Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52009XC0214(04)

Il-proċedura nazzjonali Daniża għall-allokazzjoni tad-drittijiet limitati tat-traffiku tal-ajru

ĠU C 37, 14.2.2009, p. 24–25 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

14.2.2009   

MT

Il-Ġurnal Uffiċjali tal-Unjoni Ewropea

C 37/24

Il-proċedura nazzjonali Daniża għall-allokazzjoni tad-drittijiet limitati tat-traffiku tal-ajru

(2009/C 37/07)

Skond l-Artikolu 6 tar-Regolament (KE) Nru 847/2004 tal-Parlament Ewropew u tal-Kunsill tad-29 ta' April 2004 dwar in-negozjati u l-implimentazzjoni tal-ftehimiet dwar is-servizzi tal-ajru bejn l-Istati Membri u pajjiżi terzi, il-Kummissjoni Ewropea tippubblika l-proċedura nazzjonali li ġejja għad-distribuzzjoni fost it-trasportaturi tal-Komunità eliġibbli għad-drittijiet tat-traffiku tal-ajru fejn huma limitati skond ftehimiet tas-servizzi tal-ajru ma' pajjiżi terzi.

Id-Danimarka — Ministeru tat-Trasport

Frar 2008

Linji gwida għad-distribuzzjoni limitata tad-drittijiet tat-traffiku tal-ajru

1.

Dawn il-linji gwida jinħarġu skond ir-Regolament (KE) Nru 847/2004 tal-Parlament Ewropew u tal-Kunsill tad-29 ta' April 2004 dwar in-negozjati u l-implimentazzjoni tal-ftehimiet dwar is-servizzi tal-ajru bejn l-Istati Membri u pajjiżi terzi. Għandhom jiġu applikati fil-każijiet fejn iżjed minn trasportatur tal-ajru wieħed jixtieq juża d-drittijiet tat-traffiku Daniżi li skond ftehim bilaterali dwar servizz bl-ajru li d-Danimarka kkonkludiet ma' pajjiż terz huma limitati, f'każijiet fejn l-ambitu ta' dawn id-drittijiet mhuwiex biżżejjed sabiex jissodisfa x-xewqat tal-partijiet interessati kollha sabiex jipprovdu servizzi tat-traffiku skond il-ftehim. Il-linji gwida għandhom japplikaw ukoll jekk skond il-ftehim fis-seħħ trasportatur tal-ajru wieħed biss jista' jiġi nominat minkejja li kienu bosta dawk li esprimew interess biex ikunu nominati.

2.

Jekk id-drittijiet limitati tat-traffiku ikunu propjetà tat-tliet pajjiżi Skandinavi tal-Komunità, dan il-każ għandu jiġi ttrattat skond dawn il-linji gwida jekk ir-rotta tal-ajru relevanti tibda jew tispiċċa fid-Danimarka. F'każijiet bħal dawn, għandu jkun hemm konsultazzjoni mal-awtoritajiet xierqa tan-Norveġja u l-Iżvezja.

3.

F'dawn il-linji gwida,“trasportatur tal-ajru” ifisser trasportatur tal-ajru li huwa stabbilit fid-Danimarka u nħarġitlu liċenzja tal-operat skond ir-Regolament tal-Kunsill (KEE) Nru 2407/92.

4.

L-informazzjoni dwar id-drittijiet tat-traffiku skond il-ftehimiet bilaterali dwar is-servizz tal-ajru li kkonkludiet id-Danimarka, dwar id-distribuzzjoni ta' dawn id-drittijiet skond dawn il-linji gwida u dwar in-negozjati tas-servizz tal-ajru se jkunu pprovduti mill-Ministeru tat-Trasport u ppubblikati fuq is-sit elettroniku tiegħu (www.trm.dk).

5.

L-applikazzjonijiet għad-distribuzzjoni tad-drittijiet tat-traffiku skond dawn il-linji gwida għandhom jiġu ttrattati mill-Ministeru tat-Trasport, u d-deċiżjonijiet dwar l-għoti ta' dawn id-drittijiet għandhom jiġu ppubblikati.

6.

Trasportatur tal-ajru li jixtieq juża d-drittijiet limitati tat-traffiku għandu jissottometti applikazzjoni bil-miktub lill-Ministeru tat-Trasport. L-applikazzjoni għandha tkun miktuba bid-Daniż jew bl-Ingliż u jkun fiha l-informazzjoni li ġejja:

(a)

kopja tal-liċenzja tal-operat tat-trasportatur tal-ajru jekk ma kinitx maħruġa mill-awtoritajiet Daniżi;

(b)

deskrizzjoni tas-servizzi tal-ajru ppjanati (eż. it-tip ta' ajruplan, in-nazzjonalità u l-marki ta' reġistrazzjoni, il-ħinijiet tat-tluq u tal-wasla, ir-rotta tal-ajru u t-titjiriet matul il-ġimgħa);

(c)

informazzjoni dwar kwalunkwe kirja ppjanata tal-ajruplan bl-ekwipaġġ jew mingħajru;

(d)

informazzjoni dwar kwalunkwe kooperazzjoni ma' trasportaturi tal-ajru oħrajn u n-natura u l-ambitu tagħhom;

(e)

data ppjanata għall-bidu tas-servizzi tal-ajru;

(f)

tip ta' titjiriet (eż. titjiriet tal-passiġġieri jew tal-merkanzija);

(g)

kwalunkwe titjiriet ta' konnessjoni;

(h)

politika tal-prezz tas-servizz tal-ajru.

Il-Ministeru jista' jitlob lill-applikanti sabiex jissottomettu informazzjoni addizjonali mal-applikazzjoni tagħhom.

Il-Ministeru jinforma lill-awtoritajiet xierqa tan-Norveġja u l-Iżvezja dwar kwalunkwe applikazzjoni li jirċievu.

7.

L-applikazzjonijiet jiġu pproċessati bi proċedura li mhijiex diskriminatorja u hija trasparenti. F'din il-proċedura, jistgħu jkunu assenjati valuri speċjali lis-servizzi tal-ajru li:

—

huma tal-aħjar użu għall-utenti,

—

irawmu l-kompetizzjoni l-iżjed effettiva possibbli bejn it-trasportaturi tal-ajru tal-Komunità,

—

ifornu servizzi tat-trasport tal-ajru fil-kategoriji kollha tas-servizzi tal-ajru ġenerali bl-inqas prezzijiet raġonevoli,

—

jippromwovu l-iżvilupp b'saħħtu tas-settur tal-avjazzjoni tal-Komunità u l-kummerċ u t-turiżmu, u/jew,

—

jilħqu l-għanijiet tal-politika tat-trasport pubbliku, eż. fir-rigward tal-iżvilupp reġjonali.

8.

Partikolarment, il-punti li ġejjin għandhom jiġu kkunsidrati fl-ipproċessar tal-applikazzjonijiet:

—

liema servizzi qed jiġu offruti,

—

il-frekwenzi tat-titjiriet,

—

it-tip tal-ajruplan u tal-postijiet fejn tpoġġi,

—

titjiriet diretti jew indiretti,

—

data tal-bidu tas-servizzi,

—

il-firxa tat-tijiriet matul is-sena,

—

tip ta' servizzi (eż. tal-passiġġieri jew tal-merkanzija),

—

aċċess għall-utenti tas-servizzi tal-ajru (l-ordnar u x-xiri tal-biljetti),

—

id-disponibbiltà tat-tijiriet ta' konnessjoni,

—

il-prezzijiet,

—

l-impatt fuq l-ambjent.

Aspetti oħra jistgħu jiġu kkunsidrati wkoll jekk huma pprovduti mill-applikant qabel ma tittieħed deċiżjoni.

9.

Fl-ipproċessar tal-applikazzjonijiet, għandha tkun ikkunsidrata l-ħtieġa għall-kontinwità fis-servizzi tat-trasport bl-ajru.

10.

Id-deċiżjoni dwar id-distribuzzjoni tad-drittijiet tat-traffiku tal-ajru skond dawn il-linji gwida għandha tispeċifika l-kunsiderazzjonijiet li fuqhom hija bbażata.

11.

Id-drittijiet tat-traffiku allokati ma jistgħux ikunu ttrasferiti mingħajr permess speċjali.

12.

Trasportatur tal-ajru li ġie awtorizzat sabiex juża d-drittijiet tat-traffiku skond dawn il-linji gwida għandu jibda s-servizzi tat-trasport tal-ajru matul il-perjodu tal-iskeda li jmiss. Jekk ma jagħmilx dan, l-awtorizzazzjoni tiġi invalidata.

13.

L-awtorizzazzjoni tiġi invalidata wkoll jekk:

(a)

is-servizzi tal-ajru jiġu interrotti u ma jerġawx jinbdew fi żmien sitt xhur sakemm l-interuzzjoni mhijiex riżultat ta' ċirkustanzi li huma lil hinn mill-kontroll tat-trasportatur tal-ajru awtorizzat;

(b)

it-trasportatur tal-ajru awtorizzat jinforma lill-Ministeru tat-Trasport li ma jixtieqx ikompli jagħmel użu mill-awtorizzazzjoni li ngħata.

14.

Il-Ministeru tat-Trasport jista' parzjalment jew kompletament jirtira l-awtorizzazzjoni jekk:

(a)

is-servizzi tal-ajru mhumiex joperaw skond il-kundizzjonijiet tal-awtorizzazzjoni jew id-dispożizzjonijiet stipulati fil-ftehim bilaterali li fuqu huma bbażati s-servizzi;

(b)

it-trasportatur tal-ajru awtorizzat ma jikkonformax ma' kwalunkwe dispożizzjoni oħra li tirregola s-servizzi tal-ajru; jew

(c)

jekk hemm raġunijiet speċjali għall-irtirar.

15.

Jekk l-awtorizzazzjoni li ngħatat skond dawn il-linji gwida tiġi invalidata jew irtirata, il-Ministeru jista' jerġa jikkunsidra t-talba għall-awtorizzazzjoni.

16.

Dawn il-linji gwida ma jaffetwawx kwalunkwe dritt tat-traffiku fis-seħħ fi kwalunkwe żmien li huwa użat effettivament skond-il-liġi tal-Komunità u l-liġi nazzjonali tal-kompetizzjoni.
Top