EUR-Lex Access to European Union law
This document is an excerpt from the EUR-Lex website
Document 52008PC0007
Proposal for a Council Decision authorising Italy to apply, in determined geographical areas, reduced rates of taxation on gas oil and LPG used for heating purposes in accordance with Article 19 of Directive 2003/96/EC
Proposta għal deċiżjoni tal-Kunsill li tawtorizza lill-Italja biex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal raġunijiet ta’ tisħin skond l-Artikolu 19 tad-Direttiva 2003/96/KE
Proposta għal deċiżjoni tal-Kunsill li tawtorizza lill-Italja biex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal raġunijiet ta’ tisħin skond l-Artikolu 19 tad-Direttiva 2003/96/KE
/* KUMM/2008/0007 finali */
[pic] | KUMMISSJONI TAL-KOMUNITAJIET EWROPEJ | Brussel 22.1.2008 KUMM(2008) 7 finali Proposta għal DEĊIŻJONI TAL-KUNSILL li tawtorizza lill-Italja biex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal raġunijiet ta’ tisħin skond l-Artikolu 19 tad-Direttiva 2003/96/KE (preżentata mill-Kummissjoni) MEMORANDUM TA’ SPJEGAZZJONI 1) IL-KUNTEST TAL-PROPOSTA - Ir-raġunijiet għall-proposta u l-għanijiet tagħha It-taxxa fuq prodotti ta’ l-enerġija u l-elettriku fil-Komunità hija regolata mid-Direttiva 2003/96/KE[1] (minn hawn ‘il quddiem id-“Direttiva dwar it-Taxxa fuq l-Enerġija” jew id-“Direttiva”). Skond l-Artikolu 19(1) tad-Direttiva, flimkien mad-dispożizzjonijiet previsti fl-Artikoli 5, 15 u 17, il-Kunsill, li jaġixxi b'mod unanimu fuq proposta tal-Kummissjoni, jista' jawtorizza lil kwalunkwe Stat Membru biex jintroduċi iktar eżenzjonijiet jew tnaqqis tat-taxxi tas-sisa għall-konsiderazzjonijiet politiki speċifiċi. L-għan ta' din il-proposta huwa li tawtorizza lill-Italja biex tapplika, f’żoni ġeografiċi determinati, rati mnaqqsa ta’ taxxa fuq il-gażolju u l-LPG użati għal raġunijiet ta’ tisħin biex ikunu parzjalment ikkumpensati l-ispejjeż ta’ tisħin ta’ persuni li joqgħodu f’dawk iż-żoni ġeografiċi. Il-livell għoli ta’ l-ispejjeż ta’ tisħin huwa kkawżat, kemm mill-kundizzjonijiet klimatiċi estremi u iebsin ħafna kif ukoll mill-insularità ta’ dawn iż-żoni, flimkien ma’ l-għażla limitata ta' fjuwils minħabba n-nuqqas ta' aċċess għan-netwerk tal-gass naturali. - Kuntest ġenerali B’ittra datata s-17 ta’ Ottubru 2006, l-awtoritajiet Taljani talbu l-awtorizzazzjoni biex japplikaw, f’żoni ġeografiċi determinati, rati mnaqqsa ta’ taxxa fuq il-gażolju u l-LPG użati għal raġunijiet ta’ tisħin permezz ta’ prattika segwita taħt deroga provduta fl-Artikolu 18(1) tad-Direttiva dwar it-Taxxa fuq l-Enerġija, flimkien ma’ l-għaxar inċiż tal-punt 8 ta’ l-Anness II tad-Direttiva. Dan il-provvediment jawtorizza lill-Italja biex, sal-31 ta’ Diċembru 2006, f’ċerti żoni, tapplika rati mnaqqsa tat-taxxa tas-sisa fuq il-fjuwil domestiku u l-LPG użati għat-tisħin. It-talba ta’ l-awtoritajiet Taljani saret qabel ma skadiet id-deroga li ssemmiet qabel. Iktar tagħrif u kjarifiki ġew pprovduti mill-awtoritajiet Taljani fil-5 ta’ Diċembru 2006, fit-13 ta’ Frar 2007, fit-18 ta’ April 2007, fis-7 ta’ Ġunju 2007, fis-27 ta’ Awwissu 2007, fl-1 ta’ Ottubru 2007 u fit-12 ta’ Novembru 2007. Biex issaħħaħ it-talba tagħha għal deroga, l-Italja tenfasizza d-diversità fit-territorju tagħha li għandu klima u kundizzjonijiet ġeografiċi varjabbli. Fl-1999, l-Italja għolliet il-livell ġenerali tat-taxxi tas-sisa bħala parti minn riforma tas-sistema tat-taxxa tagħha. Fl-istess ħin, b’kont meħud tal-karatteristiċi partikolari tat-territorju tagħha, sabiex ikun evitat piż żejjed fuq ċerti konsumaturi, l-Italja introduċiet rati mnaqqsa ta’ taxxa f’ċerti partijiet tat-territorju tagħha għal-LPG u l-gażolju użati għal raġunijiet ta' tisħin. Bħalissa, it-tnaqqis tat-taxxa huwa ta’ EUR 129.11 għal kull 1000 litru għall-gażolju (b’hekk ir-rata tat-taxxa applikabbli titniżżel għal EUR 274.10 għal kull 1000 litru) u ta’ EUR 159.07 għal kull 1000 kg ta’ LPG (b’hekk ir-rata ta’ taxxa applikabbli titniżżel għal EUR 30.87 għal kull 1000 kg). Ir-rati ta’ taxxa applikabbli huma ogħla mill-livelli minimi tat-tassazzjoni mniżżla fid-Direttiva. It-tnaqqis tat-taxxa huwa applikabbli f’żoni ġeografiċi li jissodisfaw il-kriterji li ġejjin: - Komuni li jaqgħu fiż-żona F kif iddefinit fid-digriet Presidenzjali Nru 412 ta’ l-1993. Dan id-digriet jaqsam it-territorju Taljan f’sitt żoni klimatiċi (minn A sa F). Il-klassifikazzjoni hija bbażata fuq l-unità ta’ kejl ta’ “gradi tal-ġurnata” li tirrappreżenta it-total tat-temperaturi medji ta’ kuljum matul il-perjodu konvenzjonali ta’ tisħin li jvarjaw mit-temperatura ottima ta’ 20 C°. Iktar ma jkun għoli n-numru li jingħata lil komun, iktar tkun baxxa l-medja tat-temperatura barra matul il-perjodu ta’ tisħin. Komuni li jaqgħu fiż-żona tal-klima F huma definiti bħala komuni b’iktar minn 3000 “gradi tal-ġurnata”[2]. - Komuni li jaqgħu fiż-żona E kif definit fid-digriet Presidenzjali Nru 412 ta’ l-1993, sakemm in-netwerk tal-gass naturali ma jkunx disponibbli għall-komun ikkonċernat. Komuni li jaqgħu fiż-żona tal-klima E huma definiti bħala komuni b’bejn 2100 u 3000 “gradi tal-ġurnata”. - Komuni fis-Sardinja u gżejjer żgħar, sakemm ma jkunx disponibbli netwerk ta’ gass naturali fil-komun ikkonċernat; din il-parti tar-reġim tkopri l-gżejjer Taljani kollha ħlief Sqallija. Skond l-awtoritajiet Taljani, id-differenzjazzjoni tat-taxxa u l-għażla taż-żoni eliġibbli huma bbażati fuq kriterji oġġettivi. L-intenzjoni hija li tkun żgurata kontinwità ġeografika mal-bqija tat-territorju Taljan, jiġifieri biex il-popolazzjoni taż-żoni eliġibbli titqiegħed fuq livell iktar komparabbli mal-bqija tal-popolazzjoni Taljana permezz ta’ tnaqqis ta’ spejjeż għoljin iż-żejjed tat-tisħin. L-ammont tat-tnaqqis tat-taxxa huwa l-istess f’kull sitwazzjoni; l-għan huwa biss li jtaffi l-ispejjeż żejda tat-tisħin għall-popolazzjoni taż-żoni eliġibbli li jirriżultaw minn klima kiesħa u/jew diffikultajiet fix-xiri tal-fjuwil. Skond l-awtoritajiet Taljani, għaż-żoni klimatiċi E u F, it-tnaqqis tat-taxxa għandha medja ta’ 11-12 % tal-prezz tal-gażolju u l-LPG użati għal raġunijiet ta’ tisħin. Dawn iċ-ċifri għandhom jitqabblu mal-medja ta’ l-ispejjez tat-tisħin: dawn huma, minħabba l-kundizzjonijiet klimatiċi, 90 % ogħla mill-medja nazzjonali fiż-żona klimatika E u 170 % ogħla mill-medja nazzjonali fiż-żona klimatika F. Il-partikolarità tal- gżejjer hija fil-fatt li minħabba s-sitwazzjoni ġeografika tagħhom, il-forniment tal-fjuwil huwa limitat u dan iwassal għal prezzijiet ogħla minn dawk fl-Italja kontinentali minħabba l-ispejjeż addizzjonali tat-trasport. L-awtoritajiet Taljani kkonfermaw li t-tnaqqis tat-taxxa ma jirriżultax f’kumpens żejjed u ma jaffettwax il-prezzijiet b'mod li dawk ta' l-LPG u l-gażolju jkunu orħos minn fl-Italja kontinentali. Skond il-kampjuni taċ-ċifri provduti mill-awtoritajiet Taljani, wara t-tnaqqis tat-taxxa l-prezz jibqa’ madwar bejn 2.5 EUR/hl u 4.5 EUR/hl ogħla minn fil-gżejjer kif imqabbel mal-prezzijiet għal-LPG fl-Italja kontinentali. Għall-gażolju, id-differenza fil-prezz hija iktar sinifikanti u f'xi każijiet, il-prezz finali fil-gżira jista’ jkun kważi doppju dak fuq l-art kontinentali. Fl-aħħarnett, la darba n-netwerk tal-gass naturali jkun disponibbli fil-komun ikkonċernat (li huwa possibbli fil-komuni li jaqgħu fiż-żona klimatika E u f’xi gżejjer), skond l-opinjoni ta’ l-awtoritajiet Taljan dan inaqqas, sa ċertu punt, l-ispejjeż żejda ta' dawn iż-żoni. B’mod partikolari, dan itejjeb il-varjetà ta’ l-għażliet bejn il-fjuwils disponibbli għall-konsumaturi. Konsegwentement, l-awtoritajiet Taljani ma jipprevedux tnaqqis tat-taxxa fil-komuni fiż-żona klimatika E jew fil-gżejjer ikkonċernati wara li tintemm il-kostruzzjoni tan-netwerk tal-gass naturali fil-komun ikkonċernat. Fil-komuni fiż-żona klimatika F, li jinsabu l-iktar fir-reġjuni muntanjużi, in-netwerks tal-gass naturali jiżviluppaw b’mod li ma jkoprux iż-żona ġeografika kollha, jew kważi kollha, tal-komuni kkonċernati.. Għalhekk, kwalunke żvilupp ta’ dan it-tip, għal ħafna mill-abitanti, se jonqos milli jtejjeb il-varjetà tal-fjuwils disponibbli. Għalhekk, l-eliġibbiltà ta’ komun fiż-żona klimatika F mhijiex ikkundizjonata min-nuqqas ta' netwerk tal-gass naturali. Il-miżura tikkorrispondi għal total baġitarju annwali ta’ madwar EUR 62 miljun. Il-popolazzjoni eliġibbli tammonta għal 4.4 miljun abitant. It-tnaqqis fit-taxxa jingħata fil-forma ta’ tnaqqis fil-preżż fil-mument ta’ l-akkwist ta’ prodotti ta’ l-enerġija mill-benefiċjarju (il-benefiċjarji huma r-residenti taż-żoni eliġibbli). - Dispożizzjonijiet eżistenti fl-ambitu tal-proposta Id-Direttiva tal-Kunsill 2003/96/KE tas-27 ta’ Ottubru 2003 li tirriforma l-istruttura tal-Komunità għat-tassazzjoni fuq prodotti ta' enerġija u elettriku. - Konsistenza ma' politiki u għanijiet oħrajn ta' l-Unjoni Kull talba għal deroga taħt l-Artikolu 19 tad-Direttiva dwar it-Taxxa fuq l-Enerġija trid tiġi eżaminata mill-Kummissjoni li għandha tqis it-tħaddim tajjeb tas-suq intern, il-bżonn li tiġi żgurata l-kompetizzjoni ġusta u l-politiki Komunitarji tas-saħħa, l-ambjent, l-enerġija u t-trasport. Għaż-żoni ġeografiċi kkonċernati, il-livell nazzjonali standard tat-taxxa applikabbli għal-LPG u l-gażolji użati għal raġunijiet ta’ tisħin jirriżulta fi spejjeż għat-tisħin li jkunu kbar wisq meta mqabbla mal-bqija tat-territorju Taljan. Dan huwa minħabba l-kundizzjonijiet iebsin tal-klima jew l-insularità taż-żoni msemmija, flimkien man-nuqqas ta’ aċċess għan-netwerk tal-gass naturali bħala sorz alternattiv ta’ enerġija għat-tisħin. Ir-rata mnaqqsa tat-taxxa tqis din il-pożizzjoni partikolari, fis-sens li ttaffi parzjalment l-ispejjeż addizzjonali għat-tisħin taż-żoni ġeografiċi kkonċernati, meta mqabbla mal-bqija tat-territorju Taljan. Skond l-awtoritajiet Taljani, f’kull każ, it-tnaqqis jibqa’ inqas minn dawn l-ispejjeż addizzjonali. Fl-istess ħin, il-livelli ta’ taxxa li jibqgħu, xorta huma ogħla mil-livelli minimi Komunitarji stabbiliti fid-Direttiva dwar it-Taxxa fuq l-Enerġija, kemm għall-gażolju kif ukoll għal-LPG. Għalhekk, jista’ jkun kkunsidrat li t-tnaqqis huwa kompatibbli ma’ l-effett ta’ l-inċentiv tat-taxxa bil-ħsieb ta’ effiċjenza fl-użu ta’ l-enerġija u aspetti oħra tal-politika dwar l-enerġija. Jirriżulta li l-miżura hija kompatibbli mal-politiki Komunitarji rilevanti dwar l-ambjent u l-enerġija. Barra minn hekk, il-miżura hija aċċettabbli mill-aspett tat-tħaddim tajjeb tas-suq intern u l-ħtieġa biex tkun żgurata kompetizzjoni ġusta. Il-miżura tipprova biss ittaffi parzjalment l-ispejjeż addizzjonali tat-tisħin assoċjati mal-kundizzjonijiet oġġettivi taż-żoni kkonċernati. It-tnaqqis tat-taxxa ma jistax jiġi akkumulat ma xi tip ieħor ta’ tnaqqis ta' taxxa u ma japplikax għal użu ieħor ta’ tisħin ħlief għal dak tal-kmamar. Skond l-awtoritajiet Taljani l-ammont benefiċċju fiskali għall-utenti kummerċjali, f’kull każ partikulari huwa kopert bir-Regolament tal-Kummissjoni (KE) Nru 1998/2006 tal-15 ta’ Diċembru 2006 dwar l-applikazzjoni ta’ l-Artikoli 87 u 88 tat-Trattat tal-KE dwar l-għajnuna de minimis[3]. Madankollu, fil-każ li l-benefiċju għal kwalunkwe impriża unika jaqbeż il-limitu stabbilit f’dak ir-regolament, dan ikun notifikat lill-Kummissjoni skond ir-Regolament (KE) 659/1999 tat-22 ta’ Marzu 1999 li jistabbilixii regoli dettaljati għall-applikazzjoni ta’ l-Artikolu 93 tat-Trattat tal-KE[4]. L-Artikolu 19(2) tad-Direttiva dwar it-Taxxa fuq l-Enerġija jipprevedi li l-miżuri adottati skond id-dispożizzjoinijiet tagħha jridu jkunu limitati biż-żmien, u jistabbilixxi perjodu massimu ta' 6 snin, bil-possibilità ta' tiġdid. Flistadju attwali, jidher xieraq li tingħata l-awtorizzazzjoni għal sitt snin. Għandu jkun żgurat li l-Italja tkun tista’ tapplika, bla ebda xkiel, it-tnaqqis speċifiku msemmi f’din il-proposta segwitu tas-sitwazzjoni li tirriżulta mill-Artikolu 18 tad-Direttiva, li għandu jinqara flimkien ma’ l-Anness II tad-Direttiva, qabel l-1 ta’ Jannar 2007. L-awtorizzazzjoni mitluba għandha għalhekk tingħata b’effett minn dik id-data. 2) KONSULTAZZJONI MAL-PARTIJIET INTERESSATI U VALUTAZZJONI TA’ L-IMPATT - Konsultazzjoni mal-partijiet interessati Il-proposta tikkonċerna lill-Italja biss. - Ġbir u użu ta' għarfien espert Ma kien hemm l-ebda ħtieġa għal kompetenza esterna. - Valutazzjoni ta' l-impatt Din il-proposta tikkonċerna l-awtorizzazzjoni lil Stat Membru individwali wara li jagħmel talba. 3) L-ELEMENTI LEGALI TAL-PROPOSTA Taqsira ta' l-azzjoni proposta Il-proposta għandha l-għan li tawtorizza lill-Italja għal deroga mid-dispożizzjonijiet ġenerali tad-Direttiva tal-Kunsill 2003/96/KE u biex ikunu applikati, f’ċerti żoni karatterizzati mil-livell għoli ta' spejjeż ta' tisħin, rati mnaqqsa ta’ taxxa fuq il-gażolju u l-LPG użati għat-tisħin. - Il-bażi ġuridika L-Artikolu 19 tad-Direttiva tal-Kunsill 2003/96/KE. - Prinċipju tas-sussidjarjetà Il-qasam tat-taxxa indiretta kopert fl-Artikolu 93 KE mhux fih innifsu fil-kompetenza esklussiva tal-Komunità fi ħdan it-tifsira ta’ l-Artikolu 5 KE. Madankollu, li l-Istati Membri jeżerċitaw il-kompetenzi konkorrenti tagħhom f’dan il-qasam huwa limitat ħafna mil-liġi Komunitarja eżistenti. Skond l-Artikolu 19 tad-Direttiva 2003/96/KE, il-Kunsill biss jista' jawtorizza lill-Istat Membru biex jintroduċi iktar eżenzjonijiet jew tnaqqis fi ħdan it-tifsira ta’ dik id-dispożizzjoni. l-Istati Membri ma jistgħux jieħdu post il-Kunsill. Il-proposta tikkonforma għalhekk mal-prinċipju tas-sussidjarjetà. - Prinċipju tal-proporzjonalità Il-proposta tikkonforma mal-prinċipju tal-proporzjonalità. It-tnaqqis fit-taxxa ma jaqbiżx l-ispejjeż addizzjonali involuti. - Għażla ta' strumenti Strument(i) propost(i): Deċiżjoni tal-Kunsill. L-Artikolu 19 tad-Direttiva 2003/96 għandu dispożizzjoni għal din it-tip ta’ miżura biss. 4) IMPLIKAZZJONI BAĠITARJA Il-miżura ma timponi l-ebda piż finanzjarju u amministrattiv fuq il-Komunità. Għalhekk, il-proposta m'għandha l-ebda impatt fuq il-baġit Komunitarju. Proposta għal DEĊIŻJONI TAL-KUNSILL li tawtorizza lill-Italja biex tapplika, fiż-żoni ġeografiċi determinati, rati mnaqqsa ta’ taxxa fuq il-gażolju u l-LPG użat għal raġunijiet ta’ tisħin skond l-Artikolu 19 tad-Direttiva 2003/96/KE (It-test bit-Taljan biss huwa awtentiku) IL-KUNSILL TA' L-UNJONI EWROPEA, Wara li kkunsidra t-Trattat li jistabbilixxi l-Komunità Ewropea, Wara li kkunsidra d-Direttiva tal-Kunsill 2003/96/KE tas-27 ta' Ottubru 2003 li tirriforma l-istruttura tal-Komunità dwar tassazzjoni fuq prodotti ta' enerġija u elettriku,[5] u b’mod partikolari l-Artikolu 19(1) tagħha, Wara li kkunsidra l-proposta mill-Kummissjoni, Billi: (1) Skond l-Artikolu 18(1) tad-Direttiva 2003/96/KE, li jinqara flimkien ma’ l-Anness II għal dik id-Direttiva, l-Italja kienet awtorizzata biex tapplika f’ċerti “żoni li huma partikolarment żvantaġġati” rati mnaqqsa tat-taxxa tas-sisa fuq il-fjuwil domestiku u l-LPG użati għat-tisħin. Id-deroga kienet applikabbli sal-31 ta' Diċembru 2006. (2) B’ittra datata s-17 ta’ Ottubru 2006, l-awtoritajiet Taljani talbu l-awtorizzazzjoni, taħt l-Artikolu 19 tad-Direttiva 2003/96/KE, biex japplikaw, fi ħdan l-istess żoni ġeografiċi, rati mnaqqsa ta’ taxxa fuq il-gażolju u l-LPG użati għat-tisħin. L-Italja tixtieq tkompli, wara l-31 ta’ Diċembru 2006, il-prattika nazzjonali tagħha li timxi mad-deroga msemmija hawn fuq. Din l-awtorizzazzjoni hija mitluba għall-perjodu mill-1 ta’ Jannar 2007 sal-31 ta’ Diċembru 2012. (3) L-Italja għandha territorju li jvarja ħafna b'kundizzjonijiet klimatiċi u ġeografiċi varjabbli. Fl-1999, l-Italja għolliet il-livell ġenerali tat-taxxi tas-sisa bħala parti minn riforma tas-sistema tat-taxxa tagħha. Billi jitqiesu l-partikolaritajiet tat-territorju tagħha, fl-istess ħin, l-Italja introduċiet rati mnaqqsa tat-taxxa fuq il-gażolju u l-LPG bil-ħsieb li ttaffi ftit l-ispejjeż għoljin iż-żejjed tat-tisħin li jkollhom iħallsu r-residenti ta’ ċerti żoni ġeografiċi. (4) Id-differenzjazzjoni tat-taxxa għandha l-għan li tqiegħed il-popolazzjoni ta’ żoni eliġibbli fuq livell li jista’ jitqabbel mal-bqija tal-popolazzjoni Taljana permezz tat-tnaqqis ta’ spejjeż ta’ tisħin li huma għoljin iż-żejjed. Għall-finijiet ta’ l-identifikazzjoni taż-żoni eliġibbli, l-Italja qed tiffoka fuq il-kriterji oġġettivi, li jittrattaw il-kundizzjonijiet klimatiċi taż-żona kkonċernata kif ukoll l-aċċess għan-netwerk tal-gass naturali. Dan il-kriterju ta’ l-aħħar jirrifletti l-għażla bejn il-fjuwils disponibbli għall-popolazzjoni taż-żona konċernata. (5) Għalhekk, it-tnaqqis tat-taxxa huwa applikabbli f’żoni ġeografiċi (komuni) li jissodisfaw il-kriterji alternattivi li ġejjin: i) komuni li jaqgħu fiż-żona klimatika F kif definit fid-digriet Presidenzjali Nru 412 ta’ l-1993[6], jiġifieri komuni b’iktar minn 3000 “gradi tal-ġurnata”, ii) komuni li jaqgħu fiż-żona E kif definit fid-digriet Presidenzjali Nru 412 ta’ l-1993, jiġifieri l-komuni b’2100 sa 3000 “gradi tal-ġurnata”[7]; iii) Sardinja u gżejjer żgħar; din l-aħħar parti tar-reġim tkopri l-gżejjer Taljani kollha ħlief Sqallija. Peress li sa ċertu punt l-iżvilupp tan-netwerk tal-gass naturali se jnaqqas l-ispejjeż addizzjonali tat-tisħin, u b’mod partikolari se jtejjeb il-varjetà ta’ għażliet bejn il-fjuwils disponibbli għall-konsumaturi, it-tnaqqis mhux se japplika iktar fil-komuni li jaqgħu taħt it-tieni u t-tielet żoni msemmija hekk kif jintemm dan l-iżvilupp fil-komun ikkonċernat. (6) Il-karatteristika komuni tal-komuni kkonċernati hija l-ispejjeż addizzjonali tat-tisħin meta mqabbla mal-bqija ta’ l-Italja. Fiż-żoni klimatiċi E u F, it-tnaqqis tat-taxxa huwa ekwivalenti għal medja ta’ 11-12 % tal-prezz tal-gażolju u l-LPG użati għat-tisħin. Il-medja ta’ l-ispejjeż tat-tisħin huma, minħabba l-kundizzjonijiet klimatiċi, 90 % ogħla mill-medja nazzjonali fiż-żona E u 170 % ogħla mill-medja nazzjonali fiż-żona klimatika F. L-ispejjeż addizzjonali tat-tisħin fil-gżejjer, meta mqabbla ma dawk fl-Italja kontinentali, jirriżultaw mill-partikolaritajiet ġeografiċi tagħhom, forniment limitat tal-fjuwil u spejjeż addizzjonali tat-trasport u konsegwentement il-prezzijiet ogħla tal-fjuwil kif mqabbla ma’ l-Italja kontinentali. (7) F’kull każ, it-tnaqqis tat-taxxa jibqa’ inqas mill-ispejjeż addizzjonali tat-tisħin li jkollha tħallas il-popolazzjoni kkonċernata, sabiex ma jkun hemm l-ebda każ ta' kumpens żejjed f'din il-kwistjoni. B’mod partikolari, l-awtoritajiet Taljani ddikjaraw li t-tnaqqis tat-taxxa ma jaqbiżx l-ammont ta’ l-ispejjeż żejda taż-żoni E u F dovuti għall-klima kiesħa; barra minn hekk, d’dak li għandu x’jaqsam mal-gżejjer, huma ddikjaraw li t-tnaqqis tat-taxxa ma jirriżultax fi tnaqqis tal-prezz tal-fjuwils ikkonċernati li jwassal għal prezz inqas minn dak ta’ l-istess fjuwil fl-Italja kontinentali. (8) Ir-rata mnaqqsa tat-taxxa kemm għall-gażolju kif ukoll għal-LPG tibqa’ ogħla mill-livelli Komunitarji minimi tat-taxxa stabbiliti fid-Direttiva 2003/96/KE. (9) Il-miżura kkonċernata tapplika biss għat-tisħin ta’ kmamar (kemm għal individwi privati kif ukoll għal negozji); ma tapplikax għal forom oħra ta’ użu kummerċjali ta' dawn il-prodotti. (10) Instab li l-miżura ma xxekkilx il-kompetizzjoni u ma ttellifx l-operazzjoni tas-suq intern u ma titqiesx inkompatibbli mal-politika Komunitarja dwar l-ambjent, l-enerġija u t-trasport. (11) Għalhekk, l-Italja għandha tkun awtorizzata, skond l-Artikolu 19(2) tad-Direttiva 2003/96/KE, biex tapplika rata mnaqqsa ta’ taxxa fuq il-gażolju u l-LPG użati għat-tisħin f’ċerti żoni ġeografiċi karaterizzati bil-livell għoli ta’ spejjeż tat-tisħin, kif indikat fl-anness għal din id-deċiżjoni, u dan għandu jkun applikabbli sal-31 ta’ Diċembru 2012. (12) Għandu jkun żgurat li l-Italja tkun tista’ tapplika, bla ebda xkiel, it-tnaqqis speċifiku msemmi f’din il-proposta segwitu tas-sitwazzjoni li tirriżulta mill-Artikolu 18 tad-Direttiva 2003/96/KE, li għandu jinqara flimkien ma’ l-Anness II tad-Direttiva, qabel l-1 ta’ Jannar 2007. L-awtorizzazzjoni mitluba għandha għalhekk tingħata b’effett mill-1 ta’ Jannar 2007. ADOTTA DIN ID-DEĊIŻJONI: Artikolu 1 B’hekk l-Italja hija awtorizzata tapplika rati mnaqqsa ta’ taxxa fuq il-gażolju u l-LPG użati fit-tisħin tal-kmamar f’ċerti żoni ġeografiċi karatterizzati mil-livell għoli ta’ l-ispejjeż tat-tisħin, kif spjegat fl-anness għal din id-deċiżjoni. Sabiex jiġi evitat kwalunkwe kumpens żejjed, it-tnaqqis m’għandhux ikun iktar mill-ispejjeż addizzjonali tat-tisħin taż-żoni kkonċernati. Ir-rata mnaqqsa għandha tkun konformi mar-rekwiżiti tad-Direttiva tal-Kunsill 2003/96/KE, u b’mod partikolari l-livelli minimi ta’ taxxa stabbiliti fl-Artikolu 9 ta' dik id-Direttiva. Artikolu 2 Il-konsum f’komuni fiż-żoni msemmija fil-punt 2 jew 3 ta' l-anness għal din id-deċiżjoni għandu jkun eliġibbli biss sakemm il-komun ikkonċernat ma jkollux netwerk tal-gass naturali. Artikolu 3 Din id-Deċiżjoni għandha tapplika mill-1 ta’ Jannar 2007 sal-31 ta’ Diċembru 2012. Artikolu 4 Din id-Deċiżjoni hija indirizzata lir-Repubblika ta' l-Italja. Magħmul fi Brussell, Għall-Kunsill Il-President ANNESS Ħarsa ġenerali lejn iż-żoni ġeografiċi kkonċernati b’din id-deċiżjoni 1. Komuni li jaqgħu fiż-żona klimatika F kif stabbilit bid-Digriet Presidenzjali tas-26 ta’ Awwissu 1993 Nru 412. 2. Komuni li jaqgħu fiż-żona klimatika E kif stabbilit bid-Digriet Presidenzjali tas-26 ta’ Awwissu 1993 Nru 412. 3. Komuni tas-Sardinja u gżejjer żgħar[8].[pic][pic][pic] [1] Id-Direttiva tal-Kunsill 2003/96/KE tas-27 ta' Ottubru 2003 li tirriforma l-istruttura tal-Komunità dwar tassazzjoni fuq prodotti ta' enerġija u elettriku (ĠU L 283 tal-31.10.2003 p. 51; Id-Direttiva kif emendata l-aħħar bid-Direttivi 2004/74/KE u 2004/75/KE (ĠU L 157 tat-30 ta' April 2004, p. 87 u p.100). [2] Il-bqija taż-żoni klimatiċi huma definiti f’termini ta’ “gradi tal-ġurnata” kif ġej: Żona A (inqas minn 600), Żona B (iktar minn 600, iżda mhux iktar minn 900), Żona C (iktar minn 900, iżda mhux iktar minn 1400) u Żona D (iktar minn 1400, iżda mhux aktar minn 2100). [3] ĠU L 379 28.12.2006, p 5. [4] ĠU L 83, 27.3.1999, p. 1. [5] ĠU L 283, 31.10.2003, p. 51 [6] Dan id-digriet jaqsam it-territorju Taljan f’sitt żoni klimatiċi (minn A sa F). Il-klassifikazzjoni hija bbażata fuq l-unità ta’ kejl ta’ “gradi tal-ġurnata” li tirrappreżenta t-total tat-temperaturi medji ta’ kuljum matul il-perjodu konvenzjonali ta’ tisħin li jvarjaw mit-temperatura ottima ta’ 20 C°. Iktar ma jkun għoli n-numru li jingħata lil komun, iktar tkun baxxa l-medja tat-temperatura barra matul il-perjodu ta’ tisħin. [7] Iż-żoni klimatiċi li jifdal huma definiti f’termini ta’ “gradi tal-ġurnata” kif ġej: Żona A (inqas minn 600), Żona B (iktar minn 600, iżda mhux iktar minn 900), Żona C (iktar minn 900, iżda mhux iktar minn 1400) u Żona D (iktar minn 1400, iżda mhux aktar minn 2100). [8] Il-Punt 3 jirreferi għall-gżejjer Taljani kollha ħlief għal Sqallija.