This document is an excerpt from the EUR-Lex website
Document 52010IP0439
10th anniversary of UN Security Council resolution 1325 on women and peace and security European Parliament resolution of 25 November 2010 on the 10th anniversary of UN Security Council Resolution 1325 (2000) on Women, Peace and Security
L-10 anniversarju tar-Riżoluzzjoni 1325 tal-Kunsill tas-Sigurtà tan-NU dwar in-nisa, l-paċi u s-sigurtà Riżoluzzjoni tal-Parlament Ewropew tal- 25 ta’ Novembru 2010 dwar l-10 Anniversarju tar-Riżoluzzjoni 1325 (2000) tal-Kunsill tas-Sigurtà tan-NU dwar in-Nisa, il-Paċi u s-Sigurtà
L-10 anniversarju tar-Riżoluzzjoni 1325 tal-Kunsill tas-Sigurtà tan-NU dwar in-nisa, l-paċi u s-sigurtà Riżoluzzjoni tal-Parlament Ewropew tal- 25 ta’ Novembru 2010 dwar l-10 Anniversarju tar-Riżoluzzjoni 1325 (2000) tal-Kunsill tas-Sigurtà tan-NU dwar in-Nisa, il-Paċi u s-Sigurtà
ĠU C 99E, 3.4.2012, p. 56–59
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
3.4.2012 |
MT |
Il-Ġurnal Uffiċjali tal-Unjoni Ewropea |
CE 99/56 |
Il-Ħamis 25 ta’ Novembru 2010
L-10 anniversarju tar-Riżoluzzjoni 1325 tal-Kunsill tas-Sigurtà tan-NU dwar in-nisa, l-paċi u s-sigurtà
P7_TA(2010)0439
Riżoluzzjoni tal-Parlament Ewropew tal-25 ta’ Novembru 2010 dwar l-10 Anniversarju tar-Riżoluzzjoni 1325 (2000) tal-Kunsill tas-Sigurtà tan-NU dwar in-Nisa, il-Paċi u s-Sigurtà
2012/C 99 E/12
Il-Parlament Ewropew,
— |
wara li kkunsidra r-Riżoluzzjonijiet 1325 (2000) u 1820 (2008) tal-Kunsill tas-Sigurtà tan-NU dwar in-nisa, il-paċi u s-sigurtà u r-Riżoluzzjoni 1888 (2009) tal-Kunsill tas-Sigurtà tan-NU dwar il-vjolenza sesswali fuq in-nisa u t-tfal f'sitwazzjonijiet ta’ kunflitti armati, li tenfasizza r-responsabbiltà tal-istati kollha biex itemmu l-impunità u biex jipprosegwixxu kontra dawk responsabbli għal delitti kontra l-umanità u delitti tal-gwerra, fosthom dawk marbuta ma’ vjolenza sesswali u vjolenza oħra fuq in-nisa u l-bniet, |
— |
wara li kkunsidra r-Riżoluzzjoni 54/134 tal-Assemblea Ġenerali tan-NU tas-7 ta’ Frar 2000, li stabbiliet il-25 ta’ Novembru bħala l-Jum Internazzjonali għall-Eliminazzjoni tal-Vjolenza fuq in-Nisa, |
— |
wara li kkunsidra l-Pjan ta’ Azzjoni tal-Kunsill tal-UE dwar l-Ugwaljanza bejn is-Sessi fil-Kooperazzjoni għall-Iżvilupp, li għandu jiżgura l-integrazzjoni tal-ugwaljanza bejn is-sessi fil-ħidma kollha tal-UE ma’ pajjiżi sħab fil-livelli kollha, |
— |
wara li kkunsidra l-ħatra f'Marzu 2010 ta’ Rappreżentant Speċjali tas-Segretarju Ġenerali tan-NU dwar il-Vjolenza Sesswali f'Kunflitti Armati, |
— |
wara li kkunsidra d-dokument tal-Kunsill bit-titolu “Approċċ Komprensiv għall-Implimentazzjoni tal-UE tal-UNSCR 1325 u 1820” u d-dokument ta’ ħidma dwar “l-Implimentazzjoni tal-UNSCR 1325 kif imsaħħa mill-UNSCR 1820 fil-kuntest tal-ESDP”, adottati t-tnejn f'Diċembru 2008, u d-dokument tal-Kunsill dwar “L-Integrazzjoni tad-Drittijiet tal-Bniedem fl-ESDP” ta’ Settembru 2006, |
— |
wara li kkunsidra l-Linji gwida tal-UE dwar il-vjolenza u d-diskriminazzjoni kontra n-nisa u l-bniet u l-Linji gwida tal-UE dwar it-tfal u l-kunflitti armati, |
— |
wara li kkunsidra r-riżoluzzjoni tiegħu tas-7 ta’ Mejju 2009 dwar l-integrazzjoni tal-ugwaljanza bejn is-sessi fir-relazzjonijiet barranin tal-UE u fil-konsolidazzjoni tal-paċi u tal-istrutturi tal-Istat (1), |
— |
wara li kkunsidra r-riżoluzzjoni tiegħu tal-1 ta’ Ġunju 2006 dwar in-nisa f'kunflitti armati u dwar ir-rwol tagħhom fir-rikostruzzjoni wara l-kunflitti (2), |
— |
wara li kkunsidra r-riżoluzzjoni tiegħu tas-16 ta’ Novembru 2006 dwar in-nisa fil-politika internazzjonali (3), |
— |
wara li kkunsidra l-pjan ta’ azzjoni 2007 dwar l-integrazzjoni tas-sessi tas-Sottokumitat tiegħu għas-Sigurtà u d-Difiża, |
— |
wara li kkunsidra r-riżoluzzjoni tiegħu tas-7 ta’ Ottubru 2010 dwar in-nuqqasijiet fil-protezzjoni tad-drittijiet tal-bniedem u tal-ġustizzja fir-Repubblika Demokratika tal-Kongo (4), |
— |
wara li kkunsidra l-Entità l-ġdida tan-NU dwar il-ġeneru (UN Women), |
— |
wara li kkunsidra l-Artikolu 110(4) tar-Regoli ta’ Proċedura tiegħu, |
A. |
billi l-vjolenza fuq in-nisa f'żoni ta’ kunflitti bosta drabi hija estensjoni tad-diskriminazzjoni bbażata fuq il-ġeneru diġà eżistenti fi żmien il-paċi; billi din is-sena l-Jum Internazzjonali għall-Eliminazzjoni tal-Vjolenza fuq in-Nisa jikkoinċidi mal-10 Anniversarju tar-Riżoluzzjoni 1325 tal-Kunsill tas-Sigurtà tan-NU, li kienet l-ewwel riżoluzzjoni li tindirizza l-impatt sproporzjonat u uniku li jkollu kunflitt armat fuq in-nisa u jorbot l-esperjenzi ta’ kunflitt tan-nisa maż-żamma tal-paċi u s-sigurtà internazzjonali, li tkopri l-oqsma tematiċi interkonnessi tal-parteċipazzjoni, il-protezzjoni, il-prevenzjoni, l-għajnuna u l-irkupru, |
B. |
wara li kkunsidra l-Jum Internazzjonali kontra l-Vjolenza fuq in-Nisa li jitfakkar fil-25 ta’ Novembru, |
C. |
billi r-Riżoluzzjonijiet 1820, 1888 u 1889 tal-Kunsill tas-Sigurtà saħħew u kkumplementaw ir-Riżoluzzjoni 1325, u billi l-erba' riżoluzzjonijiet jridu jitqiesu bħala s-sett ta’ impenji tal-Kunsill tas-Sigurtà dwar in-nisa, il-paċi u s-sigurtà, |
D. |
billi l-implimentazzjoni ta’ dawn l-impenji hija preokkupazzjoni u responsabilità komuni ta’ kull Stat Membru tan-NU, kemm jekk ikun milqut minn kunflitt, kif ukoll jekk ikun donatur jew xorta oħra; wara li kkunsidra l-adozzjoni f'Diċembru 2008 tal-Linji gwida tal-UE dwar il-vjolenza fuq in-nisa u l-bniet u l-Linji gwida tal-UE dwar it-tfal u l-kunflitti armati u l-ġlieda kontra l-forom kollha ta’ diskriminazzjoni kontrihom, li jirrappreżentaw sinjal politiku b'saħħtu li dawn huma prijoritajiet għall-Unjoni, |
E. |
billi l-implimentazzjoni tar-Riżoluzzjonijiet 1820 u 1325 tal-KSNU għandhom jingħataw prijorità fir-rigward tal-użu tal-istrumenti finanzjarji esterni tal-UE biex jingħata appoġġ xieraq lill-organizzazzjonijiet tas-soċjetà ċivili li jaħdmu f'kunflitti armati u f'pajjiżi u reġjuni milquta minn kunflitti, |
F. |
billi l-Parlament Ewropew għandu josserva l-approċċ wiesa' adottat u l-implimentazzjoni tal-Pjan ta’ Azzjoni prospettiv dwar l-Ugwaljanza bejn is-Sessi u u t-Tisħiħ tar-Rwol tan-Nisa fl-Azzjoni Esterna tal-UE, kif ukoll l-implimentazzjoni tal-linji gwida dwar il-vjolenza fuq in-nisa u t-tfal, |
G. |
billi l-preżenza ta’ perspettiva dwar il-ġeneru f'missjonijiet ċivili jew militari żżid ħafna l-effikaċja operazzjonali, li fir-rigward tagħha l-UE tista' tikkontribwixxi valur miżjud konsiderevoli billi tinvolvi ruħha attivament fil-qasam tan-nisa u l-kunflitti armati, |
H. |
billi l-UE għandha tagħmilha possibbli għan-nisa li jipparteċipaw fil-prevenzjoni tal-kunflitti, fl-immaniġġjar tal-kriżijiet, fit-taħditiet dwar il-paċi u fil-fażijiet ta’ wara l-kunflitti bħall-ippjanar tar-rikostruzzjoni wara t-tiġrif tal-gwerra, |
I. |
billi, il-Konvenzjoni ta’ Ġinevra tikkunsidra l-istupru u l-iskjavitù sesswali, meta dawn jiffurmaw parti minn prattika sistematika u ġenerali, bħala delitti kontra l-umanità u bħala delitti tal-gwerra; billi l-istupru issa huwa rikonoxxut ukoll bħala element tad-delitt tal-ġenoċidju meta jitwettaq bil-ħsieb li jeqred, kompletament jew parzjalment, grupp partikulari; billi l-UE għandha tappoġġja sforzi biex tintemm l-impunità għal dawk li wettqu vjolenza sesswali fuq in-nisa u t-tfal, |
J. |
billi l-istabbiliment tas-Servizz Ewropew għall-Azzjoni Esterna (SEAE) għandu jikkontribwixxi b'mod sinifikanti għall-implimentazzjoni ulterjuri tar-Riżoluzzjonijiet 1325 u 1820 tal-KSNU fir-rigward kemm tal-istruttura interna tiegħu kif ukoll tal-azzjonijiet u l-politiki esterni tiegħu, |
K. |
billi l-UE adottat għadd ta’ dokumenti importanti dwar kif għandhom jiġu implimentati r-Riżoluzzjonijiet 1820 u 1325 tal-KSNU, |
L. |
billi l-2010 hija wkoll is-sena tar-rieżami tal-“MDG plus 10”, |
M. |
billi hija biss minoranza tal-Istati Membri tal-UE li fasslu pjanijiet ta’ azzjoni nazzjonali biex jimplimentaw ir-Riżoluzzjoni 1325 tal-KSNU; billi l-Awstrija, il-Belġju, id-Danimarka, il-Finlandja, Franza, il-Pajjiżi l-Baxxi, il-Portugall, Spanja, l-Isveżja u r-Renju Unit adottaw pjanijiet ta’ azzjoni nazzjonali, |
1. |
Jenfasizza li l-10 Anniversarju tar-Riżoluzzjoni 1325 tal-KSNU għandu jindika l-bidu ta’ aġenda msaħħa għall-implimentazzjoni ta’ dik ir-riżoluzzjoni, li ma jista' jsir l-ebda progress dwarha jekk ma jkunx hemm tmexxija politika fl-ogħla livelli u riżorsi addizzjonali; jirrakkomanda bil-qawwa li din il-kwistjoni tiġi indirizzata kif dovut fir-rieżami li qed isir tal-politika għad-drittijiet tal-bniedem tal-UE meta din tasal għall-elaborazzjoni ta’ Strateġija għad-Drittijiet tal-Bniedem għall-Pajjiżi u għall-evalwazzjoni tal-Linji gwida tal-UE dwar il-vjolenza fuq in-nisa u l-bniet u l-Linji gwida tal UE dwar it-tfal u l-kunflitti armati u l-ġlieda kontra kull għamla ta’ diskriminazzjoni kontrihom; |
2. |
Jappella għall-allokazzjoni ta’ riżorsi finanzjarji, umani u organizzattivi speċifiċi u sinifikanti għall-parteċipazjoni tan-nisa u l-integrazzjoni tal-ugwaljanza bejn is-sessi fil-qasam tal-politika barranija u ta’ sigurtà; jappella sabiex jintbagħtu aktar nisa fil-missjonijiet tal-pulizija, militari, ġudizzjarji u favur l-istat tad-dritt, u f'operazzjonijiet għaż-żamma tal-paċi; jistieden lill-Istati Membri tal-UE biex jippromwovu attivament il-parteċipazzjoni tan-nisa fir-relazzjonijiet bilaterali u multilaterali tagħhom ma’ stati u organizzazzjonijiet barra l-UE; |
3. |
Iħeġġeġ lir-RGħ/VP Ashton, f'rieżami ta’ nofs il-perjodu wara ħames snin, biex timmonitorja l-implimentazzjoni tal-impenji u tiffaċilita l-iskambju tal-aħjar prattiki; |
4. |
Iħeġġeġ bil-qawwa lir-RGħ/VP sabiex issaħħaħ ukoll il-Grupp ta’ Ħidma tal-UE dwar in-nisa, il-paċi u s-sigurtà u jittama li jagħmel evalwazzjoni bejn il-pari tal-adozzjoni u l-implimentazzjoni ta’ pjanijiet ta’ azzjoni nazzjonali dwar ir-Riżoluzzjonijiet 1325 u 1820 tal-KSNU, iwettaq analiżi sistematika rigward ġeneru ta’ missjonijiet tal-Politika ta’ Sigurtà u ta’ Difiża Komuni (PSDK) u jimmoniterja u jagħti pariri lid-delegazzjonijiet tal-UE f'pajjiżi u reġjuni milquta minn kunflitti; |
5. |
Iqis it-twaqqif ta’ Servizz Ewropew għall-Azzjoni Esterna (SEAE) bħala opportunità unika għat-tisħiħ tar-rwol tal-UE fir-rigward tal-implimentazzjoni tar-Riżoluzzjonijiet 1820 u 1325 tal-KSNU; |
6. |
Iħeġġeġ għalhekk lir-RGħ/VP sabiex tirrinforza u ssaħħaħ il-prattika tal-integrazzjoni tal-ugwaljanza bejn is-sessi u tieħu impenji sostanzjali u viżibbli ħafna rigward persunal, riżorsi finanzjarji u ġerarkija organizzattiva; iħeġġeġ lir-RGħ/VP biex issawwar, fi ħdan is-SEAE, unità organizzattiva dwar in-nisa, il-paċi u s-sigurtà, fid-dipartiment tematiku rilevanti, u biex tassigura li f'kull dipartiment ġeografiku u delegazzjoni tal-UE tal-anqas kariga waħda full-time tiġi ddedikata lin-nisa, il-paċi u s-sigurtà u li dawn il-persuni jkunu jiffurmaw parti mill-Grupp ta’ Ħidma tal-UE, jew ikunu marbuta mill-qrib miegħu; |
7. |
Jilqa' bi pjaċir is-serje ta’ avvenimenti pubbliċi bħall-jiem miftuħa implimentati tal-anqas mit-tliet missjonijiet tal-PSDK, EUPM, EULEX u EUMM sabiex jiċċelebraw l-10 Anniversarju tar-Riżoluzzjoni 1325 tal-KSNU; jilqa' l-input tal-Kapaċità Ċivili tal-Ippjanar u t-Tmexxija (CPCC) tal-UE f'dan ir-rigward; ifakkar li missjonijiet tal-PSDK huma fost l-aktar għodda importanti tal-EU sabiex juru l-impenn tagħha favur l-objettivi tar-Riżoluzzjonijiet 1820 u 1325 tal-KSNU f'pajjiżi u reġjuni milquta minn kriżijiet; |
8. |
Iħeġġeġ lir-RGħ/VP u lill-Istati Membri tal-UE sabiex jinkludu referenzi għar-Riżoluzzjonijiet 1325 u 1820 tal-KSNU fid-Deċiżjonijiet tal-Kunsill u fil-mandati ta’ missjonijiet li jirrigwardaw il-PSDK u sabiex jiżguraw li l-missjonijiet kollha tal-PSDK ikollhom tal-anqas Konsulent wieħed dwar il-Ġeneru u Pjan ta’ Azzjoni dwar kif għandhom jintlaħqu l-objettivi tar-Riżoluzzjonijiet 1325 u 1820; iħeġġeġ lir-RGħ/VP, lill-Istati Membri u lill-Kapijiet ta’ Missjoni tal-UE sabiex jagħmlu l-kooperazzjoni u l-konsultazzjoni ma’ organizzazzjonijiet lokali tan-nisa element standard ta’ kull missjoni; |
9. |
Jitlob li jitwaqqfu proċeduri ta’ lment pubbliċi xierqa fil-kuntest tal-missjonijiet tal-PSDK, li b'mod partikolari jiffavorixxu r-rappurtar ta’ vjolenza bbażata fuq is-sess u l-ġeneru; jistieden lir-RGħ/VP sabiex tinkludi rapport dettaljat dwar in-nisa, il-paċi u s-sigurtà fl-evalazzjoni ta’ kull sitt xhur tal-missjonijiet tal-PSDK; |
10. |
Ifakkar fl-istupri tal-massa minn gruppi li seħħew mit-30 ta’ Lulju sal-4 ta’ Awwissu 2010 fid-distrett tal-minjieri fil-Lvant tal-Kongo, li tal-anqas 8 300 stupru ġew irrappurtati s-sena li għaddiet fil-Lvant tal-Kongo u li tal-anqas 1 244 mara rrappurtaw li ġew stuprati fl-ewwel tliet xhur tal-2010, li hija medja ta’ 14-il stupru kuljum; iħeġġeġ liż-żewġ missjonijiet tal-UE fir-Repubblika Demokratika tal-Kongo – EUPOL RD Kongo u EUSEC RD Kongo – sabiex jagħmlu l-ġlieda kontra l-vjolenza sesswali u l-parteċipazzjoni tan-nisa l-prijoritajiet ewlenin fil-kuntest tal-isforzi favur ir-riforma tas-settur tas-sigurtà Kongoliż; |
11. |
Jenfasizza li huwa importanti li l-UE taħtar iktar uffiċjali tal-pulizija u suldati nisa għall-missjonijiet tal-PSDK, li b'rabta magħhom il-kontinġent tal-uffiċjali tal-pulizija nisa fil-forza għaż-żamma tal-paċi tan-NU fil-Liberja jista' jintuża bħala mudell; |
12. |
Jiġbed l-attenzjoni għall-ħtieġa li jiġi stabbilit kodiċi tal-kondotta għall-persunal tal-UE li jservi f'missjonijiet militari u ċivili li jagħmilha ċara li l-isfruttament sesswali jikkostitwixxi mġiba mhux ġustifikabbli u kriminali; |
13. |
Jitlob l-implimentazzjoni tar-Riżoluzzjonijiet 1325 u 1820 tal-KSNU fid-dokumenti ta’ strateġija għall-pajjiżi tal-UE u l-mobilizzazzjoni ta’ aktar appoġġ finanzjajrju għall-parteċipazzjoni ta’ nisa minn pajjiżi milquta mill-kunflitti fi proċessi Ewropej; jistieden lir-RGħ/VP u lill-Kummissarji għall-Iżvilupp, it-Tkabbir u l-Għajnuna Umanitarja sabiex jagħmlu l-aspetti tan-nisa, il-paċi u s-sigurtà parti integrali mill-ippjanar u l-programmazzjoni tal-istrumenti finanzjarji esterni bħall-EIDHR, l-ICI, IPA u speċjalment id-DCI u l-IfS; |
14. |
Jenfasizza li l-Kummissjoni għandha tiffaċilita l-aċċess tal-NGOs żgħar għas-sussidji mill-Istrument Ewropew għad-Demokrazija u għad-Drittijiet tal-Bniedem (EIDHR); ifakkar li attwalment bosta organizzazzjonijiet żgħar tan-nisa ma jirnexxilhomx jaqbżu l-ostakoli burokratiċi għat-tressiq tal-applikazzjonijiet; |
15. |
Jistieden lill-Kummissarju għall-Iżvilupp sabiex jagħti prijorità lill-appoġġ tal-ħidma minn organizzazjonijiet tan-nisa f'żoni milquta minn kunflitti; jistieden lir-RGħ/VP biex tuża l-komponent għal perjodu twil ta’ żmien tal-Istrument għall-Istabbiltà (IfS) biex talloka fondi ta’ appoġġ għall-parteċipazzjoni tan-nisa fi proċessi rigward paċi, sigurtà u rikonċiljazzjoni u sabiex tiddetermina sistematikament allokazzjonijiet għan-nisa, il-paċi u s-sigurtà fil-miżuri kollha għal perjodu qasir ta’ żmien skont l-Artikolu 3 tal-Istrument għall-Istabbiltà; |
16. |
Huwa tal-fehma li d-delegazzjonijiet tal-UE għandhom jinfurmaw lill-organizzazzjonijiet tas-soċjetà ċivili, bħalma huma l-organizzazzjonijiet lokali tan-nisa, dwar l-impenn tagħhom f'reġjuni fejn hemm kunflitti u sabiex jikkonsultaw lill-organizzazzjonijiet tas-soċjetà ċivili fil-proċess tal-ippjanar tal-politiki; |
17. |
Jitlob li tiżdied b'mod sostanzjali l-parteċipazzjoni tan-nisa f'kull qasam tal-operazzjonijiet, inklużi l-ħidma ta’ rikonċiljazzjoni, in-negozjati għall-paċi, il-ħolqien tal-paċi, l-infurzar tal-paċi, iż-żamma tal-paċi u l-prevenzjoni tal-kunflitti; |
18. |
Jitlob żieda immedjata fil-parteċipazzjoni tan-nisa fl-inizjattivi kollha li l-għan tagħhom hu li jinstabu soluzzjonijiet għall-kunflitti, anke bħala medjaturi u negozjaturi u fl-implimentazzjoni ta’ miżuri ta’ soluzzjoni għall-kunflitti; |
19. |
Jistieden lir-RGħ/VP biex tagħti bidu għal ġimgħa annwali li fiha mexxejja nisa jiġu kkonsultati u li tista' tkun kumplimentari għall-Jum Miftuħ Globali tan-NU għan-Nisa u l-Paċi, segwita minn rapporti u attivitajiet ta’ segwitu ta’ delegazzjonijiet tal-UE; |
20. |
Jisħaq fuq il-ħtieġa ta’ pjanijiet ta’ azzjoni nazzjonali, li għandhom jipprovdu informazzjoni dwar il-perjodu ta’ żmien tal-istrateġija nazzjonali, jistabbilixxu objettivi realistiċi, jiżviluppaw mekkaniżmi ta’ superviżjoni u jikonkoraġġixxu parteċipazzjoni akbar tan-nisa fil-monitoraġġ, l-evalwazzjoni u l-mekkaniżmi ta’ superviżjoni; |
21. |
Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta’ Sigurtà, lill-Gvernijiet u l-Parlamenti tal-Istati Membri, lir-Rappreżentant Speċjali tan-NU dwar il-vjolenza sesswali f'kunflitti armati u lill-Kap tal-Entità tan-NU dwar il-Ġeneru (UN Women) li għadha kemm inħatret. |
(1) ĠU C 212 E, 5.8.2010, p. 32.
(2) ĠU C 298 E, 8.12.2006, p. 287.
(3) ĠU C 314 E, 21.12.2006, p. 347.
(4) Testi adottati, P7_TA(2010)0350.