EUR-Lex Access to European Union law
This document is an excerpt from the EUR-Lex website
Document 52010DC0586
GREEN PAPER FROM THE COMMISSION TO THE COUNCIL, THE EUROPEAN PARLIAMENT, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS The future of EU budget support to third countries
GREEN PAPER MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-futur tal-appoġġ baġitarji tal-UE lil pajjiżi terzi
GREEN PAPER MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-futur tal-appoġġ baġitarji tal-UE lil pajjiżi terzi
/* KUMM/2010/0586 finali */
GREEN PAPER MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-futur tal-appoġġ baġitarji tal-UE lil pajjiżi terzi /* KUMM/2010/0586 finali */
[pic] | IL-KUMMISSJONI EWROPEA | Brussel 19.10.2010 KUMM(2010) 586 finali GREEN PAPER MILL-KUMMISSJONI LILL-KUNSILL, LILL-PARLAMENT EWROPEW, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Il-futur tal-appoġġ baġitarji tal-UE lil pajjiżi terzi INTRODUZZJONI L-Għanijiet tal-Millennju għall-Iżvilupp (Millennium Development Goals, MDGs) stabbiliti fl-2000 xprunaw l-appoġġ internazzjonali għall-iżvilupp u taw bidu għal inizjattivi oħra biex jiżdiedu kemm il-volum kif ukoll l-effettività tal-għajnuna fuq il-bażi ta' parternarjat sod bejn pajjiżi donaturi u dawk imsieħba. Il-Kunsens ta' Monterrey (2002), il-Kunsens Ewropew għall-Iżvilupp (2005), id-Dikjarazzjoni ta' Pariġi dwar l-Effettività tal-Għajnuna (2005) u l-Aġenda ta' Accra għall-Azzjoni (2008) kienu ġrajjiet importanti ta' dan il-proċess, li stabbilixxa ħames prinċipji ewlenin ta' sjieda, armonizzazzjoni, allineament, ġestjoni għar-riżultati u kontabilità reċiproka. Fl-2000 il-Kummissjoni ppreżentat Komunikazzjoni fuq l-appoġġ tal-baġit: 'Appoġġ tal-Komunità għall-programmi ta' riforma ekonomika u aġġustament strutturali: Reviżjoni u prospetti'[1]. Dan għen biex jagħti l-forma lit-tifsila tal-appoġġ baġitarju għad-deċennju li jmiss. Meta għad baqa' ħames snin biex, fl-2015, jiskadi ż-żmien għat-twettiq tal-MDGs, l-appoġġ baġitarju sar element dejjem aktar prominenti tal-aġenda tal-effettività tal-għajnuna. Matul il-perjodu 2003-2009, il-Kummissjoni Ewropea għamlet impenji dwar l-appoġġ baġitarju li jlaħħqu 'l fuq minn EUR 13-il biljun (madwar 25% tal-impenji kollha matul dan il-perjodu). Madwar 56% tal-impenji saru fil-pajjiżi tal-Afrika, tal-Karibew u tal-Paċifiku (AKP), 24% fil-pajjiżi tal-viċinat, 8% fl-Asja, 6% fl-Amerika Latina u 5% fl-Afrika t'Isfel. Madankollu, qegħdin dejjem aktar jitqajmu dubji dwar il-kwalità, il-valur għall-flus u l-impatt tal-appoġġ baġitarju minn firxa ta' msieħba interessati, inklużi l-Qorti Ewropea tal-Awdituri, il-Parlament Ewropew u dawk nazzjonali, u s-soċjetà ċivili. Dawn għandhom jiġu indirizzati hekk kif il-Kummissjoni taħdem biex ittejjeb l-approċċ tagħha għall-appoġġ baġitarju. Il-kwistjonijiet ewlenin jinkludu i) il-goverenanza politika u r-rwol tad-djalogu politiku; ii) ir-rwol tad-djalogu politiku, ir-rwol tal-kundizzjonalità, u r-rabtiet mal-prestazzjoni u r-riżultati; iii) responsabbiltà domestika u reċiproka; iv) l-ipprogrammar tal-appoġġ baġitarju u l-koerenza ta' dan ma' strumenti oħra; v) it-tisħiħ tal-valutazzjoni tar-riskju u t-trattament tal-frodi u l-korruzzjoni; vi) appoġġ baġitarju f'sitwazzjonijiet fraġli; u vii) it-tkabbir, il-politika fiskali u l-mobilizzazzjoni tad-dħul domestiku. Il-kooridinazzjoni mtejba madwar l-UE hi essenzjali wkoll, hekk kif it-Trattat ta' Lisbona u t-twaqqif tas-Servizz Ewropew għall-Azzjoni Esterna qed ibiddlu l-kuntest istituzzjonali tal-UE li fih jiġi pprovdut l-appoġġ baġitarju. L- għan ta' din il-Green Paper hi li tiġbor l-opinjonijiet tal-imsieħba interessati rigward l-objettivi u l-użu tal-appoġġ baġitarju tal-UE, li tibni fuq l-esperjenza konġunta tal-aħħar 10 snin filwaqt li tirrikonoxxi d-differenzi fil-kuntest u n-natura tal-kooperazzjoni tal-UE mar-reġjuni u l-pajjiżi differenti fid-dinja. L- objettivi speċifiċi tal-Green Paper huma li jidentifikaw l-opportunitajiet u l-isfidi, biex iqajmu domandi speċifiċi dwar kif jistgħu jiġu sfruttati dawn l-opportunitajiet u kif jistgħu jiġu indirizzati dawn l-isfidi, u biex jinġabru l-opinjonijiet u l-evidenza li se jtejbu l-approċċ tagħna għall-appoġġ baġitarju. Il-biċċa l-kbira tal-appoġġ baġitarju tal-UE hu pprovdut lil pajjiżi li qed jiżviluppaw u għalhekk hemm enfasi partikolari fuq il-kooperazzjoni għall-iżvilupp. Imma l- ambitu ta' dan id-dokument ikopri l-appoġġ baġitarju tal-UE fir-reġjuni kollha, u jqis id-differenzi bejn il-pajjiżi li qed jiżviluppaw, kif ukoll id-differenzi mal-pajjiżi kandidati, kandidati potenzjali u pajjiżi ġirien tal-UE fejn il-kooperazzjoni u l-partenarjat Ewropej huma maħsuba biex jappoġġjaw ir-riforma u t-tranżizzjoni li tippermetti assoċjazzjoni politika aktar mill-qrib u integrazzjoni ekonomika gradwali. Għalhekk, il-kwistjonijiet imqajma f'din il-paper se jkollhom relevanza differenti u jistgħu jiġġeneraw tweġibiet differenti minn reġjuni differrenti. It-Taqsima 2 tiddefinixxi l-appoġġ baġitarju. It-Taqsima 3 tirrevedi l-esperjenzi u tidentifika numru ta' prinċipji ewlenin għat-tfassil u l-implimentazzjoni tal-appoġġ baġitarju. It-Taqsima 4 tistabbilixxi numru ta' kwistjonijiet aktar kontroversjali li jifformaw il-parti l-kbira ta' dan id-dokument ta' konsultazzjoni. It-Taqsima 5 hija l-konklużjoni. Wieħed jista' jsib dokumenti ta' appoġġ li jipprovdu sfond fuq [ daħħal l-indirizz tal-websajt ]. Din il-Green Paper se tkun ippubblikata fuq il-websajt tal-Kummissjoni (http://ec.europa.eu/yourvoice/). Il-konsultazzjoni se ssir mid-19 ta' Ottubru sa tmiem Diċembru 2010 u hi miftuħa għal kwalunkwe parti interessata. Individwi, organizzazzjonijiet u pajjiżi qed jiġu mistiedna biex jibagħtu l-kontribuzzjonijiet tagħhom, fil-forma ta' tweġibiet għall-mistoqsijiet ippreżentati fid-dokument u/jew bħala kummenti ġenerali dwar il-kwistjonijiet imqajma. Il-kontribuzzjonijiet li jaslu se jiġu ppubblikati, possibbilment f'forma mqassra, sakemm l-awtur ma joġġezzjonax għall-pubblikazzjoni tad-dejta personali għar-raġuni li tali pubblikazzjoni tagħmel ħsara lill-interessi leġittimi tiegħu/tagħha. F'dan il-każ, il-kontribuzzjoni tista' tiġi ppubblikata f'forma anonima. Altrimenti, il-kontribuzzjoni ma tiġix ippubblikata u lanqas, fil-prinċipju, ma jiġi kkunsidrat il-kontenut tagħha. Barra minn hekk, sa mit-tnedija, f'Ġunju tal-2008, tar-Reġistru tar-Rappreżentanti ta' Interessi (lobbyists) bħala parti mill-Inizjattiva Ewropea għat-Trasparenza, l-organizzazzjonijiet qed jiġu mistiedna biex jużaw dan ir-Reġistru biex jipprovdu lill-Kummissjoni Ewropea u lill-pubbliku inġenerali b'informazzjoni dwar l-objettivi, il-finanzjament u l-istrutturi tagħhom. Hi l-politika tal-Kummissjoni li s-sottomissjonijiet minn organizzazzjonijiet ikunu kkunsidrati bħala kontribuzzjonijiet individwali sakemm l-organizzazzjonijiet ma jkunux irreġistraw Il-kontribuzzjonijiet għandhom jintbagħtu lil DEV-BSGP@ec.europa.eu . Mistoqsijiet dwar din il-konsultazzjoni jistgħu jintbagħtu fl-istess indirizz elettroniku, jew lill-Kummissjoni Ewropea, DĠ Żvilupp, Unità C/3, Uffiċċju SC-15 05/100, 1049 Brussell, Il-Belġju. X'INHU L-APPOġġ BAġITARJU? L- appoġġ baġitarju hu parti mill-pakkett ġenerali ta' kooperazzjoni ma' pajjiż. Dan jinvolvi djalogu politiku, trasferimenti finanzjarji, valutazzjoni tal-prestazzjoni u bini tal-kapaċità fuq il-bażi ta' partenarjat u responsabbiltà reċiproka. Kaxxa 1: Definizzjoni ta' appoġġ baġitarju : L-appoġġ baġitarju hu t- trasferiment ta' riżorsi finanzjarji ta' aġenzija ta' finanzjament esterna lit-Teżor Nazzjonali tal-pajjiż imsieħeb, wara li dan tal-aħħar ikun irrispetta l- kundizzjonijiet maqbula tal-ħlas. Għalhekk, ir-riżorsi finanzjarji li jaslu huma parti mir-riżorsi globali tal-pajjiż imsieħeb, u bħala konsegwenza jintużaw skont is-sistema pubblika tal-ġestjoni finanzjarja tal-pajjiż imsieħeb. L-UE tipprovdi appoġġ baġitarju biss lil pajjiżi li jissodisfaw it-tliet kriterji ta' eliġibbiltà li ġejjin, mislutin mill-oqsfsa legali li jirregolaw l-appoġġ tal-UE għal kull reġjun: meta tkun qed tiġi mħaddma jew implimentata a) politika u strateġija nazzjonali (jew settorjali fil-każ tal-ABS) definita sew; b) qafas makroekonomiku orjentat lejn l-istabbiltà; c) programm relevanti u kredibbli biex tittejjeb il-ġestjoni finanzjarja pubblika. Il-ħlasijiet kollha jsiru bil-kundizzjoni li jkun hemm konformità kontinwa ma' dawn it-tliet kriterji standard ta' eliġibbiltà (riflessi fil-" kundizzjonijiet ġenerali "), u jistgħu jkunu soġġetti wkoll għal " kundizzjonijiet speċifiċi " li jirriflettu l-kriterji u l-indikaturi tal-prestazzjoni (ta' spiss iffukati fuq ir-riżultati) f'oqsma ta' prijorità. Permezz tal-appoġġ baġitarju, id-donaturi jgħinu lill-gvernijiet imsieħba biex jiffinanzjaw funzjonijiet ewlenin tal-gvern, bħall-bini ta' skejjel u sptarijiet, il-ħlas lill-għalliema u lill-persunal tal-kura tas-saħħa, il-bini tal-infrastruttura, it-titjib tas-sigurtà u tal-istat tad-dritt, l-implimentazzjoni ta' proċessi ta' riforma kumplessi u l-kisba ta' stabbiltà makroekonomika. L-appoġġ baġitarju hu maħsub biex ixejjen in-nuqqasijiet tal-approċċ tradizzjonali għall-proġetti (kosti għolja ta' tranżazzjoni, sistemi paralleli mkissrin) li, partikolarment f'pajjiżi dipendenti bis-sħiħ mill-għajnuna, kien iżomm lura l-iżvilupp ta' politiki koerenti minn gvernijiet imsieħba, idgħajjef akrtar il-kapaċità limitata tal-istituzzjonijiet nazzjonali, u jimmina s-sostenibbiltà tal-għajnuna. Min-naħa l-oħra, l-appoġġ baġitarju jidher bħala mezz li jindokra s-sjieda mill-pajjiżi msieħba ta' politiki ta' żvilupp u proċessi ta' riforma, isaħħaħ l-istituzzjonijiet u s-sistemi nazzjonali ta' responsabbiltà, u jiffaċilita t-tkabbir, it-tnaqqis tal-faqar u l-ksib tal-objettivi tal-iżvilupp. L-appoġġ baġitarju tal-UE mhuwiex poter bla riżerva, u lanqas ma jiġi pprodut lil kull pajjiż. "Il-prinċipji ta' bażi" huma importanti (ara taqsima 4.1), u d-djalogu politiku hu parti ċentrali tal-pakkett. Barra minn hekk, il-kriterji ta' eliġibbiltà (ara l-Kaxxa 1) għandhom jiġu rrispettati u jiġu ssodisfati l-kundizzjonijiet biex tingħata imbuttatura lis-salvagwardja tar-riżorsi, jitnaqqsu r-riskji, u jinħolqu inċentivi għal prestazzjoni aħjar. L-appoġġ baġitarju evolva b'mod notevoli mal-milja taż-żmien, b'orjentazzjonijiet differenti f'reġjuni differenti. Il-Qorti Ewropea tal-Awdituri kienet strumentali biex tgħin lill-Kummissjoni tejjeb l-approċċ tagħha għall-appoġġ baġitarju (ara l-Kaxxa 2). Fl-aktar taditiet reċenti mal-Kummissjoni, il-Qorti rrikonoxxiet il-progress, imma identifikat nuqqasijiet li għad jistgħu jipprevjenu lill-appoġġ baġitarju ġenerali milli jilħaq il-potenzjal sħiħ tiegħu. Hi tirrakkomanda definizzjoni ċara tal-objettivi speċifiċi għall-pajjiż biex jiġi ffaċilitat il-valutazzjoni tal-impatt; l-użu ta' qafas komplet għall-ġestjoni tar-riskji biex jitnaqqsu r-riskji tal-ġestjoni fiskali u tal-iżvilupp; aktar traspernza u raġunijiet fundamentali għall-allokazzjonijiet tal-appoġġ baġitarju u għal proporzjonijiet fissi u varjabbli; ġestjoni msaħħa ta' kundizzjonalità marbuta mal-prestazzjoni u djalogu politiku; u rappurtar aktar regolari dwar il-prestazzjoni, li jkopri kemm il-benefiċċji kif ukoll ir-riskji. Dawn il-punti, flimkien mal-awditjar intern u r-rakkondazzjonijiet tal-Parlament Ewropew, huma kruċjali biex l-approċċ tal-UE għall-appoġġ baġitarju fil-futur ikun infurmat aħjar. Kaxxa 2: L-appoġġ baġitarju u l-Qorti Ewropea tal-Awdituri Il-Qorti tal-Awdituri regolarment tifli l-appoġġ baġitarju tal-UE fir-rapport annwali tagħha. Hi ħarġet żewġ rapporti speċjali relevanti marbuta mal-appoġġ baġitarju ġenerali u beħsiebha tippubblika t-tielet wieħed sal-aħħar tal-2010. Ir-rakkomandazzjonijiet tal-Qorti infurmaw ir-reviżjonijiet u t-titjib li l–Kummissjoni għamlet fl-approċċ u l-linji gwida tagħha. B'mod speċifiku, il-Qorti kkontribwiet għat-tranżizzjoni minn appoġġ baġitarju immirat għal wieħed mhux immirat (SR 5/2001), u inkoraġġiet l-iżvilupp u l-użu ta' qafas pubbliku komuni tal-kejl tal-prestazzjoni tal-ġestjoni finanzjarja kif ukoll koordinazzjoni aktar f'saħħitha u valutazzjonijiet konġunti mar-rappreżentanti lokali tad-donaturi (SR 2/2005). Il-Qorti ripetutament ivvalutat l-interpretazzjoni dinamika tal-eliġibbiltà applikata mill-Kummissjoni u insistiet li l-Kummissjoni għandha turi l-eliġibbiltà u l-prestazzjoni fil-ġestjoni finanzjarja pubblika b'mod aktar espliċitu, formali u strutturat (SR 2/2005, AR 2009). Il-Qorti pproduċiet ukoll rapport speċjali fuq l-assistenza tal-UE għas-settur tas-saħħa. Dan ikkonkluda li l-appoġġ baġitarju ġenerali għadu ma tax kontribut effettiv biex itejjeb is-servizzi tas-saħħa u għandu jiffoka aktar biex jagħmel hekk, filwaqt li għandu jżid l-użu tal-appoġġ baġitarju settorjali iffukat (SR 10/2008). Il-Qorti beħsiebha tippubblika wkoll rapport speċjali dwar is-settur tal-edukazzjoni. | F'dan id-dokument, 'l-appoġġ baġitarju tal-UE' jirreferi għall-appoġġ baġitarju ġestit mill-Kummissjoni Ewropea, li joriġina mill-Istrumenti tal-Azzjoni Esterna ffinanzjati mill-Baġit tal-UE kif ukoll appoġġ iffinanzjat mill-Fond Ewropew għall-Iżvilupp. Jista' jieħu l-forma ta' appoġġ baġitarju ġenerali (ABĠ) biex tiġi appoġġjata l-istrateġija nazzjonali ta' żvilupp ta' pajjiż, jew appoġġ baġitarju settorjali (ABS) biex tiġi appoġġjata strateġija settorjali partikolari. L-UE u donaturi oħra tal-appoġġ baġitarju qed jużaw dejjem aktar appoġġ baġitarju ġenerali u settorjali maġenb xulxin u hemm interess dejjem jikber fl-użu tal-appoġġ baġitarju għal kwistjonijiet ġodda u speċifiċi (bħat-tibdil fil-klima). Filwaqt li l-ABS hu pprovdut mill-UE u xi donaturi oħra fil-forma mhux immirata tiegħu, oħrajn japplikaw xi forma ta' mmarkar tal-fondi. L-ABĠ u l-ABS għandhom objettivi differenti li se jkunu riflessi fil-kundizzjonijiet u d-djalogu. L-ABĠ hu mmirat biex jappoġġja l-politika u l-istrateġija tal-iżvilupp nazzjonali u għandu l-potenzjal biex jindirizza l-firxa sħiħa tal-politiki u r-riformi. L-ABS hu mmirat biex jappoġġja aġenda tal-politika u r-riforma settorjali u għandu l-vantaġġ li hu aktar iffukat fuq setturi ewlenin ta' interess. L-ABS għandu valur miżjud partikolari fejn l-appoġġ baġitarju jirrappreżenta proporzjon żgħir tal-baġit nazzjonali, u fejn wieħed qed ifittex djalogu politiku u riformi aktar iffukati. F'bosta każi l-UE tuża ż-żewġ modalitajiet flimkien, partikolarment fil-pajjiżi tal-Afrika, tal-Karibew u tal-Paċifiku, bl-ABS jikkumplimenta l-ABĠ billi l-politika għall-iżvilupp nazzjonali ssir aktar sensittiva għall-ħtiġijiet speċifiċi ta' settur jew riforma partikolari. Il- koordinazzjoni hi l-element fundamentali. L-UE hi fornitur kbir tal-appoġġ baġitarju. Għaddej ix-xogħol biex il-koordinazzjoni dwar id-djalogu politiku u d-djalogu tal-politika, it-tfassil u l-implimentazzjoni tal-programmi, il-promozzjoni tar-responsabbiltà domestika u reċiproka, u t-twettiq u l-komunikazzjoni tar-riżultati tal-evalwazzjonijiet, titjieb aktar. Dan ix-xogħol informa wkoll lil din il-Green Paper u se jikkontribwixxi biex itejjeb l-effettività tal-appoġġ baġitarju, kif ukoll il-koerenza u l-kredibbiltà tad-donaturi tal-UE, filwaqt li titjieb il-koordinazzjoni fost il-fornituri kollha tal-appoġġ baġitarju. Kaxxa 3: L-Evoluzzjoni tal-Appoġġ Baġitarju tal-UE L-esperjenza bikrija bl-appoġġ baġitarju fid-disgħinijiet uriet il-limiti tal-kundizzjonalità bħala mezz effettiv tal-promozzjoni tar-riformi; l-importanza li l-pajjiżi msieħba jkollhom sjieda tal-politiki; u l-effett limitat li l-fondi jkunu mmirati lejn linji baġitarji speċifiċi. Fuq il-bażi ta' din l-esperjenza, il-Kummissjoni adottat Komunikazzjoni (2000) dwar 'Appoġġ Komunitarju għal programmi ta' riforma ekonomika u aġġustament strutturali: reviżjoni u prospetti', li introduċiet appoġġ baġitarju għat-tnaqqis tal-faqar (poverty reduction budget support, PRBS) u approċċ innovattiv għall-kundizzjonalità. Din il-Komunikazzjoni stabbiliet l-għanijiet għall-appoġġ baġitarju li aktar tard saru parti mill-prinċipji tal-effettività tal-għajnuna. Il-programmi tal-appoġġ baġitarju tal-UE dejjem aktar kienu qed jiġu fornuti, fuq perjodi ta' tliet snin, bi proporzjonijiet annwali fissi sakemm ikun hemm konformità mal-kriterji tal-eliġibbiltà, u propozjonijiet varjabbli marbuta wkoll ma' prestazzjoni skont il-miri miftiehma fuq indikaturi magħżula tar-riżultati, prinċipalment fis-setturi soċjali. Fir-rigward tal- kriterji tal-eliġibbiltà għall-appoġġ baġitarju, il-Kummissjoni (flimkien mal-biċċa l-kbira tal-fornituri l-oħra) tapplika approċċ dinamiku billi titlob impenn relevanti u kredibbli għar-riforma u evidenza ta' progress aktar milli konformità mal-istandards minimi. Dan l-approċċ ippermetta lill-Kummissjoni topera f'kuntesti diversi ħafna, inklużi pajjiżi f'sitwazzjoni fraġli , fejn l-appoġġ baġitarju jista' jirfed l-istabbilizzazzjoni u jevita t-tmermir tas-sitwazzjoni ekonomika u politika. Fl-2008, il-Kummissjoni nediet ukoll il-' Kuntratti MDG ' għal pajjiżi bi storja ta' suċċessi fil-ġestjoni tal-appoġġ baġitarju, u li juru impenn biex jagħmlu progress lejn l-Għajnijiet għall-Iżvilupp tal-Millennju (MDGs). Il-Kuntratti MDG jipprovdu impenji ta' sitt snin biex jippermettu lill-gvernijiet jippjanaw strateġiji fit-tul u baġits b'ċertezza akbar dwar l-influssi futuri tar-riżorsi. IT-TRIQ QUDDIEM L-APPOġġ BAġITARJU - XI PRINċIPJI EWLENIN L-appoġġ baġitarju evolva matul l-aħħar deċennju u wieħed tgħallem minn numru ta' lezzjonijiet dwar it-tfassil u l-impatt tiegħu (ara l-Kaxxi 3 u 4). Kaxxa 4: L-Appoġġ Baġitarju - Lezzjonijiet li Ttieħdu Evalwazzjoni kbira fl-2006 tal-appoġġ baġitarju ġenerali (ABĠ) f'seba' pajjiżi li għadhom qed jizviluppaw (Burkina Faso, il-Malawi, il-Możambik, in-Nikaragwa, ir-Rwanda, l-Uganda, u l-Vjetnam) ikkummissjonata mill-Kumitat għall-Assistenza għall-Iżvilupp tal-Organizzazzjoni għall-Kooperazzjoni Ekonomika u tal-Iżvilupp (OECD-DAC) ikkonkludiet li l-appoġġ baġitarju kien tweġiba relevanti għal problemi rikonoxxuti fl-effettività tal-għajnuna, u jista' jkun mod effiċjenti, effettiv u sostenibbli fl-appoġġ tal-istrateġiji nazzjonali għat-tnaqqis tal-faqar. Din sabet li l-ABĠ kellu effetti pożittivi fl-armonizzazzjoni u l-allineament, u għat-tisħiħ tas-sjieda u r-responsabbiltà governattiva. Kellu wkoll effetti pożittivi fuq l-effiċjenza tan-nefqa pubblika, u fuq il-kapaċità governattiva, partikolarment fil-ġestjoni tal-finanzi pubbliċi. L-appoġġ baġitarju wassal ukoll għal titjib fl-aċċess għal servizzi fil-biċċa l-kbira tal-pajjiżi. Ma kien hemm l-ebda evidenza ta' nuqqas ta' spazju notevoli għall-iżvilupp tal-investiment privat jew ta' imminar tal-isforz għad-dħul domestiku, u lanqas evidenza ċara li l-fondi tal-appoġġ baġitarju kienu aktar affettwati mill-korruzzjoni milli minn forom oħra ta' għajnuna. Madankollu, l-evalwazzjoni esprimiet riżervi dwar l-impatti fuq it-tnaqqis tal-faqar u l-kwalità tas-servizzi bażiċi. Metodoloġija riveduta ta' evalwazzjoni bħalissa qed tiġi ppruvata fil-Mali, fit-Tuneżija u fiż–Żambja. Evalwzzjonijiet indipendenti reċenti ta' programmi tal-pajjiżi tal-Kummissjoni Ewropea f'20 pajjiż fejn l-appoġġ baġitarju kien fattur notevoli ġeneralment ikkonfermaw ir-relevanza tiegħu, u rrakkomandaw li jkompli. Imma, b'mod ġenerali, kien diffiċli li wieħed jivvaluta l-impatt tal-appoġġ baġitarju fuq it-tnaqqis tal-faqar u indikaturi oħra tal-MDGs. Kwistjonijiet ta' attribuzzjoni, kif ukoll ta' valutazzjoni ta' x'seta' ġie miksub permezz ta' strumenti alternattivi (il-kontrofattwali), instab li kienu partikolarment diffiċli. Dawn jenfasizzaw li l-appoġġ baġitarju ma għandux jitqies bħala għan fih innifsu, imma bħala mezz li jtejjeb l-effettività tal-għajnuna u li jikseb ir-riżultati. U filwaqt li l-piż ta' kull wieħed jista' jvarja minn reġjun għall-ieħor, numru ta' prinċipji ewlenin għandhom jiġu identifikati biex jiggwidaw it-tfassil u l-implimentazzjoni tal-appoġġ baġitarju li dwaru hemm livell għoli ta' kunsens fost il-fornituri tal-appoġġ baġitarju tal-UE: L-appoġġ baġitarju bħala parti minn pakkett: L-appoġġ baġitarju għandu jkun aktar minn trasferiment finanzjarju – hu parti minn pakkett li jinkludi djalogu politiku, valutazzjoni tal-prestazzjoni, bini ta' kapaċità u interventi oħra ta' appoġġ. Sjieda : L-appoġġ baġitarju għandu jappoġġja pajjiż biex jikseb l-istrateġiji tal-iżvilupp tiegħu stess. Riżultati : L-appoġġ baġitarju għandu jiffoka fuq il-kisba ta' riżultati li jistgħu jitkejlu. Prevedibbiltà: L-appoġġ baġitarju għandu jiġi pprovdut b'mod li jiżgura livell għoli ta' prevedibbiltà, kemm fuq medda qasira ta' żmien kif ukoll fit-tul. Responsabbiltà : L-apoġġ baġitarju għandu jiġi pprovdut b'mod li jsaħħaħ ir-responsabbiltà tal-gverinijiet lejn iċ-ċittadini, il-parlamenti nazzjonali u l-istituzzjonijiet supremi tal-awditjar tagħhom dwar il-mod kif ir-riżorsi qed jiġu użati u r-riżultati li qed jinkisbu (responsabbiltà domestika). L-appoġġ baġitarju għandu wkoll jiġi pprovdut b'mod li jiżgura li l-pajjiżi msieħba jonoraw l-impenji tagħhom lid-donaturi u d-donaturi jonoraw l-impenji tagħhom lill-pajjiżi msieħba (responsabbiltà reċiproka). Approċċ aktar ikkoordinat tal-UE L-appoġġ baġitarju tal-UE għandu jkun ipprovdut b'mod li jtejjeb il-koordinazzjoni kemm fi ħdan kif ukoll lil hinn mill-UE, u jsaħħaħ il-koerenza u l-kredibbiltà tal-UE. Appoġġ pubbliku : Biex jiġi żgurat appoġġ pubbliku minn imsieħba interessati fi ħdan l-UE, l-appoġġ baġitarju għandu bżonn li jipprovdu evidenza f'saħħitha tar-riżultati miksuba u l-progress li jkun sar mill-pajjiżi msieħba. Iċ-ċittadini fil-pajjiżi msieħba wkoll għandhom ikunu kapaċi jifhmu u jidentifikaw id-differenza li l-appoġġ baġitarju jkun għamel f'pajjiżhom. L-APPOġġ BAġITARJU: KWISTJONIJIET EWLENIN Hu evidenti wkoll li baqa' numru ta' sfidi biex jitjiebu l-kwalità, il-valur għall-flus u l-impatt tal-appoġġ baġitarju. Il-kwistjonijiet ewlenin fejn hemm anqas ċarezza jew kunsens fuq l-aħjar triq 'il quddiem huma marbuta ma': - Governanza politika u r-rwol tad-djalogu politiku; - Ir-rwol tad-djalogu politiku, ir-rwol tal-kundizzjonalità, u r-rabtiet mal-prestazzjoni u r-riżultati; - Ir-responsabbiltà domestika u reċiproka; - L-ipprogrammar tal-appoġġ baġitarju u l-koerenza ta' dan ma' strumenti oħra; - It-tisħiħ tal-valutazzjoni tar-riskju u t-trattament tal-frodi u l-korruzzjoni; - Appoġġ baġitarju f'sitwazzjonijiet fraġli; - It-tkabbir, il-politika fiskali u l-mobilizzazzjoni tad-dħul domestiku. Dawn il-kwistjonijiet qed jiġu ppreżentati fid-dettall hawn taħt, flimkien ma' numru ta’ mistoqsijiet li l-partijiet interessati qed jiġu mistiedna jweġbuhom. Napprezzaw evidenza u eżempji li jappoġġjaw it-tweġibiet. Governanza politika u r-rwol tad-djalogu politiku Il- governanza politika dan l-aħħar ħarġet bħala waħda mill-aktar kwistjonijiet fundamentali fl-appoġġ baġitarju. Il-punt ċentrali hu jekk l-appoġġ baġitarju għandux ikun espliċitament marbut mal-kundizzjoni li l-pajjiż jirrispetta l-prinċipji bażiċi tad-drittijiet tal-biedem, il-prinċipji demokratiċi tal-istat tad-dritt (ara l-Kaxxa 5); jew jekk dawn għandhomx jibqgħu prinċipji li jirfdu l-kooperazzjoni kollha kemm hi u għalhekk japplikaw għall-partenarjat sħiħ u għall-modalitajiet kollha tal-għajnuna. Il-gwida tal-OECD-DAC tissuġġerixxi li l-'kundizzjonalità politika m'għandhiex tkun marbuta b'mod speċifiku mal-appoġġ baġitarju jew kwalunkwe strument individwali ta' għajnuna, imma pjuttost għandha tiġi trattata fil-kuntest tad-djalogu ġenerali tal-politika bejn il-pajjiż imsieħeb u l-pajjiż tad-donaturi tiegħu[2]. Fl-aħħar mill-aħħar, l-appoġġ baġitarju dejjem jista' jiġi sospiż (l-istess bħal proġett) jekk ikun hemm ksur serju tal-prinċipji bażiċi. Dan hu konformi mad-diversi strumenti tal-UE u ftehimiet li jirregolaw l-iżvilupp u kooperazzjoni usa' fir-reġjuni kollha[3], u meħtieġ sabiex tinżamm il-leġittimità tal-apoġġ baġitarju u tal-għajnuna b'mod ġenerali. L-esperjenza wriet li s- sensittivitajiet politiċi x'aktarx tkun aktar qawwija fil-każ tal-appoġġ baġitarju, l-aktar fil-kuntest tal-appoġġ baġitarju ġenerali (ABĠ), għaliex hu ġeneralment meqjus bħala li jipprovdi approvazzjoni tal-linja politika ġenerali tal-pajjiż imsieħeb. L-appoġġ baġitarju settorjali (ABS) xi kultant hu meqjus bħala anqas vulnerabbli għar-riskju politiku minħabba li jappoġġja l-implimentazzjoni ta' politika speċifika settorjali minflok il-politika ġenerali tal-iżvilupp tal-pajjiż imsieħeb. Bosta donaturi skoprew li meta mqabbel mal-ABĠ, l-ABS hu aktar faċli li jiġi ġġustifikat ma' dawk li jħallsu t-taxxi u mal-parlamenti nazzjonali f'pajjiżhom fil-kuntest tad-diffikultajiet politiċi jew il-korruzzjoni li tkun qed tikber fil-pajjiż imsieħeb. Kaxxa 5: Il-prinċipji Bażiċi F'din il-Green Paper, il-'prinċipji bażiċi' jirreferu biss għall-elementi politiċi riflessi fid-dispożizzjonijiet ġenerali tat-Trattat ta' Lisbona tal-UE dwar l-azzjoni esterna tal-Unjoni. Dan jiddikjara li: "L-azzjoni tal-Unjoni fix-xena internazzjonali għandha tkun iggwidata mill-prinċipji li ispiraw il-ħolqien tagħha stess, l-iżvilupp u t-tkabbir, u li hija tfittex li tippromwovi fil-bqija tad-dinja: id-demokrazija, l-Istat tad-dritt, l-universalità u l-indiviżibbiltà tad-drittijiet tal-bniedem u l-libertajiet fundamentali, ir-rispett għad-dinjità tal-bniedem, il-prinċipji tal-ugwaljanza u s-solidarjetà, u r-rispett għall-prinċipji tal-Karta tan-Nazzjonijiet Uniti u tad-dritt internazzjonali.'' (l-Artikolu 21.1). Dubji reċenti dwar il-governanza politika f'bosta pajjiżi li qed jiżviluppaw li qed jirċievu appoġġ baġitarju imbuttaw lil xi donaturi biex jixħtu l-attenzjoni tagħhom fuq il-prinċipji bażiċi tad-drittijiet tal-bniedem, il-prinċipji demokratiċi tal-istat tad-dritt, bl-appoġġ baġitarju jintuża b'mod aktar speċifiku biex jinkisbu objettivi politiċi usa'. In-natura intrinsikament politika tal-baġit nazzjonali, u r-rabta mill-viċin bejn id-djalogu fuq il-prijoritajiet politiċi ġenerali tal-pajjiż imsieħeb u d-djalogu politiku, qajmet żewġ kwistjonijiet ewlenin. L-ewwel kwistjoni għandha x'taqsam mad-dispożizzjoni tal-appoġġ baġitarju meta l-prinċipji bażiċi jmorru għall-agħar. Xi donaturi jissospendu l-ħlasijiet, filwaqt li oħrajn jibqgħu għaddejjin. Reazzjonijiet inkonsistenti bħal dawn jistgħu jibagħtu l-messaġġ żabljat lill-gvernijiet imsieħba kkonċernati. Dan jenfasizza l-ħtieġa biex jinstab approċċ li jtejjeb il-koerenza u l-konsistenza, li jiżgura li l-prinċipji bażiċi jkunu kondiviżi u rispettati, filwaqt li jiġu protetti l-benefiċċji tal-iżvilupp inkluża l-prevedibbiltà tal-appoġġ baġitarju. It-tieni kwistjoni għandha x'taqsam mal-aktar forum adattat għad-djalogu u l-governanza politika. Uħud kienu tal-fehma li għandhom jintużaw it-toroq kollha possibbli, inklużi l-proċessi tad-djalogu tal-appoġġ baġitarju, bħala mezz biex jiġu mmassimizzati l-pressjoni u l-influwenza fuq kwistjonijiet politiċi fir-rigward tal-prinċipji bażiċi. Oħrajn jipperferu forum aktar politiku, separat imma li jinforma u jkun infurmat bil-proċessi ta' djalogu tal-appoġġ baġitarju, b'rikonoxximent li dawn il-prinċipji jirfdu l-koperazzjoni kollha għall-iżvilupp. M1: L-operazzjonijiet tal-appoġġ baġitarju (speċjalment l-appoġġ baġitarju ġenerali) għandhom ikunu mfassla b'mod li jirriflettu ahjar l-impenn tal-pajjiżi msieħba għall-prinċipji bażiċi u, jekk iva, kif? B'mod partikolari, il-programmi tal-appoġġ baġitarju jagħmlu użu akbar mill-kundizzjonalità tal-governanza politika? Hemm każ biex wieħed jadotta approċċ differenti għall-kundizzjonalità politika għall-appoġġ baġitarju ġenerali aktar milli settorjali? M2: Kif jista' l-proċess tal-appoġġ baġitarju jkun konsistenti mad-djalogu tal-politika fuq il-prinċipji bażiċi filwaqt li jżomm l-iffukar tad-djalogu politiku dwar l-objettivi miftiehma għall-iżvilupp? X'jistgħu jkunu l-fora relevanti u l-livell adattat li jinvolvu lid-donaturi u l-pajjiż imsieħeb biex iqajmu u jiddiskutu d-dubji rigward il-prinċipji bażiċi? M3: Kif jistgħu d-donaturi jwieġbu tassew għal xi deterjorament tal-prinċipji bażiċi filwaqt li jħarsu l-benefiċċji tal-iżvilupp u l-prevedibbiltà tal-appoġġ baġitarju? | Ir-rwol tad-djalogu politiku, ir-rwol tal-kundizzjonalità, u r-rabtiet mal-prestazzjoni u r-riżultati Id- djalogu politiku mxettel fil-proċessi baġitarji u politiċi tal-pajjiż imsieħeb innifsu hu essenzjali biex jiġi żgurat li l-miżuri politiċi li kellhom jilħqu l-miri miftiehma jkunu identifikati, diskussi u jkollhom ir-riżorsi kollha. Djalogu bħal dan jgħin biex jiżgura rabta aktar ċara bejn l-użu tar-riżorsi (inkluż l-appoġġ baġitarju) u l-kisba tar-riżultati, u għad jonqos ħafna x'isir biex dan ikun effettiv. Pereżempju, hu partikolarment importanti li jiġi żgurat li l-istituzzjonijiet supremi tal-awditjar, il-parlament nazzjonali, is-settur privat u l-organizzazzjonijiet tas-soċjetà ċivili jiġi involuti aktar. L-oqsma relevanti għad-djalogu politiku jkunu jinkludu strateġija ta' tkabbir; Stabbiltà makoroekonomika; politika fiskali (inkluża l-ġenerazzjoni tad-dħul domestiku u l-kompożizzjoni tal-baġit fil-livelli ċentrali u deċentralizzati); politiki settorjali (speċjalment setturi soċjali); protezzjoni soċjali (inkluż l-użu ta' skemi kundizzjonali ta' trasferiment ta' kontanti[4]); ġestjoni finanzjarja pubblika; kwistjonijiet usa' ta' governanza, bħall-ġlieda kontra l-korruzzjoni u l-frodi, ir-riforma fis-settur pubbliku, inkuża d-deċentralizzazzjoni. Id- djalogu politiku hu distint mid- djalogu aktar wiesa' tal-politika fuq il-prinċipji bażiċi, għalkemm naturalment dawn iridu jikkumplimentaw u jsaħħu lil xulxin. Il-kwistjoni ewlenija hi kif dan id-djalogu politiku jsir aktar effettiv. Dan iqajjem kwistjonijiet dwar l-ambitu tad-djalogu u dwar il-ħiliet li hemm bżonn; ir-rwol tal-kundizzjonalità; u l-bilanċ xieraq bejn ir-riformi politiċi u l-indikaturi tar-riżultati fl-oqsma tal-valutazzjoni tal-prestazzjoni u bħala fatturi li jattivaw il-ħlasijiet (ara wkoll il-Kaxxa 6). Kaxxa 6: Djalogu politiku dwar l-appoġġ baġitarju f'kuntesti differenti L-objettivi tal-appoġġ baġitarju jsuqu l-ambitu u n-natura tad-djalogu politiku f'kull pajjiż. Dawn l-objettivi u l-istruttura tad-djalogu jvarjaw skont iċ-ċirkostanzi tal-pajjiż u l-livell tal-iżvilupp, in-natura tar-relazzjoni tiegħu mal-UE u l-involviment aktar wiesa' tad-donatur. Pereżempju, f'pajjiż Asjatiku jew tal- Amerika Latina , fejn l-għajnuna u l-appoġġ baġitarju tipikament jirrappreżentaw proporzjon żgħir ħafna tal-baġit nazzjonali, id-djalogu jista' jkun differenti ħafna minn dak fil-biċċa l-kbira tal-pajjiżi Afrikani . Fi stati gżejjer żgħar u pajjiżi u territorji extra-Ewropej (Overseas Countries and Territories, OCTs) hemm xi sfidi partikolari li jridu jiġu indirizzati, bħal amministrazzjonijiet nazzjonali żgħar, in-nuqqas ta' politiki u strateġiji nazzjonali robusti, in-nuqqas ta' oqfsa makroekonomiċi indipendenti, u involviment limitat u koordinazzjoni ma' donaturi oħra. F' pajjiżi ġirien u ta' tkabbir tal-UE , fejn il-politika tal-UE hi aktar iffukata fuq il-promozzjoni tar-riformi orjentati lejn l-UE immirati lejn assoċjazzjoni politika u integrazzjoni ekonomika, hemm enfasi aktar b'saħħitha fuq li l-pajjiżi msieħba jinżammu responsabbli għal miżuri speċifiċi ta' politika biex jiġu implimentati fuq medda qasira ta' żmien, bħall-adozzjoni ta' leġiżlazzjoni armonizzata mal- acquis tal-UE fil-kuntest tal-Ftehimiet ta' Stabbilizzazzjoni u Assoċjazzjoni li bħalissa qed jiġu nnegozjati fil-każ tal-pajjiżi ġirien. Djalogu politiku effettiv jirrikjedi persunal imħarreġ tad-donaturi bl-opportunità u l-ħila li jappoġġja kemm l-analiżi tal-problemi li jxekklu l-progress lejn l-objettivi mitftiehma tal-iżvilupp, kif ukoll l-identifikazzjoni u l-implimentazzjoni tas-soluzzjonijiet. Imma bosta donaturi m'għandhomx ir-riżorsu umani meħtieġa biex jisfruttaw bl-aħjar mod dawn l-opportunitajiet. Dan jista' jiġi parzjalment indirizzat billi jkun hemm kondiviżjoni akbar tal-kompetenza u li titfassal diviżjoni tax-xogħol aktar effettiva bejn dawk li jipprovdu l-appoġġ baġitarju, imma tirrikjedi wkoll investiment imġedded fil-ħiliet addatati. Kundizzjonalità. L-għażla tal-pajjiiżi għall-appoġġ baġitarju fuq il-bażi ta' kriterji ta' eliġibbiltà definiti hi applikazzjoni leġittima tal-kundizzjonalità. Il-Kummissjoni bħalissa tastjeni milli tiffissa rekwiżiti minimi meta tqis li l-impenji minn pajjiż msieħeb għall-proċess ta' riforma huma aktar importanti. Il-ħlasijiet jistgħu jkunu bil-kundizzjoni ta' kumbinazzjoni ta' miżuri ta' politika u riżultati miksuba. Il-bilanċ tal-evidenza jissuġġerixxi li l-kundizzjonalità ta' politika qajla kienet effettiva fl-iżgurar tar-riformi sakemm ma jkunx hemm kostitwenza domestika f'saħħitha favurhom. Bosta atturi, inkluża l-Kummissjoni Ewropea, poġġew aktar enfasi fuq ir-riżultati, għalkemm il-maġġoranza tal-programmi jikkumbinaw kemm l-indikaturi tal-politiki u kemm dawk tar-riżultati. Prestazzjoni u riżultati. Il-Kummissjoni Ewropea kienet tal-ewwel li użat l-indikaturi tal-konklużjonijiet u r-riżultati fil-programmi tagħha ta' appoġġ baġitarju bħala bażi għall-valutazzjoni tal-progress u biex tiddeċiedi l-ammont tal-ħlasijiet fi proporzjonijiet varjabbli, u bħala punt fokali tad-djalogu politiku[5]. Dan l-approċċ kien maħsub biex jipprovdi spazju lill-gvernijiet imsieħba biex jistabbilixxu l-politiki tagħhom (b'konformità mal-prinċipju tas-sjieda), u biex jistimulaw diskussjoni dwar kif u għaliex il-politiki jirnexxilhom jiksbu r-riżultati (jew le). Madankollu, qamu xi dubji u sfidi, dwar il-kapaċità tas-servizzi tal-istatistika li jipproduċu, janalizzaw u jqassmu regolarment statistika relevanti, oġġettiva u ta' kwalità tajba biex tkejjel il-prestazzjoni; l-għażla ta' indikaturi u miri; jekk l-aħjar mod biex tkejjel il-prestazzjoni hux b'iffukar strett fuq dawk l-indikaturi jew b'valutazzjoni aktar ħolitistika tal-prestazzjoni; u b'mod aktar wiesa', sa liema punt il-pajjiżi jsibu l-kundizzjonalità bbażata fuq ir-riżultati bħala inċentiv effettiv biex jaħdmu aħjar. L-iffukar fuq ir-riżultati hu ċentrali. Imma l-attribuzzjoni finanzjarja tal-appoġġ baġitarju għal riżultati speċifiċi hu aktar diffiċli milli għal proġetti, għax il-fondi tal-appoġġ baġitarju jkunu assorbiti mill-baġit ġenerali tal-pajjiż u ma jistgħux jiġu rintraċċati. Imma xorta waħda d-donaturi għandhom jagħtu kont tal-użu tal-appoġġ baġitarju, allura hu importanti għall-UE – u għal dawk l-Ewropej li jħallsu t-taxxa - li jkollhom evidenza aktar ċara li l-pajjiżi msieħba qed jonfqu r-riżorsi kif inhu maħsub, jiksbu valur tajjeb għall-flus, u jiksbu l-oġġettivi miftiehma. Dan jitlob mid-donaturi li jiffukaw l-analiżi u d-djalogu politiku fuq l-oqsma kbar kollha tas-sistema tal-ġestjoni finanzjarja pubblika (public financial management, PFM) u l-politika fiskali ta' gvern, li tkopri ċ-ċiklu baġitarju kollu kemm hu. Fejn jiġu identifikati n-nuqqasijiet, il-gvernijiet iridu juru li għandhom programm ta' riforma PFM relevanti u kredibbli, u biex juru progress mal-milja taż-żmien. Analiżi aħjar tal-baġit hi importanti biex titjieb il-prestazzjoni tas-sistema tal-ġestjoni finanzjarja u l-benefiċċji tal-appoġġ baġitarju. Id-definizzjoni ta' objettivi speċifiċi, indikaturi ta' prestazzjoni u qafas ta' monitoraġġ li turi kif l-appoġġ baġitarju jikkontribwixxi għall-iżvilupp u t-tnaqqis tal-faqar, tibqa' sfida ewlenija. F'dan il-kuntest kapaċità ta' żvilupp misjuqa mid-domanda u orjentata lejn ir-riżultati, f'linja partikolari ta' Ministeru u korpi ċentrali bħall-Istituzzjonijiet Supremi tal-Awditjar u l-Parlamenti Nazzjonali, hi ta' importanza fundamentali. M4: Kif jista' d-djalogu politiku ma' pajjiżi msieħba jsir aktar effettiv u inklużiv fil-kontribut biex jinkisbu r-riformi, ir-riżultati u l-objettivi? M5: Kif jistgħu d-donaturi jużaw il-kundizzjonalità tal-appoġġ baġitarju biex jgħinu fit-titjib tal-prestazzjoni, u kif huma għandhom iwieġbu meta dawk il-kundizzjonijiet miftiehma ma jiġux issodisfati? M6: Kif jistgħu l-oqsfa għas-sorveljanza tal-prestazzjoni jiġu mtejba u kif jistgħu l-indikaturi tar-riżultati jiġu użati bl-aħjar mod fl-operazzjonijiet tal-appoġġ baġitarju sabiex jiġu indirizzati l-isfidi identifikati hawn fuq? M7: Kif tista' l-prestazzjoni tas-sistema tal-ġestjoni finazjarja pubblika, li tinkludi l-miżuri għall-prevenzjoni tal-frodi, u valur għall-flus tal-fondi tal-appoġġ baġitarju jiġu msaħħa bl-aħjar mod? L-UE għandha tistabbilixxi rekwiżiti minimi għall-appoġġ baġitarju? | Ir-responsabbiltà Ir- responsabbiltà domestika tirreferi għall-fatt li l-gvern imsieħeb ikun responsabbli lejn iċ-ċittadini u l-istituzzjonijiet tiegħu (il-parlament, l-istituzzjonijiet supremi tal-awditjar) dwar għażliet ta' politika, ġbir tad-dħul, allokazzjonijiet baġitarji u riżultati. Hija relazzjoni minn żewġ naħat. Iċ-ċittadini u l-istituzzjonijiet għandhom ikunu wkoll kapaċi jżommu lill-gvern responsabbli għall-azzjonijiet tiegħu, jiċċekkjaw l-abbużi u jimponu sanzjonijiet. Ir-responsabbiltà ta' gvern imsieħeb lejn iċ-ċittadini tiegħu hu mutur ewlieni biex jinkisbu r-riżultati tal-iżvilupp. Hu komponent importanti tas- sjieda ta' pajjiż tal-aġenda tiegħu tal-iżvilupp. L-appoġġ baġitarju fil-prinċipju hu suġġett għal skutinju domestiku parlamentari u tal-awditjar u ta' spiss ma jiġrix l-istess għall-appoġġ tal-proġetti. Madankollu, sa issa kien hemm biss titjib modest fir-responsabbiltà domestika, in parti għax it-tibdiliet jieħdu ż-żmien biex jiġu implimentati u biex joħorġu r-riżultati. Il-kapaċità tas-soċjetà ċivili u tal-parlamenti li jsejħu għal għażliet ta' politika u jissorveljawhom fi proċess baġitarju trasparenti għadha dgħajfa f'bosta pajjiżi. L-appoġġ ta' istituzzjonijiet u sistemi nazzjonali ta' responsabbiltà hi sfida kbira għad-donaturi involuti fl-appoġġ baġitarju. It-talbiet tad-donaturi jistgħu jieħdu s-soppravvent fuq ir-responsabbiltà domestika billi jimponu aġenda misjuqa minn barra, b'mod partikolari meta l-ammont tal-appoġġ baġitarju jkun notevolment relattiv għall-baġit nazzjonali. Kontabilità reċiproka. Mill- perspettiva tad-donaturi , ir-responsabbiltà reċiproka hi importanti biex il-gvernijiet donaturi jkunu jistgħu juru lill-parlamentari tagħhom u lil dawk li jħallsu t-taxxa li huma qed jużaw b'mod effettiv il-fondi pubbliċi allokati għall-għajnuna għall-iżvilupp. Mill-perspettiva tal-pajjiżi msieħba, huma jeħtieġu impenji kredibbli mid-donaturi biex jipprovdu informazzjoni fil-ħin, prevedibbli, trasparenti u komprensiva dwar il-flussi ta' għajnuna (speċjalment l-appoġġ baġitarju), allineat maċ-ċiklu baġitarju, biex iħejju u jimplimentaw baġits komprensivi li jwettqu l-objettivi u l-prijoritajiet ta' politika miftiehma. Il-pajjiżi msieħba jeħtieġ ukoll li jinfurmaw lill-pubbliku ġenerali dwar ir-relazzjoni tagħhom mal-komunità tad-donaturi u l-benefiċċji mill-appoġġ baġitarju. Madankollu, is-soċjetà ċivili tista' biss tgħarbel l-azzjoni tal-gvern meta jkollha informazzjoni importanti dwar l-ammonti li ntefqu fuq miżuri speċifiċi u fejn jeżistu l-kanali biex l-awtoritajiet xierqa, inklużi d-donaturi, jiġu infurmati dwar il-frodu u l-korruzzjoni. M8: Kif jista' l-appoġġ baġitarju (inkluż il-bini tal-kapaċità) jista' jiġi mfassal biex isaħħaħ ir-responsabbiltà domestika u s-sjieda fil-pajjiżi msieħba, inkluża l-parteċipazzjoni tas-soċjetà ċivili? M9: Kif tista' r-responsabbiltà reċiproka tikkontribwixxi aħjar biex issaħħa l-effettività tal-operazzjonijiet tal-appoġġ baġitarju kemm fil-pajjiżi donaturi u kemm f'dawk imsieħba? M10: X'tip ta' attivitajiet ta' viżibbiltà/komunikazzjoni għandhom isiru kemm fil-pajjiżi donaturi kif ukoll f'dawk imsieħba bies tissaħħaħ ir-responsabbiltà reċiproka? | L-ipprogrammar tal-appoġġ baġitarju u l-koerenza ta' dan ma' strumenti oħra Id-deċiżjoni dwar kemm jiġi pprovdut appoġġ baġitarju u jekk jiġix ipprovdut jeħtieġ li titqiegħed fil-kuntest aktar wiesa' tal-ipprogrammar tal-għajnuna kollu kemm hu, li fih l-allokazzjonijiet tal-pajjiżi huma ddeterminati minn kombinazzjoni ta' ħtiġijiet u prestazzjoni. Dan jorbot ma' analiżi politika ekonomika aktar wiesgħa, mal-ħtiġijiet ta' finanzjament ta' kull pajjiż (b'kunsiderazzjoni tal-qafas fiskali fuq terminu medju ta' żmien u l-kontribuzzjoni li jistgħu jipproponu d-donaturi u l-kredituri), mal-kapaċità ta' assorbiment, u mar-riskji u l-benefiċċji mistennija mill-appoġġ baġitarju. Ladarba jkun analizzat b'mod adegwat il-kuntest tal-pajjiż, inklużi l-isforzi tal-gvern biex jiġu indirizzati n-nuqqasijiet identifikati u r-riżorsi domestiċi disponibbli, l-objettivi tal-kooperazzjoni u l-modalità l-aktar xierqa tal-għajnuna - li għandha tikkunsidra wkoll mistoqsijiet ta' kosti ta' unità u valur għall-flus – tkun tista' tiġi deċiża skont dan. Flimkien mal-appoġġ baġitarju jeżistu bosta modalitajiet oħra , li jinkludu fondi vertikali, fondi fiduċjati ma' multidonaturi (multi-donor trust funds, MDTFs), fondi kondiviżi, u għajnuna għal proġetti. Firxa wiesgħa ta' modalitajiet ta' implimentazzjoni hi meqjusa bħala vantaġġ biex jitwieġbu ħtiġijiet u objettivi differenti f'kuntesti differenti. F'xi oqsma, bħall-appoġġ għal Atturi Non Statali jew għall-proċessi elettorali, hu evidenti li dan ma jistax u m'għandux jiġi pprovdut bħala appoġġ baġitarju. Għal oħrajn, bħal kompetenza ta' livell għoli jew investimenti kbar f'infrastruttura, ikollu jiġi deċiż fi ħdan il-kuntest tal-pajjiż x'inhi l-modalità l-aktar xierqa. Fir-rigward tal-appoġġ baġitarju Ġenerali (ABĠ) u l-appoġġ baġitarju Settorjali (ABS), mistoqsija ċentrali hi jekk l-appoġġ baġitarju għal pajjiż partikolari għandux jiffoka fuq firxa aktar wiesgħa ta' oqsma (ABĠ) biex wieħed jieħu stampa wiesgħa tal-politika nazzjonali imma bis-sogru li potenzjalment ikun anqas effettiv fid-djalogu dwar politika settorjali; jew jiffoka fuq setturi speċifiċi (ABS) għal djalogu politiku effettiv, imma bis-sogru li jittraskura kwistjonijiet ta' riforma aktar wiesa' u transsettorjali meħtieġa biex isir progress fil-livell settorjali. F'bosta każi l-UE tuża ż-żewġ modalitajiet flimkien (ara t-taqsima 2). M11: Xi kriterji għandha tuża l-Kummissjoni biex tinforma d-deċiżjonijiet dwar kemm appoġġ baġitarju għandha tipprovdi lill-pajjiżi eliġibbli, jekk fil-fatt għandha tipprovdi xi ħaġa? M12: X'inhuma l-vantaġġi u l-iżvantaġġi li jiġu pprovduti kemm appoġġ baġitarju ġenerali kif ukoll dak settorjali fl-istess pajjiż, jew li jkollok strument wieħed ta' appoġġ baġitarju? F'liema kuntest l-ABS jista' jitqies bħala tip aktar effettiv ta' appoġġ baġitarju? M13: X'inhuma l-vantaġġi u l-iżvantaġġi, kif ukoll l-arranġamenti prattiċi biex jiġu żgurati l-konsistenza u l-koordinazzjoni effettiva, tal-użu ta' firxa wiesgħa ta' strumenti ta' għajnuna flimkien mal-ABĠ/ABS? | It-tisħiħ tal-valutazzjoni tar-riskju u t-trattament tal-frodi u l-korruzzjoni L-effiċjenza u l-impatt tal-forom kollha tal-għajnuna (minn għajnuna għal proġetti sa appoġġ baġitarju) tista' tiġi mminata minn numru ta' riskji li għandhom jiġu mrażżna. L-appoġġ baġitarju u l-għajnuna għal proġetti għandhom profili ta' riskju differenti; Dan jimplika li l-ġestjoni tar-riskju għandha tkun adattata għall-metodu tat-twassil tal-għajnuna li jintgħażel. Il-qafas tal-ġestjoni tar-riskju għall- appoġġ baġitarju hu għodda importanti fil-valutazzjoni tal-eliġibbiltà, fl-ipprogrammar, fit-tfassil u fl-implimentazzjoni tal-programmi u biex jiġi infurmat id-djalogu politiku. Hu strument li jipproteġi l-interessi finanzjarji tal-UE. Hu wkoll dimensjoni kruċjali tal-approċċ dinamiku tal-eliġibbiltà (ara l-Kaxxa 1) li jirrikjedi impenn kredibbli għar-riformi relevanti u evidenza ta' progress. F'dal-kuntest hu importanti li l-approċċi tal-ġestjoni tar-riskju għall-appoġġ baġitarju jiġu riveduti u msaħħa. Deterjorament serju ta' governanza politika f'pajjiż imsieħeb li jkun qed jirċievi appoġġ baġitarju, jista' jnaqqas b'mod notevoli r-rwol tal-baġit nazzjonali bħala espressjoni ta' interess komuni, u jiġu mminati l-mekkaniżmi tar-responsabbiltà. Min-naħa tiegħu dan jista' jimmina l-isforzi tal-appoġġ baġitarju biex jittejbu t-trasparenza u l-ġestjoni tal-baġit innifsu u fl-aħħar mill-aħħar titnaqqar l-effettività tal-appoġġ baġitarju. Il-valutazzjoni tar-riskji politiċi tirrikjedi djalogu politiku intensifikat li jkopri aspetti relevanti għall-appoġġ baġitarju. Il-ġestjoni tar-riskji makroekonomiċi u tal-iżvilupp tirrikjedi proċessi ta' monitoraġġ f'saħħithom, djanjostiki u indikaturi relevanti, u l-kapaċità li jiġu identifikati u adottati miżuri korrettivi fejn hu xieraq. Il-kwalità limitata u d-disponibbiltà tal-indikaturi relevanti tikkomplika l-ġestjoni ta' dawn ir-riskji. It-titjib tal-ambitu u l-kwalità tad-djalogu fuq il-progress fl-implimentazzjoni tal-politiki nazzjonali u settorjali hu vitali għall-ġestjoni effettiva tar-riskju. It-titjib tal-għodod għall-ġestjoni tar- riskju finanzjarju hu essenzjali. Fl-operazzjonijiet kollha tal-appoġġ baġitarju l-fondi tad-donaturi huma ġestiti skont is-sistemi u l-proċeduri tal-ġestjoni finanzjarja pubblika u l-kontrolli tal-pajjiżi imsieħba (ara l-Kaxxa 1). Ir-riskju finanzjarju hu vvalutat u mnaqqas permezz ta' progress fl-effiċjenza u l-effettività tal- ġestjoni finanzjarja pubblika. Djanjostiki regolari jistgħu jidentifikaw oqsma ewlenin ta' progress u dgħufijiet u jinfurmaw it-tħejjija u l-implimentazzjoni ta' programmi ta' riforma li r-relevanza u l-kredibbiltà tagħhom hi ssoerveljata permezz tal-proċessi tal-appoġġ baġitarju. Il-korruzzjoni hi theddida serja għall-isforzi tal-iżvilupp. Din timmina d-demokrazija u l-governanza tajba billi taqleb ta' taħt fuq il-proċessi formali u istituzzjonali. Il-korruzzjoni timmina l-iżvilupp ekonomiku billi tiddevja r-riżorsi minn nefqiet prijoritarji, b'mod li jiġġenera l-ineffiċjenza u n-nuqqas ta' konformità mal-proċeduri tal-akkwist fit-twassil tas-servizz pubbliku. Il-korruzzjoni hi waħda mill-fatturi ewlenin li jaffettwaw il-bilanċ tal-argumenti favur u kontra l-appoġġ baġitarju. Jekk il-korruzzjoni ma tiġix ittrattata tonqos il-fiduċja, kemm fil-baġit kif ukoll fl-ekonomija politika aktar wiesgħa, u jkollha implikazzjonijiet kemm għar-riskji finanzjarji kif ukoll għall-iżvilupp. Barra minn hekk, minħabba li l-fondi tad-donaturi jiġu amalgamati mal-baġit nazzjonali, l-allegazzjonijiet ta' frodi u korruzzjoni ma jitressqux għall-attenzjoni tal-Kummissjoni jew jiġu investigati minnha. U f'każijiet ta' miżapproprjazzjoni tar-riżorsi baġitarji tal-pajjiżi msieħba, l-irkupru tal-fondi jista' jkun diffiċli. Għalhekk hu essenzjali li d-djalogu mill-qrib mal-gvernijiet imsieħba dwar kwistjonijiet ta' korruzzjoni jinżamm għaddej mill-Kummissjoni u mill-komunità ġenerali tad-donaturi. Fatturi esterni ta' riskju, bħal fatturi finanzjarji u ekonomiċi internazzjonali ħżiena, il-volatilità fil-prezzijiet tal-komoditajiet, jew kundizzjonijiet klimatiċi, jistgħu wkoll jaffettwaw is-sitwazzjoni baġitarja ta' pajjiż imsieħeb. Il-kriżi finanzjarja u ekonomika globali reċenti wriet kemm id-dinja hija interkonnessa. Is-sorveljanza u t-tnaqqis rar-riskji esterni jirrikjedu miżuri biex tiżdied ir-reżistenza tal-baġit, inkluża l-istruttura tat-tassazzjoni, għal xokkijiet esterni. M14: Kif jistgħu r-riskji t'hawn fuq jiġu vvalutati bl-aħjar mod fi ħdan qafas komprensiv u jiġu ġestiti biex titjieb l-effettività tal-appoġġ baġitarju? M15: X'tip ta' miżuri għandha tapplika l-UE jekk il-livell ta' riskju jkun ikkunsidrat għoli fir-rigward tal-frodi u l-korruzzjoni? M16: Kif jistgħu d-donaturi jirrispondu tassew, inkluż b'miżuri finanzjarji korrettivi, għal każijiet ta' korruzzjoni jew frodi ta' skala kbira fl-implimentazzjoni tal-politiki li jibbenefikaw mill-appoġġ baġitarju? | Appoġġ baġitarju f'sitwazzjonijiet ta' fraġilità L-appoġġ baġitarju jista' jkun fundamentali biex jgħin il-provvediment ta' livell ta' stabbiltà ekonomika u politika f'pajjiżi f'sitwazzjonijiet ta' fraġilità. Kaxxa 7: Sitwazzjonijiet ta' fraġilità. Din hi sitwazzjoni fejn jinkiser il-kuntratt soċjali minħabba l-kapaċità jew l-abbiltà tal-Istat li jaqdi l-funzjonijiet bażiċi tiegħu, jew li jissodisfa l-obbligi tiegħu rigward: it-twassil ta' servizzi, ġestjoni tar-riżorsi, stat tad-dritt, ugwaljanza fl-aċċess għall-poter, sigurtà u sikurezza għall-poplu u l-ħarsien u l-promozzjoni tad-drittijiet u l-libertajiet taċ-ċittadini. B'mod ġenerali, il-ħruġ ta' pajjiż minn kriżi fih tliet fażijiet suċċessivi, li ta' spiss jirkbu fuq xulxin, li fihom jintervjenu l-imsieħba u d-donaturi politiċi: Il-fażi tal-emerġenza, li hi segwita mill-istudju tal-bini tal-paċi, li tiġbor fiha rijabilitazzjoni soċjali u ekonomika u l-bidu tal-bini mill-ġdid tal-istituzzjonijiet. It-tielet stadju hu l-istabbilizzazzjoni makroekonomika (b'mod ġenerali immarkata mill-bidu mill-ġdid tal-għajnuna mill-IFIs ladarba jkunu tħallsu l-arretrati), li twassal għall-iżvilupp. Kull fażi hekk kif il-pajjiż joħroġ mill-kriżi, toffri tieqa ta' opportunità biex jiġi deċiż jekk għandux jingħata l-appoġġ baġitarju. Filwaqt li r-riskji fihom infushom huma għoljin, il-kosti tan-nuqqas ta' intervent, u l-benefiċċji (pereżempju ż-żamma tal-funzjonijiet bażiċi tal-istat bħat-twassil tas-servizzi u s-sigurtà) ta' appoġġ effettiv, jistgħu jiġu ogħla minn hekk. Il-kriterji tal-eliġibbiltà jeħtieġ li jiġu interpretati biex jirriflettu l-kapaċità , l-impenn u l-potenzjal tal-progress attwali tal-pajjiż imsieħeb. Imma koordinazzjoni aktar f'saħħitha fost dawk id-donaturi li huma lesti jappoġġjaw l-istabbiliment mill-ġdid tal-istat hi essenzjali biex jiġu żgurati valutazzjoni u ġestjoni tar-riskji kif suppost u kontinwi, sorveljanza rigoruża tal-progress, u sensittività fit-tfassil. Il-Kummissjoni qed taħdem fuq 'dokument ta' approċċ komuni' mal-FMI, mal-Bank Dinji, u mal-Bank Afrikan għall-Iżvilupp. Minkejja dan, huma relattivament ftit id-donaturi bilaterali li fil-preżent qed jipprovdu appoġġ baġitarju lil pajjiżi f'sitwazzjoni ta' fraġilità. M17: L-appoġġ baġitarju għandu jintuża għall-promozzjoni tal-istabbiltà fi stati fraġli, u jekk iva, kif? | It-tkabbir, il-politika fiskali u l-mobilizzazzjoni tad-dħul domestiku Kemm l-istrateġiji tal-iżvilupp tal-pajjiżi msieħba kif ukoll l-attenzjoni tal-UE qed jiffukaw dejjem aktar fuq l-importanza tat- tkabbir ekonomiku sostenibbli, minbarra t-twassil tas-servizzi soċjali. Għalhekk, hu meħtieġ li jiġi żgurat li l-għajnuna għall-iżvilupp b'mod ġenerali, u l-appoġġ baġitarju b'mod partikolari, ikunu kapaċi wkoll jistimulaw u jikkontribwixxu għal tkabbir inklużiv u żvilupp sostenibbli kif ukoll għat-tnaqqis tal-faqar. Hemm bżonn li tingħata aktar attenzjoni partikolarment għall-identifikazzjoni tal-passi meħtieġa biex jitneħħew restrizzjonijiet vinkolanti għat-tkabbir sostnut, bħal infrastruttura ekonomika inadegwata, burokrazija żejda jew kapital uman limitat. L-appoġġ baġitarju jista' jikkontribwixxi permezz tal-promozzjoni tal-istabbiltà makroekonomika, riformi ewlenin fl-ambjent ekonomiku biex ikun kapaċi jwassal aktar għan-negozju, u allokazzjoni baġitarja aktar effiċjenti. Il-politika fiskali hi suġġett partikolarment importanti għad-djalogu politiku tal-appoġġ baġitarju. L-iżgurar tad-dħul domestiku hu kruċjali biex tiġi żgurata l-istabbiltà makroekonomika, għall-ksib u ż-żamma tal-objettivi tal-iżvilupp, għat-tnaqqis tal-faqar, biex jintlaħqu l-miri tal-MDGs, u għat-tisħiħ tar-responsabbiltà domestika. Hu marbut kemm mat-tkabbir ekonomiku fil-pajjiżi msieħba kif ukoll mas-sistemi tat-taxxi. It-titjib tal-kapaċità tal-pajjiżi li qed jiżviluppaw biex iżidu d-dħul b'konformità mal-prinċipji tal-governanza tajba (trasparenza, skambju ta' informazzjoni u kompetizzjoni b'taxxi ġusti) fit-tul se jgħin lill-pajjiżi li qed jiżviluppaw biex inaqqsu d-dipendenza tagħhom fuq l-għajnuna u biex jikkunsidraw stateġija eventwali ta' tluq mill-appoġġ baġitarju, bil-post tal-appoġġ baġitarju x'aktarx li jinbidel hekk kif il-pajjiżi jsiru anqas dipendenti. Il-pajjiżi msieħba għandhom ikunu impenjati biex isaħħu s-sistemi domestiċi tat-taxxi u r-rati tal-ġbir tagħhom. Bażi wiesgħa tat-taxxa, flimkien ma' ġestjoni effettiva tad-dħul u n-nefqa, iżżid il-leġittimità tal-istat u ssaħħaħ ir-relazzjoni bejn il-gvern u ċ-ċittadin. Parti mill-għan tal-programmi tal-appoġġ baġitarju għandha tkun li tgħin il-kapaċità tal-pajjiż li qed jirċievi biex jindirizza l-isfidi domestiċi u internazzjonali tal-ġbir tad-dħul, sabiex itejjeb ir-responsabbiltà u jkun aktar rajh f'idejh u biex inaqqas id-dipendenza fit-tul. Għalkemm xi programmi tal-appoġġ baġitarju jindirizzaw kwistjonijiet dwar id-dħul, id-djalogu u l-kundizzjonalità fil-programmi tal-appoġġ baġitarju jiffukaw l-aktar fuq it-titjib tal-ġestjoni tan-nefqa pubblika. Għalhekk, hemm ambitu li wieħed jiffoka aktar direttament fuq kwistjonijiet ta' dħul domestiku u governanza tajba fil-qasam tat-taxxa fid-djalogu tal-appoġġ baġitarju, il-kundizzjonalità, il-valutazzjoni tal-prestazzjoni u l-iżvilupp tal-kapaċità (b'kunsiderazzjoni wkoll tal-isfidi partikolari tad-dħul f'pajjiżi li għandhom ħafna riżorsi naturali). Dan jippermetti progressivament it-tijib tar-referenzi u l-konformità mal-prinċipji ta' governanza tajba fil-qasam tat-taxxa (jiġifieri t-trasparenza, l-iskambju tal-informazzjoni u l-kompetizzjoni b'taxxa ġusta). Il-kwistjoni ta' jekk l-appoġġ baġitarju għandux ikun marbut bil-kundizzjoni tar-riformi u l-governanza tajba fil-qasam tat-taxxa hi partikolarment relevanti. L-appoġġ tal- integrazzjoni reġjonali hu wkoll fattur ewlieni fil-kooperazzjoni tal-UE. L-integrazzjoni reġjonali ġġib benefiċċji ekonomiċi notevoli, imma ġġib ukoll sfidi ġodda, b'mod partikolari l-bżonn li l-bażi tad-dħul minn tariffi esterni jinqaleb għal wieħed ibbażat fuq tassazzjoni interna hekk kif il-liberalizzazzjoni tal-kummerċ tista' twassal għal tnaqqis kontinwu fi dħul mid-dwana. M18: Kif jistgħu l-programmi tal-appoġġ baġitarju jkunu mfassla u implimentati biex jippromwovu bl-aħjar mod it-tkabbir inklużiv u sostnut? M19: Kif jistgħu d-djalogu politiku u l-kundizzjonalità tal-appoġġ baġitarju jippromwovu aktar il-ġenerazzjoni ta' dħul domestiku u jaqtgħu id-dipendenza fuq l-għajnuna? X'forma ta' strateġija ta' tluq id-donaturi għandhom jinkludu fl-operazzjonijiet tagħhom ta' appoġġ baġitarju, u kif għandhom jagħmulha? M20: Kif jista' l-appoġġ baġitarju jintuża biex jgħin lill-pajjiżi msieħba u lill-organizzazzjonijiet reġjonali biex jifirxu aktar il-proċess tal-interazzjoni reġjonali? | KONKLUżJONIJIET U L-PASSI LI JMISS L-appoġġ baġitarju kien jidher bħala soluzzjoni għall-kwistjoni dwar kif l-għajnuna għandha tintuża b'mod aktar effettiv, imma mhux ħieles minn sfidi tiegħu stess. Dan id-dokument kien immirat biex jistaqsi dwar liema huma dawk il-pajjiżi li għandhom jirċievu l-appoġġ baġitarju, kemm għandhom jirċievu, u kif l-aħjar li jiġu mfassla u mmaniġġjati l-programmi tal-appoġġ baġitarju. Dawn huma kwistjonijiet li jeħtieġ li jiġu analizzati, flimkien ma' xogħol fuq sett miftiehem ta' għanijiet u prinċipji, sabiex l-appoġġ baġitarju jkun jista' jikkontribwixxi aħjar biex jitwettqu l-Għanijiet tal-Millennju għall-Iżvilupp u t-tkabbir sostnut u t-tnaqqis tal-faqar fil-pajjiżi msieħba li qed jiżviluppaw, u l-promozzjoni tal-integrazzjoni ekonomika u assoċjazzjoni politika aktar mill-qrib fi bnadi oħra. Billi tibni fuq ir-riżultati ta' xogħol bħal dan u ieħor, il-Kummissjoni se tirsisti biex ittejjeb l-approċċ tat-tfassil u l-implimentazzjoni tal-appoġġ baġitarju, bil-ħsieb ta' approċċi aktar ikkoordinati fi ħdan l-UE. [1] COM(2000)58 tal-04/02/2000. [2] Il-linji gwida tad-DAC dwar l-Armonizzazzjoni tal-Prattiki tad-Donaturi għal Għajnuna Effettiva, Appoġġ baġitarju (vol 2, 2005). [3] Notevolment il-Ftehim ta' Cotonou, l-Istrument tal-Iżvilupp u l-Kooperazzjoni (Development and Cooperation Instrument, DCI), l-Istrument Ewropew tal-Viċinat u l-Partenarjat (European Neighbourhood and Partnership Instrument, ENPI), u l-Istrument għall-Għajnuna ta' Qabel l-Adeżjoni (Instrument for Pre-Accession Assistance, IPA). [4] Dawk l-iskemi jipprovdu trasferimenti finanzjarji lil familji fqar bil-kundizzjoni li t-tfal tagħhom imorru l-iskola u jkollhom kura tas-saħħa bażika (pereżempju l-Brażil, il-Messiku, il-Bangladexx). [5] L-iżvilupp miċ-Ċentru għall-Iżvilupp Globali ta' approċċi ta' 'ħlas f'kontanti mal-wasla' biex iħallas għar-riżultati u jippremja l-prestazzjoni jirrappreżenta innovazzjoni ulterjuri u aktar radikali f'din id-direzzjoni.