotto-nazzjonali u l-organizzazzjonijiet tas-soċjetà ċivili;

- Iż-żieda fit-trasparenza bil-pubblikazzjoni tal-informazzjoni relevanti dwar il-ftehimiet ta’ finanzjament tal-appoġġ baġitarju u r-reviżjonijiet ta’ rendiment.

L-iżvilupp tal-kapaċità

Il-ħtiġijiet għal żvilupp tal-kapaċità se jiġu evalwati sistematikament sabiex titjieb il-kapaċità tal-gvern li jimplimenta politiki u jwassal servizzi lill-benefiċjarji finali; sabiex jitħeġġeġ l-involviment attiv tal-partijiet interessati domestiċi kollha u tissaħħaħ is-sistema nazzjonali tal-istatistika. Il-Kummissjoni se tipprovdi appoġġ għal żvilupp tal-kapaċità bbażat fuq id- domanda, marbut mar-riżultati ċari, u permezz ta’ inizjattivi armonizzati u allineati.

Monitoraġġ, evalwazzjoni u komunikazzjoni

Il-pajjiż sieħeb għandu jkollu sistema kredibbli u funzjonanti fis-seħħ għall-monitoraġġ u l-evalwazzjoni (M u E) tar-riżultati. Jekk in-nuqqasijiet huma identifikati, l-azzjonijiet għandhom jiġu miftiehma biex tissaħħaħ is-sistema M u E. Il-Kummissjoni se tagħti attenzjoni partikolari lill-elementi li ġejjin:

- L-istruttura istituzzjonali tas-sistema ta’ M u E.

- Il-pjan eżistenti ta’ M u E marbut mal-għanijiet tal-politika għall-iżvilupp u l-proċessi ewlenin.

- Il-kwalità, ir-regolarità u l-affidabbiltà tad-dejta, inkluż l-istatistiċi uffiċjali, is-sistemi ta’ informazzjoni, l-indikaturi (il-kontribut, il-proċess, il-produzzjoni u r-riżultat) u d-dokumenti tar-rapportar.

- L-iżvilupp tal-kapaċità għall-appoġġ tal-funzjonijiet ta’ M u E.

Is-sistema ta’ M u E għandha tikkontribwixxi biex issaħħaħ il-vuċi u l-leġittimità tal-partijiet interessati nazzjonali tal-proċess baġitarju tal-pajjiż imsieħeb u biex tassigura li l-informazzjoni fattwali u verifikabbli dwar operazzjonijiet ta’ appoġġ baġitarju titqiegħed fid-dominju pubbliku.

L-UE għandha tikkomunika aħjar fuq l-appoġġ baġitarju kemm tal-UE kif ukoll dak bilaterali, ibbażat fuq xogħol analitiku, oqfsa ta’ valutazzjoni ta’ rendiment attwali, ir-riżultati ta’ evalwazzjonijiet attwali u l-lezzjonijiet meħuda.

KONKLUżJONIJIET

Il-Kummissjoni tistieden lill-Kunsill sabiex japprova l-Komunikazzjoni proposta, li tfittex li:

- tagħmel l-appoġġ baġitarju tal-UE aktar effiċjenti u effettiv biex iwassal riżultati tal-iżvilupp, u tapprova dawn il-proposti, fir-rigward ta’ appoġġ baġitarju bilaterali, bħala mezz biex

- tgħammar lill-UE u lill-Istati Membri b’Approċċ Ikkoordinat tal-UE dwar l-Appoġġ Baġitarju.

Il-prinċipji gwida stabbiliti f’din il-Komunikazzjoni se jiġu inkorporati fl-ipprogrammar u l-implimentazzjoni tal-appoġġ baġitarju tal-UE.

[1] Definit bħala appoġġ baġitarju li għalih hija responsabbli.l-Kummissjoni

[2] COM(2000) 58, 2.2.2000.

[3] COM(2010) 586, 19.10.2010.

[4] COM(2011) 25, 2.2.2011 u dok. tal-Kunsill 7029/11, 10.3.2011.

[5] COM(2010) 163, 21.4.2010 u dok. tal-Kunsill 11082/10, 14.6.2010.

[6] COM(2011) 637.