19.12.2006   

MT

Il-Ġurnal Uffiċjali ta’ l-Unjoni Ewropea

C NaN/93

1-2

3-6

7-12

1.

Iċ-Ċentru ta' Sorveljanza Ewropew għall-Ħarsien mir-Razziżmu u l-Ksenofobija (minn hawn 'il quddiem imsejjaħ “iċ-Ċentru”) ġie stabbilit mir-Regolament tal-Kunsill (KE) Nru 1035/97 tat-2 ta' Ġunju 1997 (1). Il-kompiti primarji taċ-Ċentru huma li jipprovdi lill-Unjoni u lill-Istati Membri b'informazzjoni affidabbli dwar ir-razziżmu, i l-ksenofobija u l-anti-Semitiżmu fl-Unjoni u li jikkopera mal-Kunsill ta' l-Ewropa f'dawn l-oqsma.

2.

Tabella 1 tagħti sommarju tal-kompetenzi u l-attivitajiet taċ-Ċentru. Informazzjoni prinċipali mir-rendikonti finanzjarji preparati miċ-Ċentru għas-sena finanzjarja 2005 huma preżentati fit-Tabelli 2, 3 u 4.

3.

Din id-Dikjarazzjoni t'Assigurazzjoni hija indirizzata lill-Parlament Ewropew u lill-Kunsill skond l-Artikolu 185(2) tar-Regolament tal-Kunsill (KE, Euratom) Nru 1605/2002 (2); hija ġiet magħmula wara eżami tal-kontijiet ta' l-Aġenzija, kif mitlub mill-Artikolu 248 tat-Trattat li jistabbilixxi l-Komunità Ewropea.

4.

Il-kontijiet taċ-Ċentru għas-sena finanzjarja li ntemmet fil-31 ta' Diċembru 2005 (3) ġew magħmula mid-Direttur tiegħu, skond l-Artikolu 12 tar-Regolament (KE) Nru 1035/97, u mibgħuta lill-Qorti, li għandha l-obbligu li tagħti dikjarazzjoni t'assigurazzjoni dwar l-affidabilità tagħhom u dwar il-legalità u r-regolarità tat-tranżazzjonijiet ta' bażi.

5.

Il-Qorti wettqet verifika skond il-politika u l-istandards tagħha, li huma bbażati fuq standards internazzjonali tal-verifika li ġew adattati għall-kuntest Komunitarju. Il-verifka ġiet ippjanata u mwettqa sabiex tinkiseb assigurazzjoni raġonevoli li l-kontijiet huma affidabbli u li t-tranżazzjonijiet ta' bażi huma legali u regolari.

6.

Il-Qorti kisbet għalhekk bażi raġonevoli għad-dikjarazzjoni espressa hawn taħt.

7.

Għalkemm ir-rata ta' l-impenji għall-approprijazzjonijiet għas-sena finanzjarja 2005 kienet ta' aktar minn 90 %, instgħab li aktar minn 50 % ta' l-impenji għan-nefqa amministrattiva kienu trasferiti 'il quddiem u li b'mod ġenerali kien hemm rata għolja ta' annullamenti ta' approprijazzjonijiet trasferiti 'il quddiem (bejn 15 % u 25 %, skond it-titolu). Din is-sitwazzjoni turi li għad hemm il-bżonn għaċ-Ċentru biex itejjeb l-ippjanar tan-nefqa u l-mod li bih jissorvelja l-implimentazzjoni ta' din l-ispiża. Hemm bżonn li t-trasferimenti bejn l-intestaturi jkunu ġustifikati u dokumentati skond id-dispożizzjonijiet fis-seħħ.

8.

Il-Qorti innutat li ma kinitx introdotta ġestjoni skond l-attività, minkejja li r-regolament finanzjarju taċ-Ċentru fih dispożizzjoni għall-introduzzjoni tagħha, hekk kif applikata fil-baġit ġenerali, bil-ħsieb li ttejjeb is-sorveljanza tal-prestazzjoni. F'dan il-kuntest, il-kisba tal-kompiti taċ-Ċentru m'għandiex tfisser biss l-eżekuzzjoni ta' serje ta' kompiti. Iżda għandha tkun ikkunsidrata bħala kontribuzzjoni lejn l-objettivi imniżżla fir-Regolament bażiku. Il-programm ta' xogħol taċ-Ċentru għandu, fil-prinċipju, jesprimi dan il-kontribut f'termini operattivi u miżurabbli.

9.

Iċ-Ċentru m'għandu l-ebda sistema biex jippjana u jġesti x-xiri ta' tagħmir. Barra dan, ma għamel ebda kontrolli perjodiċi fuq l-inventarju tiegħu, għalkemm dan kieku kien itejjeb l-affidabilità ta' l-inventarju.

10.

Is-sistema ta' kontroll intern taċ-Ċentru kellha bosta nuqqasijiet. Iċ-ċirkwiti finanzjarji mwaqqfa mill-uffiċjal li jawtorizza ma ġewx deskritti. B'mod partikolari, is-sistemi li bihom l-uffiċjal li jawtorizza u d-delegati tiegħu provdew informazzjoni lill-uffiċjal tal-kontabilità ma ġewx validati minn dan ta' l-aħħar. Il-prinċipju tas-segregazzjoni tad-dmirijiet ma kienx applikat b'mod strett, speċjalment bejn id-dmirijiet ta' inizjazzjoni u ta' verifikazzjoni. Barra dan, għall-impenji l-listi ta' verifikazzjonijiet ex ante għandhom jinkludu kriterji ta' ġestjoni finanzjarja tajba.

11.

Ir-regola fejn membri tal-bord ta' l-għażla għandhom ikunu ta' grad ekwivalenti jew ogħla mill-kariga li għandha tiġi mimlija mhux dejjem ġiet osservata.

12.

Is-sejħiet għall-offerti maħruġa miċ-Ċentru ma joffrux wisq spjegazzjoni għal dak li jirrigwarda l-kwalità minima ta' l-offerti u l-piż tal-fattur prezz. B'riżultat ta' din is-sitwazzjoni, ma jistax jiġi garantit livell adegwat ta' trasparenza u jiġu wkoll meħuda riskji għal dak li jirrigwarda l-kwalità tal-prodotti u s-servizzi provduti. Sakemm ma jkunx hemm raġuni speċifika għall-kuntrarju, għandu jintuża l-metodu ta' proporzjon prezz-kwalità minħabba li dan jassigura illi l-oġġetti u s-servizzi li ser jiġu mixtrija jkunu ta' l-ogħla kwalità possibbli.