19.8.2010   

MT

Il-Ġurnal Uffiċjali tal-Unjoni Ewropea

CE 224/8

A.

billi f'Ottubru tal-2007, SWIFT ħabbret struttura ġdida ta' messaġġi li għandha tkun operattiva sa tmiem l-2009,

B.

billi din il-bidla fl-istruttura ta' messaġġi se jkollha l-konsegwenza li l-maġġoranza tad-data finanzjarja li SWIFT kienet awtorizzata titrasferixxi għall-programm TFTP tad-Dipartiment tat-Teżor American, mhux se tibqa' disponibbli għat-TFTP,

C.

billi fis-27 ta' Lulju 2009 il-Kunsill adotta b'mod unanimu u bl-għajnuna tal-Kummissjoni d-direttivi tan-negozjati għall-Presidenza, biex jinnegozja ftehima internazzjonali mal-Istati Uniti fuq il-bażi tal-Artikoli 24 u 38 tat-Trattat tal-Unjoni Ewropea ħalli jkompli jittrasferixxi d-data tal-programm SWIFT għall-programm TFTP tal-Istati Uniti,

D.

billi d-direttivi tan-negozjati flimkien mal-opinjoni legali dwar l-għażla tal-bażi legali mis-Servizzi Legali tal-Kunsill għadhom ma sarux pubbliċi, minħabba li huma kklassifikati bħala “Ristretti għall-UE”,

E.

billi l-ftehima internazzjonali għandha tipprovdi applikazzjoni proviżjorja u immedjata mill-waqt tal-iffirmar sad-dħul fis-seħħ tal-ftehima,

F.

billi l-UE nnifisha m'għandhiex TFTP fis-seħħ,

G.

billi l-aċċess għal data amministrata mis-SWIFT jagħmilha potenzjalment possibli li jistabu mhux biss trasferimenti marbuta ma' attivitajiet illegali, iżda wkoll informazzjoni dwar l-attivitajiet ekonomiċi tal-individwi u l-pajjiżi kkonċernati, u jista' għalhekk jintuża ħażin għall-forom ta' spjunaġġ ekonomiku u industrijali fuq skala kbira,

H.

billi SWIFT ikkonkludiet memorandum ta' ftehim mad-Dipartiment tat-Teżor Amerikan, sabiex iddejjaq aktar l-ambitu tad-data trasferita u l-ambitu ta' tfittxijiet għal data speċifika għall-każijiet kontra t-terroriżmu, u għamlitha soġġetta għal sorveljanza u verifika indipendenti, inkluż il-monitoraġġ f'ħin reali,

I.

billi kwalunkwe ftehim bejn l-UE u l-Istati Uniti għandu jkun bil-kundizzjoni li tinżamm il-protezzjoni li teżisti fil-memorandum ta' ftehim u r-rappreżentanzi tat-Teżor tal-Istati Uniti, bħal dawk li japplikaw fil-każ ta' data mħarrka tat-Teżor tal-Istati Uniti miċ-ċentru operattiv ta' SWIFT,

1.

Ifakkar fid-determinazzjoni tiegħu li jiġġieled lit-terroriżmu u fit-twemmin sod tiegħu fil-ħtieġa li jinstab il-bilanċ ġust bejn miżuri tas-sigurtà u l-ħarsien tal-libertajiet ċivili u d-drittijiet fundamentali, filwaqt li jiġi żgurat ir-rispett akbar għall-privatezza u protezzjoni tad-data; itenni li n-neċessità u l-proporzjonalità huma prinċipji ewlenin li mingħajrhom il-ġlieda kontra t-terroriżmu ma tistax tkun effettiva;

2.

Jenfasizza li l-Unjoni Ewropea hija bbażata fuq l-istat tad-dritt u li kull trasferiment ta' data personali Ewropea lejn pajjiżi terzi li jsir għal finijiet ta' sigurtà għandu jirrispetta garanziji proċedurali u d-drittijiet tad-difiża u jikkonforma mal-leġiżlazzjoni tal-protezzjoni tad-data fil-livell nazzjonali u Ewropew (9);

3.

Ifakkar lill-Kunsill u lill-Kummissjoni li fil-qafas tranżatlantiku tal-ftehim bejn l-UE u l-Istati Uniti dwar assistenza legali, li se jidħol fis-seħħ fl-1 ta' Jannar 2010, l-Artikolu 4 jipprovdi għal aċċess fuq talba għal data finanzjarja mmirata, bl-awtorizzazzjoni ta' awtoritajiet statali u nazzjonali u jista' jikkostitwixxi bażi legali aktar soda għat-trasferiment ta' data ta' SWIFT mill-ftehima interim proposta u jitlob lill-Kunsill u lill-Kummissjoni biex jispjegaw il-ħtieġa għal ftehima interim;

4.

Jilqa' d-deċiżjoni ta' SWIFT ta' Ġunju 2007 sabiex issir rilokazzjoni tad-data kollha ta' trasferimenti finanzjarji intra-UE għal żewġ ċentri operattivi Ewropej; jiġbed l-attenzjoni tal-Kunsill għall-fatt li din id-deċiżjoni ttieħdet bil-qbil tal-Awtorità Belġjana għall-Protezzjoni tad-Data, u mat-talba fl-Artikolu 29 tal-Grupp ta' Ħidma tal-UE u b'konformità mal-opinjoni espressa mill-Parlament Ewropew;

5.

Jinnota li l-Kunsill adotta d-direttivi tan-negozjati biss kważi sentejn wara li SWIFT ħabbret il-bidla fl-istruttura tal-messaġġi;

6.

Jinsab imħasseb li fir-rigward tal-bażi legali magħżula għal dan il-ftehim maħsub, is-servizzi legali tal-istituzzjonijiet esprimew opinjonijiet diverġenti, u jinnota li s-Servizz Legali tal-Kunsill huwa tal-fehma li hija kompetenza tal-Komunità;

7.

Jemmen, sakemm ftehim internazzjonali huwa meħtieġ b'mod assolut, li għandu bħala minimu jiżgura:

8.

Jitlob li l-Kunsill u l-Kummissjoni jikkjarifikaw l-irwol preċiż tal-“awtorità pubblika” li se tingħata r-responsabbiltà li tirċievi talbiet mid-Dipartimant tat-Teżor tal-Istati Uniti, filwaqt li jqisu b'mod partikolari n-natura tas-setgħat mogħtija lil “awtorità” ta' dan it-tip u l-mod kif dawn is-setgħat jistgħu jkunu infurzati;

9.

Jitlob li l-Kunsill u l-Kummissjoni jikkonfermaw li l-lottijiet u l-fajls kbar bħal transazzjonijiet marbuta maż-Żona Waħdanija ta' Pagament Ewropea (SEPA) huma barra mill-ambitu tad-data li tkun mitluba mid-Dipartiment tat-Teżor tal-Istati Uniti jew trasferita lejh;

10.

Jenfasizza li SWIFT hija infrastruttura ewlenija għas-saħħa tas-sistemi ta' pagament u s-swieq tat-titoli tal-Ewropa u m'għandhiex tiġi żvantaġġata b'mod inġust fir-rigward tal-fornituri li jikkompetu fil-qasam tal-messaġġ finanzjarji;

11.

Jenfasizza l-importanza taċ-ċertezza u tal-immunità legali għaċ-ċittadini u l-organizzazzjonijiet privati li jkunu soġġetti għal trasferimenti ta' data skont arranġamenti bħal dawn proposti mill-ftehima ta' bejn l-Unjoni Ewropea u l-Istati Uniti;

12.

Jinnota li jista' jkun utli għall-Kummissjoni li tevalwa l-ħtieġa li jitwaqqaf TFTP Ewropew;

13.

Jitlob lill-Kummissjoni u lill-Presidenza biex jiżguraw li l-Parlament Ewropew u l-parlamenti nazzjonali kollha jingħataw aċċess sħiħ għad-dokumenti tan-negozjati u d-direttivi;

14.

Jagħti struzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-Bank Ċentrali Ewropew, lill-gvernijiet u lill-parlamenti tal-Istati membri u tal-pajjiżi kandidati għall-adeżjoni, u lill-Gvern tal-Istati Uniti u liż-żewġ Kmamar tal-Kungress.