This document is an excerpt from the EUR-Lex website
Document 52011DC0637
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS Increasing the impact of EU Development Policy: an Agenda for Change
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Inżidu l-impatt tal-Politika tal-UE għall-Iżvilupp: Aġenda għall-Bidla
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Inżidu l-impatt tal-Politika tal-UE għall-Iżvilupp: Aġenda għall-Bidla
/* KUMM/2011/0637 finali */
KOMUNIKAZZJONI MILL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT SOĊJALI U EKONOMIKU EWROPEW U LILL-KUMITAT TAR-REĠJUNI Inżidu l-impatt tal-Politika tal-UE għall-Iżvilupp: Aġenda għall-Bidla /* KUMM/2011/0637 finali */
WERREJ 1........... Tnaqqis tal-faqar f'dinja li
qiegħda tinbidel rapidament...................................................... 3 2........... Drittijiet tal-bniedem, demokrazija
u elementi ewlenin oħrajn ta' governanza tajba............. 5 3........... Tkabbir inklussiv u sostenibbli
għall-iżvilupp tal-bniedem.................................................. 7 3.1........ Il-protezzjoni soċjali,
is-saħħa, l-edukazzjoni u l-impjiegi.................................................. 8 3.2........ Ambjent tan-negozju, integrazzjoni reġjonali
u swieq globali............................................. 8 3.3........ L-Agrikoltura sostenibbli u
l-enerġija............................................................................... 9 4........... Sħubijiet differenzjati
għall-izvilupp................................................................................ 10 5........... Azzjoni kkoordinata tal-UE........................................................................................... 11 6........... Koerenza mtejba fost il-politiki
tal-UE........................................................................... 12 7........... Tħaddin tal-Aġenda
għall-Bidla..................................................................................... 12
1.
Tnaqqis tal-faqar f'dinja li qiegħda tinbidel rapidament
F'mument kritiku – filwaqt li qiegħda
taffaċċja sfidi globali ġodda, qrib il-mira tal-2015
għall-kisba tal-Għanijiet ta' Żvilupp tal-Millennju (MDGs) u
f’nofs it-tħejjijiet għall-Qafas Finanzjarju Multiannwali (MFF) li
jmiss - l-UE trid tagħżel it-taħlita t-tajba tal-politiki,
tal-għodod u tar-riżorsi biex tkun effettiva u effiċjenti
fil-ġlieda kontra l-faqar fil-kuntest tal-iżvilupp sostenibbli. Il-Kummissjoni qiegħda tipproponi Aġenda
għall-Bidla biex issaħħaħ is-solidarjetà tal-Ewropa
man-nazzjonijiet tad-dinja li qegħdin jiżviluppaw f’din
il-ġlieda kontra l-faqar. Kif jiddikjara t-Trattat ta' Lisbona,
l-appoġġ lill-isforzi tal-pajjiżi li qegħdin
jiżviluppaw biex jinqered il-faqar huwa l-għan ewlieni tal-politika
għall-iżvilupp u prijorità għall-azzjoni esterna tal-UE
bħala appoġġ għall-interessi tal-UE għal dinja stabbli
u b'aktar ġid. Il-politika
għall-iżvilupp tgħin ukoll tindirizza sfidi globali oħrajn
u tikkontribwixxi għall-Istrateġija UE-2020. L-UE diġà ħadmet ħafna biex
tgħin biex jitnaqqas il-faqar u b'mod partikolari biex tappoġġa
l-kisba tal-MDGs. Iżda l-faqar estrem għadu
jippersisti f’bosta partijiet tad-dinja. Serje ta' xokkijiet globali
ħallew bosta pajjiżi li qegħdin jiżviluppaw fi stat ta'
vulnerabbiltà. Hekk kif il-popolazzjoni tad-dinja qiegħda tkompli tikber,
tinħtieġ aktar azzjoni biex jiġu indirizzati l-isfidi globali
bħall-prevenzjoni tal-kunflitti, is-sigurtà, il-protezzjoni ambjentali,
it-tibdil fil-klima, u biex jitwasslu beni pubbliċi globali
bħas-sigurtà tal-ikel, l-aċċess għall-ilma u
għas-sanità, is-sigurtà tal-enerġija u l-migrazzjoni. Sadanittant, movimenti mmexxija mill-poplu
fl-Afrika ta' Fuq u fil-Lvant Nofsani enfasizzaw li progress tajjeb fuq l-MDGs
huwa essenzjali, iżda mhux biżżejjed. Dan iwassal għal
żewġ konklużjonijiet: l-ewwel, li l-għanijiet
tal-iżvilupp, id-demokrazija, id-drittijiet tal-bniedem, il-governanza
tajba u s-sigurtà huma marbutin ma' xulxin; it-tieni, li huwa kritiku li
s-soċjetajiet joffru futur liż-żgħażagħ. Il-politika tal-UE għall-iżvilupp
trid tqis id-differenzazzjoni miżjuda bejn il-pajjiżi li qegħdin
jiżviluppaw. Riċentement, bosta pajjiżi sħab saru
donaturi fihom infushom, filwaqt li oħrajn qegħdin
jaffaċċjaw fraġilità li qiegħda tiżdied. L-UE issa
trid tesplora modi ġodda biex taħdem magħhom u tippromwovi
aġenda tal-iżvilupp internazzjonali aktar inklussiva. Hemm ukoll potenzjal għall-UE biex
taħdem aktar mill-qrib mas-settur privat, mal-fondazzjonijiet,
mas-soċjetà ċivili u mal-awtoritajiet lokali u reġjonali
hekk kif ir-rwol tagħhom fl-iżvilupp jikber. Fil-livell tal-UE, it-Trattat ta' Lisbona
ankra fis-sod il-politika għall-iżvilupp fl-azzjoni esterna tal-UE.
Il-ħolqien tal-kariga ta’ Rappreżentant
Għoli/Viċi-President (RG/VP), assistita mis-Servizz Ewropew
għall-Azzjoni Esterna (SEAE), toffri opportunitajiet ġodda għal
kooperazzjoni għall-iżvilupp aktar effettiva u tfassil ta' politika
aktar integrat. L-UE mhijiex sempliċiment it-28
donatur Ewropew. Filwaqt li l-Kummissjoni timplimenta
20 % tal-isforz kollettiv tal-għajnuna tal-UE, hija taġixxi
wkoll biex tikkoordina, tlaqqa' u tfassal il-politika. L-UE hija sieħba
kummerċjali u ekonomika, u d-djalogu politiku tagħha, il-politika
tas-sigurtà u bosta politiki oħrajn – mill-kummerċ, l-agrikoltura u
s-sajd sal-ambjent, il-klima, l-enerġija u l-migrazzjoni - għandhom
impatt qawwi fuq il-pajjiżi li qegħdin jiżviluppaw. Trid tittraduċi
dan ir-rwol multidimensjonali f'taħlitiet differenti ta' politiki adattati
għal kull pajjiż imsieħeb. Biex ikunu għal kollox
effettivi, l-UE u l-Istati Membri tagħha jridu jitkellmu u jaġixxu
bħala entità waħda biex jiksbu riżultati aħjar u biex
itejbu l-viżibilità tal-UE. Iż-żminijiet diffiċli
ekonomiċi u baġitarji jagħmluha saħansitra aktar kritika li
jiġi żgurat li l-għajnuna tintefaq b'mod effettiv,
tagħti l-aħjar riżultati possibbli u tintuża biex isservi
ta' lieva għal aktar finanzjament għall-iżvilupp. B'dan il-kuntest il-ġdid f’moħha,
fl-2010 l-Kummissjoni varat konsultazzjoni dwar il-politika tal-UE għall-iżvilupp[1].
Din ikkonfermat ir-rilevanza tal-qafas ta' politika eżistenti, filwaqt li
qablet dwar il-ħtieġa li jiżdied l-impatt. Huma meħtieġa tibdiliet f'għadd
ta' direzzjonijiet. B'mod partikolari, l-UE trid tfittex li tiffoka l-offerta
tagħha lill-pajjiżi sħab fejn jista' jkollha l-akbar impatt u
għandha tikkonċentra l-kooperazzjoni għall-iżvilupp
tagħha biex tappoġġa: –
id-drittijiet tal-bniedem, id-demokrazija u
l-elementi ewlenin oħrajn ta' governanza tajba; –
it-tkabbir inklussiv u sostenibbli
għall-iżvilupp tal-bniedem. Biex jiġi żgurat l-aħjar valur
għall-flus, din għandha tiġi akkumpanjata minn: –
sħubijiet għall-iżvilupp
differenzjati; –
azzjoni kkoordinata tal-UE; –
koerenza mtejba fost il-politiki tal-UE. Il-Kummissjoni
tipproponi Aġenda għall-Bidla li tista' twassal għal: ·
sehem akbar tal-programmi ta' kooperazzjoni
tal-pajjiżi u reġjonali tal-UE dedikati għall-prijoritajiet ta'
politika mogħtija fit-taqsimiet 2 u 3 hawn taħt; ·
il-konċentrazzjoni tal-attivitajiet tal-UE
f’kull pajjiż fuq massimu ta’ tliet setturi; ·
żieda fil-volum u fis-sehem tal-għajnuna
mill-UE lill-pajjiżi l-aktar fil-bżonn u fejn l-UE jista’ jkollha
impatt reali, inkluż stati fraġli; ·
importanza msaħħa tad-drittijiet
tal-bniedem, tad-demokrazija u tax-xejriet tal-governanza tajba fid-determinazzjoni
tat-taħlita ta' strumenti u ta' modalitajiet tal-għajnuna fuq
il-livell tal-pajjiż; ·
appoġġ kontinwu
għall-inklużjoni soċjali u għall-iżvilupp tal-bniedem
permezz ta' mill-inqas 20 % tal-għajnuna tal-UE; ·
konċentrazzjoni akbar fl-investiment favur fatturi
għal tkabbir ekonomiku inklussiv u sostenibbli, li jipprovdu s-sinsla
tal-isforzi biex jitnaqqas il-faqar; ·
sehem ogħla tal-għajnuna tal-UE permezz
ta' strumenti finanzjarji innovattivi, inklużi faċilitajiet li
jgħaqqdu l-għotjiet u s-self; ·
konċentrazzjoni fuq l-għajnuna
lill-pajjiżi li qegħdin jiżviluppaw biex titnaqqas
l-espożizzjoni tagħhom għax-xokkijiet globali bħat-tibdil
fil-klima, id-degradazzjoni tal-ekosistema u tar-riżorsi, u prezzijiet
volatili u li qegħdin jogħlew tal-enerġija u tal-agrikoltura,
permezz ta' konċentrazzjoni fuq l-investiment fl-agrikoltura sostenibbli u
fl-enerġija; ·
indirizzar tal-isfidi tas-sigurtà,
tal-fraġilità u tat-tranżizzjoni; ·
strateġiji ta’ reazzjoni konġunti bejn
l-UE u l-Istati Membri bbażati fuq strateġiji ta' żvilupp
proprji tal-imsieħba, bi tqassim settorjali tal-kompiti; ·
qafas komuni tal-UE għall-irrappurtar
tar-riżultati; ·
Politika mtejba ta' Koerenza
għall-Iżvilupp, inkluż permezz tal-programmi tematiċi
ġodda li jibnu sinerġiji bejn l-interessi globali u l-qerda
tal-faqar. L-Aġenda għall-Bidla proposta
ma għandhiex il-għan li tikteb mill-ġdid il-prinċipji
bażiċi tal-politika. Kif stabbilit fil-Kunsens Ewropew dwar
l-Iżvilupp[2], il-mira kumplessiva
tal-UE sabiex jinqered il-faqar fil-kuntest tal-iżvilupp sostenibbli mhux
se tiddgħajjef. L-impenji tal-UE dwar il-finanzjament
għall-iżvilupp, il-kisba tal-MDG u l-effettività tal-għajnuna
tibqa’ soda, kif jibqgħu wkoll l-ambizzjonijiet tagħha bħala
mexxej politiku u donatur ewlieni. L-istrateġiji tal-iżvilupp immexxija
mill-pajjiż imsieħeb se jkomplu jfasslu l-kooperazzjoni
għall-iżvilupp tal-UE skont il-prinċipji ta’ sjieda u
sħubija. L-UE qiegħda tfittex involviment reċiproku akbar
mal-pajjiżi sħab tagħha, inkluż ir-responsabbiltà
reċiproka għar-riżultati. Djalogu fuq il-livell
tal-pajjiż fi ħdan qafas koordinat ta' donaturi għandu
jiddetermina eżattament fejn u kif tintervjeni l-UE . Se tiġi segwita
wkoll kollaborazzjoni aktar effettiva fi ħdan is-sistema multilaterali .
2.
Drittijiet tal-bniedem, demokrazija u elementi ewlenin oħrajn
ta' governanza tajba
Governanza tajba,
fit-termini politiċi, ekonomiċi, soċjali u ambjentali
tagħha, hija vitali għall-iżvilupp inklusiv u sostenibbli. L-appoġġ tal-UE għall-governanza
għandu jidher b’aktar prominenza fis-sħubijiet kollha, b'mod
speċjali permezz ta’ inċentivi għal riforma orjentata lejn
ir-riżultati u enfasi fuq l-impenji tal-imsieħba favur id-drittijiet
tal-bniedem, id-demokrazija u l-istat tad-dritt u li jiġu ssodisfati
t-talbiet u l-ħtiġijiet tan-nies tagħhom. Billi l-progress
fit-tul jista' jitmexxa biss minn forzi interni, se jiġi segwit approċċ
iċċentrat fuq id-djalogu politiku u ta' politika mal-partijiet
interessati kollha. It-taħlita u l-livell tal-għajnuna se
jiddependu fuq is-sitwazzjoni fil-pajjiż, inkluża l-abbiltà
tiegħu biex iwettaq riformi. L-appoġġ
għall-governanza jista' jieħu l-forma ta’ programmi jew interventi
msejsa fuq proġetti biex jappoġġaw l-atturi u l-proċessi
fuq il-livell lokali, nazzjonali u settorjali. Appoġġ
baġitarju ġenerali tal-UE għandu jkun marbut mas-sitwazzjoni ta'
governanza u mad-djalogu politiku mal-pajjiż imsieħeb,
f’koordinazzjoni mal-Istati Membri[3]. Jekk pajjiż
inaqqas l-impenn tiegħu lejn id-drittijiet tal-bniedem u d-demokrazija,
l-UE għandha ssaħħaħ il-koperazzjoni tagħha mal-atturi
mhux statali u mal-awtoritajiet lokali u tuża forom ta’ għajnuna
li jipprovdu lill-foqra bl-appoġġ li jkollhom bżonn. Fl-istess
ħin, l-UE għandha żżomm djalogu mal-gvernijiet u mal-atturi
mhux statali. F’xi każijiet, kondizzjonalità aktar stretta se
tiġi ġġustifikata. Il-konċentrazzjoni fuq ir-riżultati
u r-responsabbiltà reċiproka ma tfissirx li l-UE se tinjora s-sitwazzjonijiet
fraġli fejn l-impatt huwa aktar bil-mod jew aktar diffiċli biex
jitkejjel. L-UE għandha taħdem biex tgħin lill-pajjiżi f’sitwazzjonijiet
ta’ fraġilità biex jistabbilixxu l-funzjonament u l-istituzzjonijiet
responsabbli li jagħtu servizzi bażiċi u li jappoġġjaw
it-tnaqqis tal-faqar. Se jittieħdu deċiżjonijiet biex jiġi
pprovdut appoġġ baġitarju lil tali pajjiżi fuq bażi
ta' każ b'każ, li jiżnu l-benefiċċji, il-kostijiet u
r-riskji. L-azzjoni tal-UE għandha tiffoka fuq: ·
Id-demokrazija, id-drittijiet tal-bniedem u
l-istat tad-dritt. L-UE għandha tkompli
tappoġġa d-demokratizzazzjoni, l-elezzjonijiet ħielsa u
ġusti, il-funzjonament tal-istituzzjonijiet, il-libertà tal-midja u
l-aċċess għall-internet, il-protezzjoni tal-minoranzi, l-istat
tad-dritt u sistemi ġudizzjarji fil-pajjiżi msieħba. ·
L-ugwaljanza bejn is-sessi u
l-emanċipazzjoni tan-nisa bħala atturi
għall-iżvilupp u ħaddiema għall-paċi[4]
se jiġu integrati fil-politiki u fil-programmi kollha tal-UE
għall-iżvilupp permezz tal-Pjan ta’ Azzjoni tal-UE dwar is-Sessi
tal-2010. ·
Il-ġestjoni tas-settur pubbliku għal servizz aħjar ta’ twettiq. L-UE għandha
tappoġġa programmi nazzjonali biex itejbu l-formulazzjoni
tal-politika, il-ġestjoni finanzjarja pubblika, inklużi t-twaqqif u
t-tisħiħ ta’ korpi u miżuri ta' awditjar, kontroll u kontra
l-frodi, u żvilupp istituzzjonali, inkluż l-immaniġjar
tar-riżorsi umani. Ir-riforma domestika u l-politiki fiskali favur
il-foqra huma vitali. ·
Il-politika u l-amministrazzjoni fiskali.
L-UE se tkompli tippromwovi sistemi fiskali nazzjonali
ġusti u trasparenti fil-programmi tagħha tal-pajjiż, skont
il-prinċipji tal-UE għal governanza tajba fil-qasam tat-taxxa,
flimkien ma' inizjattivi internazzjonali u rappurtar pajjiż b'pajjiż
biex tiżdied it-trasparenza finanzjarja. ·
Il-korruzzjoni. L-UE
għandha tgħin lill-pajjiżi sħab tagħha biex
jindirizzaw il-korruzzjoni permezz programmi ta' governanza li jappoġġaw
il-promozzjoni, is-sensibilizzazzjoni u r-rappurtar u jżidu
l-kapaċità tal-korpi tal-kontroll u tas-sorveljanza u l-ġudikatura. ·
Is-soċjetà ċivili u l-awtoritajiet
lokali. Filwaqt li tibni fuq 'Djalogu Strutturat'[5],
l-UE għandha ssaħħaħ ir-rabtiet tagħha
mal-organizzazzjonijiet tas-soċjetà ċivili, mal-isħab
soċjali u mal-awtoritajiet lokali, permezz ta’ djalogu regolari u
l-użu tal-aħjar prattiki. Għandha tappoġġa
l-ħolqien ta' soċjetà ċivili lokali organizzata
kapaċi taġixxi bħala għassies u sieħeb fi djalogu
mal-gvernijiet nazzjonali. L-UE għandha tqis modi kif timmobilizza
l-kompetenzi tal-awtoritajiet lokali, pereżempju permezz ta' netwerks
ta' eċċellenza jew eżerċizzji ta' ġemellaġġ.
·
Ir-riżorsi naturali. L-UE għandha żżid l-appoġġ tagħha
għall-proċessi u korpi ta' sorveljanza u tkompli tappoġġa
riformi ta' governanza li jippromwovu l-ġestjoni sostenibbli u trasparenti
ta' riżorsi naturali, inklużi materja prima u riżorsi marittimi,
u tas-servizzi tal-ekosistemi, b'attenzjoni partikolari għad-dipendenza
fuqhom mill-foqra, b'mod speċjali azjendi agrikoli żgħar . ·
Ir-rabta żvilupp-sigurtà. L-UE għandha tiżgura li l-għanijiet tagħha
fl-oqsma tal-politika għall-iżvilupp, tal-bini tal-paċi,
tal-prevenzjoni tal-kunflitti u tas-sigurtà internazzjonali (inkluż
is-sigurtà ċibernetika) jirrinfurzaw lil xulxin. Għandha tiffinalizza
u timplimenta l-Pjan ta' Azzjoni mitlub dwar is-sigurtà, il-fraġilità u
l-iżvilupp[6].
3.
Tkabbir inklussiv u sostenibbli għall-iżvilupp tal-bniedem
It-tkabbir ekonomiku inklussiv u sostenibbli
huwa kruċjali għat-tnaqqis fit-tul tal-faqar u x-xejriet ta'
tkabbir huma importanti daqs ir-rati ta' tkabbir. Għal dan
il-għan, l-UE għandha tħeġġeġ aktar tkabbir
inklużiv, ikkaratterizzat mill-ħila tal-persuni biex
jipparteċipaw fi, u jibbenefikaw minn, ġid u ħolqien
tax-xogħol. Hija vitali l-promozzjoni tax-xogħol deċenti li
tkopri l-ħolqien tax-xogħol, il-garanzija tad-drittijiet fuq il-post
tax-xogħol, il-ħarsien soċjali u d-djalogu soċjali. L-iżvilupp mhuwiex sostenibbli jekk
dan jagħmel ħsara lill-ambjent, lill-bijodiversità u lir-riżorsi
naturali u jżid l-espożizzjoni/il-vulnerabbiltà
għad-diżastri naturali. Il-politika tal-UE
għall-iżvilupp għandha tippromwovi “ekonomija ekoloġika” li
tista’ tiġġenera tkabbir, toħloq ix-xogħol u tgħin
biex jitnaqqas il-faqar billi tivvaluta u tinvesti fil-kapital naturali[7],
inkluż permezz tal-appoġġ għall-opportunitajiet tas-suq
għal teknoloġiji aktar nodfa, użu effiċjenti
tal-enerġija u tar-riżorsi, żvilupp b'livell baxx ta' emissjoni
tal-karbonju filwaqt li tistimola l-innovazzjoni, l-użu tal-ICT, u tnaqqas
l-użu mhux sostenibbli tar-riżorsi naturali. Għandha
tikkontribwixxi wkoll għat-titjib tar-reżiljenza tal-pajjiżi li
qegħdin jiżviluppaw fir-rigward tal-konsegwenzi tat-tibdil fil-klima. L-atturi pubbliċi għandhom
joħolqu sħubijiet ma’ kumpaniji privati, komunitajiet lokali u
soċjetà ċivili. Ir-responsabbiltà soċjali korporattiva
fil-livell internazzjonali u nazzjonali tista' tgħin biex jiġi evitat
li jitnaqqas il-livell tad-drittijiet tal-bniedem, tal-istandards
internazzjonali soċjali u ambjentali u biex ikun hemm promozzjoni ta'
mġiba kummerċjali responsabbli konsistenti ma' strumenti rikonoxxuti
internazzjonalment. L-UE għandha tiffoka l-appoġġ
tagħha għal tkabbir inklussiv u sostenibbli fuq: ·
dawk is-setturi li jibnu l-pedamenti għal
tkabbir u jgħinu jiżguraw li jkunu inklussivi, b'mod speċjali l-ħarsien
soċjali, is-saħħa u l-edukazzjoni; ·
il-vetturi faċilitattivi għal tkabbir
inklussiv u sostenibbli, b'mod speċjali ambjent aktar
b'saħħtu tan-negozju u integrazzjoni reġjonali aktar profonda;
·
dawk is-setturi li jkollhom impatt multiplikatur
qawwi fuq l-ekonomiji tal-pajjiżi li qegħdin jiżviluppaw u li
jikkontribwixxu għall-ħarsien ambjentali, il-prevenzjoni u
l-adattament fit-tibdil fil-klima, b'mod speċjali fl-agrikoltura
sostenibbli u fl-enerġija.
3.1.
Il-protezzjoni soċjali, is-saħħa,
l-edukazzjoni u l-impjiegi
L-UE għandha tieħu approċċ
aktar komprensiv lejn l-iżvilupp tal-bniedem. Dan jinvolvi
l-appoġġ għal poplu b’saħħtu u b'edukazzjoni tajba, li
jagħti lill-forza tax-xogħol il-ħiliet li twieġeb
għall-ħtiġijiet tas-suq tax-xogħol, tiżviluppa
l-ħarsien soċjali, u jnaqqas l-inugwaljanza tal-opportunità. L-UE għandha tappoġġa riformi
fis-settur li jżidu l-aċċess għal servizzi
tas-saħħa u tal-edukazzjoni ta' kwalità u jssaħħu
l-kapaċitajiet lokali biex jirreaġixxu għall-isfidi globali.
L-UE għandha tuża l-firxa tagħha ta' strumenti ta'
għajnuna, b'mod speċjali "kuntratti għar-riforma
tas-settur" bi djalogu politiku intensifikat. L-UE għandha tieħu azzjoni biex
tiżviluppa u ssaħħaħ is-sistemi tas-saħħa,
tnaqqas l-inugwaljanzi fl-aċċess għas-servizzi
tas-saħħa, tippromwovi l-koerenza tal-politika u żżid
il-protezzjoni kontra t-theddid tas-saħħa globali sabiex jitjiebu
r-riżultati tas-saħħa għall-kulħadd. L-UE għandha ssaħħaħ
l-appoġġ tagħha għal edukazzjoni ta’ kwalità biex
tagħti liż-żgħażagħ l-għarfien u
l-ħiliet biex ikunu membri attivi f'soċjetà li qiegħda dejjem
tevolvi. Permezz tal-bini ta' kapaċità u l-iskambju tal-għarfien,
l-UE għandha tappoġġa t-taħriġ vokazzjonali
għall-impjegabbiltà u għall-kapaċità biex twettaq
ir-riċerka u tuża r-riżultati tagħha. L-UE għandha tappoġġa l-aġenda
tax-xogħol deċenti, l-iskemi tal-protezzjoni soċjali u
ta' garanziji minimi u tinkuraġġixxi politiki li jiffaċilitaw
il-mobbiltà reġjonali tax-xogħol. L-UE se tappoġġa
sforzi mmirati biex tisfrutta b'mod sħiħ l-interrelazzjoni bejn
il-migrazzjoni, il-mobbiltà u l-impjieg.
3.2.
Ambjent tan-negozju, integrazzjoni reġjonali u
swieq globali
It-tkabbir ekonomiku għandu bżonn ta'
ambjent favorevoli għan-negozju. L-UE għandha tappoġġa
l-iżvilupp tas-setturi privati lokali kompettitivi inkluż
permezz tal-bini tal-kapaċità lokali istituzzjonali u kummerċjali,
tippromwovi l-SMEs u l-kooperattivi, tappoġġa riformi tal-qafas
leġiżlattiv u regolatorju u l-infurzar tagħhom (inkluż
għall-użu ta' komunikazzjonijiet elettroniċi bħala
għodda biex tappoġġa t-tkabbir fis-setturi kollha),
tiffaċilita l-aċċess għal servizzi kummerċjali u
finanzjarji u tippromwovi l-politiki agrikoli, industrijali u ta' innovazzjoni.
Dan se jippermetti wkoll lill-pajjiżi li qegħdin jiżviluppaw,
b'mod speċjali l-ifqar pajjiżi, biex jużaw l-opportunitajiet
offruti mis-swieq integrati globalment. L-għajnuna
għall-Kummerċ u l-iffaċilitar tal-kummerċ aħjar u
aktar immirati jridu jakkumpanjaw dawn l-isforzi. Bl-istess mod, l-attirar u ż-żamma
ta' investiment sostanzjali privat domestiku u barrani u t-titjib
tal-infrastruttura huma kruċjali għas-suċċess
tal-pajjiżi li qegħdin jiżviluppaw. L-UE għandha
tiżviluppa modi ġodda ta' involviment tas-settur privat, b'mod
speċjali bil-ħsieb li tistimola attività tas-settur privat u
riżorsi li jipprovdu prodotti pubbliċi. Għandha tesplora
l-mekkaniżmi tal-kondiviżjoni tar-riskju u tagħti finanzjament
bil-quddiem biex tikkatalizza sħubijiet pubbliċi-privati u
investiment privat. L-UE għandha tinvesti biss fl-infrastruttura, fejn
is-settur privat ma jistax jagħmel hekk fuq termini kummerċjali. L-UE se tkompli tiżviluppa
mekkaniżmi ta' kooperazzjoni biex tagħti spinta lir-riżorsi finanzjarji
għall-iżvilupp, tibni fuq esperjenzi ta’ suċċess
bħall-faċilitajiet Ewropej għall-Investiment jew lill-Fond
Fiduċjarju ta' bejn l-UE u l-Afrika għall-infrastruttura. F'setturi u
pajjiżi magħżula, persentaġġ ogħla
tar-riżorsi tal-UE għall-iżvilupp għandhom jiġu
użati permezz ta' strumenti finanzjarji eżistenti jew ġodda,
bħall-għaqda tal-għotjiet u tas-self u mekkaniżmi
oħrajn tal-kondiviżjoni tar-riskju, sabiex jiġu attratti aktar
riżorsi u għaldaqstant jiżdied l-impatt. Dan il-proċess
għandu jiġi appoġġat minn pjattaforma tal-UE
għall-Kooperazzjoni u għall-Iżvilupp li tinkorpora
l-Kummissjoni, l-Istati Membri u l-istituzzjonijiet finanzjarji Ewropej. L-iżvilupp u l-integrazzjoni
reġjonali jistgħu jistimolaw il-kummerċ
u l-investiment u jrawmu l-paċi u l-istabbiltà. L-UE għandha
tappoġġa l-isforzi għall-integrazzjoni reġjonali u
kontinentali (inklużi l-inizjattivi Nofsinhar-Nofsinhar) permezz
tal-politiki tal-imsieħba f'oqsma bħas-swieq, l-infrastruttura u l-kooperazzjoni
transkonfinali dwar l-ilma, l-enerġija u s-sigurtà. Se jiġi offrut
appoġġ biex jiġu indirizzati l-lakuni tal-kompetittività,
bħala parti mill-Għajnuna għall-Attivitajiet tal-Kummerċ
u tal-Ftehimiet ta' Sħubija Ekonomika tal-UE li qegħdin
dejjem jikbru u li huma sostanzjali u ftehimiet oħrajn ta' kummerċ
ħieles ma' reġjuni li qegħdin jiżviluppaw.
3.3.
L-Agrikoltura sostenibbli u l-enerġija
L-UE għandha tuża l-appoġġ
tagħha fl-agrikoltura u fl-enerġija biex tgħin tiżola
lill-pajjiżi li qegħdin jiżviluppaw minn xokkijiet
(bħall-iskarsezza tar-riżorsi u l-provvista u bħall-volatilità
tal-prezzijiet) u għalhekk tgħin tipprovdi l-pedamenti għal
tkabbir sostenibbli. Għandha tindirizza l-inugwaljanzi, b'mod partikolari
biex tagħti lin-nies foqra aċċess aħjar għall-art,
l-ikel, l-ilma u l-enerġija mingħajr ma ssir ħsara
għall-ambjent. Fl-agrikoltura, l-UE għandha
tappoġġa prattiki sostenibbli, inklużi l-issalvagwardjar
tas-servizzi tal-ekosistemi, tagħti prijorità lill-prattiki
żviluppati lokalment u tiffoka fuq l-agrikoltura ta' skala
żgħira u l-għajxien rurali, il-formazzjoni ta' gruppi ta'
produtturi, ta' katina għall-fornitura u
għall-kummerċjalizzazzjoni u l-isforzi tal-gvern biex
jiffaċilita investiment privat responsabbli. L-UE se tkompli taħdem
biex issaħħaħ l-istandards nutrittivi, il-governanza tas-sigurtà
tal-ikel u tnaqqas il-volatilità tal-prezzijiet tal-ikel fuq livell
internazzjonali. Fl-enerġija, l-UE għandha
toffri t-teknoloġija u l-għarfien espert kif ukoll fondi
għall-iżvilupp, u għandha tiffoka fuq tliet sfidi ewlenin:
il-volatilità tal-prezzijiet u s-sigurtà tal-enerġija; it-tibdil
fil-klima, inkluż l-aċċess għal teknoloġiji b'livell
baxx tal-emissjoni tal-karbonju; u aċċess għal servizzi sikuri,
bi prezz raġonevoli, ta' enerġija nadifa u sostenibbli[8].
Fiż-żewġ setturi, l-UE
għandha tappoġġa l-iżvilupp tal-kapaċità u
t-trasferiment tat-teknoloġija, inkluż fi strateġiji ta’
adattament u mitigazzjoni tal-klima. L-UE qiegħda tfittex għal
sħubijiet fit-tul ma' pajjiżi li qegħdin jiżviluppaw,
ibbażati fuq responsabbiltà reċiproka.
4.
Sħubijiet differenzjati għall-izvilupp
L-UE trid tfittex li tiffoka r-riżorsi
tagħha fejn huma meħtieġa l-aktar biex tindirizza t-tnaqqis
tal-faqar u fejn jistgħu jkollhom l-akbar impatt. Għajnuna bbażata fuq l-għoti
m'għandhiex tidher fil-kooperazzjoni ġeografika ma' pajjiżi li
qegħdin jiżviluppaw aktar avvanzati li diġà qegħdin fuq
perkorsi appoġġati ta' tkabbir u/jew kapaċi jiġġeneraw
biżżejjed riżorsi proprji. Min-naħa l-oħra, ħafna
pajjiżi oħrajn jibqgħu jiddependu ħafna fuq
appoġġ estern sabiex jipprovdu servizzi bażiċi lill-poplu
tagħhom. Fiż-żona intermedja, hemm firxa ta’ sitwazzjonijiet li
jeħtieġu taħlitiet ta' politiki u arranġamenti ta’
kooperazzjoni differenti. Approċċ differenzjat tal-UE
għall-allokazzjoni tal-għajnuna u għas-sħubijiet huwa
għalhekk essenzjali biex jintlaħaq il-livell massimu ta' impatt u ta'
valur għall-flus. L-UE għandha tkompli tirrikonoxxi
l-importanza partikolari ta' appoġġ għall-iżvilupp fil-viċinat[9]
tagħha stess u fl-Afrika sub-Saħarjana[10].
Għandha, fir-reġjuni kollha, talloka aktar fondi milli kienet
tagħmel fil-passat lill-pajjiżi l-aktar fil-bżonn, inkluż
stati fraġli. Aktar preċiżament, l-assistenza
tal-UE għall-iżvilupp għandha tkun allokata skont: –
Il-ħtiġijiet tal-pajjiż: ivvalutati bl-użu ta’ diversi indikaturi, filwaqt li jitqiesu, inter
alia, ix-xejriet tal-iżvilupp ekonomiku u soċjali/uman u
l-perkors tat-tkabbir u kif ukoll l-indikaturi ta' vulnerabbiltà u
fraġilità. –
Il-kapaċitajiet: ivvalutati
skont l-abbiltà tal-pajjiż li jiġġenera biżżejjed
riżorsi finanzjarji, b'mod speċjali riżorsi domestiċi, u
l-aċċess tiegħu għal sorsi oħrajn ta’ finanzjament
bħal swieq internazzjonali, investiment privat jew riżorsi naturali.
Għandhom jitqiesu wkoll il-kapaċitajiet ta’ assorbiment. –
L-impenji u l-prestazzjoni tal-pajjiż: għandu jitqies b'mod pożittiv l-investiment tal-pajjiż
fl-edukazzjoni, fis-saħħa u fil-protezzjoni soċjali, il-progress
tiegħu fuq l-ambjent, id-demokrazija u l-governanza tajba, u s-solidità
tal-politiki ekonomiċi u fiskali tiegħu, inkluża l-ġestjoni
finanzjarja. –
L-impatt potenzjali tal-UE: ivvalutat permezz żewġ għanijiet trażversali: (1)
Iż-żieda tal-limitu sa fejn
il-kooperazzjoni tal-UE tista' tippromwovi u tappoġġa riformi
politiċi, ekonomiċi, soċjali u ambjentali fil-pajjiżi
msieħba; (2)
Iż-żieda tal-effett ta' lieva li
l-għajnuna tal-UE jista' jkollha fuq sorsi oħrajn ta’ finanzjament
għall-iżvilupp, b'mod partikolari l-investiment privat. Permezz ta' djalogu komprensiv politiku u
ta’ politika mal-pajjiżi sħab kollha, l-UE għandha
tiddefinixxi l-aktar forma xierqa ta’ kooperazzjoni, li twassal għal
deċiżjonijiet infurmati u oġġettivi dwar l-aktar
taħlita ta' politiki effettiva, livelli ta' għajnuna,
arranġamenti ta' għajnuna u l-użu tal-għodod finanzjarji
eżistenti u ġodda, u tibni fuq l-esperjenza proprja tal-UE
fil-ġestjoni tat-tranżizzjoni. Għal ċerti pajjiżi dan jista’
jirriżulta f’inqas jew fl-ebda għoti ta' għajnuna tal-UE
għall-iżvilupp u l-għażla ta' relazzjoni ta'
żvilupp differenti bbażata fuq self, kooperazzjoni teknika jew
appoġġ għall-kooperazzjoni trilaterali. F'sitwazzjonijiet ta' fraġilità,
għandhom jiġu definiti forom speċifiċi ta' appoġġ
li jippermettu l-irkupru u r-reżiljenza, b'mod
speċjali permezz ta' koordinazzjoni mill-qrib mal-komunità internazzjonali
u artikolazzjoni tajba mal-attivitajiet umanitarji. L-għan għandu
jkun li tiġi massimizzata sjieda nazzjonali kemm fuq il-livell tal-istat
kif ukoll fuq dak lokali sabiex tiġi żgurata l-istabbiltà u jiġu
sodisfatti l-ħtiġijiet bażiċi fuq perjodu qasir, filwaqt li
fl-istess ħin tissaħħaħ il-governanza, il-kapaċità u
t-tkabbir ekonomiku, filwaqt li l-bini tal-istat jinżamm bħala
element ċentrali. Dan il-proċess ta' teħid
tad-deċiżjonijiet ibbażat fuq il-pajjiż għandu
jagħti lill-UE l-flessibbiltà biex tirreaġixxi għal
avvenimenti mhux mistennija, b'mod speċjali dawk naturali jew
ikkaġunati mill-bniedem .
5.
Azzjoni kkoordinata tal-UE
Il-frammentazzjoni u l-proliferazzjoni
tal-għajnuna xorta għadhom mifruxa u qegħdin anke jiżdiedu, minkejja sforzi reċenti konsiderevoli biex jiġu kkoordinati
u armonizzati l-attivitajiet tad-donaturi. L-UE għandha tieħu rwol
ta' tmexxija aktar attiv, kif awtorizzat mit-Trattat ta’ Lisbona, u tressaq
proposti biex tagħmel l-għajnuna Ewropea aktar effettiva. L-ipprogrammar konġunt
tal-għajnuna tal-UE u tal-Istati Membri għandu
jnaqqas il-frammentazzjoni u jżid l-impatt tiegħu proporzjonalment
mal-livelli ta’ impenn. L-għan huwa għal proċess ta' pprogrammar
simplifikat u aktar mgħaġġel, li jitwettaq prinċipalment
fuq il-post. Fejn il-pajjiż imsieħeb ikun fassal
l-istrateġija propja tiegħu, l-UE għandha tappoġġha
billi tiżviluppa, kull fejn ikun possibbli, dokumenti
konġunti ta' programmar multiannwali mal-Istati Membri. Fejn
il-pajjiż imsieħeb ma jkunx għamel dan, l-UE se taħdem biex
tiżviluppa strateġija konġunta mal-Istati Membri. Dan il-proċess jista' jirriżulta f’dokument
ta’ pprogrammar konġunt wieħed li għandu jindika t-tqassim
settorjali tax-xogħol u l-allokazzjonijiet finanzjarji għal kull
settur u donatur. L-UE u l-Istati Membri għandhom isegwu d-dokument meta
jfasslu l-pjanijiet ta' implimentazzjoni bilaterali tagħhom. Il-parteċipazzjoni
għandha tinfetaħ għal donaturi mhux mill-UE impenjati
għall-proċess f'pajjiż speċifiku. Biex tissaħħaħ is-sjieda
tal-pajjiżi, fejn huwa possibbli l-ipprogrammar konġunt għandu
jiġi sinkronizzat maċ-ċikli tal-istrateġija
tal-pajjiżi msieħba. F'sens ta' operat, l-UE u l-Istati Membri
għandhom jużaw il-modalitajiet tal-għajnuna li jiffaċilitaw
l-azzjoni konġunta bħall-appoġġ baġitarju
(taħt 'kuntratt wieħed tal-UE'), il-fondi fiduċjarji tal-UE u
l-kooperazzjoni ddelegata. Rigward it-tqassim tax-xogħol
transkonfinali, il-Kummissjoni tinkoraġixxi lill-Istati Membri kollha biex
ikunu aktar trasparenti meta jidħlu jew joħorġu, f'konformità
mal-Kodiċi ta' Kondotta tal-UE dwar t-Tqassim tax-Xogħol[11].
Hemm bżonn ta' approċċ koordinat, inkluż mekkaniżmu
ta' koordinazzjoni għat-tqassim tax-xogħol transkonfinali. L-UE għandha tiżviluppa qafas
komuni għall-kejl u għall-ikkomunikar tar-riżultati
tal-politika għall-iżvilupp, inkluż għal tkabbir inklussiv
u sostenibbli. Skont il-Qafas Operattiv dwar l-Effettività tal-Għajnuna[12],
l-UE se taħdem mal-pajjiżi sħab u donaturi oħrajn fuq
strateġiji komprensivi rigward ir-responsabbiltà domestika u
reċiproka u t-trasparenza, inkluż permezz tal-bini ta' kapaċità
statistika. It-trasparenza hija l-qofol ta’ għajnuna
effettiva u responsabbli. Il-Kummissjoni, li adottat l-istandard
tal-Inizjattiva Internazzjonali tat-Trasparenza tal-Għajnuna, diġà
hija waħda mill-aktar donaturi trasparenti. Għandha tkompli dan
l-isforz, flimkien mal-Istati Membri.
6.
Koerenza mtejba fost il-politiki tal-UE.
L-UE hija fuq quddiemnett tal-aġenda
għall-Koerenza tal-Politika għall-Iżvilupp (PCD) u se
tkompli tevalwa l-impatt tal-politiki tagħha fuq l-għanijiet ta'
żvilupp. Se ssaħħaħ id-djalogu tagħha fil-livell
tal-pajjiżi dwar il-PCD u se tkompli tippromwovi l-PCD f'fora globali biex
tgħin biex jissawwar ambjent li jappoġġa l-isforzi
tal-pajjiżi l-aktar foqra. L-MFF futur għandu jsaħħaħ
il-PCD. Il-programmi tematiċi huma maħsuba bħala strumenti biex
jindirizzaw it-tħassib globali u se jipproġettaw il-politiki
tal-UE fil-kooperazzjoni għall-iżvilupp u jgħinu wkoll biex
jinqered il-faqar. L-UE trid
tintensifika l-approċċ konġunt tagħha għas-sigurtà
u għall-faqar, u fejn ikun meħtieġ tadatta l-bażijiet u
l-proċeduri legali tagħha. L-inizjattivi tal-UE, fil-qasam
tal-iżvilupp, tal-politika barranija u tas-sigurtà għandhom ikunu
marbuta biex joħolqu approċċ aktar koerenti lejn il-paċi,
il-bini tal-istati, it-tnaqqis tal-faqar u l-kawżi sottostanti ta’
kunflitti. L-UE għandha l-għan li tiżgura tranżizzjoni
bla xkiel mill-għajnuna umanitarja u mir-reazzjoni
għall-kriżijiet lejn il-kooperazzjoni għall-iżvilupp
għat-tul. F'termini tar-rabta
żvilupp-migrazzjoni, l-UE għandha tgħin lill-pajjiżi li
qegħdin jiżviluppaw fit-tisħiħ tal-politiki,
tal-kapaċitajiet u tal-attivitajiet tagħhom fil-qasam tal-migrazzjoni
u tal-mobbiltà, bil-għan li timmassimizza l-impatt tal-iżvilupp
taż-żieda tal-mobbiltà reġjonali u globali tan-nies.
7.
Tħaddin tal-Aġenda għall-Bidla
Il-Kummissjoni ssejjaħ lill-Kunsill biex
japprova l-Aġenda għall-Bidla proposta li tfittex li: –
tipprovdi lill-UE b'politika u prattika
tal-iżvilupp ta' impatt qawwi għall-għaxar snin li ġejjin u
tagħtiha rwol ewlieni fl-istabbiliment ta' aġenda ta' żvilupp
internazzjonali komprensiva sa u lil hinn mill-2015; –
tgħin għall-bidla meħtieġa
fil-pajjiżi sħab biex ikun hemm progress aktar
mgħaġġel lejn it-tnaqqis tal-faqar u l-MDGs. Is-servizzi tal-Kummissjoni u s-SEAE se
jiżguraw li l-prinċipji gwida stipulati f’din il-Komunikazzjoni huma
riflessi progressivament matul il-bqija taċ-ċiklu ta’ programmar ta'
bħalissa u fid-dokumenti ta’ pprogrammar futuri, kif ukoll fil-proposti
rigward l-arkitettura, il-leġiżlazzjoni u l-ipprogrammar
tal-istrumenti finanzjarji futuri għal azzjoni esterna. L-Istati Membri huma mħeġġa
biex jimplimentaw ukoll l-Aġenda. [1] COM(2010)629 http://ec.europa.eu/europeaid/how/public-consultations/5241_en.htm [2] 2006/C 46/01. [3] COM(2011) 638. [4] SEC(2010) 265 finali. [5] http://ec.europa.eu/europeaid/who/partners/civil-society/structured-dialogue_en.htm [6] Il-Konklużjonijiet tal-Kunsill 14919/07 u 15118/07. [7] COM(2011) 363 finali. [8] Filwaqt li jitqiesu l-inizjattivi li għaddejjin
bħalissa bħall-Grupp ta' Livell Għoli tan-NU dwar
l-Enerġija Sopstenibbli għal kulħadd. [9] COM(2011) 303. [10] Inkluż permezz l-Istrateġija Konġunta bejn
l-UE u l-Afrika. [11] 9558/07. [12] 18239/10.