7.7.2007   

MT

Il-Ġurnal Uffiċjali ta’ l-Unjoni Ewropea

C 156/8

—

iqis essenzjali, speċjalment minħabba d-dibattitu attwali dwar il-futur ta' l-Ewropa, li tiżdied il-parteċipazzjoni miż-żgħażagħ u l-informazzjoni għalihom fil-komunitajiet fejn jgħixu;

—

jisħaq fuq il-bżonn li l-kwistjonijiet taż-żgħażagħ jiġu indirizzati mill-Kunsilli kollha fis-setturi kollha, għaliex iż-żgħażagħ għandhom jiġu kkunsidrati fl-oqsma kollha ta' interess għall-UE;

—

ifakkar li ż-żgħażagħ jirrappreżentaw fattur ewlieni sabiex jintlaħqu l-miri ta' l-Istrategija ta' Lisbona l-ġdida, u jikkunsidraha essenzjali li jingħataw edukazzjoni aħjar, taħriġ, mobilità, dħul fl-impjieg;

—

però, ma jissottovalutax l-isfidi kbar li qegħdin jiffaċċjaw iż-żgħażagħ illum, bħalma huma il-qagħad, id-dewmien sabiex jidħlu fid-dinja tax-xogħol, in-natura inċerta tax-xogħol, diffikultajiet sabiex isibu alloġġ u bħala konsegwenza d-diffikultajiet sabiex jagħżlu t-triq ta' ħajjithom;

—

jipproponi proġetti li jinkoraġġixxu liż-żgħażagħ sabiex jieħdu sehem fil-gvern lokali u reġjonali fit-tmexxija tal-komunitajiet rispettivi tagħhom, kif ukoll kuntatti bejn l-awtoritajiet lokali u l-iskejjel sabiex titrawwem kuxjenza ċivika u użu informat tad-dritt tal-vot;

—

isejjaħ lill-Kummissjoni sabiex tappoġġja inizjattivi ħalli jinxterdu l-politiki Ewropej dwar iż-żgħażagħ u d-dispożizzjonijiet tal-Patt Ewropew għaż-Żgħażagħ fil-livell lokali, permezz tan-netwerks ta' l-awtoritajiet lokali u billi jingħata rwol attiv lill-amministraturi żgħażagħ.

1.1

jilqa' l-Komunikazzjoni ġdida mill-Kummissjoni, li tevalwa s-segwitu li ngħata mill-Istati Membri għall-għanijiet komuni dwar il-parteċipazzjoni miż-żgħażagħ u l-informazzjoni għalihom;

1.2

jikkonsidra li mindu ġiet ippublikata l-White Paper ta' l-2001, l-Istati Membri għamlu progress u qegħdin jiffokaw aktar fuq iż-żagħażagħ, imma li għad fadal ħafna xi jsir, jew permezz tal-Metodu Miftuħ ta' Koordinazzjoni (OMC) fil-qasam taż-żgħażagħ, jew permezz ta' azzjonijiet oħra konnessi mal-politiki relatati;

1.3

jinnota r-Riżoluzzjoni riċenti tal-Kunsill u tar-Rappreżentanti tal-Gvernijiet ta' l-Istati Membri li ltaqgħu fis-sede tal-Kunsill, li tidentifika miżuri ġodda intiżi sabiex isaħħu l-applikazzjoni u l-implimentazzjoni ta' l-għanijiet komuni għall-parteċipazzjoni miż-żgħażagħ u l-informazzjoni għalihom;

1.4

jaqbel mal-Kunsill li l-erba' temi prijoritarji proposti fil-White Paper (parteċipazzjoni, informazzjoni, attivitajiet volontarji u għarfien aħjar taż-żgħażagħ) u l-għanijiet komuni rilevanti għadhom topiċi ħafna, u jemmen li għandhom jiggwidaw il-ħidma ta' l-Istati Membri u l-istituzzjonijiet Ewropej f'dan is-settur partikolari, u fil-politiki l-oħra kollha li jikkonċernaw liż-żgħażagħ;

1.5

jisħaq fuq il-bżonn li l-kwistjonijiet taż-żgħażagħ jiġu indirizzati mill-Kunsilli kollha fis-setturi kollha, għaliex iż-żgħażagħ għandhom jiġu kkunsidrati fl-oqsma kollha ta' interess għall-UE;

1.6

jindika però li l-Kunsill seta' saħaq iktar fuq l-importanza ta' l-awtoritajiet lokali u reġjonali, speċjalment fis-sezzjonijiet li jindikaw il-miżuri intiżi li jmexxu 'l quddiem l-implimentazzjoni ta' l-għanijiet komuni, dan għaliex l-awtoritajiet lokali u reġjonali jwettqu rwol kruċjali fl-edukazzjoni u fit-tkabbir ta' kuxjenza ċivika fost iż-żgħażagħ;

1.7

iqis essenzjali, speċjalment minħabba d-dibattitu kurrenti dwar il-futur ta' l-Ewropa, li tiżdied il-parteċipazzjoni miż-żgħażagħ u l-informazzjoni għalihom fil-komunitajiet fejn jgħixu, sabiex iħossuhom aktar parti mill-Unjoni, ħalli jiġi żgurat li jkunu jistgħu iħaddmu dawk il-jeddijiet li jinsabu fil-karta tad-drittijiet fundamentali ta' l-Unjoni Ewropea, u sabiex tingħata spinta ġdida lill-intrapriża Ewropea billi tagħmel il-kunċett taċ-ċittadinanza Ewropea realtà, jenfasizza li trid tingħata attenzjoni partikolari, f'dan ir-rigward, lill-“parteċipazzjoni” u lill-“informazzjoni” taż-żgħażagħ li jgħixu f'reġjuni insulari;

1.8

però, ma jissottovalutax l-isfidi kbar li qegħdin jiffaċċjaw iż-żgħażagħ illum, bħalma huma il-qagħad, id-dewmien sabiex jidħlu fid-dinja tax-xogħol, in-natura inċerta tax-xogħol, diffikultajiet sabiex isibu alloġġ u bħala konsegwenza d-diffikultajiet sabiex jagħżlu t-triq ta' ħajjithom, in-nuqqas ta' mezzi adegwati sabiex jiksbu l-ħiliet meħtieġa, il-faqar, l-abbandun bikri ta' l-iskola u l-eskluzjoni soċjali;

1.9

għalhekk jemmen li l-għanijiet tal-parteċipazzjoni taż-żgħażagħ u l-informazzjoni għalihom jistgħu jintlaħqu b'mod aktar effettiv jekk l-Istati Membri u l-istituzzjonijiet jagħmlu kull sforz sabiex joffrulhom prospetti aħjar fil-ħajja, jiggarantulhom it-tgawdija sħiħa tad-drittijiet fundamentali li jinsabu fil-Karta tad-Drittijiet Fundamentali ta' l-Unjoni Ewropea (li jinkludu d-dritt għax-xogħol, id-dritt għaż-żwieġ u li jkollok familja, u d-dritt li jkun hemm bilanċ bejn il-ħajja familjali u dik professjonali);

1.10

ifakkar, f'dan ir-rigward, li ż-żgħażagħ jirrappreżentaw fattur ewlieni sabiex jintlaħqu l-miri ta' l-Istrategija ta' Lisbona l-ġdida, u jikkunsidraha essenzjali li jingħataw edukazzjoni aħjar, taħriġ, mobilità, dħul fl-impjieg, inklużjoni soċjali u servizzi għall-familji żgħażagħ:

1.11

iqis għalhekk li l-politiki għaż-żgħażagħ mħaddma mill-awtoritajiet lokali u reġjonali jistgħu jieħdu dimensjoni Ewropea permezz ta' politiki u fondi nazzjonali adegwati, flimkien ma' programmi tal-Komunità speċifiċi li jżidu l-opportunitajiet għall-informazzjoni u l-parteċipazzjoni taċ-ċittadini żgħażagħ fil-ħajja ċivika u politika fuq il-livell lokali, reġjonali, nazzjonali u Ewropew;

1.12

ifakkar li l-Unjoni hija bbażata fuq il-prinċipji ta' libertà u demokrazija u jemmen li għal dik ir-raġuni jridu jittieħdu aktar passi prattiċi mingħajr telf ta' żmien sabiex jiġi żgurat li ċ-ċittadini Ewropej kollha, anke dawk l-aktar żgħar, ikunu jistgħu jipparteċipaw fiha, b'rispett sħiħ għall-prinċipju ta' sussidjarjetà.

2.1

jinnota li l-Kunsill iħares lejn l-għan li “ż-żgħażagħ jipparteċipaw fil-ħajja tal-komunità” prinċiparjament bħala l-promozzjoni ta' l-involviment tagħhom fi strutturi parteċipattivi;

2.2

ifakkar li huwa possibbli li tieħu sehem fil-ħajja tal-komunità lokali mingħajr ma tkun f'xi struttura organizzata; jemmen li dan l-għan għandu jiġi interpretat b'mod wiesa', li jinkoraġġixxi l-inizjattivi li wkoll ifittxu li jinvolvu żgħażagħ li minn jeddhom jiddeċiedu li jieħdu sehem fil-ħajja tal-komunità lokali tagħhom;

2.3

jaqbel kompletament li għandha tingħata attenzjoni speċjali liż-żgħażagħ li huma l-aktar żvantaġġjati u jemmen li dawn iż-żgħażagħ għandhom jiġu identifikati b'mod aktar preċiż f'kull żona lokali; jilqa' l-inizjattivi li ħadu l-Polonja u l-Litwanja mmirati lejn żgħazagħ li jgħixu f'żoni rurali;

2.4

iħeġġeġ lill-Kummissjoni u lill-Istati Membri sabiex jistabbilixxu u jimplimentaw miżuri baġitarji intiżi sabiex isaħħu l-parteċipazzjoni taż-żgħażagħ mill-aktar żoni periferiċi ta' l-UE fil-ħajja ċivika Ewropea. Id-distanza ta' dawn iż-żoni fil-fatt tagħmilha aktar diffiċli għalihom sabiex jintegraw u jipparteċipaw;

2.5

japprezza wkoll dawk l-inizjattivi kollha li ttieħdu mill-awtoritajiet pubbliċi sabiex isostnu strutturi parteċipattivi permezz ta' kontribuzzjonijiet finanzjarji jew billi jipprovdu tagħmir, assistenza teknika, riżorsi umani, bini jew għajnuna sabiex jinbnew websajts.

2.6

iqis li dan l-għan għandu importanza fundamentali jekk iċ-ċittadinanza attiva ser titpoġġa fil-prattika: b'hekk iż-żgħażagħ ikollhom aktar piż fil-korpi lokali, reġjonali u nazzjonali kif ukoll f'ministeri u partiti politiċi, filwaqt li jiġi żgurat li l-ġuvintur u t-tfajliet ikollhom opportunitajiet indaqs;

2.7

jisħaqq fuq l-importanza li l-opportunitajiet li joffru t-teknoloġiji l-ġodda jiġu sfruttati kemm jista' jkun sabiex l-UE toqrob aktar lejn iż-żgħażagħ. Għalhekk huwa essenzjali għall-istituzzjonijiet Ewropej li jinkoraġġixxu d-diversi miżuri innovattivi li f'dan il-kuntest jistgħu jiġu offruti mill-atturi soċjali Ewropej u, b'mod partikolari, mill-awtoritajiet lokali u reġjonali; f'dan il-kuntest, jikkunsidra li l-iskambju ta' l-aħjar prattiċi jkun ta' benefiċċju partikolari, u b'mod speċifiku, jipproponi li l-Kummissjoni tippromovi l-organizzazzjoni ta' Forum Annwali taż-Żgħażagħ fejn iż-żgħażagħ u l-istituzzjonijiet pubbliċi jistgħu jaqsmu l-opinjonijiet u jinkoraġġixxu inizjattivi ġodda;

2.8

jilqa' l-inizjattivi kollha ta' l-Istati Membri li jżommu djalogu miftuħ maż-żgħażagħ: kunsilli lokali, nazzjonali u reġjonali, parlamenti taż-żgħażagħ, kummissjonijiet speċifiċi taż-żgħażagħ, ombudsmen jew korrispondenti, u laqgħat inter-ministerjali; u jittama li dan kollu jkompli jiżviluppa;

2.9

jirrapporta li fl-Italja twaqqaf korp konsultattiv għal amministraturi żgħażagħ, fil-qafas ta' l-Assoċjazzjoni Nazzjonali tal-Kunsilli Lokali Taljani, li wieħed mill-kompiti tiegħu huwa li josserva, jinkoraġġixxi u jsaħħaħ l-involviment taż-żgħażagħ fl-amministrazzjonijiet lokali;

2.10

jafda li l-Istati Membri kif ukoll l-awtoritajiet lokali u reġjonali ser jintegraw b'mod sistematiku programmi ta' taħriġ għall-parteċipazzjoni demokratika fl-istituzzjonijiet, fis-sistema edukattiva uffiċjali u li jinkoraġġixxu kuntatti interattivi bejn l-edukazzjoni formali u mhux formali;

2.11

jenfasizza li kuntatti bejn l-iskejjel u l-awtoritajiet lokali jistgħu jkunu mezz effettiv sabiex jinkoraġġixxu l-parteċipazzjoni ta' l-istudenti fil-ħajja tal-komunitajiet tagħhom, u jsejjaħ lill-amministraturi lokali — speċjalment dawk żgħażagħ — sabiex iservu ta' ambaxxaturi u jorganizzaw dibattiti pubbliċi dwar kwistjonijiet ta' interess lokali li jkunu miftuħa wkoll għaż-żgħażagħ li telqu mill-iskola;

2.12

huwa konvint li l-mira li l-gvern lokali jinfetaħ għaż-żgħażagħ iġġib magħha fehma reali tar-responsabbiltà fir-rigward tat-tmexxija tat-territorju proprju tiegħu u tgħin sabiex tinħoloq kuxjenza ċivika u tinkoraġġixxi l-eżerċizzju informat tad-dritt għall-vot, li s'issa interessa lil ftit wisq żagħżagħ;

2.13

jilqa' l-inizjattiva Finlandiża li testendi d-dritt tal-vot għall-elezzjonijiet lokali liż-żagħżagħ li għandhom 'il fuq minn 16-il sena, u l-inizjattiva Ġermaniża relatata mal-proġetti taż-żgħażagħ dwar ir-riġenerazzjoni urbana, u jilqa' s-sejħa tal-Kunsill sabiex jiġi kkunsidrat dibattitu sabiex titbaxxa l-età għad-dritt tal-vot;

2.14

jesprimi l-apprezzament tiegħu għall-każ ta' mara żagħżugħa bħala deputat sindku fil-belt ta' Stokkolma;

2.15

jikkunsidra l-Karta Ewropea Riveduta dwar il-Parteċipazzjoni taż-Żgħażagħ fil-Ħajja Lokali u Reġjonali tal-Kunsill ta' l-Ewropa bħala strument siewi ħafna, u jittama li din tasal għand l-awtoritajiet lokali u reġjonali fl-Unjoni, u li magħha jkun hemm ukoll kooperazzjoni aktar mill-qrib f'dan il-qasam bejn il-Kumitat tar-Reġjuni u l-Kungress ta' l-Awtoritajiet Lokali u Reġjonali.

2.16

jaqbel mal-proposti tal-Kummissjoni, ikkonfermati mill-Kunsill, dwar kif għandu jintlaħaq dan il-għan;

2.17

bi pjaċir jinnota li l-Kummissjoni Ewropea kkunsidrat il-kummenti preċedenti tal-KtR (1) dwar politika sostnuta ta' dibattitu u konsultazzjoni maż-żgħażagħ u tappoġġja bis-sħiħ l-idea ta' djalogu mtejjeb dwar l-Aġenda Ewropea. Madankollu jisħaq li dan għandu jinvolvi b'mod partikolari l-awtoritajiet lokali u reġjonali;

2.18

jilqa' l-programm il-ġdid “Żgħażagħ f'azzjoni” u l-programmi oħra ta' edukazzjoni u taħriġ għaż-żgħażagħ, li taw l-opportunità lil ħafna żgħażagħ sabiex jiksbu esperjenza prattika ta' l-Ewropa, u jħeġġeġ għal aċċess usa' u disseminazzjoni mifruxa ta' dawn il-programmi, filwaqt li tingħata attenzjoni speċjali liż-żgħażagħ l-aktar żvantaġġjati jistieden lill-Kummissjoni u lill-Istati Membri sabiex jiddeċentralizzaw aktar il-ġestjoni ta' dan il-programm, sabiex jiżguraw is-sussidjarjetà billi t-tmexxija tiegħu tiġi aktar f'idejn l-awtoritajiet reġjonali, u jiddispjaċih li twaqqaf il-programm Imprendituri Żgħażagħ, li għin ħafna żgħażagħ sabiex jiftħu negozju u jiksbu esperjenzji importanti;

2.19

jipproponi li l-awtoritajiet Ewropej lokali u reġjonali jipprovdu forum għaż-żgħażagħ mill-komunitajiet tagħhom li jaħdmu fl-istituzzjonijiet u fl-uffiċċji Ewropej jew li jipparteċipaw fi programmi Ewropej, u jiġu involuti bħala ambaxxaturi f'dibattiti dwar l-Ewropa, u b'hekk isaħħu l-metodu ta' parteċipazzjoni doppja filwaqt li jagħtu valur lix-xogħol, u lill-esperjenza edukattiva u vokazzjonali barra mill-pajjiż;

2.20

isejjaħ lill-Kummissjoni sabiex tappoġġja inizjattivi ħalli jinxterdu l-politiki Ewropej dwar iż-żgħażagħ u d-dispożizzjonijiet tal-Patt Ewropew għaż-Żgħażagħ fil-livell lokali, permezz tan-netwerks ta' l-awtoritajiet lokali u billi jingħata rwol attiv lill-amministraturi żgħażagħ.

3.1

ifakkar li d-dritt għall-informazzjoni huwa l-bażi tax-xogħol għall-informazzjoni taż-żgħażagħ li sar mill-Unjoni Ewropea; bħala kosegwenza, jikkonsidrah d-dmir ta' l-Istati Membri u, f'każ ta' bżonn, ta' l-awtoritajiet lokali u reġjonali, li jimplimentaw bħala parti mill-proċess edukattiv politiki li jiżguraw l-eżerċizzju effettiv ta' dan id-dritt miż-żgħażagħ, billi jiffukaw b'mod speċjali fuq il-promozzjoni taċ-ċarezza u tal-faċilità ta' l-aċċess għall-informazzjoni;

3.2

jilqa' bis-sħiħ il-fatt li l-Kummissjoni Ewropea aċċettat il-kummenti tal-Kumitat tar-Reġjuni dwar l-importanza tad-dimensjoni lokali u reġjonali fil-politika taż-żgħażagħ, waqt li rrikonoxxiet li l-mobilizzazzjoni ta' l-awtoritajiet lokali hija kruċjali sabiex titrawwem il-parteċipazzjoni taż-żgħażagħ fil-lokalità. Jisħaq f'dan ir-rigward fuq l-importanza tad-dimensjoni lokali u reġjonali għaliex huwa f'dan il-livell li jseħħ l-ewwel kuntatt dirett mal-politika u ċ-ċittadinanza attiva ssir realtà;

3.3

jinnota b'sodisfazzjoni li l-websajts li jipprovdu informazzjoni liż-żgħażagħ issa jeżistu kważi fl-Istati Membri kollha, imma jħeġġeġ li tiġi mfassla strateġija effettiva ta' informazzjoni li tkopri l-oqsma differenti tal-mistoqsijiet u suġġetti li jinteressaw liż-żgħażagħ;

3.4

jaqbel mal-Kunsill li l-portall taż-żgħażagħ Ewropew huwa għodda utli ħafna li għandha tiġi żviluppata u mxerrda, u li l-istrumenti li jiġu pprovduti lokalment u dawk fil-livell nazzjonali jew Ewropew għandhom jiġu kkoordinati aħjar, sabiex l-informazzjoni tiġi ċċirkulata aktar malajr u b'mod aktar faċli;

3.5

jemmen li n-netwerks ta' assoċjazzjonijiet taż-żgħażagħ li jaħdmu f'livell lokali għandhom jieħdu sehem fil-proċess ta' konsultazzjoni u parteċipazzjoni taż-żgħażagħ, sabiex jiġi evitat il-periklu li jipparteċipaw biss in-netwerks nazzjonali maġġuri u jsejjaħ għall-iżvilupp ta' kanali għall-parteċipazzjoni u l-konsultazzjoni taż-żgħażagħ li m'humiex f'xi assoċjazzjoni. Għal dan il-għan ikun milqugħ is-sehem dirett tal-muniċipalitajiet li jistgħu jiżviluppaw il-mudelli tagħhom sabiex iż-żgħażagħ jipparteċipaw fil-proċess ta' konsultazzjoni u kooperazzjoni.

3.6

huwa informat mill-Kummissjoni li huma biss ftit l-Istati Membri li jiffukaw fuq it-taħriġ ta' dawk li jaħdmu fl-ambitu ta' l-informazzjoni għaż-żgħażagħ; isejjaħ għal aktar attenzjoni f'dan ir-rigward, bi programmi speċifiċi ta' studju;

3.7

iqis li l-Kummissjoni għandha titfa' aktar enfasi fuq ir-rabta bejn l-informazzjoni u l-konsulenza, sabiex iż-żgħażagħ jiġu megħjuna jiżviluppaw il-ħiliet meħtieġa sabiex jiksbu, jagħżlu u jwieżnu l-informazzjoni, u b'hekk isiru utenti informati. L-Istati Membri huma mħeġġa sabiex jużaw il-kanali kollha eżistenti sabiex iwasslu l-informazzjoni liż-żgħażagħ (Internet, mobiles, videos u ċinema).

3.8

bi pjaċir jinnota l-attenzjoni ġdida li qiegħda tingħata lill-kunsilli lokali taż-żgħażagħ, bl-involviment sistematiku taż-żgħażagħ f'korpi lokali responsabbli għat-teħid tad-deċiżjonijiet u bis-sostenn ta' l-awtoritajiet lokali u reġjonali. Isejjaħ lill-Kummissjoni sabiex tinkoraġġixxi l-formulazzjoni ta' kriterji preċiżi dwar l-għan tal-parteċipazzjoni taż-żgħażagħ sabiex tappoġġja l-parteċipazzjoni fil-livell lokali u ċ-ċittadinanza attiva;

3.9

jenfasizza l-importanza li ż-żgħażagħ jiġu involuti fil-perfezzjonament ta' strateġiji ta' informazzjoni, fil-ħolqien ta' prodotti ta' informazzjoni, fit-tixrid ta' l-informazzjoni u fl-attivitajiet ta' konsulenza;

3.10

iqis li l-kontribuzzjonijiet ta' żgħażagħ individwali jew ta' organizzazzjonijiet taż-żgħażagħ f'dan ir-rigward jirrappreżentaw riżorsa siewja li għandha tintuża' bl-aktar mod effettiv, u jsejjaħ lill-Kummissjoni sabiex tħeġġeġ lill-Istati Membri sabiex jidentifikaw modi ġodda ta' parteċipazzjoni.

4.1

huwa konxju li s-settur taż-żgħażagħ jaqa' taħt ir-responsabbiltà ta' l-Istati Membri, u għalhekk isejjaħ għal impenn konġunt min-naħa tal-Kummissjoni u ta' l-Istati Membri, f'kollaborazzjoni ma' l-awtoritajiet lokali u reġjonali;

4.2

iqis fuq kollox li l-Kummissjoni tista' tenfasizza l-kisbiet u b'mod aktar speċifiku l-aħjar prattiċi ta' l-Istati Membri.

5.1

jirrikmanda li l-Istati Membri jiggarantixxu opportunitajiet indaqs bejn iċ-ċittadini kollha, irġiel u nisa, u b'mod partikolari fost l-addoloxxenti taż-żewġ sessi u fost il-ġuvintur u t-tfajliet;

5.2

jafda li r-riżorsi jitqassmu b'mod ġust bejn il-proġetti ta' l-assoċjazzjonijiet taż-żgħażagħ u dawk immirati għal żgħażagħ individwali, filwaqt li ma jiġux injorati l-programmi għall-aktar gruppi żvantaġġjati;

5.3

jittama wkoll li l-Istati Membri jinkoraġġixxu liż-żgħażagħ sabiex jieħdu sehem f'korpi lokali, reġjonali u nazzjonali, f'ministeri u partiti politiċi, u li dawn jiġu kkonsultati permezz tal-kunsilli taż-żgħażagħ u strutturi oħra ta' parteċipazzjoni;

5.4

jipproponi proġetti min-naħa ta' l-Istati Membri li jinkoraġġixxu liż-żgħażagħ sabiex jieħdu sehem fil-gvern lokali u reġjonali u fit-tmexxija tal-komunitajiet rispettivi tagħhom, kif ukoll li jkun hemm kuntatti bejn l-awtoritajiet lokali u l-iskejjel sabiex titrawwem kuxjenza ċivika u użu informat tad-dritt tal-vot;

5.5

isejjaħ lill-awtoritajiet lokali, reġjonali u nazzjonali sabiex jinkludu liż-żgħażagħ fid-dibattiti dwar il-futur ta' l-Ewropa, sabiex isaħħu l-parteċipazzjoni tagħhom fl-iżvilupp ta' l-Unjoni Ewropea, billi jagħtu sehem attiv lil dawk li jaħdmu fl-istituzzjonijiet jew fl-uffiċċji Ewropej jew li huma involuti fil-programmi Ewropej.

5.6

iqis essenzjali li l-Istati Membri jiggarantixxu d-dritt għall-informazzjoni permezz ta' strateġiji speċifiċi li jirriflettu l-bżonnijiet taż-żgħażagħ filwaqt li tingħata attenzjoni speċjali lill-aktar gruppi vulnerabbli, u fl-istess ħin jiġi pprovdut it-taħriġ neċessarju lil dawk kollha li huma involuti fl-edukazzjoni u t-trawwim taż-żgħażagħ;

5.7

itenni li l-ħolqien ta' Ewropa taċ-ċittadini u l-integrazzjoni taż-żgħażagħ fis-soċjetà huma prijorità ewlenija tal-Kumitat, u jixtieq jagħti kontribut billi jikkommetti ruħu li jorganizza djalogi strutturati u sistematiċi, laqgħat mar-rappreżentanti ta' l-assoċjazzjonijiet u l-kunsilli lokali u reġjonali taż-żgħażagħ, filwaqt li jippjana li jwaqqaf grupp ta' ħidma sabiex josserva u jippromovi l-impenji reali ta' l-awtoritajiet lokali u reġjonali u jivverifika l-aħjar prattiċi lokali u reġjonali bl-għajnuna ta' l-assoċjazzjonijiet nazzjonali rilevanti; jimmira li jkun strumentali sabiex jassisti lill-Istati Membri fl-implimentazzjoni tar-rakkomandazzjonijiet dwar il-parteċipazzjoni taż-żgħażagħ u l-informazzjoni għalihom;

5.8

jikkommetti ruħu li jferrex b'mod usa' l-informazzjoni dwar temi Ewropej sabiex jiġu żviluppati d-dibattiti fil-livell lokali u reġjonali, u dwar avvenimenti Ewropej organizzati għaż-żgħażagħ, sabiex ikabbar il-parteċipazzjoni bl-aktar mod wiesa';

5.9

sabiex jinkoraġġixxi l-parteċipazzjoni fl-iżvilupp ta' l-Unjoni Ewropea, isejjaħ lill-Kummissjoni ħalli tipprovdi kampanja ta' informazzjoni ad hoc sabiex twassal il-programmi kollha Ewropej taż-żgħażagħ.

5.10

japprezza l-intenzjoni ddikjarata mill-Kunsill li jadotta u jtejjeb il-linji ta' azzjoni u li jħaddem il-miżuri li ġew indikati fir-Riżoluzzjoni riċenti, u għalhekk jitlob li jiġu kkunsidrati l-kummenti u l-proposti magħmula f'din l-opinjoni;

5.11

iħeġġeġ lill-Istati Membri, sabiex ikomplu jipprovdu informazzjoni lill-Kummissjoni dwar il-politiki proprji tagħhom dwar iż-żgħażagħ, bħala parti mir-rapporti ta' rutina li diġa jeżistu, u b'hekk jagħtu l-kontribut tagħhom fil-kuntest ta' l-OMC u jippermettu li l-aħjar prattika tiġi identifikata b'mod preċiż u ddisseminata;

5.12

jaqbel li l-linji ta' azzjoni li l-Istati Membri għandhom l-intenzjoni li jiffukaw fuqhom fil-qasam tal-parteċipazzjoni u l-informazzjoni, għandhom jiġu stabbiliti sa mhux aktar tard minn Marzu 2007, sabiex ikunu jistgħu jiġu identifikati pjanijiet ta' azzjoni rilevanti u b'mod partikolari sabiex l-aħjar prattiċi jitferrxu b'mod usa';

5.13

jitlob lill-Kummissjoni li tidentifika l-aħjar mezzi sabiex tiżgura analiżi effettiva tal-progress milħuq mill-Istati Membri permezz ta' metodi effikaċi ta' statistika u ta' riċerka kwalitattiva;

5.14

jipproponi li jitwaqqaf grupp ta' ħidma responsabbli li jiddefenixxi l-istrumenti li ser jivvalutaw l-implimentazzjoni tal-miżuri sabiex isaħħu l-għanijiet komuni u jsejjaħ lir-rappreżentanti ta' l-awtoritajiet lokali u reġjonali sabiex ikunu involuti permezz tal-Kumitat;

5.15

jerġa' jisħaq li l-għanijiet komuni fir-rigward taż-żgħażagħ jintlaħqu l-aħjar billi ż-żgħażagħ jiġu provduti kondizzjonijiet ta' għajxien aħjar. Jittama li l-Kummissjoni toħloq pjan ta' azzjoni taħt il-Patt Ewropew għaż-Żgħażagħ li jkun jista' jiggwida u jappoġġja aħjar l-inizjattivi ta' l-Istati Membri individwali, jipprovdi fondi għal dan l-iskop u possibbilment ikun marbut ma' azzjonijiet innovattivi u skambju dwar l-aħjar prattiċi;

5.16

isejjaħ lill-Istati Membri sabiex jallokaw biżżejjed fondi lill-awtoritajiet lokali u reġjonali sabiex ikunu jistgħu jimplimentaw l-għanijiet komuni;

5.17

jittama li fl-aħħar mill-aħħar, il-kwistjoni ta' l-inċertezza fl-impjiegi fost iż-żgħażagħ tiġi indirizzata mill-Istati Membri, sabiex jintlaħqu aħjar l-għanijiet taż-żgħażagħ, anke fil-kuntest tad-diskussjoni dwar il-Karta Ħadra (Green Paper) l-ġdida tal-Kummissjoni dwar il-liġi tax-xogħol.