52009DC0451

[pic] | KUMMISSJONI TAL-KOMUNITAJIET EWROPEJ |

Brussel 4.9.2009

KUMM(2009) 451 finali

RAPPORT MILL-KUMMISSJONI LILL-KUNSILL U LILL-PARLAMENT EWROPEW

dwar l-użu tad-dispożizzjonijiet dwar l-għajnuna reċiproka għall-irkupru ta’ pretensjonijiet li jirrigwardaw ċerti imposti, dazji, taxxi u miżuri oħrajn fl-2005-2008

RAPPORT MILL-KUMMISSJONI LILL-KUNSILL U LILL-PARLAMENT EWROPEW

dwar l-użu tad-dispożizzjonijiet dwar l-għajnuna reċiproka għall-irkupru ta’ pretensjonijiet li jirrigwardaw ċerti imposti, dazji, taxxi u miżuri oħrajn fl-2005-2008

1. Introduzzjoni

L-Istati Membri tal-KE jipprovdu għajnuna reċiproka lil xulxin għall-irkupru ta' pretensjonijiet relatati ma' ċerti imposti, dazji, taxxi u miżuri oħrajn. Il-leġiżlazzjoni kkonċernata oriġinalment ġiet stabbilit mid-Direttiva tal-Kunsill 76/308/KEE tal-15 ta’ Marzu 1976[1]. Din id-Direttiva ġiet sostitwita mid-Direttiva 2008/55/KE tas-26 ta' Mejju 2008[2]. Taħt dil-leġiżlazzjoni, il-Kummissjoni hija meħtieġa li tħejji rapport regolari dwar l-użu ta’ arranġamenti ta’ għajnuna reċiproka. L-ewwel rapport (id-dokument COM(2006)43) ġie ppubblikat fit-8 ta’ Frar 2006. Ta ħarsa ġenerali lejn l-għajnuna reċiproka għall-irkupru pprovduta fl-2003 u l-2004. Dan ir-rapport jirrigwarda l-għajnuna għall-irkupru mogħtija fl-2005-2008. Jittratta wkoll l-inizjattivi attwali tal-Kummissjoni f’dan il-qasam.

2. ANALIżI TAL-UżU TA' MIżURI TA' GħAJNUNA REċIPROKA FL-2005-2007

2.1. Rimarka ta' introduzzjoni

Fir-rapport preċedenti tagħha l-Kummissjoni indikat li l-istatistiċi ta’ diversi Stati Membri kien fihom ċerti inkonsistenzi. L-istatistiċi li jirrigwardaw in-numri tat-talbiet li saru fil-perjodu 2005-2007 ġeneralment juru tnaqqis sostanzjali f’dawn l-inkonsistenzi, minkejja li n-numru ta’ talbiet żdied konsiderevolment.

Dan juri li l-Istati Membri taw aktar attenzjoni lit-tħejjija ta’ statistiċi korretti. L-adozzjoni ta’ istruzzjonijiet preċiżi dwar l-obbligi ta’ rappuraġġ statistiku fil-5 ta’ Diċembru 2005 mingħajr dubju kkontribwixxa għat-titjib fl-akkuratezza tal-istatistiċi. Barra minn dan, il-mistoqsijiet tal-Istati Membri dwar din il-kwistjoni ġew eżaminati b'reqqa fil-Kumitat tal-Irkupru, li ppermetta lill-awtoritajiet nazzjonali li jnaqqsu l-possibbiltà ta’ opinjonijiet diverġenti li jistgħu jwasslu għal inkonsistenzi fl-istatistiċi rrappurtati.

2.2. Użu akbar ta’ talbiet ta’ għajnuna reċiproka tal-KE

L-istatistiċi pprovduti mill-Istati Membri juru numru li qed jiżdied ta’ talbiet għall-għajnuna fuq il-bażi tad-Direttiva tal-KE ( l-ewwel kolonna tal-grafiċi ta’ hawn taħt).

Jidher ukoll li l-qafas leġiżlattiv tal-KE jintuża aktar estensivament bejn l-Istati Membri tal-KE minn kwalunkwe ftehim jew arranġament ieħor dwar għajnuna reċiproka għall-irkupru. L-użu ta’ kwalunkwe arranġamenti oħrajn dwar għajnuna reċiproka bejn l-Istati Membri ( it-tieni kolonna tal-grafiċi hawn taħt) naqas fil-perjodu 2005-2008. (Dejta dwar l-użu ta’ ftehimiet oħra dwar għajnuna reċiproka hija biss disponibbli għall-perjodu mill-2005 sal-2008)[3].

2.2.1. Evoluzzjoni tat-talbiet għal informazzjoni

[pic]

2.2.2. Evoluzzjoni tat-talbiet għal notifika

[pic]

2.2.3. Evoluzzjoni tat-talbiet għall-irkupru

[pic]

2.2.4. Tip tal-pretensjonijiet li għalihom intalbet għajnuna għall-irkupru

It-tip ta’ pretensjonijiet, bħala perċentwali tal-ammonti totali tal-pretensjonijiet kollha, qed jintwera mis-statistiċi li ġejjin[4]:

- [pic] talbiet li jirrigwardaw pretensjonijiet rigward il-VAT (imsemmija fl-Artikolu 2(e) tad-Direttiva 2008/55/KE) jirrappreżentaw il-biċċa l-kbira tat-talbiet għal miżuri għall-irkupru: is-sehem tagħhom tela’ minn 43% fl-2005 għal 57% fl-2007; fl-2008 naqas għal 34%.

- [pic] talbiet relatati ma’ taxxi fuq id-dħul u l-kapital (imsemmija fl-Artikolu 2(g) tad-Direttiva) jirrappreżentaw il-biċċa l-kbira oħra tat-talbiet. Din il-parti naqset minn 37% mit-talbiet kollha fl-2005 għal 26% mit-talbiet kollha fl-2007; fl-2008, 50% mit-talbiet kollha kienu jirrigwardaw pretensjonijiet ta’ din il-kategorija.

- [pic] talbiet li jirrigwardaw rifużjonijiet, interventi u miżuri oħra li jiffurmaw parti mis-sistema tal-iffinanzjar tal-Fond Agrikolu Ewropew ta’ Garanzija u l-Fond Agrikolu Ewropew għall-Iżvilupp Rurali, imposti u dazji oħra li għalihom hemm ipprovdut taħt l-organizzazzjoni komuni tas-suq għas-settur taz-zokkor u dazji fuq l-importazzjoni u fuq l-esportazzjoni (imsemmija fl-Artikolu 2(a) - (e) tad-Direttiva) jirrappreżentaw bejn wieħed u ieħor 10% mit-talbiet kollha;

- [pic] talbiet li jirrigwardaw dazji tas-sisa (imsemmija fl-Artikolu 2(f) tad-Direttiva) jirrappreżentaw ukoll madwar 10% mit-talbiet kollha (ħlief fl-2007 meta dan is-sehem naqas għal 4%);

- [pic] talbiet li jirrigwardaw it-taxxi fuq il-poloz tal-assigurazzjoni (imsemmija fl-Artikolu 2(h) tad-Direttiva) jirrappreżentaw biss parti żgħira mit-talbiet kollha. Saħansitra, fl-2008, ma kien hemm l-ebda talbiet relatati ma’ dawn it-taxxi.

[pic]

2.3. Aktar ammonti rkuprati

2.3.1. Evoluzzjoni globali tal-ammonti rkuprati

L-evoluzzjoni tal-ammonti li jiġu effettivament irkuprati turi wkoll tendenza li qed tiżdied. Meta mqabbla mal-ammonti rkuprati fl-2003 (100%), l-ammonti rkuprati żdiedu b'aktar minn 600% fl-2006 u l-2008[5].

[pic]

2.3.2. Id-distribuzzjoni tal-ammonti rkuprati mill-Istati Membri l-oħrajn, skont is-snin relatati mat-talbiet ikkonċernati

Jeħtieġ xi ftit taż-żmien qabel jittieħdu miżuri għall-irkupru u qabel ma dawn iwasslu għall-effett tagħhom. Pereżempju, l-ammonti rkuprati minn Stat Membru mitlub fl-2008, ikunu relatati biss parzjalment mat-talbiet irċevuti fl-2008; dawn l-ammonti jkunu relatati wkoll ma’ talbiet irċevuti fi snin preċedenti. Il-grafiċi li jmiss juru, rigward l-ammonti effettivament irkuprati fis-snin 2005-2008, ma’ liema sena t-talbiet huma relatati. Minn dawn l-istatistiċi jidher li (aktar minn) 80% tal-ammonti rkuprati f’dawn is-snin huwa relatat ma’ talbiet magħmulin fl-istess sena (indikati b’“=” fil-grafiċi hawn isfel) jew fis-sentejn kalendarji ta’ qabel (indikati bħala “-1” u “-2” fil-grafiċi hawn isfel).

[pic]

2.4. Nuqqas ta’ effiċjenza

L-istatistiċi dwar l-għajnuna reċiproka għall-irkupru relatati mal-2005-2008 juru li l-ammonti rkuprati żdiedu konsiderevolment. Madankollu, in-numru ta’ talbiet u l-ammonti li għalihom hija mitluba l-għajnuna għall-irkupru ukoll qed jiżdiedu. Konsegwentement, għad baqa’ differenza kbira bejn l-ammonti li għalihom tintalab l-għajnuna u l-ammonti attwalment irkuprati permezz tal-għajnuna reċiproka.

Kif diġà ġie indikat taħt il-punt 2.3.2, il-miżuri ta’ rkupru li jittieħdu biex tiġi eżegwita talba rċevuta f’sena partikolari ma jwasslux għal irkupru immedjat matul dik l-istess sena. M’hemmx statistiċi disponibbli dwar dan l-effett pospost tal-miżuri ta' rkupru għas-snin ta’ qabel l-2005. Għaldaqstant, bħalissa mhuwiex possibbli li tinkiseb idea preċiżi tal-ammonti li huma effettivament irkuprati, meta mqabbla mal-ammonti li ntalbet għajnuna għall-irkupru fil-każ tagħhom f'sena partikolari. Madankollu, l-informazzjoni parzjali li hija disponibbli bħalissa tagħmilha ċara li jista' jkun mistenni li l-proporzjon globali tal-irkupru għal talbiet ta' rkupru bejn l-Istati Membri tal-KE huwa madwar 5%[6].

B’riżultat taż-żieda fit-talbiet u ż-żieda fl-ammonti li għalihom tintalab għajnuna għall-irkupru, jinħtieġu sforzi speċjali biex titjieb l-effiċjenza ta’ din l-għajnuna. Dawn l-isforzi jridu jsiru fil-livell nazzjonali u fil-livell tal-Komunità:

- l-Istati Membri individwali jridu jsaħħu l-istrumenti għall-irkupru disponibbli fil-leġiżlazzjoni nazzjonali tagħhom; u

- il-Komunità Ewropea trid issaħħaħ u tiffaċilita l-għajnuna reċiproka għall-irkupru bejn l-Istati Membri.

3. Inizjattivi ġodda tal-Komunità biex tissaħħaħ l-għajnuna reċiproka għall-irkupru

3.1. Id-Direttiva tal-Kunsill il-ġdida

Id-Direttiva oriġinali tal-Kunsill dwar l-għajnuna reċiproka għall-irkupru ta' pretensjonijiet relatati ma’ ċerti imposti, dazji, taxxi u miżuri oħrajn – id-Direttiva 76/308/KEE – ġiet emendata diversi drabi. Għal iktar ċarezza u razzjonalità, l-imsemmija Direttiva ġiet ikkodifikata. Id-Direttiva tal-Kunsill 2008/55/KE il-ġdida ġiet adottata fis-26 ta’ Mejju 2008 u daħlet fis-seħħ fit-30 ta’ Ġunju 2008.

3.2. Ir-Regolament tal-Kummissjoni l-ġdid li jiffaċilita l-iskambju ta’ talbiet għal għajnuna

Fit-28 ta’ Novembru 2008, il-Kummissjoni adottat ir-Regolament (KE) Nru 1179/2008, li ssostitwixxa d-Direttiva tal-Kummissjoni 2002/94/KE sa mill-1 ta’ Jannar 2009. Din il-leġiżlazzjoni l-ġdida, li tistabbilixxi regoli dettaljati li jimplimentaw id-Direttiva tal-Kunsill, tiffaċilita l-għajnuna reċiproka fil-prattika, b’mod partikolari l-komunikazzjoni bejn l-awtoritajiet kompetenti ta’ Stati Membri differenti. Dan hu tabilħaqq indispensabbli, fid-dawl taż-żieda kontinwa fit-talbiet.

Skont ir-regoli l-ġodda, il-komunikazzjoni elettronika tat-talbiet u r-risposti hija, fil-prinċipju, applikata għat-tipi kollha ta’ talbiet għal għajnuna reċiproka. Formoli standard ġodda għat-talbiet jikkontribwixxu wkoll għal komunikazzjoni aktar mgħaġġla bejn l-awtorità li tagħmel it-talba u l-awtorità rikjesta.

Issa qed tiġi żviluppata verżjoni elettronika ta’ dawn il-formoli ġodda għat-talbiet li tippermetti t-traduzzjoni awtomatika. Fl-1 ta’ Ġunju 2008 bdiet fażi ta’ ttestjar għall-użu ta’ dawn il-formoli elettroniċi għat-talbiet. Tinvolvi l-awtoritajiet minn 6 Stati Membri. Huwa mistenni li l-Istati Membri kollha se jkunu jistgħu jużaw il-formoli elettroniċi l-ġodda matul l-2010.

3.3. Proposta għal leġiżlazzjoni ġdida tal-Kunsill

Fit-2 ta’ Frar 2009, il-Kummissjoni ppreżentat il-proposta COM(2009)28 biex tissostitwixxi d-Direttiva tal-Kunsill 2008/55/KE b’dispożizzjonijiet ġodda biex issaħħaħ l-għajnuna għall-irkupru.

L-għanijiet u l-elementi ewlenija ta’ din il-proposta jirrigwardaw:

- estensjoni tal-ambitu għal imposti li għadhom mhumiex koperti mil-leġiżlazzjoni attwali tal-KE, minħabba li l-kompetittività u n-newtralità fiskali tas-suq intern mhumiex biss milquta min-nuqqas ta’ ħlas ta’ taxxi li jaqgħu fl-ambitu tad-Direttiva 2008/55/KE. Id-distorsjonijiet fil-kundizzjonijiet tas-suq intern, kif ukoll it-theddida għall-interessi finanzjarji tal-Komunità u tal-Istati Membri jistgħu wkoll jirriżultaw minn frodi li tirrigwarda taxxi oħrajn;

- l-użu preferenzjali tal-leġiżlazzjoni tal-KE għat-talbiet kollha għal għajnuna reċiproka għall-irkupru bejn Stati Membri tal-KE. Dan għandu jippermetti lill-uffiċjali kkonċernati jevitaw id-diffikultajiet li jirriżultaw mill-applikazzjoni ta’ bosta ftehimiet u arranġamenti, kull wieħed b’possibiltajiet, kundizzjonijiet, modalitajiet u metodi ta’ komunikazzjoni differenti.

- it-tisħiħ tal-possibiltajiet biex tintalab għajnuna reċiproka u biex jitħaffef l-ipproċessar ta’ talbiet għal għajnuna reċiproka. Dan jidher li hu essenzjali, minħabba li l-possibiltajiet biex jiġu rkuprati pretensjonijiet huma kjarament relatati ma’ kemm ila l-pretensjoni. Sabiex jitjiebu l-possibiltajiet ta' rkupru, il-Kummissjoni qed tipproponi miżuri bħal:

- il-possibbiltà li jintalbu miżuri ta’ rkupru, anki meta ma jkunux għadhom ittieħdu l-azzjonijiet għall-irkupru xierqa kollha fl-Istat Membru applikant;

- L-iskambju spontanju ta’ ċerti kategoriji ta’ informazzjoni;

- il-possibbiltà għall-uffiċjali għall-irkupru li jkunu preżenti fl-uffiċċji amministrattivi u li jipparteċipaw f'inkjesti amministrattivi fi Stat Membru ieħor;

- is-simplifikar tal-proċeduri għan-notifika ta’ dokumenti bl-introduzzjoni ta’ metodu ta’ notifikazzjoni uniformi, bl-użu ta' formola standard;

- l-iżvilupp ta’ strumenti uniformi tal-Komunità li jippermettu l-infurzar jew ta’ miżuri kawtelatorji, li jwasslu biex jiġu evitati problemi ta’ traduzzjoni u ta’ rikonoxximent ta’ strumenti barranin.

4. Konklużjonijiet u rakkomandazzjonijiet

4.1. Konklużjonijiet

Iż-żieda fin-numru tat-talbiet għal għajnuna turi li l-Istati Membri jħossu l-ħtieġa li jaħdmu mill-qrib flimkien fil-ġlieda kontra l-frodi fiskali.

Minkejja li l-ammonti rkuprati żdiedu matul il-perjodu 2005-2008, huwa meħtieġ tisħiħ ulterjuri tal-leġiżlazzjoni eżistenti f’dan il-qasam, sabiex jiġi affaċċjat in-numru dejjem jikber ta’ talbiet għal għajnuna u sabiex tiżdied l-effiċjenza tal-għajnuna għall-irkupru.

4.2. Rakkomandazzonijiet

l-Istati Membri qed jitħeġġu jsaħħu l-istrumenti għall-irkupru disponibbli fil-leġiżlazzjoni nazzjonali tagħhom.

Il-Kunsill u l-Parlament huwa mistiedna biex jadottaw malajr il-proposta li l-Kummissjoni ppreżentat fit-2 ta’ Frar 2009 biex tissaħħaħ l-għajnuna reċiproka għall-irkupru.

[1] ĠU L 73, 19.3.1976, p. 18.

[2] ĠU L 150, 10.6.2008, p. 28.

[3] L-informazzjoni hija skont l-istatiċi li għaddew l-Istati Membri mitluba.

[4] L-istatistiċi huma bbażati fuq il-medja tat-talbiet irċevuti u mibgħuta. Għall-2005, l-istatistiċi huma bbażati fuq id-dejta rrappurtata minn 17-il Stat Membru; għall-2006, fuq dejta rrappurtata minn 20 Stat Membru; għall-2007, fuq dejta rrappurtata minn 24 Stat Membru; u għall-2008, fuq dejta rrappurtata minn 25 Stat Membru.

[5] L-istatistiċi kif rappurtati mill-Istati Membri mitlubin kif irkuprati fuq it-talba ta’ Stati Membri oħrajn.

[6] Madankollu għandu jinżamm amment li s-somma totali tal-ammonti msemmija fit-talbiet ta’ rkupju ma tikkorrispondix neċessarjament mal-ammonti verament dovuti; eż. l-istess pretensjoni tista' tkun is-suġġett ta’ bosta talbiet lil Stati Membri differenti. jew it-talbiet jistgħu jiġu rtirati fi stadju ulterjuri, minħabba li l-pretensjonijiet tħallsu volontarjament jew ġew ikkontestati b’suċċess. Bħalissa, l-istatistiċi disponibbli ma jippermettux li jitqiesu dawn is-sitwazzjonijiet kollha.