EUR-Lex Access to European Union law
This document is an excerpt from the EUR-Lex website
Document 52008DC0421
Communication from the Commission to the European Parliament and the Council - Solidarity in the face of Change: the European Globalisation Adjustment Fund (EGF) in 2007 - Review and Prospects
Komunikazzjoni tal-Kummissjoni lill-Parlament Ewropew u lill-Kunsill - Solidarjetà quddiem il-Bidla: Fond Ewropew ta’ Aġġustament għall-Globalizzazzjoni (EGF) fl-2007 - Reviżjoni u Prospetti
Komunikazzjoni tal-Kummissjoni lill-Parlament Ewropew u lill-Kunsill - Solidarjetà quddiem il-Bidla: Fond Ewropew ta’ Aġġustament għall-Globalizzazzjoni (EGF) fl-2007 - Reviżjoni u Prospetti
/* KUMM/2008/0421 finali */
[pic] | KUMMISSJONI TAL-KOMUNITAJIET EWROPEJ | Brussel 2.7.2008 KUMM(2008) 421 finali KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Solidarjetà quddiem il-Bidla: Fond Ewropew ta’ Aġġustament għall-Globalizzazzjoni (EGF) fl-2007 - Reviżjoni u Prospetti KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL Solidarjetà quddiem il-Bidla:Fond Ewropew ta’ Aġġustament għall-Globalizzazzjoni (EGF) fl-2007 [1] - Reviżjoni u Prospetti L-EGF sena wara Waħda mit-temi ewlenin ta' l-Aġenda Soċjali Mġedda[2] hija reazzjoni flessibbli u b'kunfidenza għall-bidla li ġġib magħha l-globalizzazzjoni. Parti minn dik ir-reazzjoni tinkludi turija ta' solidarjetà lil dawk affettwati negattivament mill-globalizzazzjoni. Il-Fond Ewropew ta’ Aġġustament għall-Globalizzazzjoni (EGF) kien imfassal bħala mod ta' kif tintwera solidarjetà - biex jiġu megħjuna ħaddiema li tilfu xogħolhom minħabba l-globalizzazzjoni ħalli jsibu xogħol ġdid malajr. Wara l-adozzjoni tar-Regolament (KE) Nru 1927/2006 mill-Parlament Ewropew u mill-Kunsill fl-20 ta' Diċembru 2006, l-EGF sar operattiv mill-1 ta' Jannar 2007. Il-Kummissjoni tirrevedi l-EGF wara sena li jkun ilu operattiv u tagħti suġġerimenti għal modi immedjati u għat-tul għal kif titjieb l-eżekuzzjoni tiegħu. Għajnuna għall-ħaddiema biex jaġġustaw ruħhom għall-bidla L-EGF irċieva għaxar applikazzjonijiet fl-2007 li kellhom fil-mira 11 339 ħaddiem. Ġew approvati erba' applikazzjonijiet mill-Kummissjoni qabel tmiem l-2007, wara mobilizzazzjoni tal-fondi neċessarji mill-Awtorità Baġitarja ta' l-UE; ħamsa baqgħu jiġu kkunsidrati, u waħda ġiet irtirata (biex terġa' tintbagħat fil-bidu ta' l-2008 wara xi modifiki tekniċi). L-EGF ta għajnuna li tammonta għal € 18.6 miljun jew 3.7 % ta' l-ammont massimu permess skond il-Ftehim Interistituzzjonali dwar dixxiplina baġitarja u ġestjoni soda tal-finanzi[3]. Il-fondi ntużaw għal miżuri attivi fis-suq tax-xogħol għal 5 113-il ħaddiem kkonċernati. Id-dettalji għas-sena 2007 ta' l-applikazzjonijiet u d-deċiżjonijiet li saru, u l-azzjonijiet iffinanzjati, jinsabu fl-anness ma' dan ir-rapport. L-ammont massimu annwali ta' € 500 miljun fis-sena mhuwiex mira għall-infiq. Minflok, huwa jiddaħħal fir-riserva tal-baġit u jipprovdi l-possibilità ta' finanzjament adegwat, jekk inkun hemm inċidenza għolja ta' ristrutturazzjoni fi kwalunkwe sena partikolari. L-approprjazzjonijiet neċessarji ta' l-impenn għal kull intervent huma mobilizzati permezz ta' trasferiment lil-linja tal-baġit ta' l-EGF, wara ftehim ma' l-Awtorità Baġitarja fuq proposta mill-Kummissjoni. Madankollu, ftit Stati Membri rrikorrew għall-EGF. Hemm bosta raġunijiet għal dan. Waħda minnhom hija l-klima ekonomika favorevoli fl-2007. Huwa naturali li l-Istati Membri ma applikawx għal għajnuna f'perjodu meta s-swieq tax-xogħol qed jaħdmu sew. Iżda r-rikors limitat għall-EGF jista' jirrifletti wkoll inċertezza fl-Istati Membri dwar l-eliġibilità għal finanzjament. Għalkemm l-EGF jista' jintervjeni immedjatament ladarba l-ħaddiema jitilfu xogħolhom, l-Istati Membri qagħdu lura milli japplikaw għad-dritt ta' finanzjament mill-EGF sa mill-ewwel ġurnata ta' kriżi ta' ħaddiema jitilfu xogħolhom minħabba inċertezza dwar jekk l-applikazzjoni tagħhom tkunx approvata. Għalhekk, hemm fejn l-eżekuzzjoni ta' l-EGF tista' titjieb. Titjib tat-tħaddim attwali ta' l-EGF Jistgħu jittieħdu passi immedjati biex jitjieb it-tħaddim ta' l-EGF: - Semplifikazzjoni tal-proċeduri: Il-Kummissjoni se tissemplifika l-proċeduri tagħha biex twieġeb malajr u b'mod ċar lill-Istati Membri dwar l-eleġibilità ta' l-applikazzjonijiet tagħhom[4]. Hija se tqassam ukoll tagħrif dettaljat dwar il-każijiet preċedenti, li rnexxew u li le, biex tgħin lill-Istati Membri jivvalutaw il-kriterji użati mill-Istituzzjonijiet ta' l-UE biex jaslu għad-deċiżjonijiet tagħhom. Il-Kummissjoni se teżamina kif tista' tħaffef l-ipproċessar ta' l-applikazzjonijiet u tissemplifika l-proċeduri interni tagħha filwaqt li żżomm kwalità ta' analiżi għolja. - Promozzjoni ta' skambju ta' esperjenzi u prassi tajba , inklużi l-metodoloġiji ttestjati estensivament permezz tal-Fond Soċjali Ewropew (FSE), u b'mod partikolari l-Inizjattiva Komunitarja EQUAL. Dan jista' jnaqqas d-dewmien fl-Istati Membri waqt li jaħsbu għal miżuri adegwati għal kriżi ta' telfien ta' xogħol fuq skala kbira. Eżempju ta' min isegwih huwa l-approċċ użat mill-Portugall, fejn Deċiżjoni Ministerjali adottat sett ta' miżuri li jistgħu jiġu attwati fi żmien qasir f'każijiet tipiċi ta' EGF. - Intensifikazzjoni ta' attivitajiet ta' tqajjim ta' kuxjenza sabiex tinkiseb iktar viżibilità tal-Fond. Inħarsu 'l quddiem - aġġustament tar-Regolament ta' l-EGF Fid-dawl ta' l-esperjenza u bil-ħsieb tat-tisħiħ ta' l-impatt ta' l-EGF fuq il-ħolqien ta' l-impjiegi, it-taħriġ u l-opportunitajiet għall-ħaddiema ta' l-Ewropa, il-Kummissjoni qiegħda teżamina b'mod attiv modi kif il-Fond jista' jiġi mmodifikat, fil-limiti baġitarji preżenti, biex titjieb l-eżekuzzjoni tiegħu. Ir-Regolament ta' l-EGF (fl-Artikolu 20 tiegħu) effettivament jistipula li l-Kummissjoni tista' tibgħat proposta, fuq il-bażi ta' l-ewwel rapport annwali, għall-Parlament Ewropew u l-Kunsill biex jirrevedu r-Regolament. Kopertura ta' telfien ta' xogħol mhux attribwibbli direttament għal xejriet kummerċjali : L-EGF jiffoka fuq telfien ta' xogħol ikkawżat minn bidliet strutturali fix-xejriet kummerċjali globali. Il-globalizzazzjoni tista' taħdem ukoll permezz ta' tipi oħrajn ta' bidliet strutturali. Bidliet bħal dawn jinkludu progress maġġuri fil-produzzjoni u t-teknoloġija tal-prodott; bidliet fl-organizzazzjoni tal-produzzjoni (bħall-għoti ta' xogħol barra mill-kumpanija); u aċċess għal materja prima u inputs oħrajn u l-prezz tagħhom. Dan joħroġ partikolarment minn żidiet reċenti fil-prezzijiet taż-żejt u l-impatt tagħhom fuq setturi fejn inputs tal-fjuwil jirrappreżentaw fattur ta' spiża għolja. Bidliet maġġuri u ħesrem jistgħu jwasslu għal telfien ta' xogħol li ma jistax ikun kopert minn Regolament eżistenti. Il-Kummissjoni se teżamina dawn il-muturi ta' globalizzazzjoni biex tara jekk jistgħux jitqiesu bħala li jwasslu għal appoġġ ta' l-EGF. Espansjoni ta' l-ambitu ta' l-EGF għal avvenimenti ta' telfien ta' xogħol iżgħar : Ir-rekwiżit ġenerali ta' mill-inqas 1 000 post tax-xogħol mitluf jista' jitnaqqas sabiex l-Istati Membri jingħataw iktar flessibilità biex jippreżentaw l-applikazzjonijiet, inklużi għall-SMEs u swieq tax-xogħol iżolati[5]. Il-Kummissjoni qiegħda tanalizza l-implikazzjonijiet li tnaqqas dan il-limitu fuq l-għadd ta' nies eleġibbli u fuq il-baġit. Alternattiva possibbli għat-tnaqqis tal-limitu eżistenti tista' tkun l-inklużjoni mhux biss tat-telfien ta' xogħol tal-fornituri u l-produtturi 'l isfel fil-katina tal-produzzjoni tal-kumpanija ewlenija kkonċernata imma wkoll telfien ta' xogħol ieħor f'kumpaniji oħrajn fiż-żona ġeografika kkonċernata. Espansjoni tad-dewmien ta' l-għajnuna ta' l-EGF : Billi mhux il-ħaddiema kollha li jitilfu xogħolhom isibu impjieg matul il-perjodu ta' appoġġ mill-EGF, hemm bżonn ta' appoġġ li jdum iktar. Tista' tiġi kkunsidrata l-estensjonjoni tal-perjodu massimu għall-użu ta' finanzjament ta' l-EGF lil hinn mit-12-il xahar speċifikati fir-regolament attwali. Possibilitajiet oħrajn bħall-użu ta' l-EGF għat-trawwim tal-mobilità tal-ħaddiema bejn l-Istati Membri qegħdin jiġu eżaminati wkoll. Tista' tiġi kkunsidrata wkoll l-iddedikar ta' ammont limitat ta' fondi għall-analiżi u l-antiċipazzjoni tal-bidliet minħabba l-globalizzazzjoni. Konklużjoni Il-Kummissjoni tistieden lill-Parlament Ewropew u lill-Kunsill jieħdu nota ta' l-impatt pożittiv ta' l-EGF fl-ewwel sena ta' ħidma. Il-Kummissjoni se tissemplifika l-proċeduri, tippromwovi l-iskambju ta' prassi tajba u tintensifika t-tqajjim ta' kuxjenza dwar l-EGF. Hija se tivvaluta l-fattibilità ta' modifika tar-Regolament u se tagħmel proposti adatti f'dan ir-rigward qabel ma toħroġ ir-rapport annwali li jmiss. ANNESS 1. Applikazzjonijiet li waslu fl-2007 Tabella 1: Applikazzjonijiet li waslu fl-2007 Mill-10 applikazzjonijiet għal għajnuna li waslu għand l-EGF fl-2007, erbgħa ġew approvati qabel l-aħħar tas-sena, ħamsa baqgħu jiġu kkunsidrati, u waħda ġiet irtirata (biex terġa' tintbagħat fil-bidu ta' l-2008 wara xi modifiki tekniċi). L-ebda applikazzjonijiet ma ġew miċħuda fl-2007, la fuq bażi ta' ineliġibilità u lanqas minħabba nuqqas ta' approprjazzjonijiet suffiċjenti. Id-dettalji għall-applikazzjonijiet kollha huma disponibbli fuq il-websajt ta' l-EGF tal-Kummissjoni, fi: http://ec.europa.eu/employment_social/egf/applications07_mt.html Applikazzjonijiet lill-EGF fl-2007 skond l-Istat Membru: Seba' Stati Membri applikaw għal kontribut mill-EGF, fosthom l-Italja fir-rigward tas-settur tat-tessuti fi tliet reġjuni separati, u Franza fir-rigward ta' żewġ avvenimenti ta' telfien ta' xogħol. L-applikazzjoni minn Spanja ġiet irtirata u sussegwentement reġgħet intbagħtet fl-2008. Applikazzjonijiet lill-EGF fl-2007 bl-ammont ta' kontribuzzjoni mitluba: L-ammont ta' għajnuna mitlub huwa fid-diskrezzjoni ta' l-Istat Membru applikant, u jiddependi fost l-oħrajn mis-severità ta' l-avveniment ta' telfien ta' xogħol li l-applikazzjoni tirreferi għalih. Ma hemm l-ebda ammont massimu jew irrakkomandat. L-ammonti mitluba jvarjaw minn € 681 207 fl-applikazzjoni Maltija (EGF/2007/008) għal € 14 660 750 fl-applikazzjoni Taljana fir-rigward tas-settur tat-tessuti fil-Lombardija (EGF/2007/007). Applikazzjonijiet lill-EGF fl-2007 skond l-għadd ta' ħaddiema fil-mira ta' l-għajnuna: Għalkemm l-EGF huwa maħsub primarjament biex jgħin f'każijiet ta' telfien ta' xogħol fuq skala kbira, l-Istati Membri jistgħu jagħmlu applikazzjonijiet fir-rigward ta' swieq tax-xogħol żgħar jew ċirkostanzi eċċezzjonali. Barra minn hekk, Stat Membru jista' jagħżel li jiffoka l-għajnuna biss fuq xi wħud mill-ħaddiema li tilfu xogħolhom, jekk iħoss li dawn jiffaċċjaw diffikultajiet eċċezzjonali biex jibqgħu jaħdmu. Filwaqt li l-parti l-kbira ta' l-applikazzjonijiet (5 minn 9) għandhom fil-mira iktar minn 1 000 ħaddiem, tnejn oħra li jikkonċernaw 'swieq tax-xogħol żgħar' għandhom fil-mira numru iżgħar, u fil-każ taż-żewġ kontribuzzjonijiet mogħtija lil Franza (EGF/2007/001 u EGF/2007/002), l-Istat Membru mmira speċifikatament l-għajnuna lejn parti iżgħar tal-ħaddiema affettwati li min kien jimpjegahom spiċċa falla. Applikazzjonijiet lill-EGF fl-2007 bl-ammont ta' kontribuzzjoni mitluba għal kull ħaddiem (Euro): Il-pakkett ta' servizzi individwalizzati li l-Istati Membri jipproponu li joffru huwa fid-diskrezzjoni tagħhom. L-ammont mitlub għal kull ħaddiem milqut jista' għalhekk ivarja skond is-severità ta' l-avveniment ta' telfien ta' xogħol, il-qagħda tas-suq tax-xogħol fir-reġjun milqut, iċ-ċirkostanzi individwali tal-ħaddiema affettwati, jew anki l-istrutturi ġenerali ta' nfiq fl-Istat Membru jew ir-reġjun ikkonċernat. Fil-prattika, l-ammonti proposti għal kull ħaddiem varjaw bil-kbir, minn kemm kemm iktar minn € 1 000 fil-każ ta' Malta (EGF/2007/008) għal aktar minn € 11 000 fil-każ ta' l-applikazzjoni Taljana fir-rigward tas-settur tat-tessuti f'Sardenja. F'termini ġenerali, l-għajnuna proposta għal kull ħaddiem ġeneralment tkun ogħla f'reġjuni jew setturi fejn il-ħaddiema jiffaċċjaw problemi partikolari tas-suq tax-xogħol, jew fejn l-ispejjeż ikunu ogħla mill-medja ta' l-UE. Applikazzjonijiet lill-EGF fl-2007 skond il-kriterju ta' l-intervent: L-EGF jippermetti applikazzjonijiet li jirrispettaw waħda mit-tliet kriterji fl-Artikolu 2 tar-Regolament (KE) Nru 1927/2006. Tista' ssir applikazzjoni jekk bidliet strutturali maġġuri fix-xejriet kummerċjali dinjija jwasslu għal tfixkil ekonomiku serju, partikolarment żieda sostanzjali fl-importazzjonijiet fl-UE, jew tnaqqis rapidu tas-sehem mis-suq ta’ l-UE f’settur partikolari jew delokalizzazzjoni lejn pajjiżi terzi, li jirriżultaw fi: (a) telf ta' mill-inqas 1 000 post tax-xogħol matul perjodu ta' 4 xhur f'intrapriża fi Stat Membru, inklużi l-ħaddiema li jitilfu xogħolhom mal-fornituri tagħhom jew mal-produtturi iktar 'l isfel fil-katina ta' produzzjoni, jew (b) telf ta' mill-inqas 1 000 post tax-xogħol, matul perjodu ta' 9 xhur, partikolarment f'intrapriżi żgħar jew ta' daqs medju, f'settur NACE 2 f'reġjun wieħed jew f'żewġ reġjuni maġenb xulxin fil-livell NUTS II. Tlieta mill-applikazzjonijiet li waslu fl-2007 rreferew għall-kriterji ta' l-Artikolu 2(a). Erbgħa oħrajn irreferew għall-kriterji fl-Artikolu 2(b). Barra minn hekk, meta jitqies id-daqs żgħir ta' xi swieq tax-xogħol ta' l-UE, jew ċirkostanzi eċċezzjonali mhux definiti oħrajn, tista' ssir kontribuzzjoni mill-EGF. (c) fi swieq tax-xogħol żgħar jew f'ċirkostanzi eċċezzjonali, sostanzjati sew mill-Istat(i) Membru/i kkonċernat(i), anke jekk il-kundizzjonijiet stabbiliti f'(a) u (b) hawn fuq ma jkunux sodisfatti għal kollox, meta t-telf ta' postijiet tax-xogħol iħalli impatt serju fuq l-impjiegi u l-ekonomija lokali. Tnejn mill-applikazzjonijiet li waslu fl-2007 rreferew għall-kriterji ta' l-Artikolu 2(c). 2. Il-kontribuzzjonijiet li ngħataw fl-2007 Wara l-mobilizzazzjoni tal-fondi neċessarji mill-Awtorità Baġitarja, il-Kummissjoni ħadet deċiżjonijiet biex tagħti kontribuzzjonijiet finanzjarji mill-Fond fl-erba' każijiet li ġejjin: Tabella 2: Il-kontribuzzjonijiet li ngħataw mill-Kummissjoni fl-2007 EGF/2007/002 | Franza | Fornituri għar-Renault | 1,258,030 | 2007/726/KE tat-23/10/2007 (ĠU L 294, 13/11/2007, p. 21) | C(2007) 6149 ta' l-4/12/2007 | EGF/2007/003 | Il-Ġermanja | BenQ | 12,766,150 | 2008/30/KE tat-18/12/2007 (ĠU L 6, 10/01/2008, p. 9) | C (2007) 6747 tat-18/12/2007 | EGF/2007/004 | Il-Finlandja | Perlos | 2,028,538 | 2008/30/KE tat-18/12/2007 (ĠU L 6, 10/01/2008, p. 9) | C(2007) 6742 tat-18/12/2007 | Total | 18,610,968 | L-Awtorità Baġitarja ma rrifjutat l-ebda proposta li ressqitilha l-Kummissjoni għal finanzjament mill-EGF, u ma mmodifikat bl-ebda mod il-proposti minn kif intbagħtu mill-Kummissjoni. 3. L-azzjonijiet iffinanzjati Ir-Regolament ta' l-EGF jillimita l-Fond biex jiffinanzja miżuri ta' Politika tas-Suq tax-Xogħol Attiva (ALMP) li jagħmlu parti minn pakkett koordinat ta’ servizzi personalizzati mfassla biex jerġgħu jintegraw fis-suq tax-xogħol lill-ħaddiema li jkunu tilfu xogħolhom. Barra minn hekk, l-EGF jista' jiffinanzja attivitajiet ta' Għajnuna Teknika mwettqa minn Stat Membru biex jiffaċilita t-tħejjija, il-ġestjoni, it-tagħrif u l-pubbliċità, u kontroll tal-kontribuzzjoni. It-tqassim ta' l-ispejjeż stmati ta' l-azzjonijiet proposti fl-erba' interventi mill-EGF mogħtija fl-2007, flimkien ma' l-attivitajiet ta' Għajnuna Teknika ta' sostenn, huwa kif ġej. Tabella 3: Infiq ta' miżuri speċifiċi ta' Politika tas-Suq tax-Xogħol Attiva (ALMP) Klassifikazzjoni mill-Eurostat ta' l-Interventi tal-Politika tas-Suq tax-Xogħol (LMP) | Ammont ta' l-EGF (Euro) | % tat- total | Servizzi ta’ l-LMP | 1 | Għajnuna għat-tfittix ta’ impjieg | 1.1.2 | Servizzi ta' ġestjoni skond il-każ individwali | 306 623 | 1.6 % | Miżuri tal-LMP | 2 | Taħriġ (mill-ġdid) għas-suq tax-xogħol | 2.1 | Taħriġ istituzzjonali | 2 715 632 | 14.6 % | Allokazzjonijiet għat-taħriġ/Allokazzjonijiet għat-tfittix ta' impjieg | 13 476 688 | 72.4 % | 4 | Inċentivi għall-impjiegi | 4.1 | Inċentivi għar-reklutaġġ | 821 050 | 4.4 % | 4.2 | Inċentivi biex jinżammu l-impjiegi | 325 000 | 1.7 % | 7 | Inċentivi biex tibda | 326 475 | 1.8 % | Għajnuna Teknika (Artikolu 3 tar-R. 1927/2006) | 639 500 | 3.4 % | Total | 18 610 968 | 100 % | Miżuri li ma jidhrux hawn fuq ma kinux proposti mill-Istati Membri fl-erba' interventi ta' l-EGF mogħtija fl-2007. 4. Il-profil tal-ħaddiema li jibbenefikaw minn għajnuna ta' l-EGF Total ta' 5 113-il ħaddiem ibbenefikaw minn għajnuna mill-EGF fl-erba' kontribuzzjonijiet mogħtija fl-2007. Dawn il-ħaddiema huma mxerrda f'għadd ta' reġjuni fi Franza, il-Ġermanja u l-Finlandja. Table 4: Il-profil tal-ħaddiema li bbenefikaw minn għajnuna ta' l-EGF fl-2007 li minnhom: nisa | 41 | 155 | 797 | 302 | 1 295 | % | 15 % | 25 % | 24 % | 33 % | 25 % | li minnhom: mhumiex ċittadini ta’ l-UE | 0 | 5 | 91 | 0 | 96 | li minnhom, ta' l-età ta': | 15-24 | 2 | 15 | 34 | 91 | 142 | 25-54 | 236 | 553 | 3,149 | 787 | 4,725 | 55-64 | 29 | 60 | 121 | 37 | 247 | 65+ | 0 | 0 | 0 | 0 | 0 | li minnhom, għandhom problema ta’ saħħa jew diżabilità fit-tul | 4 | 49 | n/a | 50 | 103 | 5. Kumplimentarjetà ma' azzjonijiet iffinanzjati mill-Fondi Strutturali, partikolarment il-FSE L-EGF jiffinanzja biss Miżuri tas-Suq tax-Xogħol Attivi u, bħall-Fond Soċjali Ewropew (FSE), ma jistax jikkontribwixxi għal miżuri ta' ħarsien soċjali passivi. Madankollu, filwaqt li l-Fondi Strutturali jikkonsistu fi programmi multiannwali b'appoġġ għal miri strateġiċi, fit-tul – partikolarment antiċipazzjoni u ġestjoni ta' bidla u ristritturazzjoni, b'attivitajiet bħal tagħlim tul il-ħajja – l-EGF huwa reazzjoni għal kriżi speċifika, ta' skala kbira. Għalhekk, filwaqt li l-azzjonijiet huma simili għal dawk tal-Fond Soċjali Ewropew (FSE), huwa jipprovdi sostenn individwali ta' darba, limitat fiż-żmien, immirat direttament biex jgħin lill-ħaddiema li tilfu xogħolhom minħabba raġunijiet kummerċjali. L-Istati Membri jistgħu jibdew jimplimentaw azzjonijiet taħt l-EGF immedjatament malli jsiru jafu b'avveniment maġġuri ta' telfien ta' xogħol, għalhekk ma għandhomx għalfejn ibidlu programm ta' Fond Strutturali biex jagħmlu dan. L-Istati Membri huma mħeġġa, madankollu, biex jużaw il-perjodu ta' implimentazzjoni tal-kontribut ta' l-EGF (12-il xahar mid-data ta' l-applikazzjoni) biex jiġu vvalutati l-bżonnijiet fit-tul ikkawżati mill-avveniment ta' telfien ta' xogħol, u biex jimmodifikaw kwalunkwe programmi tal-FSE neċessarji. L-applikanti kollha huma meħtieġa, bħala parti mill-proċess ta' applikazzjoni għall-EGF, jiddeskrivu kif biħsiebhom jippromwovu l-kumplimentarjetà ta' l-azzjonijiet ta' l-EGF ma' dawk tal-Fondi Strutturali. 6. Ir-riżultati miksuba L-2007 kienet l-ewwel sena ta' implimentazzjoni ta' l-EGF. Is-sors ewlieni ta' informazzjoni dwar ir-riżultati miksuba mill-EGF se jkun ir-rapport finali li jrid jiġi ppreżentat mill-Istat Membru wara tmiem il-perjodu speċifikat għall-użu tal-kontribuzzjoni, li huwa tnax-il xahar wara d-data ta' applikazzjoni. Dan ir-rapport finali jrid jintbagħat mill-Istati Membri mhux iktar tard minn sitt xhur wara tmiem il-perjodu ta' użu tal-kontribuzzjoni. L-ebda wieħed mir-Rapporti Finali fir-rigward tal-kontribuzzjonijiet mogħtija fl-2007 kienu dovuti fl-2007, u b'hekk il-Kummissjoni għad ma għandha l-ebda tagħrif dettaljat dwar ir-riżultati miksuba. Tabella 5: L-iskeda ta' rappurtaġġ għall-kontribuzzjonijiet mogħtija fl-2007 2 | 23/3/2007 | Franza | 23/10/2007 | 22/3/2008 | 22/9/2008 | 3 | 27/6/2007 | Il-Ġermanja | 18/12/2007 | 26/6/2008 | 26/12/2008 | 4 | 18/7/2007 | Il-Finlandja | 18/12/2007 | 17/7/2008 | 17/1/2009 | Il-Kummissjoni se tagħlaq il-kontribuzzjoni finanzjarja mhux iktar tard minn sitt xhur wara li tirċievi t-tagħrif kollu mitlub fir-Rapport Finali. 7. Attivitajiet ta' Għajnuna Teknika li għamlet il-Kummissjoni Ewropea Informazzjoni u pubbliċità Ir-Regolament (KE) Nru 1927/2006 (Artikolu 9) jitfa' responsabbiltà fuq il-Kummissjoni biex: "twaqqaf sit ta’ l-internet li jkun disponibbli bil-lingwi kollha tal-Komunità, liema sit għandu jipprovdi tagħrif dwar l-EGF, gwida dwar it-tfigħ ta’ l-applikazzjonijiet, u tagħrif aġġornat dwar applikazzjonijiet aċċettati u miċħuda, filwaqt li jenfasizzaw l-irwol ta’ l-awtorità baġitarja." Sit ta’ l-internet. Is-sit ta' l-internet (http://ec.europa.eu/egf) ilu jaħdem minn Marzu 2007, u fih sezzjonijiet dwar mistoqsijiet u tweġibiet bażiċi dwar l-EGF, aħbarijiet, dokumenti ewlenin, applikazzjonijiet, librerija ta' rapporti rilevanti u ħoloq, u dettalji ta' l-awtoritajiet responsabbli ta' l-EGF fl-Istati Membri. Il-websajt kien aġġornat u mtejjeb fuq bażi regolari, b'dokumenti f'lingwi differenti jiżdiedu malli jsiru disponibbli. Vidjo ta' l-EGF Fl-2007 l-Kummissjoni ħarġet vidjo dwar l-EGF biex jintuża mill-mezzi tax-xandir u partijiet interessati oħrajn. Il-vidjo ta' disa' minuti jinkludi servizz dwar l-attivitajiet ta' l-EGF fi Franza u l-Finlandja, u tista' tarah fi: http://ec.europa.eu/avservices/video/video_prod_en.cfm?type=detail&prodid=4097 Fuljett Fl-2007 l-Kummissjoni ppubblikat fuljett informattiv dwar l-EGF fi 22 lingwa (il-lingwi uffiċjali kollha ħlief l-Irlandiż). Dan il-fuljett huwa disponibbli fi kwantitajiet limitati fuq karta, imma huwa disponibbli liberament ukoll fuq is-sit ta' l-internet ta' l-EGF tal-Kummissjoni fi: http://ec.europa.eu/employment_social/egf/docs/egf_leaflet_mt.pdf Attività ta' verifika u kontroll Ma kien hemm l-ebda attivitajiet ta' verifika u kontroll speċifiċi għall-EGF imwettqa mill-Kummissjoni fl-2007. Valutazzjoni Ir-Regolament ta' l-EGF ma jipprevedix valutazzjoni ta' l-EGF sal-31 ta’ Diċembru 2011. Il-Kummissjoni diġà ħadet passi biex tiżgura li jinġabar tagħrif xieraq mill-Istati Membri mill-bidu ta' l-EGF. Laqgħat ma' l-Awtoritajiet Nazzjonali Fil-bidu ta' l-2007 l-Kummissjoni stabbiliet netwerk ta' punti ta' kuntatt fl-Istati Membri, sabiex tgħin lill-Istati Membri jlestu ruħhom għall-applikazzjonijiet potenzjali kif ukoll l-implimentazzjoni tal-Fond. In-netwerk huwa rreġistrat formalment bħala l-"Grupp ta' Esperti dwar il-Persuni ta' Kuntatt tal-Fond Ewropew ta' Aġġustament għall-Globalizzazzjoni", jew fil-qasir, "il-persuni ta' kuntatt ta' l-EGF" (kodiċi E20100). Il-Kummissjoni taġġorna regolarment il-membri tal-grupp dwar il-Fond, tistidinhom għal laqgħat ta' skambji ta' esperjenza u tagħrif. Il-membri tal-grupp huma uffiċjali fi ħdan il-ministeri fl-Istati Membri li jew għandhom, jew x'aktarx li jkollhom, responsabbiltà biex japplikaw għal kontribuzzjoni mill-EGF jew jimplimentawha. Saru żewġ laqgħat tal-grupp fi Brussell matul l-2007, fl-1 ta' Marzu u fid-9 ta' Ottubru. 8. Rapport finanzjarju Fondi kkontribwiti: Skond il-Ftehim Interistituzzjonali tas-17 ta’ Mejju 2006, l-EGF ma jistax jaqbeż ammont annwali massimu ta' EUR 500 miljun (prezzijiet ta' l-2006) li jistgħu joħorġu minn kwalunkwe marġini eżistenti taħt il-massimu ta' nfiq globali tas-sena preċedenti, u/jew minn approprjazzjonijiet ta' impenn ikkanċellati mis-sentejn preċedenti, esklużi dwk relatati ma' l-intestatura 1B tal-qafas finanzjarju. Barra minn hekk, skond l-Artikolu 12.6 tar-Regolament (KE) Nru 1927/2006, ta' l-inqas kwart mill-ammont annwali massimu jrid jibqa' disponibbli fl-1 ta' Settembru ta' kull sena sabiex ikopri l-ispejjeż li jinqalgħu sa l-aħħar tas-sena. Matul l-2007 erbgħa ngħataw kontribuzzjonijiet ta' l-EGF mill-Awtorità Baġitarja (ara t-Tabella 2). Il-fondi mogħtija mill-Awtorità Baġitarja tirrappreżenta 3.72 % ta' l-ammont annwali massimu. Ma ngħataw l-ebda kontribuzzjonijiet qabel l-1 ta’ Settembru 2007, u għalhekk l-ammont kollu baqa' disponibbli sabiex ikopri l-ispejjeż li jinqalgħu sa l-aħħar tas-sena. Rimborsi Ma kien hemm l-ebda rimborsi matul l-2007. Infiq ta' għajnuna teknika Ma kien hemm l-ebda nfiq matul l-2007 taħt id-dispożizzjonijiet ta' l-Għajnuna Teknika ta' l-Artikolu 8 tar-Regolament (KE) Nru 1927/2006, billi l-linja tal-baġit rilevanti kienet għadha ma nħolqitx. Irregolaritajiet irrapportati matul l-2007 Ma kien hemm l-ebda irregolaritajiet irrapportati lill-Kummissjoni skond ir-Regolament tal-Kummissjoni (KE) Nru 1681/94[6] matul l-2007 fir-rigward ta' l-EGF. Irregolaritajiet magħluqa matul l-2007 Billi l-2007 kienet l-ewwel sena ta' tħaddim ta' l-EGF, ma kien hemm l-ebda irregolaritajiet minn snin preċedenti x'jingħalqu. 9. Għeluq tal-kontribuzzjonijiet finanzjarji li saru L-ebda waħda mill-kontribuzzjonijiet li ngħataw mill-bidu ta' l-EGF ma ngħalqu fl-2007. Ir-Regolament li jirregola l-EGF jistipula perjodu ta' 12-il xahar mid-data ta' l-applikazzjoni għall-Istat Membru biex juża l-kontribuzzjoni, segwit minn massimu ta' sitt xhur li matulhom irid jippreżenta rapport dwar l-eżekuzzjoni tal-kontribuzzjoni finanzjarja. Huwa biss wara li tirċievi dak ir-rapport li l-Kummissjoni tista' tipproċedi bl-għeluq tal-kontribuzzjoni. L-infiq fuq l-ewwel kontribuzzjoni mogħtija mill-Awtorità Baġitarja, li tirrelata għall-applikazzjoni EGF/2007/001 li saret fid-9 ta’ Marzu 2007 minn Franza, kienet eleġibbli sat-8 ta’ Marzu 2008, u Franza mbagħad għandha sat-8 ta’ Settembru 2008 biex tippreżenta r-rapport finali tagħha. [1] Rapport mibgħut skond l-Artikolu 16 tar-Regolament (KE) Nru 1927/2006 (ĠU L 406, 30.12.2006, p. 1, ir-Regolament kif ġie korrett fil-ĠU L 48, 22.02.2008, p. 82) [2] COM(2008) 402 ta' 02.07.2008 [3] Ftehim Interistituzzjonali bejn il-Parlament Ewropew, il-Kunsill u l-Kummissjoni dwar dixxiplina baġitarja u ġestjoni finanzjarja soda (2006/C 139/01). ĠU C 139, 14.6.2006, p. 1; Il-Ftehim kif emendat mid-Deċiżjoni tal-Parlament Ewropew u tal-Kunsill tat-18 ta’ Diċembru 2007 li temenda l-Ftehim Interistituzzjonali tas-17 ta’ Mejju 2006 dwar id-dixxiplina baġitarja u l-amministrazzjoni finanzjarja fis-sod fir-rigward tal-qafas finanzjarju multiannwali (2008/29/EC). ĠU L 6, 10.1.2008, p. 7-8. [4] Inklużi: id-definizzjoni ta' ħaddiema li tilfu xogħolhom (l-Artikolu 1 tar-Regolament ta' l-EGF); l-interpretazzjoni li trid tingħata għall-kriterji bħal 'żieda sostanzjali' jew 'tnaqqis rapidu' (Artikolu 2); id-definizzjoni ta' swieq żgħar tax-xogħol u ċirkostanzi eċċezzjonali (Artikolu 2); it-tifsira preċiża ta' l-'użu' ta' kontribut finanzjarju (Artikolu 13.2). [5] Ir-rapport " l’Europe dans la mondialisation " ippreżentat lill-Ministri Franċiżi għall-Ekonomija, l-Industrija u l-Impjiegi, u għax-Xogħol, ir-Relazzjonijiet Soċjali, il-Familja u s-Solidarjetà, u ppubblikat fil-15 ta’ April 2008, alluda għal possibbiltà bħal din. [6] Ir-Regolament tal-Kummissjoni (KE) Nru 1681/94 tal-11 ta’ Lulju 1994 dwar irregolaritajiet u l-ħlas lura ta’ ammonti mħallsa ħażin in konnessjoni mal-finanzjament tal-politika strutturali u l-organizzazzjoni ta’ sistema ta’ informazzjoni f’dan il-qasam ĠU L 178, 12/7/1994 p. 43