EUR-Lex Access to European Union law
This document is an excerpt from the EUR-Lex website
Document 52011AR0065
Opinion of the Committee of the Regions on ‘The European eGovernment Action Plan 2011-2015’
Opinjoni tal-Kumitat tar-Reġjuni “Il-pjan ta’ azzjoni Ewropew dwar il-Gvern Elettroniku 2011–2015”
Opinjoni tal-Kumitat tar-Reġjuni “Il-pjan ta’ azzjoni Ewropew dwar il-Gvern Elettroniku 2011–2015”
ĠU C 9, 11.1.2012, p. 65–70
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
11.1.2012 |
MT |
Il-Ġurnal Uffiċjali tal-Unjoni Ewropea |
C 9/65 |
Opinjoni tal-Kumitat tar-Reġjuni “Il-pjan ta’ azzjoni Ewropew dwar il-Gvern Elettroniku 2011–2015”
2012/C 9/12
IL-KUMITAT TAR-REĠJUNI
— |
jilqa' b'sodisfazzjon it-tfassil tal-Pjan ta’ Azzjoni Ewropew dwar il-gvern elettroniku 2011-2015. Il-prijoritajiet tal-pjan – servizzi transkonfinali, it-tisħiħ tal-poteri tal-utent, l-użu mill-ġdid tal-informazzjoni tas-settur pubbliku (ISP), il-parteċipazzjoni elettronika, is-suq uniku onlajn, il-gvern ekoloġiku u l-interoperabbiltà – huma kollha oqsma li fihom ir-reġjuni u l-awtoritajiet lokali huma fl-istess waqt atturi, fornituri u benefiċċjarji; |
— |
jilqa' b'sodisfazzjon l-isforzi tal-amministraturi Ewropej biex isaħħu liċ-ċittadini u lin-negozji permezz tas-servizzi tal-gvern elettroniku, kif ukoll aċċess akbar għall-informazzjoni pubblika u trasparenza mtejba. Il-Kumitat jaqbel mal-isforzi li jkabbru l-parteċipazzjoni pubblika fil-proċess politiku, itejbu l-mobbiltà fi ħdan is-suq uniku u jnaqqsu l-burokrazija żejda għall-pubbliku; |
— |
jenfasizza li l-Pjan ta’ Azzjoni Ewropew dwar il-gvern elettroniku jista' jikkontribwixxi b'mod sinifikanti biex tonqos il-firda diġitali u jitwettqu l-għanijiet tal-istrateġija Ewropa 2020, filwaqt li jgħin biex jiġu sodisfatti għadd ta’ bżonnijiet importanti taċ-ċittadini Ewropej fl-oqsma soċjali, kulturali u ekonomiċi; |
— |
li filwaqt li s-softwer b'sors miftuħ (open source) kiseb aċċettazzjoni li qed tikber fis-suq, standards miftuħin u interfaċċi miftuħin huma importanti wkoll fl-abilitazzjoni tat-trasferiment u l-użu tal-informazzjoni u l-interoperabbiltà madwar l-organizzazzjonijiet, is-sistemi u t-tagħmir. |
Relatur |
Ján ORAVEC (SK/PPE), Sindku ta’ Štúrovo |
Dokument ta’ referenza |
Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni – Il-Pjan ta’ Azzjoni Ewropew dwar il-gvern elettroniku 2011–2015 – L-użu tal-ICT għall-promozzjoni ta’ gvern intelliġenti, sostenibbli u innovattiv COM(2010) 743 finali |
I. RAKKOMANDAZZJONIJIET TA' POLITIKA
Is-soċjetà tal-informazzjoni (SI) kienet aċċelleratur tremend tal-progress ekonomiku u soċjali. Filwaqt li jirrikonoxxu dal-fatt, il-pajjiżi u r-reġjuni kollha madwar id-dinja qed idaħħlu t-titjib fl-SI fil-pjani ta’ żvilupp tagħhom u, permezz ta’ azzjoni pubblika, ifittxu li jħaffu t-twaqqif ta’ infrastruttura tat-teknoloġiji tal-informazzjoni u l-komunikazzjoni (ICT), jappoġġjaw il-ħolqien tal-kontenut, iħaffu s-servizzi li jiġu offruti u jappoġġjaw liċ-ċittadini biex iżidu l-grad ta’ użu tagħhom. L-Ewropa hija fost il-pijunieri globali f'dan ir-rigward u l-aġenda tagħha għandha tissaħħaħ bil-parteċipazzjoni tal-awtoritajiet lokali u reġjonali.
Il-pjan ta’ azzjoni dwar il-gvern elettroniku Ewropew għall-2011-2015 irid jinftiehem bħala t-twettiq fil-prattika tal-miri tal-Aġenda Diġitali għall-Ewropa. L-ostakli għal tkabbir aktar dinamiku fil-potenzjal tal-ITCs, li wasslu għal dawn l-inizjattivi huma ċari ħafna fl-Ewropa. Huwa partikolarment importanti li nfittxu li ntejbu l-aċċess għat-teknoloġiji innovattivi tal-awtoritajiet lokali u reġjonali, li huma l-eqreb taċ-ċittadini u jipprovdu servizzi fil-lokalità. Irridu nitgħallmu mill-proġetti tal-passat li ma rnexxielhomx jagħtu r-riżultati mistennija.
Il-Kumitat tar-Reġjuni jappoġġja
1. |
il-proposti fil-Pjan ta’ Azzjoni dwar il-Gvern elettroniku li huma rilevanti ħafna għall-awtoritajiet lokali u reġjonali, li għandhom iqisu l-ICT bħala element essenzjali biex il-pjan jimxi 'l quddiem. Il-prijoritajiet tal-istrateġija l-ġdida fil-livell lokali u reġjonali jistgħu jappoġġjaw il-kwalità tal-ħajja u l-attività soċjali u ekonomika taċ-ċittadini, kif ukoll jistimolaw servizzi pubbliċi aktar effiċjenti u personalizzati, u n-negozji lokali. Hemm diversi mezzi li bihom ir-reġjuni u l-bliet jistgħu jappoġġjaw l-iżvilupp sħiħ ta’ dan il-potenzjal; |
2. |
wieħed mill-għanijiet ewlenin tal-Pjan ta’ Azzjoni li huwa il-promozzjoni tal-inklużjoni elettronika – jiġifieri soċjetà tal-informazzjoni inklussiva, u ġusta fil-livelli reġjonali u soċjali li tuża' l-ICT biex iżżid il-kompetittività u ttejjeb is-servizzi pubbliċi. |
3. |
is-sehem li qed jagħtu l-awtoritajiet lokali u reġjonali f'kollaborazzjoni mifruxa biex titjieb l-interoperabbiltà tas-sistemi governattivi u biex il-provvista tas-servizzi pubbliċi ssir aktar effettiva (1); |
Il-Kumitat tar-Reġjuni jilqa' b'sodisfazzjon
4. |
it-tfassil tal-Pjan ta’ Azzjoni Ewropew dwar il-gvern elettroniku 2011-2015. Il-prijoritajiet tal-pjan – servizzi transkonfinali, it-tisħiħ tal-poteri tal-utent, l-użu mill-ġdid tal-informazzjoni tas-settur pubbliku (ISP), il-parteċipazzjoni elettronika, is-suq uniku onlajn, il-gvern ekoloġiku u l-interoperabbiltà – huma kollha oqsma li fihom ir-reġjuni u l-awtoritajiet lokali huma fl-istess waqt atturi, fornituri u benefiċċjarji; |
5. |
l-isforzi tal-amministraturi Ewropej biex isaħħu liċ-ċittadini u lin-negozji permezz tas-servizzi tal-gvern elettroniku, kif ukoll aċċess akbar għall-informazzjoni pubblika u trasparenza mtejba. Il-Kumitat jaqbel mal-isforzi li jkabbru l-parteċipazzjoni pubblika fil-proċess politiku, itejbu l-mobbiltà fi ħdan is-suq uniku u jnaqqsu l-burokrazija żejda għall-pubbliku; |
6. |
l-approċċ ta’ punt uniku, li ttieħed f'diversi Stati Membri. Il-ħolqien ta’ ċentri tas-servizzi tal-awtoritajiet pubbliċi bħal dawn madwar l-UE jkollhom importanza fundamentali kemm għall-pubbliku kif ukoll għan-negozji fl-Istati Membri tagħha. Madankollu, jeħtieġ li l-ewwel jinħolqu l-kundizzjonijiet adatti għall-gvern elettroniku u fl-istess waqt għandu jkun hemm valutazzjoni komprensiva tal-implimentazzjoni tad-Direttiva tal-UE dwar is-servizzi; |
7. |
xogħol fejjiedi fuq il-promozzjoni u l-monitoraġġ tas-saħħa pubblika, speċjalment fiż-żoni remoti jew b'aċċess diffiċli. It-tfassil u l-implimentazzjoni ta’ progammi nazzjonali għall-adozzjoni ta’ sistemi diġitali fil-kura tas-saħħa fl-Istati Membri għandhom jiffaċilitaw ħafna l-għoti tas-servizzi tas-saħħa fil-livell lokali, reġjonali jew transkonfinali. |
Il-Kumitat tar-Reġjuni jenfasizza
8. |
li l-awtoritajiet lokali u reġjonali għandu jkollhom rwol importanti f'dan il-proċess, għalhekk:
|
9. |
l-adozzjoni ta’ miżuri ta’ razzjonalizzazzjoni, modernizzazzjoni u tnaqqis ta’ piżijiet amministrattivi bħala azzjoni prijoritarja sabiex jitnaqqsu l-ispejjeż, kif ukoll ir-razzjonalizzazzjoni u s-semplifikazzjoni tal-proċeduri amministrattivi u s-servizzi, li jixprunaw l-attività ekonomika, inaqqsu l-proċeduri u l-formalitajiet burokratiċi u jiffaċilitaw ukoll ir-relazzjonijiet bejn iċ-ċittadini u l-amministrazzjoni, jgħinu fit-tnaqqis tal-ispejjeż amministrattivi tal-attivitajiet intraprenditorjali, fit-titjib tal-kompetittività tal-intrapriżi u biex jiġi stimulat l-iżvilupp tagħhom; |
10. |
il-prinċipji li fuqhom huwa bbażat il-pjan ta’ azzjoni – il-ftuħ, il-flessibbiltà u l-kooperazzjoni fil-kuntatti bejn l-amministrazzjonijiet pubbliċi Ewropej u l-pubbliku – huma tal-akbar importanza għal implimentazzjoni b'suċċess; |
11. |
li l-idea tat-trasparenza hija partikolarment importanti hawnhekk, peress li “se jippermettu li ċ-ċittadini jkollhom aċċess elettroniku għal dik id-data personali li hija disponibbli fuqhom meta tkun disponibbli elettronikament” (6). Din l-informazjoni llum diġà hija aċċessibbli għaċ-ċittadini. Madankollu, il-Kumitat tar-Reġjuni jesprimi xi riservi dwar il-proposta tal-Kummissjoni li ċ-ċittadini jiġu infurmati b'mod elettroniku mill-2014 'l quddiem kull meta d-data tagħhom tkun ipproċessata b'mod awtomatiku. Informazzjoni ta’ dan it-tip għandha biss tiġi trasmessa jekk tkun utli għaċ-ċittadini u jekk l-ispejjeż relatati jkunu proporzjonati; |
12. |
li l-involviment aktar mill-qrib tal-awtoritajiet lokali u reġjonali jista' jagħmilha possibbli li l-potenzjal sħiħ tal-użu mill-ġdid tal-informazzjoni tas-settur pubbliku jintuża hekk kif l-awtoritajiet lokali u reġjonali jistgħu jieħdu rwol importanti fl-appoġġ ta’ dan l-użu sabiex tiżdied il-kompetittività u jinħolqu impjiegi ġodda (7).; |
13. |
li l-Pjan ta’ Azzjoni Ewropew dwar il-gvern elettroniku jista' jikkontribwixxi b'mod sinifikanti biex tonqos il-firda diġitali u jitwettqu l-għanijiet tal-istrateġija Ewropa 2020, filwaqt li jgħin biex jiġu sodisfatti għadd ta’ bżonnijiet importanti taċ-ċittadini Ewropej fl-oqsma soċjali, kulturali u ekonomiċi (8); |
14. |
li d-dħul madwar l-Ewropa tal-prinċipju li d-dettalji tan-nies u d-dettalji tal-oġġetti jiġu reġistrati darba biss, mingħajr il-ħtieġa ta’ mili ta’ formoli repetuti, jkun pass kbir biex tonqos il-burokrazija żejda għall-pubbliku u b'mod ġenerali biex jonqsu l-ispejjeż amministrattivi. F'dan ir-rigward, huwa importanti li jiġi żgurat li l-liġi dwar il-protezzjoni tad-data tibqa' tiġi rispettata; |
15. |
lit-tneħħija tal-inugwaljanzi, li għadhom jeżistu f'partijiet varji tal-Unjoni Ewropea, speċjalment fir-reġjuni ultraperiferiċi, fl-aċċess tan-nies u l-livell tat-tagħmir hija rekwiżit fundamentali għal użu aħjar tal-ICT. Dan huwa partikolarment il-każ tal-awtoritajiet lokali u reġjonali, fejn mhux biss hemm differenzi kbar bejn reġjuni differenti fl-istess pajjiż, iżda wkoll bejn awtoritajiet lokali skont id-daqs tagħhom. Hemm tendenza li bliet u rħula żgħar jinsabu ħafna aktar lura meta jiġu biex jilħqu l-kapaċità teknika, organizzattiva, u tal-persunal meħtieġa biex jestendu l-użu tal-ICT. Għalhekk irid jibda x-xogħol fuq l-offerta ta’ pjattaformi unifikati għall-provvista tas-servizzi tal-kunsilli lokali u muniċipali fil-forma ta’ softwer bħala servizz (SaaS). Dan jirrikjedi l-użu tal-iżviluppi attwali fl-IT bħall-virtwalizzazzjoni u l-cloud computing, li jnaqqsu l-ispejjeż u l-ħin biex isiru l-proġetti. Dawn l-iżviluppi għandhom essenzjalment ikunu bbażati fuq pjattaformi eżistenti u fuq l-użu ta’ softwer tat-tip open source; |
16. |
li d-dokument għandu jisħaq b'mod partikolari fuq il-ħtieġa li tingħalaq il-firda bejn ir-reġjuni, jew tal-anqas li din ma tkomplix tikber. Aħna konxji b'mod partikolari mir-riskju li l-proġetti tal-gvern elettroniku jiġu adottati u implimentati biss f'ċerti reġjuni; |
17. |
li servizzi transkonfinali bla tfixkil u li jippermettu lin-negozji jipprovdu servizzi u prodotti madwar l-UE (SPOCS – Simple Procedures Online for Crossborder Services – Proċeduri Sempliċi Onlajn għas-Servizzi Transkonfinali) permezz ta’ akkwist pubbliku faċli (PEPPOL – Pan-European Public Procurement Online – Akkwist Pubbliku Pan-Ewropew Onlajn) ikunu stimolu kbir għat-tkomplija tal-iżvilupp tan-negozji fl-UE; |
18. |
li filwaqt li s-softwer b'sors miftuħ (open source) kiseb aċċettazzjoni li qed tikber fis-suq, standards miftuħin u interfaċċji miftuħin huma importanti wkoll fl-abilitazzjoni tat-trasferiment u l-użu tal-informazzjoni u l-interoperabbiltà madwar l-organizzazzjonijiet, is-sistemi u t-tagħmir; |
19. |
li l-awtoritajiet lokali u reġjonali għandhom sehem importanti ħafna fl-espansjoni tal-aċċess għall-broadband fiż-żoni fejn is-suq ma jirnexxielux (9); |
20. |
jappoġġja r-Riżoluzzjoni tal-Parlament Ewropew tas-6 ta’ Lulju 2011 dwar Il-Broadband Ewropew: investiment fi tkabbir ekonomiku mmexxi diġitalment (10) u b'mod partikolari jappoġġja l-fehma li l-obbligu ġenerali ta’ servizz jaf jagħti kontribut essenzjali għall-iżvilupp tal-komunikazzjoni bil-broadband fiż-żoni rurali. |
21. |
li l-aċċess għal servizzi tal-broadband ta’ kwalità għolja u bi prezz raġonevoli jista' jżid l-aċċessibbiltà u l-kwalità tas-servizzi pprovduti mill-awtoritajiet lokali u reġjonali – u fil-każ tal-mikrointrapriżi u l-SMEs jiffaċilita l-kummerċjalizzazzjoni tal-prodotti. Reġjuni u bliet imbiegħda, b'mod speċjali dawk ultraperiferiċi, huma mistennija li jibbenefikaw b'mod konsiderevoli minn aċċess usa' u iktar veloċi għas-servizzi tal-broadband (11); |
22. |
li b'hekk l-aċċess għall-broadband ikun jista' jpatti għad-diffikultajiet li jirriżultaw minħabba l-iżolament taż-żoni rurali, permezz ta’ komunikazzjoni aħjar bejn l-amministrazzjoni u l-utenti – kemm dawk privati kif ukoll dawk kummerċjali (12); |
23. |
li s-servizzi tal-Gvern elettroniku li għandhom jiġu żviluppati għandhom jinkludu oqsma bħal: relazzjonijiet bejn l-utenti u l-amministrazzjoni; il-kontribut tal-amministrazzjonijiet fit-tisħiħ tad-dibattitu pubbliku (disseminazzjoni ta’ informazzjoni pubblika essenzjali, fora pubbliċi, konsultazzjonijiet onlajn u – b'mod aktar wiesa' – mekkaniżmi ġodda ta’ konsultazzjoni pubblika); il-kuntatti bejn il-kumpaniji u l-amministrazzjoni (bħal notifiki ta’ data soċjali, notifiki ta’ reklutaġġ, trasferimenti tat-taxxa u kontabbiltà tad-data); l-applikazzjoni tat-tekniki tal-kummerċ elettroniku fl-isfera tal-akkwist pubbliku (akkwist elettroniku); u l-metodi ta’ ħidma u organizzazzjoni ġodda fi ħdan l-amministrazzjonijiet (trasformazzjoni tal-impjiegi, ħidma kooperattiva, teleworking); |
24. |
il-miżuri intiżi biex jagħtu lil kull ċittadin Ewropew aċċess għall-broadband bażiku sal-2013 u broadband rapidu u ultrarapidu sal-2020, b'konformità mal-impenji tal-UE fl-Aġenda Diġitali għall-Ewropa, għandhom jiġu implimentati mill-aktar fis; |
25. |
li, meta niġu għall-użu tal-potenzjal tal-gvern elettroniku biex jonqos l-impatt tal-karbonju, ir-reġjuni u l-bliet jista' jkollhom rwol ta’ tmexxija fl-identifikazzjoni ta’ opportunitajiet tal-ICT għall-azzjoni lokali, l-iskambji dwar l-aqwa prattiki fit-teknoloġija, l-identifikazzjoni ta’ msieħba fil-proġetti, l-allokazzjoni tal-fondi għall-investiment fl-għodod tal-ICT, il-kejl tal-progress u l-komunikazzjoni tas-suċċess. |
Il-Kumitat tar-Reġjuni jiġbed l-attenzjoni
26. |
għall-importanza partikolari tas-settur tas-servizzi biex jinkisbu l-benefiċċji tal-ICT, peress li l-industriji bħall-kummerċ bil-grossa u bl-imnut u s-servizzi finanzjarji u tan-negozju huma fost l-aktar investituri importanti fl-ICT (13); |
27. |
li l-persistenza tal-firda diġitali qed tgħarraq is-sitwazzjoni tal-esklużjoni soċjali u d-diverġenza ekonomika. Għalhekk il-ħolqien ta’ opportunitajiet ugwali fil-qasam diġitali huwa essenzjali għal raġunijiet kemm soċjali kif ukoll ekonomiċi. F'dan id-dawl, l-inklużjoni elettronika hija essenzjali biex jintlaħqu l-għanijiet tal-Pjan ta’ Azzjoni dwar il-Gvern elettroniku 2011–2015 u b'hekk l-għanijiet tal-istrateġija Ewropa 2020 (14) fil-qasam tal-iżvilupp soċjali u ekonomiku; |
28. |
li l-provvista tal-protezzjoni tal-privatezza tiddependi minn ċerti fatturi, inkluż l-istrutturar tal-korpi tas-settur pubbliku (li l-maġġoranza tagħhom tinsab fil-livell lokali), il-konverġenza tal-leġislazzjoni tal-UE, it-trawwim ta’ kultura innovattiva fost l-uffiċjali tal-awtoritajiet pubbliċi, fosthom l-użu ta’ kodiċi komuni tal-etika, u fost iċ-ċittadini, permezz tad-definizzjoni tad-drittijiet tal-konsumaturi diġitali u s-sensibilizzazzjoni dwarhom, u l-ġestjoni tal-applikazzjonijiet bbażati fuq l-ICT (15); |
29. |
il-ħtieġa li jiġi żgurat li r-rekwiżiti tas-sigurtà jiġu sodisfatti fil-livelli kollha hekk kif tkun qed tiġi installata l-infrastruttura tal-internet u jiġu żviluppati s-servizzi relatati. Dan jiggarantixxi l-ħarsien massimu tal-privatezza u tad-data personali u l-prevenzjoni ta’ kull monitoraġġ mhux awtorizzat ta’ data personali u tal-profili, inklużi l-preferenzi fix-xiri, id-drawwiet, il-kundizzjoni medika, l-istorja medika u affarijiet oħra (16); |
30. |
li l-awtoritajiet lokali u reġjonali għandhom rwol importanti fil-ġlieda kontra ċ-ċiberkriminalità u fil-protezzjoni tas-sigurtà tad-data. Għandhom jipparteċipaw fil-ġbir tad-data dwar l-istatistika taċ-ċiberkriminalità u fit-taħriġ tal-persunal; |
31. |
li, rigward il-prinċipju ta’ suq kompetittiv tal-informazzjoni tas-settur pubbliku, huwa essenzjali li jiġi żgurat li l-fornituri tas-servizzi privati jiffaċċjaw l-istess kundizzjonijiet bħall-istituzzjonijiet pubbliċi, li jiġi permess l-aċċess għall-informazzjoni pubblika mill-utenti privati, kif ukoll li jkunu indikati b'mod ċar il-kundizzjonijiet li bihom din id-data tista' tintuża għal skopijiet kummerċjali (17); |
32. |
li, fil-governanza tal-proċess li fuqhom huwa bbażat il-Pjan ta’ Azzjoni dwar il-Gvern elettroniku u l-politiki pubbliċi relatati, l-azzjoni kkoordinata mill-Unjoni Ewropea, l-Istati Membri u l-awtoritajiet lokali u reġjonali, li tirrispetta għal kollox il-prinċipju tas-sussidjarjetà, hija ta’ importanza kbira ħafna, kif indika l-KtR fil-White paper tiegħu dwar il-governanza f'livelli differenti (18). |
Il-Kumitat tar-Reġjuni jinnota
33. |
li l-imsieħba soċjali, l-awtoritajiet lokali u reġjonali u l-gvernijiet għandhom bżonn jaħdmu flimkien biex jiżguraw il-bidu ta’ ċirku virtwuż ta’ titjib fir-riżorsi umani, tibdil organizzattiv, ICT u produttività u li l-ICTs jiġu żviluppati u użati b'mod effettiv. Politiki mmirati li jtejbu l-litteriżmu bażiku diġitali, il-bini ta’ ħiliet f'livell għoli, il-promozzjoni tat-tagħlim tul il-ħajja fl-ICT, u t-titjib fil-ħiliet tal-ġestjoni kif ukoll dawk fin-netwerking meħtieġa għall-użu effettiv tal-ICT huma partikolarment rilevanti (19) u jinsabu fost il-kompetenzi ewlenin tal-awtoritajiet lokali u reġjonali; |
34. |
li, f'din il-Komunikazzjoni, il-Kummissjoni Ewropea ssemmi għadd impressjonanti ta’ azzjonijiet li għandhom jittieħdu taħt il-kappa tal-Pjan ta’ Azzjoni tal-Gvern elettroniku. |
35. |
li, kif inhuma, il-miżuri u l-azzjonijiet previsti mill-komunikazzjoni ma jidhrux li jqajmu problemi dwar il-konformità tagħhom mal-prinċipju tal-proporzjonalità peress li ma jaqbżux dak li hu meħtieġ biex jintlaħqu l-miri intiżi. Kemm jista' jkun għandu jiġi evitat kull piż żejjed li l-miżuri jista' jkollhom fuq l-Istati Membri u dan il-piż għandu jkun soġġett għal valutazzjoni ta’ kosteffettività; |
36. |
li l-forom ta’ azzjoni proposti (miżuri ta’ politika ħfief – soft policy measures) huma sempliċi kemm jista' jkun biex jilħqu l-għanijiet intiżi u jħallu kemm jista' jkun spazju għad-deċiżjonijiet nazzjonali (fosthom dawk reġjonali); |
37. |
li l-miżuri speċifiċi li jridu jiġu implimentati għandhom jiġu osservati mill-qrib u vvalutati, biex jiġi żgurat li ma jaqbżux dak li hu meħtieġ biex jintlaħqu l-għanijiet iffissati u li l-Istati Membri jżommu l-akbar marġni għat-teħid tad-deċiżjonijiet filwaqt li n-negozji ma jkollhomx piżijiet bla bżonn. Għal dan il-għan trid tiddaħħal sistema ta’ proċeduri ta’ monitoraġġ. |
38. |
li l-ksur tas-sigurtà huwa theddida għas-servizzi ta’ utilità (ilma, enerġija, kumpaniji tal-enerġija ekoloġika lokali u oħrajn); |
39. |
li l-ġestjoni tat-tibdil fil-klima hija waħda mill-aktar sfidi politiċi importanti quddiem l-awtoritajiet lokali u reġjonali għas-snin li ġejjin u li biex jinkisbu l-miri ambizzjużi għall-2020 hemm bżonn li s-soluzzjonijiet li jużaw l-ICT jkunu faċilment disponibbli kif ukoll li jintużaw b'mod komplut; |
40. |
li r-reġjuni, l-istess bħall-awtoritajiet lokali, huma atturi ewlenin fil-qasam tal-ICT għat-tkabbir sostenibbli peress li huma responsabbli għal għadd ta’ attivitajiet li jirrigwardaw l-ippjanar, l-għoti ta’ permessi, l-investiment, l-akkwist, il-produzzjoni u l-konsum. It-trasport, id-djar u l-bini pubbliku, u l-infrastruttura tad-dawl pubbliku, li huma ppjanati u pprovduti mill-awtoritajiet lokali u reġjonali, huma oqsma li fihom jista' jsir kemm tnaqqis importanti tas-CO2 kif ukoll iffrankar tal-enerġija. Barra minn hekk, il-potenzjal kbir tal-ICTs biex itejjeb l-effiċjenza enerġetika jsaħħaħ il-kompetittività tal-Unjoni Ewropea u jkabbar l-opportunitajiet tan-negozju fil-livell lokali u reġjonali. |
Il-Kumitat tar-Reġjuni jirrakkomanda
41. |
li l-Kummissjoni Ewropea u l-gvernijiet tal-Istati Membri għandhom iħeġġu b'mod attiv l-involviment tal-awtoritajiet lokali u reġjonali fl-użu tal-innovazzjonijiet tal-ICT fis-settur pubbliku, l-aktar billi jippromovu l-aħjar prattiki Ewropej u jipprovdu pariri u rakkomandazzjonijiet metodoloġiċi (20). |
42. |
li għandu jiġi provdut taħriġ estensiv tal-persunal kollu, speċjalment tekniċi speċjalizzati (eżempju fin-netwerks, is-sistemi, is-sigurtà, il-privatezza, eċċ), persunal li jaħdem direttament ma’ proċeduri tas-sigurtà bl-użu ta’ metodoloġiji differenti u persunal li b'mod ġenerali jew indirett jipparteċipa fl-inizjattivi tal-innovazzjoni u l-immodernizzar (eżempju it-tagħlim tal-litteriżmu diġitali lill-konsumaturi) dwar kwistjonijiet marbutin mal-fiduċja u s-sigurtà (21); |
43. |
li ser tiġi żviluppata Valutazzjoni tal-Impatt tal-Informazzjoni mill-Kummissjoni Ewropea u ser tiġi inkluża fil-kodiċi tal-kondotta tar-relazzjonijiet intergovernattivi biex tevalwa l-impatt ta’ politiki ġodda u leġislazzjonijiet ġodda fuq il-muniċipalitajiet u r-reġjuni li jirrikjedu tibdil fil-ġestjoni tal-informazzjoni u l-adattament ta’ teknoloġiji ġodda. Il-valutazzjoni tal-impatt tas-sistemi tal-informazzjoni għandha l-għan li:
|
44. |
li tingħata aktar attenzjoni lis-sensibilizzazzjoni fil-livell reġjonali lokali, minħabba fin-nuqqas ta’ għarfien u/jew ta’ mekkaniżmi biex l-informazzjoni disponibbli għall-użu mill-ġdid tiġi identifikata biex il-korpi pubbliċi jkunu jistgħu jkunu aktar trasparenti u jippromovu l-użu mill-ġdid tal-informazzjoni tas-servizzi pubbliċi (22); |
45. |
l-awtoritajiet lokali u reġjonali fl-Ewropa jużaw b'mod estensiv l-opportunitajiet tal-ICT biex jgħelbu l-isfidi ta’ popolazzjoni li qed tixjieħ u b'hekk itejbu l-kwalità tal-ħajja tal-anzjani, jżommuhom integrati mal-komunitajiet lokali u jippromovu l-kompetittività lokali u reġjonali permezz tal-provvista ta’ servizzi personalizzati (23). |
Brussell, 12 ta’ Ottubru 2011.
Il-President tal-Kumitat tar-Reġjuni
Mercedes BRESSO
(1) CdR 10/2009 fin.
(2) CdR 283/2008 fin.
(3) CdR 156/2009 fin.
(4) CdR 104/2010 fin.
(5) COM(2009) 116 finali
(6) COM(2010) 743 finali
(7) CdR 247/2009 fin.
(8) CdR 14/2010 fin.
(9) CdR 5/2008 fin.
(10) http://www.europarl.europa.eu/sides/getDoc.do?type=TA&reference=P7-TA-2011-0322&language=MT
(11) CdR 252/2005 fin.
(12) CdR 14/2010 fin.
(13) The Economic Impact of ICT: Measurement, Evidence and Implications (L-impatt ekonomiku tal-ICT: il-kejl, l-evidenza u l-implikazzjonijiet), OECD Publishing (2004).
(14) COM(2010) 2020.
(15) CdR 247/2009 fin.
(16) CdR 247/2009 fin.
(17) CdR 247/2009.
(18) CdR 89/2009 fin.
(19) The Economic Impact of ICT Measurement, Evidence and Implications (L-impatt ekonomiku tal-ICT: il-kejl, l-evidenza u l-implikazzjonijiet), OECD Publishing (2004).
(20) CdR 156/2009 fin.
(21) CdR 104/2010 fin.
(22) CdR 247/2009.
(23) CdR 84/2007 fin.