(1)

Id-Direttiva 2009/138/KE tal-Parlament Ewropew u tal-Kunsill (3) ħolqot regoli prudenzjali aktar ibbażati fuq ir-riskju u aktar armonizzati għas-settur tal-assigurazzjoni u tar-riassigurazzjoni. Uħud mid-dispożizzjonijiet ta' dik id-Direttiva huma soġġetti għal klawżoli ta' rieżami. L-applikazzjoni ta' dik id-Direttiva kkontribwiet sostanzjalment għat-tisħiħ tas-sistema finanzjarja fl-Unjoni u għamlet l-impriżi tal-assigurazzjoni u tar-riassigurazzjoni aktar reżiljenti għal varjetà ta' riskji. Għalkemm hija komprensiva ħafna, dik id-Direttiva ma tindirizzax id-dgħufijiet identifikati kollha li jaffettwaw lill-impriżi tal-assigurazzjoni u tar-riassigurazzjoni.

(2)

Il-pandemija tal-Covid-19 ikkawżat ħsara soċjoekonomika tremenda u ħalliet l-ekonomija tal-Unjoni fil-bżonn ta' rkupru sostenibbli, inklużiv u ġust. Bl-istess mod, il-konsegwenzi ekonomiċi u soċjali tal-gwerra ta' aggressjoni tar-Russja kontra l-Ukrajna għadhom qed jiżviluppaw. Din għamlet il-ħidma fuq il-prijoritajiet politiċi tal-Unjoni saħansitra aktar urġenti, b'mod partikolari l-iżgurar li l-ekonomija tkun għas-servizz tan-nies u tilħaq l-objettivi tal-Patt Ekoloġiku Ewropew. Is-settur tal-assigurazzjoni u tar-riassigurazzjoni jista' jipprovdi sorsi privati ta' finanzjament lin-negozji Ewropej u jista' jagħmel l-ekonomija aktar reżiljenti billi jipprovdi protezzjoni kontra firxa wiesgħa ta' riskji. B'dan ir-rwol doppju, is-settur għandu potenzjal kbir li jikkontribwixxi għall-kisba tal-prijoritajiet tal-Unjoni.

(3)

Kif enfasizzat fil-komunikazzjoni tal-Kummissjoni tal-24 ta' Settembru 2020“Unjoni tas-Swieq Kapitali għall-persuni u n-negozji”, l-inċentivar tal-investituri istituzzjonali, b'mod partikolari l-assiguraturi, biex jagħmlu investimenti aktar fit-tul, ser ikun strumentali fl-appoġġ tar-riekwitizzazzjoni fis-settur korporattiv. Sabiex tiġi ffaċilitata l-kontribuzzjoni tal-assiguraturi għall-finanzjament tal-irkupru ekonomiku tal-Unjoni, jenħtieġ li l-qafas prudenzjali jiġi aġġustat sabiex iqis aħjar in-natura fit-tul tan-negozju tal-assigurazzjoni. B'mod partikolari, meta jiġi kkalkolat ir-Rekwiżit Kapitali tas-Solvenza skont il-formula standard, jenħtieġ li tiġi ffaċilitata l-possibbiltà li jintuża parametru standard aktar favorevoli għall-investimenti fl-ekwità li jinżammu b'perspettiva fit-tul, dment li l-impriżi tal-assigurazzjoni u tar-riassigurazzjoni jikkonformaw ma' kriterji sodi u robusti, li jippreservaw il-protezzjoni tad-detenturi ta' poloz u l-istabbiltà finanzjarja. Jenħtieġ li tali kriterji jkollhom l-għan li jiżguraw li l-impriżi tal-assigurazzjoni u tar-riassigurazzjoni jkunu jistgħu jevitaw il-bejgħ furzat ta' ekwitajiet maħsubin biex jinżammu fit-tul, inkluż f'kundizzjonijiet ta' stress fis-suq. Peress li l-impriżi tal-assigurazzjoni u tar-riassigurazzjoni għandhom varjetà wiesgħa ta' għodod għall-ġestjoni tar-riskju biex jevitaw tali bejgħ furzat, jenħtieġ li dawk il-kriterji jirrikonoxxu tali varjetà u ma jeħtiġux id-delimitazzjoni legali jew kuntrattwali tal-assi ta' investiment fit-tul sabiex l-impriżi tal-assigurazzjoni u tar-riassigurazzjoni jibbenefikaw mill-parametru standard aktar favorevoli għall-investimenti fl-ekwità. Barra minn hekk, jenħtieġ li l-maniġment tal-impriża tal-assigurazzjoni jew tar-riassigurazzjoni jimpenja ruħu għal perjodu minimu ta' żamma tal-ekwitajiet li l-impriża tinvesti fihom permezz ta’ regoli bil-miktub u juri l-kapaċità tal-impriża li żżomm dawk l-ekwitajiet tul dak il-perjodu ta' żamma.

(4)

Aġġustamenti li jqisu aħjar in-natura fit-tul tan-negozju tal-assigurazzjoni jistgħu jwasslu għal żieda fil-kapital disponibbli liberament b'riżultat tat-tnaqqis fir-Rekwiżit Kapitali tas-Solvenza. Meta dak ikun il-każ, jenħtieġ li l-impriżi tal-assigurazzjoni u tar-riassigurazzjoni jqisu li ma jidderiġux il-kapital liberat lejn id-distribuzzjonijiet tal-azzjonisti jew il-bonusijiet tal-maniġment, iżda jenħtieġ li jagħmlu ħilithom biex jidderieġu l-kapital liberat lejn investimenti produttivi fl-ekonomija reali sabiex jappoġġaw l-irkupru ekonomiku u l-objettivi ta' politika usa' tal-Unjoni.

(5)

L-assiguraturi u r-riassiguraturi għandhom il-libertà li jinvestu kullimkien fid-dinja, u mhumiex limitati għall-Unjoni. L-investimenti f'pajjiżi terzi jistgħu jwasslu wkoll għal politiki ġenerali ta' għajnuna għall-iżvilupp tal-Unjoni jew tal-Istati Membri. Għalhekk, jenħtieġ li l-impriżi tal-assigurazzjoni u tar-riassigurazzjoni jiżguraw li l-politika ta' investiment tagħhom tirrifletti l-objettivi tal-lista aġġornata tal-UE ta' ġuriżdizzjonijiet li ma jikkooperawx għal finijiet ta' taxxa u tad-Direttiva (UE) 2015/849 tal-Parlament Ewropew u tal-Kunsill (4) fir-rigward ta' pajjiżi terzi b'riskju kbir.

(6)

Fil-komunikazzjoni tagħha tal-11 ta' Diċembru 2019 dwar il-Patt Ekoloġiku Ewropew, il-Kummissjoni ħadet impenn li tintegra aħjar il-ġestjoni tar-riskji klimatiċi u ambjentali fil-qafas prudenzjali tal-Unjoni. Il-Patt Ekoloġiku Ewropew huwa l-istrateġija l-ġdida tal-Unjoni għat-tkabbir, li għandu l-għan li jittrasforma lill-Unjoni f'ekonomija moderna, effiċjenti fl-użu tar-riżorsi u kompetittiva mingħajr emissjonijiet netti ta' gassijiet serra sal-2050. Ser jikkontribwixxi għall-objettiv li tiġi żviluppata ekonomija għas-servizz tan-nies, filwaqt li jsaħħaħ l-ekonomija soċjali tas-suq tal-Unjoni u jgħin jiżgura li din tkun lesta għall-futur u li twassal għal stabbiltà, impjiegi, tkabbir u investiment. Fil-proposta tagħha tal-4 ta' Marzu 2020 għal Liġi Ewropea dwar il-Klima, il-Kummissjoni pproponiet li l-objettiv ta' newtralità klimatika u reżiljenza għall-klima sal-2050 isir vinkolanti fl-Unjoni. Din il-proposta ġiet adottata mill-Parlament Ewropew u mill-Kunsill u daħlet fis-seħħ fid-29 ta' Lulju 2021 (5). L-ambizzjoni tal-Kummissjoni li tiżgura tmexxija globali mill- Unjoni fit-triq lejn l-2050 ġiet imtennija fir-Rapport ta' Prospettiva Strateġika tal-2021, li jidentifika l-iżvilupp ta' sistemi ekonomiċi u finanzjarji reżiljenti u validi fil-futur bħala qasam strateġiku ta' azzjoni.

(7)

Il-qafas ta' finanzjament sostenibbli tal-UE ser ikollu rwol importanti fl-ilħuq tal-miri tal-Patt Ekoloġiku Ewropew u jenħtieġ li r-regolamentazzjoni ambjentali tiġi kkomplementata b'qafas ta' finanzjament sostenibbli li jidderieġi l-finanzjament lejn investimenti li jnaqqsu l-iskopertura għal riskji klimatiċi u ambjentali. Fil-komunikazzjoni tagħha tas-6 ta' Lulju 2021 bit-titlu “Strateġija għall-Finanzjament tat-Tranżizzjoni lejn Ekonomija Sostenibbli”, il-Kummissjoni ħadet impenn li tipproponi emendi għad-Direttiva 2009/138/KE biex tintegra b'mod konsistenti r-riskji għas-sostenibbiltà fil-ġestjoni tar-riskju tal-assiguraturi billi teħtieġ analiżi tax-xenarju tat-tibdil fil-klima mill-assiguraturi.

(8)

Reċentement ġew proposti u adottati numru ta' atti leġiżlattivi biex titjieb ir-reżiljenza u li jikkontribwixxu għas-sostenibbiltà, b'mod partikolari b'rabta mar-rappurtar dwar is-sostenibbiltà, inkluż ir-Regolament (UE) 2019/2088 tal-Parlament Ewropew u tal-Kunsill (6), id-Direttiva (UE) 2022/2464 tal-Parlament Ewropew u tal-Kunsill (7), u direttiva dwar id-diliġenza dovuta tas-sostenibbiltà korporattiva u li temenda d-Direttiva (UE) 2019/1937, li kollha kemm huma jaffettwaw is-settur tal-assigurazzjoni u tar-riassigurazzjoni.

(9)

L-integrazzjoni ulterjuri tas-suq intern tal-Unjoni għall-assigurazzjoni hija objettiv ewlieni ta' din id-Direttiva emendatorja. L-integrazzjoni tas-suq intern għall-assigurazzjoni żżid il-kompetizzjoni u d-disponibbiltà tal-prodotti tal-assigurazzjoni madwar l-Istati Membri għall-benefiċċju tan-negozji u tal-konsumaturi. Il-fallimenti tal-assigurazzjoni fis-suq intern tal-Unjoni għall-assigurazzjoni minn meta bdiet tapplika d-Direttiva 2009/138/KE jenfasizzaw il-ħtieġa għal aktar konsistenza u konverġenza tas-superviżjoni fl-Unjoni kollha. Jenħtieġ li s-superviżjoni tal-impriżi tal-assigurazzjoni u tar-riassigurazzjoni li joperaw bil-libertà li jiġu pprovduti servizzi u d-dritt tal-istabbiliment tittejjeb aktar mingħajr ma jiddgħajjef l-objettiv ta' integrazzjoni ulterjuri tas-suq intern għall-assigurazzjoni biex tiġi żgurata protezzjoni konsistenti tal-konsumatur u tiġi ssalvagwardjata kompetizzjoni ġusta fis-suq intern kollu.

(10)

Id-Direttiva 2009/138/KE teskludi lil ċerti impriżi mill-kamp ta' applikazzjoni tagħha, minħabba d-daqs tagħhom. Wara l-ewwel snin ta' applikazzjoni tad-Direttiva 2009/138/KE u bl-għan li jiġi żgurat li ma tapplikax bla bżonn għall-impriżi iżgħar, huwa xieraq li dawk l-esklużjonijiet jiġu rieżaminati billi jiżdiedu dawk il-limiti, sabiex impriżi żgħar li jissodisfaw ċerti kundizzjonijiet ma jkunux soġġetti għal dik id-Direttiva. Bħalma diġà huwa l-każ għall-impriżi tal-assigurazzjoni esklużi mill-kamp ta' applikazzjoni tad-Direttiva 2009/138/KE, jenħtieġ li l-impriżi li jibbenefikaw minn dawn il-limiti ogħla jkollhom l-għażla li jżommu jew jitolbu awtorizzazzjoni skont dik id-Direttiva sabiex jibbenefikaw mil-liċenzja unika pprovduta fiha u jenħtieġ li jkun possibbli li l-Istati Membri jagħmlu lill-impriżi tal-assigurazzjoni esklużi mill-kamp ta' applikazzjoni tad-Direttiva 2009/138/KE soġġetti għal dispożizzjonijiet li jkunu simili jew identiċi għal dawk previsti f'dik id-Direttiva.

(11)

Id-Direttiva 2009/138/KE ma tapplikax għal attività ta' assistenza fejn jiġu ssodisfati l-kundizzjonijiet tal-Artikolu 6(1) ta' dik id-Direttiva. L-ewwel kundizzjoni tiddikjara li l-assistenza għandha tkun relatata ma' inċidenti jew waqfien li jinvolvu vettura tat-triq li jseħħu fit-territorju tal-Istat Membru tal-impriża li tipprovdi kopertura. Dik id-dispożizzjoni tista' timplika li rekwiżit ta' awtorizzazzjoni bħala assiguratur tapplika għall-fornituri ta' assistenza għall-vetturi tat-triq f'każ ta' inċident jew waqfien li jseħħ eżatt wara l-fruntiera u tista' tfixkel l-assistenza bla bżonn. Għal din ir-raġuni, huwa xieraq li dik il-kundizzjoni tiġi rieżaminata. Għalhekk, jenħtieġ li l-kundizzjoni skont l-Artikolu 6(1), il-punt (a), tad-Direttiva 2009/138/KE tiġi estiża għal inċidenti jew waqfien li jinvolvu l-vettura tat-triq koperta minn dik l-impriża, li xi kultant iseħħu f'pajjiż ġar.

(12)

L-informazzjoni dwar kwalunkwe applikazzjoni għall-awtorizzazzjoni biex jinbeda negozju fi Stat Membru u l-eżiti tal-valutazzjoni ta' dawn l-applikazzjonijiet jistgħu jipprovdu informazzjoni essenzjali għall-valutazzjoni tal-applikazzjonijiet fi Stati Membri oħra. Għalhekk, jenħtieġ li l-awtorità superviżorja konċernata tiġi infurmata mill-applikant dwar ċaħdiet jew irtirar preċedenti ta' applikazzjonijiet għall-awtorizzazzjoni fi Stat Membru ieħor.

(13)

Qabel l-għoti ta' awtorizzazzjoni lil impriża tal-assigurazzjoni jew tar-riassigurazzjoni li tkun impriża sussidjarja ta' impriża li tinsab fi Stat Membru ieħor, jew li ser tkun taħt il-kontroll tal-istess persuna ġuridika jew fiżika bħal impriża oħra tal-assigurazzjoni jew tar-riassigurazzjoni li tinsab fi Stat Membru ieħor, jenħtieġ li l-awtorità superviżorja tal-Istat Membru li jagħti l-awtorizzazzjoni tikkonsulta lill-awtoritajiet superviżorji ta' kwalunkwe Stat Membru kkonċernat. Fid-dawl ta' żieda fl-attivitajiet tal-grupp tal-assigurazzjoni fi Stati Membri differenti, huwa neċessarju li jissaħħu l-applikazzjoni konverġenti tal-liġi tal-Unjoni u l-iskambju ta' informazzjoni bejn l-awtoritajiet superviżorji, b'mod partikolari qabel ma jingħataw l-awtorizzazzjonijiet. Għalhekk, meta jkun meħtieġ li jiġu kkonsultati diversi awtoritajiet superviżorji, jenħtieġ li kwalunkwe awtorità superviżorja kkonċernata titħalla titlob valutazzjoni konġunta ta' applikazzjoni għall-awtorizzazzjoni mill-awtorità superviżorja tal-Istat Membru fejn ikun għaddej il-proċess ta' awtorizzazzjoni ta' impriża futura tal-assigurazzjoni jew tar-riassigurazzjoni tal-grupp. Id-deċiżjoni li tingħata l-awtorizzazzjoni tibqa' l-kompetenza tal-awtorità superviżorja tal-Istat Membru ta' domiċilju fejn l-impriża kkonċernata titlob l-awtorizzazzjoni. Madankollu, jenħtieġ li jitqiesu r-riżultati tal-valutazzjoni konġunta meta tittieħed dik id-deċiżjoni.

(14)

Jenħtieġ li d-Direttiva 2009/138/KE tiġi applikata f'konformità mal-prinċipju tal-proporzjonalità. Sabiex tiġi ffaċilitata l-applikazzjoni proporzjonata tad-Direttiva għal impriżi li huma iżgħar u inqas kumplessi mill-impriża medja, u biex jiġi żgurat li huma ma jkunux soġġetti għal rekwiżiti ta' piż sproporzjonat, huwa neċessarju li jiġu pprovduti kriterji bbażati fuq ir-riskju li jippermettu l-identifikazzjoni tagħhom.

(15)

Jenħtieġ li jkun possibbli li l-impriżi li jikkonformaw mal-kriterji bbażati fuq ir-riskju jiġu kklassifikati bħala impriżi żgħar u mhux kumplessi f'konformità ma' proċess sempliċi ta' notifika. Meta, f'perjodu timitat wara tali notifika, l-awtorità superviżorja ma topponix il-klassifikazzjoni għal raġunijiet debitament ġustifikati marbuta mal-valutazzjoni tal-kriterji rilevanti, jenħtieġ li dik l-impriża titqies bħala impriża żgħira u mhux kumplessa. Ladarba tiġi kklassifikata bħala impriża żgħira u mhux kumplessa, fil-prinċipju, jenħtieġ li impriża tibbenefika awtomatikament minn miżuri ta' proporzjonalità identifikati dwar ir-rappurtar, l-iżvelar, il-governanza, ir-reviżjoni tar-regoli bil-miktub, il-kalkolu tad-dispożizzjonijiet tekniċi, il-valutazzjoni tas-solvenza u tar-riskju proprju, u l-pjanijiet ta' ġestjoni tar-riskju tal-likwidità.

(16)

B'deroga mill-benefiċċju awtomatiku minn miżuri ta' proporzjonalità, meta l-awtoritajiet superviżorji jkollhom tħassib serju b'rabta mal-profil tar-riskju ta' impriża żgħira u mhux kumplessa individwali, jenħtieġ li jkollhom is-setgħa li jirrikjedu li l-impriża kkonċernata toqgħod lura milli tuża miżura ta' proporzjonalità waħda jew aktar. Din is-setgħa tista' tintuża meta jidentifikaw li ma jkunx għad hemm konformità mar-Rekwiżit Kapitali tas-Solvenza, meta jkun hemm riskju ta' nuqqas ta' konformità, meta l-profil tar-riskju ta' impriża jinbidel materjalment, jew meta s-sistema ta' governanza ta’ impriża ma tkunx effettiva.

(17)

Huwa xieraq li l-miżuri ta' proporzjonalità jkunu disponibbli wkoll għal impriżi li mhumiex ikklassifikati bħala impriżi żgħar u mhux kumplessi, iżda li għalihom xi wħud mir-rekwiżiti tad-Direttiva 2009/138/KE huma għaljin u kumplessi wisq, fid-dawl tar-riskji involuti fin-negozju mwettaq minn dawn l-impriżi. Jenħtieġ li dawk l-impriżi jitħallew jużaw miżuri ta' proporzjonalità abbażi ta' analiżi għal kull każ u wara approvazzjoni minn qabel mill-awtoritajiet superviżorji tagħhom.

(18)

Implimentazzjoni xierqa tal-prinċipju tal-proporzjonalità hija kruċjali biex jiġi evitat piż eċċessiv fuq l-impriżi tal-assigurazzjoni u tar-riassigurazzjoni. Għal dik ir-raġuni, jenħtieġ li l-impriżi tal-assigurazzjoni u tar-riassigurazzjoni jressqu rapport lill-awtoritajiet superviżorji tagħhom biss meta jkun hemm bidla fl-ambitu tal-miżuri ta' proporzjonalità li japplikaw.

(19)

L-impriżi tal-assigurazzjoni captive u l-impriżi tar-riassigurazzjoni captive li jkopru biss ir-riskji assoċjati mal-grupp industrijali jew kummerċjali li jappartjenu għalih, jippreżentaw profil tar-riskju partikolari li jenħtieġ li jitqies meta jiġu ddefiniti xi rekwiżiti, b'mod partikolari dwar il-valutazzjoni tar-riskju proprju u tas-solvenza, l-iżvelar u l-awtorizzazzjonijiet relatati biex il-Kummissjoni tispeċifika aktar ir-regoli dwar dawn ir-rekwiżiti. Barra minn hekk, jenħtieġ li l-impriżi tal-assigurazzjoni captive u l-impriżi tar-riassigurazzjoni captive jkunu jistgħu jibbenefikaw ukoll mill-miżuri ta' proporzjonalità meta jiġu kklassifikati bħala impriżi żgħar u mhux kumplessi.

(20)

Huwa importanti li l-impriżi tal-assigurazzjoni u tar-riassigurazzjoni jżommu pożizzjoni finanzjarja solida. Għal dak il-fini, id-Direttiva 2009/138/KE tipprevedi superviżjoni finanzjarja fir-rigward tal-istat ta' solvenza ta' impriża, l-istabbiliment ta' dispożizzjonijiet tekniċi tagħha, l-assi u l-fondi proprji eliġibbli tagħha. Madankollu, is-sistema ta' governanza ta' impriża hija wkoll fattur importanti fl-iżgurar li l-impriża żżomm is-solidità finanzjarja tagħha. Għal dak l-għan, jenħtieġ li l-awtoritajiet superviżorji jkunu meħtieġa jwettqu rieżamijiet regolari tas-sistema ta' governanza bħala parti mis-superviżjoni finanzjarja tal-impriżi tal-assigurazzjoni u tar-riassigurazzjoni.

(21)

Jenħtieġ li l-awtoritajiet superviżorji jkunu intitolati jirċievu minn kull impriża tal-assigurazzjoni u tar-riassigurazzjoni taħt superviżjoni u mill-gruppi tagħhom, mill-inqas kull tliet snin, rapport narrattiv regolari b'informazzjoni dwar in-negozju u l-prestazzjoni, is-sistema ta' governanza, il-profil tar-riskju, il-ġestjoni tal-kapital u informazzjoni rilevanti oħra għal finijiet ta' solvenza. Sabiex jiġi ssimplifikat dak l-obbligu ta' rappurtar għall-gruppi tal-assigurazzjoni u tar-riassigurazzjoni, jenħtieġ li jkun possibbli, soġġett għal ċerti kundizzjonijiet, li l-informazzjoni tar-rapport superviżorju regolari relatata mal-grupp u mas-sussidjarji tiegħu tiġi ppreżentata b'mod aggregat għall-grupp kollu.

(22)

Jenħtieġ li jiġi żgurat li l-impriżi żgħar u mhux kumplessi jingħataw prijorità meta s-superviżuri jagħtu eżenzjonijiet u limitazzjonijiet għar-rappurtar. Għal dak it-tip ta' entità, jenħtieġ li l-proċess ta' notifika li japplika għall-klassifikazzjoni bħala impriża żgħira u mhux kumplessa jiżgura li jkun hemm biżżejjed ċertezza fir-rigward tal-użu ta' eżenzjonijiet u limitazzjonijiet għar-rappurtar.

(23)

Jenħtieġ li l-iskadenzi għar-rappurtar u għall-iżvelar jiġu stabbiliti b'mod ċar fid-Direttiva 2009/138/KE. Madankollu, jenħtieġ li jiġi rikonoxxut li ċirkostanzi eċċezzjonali, jiġifieri emerġenzi tas-saħħa, katastrofijiet naturali u avvenimenti estremi oħra, jistgħu jagħmluha impossibbli għall-impriżi tal-assigurazzjoni u tar-riassigurazzjoni li jissottomettu tali rapporti u żvelar, sal-iskadenzi stabbiliti. Għalhekk, jenħtieġ li l-Kummissjoni jkollha s-setgħa testendi l-iskadenzi f'tali ċirkostanzi wara li tkun ikkonsultat lill-Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol) (EIOPA), stabbilita bir-Regolament (UE) Nru 1094/2010 tal-Parlament Ewropew u tal-Kunsill (8).

(24)

Id-Direttiva 2009/138/KE tipprevedi li l-awtoritajiet superviżorji għandhom jivvalutaw jekk kwalunkwe persuna ġdida maħtura biex timmaniġġa impriża tal-assigurazzjoni jew tar-riassigurazzjoni jew biex twettaq funzjoni ewlenija tkunx kompetenti u idonea. Madankollu, jenħtieġ li dawk li jimmaniġġaw l-impriża jew li jwettqu funzjoni ewlenija jkunu kompetenti u idonei fuq bażi kontinwa. F'każ ta' nuqqas ta' konformità mar-rekwiżiti ta' kompetenza u idoneità, jenħtieġ li l-awtoritajiet superviżorji jkollhom is-setgħa li jieħdu miżuri, bħal, fejn xieraq, it-tneħħija tal-persuna kkonċernata mill-pożizzjoni rilevanti.

(25)

Peress li l-attivitajiet tal-assigurazzjoni jistgħu jikkawżaw jew jamplifikaw ir-riskji għall-istabbiltà finanzjarja, jenħtieġ li l-impriżi tal-assigurazzjoni u tar-riassigurazzjoni jinkorporaw kunsiderazzjonijiet u analiżi makroprudenzjali fl-attivitajiet tagħhom ta' sottoskrizzjoni, investiment, u ġestjoni tar-riskju. Dan jista' jinkludi li titqies l-imġiba potenzjali ta' parteċipanti oħra fis-suq, riskji makroekonomiċi, bħal tnaqqis fiċ-ċiklu tal-kreditu jew likwidità mnaqqsa fis-suq, jew konċentrazzjonijiet eċċessivi fil-livell tas-suq f'ċerti tipi ta' assi, kontropartijiet jew setturi.

(26)

Meta jintalbu mill-awtorità superviżorja, jenħtieġ li l-impriżi tal-assigurazzjoni u tar-riassigurazzjoni jkunu meħtieġa jieħdu kont ta' kwalunkwe informazzjoni makroprudenzjali rilevanti pprovduta mill-awtoritajiet superviżorji fil-valutazzjoni tagħhom tar-riskju proprju u tas-solvenza. Sabiex tiżgura l-applikazzjoni konsistenti ta' tali rekwiżiti makroprudenzjali addizzjonali, jenħtieġ li l-EIOPA tiżviluppa abbozzi ta' standards tekniċi regolatorji li jispeċifikaw il-kriterji li għandhom jitqiesu mill-awtoritajiet superviżorji meta jkunu qed jidentifikaw l-impriżi li għalihom tapplika l-miżura. Jenħtieġ li l-awtoritajiet superviżorji janalizzaw ir-riżultati tal-valutazzjoni tar-riskju proprju u tas-solvenza tal-impriżi tal-assigurazzjoni u tar-riassigurazzjoni li jintalbu jqisu konsiderazzjonijiet makroprudenzjali fil-ġuriżdizzjonijiet tagħhom, jaggregawhom u jipprovdu kontribut lill-impriżi tal-assigurazzjoni u tar-riassigurazzjoni dwar l-elementi li jenħtieġ li jitqiesu fil-valutazzjonijiet futuri tagħhom tar-riskju proprju u tas-solvenza, b’mod partikolari fir-rigward tar-riskji makroprudenzjali. Jenħtieġ li l-Istati Membri jiżguraw li, meta jafdaw awtorità jew korp b'mandat makroprudenzjali, l-eżitu u s-sejbiet tal-valutazzjonijiet makroprudenzjali mill-awtoritajiet superviżorji jiġu kondiviżi ma' dik l-awtorità makroprudenzjali.

(27)

F'konformità mal-Prinċipji Fundamentali tal-Assigurazzjoni adottati fl-2011 mill-Assoċjazzjoni Internazzjonali tas-Superviżuri tal-Assigurazzjoni, jenħtieġ li l-awtoritajiet superviżorji nazzjonali jkunu jistgħu jidentifikaw, jimmonitorjaw u janalizzaw l-iżviluppi tas-suq u finanzjarji li jistgħu jaffettwaw lill-impriżi tal-assigurazzjoni u tar-riassigurazzjoni jew lis-swieq tal-assigurazzjoni u tar-riassigurazzjoni, u jenħtieġ li jużaw dik l-informazzjoni fis-superviżjoni ta' impriżi individwali tal-assigurazzjoni jew tar-riassigurazzjoni. Meta jwettqu dawk il-kompiti, jenħtieġ li, fejn xieraq, l-awtoritajiet superviżorji jużaw informazzjoni minn awtoritajiet superviżorji oħra u għarfien miksub minnhom.

(28)

Korpi jew awtoritajiet b'mandat makroprudenzjali huma responsabbli għall-politika makroprudenzjali għas-suq nazzjonali tagħhom tal-assigurazzjoni u tar-riassigurazzjoni. Il-politika makroprudenzjali tista' tiġi segwita mill-awtorità superviżorja jew minn awtorità jew korp ieħor fdat b'dak l-għan.

(29)

Koordinazzjoni tajba bejn l-awtoritajiet superviżorji u l-korpi u l-awtoritajiet rilevanti b'mandat makroprudenzjali hija importanti għall-identifikazzjoni, il-monitoraġġ u l-analiżi tar-riskji possibbli għall-istabbiltà tas-sistema finanzjarja li jistgħu jaffettwaw lill-impriżi tal-assigurazzjoni u tar-riassigurazzjoni, u għat-teħid ta' miżuri biex dawk ir-riskji jiġu indirizzati b'mod effettiv u xieraq. Jenħtieġ li l-kooperazzjoni bejn l-awtoritajiet ikollha wkoll l-għan li tevita kwalunkwe forma ta' azzjoni duplikata jew inkonsistenti.

(30)

Jenħtieġ li ma jiġix prevenut l-iskambju ta' informazzjoni bejn l-awtoritajiet superviżorji u l-awtoritajiet tat-taxxa. Jenħtieġ li dawn l-iskambji jkunu f'konformità mal-liġi nazzjonali u, meta l-informazzjoni toriġina fi Stat Membru ieħor, jenħtieġ li tiġi skambjata biss bil-ftehim espliċitu tal-awtorità rilevanti li minnha toriġina l-informazzjoni.

(31)

Id-Direttiva 2009/138/KE teħtieġ li l-impriżi tal-assigurazzjoni u tar-riassigurazzjoni jkollhom valutazzjoni perjodika tar-riskju proprju u tas-solvenza bħala parti integrata mill-istrateġija kummerċjali tagħhom. Xi riskji, bħar-riskji tat-tibdil fil-klima, ma jistgħux jiġu kkwantifikati faċilment jew inkella jimmaterjalizzaw fuq perjodu li jkun itwal minn dak użat għall-kalibrar tar-Rekwiżit Kapitali tas-Solvenza. Dawn ir-riskji jistgħu jitqiesu aħjar fil-valutazzjoni tar-riskju proprju u tas-solvenza. Meta l-impriżi tal-assigurazzjoni u tar-riassigurazzjoni jkollhom skopertura materjali għar-riskji tat-tibdil fil-klima, jenħtieġ li jkunu meħtieġa jwettqu, f'intervalli xierqa u bħala parti mill-valutazzjoni tar-riskju proprju u tas-solvenza, analiżijiet tal-impatt ta' xenarji fit-tul tar-riskju tat-tibdil fil-klima fuq in-negozju tagħhom. Jenħtieġ li dawn l-analiżijiet ikunu proporzjonati man-natura, l-iskala u l-kumplessità tar-riskji inerenti fin-negozju tal-impriżi. B'mod partikolari, filwaqt li jenħtieġ li l-valutazzjoni tal-materjalità tal-iskopertura għar-riskji tat-tibdil fil-klima tkun meħtieġa mill-impriżi kollha tal-assigurazzjoni u tar-riassigurazzjoni, jenħtieġ li ma jkunux meħtieġa analiżijiet tax-xenarju fit-tul tat-tibdil fil-klima għal impriżi żgħar u mhux kumplessi.

(32)

Jenħtieġ li l-impriżi jiżviluppaw u jimmonitorjaw l-implimentazzjoni ta' pjanijiet speċifiċi biex jindirizzaw ir-riskji finanzjarji li jirriżultaw minn fatturi ta' sostenibbiltà. Meta grupp ikun meħtieġ ifassal pjan bħal dan fil-livell tal-grupp, jenħtieġ li jiġi żgurat li r-rekwiżit li jitfasslu pjanijiet fil-livell individwali jiġi rinunzjat għas-sussidjarji tal-assigurazzjoni u tar-riassigurazzjoni tal-grupp jekk l-aspetti rilevanti kollha ta' dawk is-sussidjarji jkunu riflessi fil-pjan fil-livell tal-grupp.

(33)

Id-Direttiva 2009/138/KE tirrikjedi l-iżvelar, mill-inqas kull sena, ta' informazzjoni essenzjali permezz tar-rapport dwar is-solvenza u l-kundizzjoni finanzjarja. Dak ir-rapport huwa mmirat lejn id-detenturi ta' poloz u l-benefiċjarji minn naħa waħda, u l-analisti u professjonisti oħra tas-suq min-naħa l-oħra. Sabiex jiġu indirizzati l-ħtiġijiet u l-aspettattivi ta' dawk iż-żewġ gruppi differenti, jenħtieġ li l-kontenut tar-rapport jinqasam f'żewġ partijiet. L-ewwel parti, indirizzata prinċipalment lid-detenturi ta' poloz u lill-benefiċjarji, jenħtieġ li jkun fiha l-informazzjoni ewlenija dwar in-negozju, il-prestazzjoni, il-ġestjoni tal-kapital u l-profil tar-riskju. It-tieni parti, indirizzata lill-professjonisti tas-suq, jenħtieġ li jkun fiha informazzjoni dettaljata dwar in-negozju u dwar is-sistema ta' governanza, informazzjoni speċifika dwar id-dispożizzjonijiet tekniċi u obbligazzjonijiet oħra, il-pożizzjoni ta' solvenza kif ukoll data oħra rilevanti għal analisti speċjalizzati.

(34)

Huwa possibbli li l-impriżi tal-assigurazzjoni u tar-riassigurazzjoni jaġġustaw l-istruttura ta' terminu tar-rata tal-imgħax mingħajr riskju rilevanti għall-kalkolu tal-aħjar stima f'konformità mal-movimenti tal-firxa tal-assi tagħhom wara l-approvazzjoni superviżorja (“aġġustament ta' korrispondenza”) jew f'konformità mal-moviment medju tal-firxa tal-assi miżmuma mill-impriżi tal-assigurazzjoni u tar-riassigurazzjoni f'munita jew f'pajjiż partikolari (“aġġustament tal-volatilità”). Jenħtieġ li l-parti tar-rapport dwar is-solvenza u l-kundizzjoni finanzjarja mmirata lejn id-detenturi ta' poloz u l-benefiċjarji jkun fiha biss l-informazzjoni li hija mistennija tkun rilevanti għat-teħid ta' deċiżjonijiet ta' detentur ta' polza jew benefiċjarju medju. Filwaqt li jenħtieġ li l-impriżi tal-assigurazzjoni u tar-riassigurazzjoni jiżvelaw pubblikament l-impatt li ma jiġux applikati l-aġġustament ta' korrispondenza, l-aġġustament tal-volatilità u l-miżuri tranżizzjonali fuq ir-rati tal-imgħax mingħajr riskju u fuq id-dispożizzjonijiet tekniċi fuq il-pożizzjonijiet finanzjarji tagħhom, jenħtieġ li tali żvelar ma jitqiesx rilevanti għat-teħid ta' deċiżjonijiet ta' detentur ta' polza jew benefiċjarju medju. Għalhekk, jenħtieġ li dan l-iżvelar jiġi inkluż fil-parti tar-rapport dwar is-solvenza u l-kundizzjoni finanzjarja mmirata lejn il-professjonisti tas-suq u mhux fil-parti mmirata lejn id-detenturi ta' poloz u l-benefiċjarji.

(35)

Jenħtieġ li r-rekwiżiti ta' żvelar ma jkunux ta' piż eċċessiv għall-impriżi tal-assigurazzjoni u tar-riassigurazzjoni. Għal dan il-għan, jenħtieġ li xi miżuri ta' simplifikazzjoni u proporzjonalità jiġu inklużi fid-Direttiva 2009/138/KE, b'mod partikolari meta ma jipperikolawx il-leġibbiltà tad-data pprovduta mill-impriżi tal-assigurazzjoni u tar-riassigurazzjoni. Barra minn hekk, jenħtieġ li d-Direttiva 2013/34/UE tal-Parlament Ewropew u tal-Kunsill (9) tiġi emendata sabiex ikun possibbli li l-impriżi żgħar u mhux kumplessi jillimitaw ir-rappurtar tagħhom dwar is-sostenibbiltà skont l-istandards simplifikati tar-rappurtar dwar is-sostenibbiltà tal-SMEs stabbiliti f'dik id-Direttiva.

(36)

Sabiex jiġi ggarantit l-ogħla grad ta' akkuratezza tal-informazzjoni żvelata lill-pubbliku, jenħtieġ li xi elementi mir-rapport dwar is-solvenza u l-kundizzjoni finanzjarja jkunu soġġetti għal verifika. Jenħtieġ li tali rekwiżit ta' verifika jkopri mill-inqas il-karta tal-bilanċ ivvalutata f'konformità mal-kriterji ta' valwazzjoni stipulati fid-Direttiva 2009/138/KE.

(37)

Peress li l-impriżi żgħar u mhux kumplessi mhumiex mistennija jkunu rilevanti għall-istabbiltà finanzjarja tal-Unjoni, huwa xieraq li għal dawk l-impriżi tiġi inkluża eżenzjoni mir-rekwiżit ta' verifika tar-rapport dwar is-solvenza u l-kundizzjoni finanzjarja. Bl-istess mod, minħabba l-profil tar-riskju partikolari u l-ispeċifiċità tal-impriżi tal-assigurazzjoni captive u l-impriżi tar-riassigurazzjoni captive, huwa xieraq li r-rekwiżit ta' verifika ma jiġix impost fuqhom. Madankollu, jenħtieġ li jkun possibbli li l-Istati Membri li diġà japplikaw rekwiżiti ta' verifika għall-impriżi kollha jew għal elementi tar-rapport dwar is-solvenza u l-kundizzjoni finanzjarja minbarra l-karta tal-bilanċ, ikomplu japplikaw dawn ir-rekwiżiti.

(38)

Jenħtieġ li jiġi rrikonoxxut li, għalkemm huwa ta' benefiċċju, ir-rekwiżit ta' verifika jkun piż addizzjonali għal kull impriża. Għalhekk, jenħtieġ li l-iskadenzi annwali għar-rappurtar u għall-iżvelar għall-impriżi tal-assigurazzjoni u tar-riassigurazzjoni u għall-gruppi tal-assigurazzjoni u tar-riassigurazzjoni jiġu estiżi sabiex dawn jingħataw biżżejjed żmien biex jipproduċu rapporti vverifikati.

(39)

Il-Linji Gwida tal-EIOPA dwar ir-rappurtar għal finijiet ta' stabbiltà finanzjarja diġà jistabbilixxu kriterji biex jiġu identifikati l-impriżi tal-assigurazzjoni u tar-riassigurazzjoni li huma rilevanti għall-istabbiltà tas-sistemi finanzjarji fl-Unjoni.

(40)

Jenħtieġ li jiġi żgurat li l-metodi għall-kalkolu tad-dispożizzjonijiet tekniċi ta' kuntratti b'opzjonijiet u garanziji jkunu proporzjonati għan-natura, l-iskala u l-kumplessità tar-riskji ffaċċjati mill-assiguratur. F'dak ir-rigward, jenħtieġ li jiġu pprovduti xi simplifikazzjonijiet.

(41)

Jenħtieġ li l-kost tal-kapital jitnaqqas meta mqabbel mal-livell stabbilit fi żmien l-adozzjoni tad-Direttiva 2009/138/KE u l-atti delegati adottati skont dik id-Direttiva, filwaqt li jinżamm livell suffiċjenti ta' prudenza u protezzjoni tad-detenturi ta' poloz. Barra minn hekk, jenħtieġ li l-kalkolu tal-marġni ta' riskju jqis id-dipendenza tar-riskji fuq iż-żmien u jnaqqas l-ammont tal-marġni ta' riskju, b'mod partikolari għall-obbligazzjonijiet fit-tul, u b'hekk titnaqqas is-sensittività tal-marġni ta' riskju għall-bidliet fir-rati tal-imgħax. Għalhekk, jenħtieġ li jiġi introdott element esponenzjali u dipendenti fuq iż-żmien.

(42)

Id-Direttiva 2009/138/KE tirrikjedi li jiġi ddeterminat l-ammont ta' fondi proprji eliġibbli meħtieġa biex jiġu appoġġati l-obbligi tal-assigurazzjoni u tar-riassigurazzjoni sabiex ikun jista' jiġi kkalkolat il-marġni ta' riskju u li r-rata tal-Kost tal-Kapital tkun daqs ir-rata addizzjonali, ogħla mir-rata rilevanti tal-imgħax mingħajr riskju, li impriża tal-assigurazzjoni jew tar-riassigurazzjoni ġġarrab meta jkollha dak l-ammont ta' fondi proprji eliġibbli. Id-Direttiva 2009/138/KE tirrikjedi wkoll li r-rata tal-Kost tal-Kapital tiġi rieżaminata perjodikament. Għal dak il-fini, jenħtieġ li r-rieżamijiet jiżguraw li r-rata tal-Kost tal-Kapital tibqa' bbażata fuq ir-riskju u ma taqbiżx 5 %.

(43)

Jenħtieġ li d-determinazzjoni tal-istruttura ta' terminu tar-rata tal-imgħax mingħajr riskju rilevanti tibbilanċja l-użu ta' informazzjoni derivata minn strumenti finanzjarji rilevanti mal-kapaċità tal-impriżi tal-assigurazzjoni u tar-riassigurazzjoni li jiħħeġġjaw ir-rati tal-imgħax derivati minn strumenti finanzjarji. B'mod partikolari, jista' jseħħ li impriżi iżgħar tal-assigurazzjoni u tar-riassigurazzjoni ma jkollhomx il-kapaċitajiet li jiħħeġġjaw ir-riskju tar-rata tal-imgħax ma' strumenti għajr bonds, self jew assi simili bi flussi ta' flus fissi. Għalhekk, jenħtieġ li l-istruttura ta' terminu tar-rata tal-imgħax mingħajr riskju rilevanti tiġi estrapolata għall-maturitajiet meta s-swieq għall-bonds ma jibqgħux profondi, likwidi u trasparenti. Madankollu, jenħtieġ li l-metodu għall-estrapolazzjoni jagħmel użu minn informazzjoni derivata minn strumenti finanzjarji rilevanti għajr bonds, meta tali informazzjoni tkun disponibbli minn swieq profondi, likwidi u trasparenti għall-maturitajiet meta s-swieq tal-bonds ma jibqgħux profondi, likwidi u trasparenti. Sabiex jiġu żgurati ċ-ċertezza u l-applikazzjoni armonizzata filwaqt li tkun tista' tinkiseb ukoll reazzjoni f'waqtha għall-bidliet fil-kundizzjonijiet tas-suq, jenħtieġ li l-Kummissjoni tadotta atti delegati sabiex tispeċifika kif jenħtieġ li japplika l-metodu ta' estrapolazzjoni l-ġdid. Fid-dawl tal-kundizzjonijiet attwali tas-suq, jenħtieġ li l-punt tat-tluq għall-estrapolazzjoni għall-euro fid-data tad-dħul fis-seħħ ta' din id-Direttiva emendatorja jibqa' fl-istess livell bħal-livell tagħha fil-31 ta' Diċembru 2023, jiġifieri b'maturità ta' 20 sena.

(44)

Id-determinazzjoni tal-istruttura ta' terminu tar-rata tal-imgħax mingħajr riskju rilevanti għandha impatt sinifikanti fuq il-pożizzjoni ta' solvenza, b'mod partikolari għall-impriżi tal-assigurazzjoni tal-ħajja b'obbligazzjonijiet fit-tul. Sabiex jiġi evitat tfixkil għan-negozju tal-assigurazzjoni eżistenti u sabiex tkun tista' ssir tranżizzjoni bla xkiel għall-metodu l-ġdid ta' estrapolazzjoni, huwa neċessarju li jiġi previst mekkaniżmu ta' introduzzjoni gradwali. Jenħtieġ li dan il-mekkaniżmu ta' introduzzjoni gradwali jkollu l-għan li jevita t-tfixkil fis-suq u jipprovdi perkors trasparenti għall-metodu ta' estrapolazzjoni finali.

(45)

Id-Direttiva 2009/138/KE tipprevedi aġġustament tal-volatilità, li jfittex li jtaffi l-effett ta' eżaġerazzjonijiet tal-firxiet tal-bonds u huwa bbażat fuq portafolli ta' referenza għall-muniti rilevanti tal-impriżi tal-assigurazzjoni u tar-riassigurazzjoni u, fil-każ tal-euro, fuq portafolli ta' referenza għas-swieq nazzjonali tal-assigurazzjoni. L-użu ta' aġġustament uniformi tal-volatilità għal muniti jew għal pajjiżi sħaħ jista' jwassal għal benefiċċji li jaqbżu l-mitigazzjoni ta' firxiet eżaġerati tal-bonds, b'mod partikolari meta s-sensittività tal-assi rilevanti ta' dawk l-impriżi tal-assigurazzjoni u tar-riassigurazzjoni għall-bidliet fil-firxiet tal-kreditu tkun aktar baxxa mis-sensittività tal-aħjar stima rilevanti għall-bidliet fir-rati tal-imgħax. Sabiex jiġu evitati tali benefiċċji eċċessivi mill-aġġustament tal-volatilità, jenħtieġ li l-aġġustament tal-volatilità jkun soġġett għal approvazzjoni superviżorja u jenħtieġ li l-kalkolu tiegħu jqis il-karatteristiċi speċifiċi għall-impriża relatati mas-sensittività tal-firxa tal-assi u s-sensittività tar-rata tal-imgħax tal-aħjar stima tad-dispożizzjonijiet tekniċi. Barra minn hekk, jenħtieġ li bħala salvagwardja addizzjonali jiġu introdotti kundizzjonijiet minimi għall-użu tal-aġġustament tal-volatilità. L-Istati Membri, li xi wħud minnhom diġà jagħmlu l-użu tal-aġġustament tal-volatilità soġġett għal proċess ta' approvazzjoni superviżorja, jenħtieġ li jkollhom l-għażla li jestendu l-kundizzjonijiet għall-approvazzjoni biex jinkludu valutazzjoni bi tqabbil mas-suppożizzjonijiet sottostanti tal-aġġustament tal-volatilità. Fid-dawl tas-salvagwardji addizzjonali, jenħtieġ li l-impriżi tal-assigurazzjoni u tar-riassigurazzjoni jitħallew jiżdiedu sa proporzjon akbar ta' 85 % tal-firxa b'riskju kkoreġut derivata mill-portafolli rappreżentattivi għall-istruttura ta' terminu tar-rata tal-imgħax mingħajr riskju bażika.

(46)

Meta impriża tal-assigurazzjoni jew tar-riassigurazzjoni tinvesti fi strumenti ta' dejn li jkollhom kwalità ta' kreditu aħjar mill-istrumenti ta' dejn li jkunu jinsabu fil-portafoll rappreżentattiv għall-kalkolu tal-aġġustament tal-volatilità, l-aġġustament tal-volatilità jista' jikkumpensa żżejjed it-telf ta' fondi proprji kkawżat minn firxiet usa' tal-bonds u jista' jwassal għal volatilità mhux dovuta fil-fondi proprji. Bl-għan li tiġi kkumpensata l-volatilità artifiċjali kkawżata minn tali kumpens żejjed, jenħtieġ li, f'dawn il-każijiet, l-impriżi tal-assigurazzjoni u tar-riassigurazzjoni jkunu jistgħu japplikaw għal modifika tal-aġġustament tal-volatilità li tqis l-informazzjoni dwar l-investimenti speċifiċi tal-impriża fi strumenti ta' dejn.

(47)

Id-Direttiva 2009/138/KE tipprevedi komponent tal-pajjiż fl-aġġustament tal-volatilità li għandu l-għan li jiżgura li jittaffew l-eżaġerazzjonijiet tal-firxiet tal-bonds f'pajjiż speċifiku. Madankollu, l-attivazzjoni tal-komponent tal-pajjiż hija bbażata fuq limitu assolut u fuq limitu relattiv fir-rigward tal-firxa b'riskju aġġustat riskju tal-pajjiż, li tista' twassal għal effetti ta' preċipizju u għalhekk iżżid il-volatilità tal-fondi proprji tal-impriżi tal-assigurazzjoni u tar-riassigurazzjoni. Sabiex jiġi żgurat li l-eżaġerazzjonijiet tal-firxiet tal-bonds fi Stat Membru speċifiku li l-munita tiegħu hija l-euro tiġi mmitigata b'mod effettiv, jenħtieġ li l-komponent tal-pajjiż jiġi sostitwit b'makrokomponent li għandu jiġi kkalkolat abbażi tad-differenzi bejn il-firxa b'riskju kkoreġut għall-euro u l-firxa b'riskju kkoreġut għall-pajjiż. Sabiex jiġu evitati l-effetti ta' preċipizju, jenħtieġ li l-kalkolu jevita diskontinwitajiet fir-rigward tal-parametri tal-input.

(48)

Sabiex jitqiesu l-iżviluppi fil-prattiki ta' investiment tal-impriżi tal-assigurazzjoni u tar-riassigurazzjoni, jenħtieġ li l-Kummissjoni tingħata s-setgħa tadotta atti delegati biex tistipula kriterji għall-eliġibbiltà tal-assi li għandhom jiġu inklużi fil-portafoll assenjat ta' assi fejn in-natura tal-assi tkun tista' twassal għal prattiki diverġenti fir-rigward tal-kriterji għall-applikazzjoni u l-kalkolu tal-aġġustament ta' korrispondenza.

(49)

Sabiex jiġi żgurat li jiġi applikat l-istess trattament għall-impriżi kollha tal-assigurazzjoni u tar-riassigurazzjoni li jikkalkolaw l-aġġustament tal-volatilità, jew biex jitqiesu l-iżviluppi tas-suq, jenħtieġ li l-Kummissjoni tingħata s-setgħa tadotta atti delegati li jispeċifikaw il-kalkolu ta' elementi tal-aġġustament tal-volatilità speċifiċi għall-impriża. Għal valuti li mhumiex l-euro, il-kalkolu tal-elementi speċifiċi għall-munita tal-aġġustament tal-volatilità jenħtieġ li jqis il-possibbiltà ta' tqabbil tal-flussi ta' flus bejn il-pari ta' valuti marbuta tal-Istati Membri, bil-kundizzjoni li dan inaqqas b'mod konsistenti r-riskju tal-kambju.

(50)

Għall-fini tal-kalkolu tal-fondi proprji tagħhom skont ir-Regolament (UE) Nru 575/2013 tal-Parlament Ewropew u tal-Kunsill (10), l-istituzzjonijiet li jappartjenu għal konglomerati finanzjarji li huma soġġetti għad-Direttiva 2002/87/KE tal-Parlament Ewropew u tal-Kunsill (11) jistgħu jitħallew ma jnaqqsux l-investimenti sinifikanti tagħhom f'impriżi tal-assigurazzjoni jew tar-riassigurazzjoni, dment li jiġu ssodisfati ċerti kriterji. Hemm bżonn li jiġi żgurat li r-regoli prudenzjali applikabbli għall-impriżi tal-assigurazzjoni jew tar-riassigurazzjoni u għall-istituzzjonijiet ta' kreditu jippermettu kundizzjonijiet ekwi xierqa bejn il-gruppi finanzjarji mmexxija mill-banek u dawk immexxija mill-assigurazzjoni. Għalhekk, jenħtieġ li l-impriżi tal-assigurazzjoni jew tar-riassigurazzjoni jitħallew ukoll ma jnaqqsux mill-parteċipazzjonijiet ta' fondi proprji eliġibbli tagħhom f'istituzzjonijiet ta' kreditu u finanzjarji, soġġett għal kundizzjonijiet simili. B'mod partikolari, jenħtieġ li għal grupp li jinkludi kemm l-impriża tal-assigurazzjoni jew tar-riassigurazzjoni kif ukoll l-istituzzjoni relatata tapplika jew superviżjoni tal-grupp f'konformità mad-Direttiva 2009/138/KE jew superviżjoni supplimentari f'konformità mad-Direttiva 2002/87/KE. Barra minn hekk, jenħtieġ li l-parteċipazzjoni fl-istituzzjoni tkun investiment fl-ekwità ta' natura strateġika għall-impriża tal-assigurazzjoni jew tar-riassigurazzjoni u jenħtieġ li l-awtoritajiet superviżorji jkunu sodisfatti fir-rigward tal-livell ta' ġestjoni integrata, ta' ġestjoni tar-riskju u ta' kontrolli interni fir-rigward tal-entitajiet fil-kamp ta' applikazzjoni tas-superviżjoni tal-grupp jew tas-superviżjoni supplimentari.

(51)

Il-limiti eżistenti imposti fuq il-livell tal-aġġustament simetriku jirrestrinġu l-kapaċità ta' dak l-aġġustament biex itaffi l-effetti proċikliċi potenzjali tas-sistema finanzjarja u biex jevita sitwazzjoni fejn l-impriżi tal-assigurazzjoni u tar-riassigurazzjoni jkunu mġiegħla bla bżonn jiġġeneraw kapital addizzjonali jew ibigħu l-investimenti tagħhom minħabba movimenti avversi mhux sostnuti fis-swieq finanzjarji, bħal dawk ikkawżati mill-pandemija tal-COVID-19. Għalhekk, jenħtieġ li l-aġġustament simetriku jiġi emendat sabiex jippermetti bidliet akbar fl-imposta standard ta' kapital ta' ekwità u jkompli jtaffi l-impatt ta' żidiet jew tnaqqis qawwi fis-swieq tal-istokks.

(52)

Biex tittejjeb il-proporzjonalità fir-rekwiżiti kwantitattivi, jenħtieġ li l-impriżi tal-assigurazzjoni u tar-riassigurazzjoni jingħataw il-possibbiltà li jikkalkolaw ir-rekwiżit kapitali għal riskji immaterjali fil-formula standard b'approċċ simplifikat għal perjodu ta' mhux aktar minn tliet snin. Jenħtieġ li tali approċċ simplifikat jippermetti lill-impriżi jistmaw ir-rekwiżit kapitali għal riskju immaterjali abbażi ta' daqs xieraq tal-volum li jvarja maż-żmien. Jenħtieġ li dak l-approċċ ikun ibbażat fuq regoli komuni u jkun soġġett għal kriterji komuni għall-identifikazzjoni ta' riskji immaterjali.

(53)

L-impriżi tal-assigurazzjoni u tar-riassigurazzjoni li jużaw l-aġġustament ta' korrispondenza jridu jidentifikaw, jorganizzaw u jiġġestixxu l-portafoll assenjat ta' assi u ta' obbligi b'mod separat mill-partijiet l-oħra tan-negozju, u għalhekk ma jitħallewx jindirizzaw riskji li jitfaċċaw xi mkien ieħor fin-negozju billi jużaw il-portafoll assenjat ta' assi. Madankollu, il-ġestjoni separata tal-portafoll ma tirriżultax f'żieda fil-korrelazzjoni bejn ir-riskji f'dak il-portafoll u dawk fil-bqija tal-impriża. Għalhekk, jenħtieġ li l-impriżi tal-assigurazzjoni u tar-riassigurazzjoni li jużaw l-aġġustament ta' korrispondenza jitħallew jikkalkolaw ir-Rekwiżit Kapitali tas-Solvenza tagħhom abbażi tas-suppożizzjoni ta' diversifikazzjoni sħiħa bejn l-assi u l-obbligazzjonijiet tal-portafoll u l-bqija tal-impriża, sakemm il-portafolli tal-assi li jkopru l-aħjar stima korrispondenti tal-obbligi tal-assigurazzjoni jew tar-riassigurazzjoni ma jiffurmawx fond delimitat.

(54)

Il-ħtieġa li jiġu riflessi kif xieraq ir-rati tal-imgħax estremament baxxi u negattivi fis-superviżjoni tal-assigurazzjoni rriżultat minħabba dak li kien ġie osservat fis-swieq f'dawn l-aħħar snin. Jenħtieġ li dan jinkiseb permezz ta' rikalibrazzjoni tas-submodulu tar-riskju tar-rata tal-imgħax biex tiġi riflessa l-eżistenza ta' ambjent b'rendiment negattiv. Fl-istess ħin, jenħtieġ li l-metodoloġija li għandha tintuża ma tirriżultax fi tnaqqis kbir mhux realistiku fil-parti likwida tal-kurva u dan jista' jiġi evitat billi jiġi previst limitu minimu espliċitu li jirrappreżenta limitu aktar baxx ta' rati tal-imgħax negattivi. F'konformità mad-dinamika tar-rati tal-imgħax, jenħtieġ li l-Kummissjoni jkollha l-għan li tintroduċi limitu minimu li jkun dipendenti mit-terminu aktar milli ċatt, sal-punt li d-data tas-suq disponibbli tippermetti kalibrazzjoni robusta bbażata fuq ir-riskju ta' din id-dipendenza mit-terminu.

(55)

Il-Kummissjoni rraggruppat is-setgħat kollha previsti fid-Direttiva 2009/138/KE fir-Regolament Delegat tal-Kummissjoni (UE) 2015/35 (12). Dak l-approċċ ħadem sew għall-implimentazzjoni ta' dik id-Direttiva u għamilha aktar faċli biex tiġi żgurata l-konformità ma' dak ir-Regolament Delegat. Għalhekk, jenħtieġ li r-Regolament Delegat (UE) 2015/35 jibqa’ fis-seħħ u jenħtieġ li l-emendi kollha meħtieġa skont is-setgħat eżistenti kif ukoll l-implimentazzjoni ta' setgħat ġodda skont din id-Direttiva jiġu effettwati esklużivament bħala atti emendatorji għar-Regolament Delegat (UE) 2015/35. Meta dawn l-emendi jkunu ser jiġu raggruppati f'att delegat emendatorju wieħed jew aktar fil-futur, il-Kummissjoni, f'konformità mal-paragrafu 31 tal-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (13), matul il-konsultazzjonijiet fit-tħejjija ta' tali atti delegati, tindika wkoll liema setgħat jitqiesu li huma marbuta b'mod sostantiv, li għalihom il-Kummissjoni mistennija tipprovdi ġustifikazzjonijiet oġġettivi bbażati fuq ir-rabta sostantiva bejn żewġ setgħat jew aktar.

(56)

Bħala parti mill-proċess ta' rieżami superviżorju, huwa importanti li l-awtoritajiet superviżorji jkunu jistgħu jqabblu l-informazzjoni bejn l-impriżi tal-assigurazzjoni u tar-riassigurazzjoni li jissorveljaw. Il-mudelli interni parzjali u sħaħ jippermettu l-ġbir aħjar tar-riskju individwali ta' impriża u d-Direttiva 2009/138/KE tippermetti lill-impriżi tal-assigurazzjoni u tar-riassigurazzjoni jużawhom biex jiddeterminaw ir-rekwiżiti kapitali mingħajr limitazzjonijiet li jirriżultaw mill-formula standard. L-awtoritajiet superviżorji jibbenefikaw minn aċċess ukoll għal stimi tar-Rekwiżit Kapitali tas-Solvenza ddeterminati f’konformità mal-formula standard sabiex iqabblu l-impriżi ma' xulxin u jqabblu impriża partikolari tul iż-żmien. Għalhekk, jenħtieġ li l-impriżi kollha tal-assigurazzjoni u tar-riassigurazzjoni li jużaw mudell intern sħiħ jew parzjali jirrappurtaw regolarment lill-awtoritajiet superviżorji tagħhom stima tar-Rekwiżit Kapitali tas-Solvenza ddeterminata f'konformità mal-formula standard. Jenħtieġ li din l-istima tirrifletti kif xieraq il-metodi u s-suppożizzjonijiet sottostanti tal-formula standard li tiffaċilita valutazzjoni superviżorja xierqa. Sabiex jiġi evitat piż eċċessiv għall-impriżi meta jiddeterminaw l-istima, jenħtieġ li dawn jitħallew jagħmlu użu mill-informazzjoni dderivata mis-simplifikazzjonijiet rilevanti fil-formula standard stabbilita fid-Direttiva 2009/138/KE u fl-atti delegati adottati skont dik id-Direttiva. Meta jintuża approċċ simplifikat bħal dan biex tiġi ddeterminata l-istima tar-Rekwiżit Kapitali tas-Solvenza, jenħtieġ li s-suppożizzjonijiet sottostanti jiġu spjegati b'mod ċar għas-sodisfazzjon tal-awtoritajiet superviżorji.

(57)

Id-Direttiva 2009/138/KE tipprevedi l-possibbiltà li l-impriżi tal-assigurazzjoni u tar-riassigurazzjoni jikkalkolaw ir-Rekwiżit Kapitali tas-Solvenza tagħhom b'mudell intern soġġett għall-approvazzjoni superviżorja. Meta jiġi applikat mudell intern, dik id-Direttiva ma tipprevjenix lil impriża tal-assigurazzjoni jew tar-riassigurazzjoni milli tqis l-effett tal-movimenti tal-firxiet tal-kreditu fuq l-aġġustament tal-volatilità fil-mudell intern tagħha. Peress li l-użu tal-aġġustament tal-volatilità jista' jwassal għal benefiċċji li jaqbżu l-mitigazzjoni ta' firxiet tal-bonds eżaġerati fil-kalkolu tal-aħjar stima, tali benefiċċji eċċessivi jistgħu joħolqu distorsjoni wkoll fil-kalkolu tar-Rekwiżit Kapitali tas-Solvenza fejn l-effett tal-movimenti tal-firxiet tal-kreditu fuq l-aġġustament tal-volatilità jitqies fil-mudell intern. Sabiex tiġi evitata din id-distorsjoni, jenħtieġ li jiġi applikat limitu minimu għar-Rekwiżit Kapitali tas-Solvenza, fejn l-awtoritajiet superviżorji jippermettu lill-impriżi tal-assigurazzjoni u tar-riassigurazzjoni jqisu l-effett tal-movimenti tal-firxiet tal-kreditu fuq l-aġġustament tal-volatilità fil-mudell intern tagħhom, f'livell li taħtu jkunu mistennijin iseħħu l-benefiċċji fuq ir-Rekwiżit Kapitali tas-Solvenza li jaqbżu l-mitigazzjoni ta' firxiet tal-bonds eżaġerati.

(58)

Jenħtieġ li l-impriżi tal-assigurazzjoni u tar-riassigurazzjoni jingħataw inċentivi biex jibnu reżiljenza għal sitwazzjonijiet ta' kriżi. Meta l-impriżi tal-assigurazzjoni u tar-riassigurazzjoni jqisu l-effett tal-movimenti tal-firxiet tal-kreditu fuq l-aġġustament tal-volatilità fil-mudell intern tagħhom, filwaqt li jqisu wkoll l-effett tal-movimenti tal-firxiet tal-kreditu fuq l-aġġustament tal-volatilità makro, dan jista' jdgħajjef b'mod sever kwalunkwe inċentiv biex tinbena r-reżiljenza għal sitwazzjonijiet ta' kriżi. Għalhekk, jenħtieġ li l-impriżi tal-assigurazzjoni u tar-riassigurazzjoni ma jitħallewx iqisu aġġustament tal-volatilità makro fil-mudell intern tagħhom.

(59)

Meta jitqiesu n-natura, l-iskala u l-kumplessità tar-riskji, jenħtieġ li l-awtoritajiet superviżorji jkunu jistgħu jiġbru informazzjoni makroprudenzjali rilevanti dwar l-istrateġija ta' investiment tal-impriżi tal-assigurazzjoni u tar-riassigurazzjoni, janalizzawha flimkien ma' informazzjoni rilevanti oħra li tista' tkun disponibbli minn sorsi oħra tas-suq, u jinkorporaw perspettiva makroprudenzjali fis-superviżjoni tagħhom tal-impriżi tal-assigurazzjoni u tar-riassigurazzjoni. Dan jista' jinkludi s-superviżjoni tar-riskji relatati ma' ċikli ta' kreditu speċifiċi, ma' reċessjonijiet ekonomiċi u ma' mġiba kollettiva jew komunitarja fl-investimenti.

(60)

Huwa neċessarju li jiġu ttrattati b'mod effiċjenti l-pożizzjonijiet finanzjarji tal-impriżi tal-assigurazzjoni u tar-riassigurazzjoni li jkunu qed jiddeterjoraw, jew il-ksur tar-rekwiżiti regolatorji minn dawk l-impriżi, u li tiġi evitata l-eskalazzjoni tal-problemi. Għalhekk, jenħtieġ li l-awtoritajiet superviżorji jkollhom is-setgħa li jimponu miżuri preventivi. Madankollu, jenħtieġ li dawn is-setgħat preventivi jkunu konsistenti mal-iskala tal-interventi u mas-setgħat superviżorji diġà previsti fid-Direttiva 2009/138/KE għal ċirkostanzi simili, inkluż is-setgħat superviżorji previsti fil-proċess ta' rieżami superviżorju stabbilit fl-Artikolu 36 ta' dik id-Direttiva. Jenħtieġ li setgħat preventivi bħal dawn ma jwasslux għal skattatur ġdid ta' intervent definit minn qabel, qabel ir-Rekwiżit Kapitali tas-Solvenza, stabbilit fit-Titolu I, il-Kapitolu VI, it-Taqsima 4, ta' dik id-Direttiva. Jenħtieġ li l-awtoritajiet superviżorji jivvalutaw kull sitwazzjoni individwalment u jiddeċiedu dwar il-ħtieġa għal miżuri preventivi abbażi taċ-ċirkostanzi, tas-sitwazzjoni tal-impriża u tal-ġudizzju superviżorju tagħhom.

(61)

Id-Direttiva 2009/138/KE tipprevedi r-rikonoxximent reċiproku u l-infurzar fl-Istati Membri kollha ta' deċiżjonijiet li jikkonċernaw ir-riorganizzazzjoni jew l-istralċ ta' impriżi tal-assigurazzjoni. Dik id-Direttiva tiżgura li l-assi u l-obbligazzjonijiet kollha tal-impriża, irrispettivament mill-pajjiż li jinsabu fih, jiġu ttrattati fi proċess uniku fl-Istat Membru ta' domiċilju u li l-kredituri fl-Istati Membru ospitanti jiġu ttrattati bħall-kredituri fl-Istat Membru ta' domiċilju. Sabiex tinkiseb riżoluzzjoni effettiva, jenħtieġ li japplikaw id-dispożizzjonijiet dwar ir-riorganizzazzjoni u l-istralċ stabbiliti fid-Direttiva 2009/138/KE f'każ li jintużaw l-għodod ta' riżoluzzjoni, kemm meta dawk l-għodod jiġu applikati għall-impriżi tal-assigurazzjoni u tar-riassigurazzjoni kif ukoll meta jiġu applikati għal entitajiet oħra koperti mir-reġim ta' riżoluzzjoni. Għalhekk, jenħtieġ li dawk id-dispożizzjonijiet jiġu emendati kif xieraq.

(62)

Id-Direttiva 2009/138/KE tipprevedi estensjoni tal-perjodu ta' rkupru f'każijiet ta' ksur tar-Rekwiżit Kapitali tas-Solvenza meta l-EIOPA tkun iddikjarat l-eżistenza ta' sitwazzjonijiet avversi eċċezzjonali. Id-dikjarazzjonijiet jistgħu jsiru wara talbiet mill-awtoritajiet superviżorji nazzjonali, li huma meħtieġa jikkonsultaw lill-Bord Ewropew dwar ir-Riskju Sistemiku (BERS) stabbilit bir-Regolament (UE) Nru 1092/2010 tal-Parlament Ewropew u tal-Kunsill (14), fejn xieraq qabel it-talba. Il-konsultazzjoni mal-BERS b'mod deċentralizzat mill-awtoritajiet superviżorji nazzjonali hija inqas effiċjenti minn konsultazzjoni mal-BERS b'mod ċentralizzat mill-EIOPA. Sabiex jiġi żgurat proċess effiċjenti, jenħtieġ li tkun l-EIOPA, u mhux l-awtoritajiet superviżorji nazzjonali, li tikkonsulta lill-BERS qabel id-dikjarazzjoni tal-eżistenza ta' sitwazzjonijiet avversi eċċezzjonali, meta n-natura tas-sitwazzjoni tkun tippermetti tali konsultazzjoni minn qabel.

(63)

Id-Direttiva 2009/138/KE tirrikjedi li l-impriżi tal-assigurazzjoni u tar-riassigurazzjoni jinfurmaw lill-awtorità superviżorja kkonċernata minnufih meta josservaw nuqqas ta' konformità, jew riskju ta' nuqqas ta' konformità fit-tliet xhur ta' wara, mar-Rekwiżit Kapitali Minimu. Madankollu, dik id-Direttiva ma tispeċifikax meta n-nuqqas ta' konformità mar-Rekwiżit Kapitali Minimu jew ir-riskju ta' nuqqas ta' konformità fit-tliet xhur ta' wara jista' jiġi osservat u l-impriżi jistgħu jdewmu l-għoti ta' informazzjoni lill-awtoritajiet superviżorji sa tmiem it-trimestru rilevanti meta jkun ser isir il-kalkolu tar-Rekwiżit Kapitali Minimu li għandu jiġi rrappurtat formalment lill-awtorità superviżorja. Sabiex jiġi żgurat li l-awtoritajiet superviżorji jirċievu informazzjoni f'waqtha u jkunu jistgħu jieħdu l-azzjoni meħtieġa, jenħtieġ li l-impriżi tal-assigurazzjoni u tar-riassigurazzjoni jkunu meħtieġa jinfurmaw minnufih lill-awtoritajiet superviżorji dwar nuqqas ta' konformità mar-Rekwiżit Kapitali Minimu jew riskju ta' nuqqas ta' konformità anke meta dan ikun ġie osservat abbażi ta' stimi jew ta' kalkoli bejn żewġ dati ta' kalkoli uffiċjali tar-Rekwiżit Kapitali Minimu, fit-trimestru rilevanti.

(64)

Il-protezzjoni tal-interessi tal-persuni assigurati hija objettiv ġenerali tal-qafas prudenzjali li jenħtieġ li jiġi segwit mill-awtoritajiet superviżorji f'kull stadju tal-proċess ta’ rieżami superviżorju, inkluż f'każijiet ta' ksur jew ta' ksur probabbli tar-rekwiżiti mill-impriżi tal-assigurazzjoni jew tar-riassigurazzjoni li jista' jwassal għall-irtirar tal-awtorizzazzjoni. Jenħtieġ li dak l-objettiv jiġi segwit qabel u wara l-irtirar tal-awtorizzazzjoni, u jenħtieġ li tiġi kkunsidrata kwalunkwe implikazzjoni legali għall-persuni assigurati li tista' tirriżulta minn dak l-irtirar.

(65)

Jenħtieġ li l-awtoritajiet superviżorji jkunu mgħammra b'għodod biex jipprevjenu l-materjalizzazzjoni tar-riskji għall-istabbiltà finanzjarja fis-swieq tal-assigurazzjoni, jillimitaw l-imġiba proċiklika mill-impriżi tal-assigurazzjoni u tar-riassigurazzjoni u jtaffu l-effetti konsegwenzjali negattivi fis-sistema finanzjarja u fl-ekonomija reali.

(66)

Kriżijiet ekonomiċi u finanzjarji reċenti, b'mod partikolari l-kriżi li rriżultat mill-pandemija tal-COVID-19, urew li ġestjoni tajba tal-likwidità mill-impriżi tal-assigurazzjoni u tar-riassigurazzjoni tista' tipprevjeni riskji għall-istabbiltà tas-sistema finanzjarja. Għal dik ir-raġuni, jenħtieġ li l-impriżi tal-assigurazzjoni u tar-riassigurazzjoni jkunu meħtieġa jsaħħu l-ġestjoni u l-ippjanar tal-likwidità, speċjalment fil-kuntest ta' sitwazzjonijiet avversi li jaffettwaw parti kbira jew it-totalità tas-suq tal-assigurazzjoni u tar-riassigurazzjoni.

(67)

Meta l-impriżi tal-assigurazzjoni u tar-riassigurazzjoni bi profili partikolarment vulnerabbli, bħal dawk li jkollhom obbligazzjonijiet likwidi, li jkollhom assi illikwidi, jew b'vulnerabbiltajiet ta' likwidità, li jistgħu jaffettwaw l-istabbiltà finanzjarja ġenerali, ma jirrimedjawx is-sitwazzjoni kif xieraq, jenħtieġ li l-awtoritajiet superviżorji nazzjonali jkunu jistgħu jintervjenu sabiex isaħħu l-pożizzjoni ta' likwidità ta' dawk l-impriżi.

(68)

Jenħtieġ li l-awtoritajiet superviżorji jkollhom is-setgħat neċessarji sabiex jippreservaw il-pożizzjoni ta' solvenza ta' impriżi speċifiċi tal-assigurazzjoni jew tar-riassigurazzjoni matul sitwazzjonijiet eċċezzjonali bħal avvenimenti ekonomiċi jew tas-suq negattivi li jaffettwaw parti kbira jew it-totalità tas-suq tal-assigurazzjoni u tar-riassigurazzjoni, sabiex jipproteġu lid-detenturi ta' poloz u jippreservaw l-istabbiltà finanzjarja. Jenħtieġ li dawk is-setgħat jinkludu l-possibbiltà li jiġu ristretti jew sospiżi d-distribuzzjonijiet lill-azzjonisti u lil kredituri subordinati oħra ta' impriża tal-assigurazzjoni jew tar-riassigurazzjoni partikolari qabel ma jseħħ ksur tar-Rekwiżit Kapitali tas-Solvenza. Jenħtieġ li dawk is-setgħat jiġu applikati fuq bażi ta' każ b'każ, jirrispettaw kriterji komuni bbażati fuq ir-riskju u ma jfixklux il-funzjonament tas-suq intern.

(69)

Peress li r-restrizzjoni jew is-sospensjoni tad-distribuzzjoni tad-dividendi u ta' bonusijiet oħra jaffettwaw, anke fuq bażi temporanja, id-drittijiet tal-azzjonisti u ta' kredituri subordinati oħrajn, jenħtieġ li l-awtoritajiet superviżorji jqisu kif xieraq il-prinċipji tal-proporzjonalità u tan-neċessità meta jieħdu tali miżuri. Jenħtieġ li l-awtoritajiet superviżorji jiżguraw ukoll li l-ebda waħda mill-miżuri adottati ma tkun tinvolvi effetti negattivi sproporzjonati fuq is-sistema finanzjarja kollha jew parti minnha fi Stati Membri oħrajn jew fl-Unjoni kollha kemm hi. B'mod partikolari, jenħtieġ li l-awtoritajiet superviżorji jirrestrinġu d-distribuzzjonijiet kapitali fi grupp tal-assigurazzjoni u tar-riassigurazzjoni f'ċirkostanzi eċċezzjonali biss, u meta jkun debitament iġġustifikat biex tiġi ppreservata l-istabbiltà tas-suq tal-assigurazzjoni u tar-riassigurazzjoni u tas-sistema finanzjarja kollha kemm hi.

(70)

F'ċirkostanzi eċċezzjonali, l-impriżi tal-assigurazzjoni jistgħu jkunu soġġetti għal riskji sinifikanti ta' likwidità. Għalhekk, jenħtieġ li l-awtoritajiet superviżorji jkollhom is-setgħa li jissospendu temporanjament, għal perjodu qasir ta' żmien u bħala miżura tal-aħħar istanza biss, id-drittijiet ta' tifdija fuq poloz tal-assigurazzjoni tal-ħajja ta' tali impriżi kkonċernati minn riskji sinifikanti ta' likwidità. Jenħtieġ li din il-miżura eċċezzjonali tintuża bil-ħsieb li tiġi ppreservata l-protezzjoni kollettiva tad-detenturi ta' poloz, jiġifieri l-protezzjoni tad-detenturi ta' poloz kollha, inkluż dawk li jistgħu jiġu affettwati indirettament minn dawn ir-riskji.

(71)

Il-fallimenti reċenti tal-impriżi tal-assigurazzjoni u tar-riassigurazzjoni li joperaw b'mod transfruntier enfasizzaw il-ħtieġa li l-awtoritajiet superviżorji jkunu informati aħjar dwar l-attivitajiet imwettqa minn dawk l-impriżi. Għalhekk, jenħtieġ li l-impriżi tal-assigurazzjoni u tar-riassigurazzjoni jkunu meħtieġa jinnotifikaw lill-awtorità superviżorja tal-Istat Membru ta' domiċilju tagħhom dwar kwalunkwe bidla materjali li taffettwa l-profil tar-riskju tagħhom fir-rigward tal-attivitajiet tal-assigurazzjoni transfruntieri tagħhom li jkunu għaddejjin, u jenħtieġ li dik l-informazzjoni tiġi kondiviża mal-awtoritajiet superviżorji tal-Istati Membri ospitanti kkonċernati.

(72)

Skont id-Direttiva 2009/138/KE, l-EIOPA għandha s-setgħa li tistabbilixxi u tikkoordina pjattaformi ta' kollaborazzjoni biex ittejjeb il-kollaborazzjoni bejn l-awtoritajiet superviżorji rilevanti meta impriża tal-assigurazzjoni jew tar-riassigurazzjoni twettaq, jew ikun biħsiebha twettaq, attivitajiet li jkunu bbażati fuq il-libertà li jiġu pprovduti servizzi jew fuq id-dritt tal-istabbiliment. Madankollu, fid-dawl tal-kumplessità tal-kwistjonijiet superviżorji ttrattati f'dawk il-pjattaformi, f'diversi każijiet, l-awtoritajiet superviżorji jonqsu milli jilħqu fehma komuni dwar kif jindirizzaw kwistjonijiet relatati ma' impriża tal-assigurazzjoni jew tar-riassigurazzjoni li qed topera fuq bażi transfruntiera. Fil-każ li l-awtoritajiet superviżorji involuti fil-pjattaformi ta' kollaborazzjoni ma jkunux jistgħu jilħqu ftehim dwar kwistjonijiet relatati ma' impriża tal-assigurazzjoni jew tar-riassigurazzjoni li tkun qed topera fuq bażi transfruntiera, jenħtieġ li l-EIOPA jkollha s-setgħa li ssolvi n-nuqqas ta' qbil f'konformità mal-Artikolu 19 tar-Regolament (UE) Nru 1094/2010.

(73)

Jenħtieġ li tissaħħaħ il-kooperazzjoni u l-kondiviżjoni ta' informazzjoni bejn l-awtorità superviżorja tal-Istat Membru ta' domiċilju li tkun tat awtorizzazzjoni lil impriża tal-assigurazzjoni jew tar-riassigurazzjoni u l-awtoritajiet superviżorji tal-Istati Membri fejn dik l-impriża twettaq attivitajiet billi tistabbilixxi fergħat jew billi tipprovdi servizzi, sabiex jiġu evitati aħjar il-problemi potenzjali li jaffettwaw id-drittijiet tal-konsumatur u biex tissaħħaħ il-protezzjoni tad-detenturi ta' poloz madwar l-Unjoni. Dik il-kooperazzjoni msaħħa hija partikolarment importanti fejn ikun hemm attivitajiet transfruntieri sinifikanti, u jenħtieġ li żżid it-trasparenza u l-iskambju obbligatorju regolari ta' informazzjoni bejn l-awtoritajiet superviżorji kkonċernati. Jenħtieġ li dan l-iskambju jkun informattiv biżżejjed u jinkludi l-informazzjoni rilevanti kollha li tkun ġejja mill-awtorità superviżorja tal-Istat Membru ta' domiċilju, b'mod partikolari rigward l-eżitu tal-proċess ta' rieżami superviżorju relatat mal-attività transfruntiera u l-kundizzjoni finanzjarja tal-impriża. Biex jiġu żgurati l-aċċess bla xkiel għad-data superviżorja disponibbli, ir-rapporti dwar il-proċess ta' rieżami superviżorju u informazzjoni rilevanti oħra b'rabta mal-impriżi li jwettqu attivitajiet transfruntieri sinifikanti, kif ukoll l-iskambju effiċjenti tagħhom, u filwaqt li titqies il-ħtieġa li jiġi limitat il-piż amministrattiv, jenħtieġ li jintużaw għodod diġitali għall-kondiviżjoni tal-informazzjoni. Għalhekk, tali informazzjoni tista' tingħadda permezz tal-għodod eżistenti ta' kollaborazzjoni diġitali stabbiliti mill-EIOPA.

(74)

Meta l-awtorità superviżorja ta' Stat Membru ospitanti jkollha tħassib serju dwar il-pożizzjoni ta' solvenza ta' impriża tal-assigurazzjoni jew tar-riassigurazzjoni li twettaq attivitajiet transfruntieri sinifikanti fit-territorju tagħha, jenħtieġ li jkollha s-setgħa li titlob li ssir spezzjoni konġunta fuq il-post flimkien mal-awtorità superviżorja tal-Istat Membru ta' domiċilju, fejn ikun hemm nuqqas ta' konformità mar-Rekwiżit Kapitali tas-Solvenza jew mar-Rekwiżit Kapitali Minimu. Jenħtieġ li l-awtorità superviżorja tal-Istat Membru ta' domiċilju tikkoordina l-ispezzjoni konġunta fuq il-post u jenħtieġ li tistieden lill-awtoritajiet superviżorji nazzjonali rilevanti kollha kif ukoll lill-EIOPA. Jenħtieġ li l-awtoritajiet superviżorji kollha jaqblu dwar l-objettivi tal-ispezzjoni fuq il-post qabel ma titwettaq. Sa tmiem l-ispezzjoni, jenħtieġ li dawn jiffurmaw ukoll fehma komuni dwar il-miżuri superviżorji meħtieġa li għandhom jittieħdu. Jenħtieġ li l-awtorità superviżorja tal-Istat Membru ta' domiċilju tinforma lill-awtoritajiet superviżorji kollha kkonċernati dwar is-segwitu għall-ispezzjoni fuq il-post. Meta l-awtoritajiet superviżorji ma jaqblux dwar jekk ikunx meħtieġ li jwettqu spezzjoni konġunta fuq il-post, jenħtieġ li l-EIOPA jkollha s-setgħa li ssolvi n-nuqqas ta' qbil f'konformità mal-Artikolu 19 tar-Regolament (UE) Nru 1094/2010.

(75)

Skont id-Direttiva 2009/138/KE, l-impriżi tal-assigurazzjoni jew tar-riassigurazzjoni ma humiex meħtieġa jipprovdu informazzjoni dwar it-twettiq tan-negozju tagħhom lill-awtoritajiet superviżorji tal-Istati Membri ospitanti fil-ħin. Din l-informazzjoni tista' tinkiseb biss billi tintalab mill-awtorità superviżorja tal-Istat Membru ta' domiċilju. Madankollu, approċċ bħal dan ma jiżgurax l-aċċess għall-informazzjoni f'perjodu raġonevoli. Għalhekk, jenħtieġ li l-awtoritajiet superviżorji tal-Istati Membri ospitanti jkollhom is-setgħa li jitolbu informazzjoni direttament mingħand l-impriżi tal-assigurazzjoni jew tar-riassigurazzjoni, meta l-awtorità superviżorja tal-Istat Membru ta' domiċilju tonqos milli tipprovdi l-informazzjoni f'waqtha. Jenħtieġ li dik is-setgħa ma tipprevjenix it-trażmissjoni volontarja ta' informazzjoni mill-impriżi tal-assigurazzjoni u tar-riassigurazzjoni lill-awtoritajiet superviżorji tal-Istati Membri ospitanti.

(76)

Sabiex tiġi identifikata bħala kumpanija azzjonarja tal-assigurazzjoni, kumpanija prinċipali trid, b'mod partikolari, ikollha, bħala n-negozju ewlieni tagħha, l-akkwiżizzjoni u ż-żamma ta' parteċipazzjonijiet f'impriżi sussidjarji, fejn dawk l-impriżi sussidjarji jkunu esklużivament jew prinċipalment impriżi tal-assigurazzjoni jew tar-riassigurazzjoni, jew inkella impriżi tal-assigurazzjoni jew tar-riassigurazzjoni ta' pajjiżi terzi. Bħalissa, l-awtoritajiet superviżorji għandhom interpretazzjonijiet differenti fir-rigward tat-tifsira ta' “esklużivament jew prinċipalment” f'dak il-kuntest. Għalhekk, jenħtieġ li d-definizzjoni ta' kumpanija azzjonarja tal-assigurazzjoni tiġi emendata u ċċarata, filwaqt li jitqiesu emendi simili għad-definizzjoni ta' kumpanija azzjonarja finanzjarja kif imsemmi fir-Regolament (UE) Nru 575/2013 għas-settur bankarju. B'mod partikolari, sabiex impriża tiġi kklassifikata bħala kumpanija azzjonarja tal-assigurazzjoni, jenħtieġ li n-negozju ewlieni tagħha jkun relatat mal-akkwiżizzjoni u ż-żamma ta' impriżi tal-assigurazzjoni jew tar-riassigurazzjoni, il-forniment ta' servizzi anċillari lil impriżi tal-assigurazzjoni jew tar-riassigurazzjoni relatati, jew it-twettiq ta' attivitajiet finanzjarji oħra mhux regolati. Jenħtieġ li l-awtoritajiet superviżorji jkollhom is-setgħa jikkonkludu li dan il-kriterju jkun issodisfat, irrispettivament mill-fini jew l-objettiv korporattiv iddikjarat tal-impriża stess.

(77)

F'xi każijiet, fi grupp soġġett għal superviżjoni tal-grupp f'konformità mal-Artikolu 213(2), il-punti (a), (b) jew (c), tad-Direttiva 2009/138/KE, parteċipazzjonijiet f'impriżi sussidjarji tal-assigurazzjoni u tar-riassigurazzjoni li jinsabu f'pajjiż terz jinżammu permezz ta' kumpanija azzjonarja intermedja mhux regolata. Anke jekk din il-kumpanija azzjonarja intermedja mhux regolata ma jkollha l-ebda impriża sussidjarja tal-assigurazzjoni jew tar-riassigurazzjoni li l-uffiċċju prinċipali tagħha jkun jinsab fl-Unjoni, huwa importanti li tkun tista' tiġi ttrattata b'mod simili għal kumpanija azzjonarja tal-assigurazzjoni jew kumpanija azzjonarja finanzjarja mħallta u tkun inkluża fil-kalkoli tas-solvenza tal-grupp. Għalhekk, jenħtieġ li tiġi introdotta definizzjoni ta' kumpaniji azzjonarji ta' impriżi tal-assigurazzjoni u tar-riassigurazzjoni ta' pajjiżi terzi sabiex il-gruppi jkunu jistgħu jqisu impriżi relatati ta' pajjiżi terzi fil-kalkolu tar-Rekwiżit Kapitali tas-Solvenza tal-grupp.

(78)

F'xi każijiet, diversi impriżi tal-assigurazzjoni u tar-riassigurazzjoni jiffurmaw grupp de facto u jaġixxu bħala tali, għalkemm ma jissodisfawx id-definizzjoni ta' grupp kif stipulat fl-Artikolu 212 tad-Direttiva 2009/138/KE. Għalhekk, it-Titolu III ta' dik id-Direttiva ma japplikax għal tali impriżi tal-assigurazzjoni u tar-riassigurazzjoni. F'każijiet bħal dawn, b'mod partikolari għal gruppi orizzontali mingħajr rabtiet kapitali bejn impriżi differenti, jenħtieġ li s-superviżuri tal-grupp jkollhom is-setgħa li jidentifikaw l-eżistenza ta' grupp. Jenħtieġ li jiġu pprovduti wkoll kriterji oġġettivi sabiex issir identifikazzjoni bħal din. Fin-nuqqas ta' bidliet fl-ispeċifiċitajiet tal-gruppi, huwa mistenni li l-gruppi li diġà huma soġġetti għas-superviżjoni tal-grupp ser ikomplu jkunu soġġetti għal tali superviżjoni.

(79)

Il-gruppi tal-assigurazzjoni u tar-riassigurazzjoni huma liberi li jiddeċiedu dwar l-arranġamenti interni speċifiċi, id-distribuzzjoni tal-kompiti u l-istruttura organizzazzjonali fi ħdan il-grupp kif jaraw li jkunu xierqa sabiex jiżguraw il-konformità mad-Direttiva 2009/138/KE. Madankollu, fi ftit każijiet, tali arranġamenti u strutturi organizzazzjonali jistgħu jipperikolaw is-superviżjoni effettiva tal-grupp. Għalhekk, jenħtieġ li s-superviżuri tal-grupp ikollhom is-setgħa - f'ċirkostanzi eċċezzjonali u wara li jikkonsultaw lill-EIOPA u lill-awtoritajiet superviżorji kkonċernati l-oħra - li jirrikjedu bidliet f'dawk l-arranġamenti jew fl-istrutturi organizzazzjonali. Jenħtieġ li s-superviżuri tal-grupp jiġġustifikaw kif xieraq id-deċiżjonijiet tagħhom u jispjegaw għaliex l-arranġamenti jew l-istrutturi eżistenti jxekklu u jipperikolaw is-superviżjoni effettiva tal-grupp.

(80)

Is-superviżuri tal-grupp jistgħu jiddeċiedu li jeskludu impriża mis-superviżjoni tal-grupp, b'mod partikolari meta din l-impriża titqies ta' interess negliġibbli fir-rigward tal-objettivi tas-superviżjoni tal-grupp. L-EIOPA nnotat interpretazzjonijiet diverġenti dwar il-kriterju ta' interess negliġibbli, u identifikat li, f'xi każijiet, esklużjonijiet bħal dawn jirriżultaw f'eżenzjonijiet sħaħ tas-superviżjoni tal-grupp jew fis-superviżjoni fil-livell ta' kumpanija prinċipali intermedja. Għalhekk huwa neċessarju li jiġi ċċarat li deċiżjonijiet ta’ esklużjoni li jirriżultaw f'eżenzjonijiet sħaħ tas-superviżjoni tal-grupp jew f’superviżjoni fil-livell ta’ kumpanija prinċipali intermedja jenħtieġ li jittieħdu biss f'ċirkostanzi eċċezzjonali ħafna u li jenħtieġ li s-superviżuri tal-grupp jikkonsultaw lill-EIOPA qabel ma jieħdu deċiżjonijiet bħal dawn. Jenħtieġ li jiġu introdotti wkoll kriterji sabiex ikun hemm aktar ċarezza dwar x'għandu jitqies bħala interess negliġibbli fir-rigward tal-objettivi tas-superviżjoni tal-grupp.

(81)

Deċiżjonijiet biex impriża ma tiġix inkluża fl-ambitu tas-superviżjoni tal-grupp jistgħu jkunu bbażati fuq diversi dispożizzjonijiet stabbiliti fid-Direttiva 2009/138/KE. Għalhekk, jenħtieġ li l-emendi għall-Artikolu 214(2) ta' dik id-Direttiva li għandhom l-għan li jispeċifikaw il-kunċett ta' “interess negliġibbli” ma jaffettwawx il-bażi eżistenti possibbli biex jittieħdu deċiżjonijiet ta' esklużjonijiet mis-superviżjoni tal-grupp skont il-punt (c) ta' dak il-paragrafu, meta l-Istat Membru jkun ittraspona l-Artikolu 214 ta' dik id-Direttiva b'tali mod li jippermetti l-esklużjoni tal-impriża prinċipali aħħarija meta din tal-aħħar ikollha l-karatteristiċi kollha li ġejjin: tibqa' soġġetta għas-superviżjoni tal-awtorità superviżorja skont il-liġi ta' dak l-Istat Membru, ma jkollhiex awtorizzazzjoni biex tibda negozju tal-assigurazzjoni jew tar-riassigurazzjoni, ma tipprovdix servizzi anċillari lis-sussidjarji tal-assigurazzjoni jew tar-riassigurazzjoni fil-grupp, ikollha liġijiet sekondarji li jipprekludu espressament lill-impriża milli twettaq koordinazzjoni ċentrali tas-sussidjarji tal-assigurazzjoni jew tar-riassigurazzjoni tagħha f'konformità mal-liġi tal-Istat Membru li tillimita strettament l-ambitu tal-attivitajiet tal-impriża, u jkun hemm entità intermedja stabbilita fit-territorju ta' Stat Membru li timmaniġġa attivament is-sussidjarji tal-assigurazzjoni jew tar-riassigurazzjoni fil-grupp.

(82)

Hemm nuqqas ta' ċarezza rigward it-tipi ta' impriża li għalihom jista' jiġi applikat il-metodu 2, jiġifieri metodu ta' tnaqqis u aggregazzjoni definit fid-Direttiva 2009/138/KE, meta tiġi kkalkolata s-solvenza tal-grupp, li huwa ta' detriment għall-kundizzjonijiet ekwi. Għalhekk, jenħtieġ li jiġi speċifikat b'mod ċar liema impriżi jistgħu jiġu inklużi fil-kalkolu tas-solvenza tal-grupp permezz tal-metodu 2. Jenħtieġ li l-Metodu 2 japplika biss għal impriżi tal-assigurazzjoni u tar-riassigurazzjoni, impriżi tal-assigurazzjoni u tar-riassigurazzjoni ta' pajjiżi terzi, impriżi li jappartjenu għal setturi finanzjarji oħra, kumpaniji azzjonarji finanzjarji mħallta, kumpaniji azzjonarji tal-assigurazzjoni, u impriżi prinċipali oħra li n-negozju ewlieni tagħhom huwa li jakkwistaw u jżommu parteċipazzjonijiet f'impriżi sussidjarji, fejn dawk l-impriżi sussidjarji jkunu esklużivament jew prinċipalment impriżi tal-assigurazzjoni jew tar-riassigurazzjoni, jew impriżi tal-assigurazzjoni jew tar-riassigurazzjoni ta' pajjiżi terzi.

(83)

F'xi gruppi tal-assigurazzjoni jew tar-riassigurazzjoni, impriża prinċipali intermedja għajr impriża tal-assigurazzjoni jew tar-riassigurazzjoni jew impriża tal-assigurazzjoni jew tar-riassigurazzjoni ta' pajjiż terz takkwista u żżomm parteċipazzjonijiet f'impriżi sussidjarji fejn dawk l-impriżi sussidjarji jkunu esklużivament jew prinċipalment impriżi tal-assigurazzjoni jew tar-riassigurazzjoni ta' pajjiż terz. Skont ir-regoli attwali, jekk dawk l-impriżi prinċipali intermedji ma jkollhomx parteċipazzjoni f'mill-inqas impriża sussidjarja waħda tal-assigurazzjoni jew tar-riassigurazzjoni li jkollha l-uffiċċju prinċipali tagħha fl-Unjoni, dawn ma jiġux ittrattati bħala kumpaniji azzjonarji tal-assigurazzjoni għall-finijiet tal-kalkolu tas-solvenza tal-grupp, għalkemm in-natura tar-riskji tagħhom hija simili ħafna. Għalhekk, jenħtieġ li r-regoli jiġu emendati sabiex tali kumpaniji azzjonarji ta' impriżi tal-assigurazzjoni u tar-riassigurazzjoni ta' pajjiżi terzi jiġu ttrattati bl-istess mod bħall-kumpaniji azzjonarji tal-assigurazzjoni għall-finijiet tal-kalkolu tas-solvenza tal-grupp.

(84)

Id-Direttiva 2009/138/KE u r-Regolament Delegat (UE) 2015/35 jipprovdu erba' metodi ta' inklużjoni fil-kalkolu tas-solvenza tal-grupp ta' impriżi li jappartjenu għal setturi finanzjarji oħrajn, inklużi l-metodi 1 u 2 stipulati fl-Anness I tad-Direttiva 2002/87/KE. Dak iwassal għal approċċi superviżorji inkonsistenti u għal kundizzjonijiet mhux ekwi, u jiġġenera kumplessità żejda. Għalhekk, jenħtieġ li r-regoli jiġu ssimplifikati sabiex l-impriżi li jappartjenu għal setturi finanzjarji oħrajn dejjem jikkontribwixxu għas-solvenza tal-grupp billi jużaw ir-regoli settorjali rilevanti rigward il-kalkolu tal-fondi proprji u tar-rekwiżiti kapitali. Jenħtieġ li dawk ir-rekwiżiti ta' fondi proprji u kapitali sempliċiment jiġu aggregati mar-rekwiżiti ta' fondi proprji u kapitali tal-parti tal-assigurazzjoni u tar-riassigurazzjoni tal-grupp.

(85)

Skont ir-regoli attwali, l-impriżi tal-assigurazzjoni u tar-riassigurazzjoni parteċipi jingħataw possibbiltajiet limitati sabiex jużaw kalkoli simplifikati għall-fini tad-determinazzjoni tas-solvenza tal-grupp tagħhom meta jintuża l-metodu 1, jiġifieri l-metodu bbażat fuq il-konsolidament kontabilistiku. Dan jiġġenera piż sproporzjonat, b'mod partikolari meta l-gruppi jkollhom parteċipazzjonijiet f'impriżi relatati li jkunu ta' daqs żgħir ħafna. Għalhekk, soġġetti għall-approvazzjoni superviżorja minn qabel, jenħtieġ li l-impriżi parteċipi jitħallew jintegraw impriżi relatati li d-daqs tagħhom huwa immaterjali fis-solvenza tal-grupp tagħhom billi jużaw approċċi simplifikati.

(86)

Mhuwiex ċar kif il-kunċett ta' restrizzjonijiet, li jenħtieġ li jitqies meta l-elementi ta' fondi proprji jiġu kklassifikati f'livelli, japplika għall-kumpaniji azzjonarji tal-assigurazzjoni u għall-kumpaniji azzjonarji finanzjarji mħallta li ma għandhomx detenturi ta' poloz u benefiċjarji bħala klijenti diretti. Għalhekk, jenħtieġ li jiġu introdotti kriterji minimi li jippermettu l-identifikazzjoni ta' każijiet li fihom element ta' fondi proprji maħruġ minn kumpanija azzjonarja tal-assigurazzjoni jew minn kumpanija azzjonarja finanzjarja mħallta jkun ħieles minn restrizzjonijiet.

(87)

Jenħtieġ li l-ambitu tal-impriżi li jenħtieġ li jitqies meta jiġi kkalkolat il-limitu minimu għar-Rekwiżit Kapitali tas-Solvenza tal-grupp ikun konsistenti mal-ambitu tal-impriżi li jikkontribwixxu għall-fondi proprji eliġibbli li jkunu disponibbli sabiex ikopru r-Rekwiżit Kapitali tas-Solvenza tal-grupp konsolidat. Għalhekk, meta jikkalkolaw il-limitu minimu, jenħtieġ li jitqiesu l-impriżi tal-assigurazzjoni u tar-riassigurazzjoni ta' pajjiżi terzi inklużi permezz tal-metodu 1.

(88)

Il-formula għall-kalkolu tar-Rekwiżit Kapitali tas-Solvenza minimu tal-grupp konsolidat tista' twassal għal sitwazzjonijiet li fihom dak il-minimu jkun qrib, jew saħansitra daqs, ir-Rekwiżit Kapitali tas-Solvenza tal-grupp konsolidat. Jenħtieġ li fejn, f'każijiet bħal dawn, grupp ma jikkonformax mar-Rekwiżit Kapitali tas-Solvenza minimu tal-grupp konsolidat iżda għadu jikkonforma mar-Rekwiżit Kapitali tas-Solvenza tiegħu fil-livell tal-grupp ikkalkolat abbażi ta' data konsolidata, l-awtoritajiet superviżorji jużaw biss is-setgħat li jkunu disponibbli meta jkun hemm nuqqas ta' konformità mar-Rekwiżit Kapitali tas-Solvenza tal-grupp.

(89)

Għall-finijiet tal-kalkolu tas-solvenza tal-grupp, jenħtieġ li l-kumpaniji azzjonarji tal-assigurazzjoni u l-kumpaniji azzjonarji finanzjarji mħallta jiġu ttrattati bħala impriżi tal-assigurazzjoni jew tar-riassigurazzjoni. Dak jimplika l-kalkolu tar-rekwiżiti kapitali nozzjonali għal dawn l-impriżi. Madankollu, jenħtieġ li tali kalkoli qatt ma jimplikaw li l-kumpaniji azzjonarji tal-assigurazzjoni u l-kumpaniji azzjonarji finanzjarji mħallta ikunu meħtieġa jikkonformaw ma' dawk ir-rekwiżiti kapitali nozzjonali fil-livell individwali.

(90)

Ma hemm l-ebda dispożizzjoni legali li tispeċifika kif għandha tiġi kkalkolata s-solvenza tal-grupp meta jintuża kombinament tal-metodu 1 u tal-metodu 2. Dak iwassal għal prattiki inkonsistenti u għal inċertezzi, b'mod partikolari b'rabta mal-mod kif tiġi kkalkolata l-kontribuzzjoni għar-Rekwiżit Kapitali tas-Solvenza tal-grupp tal-impriżi tal-assigurazzjoni u tar-riassigurazzjoni, inkluż permezz tal-metodu 2. Għalhekk, jenħtieġ li jiġi ċċarat kif is-solvenza tal-grupp għandha tiġi kkalkolata meta tintuża kombinazzjoni ta' metodi. Għal dak l-għan, jenħtieġ li ma jiġi injorat l-ebda riskju materjali li jirriżulta minn tali impriżi fil-kalkolu tas-solvenza tal-grupp. Madankollu, sabiex jiġu evitati żidiet materjali fir-rekwiżiti kapitali u biex jiġu ppreservati kundizzjonijiet ekwi għall-gruppi tal-assigurazzjoni jew tar-riassigurazzjoni fil-livell globali, jenħtieġ li jiġi ċċarat li, għall-fini tal-kalkolu tar-Rekwiżit Kapitali tas-Solvenza tal-grupp konsolidat, ma għandha tiġi applikata l-ebda imposta kapitali għar-riskju ta' ekwità għal tali holdings. Għall-istess raġuni, jenħtieġ li imposta kapitali għar-riskju tal-kambju tiġi applikata biss għall-valur ta' dawk il-holdings li jkun ogħla mir-Rekwiżiti Kapitali tas-Solvenza ta' dawk l-impriżi relatati. Jenħtieġ li l-impriżi tal-assigurazzjoni jew tar-riassigurazzjoni parteċipi jitħallew iqisu d-diversifikazzjoni bejn dak ir-riskju tal-kambju u riskji oħra sottostanti għall-kalkolu tar-Rekwiżit Kapitali tas-Solvenza tal-grupp konsolidat.

(91)

Bħalissa, is-superviżuri tal-grupp jistgħu jiddeterminaw il-limiti li fuqhom it-tranżazzjonijiet intragrupp u l-konċentrazzjoni tar-riskju jitqiesu sinifikanti abbażi tar-Rekwiżiti Kapitali tas-Solvenza, tad-dispożizzjonijiet tekniċi, jew tat-tnejn li huma. Madankollu, kriterji kwantitattivi jew kwalitattivi oħra bbażati fuq ir-riskju, pereżempju fondi proprji eliġibbli, jistgħu jkunu xierqa wkoll biex jiġu ddeterminati l-limiti. Għalhekk, jenħtieġ li s-superviżuri tal-grupp ikollhom aktar flessibbiltà meta jiddefinixxu tranżazzjoni intragrupp sinifikanti jew konċentrazzjoni tar-riskju sinifikanti.

(92)

Il-kumpaniji azzjonarji tal-assigurazzjoni u l-kumpaniji azzjonarji finanzjarji mħallta jistgħu jkunu impriżi prinċipali ta' gruppi tal-assigurazzjoni jew tar-riassigurazzjoni. F'dak il-każ, l-applikazzjoni tas-superviżjoni tal-grupp hija meħtieġa fuq il-bażi tas-sitwazzjoni konsolidata ta' tali kumpaniji azzjonarji. Peress li l-impriżi tal-assigurazzjoni jew tar-riassigurazzjoni kkontrollati minn tali kumpaniji azzjonarji mhux dejjem ikunu jistgħu jiżguraw il-konformità mar-rekwiżiti dwar is-superviżjoni tal-grupp, huwa neċessarju li jiġi żgurat li s-superviżuri tal-grupp ikollhom is-setgħat superviżorji u ta' infurzar xierqa sabiex jiżguraw il-konformità mill-gruppi mad-Direttiva 2009/138/KE. Għalhekk, simili għall-emendi għad-Direttiva 2013/36/UE tal-Parlament Ewropew u tal-Kunsill (15) introdotti bid-Direttiva (UE) 2019/878 tal-Parlament Ewropew u tal-Kunsill (16) għall-istituzzjonijiet ta' kreditu u finanzjarji, jenħtieġ li s-superviżuri tal-grupp ikollhom sett minimu ta' setgħat fuq il-kumpaniji azzjonarji, inkluż is-setgħat superviżorji ġenerali li huma applikabbli għall-impriżi tal-assigurazzjoni u tar-riassigurazzjoni għall-finijiet tas-superviżjoni tal-grupp.

(93)

Għall-finijiet ta' protezzjoni tad-detenturi ta' poloz, jenħtieġ li l-gruppi kollha tal-assigurazzjoni li joperaw fl-Unjoni, irrispettivament minn fejn jinsab l-uffiċċju prinċipali tal-impriża prinċipali aħħarija tagħhom, jiġu ttrattati b'mod ugwali fl-applikazzjoni tas-superviżjoni tal-grupp skont it-Titolu III tad-Direttiva 2009/138/KE. Meta l-impriżi tal-assigurazzjoni u tar-riassigurazzjoni jkunu parti minn grupp li l-impriża prinċipali tiegħu jkollha l-uffiċċju prinċipali tagħha f'pajjiż terz li ma jitqiesx ekwivalenti jew temporanjament ekwivalenti f'konformità mal-Artikolu 260 ta' dik id-Direttiva, l-eżerċitar tas-superviżjoni tal-grupp ikun aktar diffiċli. Is-superviżuri tal-grupp jistgħu jiddeċiedu li japplikaw l-hekk imsejħa “metodi oħra” f'konformità mal-Artikolu 262 ta' dik id-Direttiva għal dawn il-gruppi. Madankollu, dawk il-metodi ma humiex definiti b'mod ċar u l-objettivi li jenħtieġ li jinkisbu minn dawk il-metodi l-oħrajn huma inċerti. Jekk ma tiġix indirizzata, dik il-kwistjoni tista' twassal għal effetti mhux mixtieqa fuq il-kundizzjonijiet ekwi bejn gruppi li l-impriża prinċipali aħħarija tagħhom tinsab fl-Unjoni u gruppi li l-impriża prinċipali aħħarija tagħhom tinsab f'pajjiż terz mhux ekwivalenti. Għalhekk, jenħtieġ li l-iskop tal-metodi l-oħrajn jiġi speċifikat aktar, inkluż sett minimu ta' miżuri li jenħtieġ li s-superviżuri tal-grupp jikkunsidraw. B'mod partikolari, jenħtieġ li dawk il-metodi jiġġustifikaw l-istess livell ta' protezzjoni għad-detenturi ta' poloz kollha tal-impriżi tal-assigurazzjoni jew tar-riassigurazzjoni li għandhom l-uffiċċju prinċipali tagħhom fl-Unjoni, irrispettivament mill-post tal-uffiċċju prinċipali tal-impriża prinċipali aħħarija tal-grupp li għalih jappartjenu dawn l-impriżi tal-assigurazzjoni jew tar-riassigurazzjoni.

(94)

Ir-Regolament Delegat tal-Kummissjoni (UE) 2019/981 (17) introduċa trattament preferenzjali għal investimenti fit-tul fl-ekwità. Is-submodulu tar-riskju ta' ekwità bbażat fuq id-durata, li għandu l-għan ukoll li jirrifletti r-riskju aktar baxx ta' investiment fuq perjodu ta' żmien itwal, iżda li huwa ta' użu limitat ħafna fl-Unjoni, huwa soġġett għal kriterji li huma aktar stretti minn dawk applikabbli għal investimenti fl-ekwità fit-tul. Għalhekk, il-kategorija prudenzjali l-ġdida tal-investimenti fl-ekwità fit-tul tidher li telimina l-ħtieġa għas-submodulu eżistenti tar-riskju ta' ekwità bbażat fuq id-durata. Peress li ma hemmx bżonn li jinżammu żewġ trattamenti preferenzjali distinti li jkollhom l-istess objettiv li jippremjaw investimenti fit-tul, jenħtieġ li jitħassar is-submodulu tar-riskju ta' ekwità bbażat fuq id-durata. Madankollu, sabiex tiġi evitata sitwazzjoni li fiha dak it-tħassir iwassal għal effetti avversi, jenħtieġ li tiġi prevista klawżola ta' anterjorità fir-rigward tal-assiguraturi li bħalissa qed japplikaw is-submodulu tar-riskju ta' ekwità bbażat fuq id-durata.

(95)

Il-kisba tal-ambizzjonijiet ambjentali u klimatiċi tal-Patt Ekoloġiku Ewropew teħtieġ id-direzzjonar ta' ammonti kbar ta' investimenti mis-settur privat, inkluż minn impriżi tal-assigurazzjoni u tar-riassigurazzjoni, lejn investimenti sostenibbli. Jenħtieġ li d-dispożizzjonijiet tad-Direttiva 2009/138/KE dwar ir-rekwiżiti kapitali ma jimpedixxux investimenti sostenibbli minn impriżi tal-assigurazzjoni u tar-riassigurazzjoni iżda jenħtieġ li jirriflettu r-riskju sħiħ ta' investimenti f'attivitajiet li jagħmlu ħsara lill-ambjent. Għalhekk, hemm il-ħtieġa li jiġi vvalutat jekk l-evidenza dwar id-differenzi fir-riskju bejn investimenti li jagħmlu ħsara ambjentali jew soċjali u investimenti oħra hijiex suffiċjenti biex jiġi ġġustifikat trattament prudenzjali differenzjat. Sabiex tiġi żgurata valutazzjoni xierqa tal-evidenza rilevanti, jenħtieġ li l-EIOPA timmonitorja u tirrapporta sal-1 ta’ Marzu 2025 dwar l-evidenza dwar il-profil tar-riskju ta' investimenti li jagħmlu ħsara ambjentali jew soċjali. Fejn xieraq, jenħtieġ li r-rapport tal-EIOPA jagħti pariri dwar il-bidliet fid-Direttiva 2009/138/KE u fl-atti delegati u ta' implimentazzjoni adottati skont dik id-Direttiva. Jenħtieġ li jkun possibbli li l-EIOPA tinvestiga wkoll jekk ikunx xieraq li jitqiesu ċerti riskji ambjentali, minbarra r-riskji relatati mat-tibdil fil-klima, u kif għandu jsir dan. Pereżempju, jekk l-evidenza tissuġġerixxi hekk, l-EIOPA tista' tanalizza l-ħtieġa għall-estensjoni tal-analiżijiet tax-xenarji kif introdotti minn din id-Direttiva fil-kuntest tar-riskji relatati mat-tibdil fil-klima għal riskji ambjentali oħrajn.

(96)

It-tibdil fil-klima qed jaffettwa l-frekwenza u s-severità tal-katastrofi naturali, li t-tnejn li huma x'aktarx jiżdiedu aktar minħabba d-degradazzjoni ambjentali u t-tniġġis. Dan jista' jibdel ukoll l-iskopertura tal-impriżi tal-assigurazzjoni u tar-riassigurazzjoni għar-riskju ta' katastrofi naturali u jrendi invalidi l-parametri standard għar-riskju ta' katastrofi naturali stipulati fir-Regolament Delegat (UE) 2015/35. Sabiex jiġi żgurat li ma jkun hemm l-ebda diskrepanza persistenti bejn il-parametri standard għar-riskju ta' katastrofi naturali u l-iskopertura attwali tal-kumpaniji tal-assigurazzjoni u tar-riassigurazzjoni għal tali riskji, jenħtieġ li l-EIOPA tirrieżamina regolarment l-ambitu tal-modulu ta' riskju ta' katastrofi naturali u l-kalibrazzjonijiet tal-parametri standard tiegħu. Għal dak l-għan, jenħtieġ li l-EIOPA tqis l-aħħar evidenza disponibbli mix-xjenza klimatika u, fejn jinstabu diskrepanzi, jenħtieġ li tippreżenta opinjoni lill-Kummissjoni kif xieraq.

(97)

Jenħtieġ li r-rekwiżiti stipulati fl-Artikolu 308b(12) tad-Direttiva 2009/138/KE jiġu emendati sabiex jiġu żgurati konsistenza mal-qafas bankarju u kundizzjonijiet ekwi fit-trattament tal-iskoperturi għall-gvernijiet ċentrali jew għall-banek ċentrali tal-Istati Membri denominati u ffinanzjati fil-munita domestika ta' kwalunkwe Stat Membru. Għal dak il-fini, jenħtieġ li jiġi introdott reġim ta' anterjorità għal tali skoperturi biex l-iskoperturi rilevanti jiġu eżentati mill-imposti kapitali tar-riskju tal-firxa u tal-konċentrazzjoni tas-suq, dment li l-iskoperturi jkunu ġġarrbu qabel l-1 ta' Jannar 2023.

(98)

F'xi każijiet, il-gruppi tal-assigurazzjoni jew tar-riassigurazzjoni jiddependu ħafna fuq l-użu tal-miżura tranżizzjonali fuq ir-rati tal-imgħax mingħajr riskju u tal-miżura tranżizzjonali fuq id-dispożizzjonijiet tekniċi. Din id-dipendenza tista' tirrappreżenta b'mod skorrett il-pożizzjoni attwali tas-solvenza tal-grupp. Għalhekk, jenħtieġ li l-gruppi tal-assigurazzjoni jew tar-riassigurazzjoni jkunu meħtieġa jiżvelaw l-impatt fuq il-pożizzjoni ta' solvenza tagħhom tas-suppożizzjoni li l-fondi proprji li jirriżultaw minn dawk il-miżuri tranżizzjonali ma humiex disponibbli sabiex ikopru r-Rekwiżit Kapitali tas-Solvenza tal-grupp. Jenħtieġ li l-awtoritajiet superviżorji jkollhom ukoll is-setgħa li jieħdu miżuri xierqa sabiex l-użu tal-miżuri jkun jirrifletti b'mod xieraq il-pożizzjoni finanzjarja tal-grupp. Madankollu, jenħtieġ li dawk il-miżuri ma jaffettwawx l-użu, minn impriżi tal-assigurazzjoni jew tar-riassigurazzjoni relatati, ta' dawk il-miżuri tranżizzjonali meta jikkalkolaw ir-Rekwiżit Kapitali tas-Solvenza individwali tagħhom.

(99)

Id-Direttiva 2009/138/KE tipprevedi miżuri tranżizzjonali għar-rati tal-imgħax mingħajr riskju u għad-dispożizzjonijiet tekniċi li huma soġġetti għal approvazzjoni superviżorja u li japplikaw fir-rigward ta' kuntratti li jwasslu għal obbligi tal-assigurazzjoni u tar-riassigurazzjoni li ġew konklużi qabel l-2016. Filwaqt li jenħtieġ li l-miżuri tranżizzjonali jħeġġu lill-impriżi sabiex jimxu b'mod kemm jista' jkun puntwali lejn il-konformità ma' dik id-Direttiva, l-applikazzjoni ta' miżuri tranżizzjonali approvati għall-ewwel darba ferm wara l-2016 x'aktarx li tnaqqasir-ritmu tal-perkors. Għalhekk, jenħtieġ li tali approvazzjoni tal-użu ta' dawk il-miżuri tranżizzjonali tkun ristretta għal każijiet li fihom impriża tal-assigurazzjoni jew tar-riassigurazzjoni ssir għall-ewwel darba soġġetta għar-regoli tad-Direttiva 2009/138/KE u meta impriża tkun aċċettat portafoll ta' kuntratti tal-assigurazzjoni jew tar-riassigurazzjoni u l-impriża trasferenti tkun applikat miżura tranżizzjonali fir-rigward tal-obbligi relatati ma' dak il-portafoll qabel it-trasferiment.

(100)

Sabiex jitqiesu l-iżviluppi tas-suq u jiġu ssupplimentati ċerti aspetti tekniċi dettaljati ta' din id-Direttiva, jenħtieġ li l-Kummissjoni tiġi delegata s-setgħa li tadotta atti f'konformità mal-Artikolu 290 tat-Trattat dwar il-Funzjonament tal-Unjoni Ewropea (TFUE) fir-rigward tal-kriterji għall-identifikazzjoni ta' impriżi u gruppi żgħar u mhux kumplessi, tat-trattament tar-riskju li jġibu magħhom il-kriptoassi fis-submodulu tar-riskju tas-suq, tal-kjarifiki fir-rigward tal-investimenti fit-tul, tal-kriterji għal rappurtar superviżorju limitat għall-impriżi tal-assigurazzjoni u tar-riassigurazzjoni captive, tal-valwazzjoni deterministika prudenti tal-aħjar stima, tal-applikazzjoni tal-approċċ simplifikat għall-fini tal-kalkolu tas-solvenza tal-grupp, tal-informazzjoni li għandha tiġi inkluża fir-rapport superviżorju regolari tal-grupp, u tal-estensjoni tal-iskadenzi tar-rappurtar f'ċirkostanzi eċċezzjonali. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet. B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(101)

Sabiex tiġi żgurata l-applikazzjoni armonizzata ta' din id-Direttiva, jenħtieġ li l-EIOPA tiżviluppa abbozzi ta' standards tekniċi regolatorji sabiex tispeċifika aktar il-fatturi li għandhom jiġu kkunsidrati mill-awtoritajiet superviżorji għall-fini tal-identifikazzjoni tar-relazzjoni bejn impriżi differenti li jistgħu jifformaw parti minn grupp. Jenħtieġ li l-Kummissjoni tissupplimenta din id-Direttiva billi tadotta l-istandards tekniċi regolatorji żviluppati mill-EIOPA permezz ta' atti delegati skont l-Artikolu 290 TFUE u f'konformità mal-Artikoli 10 sa 14 tar-Regolament (UE) Nru 1094/2010. Jenħtieġ ukoll li l-Kummissjoni tingħata s-setgħa li tadotta l-istandards tekniċi ta' implimentazzjoni żviluppati mill-EIOPA rigward xi elementi metodoloġiċi speċifiċi relatati mal-valwazzjoni deterministika prudenti tal-aħjar stima għall-obbligi tal-ħajja permezz ta' atti ta' implimentazzjoni skont l-Artikolu 291 TFUE u f'konformità mal-Artikolu 15 tar-Regolament (UE) Nru 1094/2010.

(102)

Minħabba li l-objettivi ta' din id-Direttiva, jiġifieri li jingħataw inċentivi għall-assiguraturi biex jikkontribwixxu għall-finanzjament sostenibbli fit-tul tal-ekonomija, li tittejjeb is-sensittività għar-riskju, li tittaffa l-volatilità eċċessiva fuq terminu qasir fil-pożizzjonijiet ta' solvenza tal-assiguraturi, li jittejbu l-kwalità, il-konsistenza u l-koordinazzjoni tas-superviżjoni tal-assigurazzjoni fl-Unjoni kollha u li tittejjeb il-protezzjoni tad-detenturi ta' poloz u tal-benefiċjarji, u li tiġi indirizzata aħjar l-akkumulazzjoni potenzjali ta' riskju sistemiku fis-settur tal-assigurazzjoni, ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-iskala u l-effetti tagħhom, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità kif stabbilit f'dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(103)

Ir-Renju Unit sar pajjiż terz fl-1 ta' Frar 2020 u d-dritt tal-Unjoni ma baqax japplika għar-Renju Unit u fih fil-31 ta' Diċembru 2020. Minħabba li d-Direttiva 2009/138/KE għandha diversi dispożizzjonijiet li jindirizzaw l-ispeċifiċitajiet ta' Stati Membri partikolari, meta t-tali dispożizzjonijiet jikkonċernaw speċifikament lir-Renju Unit, dawn ma baqgħux validi u, għalhekk, jenħtieġ li jitħassru.

(104)

Il-kalibrazzjonijiet li jintużaw għall-atti delegati u l-atti ta' implimentazzjoni adottati mill-Kummissjoni spiss ikunu bbażati fuq data li hija influwenzata ħafna mill-inklużjoni tad-data mis-suq tar-Renju Unit. Għalhekk, jenħtieġ li l-kalibrazzjonijiet kollha li jiddaħħlu għall-kalkoli tar-Rekwiżit Kapitali tas-Solvenza u r-Rekwiżit Kapitali Minimu jiġu rieżaminati biex jiġi ddeterminat jekk humiex dipendenti bla bżonn fuq data mis-suq tar-Renju Unit u, fejn applikabbli, jenħtieġ li tali data tiġi eliminata mis-settijiet tad-data rilevanti, sakemm ma tkun disponibbli l-ebda data oħra.

(105)

Jenħtieġ li jiġi żgurat li t-trattament prudenzjali tal-investimenti fit-titolizzazzjoni, inkluż titolizzazzjoni sempliċi, trasparenti u standardizzata (STS), jirrifletti b'mod xieraq ir-riskji reali, u li r-rekwiżiti kapitali assoċjati ma' dawn l-investimenti jkunu orjentati lejn ir-riskju. Għal dak l-għan, jenħtieġ li l-Kummissjoni tivvaluta l-adegwatezza tal-kalibrazzjonijiet eżistenti għall-investimenti f'titolizzazzjonijiet li huma stipulati fl-atti delegati adottati skont id-Direttiva 2009/138/KE, filwaqt li tqis id-data tas-suq disponibbli, u l-konsistenza tagħhom mar-rekwiżiti kapitali li huma applikabbli għal investimenti f'titoli oħra b'introjtu fiss. Abbażi ta' din il-valutazzjoni, u fejn xieraq, jenħtieġ li l-Kummissjoni tqis li temenda l-att delegat li jistabbilixxi r-rekwiżiti kapitali applikabbli għall-investimenti fit-titolizzazzjoni. Dawn l-emendi, li jenħtieġ li jkunu bbażati fuq ir-riskju u bbażati fuq l-evidenza, jistgħu jinkludu l-introduzzjoni ta' sett aktar granulari ta' fatturi tar-riskju skont il-klassifikazzjoni tas-segmenti tat-titolizzazzjoni, jew li jiddiferenzjaw bejn tipi differenti ta' titolizzazzjoni mhux STS skont ir-riskji tagħhom.

(106)

Għalhekk jenħtieġ li d-Direttiva 2009/138/KE tiġi emendata skont dan,

(1)

fl-Artikolu 2(3), il-punt (a)(iv) huwa sostitwit b'dan li ġej:

;

(2)

fl-Artikolu 4(1), il-punti (a), (b) u (c) huma sostitwiti b'dan li ġej:

;

(3)

l-Artikolu 6 huwa emendat kif ġej:

(4)

fl-Artikolu 8, jitħassar il-punt (3);

(5)

l-Artikolu 13 huwa emendat kif ġej:

(6)

fl-Artikolu 18(1), jiżdied il-punt li ġej:

;

(7)

fl-Artikolu 23(1), jiżdied il-punt li ġej:

;

(8)

fl-Artikolu 24(2), it-tieni subparagrafu, il-kliem “id-Direttiva 2004/39/KE” huwa sostitwit bil-kliem “id-Direttiva 2014/65/UE”;

(9)

l-Artikolu 25 huwa emendat kif ġej:

(10)

fl-Artikolu 25a, il-kliem “l-Awtorità Superviżorja Ewropea (l-Awtorità Ewropea tal-Assigurazzjoni u l-Pensjonijiet tax-Xogħol) (‘EIOPA’) stabbilita bir-Regolament (UE) Nru 1094/2010 tal-Parlament Ewropew u tal-Kunsill (1)” huwa sostitwit bil-kelma “l-EIOPA”;

(11)

fl-Artikolu 26, jiżdied il-paragrafu li ġej:

(12)

fl-Artikolu 29, il-paragrafi 3 u 4 huma sostitwiti b'dan li ġej:

(13)

jiddaħħlu l-artikoli li ġejjin:

(14)

fl-Artikolu 30(2), it-tielet subparagrafu huwa sostitwit b'dan li ġej:

“Is-superviżjoni finanzjarja skont il-paragrafu 1 għandha tinkludi verifika, rigward in-negozju kollu tal-impriża tal-assigurazzjoni u tar-riassigurazzjoni, is-sistema ta' governanza tagħha, l-istat ta' solvenza tagħha, l-istabbiliment tad-dispożizzjonijiet tekniċi, l-assi tagħha u l-fondi proprji eliġibbli, f'konformità mar-regoli stipulati jew mal-prattika segwita fl-Istat Membru ta' domiċilju skont id-dispożizzjonijiet adottati fil-livell tal-Unjoni.”

(15)

l-Artikolu 35 huwa emendat kif ġej:

(16)

jiddaħħlu l-artikoli li ġejjin:

(17)

fl-Artikolu 36(2), il-punt (a) huwa sostitwit b'dan li ġej:

;

(18)

l-Artikolu 37 huwa emendat kif ġej:

(19)

fl-Artikolu 40, jiżdiedu l-paragrafi li ġejjin:

“Il-membri tal-korpi amministrattivi, maniġerjali u superviżorji tal-impriża tal-assigurazzjoni jew tar-riassigurazzjoni għandhom f'kull ħin ikunu ta' reputazzjoni tajba u jkollhom kollettivament biżżejjed għarfien, ħiliet u esperjenza biex iwettqu d-dmirijiet tagħhom.

Il-membri tal-korpi amministrattivi, maniġerjali u superviżorji ma għandhomx ikunu nstabu ħatja ta' xi reat serju jew reati ripetuti relatati mal-ħasil tal-flus jew il-finanzjament tat-terroriżmu jew reati oħra li jqajmu dubji dwar ir-reputazzjoni tajba tagħhom, tal-anqas, fl-għaxar snin ta' qabel is-sena li fiha jkunu qed iwettqu jew ser iwettqu dmirijiethom fl-impriża.”

(20)

l-Artikolu 41 huwa emendat kif ġej:

(21)

fl-Artikolu 42, il-paragrafi 2 u 3 huma sostitwiti b'dawn li ġejjin:

(22)

l-Artikolu 44 huwa emendat kif ġej:

(23)

l-Artikolu 45 huwa emendat kif ġej:

(24)

jiddaħħal l-artikolu li ġej:

(25)

l-Artikolu 51 huwa sostitwit b’dan li ġej:

(26)

jiddaħħal l-artikolu li ġej:

(27)

l-Artikolu 52 huwa emendat kif ġej:

(28)

fl-Artikolu 53, il-paragrafu 4 huwa sostitwit b'dan li ġej:

(29)

fl-Artikolu 56, jiżdied il-paragrafu li ġej:

“L-EIOPA għandha tiżviluppa soluzzjonijiet tal-IT għall-proċeduri, il-formati u l-mudelli msemmijin fit-tieni paragrafu, inkluż għall-istruzzjonijiet.”

(30)

fl-Artikolu 58(3), il-punti (a) u (b) huma sostitwiti b'dan li ġej:

(*11)  Id-Direttiva 2009/65/KE tal-Parlament Ewropew u tal-Kunsill tat-13 ta' Lulju 2009 dwar il-koordinazzjoni ta' liġijiet, regolamenti u dispożizzjonijiet amministrattivi fir-rigward tal-impriżi ta' investiment kollettiv f'titoli trasferibbli (UCITS) (ĠU L 302, 17.11.2009, p. 32).”;"

(31)

fl-Artikolu 60(1), il-punt (a), il-kliem “il-punt 2 tal-Artikolu 1a tad-Direttiva 85/611/KEE” huwa sostitwit bil-kliem “l-Artikolu 2(1), il-punt (b), tad-Direttiva 2009/65/KE”;

(32)

fl-Artikolu 62, l-ewwel paragrafu, l-ewwel sentenza hija sostitwita b'dan li ġej:

“Meta l-influwenza eżerċitata mill-persuni msemmijin fl-Artikolu 57 x'aktarx li taħdem kontra l-ġestjoni tajba u prudenti ta' impriża tal-assigurazzjoni jew tar-riassigurazzjoni, l-Istati Membri għandhom jesiġu lill-awtorità superviżorja tal-Istat Membru ta' domiċilju ta' dik l-impriża li fiha tinżamm, titfittex jew tiżdied il-holding kwalifikanti, biex tieħu l-miżuri xierqa biex ittemm dik is-sitwazzjoni.”

(33)

fl-Artikolu 63, it-tieni paragrafu, il-kliem “id-Direttiva 2004/39/KE” huma sostitwiti bil-kliem “id-Direttiva 2014/65/UE”;

(34)

fl-Artikolu 64, jiżdied il-paragrafu li ġej:

“L-ewwel, it-tieni u t-tielet paragrafi ta' dan l-Artikolu ma għandhomx jipprevjenu lill-awtoritajiet superviżorji milli jippubblikaw l-eżitu tat-testijiet tal-istress imwettqa f'konformità mal-Artikolu 34(4) ta' din id-Direttiva jew l-Artikolu 32 tar-Regolament (UE) Nru 1094/2010 jew milli jittrażmettu l-eżitu tat-testijiet tal-istress lill-EIOPA għall-finijiet tal-pubblikazzjoni mill-EIOPA tar-riżultati tat-testijiet tal-istress fl-Unjoni kollha.”

(35)

fl-Artikolu 68(1), jiddaħħal is-subparagrafu li ġej wara l-ewwel subparagrafu:

“L-Artikolu 64, l-ewwel paragrafu, u l-Artikolu 67 ma għandhomx jipprevjenu l-iskambju ta' informazzjoni bejn l-awtoritajiet superviżorji u l-awtoritajiet tat-taxxa fl-istess Stat Membru sa fejn tali skambju jkun permess mil-liġi nazzjonali. Meta dik l-informazzjoni toriġina fi Stat Membru ieħor, għandha tiġi skambjata biss bil-ftehim espliċitu tal-awtorità minn fejn toriġina l-informazzjoni.”

(36)

fl-Artikolu 70, il-paragrafu 1 huwa emendat kif ġej:

(37)

fl-Artikolu 72(1), il-formulazzjoni introduttorja hija sostitwit b’dan li ġej:

(38)

l-Artikolu 77 huwa emendat kif ġej:

(39)

l-Artikolu 77a huwa sostitwit b'dan li ġej:

(40)

fl-Artikolu 77b(1), jiżdied is-subparagrafu li ġej:

“Għall-finijiet tal-ewwel subparagrafu, il-punti (i), kuntratt kollettiv fuq il-ħajja għandu jitqies bħala kuntratt uniku.”

(41)

l-Artikolu 77d huwa emendat kif ġej:

(a)

il-paragrafi 1 sa 4 huma sostitwiti b'dawn li ġejjin: “1.   L-Istati Membri għandhom jiżguraw li impriża tal-assigurazzjoni jew tar-riassigurazzjoni tkun tista' tapplika aġġustament tal-volatilità għall-istruttura ta' terminu tar-rata tal-imgħax mingħajr riskju rilevanti sabiex tikkalkola l-aħjar stima msemmija fl-Artikolu 77(2) soġġetta għal approvazzjoni minn qabel mill-awtoritajiet superviżorji meta jiġu ssodisfati tal-anqas il-kundizzjonijiet li ġejjin: (a) l-aġġustament tal-volatilità għal munita partikolari jiġi applikat fil-kalkolu tal-aħjar stima tal-obbligi kollha tal-assigurazzjoni u tar-riassigurazzjoni tal-impriża denominati f'dik il-munita fejn l-istruttura ta' terminu tar-rata tal-imgħax mingħajr riskju rilevanti użata sabiex tiġi kkalkolata l-aħjar stima għal dawk l-obbligi ma tinkludix aġġustament ta' korrispondenza kif imsemmi fl-Artikolu 77b; (b) l-impriża turi għas-sodisfazzjon tal-awtorità superviżorja li għandha proċessi adegwati fis-seħħ sabiex tikkalkola l-aġġustament tal-volatilità skont il-paragrafi 3 u 4 ta' dan l-Artikolu. 1a.   Minkejja l-paragrafu 1 ta' dan l-Artikolu, l-impriżi tal-assigurazzjoni u tar-riassigurazzjoni li applikaw aġġustament tal-volatilità għall-istruttura ta' terminu tar-rata tal-imgħax mingħajr riskju rilevanti sabiex jikkalkolaw l-aħjar stima msemmija fl-Artikolu 77(2) qabel id-29 ta’ Jannar 2026 jistgħu, mingħajr approvazzjoni minn qabel mill-awtorità superviżorja, ikomplu japplikaw aġġustament tal-volatilità dment li jikkonformaw mal-kundizzjonijiet għal approvazzjoni minn qabel skont il-paragrafu 1, ta' dan l-Artikolu mit-30 ta’ Jannar 2027. 1b.   L-Istati Membri għandhom jiżguraw li l-awtoritajiet superviżorji jkollhom is-setgħa li jirrikjedu li impriża tal-assigurazzjoni jew tar-riassigurazzjoni tieqaf tapplika aġġustament tal-volatilità għall-istruttura ta' terminu tar-rata tal-imgħax mingħajr riskju rilevanti sabiex tikkalkola l-aħjar stima msemmija fl-Artikolu 77(2) meta l-impriża ma tibqax tissodisfa l-kundizzjonijiet għal approvazzjoni minn qabel stabbilita mil-liġi nazzjonali f’konformità mal-paragrafu 1 ta' dan l-Artikolu. Meta impriża terġa’ tistabbilixxi l-konformità ma’ dawk il-kundizzjonijiet, hija tista' titlob approvazzjoni minn qabel mill-awtoritajiet superviżorji sabiex tapplika aġġustament tal-volatilità għall-istruttura ta' terminu tar-rata tal-imgħax mingħajr riskju rilevanti sabiex tikkalkola l-aħjar stima skont il-paragrafu 1 ta' dan l-Artikolu. 1c.   L-impriżi tal-assigurazzjoni u tar-riassigurazzjoni jistgħu, soġġett għal approvazzjoni minn qabel mill-awtorità superviżorja, japplikaw aġġustament speċifiku għall-impriża għall-firxa b'riskju kkoreġut għall-munita msemmija fil-paragrafu 3, fejn: (a) il-firxa b'riskju kkoreġut tkun qabżet il-firxa b'riskju kkoreġut kkalkolata fuq il-bażi tal-portafoll ta' investimenti tal-impriża fi strumenti ta' dejn għall-erba' perjodi ta' rappurtar trimestrali qabel id-data tar-rappurtar; u (b) l-informazzjoni li hija inerenti għall-assi rilevanti tal-impriża u li hija rrapportata mill-impriża f'konformità mal-Artikolu 35(1) sa (4) tkun ta' kwalità suffiċjenti biex tippermetti kalkolu sod u affidabbli ta' dak l-aġġustament. L-aġġustament għandu jikkorrispondi għall-anqas wieħed minn 105 % u l-proporzjon tal-firxa b'riskju kkoreġut kkalkolata abbażi tal-portafoll ta' investimenti tal-impriża fi strumenti ta' dejn u l-firxa b'riskju kkoreġut abbażi tal-portafoll ta' referenza għall-munita rilevanti. Il-firxa b'riskju kkoreġut abbażi tal-portafoll ta' investimenti tal-impriża fi strumenti ta' dejn għandha tiġi kkalkolata bl-istess mod bħall-firxa b'riskju kkoreġut abbażi tal-portafoll ta' referenza għall-munita rilevanti, iżda bl-użu ta' data speċifika għall-impriża dwar il-piżijiet u d-durata medja tas-subklassijiet rilevanti fil-portafoll ta' investimenti tal-impriża fi strumenti ta' dejn għall-munita rilevanti. Meta jiġi applikat l-aġġustament, l-aġġustament tal-volatilità ma għandux jiżdied bl-aġġustament tal-volatilità makro msemmi fil-paragrafu 4. L-impriżi tal-assigurazzjoni u tar-riassigurazzjoni għandhom jieqfu japplikaw l-aġġustament immedjatament meta jżidu l-firxa b'riskju kkoreġut tal-munita msemmija fil-paragrafu 3 għal żewġ perjodi ta' rappurtar trimestrali konsekuttivi. 2.   Għal kull munita rilevanti, l-aġġustament tal-volatilità għall-istruttura ta' terminu tar-rata tal-imgħax mingħajr riskju rilevanti għandu jkun ibbażat fuq il-firxa bejn ir-rata tal-imgħax li tista' tinkiseb minn portafoll ta' referenza ta' investimenti fi strumenti ta' dejn għal dik il-munita u r-rati tal-istruttura bażika ta' terminu tar-rata tal-imgħax mingħajr riskju rilevanti għal dik il-valuta. Il-portafoll ta' referenza ta' investimenti fi strumenti ta' dejn għal munita għandu jkun rappreżentattiv għall-assi li huma denominati f'dik il-munita u li fih l-impriżi tal-assigurazzjoni u tar-riassigurazzjoni jinvestu biex ikopru l-aħjar stima għall-obbligi tal-assigurazzjoni u tar-riassigurazzjoni denominati f'dik il-valuta. 3.   L-ammont tal-aġġustament tal-volatilità għar-rati tal-imgħax mingħajr riskju għal munita għandu jiġi kkalkolat kif ġej: VAcu= 85 % · CSSRcu · RCScu fejn: (a) VAcu hija l-aġġustament tal-volatilità għal munita cu ; (b) CSSRcu hija l-proporzjon tas-sensittività tal-firxa tal-kreditu ta' impriża tal-assigurazzjoni jew tar-riassigurazzjoni għall-munita cu ; (c) RCScu hija l-firxa b'riskju kkoreġut għall-munita cu . VAcu għandha tapplika għar-rati tal-imgħax mingħajr riskju rilevanti tal-istruttura ta' terminu li ma humiex derivati permezz ta' estrapolazzjoni f'konformità mal-Artikolu 77a. Meta l-parti estrapolata tar-rati tal-imgħax mingħajr riskju rilevanti tqis l-informazzjoni minn strumenti finanzjarji għajr bonds skont l-Artikolu 77a(1), VAcu għandha tapplika wkoll għar-rati tal-imgħax mingħajr riskju derivati minn dawk l-istrumenti finanzjarji. L-estrapolazzjoni tal-istruttura ta' terminu tar-rata tal-imgħax mingħajr riskju rilevanti għandha tkun ibbażata fuq dawk ir-rati tal-imgħax mingħajr riskju aġġustati. Is-CSSRcu ma għandhiex tkun negattiva u ma għandhiex tkun ogħla minn wieħed. Hija għandha tieħu valuri anqas minn wieħed fejn is-sensittività tal-assi ta' impriża tal-assigurazzjoni jew tar-riassigurazzjoni f'munita għall-bidliet fil-firxiet tal-kreditu tkun anqas mis-sensittività tad-dispożizzjonijiet tekniċi ta' dik l-impriża f'dik il-munita għal bidliet fir-rati tal-imgħax. RCScu għandha tiġi kkalkolata bħala d-differenza bejn il-firxa msemmija fil-paragrafu 2 u l-porzjon ta' dik il-firxa li huwa attribwibbli għal valutazzjoni realistika tat-telf mistenni jew tal-kreditu mhux mistenni jew ta' riskju ieħor tal-assi. Il-porzjon tal-firxa huwa attribwibbli għal valutazzjoni realistika tat-telf mistenni, ir-riskju ta' kreditu mhux mistenni jew kwalunkwe riskju ieħor għandu jiġi kkalkolat bħala perċentwal tal-firxiet. Dak il-perċentwal għandu jonqos hekk kif jiżdiedu l-firxiet u għandu mill-anqas jagħmel distinzjoni bejn it-tliet każijiet li ġejjin: (a) fejn il-firxiet ma jaqbżux il-medja fit-tul tagħhom; (b) fejn il-firxiet jaqbżu l-medja fit-tul tagħhom iżda ma jaqbżux id-doppju tal-medja fit-tul tagħhom; (c) fejn il-firxiet jaqbżu d-doppju tal-medja fit-tul tagħhom. Il-korrezzjoni tar-riskju qatt ma għandha taqbeż perċentwal xieraq tal-firxiet medji fit-tul. B'deroga mill-ewwel subparagrafu, l-impriżi tal-assigurazzjoni u tar-riassigurazzjoni li jkollhom l-uffiċċju prinċipali tagħhom fi Stat Membru b'munita marbuta mal-euro li tikkonforma mal-kriterji dettaljati għall-aġġustamenti għall-valuti marbutin mal-euro għall-fini li jiġi ffaċilitat il-kalkolu tas-submodulu tar-riskju tal-munita, kif stabbilit skont l-Artikolu 111(1), il-punt (p), meta jiġi kkalkolat l-aġġustament tal-volatilità għar-rati tal-imgħax mingħajr riskju għall-munita marbuta u l-aġġustament tal-volatilità għar-rati tal-imgħax mingħajr riskju għall-euro, għandhom jitħallew jikkalkolaw CSSRcu uniku kemm għall-munita lokali tagħhom kif ukoll għall-euro, billi jqisu b'mod konġunt l-assi u l-obbligazzjonijiet denominati f'euro u l-munita lokali tagħhom. 4.   Mingħajr preġudizzju għall-paragrafu 1c, l-aġġustament tal-volatilità għall-euro għandu jiżdied b'aġġustament tal-volatilità makro. L-aġġustament tal-volatilità makro għandu jiġi kkalkolat kif ġej: VAEuro,macro= 85 %·CSSREuro·max(RCSco-1.3·RCSEuro;0)·ωco fejn: (a) VAEuro,macro hija l-aġġustament tal-volatilità makro għal pajjiż co ; (b) CSSREuro hija l-proporzjon tas-sensittività tal-firxa tal-kreditu ta' impriża tal-assigurazzjoni jew tar-riassigurazzjoni għall-euro; (c) RCSco hija l-firxa b'riskju kkoreġut għall-pajjiż co ; (d) RCSEuro hija l-firxa b'riskju kkoreġut għall-euro; (e) ωco hija l-fattur ta' aġġustament tal-pajjiż għall-pajjiż co. CSSREuro għandha tiġi kkalkolata bħala l-proporzjon tas-sensittività tal-firxa ta' kreditu ta' impriża tal-assigurazzjoni jew tar-riassigurazzjoni għall-euro f'konformità mal-paragrafu 3. RCSco għandha tiġi kkalkolata bl-istess mod bħall-firxa b'riskju kkoreġut għall-euro skont il-paragrafu 3, iżda fuq il-bażi ta' portafoll ta' referenza li huwa rappreżentattiv għall-assi li l-impriżi tal-assigurazzjoni u tar-riassigurazzjoni qed jinvestu fihom sabiex ikopru l-aħjar stima għall-obbligi tal-assigurazzjoni u tar-riassigurazzjoni ta' prodotti mibjugħin fis-suq tal-assigurazzjoni ta' dak il-pajjiż u denominati f'euro. RCSEuro hija kkalkolata bħala l-firxa b'riskju kkoreġut għall-euro f'konformità mal-paragrafu 3. Il-fattur ta' aġġustament tal-pajjiż imsemmi fl-ewwel subparagrafu, il-punt (e), għandu jiġi kkalkolat kif ġej: ωco= max(min (((RCSco*-0.6 %)/0.3 %);1);0) Fejn RCSco * hija l-firxa b'riskju kkoreġut għall-pajjiż co kif imsemmi fl-ewwel subparagrafu, il-punt (c), immoltiplikata bil-perċentwal ta' investimenti fi strumenti ta' dejn fir-rigward tal-assi totali miżmumin mill-impriżi tal-assigurazzjoni u tar-riassigurazzjoni awtorizzati fil-pajjiż co . 4a.   Biex tiġi kkalkolata l-firxa sottostanti għall-aġġustament tal-volatilità, għal kull munita u għal kull pajjiż, il-firxa msemmija fil-paragrafi 2 u 4 għandha tkun is-somma tal-valur ponderat tal-firxa medja tal-munita fuq il-bonds tal-gvern u l-firxa medja tal-munita fuq bonds għajr bonds tal-gvern, self, u titolizzazzjonijiet. Għall-finijiet ta' dak il-kalkolu, il-piżijiet rispettivi għandhom ikunu l-proporzjon tal-valur tal-bonds tal-gvern inklużi fil-portafoll ta' referenza tal-assi għal dik il-munita jew pajjiż u l-valur tal-assi kollha inklużi f'dak il-portafoll ta' referenza, u l-proporzjon tal-valur tal-bonds għajr bonds tal-gvern, self u titolizzazzjonijiet inklużi fil-portafoll ta' referenza tal-assi għal dik il-munita jew pajjiż u l-valur tal-assi kollha inklużi f'dak il-portafoll ta' referenza.” ;

(42)

l-Artikolu 77e huwa emendat kif ġej:

(43)

l-Artikolu 86 huwa emendat kif ġej:

(44)

fl-Artikolu 92, il-paragrafi 1a u 2 huma sostitwiti b’dan li ġej:

(*12)  Ir-Regolament (UE) 2019/2033 tal-Parlament Ewropew u tal-Kunsill tas-27 ta' Novembru 2019 dwar ir-rekwiżiti prudenzjali tad-ditti tal-investiment u li jemenda r-Regolamenti (UE) Nru 1093/2010, (UE) Nru 575/2013, (UE) Nru 600/2014 u (UE) Nru 806/2014 (ĠU L 314, 5.12.2019, p. 1).”;"

(45)

fl-Artikolu 95, it-tieni subparagrafu huwa sostitwit b'dan li ġej:

“Għal dak l-għan, u fejn applikabbli, l-impriżi tal-assigurazzjoni u tar-riassigurazzjoni għandhom jirreferu għal-lista ta' elementi ta' fondi proprji msemmijin fl-Artikolu 97(1).”

(46)

fl-Artikolu 96, l-ewwel paragrafu huwa sostitwit b'dan li ġej:

“Mingħajr preġudizzju għall-Artikolu 95 u għall-Artikolu 97(1), għall-finijiet ta' din id-Direttiva, għandhom jiġu applikati l-klassifikazzjonijiet li ġejjin:

(47)

fl-Artikolu 105, jiżdied il-paragrafu li ġej:

(48)

jiddaħħal l-artikolu li ġej:

(49)

fl-Artikolu 106, il-paragrafu 3 huwa sostitwit b'dan li ġej:

(50)

l-Artikolu 109 huwa sostitwit b'dan li ġej:

(51)

l-Artikolu 111 huwa emendat kif ġej:

(52)

fl-Artikolu 112, il-paragrafu 7 huwa sostitwit b'dan li ġej:

(53)

Fl-Artikolu 122, jiżdied il-paragrafu li ġej:

(54)

l-Artikolu 132 huwa emendat kif ġej:

(55)

fl-Artikolu 133(3), il-kliem “id-Direttiva 85/611/KEE” huwa sostitwit bil-kliem “id-Direttiva 2009/65/KE”;

(56)

jiddaħħal l-artikolu li ġej:

(*13)  Direttiva (UE) 2025/1 tal-Parlament Ewropew u tal-Kunsill tas-27 ta’ Novembru 2024 li tistabbilixxi qafas għall-irkupru u għar-riżoluzzjoni tal-impriżi tal-assigurazzjoni u tar-riassigurazzjoni u li temenda d-Direttivi 2002/47/KE, 2004/25/KE, 2007/36/KE, 2014/59/UE, (UE) 2017/1132 u r-Regolamenti (UE) Nru 1094/2010, (UE) Nru 648/2012, (UE) Nru 806/2014 u (UE) 2017/1129 (ĠU L, 2025/1, 8.1.2025, ELI: http://data.europa.eu/eli/dir/2025/1/oj).”;"

(57)

l-Artikolu 138(4) huwa emendat kif ġej:

(58)

l-Artikolu 139 huwa sostitwit b'dan li ġej:

(59)

l-Artikolu 141 huwa sostitwit b'dan li ġej:

(60)

Fl-Artikolu 144, jiżdied il-paragrafu li ġej:

(61)

fit-Titolu I, jiddaħħal il-kapitolu li ġej:

(62)

fl-Artikolu 145, il-paragrafu 2 huwa emendat kif ġej:

(63)

l-Artikolu 149 huwa sostitwit b'dan li ġej:

(64)

it-titolu tal-Kapitolu VIII, it-Taqsima 2A, huwa sostitwit b'dan li ġej:

“Notifika, attivitajiet transfruntieri sinifikanti u pjattaformi ta' kollaborazzjoni”

(65)

fl-Artikolu 152a, il-paragrafu 2 huwa sostitwit b'dan li ġej:

(66)

jiddaħħlu l-artikoli li ġejjin:

(67)

l-Artikolu 152b huwa emendat kif ġej:

(68)

l-Artikolu 153 huwa sostitwit b'dan li ġej:

(69)

l-Artikolu 212 huwa emendat kif ġej:

(70)

l-Artikolu 213 huwa emendat kif ġej:

(71)

jiddaħħlu l-artikoli li ġejjin: