27.1.2010

MT

Il-Ġurnal Uffiċjali tal-Unjoni Ewropea

C 20/33

---

Pubblikazzjoni ta' applikazzjoni għar-reġistrazzjoni skont l-Artikolu 8(2) tar-Regolament tal-Kunsill (KE) Nru 509/2006 dwar prodotti agrikoli u oġġetti tal-ikel bħala speċjalitajiet tradizzjonali garantiti

2010/C 20/09

Din il-pubblikazzjoni tikkonferixxi d-dritt għal oġġezzjoni għall-applikazzjoni skont l-Artikolu 9 tar-Regolament tal-Kunsill (KE) Nru 509/2006. Id-dikjarazzjonijiet ta' oġġezzjoni għandhom jaslu għand il-Kummissjoni fi żmien sitt xhur mid-data ta' din il-pubblikazzjoni.

APPLIKAZZJONI GĦAR-REĠISTRAZZJONI TA' STG

IR-REGOLAMENT TAL-KUNSILL (KE) Nru 509/2006

“OVČÍ HRUDKOVÝ SYR – SALAŠNÍCKY”

Nru tal-KE: SK-TSG-0007-0046-20.10.2006

1.   Isem u indirizz tal-grupp applikant:

Isem:	Družstvo – „Cech výrobcov ovčieho syra v Turci“
Indirizz:	Poľnohospodárske družstvo Turčianske Kľačany 271 038 61 Vrútky SLOVENSKO/SLOVAKIA
Tel.	+421 4343085213
Fax	+421 434308523
Posta elettronika:	tas_sro@stonline.sk

2.   Stat membru jew pajjiż terz:

Ir-Repubblika Slovakka

3.   Speċifikazzjoni tal-prodott:

3.1.   Isem/Ismijiet li se jiġi/u rreġistrat(i):

“Ovčí hrudkový syr – salašnícky”

3.2.   Jekk l-isem:

	huwiex speċifiku fih innifsu
	jesprimix il-karattru speċifiku tal-prodott agrikolu jew tal-oġġett tal-ikel

Il-karattru speċifiku huwa determinat skont in-natura tal-materja prima, jiġifieri l-ħalib tan-nagħaġ qabel ma jiġi ppasturizzat u l-ipproċessar tradizzjonali tiegħu fl-għerejjex tar-rgħajja. It-terminu “salašnícky” fl-isem jesprimi n-natura speċifika tal-prodott u ġej mill-kelma “salaš”, li tfisser għarix ta' ragħaj, fejn isir il-ġobon, u għalhekk joħloq rabta mal-post fejn issir il-produzzjoni.

3.3.   Jekk l-isem hux qed jiġi rriżervat skont l-Artikolu 13(2) tar-Regolament (KE) Nru 509/2006:

	Reġistrazzjoni bir-riżervazzjoni tal-isem
	Reġistrazzjoni mingħajr riżervazzjoni tal-isem

3.4.   Tip ta' prodott:

1.3.

Ġobnijiet

3.5.   Deskrizzjoni tal-prodott agrikolu jew tal-oġġett tal-ikel li għalih japplika l-isem indikat fil-punt 3.1.:

“Ovčí hrudkový syr – salašnícky” huwa ġobon li jsir mill-ħalib frisk tan-nagħaġ fl-għerejjex tar-rgħajja u t-togħma karatteristika tiegħu tnisslet b'riżultat tat-teknoloġija tradizzjonali użata waqt il-fermentazzjoni tiegħu, u mill-fatt li jingħata s-sura ta' boċċa bl-idejn.

Fatturi fiżiċi

—	sura sferika, fil-forma ta' boċċa,

—	daqs: jiżen sa 5 kg;

Fatturi kimċi

—	materja niexfa: għall-anqas 40 % mill-piż,

—	kontenut imxaħħam mill-piż fil-materja niexfa: għall-anqas 50 %,

—	aċidità: pH 5,2-4,9;

Kriterji mikrobijoloġiċi

Fih firxa ta' mikroorganiżmi, inkluż b'mod partikolari:

Mikroorganiżmi aċidoġenniċi – Streptococcus lactis, Leuconostos mesenteroides, Lactobacillus casei, Lactobacillus plantarum; ħmejjer u moffa – Torulopsis candida, Geotrichum candidum, Geotrichum casei;

Karatteristiċi organolettiċi

—	dehra minn barra: niexfa, intatta, wiċċ mhux mittiefes, qoxra rqiqa fis-sezzjoni trasversali, b'toqob u xquq żgħar 'l hawn u 'l hinn,

—	lewn: wiċċ abjad għal safrani, abjad bi sfumatura kemxejn safranija fis-sezzjoni trasversali,

—	togħma u riħa: sottili, kemxejn aċidika, togħma friska, tipika tal-prodotti magħmulin mill-ħalib tan-nagħaġ,

—	konsistenza: soda u elastika.

3.6.   Deskrizzjoni tal-metodu tal-produzzjoni tal-prodott agrikolu jew tal-oġġett tal-ikel li għalih japplika l-isem indikat fil-punt 3.1.:

Ġbir tal-ħalib tan-nagħaġ

—

il-ħalib użat fil-produzzjoni tal-ġobon jiġi minn nagħaġ b'saħħithom (nagħaġ li ġejjin mir-razez li jitrabbew fil-muntanji u fiż-żoni ta' madwarhom) billi jinħelbu bl-idejn f'maqjel fejn jinżammu annimali li jinħelbu (strunga) miżmum f’kundizzjonijiet naturali. Il-ħalib jinġabar f'barmil apposta li ma jissaddadx li jkollu fih apparat iffittjat li jiffiltra (tradizzjonalment il-ħalib kien jinġabar f'barmil tal-injam). Meta l-barmil (geleta) jimtela, li jkun hemm fih jissaffa ġo bott tal-ħalib billi jgħaddi minn passatur li jkun fih filter tat-tajjar (il-ħalib jista' jinġabar ukoll mekkanikament f'post fejn jinbiegħ il-ħalib f'post fiss jew mobbli),

—	il-ħalib miġbur jiġi trasferit fil-bottijiet u jintbagħat fil-bini fejn issir il-produzzjoni - fl-għerejjex tar-rgħajja (salaš-koliba).

L-ipproċessar tal-ħalib f'ġobon – il-produzzjoni tal-ġobon f'forma ta' boċċa mill-ħalib tan-nagħaġ

—

Il-ħalib frisk li jinġabar jiġi pproċessat immedjatament wara li jinħeleb, wara li jiġi trasferit lejn iż-żona tal-produzzjoni tal-għerejjex tar-rgħajja, fejn jitferra' mill-bott għal ġo putera, kontenitur li jintuża fil-produzzjoni tal-ġobon; waqt dan il-proċess, dan jerġa' jgħaddi minn filter li jkun fih it-tajjar. Fil-produzzjoni tal-ġobon jintuża kontenitur tal-injam (putera) jew kontenitur magħmul mill-istainless steel b'qiegħ doppju.

—	It-temperatura tal-ħalib titla' għal 30-32 °C billi wieħed iżid direttament miegħu ilma tax-xorb sħun (li jkun laħaq temperatura ta' 50 °C) jew jissaħħan permezz ta' ilma jaħraq f'kontenitur imlibbes jew putera, jew billi jiżdied ix-xorrox jagħli tal-ħalib qares tan-nagħaġ.

—

Wara li t-temperatura tkun telgħet għal 30-32 °C, jiżdied il-qtar tat-tames likwidu mikrobiku (imsejjes fuq Rhizomucor miehei, fungus stabbilit fil-klorur), filwaqt li jibqa' jitħawwad kontinwament, 40 ml ta' tames ma' kull 100 litru ta' ħalib (l-ammont ta' tames li jintefa' jiġi deċiż mill-produttur skont kemm ikun qawwi). L-ammont ta' tames użat jiddependi wkoll mill-perjodu tal-ħlib (jiġifieri l-kwalità tal-ħalib, li tinbidel waqt il-perjodu tal-ħlib). Il-ħalib jagħmel il-baqta madwar 30-45 minuta minn meta jkun żdied it-tames.

—	Il-baqtiet li jitrabbew jitħawdu u jinqatgħu b'xafra apposta f'forma ta' arpa sakemm jiġu biċċiet ta' bejn 0,5 u 1 cm.

—

L-ilma tax-xorb li jkun għala, jitkessaħ f'temperatura ta' 65 °C, jiżdied mal-baqtiet maqtugħin sabiex jissaħħnu għal temperatura ta' 32-35 °C, u b'hekk jiġi sseparat aħjar ix-xorrox mill-biċċiet tal-baqta. Il-baqtiet jitħawdu sew u jitħallew joqogħdu. Matul il-proċess kollu tal-ġobon f'forma ta' boċċa magħmul mill-ħalib tan-nagħaġ, it-temperatura tal-ħalib u tax-xorrox ma għandhiex tinżel iktar minn 29 °C.

—	Il-baqtiet li jkunu qagħdu jiġu kkumpressati bl-idejn wara madwar 10 minuti u jingħataw il-forma ta' boċċa permezz ta' garża.

—	Il-boċċa titħalla toqtor għal madwar sagħtejn, imdendla ma' grampun.

—	Wara li toqtor, il-ġobon jiġi trasferit ġo żona sħuna ta' ħżin, il-kamra tal-fermentazzjoni, fejn iseħħ il-proċess tal-fermentazzjoni. Il-ġobon iffurmat li jkun fil-garża jiddendel ma' grampun u wara jitpoġġa fuq xkaffa li tkun imfassla għal dan il-għan sabiex ix-xorrox ikun jista' joqtor.

—	It-temperatura tal-kamra waqt il-fermentazzjoni ma għandhiex tinżel iktar minn 18-22 °C. Il-ġobon jiffermenta f'jumejn jew l-iktar tlett ijiem f'dawn il-kundizzjonijiet. It-temperatura waqt il-fermentazzjoni tkun taħt osservazzjoni.

—	Meta l-proċess tal-produzzjoni jkun lest, il-ġobon jista' jinbiegħ. Meta jinbiegħ, il-ġobon jiġi ppakkjat u ttikkettat.

3.7.   Karattru speċifiku tal-prodott agrikolu jew tal-oġġett tal-ikel:

—	dan il-prodott ilu jsir għal bosta sekli,

—	il-fatturi speċifiċi tiegħu jispikkaw minħabba l-kwalità tal-ħalib prodott fir-reġjuni muntanjużi u ta' madwarhom (ir-rigħi tan-nagħaġ fil-mergħat, u l-għalf miksub mill-mergħat fiż-żoni tal-muntanji u f’dawk ta’ madwarhom),

—	għandu togħma u riħa tipika (sottili, ftit aċidika, togħma friska, tipika għall-prodotti magħmulin mill-ħalib tan-nagħaġ),

—	il-prodott għandu sura distinta, f'forma ta' boċċa,

—	jiġi prodott f'perjodu limitat, fir-rebbiegħa u fis-sajf,

—	magħmul bl-użu ta' metodu tradizzjonali fl-għerejjex tar-rgħajja (mhux b'mod industrijali),

—	isir bl-idejn, permezz tat-teknoloġija tradizzjonali, bi proċess manwali tal-baqtiet.

3.8.   Karattru tradizzjonali tal-prodott agrikolu jew tal-oġġett tal-ikel:

L-element tas-“salašnícky” imdaħħal fl-isem tal-ġobon ġej mill-post tradizzjonali fejn kienet issir il-produzzjoni, li kien għarix tar-rgħajja (salaš). Il-karattru tradizzjonali tiegħu joriġina mill-kompożizzjoni, il-metodu tal-produzzjoni u l-ipproċessar tradizzjonali tiegħu.

Kif stqarr P. Huba fil-ktieb Zázrivá, 'it-trobbija tan-nagħaġ fi skala żgħira ta' mergħat f'Zázrivá kienet iffukata fuq il-produzzjoni tal-ħalib tan-nagħaġ, li kien dejjem ipproċessat fl-għerejjex tar-rgħajja (salaš), fejn “ovčí hrudkový syr – salašnícky” kien jiġi offrut bħala speċjalità lil dawk li jżuru lir-rgħajja. (Martin: Osveta. 1988).

L-“ovčí hrudkový syr salašnícky” tradizzjonali kien prodott mill-ħalib frisk tan-nagħaġ billi jagħmel il-baqta bis-saħħa tal-qtar tat-tames frisk (kľag) f'putera f'temperatura medja (ta' 32°C) għal 10-30 minuti. Il-ħalib imbaqqat l-ewwel kien jitħawwad, imbagħad jitħalla joqgħod, u fl-aħħar il-baqtiet jitqiegħdu f'garża u jiġu ppressati f'boċċa kumpatta. Il-garża mimlija bil-baqta kienet tiddendel ma' bitta, fejn ix-xorrox jitħalla iqattar.

Wara li jkun qotor, il-ġobon f’forma ta’ boċċa kien jitneħħa mill-biċċa u jitqiegħed rasu ’l isfel fuq xkaffa tal-injam (“podišiar”), fejn kien jitħalla għal diversi jiem sabiex jinxef u jimmatura. Wara li jimmaturaw, il-boċċi tal-ġobon kienu jittieħdu mill-għerejjex tar-rgħajja għad-djar ta' dawk li kellhom in-nagħaġ (Podolák Ján: Slovenský národopis 25, 1977).

Fis-seklu 20, il-produzzjoni tal-“ovčí hrudkový syr salašnícky” u tal-“ovčí salašnícky údený syr” infirxet maż-żoni muntanjużi tas-Slovakkja fejn kienu jitrabbew in-nagħaġ.

L-“ovčí hrudkový syr – salašnícky” u l-“Ovčí salašnícky údený syr” huma wħud mill-prodotti magħmulin mill-ħalib tan-nagħaġ imrobbija b'mod tradizzjonali fil-Wallachia, u l-produzzjoni tagħhom kienet ir-raġuni prinċipali għala kienu jitrabbew in-nagħaġ fir-reġjuni muntanjużi tas-Slovakkja. Bħala speċjalità tal-ikel, dan il-prodott kien jintuża frisk (immerraq - ħelu) jew iffermentat jew imnixxef, jewinkella ppriżervat permezz tal-proċess tal-affumikar. (Podolák Ján: Slovenský národopis 25, 1977).

Prokop kiteb dan li ġej f'artiklu li kien jismu Z histórie Ovčieho mliekárstva na Slovensku: “Il-kultura tal-Wallachia għadha tinżamm ħajja f’dawn ir-reġjuni permezz tas-sengħa tat-tinqix li għandhom ir-rgħajja tagħna; l-influwenzi tagħha għadna nistgħu narawhom fil-bwieqi minquxin b’mod irfinut ħafna (‘črpáky’) li kienu jużaw ir-rgħajja.” (Slovenská spoločnosť pre racionálnu výživu, Bratislava, 1969). Il-forom ta’ qlub jew ta' papri jintużaw għall-“ovčí salašnícky údený syr”.

Dr Ján Balko, l-awtur tal-pubblikazzjoni Bryndziarsky priemysel na Slovensku, ippubblikata minn Osveta fl-1968, għamel l-osservazzjoni li ġejja: “Ma għandna l-ebda provi eżatti li juru min għamel l-ewwel ġobon f’forma ta’ boċċa mill-ħalib tan-nagħaġ hawnhekk, jew li juru meta sar dan. Madankollu, nistgħu nassumu b'mod sikur li dan sar bosta seklu ilu, minħabba li, sal-1914, il-mod kif in-nagħaġ li kienu jitrabbew biex jinħelbu ma kienx tant differenti mill-prattiki tat-trobbija li eżistew fiż-żmien meta n-nies kienu qed jemigraw.”

Fl-Ovčie mliekárstvo a syrárstvo po novom hemm miktub li: “… il-kwalità tal-bryndza prodotta tiddependi prinċiparjament mill-kwalità tal-‘ovčí hrudkový syr salašnícky’ ” (Edícia Povereníctva SNR pre pôdohospodárstvo, Bratislava, 1966).

L-isem u l-metodu tradizzjonali tal-produzzjoni tal-“ovčí hrudkový syr salašnícky” u tal-“ovčí salašnícky údený syr” kienu użati wkoll mir-rgħajja li jkunu ġejjin mill-muniċipalità ta' Priechod, li kienu jaħdmu fl-għerejjex tar-rgħajja fis-sittinijiet u fis-sebgħinijiet tas-seklu li għadda fir-reġjun ta' Turiec (osservazzjoni li saret bil-fomm minn Lamper, ragħaj, u minn Ivanič minn Priechod).

P. Jasenský, ragħaj minn Dolná Jaseň jiftakar li: “l-ġobon tat-tip ‘Ovčí hrudkový syr – salašnícky’ u tat-tip ‘ovčí salašnícky údený syr’ ilu jsir minn żmien żemżem, imma dejjem f’ammonti żgħar biss, u jgħid li kien jintuża għall-konsum dirett fl-għerejjex tar-rgħajja u li kien, u għadu, jinbiegħ lin-nies li jżuru l-għerejjex tar-rgħajja. Dawn huma speċjalitajiet tradizzjonali li jgawduhom in-nies Slovakki li joqogħdu fir-reġjuni tal-muntanji u fiż-żoni ta’ madwarhom”. (Prehlásenie pána Jasenského, 1999).

3.9.   Rekwiżiti u proċeduri minimi sabiex jiġi ċċekkjat il-karattru speċifiku:

Il-kontrolli jsiru abbażi ta' dan li ġej:

—	il-materja prima użata: ħalib frisk, mhux ippasturizzat li jiġi min-nagħaġ li jirgħu u min-nagħaġ li jingħalfu mill-mergħat fiż-żoni tal-muntanji u f’dawk ta’ madwarhom. Il-kontrolli jsiru b’mod viżwali waqt li jkunu qed jinħelbu n-nagħaġ u abbażi tar-reġistri dwar dan il-proċess,

—	il-produzzjoni fl-għerejjex tar-rgħajja u l-produzzjoni skont l-istaġun (minn April sa Settembru),

—

waqt il-proċess teknoloġiku, it-temperatura tal-ħalib qabel ma jitbaqqat, u l-ipproċessar tal-baqta bl-idejn; is-sura tal-ġobon għandha tiġi vverifikata b’mod viżwali wara li tkun ġiet iffurmata l-boċċa; it-temperatura tal-ambjent fiż-żona tal-ħżin, immonitorjata waqt il-fermentazzjoni. Il-kontrolli jitwettqu abbażi tar-reġistri tat-temperatura waqt il-fermentazzjoni,

—	l-indikaturi fiżiċi tal-prodott aħħari: is-sura u l-piż. Il-kontrolli jitwettqu b'mod viżwali u bl-użin,

—	l-indikaturi kimiċi tal-prodott aħħari: il-kontenut tal-materja niexfa, il-kontenut tax-xaħam fil-materja niexfa; il-valuri kimiċi għandhom jikkorrispondu ma' dawk speċifikati taħt il-punt 3.5 fl-ispeċifikazzjoni. Il-kontrolli jitwettqu permezz ta' analiżi li ssir fil-laboratorji,

—

il-proprjetajiet organolettiċi tal-prodott aħħari: id-dehra u l-kulur minn barra, id-dehra u l-kulur tas-sezzjoni trasversali, it-togħma u r-riħa, il-konsistenza. Il-proprjetajiet organolettiċi jiġu kkontrollati wara li l-proċess teknoloġiku tal-produzzjoni tal-ġobon ikun lest. Il-kontrolli jitwettqu permezz ta' analiżi sensorjali tal-prodott aħħari,

—	l-użu tal-għodod, li huwa suġġett għall-approvazzjoni tal-operat tal-għerejjex tar-rgħajja.

Il-kontrolli mwettqa mill-awtorità jew mill-entità li tivverifika l-konformità mal-ispeċifikazzjoni tal-prodott isiru darba fis-sena.

4.   Awtoritajiet jew entitajiet li jivverifikaw il-konformità mal-ispeċifikazzjoni tal-prodott:

4.1.   Isem u indirizz:

Isem:	Štátna veterinárna a potravinová správa SR
Indirizz:	Botanická 17 842 13 Bratislava SLOVENSKO/SLOVAKIA
Tel.	+421 260257427
Posta elettronika:	buchlerova@svssr.sk

Pubbliċi  Privati

4.2.   Kompiti speċifiċi tal-awtorità jew tal-entità:

L-entità ta’ spezzjoni msemmija hawn fuq hija responsabbli għall-monitoraġġ tal-ispeċifikazzjoni kollha.

---