6.3.2013

MT

Il-Ġurnal Uffiċjali tal-Unjoni Ewropea

C 65/4

---

Deċiżjoni tal-Bordijiet Eżekuttivi tal-Kurituri tat-Trasport Ferrovjarju tal-Merkanzija Nru 1 u Nru 2 li tistabbilixxi l-Qafas għall-allokazzjoni tal-kapaċità dwar il-Kurituri tat-Trasport Ferrovjarju tal-Merkanzija Nru 1 u Nru 2

2013/C 65/04

IL-MINISTRI TAT-TRASPORT TAR-RENJU TAL-BELĠJU, TAR-REPUBBLIKA FEDERALI TAL-ĠERMANJA, TAR-REPUBBLIKA FRANĊIŻA, TAR-REPUBBLIKA TALJANA, TAL-GRAN DUKAT TAL-LUSSEMBURGU, TAR-RENJU TAL-PAJJIŻI L-BAXXI,

FIL-PREŻENZA TAL-VIĊI PRESIDENT TAL-KUMMISSJONI EWROPEA,

Wara li kkunsidraw:

—	Id-Direttiva 2012/34/UE tal-Parlament Ewropew u tal-Kunsill tal-21 ta’ Novembru 2012 li tistabbilixxi żona ferrovjarja unika Ewropea (1) u b’mod partikolari l-Artikoli 39, 43, 45, 46, 48, 56.1 u l-Anness VII tad-Direttiva;

—	Ir-Regolament (UE) Nru 913/2010 tal-Parlament Ewropew u tal-Kunsill tat-22 ta’ Settembru 2010 dwar netwerk ferrovjarju Ewropew għat-trasport ta’ merkanzija kompetittiv (2) u b’mod partikolari l-Artikoli 8, 13, 14, 15, 18, 19 u 20 tar-Regolament;

Billi:

—	Il-Bordijiet Eżekuttivi tal-Kurituri tat-Trasport Ferrovjarju tal-Merkanzija Nru 1 u Nru 2, kif imsemmi fl-Artikolu 8 tar-Regolament (UE) Nru 913/2010, ġew stabbiliti u d-dikjarazzjoni tal-missjoni tagħhom ġew adottati fl-okkażjoni tal-Konferenza ta’ Antwerp, fis-27 ta’Ġunju 2011;

—	Il-Presidenti tal-Bordijiet Eżekuttivi tal-Kurituri tat-Trasport Ferrovjarju tal-Merkanzija Nru 1 u Nru 2 għarrfu lill-Kummissjoni Ewropea bl-istabbiliment tal-bordijiet tagħhom permezz tal-ittri bid-data tad-29 ta’ Ġunju 2011 u tal-11 ta’ Lulju 2011 rispettivament;

—	Il-Kummissjoni Ewropea wieġbet lill-Presidenti, permezz tal-ittri bid-data tad-19 ta’Ottubru 2011, billi laqgħet l-istabbiliment tal-Bordijiet Eżekuttivi tal-Kurituri tat-Trasport Ferrovjarju tal-Merkanzija Nru 1 u Nru 2;

—	Il-Bordijiet Eżekuttivi għandhom jiddefinixxu l-qafas għall-allokazzjoni tal-kapaċità ta’ infrastruttura fuq il-kuritur tal-merkanzija f’konformità mal-Artikolu 14(1) tar-Regolament (UE) Nru 913/2010.

—	L-Isvizzera qiegħda tinnegozja it-traspożizzjoni tar-Regolament (UE) Nru 913/2010 mal-Kummissjoni Ewropea;

—

Il-Kurituri tat-Trasport Ferrovjarju tal-Merkanzija Nru 1 u Nru 2 huma interkonnessi f’Rotterdam, f’Antwerp, f’Basle; il-Kurituri tat-Trasport Ferrovjarju tal-Merkanzija Nru 1 u Nru 8 huma interkonnessi f’Antwerp, f’Duisburg; il-Kurituri tat-Trasport Ferrovjarju tal-Merkanzija Nru 1 u Nru 6 huma interkonnessi f’Milan; il-Kurituri tat-Trasport Ferrovjarju tal-Merkanzija Nru 2 u Nru 6 huma interkonnessi f’Lyon; u l-Kurituri tat-Trasport Ferrovjarju tal-Merkanzija Nru 2 u Nru 4 huma interkonnessi f’Metz;

—	Huma meħtieġa regoli komuni vinkolanti fil-livell tal-kurituri li jippermettu Punti ta’ Waqfa Waħda għall-Kurituri (Corridor One-stop-Shops/C-OSS) sabiex ikun hemm allokazzjoni ġusta inkluż f’każ ta’ applikazzjonijiet konfliġġenti;

—	Huwa mixtieq Qafas armonizzat għall-allokazzjoni tal-kapaċità ta’ infrastruttura fuq il-Kurituri tat-Trasport Ferrovjarju tal-Merkanzija;

—	Il-Bordijiet ta’ Tmexxija tal-Kurituri tat-Trasport Ferrovjarju tal-Merkanzija Nru 1 u Nru 2 qablu dwar dan il-qafas għall-allokazzjoni tal-kapaċità ta’ infrastruttura;

—	Il-Ġesturi (il-Maniġers) tal-Infrastruttura/il-Korpi tal-Allokazzjoni għandhom jirreferu għalih fid-dikjarazzjoni nazzjonali rispettiva tagħhom dwar in-netwerk fid-dawl tal-implimentazzjoni tiegħu;

—	Il-Korpi Regolatorji esprimew il-pożizzjoni tagħhom dwar dan il-qafas għall-allokazzjoni tal-kapaċità ta’ infrastruttura;

—	Il-Ministri li jiffirmaw dan id-dokument se jkollhom l-għan li japplikaw dan id-dokument u se jikkunsidraw jestendu l-applikazzjoni tiegħu għal kurituri oħrajn li jkunu involuti fihom;

—	Hemm disponibbli verżjoni bl-Ingliż ta’ dan il-qafas,

JIDDEĊIEDU li jadottaw il-qafas għall-allokazzjoni tal-kapaċità ta’ infrastruttura tal-Kurituri tat-Trasport Ferrovjarju tal-Merkanzija Nru 1 u Nru 2, fl-Anness;

JIDDEĊIEDU li dan il-qafas għandu jiġi implimentat;

JESPRIMU l-kunsens tal-Istati tagħhom li jkunu marbutin b’din id-Deċiżjoni;

JITOLBU li l-Kummissjoni Ewropea tippubblika din id-Deċiżjoni u l-qafas għall-allokazzjoni tal-kapaċità ta’ infrastruttura tal-Kurituri tat-Trasport Ferrovjarju tal-Merkanzija Nru 1 u Nru 2 fl-Anness, f'Il-Ġurnal Uffiċjali tal-Unjoni Ewropea.

IL-QAFAS TAL-KURITUR

għall-allokazzjoni tal-kapaċità ta’ infrastruttura fuq il-kurituri tal-merkanzija skont ir-Regolament (UE) Nru 913/2010

I.   L-GĦAN, IL-KAMP TA’ APPLIKAZZJONI U L-KARATTRU TAL-QAFAS

1.

L-Artikolu 14.1 tar-Regolament (UE) Nru 913/2010 (“ir-Regolament”) jesiġi li l-Bord Eżekuttiv jistabbilixxi qafas ta’ kuritur għall-allokazzjoni tal-kapaċità. Il-qafas għall-allokazzjoni tal-kapaċità fuq il-kuritur tikkonċerna aspetti mandatorji tar-Regolament dwar l-allokazzjoni tal-kapaċità. Dan il-qafas għall-allokazzjoni tal-kapaċità tal-kuritur (“Corridor-framework”) jikkonċerna biss l-allokazzjoni marbuta ma’ mogħdijiet ferrovjarji maqbulin (stabbiliti) minn qabel u mal-kapaċità ta’ riserva mogħtija lill-Punt ta’ Waqfa Waħda għall-Kuritur (“C-OSS”) għall-ferroviji tal-merkanzija, li jaqsmu mill-inqas fruntiera waħda fuq kuritur kif previst fl-Artikolu 14.4 tar-Regolament, jiġifieri fejn l-allokazzjoni tal-kapaċità mis-C-OSS hija obbligatorja, skont l-Artikolu 13 tar-Regolament. Il-Bord Eżekuttiv se jevalwa l-funzjonament tal-Qafas tal-Kuritur, filwaqt li jqis il-monitoraġġ stabbilit fl-Anness 1. Il-korpi regolatorji se jgħarrfu lill-Bord Eżekuttiv dwar l-osservazzjonijiet tagħhom stess.

2.

Il-qafas għandu japplika għall-Maniġers tal-Infrastruttura u għall-Korpi tal-Allokazzjoni sabiex dawn jinkorporaw prinċipji ċari u trasparenti fil-proċess tal-allokazzjoni mis-C-OSS ta’ mogħdijiet ferrovjarji stabbiliti minn qabel u ta’ kapaċità ta’ riserva. Il-Maniġers tal-Infrastruttura u l-Korpi tal-Allokazzjoni se jinfurzaw l-implimentazzjoni tal-qafas billi jinkludu d-dispożizzjonijiet rilevanti fid-dikjarazzjonijiet tagħhom dwar in-netwerk. Il-kamp tal-applikazzjoni tal-qafas se jiġi definit fil-pjan ta' implimentazzjoni tal-kuritur fejn għandhom jiġu ddefiniti r-rotot u l-linji ta’ konnessjoni.

II.   PRINĊIPJI GĦALL-FORNIMENT TA’ MOGĦDIJIET STABBILITI MINN QABEL

Il-kapaċità pprovduta mill-Maniġers tal-Infrastruttura u mill-Korpi tal-Allokazzjoni nazzjonali għal mogħdijiet ferrovjarji stabbiliti minn qabel u għall-kapaċità ta’ riserva lis-C-OSS, tittieħed mill-kapaċità nazzjonali ddedikata għat-traffiku tal-merkanzija. Il-Maniġers tal-Infrastruttura u l-Korpi tal-Allokazzjoni se jorganizzaw il-kostruzzjoni ta’ mogħdijiet stabbiliti minn qabel u d-definizzjoni ta’ kapaċità ta’ riserva, skont l-Artikolu 14 tar-Regolament, billi huma jqisu inter alia:

—	l-istudju dwar is-Suq tat-Trasport, li janalizza d-domanda għat-traffiku internazzjonali tal-merkanzija fuq il-kuritur u li jkopri t-tipi differenti ta’ traffiku, speċjalment it-traffiku tal-passiġġieri;

—	it-talba għall-kapaċità ta’ infrastruttura marbuta mal-iskedi tax-xogħol tal-passat u tal-preżent;

—	il-ftehimiet ta’ qafas nazzjonali.

Id-dettalji tal-forniment ta’ mogħdijiet stabbiliti minn qabel huma spjegati fid-Dokument ta’ Informazzjoni dwar il-Kuritur.

Dawn il-mogħdijiet stabbiliti minn qabel jingħataw lis-C-OSS għall-ġestjoni esklussiva tiegħu sa, l-aktar tard, X-11 u għar-riserva ta’ kapaċità mill-anqas 60 jum qabel ma tibda taħdem il-ferrovija (X-2).

Il-Maniġers tal-Infrastruttura u l-Korpi tal-Allokazzjoni se jimmiraw li fil-forniment ta’ mogħdijiet ferrovjarji stabbiliti minn qabel, jinkludu l-aċċess u l-mogħdijiet li jikkonnettjaw it-terminals, fejn dan ikun fattibbli.

Il-mogħdijiet stabbiliti minn qabel ġestiti mis-C-OSS għall-allokazzjoni fl-iskeda annwali u għall-kapaċità ta’ riserva huma ddedikati lill-kuritur. Għalhekk huwa essenzjali li l-kapaċità ddedikata murija tiġi protetta fil-konfront tal-adattamenti sussegwenti min-naħa tal-Maniġers tal-Infrastruttura u mill-Korpi tal-Allokazzjoni li huma kritiċi għall-applikanti.

Il-Bord ta’ Tmexxija għandu jiddeċiedi jekk, u il-kapaċità mhux użata tingħatax lura mis-C-OSS lill-Maniġers tal-Infrastruttura u lill-Korpi tal-Allokazzjoni rilevanti fil-X-7,5 u jekk iva, sa liema punt, skont prinċipju ppubblikat fid-Dokument ta’ Informazzjoni dwar il-Kuritur u billi jqis il-ħtieġa ta’ kapaċità ta’ riserva suffiċjenti u ta’ kwalità tajba.

III.   PRINĊIPJI TAL-ALLOKAZZJONI TAL-MOGĦDIJIET FERROVJARJI STABBILITI MINN QABEL U TA’ KAPAĊITÀ TA’ RISERVA MIS-C-OSS

Id-deċiżjoni dwar l-allokazzjoni ta’ mogħdijiet ferrovjarji stabbiliti minn qabel u ta’ kapaċità ta’ riserva għall-kuritur tal-merkanzija tittieħed mis-C-OSS, skont l-Artikolu 13 tar-Regolament.

Bħall-Maniġers tal-Infrastruttura u l-Korpi tal-Allokazzjoni, is-C-OSS għandu jirrispetta r-regoli tad-Direttiva 2012/34/UE, speċjalment l-Artikolu 29.

L-attivitajiet fil-proċessi tal-iskedar li jikkonċernaw il-mogħdijiet ferrovjarji stabbiliti minn qabel u l-kapaċità ta’ riserva huma deskritti fl-Anness 2.

1.   Prinċipji ġenerali relatati mat-twaqqif tas-C-OSS

Is-C-OSS għandu jiġi stabbilit skont il-prinċipji ta’ trasparenza, ta’ nondiskriminazzjoni, ta’ indipendenza, ta’ bilanċ u ta’ imparzjalità u huwa rregolat minnhom.

Il-Bord ta’ Tmexxija huwa responsabbli għall-ħatra jew għat-twaqqif tas-C-OSS, inklużi l-modalitajiet operattivi tiegħu. Il-pjan ta’ implimentazzjoni, li se jifforma parti mid-Dokument ta’ Informazzjoni dwar il-Kuritur li se jiġi ppubblikat mill-Bord ta’ Tmexxija skont l-Artikolu 18 tar-Regolament, se jiddeskrivi l-kompetenzi, il-forma ta’ organizzazzjoni, id-drittijiet tal-aċċess, ir-responsabbiltà vis-à-vis l-applikanti u l-mod tal-funzjonament tas-C-OSS u l-kondizzjonijiet tiegħu għall-użu.

2.   Prinċipji ta’ trasparenza u ta’ nondiskriminazzjoni

Minbarra d-Dokument ta’ Informazzjoni dwar il-Kuritur, ladarba jiġi adottat, il-Maniġers tal-Infrastruttura u l-Korpi tal-Allokazzjoni se jippubblikaw il-funzjonament u l-organizzazzjoni tas-C-OSS fid-dikjarazzjonijiet dwar in-netwerk tagħhom. Huma se jsemmu wkoll id-Dokument ta’ Informazzjoni dwar il-Kuritur fid-dikjarazzjonijiet dwar in-netwerk tagħhom stess.

Skont l-Artikolu 13 tar-Regolament, kwalunkwe applikazzjoni ta’ mogħdijiet stabbiliti minn qabel u ta’ kapaċità ta’ riserva ta’ infrastruttura għall-kapaċità tal-kuritur, li jaqsmu mill-inqas fruntiera waħda fuq kuritur, minn impriża ferrovjarja jew minn applikant awtorizzat se titmexxa mis-C-OSS (trattament ta’ talbiet, koordinazzjoni mal-Maniġers tal-Infrastruttura u mal-Korpi tal-Allokazzjoni, sorveljanza, deċiżjonijiet u tweġibiet). Kull applikazzjoni għandha tiġi rreġistrata minn C-OSS u tkun suġġetta għat-tweġiba dovuta.

Wara l-wasla tat-talbiet kollha għal mogħdijiet stabbiliti minn qabel fil-X-8 (id-data ta’ skadenza regolari għas-sottomissjoni tat-talbiet għal mogħdijiet għall-iskeda annwali) is-C-OSS se jiddeċiedi mingħajr dewmien dwar l-allokazzjoni ta’ mogħdijiet stabbiliti minn qabel sal-X-7,5 u se jimmarka l-allokazzjoni fir-reġistru tal-mogħdijiet skont dan.

Skont l-Artikolu 13.3 u 13.4 tar-Regolament, bl-istess mod huwa mitlub li s-C-OSS jgħarrfu mingħajr dewmien lill-Maniġers tal-Infrastruttura u lill-Korpi tal-Allokazzjoni kompetenti dwar l-applikazzjonijiet riċevuti u d-deċiżjonijiet meħuda dwarhom. Huwa mitlub ukoll li għal kull applikazzjoni li ma tistax tiġi ssodisfata, is-C-OSS għandu mingħajr dewmien, jibgħat l-applikazzjoni għall-kapaċità ta’ infrastruttura lill-Maniġers tal-Infrastruttura u lill-Korpi tal-Allokazzjoni kompetenti, li għandhom jieħdu deċiżjoni dwar dik l-applikazzjoni u jikkomunika din id-deċiżjoni lis-C-OSS biex tkun segwita. Din il-proċedura tippermetti segwitu ta' applikazzjonijiet li s-C-OSS jista’ jirċievi fir-rigward ta' mogħdijiet ferrovjarji internazzjonali tal-merkanzija fuq il-kuritur.

3.   Prinċipji ta’ imparzjalità u ta’ indipendenza

Is-C-OSS jirrispetta d-dmirijiet ta’ kunfidenzjalità rigward l-applikazzjonijiet riċevuti.

Fil-kuntest tal-kuritur, u konsegwentement minn perspettiva ta’ kooperazzjoni internazzjonali, l-esperti tal-persunal tas-C-OSS għandhom, fil-limiti tal-mandat tagħhom, jaħdmu indipendentement mill-kompiti tagħhom ta’ Maniġers tal-Infrastruttura u ta’ Korpi tal-Allokazzjoni filwaqt li jassiguraw deċiżjonijiet ta' allokazzjoni għal mogħdijiet stabbiliti minn qabel u ta’ kapaċità ta’ riserva fil-livell ta’ kuritur. Madankollu, l-esperti tas-C-OSS jistgħu jaħdmu ma’ Maniġers tal-Infrastruttura u ma’ Korpi tal-Allokazzjoni għall-iskop ta’ koordinazzjoni tal-allokazzjoni ta’ mogħdijiet tal-kuritur mal-allokazzjoni ta’ mogħdijiet nazzjonali ta’ alimentazzjoni/ta’ ħruġ.

4.   Prinċipji ta’ kooperazzjoni u ta’ bilanċ

Il-Maniġers tal-Infrastruttura u l-Korpi tal-Allokazzjoni se jikkoordinaw u jiġbru flimkien il-mogħdijiet ferrovjarji stabbiliti minn qabel tal-kuritur fil-katalgu tal-mogħdijiet tas-C-OSS sabiex jitqiesu l-ħtiġijiet tas-suq, espressi permezz ta’, pereżempju, Studju dwar is-Suq tat-Trasport. Il-Bord ta’ Tmexxija se jinforma lill-Bord Eżekuttiv fuq bażi annwali dwar l-iżvilupp kwantitattiv u kwalitattiv ta’ mogħdijiet ferrovjarji tal-kuritur, skont l-Artikolu 19.2 tar-Regolament (ara l-Anness 1 għal sett minimu ta’ indikaturi).

5.   Prijoritajiet li għandhom jiġu applikati mis-C-OSS f’każ ta’ applikazzjonijiet konfliġġenti

Wara l-wasla tat-talbiet kollha għal mogħdijiet ferrovjarji stabbiliti minn qabel fil-X-8, is-C-OSS se jiddeċiedi dwar l-allokazzjoni tal-mogħdijiet stabbiliti minn qabel.

F’każ ta’ applikazzjonijiet konfliġġenti, is-C-OSS se japplika r-regola ta’ prijorità komuni għal koordinazzjoni li tiffoka fuq l-ippremjar tal-applikanti li mill-perspettiva tal-Maniġers tal-Infrastruttura/tal-Korpi tal-Allokazzjoni għandhom valur kummerċjali ogħla u sabiex ikun immassimizzat l-użu tal-kapaċità (sezzjonijiet tal-mogħdijiet stabbiliti minn qabel itwal u dan aktar ta’ spiss). Il-formula hija deskritta fl-Anness 3.

Jistgħu jsiru bidliet f’dan l-Anness bil-kundizzjoni li jkun hemm ftehim komuni bejn iż-żewġ Bordijiet, dak Eżekuttiv u l-Bord ta’ Tmexxija.

Din ir-regola ta’ prijorità għall-koordinazzjoni tikkonċerna biss il-mogħdijiet ferrovjarji stabbiliti minn qabel tal-kuritur u jiġu applikati biss bejn X-8 u X-7,5 fil-każ ta’ applikazzjonijiet konfliġġenti.

Ladarba tkun saret id-deċiżjoni tal-allokazzjoni wara li jkunu saru t-talbiet sal-X-8, is-C-OSS jipproponi mogħdijiet ferrovjarji stabbiliti minn qabel alternattivi lill-applikanti li ma ntlaqatilhomx it-talba. Jekk dawn is-soluzzjonijiet alternattivi mhumiex adegwati biżżejjed għall-applikant, is-C-OSS jibgħat it-talbiet lill-Maniġers tal-Infrastruttura/lill-Korpi tal-Allokazzjoni kompetenti skont l-Artikolu 13.4 tar-Regolament. Dawk it-talbiet għal mogħdijiet għandhom jiġu kkunsidrati mill-Maniġers tal-Infrastruttura/mill-Korpi tal-Allokazzjoni li tressqu qabel id-data ta’ skadenza X-8.

Rigward it-talbiet li jitressqu wara X-8, għandha tiġi applikata r-regola ta’ prijorità għall-koordinazzjoni “min jiġi l-ewwel, jinqeda l-ewwel”.

Dawn ir-regoli se jiddaħħlu fid-dikjarazzjonijiet dwar in-netwerk nazzjonali ta’ kull membru tal-Bord ta’ Tmexxija tal-kuritur, se jiddeskrivu l-aspetti tal-kuritur, u mbagħad se jiġu ppubblikati fid-Dokument ta’ Informazzjoni dwar il-Kuritur.

IV.   KONTROL REGOLATORJU

L-impatt tal-qafas dwar l-allokazzjoni tal-kapaċità fuq l-allokazzjoni annwali huwa, fil-każ ta’ ilmenti, suġġett għal kontroll (ex post) mill-korpi regolatorji. Il-korpi regolatorji jistgħu wkoll jibdew b’investigazzjonijiet fuq inizjattiva tagħhom stess.

Skont l-Artikolu 20 tar-Regolament, il-korpi regolatorji ta’ kull kuritur għandhom jikkollaboraw. Il-Ministri jistiednu lill-Korpi Regolatorji biex jiddeskrivu l-mod kif jikkooperaw fir-rigward tal-kontroll regolatorju tas-C-OSS, u b’mod partikolari kif jintlaħaq ftehim ta’ kooperazzjoni li jiddefinixxi kif għandhom jiġu ffajljati l-ilmenti dwar il-proċess tal-allokazzjoni tas-C-OSS u kif għandha tittieħed deċiżjoni wara lment. Dan il-ftehim għandu jiġi ppubblikat.

Skont id-dispożizzjonijiet nazzjonali f'ċerti pajjiżi, il-korpi regolatorji għandhom jiġu involuti fil-proċess tal-allokazzjoni (eż. fil każ li talba ma tkunx tista’ tiġi ssodisfata). F’dan il-każ il-korp regolatorju se jkollu l-kompetenza li jissorvelja lill-Maniġers tal-Infrastruttura/lill-Korpi tal-Allokazzjoni fuq it-territorju tiegħu stess skont l-Artikolu 56.1 tad-Direttiva 2012/34/UE.

V.   APPLIKANTI AWTORIZZATI

Skont l-Artikolu 15 tar-Regolament, applikant awtorizzat jista’ japplika direttament mas-C-OSS għall-allokazzjoni ta’ mogħdijiet ferrovjarji stabbiliti minn qabel/ta’ kapaċità ta' riserva. Jekk il-mogħdija ferrovjarji stabbilita minn qabel/il-kapaċità ta’ riserva ġiet allokata mis-C-OSS skont dan, l-applikant awtorizzat għandu jindika lis-C-OSS fiż-żmien deċiż mill-Bord ta’ Tmexxija, l-impriża/i ferrovjarja/i li se tuża/jużaw mogħdija ferrovjarja/kapaċità ta’ riserva f’isem l-applikant awtorizzati. L-impriża ferrovjarja maħtura għalhekk trid tikkonkludi l-kuntratti individwali neċessarji mal-Maniġers tal-Infrastruttura/mal-Korpi tal-Allokazzjoni kkonċernati billi tiddependi fuq kondizzjonijiet ta’ aċċess rispettivi tan-network nazzjonali.

Id-Dokument ta’ Informazzjoni dwar il-Kuritur se jiddeskrivi d-drittijiet u l-obbligi tal-applikanti vis-à-vis s-C-OSS, b’mod partikolari fejn l-ebda Impriża Ferrovjarja ma tkun għada ġiet assenjata. Id-Dikjarazzjonijiet dwar in-Netwerk għandhom jinkludu t-tariffi ta’ prenotazzjoni sabiex jipprovdu inċentiv għall-użu effiċjenti tal-mogħdija allokata.

IMPLIMENTAZZJONI

Dan il-Qafas tal-Kuritur għandu jidħol fis-seħħ mal-iffirmar tal-qafas preżenti. L-ewwel evalwazzjoni tal-Qafas tal-Kuritur mill-Bordijiet Eżekuttivi se sseħħ xahrejn wara l-wasla ta’ rapport ta’ sorveljanza għas-sena 2014, previst fl-Artikolu 19.2. Din il-verżjoni ta’ dan il-qafas għandha tiġi ppubblikata fid-Dokument ta’ Informazzjoni dwar il-Kuritur.

ANNESSI

1.	Il-monitoraġġ tal-proċess tal-allokazzjoni

2.	L-attivitajiet fil-proċessi tal-iskedar rigward il-mogħdijiet ferrovjarji stabbiliti minn qabel u l-kapaċità ta’ riserva

3.	Id-deskrizzjoni tar-regola tal-prijorità għall-koordinazzjoni fil-X-8 fil-każ ta’ talbiet konfliġġenti għal mogħdijiet stabbiliti minn qabel

---

(1)  ĠU L 343, 14.12.2012, p. 32.

(2)  ĠU L 276, 20.10.2010, p. 22.

---

---

---

---