This document is an excerpt from the EUR-Lex website
Document 52010PC0145
Proposal for a Regulation of the European Parliament and of the Council amending Council Regulation (EC) No 861/2006 of 22 May 2006 establishing Community financial measures for the implementation of the common fisheries policy and in the area of the Law of the Sea
Proposta għal regolament tal-Parlament Ewropew u tal-Kunsill li jemenda r-regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar
Proposta għal regolament tal-Parlament Ewropew u tal-Kunsill li jemenda r-regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar
/* KUMM/2010/0145 finali - COD 2010/0080 */
Proposta għal regolament tal-Parlament Ewropew u tal-Kunsill li jemenda r-regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar /* KUMM/2010/0145 finali - COD 2010/0080 */
[pic] | IL-KUMMISSJONI EWROPEA | Brussel 29.4.2010 KUMM(2010)145 finali 2010/0080 (COD) Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar MEMORANDUM TA’ SPJEGAZZJONI 1. L-emendi proposti għar-Regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar[1] huma maħsuba biex jiżguraw il-koerenza bejn ir-Regolament u elementi oħra tal-qafas leġiżlattiv rilevanti. F'ċerti każijiet, l-esperjenza wriet il-ħtieġa li jiġi żgurat li d-dispożizzjonijiet tar-Regolament ikunu adattati xi ftit biex jissodisfaw aħjar il-ħtiġijiet. Huwa propost ukoll li għandu jiġi ċċarat, fejn ikun meħtieġ, l-ambitu tal-miżuri ffinanzjati u sabiex jittejjeb il-mod li bih huma mfassla xi artikoli. Din ir-reviżjoni ma tinvolvi l-ebda tibdil fundamentali għar-Regolament tal-Kunsill (KE) Nru 861/2006: l-għanijiet, it-tip ta' miżuri ffinanzjati, l-arkitettura u l-pakkett finanzjarju mhumiex milquta. 2. Modifiki minħabba l-evoluzzjoni tal-qafas leġiżlattiv: L-Artikoli 2(b), 3(b), 5, 9, 10, 16, 17, 22 u l-intestatura tat-taqsima 2. L-ambitu tal-qafas il-ġdid għall-ġbir tad-dejta[2] huwa akbar mill-qafas ta' qabel[3]. Ma jkoprix biss il-ġbir tad-dejta mill-Istati Membri imma wkoll il-ġestjoni u l-użu tagħha. Filwaqt li l-kliem tat-test attwali tar-Regolament hija wiesgħa biżżejjed biex tkopri l-ġestjoni u l-użu tad-dejta, id-dispożizzjonijiet ta' hawn fuq ġew emendati sabiex jinkudu referenza ċara għal dan fl-interess taċ-ċertezza legali. L-Artikolu 12(c) ġie mfassal mill-ġdid biex jirrifletti l-fatt li fid-Deċiżjoni tal-Kunsill 2007/409/KE tal-11 ta' Ġunju 2007 li temenda d-Deċiżjoni 2004/585/KE li tistabbilixxi Kunsilli Konsultattivi Reġjonali taħt il-Politika Komuni dwar is-Sajd [tas-Sajd][4], il-Kunsilli Konsultattivi Reġjonali ngħataw l-istatus ta' korpi li jsegwu għan ta' interess ġenerali Ewropew. Jistgħu jingħataw appoġġ finanzjarju biex jiġu koperti l-ispejjeż operattivi tagħhom u r-restrizzjoni li llimitat l-appoġġ għall-fażi tagħhom tal-bidu tħassret. L-Artikolu 5 ġie emendat biex jirrifletti d-dispożizzjonijiet dwar il-qafas il-ġdid għall-ġbir tad-dejta, li fil-kuntest tiegħu, id-dejta li għandha tinġabar tkun tinkorpora wkoll varjabbli soċjoekonomiċi fis-settur tas-sajd, l-akkwakultura u l-ipproċessar, bħad-dħul, l-ispejjeż kapitali, l-impjiegi, eċċ. Dawn l-elementi huma previsti mid-Deċiżjoni tal-Kummissjoni 949/2008 tas-6 ta' Novembru 2008 li tadotta programm Komunitarju multiannwali skont ir-Regolament tal-Kunsill (KE) Nru 199/2008 dwar l-istabbiliment ta' qafas Komunitarju għall-ġbir, il-ġestjoni u l-użu ta' dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd[5], b'mod partikolari l-Appendiċijiet VI, X u XII. L-Artikolu 9 ġie riformulat u simplifikat sabiex id-deskrizzjoni tiġi allinjata ma' oqsma oħra ta' nfiq koperti mir-Regolament billi jiġu identifikati biss il-kategoriji ewlenin ta' miżuri. Il-miżuri eliġibbli huma definiti fid-dettall mir-Regolament tal-Kunsill (KE) Nru 199/2008 tal-25 ta’ Frar 2008 dwar l-istabbiliment ta’ qafas Komunitarju għall-ġbir, il-ġestjoni u l-użu ta’ dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd[6]. L-Artikoli 16 u 24 ġew emendati sabiex jitqiesu d-dispożizzjonijiet rilevanti tal-qafas il-ġdid għall-ġbir tad-dejta li jiddefinixxu fid-dettall il-proċeduri ta' pprogrammar fl-Artikoli 4, 5 u 6 tar-Regolament tal-Kunsill (KE) Nru 199/2008 u l-Artikoli 1, 2 u 4 tar-Regolament tal-Kummissjoni (KE) Nru 665/2008 tal-14 ta' Lulju 2008 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 199/2008[7]. L-Artikolu 23 tħassar għaliex skada żmienu peress li l-proċeduri ta' pprogrammar issa huma ddefiniti fil-qafas il-ġdid għall-ġbir tad-dejta. 3. Emenda limitata tal-ambitu ta' ċerti miżuri sabiex il-ħtiġijiet jiġu indirizzati b'mod aħjar: L-Artikolu 11 huwa emendat sabiex il-Kummissjoni tkun tista' tiffirma kuntratti ta' prokura mal-korpi internazzjonali inkarigati mill-valutazzjonijiet tal-istokkijiet. L-Artikoli 12(a) u 18(2) ġew adattati sabiex il-possibbiltà li jiġu ffinanzjati l-ispejjeż marbuta mat-tħejjija tal-laqgħat tal-Kumitat Konsultattiv dwar is-Sajd u l-Akkwakultura (ACFA) tiġi estiża għal organizzazzjonijet rappreżentattivi oħra fl-ACFA. Il-possibbiltà diġà teżisti għal Organizzazzjonijiet Kummerċjali Ewropej. Barra minn hekk, l-artikolu issa jagħti lok għall-appoġġ finanzjarju għat-traduzzjoni, l-interpretazzjoni u l-ispejjeż tal-kiri tal-kmamar marbuta ma' dawn il-laqgħat. L-Artikolu 20(1) ġie emendat biex id-data għat-tressiq tal-applikazzjonijiet għall-appoġġ Komunitarju tiġi avvanzata. Dan huwa maħsub biex jiġu mgħaġġla l-proċeduri u l-implimentazzjoni tal-programm. L-Artikolu 20(2) ġie emendat sabiex jagħti deskrizzjoni aktar dettaljata tal-informazzjoni li għandha tiġi pprovduta sabiex tiġi standardizzata d-dejta li tasal fir-rigward tal-proġetti u sabiex tissaħħaħ il-ġestjoni finanzjarja tajba. Jispeċifika wkoll l-informazzjoni meħtieġa għal proġetti konġunti mwettqa minn aktar minn Stat Membru wieħed. L-Artikolu 20(3)(b) emendat jesiġi li tiġi pprovduta informazzjoni dwar il-mekkaniżmi li jippermettu l-verifikar tal-użu ta' riżorsi kofinanzjati ta' kontroll. Artikolu 20(4) ġdid huwa maħsub biex itejjeb it-trażmissjoni tad-dejta dwar il-proġetti. 4. Kjarifika tal-ambitu tal-azzjonijiet li għandhom jittieħdu: L-Artikolu 32(a). Id-Deċiżjoni tal-Kunsill 2000/439/KE tad-29 ta' Ġunju 2000 dwar il-kontribuzzjoni finanzjarja tal-Komunità b’riżq l-ispiża minfuqa mill-Istati Membri għall-ġbir tad-dejta, u biex jiġu ffinanzjati studji u proġetti pilota biex tiġi esegwita l-politika komuni tas-sajd[8], ġiet revokata mir-Regolament tal-Kunsill 861/2006 b'effett mill-1 ta' Jannar 2007, peress li ħafna mid-dispożizzjonijiet stipulati f'dik id-deċiżjoni ġew inkorporati fir-regolament. Madankollu, ċerti elementi ma kinux koperti, b'mod partikolari r-rata aktar baxxa ta' kofinanzjament, ta' 35%, għal programmi estiżi (l-Artikolu 3, it-tieni (2) inċiż), regoli aktar dettaljati dwar it-tressiq ta' programmi u previżjonijiet finanzjarji, rapporti tekniċi u finanzjarji, modalitajiet tal-ħlas mill-Kummissjoni (l-Artikoli 4 u 6) u d-definizzjoni tal-ispejjeż eliġibbli taħt il-programmi nazzjonali (l-Anness għad-Deċiżjoni). Peress li ma ġewx adottati regoli tal-implimentazzjoni li jkopru dawn l-elementi, kien hemm nuqqas ta' regoli stabbiliti biex ikopru l-programmi nazzjonali fl-2007 u l-2008 minkejja li kemm l-Istati Membri kif ukoll il-Kummissjoni komplew jaħdmu abbażi tar-regoli preċedenti. Din is-sitwazzjoni kompliet sal-adozzjoni tal-qafas il-ġdid għall-ġbir tad-deja u fl-interess taċ-ċertezza legali, għandu jkun iċċarat li ċerti dispożizzjonijiet baqgħu japplikaw għall-programmi nazzjonali tal-2007 u l-2008. L-Artikolu 7(c) ġie ċċarat biex jindika li s-sħubijiet fl-arena internazzjonali jistgħu jkunu fuq livell bilaterali, reġjonali jew multilaterali. L-Artikolu 8(a)(i) u (iii) tfassal mill-ġdid sabiex jipprovdi ċ-ċarezza u ċ-ċertezza fuq in-nefqa eliġibbli. Barra minn hekk, l-azzjonijiet previsti mir-Regolament tal-Kunsill (KE) Nru 1224/2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd[9] jissemmew b'mod espliċitu, jiġifieri sistemi ta' individwazzjoni tal-bastimenti, sistemi awtomatiċi ta' identifikazzjoni, skambju u analiżi tad-dejta bejn l-Istati Membri, l-istabbiliment ta' websajts marbuta mal-kontroll tas-sajd. Fl-Artikolu 8(a)(ii) il-kliem "ħaddiema taċ-ċivil" inbidel b'"persunal" minħabba l-possibbiltà li l-parteċipanti fit-taħriġ, minkejja li jirrappreżentaw l-awtorità ta' Stat Membru, mhux bilfors huma ħaddiema taċ-ċivil". Fl-Artikolu 8(a)(v) il-kliem "sajd irresponsabbli u illegali" jinbidel bil-formulazzjoni "sajd illegali, mhux rappurtat u mhux regolat", li hija dik użata b'mod partikolari fir-Regolament tal-Kunsill (KE) Nru 1005/2008. L-Artikolu 8(b) ġie emendat biex jirrifletti aħjar il-kompiti mwettqa miċ-Ċentru Konġunt tar-Riċerka, li mhux biss janalizza l-implimentazzjoni tal-attivitajiet ta' kontroll, iżda għandu wkoll rwol konsultattiv u huwa involut fl-iżvilupp ta' teknoloġiji ġodda. L-Artikolu (8)(d) ġie emendat biex titħassar kategorija superfluwa ta' nfiq għall-Aġenzija Komunitarja għall-Kontroll tas-Sajd L-Artikolu 12(b). Ġiet emendata l-lista ta' korpi konsultattivi għal-laqgħat li għalihom is-sessjonijiet tal-ACFA jaħtru rappreżentant. L-Artikolu 13(e) ġie emendat biex jirrifletti l-firxa ta' kooperazzjoni li jista' jkun meħtieġ li l-Kummissjoni tistabbilixxi ma' organizzazzjonijiet internazzjonali. 5. Barra minn hekk, saru emendi biex jittejjeb u jiġi ċċarat il-kliem tat-test tar-Regolament fil-premessa (12) u l-Artikoli 2(b), 3(b), 5, 10, 13(e), 18(3), 20(1), 24. 6. L-emendi mdaħħla b'din il-proposta għal emenda ma jġibu magħhom l-ebda konsegwenza finanzjarja għall-baġit tal-UE. Se jippermettu biss eżekuzzjoni aħjar tal-ammonti tal-baġit kif ikkwantifikati fid-Dikjarazzjoni Finanzjarja mehmuża mar-Regolament tal-Kunsill (KE) Nru 861/2006. 2010/0080 (COD) Proposta għal REGOLAMENT TAL-PARLAMENT EWROPEW U TAL-KUNSILL li jemenda r-Regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar IL-PARLAMENT EWROPEW U L-KUNSILL TAL-UNJONI EWROPEA, Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 43 tiegħu, Wara li kkunsidraw l-proposta mill-Kummissjoni , Wara li kkunsidraw l-opinjoni tal-Kumitat Ekonomiku u Soċjali Ewropew, Wara t-trażmissjoni tal-proposta lill-Parlamenti nazzjonali, Filwaqt li jaġixxu skont il-proċedura leġiżlattiva ordinarja, Billi: (1) Ir-Regolament tal-Kunsill (KE) Nru 861/2006 tat-22 ta’ Mejju 2006 li jistabbilixxi miżuri finanzjarji Komunitarji għall-implimentazzjoni tal-Politika Komuni tas-Sajd u fil-qasam tal-Liġi tal-Baħar[10], jipprovdi għall-finanzjament fl-oqsma li ġejjin: relazzjonijiet internazzjonali, governanza, ġbir tad-dejta u pariri xjentifiċi u kontroll u infurzar tal-Politika Komuni tas-Sajd. (2) F'kull qasam tal-azzjoni, ir-Regolament tal-Kunsill (KE) Nru 861/2006 huwa kkompletat minn regolamenti jew deċiżjonijiet oħra. Mill-adozzjoni tar-Regolament 861/2006 'l hawn, evolvew diversi elementi tal-leġiżlazzjoni relatata, li għandhom jiġu emendati sabiex tiġi żgurata l-koerenza bejn l-elementi kollha tal-qafas leġiżlattiv. (3) L-esperjenza wriet il-ħtieġa li jiġi emendat ir-Regolament ħalli jiġu adattati xi ftit ċerti dispożizzjonijiet biex jissodisfaw aktar il-ħtiġijiet. (4) Huwa propost ukoll li għandu jiġi ċċarat, fejn ikun meħtieġ, l-ambitu tal-miżuri ffinanzjati u sabiex jittejjeb il-mod li bih huma mfassla xi artikoli. (5) Is-sħubijiet fl-arena internazzjonali jistgħu jkunu fuq livell bilaterali, reġjonali jew multilaterali. (6) Il-Kunsilli Konsultattivi Reġjonali ngħataw l-istatus ta' korpi li jsegwu għan ta' interess ġenerali Ewropew fid-Deċiżjoni tal-Kunsill 409/2007/KE tal-11 ta’ Ġunju 2007 li temenda d-Deċiżjoni 2004/585/KE li tistabbilixxi l-Kunsilli Konsultattivi Reġjonali taħt il-Politika Komuni dwar is-Sajd[11] u dan għandu jirriflettih ir-Regolament. (7) Għal-laqgħat ta' tħejjija tal-Kumitat Konsultattiv dwar is-Sajd u l-Akkwakultura (ACFA), għandu jkun hemm il-possibbiltà ta' appoġġ finanzjarju lir-rappreżentanti minbarra dawk tal-Organizzazzjonijiet Ewropej tal-Kummerċ u wkoll għall-ispejjeż għall-finanzjament tat-traduzzjoni, interpretazzjoni u kiri ta' kmamar. Għandha tiġi emendata l-lista ta' korpi konsultattivi għal-laqgħat li għalihom is-sessjonijiet tal-ACFA jaħtru rappreżentant. (8) Ir-Regolament tal-Kunsill (KE) Nru 199/2008 tal-25 ta’ Frar 2008 dwar l-istabbiliment ta’ qafas Komunitarju għall-ġbir, il-ġestjoni u l-użu ta’ dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd[12], wessa' l-ambitu tal-ġbir tad-dejta sabiex jiġu koperti l-ġbir, il-ġestjoni u l-użu tad-dejta u dan għandu jkun rikonoxxut b'mod espliċitu fir-Regolament. (9) Id-Deċiżjoni tal-Kummissjoni 949/2008/KE tas-6 ta' Novembru 2008 li tadotta programm Komunitarju multiannwali skont ir-Regolament tal-Kunsill (KE) Nru 199/2008 dwar l-istabbiliment ta' qafas Komunitarju għall-ġbir, il-ġestjoni u l-użu ta' dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd[13] tipprovdi li d-dejta li għandha tinġabar tinkorpora varjabbli soċjoekonomiċi. (10) Miżuri eliġibbli għall-appoġġ finanzjarju mill-Komunità fil-qasam tal-ġbir tad-dejta u l-parir xjentifiku huma definiti fir-Regolament (KE) Nru 199/2008, u r-Regolament (KE) Nru 861/2006 għandu jkun allinjat ma' dawk id-definizzjonijiet. (11) Il-miżuri ta' pprogrammar fil-qasam tal-ġbir tad-dejta u l-parir xjentifiku huma stipulati fir-Regolament (KE) Nru 199/2008 u r-Regolament ta' implimentazzjoni tal-Kummissjoni (KE) Nru 665/2008 tal-14 ta’ Lulju 2008 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 199/2008[14]. (12) Għadd ta' dispożizzjonijiet tad-Deċiżjoni tal-Kunsill 2000/439/KE tad-29 ta' Ġunju 2000 dwar il-kontribuzzjoni finanzjarja tal-Komunità b'riżq l-ispiża minfuqa mill-Istati Membri għall-ġbir tad-dejta, u biex jiġu ffinanzjati studji u proġetti pilota biex tiġi esegwita l-politka komuni tas-sajd[15], ma ddaħħlux fir-Regolament (KE) 861/2006 u lanqas ma nqalbu f'regoli ta' implimentazzjoni. Dan ħoloq lakuna għas-snin 2007 u 2008 li fihom il-Kummissjoni kellha tapplika r-regoli li kienu fis-seħħ qabel, kif stipulati fid-Deċiżjoni 2000/439/KE. Fl-interess taċ-ċertezza legali għandu jiġi pprovdut retroattivament li dawk ir-regoli baqgħu applikabbli f'dak il-perjodu. (13) Huwa meħtieġ li l-Kummissjoni titħalla tiffirma kuntratti ta' prokura mal-korpi internazzjonali inkarigati mill-valutazzjonijiet tal-istokkijiet. (14) L-indikazzjonijiet dwar in-nefqa eliġibbli fil-qasam tal-kontroll għandhom jiġu ppreżentati b'mod aktar ċar u dettaljat u għandha ssir rabta mar-Regolament tal-Kunsill (KE) Nru 1224/2009 tal-20 ta' Novembru 2009 li jistabbilixxi sistema Komunitarja ta’ kontroll għall-iżgurar tal-konformità mar-regoli tal-Politika Komuni tas-Sajd[16], u r-Regolament tal-Kunsill (KE) Nru 1005/2008 tad-29 ta' Settembru 2008 li jistabbilixxi sistema Komunitarja sabiex tipprevjeni, tiskoraġġixxi u telimina sajd illegali, mhux irrappurtat u mhux irregolat[17]. (15) Il-parteċipanti tat-taħriġ fil-qasam tal-kontroll u tal-infurzar, minkejja li jirrappreżentaw awtorità ta' Stat Membru, mhux bilfors dejjem ikunu impjegati taċ-ċivil. Għaldaqstant, l-infiq imġarrab għat-taħriġ ta' persunal ieħor ukoll għandu jkun eliġibbli għall-miżuri finanzjarji. (16) Iċ-Ċentru Konġunt tar-Riċerka mhux biss janalizza l-implimentazzjoni tal-attivitajiet ta' kontroll, iżda jaqdi wkoll rwol ta' konsulenza u huwa involut fl-iżvilupp ta' teknoloġiji ġodda. (17) Ir-regoli tal-ipprogrammar għall-infiq ta' kontroll jeħtieġ li jiġu adattati sabiex tittejjeb il-ġestjoni finanzjarja tajba, partikolarment billi tinġieb 'il quddiem id-data għat-tressiq tal-applikazzjonijiet għall-appoġġ Komunitarju, u billi tiġi speċifikata wkoll l-informazzjoni li għandha tiġi kkomunikata fir-rigward tal-proġetti u l-format li bih għandha tiġi pprovduta. (18) Ir-Regolament (KE) Nru 861/2006 għandu għalhekk jiġi emendat skont dan. ADOTTAW DAN IR-REGOLAMENT: Artikolu 1 Ir-Regolament (KE) Nru 861/2006 huwa emendat kif ġej: (1) Fl-Artikolu 2, il-punt (b) għandu jinbidel b’dan li ġej: "(b) miżuri ta' konservazzjoni, ġbir u ġestjoni tad-dejta u l-użu tad-dejta sabiex jiġi ġġenerat il-parir xjentifiku għall-PKS;" (2) Fl-Artikolu 3, il-punt (b) għandu jinbidel b’dan li ġej: "(b) titjib tal-ġbir, il-ġestjoni u l-użu tad-dejta meħtieġa għall-PKS;" (3) L-Artikolu 5 jinbidel b’dan li ġej: "Artikolu 5 Għanijiet speċifiċi fil-qasam tal-ġbir, ġestjoni u użu tad-dejta u l-parir xjentifiku Il-miżuri ta' finanzjament Komunitarju msemmija fl-Artikoli 9, 10 u 11 għandhom jikkontribwixxu għall-għan li jittejbu l-ġbir, il-ġestjoni u l-użu tad-dejta u l-parir xjentifiku dwar il-qagħda tar-riżorsi, l-impatt tas-sajd fuq ir-riżorsi u l-ekosistema tal-baħar u fuq il-prestazzjoni tal-industrija tas-sajd, fi ħdan u lil hinn mill-ilmijiet tal-Komunità, billi jkun ipprovdut appoġġ finanzjarju lill-Istati Membri ħalli jistabbilixxu settijiet ta' dejta aggregati multiannwali li jkunu bbażati fuq ix-xjenza u li jkunu jinkorporaw tagħrif bijoloġiku, tekniku, ambjentali u soċjoekonomiku." (4) L-Artikolu 7(1)(c) jinbidel b’dan li ġej: "(c) l-iżvilupp, permezz tas-sħubija fuq livell bilaterali, reġjonali jew multilaterali, il-ġestjoni tar-riżorsi tas-sajd u tal-kapaċitajiet ta’ kontroll ta’ pajjiżi terzi sabiex jiġi żgurat sajd sostenibbli u jiġi mħeġġeġ l-iżvilupp ekonomiku tas-settur tas-sajd f’dawk il-pajjiżi billi tittejjeb l-evalwazzjoni xjentifika u teknika tas-sajd ikkonċernat, il-monitoraġġ u l-kontroll tal-attivitajiet tas-sajd, il-kundizzjonijiet tas-saħħa u l-ambjent kummerċjali fis-settur;" (5) l-Artikolu 8 huwa emendat kif ġej: (a) il-punt (a)(i) jinbidel b'dan li ġej: "(i) investimenti, marbuta ma' attivitajiet ta' kontroll imwettqa minn korpi amministrattivi jew mis-settur privat, fi: - ix-xiri u l-installazzjoni ta' teknoloġija, inkluż il-ħardwer u s-softwer, sistemi ta' individwazzjoni tal-bastimenti (VDS) u netwerks tal-IT li jippermettu l-ġbir, l-amministrazzjoni, il-validazzjoni, l-iżvilupp ta' metodi ta' kampjunar u l-iskambju ta' dejta marbuta mas-sajd; - ix-xiri u l-installazzjoni tal-komponenti meħtieġa sabiex jiġi żgurat li t-trażmissjoni tad-dejta mill-atturi involuti fis-sajd u fil-kummerċjalizzazzjoni tal-prodotti tas-sajd lill-awtoritajiet rilevanti tal-Istati Membri u tal-Komunità, fosthom il-komponenti meħtieġa għas-sistemi elettroniċi ta' reġistrar u ta' rappurtar (ERS), sistemi ta' monitoraġġ tal-bastimenti (VMS) u sistemi ta' identifikazzjoni awtomatika (AIS); - implimentazzjoni ta' programmi mmirati lejn l-iskambju u l-analiżi tad-dejta bejn l-Istati Membri; - ix-xiri u l-immodernizzar tal-mezzi ta' kontroll; (b) il-punt (a)(ii) jinbidel b'dan li ġej: "(ii) programmi ta' taħriġ u ta' skambju, anke bejn l-Istati Membri, ta' persunal responsabbli għall-monitoraġġ, kontroll u sorveljanza tal-attivitajiet tas-sajd;" (c) il-punt (a)(iii) jinbidel b'dan li ġej: "(iii) implimentazzjoni ta' proġetti pilota marbuta mal-kontroll tas-sajd, inkluż l-iżvilupp ta' websajts marbuta mal-kontroll;" (d) il-punt (a)(v) jinbidel b'dan li ġej: "(v) inizjattivi, li jinkludu seminars u għodod tal-midja, immirati lejn it-trawwim ta' kuxjenza, kemm fost is-sajjieda u atturi oħrajn bħal spetturi, prosekuturi pubbliċi u mħallfin, kif ukoll fost il-pubbliku ġenerali dwar il-ħtieġa li jiġi miġġieled is-sajd illegali, mhux rappurtat u mhux regolat u dwar l-implimentazzjoni tar-regoli tal-PKS;" (e) il-punt (b) jinbidel b’dan li ġej: "(b) in-nefqa marbuta mal-arranġamenti amministrattivi maċ-Ċentru Konġunt għar-Riċerka, jew kwalunkwe korp konsultattiv Komunitarju ieħor, biex jiġu vvalutati u żviluppati teknoloġiji ġodda;" (f) il-punt (d) jinbidel b'dan li ġej: "(d) il-kontribut għall-baġit tal-Aġenzija Komunitarja għall-Kontroll tas-Sajd (CFCA) biex tkun koperta n-nefqa għall-persunal, għall-amministrazzjoni u n-nefqa operattiva marbuta mal-pjan ta’ ħidma annwali tas-CFCA." (6) L-Artikolu 9 jinbidel b’dan li ġej: "Artikolu 9 Miżuri fil-qasam tal-ġbir, ġestjoni u użu ta’ dejta bażika Fil-qasam tal-ġbir, ġestjoni u użu tad-dejta, in-nefqa li ġejja għandha tkun eliġibbli għall-appoġġ finanzjarju Komunitarju fil-qafas ta' programmi nazzjonali multiannwali: (a) in-nefqa mġarrba għall-ġbir ta' dejta bijoloġika, teknika, ambjentali u soċjoekonomika fir-rigward tas-sajd kummerċjali u rikreattiv, inkluż it-teħid ta' kampjuni, monitoraġġ fil-baħar u stħarriġiet ta' riċerka, u l-ġbir ta' dejta soċjoekonomika fl-industrija tal-akkwakultura u l-ipproċessar, kif stipulati fil-programm Komunitarju multiannwali; (b) in-nefqa mġarrba għal miżuri marbuta mal-ġestjoni, l-iżvilupp, it-titjib u l-isfruttar tad-dejta msemmija fil-punt (a); (c) in-nefqa mġarrba għal miżuri marbuta mal-użu tad-dejta msemmija fil-punt (a), bħalma huma stimi tal-parametri bijoloġiċi, il-produzzjoni ta' ġabriet ta' dejta għall-analiżi u l-parir xjentifiku; (d) in-nefqa mġarrba għall-parteċipazzjoni fil-Laqgħat Reġjonali ta' Koordinazzjoni, laqgħat xjentifiċi rilevanti ta' organizzazzjonijiet reġjonali tal-ġestjoni tas-sajd li l-Komunità hija parti kontraenti tagħhom jew inkella osservatriċi u għal korpi internazzjonali inkarigati mill-forniment ta' pariri xjentifiċi." (7) l-Artikolu 10 huwa emendat kif ġej: (a) l-intestatura għandha tinbidel b'dan li ġej: "Miżuri fil-qasam tal-ġbir, ġestjoni u użu ta’ dejta addizzjonali" (b) it-tieni sentenza fl-introduzzjoni tal-paragrafu 1 tinbidel b'dan li ġej: "L-attivitajiet li jistgħu jkunu eliġibbli għal miżuri ta' appoġġ finanzjarju Komunitarju għandhom jinkludu: (c) il-paragrafu 1 (a) jinbidel b'dan li ġej: "(a) studji u proġetti metodoloġiċi mmirati lejn l-aqwa titjib possibbli u l-istandardizzazzjoni tal-metodi tal-ġbir tad-dejta meħtieġa għall-parir xjentifiku;" (8) Fl-Artikolu 11, il-punt (a) għandu jinbidel b'dan li ġej: "(a) in-nefqa għall-kuntratti ta' sħubija ma' istituzzjonijiet nazzjonali tar-riċerka jew korpi internazzjonali inkarigati mill-valutazzjonijiet tal-istokkijiet għall-forniment ta' pariri u dejta xjentifiċi;" (9) l-Artikolu 12 huwa emendat kif ġej: (a) il-punt (a) jinbidel b'dan li ġej: "(a) spejjeż tal-ivvjaġġar u tal-akkomodazzjoni ta' membri ta' organizzazzjonijiet rappreżentattivi fl-ACFA marbuta ma' laqgħat ta' tħejjija qabel il-laqgħat tal-ACFA, kif ukoll spejjeż marbuta mat-traduzzjoni, interpretazzjoni u għall-kiri tal-kmamar imġarrba għal dawk il-laqgħat ta' tħejjija;" (b) il-punt (b) jinbidel b’dan li ġej: "(b) l-ispejjeż għall-parteċipazzjoni tar-rappreżentanti maħtura mill-ACFA biex jirrappreżentawha f'laqgħat tal-Kunsilli Konsultattivi Reġjonali (RAC), il-Kunsill Internazzjonali għall-Esplorazzjoni tal-Baħar (ICES) u l-Kumitat Xjentifiku, Tekniku u Ekonomik għas-Sajd (STECF);" (c) il-punt (c) jinbidel b'dan li ġej: "(c) l-ispejjeż operattivi tal-RACs kif previst fid-Deċiżjoni tal-Kunsill 2004/585/KE;" (10) Fl-Artikolu 13(1), il-punt (e) jinbidel b'dan li ġej: "(e) kontribuzzjonijiet finanzjarji volontarji biex isir xogħol fuq programmi mwettqa minn organizzazzjonijiet internazzjonali li huma ta' interess speċjali għall-Komunità;" (11) l-Artikolu 16 huwa emendat kif ġej: (a) l-intestatura għandha tinbidel b'dan li ġej: "Rati ta' kofinanzjament fil-qasam tal-ġbir, ġestjoni u użu ta’ dejta bażika" (b) il-kliem "Artikolu 23 (1)" jinbidlu bil-kliem "Artikolu 4 tar-Regolament (KE) Nru 199/2008". (12) L-intestatura tal-Artikolu 17 għandha tinbidel b’dan li ġej: "Rati ta' kofinanzjament fil-qasam tal-ġbir, ġestjoni u użu ta’ dejta addizzjonali" (13) l-Artikolu 18 huwa emendat kif ġej: (a) il-paragrafu 2 jinbidel b’dan li ġej: "2. Id-drittijiet ta' preljev jiġu allokati, skont ftehim ta' finanzjament mal-Kummissjoni, għal kull organizzazzjoni rappreżentattiva li hija membru plenarju tal-ACFA, proporzjonalment għall-intitolamenti fi ħdan il-kumitat plenarju tal-ACFA, u jiddependu mir-riżorsi finanzjarji disponibbli. (b) Il-paragrafu 3 jinbidel b’dan li ġej: "3. Dawk id-drittijiet ta' preljev u l-ispiża medja ta' vjaġġ minn membru ta' organizzazzjoni rappreżentattiva għandhom jiddeterminaw l-għadd ta' vjaġġi li kull organizzazzjoni tkun finanzjarjament responsabbli għalihom għall-finijiet ta' tħejjija għal-laqgħat. Mil-limitu kumplessiv tad-dritt ta' preljev, 20% tal-ispiża attwali eliġibbli għandha tinżamm bħala somma globali minn kull organizzazzjoni rappreżentattiva biex tkopri l-ispejjeż organizzattivi u amministrattivi marbuta strettament mal-organizzazzjoni tal-laqgħat ta' tħejjija." (14) l-Artikolu 20 huwa emendat kif ġej: (a) fil-paragrafu 1, l-ewwel subparagrafu jinbidel b'dan li ġej: "L-applikazzjonijiet mill-Istati Membri għal miżuri ta' finanzjament Komunitarju għandhom jitressqu quddiem il-Kummissjoni sal-31 ta' Ottubru ta' kull sena ta' implimentazzjoni kkonċernata." (b) Il-paragrafu 2 jinbidel b’dan li ġej: "2. Għal kull proġett, il-programm ta' kontroll tas-sajd għandu jispeċifika għal liema miżura msemmija fl-Artikolu 8(a) huwa relatat, l-għan u deskrizzjoni dettaljata bil-punti li ġejjin: is-sid, il-post, l-ispiża stmata, skeda għall-ikkompletar tal-proġett u l-proċedura ta' akkwist pubbliku li għandha tiġi segwita. Meta proġett jitwettaq b'mod konġunt minn aktar minn Stat Membru wieħed, il-programm ta' kontroll tas-sajd għandu jinkludi wkoll lista tal-Istati Membri li jwettqu l-proġett, l-ispejjeż totali stmati għall-proġett kif ukoll l-ispejjeż stmati għal kull Stat Membru." (c) fil-paragrafu 3, il-punt (b) jinbidel b’dan li ġej: "(b) kemm-il siegħa jew kemm-il jum fis-sena x'aktarx jintużaw għal finijiet ta' kontroll tas-sajd u liema sistema ġiet stabbilita fl-Istat Membru sabiex ikun possibbli għall-Kumissjoni jew għall-Qorti Ewropea tal-Awdituri biex jivverifikaw l-użu effettiv għall-finijiet ta' kontroll;" (d) għandu jiżdied il-paragrafu 4 li ġej: "4. L-Istati Membri għandhom jipprovdu l-informazzjoni mitluba fil-paragrafi 1, 2 u 3 billi jressqu l-formola elettronika kkomunikata lilhom mill-Kummissjoni, kemm elettronikament kif ukoll fil-forma stampata." (15) L-intestatura tat-Taqsima 2 għandha tinbidel b’dan li ġej: "Proċeduri fil-qasam tal-ġbir, ġestjoni u użu ta’ dejta" (16) L-Artikolu 22 jinbidel b’dan li ġej: "Artikolu 22 Dispożizzjoni introduttorja Il-kontribut finanzjarju Komunitarju għan-nefqa mġarrba mill-Istati Membri għall-ġbir, il-ġestjoni u l-użu tad-dejta bażika dwar is-sajd imsemmija fl-Artikolu 9 għandu jiġi provdut skont il-proċeduri stabbiliti f’din it-Taqsima." (17) L-Artikolu 23 għandu jitħassar. (18) l-Artikolu 24 huwa emendat kif ġej: (a) l-intestatura għandha tinbidel b'dan li ġej: "Deċiżjoni ta' finanzjament tal-Kummissjoni" (b) Il-paragrafu 1 jinbidel b’dan li ġej: "1. Abbażi tal-programmi multiannwali mressqa mill-Istati Membri f'konformità mal-Artikolu 4(4) tar-Regolament (KE) Nru 199/2008 u approvati mill-Kummissjoni f'konformità mal-Artikolu 6(3) ta' dak ir-Regolament, kull sena għandhom jittieħdu d-deċiżjonijiet dwar il-kontribut finanzjarju tal-Komunità għall-programmi nazzjonali, f'konformità mal-proċedura msemmija fl-Artikolu 30(2)." (c) il-paragrafu 2 jitħassar. (19) L-Artikolu 32a li ġej għandu jiddaħħal: "Artikolu 32a Miżuri tranżizzjonali Minkejja l-Artikolu 32 ta' dan ir-Regolament, it-tieni inċiż tal-Artikolu 3 u tal-Artikoli 4 u 6 tad-Deċiżjoni 2000/439/KE, kif ukoll l-Anness għal dik id-Deċiżjoni, għandhom jibqgħu japplikaw għall-programmi nazzjonali tal-2007 u l-2008 fil-qasam tal-ġbir u l-ġestjoni tad-dejta." Artikolu 2 Dan ir-Regolament għandu jidħol fis-seħħ l-għada tal-pubblikazzjoni tiegħu f' Il-Ġurnal Uffiċjali tal-Unjoni Ewropea . [L-Artikolu 1(19) għandu japplika mill-1 ta’ Jannar 2007.] Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussell, Għall-Parlament Ewropew Għall-Kunsill Il-President Il-President [pic][pic][pic] [1] ĠU L 160, 14.6.2006, p. 1 [2] Il-qafas il-ġdid għall-ġbir tad-dejta magħmul minn diversi atti leġiżlattivi adottati matul l-2008: - Ir-Regolament tal-Kummissjoni (KE) Nru 1078/2008 tat-3 ta’ Novembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 861/2006 rigward in-nefqa mġarrba mill-Istati Membri għall-ġbir u l-ġestjoni tad-dejta bażika dwar is-sajd. ĠU L 295, 4.11.2008, p. 24 - Ir-Regolament tal-Kunsill (KE) Nru 199/2008 tal-25 ta’ Frar 2008 dwar l-istabbiliment ta’ qafas Komunitarju għall-ġbir, il-ġestjoni u l-użu ta’ dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd. ĠU L 60, 5.3.2008, p. 1 - Ir-Regolament tal-Kummissjoni (KE) Nru 665/2008 tal-14 ta’ Lulju 2008 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 199/2008 dwar l-istabbiliment ta’ qafas Komunitarju għall-ġbir, il-ġestjoni u l-użu ta’ dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd. ĠU L 186, 15.7.2008, p. 3 - Id-Deċiżjoni tal-Kummissjoni 2008/949/KE tas-6 ta' Novembru 2008 li tadotta programm Komunitarju multiannwali skont ir-Regolament tal-Kunsill (KE) Nru 199/2008 dwar l-istabbiliment ta' qafas Komunitarju għall-ġbir, il-ġestjoni u l-użu ta' dejta fis-settur tas-sajd u appoġġ għall-parir xjentifiku fir-rigward tal-Politika Komuni tas-Sajd. ĠU L 346, 23.12.2008, p. 37 [3] Il-qafas preċedenti għall-ġbir tad-dejta kien magħmul minn: - Ir-Regolament tal-Kunsill (KE) Nru 1543/2000 tad-29 ta' Ġunju 2000 li jistabbilixxi struttura Komunitarja għall-ġbir u l-ġestjoni tad-dejta meħtieġa għat-twettiq tal-politika komuni tas-sajd. ĠU L 176, 15.7.2000, p. 1 - Ir-Regolament tal-Kummissjoni (KE) Nru 1639/2001 tal-25 ta' Lulju 2001 li jistabbilixxi l-programmi minimi u estiżi tal-Komunità għall-ġbir tad-dejta fis-settur tas-sajd u li jniżżel regoli dettaljati għall-applikazzjoni tar-Regolament tal-Kunsill (KE) Nru 1543/2000. ĠU L 222, 17.8.2001, p. 53 [4] ĠU L 155, 15.6.2007, p. 68 [5] ĠU L 346, 23.12.2008, p. 37 [6] ĠU L 60, 5.3.2008, p. 1 [7] ĠU L 186, 15.7.2008, p. 3 [8] ĠU L 176, 15.7.2000, p. 42 [9] ĠU L 343, 22.12.2009, p. 1 [10] ĠU L 160, 14.6.2006, p. 1 [11] ĠU L 155, 15.6.2007, p. 68 [12] ĠU L 60, 5.3.2008, p. 1 [13] ĠU L 346, 23.12.2008, p. 37 [14] ĠU L 186, 15.7.2008, p. 3 [15] ĠU L 176, 15.7.2000, p. 42 [16] ĠU L 343, 22.12.2009, p. 1 [17] ĠU L 286, 29.10.2008, p. 1