52007PC0526

[pic] | KUMMISSJONI TAL-KOMUNITAJIET EWROPEJ |

Brussel 13.9.2007

KUMM(2007) 526 finali

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond ta' Solidarjetà ta' l-UE skond il-punt 26 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina tal-baġit u l-ġestjoni finanzjarja tajba

(preżentata mill-Kummissjoni)

MEMORANDUM TA' SPJEGAZZJONI

Il-Ftehim Interistituzzjonali tas-17 ta’ Mejju 2006[1] jippermetti l-mobilizzazzjoni tal-Fond ta' Solidarjetà ta’ l-Unjoni Ewropea permezz ta’ mekkaniżmu ta’ flessibilità, fil-limitu massimu annwali ta' biljun Euro, minbarra l-intestaturi rilevanti tal-perspettiva finanzjarja. Il-kundizzjonijiet ta’ l-eliġibilità għall-Fond huma ppreżentati fid-dettall fir-Regolament tal-Kunsill (KE) Nru 2012/2002[2].

Fuq il-bażi ta’ l-applikazzjonijiet għall-għajnuna mill-Fond mill-Ġermanja u minn Franza (La Réunion) li kienu affettwati minn maltempata maġġuri f'Jannar u minn ċiklun tropikali fi Frar 2007 rispettivament, l-estimi totali tal-ħsara kkawżata huma kif ġej:

(f'EUR)

Ħsarat diretti | Għajnuna proposta |

Il-Ġermanja, maltempata Kyrill | 4 687 300 000 | 166 905 985 |

Franza/La Réunion, ċiklun Gamède | 211 600 000 | 5 290 000 |

Total | 4 898 900 000 | 172 195 985 |

Fid-dawl ta' l-eżaminazzjoni ta' dawn l-applikazzjonijiet[3], u meta titqies l-għotja massima possibbli mill-Fond flimkien ma' l-ambitu ta' rijallokazzjoni ta' l-approprjazzjonijiet taħt l-intestatura li tirrikjedi nefqa addizzjonali, il-Kummissjoni tipproponi li timmobilizza l-Fond ta' Solidarjetà ta' l-Unjoni Ewropea għal ammont totali ta' EUR 172 195 985, li għandu jkun allokat taħt l-intestatura 3b tal-qafas finanzjarju.

Il-Kummissjoni se tippreżenta baġit ta’ emenda (AB – Amending budget ) sabiex jiddaħħlu fil-baġit ta’ l-2007 approprjazzjonijiet speċifiċi għall-impenji u għall-ħlasijiet, imqassma skond il-pajjiż li jibbenefika, kif mitlub mill-Punt 26 tal-Ftehim Interistituzzjonali tas-17 ta’ Mejju 2006.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond ta' Solidarjetà ta' l-UE skond il-punt 26 tal-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina tal-baġit u l-ġestjoni finanzjarja tajba

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw il-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina tal-baġit u l-ġestjoni finanzjarja tajba[4], u b'mod partikulari l-punt 26 tiegħu,

Wara li kkunsidraw ir-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà ta’ l-Unjoni Ewropea[5],

Wara li kkunsidraw il-proposta mill-Kummissjoni,[6]

Billi:

(1) L-Unjoni Ewropea ħolqot il-Fond ta' Solidarjetà ta' l-Unjoni Ewropea (il-"Fond") sabiex turi solidarjetà mal-popolazzjonijiet ta’ reġjuni milquta b’diżastri.

(2) Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-Fond sal-limitu massimu annwali ta’ biljun Euro.

(3) Ir-Regolament (KE) Nru 2012/2002 fih id-dispożizzjonijiet li permezz tagħhom il-Fond jista’ jiġi mmobilizzat,

(4) il-Ġermanja u Franza ssottomettew applikazzjonijiet sabiex jimmobilizzaw il-Fond, fir-rigward ta' żewġ diżastri kkawżati minn maltemplata maġġuri u minn ċiklun tropikali rispettivament.

IDDEĊIDEW KIF ĠEJ:

Artikolu 1

Għall-baġit ġenerali ta' l-Unjoni Ewropea għas-sena finanzjarja 2007, il-Fond ta' Solidarjetà ta’ l-Unjoni Ewropea għandu jiġi mmobilizzat sabiex jipprovdi s-somma ta’ EUR 172 195 985 f’approprjazzjonijiet għall-impenji u għall-ħlasijiet.

Artikolu 2

Din id-Deċiżjoni għandha tiġi pubblikata fil- Ġurnal Uffiċjali ta’ l-Unjoni Ewropea .

Magħmul fi Brussell,

Għall-Parlament Ewropew Għall-Kunsill

Il-President Il-President

[1] ĠU C 139, 14.06.2006, p. 1.

[2] ĠU L 311, 14.11.2002, p. 3

[3] Il-Komunikazzjoni lill-Kummissjoni dwar applikazzjoni għal mobilizzazzjoni tal-Fond tas-Solidarjetà ta’ l-Unjoni Ewropea magħmula mill-Ġermanja fil-każ ta’ maltempata maġġuri f'Jannar 2007 u l-Komunikazzjoni lill-Kummissjoni dwar applikazzjoniji għal mobilizzazzjoni tal-Fond tas-Solidarjetà ta’ l-Unjoni Ewropea magħmula minn Franza (La Réunion) fil-każ ta’ ċiklun tropikali fi Frar 2007 bl-analiżi tal-Kummissjoni dwar it-talbiet.

[4] ĠU C 139, 14.06.2006, p. 1.

[5] ĠU L 311, 14.11.2002, p. 3.

[6] ĠU C […], […], p. […]