(1)

Fl-20 ta’ Diċembru 2023, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet tal-bijodiżil li joriġinaw mir-Repubblika tal-Poplu taċ-Ċina (“il-pajjiż ikkonċernat”, “ir-RPĊ” jew “iċ-Ċina”) abbażi tal-Artikolu 5 tar-Regolament (UE) 2016/1036 tal-Parlament Ewropew u tal-Kunsill (“ir-Regolament bażiku”). Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (2) (“in-Notifika tal-Bidu”).

(2)

Il-Kummissjoni bdiet l-investigazzjoni wara lment li tressaq fis-7 ta’ Novembru 2023 mill-Bord Ewropew tal-Bijodiżil (“l-ilmentatur” jew “l-EBB”). L-ilment sar f’isem l-industrija tal-Unjoni tal-bijodiżil fis-sens tal-Artikolu 5(4) tar-Regolament bażiku. L-ilment kien fih evidenza ta’ dumping u tad-dannu materjali li jirriżulta, li kienet biżżejjed sabiex tiġġustifika l-bidu tal-investigazzjoni.

(3)

L-importazzjonijiet tal-bijodiżil bħalissa huma soġġetti għal miżuri anti-dumping meta joriġinaw mill-Istati Uniti tal-Amerka (“l-Istati Uniti”) (3) u għal miżuri kompensatorji meta joriġinaw mill-Arġentina (4), mill-Indoneżja (5) jew mill-Istati Uniti (6).

(4)

Fid-29 ta’ April 2024, l-ilmentatur talab ir-reġistrazzjoni tal-importazzjonijiet skont l-Artikolu 14(5) tar-Regolament bażiku. Il-Kummissjoni ma rreġistratx l-importazzjonijiet peress li l-kundizzjonijiet għall-applikazzjoni retroattiva deskritti fl-Artikolu 10(4) tar-Regolament bażiku tqiesu li ma ġewx issodisfati.

(5)

Fin-Notifika tal-Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni informat b’mod speċifiku lill-ilmentatur, lil produtturi magħrufa tal-Unjoni oħrajn, lill-produtturi esportaturi magħrufa u lill-awtoritajiet tar-RPĊ, lill-importaturi, lill-fornituri u lill-utenti magħrufa, lin-negozjanti, kif ukoll lill-assoċjazzjonijiet magħrufa li huma kkonċernati dwar il-bidu tal-investigazzjoni u stednithom jipparteċipaw.

(6)

Il-partijiet interessati kellhom l-opportunità li jikkummentaw dwar il-bidu tal-investigazzjoni u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali. L-ebda parti ma talbet seduta ta’ smigħ mal-Uffiċjal tas-Seduta. Il-Kummissjoni organizzat seduti ta’ smigħ mal-ilmentatur (flimkien ma’ assoċjazzjonijiet magħrufa li huma kkonċernati), mal-produttur esportatur inkluż fil-kampjun EcoCeres, u mal-importatur relatat ta’ Zhuoyue – Excelence New Energy BV.

(7)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(8)

Fin-Notifika tal-Bidu tagħha, il-Kummissjoni ddikjarat li hija kienet għażlet b’mod provviżorju kampjun tal-produtturi tal-Unjoni. Il-Kummissjoni għażlet kampjun ta’ tliet produtturi tal-Unjoni abbażi tal-akbar volum ta’ produzzjoni u bejgħ tal-prodott simili fl-Unjoni bejn l-1 ta’ Ottubru 2022 u t-30 ta’ Settembru 2023 irrapportat fl-istadju tal-bidu. Tqieset ukoll it-taħlita tal-prodott. It-tliet produtturi tal-Unjoni inklużi fil-kampjun kienu jirrappreżentaw madwar 12 % tal-volum totali stmat tal-produzzjoni tal-prodott simili fl-Unjoni u 23 % tal-produzzjoni u l-bejgħ tal-UE tal-produtturi li wieġbu għall-inkjesta. Il-Kummissjoni stiednet lill-partijiet interessati jikkummentaw dwar il-kampjun provviżorju. L-ilmentatur u l-produttur esportatur Ċiniż EcoCeres ipprovdew kummenti.

(9)

EcoCeres talab l-inklużjoni tal-produttur tal-Unjoni Neste fil-kampjun. Dan iddikjara li l-inklużjoni ta’ Neste kienet mistħoqqa biex tiġi żgurata r-rappreżentattività ġenerali tal-kampjun peress li jkun l-akbar produttur tal-Unjoni, li huwa responsabbli għal 15 % tal-volum totali stmat tal-produzzjoni tal-bijodiżil fl-Unjoni, u mingħajr il-kampjun ma jkunx rappreżentattiv f’termini tal-volum tal-produzzjoni jew tal-bejgħ. Dan sab l-inklużjoni ta’ Neste fil-kampjun mistħoqqa wkoll peress li dan ikun produttur kbir tat-tipi ta’ prodotti ta’ żejt veġetali idrotrattat (“HVO”), it-tip ta’ prodott ewlieni mibjugħ minn EcoCeres fis-suq tal-Unjoni.

(10)

Il-Kummissjoni analizzat id-dikjarazzjoni ta’ EcoCeres. L-ewwel nett, il-Kummissjoni nnotat li l-kampjun qies id-daqs tal-entitajiet legali individwali. F’dan ir-rigward, fid-dawl tal-kjarifiki fir-rigward tal-volum tal-produzzjoni ta’ Neste pprovduti mill-ilmentatur, id-dikjarazzjoni ta’ EcoCeres rigward il-volumi tal-produzzjoni rispettivi ta’ Neste fl-impjanti differenti tiegħu dehret li kienet eċċessiva. It-tieni, l-informazzjoni disponibbli fil-fajl uriet li, fil-perjodu ta’ investigazzjoni, il-produzzjoni tal-Unjoni kienet tikkonsisti fil-biċċa l-kbira minn ester metiliku tal-aċidi grassi (“FAME”); filwaqt li l-volumi tal-produzzjoni tal-HVO (7) kienu b’mod ċar aktar baxxi. It-tielet, il-kampjun provviżorju diġà qies din it-taħlita ta’ prodotti sal-punt li kien jinkludi lil Raffineria di Gela S.p.A., parti mill-Eni group, li timmanifattura l-HVO. Għalhekk, it-talba ta’ EcoCeres biex jiżdied Neste mal-kampjun ġiet miċħuda.

(11)

Fid-dawl tat-taħlita tal-materja prima tal-produtturi Ċiniżi (ibbażata fuq l-iskart), l-EBB sostna li Saipol, il-produttur tal-Unjoni inkluż fil-kampjun, li timmanifattura l-bijodiżil miż-żejt tal-lift, jenħtieġ li tiġi ssostitwita minn produttur li jimmanifattura l-bijodiżil minn materja prima avvanzata li jinsab fil-Ġermanja. L-EBB argumenta li l-industrija Ċiniża tal-bijodiżil ma tużax żejt tal-lift għall-manifattura tal-bijodiżil, peress li fil-biċċa l-kbira jużaw żejt tat-tisjir użat (“UCO”) li huwa disponibbli domestikament. Għaldaqstant, jekk Saipol tiġi kkonfermata fil-kampjun definittiv tal-produtturi tal-Unjoni, kważi nofs il-bejgħ tal-Unjoni tal-kampjun ma jistax jitqabbel direttament mal-importazzjonijiet Ċiniżi ta’ bijodiżil ibbażat fuq l-iskart. L-EBB argumenta li Verbio SE jkun produttur tal-UE inkluż fil-kampjun xieraq għall-investigazzjoni preżenti minħabba li jinsab fil-Ġermanja u l-impjanti ta’ Verbio jużaw materja prima avvanzata filwaqt li jużaw ukoll iż-żejt tal-lift għall-manifattura tal-bijodiżil.

(12)

Wara din id-dikjarazzjoni, il-Kummissjoni ċċarat li l-kriterji għall-għażla ta’ kampjun ta’ produtturi tal-Unjoni kienu l-volum tal-bejgħ jew tal-produzzjoni tal-kumpaniji kkunsidrati, kif ukoll it-taħlita tal-prodotti. Il-partijiet inklużi fil-kampjun fuq dik il-bażi kienu kkunsidrati rappreżentattivi għall-industrija tal-Unjoni kollha kemm hi. Konsegwentement, minkejja l-kummenti tal-EBB, il-Kummissjoni ma sabet l-ebda raġuni biex teskludi lil Saipol mill-kampjun tal-produtturi tal-Unjoni. Tabilħaqq, Saipol kienet fost l-akbar produtturi tal-bijodiżil (8) fl-Unjoni, kif innotat mill-ilmentatur innifsu. Barra minn hekk, Saipol tqieset bħala rappreżentattiva tal-industrija tal-Unjoni peress li timmanifattura l-bijodiżil billi tibda miż-żejt tal-lift, il-materja prima dominanti fl-Unjoni għall-produzzjoni tal-bijodiżil.

(13)

Barra minn hekk, l-inklużjoni ta’ impjant ta’ Verbio fil-kampjun ma tkunx ġustifikata minħabba li, kif indikat mill-EBB innifsu, il-volum tal-produzzjoni ta’ Masol Iberia Biodiesel S.L.U., waħda mit-tliet kumpaniji proposti għall-kampjun, kien ogħla b’mod sinifikanti. Barra minn hekk, Masol Iberia Biodiesel S.L.U. tiżgura li jkun jista’ jsir tqabbil bejn l-industrija tal-Unjoni u l-bejgħ tal-bijodiżil mill-produtturi esportaturi magħmul minn materja prima avvanzata. Għalhekk, it-talba biex Verbio SE tiġi inkluża ġiet miċħuda.

(14)

Madankollu, fid-dawl tal-użu tal-materja prima ewlenija kif irrapportat mill-partijiet Ċiniżi inklużi fil-kampjun, il-Kummissjoni qieset li huwa xieraq li jitkabbar il-volum ta’ bijodiżil ibbażat fuq il-UCO fil-kampjun tal-produtturi tal-Unjoni peress li dan itejjeb ir-rappreżentattività tat-taħlita tal-prodott tal-industrija tal-Unjoni vis-à-vis l-importazzjonijiet Ċiniżi u jiffaċilita t-tqabbil bejn il-prezzijiet tal-Unjoni u l-prezzijiet tal-importazzjoni Ċiniżi tal-bijodiżil. Għalhekk, il-Kummissjoni ddeċidiet li żżid lil Chevron Renewable Energy Group, produttur tal-bijodiżil ibbażat fil-Ġermanja li juża l-UCO bħala materja prima, mal-kampjun.

(15)

L-erba’ produtturi tal-Unjoni inklużi fil-kampjun kienu jirrappreżentaw madwar 15 % tal-volum totali stmat tal-produzzjoni tal-prodott simili fl-Unjoni u 28 % tal-produzzjoni u l-bejgħ tal-UE tal-produtturi li wieġbu għall-inkjesta.

(16)

Il-Kummissjoni stiednet lill-erba’ produtturi tal-Unjoni inklużi fil-kampjun biex iwieġbu għall-kwestjonarju. Hija stiednet ukoll lill-partijiet interessati jikkummentaw dwar il-kampjun rivedut. EcoCeres ipprovda kummenti.

(17)

EcoCeres iddikjara li d-deċiżjoni tal-kampjun ittieħdet abbażi ta’ bażi fattwali żbaljata. B’mod partikolari, iddikjarat li l-impjant ta’ Rotterdam ta’ Neste kellu kapaċità ta’ produzzjoni akbar minn dik ta’ Saipol u li l-Kummissjoni kienet issottovalutat il-produzzjoni ta’ HVO fl-UE (9). Għalhekk, EcoCeres talab l-inklużjoni ta’ mill-anqas entità/impjant wieħed ta’ Neste fil-kampjun, minflok jew flimkien ma’ Raffineria di Gela.

(18)

L-allegazzjoni li l-impjant ta’ Rotterdam ta’ Neste kellu kapaċità ta’ produzzjoni ta’ HVO li kienet ogħla mill-produzzjoni tal-bijodiżil ta’ Saipol ma turix li matul il-perjodu ta’ investigazzjoni, l-entità legali rilevanti fil-fatt kellha livell ta’ produzzjoni jew bejgħ tal-UE qrib tali kapaċità ta’ produzzjoni. Fl-istess ħin, kif spjegat fil-premessa (8) hawn fuq, il-volumi tal-produzzjoni u tal-bejgħ aktar milli l-kapaċità tal-produzzjoni huma elementi determinanti għal kumpanija li għandha tiġi inkluża (jew le) fil-kampjun. Fir-rigward tal-allegata sottovalutazzjoni tal-produzzjoni ta’ HVO fl-Unjoni, il-Kummissjoni nnotat li l-parti ppreżentat informazzjoni kontradittorja. Il-produzzjoni ta’ 5 miljun tunnellata ta’ HVO fl-Unjoni fl-2022 allegata minn EcoCeres kienet f’kontradizzjoni ma’ sottomissjonijiet oħra tagħha (10) li fiha, il-kapaċità (jiġifieri ċifra normalment ogħla mill-produzzjoni attwali) fl-2023 ta’ faċilitajiet ta’ produzzjoni indipendenti ta’ HVO fl-Unjoni ġiet irrapportata li tammonta għal 3 miljun tunnellata. Fid-dawl ta’ dan ta’ hawn fuq u sabiex ma jkunx hemm sovrarappreżentanza bla bżonn ta’ HVO fil-kampjun, it-talba ta’ EcoCeres dwar l-inklużjoni ta’ mill-anqas entità/impjant wieħed ta’ Neste fil-kampjun ġiet miċħuda.

(19)

Sabiex tiddeċiedi jekk il-kampjunar huwiex meħtieġ u, jekk iva, sabiex tagħżel kampjun, il-Kummissjoni talbet lil importaturi mhux relatati jipprovdu l-informazzjoni speċifikata fin-Notifika tal-Bidu.

(20)

Żewġ importaturi mhux relatati pprovdew l-informazzjoni mitluba u qablu li jiġu inklużi fil-kampjun. Minħabba l-għadd żgħir ta’ tweġibiet, il-Kummissjoni ddeċidiet li l-kampjunar ma kienx meħtieġ.

(21)

Sabiex tiddeċiedi jekk il-kampjunar huwiex meħtieġ u, jekk iva, sabiex tagħżel kampjun, il-Kummissjoni talbet lill-produtturi esportaturi kollha fir-RPĊ sabiex jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(22)

Tlieta u sittin (63) produttur esportatur fil-pajjiż ikkonċernat ipprovdew l-informazzjoni mitluba u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun ta’ tliet produtturi esportaturi/gruppi ta’ produtturi esportaturi abbażi tal-akbar volum rappreżentattiv ta’ esportazzjonijiet lejn l-Unjoni li seta’ jiġi investigat b’mod raġonevoli fiż-żmien disponibbli. F’konformità mal-Artikolu 17(2) tar-Regolament bażiku, il-produtturi esportaturi magħrufin kollha u l-awtoritajiet tal-pajjiż ikkonċernat ġew ikkonsultati dwar l-għażla tal-kampjun.

(23)

Il-Kummissjoni rċeviet kummenti dwar il-kampjun minn parti interessata waħda. Il-produttur esportatur Henan Junheng Industrial Group Biotechnology Company., Ltd. (“Henan Junheng”) argumenta li l-Kummissjoni jenħtieġ li żżid l-għadd ta’ kumpaniji li jimmanifatturaw żejt veġetali idroġenat (“HVO”) fil-kampjun biex jirrifletti d-differenzi fil-kostijiet u fil-prezzijiet tal-esportazzjoni li jirriżultaw minn proċessi ta’ produzzjoni differenti ta’ FAME u HVO.

(24)

Il-Kummissjoni fakkret li l-kampjun inizjali kopra sehem sostanzjali mill-importazzjonijiet (madwar 55 %). Barra minn hekk, il-produttur tal-HVO inkluż fil-kampjun kien jirrappreżenta madwar terz tal-volum tal-esportazzjoni inkluż fil-kampjun. Għalhekk, il-Kummissjoni qieset li l-kampjun kien jirrappreżenta b’mod suffiċjenti lill-produtturi esportaturi Ċiniżi li jimmanifatturaw iż-żewġ subkategoriji distinti ta’ bijodiżil. Konsegwentement, il-Kummissjoni ċaħdet id-dikjarazzjoni u kkonfermat il-kampjun inizjali tal-produtturi esportaturi.

(25)

Produttur esportatur wieħed fir-RPĊ talab eżami individwali skont l-Artikolu 17(3) tar-Regolament bażiku. L-eżami ta’ din it-talba matul l-istadju provviżorju tal-investigazzjoni kien ikun ta’ piż bla bżonn, b’mod partikolari meta titqies l-istruttura kkumplikata tal-produtturi esportaturi/gruppi ta’ produtturi esportaturi inklużi fil-kampjun (b’kollox ħames entitajiet ta’ produzzjoni u diversi kumpaniji relatati rilevanti, bħal fornituri jew negozjanti) u t-tul ta’ żmien korrispondenti tal-verifiki fuq il-post. Barra minn hekk, il-produttur esportatur li talab l-eżami individwali biegħ il-bijodiżil lill-Unjoni direttament u permezz ta’ negozjant relatat, jiġifieri eżami individwali ta’ din il-kumpanija jkun jeħtieġ investigazzjoni ta’ mill-inqas żewġ entitajiet. Il-Kummissjoni se tiddeċiedi jekk tagħmilx eżami individwali fl-istadju definittiv tal-investigazzjoni.

(26)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(27)

Il-Kummissjoni bagħtet kwestjonarji lil produtturi tal-Unjoni inklużi fil-kampjun, lil żewġ importaturi/negozjanti, lill-ilmentatur u lill-produtturi esportaturi fir-RPĊ. Ħlief għal dak tal-ilmentatur, l-istess kwestjonarji saru disponibbli online (11) fil-jum tal-bidu.

(28)

Il-Kummissjoni fittxet u vverifikat l-informazzjoni kollha li qieset meħtieġa għal determinazzjoni provviżorja ta’ dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku twettqu fil-bini tal-kumpaniji li ġejjin:

(29)

L-investigazzjoni tad-dumping u tad-dannu kopriet il-perjodu bejn l-1 ta’ Ottubru 2022 u t-30 ta’ Settembru 2023 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu bejn l-1 ta’ Jannar 2020 u tmiem il-perjodu ta’ investigazzjoni (“il-perjodu taħt kunsiderazzjoni”).

(30)

Il-prodott taħt investigazzjoni huwa esteri monoalkiliċi tal-aċidi grassi u/jew ta’ gassijiet paraffiniċi miksuba minn sinteżi u/jew idrotrattament, ta’ oriġini mhux fossili, magħrufa komunement bħala “bijodiżil”, f’forma pura jew kif inkluż f’taħlita, li bħalissa jaqgħu’ taħt il-kodiċijiet NM ex 1516 20 98 (il-kodiċijiet TARIC 1516 20 98 21, 1516 20 98 22, 1516 20 98 23, 1516 20 98 29, 1516 20 98 31, 1516 20 98 32 u 1516 20 98 39), ex 1518 00 91 (il-kodiċijiet TARIC 1518 00 91 21, 1518 00 91 22, 1518 00 91 23, 1518 00 91 29, 1518 00 91 31, 1518 00 91 32 u 1518 00 91 39), ex 1518 00 95 (il-kodiċijiet TARIC 1518 00 95 10, 1518 00 95 11 u 1518 00 95 19), ex 1518 00 99 (il-kodiċijiet TARIC 1518 00 99 21, 1518 00 99 22, 1518 00 99 23, 1518 00 99 29, 1518 00 99 31, 1518 00 99 32 u 1518 00 99 39), ex 2710 19 43 (il-kodiċijiet TARIC 2710 19 43 21, 2710 19 43 22, 2710 19 43 23, 2710 19 43 29, 2710 19 43 31, 2710 19 43 32 u 2710 19 43 39), ex 2710 19 46 (il-kodiċijiet TARIC 2710 19 46 21, 2710 19 46 22, 2710 19 46 23, 2710 19 46 29, 2710 19 46 31, 2710 19 46 32 u 2710 19 46 39), ex 2710 19 47 (il-kodiċijiet TARIC 2710 19 47 21, 2710 19 47 22, 2710 19 47 23, 2710 19 47 29, 2710 19 47 31, 2710 19 47 32 u 2710 19 47 39), 2710 20 11 , 2710 20 16 , ex 3824 99 92 (il-kodiċijiet TARIC 3824 99 92 10, 3824 99 92 11, 3824 99 92 13, 3824 99 92 14, 3824 99 92 15, 3824 99 92 16, u 3824 99 92 19), 3826 00 10 u ex 3826 00 90 (il-kodiċijiet TARIC 3826 00 90 11, 3826 00 90 12, 3826 00 90 13, 3826 00 90 19, 3826 00 90 31, 3826 00 90 32 u 3826 00 90 39), għajr il-fjuwil tal-avjazzjoni sostenibbli li jissodisfa r-rekwiżiti tal-Ispeċifikazzjoni Standard ta’ ASTM D7566-22 għall-Fjuwil tat-Turbini tal-Avjazzjoni li fih l-Idrokarburi Sintetizzati, li bħalissa jaqa’ taħt il-kodiċijiet NM ex 2710 19 43 (il-kodiċi addizzjonali TARIC 89FT), ex 2710 19 46 (il-kodiċi addizzjonali TARIC 89FT), ex 2710 19 47 (il-kodiċi addizzjonali TARIC 89FT), ex 2710 20 11 (il-kodiċi addizzjonali TARIC 89FT) u ex 2710 20 16 (il-kodiċi addizzjonali TARIC 89FT), u li joriġina mir-Repubblika tal-Poplu taċ-Ċina (“il-prodott taħt investigazzjoni”).

(31)

Il-prodott taħt investigazzjoni jista’ jiġi prodott permezz ta’ proċessi differenti, bħat-transesterifikazzjoni taż-żjut u tax-xaħmijiet, sinteżi Fischer-Tropsch jew l-idrotrattament tal-materja prima rinnovabbli. Dan huwa fjuwil rinnovabbli prodott minn firxa wiesgħa ta’ materja prima, jiġifieri żjut veġetali bħaż-żejt tal-lift, iż-żejt tas-sojja u ż-żejt tal-palm, żjut tat-tisjir użati (“UCO”), xaħmijiet tal-annimali jew bijomassa.

(32)

Il-bijodiżil tipikament jintuża fis-settur tat-trasport, bħas-setturi tat-toroq, tal-ferroviji, tal-avjazzjoni u marittimi, prinċipalment imħallat mad-diżil fossili iżda anke fil-forma pura tiegħu.

(33)

Il-prodott ikkonċernat huwa l-prodott investigat li joriġina mir-RPĊ (“il-prodott ikkonċernat”).

(34)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(35)

F’dan l-istadju, il-Kummissjoni ddeċidiet li dawn il-prodotti huma għalhekk prodotti simili skont it-tifsira tal-Artikolu 1(4) tar-Regolament bażiku.

(36)

China Chamber of Commerce of Metals, Minerals & Chemicals Importers & Exporters (“CCCMC”), mogħtija s-setgħa li tirrappreżenta 27 produttur esportatur (12) f’din l-investigazzjoni, sostniet li l-bijodiżil prodott mill-materja prima elenkata fl-Anness IX tad-Direttiva dwar l-Enerġija Rinnovabbli II (“RED II”) (13) jenħtieġ li jiġi eskluż mill-ambitu tal-investigazzjoni preżenti minħabba li f’investigazzjoni reċenti dwar l-aċidu xaħmi li joriġina mill-Indoneżja “il-Kummissjoni sabet li l-aċidi grassi b’DoS ta’ mill-inqas 97 % prodotti mill-iskart u ċċertifikati minn skema volontarja rikonoxxuta mill-Kummissjoni skont l-Artikolu 30(4) tar-RED II jew skema nazzjonali ta’ ċertifikazzjoni stabbilita skont l-Artikolu 30(6) tar-RED II, għalkemm jikkondividu l-istess karatteristiċi ma’ aċidi xaħmin oħrajn, għandhom użi differenti u ma humiex f’kompetizzjoni mal-prodott simili” (14). Il-Kummissjoni nnotat li, għall-kuntrarju tal-każ tal-aċidu xaħmi ikkwotat, f’din l-investigazzjoni t-tipi kollha ta’ prodotti huma tipikament soġġetti għal RED II, fid-dawl tal-fatt li l-klijenti jitolbu bijodiżil prodott bl-użu ta’ materja prima elenkata fil-Parti A u B tal-Anness IX tar-RED II. Dawn huma wkoll, kif spjegat aktar hawn taħt f’din it-taqsima, f’kompetizzjoni diretta. Il-Kummissjoni ċaħdet id-dikjarazzjoni tas-CCCMC.

(37)

Fl-ambitu tal-prodott ta’ dan il-proċediment, tista’ ssir distinzjoni bejn tliet gruppi ta’ prodotti ewlenin: FAME, HVO u Fjuwil tal-Avjazzjoni Sostenibbli (“SAF”).

(38)

EcoCeres talab li SAF jiġi eskluż mill-ambitu tal-investigazzjoni peress li qatt ma ġie investigat qabel f’investigazzjonijiet għad-difiża tal-kummerċ li jikkonċernaw il-bijodiżil, kellu karatteristiċi fiżiċi u tekniċi differenti, kien iddestinat għal użu finali differenti u soġġett għal proċess ta’ produzzjoni differenti. Huwa indika wkoll il-fatt li ma kienx interkambjabbli mal-gruppi ta’ prodotti l-oħra FAME u HVO. EcoCeres żied li l-impożizzjoni ta’ dazji fuq l-SAF, allegatament skars fl-Unjoni u fis-suq globali, ma tkunx raġonevoli u tmur kontra inizjattivi ta’ politika b’saħħithom imressqa mill-Kummissjoni nnifisha.

(39)

Bħala l-ewwel rimarka introduttorja, il-Kummissjoni ċċarat li mhux l-SAF kollu huwa bijodiżil u li diversi definizzjonijiet u terminoloġija jistgħu japplikaw skont il-kuntest u l-ambjent regolatorju. L-Artikolu 3 tar-Regolament ReFuelEU Aviation (15) jiddefinixxi l-SAF bħala fjuwils tal-avjazzjoni li huma jew: (a) fjuwils tal-avjazzjoni sintetiċi; (b) bijofjuwils tal-avjazzjoni; jew (c) fjuwils tal-avjazzjoni minn karbonju riċiklat. Din it-taqsima tikkonċerna biss il-fjuwils fit-taqsima (b), jiġifieri l-bijofjuwils tal-avjazzjoni rilevanti.

(40)

L-investigazzjoni wriet varjanzi limitati fil-proċess tal-produzzjoni u l-karatteristiċi fiżiċi, kimiċi u tekniċi bażiċi ta’ SAF kontra l-HVO. Madankollu, fil-preżent, HVO u FAME ma jistgħux jintużaw għall-magni tal-avjazzjoni. Għalhekk, il-Kummissjoni sabet li SAF kellu użu differenti u kkonkludiet li ma jistax jitqies li huwa interkambjabbli jew f’kompetizzjoni ma’ HVO/FAME.

(41)

Abbażi ta’ dawn il-kunsiderazzjonijiet, il-Kummissjoni ddeċidiet li taċċetta b’mod proviżorju l-esklużjoni tal-SAF mill-kamp ta’ applikazzjoni ta’ din l-investigazzjoni.

(42)

Is-CCCMC talbet li l-HVO jiġi eskluż mill-ambitu tal-investigazzjoni minħabba li l-FAME u l-HVO huma prodotti fundamentalment differenti f’termini ta’ preferenzi u standards tal-konsumatur, karatteristiċi fiżiċi u kimiċi, użi finali, proċessi ta’ produzzjoni u interkambjabbiltà.

(43)

EcoCeres talab li l-HVO jiġi eskluż mill-ambitu tal-investigazzjoni u jitqies bħala prodott differenti mill-bijodiżil tal-FAME minħabba li l-HVO qatt ma kien fokus tal-investigazzjonijiet tal-UE dwar id-difiża tal-kummerċ fil-bijodiżil u, meta mqabbel mal-FAME, allegatament għandu perċezzjoni differenti tas-suq, trattament ġuridiku differenti fl-UE meta mqabbel ma’ awtoritajiet oħrajn bħar-Renju Unit u l-Istati Uniti tal-Amerka bi klassifikazzjoni doganali differenti u bi standards tal-prodott differenti; karatteristiċi fiżiċi u kimiċi differenti; użi finali differenti; proċess ta’ produzzjoni differenti; u impatt ambjentali differenti.

(44)

L-ewwel nett, il-Kummissjoni nnotat li fid-definizzjoni tal-ambitu tal-prodott, il-Kummissjoni tista’ tqis għadd ta’ fatturi, bħal, fost l-oħrajn, il-karatteristiċi fiżiċi, tekniċi u kimiċi tal-prodotti, l-użu tagħhom, l-interkambjabbiltà, il-perċezzjoni tal-konsumatur, il-kanali ta’ distribuzzjoni, il-proċess tal-manifattura, il-kostijiet tal-produzzjoni u l-kwalità. Għaldaqstant, id-differenzi fil-proċess tal-produzzjoni u l-istandards tal-prodotti waħedhom mhumiex deċiżivi għad-determinazzjoni dwar jekk it-tipi ta’ prodotti jikkostitwixxux prodott wieħed.

(45)

It-tieni, fir-rigward tad-dikjarazzjoni li l-HVO qatt ma kien fokus tal-investigazzjonijiet tal-UE dwar id-difiża tal-kummerċ fil-bijodiżil, dan jidher li jikkontradixxi d-dikjarazzjonijiet proprji ta’ EcoCeres (16). Fil-fatt, il-Kummissjoni nnotat li fil-passat u fl-investigazzjonijiet tal-UE li għaddejjin bħalissa dwar il-bijodiżil, l-ambitu tal-prodott kien jinkludi żjut tal-gass miksuba minn sinteżi u/jew idrotrattament ta’ oriġini mhux fossili. F’investigazzjoni konkluża fl-2021, hija diġà rċeviet u indirizzat talba għall-esklużjoni tal-prodott tal-HVO, li ġiet irrifjutata għal diversi raġunijiet. (17)

(46)

Il-premessi ta’ hawn taħt jindirizzaw l-argumenti l-oħrajn miġbura fil-qosor fil-premessi (42) u (43).

(47)

Fir-rigward tal-allegati karatteristiċi fiżiċi u kimiċi bażiċi differenti, f’investigazzjonijiet preċedenti, il-Kummissjoni rrikonoxxiet l-eżistenza ta’ xi differenzi fil-karatteristiċi fiżiċi bejn il-FAME u l-HVO f’investigazzjonijiet preċedenti, iżda dawn id-differenzi ma kinux tat-tip li jiġġustifikaw esklużjoni tal-prodott (18).

(48)

Il-partijiet innotaw li l-karatteristiċi fiżiċi u kimiċi tal-HVO huma eqreb tad-diżil konvenzjonali minn dawk tal-FAME u li l-livell tal-punt limitu tal-filtrabbiltà fil-ksieħ (“CFPP”) tipiku u karatteristiċi oħrajn (bħad-densità jew il-viskożità) tal-HVO u tal-FAME jvarjaw.

(49)

Madankollu, dan ma jagħmilx lill-HVO prodott differenti għall-finijiet ta’ din l-investigazzjoni. Kemm l-HVO kif ukoll il-FAME għandhom diversi tipi ta’ prodotti b’livelli distinti ta’ CFPP, densità u viskożità. Fil-fatt, hemm tipi ta’ prodotti FAME bl-istess livell ta’ CFPP bħal ċerti tipi ta’ prodotti HVO (19). Is-CCCMC indikat l-istabbiltà tajba tal-ħżin tal-HVO meta mqabbla mal-FAME, iżda lanqas din ma tagħmel l-HVO prodott differenti.

(50)

EcoCeres iddikjara li l-materja prima għall-FAME hija bbażata fuq l-ikel u l-għelejjel u hija differenti mill-materja prima użata għall-produzzjoni ta’ bijodiżil tat-tieni ġenerazzjoni, li jagħmel lil dan tal-aħħar prodott fundamentalment differenti.

(51)

Il-Kummissjoni ma qablitx u nnotat li l-użu kurrenti tal-materja prima huwa r-riżultat ta’ għażliet leġiżlattivi li qed jevolvu maż-żmien. Barra minn hekk, xi tipi ta’ FAME huma magħmula minn “skart”, bħall-UCOME, filwaqt li xejn fit-transunt ma jipprekludi l-użu ta’ materja prima li ma hijiex skart għall-produzzjoni tal-HVO.

(52)

Fir-rigward ta’ kwalunkwe użu aħħari differenti allegat, f’investigazzjoni reċenti dwar l-istess ambitu tal-prodott, il-Kummissjoni diġà ċaħdet talba għall-esklużjoni ta’ prodott tal-HVO peress li kienet sabet li l-użu aħħari tal-prodott tal-HVO u tal-FAME huwa l-istess. (20) Fl-investigazzjoni kurrenti, il-Kummissjoni sabet li l-HVO prodott fiċ-Ċina huwa f’kompetizzjoni ma’ kwalunkwe bijodiżil prodott fl-Unjoni. L-HVO jista’ jintuża fl-Unjoni matul is-sena kollha, jew pur jew imħallat ma’ bijodiżil ieħor qabel l-użu, bl-istess mod bħal pereżempju l-RME, tip ta’ FAME magħmul miż-żejt tal-lift li huwa prodott b’mod estensiv fl-Unjoni. Il-HVO għalhekk huwa interskambjabbli ma’ bijodiżil magħmul fl-Unjoni.

(53)

Is-CCCMC sostniet li l-HVO biss jintuża pur. Madankollu, kemm il-FAME kif ukoll l-HVO jintużaw f’forma pura fil-magni, u dan imur kontra dik id-dikjarazzjoni (21). Barra minn hekk, kemm il-FAME kif ukoll l-HVO jistgħu jitħalltu mad-diżil fossili (u ma’ tipi oħrajn ta’ bijodiżil) bil-għan li jintlaħaq l-aħjar fjuwil għall-mod speċifiku tat-trasport u/jew għall-perjodu tas-sena.

(54)

L-investigazzjoni żvelat li FAME u HVO minn kwalunkwe oriġini huma prodotti ġeneriċi (fi proprjetajiet fiżiċi/speċifikazzjonijiet) li huma komparabbli minn perspettiva ta’ importatur u negozjant. (22)

(55)

Fl-aħħar nett, fir-rigward tal-użu aħħari, is-CCCMC allegat ukoll li l-manifatturi tal-karozzi normalment jippreferu l-HVO fuq il-FAME. Madankollu, din id-dikjarazzjoni ma kinitx issostanzjata u xejn fil-fajl ma seta’ jikkonfermaha.

(56)

Fir-rigward tal-perċezzjoni differenti tas-suq allegata tal-HVO meta mqabbla ma’ tal-FAME, il-Kummissjoni sabet li FAME u HVO jappartjenu għall-istess kategorija ġenerali, jiġifieri sostitut sostenibbli tal-fjuwil tad-diżil fossili użat prinċipalment fis-settur tat-trasport. Is-suq jipperċepixxi l-FAME u l-HVO bħala fjuwils alternattivi sostenibbli għall-magni tad-diżil fis-settur tat-trasport. EcoCeres sostna li s-siti web tal-ilmentatur u diversi produtturi kienu jsejħu lill-HVO “diżil rinnovabbli”. Il-Kummissjoni nnotat li l-informazzjoni dwar dawn is-siti web kellha skopijiet deskrittivi u għamlet distinzjoni bejn tipi differenti ta’ prodotti iżda ma appoġġatx il-konklużjoni li l-HVO kien prodott differenti għall-fini ta’ din l-investigazzjoni.

(57)

Fid-dawl ta’ dan ta’ hawn fuq kollu, il-Kummissjoni eskludiet b’mod provviżorju l-SAF mill-ambitu tal-investigazzjoni u ċaħdet id-dikjarazzjonijiet l-oħrajn kollha rigward l-ambitu tal-prodott. It-tipi kollha ta’ bijodiżil magħmul fl-Unjoni koperti minn din l-investigazzjoni nstabu li kienu f’kompetizzjoni diretta mal-bijodiżil magħmul fiċ-Ċina. Barra minn hekk, minkejja d-differenzi possibbli f’termini ta’ materja prima użata għall-produzzjoni, jew varjanzi fil-proċess tal-produzzjoni, kollha għandhom l-istess karatteristiċi fiżiċi, kimiċi u tekniċi bażiċi jew simili ħafna u jintużaw għall-istess skopijiet. Il-varjazzjonijiet possibbli fil-prodott taħt investigazzjoni ma jibdlux id-definizzjoni bażika tiegħu, il-karatteristiċi tiegħu jew il-perċezzjoni li bosta partijiet għandhom tiegħu. B’mod partikolari, mill-perspettiva tal-utent finali tal-fjuwil tad-diżil, ma tagħmel l-ebda differenza jekk it-taħlita disponibbli jkun fiha bijodiżil magħmul minn materja prima partikolari waħda jew permezz ta’ proċess ta’ produzzjoni speċifiku. It-tipi kollha ta’ bijodiżil u taħlitiet ta’ bijodiżil koperti minn din l-investigazzjoni huma parti minn pakkett leġiżlattiv dwar l-effiċjenza enerġetika u l-enerġija rinnovabbli u fjuwils alternattivi. L-industrija tal-bijodiżil tal-Unjoni tipproduċi t-tipi kollha ta’ bijodiżil koperti minn din l-investigazzjoni.

(58)

Fid-dawl tal-evidenza suffiċjenti disponibbli fil-bidu tal-investigazzjoni li indikat l-eżistenza ta’ distorsjonijiet sinifikanti skont it-tifsira tal-punt (b) tal-Artikolu 2(6a) tar-Regolament bażiku fir-rigward tar-RPĊ, il-Kummissjoni qieset li jkun xieraq li tinbeda l-investigazzjoni fir-rigward tal-produtturi esportaturi minn dan il-pajjiż fir-rigward tal-Artikolu 2(6a) tar-Regolament bażiku.

(59)

Konsegwentement, sabiex tiġbor id- meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika tal-Bidu, il-Kummissjoni stiednet lill-produtturi esportaturi kollha fir-RPĊ biex jipprovdu informazzjoni rigward l-inputs użati għall-produzzjoni tal-bijodiżil. Tnejn u erbgħin (42) produttur esportatur ippreżentaw l-informazzjoni rilevanti.

(60)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea.

(61)

Ma waslet l-ebda tweġiba għall-kwestjonarju mill-GTĊ. Sussegwentement, il-Kummissjoni informat lill-GTĊ li kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(62)

Il-GTĊ, is-CCCMC, u Zhuoyue għamlu sottomissjoni dwar l-applikazzjoni tal-Artikolu 2(6a) tar-Regolament bażiku. Dawn il-kummenti huma indirizzati fit-taqsima 3.2.1.8.

(63)

Fil-punt 5.3.2 tan-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, il-Brażil kien pajjiż rappreżentattiv xieraq possibbli skont l-Artikolu 2(6a)(a) tar-Regolament bażiku bil-għan li jiġi ddeterminat il-valur normali abbażi ta’ prezzijiet jew ta’ parametri referenzjarji mingħajr distorsjoni. Il-Kummissjoni ddikjarat ukoll li kienet se teżamina pajjiżi rappreżentattivi oħra li setgħu jkunu xierqa f’konformità mal-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku.

(64)

Fis-7 ta’ Marzu 2024, il-Kummissjoni informat b’nota fil-fajl (“l-Ewwel Nota”) lill-partijiet interessati dwar is-sorsi rilevanti li kienet beħsiebha tuża sabiex tiddetermina l-valur normali. F’dik in-nota, il-Kummissjoni pprovdiet lista tal-fatturi kollha tal-produzzjoni bħall-materja prima, ix-xogħol u l-enerġija użati fil-produzzjoni tal-bijodiżil. Barra minn hekk, abbażi tal-kriterji li jiggwidaw l-għażla ta’ prezzijiet jew valuri referenzjarji mingħajr distorsjoni, il-Kummissjoni identifikat pajjiżi rappreżentattivi possibbli, jiġifieri l-Brażil, il-Kolombja, il-Malażja, u t-Tajlandja. Il-Kummissjoni indirizzat ukoll l-informazzjoni dwar l-għażla ta’ pajjiż rappreżentattiv ippreżentata minn EcoCeres fil-bidu tal-investigazzjoni skont il-punt 5.3.2. tan-Notifika tal-Bidu.

(65)

Il-Kummissjoni rċeviet kummenti dwar l-Ewwel Nota mill-ilmentatur u t-tliet produtturi esportaturi inklużi fil-kampjun kollha.

(66)

Fis-7 ta’ Ġunju 2024, il-Kummissjoni ħarġet it-tieni nota (“it-Tieni Nota”), fejn indirizzat il-kummenti dwar l-Ewwel Nota dettaljata fit-taqsimiet 3.2.2.2 sa 3.2.2.4 hawn taħt u kif xieraq, qisithom f’analiżi ulterjuri u fl-għażla tal-pajjiż rappreżentattiv.

(67)

Fit-Tieni Nota, il-Kummissjoni informat lill-partijiet interessati dwar is-sorsi rilevanti li kienet beħsiebha tuża biex tiddetermina l-valur normali, bil-Malażja bħala l-pajjiż rappreżentattiv. Informat ukoll lill-partijiet interessati li kienet se tistabbilixxi l-ispejjeż tal-bejgħ, ġenerali u amministrattivi (“SG&A”) u l-profitt abbażi tal-informazzjoni finanzjarja ta’ seba’ produtturi tal-bijodiżil fil-pajjiż rappreżentattiv.

(68)

Il-Kummissjoni rċeviet kummenti dwar it-Tieni Nota mingħand EBB, Jiao u Zhuoyue. Il-kummenti huma indirizzati fit-taqsimiet 3.2.2.2 sa 3.2.2.4 hawn taħt.

(69)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur” .

(70)

Madankollu, skont l-Artikolu 2(6a)(a) tar-Regolament bażiku, “fil-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni,” u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti.” ( “il-kostijiet amministrattivi, tal-bejgħ u ġenerali” minn hawn ’il quddiem imsejħa “SG&A”).

(71)

Kif spjegat ulterjorment hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi esportaturi, l-applikazzjoni tal-Artikolu 2(6a) tar-Regolament bażiku kienet xierqa.

(72)

L-Artikolu 2(6a)(b) tar-Regolament bażiku jistipula li “distorsjonijiet sinifikanti bħala dawk id-distorsjonijiet li jseħħu meta l-prezzijiet jew il-kostijiet irrapportati, inklużi l-kostijiet tal-materja prima u tal-enerġija, ma jkunux ir-riżultat ta’ forzi tas-suq ħieles peress li dawn jiġu affettwati minn intervent sostanzjali tal-gvern. Meta tkun valutata l-eżistenza ta’ distorsjonijiet sinifikanti għandha tingħata attenzjoni, fost oħrajn, lill-impatt potenzjali ta’ element wieħed jew aktar minn dawn li ġejjin:

(73)

Peress li l-lista fl-Artikolu 2(6a)(b) tar-Regolament bażiku ma hijiex kumulattiva, mhux l-elementi kollha jeħtieġ li jingħataw għal sejba ta’ distorsjonijiet sinifikanti. Barra minn hekk, l-istess ċirkostanzi fattwali jistgħu jintużaw sabiex tintwera l-eżistenza ta’ element wieħed jew aktar tal-lista.

(74)

Madankollu, kwalunkwe konklużjoni dwar distorsjonijiet sinifikanti skont it-tifsira tal-Artikolu 2(6a)(a) tar-Regolament bażiku trid issir abbażi tal-evidenza kollha disponibbli. Il-valutazzjoni globali dwar l-eżistenza ta’ distorsjonijiet tista’ tqis ukoll il-kuntest ġenerali u s-sitwazzjoni fil-pajjiż esportatur, b’mod partikolari fejn l-elementi fundamentali tal-istruttura ekonomika u amministrattiva tal-pajjiż esportatur jipprovdu lill-gvern b’setgħat sostanzjali sabiex jintervjeni fl-ekonomija b’tali mod li l-prezzijiet u l-kostijiet ma jkunux ir-riżultat tal-iżvilupp ħieles tal-forzi tas-suq.

(75)

L-Artikolu 2(6a)(c) tar-Regolament bażiku jipprevedi li “[f]ejn il-Kummissjoni jkollha indikazzjonijiet fondati sew tal-eżistenza potenzjali ta’ distorsjonijiet sinifikanti kif imsemmija fil-punt (b) f’ċertu pajjiż jew f’ċertu settur f’dak il-pajjiż, u fejn ikun xieraq għall-applikazzjoni effettiva ta’ dan ir-Regolament, il-Kummissjoni għandha tipproduċi, tippubblika u taġġorna regolarment rapport li jiddeskrivi ċ-ċirkostanzi tas-suq imsemmija fil-punt (b) f’dak il-pajjiż jew settur” .

(76)

Skont din id-dispożizzjoni, il-Kummissjoni ħarġet rapport tal-pajjiż dwar iċ-Ċina (“ir-Rapport”) (23), li fih evidenza dwar l-eżistenza ta’ intervent sostanzjali tal-gvern f’ħafna livelli tal-ekonomija, inklużi distorsjonijiet speċifiċi f’bosta fatturi ewlenin tal-produzzjoni (bħall-art, l-enerġija, il-kapital, il-materja prima u l-manodopera) kif ukoll f’setturi magħżula (bħas-settur tas-sustanzi kimiċi). Il-partijiet interessati ġew mistiedna jirribattu, jikkummentaw jew jissupplimentaw l-evidenza li tinsab fil-fajl tal-investigazzjoni fiż-żmien tal-bidu. Ir-Rapport dwar iċ-Ċina tqiegħed fil-fajl tal-investigazzjoni fl-istadju tal-bidu.

(77)

L-ilmentatur irrefera għall-evidenza li tinsab fir-Rapport, kif ukoll għas-sejbiet tal-Kummissjoni f’investigazzjonijiet reċenti (24), biex jenfasizza r-rilevanza tad-distorsjonijiet imsemmija hawn taħt fil-kuntest tal-proċedimenti tal-anti-dumping tal-UE.

(78)

L-ilmentatur ikkomplementa wkoll ir-Rapport b’evidenza rilevanti addizzjonali, bħal rapporti mill-awtoritajiet f’ġuriżdizzjonijiet oħrajn. Pereżempju, l-ilmentatur indika li fl-2023, id-Dipartiment tal-Agrikoltura tal-Istati Uniti wera li “d-direttivi xprunati mill-politika magħmula mir-RPĊ ippermettew ukoll li s-settur tal-bijofjuwils tal-pajjiż ikun parzjalment iżolat mis-suq globali u anqas sensittiv għall-forzi tas-suq”  (25).

(79)

Barra minn hekk, l-ilmentatur fakkar l-elementi li ġejjin li jirriżultaw f’distorsjonijiet sinifikanti.

(80)

L-ewwel nett, is-settur tal-bijodiżil qiegħed jiġi servut b’mod sinifikanti minn intrapriżi li joperaw taħt is-sjieda, il-kontroll jew is-superviżjoni ta’ politika jew taħt il-gwida tal-awtoritajiet tal-istat. Pereżempju, wieħed mill-produtturi ewlenin tal-bijodiżil fiċ-Ċina, Beijing Haixin Energy Technology Co., Ltd, huwa kkontrollat minn SOEs, jiġifieri Beijing Haixinzhi Low Carbon Technology Development u Beijing Haidian District State-owned Assets Investment Management Co., Ltd, li għandhom 35,22 % tal-ishma tal-kumpanija (26). Fl-2022, il-produzzjoni tal-kumpanija tal-bijodiżil “daħlet fl-istadju tal-produzzjoni tal-massa, u l-ammont tal-istokk tal-produzzjoni, tal-bejgħ u tas-sikurezza żdied b’mod sinifikanti sena wara sena”  (27).

(81)

Il-GTĊ jissorvelja u jiggwida wkoll lill-produtturi tal-bijodiżil li huma proprjetà privata, kif jidher mill-elementi li ġejjin:

(82)

L-għanijiet nazzjonali huma fil-fatt segwiti mill-industrija privata: pereżempju, Longyan Zhuoyue New Energy Co., Ltd. (“Zhuoyue”), produttur Ċiniż tal-bijodiżil ewlieni ieħor, jiddikjara fuq is-sit web tiegħu li “wettaq b’suċċess diversi programmi importanti, inkluż Pjan Nazzjonali Ewlieni għall-Prodotti, Pjan Nazzjonali għat-Torch, l-Għaxar Pjan Nazzjonali għal Ħames Snin ta’ Riċerka fix-Xjenza u fit-Teknoloġija, il-Ħdax-il Programm Nazzjonali ta’ Ħames Snin ta’ Appoġġ għax-Xjenza u t-Teknoloġija, it-Tnax-il Programm Nazzjonali ta’ Ħames Snin ta’ Riċerka fix-Xjenza u t-Teknoloġija”.

(83)

It-tieni, il-preżenza tal-istat fid-ditti tal-bijodiżil tippermetti wkoll lill-awtoritajiet jinterferixxu fil-prezzijiet u/jew fil-kostijiet. Fil-fatt, l-ilmentatur sab sovrapożizzjonijiet bejn pożizzjonijiet maniġerjali u l-funzjonijiet ta’ sħubija/tal-Partit tal-Partit Komunista Ċiniż (“CCP”) f’kumpaniji involuti fil-produzzjoni tal-bijodiżil: pereżempju, il-Maniġer Ġenerali ta’ Sanju Environmental Protection huwa membru tas-CPP, filwaqt li diversi membri tal-Bord tad-Diretturi ta’ Haixin Energy Technology, flimkien mal-Maniġer Ġenerali u d-Direttur tagħha, huma affiljati u jaderixxu mas-CPP. Il-Maniġer Ġenerali u President ta’ Zhejiang Jiaao Enprotech Stock Co. Ltd. huwa membru tal-Konferenza Konsultattiva Politika tal-Poplu Ċiniż.

(84)

It-tielet, il-GTĊ isegwi politiki jew miżuri pubbliċi li jiddiskriminaw favur fornituri domestiċi jew li b’xi mod ieħor jinfluwenzaw il-forzi tas-suq ħieles, speċjalment fil-livell provinċjali. Pereżempju, Shanghai stabbiliet miżuri biex tippromwovi l-produzzjoni u l-użu ta’ bijodiżil magħmul minn żejt u xaħmijiet tal-kċina mormija:

(85)

L-ilmentatur osserva wkoll li d-distorsjonijiet fil-prezzijiet u l-kostijiet huma preżenti wkoll fis-settur tal-enerġija: is-sors ewlieni tal-enerġija fiċ-Ċina huwa l-faħam, u, konsegwentement, huwa probabbli li l-enerġija użata għall-manifattura tal-bijodiżil fiċ-Ċina hija derivata wkoll mill-faħam. Kif deskritt fir-Rapport, il-prezzijiet tal-faħam, u anke tal-elettriku, huma kkontrollati mill-Istat (29).

(86)

L-ilmentatur sab ukoll li s-settur tal-prodott ikkonċernat jibbenefika minn diversi politiki tat-taxxa. Tabilħaqq, iċ-Ċina introduċiet politika ta’ rifużjoni tal-VAT li tippermetti lill-produtturi tal-bijodiżil igawdu minn rifużjoni tal-VAT ta’ 70 % jekk il-bijodiżil ikun magħmul minn żjut tal-annimali u veġetali użati. Pereżempju, fl-2023, Zhejiang Dongjiang Energy Technology Co. rċeviet, għall-perijodu minn Diċembru 2022 sa Marzu 2023, madwar 12-il miljun CNY (EUR 1.54 miljun) bħala riżultat tar-rifużjoni tat-taxxa. Il-kumpanija rrapportat li “l-ammont imsemmi hawn fuq jaqbeż l-10 % tal-profitt nett awditjat tal-kumpanija fl-aħħar sena fiskali”  (30).

(87)

Barra minn hekk, il-produtturi Ċiniżi tal-bijodiżil jibbenefikaw minn skont ta’ 90 % fuq l-introjtu taxxabbli mill-prodotti rilevanti.

(88)

Ir-raba’, bħal fi kwalunkwe settur ieħor fl-ekonomija Ċiniża, is-settur tal-bijodiżil huwa soġġett għad-distorsjonijiet li jirriżultaw mill-applikazzjoni diskriminatorja jew minn infurzar inadegwat tar-regoli Ċiniżi dwar il-falliment, il-kumpaniji u l-proprjetà. L-ilmentatur irrefera għar-Rapport (31) u għall-investigazzjonijiet reċenti tal-Kummissjoni, filwaqt li osserva, barra minn hekk, li fis-settur tal-falliment il-GTĊ jintervjeni fir-riorganizzazzjoni tal-kumpaniji elenkati, filwaqt li jipprevjeni l-implimentazzjoni adegwata tal-liġijiet dwar il-falliment (32).

(89)

Il-ħames, il-kostijiet tal-pagi huma distorti fis-settur tal-prodott ikkonċernat, kif muri mill-Kummissjoni f’investigazzjonijiet preċedenti dwar id-difiża tal-kummerċ (33). Fil-fatt, sistema ta’ pagi bbażati fuq is-suq ma tistax tiżviluppa kompletament fiċ-Ċina minħabba li l-ħaddiema u l-impjegaturi huma mxekkla fid-drittijiet tagħhom għal organizzazzjoni kollettiva.

(90)

Is-sitt, il-produtturi tal-bijodiżil għandhom aċċess għall-finanzi mogħtija minn istituzzjonijiet li jimplimentaw objettivi ta’ politika pubblika jew li b’xi mod ieħor ma jaġixxux indipendentement mill-istat. Fil-fatt, f’investigazzjonijiet preċedenti dwar id-difiża tal-kummerċ, il-Kummissjoni enfasizzat il-pożizzjoni b’saħħitha tal-banek tal-Istat li jagħtu aċċess għall-finanzi abbażi tal-politika ekonomika u soċjali tal-Istat u mhux abbażi ta’ kunsiderazzjonijiet tas-suq. Barra minn hekk, bħala regola ġenerali, il-banek huma konnessi mal-Istat Ċiniż permezz ta’ relazzjonijiet personali, bl-ogħla uffiċjali eżekuttivi jinħatru fl-aħħar mill-aħħar mis-CCP (34).

(91)

Bħala konklużjoni, l-ilmentatur argumenta li hemm distorsjonijiet sinifikanti skont l-Artikolu 2(6a) tar-Regolament bażiku fis-settur tal-bijodiżil.

(92)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti fis-sens tal-Artikolu 2(6a), il-punt (b), tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl. L-evidenza fil-fajl inkludiet l-evidenza li tinsab fir-Rapport, kif ukoll fil-verżjoni aġġornata tiegħu (“Rapport aġġornat”) (35), li tiddependi fuq sorsi disponibbli għall-pubbliku.

(93)

Dik l-analiżi kopriet l-eżami tal-interventi sostanzjali tal-gvern fl-ekonomija taċ-Ċina b’mod ġenerali, iżda anke s-sitwazzjoni speċifika tas-suq fis-settur rilevanti, inkluż il-prodott ikkonċernat. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti sabiex tikkonferma l-eżistenza ta’ distorsjonijiet sinifikanti fiċ-Ċina.

(94)

Is-sistema ekonomika Ċiniża hija bbażata fuq il-kunċett ta’ “ekonomija tas-suq soċjalista”. Dak il-kunċett huwa mnaqqax fil-Kostituzzjoni Ċiniża u jiddetermina l-governanza ekonomika taċ-Ċina. Il-prinċipju ewlieni huwa s- “sjieda pubblika soċjalista tal-mezzi ta’ produzzjoni, jiġifieri s-sjieda min-nies kollha u s-sjieda kollettiva mill-persuni li jaħdmu”  (36).

(95)

L-ekonomija tal-Istat hija l- “forza mexxejja tal-ekonomija nazzjonali” u l-Istat għandu l-mandat li jiżgura “l-konsolidazzjoni u t-tkabbir”  (37). Konsegwentement, l-istruttura ġenerali tal-ekonomija Ċiniża mhux biss tippermetti interventi sostanzjali mill-gvern fl-ekonomija, iżda dawn l-interventi huma obbligatorji b’mod espliċitu. Il-kunċett tas-supremazija tas-sjieda pubblika fuq dik privata huwa mifrux fis-sistema ġuridika kollha u huwa enfasizzat bħala prinċipju ġenerali fl-atti leġiżlattivi prinċipali kollha.

(96)

Il-liġi Ċiniża fil-qasam tal-proprjetà hija eżempju ewlieni: din tirreferi għall-istadju primarju tas-soċjaliżmu u tafda lill-Istat bil-ħarsien tas-sistema ekonomika bażika li permezz tagħha s-sjieda pubblika għandha rwol dominanti. Forom oħrajn ta’ sjieda huma tollerati, fejn il-liġi tippermettilhom jiżviluppaw spalla ma’ spalla mas-sjieda tal-Istat (38).

(97)

Barra minn hekk, skont id-dritt Ċiniż, l-ekonomija tas-suq soċjalista hija żviluppata taħt it-tmexxija tas-CCP. L-istrutturi tal-Istat Ċiniż u tas-CCP huma marbuta ma’ xulxin f’kull livell (legali, istituzzjonali, personali), u jifformaw sovrastruttura fejn ma ssirx distinzjoni bejn ir-rwoli tas-CCP u tal-Istat.

(98)

Wara emenda tal-Kostituzzjoni Ċiniża f’Marzu 2018, ir-rwol ewlieni tas-CCP ingħata prominenza saħansitra akbar billi ġie affermat mill-ġdid fit-test tal-Artikolu 1 tal-Kostituzzjoni.

(99)

Wara l-ewwel sentenza diġà eżistenti tad-dispożizzjoni: “[i]s-sistema soċjalista hija s-sistema bażika tar-Repubblika tal-Poplu taċ-Ċina” , iddaħħlet it-tieni sentenza ġdida li taqra: “[i]l-karatteristika li tiddefinixxi s-soċjaliżmu b’karatteristiċi Ċiniżi hija t-tmexxija tal-Partit Komunista taċ-Ċina. ”  (39) Dan juri l-kontroll mhux ikkontestat u dejjem jikber tas-CCP fuq is-sistema ekonomika taċ-Ċina.

(100)

Din it-tmexxija u dan il-kontroll huma inerenti għas-sistema Ċiniża u jmorru ferm lil hinn mis-sitwazzjoni abitwali f’pajjiżi oħrajn fejn il-gvernijiet jeżerċitaw kontroll makroekonomiku ġenerali li fil-limitazzjonijiet tiegħu joperaw forzi tas-suq ħieles.

(101)

L-Istat Ċiniż iħaddem politika ekonomika intervenzjonista biex jilħaq għanijiet li jikkoinċidu mal-aġenda politika stabbilita mis-CCP minflok ma jkunu jirriflettu l-kundizzjonijiet ekonomiċi prevalenti f’suq ħieles (40). L-għodod ekonomiċi intervenzjonisti użati mill-awtoritajiet Ċiniżi huma multipli, inkluża s-sistema tal-ippjanar industrijali, is-sistema finanzjarja, kif ukoll fil-livell tal-ambjent regolatorju.

(102)

L-ewwel nett, fil-livell tal-kontroll amministrattiv kumplessiv, id-direzzjoni tal-ekonomija Ċiniżi hija regolata minn sistema kumplessa ta’ ppjanar industrijali li taffettwa l-attivitajiet ekonomiċi kollha fil-pajjiż. Dawn il-pjanijiet kollha jkopru matriċi komprensiva u kumplessa ta’ setturi u ta’ politiki trażversali u huma preżenti fil-livelli kollha tal-gvern.

(103)

Il-pjanijiet fil-livell provinċjali huma spjegati fid-dettall, filwaqt li l-pjanijiet nazzjonali jistabbilixxu miri usa’. Il-pjanijiet jispeċifikaw ukoll il-mezzi sabiex jiġu appoġġati l-industriji/is-setturi rilevanti, kif ukoll il-perjodi ta’ żmien li fihom jeħtieġ li jintlaħqu l-objettivi. Xi pjanijiet għadhom jinkludu miri tal-output espliċiti.

(104)

Skont il-pjanijiet, qegħdin jiġu identifikati setturi u/jew proġetti industrijali individwali bħala prijoritajiet (pożittivi jew negattivi) f’konformità mal-prijoritajiet tal-gvern, u qegħdin jiġu attribwiti lilhom għanijiet ta’ żvilupp speċifiċi (titjib industrijali, espansjoni internazzjonali, eċċ.).

(105)

L-operaturi ekonomiċi, privati u dawk tal-Istat kollha kemm huma, iridu jaġġustaw b’mod effettiv l-attivitajiet kummerċjali tagħhom skont ir-realtajiet imposti mis-sistema tal-ippjanar. Dan ma huwiex biss minħabba n-natura vinkolanti tal-pjanijiet iżda anke minħabba l-fatt li l-awtoritajiet Ċiniżi rilevanti fil-livelli kollha tal-gvern jaderixxu mas-sistema ta’ pjanijiet u jużaw is-setgħat mogħtija lilhom skont kif ikun meħtieġ, u b’hekk jisfurzaw lill-operaturi ekonomiċi jikkonformaw mal-prijoritajiet stabbiliti fil-pjanijiet (41).

(106)

It-tieni, fil-livell tal-allokazzjoni tar-riżorsi finanzjarji, is-sistema finanzjarja taċ-Ċina hija ddominata mill-banek kummerċjali u ta’ politika tal-Istat. Dawk il-banek, meta jkunu qed jistabbilixxu u jimplimentaw il-politika tas-self tagħhom iridu jallinjaw lilhom infushom mal-objettivi tal-politika industrijali tal-gvern minflok ma jivvalutaw primarjament il-merti ekonomiċi ta’ proġett partikolari (42).

(107)

L-istess japplika għall-komponenti l-oħrajn tas-sistema finanzjarja Ċiniża, bħas-swieq tal-istokks, is-swieq tal-bonds, is-swieq tal-ekwità privata eċċ. Barra minn hekk, dawn il-partijiet tas-settur finanzjarju huma stabbiliti b’mod istituzzjonali u operazzjonali b’mod li ma jkunx immirat lejn il-massimizzazzjoni tal-funzjonament effiċjenti tas-swieq finanzjarji iżda lejn l-iżgurar tal-kontroll u l-awtorizzazzjoni ta’ intervent mill-Istat u mis-CCP (43).

(108)

It-tielet, fil-livell tal-ambjent regolatorju, l-interventi mill-Istat fl-ekonomija jieħdu numru ta’ forom. Pereżempju, ir-regoli dwar l-akkwist pubbliku jintużaw regolarment sabiex jintlaħqu għanijiet ta’ politika għajr l-effiċjenza ekonomika, u b’hekk jimminaw il-prinċipji bbażati fuq is-suq fil-qasam. Il-leġiżlazzjoni applikabbli tipprevedi b’mod speċifiku li l-akkwist pubbliku għandu jsir sabiex jiġi ffaċilitat l-ilħuq tal-għanijiet imfassla mill-politiki tal-Istat. Madankollu, in-natura ta’ dawn l-għanijiet għadha ma hijiex definita, u għalhekk tħalli marġni ta’ apprezzament wiesa’ għall-korpi li jieħdu d-deċiżjonijiet (44).

(109)

B’mod simili, fil-qasam tal-investiment, il-GTĊ iżomm kontroll u influwenza sinifikanti fuq id-destinazzjoni u l-kobor kemm tal-investiment tal-Istat kif ukoll ta’ dak privat. L-iskrinjar tal-investiment, kif ukoll diversi inċentivi, restrizzjonijiet, u projbizzjonijiet relatati mal-investiment jintużaw mill-awtoritajiet bħala għodda importanti biex jiġu appoġġati għanijiet ta’ politika industrijali, bħaż-żamma tal-kontroll tal-istat fuq setturi ewlenin jew it-tisħiħ tal-industrija domestika (45).

(110)

Fil-qosor, il-mudell ekonomiku Ċiniż huwa bbażat fuq ċerti assjomi bażiċi, li jipprevedu u jinkoraġġixxu bosta interventi mill-gvern. Dawn l-interventi sostanzjali mill-gvern huma f’kunflitt mal-azzjoni libera tal-forzi tas-suq, li jirriżulta fid-distorsjoni tal-allokazzjoni effettiva tar-riżorsi f’konformità mal-prinċipji tas-suq (46).

(111)

Fiċ-Ċina, l-intrapriżi li joperaw taħt is-sjieda, il-kontroll u/jew is-superviżjoni politika jew il-gwida tal-Istat jirrappreżentaw parti essenzjali mill-ekonomija.

(112)

Il-GTĊ u s-CCP għandhom strutturi li jiżguraw li jibqa’ jkollhom influwenza fuq l-intrapriżi, u b’mod partikolari fuq l-intrapriżi tal-Istat (“SOEs”). L-Istat (u f’ħafna aspetti anke s-CCP) mhux biss jifformula u jissorvelja b’mod attiv l-implimentazzjoni tal-politiki ekonomiċi ġenerali minn SOEs individwali, iżda jeżerċita wkoll id-drittijiet tiegħu li jipparteċipa fit-teħid ta’ deċiżjonijiet operazzjonali fl-SOEs. Ġeneralment dan isir permezz tar-rotazzjoni ta’ uffiċjali tal-partit (cadres) bejn l-awtoritajiet tal-gvern u l-SOEs, permezz tal-preżenza ta’ membri tal-partit fuq il-korpi eżekuttivi tal-SOEs u ta’ ċelloli tal-partit fil-kumpaniji, kif ukoll permezz tat-tfassil tal-istruttura korporattiva tas-settur tal-SOEs. Ta’ dan, l-SOEs igawdu minn status partikolari fl-ekonomija Ċiniża, li jinvolvi għadd ta’ benefiċċji ekonomiċi, b’mod partikolari protezzjoni mill-kompetizzjoni u aċċess preferenzjali għal inputs rilevanti, inklużi l-finanzi (47).

(113)

Madankollu, l-interventi tas-CCP fit-teħid ta’ deċiżjonijiet operazzjonali saru n-norma mhux biss fl-SOEs, iżda anke f’kumpaniji privati (48), bis-CCP jiddikjara tmexxija fuq prattikament kull aspett tal-ekonomija tal-pajjiż. Fil-fatt, l-influwenza tal-Istat permezz tal-istrutturi tas-CCP fil-kumpaniji effettivament tirriżulta f’li l-operaturi ekonomiċi jkunu taħt il-kontroll u s-superviżjoni tal-politika tal-gvern, minħabba sa liema punt l-istrutturi tal-Istat u tal-Partit kibru flimkien fiċ-Ċina.

(114)

Is-settur tal-prodott ikkonċernat huwa moqdi kemm mill-SOEs kif ukoll minn kumpaniji privati. Pereżempju, il-Korporazzjoni Petrokimika taċ-Ċina (“Sinopec”) hija kompletament proprjetà tal-Istat (49), filwaqt li Zhuoyue (50) u Zhejiang Jiaao Enprotech Stock Co., Ltd. (“Jiaao”) (51) huma privati. Mhux biss, wieħed mill-produtturi ewlenin tal-prodott ikkonċernat, Beijing Haixin Energy Technology, li qabel kien magħruf bħala Beijing Sanju Enviromental Protection and New Materials (“Haixin”) (52), juri grad sinifikanti ta’ sjieda pubblika, jiġifieri 35,22 % (53).

(115)

Il-GTĊ jeżerċita gwida dwar l-intrapriżi wkoll billi jistabbilixxi objettivi speċifiċi għas-settur. Pereżempju, fl-2023, l-NEA ħarġet Avviż dwar l-organizzazzjoni u t-twettiq ta’ dimostrazzjonijiet pilota għall-promozzjoni u l-applikazzjoni tal-bijodiżil (“l-Avviż”) (54), li jindirizza direttament is-settur tal-prodott ikkonċernat, billi jimmira li “[j]espandi x-xenarji ta’ applikazzjoni tal-bijodiżil domestiku, jesplora u jistabbilixxi sistema ta’ politika u perkors ta’ żvilupp replikabbli u li tista’ tespandi, gradwalment jifforma effett ta’ dimostrazzjoni u effett fuq l-iskala, u jakkumula l-esperjenza għall-espansjoni kontinwa tal-promozzjoni u l-applikazzjoni ta’ fjuwils likwidi ekoloġiċi bħall-bijodiżil”  (55). L-Avviż jindika wkoll kif jenħtieġ li jintlaħqu l-objettivi msemmija hawn fuq: “[a] bbażi tal-istatus ta’ żvilupp kurrenti tal-industrija tal-bijodiżil kif ukoll tal-produzzjoni u l-konsum, il-gvernijiet fil-livelli kollha, l-intrapriżi u entitajiet oħrajn li japplikaw għal dimostrazzjonijiet pilota jistgħu jagħżlu wieħed jew aktar mill-metodi li ġejjin biex iwettqu dimostrazzjonijiet pilota għall-promozzjoni u l-applikazzjoni tal-bijodiżil filwaqt li jqisu l-kundizzjonijiet lokali. Fl-istess ħin, il-gvernijiet lokali huma mħeġġa wkoll iwettqu dimostrazzjonijiet pilota b’mod kreattiv b’modi oħrajn. […] (I) Organizzazzjoni u rapportar. Il-Kummissjonijiet għall-Iżvilupp u r-Riforma u l-Uffiċċji tal-Enerġija tal-provinċji rilevanti (ir-reġjuni awtonomi u l-muniċipalitajiet direttament taħt il-Gvern Ċentrali), il-Kummissjonijiet għall-Iżvilupp u r-Riforma u l-Uffiċċji tal-Enerġija tal-bliet ippjanati b’mod indipendenti, il-Kummissjoni tal-Ġestjoni Urbana Muniċipali u l-kumpaniji rilevanti tal-enerġija jenħtieġ li jagħtu importanza lill-promozzjoni u l-applikazzjoni tal-bijodiżil, u jorganizzaw b’mod attiv il-bliet, il-kontej (id-distretti) u l-kumpaniji rilevanti fir-reġjun amministrattiv biex iwettqu l-applikazzjoni għal dimostrazzjonijiet pilota għall-promozzjoni u l-applikazzjoni tal-bijodiżil. […] (III) Gwida għall-ħolqien. L-uffiċċju tagħna se jipprovdi gwida ġenerali għall-ħolqien ta’ oqsma pilota ta’ dimostrazzjoni u proġetti relatati mal-promozzjoni u l-applikazzjoni tal-bijodiżil. Id-dipartiment kompetenti ewlieni provinċjali jenħtieġ li jaħdem mad-dipartimenti rilevanti tal-gvern lokali biex isaħħaħ il-gwida u l-appoġġ għall-ħidma tal-ħolqien ta’ dimostrazzjonijiet pilota tal-promozzjoni u l-applikazzjoni tal-bijodiżil fil-ġuriżdizzjoni tiegħu, u jikkoordina biex isolvi problemi relatati. […] (V) Appoġġ għall-politika. L-uffiċċju tagħna se jagħti prijorità lill-appoġġ ta’ proġetti eliġibbli ta’ dimostrazzjonijiet pilota fil-proġetti ta’ self fuq perjodu ta’ żmien medju u twil għall-industrija tal-manifattura, u jippromwovi b’mod attiv l-istabbiliment ta’ metodoloġija għat-tnaqqis tal-emissjonijiet tal-karbonju tal-bijodiżil, jippromwovi l-inklużjoni tal-bijodiżil fil-mekkaniżmu nazzjonali ċċertifikat għat-tnaqqis volontarju tal-emissjonijiet (CCER) u jħaffef l-iżvilupp tal-valur ekoloġiku tal-bijodiżil”  (56).

(116)

Bl-istess mod, fl-2023, il-Kummissjoni Nazzjonali għall-Iżvilupp u r-Riforma (“NDRC”) ħarġet l-Opinjoni ta’ Gwida dwar il-promozzjoni tal-innovazzjoni ekoloġika u l-iżvilupp ta’ kwalità għolja tal-industrija tar-raffinar, li tippromwovi b’mod attiv “[l-iżvilupp ta’] fjuwils likwidi tal-bijomassa bħall-bijodiżil u l-bijofjuwil tal-avjazzjoni li jużaw grass mormi bħala l-materja prima ewlenija” (57) .

(117)

Il-kontroll tal-gvern u s-superviżjoni tal-politika jistgħu jiġu osservati wkoll fil-livell tal-assoċjazzjonijiet tal-industrija rilevanti (58).

(118)

Pereżempju, China Petroleum and Chemical Industry Federation (“CPPIF”) (59) tiddikjara fl-Artikolu 3 tal-Artikoli ta’ Assoċjazzjoni tagħha li l-organizzazzjoni “tistabbilixxi organizzazzjoni tal-Partit Komunista taċ-Ċina, twettaq attivitajiet tal-Partit u tipprovdi l-kundizzjonijiet meħtieġa għall-attivitajiet tal-organizzazzjoni tal-Partit” u “taċċetta l-gwida, is-superviżjoni u l-ġestjoni professjonali mill-entitajiet responsabbli mir-reġistrazzjoni u mill-ġestjoni, mill-entitajiet responsabbli mill-bini tal-Partit, kif ukoll mid-dipartimenti amministrattivi rilevanti responsabbli mill-ġestjoni tal-industrija”  (60).

(119)

Is-CPCIF stabbilixxiet Kumitat għall-Industrija tal-Bijokimika u l-Enerġija mill-Bijomassa, li l-għan tiegħu huwa li:

(120)

Sinopec hija fost il-membri tas-CPCIF (62).

(121)

Il-Fergħa tal-Industrija tal-Enerġija mill-Bijomassa (“BEIB”) (63) tal-Assoċjazzjoni taċ-Ċina għall-Promozzjoni tal-Iżvilupp tal-Industrija, skont l-Artikolu 4 tal-Miżuri ta’ Ġestjoni tagħha, għandha l-għan li “torganizza l-industrija tal-enerġija mill-bijomassa biex timplimenta l-istrateġiji nazzjonali l-ġodda għall-iżvilupp tal-enerġija u tal-enerġija mill-bijomassa, pjanijiet u politiki f’konformità mar-rekwiżiti nazzjonali tal-enerġija, tal-protezzjoni ambjentali u tal-iżvilupp agrikolu modern, issaħħaħ l-awtoġestjoni tal-industrija tal-enerġija mill-bijomassa, ittejjeb il-livell tal-iżvilupp tal-industrija”  (64).

(122)

Konsegwentement, il-produtturi privati fis-settur tal-prodott ikkonċernat huma pprevenuti milli joperaw skont il-kundizzjonijiet tas-suq. Fil-fatt, kemm l-intrapriżi pubbliċi kif ukoll dawk privati fis-settur huma soġġetti għal superviżjoni u għal gwida tal-politika.

(123)

Il-GTĊ huwa f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti. Fil-fatt, iċ-ċelloli tas-CCP fl-intrapriżi, kemm jekk tal-Istat kif ukoll privati, jirrappreżentaw mezz importanti li permezz tiegħu l-Istat jista’ jinterferixxi fid-deċiżjonijiet kummerċjali.

(124)

Skont id-dritt soċjetarju taċ-Ċina, f’kull kumpanija għandha tiġi stabbilita organizzazzjoni tas-CCP (li jkollha mill-anqas tliet membri tas-CCP kif speċifikat fil-Kostituzzjoni tas-CCP (65)) u l-kumpanija għandha tipprovdi l-kundizzjonijiet meħtieġa għall-attivitajiet tal-organizzazzjoni tal-Partit.

(125)

Fil-passat, jidher li dan ir-rekwiżit mhux dejjem ġie segwit jew inforzat b’mod strett. Madankollu, mill-anqas mill-2016, is-CCP qiegħed isaħħaħ il-pretensjonijiet tiegħu sabiex jikkontrolla d-deċiżjonijiet kummerċjali fil-kumpaniji bħala kwistjoni ta’ prinċipju politiku (66), inkluż l-eżerċitar ta’ pressjoni fuq il-kumpaniji privati sabiex ipoġġu l-“patrijottiżmu” l-ewwel u sabiex isegwu d-dixxiplina tal-Partit (67).

(126)

Fl-2017, diġà kien ġie rrapportat li kienu jeżistu ċelloli tal-partit f’70 % ta’ madwar 1,86 miljun kumpanija privata, u dan irriżulta fi pressjoni dejjem akbar biex l-organizzazzjonijiet tas-CCP ikollhom l-aħħar kelma fuq id-deċiżjonijiet kummerċjali fil-kumpaniji rispettivi tagħhom (68). Dawn ir-regoli għandhom applikazzjoni ġenerali fl-ekonomija Ċiniża kollha, fost is-setturi kollha, inkluż għall-produtturi tal-prodott ikkonċernat u għall-fornituri tal-inputs tagħhom.

(127)

Barra minn hekk, fil-15 ta’ Settembru 2020 inħareġ dokument bit-titolu Linji Gwida tal-Uffiċċju Ġenerali tal-Kumitat Ċentrali tas-CCP dwar it-tisħiħ tal-ħidma tal-Front Magħqud fis-settur privat għall-era l-ġdida (“il-Linji Gwida”) (69) , li kompla jespandi r-rwol tal-kumitati tal-Partit f’intrapriżi privati.

(128)

It-Taqsima II.4 tal-Linji Gwida tiddikjara: “[i]rridu nżidu l-kapaċità ġenerali tal-Partit biex imexxi l-ħidma tal-Front Magħqud fis-settur privat u jżid b’mod effettiv il-ħidma f’dan il-qasam” ; u t-taqsima III.6 tiddikjara: “[i]rridu nżidu aktar il-bini tal-Partit f’intrapriżi privati u nippermettu liċ-ċelloli tal-Partit jaqdu r-rwol tagħhom b’mod effettiv bħala fortizza u nippermettu lill-membri tal-Partit iwettqu l-partijiet tagħhom bħala vangwardji u pijunieri” . Għalhekk, il-Linji Gwida jenfasizzaw u jfittxu li jżidu r-rwol tas-CCP fil-kumpaniji u f’entitajiet oħrajn tas-settur privat (70).

(129)

L-investigazzjoni kkonfermat li t-trikkib bejn il-karigi maniġerjali u s-sħubija fis-CCP/il-funzjonijiet tal-Partit jeżisti wkoll fis-settur tal-bijodiżil. Sabiex jingħata eżempju, diversi diretturi ta’ Haixin, kif ukoll il-maniġer ġenerali u l-viċi maniġer ġenerali eżekuttiv huma membri tas-CCP (71).

(130)

Bl-istess mod, id-direttur u l-Viċi Maniġer Ġenerali kurrenti ta’ Jiaao huwa Rappreżentant fl-14-il Kungress tal-Poplu tal-Belt ta’ Jiaxing, Provinċja ta’ Zhejiang (72). Barra minn hekk, informazzjoni mill-2023 turi kif il-fergħa tal-Partit tal-kumpanija kienet qed tinterferixxi direttament mat-teħid ta’ deċiżjonijiet operazzjonali: “[i]r-rappreżentanti tal-fergħat attendew 100 % tal-laqgħat tal-azzjonisti tal-kumpanija, tal-bord tad-diretturi u tal-bord tas-superviżuri fl-2023, u pparteċipaw f’100 % tat-teħid ta’ deċiżjonijiet ewlenin. Il-fergħa pprovdiet garanziji għat-teħid ta’ deċiżjonijiet xjentifiku tal-maniġment tal-kumpanija”  (73).

(131)

Barra minn hekk, diversi maniġers superjuri ta’ Sinopec huma membri tas-CCP, inklużi diversi diretturi u l-President tal-kumpanija. Pereżempju, il-President ta’ Sinopec huwa wkoll is-Segretarju tal-Organizzazzjoni tal-Partit. (74) L-istrutturi tal-Partit fi ħdan il-grupp huma involuti f’diversi aspetti tal-operazzjonijiet ta’ kuljum tan-negozju, pereżempju fir-rigward tat-tisħiħ tal-governanza korporattiva: “[i]l-proposti kollha ppreżentati lill-bord tad-diretturi għal rieżami, bħat-trasformazzjoni u t-titjib tal-intrapriżi tar-raffinar u tal-kimika u l-pjan ta’ azzjoni tal-ogħla livell ta’ karbonju, għaddew u ġew implimentati b’mod ordnat u effettiv, filwaqt li twettqet l-unità tar-rwol ta’ tmexxija tal-grupp tal-Partit u l-prestazzjoni tal-bord tad-diretturi u tat-tim maniġerjali tad-dmirijiet tagħhom f’konformità mal-liġi u mal-karta” (75).

(132)

Il-preżenza u l-intervent tal-Istat fis-swieq finanzjarji kif ukoll fil-provvista ta’ materja prima u ta’ inputs iħallu effett distorsiv addizzjonali fuq is-suq (76). B’hekk, il-preżenza tal-Istat f’ditti, fis-settur tal-bijodiżil u f’setturi oħrajn (bħas-settur finanzjarju u dak tal-inputs) tippermetti lill-GTĊ jinterferixxi fir-rigward tal-prezzijiet u tal-kostijiet.

(133)

Id-direzzjoni tal-ekonomija Ċiniża hija ddeterminata b’mod sinifikanti minn sistema elaborata ta’ ppjanar li tistabbilixxi l-prijoritajiet u tippreskrivi l-miri li fuqhom iridu jiffokaw il-gvernijiet ċentrali, provinċjali u lokali. Jeżistu pjanijiet rilevanti fil-livelli kollha tal-gvern u dawn ikopru virtwalment is-setturi ekonomiċi kollha. L-objettivi stabbiliti mill-istrumenti tal-ippjanar huma ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell korrispondenti aktar baxx tal-gvern.

(134)

B’mod ġenerali, is-sistema tal-ippjanar fiċ-Ċina tirriżulta fit-tmexxija ta’ riżorsi lejn setturi ddeżinjati bħala strateġiċi jew inkella politikament importanti mill-gvern, minflok ma jiġu allokati f’konformità mal-forzi tas-suq (77).

(135)

L-awtoritajiet Ċiniżi adottaw għadd ta’ politiki li jiggwidaw il-funzjonament tas-settur tal-prodott ikkonċernat.

(136)

Pereżempju, l-14-il FYP dwar l-iżvilupp tal-bijoekonomija (78) jistabbilixxi l-objettivi li ġejjin “[g]ħażla mmirata, promozzjoni u applikazzjoni ta’ varjetajiet ġodda ta’ foresti taż-żejt u tal-enerġija b’rendiment għoli, reżistenza għolja u tkabbir rapidu, kostruzzjoni ta’ bażijiet tal-bijoenerġija skont il-kundizzjonijiet lokali, tisħiħ tal-innovazzjoni fit-teknoloġija termokimika u promozzjoni tal-applikazzjoni ta’ bijoenerġija b’effiċjenza għolja u b’kost baxx. It-twettiq ta’ siti ta’ dimostrazzjoni tal-industrija tal-etanol, tal-bijodiżil u tal-gass bijonaturali f’żoni urbani u rurali fejn l-iskart organiku jkun ikkonċentrat […]. It-twettiq ta’ proġetti pilota għall-promozzjoni tal-bijodiżil f’żoni fejn il-kundizzjonijiet jippermettu u l-promozzjoni tad-dimostrazzjoni u l-applikazzjoni ta’ fjuwil tal-bijoavjazzjoni”  (79).

(137)

Barra minn hekk, skont l-14-il FYP dwar l-enerġija rinnovabbli (80), il-GTĊ “[s]e jappoġġa r-riċerka, l-iżvilupp u l-espansjoni ta’ tagħmir teknoloġiku avvanzat fis-setturi tal-produzzjoni tal-bijodiżil u tal-bijopitrolju” (81) u “[s]e jkompli jippromwovi l-applikazzjonijiet kummerċjali ta’ fjuwils likwidi nodfa bħall-etanol u l-bijodiżil, u abbażi tar-riċerka xjentifika dwar il-ġenerazzjoni tal-enerġija u l-prestazzjoni tas-sikurezza, se nespandu l-użu tal-petrol u tad-diżil f’vetturi tqal, f’ajruplani u f’bastimenti”  (82).

(138)

L-14-il FYP dwar l-innovazzjoni fix-xjenza u t-teknoloġija fl-enerġija (83) għandu l-għan li “[j]ifforma sistema teknika għas-sinteżi/għall-konverżjoni effiċjenti tal-bijomassa bħala materja prima għall-produzzjoni ta’ fjuwils għat-trasport/prodotti tal-enerġija b’livell baxx ta’ emissjonijiet tal-karbonju. [Dimostrazzjoni u Ttestjar] Jiżviluppa u juri serje ta’ teknoloġiji bħall-konverżjoni effiċjenti ta’ diversi tipi ta’ materja prima tal-bijomassa f’etanol, il-konverżjoni termali għall-produzzjoni taż-żejt tal-fjuwil u l-konverżjoni termokimika kontinwa taż-żjut għall-produzzjoni tal-bijodiżil” (84) u li “[j]wettaq dimostrazzjonijiet ta’ proġetti ta’ fjuwil bijolikwidu bħall-etanol tal-bijofjuwil, il-bijodiżil, il-bijofjuwil [...]” (85).

(139)

Il-Katalogu ta’ Gwida għall-Aġġustament Strutturali tal-Industrija (“il-Katalogu ta’ Gwida”) jindirizza direttament is-settur tal-prodott ikkonċernat billi jelenkah bħala industrija mħeġġa, filwaqt li proġetti taż-żejt veġetali għall-bijofjuwils li ma humiex konformi mal-pjanijiet nazzjonali u mal-politiki industrijali huma elenkati bħala ristretti (86).

(140)

Il-prodott ikkonċernat jibbenefika wkoll mill-appoġġ tat-taxxa. L-ewwel nett, il-materja prima tal-bijodiżil hija inkluża fl-edizzjoni tal-2022 tal-Katalogu ta’ prodotti u servizzi ta’ użu komprensiv li jibbenefikaw minn rati preferenzjali tal-VAT, b’rata ta’ rifużjoni tat-taxxa ta’ 70 % (87). It-tieni, il-prodott ikkonċernat huwa eżentat ukoll mit-taxxa fuq il-konsum (88) meta jissodisfa l-kundizzjonijiet li ġejjin: “(1) Il-proporzjon ta’ żejt tal-annimali u żejt veġetali mormi fil-produzzjoni tal-materja prima ma għandux ikun anqas minn 70 %. (2) Il-bijodiżil pur prodott jikkonforma mal-istandard nazzjonali “Bijodiżil Imħallat bil-Fjuwil tal-Magni Diżil (BD100)”  (89) . It-tielet, l-intrapriżi jibbenefikaw minn skont ta’ 90 % fuq l-introjtu taxxabbli li joriġina mill-bijodiżil jekk ir-riżorsi speċifikati fil-Katalogu tal-Inċentivi tat-Taxxa fuq l-Introjtu tal-Intrapriżi għall-Użu Komprensiv tar-Riżorsi (“Katalogu tal-Inċentivi tat-Taxxa fuq l-Introjtu”) jintużaw bħala l-materja prima ewlenija (90). B’mod partikolari, il-Katalogu tal-Inċentivi tat-Taxxa fuq l-Introjtu jirregola l-bijodiżil u ż-żejt imħallat ta’ grad industrijali magħmul miż-żejt tal-bijomassa mormi u miż-żejt lubrikanti mormi, li jirrikjedi li “1. Aktar minn 90 % tal-materja prima tal-prodott tiġi mir-riżorsi elenkati. 2. Il-prodott jikkonforma mal-istandards nazzjonali u industrijali”  (91).

(141)

Fil-livell tal-provinċja, skont l-14-il FYP ta’ Jiangsu dwar l-iżvilupp ta’ livell għoli tal-industrija kimika (92) l-awtoritajiet tal-gvern huma mistennija li jsawru t-tqassim industrijali tas-settur kif ġej: “[j]ippromwovu s-sostituzzjoni tal-enerġija mhux fossili u jiffokaw fuq il-promozzjoni tal-applikazzjoni fuq skala kbira tal-bijofjuwils, tal-fjuwils derivati mill-iskart u ta’ sorsi tal-enerġija oħrajn f’oqsma ewlenin”  (93).

(142)

Is-settur tal-bijodiżil huwa appoġġat ħafna wkoll mill-Muniċipalità ta’ Shanghai. Il-Miżuri ta’ Shanghai tal-2021 jindirizzaw direttament is-settur tal-prodott ikkonċernat (ara wkoll il-premessa (84)). Pereżempju, jistabbilixxu mekkaniżmu għall-formazzjoni tal-prezzijiet: “l-intrapriżi tat-tħejjija u tal-bejgħ tal-bijodiżil B5 jixtru l-bijodiżil BD100 minn intrapriżi tad-disponiment skont il-prezz bl-ingrossa tad-diżil 0# imħabbar mid-dipartiment tal-prezzijiet tal-belt (il-prezz bl-ingrossa tad-diżil 0# huwa l-ogħla prezz bl-imnut ippubblikat nieqes CNY 300/tunnellata, l-istess hawn taħt) […] Meta l-prezz bl-ingrossa ta’ diżil 0# ikun anqas minn 6 000 yuan/tunnellata, il-fondi fiskali muniċipali jissussidjaw il-porzjon anqas minn 6 000 CNY/tunnellata għall-intrapriża tad-disponiment. Matul l-implimentazzjoni tas-sussidji ta’ emerġenza, il-kumpaniji tad-disponiment jenħtieġ li jixtru ż-żejt mhux maħdum bi prezz ta’ mhux anqas minn 3 600 CNY/tunnellata” (94). Barra minn hekk, jirregolaw Politika ta’ Appoġġ Finanzjarju: “[i]l-finanzi muniċipali jorganizzaw fondi biex jissussidjaw lill-intrapriżi tat-taħlit u tal-bejgħ tal-bijodiżil B5 ibbażati fuq 80 % tal-iskont attwali meta mqabbel ma’ diżil 0# għall-bijodiżil B5 mibjugħ f’pompi tal-petrol tal-bijodiżil B5, f’pompi tal-petrol galleġġanti u f’pompi tal-petrol interni. […] Kull darba li intrapriża tat-taħlit u tal-bejgħ tal-bijodiżil B5 tiddetermina jew taġġusta l-prezz bl-imnut tal-gażolina u tad-diżil fil-pompi tal-petrol, trid tistipula b’mod ċar il-prezz tal-bijodiżil B5 jew il-marġni preferenzjali meta mqabbel ma’ diżil 0#, u tibgħat kopja tad-dokument lill-awtoritajiet kompetenti rilevanti. Il-pompi tal-petrol kollha jenħtieġ li jieħdu l-inizjattiva li jiżvelaw il-prezzijiet tal-bejgħ tad-diżil 0# u tal-bijodiżil B5 u jaċċettaw superviżjoni soċjali. […] Is-sussidji finanzjarji huma soġġetti għall-kontroll tal-volum totali, u l-volum totali tal-applikazzjoni tal-bijodiżil B5 issussidjat ma għandux jaqbeż is-600 000 tunnellata. Jekk il-volum iġġenerat, miġbur, ittrasportat, mormi, ippreparat u mibjugħ f’din il-belt tabilħaqq jaqbeż is-600 000 tunnellata, dan irid jiġi rieżaminat u rrapportat b’mod konġunt lill-Uffiċċju Muniċipali tal-Ekoloġizzazzjoni u d-Dehra tal-Belt, lill-Kummissjoni Muniċipali tal-Ekonomija u tat-Teknoloġija tal-Informazzjoni, lill-Uffiċċju Muniċipali ta’ Superviżjoni tas-Suq, lill-Kummissjoni Muniċipali tal-Iżvilupp u r-Riforma, u lill-Uffiċċju Muniċipali tal-Finanzi. Se jsiru aġġustamenti wara li l-gvern tal-belt jaqbel” (95). Il-fondi ta’ sussidju involuti fil-miżuri msemmija hawn fuq huma allokati mill-fondi speċjali ta’ Shanghai għall-konservazzjoni tal-enerġija u għat-tnaqqis tal-emissjonijiet (96).

(143)

L-allokazzjoni ta’ fondi speċjali għall-promozzjoni u l-applikazzjoni tal-bijodiżil mill-iskart taż-żejt tal-kċina fl-2021, ibbenefikat, pereżempju, Sinopec Sales Co., Ltd. Fergħa ta’ Shanghai Petroleum – Bijodiżil, li rċeviet appoġġ finanzjarju ta’ CNY 129 miljun (97). Fl-2022, irċeviet CNY 152 miljun (98).

(144)

Għalhekk, permezz ta’ dawn l-istrumenti u mezzi oħrajn, il-GTĊ jidderieġi u jikkontrolla kważi kull aspett fl-iżvilupp u fil-funzjonament tas-settur, kif ukoll l-inputs upstream.

(145)

Fil-qosor, il-GTĊ għandu miżuri fis-seħħ biex iħeġġeġ lill-operaturi jikkonformaw mal-objettivi tal-ordni pubbliku li jikkonċernaw is-settur. Dawn il-miżuri jimpedixxu l-forzi tas-suq milli joperaw b’mod ħieles.

(146)

Skont l-informazzjoni fil-fajl, is-sistema Ċiniża dwar il-falliment ma timplimentax b’mod adegwat l-objettivi ewlenin tagħha bħal pereżempju s-saldu ġust tal-pretensjonijiet u tad-dejn u s-salvagwardja tad-drittijiet u l-interessi legali tal-kredituri u tad-debituri. Dan jidher li huwa msejjes fil-fatt li filwaqt li l-liġi Ċiniża dwar il-falliment tiddependi b’mod formali minn prinċipji simili għal dawk applikati f’liġijiet korrispondenti ta’ pajjiżi oħra għajr iċ-Ċina, is-sistema Ċiniża hija kkaratterizzata minn nuqqas ta’ infurzar sistematiku.

(147)

In-numru ta’ fallimenti għadu magħruf li huwa baxx meta mqabbel mad-daqs tal-ekonomija tal-pajjiż, mhux l-anqas minħabba li l-proċedimenti ta’ insolvenza għandhom numru ta’ nuqqasijiet, li effettivament jiffunzjonaw bħala diżinċentiv għall-preżentazzjonijiet ta’ fallimenti. Barra minn hekk, ir-rwol tal-Istat fil-proċedimenti ta’ insolvenza għadu b’saħħtu u attiv, u ta’ spiss ikollu influwenza diretta fuq l-eżitu tal-proċedimenti (99).

(148)

Barra minn hekk, in-nuqqasijiet tas-sistema tad-drittijiet tal-proprjetà huma partikolarment ovvji fir-rigward tas-sjieda tal-art u tad-drittijiet għall-użu tal-art fiċ-Ċina (100). L-art kollha hija proprjetà tal-Istat (art rurali bi sjieda kollettiva u art urbana proprjetà tal-Istat) u l-allokazzjoni tagħha tibqa’ tiddependi biss fuq l-Istat. Hemm dispożizzjonijiet legali li għandhom l-għan li jallokaw id-drittijiet għall-użu tal-art b’mod trasparenti u bi prezzijiet tas-suq, pereżempju bl-introduzzjoni ta’ proċeduri ta’ offerti. Madankollu, dawn id-dispożizzjonijiet huma regolarment mhux irrispettati, u ċerti akkwirenti jiksbu l-art tagħhom mingħajr ħlas jew b’rati aktar baxxi mir-rati tas-suq (101). Barra minn hekk, l-awtoritajiet spiss isegwu għanijiet politiċi speċifiċi, inkluż l-implimentazzjoni tal-pjanijiet ekonomiċi, meta jkunu qed jallokaw l-art (102).

(149)

L-istess bħas-setturi l-oħrajn fl-ekonomija Ċiniża, il-produtturi tal-prodott ikkonċernat huma soġġetti għar-regoli ordinarji dwar il-liġi Ċiniża dwar il-falliment, il-kumpaniji u l-proprjetà. L-effett ta’ dan huwa li anke dawn il-kumpaniji huma soġġetti għad-distorsjonijiet minn fuq għal isfel li jirriżultaw mill-applikazzjoni diskriminatorja jew mill-infurzar inadegwat tal-liġijiet dwar il-falliment u l-proprjetà. Dawn il-kunsiderazzjonijiet, abbażi tal-evidenza disponibbli, jidhru li huma kompletament applikabbli wkoll fis-settur tal-prodott ikkonċernat. Din l-investigazzjoni ma żvelat xejn li jqajjem dubji dwar dawn is-sejbiet.

(150)

Fid-dawl ta’ dan ta’ hawn fuq, il-Kummissjoni kkonkludiet li kien hemm applikazzjoni diskriminatorja jew infurzar inadegwat tal-liġijiet dwar il-falliment u l-proprjetà fis-settur tal-prodott ikkonċernat.

(151)

Sistema ta’ pagi bbażati fuq is-suq ma tistax tiżviluppa kompletament fiċ-Ċina minħabba li l-ħaddiema u l-impjegaturi huma mxekkla fid-drittijiet tagħhom għal organizzazzjoni kollettiva. Iċ-Ċina ma rratifikatx numru ta’ konvenzjonijiet essenzjali tal-Organizzazzjoni Internazzjonali tax-Xogħol, b’mod partikolari dawk dwar il-libertà ta’ assoċjazzjoni u dwar in-negozjar kollettiv (103).

(152)

Skont il-liġi nazzjonali, organizzazzjoni ta’ trade union waħda biss hija attiva. Madankollu, din l-organizzazzjoni ma hijiex indipendenti mill-awtoritajiet tal-istat u l-involviment tagħha fin-negozjar kollettiv u fil-protezzjoni tad-drittijiet tal-ħaddiema għadu rudimentali (104). Barra minn hekk, il-mobilità tal-forza tax-xogħol Ċiniża hija ristretta mis-sistema ta’ reġistrazzjoni tal-unitajiet domestiċi, li tillimita l-aċċess għall-firxa sħiħa tal-benefiċċji tas-sigurtà soċjali u oħrajn għar-residenti lokali ta’ żona amministrattiva partikolari.

(153)

Dan tipikament jirriżulta f’ħaddiema li ma jkunux fil-pussess tar-reġistrazzjoni tar-residenza lokali, u jsibu ruħhom f’pożizzjoni ta’ impjieg vulnerabbli u jirċievu introjtu aktar baxx mid-detenturi tar-reġistrazzjoni tar-residenza (105). Dawk is-sejbiet iwasslu għad-distorsjoni tal-kostijiet tal-pagi fiċ-Ċina.

(154)

Ma ġiet ippreżentata l-ebda evidenza li turi li s-settur tal-bijodiżil ma huwiex soġġett għas-sistema Ċiniża dwar il-liġi tax-xogħol deskritta. Għalhekk, is-settur huwa affettwat mid-distorsjonijiet tal-kostijiet tal-pagi kemm direttament (fil-produzzjoni tal-prodott ikkonċernat jew tal-materja prima ewlenija għall-produzzjoni tiegħu) kif ukoll indirettament (f’termini ta’ aċċess għall-kapital jew għal inputs minn kumpaniji soġġetti għall-istess sistema tax-xogħol fiċ-Ċina).

(155)

L-aċċess għall-kapital għal atturi korporattivi fiċ-Ċina huwa soġġett għal diversi distorsjonijiet.

(156)

L-ewwel nett, is-sistema finanzjarja Ċiniża hija kkaratterizzata mill-pożizzjoni b’saħħitha tal-banek tal-Istat (106), li, meta jagħtu aċċess għal finanzi, iqisu kriterji oħrajn għajr il-vijabbiltà ekonomika ta’ proġett. B’mod simili għall-SOEs mhux finanzjarji, il-banek jibqgħu konnessi mal-Istat mhux biss permezz tas-sjieda iżda anke permezz ta’ relazzjonijiet personali (l-ogħla uffiċjali eżekuttivi ta’ istituzzjonijiet finanzjarji kbar tal-Istat fl-aħħar mill-aħħar jinħatru mis-CCP) (107) u dawn jimplimentaw regolarment ordnijiet pubbliċi mfassla mill-GTĊ.

(157)

Meta jagħmlu dan, il-banek jikkonformaw ma’ obbligu legali espliċitu li jmexxu n-negozju tagħhom f’konformità mal-ħtiġijiet tal-iżvilupp ekonomiku u soċjali nazzjonali u skont il-gwida tal-politiki industrijali tal-Istat (108). Filwaqt li huwa rikonoxxut li diversi dispożizzjonijiet legali jirreferu għall-ħtieġa li jiġu rrispettati l-imġiba bankarja normali u r-regoli prudenzjali bħall-ħtieġa li tiġi eżaminata l-affidabbiltà kreditizja tal-mutwatarju, l-evidenza massiva, inklużi s-sejbiet li saru fl-investigazzjonijiet tad-difiża tal-kummerċ, tissuġġerixxi li dawn id-dispożizzjonijiet għandhom biss rwol sekondarju fl-applikazzjoni tad-diversi strumenti legali.

(158)

Pereżempju, il-GTĊ iċċara li anke d-deċiżjonijiet bankarji kummerċjali privati jridu jiġu ssorveljati mis-CCP u jibqgħu konformi mal-politiki nazzjonali. Wieħed mit-tliet għanijiet ġenerali tal-Istat fir-rigward tal-governanza bankarja issa huwa li tissaħħaħ it-tmexxija tal-Partit fis-settur bankarju u tal-assigurazzjoni, inkluż fir-rigward ta’ kwistjonijiet operazzjonali u ta’ ġestjoni (109). Barra minn hekk, il-kriterji tal-evalwazzjoni tal-prestazzjoni tal-banek kummerċjali issa għandhom iqisu, b’mod partikolari, kif l-entitajiet “jaqdu l-objettivi ta’ żvilupp nazzjonali u l-ekonomija reali”, u b’mod partikolari kif dawn “jaqdu l-industriji strateġiċi u emerġenti”. (110)

(159)

Barra minn hekk, il-klassifikazzjonijiet tal-bonds u tal-kreditu ta’ spiss ikunu distorti għal diversi raġunijiet, inkluż il-fatt li l-valutazzjoni tar-riskju tiġi influwenzata mill-importanza strateġika tad-ditta għall-GTĊ u mis-saħħa ta’ kull garanzija impliċita mill-gvern (111). Dan huwa amplifikat permezz ta’ regoli eżistenti addizzjonali, li jidderieġu l-finanzi lejn setturi magħżula mill-gvern bħala mħeġġa jew li b’xi mod ieħor huma importanti (112). Dan jirriżulta f’tendenza favur li jingħata self lill-SOEs, lil ditti privati kbar u b’konnessjonijiet tajbin u lil ditti f’setturi industrijali ewlenin, u dan jimplika li d-disponibbiltà u l-kost tal-kapital ma humiex ugwali għall-atturi kollha fis-suq.

(160)

It-tieni, il-kostijiet tas-self inżammu baxxi b’mod artifiċjali sabiex jiġi stimulat it-tkabbir tal-investiment. Dan wassal għall-użu eċċessiv ta’ investiment kapitali b’redditi dejjem aktar baxxi fuq l-investiment. Dan huwa muri mit-tkabbir fl-ingranaġġ korporattiv fis-settur tal-Istat minkejja tnaqqis qawwi fil-profittabbiltà, li jissuġġerixxi li l-mekkaniżmi operati fis-sistema bankarja ma jsegwux risponsi kummerċjali normali.

(161)

It-tielet, għalkemm f’Ottubru 2015 inkisbet liberalizzazzjoni nominali tar-rata tal-imgħax, is-sinjali tal-prezzijiet għadhom ma humiex ir-riżultat ta’ forzi tas-suq ħieles, iżda huma influwenzati minn distorsjonijiet ikkawżati mill-gvern. Is-sehem tas-self bir-rata ta’ referenza jew taħtha kien għadu jirrappreżenta mill-anqas terz tas-self kollu sa tmiem l-2018 (113) u, fl-2020, il-media uffiċjali fiċ-Ċina rrapportat li s-CCP talab li “titnaqqas ir-rata tal-imgħax tas-suq tas-self” (114). Rati tal-imgħax baxxi b’mod artifiċjali jirriżultaw fi twaqqigħ tal-prezzijiet, u konsegwentement, fl-użu eċċessiv tal-kapital.

(162)

It-tkabbir ġenerali tal-kreditu fiċ-Ċina jindika deterjorament fl-effiċjenza tal-allokazzjoni tal-kapital mingħajr ebda sinjal ta’ ssikkar tal-kreditu li jkun mistenni f’ambjent tas-suq mingħajr distorsjoni. B’riżultat ta’ dan, is-self improduttiv żdied b’mod rapidu, u l-GTĊ għażel numru ta’ drabi li jew jevita l-inadempjenzi, biex b’hekk inħolqu l-hekk imsejħin kumpaniji “żombi”, jew li jittrasferixxi s-sjieda tad-dejn (eż. permezz ta’ fużjonijiet jew ta’ skambju ta’ dejn ma’ ekwità), mingħajr ma neċessarjament jelimina l-problema ġenerali tad-dejn jew jindirizza l-kawżi ewlenin tagħha.

(163)

Essenzjalment, minkejja l-passi li ttieħdu biex jiġi liberalizzat is-suq, is-sistema tal-kreditu korporattiv fiċ-Ċina hija affettwata minn distorsjonijiet sinifikanti li jirriżultaw mir-rwol pervażiv kontinwu tal-istat fis-swieq kapitali. Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(164)

Fis-settur tal-prodott ikkonċernat, pereżempju, l-Avviż tal-NEA tal-2023 imsemmi fil-premessa (115)(122), jistipula li “[s]kont is-sitwazzjoni attwali, kull reġjun se jżid il-garanzija tal-użu tal-art u tal-baħar u fatturi oħrajn għal proġetti ta’ ħolqien ta’ dimostrazzjoni pilota, jottimizza l-proċess tal-approvazzjoni tal-proġett, u jistudja u jipprovdi appoġġ finanzjarju biex jinħolqu kundizzjonijiet tajbin għall-kostruzzjoni ta’ żoni u proġetti ta’ dimostrazzjoni pilota”  (115).

(165)

Ma tressqet l-ebda evidenza f’din l-investigazzjoni li turi li s-settur tal-prodott ikkonċernat ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż, tar-Regolament bażiku. Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(166)

Il-Kummissjoni nnotat li d-distorsjonijiet deskritti fir-Rapport aġġornat huma karatteristiċi għall-ekonomija Ċiniża. L-evidenza disponibbli turi li l-fatti u l-karatteristiċi tas-sistema Ċiniża kif deskritti hawn fuq kif ukoll fil-Parti I tar-Rapport aġġornat japplikaw fil-pajjiż kollu u fis-setturi kollha tal-ekonomija. L-istess jgħodd għad-deskrizzjoni tal-fatturi tal-produzzjoni kif stabbilit hawn fuq u fil-Parti II tar-Rapport aġġornat.

(167)

Il-Kummissjoni tfakkar li sabiex jiġi mmanifatturat il-prodott ikkonċernat, huma meħtieġa ċerti inputs. Meta l-produtturi tal-prodott ikkonċernat jixtru/jikkuntrattaw dawn l-inputs, il-prezzijiet li dawn iħallsu (u li jiġu rreġistrati bħala l-kostijiet tagħhom) huma esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu ħaddiema li huma soġġetti għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital. Minbarra dan, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi. Dawn id-distorsjonijiet ġew deskritti fid-dettall hawn fuq, b’mod partikolari fit-taqsimiet 3.2.1 sa 3.2.1.7. Il-Kummissjoni indikat li l-istruttura regolatorja li tirfed dawk id-distorsjonijiet tapplika b’mod ġenerali, bil-produtturi tal-bijodiżil ikunu soġġetti għal dawk ir-regoli bħal kwalunkwe operatur ekonomiku ieħor fiċ-Ċina. Għalhekk, id-distorsjonijiet għandhom impatt dirett fuq l-istruttura tal-kostijiet tal-prodott ikkonċernat.

(168)

B’konsegwenza ta’ dan, mhux biss il-prezzijiet tal-bejgħ domestiku tal-prodott ikkonċernat ma humiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-ħaddiema, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali min-naħa tal-gvern, kif deskritt fil-Partijiet I u II tar-Rapport aġġornat.

(169)

Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-ħaddiema, tal-enerġija u tal-materja prima huma preżenti fiċ-Ċina kollha kemm hi. Dan ifisser, pereżempju, li input li minnu nnifsu kien immanifatturat fiċ-Ċina permezz tal-kombinazzjoni ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input tal-input u l-bqija.

(170)

Is-CCCMC, fl-osservazzjonijiet ippreżentati fis-26 ta’ Jannar 2024, esprimiet il-pożizzjoni ġenerali tagħha li l-metodoloġija preskritta mill-Artikolu 2(6a) tar-Regolament bażiku biex jiġi stabbilit il-valur normali hija inkompatibbli mal-ftehimiet u l-ġurisprudenza tad-WTO, b’mod partikolari l-Artikoli 2.1 u 2.2 tal-Ftehim tad-WTO dwar l-Anti-dumping (“ADA”), li jipprovdu l-metodoloġiji standard sabiex jiġi stabbilit il-valur normali. F’dan ir-rigward, is-CCCMC ippreżentat id-dikjarazzjonijiet li ġejjin.

(171)

L-ewwel nett, it-Taqsima 15 tal-Protokoll ta’ Adeżjoni taċ-Ċina mad-WTO ppermettiet lill-membri tad-WTO jidderogaw mill-metodoloġija standard imsemmija hawn fuq fid-determinazzjoni tal-valur normali u l-komparabbiltà tal-prezzijiet biss sal-11 ta’ Diċembru 2016, meta din id-deroga skadiet. Minn dak iż-żmien, l-UE kienet mistennija li taderixxi mal-metodoloġiji standard previsti skont l-Artikoli 2.1 u 2.2 tal-ADA biex tistabbilixxi l-valur normali tal-produtturi esportaturi Ċiniżi, u b’hekk tuża l-prezzijiet u l-kostijiet attwali tal-produtturi esportaturi Ċiniżi.

(172)

It-tieni, il-metodoloġija prevista fl-ADA biex jiġi stabbilit il-valur normali ma tippermettix l-użu ta’ informazzjoni għajr informazzjoni relatata mal-pajjiż esportatur, li jimplika li l-awtorità investigattiva ma tistax tikkalkula l-valur normali abbażi ta’ prezzijiet jew parametri referenzjarji mingħajr distorsjoni f’pajjiż rappreżentattiv xieraq (għajr il-pajjiż esportatur) abbażi tal-eżistenza ta’ distorsjonijiet sinifikanti, li l-kunċett tagħhom ma jeżistix fl-ADA. Biex tappoġġa d-dikjarazzjoni tagħha, is-CCCMC semmiet ir-rapport tal-Korp tal-Appell fit-tilwima DS473 UE – Bijodiżil (l-Arġentina).

(173)

Dawn l-argumenti ma setgħux jiġu aċċettati. Il-Kummissjoni qieset li d-dispożizzjoni tal-Artikolu 2(6a) hija konsistenti b’mod sħiħ mal-obbligi tad-WTO tal-Unjoni Ewropea u mal-ġurisprudenza ċċitata mis-CCCMC. Fil-fatt, l-eżistenza ta’ distorsjonijiet sinifikanti tagħmel il-kostijiet u l-prezzijiet fil-pajjiż esportatur mhux xierqa għall-kalkolu tal-valur normali. F’dawn iċ-ċirkostanzi, l-Artikolu 2(6a) tar-Regolament bażiku jipprevedi l-kalkolu tal-kostijiet tal-produzzjoni u tal-bejgħ abbażi ta’ prezzijiet jew parametri referenzjarji mingħajr distorsjoni, inklużi dawk f’pajjiż rappreżentattiv xieraq b’livell simili ta’ żvilupp bħall-pajjiż esportatur. Ir-rapport tal-Korp tal-Appell f’DS473 ma kienx jikkonċerna l-applikazzjoni tal-Artikolu 2(6a) tar-Regolament bażiku, iżda ta’ dispożizzjoni speċifika tal-Artikolu 2(5) tar-Regolament bażiku. Fi kwalunkwe każ, il-liġi tad-WTO kif interpretata mill-Korp tal-Appell f’DS437, tippermetti l-użu ta’ data minn pajjiż terz, debitament aġġustata meta dan l-aġġustament ikun meħtieġ u sostanzjat.

(174)

Fir-rigward tal-impenji skont it-Taqsima 15 tal-Protokoll ta’ Adeżjoni taċ-Ċina mad-WTO, il-Kummissjoni indikat li fi proċedimenti anti-dumping li jikkonċernaw prodotti miċ-Ċina, il-partijiet tat-taqsima 15 tal-Protokoll li ma skadewx ikomplu japplikaw meta jiġi ddeterminat il-valur normali.

(175)

Billi l-Kummissjoni kkonkludiet fit-taqsima 3.2.1 li huwa xieraq li f’din l-investigazzjoni jiġi applikat l-Artikolu 2(6a) tar-Regolament bażiku u li d-dispożizzjoni hija kompletament konsistenti mar-regoli tad-WTO, dawn id-dikjarazzjonijiet ġew miċħuda.

(176)

Is-CCCMC, fl-osservazzjonijiet tagħha, iddikjarat ukoll li l-ilmentatur ma sab l-ebda evidenza suffiċjenti ta’ distorsjonijiet sinifikanti li jaffettwaw il-prezzijiet u l-kostijiet fiċ-Ċina. F’dan ir-rigward, is-CCCMC issottomettiet għadd ta’ argumenti.

(177)

L-ewwel nett, sabiex tintwera l-eżistenza ta’ distorsjonijiet sinifikanti u s-superviżjoni, il-gwida u l-intervent tal-gvern fis-settur tal-bijodiżil, l-ilmentatur ibbaża fuq dokumenti li jew huma skaduti – bħar-Rapport – jew huma ġenerali wisq u mhux vinkolanti – bħall-Pjan ta’ Azzjoni Strateġiku għall-Iżvilupp tal-Enerġija (2014-2020), li issa skada, u l-14-il FYP (2021-2025) għall-Iżvilupp tal-Enerġija Rinnovabbli.

(178)

It-tieni, l-ilmentatur ibbaża wkoll fuq diversi investigazzjonijiet tal-Kummissjoni tal-passat, li jew ma għandhom l-ebda korrelazzjoni temporali mal-każ preżenti jew jikkonċernaw prodotti, industriji u setturi differenti. Is-CCCMC fakkret li, kif sostnut mill-Korp tal-Appell f’DS379 US – AD u CVD (iċ-Ċina): “[L]i sempliċiment jiġi inkorporat b’sejbiet ta’ referenza minn determinazzjoni waħda f’determinazzjoni oħra normalment ma jkunx biżżejjed bħala spjegazzjoni motivata u adegwata. Madankollu, meta jkun hemm koinċidenza temporali u sostantiva mill-qrib bejn iż-żewġ investigazzjonijiet, din il-kontroreferenza tista’, b’mod eċċezzjonali, tkun biżżejjed” (116). Għalhekk, meta wieħed iqis in-nuqqas ta’ korrelazzjoni temporali u sostantiva bejn investigazzjonijiet tal-passat bħal dawn u l-każ preżenti, referenza sempliċi għas-sejbiet tal-Kummissjoni f’investigazzjonijiet bħal dawn ma sservix bħala evidenza suffiċjenti ta’ distorsjonijiet sostanzjali fl-industrija Ċiniża tal-bijodiżil.

(179)

It-tielet, sabiex jintwera intervent sostanzjali tal-gvern li jaffettwa l-prezzijiet u l-kostijiet domestiċi, l-ilmentatur iddikjara li ħafna intrapriżi fiċ-Ċina huma proprjetà tal-Istat. Madankollu, is-sjieda tal-Istat ma tikkostitwix evidenza suffiċjenti ta’ “kontroll sinifikanti”, ta’ “inkarigu”, ta’ “direzzjoni” mill-Gvern jew ta’ “interferenza mill-Istat” fir-rigward tal-prezzijiet jew tal-kostijiet f’industrija partikolari.

(180)

Ir-raba’, fi kwalunkwe każ, l-ilmentatur ma pprovdiex evidenza biex juri li l-intervent tal-gvern huwa l-kawża ta’ “distorsjonijiet sinifikanti” li jaffettwaw il-prezzijiet u/jew il-kostijiet tal-produtturi Ċiniżi tal-bijodiżil. Fin-nuqqas ta’ evidenza bħal din, ma jistax jiġi preżunt li l-prezzijiet u l-kostijiet tal-produtturi Ċiniżi tal-bijodiżil ma humiex ir-riżultat ta’ forzi tas-suq ħieles.

(181)

Il-Kummissjoni ma setgħetx taċċetta l-argumenti tas-CCCMC dwar (l-allegat nuqqas ta’) evidenza ta’ distorsjonijiet sinifikanti fiċ-Ċina għar-raġunijiet li ġejjin.

(182)

L-ewwel nett, anki jekk ċerti dokumenti ta’ politika Ċiniżi, bħall-FYPs tat-13-il ċiklu ta’ ppjanar imsemmija fir-Rapport, sadattant skadew, it-tipi u l-firxa tad-distorsjonijiet deskritti fir-Rapport jibqgħu fis-seħħ fiċ-Ċina. Dan minħabba li l-leġiżlazzjoni ewlenija – inkluż il-Kostituzzjoni Ċiniża, il-Kostituzzjoni tas-CCP, kif ukoll bosta liġijiet sekondarji - iżżomm l-elementi li jirriżultaw f’distorsjonijiet fis-sens tal-Artikolu 2 (6a) tar-Regolament bażiku u li r-Rapport jiddeskrivi fid-dettall. Għalhekk, l-ilmentatur kellu raġun jibbaża fuq ir-Rapport bħala sors ta’ informazzjoni li jindika l-eżistenza ta’ distorsjonijiet sinifikanti. F’dan il-kuntest, il-Kummissjoni fakkret l-istandard speċifiku ta’ evidenza fil-bidu skont l-Artikolu 5(9) tar-Regolament bażiku (ara l-premessa (186) għal aktar dettalji). Fi kwalunkwe każ, mhux talli ma bbażax biss fuq l-evidenza fir-Rapport, l-ilmentatur irrefera għal għadd ta’ elementi ta’ distorsjoni addizzjonali fis-settur tal-bijodiżil fiċ-Ċina, kif deskritt fil-premessi (80) - (90) hawn fuq.

(183)

Barra minn hekk, il-Kummissjoni ma qablitx li l-14-il FYP għall-Iżvilupp tal-Enerġija Rinnovabbli, kif ukoll FYPs oħra, jirrappreżentaw biss linja gwida mhux vinkolanti. Għall-kuntrarju, il-Kummissjoni fakkret li s-sistema Ċiniża tal-ippjanar tistabbilixxi prijoritajiet u tippreskrivi l-miri li l-gvernijiet ċentrali u lokali jridu jiffokaw fuqhom. Jeżistu pjanijiet rilevanti fil-livelli kollha tal-gvern u dawn ikopru virtwalment is-setturi ekonomiċi kollha u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell inferjuri korrispondenti tal-gvern. Kif deskritt fid-dettall fir-Rapport aġġornat, l-objettivi stabbiliti mill-istrumenti ta’ ppjanar fil-fatt huma ta’ natura vinkolanti, u s-sistema tal-ippjanar tirriżulta fl-allokazzjoni ta’ riżorsi għal setturi ddeżinjati bħala strateġiċi jew inkella politikament importanti mill-gvern, minflok fl-allokazzjoni tagħhom f’konformità mal-forzi tas-suq.

(184)

It-tieni, il-Kummissjoni fakkret li fil-fatt f’DS379, id-deċiżjoni tal-Korp tal-Appell stabbiliet b’mod espliċitu li hija permessa kontroreferenza minn determinazzjoni għal oħra, fejn hemm koinċidenza temporali u sostantiva mill-qrib bejn iż-żewġ investigazzjonijiet. Din il-koinċidenza sostantiva teżisti b’mod ċar bejn din l-investigazzjoni u l-investigazzjonijiet imsemmija mill-ilmentatur, b’mod partikolari minħabba li dawk l-investigazzjonijiet analizzaw politiki u regoli li huma ta’ applikazzjoni ġenerali fl-ekonomija Ċiniża kollha, fis-setturi kollha, u għalhekk jinfluwenzaw ukoll is-settur tal-prodott ikkonċernat, bħall-influwenza tal-GTĊ u tas-CCP fuq il-kumpaniji u/jew il-fatt li s-sistema ta’ ppjanar fir-RPĊ tirriżulta fl-allokazzjoni ta’ riżorsi f’konformità mal-objettivi tal-politiki industrijali. Barra minn hekk, is-sejba tal-Korp tal-Appell imfakkra mis-CCCMC kienet tikkonċerna d-determinazzjoni finali aktar milli s-suffiċjenza tal-evidenza fil-bidu.

(185)

It-tielet, fir-rigward tas-sjieda tal-Istat, il-Kummissjoni spjegat fir-Rapport aġġornat l-influwenza wiesgħa li l-GTĊ u s-CCP għandhom fuq l-SOEs, kif ukoll il-karatteristika legali u organizzazzjonali rilevanti li tipprovdi lill-awtoritajiet Ċiniżi b’influwenza fuq l-imġiba tas-suq anke fil-każ ta’ kumpaniji privati (ara, b’mod partikolari, it-taqsima 3.2.1.2). Barra minn hekk, il-Kummissjoni fakkret li, skont l-Artikolu 2(6a)(b) tar-Regolament bażiku, il-Kummissjoni ma tivvalutax jekk is-sjieda tal-Istat tikkostitwix “kontroll sinifikanti”, “inkarigu”, “direzzjoni” jew “interferenza mill-Istat” mill-Gvern fir-rigward tal-prezzijiet jew tal-kostijiet f’industrija partikolari. Minflok, il-Kummissjoni tiddetermina jekk is-suq inkwistjoni huwiex qiegħed jiġi servut sa punt sinifikanti minn intrapriżi li joperaw taħt is-sjieda, taħt il-kontroll jew taħt is-superviżjoni politika jew taħt il-gwida tal-awtoritajiet tal-pajjiż esportatur. Dan min-naħa tiegħu huwa wieħed mill-elementi li l-impatt tagħhom għandu jitqies meta tiġi vvalutata l-eżistenza ta’ distorsjonijiet sinifikanti.

(186)

Ir-raba’, kif ikkonfermat mill-Qorti Ġenerali fi Viraj Profiles, il-kwantità u l-kwalità tal-evidenza meħtieġa biex jiġu ssodisfati l-kriterji tas-suffiċjenza tal-evidenza għall-fini tal-bidu ta’ investigazzjoni hija differenti minn dik li hija meħtieġa għall-fini ta’ determinazzjoni preliminari jew finali tal-eżistenza ta’ dumping, dannu jew rabta każwali. (117) L-ilment issodisfa l-istandards stabbiliti fl-Artikolu 5(9) tar-Regolament bażiku, flimkien mal-Artikolu 2(6a)(d). Fil-fatt, kif indikat fin-Notifika tal-Bidu, fl-istadju tal-bidu, il-Kummissjoni qieset li kien hemm evidenza suffiċjenti skont l-Artikolu 5(9) tar-Regolament bażiku li turi li, minħabba distorsjonijiet sinifikanti li jaffettwaw il-prezzijiet u l-kostijiet, l-użu tal-prezzijiet u l-kostijiet domestiċi fir-RPĊ ma jkunx xieraq, u b’hekk jiġġustifika l-bidu ta’ investigazzjoni abbażi tal-Artikolu 2(6a) tar-Regolament bażiku. Għalhekk, il-Kummissjoni pproċediet biex tagħti prova ta’ distorsjonijiet bħal dawn fit-taqsimiet 3.2.1.1 sa 3.2.1.8.

(187)

Għalhekk il-Kummissjoni ċaħdet id-dikjarazzjonijiet tas-CCCMC.

(188)

Zhuoyue, fl-osservazzjonijiet tagħha ippreżentati fil-15 ta’ Marzu 2024, esprimiet il-pożizzjoni ġenerali tagħha li l-Artikolu 2(6a) tar-Regolament bażiku ma huwiex kompatibbli mad-dritt tad-WTO.

(189)

Billi din id-dikjarazzjoni hija simili għal dawk li sostniet is-CCCMC, il-Kummissjoni ċaħditha għar-raġunijiet deskritti hawn fuq (ara l-premessi (173) u (174)).

(190)

Zhuoyue argumentat ukoll li l-ilmentatur naqas milli juri l-eżistenza ta’ distorsjonijiet sinifikanti u li ma hemm l-ebda distorsjoni sinifikanti fl-industrija tal-bijodiżil taċ-Ċina. Il-Kummissjoni nnotat li l-affermazzjonijiet imqajma minn Zhuoyue fir-rigward tal-allegat nuqqas tal-ilmentatur li juri distorsjonijiet huma essenzjalment identiċi għal dawk sostnuti mis-CCCMC u għalhekk għandhom jiġu miċħuda għar-raġunijiet deskritti hawn fuq (ara l-premessi (182)(184) u (186)). Madankollu, Zhuoyue ppreżentat id-dikjarazzjonijiet addizzjonali li ġejjin.

(191)

L-ewwel nett, l-UE adottat miżuri tas-suq fl-UE kollha li jikkorrispondu sostanzjalment ma’ miżuri Ċiniżi simili, inkluż l-għoti ta’ sussidji lill-industriji tal-UE biex tippromwovi l-aderenza tagħhom ma’ objettivi ġodda tal-politika industrijali tal-UE (li dawn stess jirriflettu l-objettivi tal-politika industrijali tal-gvern Ċiniż) u l-intervent fl-investiment korporattiv u fit-teħid tad-deċiżjonijiet.

(192)

It-tieni, Zhuoyue hija intrapriża privata, mingħajr ebda sfond governattiv, u għalhekk l-operazzjonijiet tagħha ma humiex soġġetti għal xi intervent jew influwenza mill-GTĊ. L-ilmentatur semma diversi programmi nazzjonali li l-kumpanija wettqet (ara l-premessa (82)), iżda programmi bħal dawn iffokaw fuq ir-riċerka u l-iżvilupp tat-teknoloġija u huma maħsuba biex jinkoraġġixxu u jippromwovu l-innovazzjoni u l-iżvilupp tat-teknoloġiji f’ċerti industriji. Ma għandhom l-ebda influwenza fuq il-kost jew fuq il-prezz tal-prodotti tal-produtturi Ċiniżi jew fuq il-forza tas-suq ħieles.

(193)

It-tielet, l-allegazzjonijiet tal-ilmentatur dwar l-intervent tal-gvern minħabba n-natura tal-intrapriżi tal-Istat u l-konnessjonijiet bejn is-CCP u l-produtturi Ċiniżi tal-bijodiżil huma mingħajr bażi. Fil-fatt, skont l-Artikolu 6 tal-Liġi tar-Repubblika tal-Poplu taċ-Ċina dwar l-Assi tal-Intrapriżi tal-Istat (“il-liġi SOE”), “[i]l-Kunsill tal-Istat u l-gvernijiet tal-poplu lokali għandhom, skont il-liġi, iwettqu l-funzjonijiet tal-kontributur, abbażi tal-prinċipji tas-separazzjoni tal-korpi u l-intrapriżi tal-gvern, is-separazzjoni tal-funzjonijiet amministrattivi tal-affarijiet pubbliċi u l-funzjonijiet tal-kontributur tal-assi tal-Istat, u n-nuqqas ta’ intervent fl-operazzjonijiet kummerċjali leġittimi u indipendenti tal-intrapriżi”. Din id-dispożizzjoni hija obbligatorja u għalhekk, irrispettivament minn jekk produttur huwiex proprjetà tal-Istat jew le, l-operat ta’ produttur bħal dan huwa indipendenti mill-gvern.

(194)

Bi tweġiba għall-argumenti ta’ Zhuoyue, il-Kummissjoni nnotat, l-ewwel nett, li l-politiki tal-UE ma għandhom l-ebda rilevanza fil-kuntest ta’ valutazzjoni mwettqa skont l-Artikolu 2(6a) tar-Regolament bażiku.

(195)

It-tieni, fir-rigward tad-dikjarazzjoni ta’ Zhuoyue li hija kumpanija bi sjieda privata, il-Kummissjoni ddeskriviet fit-taqsimiet 3.2.1.1 sa 3.2.1.8 l-interventi sostanzjali tal-gvern fir-RPĊ li jirriżultaw f’distorsjoni tal-allokazzjoni effettiva tar-riżorsi f’konformità mal-prinċipji tas-suq. Dawk id-distorsjonijiet jaffettwaw lill-operaturi kummerċjali, irrispettivament mill-istruttura tas-sjieda jew mill-istruttura maniġerjali. Barra minn hekk, fir-rigward tal-affermazzjoni li l-programmi nazzjonali jiffukaw fuq ir-riċerka u l-iżvilupp, il-Kummissjoni indikat li filwaqt li l-kostijiet tar-riċerka u l-iżvilupp jinfluwenzaw il-kostijiet u l-prezzijiet tal-prodotti finali, l-ilmentatur irrefera għal dawn il-programmi bħala elementi li jindikaw il-kontroll jew is-superviżjoni tal-politika jew il-gwida tal-awtoritajiet fuq l-operaturi ekonomiċi fis-settur tal-bijodiżil fiċ-Ċina.

(196)

Fl-aħħar nett, il-Kummissjoni nnotat li huwa evidenti li l-qari tal-Liġi SOE minn Zhuoyue huwa wieħed selettiv. Filwaqt li l-kumpanija enfasizzat id-diviżjoni formali bejn ir-rwoli amministrattivi u tal-azzjonisti tal-Istat skont l-Artikolu 6 tal-Liġi SOE, hija għażlet li tħalli barra referenza għall-Artikolu 1. L-Artikolu 1 jiddefinixxi l-għan ġenerali tal-liġi bħala, inter alia, li tappoġġa r-rwol ewlieni tas-settur ekonomiku tal-Istat fl-ekonomija nazzjonali, u li tippromwovi l-iżvilupp tal-ekonomija tas-suq soċjalista. Zhuoyue naqset ukoll milli tirreferi għall-Artikolu 7, li jagħti mandat lill-Istat biex jinkoraġġixxi investiment akbar tal-kapital tal-Istat f’industriji ewlenin u f’oqsma importanti għall-ekonomija nazzjonali; kif ukoll għall-Artikolu 36 li skontu, l-SOEs, meta jagħmlu investimenti, għandhom jikkonformaw mal-politiki industrijali nazzjonali. Dispożizzjonijiet bħal dawn fil-fatt joħolqu ambjent legali li fih separazzjoni bejn il-gvern u l-intrapriżi hija kważi impossibbli.

(197)

Għalhekk il-Kummissjoni ċaħdet id-dikjarazzjonijiet ta’ Zhuoyue.

(198)

Fil-31 ta’ Jannar 2024, il-GTĊ ippreżenta l-osservazzjonijiet tiegħu stess, fejn esprima l-pożizzjoni ġenerali li l-Artikolu 2(6a) tar-Regolament bażiku ma huwiex kompatibbli mad-dritt tad-WTO. Billi dawn id-dikjarazzjonijiet huma analogi għal dawk imqajma mis-CCCMC u minn Zhuoyue, il-Kummissjoni ċaħdithom għar-raġunijiet deskritti hawn fuq (ara l-premessi (173), (174), (182) u (194)).

(199)

Minbarra d-dikjarazzjonijiet dwar il-kompatibbiltà tad-WTO tal-Artikolu 2(6a) tar-Regolament bażiku, il-GTĊ sostna li l-investigazzjoni mwettqa mill-Kummissjoni abbażi tal-Artikolu 2(6a) tar-Regolament bażiku f’dan il-każ kellha standards doppji. Skont il-GTĊ, il-Kummissjoni rrifjutat li taċċetta d-tal-kostijiet tal-esportaturi Ċiniżi minħabba li kien hemm distorsjonijiet sinifikanti tas-suq fis-suq Ċiniż, iżda aċċettat id-data tal-pajjiż rappreżentattiv u użatha biex tissostitwixxi d-data tal-produtturi Ċiniżi mingħajr ebda evalwazzjoni dwar jekk jistax ikun hemm distorsjonijiet tas-suq li jaffettwaw din id-data ta’ sostituzzjoni. Dan, skont il-GTĊ, huwa prova ta’ “standards doppji”. Il-GTĊ indika li skont id-dritt tal-Unjoni, il-Kummissjoni hija obbligata li tuża prezzijiet mingħajr distorsjoni biex tikkostruwixxi l-valur normali. Għalhekk, fil-fehma tal-GTĊ, jenħtieġ li l-Kummissjoni tieħu l-inizjattiva li tinvestiga u tipprova l-eżistenza jew in-nuqqas ta’ eżistenza ta’ distorsjonijiet fil-pajjiżi rappreżentattivi, aktar milli tistenna b’mod passiv lill-partijiet involuti fil-każ jissottomettu l-evidenza.

(200)

Il-Kummissjoni ma kinitx konvinta minn dan l-argument. Fil-fatt, f’konformità mal-Artikolu 2 (6a)(a) tar-Regolament bażiku, il-Kummissjoni tipproċedi biex tibni l-valur normali abbażi ta’ data għajr il-prezzijiet u l-kostijiet domestiċi (sakemm dawn il-kostijiet ma jiġux stabbiliti b’mod pożittiv li ma humiex distorti) fil-pajjiż esportatur biss meta tistabbilixxi li din id-data hija xierqa biex tirrifletti prezzijiet u kostijiet mingħajr distorsjoni. F’dan il-proċess, il-Kummissjoni hija marbuta li tuża biss data mingħajr distorsjoni. F’dak ir-rigward, minflok toqgħod tistenna b’mod passiv, il-Kummissjoni tagħmel l-analiżi tagħha stess u tistieden lill-partijiet interessati biex jikkummentaw dwar is-sorsi proposti għad-determinazzjoni tal-valur normali fl-istadji bikrija tal-investigazzjoni, jiġifieri permezz tan-noti dwar is-sorsi mingħajr distorsjoni li għandha l-ħsieb li tuża rilaxxati kmieni fil-proċediment. Id-deċiżjoni finali tal-Kummissjoni dwar liema data mingħajr distorsjoni jenħtieġ li tintuża sabiex jiġi kkalkolat il-valur normali tqis bis-sħiħ il-kummenti kollha riċevuti mill-partijiet, kif ukoll ir-riċerka tal-Kummissjoni stess.

(201)

Fl-aħħar nett, il-GTĊ argumenta li r-Rapport huwa żbaljat, unilaterali u mbiegħed mir-realtà. Ir-Rapport allegatament ittratta l-vantaġġi kompetittivi leġittimi tal-kumpaniji Ċiniżi u d-differenzi istituzzjonali normali bejn iċ-Ċina u l-UE bħala l-bażi għad-determinazzjoni ta’ distorsjoni sinifikanti tas-suq. Barra minn hekk, il-GTĊ iddikjara li l-fatt li l-Kummissjoni aċċettat l-allegazzjonijiet ta’ distorsjoni tas-suq iddikjarati mill-industrija tal-Unjoni abbażi tar-Rapport, ipprovda vantaġġi inġusti lill-industrija tal-Unjoni, li kienu jammontaw għal għoti ta’ sentenzi qabel proċess. Il-prova tal-evidenza għall-ilment tal-industrija hija ugwali għat-teħid tan-naħa tal-industrija, u għalhekk ma tikkonformax mal-ispirtu legali fundamentali tal-korrettezza u tal-ġustizzja.

(202)

Il-Kummissjoni ma setgħetx taċċetta dawn l-argumenti. Ir-Rapport, kif ukoll ir-Rapport aġġornat, huma dokumenti komprensivi bbażati fuq evidenza oġġettiva estensiva, inklużi leġiżlazzjoni, regolamenti u dokumenti ta’ politika uffiċjali oħrajn ippubblikati mill-GTĊ, rapporti minn organizzazzjonijiet internazzjonali, studji akkademiċi u artikoli minn akkademiċi, u sorsi indipendenti affidabbli oħrajn. Dan sar disponibbli fil-fajl tal-investigazzjoni sabiex kwalunkwe parti interessata jkollha biżżejjed opportunità sabiex tirribatti, tissupplimenta jew tikkummenta dwaru u dwar l-evidenza li huwa bbażat fuqha. Il-GTĊ ma pprovda l-ebda tweġiba bħal din u ppreżenta biss kummenti ġeneriċi mhux issostanzjati. L-istess argumentazzjoni hija valida għar-Rapport Aġġornat ukoll.

(203)

Il-GTĊ ssuġġerixxa wkoll li l-ħruġ ta’ rapport tal-pajjiż issostitwixxa l-investigazzjoni reali, iżda l-Kummissjoni fakkret li, skont l-Artikolu 2(6a)(e) tar-Regolament bażiku, jekk il-Kummissjoni tqis li l-evidenza ppreżentata mill-ilmentatur dwar id-distorsjonijiet sinifikanti tkun suffiċjenti, hija tista’ tibda l-investigazzjoni fuq din il-bażi. Madankollu, id-determinazzjoni dwar l-eżistenza u l-impatt reali ta’ distorsjonijiet sinifikanti u l-użu konsegwenti tal-metodoloġija preskritta mill-Artikolu 2(6a)(a) tar-Regolament bażiku jseħħu fiż-żmien tad-divulgazzjoni provviżorja u/jew definittiva bħala riżultat ta’ investigazzjoni. L-eżistenza u l-impatt potenzjali ta’ distorsjonijiet sinifikanti ma humiex ikkonfermati fl-istadju tal-bidu kif iddikjarat mill-GTĊ, iżda biss wara investigazzjoni fil-fond, u b’hekk dan l-argument huwa miċħud ukoll.

(204)

Bħala konklużjoni, l-ebda evidenza materjali komprensiva jew argumenti b’bażi soda li jiċħdu l-eżistenza ta’ distorsjonijiet sinifikanti fis-settur tal-bijodiżil ma tressaq mill-GTĊ, mis-CCCMC jew mill-produtturi esportaturi f’din l-investigazzjoni.

(205)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(206)

Kif spjegat fil-premessi (64) sa (68), il-Kummissjoni ħarġet żewġ noti għall-fajl dwar is-sorsi għad-determinazzjoni tal-valur normali. Dawn in-noti ddeskrivew il-fatti u l-evidenza li fuqhom huma bbażati l-kriterji rilevanti, u indirizzaw ukoll il-kummenti li rċevew il-partijiet dwar dawk l-elementi u dwar is-sorsi rilevanti. Fit-Tieni Nota, il-Kummissjoni informat lill-partijiet interessati bl-intenzjoni tagħha li tqis lill-Malażja bħala pajjiż rappreżentattiv xieraq f’dan il-każ, jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(207)

Fl-Ewwel Nota, il-Kummissjoni identifikat 49 pajjiż b’livell simili ta’ żvilupp ekonomiku bħar-RPĊ skont il-Bank Dinji, jiġifieri dawn huma kollha kklassifikati mill-Bank Dinji bħala pajjiżi “b’introjtu medju superjuri” fuq bażi tal-introjtu nazzjonali gross fejn kien magħruf li jiġi mmanifatturat il-prodott taħt investigazzjoni. Minn dawk id-49 pajjiż, il-Kummissjoni identifikat sitt pajjiżi bl-akbar produzzjoni ta’ bijodiżil fl-2022 u fl-2023 bl-użu tal-projezzjonijiet mill-OECD u mill-FAO (119). Dawk il-pajjiżi kienu (fl-ordni tal-volum tal-produzzjoni tagħhom): il-Brażil, l-Arġentina, it-Tajlandja, il-Malażja, il-Kolombja u l-Peru. Il-Brażil ġie identifikat ukoll bħala pajjiż rappreżentattiv xieraq mill-EBB fl-ilment.

(208)

Fil-kummenti tagħhom dwar l-Ewwel Nota, l-EBB, EcoCeres u Jiaao kkummentaw dwar il-produzzjoni tal-prodott taħt investigazzjoni. L-EBB sostna li l-Brażil bħala l-akbar produttur tal-bijodiżil fost il-pajjiżi fil-livell ta’ żvilupp simili għar-RPĊ kien l-aktar pajjiż rappreżentattiv xieraq. Għall-kuntrarju ta’ dan, EcoCeres u Jiaao argumentaw li l-Brażil ma kienx xieraq peress li ftit produtturi biss immanifatturaw bijodiżil mill-istess materja prima bħall-produtturi Ċiniżi, bil-materja prima ewlenija tkun l-UCO, il-grass kannella (“BG”), u l-effluwent tal-imtieħen taż-żejt tal-palm (“POME”). Skont EcoCeres, kien hemm ukoll produzzjoni insuffiċjenti ta’ bijodiżil minn dik il-materja prima fil-Kolombja u fit-Tajlandja.

(209)

Barra minn hekk, l-EBB, EcoCeres u Jiaao kkummentaw dwar il-livell għoli ta’ regolamentazzjoni tal-gvern tul il-katina tal-valur tal-bijodiżil fl-erba’ pajjiżi rappreżentattivi potenzjali (il-Brażil, il-Kolombja, il-Malażja u t-Tajlandja) identifikati fl-Ewwel Nota (ara l-premessa (246)).

(210)

Fir-rigward tal-kummenti dwar il-livell ta’ regolamentazzjoni tal-gvern tul il-katina tal-valur tal-bijodiżil fil-pajjiżi rappreżentattivi potenzjali, il-Kummissjoni, fit-Tieni Nota, indikat li s-suq tal-bijodiżil u l-katina tal-valur tiegħu huma regolati permezz ta’ miżuri tal-gvernijiet madwar id-dinja peress li l-industrija tikkontribwixxi b’mod sinifikanti għall-pajjiżi li jissodisfaw l-impenji internazzjonali tagħhom għat-tnaqqis tal-emissjonijiet tal-gassijiet serra.

(211)

Fil-kummenti tagħha dwar it-Tieni Nota, l-EBB tenna li s-suq tal-bijodiżil u l-katina tal-valur tiegħu huma soġġetti għal regolamenti tal-gvern fil-Malażja. B’mod partikolari, skont l-EBB, il-prezz tal-bijodiżil huwa stabbilit mill-Gvern tal-Malażja (“GOM”) permezz ta’ formula tal-ipprezzar li tipprevedi SG&A u profitt fissi. Barra minn hekk, l-esportazzjonijiet taż-żejt tal-palm mhux raffinat huma soġġetti għal taxxa fuq l-esportazzjoni, li skont l-EBB tinfluwenza l-kost tal-produzzjoni tal-produtturi tal-bijodiżil Malażjani. Fl-aħħar nett, l-EBB indika li minn Frar 2024, l-Istat Malażjan ta’ Sabah għamel ukoll esportazzjonijiet ta’ POME soġġetti għal taxxa fuq l-esportazzjoni.

(212)

Fir-rigward tal-Malażja, il-Kummissjoni nnotat li l-mekkaniżmu tal-ipprezzar awtomatiku japplika għall-fjuwil mibjugħ mill-bejjiegħa bl-imnut fil-pompi tal-petrol, jiġifieri għall-petrol imħallat mal-bijodiżil. Il-prezz ta’ dan il-fjuwil huwa stabbilit bl-użu ta’ formula tal-ipprezzar, li tqis prezz ta’ referenza taż-żejt mhux maħdum, diversi kostijiet tal-kumpanija taż-żejt u tal-bejjiegħ bl-imnut, kif ukoll il-profitt tagħhom. (120) (121) (122) Meta l-prezz fiss ikun taħt prezz tas-suq mixtieq, jiġifieri ma jkoprix il-kost u l-profitt tal-bejjiegħ bl-imnut, il-GOM jista’ jikkumpensa d-differenza permezz ta’ sussidju mħallas lill-bejjiegħ bl-imnut (123).

(213)

Barra minn hekk, meta għażlet il-kumpaniji biex jintużaw bħala s-sors tal-SG&A u l-profitt, il-Kummissjoni ffukat fuq dawk li pproduċew il-bijodiżil minn UCO, POME u BG. Għalkemm xi wħud mill-kumpaniji magħżula jistgħu jużaw parzjalment iż-żejt tal-palm mhux raffinat bħala waħda mill-materja prima tagħhom, il-Kummissjoni qieset li r-riżultati finanzjarji tagħhom jiġu affettwati biss marġinalment. Fl-aħħar nett, it-taxxa tal-esportazzjoni imposta minn Sabah mhijiex rilevanti għall-investigazzjoni preżenti peress li ġiet introdotta biss wara l-perjodu ta’ investigazzjoni.

(214)

Konsegwentement, il-Kummissjoni qieset li r-regolamenti tal-gvern applikabbli għas-suq tal-bijodiżil u l-katina tal-valur tiegħu fil-Malażja ma kinux ta’ tali natura li jagħmlu l-pajjiż mhux xieraq bħala pajjiż rappreżentattiv.

(215)

Fir-rigward tal-Brażil, fil-kummenti tiegħu dwar it-Tieni Nota, l-EBB indika li s-sistema tal-irkanti pubbliċi ġiet sostitwita minn kummerċ barra l-Borża bil-bijodiżil mill-2022. L-EBB ikkonferma wkoll li l-importazzjonijiet tal-bijodiżil huma limitati ħafna peress li huma soġġetti għal liċenzji tal-importazzjoni, li jinħarġu biss f’każijiet eċċezzjonali. Madankollu, l-EBB iddikjara li dawn il-miżuri ma influwenzawx il-prezzijiet u l-kostijiet fis-suq Brażiljan peress li kompetizzjoni suffiċjenti hija garantita mill-għadd ta’ produtturi ċċertifikati tal-bijodiżil li joperaw fl-industrija.

(216)

Il-Kummissjoni ħadet nota ta’ din l-informazzjoni addizzjonali. Billi l-Malażja ġiet ikkonfermata bħala pajjiż rappreżentattiv xieraq, il-Kummissjoni ma sabitx li kien meħtieġ li r-regolamentazzjoni tas-suq tal-bijodiżil u l-katina tal-valur tiegħu fil-Brażil jiġu analizzati fid-dettall.

(217)

Fl-Ewwel Nota, il-Kummissjoni ffokat fuq l-aktar fatturi importanti tal-produzzjoni li jirrappreżentaw aktar minn 80 % tal-kost tal-produzzjoni Ċiniż, jiġifieri l-materja prima li taqa’ taħt il-kodiċijiet HS 1518 00 (UCO) u 3823 19 (POME, BG u l-biċċa l-kbira tal-materja prima l-oħra, bħall-iskart tal-ikel jew l-istokk tas-sapun). Il-Kummissjoni analizzat jekk is-sitt pajjiżi rappreżentattivi potenzjali kellhomx fis-seħħ restrizzjonijiet fuq l-esportazzjoni li joħolqu distorsjoni fil-prezz domestiku, jekk importawx kwantitajiet miċ-Ċina li potenzjalment jistgħu joħolqu distorsjoni fil-prezz medju tal-importazzjoni, u fl-aħħar jekk il-merkanzija li taqa’ taħt iż-żewġ kodiċijiet HS ewlenin kinitx importata fi kwantitajiet rappreżentattivi. L-analiżi twettqet mhux biss fil-livell tal-kodiċijiet HS iżda anke fil-livell ta’ kodiċijiet tal-merkanzija aktar dettaljati skont in-nomenklatura doganali tal-pajjiżi individwali.

(218)

Il-Kummissjoni sabet li fl-Arġentina, il-merkanzija li jaqgħu taħt iż-żewġ kodiċijiet HS ewlenin kienu soġġetti għal taxxa fuq l-esportazzjoni. Barra minn hekk, ċertu merkanzija li taqa’ taħt il-kodiċi HS 1518 00 kienet soġġetta għal-liċenzjar tal-esportazzjoni fil-Malażja.

(219)

Il-Kummissjoni sabet ukoll li kwantitajiet sinifikanti ta’ faħam importat lejn l-Arġentina (HS 2701 11 ), ta’ merkanzija kklassifikata taħt tliet kodiċijiet tal-merkanzija li jaqgħu taħt il-kodiċi HS 1518 00 fil-Malażja, u ħames prodotti li jaqgħu taħt il-kodiċi HS 1518 00 fit-Tajlandja oriġinaw mir-RPĊ.

(220)

Wara li ġew esklużi l-importazzjonijiet li kienu jew soġġetti għal restrizzjonijiet fuq l-esportazzjoni jew li x’aktarx kienu affettwati mill-kwantitajiet sinifikanti importati mir-RPĊ, il-Malażja kienet bil-wisq il-pajjiż bl-akbar kwantitajiet ta’ merkanzija importata taħt iż-żewġ kodiċijiet HS ewlenin (200 elf tunnellata taħt il-kodiċi HS 1518 00 u 790 elf tunnellata taħt il-kodiċi HS 3823 19 meta mqabbla ma’ 17-il elf tunnellata taħt il-kodiċi HS 1518 00 fit-Tajlandja u 18-il elf tunnellata taħt il-kodiċi HS 3823 19 fil-Brażil, iż-żewġ pajjiżi bit-tieni l-akbar volumi ta’ importazzjonijiet).

(221)

Fil-kummenti tagħha dwar il-pajjiż rappreżentattiv u l-fatturi tal-produzzjoni ppreżentati fil-bidu, EcoCeres indika li l-kodiċi HS 1518 00 kien ikopri varjetà wiesgħa ta’ oġġetti. Għalhekk, kwalunkwe nomenklatura doganali li ma ppermettitx li ssir distinzjoni bejn ix-xaħmijiet u ż-żjut li jittieklu u li ma jittiklux ma kinitx adattata għalkollox biex jiġi identifikat kodiċi tal-merkanzija xieraq. F’dan ir-rigward, il-kumpanija ssuġġeriet li jenħtieġ li l-Kummissjoni tuża “prezzijiet, kostijiet jew parametri referenzjarji internazzjonali mingħajr distorsjoni” biex tistabbilixxi l-kost mingħajr distorsjoni tal-UCO u ppreżentat informazzjoni dwar il-prezzijiet miġbura u ppubblikata minn Argus Biofuels (124).

(222)

Fl-Ewwel Nota, il-Kummissjoni sabet li tabilħaqq huwa meħtieġ li tagħżel sors xieraq ta’ kost mingħajr distorsjoni tal-UCO. Il-Kummissjoni nnotat li n-nomenklaturi doganali tal-Malażja u tat-Tajlandja biss ippermettew li ssir distinzjoni bejn ix-xaħmijiet u ż-żjut li jittieklu u li ma jittiklux. Il-Kummissjoni ddeċidiet li tkompli tanalizza l-kwalità tas-sorsi potenzjali kollha ta’ kost mingħajr distorsjoni tal-UCO, inklużi l-parametri referenzjarji internazzjonali pprovduti minn EcoCeres.

(223)

Fil-kummenti tagħhom dwar l-Ewwel Nota, EcoCeres, Jiaao u Zhuoyue argumentaw li l-Malażja kienet l-uniku pajjiż rappreżentattiv potenzjali b’volumi ta’ importazzjoni rappreżentattivi taħt il-kodiċijiet HS 1518 00 u 3823 19 , li kopra l-aktar materja prima importanti użata mill-produtturi esportaturi inklużi fil-kampjun (ara l-premessa (208)). Barra minn hekk, EcoCeres u Zhuoyue tennew li l-kodiċijiet HS rispettivi koprew varjetà wiesgħa ta’ prodotti differenti u li n-nomenklatura doganali tal-Malażja u tat-Tajlandja biss ippermettiet differenzjazzjoni ta’ xaħmijiet u żjut li jittieklu u li ma jittiklux taħt il-kodiċi HS 1518 00 . EcoCeres tenniet li l-parametri referenzjarji internazzjonali jistgħu jintużaw biex jiġu stabbiliti l-kostijiet mingħajr distorsjoni tal-UCO u tal-POME.

(224)

Min-naħa l-oħra, fil-kummenti tagħha dwar l-Ewwel Nota, l-EBB enfasizza li l-volumi tal-importazzjoni taħt iż-żewġ kodiċijiet HS ewlenin lejn il-Brażil kienu t-tieni l-akbar (fost l-erba’ pajjiżi rappreżentattivi potenzjali li jifdal, ara l-premessa (246) wara l-Malażja u argumenta li l-prezz tal-importazzjonijiet Brażiljani taħt il-kodiċi HS 1518 00 kien jirrifletti l-prezz ta’ xaħmijiet u żjut li ma jittiklux fis-suq domestiku.

(225)

L-EBB sostna wkoll li peress li ftit mill-merkanzija taħt il-kodiċi HS 1518 00 kienet soġġetta għal-liċenzjar tal-esportazzjoni fil-Malażja, din ir-restrizzjoni fuq l-esportazzjoni ħolqot distorsjoni wkoll fil-prezzijiet tal-importazzjoni (u dawk domestiċi) tal-merkanzija kollha li jaqgħu taħt il-kodiċi HS rispettiv. EcoCeres ma qabilx u argumenta li jekk il-liċenzjar tal-esportazzjoni applikabbli għal xi parti mill-merkanzija jrażżan il-prezzijiet tal-prodotti kollha taħt il-kodiċi HS 1518 00 , il-fornituri barranin kienu jirridirezzjonaw il-bejgħ tagħhom lejn swieq oħrajn bi prezzijiet aktar attraenti.

(226)

Fir-rigward tad-disponibbiltà ta’ data rilevanti, Zhuoyue nnotat li ma kien hemm l-ebda importazzjoni ta’ biopitch fil-Brażil u fil-Kolombja.

(227)

Fit-Tieni Nota, il-Kummissjoni sabet li huwa kruċjali li jiġu identifikati kodiċijiet tal-merkanzija li huma kemm jista’ jkun qrib tal-materja prima attwali użata mill-produtturi Ċiniżi. F’dan ir-rigward, il-Kummissjoni kkonkludiet li n-nomenklatura doganali tal-Brażil u tal-Kolombja ma ppermettietx li jiġu identifikati l-importazzjonijiet li jirriflettu l-prezzijiet domestiċi tal-UCO. Barra minn hekk, wara l-verifiki fuq il-post, ġie kkonfermat li l-volumi tal-importazzjoni taħt iż-żewġ kodiċijiet HS ewlenin fil-Brażil, il-Kolombja u t-Tajlandja ma kinux rappreżentattivi, b’mod partikolari fir-rigward tal-volumi tal-konsum tal-produtturi Ċiniżi tal-bijodiżil.

(228)

Meta jitqies il-fatt li l-kodiċi HS 1518 00 ikopri firxa wiesgħa ta’ prodotti, inkluż dawk li ma jintużawx bħala materja prima għall-produzzjoni tal-bijodiżil, il-Kummissjoni sabet li ma kienx probabbli li l-liċenzjar tal-esportazzjoni applikabbli għal diversi kodiċijiet tal-merkanzija jrażżan il-prezzijiet tal-importazzjoni (u dawk domestiċi) tal-oġġetti kollha importati taħt il-kodiċijiet tal-oġġetti koperti mill-kodiċi HS 1518 00 .

(229)

Madankollu, il-Kummissjoni rrifjutat l-użu ta’ parametri referenzjarji internazzjonali għall-UCO u l-POME f’dan l-istadju tal-investigazzjoni peress li l-parametri referenzjarji ma speċifikawx l-oriġini tal-materja prima rispettiva. Għalhekk, ma setax jiġi aċċertat li d-data għall-UCO ma kinitx distorta minn materja prima ta’ oriġini Ċiniża. Bl-istess mod, instab li l-prezzijiet tal-POME li joriġina mill-Indoneżja kienu distorti mill-applikazzjoni ta’ taxxa fuq l-esportazzjoni (ara l-premessa (237)) u ma setax jiġi eskluż li l-POME tal-Indoneżja kien kopert mill-parametru referenzjarju rispettiv.

(230)

Fir-rigward tal-importazzjonijiet ta’ biopitch, il-Kummissjoni nnotat li għalkemm ma kinitx input importanti f’termini tas-sehem tagħha fuq il-kost totali tal-produzzjoni, l-għażla ta’ pajjiż rappreżentattiv b’importazzjonijiet ta’ biopitch kienet ta’ vantaġġ.

(231)

Fil-kummenti tagħhom dwar it-Tieni Nota, l-EBB u Jiaao ppreżentaw kummenti dwar il-kost mingħajr distorsjoni tal-UCO. L-EBB indika li ċerti volumi ta’ UCO importati lejn il-Malażja oriġinaw mill-Indoneżja. Madankollu, il-prezzijiet ta’ dawk l-importazzjonijiet kienu distorti mit-taxxa fuq l-esportazzjoni imposta fuq l-esportazzjoni tal-UCO mill-Indoneżja (125).

(232)

Il-Kummissjoni eżaminat id-dikjarazzjonijiet u sabet li tabilħaqq, l-esportazzjonijiet tal-UCO mill-Indoneżja kienu soġġetti għal taxxa fuq l-esportazzjoni. Abbażi ta’ dak, il-Kummissjoni ddeċidiet li teskludi l-importazzjonijiet tal-UCO fil-Malażja li joriġinaw mill-Indoneżja mid-determinazzjoni tal-kost mingħajr distorsjoni.

(233)

B’referenza għall-kummenti tagħha dwar ir-regolamenti tal-gvern tas-suq tal-bijodiżil u l-katina tal-valur tiegħu fil-Malażja (ara l-premessa (211)), l-EBB tenna li l-importazzjonijiet taħt il-kodiċijiet HS 1518 00 (għall-UCO) u 3823 19 (għall-POME) lejn il-Brażil ma kinux affidabbli minkejja l-volum limitat tagħhom. Il-parti ssuġġeriet żewġ alternattivi:

(234)

Kif konkluż fil-premessa (258), il-Kummissjoni qieset lill-Malażja bħala pajjiż rappreżentattiv xieraq f’dan l-istadju proviżorju. Għalhekk, l-użu tal-importazzjonijiet fl-Istati Uniti bħala sors alternattiv ta’ parametri referenzjarji għall-UCO u għall-POME ġie miċħud. Fir-rigward tal-klassifikazzjoni tal-UCO taħt żjut li jittieklu jew li ma jittiklux, f’dan l-istadju tal-investigazzjoni, il-Kummissjoni ma tistax tikkonkludi dwar jekk il-klassifikazzjoni użata fil-kuntratti hijiex kompatibbli man-nomenklatura doganali tal-Malażja, b’mod partikolari peress li l-parti naqset milli tipprovdi sommarju mhux kunfidenzjali sinifikanti tal-argumenti tagħha.

(235)

Fil-kummenti tagħha dwar it-Tieni Nota, Jiaao argumentat li l-Kummissjoni jenħtieġ li teskludi ċerti kodiċijiet tal-merkanzija, bħal dawk li jkopru żjut li ma jittiklux mill-kittien, miż-żebbuġ u mill-ġewż tal-art, mill-ambitu tal-kodiċijiet użati biex jiġi ddeterminat il-kost mingħajr distorsjoni tal-UCO. Il-parti ddikjarat li l-Kummissjoni vverifikat li dawn it-tipi ta’ żjut ma ntużawx mill-kumpanija fil-produzzjoni tal-bijodiżil tagħha. Barra minn hekk, Jiaao sostniet li l-importazzjonijiet tal-UCO li joriġina mill-Ġappun jenħtieġ li jiġu esklużi mid-determinazzjoni tal-parametru referenzjarju peress li l-Ġappun għandu provvista domestika limitata ta’ UCO (126).

(236)

Għalkemm il-Ġappun tabilħaqq għandu disponibbiltà domestika limitata ta’ UCO, fl-2022 esporta l-biċċa l-kbira tal-volumi miġbura (127). Għal tqabbil, fl-2022, il-volumi esportati qabżu b’mod sinifikanti l-volumi importati fil-Malażja mill-Ġappun fil-perjodu ta’ investigazzjoni. Għaldaqstant, il-Kummissjoni ċaħdet iż-żewġ dikjarazzjonijiet.

(237)

Fil-kummenti tiegħu dwar it-Tieni Nota, l-EBB sostna li l-importazzjonijiet Malażjani ta’ POME taħt il-kodiċi HS 3823 19 kienu distorti minn kwantitajiet sinifikanti ta’ importazzjonijiet mill-Indoneżja. Peress li l-Indoneżja timponi taxxa fuq l-esportazzjoni fuq l-esportazzjonijiet tal-POME (128), il-prezzijiet ta’ dawk l-importazzjonijiet kienu distorti.

(238)

Wara din id-dikjarazzjoni, f’dan l-istadju l-Kummissjoni ddeċidiet li teskludi l-importazzjonijiet ta’ oġġetti li jaqgħu taħt il-kodiċijiet tal-merkanzija rilevanti għall-POME u aċidi grassi taż-żejt tal-palm, peress li l-importazzjonijiet taħt l-istess kodiċijiet tal-merkanzija jintużaw għaż-żewġ inputs bħala s-sors ta’ kost mingħajr distorsjoni, li joriġinaw mill-Indoneżja milli jitqiesu.

(239)

Fil-kummenti tagħha dwar it-Tieni Nota, Zhuoyue ddikjarat li jenħtieġ li l-Kummissjoni ma tużax il-kodiċi tal-merkanzija 3823 19 90 bħala wieħed mill-kodiċijiet għall-BG, l-iskart tal-ikel, l-istokk tas-sapun u spent bleaching earth oil (“SBEO”). Skont il-parti, dak il-kodiċi ma jkoprix iż-żjut tal-aċidu raffinati filwaqt li l-materja prima msemmija hawn fuq kollha tirrappreżenta dawn iż-żjut. Il-kumpanija appoġġat l-argumenti tagħha bil-fatt li l-prezz tal-importazzjoni ta’ unità taħt dan il-kodiċi kien ogħla mill-prezz tal-importazzjoni ta’ unità tal-UCO, li huwa kontrointuwittiv peress li l-UCO huwa l-materja prima aktar siewja meta jitqiesu l-karatteristiċi tiegħu, bħall-kontenut ta’ aċidi grassi ħielsa, il-kompożizzjoni, il-kontenut ta’ metall.

(240)

Il-Kummissjoni kkonsultat in-nomenklatura doganali tal-Malażja disponibbli permezz tas-sit web tal-Kummissjoni Acces2Markets (129) u kkonkludiet b’mod provviżorju li l-merkanzija kollha taħt il-kodiċi HS 3823 19 , ħlief għal dawk relatati mad-derivattivi taż-żejt tal-palm, jenħtieġ li jiġu inklużi b’mod raġonevoli fid-determinazzjoni tal-parametru referenzjarju għall-materja prima b’livelli ogħla ta’ aċidi grassi ħielsa, bħall-BG, l-iskart tal-ikel, l-istokk tas-sapun u l-SBEO. Għalhekk, il-Kummissjoni ċaħdet id-dikjarazzjoni.

(241)

Fil-kummenti tagħha dwar it-Tieni Nota, Zhuoyue sostniet li jenħtieġ li l-Kummissjoni ma tissostitwix il-kost Ċiniż b’parametru referenzjarju mingħajr distorsjoni peress li ma kien hemm l-ebda evidenza ta’ distorsjonijiet sinifikanti fis-suq tal-bijodiżil fir-RPĊ. Il-parti sostniet ukoll li anke jekk il-kost lavorattiv jiġi ssostitwit b’parametru referenzjarju, il-Kummissjoni jenħtieġ li tidentifika metodu aktar xieraq għall-aġġustament tal-kost lavorattiv Malażjan, li kien disponibbli biss għall-2016, għal livell xieraq għall-PI. Zhuoyue argumentat li ma kien hemm l-ebda korrelazzjoni bejn il-livell tal-pagi u r-rata tal-inflazzjoni espressa permezz tal-Indiċi tal-Prezzijiet tal-Produtturi (“PPI”).

(242)

Fir-rigward tal-allegat suq tal-bijodiżil mingħajr distorsjoni fir-RPĊ, il-Kummissjoni tirreferi għas-sejbiet tagħha fit-taqsimiet 3.2.1 sa 3.2.1.8 u speċifikament dwar is-suq tax-xogħol fit-taqsima 3.2.1.6. Peress li l-kost lavorattiv kien jirrappreżenta sehem negliġibbli fuq il-kost tal-produzzjoni tal-produtturi esportaturi (massimu ta’ 1,5 %), il-Kummissjoni qieset li l-użu tal-PPI biex jiġi aġġornat il-kost lavorattiv fil-Malażja ma influwenzax b’mod sinifikanti l-valur normali mingħajr distorsjoni. Għalhekk, il-Kummissjoni ċaħdet id-dikjarazzjoni.

(243)

Fil-kummenti tagħha dwar it-Tieni Nota, Zhuoyue barra minn hekk indikat li l-Kummissjoni biddlet il-kodiċi HS li għandu jintuża għall-biopitch minn 1522 00 għal 1520 00.

(244)

Il-Kummissjoni sabet li l-bidla kienet dovuta għal żball klerikali u kkoreġiet dak l-iżball qabel ma ġie stabbilit il-kost mingħajr distorsjoni tal-biopitch.

(245)

Fl-Ewwel Nota, il-Kummissjoni sabet li l-esportazzjonijiet ta’ bijodiżil li joriġina mill-Arġentina huma soġġetti għal miżuri anti-dumping u antisussidji imposti mill-Peru (130) (131), mill-Unjoni (132), u mill-Istati Uniti (133) (134) (“US”). Bħala tali, ir-riżultati finanzjarji tal-produtturi tal-Arġentina jistgħu jkunu potenzjalment distorti minn prattiki ta’ sussidjar u ta’ dumping. Barra minn hekk, id-data finanzjarja tal-produtturi tal-bijodiżil fil-Peru tista’ tiġi potenzjalment affettwata mid-dannu mġarrab minn importazzjonijiet oġġett ta’ dumping u/jew sussidjati ta’ bijodiżil li joriġinaw mill-Arġentina u mill-Istati Uniti (135).

(246)

Wara s-sejbiet tar-restrizzjonijiet fuq l-esportazzjoni fl-Arġentina (ara l-premessa (218)) u d-distorsjoni potenzjali tal-informazzjoni finanzjarja bbażata fuq l-eżistenza ta’ miżuri għad-difiża tal-kummerċ li jikkonċernaw l-Arġentina u l-Peru, il-Kummissjoni analizzat ulterjorment id-disponibbiltà u l-kwalità tal-informazzjoni finanzjarja għall-erba’ pajjiżi rappreżentattivi potenzjali li jifdal biss: il-Brażil, il-Kolombja, il-Malażja u t-Tajlandja.

(247)

Fl-Ewwel Nota, il-Kummissjoni identifikat tliet produtturi tal-bijodiżil b’informazzjoni finanzjarja xierqa faċilment disponibbli għall-pubbliku fil-Brażil, wieħed minnhom ibbażat fuq l-informazzjoni fl-ilment. Għat-tliet kumpaniji kollha, l-informazzjoni finanzjarja li parzjalment ikkoinċidiet mal-perjodu ta’ investigazzjoni, kien fiha d-dettalji fil-forma ta’ Noti għar-rapporti finanzjarji, u kienet konformi jew mal-Istandards Internazzjonali tar-Rapportar Finanzjarju (“IFRS”) jew mal-Prinċipji tal-Kontabilità Ġeneralment Aċċettati lokali. Fil-Kolombja, kien hemm informazzjoni finanzjarja faċilment disponibbli xierqa għal ħames kumpaniji. L-informazzjoni finanzjarja ma kienx fiha aktar dettalji fil-forma tan-Noti għar-rapporti finanzjarji. Għall-Malażja u t-Tajlandja, informazzjoni finanzjarja faċilment disponibbli mill-bażi tad-data Orbis kienet disponibbli għal kumpanija waħda għal kull pajjiż. Barra minn hekk, l-informazzjoni finanzjarja tal-kumpanija Tajlandiża parzjalment ma kinitx konformi mal-IFRS.

(248)

Fil-kummenti tiegħu dwar l-Ewwel Nota, l-EBB indika li l-Brażil kien l-uniku pajjiż rappreżentattiv potenzjali fejn kien hemm disponibbli sett sħiħ ta’ rapporti finanzjarji għal produttur tal-bijodiżil. Madankollu, EcoCeres ippreżenta sett sħiħ ta’ rapporti finanzjarji ta’ tlettax-il produttur tal-bijodiżil minn reġistru lokali Malażjan fil-kummenti tagħha dwar l-Ewwel Nota. EcoCeres innotat ukoll li wieħed mill-produtturi tal-bijodiżil identifikati mill-Kummissjoni fil-Kolombja kien sussidjarju ta’ kumpanija identifikata oħra. Barra minn hekk, l-entità omm kienet kumpanija kbira taż-żejt integrata u, skont EcoCeres, jenħtieġ li ma tiġix ikkunsidrata. Fl-aħħar nett, EcoCeres u Zhuoyue argumentaw li t-Tajlandja jenħtieġ li ma titqiesx bħala pajjiż rappreżentattiv xieraq peress li l-uniċi rapporti finanzjarji faċilment disponibbli għall-pubbliku identifikati mill-Kummissjoni kienu parzjalment mhux konformi mal-IFRS.

(249)

Fit-Tieni Nota, il-Kummissjoni għamlet sforz biex tikkalibra l-għażla ta’ produtturi xierqa tal-bijodiżil b’informazzjoni finanzjarja faċilment disponibbli għall-pubbliku. Għalhekk, iddeċidiet li f’dan il-każ tqis il-materja prima użata mill-produtturi fil-pajjiżi rappreżentattivi potenzjali. Il-Kummissjoni sabet żewġ kumpaniji li jipproduċu l-bijodiżil mill-UCO, mill-BG jew mill-POME fil-Brażil, żewġ kumpaniji bħal dawn fil-Kolombja, għaxra fil-Malażja u tmienja fit-Tajlandja.

(250)

Wara l-konklużjoni li l-importazzjonijiet tal-inputs ewlenin lejn il-Kolombja u t-Tajlandja ma kinux rappreżentattivi f’termini ta’ kwantità (ara l-premessa (227)), il-Kummissjoni analizzat id-disponibbiltà u l-kwalità tal-informazzjoni finanzjarja fil-Brażil u fil-Malażja.

(251)

Għalkemm ir-rapporti finanzjarji taż-żewġ kumpaniji Brażiljani (ara l-premessa (249)) kienu disponibbli, dawn ma kien fihom l-ebda rapportar skont is-segmenti, jew ir-rapportar skont is-segmenti ma kienx biżżejjed biex tiġi individwata l-informazzjoni finanzjarja dwar il-produzzjoni tal-bijodiżil. Mill-għaxar kumpaniji Malażjani, sebgħa ġew identifikati minn EcoCeres u tlieta mill-Kummissjoni. Il-Kummissjoni sabet ir-rapporti finanzjarji ta’ sebgħa minn dawk il-kumpaniji xierqa biex jiġu stabbiliti l-SG&A u l-profitt. Għat-tlieta l-oħrajn, ma kien hemm l-ebda informazzjoni finanzjarja disponibbli, jew ir-rapportar skont is-segmenti ma ppermettiex li tiġi ddeterminata l-informazzjoni finanzjarja speċifika għall-produzzjoni tal-bijodiżil.

(252)

Fil-kummenti tagħha dwar it-Tieni Nota, l-EBB ipprovda lista ta’ madwar 45 produttur tal-bijodiżil fil-Brażil, li minnhom madwar 20 jipproduċu bijodiżil mill-UCO jew mill-aċidu xaħmi taż-żejt tal-palm (“PFAD”). L-EBB sostna li jenħtieġ li l-Kummissjoni tuża l-informazzjoni finanzjarja tal-kumpanija BE8. Jekk il-Kummissjoni ssib li r-rapporti finanzjarji tagħha ma humiex xierqa, l-EBB sostna li l-Kummissjoni kienet intitolata li tuża l-informazzjoni finanzjarja ta’ kumpanija li tipproduċi prodott fl-istess kategorija ġenerali bħall-bijodiżil. F’dan ir-rigward, l-EBB issuġġerixxa li l-produttur tal-etanol SF, li dan l-aħħar ġie ċċertifikat li jissodisfa r-rekwiżiti internazzjonali bħala fornitur ta’ etanol għall-produzzjoni tal-SAF (permezz tal-perkors mill-alkoħol għall-ġett).

(253)

Għal tlieta mill-20 produttur tal-bijodiżil mill-UCO jew mill-PFAD identifikati mill-EBB, ir-rapporti finanzjarji kienu disponibbli mill-istadji preċedenti tal-għażla tal-pajjiż rappreżentattiv. Għal tnejn minnhom, inkluż BE8, il-Kummissjoni kienet diġà kkonkludiet li r-rapporti finanzjarji ma kinux sors xieraq ta’ SG&A u profitt mingħajr distorsjoni kif spjegat fil-premessa (251). L-unika kumpanija li jifdal tkun Caramuru Alimentos S.A. (“Caramuru”), li ġiet proposta mill-EBB fl-ilment.

(254)

Meta wieħed iqis il-konklużjonijiet dwar id-disponibbiltà tal-informazzjoni dwar il-fatturi tal-produzzjoni kif ippreżentati fil-premessa (227) u d-disponibbiltà ta’ informazzjoni finanzjarja xierqa għal għadd ta’ produtturi tal-bijodiżil Malażjani, il-Kummissjoni kkonkludiet li d-disponibbiltà tal-informazzjoni finanzjarja għal Caramuru ma kinitx rilevanti. Lanqas ma kien hemm bżonn li wieħed ifittex u janalizza l-informazzjoni finanzjarja ta’ kumpanija li tipproduċi prodott fl-istess kategorija ġenerali bħall-bijodiżil.

(255)

Fl-aħħar nett, fil-kummenti tagħha dwar it-Tieni Nota, Zhuoyue argumentat li l-informazzjoni finanzjarja ta’ wieħed mill-produtturi tal-bijodiżil Malażjani, Vance Bioenergy Sdn Bhd. (“Vance”), ma kinitx sors xieraq ta’ SG&A u profitt mingħajr distorsjoni peress li l-kumpanija pproduċiet ukoll prodotti oħrajn. Barra minn hekk, il-kumpanija ddikjarat li l-piż tal-informazzjoni finanzjarja ta’ kumpanija oħra, FIMA BIODIESEL SDN BHD (“FIMA”), fil-basket jenħtieġ li jiġi aġġustat peress li l-informazzjoni finanzjarja kienet disponibbli biss għall-ewwel trimestru tal-2023, minflok għas-sena sħiħa 2022 bħal fis-sitt kumpaniji l-oħrajn.

(256)

Il-Kummissjoni ċaħdet id-dikjarazzjonijiet. L-ewwel nett, il-prodotti l-oħrajn immanifatturati minn Vance kienu prodotti sekondarji tal-bijodiżil u għalhekk ma setgħux jitqiesu bħala kategorija ta’ prodotti kompletament mhux relatata. It-tieni, ir-rapporti finanzjarji għall-FIMA kienu disponibbli wkoll għal sena sħiħa, iżda l-kumpanija użat bħala sena finanzjarja l-perjodu mill-1 ta’ April sal-31 ta’ Marzu.

(257)

Wara li ġie stabbilit li l-Malażja kienet l-uniku pajjiż rappreżentattiv xieraq disponibbli, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-Artikolu 2(6a)(a), l-ewwel inċiż, tar-Regolament bażiku.

(258)

Fid-dawl tal-analiżi ta’ hawn fuq, il-Malażja ssodisfat il-kriterji stipulati fl-Artikolu 2(6a)(a), l-ewwel inċiż tar-Regolament bażiku sabiex titqies bħala pajjiż rappreżentattiv xieraq.

(259)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota.

(260)

Sussegwentement, fit-Tieni Nota, il-Kummissjoni ddikjarat li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija tuża l-bażi tad- tal-Global Trade Atlas (136) (“GTA”) sabiex tistabbilixxi l-kost mingħajr distorsjoni tal-biċċa l-kbira tal-fatturi ta’ produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża l-informazzjoni ppubblikata mill-Istitut tal-Malażja għall-Informazzjoni u l-Analiżi tas-Suq tax-Xogħol (“ILMIA”) (137) biex jiġu stabbiliti kostijiet lavorattivi mingħajr distorsjoni, minn Tenaga Nasional Berhad (“TNB”) (138) għall-elettriku, mill-Kummissjoni tal-Enerġija (Suruhanjaya Tenaga) (139) għall-gass naturali u l-fwar, u mill-Kummissjoni Nazzjonali tas-Servizzi tal-Ilma (“SPAN”) (140) għall-ilma.

(261)

Meta titqies l-informazzjoni kollha ppreżentata mill-partijiet interessati u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2 (6a)(a) tar-Regolament bażiku:

Tabella 1

Fatturi ta’ produzzjoni tal-bijodiżil

(262)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi ta’ produzzjoni msemmija hawn fuq. Sabiex tistabbilixxi dan l-ammont, il-Kummissjoni użat il-kost ġenerali tal-manifattura mġarrab mill-produtturi esportaturi inklużi fil-kampjun aġġustat kif xieraq għal livell mingħajr distorsjoni. Il-metodoloġija hija spjegata kif xieraq fil-premessi (277) u (278).

(263)

Sabiex jiġi stabbilit il-prezz mingħajr distorsjoni tal-inputs u tal-materja prima sal-fabbrika ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat ta’ importazzjoni fil-pajjiż rappreżentattiv kif irrapportat fil-bażi tad-data tal-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li ma humiex membri tad-WTO elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (141). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fit-taqsima 3.2.1 hija kkonkludiet li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Il-volumi li jifdal tqiesu mill-Kummissjoni bħala rappreżentattivi. Barra minn hekk, fir-rigward tal-kost mingħajr distorsjoni tal-POME, tal-aċidi grassi taż-żejt tal-palm, tal-UCO, taż-żejt imħallat industrijali, taż-żejt irriċiklat u taż-żejt transesterifikat, il-Kummissjoni eskludiet ukoll l-importazzjonijiet li joriġinaw mill-Indoneżja. Kif deskritt fil-premessi (232) u (238), il-Kummissjoni sabet li l-prezzijiet tal-materja prima msemmija hawn fuq kienu distorti mill-applikazzjoni tat-taxxa fuq l-esportazzjoni mill-Indoneżja.

(264)

Sabiex tiddetermina d-dazji tal-importazzjoni applikabbli għal kull kodiċi tal-merkanzija u pajjiż tal-oriġini, il-Kummissjoni kkonsultat il-Mappa tal-Aċċess għas-Suq. (142) Id-dazji tal-importazzjoni żdiedu mal-valur CIF irreġistrat fl-istatistika tal-importazzjoni tal-Malażja kif disponibbli fil-bażi tad-data tal-GTA.

(265)

Il-Kummissjoni esprimiet il-kost tat-trasport imġarrab mill-produtturi esportaturi inklużi fil-kampjun għall-provvista tal-materja prima bħala perċentwal tal-kost attwali ta’ din il-materja prima u mbagħad applikat l-istess perċentwal għall-kost mingħajr distorsjoni tal-istess materja prima sabiex jinkiseb il-kost mingħajr distorsjoni tat-trasport. Il-Kummissjoni qieset li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet mingħajr distorsjoni tat-trasport tal-materja prima meta tiġi kkonsenjata lill-fabbrika tal-kumpanija.

(266)

Fil-kummenti tagħha dwar l-Ewwel Nota, EcoCeres argumentat li l-istatistika dwar l-importazzjoni ma kinitx sors affidabbli ta’ parametru referenzjarju għall-idroġenu għar-raġunijiet li ġejjin:

(267)

Il-kumpanija ssuġġeriet li l-Kummissjoni jenħtieġ li tuża l-mekkaniżmu tal-ipprezzar inkluż fil-kuntratt tal-kumpanija għall-provvista tal-idroġenu. Inkella, il-kumpanija rreferiet għal prezz domestiku tal-idroġenu magħmul disponibbli mill-gvern tal-Malażja f’Novembru 2023 (143) u għalhekk x’aktarx ibbażat fuq il-prezzijiet applikabbli matul il-perjodu ta’ investigazzjoni.

(268)

Il-Kummissjoni sabet li l-kwantità tal-importazzjoni tal-idroġenu lejn il-Malażja kienet tabilħaqq baxxa ħafna (ftit anqas minn 155 m3). Għalhekk, f’dan l-istadju, il-Kummissjoni użat il-prezz domestiku ppubblikat mill-gvern tal-Malażja (144) bħala s-sors ta’ kost mingħajr distorsjoni tal-idroġenu. Peress li l-prezz jirreferi għall-idroġenu użat bħala sors tal-enerġija, il-Kummissjoni aġġustat il-prezz għad-differenza bejn il-prezz tal-idroġenu għall-enerġija u għall-użu industrijali abbażi tal-istatistika miġbura mis-Sħubija għall-Idroġenu Nadif (145).

(269)

Għal għadd ta’ fatturi ta’ produzzjoni, il-kostijiet attwali mġarrba minn ċerti produtturi esportaturi inklużi fil-kampjun kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni. Peress li l-valur użat għal dawn il-fatturi ta’ produzzjoni ma kellu l-ebda impatt apprezzabbli fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet fil-materjal konsumabbli. Il-valur attwali vverifikat tal-materjal konsumabbli ġie espress bħala sehem mill-kost attwali vverifikat tal-materja prima tal-produtturi esportaturi inklużi fil-kampjun. Dan il-perċentwal intuża biex jiġi stabbilit il-valur mingħajr distorsjoni tal-materjal konsumabbli kif deskritt fil-premessa (287).

(270)

Id-data statistika dwar il-kost lavorattiv fil-Malażja hija ppubblikata mill-Istitut tal-Malażja tal-Informazzjoni u l-Analiżi tas-Suq tax-Xogħol (“ILMIA”) (146). Il-Kummissjoni użat l-informazzjoni dwar il-kost lavorattiv totali tat-tekniċi u tal-professjonisti assoċjati fl-2016. Il-valur medju fix-xahar tal-2016 ġie aġġustat kif xieraq għall-inflazzjoni bl-użu tal-indiċi tal-prezzijiet tal-produtturi domestiċi kif ippubblikat mill-Bank Dinji (147). Sabiex tistabbilixxi l-kost lavorattiv ta’ kull siegħa, il-Kummissjoni applikat l-informazzjoni miġbura mid-Dipartiment tal-Istatistika tal-ILO (“ILOSTAT”) fuq medja ta’ sigħat ta’ kull ġimgħa attwalment maħduma għal kull persuna impjegata (148).

(271)

Il-prezz tal-elettriku għall-kumpaniji (utenti industrijali) fil-Malażja huwa ppubblikat minn TNB (149). Il-Kummissjoni użat id-data dwar il-prezzijiet tal-elettriku industrijali fil-livell ta’ konsum korrispondenti f’kWh li tkopri l-perjodu ta’ investigazzjoni. Fejn disponibbli, ġew ikkunsidrati t-tariffi għal domanda massima u mhux massima.

(272)

Il-kost mingħajr distorsjoni tal-elettriku użat għal kull produttur esportatur inkluż fil-kampjun ivarja skont il-livell ta’ konsum li jaqa’ taħtu.

(273)

Il-prezz tal-gass naturali għall-kumpaniji (utenti industrijali) fil-Malażja huwa pubblikat mill-Kummissjoni tal-Enerġija (Suruhanjaya Tenaga) (150). Il-Kummissjoni użat id-data għall-prezzijiet tal-gass mhux residenzjali fil-livell ta’ konsum korrispondenti, li ġiet irrapportata f’mmBtu, li tkopri l-perjodu ta’ investigazzjoni.

(274)

Il-kost mingħajr distorsjoni tal-gass naturali użat għal kull produttur esportatur inkluż fil-kampjun ivarja skont il-livell ta’ konsum li jaqa’ taħtu.

(275)

Il-Kummissjoni ddeterminat il-kost mingħajr distorsjoni tal-fwar abbażi tal-kost mingħajr distorsjoni tal-gass naturali u skont il-metodoloġija ppubblikata mid-Dipartiment tal-Enerġija tal-Istati Uniti (151). Billi l-metodoloġija tikkalkula biss il-kost tal-fjuwil tal-fwar, il-Kummissjoni aġġustat il-kost tal-fjuwil għall-SG&A u l-profitt tal-kumpanija tal-Malażja li tforni l-gass, Gas Malaysia Energy & Services Sdn. Bhd. (“GMES”) (152).

(276)

It-tariffi tal-ilma ġew imħabbra mill-Kummissjoni Nazzjonali tas-Servizzi tal-Ilma (“SPAN”) fil-Malażja. Il-Kummissjoni użat tariffi applikabbli għal utenti mhux domestiċi f’diversi reġjuni tal-Malażja (153).

(277)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi ta’ produzzjoni msemmija hawn fuq.

(278)

L-ispejjeż ġenerali tal-manifattura mġarrba minn kull produttur esportatur inkluż fil-kampjun ġew espressi bħala sehem mill-kostijiet tal-manifattura attwalment imġarrba mill-produttur esportatur. Dan il-perċentwal intuża biex jiġi ddeterminat il-valur mingħajr distorsjoni tal-ispejjeż ġenerali tal-manifattura.

(279)

Kif diskuss fit-Tieni Nota, għall-istabbiliment ta’ ammont mingħajr distorsjoni u raġonevoli għall-SG&A u l-profitt, il-Kummissjoni qagħdet fuq l-informazzjoni finanzjarja għas-sena finanzjarja li ntemmet fil-31 ta’ Diċembru 2022 u għas-sena finanzjarja li ntemmet fil-31 ta’ Marzu 2023 minn rapporti finanzjarji ppreżentati mis-seba’ kumpaniji li ġejjin fir-reġistru tal-Malażja lokali:

(280)

Fejn ir-rapporti finanzjarji kien fihom l-informazzjoni meħtieġa, il-Kummissjoni naqqset mill-kost relatat mat-trasport tal-SG&A biex tippermetti kalkolu tal-valur normali fil-livell ta’ kif joħroġ mill-fabbrika.

(281)

Barra minn hekk, il-Kummissjoni injorat ċertu kost li ma kienx relatat mal-bejgħ jew mal-amministrazzjoni ġenerali tal-kumpanija, bħal bidliet fil-valur ġust, differenzi mhux realizzati fil-kambju.

(282)

Madankollu, il-Kummissjoni qieset ukoll li l-basket ta’ kumpaniji kien limitat biss għall-produtturi li jużaw il-proċess tal-produzzjoni tat-transesterifikazzjoni. Sabiex jiġu riflessi d-differenzi potenzjali fl-SG&A u l-profitti fost id-diversi proċessi tal-produzzjoni (ara l-premessa (31)), f’dan l-istadju, il-Kummissjoni ddeċidiet li tinkludi tliet produtturi Malażjani addizzjonali fl-istess settur, jiġifieri tas-sustanzi kimiċi organiċi (154), fil-basket. L-informazzjoni finanzjarja tagħhom kienet disponibbli fil-bażi tad-data ta’ Orbis għas-sena finanzjarja li ntemmet fil-31 ta’ Diċembru 2022. Il-kumpaniji kienu profittabbli, u l-informazzjoni finanzjarja kien fiha l-elementi kollha meħtieġa (il-kostijiet tal-merkanzija mibjugħa, diversi kostijiet operatorji u/jew finanzjarji oħrajn, il-profitt).

(283)

Il-kumpaniji li ġejjin żdiedu mas-seba’ produtturi tal-bijodiżil elenkati fil-premessa (279):

(284)

L-SG &A u profitt mingħajr distorsjoni ġew iddeterminati bħala perċentwal tal-kostijiet tal-oġġetti mibjugħa fil-livell ta’ 5,4 % u 12,7 % rispettivament. Il-Kummissjoni qieset li dawk il-livelli kienu raġonevoli, skont it-tifsira tal-aħħar subparagrafu tal-Artikolu 2(6a)(a) tar-Regolament bażiku, għal-livell ta’ kummerċ mill-fabbrika.

(285)

Abbażi ta’ dan ta’ hawn fuq, il-Kummissjoni bniet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(286)

L-ewwel, il-Kummissjoni stabbiliet il-kost mingħajr distorsjoni tal-manifattura. Il-Kummissjoni mmultiplikat il-kwantità tal-konsum reali vverifikata tal-fatturi individwali tal-produzzjoni tal-produtturi esportaturi fil-kampjun bil-kostijiet unitarji mingħajr distorsjoni ta’ dawk il-fatturi tal-produzzjoni osservati fil-pajjiż rappreżentattiv, kif deskritt fit-taqsima 3.2.4.

(287)

Il-porzjon tal-kost mingħajr distorsjoni tal-manifattura li jirrifletti l-valur mingħajr distorsjoni tal-oġġetti konsumabbli ġie stabbilit billi l-valur mingħajr distorsjoni tal-materja prima ddeterminat kif deskritt fil-premessa (286) ġie mmultiplikat bil-perċentwal ta’ oġġetti konsumabbli ddeterminat kif deskritt fil-premessa (269).

(288)

It-tieni, il-Kummissjoni stabbiliet il-valur mingħajr distorsjoni tal-ispejjeż ġenerali tal-manifattura billi mmultiplikat il-valur mingħajr distorsjoni tal-kost tal-manifattura bil-perċentwal tal-ispejjeż ġenerali tal-manifattura ddeterminat kif deskritt fil-premessa (278).

(289)

Billi żiedet il-valur mingħajr distorsjoni tal-ispejjeż ġenerali tal-manifattura mal-valur mingħajr distorsjoni tal-kost tal-manifattura, il-Kummissjoni stabbiliet il-kost tal-produzzjoni mingħajr distorsjoni.

(290)

Fl-aħħar nett, il-Kummissjoni stabbiliet l-ammonti mingħajr distorsjoni għal SG&A u għall-profitt billi mmultiplikat il-valur mingħajr distorsjoni tal-kost tal-produzzjoni bir-rati ta’ S&GA u ta’ profitt iddeterminati kif spjegat fil-premessi (279) sa (284). L-ammonti mingħajr distorsjoni għal SG&A u għall-profitt, li tqiesu mill-Kummissjoni bħala raġonevoli għal-livell ta’ kummerċ mill-fabbrika, żdiedu mal-kost tal-produzzjoni mingħajr distorsjoni.

(291)

Abbażi ta’ dan, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(292)

Il-produtturi esportaturi inklużi fil-kampjun esportaw lejn l-Unjoni jew direttament lil klijenti indipendenti jew permezz ta’ kumpaniji relatati li jaġixxu bħala importaturi.

(293)

Għall-produtturi esportaturi li esportaw il-prodott ikkonċernat direttament lil klijenti indipendenti fl-Unjoni, il-prezz tal-esportazzjoni kien il-prezz li effettivament tħallas jew dak pagabbli għall-prodott ikkonċernat meta nbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(294)

Għall-produttur esportatur li esporta l-prodott ikkonċernat lejn l-Unjoni permezz ta’ kumpanija relatata li taġixxi bħala importatur, il-prezz tal-esportazzjoni ġie stabbilit abbażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, f’konformità mal-Artikolu 2(9) tar-Regolament bażiku. F’dan il-każ, saru aġġustamenti fil-prezz għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A, u għall-profitti akkumulati. Meta wieħed iqis in-nuqqas ta’ informazzjoni dwar il-profitt minn importaturi indipendenti li kkooperaw, il-Kummissjoni bbażat fuq il-profitt fil-livell ta’ 5 % meqjus raġonevoli f’investigazzjoni preċedenti dwar l-importazzjonijiet ta’ bijodiżil li joriġinaw mill-Arġentina u mill-Indoneżja (155).

(295)

L-Artikolu 2(10) tar-Regolament bażiku jirrikjedi li l-Kummissjoni tagħmel paragun ġust bejn il-valur normali u l-prezz tal-esportazzjoni fl-istess livell ta’ kummerċ u tagħmel konċessjoni għad-differenzi fil-fatturi li jaffettwaw il-prezzijiet u l-komparabbiltà tal-prezzijiet. F’dan il-każ, il-Kummissjoni għażlet li tqabbel il-valur normali u l-prezz tal-esportazzjoni tal-produtturi esportaturi fil-kampjun fil-livell ta’ kummerċ mill-fabbrika. Kif spjegat aktar hawn taħt, fejn xieraq, il-valur normali u l-prezz tal-esportazzjoni ġew aġġustati sabiex: (i) jiġu nnettjati lura għal-livell ta’ kummerċ mill-fabbrika; u (ii) jagħmlu konċessjonijiet għal differenzi fil-fatturi li ġew iddikjarati, u murija, li jaffettwaw il-prezzijiet u l-komparabbiltà tal-prezzijiet.

(296)

Kif spjegat fil-premessa (291), il-valur normali ġie stabbilit fil-livell ta’ kummerċ mill-fabbrika bl-użu tal-kostijiet tal-produzzjoni flimkien mal-ammonti tal-SG&A u tal-profitt, li tqiesu bħala raġonevoli għal dak il-livell ta’ kummerċ. Għalhekk, ma kien meħtieġ l-ebda aġġustament biex il-valur normali jiġi nnettjat lura għal-livell ta’ kif joħroġ mill-fabbrika.

(297)

Il-Kummissjoni ma sabet l-ebda raġuni għaliex għamlet xi konċessjonijiet għall-valur normali, u dawn il-konċessjonijiet lanqas ma ntalbu minn xi wieħed mill-produtturi esportaturi fil-kampjun.

(298)

Sabiex il-prezz tal-esportazzjoni jiġi nnettjat lura għal-livell ta’ kummerċ mill-fabbrika, saru aġġustamenti minħabba: dazju doganali, imposti oħra fuq l-importazzjoni, merkanzija, assigurazzjoni, tagħbija tal-immaniġġjar u kostijiet anċillari.

(299)

Saru konċessjonijiet għall-fatturi li ġejjin li jaffettwaw il-prezzijiet u l-komparabbiltà tal-prezzijiet: il-kost tal-kreditu, l-imposti bankarji u l-kummissjonijiet.

(300)

Għall-produtturi esportaturi inklużi fil-kampjun, il-Kummissjoni qabblet il-valur normali medju ponderat ta’ kull tip ta’ prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, f’konformità mal-Artikoli 2(11) u (12) tar-Regolament bażiku.

(301)

Għall-produtturi esportaturi li kkooperaw li ma humiex inklużi fil-kampjun, il-Kummissjoni kkalkolat il-marġni tad-dumping medju ponderat, f’konformità mal-Artikolu 9(6) tar-Regolament bażiku. Għaldaqstant, dak il-marġni kien stabbilit fuq il-bażi tal-marġnijiet tal-produtturi esportaturi inklużi fil-kampjun.

(302)

Għall-produtturi esportaturi l-oħrajn kollha fir-RPĊ, il-Kummissjoni stabbiliet il-marġni tad-dumping abbażi tal-fatti disponibbli, f’konformità mal-Artikolu 18 tar-Regolament bażiku. Għal dan l-għan, il-Kummissjoni ddeterminat il-livell ta’ kooperazzjoni tal-produtturi esportaturi. Il-livell ta’ kooperazzjoni huwa l-volum ta’ esportazzjonijiet lejn l-Unjoni tal-produtturi esportaturi li kkooperaw espress bħala proporzjon tal-importazzjonijiet totali mill-pajjiż ikkonċernat lejn l-Unjoni fil-PI, li ġew stabbiliti abbażi tal-Eurostat (il-bażi tad- Comext).

(303)

Il-livell ta’ kooperazzjoni f’dan il-każ huwa għoli minħabba li l-esportazzjonijiet irrapportati mill-produtturi esportaturi li kkooperaw qabżu t-total tal-importazzjonijiet matul il-PI. Din id-diskrepanza apparenti tista’ tiġi attribwita għan-natura speċifika tal-katina tal-provvista tal-bijodiżil. Il-produtturi Ċiniżi rari jfornu lill-klijenti tal-Unjoni direttament. L-esportazzjonijiet jitwettqu permezz ta’ negozjanti (li spiss jinsabu f’pajjiżi terzi), jiġifieri f’xi każijiet, il-produtturi setgħu biss jistmaw l-Unjoni bħala d-destinazzjoni bbażata fuq it-talba tan-negozjant għal ċertifikat ta’ sostenibbiltà; inkella, il-bijodiżil oriġinarjament immirat għas-suq tal-Unjoni seta’ jiġi ridirett lejn pajjiż mhux tal-UE. Filwaqt li qieset il-livell għoli ta’ kooperazzjoni, il-Kummissjoni qieset li kien xieraq li tistabbilixxi l-marġni tad-dumping għall-produtturi esportaturi li ma kkooperawx fil-livell tal-kumpanija inkluża fil-kampjun bl-ogħla marġni tad-dumping.

(304)

Il-marġnijiet tad-dumping provviżorji, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(305)

Matul il-perjodu ta’ investigazzjoni, il-prodott simili kien immanifatturat minn 43 produttur fl-Unjoni li kienu membri tal-EBB flimkien ma’ madwar 20 membru ieħor mhux membri tal-EBB. Dawn il-produtturi jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(306)

Fi preżentazzjoni datata l-11 ta’ Jannar 2024 (156), EcoCeres xeħet dubju fuq il-kompletezza tal-fajl miftuħ fir-rigward tal-formoli permanenti. Huwa talab ukoll għar-raġunijiet għad-diskrepanzi bejn id-data fl-ilment fir-rigward tal-ilmentaturi reali u dawk li jappoġġawhom u d-data fin-nota tal-Kummissjoni għall-fajl dwar il-pożizzjoni permanenti u staqsa dwar il-pożizzjoni speċifika tal-produttur tal-Unjoni Neste. Il-Kummissjoni kkonfermat li: a) il-verżjonijiet miftuħin kollha tal-formoli permanenti riċevuti tqiegħdu fil-fajl miftuħ fi żmien xieraq; b) il-limiti rilevanti biex jiġi skattat ilment kif stabbilit fir-Regolament bażiku ġew issodisfati; u c) li l-fajl miftuħ kien jirrifletti l-pożizzjonijiet individwali tal-kumpaniji meta esprimew dan. Barra minn hekk, il-Kummissjoni nnotat li l-kumpaniji li jipparteċipaw fl-eżerċizzju permanenti ma kinux l-istess kumpaniji li kkontribwew b’data għall-fini li jiġi stabbilit l-ilment, li rriżulta f’xi diskrepanzi bejn iċ-ċifri fl-ilment meta mqabbla maċ-ċifri fin-nota tal-Kummissjoni għall-fajl permanenti.

(307)

Fl-istadju tal-bidu, il-produzzjoni totali tal-Unjoni matul il-perjodu ta’ investigazzjoni ġiet stabbilita f’livell ta’ madwar 12-il miljun tunnellata. Il-Kummissjoni stabbiliet iċ-ċifra abbażi tad-data mill-ilmentatur, minn kumpaniji individwali u minn assoċjazzjonijiet rilevanti. Għas-CCCMC, din iċ-ċifra kienet f’kunflitt mar-Rapport GAIN tal-USDA tal-14 ta’ Awwissu 2023 li kien jiddependi fuqu l-ilmentatur. EcoCeres indika wkoll rappreżentazzjoni ħażina tal-volumi tal-HVO.

(308)

L-ilmentatur irreveda l-produzzjoni totali tal-Unjoni ’l fuq fit-tweġiba tiegħu għall-kwestjonarju makro. Iċ-ċifra riveduta tal-ilmentatur kienet ibbażata fuq fornitur estern tal-intelliġenza tas-suq imsejjaħ Stratas. Il-Kummissjoni ma rċeviet l-ebda kumment mill-partijiet interessati fir-rigward tad-data tal-produzzjoni totali tal-Unjoni kif irrapportata fit-tweġiba għall-kwestjonarju makro. Fl-istadju provviżorju, il-produzzjoni totali tal-Unjoni matul il-perjodu ta’ investigazzjoni għalhekk ġiet stabbilita għal 14 775 455 tunnellata, li hija ċ-ċifra rrapportata mill-ilmentatur nieqes stima għall-SAF magħmula mill-Kummissjoni, kif spjegat fit-taqsima 4.5.2.1.

(309)

Minbarra dak li ġie indikat fil-premessa (15), fid-dawl taċ-ċifra riveduta tal-produzzjoni tal-Unjoni fil-premessa ta’ hawn fuq, l-erba’ produtturi tal-Unjoni inklużi fil-kampjun kienu jirrappreżentaw 12 % tal-produzzjoni totali tal-Unjoni tal-prodott simili.

(310)

Jekk l-HVO ma jiġix eskluż mill-ambitu ta’ din l-investigazzjoni, is-CCCMC sostniet li l-HVO u l-FAME jenħtieġ li jiġu eżaminati separatament fl-analiżi tad-dannu tal-Kummissjoni, kif sar fl-investigazzjoni dwar il-Moduli u ċ-Ċelloli Solari (157).

(311)

EcoCeres sostna li, jekk il-Kummissjoni tiddeċiedi li żżomm l-HVO u l-SAF fl-ambitu tal-investigazzjoni, il-Kummissjoni jenħtieġ li twettaq analiżi tad-dannu segmentata tal-FAME, tal-HVO u tal-SAF, biex jitqiesu d-differenzi bejn dawn it-tliet prodotti. Skont il-parti, il-FAME, l-HVO u l-SAF huma kompletament differenti f’termini ta’ karatteristiċi fiżiċi u kimiċi, proċessi ta’ produzzjoni, użi finali u impatt ambjentali u huma meqjusin bħala prodotti differenti fis-suq, kif ukoll mill-awtoritajiet u mill-aġenziji madwar id-dinja. Għall-kuntrarju tal-FAME, l-HVO u l-SAF ma jkunux “bijodiżil” u l-importazzjonijiet ta’ tip wieħed ta’ prodott ma jkunux kapaċi jikkawżaw dannu lill-produtturi tat-tipi ta’ prodotti l-oħrajn. EcoCeres iddikjara li FAME hija orħos minn HVO u SAF u għalhekk ma tikkompetix magħhom.

(312)

Il-Kummissjoni nnotat li tista’ tkun meħtieġa analiżi tad-dannu segmentata meta: a) il-prodotti inkwistjoni ma jkunux “interkambjabbli biżżejjed”; b) “hemm sitwazzjoni partikolari kkaratterizzata minn konċentrazzjoni għolja ta’ bejgħ domestiku u importazzjonijiet li huma l-oġġett ta’ dumping f’segmenti separati u minn differenzi fil-prezzijiet li huma sinifikanti ħafna bejn dawk is-segmenti”; u c) l-importazzjonijiet ikunu “kkonċentrati l-aktar f’wieħed mis-segmenti tas-suq”. (158) Minħabba li l-SAF f’dan l-istadju ġie eskluż mill-ambitu tal-prodott, l-analiżi ta’ hawn taħt tkopri l-FAME u l-HVO.

(313)

L-ewwel nett, il-Kummissjoni sabet li t-tipi ta’ prodotti inkwistjoni bħala interkambjabbli biżżejjed kif spjegat fit-taqsima 2.4 hawn fuq. Ma hemm l-ebda segmentazzjoni tas-suq f’dan il-każ, anki jekk jista’ jkun hemm differenzi fil-prezzijiet bejn FAME u HVO. It-tieni, il-firxa tal-prezzijiet kemm għal FAME kif ukoll għal HVO tista’ tvarja b’mod sinifikanti skont iċ-ċirkostanzi tas-suq tal-bijodiżil, jiġifieri l-ambjent regolatorju, il-volumi tal-provvista u s-sitwazzjoni tal-materja prima.

(314)

Fis-sottomissjoni tiegħhu datata s-6 ta’ Frar 2024 (159), EcoCeres ikkwota prezzijiet tal-HVO ta’ aktar minn USD 1 100/tunnellata ogħla mill-prezz ta’ FAME. Madankollu, il-firxa bejn HVO u FAME kienet ferm aktar baxxa (jiġifieri madwar USD 258/tunnellata) fil-bidu tal-2024 (160).

(315)

Madankollu, firxa sinifikanti simili teżisti fost it-tipi ta’ prodotti tal-FAME nfushom. Pereżempju, fl-20 ta’ Settembru 2023, l-intelliġenza tas-suq ikkwotat prezz ta’ USD 1 455 għal kull tunnellata għal FAME minn UCO (FOB to Rotterdam-Antwerp (portijiet) “ARA”), prezz ta’ USD 1 190/tunnellata għall-FAME 0 (FOB ARA) u prezz ta’ USD 1 382/tunnellata għal FAME miż-żejt tal-lift (FOB ARA) (161). L-istess sors irrefera għal firxa bejn il-prezzijiet West-EU ta’ FAME 0 (FOB ARA) kontra FAME minn UCO (FOB ARA) li tammonta għal madwar USD 400/tunnellata f’diversi każijiet matul il-PI (162). Konsegwentement, id-dikjarazzjoni li d-differenza fil-prezz bejn HVO u FAME hija sinifikanti hija eskluża mill-kuntest u qarrieqa.

(316)

Fl-aħħar nett, il-bejgħ Ċiniż fl-Unjoni jirrifletti l-kapaċitajiet Ċiniżi u d-domanda tal-UE, kemm FAME storikament iżda li qed jikber għal HVO. (163) F’dan ir-rigward, l-investigazzjoni wriet li FAME kienet tirrappreżenta madwar żewġ terzi tal-volumi ta’ esportazzjoni fil-kampjun, filwaqt li l-bijodiżil HVO kien jirrappreżenta madwar terz (164) . Għalhekk, anki jekk kien hemm żewġ segmenti distinti għal FAME u HVO, quod non, l-importazzjonijiet mhumiex ikkonċentrati l-aktar fi kwalunkwe wieħed mit-tipi ta’ prodotti mibjugħa fis-suq.

(317)

Għalhekk, ma hemm l-ebda raġuni għaliex analiżi tad-dannu segmentata tkun iġġustifikata f’dan il-każ. Għalhekk, il-Kummissjoni ċaħdet it-talbiet għal analiżi segmentata tad-dannu tal-bijodiżil tal-FAME u l-HVO.

(318)

Il-Kummissjoni stabbiliet il-konsum tal-Unjoni abbażi tal-volumi tal-bejgħ fl-Unjoni mill-industrija tal-Unjoni kif ippreżentati mill-ilmentatur u vverifikati fil-bini tal-EBB u tal-Comext għad-data dwar l-importazzjoni.

(319)

Il-konsum tal-Unjoni żviluppa kif ġej:

Tabella 2

Konsum tal-Unjoni (tunnellati)

(320)

Il-konsum tal-Unjoni żviluppa b’mod pożittiv matul il-perjodu kkunsidrat, f’konformità maż-żieda fil-mandati għall-użu u t-taħlit tal-bijodiżil fl-Unjoni.

(321)

Fi preżentazzjoni datata s-26 ta’ Jannar 2024 (165), is-CCCMC talbet lill-Kummissjoni biex tagħmel disponibbli għall-pubbliku d-data dwar il-monitoraġġ tal-importazzjoni fir-rigward tal-perjodu kollu ta’ investigazzjoni u biex tinjora l-valutazzjoni tal-ilmentatur tal-evoluzzjoni tal-importazzjonijiet tal-bijodiżil miċ-Ċina ppreżentata fl-ilment minħabba li kienet ibbażata fuq sempliċi suppożizzjonijiet u spekulazzjonijiet. Il-Kummissjoni nnotat li użat data minn Comext biex tistabbilixxi l-volumi tal-importazzjoni, kif spjegat fid-dettall hawn taħt.

(322)

Il-Kummissjoni stabbiliet il-volum tal-importazzjonijiet abbażi ta’ statistika dwar l-importazzjonijiet minn Comext u GTA. Is-sehem mis-suq tal-importazzjonijiet ġie stabbilit abbażi tal-konsum tal-bijodiżil tal-Unjoni fit-tabella 2, id-data dwar il-bejgħ mill-produtturi tal-Unjoni kif ippreżentata mill-ilmentatur, minn Comext u minn GTA. Kif innotat fil-premessa (57), l-SAF ġie eskluż mill-kamp ta’ applikazzjoni ta’ din l-investigazzjoni u għalhekk il-volumi rispettivi ġew esklużi abbażi tal-informazzjoni tal-Kummissjoni dwar dan miksuba matul l-investigazzjoni.

(323)

L-importazzjonijiet lejn l-Unjoni mill-pajjiż ikkonċernat żviluppaw kif ġej:

Tabella 3

Volum tal-importazzjonijiet (tunnellati) u sehem mis-suq

(324)

L-importazzjonijiet miċ-Ċina varjaw iżda kumplessivament żdiedu drastikament matul il-perjodu kkunsidrat (+ 60 % b’mod ġenerali). Is-sehem mis-suq tagħhom żdied b’49 %, minn 5,4 % fl-2020 għal 8 % fil-perjodu ta’ investigazzjoni.

(325)

Dik id-data tikkontradixxi d-dikjarazzjoni tas-CCCMC, abbażi tad-data tal-ilment, li ż-żieda fl-importazzjonijiet Ċiniżi ma kinitx tikkostitwixxi żieda “sostanzjali” f’termini relattivi għall-produzzjoni u l-konsum.

(326)

Il-Kummissjoni stabbiliet il-prezzijiet tal-importazzjonijiet abbażi ta’ Comext. It-twaqqigħ tal-prezz tal-importazzjonijiet ġie stabbilit abbażi tat-tweġibiet ivverifikati għall-kwestjonarju.

(327)

Il-prezz medju tal-importazzjonijiet fl-Unjoni mill-pajjiż ikkonċernat żviluppa kif ġej:

Tabella 4

Prezzijiet tal-importazzjoni (EUR/tunnellata)

(328)

Il-prezz tal-importazzjonijiet miċ-Ċina żdied b’mod sinifikanti matul il-perjodu taħt kunsiderazzjoni (+53 % b’mod ġenerali).

(329)

Is-CCCMC sostniet li l-fatt li l-prezzijiet tal-importazzjoni Ċiniżi kienu ogħla mill-prezzijiet tal-bejgħ tal-industrija tal-Unjoni matul il-biċċa l-kbira tal-perjodu taħt kunsiderazzjoni dgħajjef l-allegazzjonijiet fl-ilment. Il-Kummissjoni nnotat li d-differenza bejn iż-żewġ settijiet ta’ prezzijiet, li huma medji ta’ EUR/tunnellata tal-bejgħ tal-industrija Ċiniża u tal-Unjoni tal-UE, tirriżulta mit-taħlita ta’ prodotti differenti. L-importazzjonijiet Ċiniżi huma tipi ta’ prodotti tal-bijodiżil li jużaw materja prima, li skont id-Direttivi RED, jistgħu jingħaddu darbtejn mal-miri tal-enerġija rinnovabbli tal-UE u b’hekk jattiraw prezzijiet tipikament ogħla fis-suq minn FAME bbażata fuq l-għelejjel u l-għalf. Sehem kbir mill-bejgħ mill-produtturi tal-Unjoni madankollu kien il-FAME ibbażat fuq l-għelejjel u l-għalf mingħajr primjum b’għadd doppju bħal dan.

(330)

Is-CCCMC talbet lill-Kummissjoni biex ma tiffokax l-analiżi tat-twaqqigħ tal-prezz tagħha fuq sena waħda meta twettaq l-analiżi tagħha tal-effetti fuq il-prezzijiet, filwaqt li qajmet dubji dwar il-kalkoli tat-twaqqigħ tal-prezz fl-ilment. Il-Kummissjoni ċaħdet id-dikjarazzjoni, li ma kinitx issostanzjata, u stabbiliet twaqqigħ tal-prezz għall-perjodu ta’ investigazzjoni.

(331)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(332)

It-tqabbil tal-prezzijiet sar fuq bażi ta’ tip b’tip għat-tranżazzjonijiet fl-istess livell ta’ kummerċ, bl-aġġustament dovut meta meħtieġ, u wara tnaqqis tar-ribassi u tal-iskontijiet. Ir-riżultat tat-tqabbil kien espress bħala perċentwal tal-fatturat teoriku tal-produtturi tal-Unjoni inklużi fil-kampjun matul il-perjodu ta’ investigazzjoni. Dan wera marġni medju ponderat tat-twaqqigħ tal-prezz ta’ bejn 5,3 % u 13,8 % permezz tal-importazzjonijiet mill-pajjiż ikkonċernat fis-suq tal-Unjoni. Instab twaqqigħ tal-prezz għal 100 % tal-volumi importati tal-kumpaniji inklużi fil-kampjun.

(333)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet li huma oġġett ta’ dumping fuq l-industrija tal-Unjoni kien jinkludi evalwazzjoni tal-indikaturi ekonomiċi kollha li kellhom effett fuq l-istat tal-industrija tal-Unjoni matul il-perjodu taħt kunsiderazzjoni.

(334)

Kif imsemmi fil-premessi (8)-(18), intuża l-kampjunar għad-determinazzjoni tad-dannu possibbli li ġarrbet l-industrija tal-Unjoni.

(335)

Biex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi fuq il-bażi tad-data li tinsab fit-tweġiba għall-makrokwestjonarju ppreżentata mill-ilmentatur. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data li tinsab fit-tweġibiet għall-kwestjonarju mill-produtturi tal-Unjoni inklużi fil-kampjun. Instab li ż-żewġ settijiet ta’ data kienu rappreżentattivi tas-sitwazzjoni ekonomika tal-industrija tal-Unjoni.

(336)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(337)

L-indikaturi mikroekonomiċi huma: il-prezzijiet medji ta’ unità, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-kapaċità li jiġi ġġenerat il-kapital.

(338)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu taħt kunsiderazzjoni:

Tabella 5

Poduzzjoni, kapaċità tal-produzzjoni u użu tal-kapaċità

(339)

Il-produzzjoni, il-kapaċità tal-produzzjoni u l-użu tal-kapaċità kienu f’livelli relattivament simili fil-perjodu ta’ investigazzjoni meta mqabbla mal-2020. Madankollu, il-volumi tal-produzzjoni naqsu b’mod sinifikanti fil-perjodu ta’ investigazzjoni meta mqabbla mal-2022.

(340)

Il-volum tal-bejgħ lil klijenti mhux relatati u s-sehem mis-suq tal-industrija tal-Unjoni żviluppaw kif ġej matul il-perjodu taħt kunsiderazzjoni:

Tabella 6

Il-volum tal-bejgħ u s-sehem mis-suq

(341)

Matul il-perjodu kkunsidrat, is-sehem mis-suq tal-industrija tal-Unjoni naqas b’mod sinifikanti bi kważi 10 punti perċentwali biex laħaq sehem mis-suq ta’ 64,8 % fil-perjodu ta’ investigazzjoni. Mill-2022, meta l-volumi tal-importazzjonijiet Ċiniżi bdew jiżdiedu b’mod esponenzjali, il-volumi tal-bejgħ tal-industrija tal-Unjoni u s-sehem mis-suq korrispondenti bdew jonqsu malajr.

(342)

L-industrija tal-Unjoni ma esperjenzat l-ebda tkabbir f’termini ta’ produzzjoni matul il-perjodu kkunsidrat minkejja l-iżvilupp pożittiv tal-konsum tal-bijodiżil f’dak il-perjodu. Fil-fatt, il-volum ta’ bejgħ u s-sehem mis-suq tal-industrija tal-Unjoni fil-fatt naqsu matul il-perjodu ta’ referenza.

(343)

L-impjiegi u l-produttività żviluppaw kif ġej matul il-perjodu taħt kunsiderazzjoni:

Tabella 7

Impjiegi u produttività

(344)

Il-Kummissjoni nnotat li mhux il-produtturi kollha tal-Unjoni rrapportaw data dwar l-impjiegi lill-EBB bl-istess approċċ u li kienu meħtieġa xi stimi għall-kumpaniji li ma jirrapportawx, u dan ħoloq xi nuqqasijiet fid-data disponibbli għall-Kummissjoni fir-rigward tal-impjiegi. Fi kwalunkwe każ, l-għadd stmat ta’ impjegati ppreżentat fit-Tabella 7 tqies bħala raġonevolment preċiż u adegwat għall-finijiet ta’ din l-investigazzjoni.

(345)

Is-CCCMC argumentat li żieda fl-impjiegi hija sinjal ċar ta’ industrija b’saħħitha. Argumentat ukoll li t-tnaqqis fil-produttività huwa dovut għal żieda fl-impjiegi flimkien ma’ tnaqqis fid-domanda (u l-produzzjoni u l-bejgħ li jirriżultaw). Madankollu, il-Kummissjoni nnotat li ż-żieda fl-impjiegi seħħet l-aktar fl-2021, meta l-industrija tal-Unjoni setgħet tieħu vantaġġ mit-tnaqqis fl-importazzjonijiet Ċiniżi u żżid il-volumi tal-bejgħ tagħha. Fil-perjodu ta’ investigazzjoni, meta l-importazzjonijiet Ċiniżi żdiedu, l-impjiegi naqsu b’mod sinifikanti. Konsegwentement, l-affermazzjoni ġiet miċħuda.

(346)

Il-marġnijiet tad-dumping tal-produtturi esportaturi inklużi fil-kampjun kollha kienu ferm ogħla mil-livell de minimis. L-impatt tad-daqs tal-marġnijiet attwali tad-dumping fuq l-industrija tal-Unjoni ma kienx negliġibbli, meta wieħed iqis il-volum u l-prezzijiet tal-importazzjonijiet mill-pajjiż ikkonċernat u n-natura tal-prodott, jiġifieri prodott ta’ komodità.

(347)

Il-prodott taħt investigazzjoni diġà kien soġġett għal diversi investigazzjonijiet anti-dumping u antisussidji. Il-miżuri anti-dumping u antisussidji eżistenti kontra l-Istati Uniti (estiżi għal kunsinni mill-Kanada, b’xi eżenzjonijiet (168)) ġew imġedda matul il-perjodu taħt kunsiderazzjoni. Ma hemm l-ebda indikazzjoni li dawk il-miżuri ma kinux effettivi.

(348)

Fl-2020, l-industrija tal-Unjoni wriet b’mod ċar sinjali ta’ rkupru wara l-impożizzjoni fl-2019 ta’ miżuri kumpensatorji definittivi kontra l-importazzjonijiet ta’ bijodiżil li joriġina mill-Arġentina (169) u mill-Indoneżja (170). Fir-rigward tal-bqija tal-perjodu taħt kunsiderazzjoni, l-irkupru kien għadu għaddej kif muri, fost fatturi oħrajn, minn livelli ta’ profittabbiltà baxxi (kif muri hawn taħt), iżda waqaf fl-2022 meta bdew jiżdiedu l-importazzjonijiet Ċiniżi.

(349)

Il-prezzijiet medji tal-bejgħ ta’ unità tal-produtturi tal-Unjoni lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 8

Il-prezzijiet tal-bejgħ fl-Unjoni

(350)

Mill-2020 sal-2022, il-prezzijiet tal-bejgħ segwew ix-xejriet fil-kostijiet, u telgħu t-tnejn b’90 % sal-2022. Fil-perjodu ta’ investigazzjoni, l-industrija tal-Unjoni ma setgħetx tirrifletti ż-żieda fil-kostijiet fil-prezzijiet tal-bejgħ tagħha u kienet imġiegħla tbigħ kważi bil-prezz tal-kost.

(351)

Sehem kbir mill-bejgħ mill-produtturi tal-Unjoni kien il-FAME ibbażat fuq l-għelejjel u l-għalf mingħajr primjum b’għadd doppju. Fi tmiem il-perjodu kkunsidrat, id-distakk bejn il-kost unitarju tal-produzzjoni u l-prezz tal-bejgħ ta’ unità naqas u bilkemm kien EUR 2.

(352)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 9

Kostijiet lavorattivi medji għal kull impjegat

(353)

Bħala medja, il-kost lavorattiv tal-produtturi tal-Unjoni inklużi fil-kampjun żdied bi 15 % matul il-perjodu taħt kunsiderazzjoni. Peress li l-kost lavorattiv jirrappreżenta mhux inqas minn 3 % tal-kost tal-manifattura tal-bijodiżil, iż-żieda fil-kostijiet lavorattivi - li ma hijiex f’kunflitt maż-żieda ġenerali medja ta’ 12 % fil-kost lavorattiv fl-Unjoni fil-perjodu 2020-2023 skont il-Eurostat (171) - għandha impatt negliġibbli fuq l-istat tal-industrija tal-Unjoni.

(354)

Il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 10

Inventarji

(355)

Is-CCCMC sostniet li dan il-fattur ma huwiex rilevanti fil-kuntest ta’ din l-investigazzjoni minħabba li l-Kummissjoni kienet iddikjarat preċedentement li l-livell tal-istokkijiet huwa indikatur anqas sinifikanti għal din it-tip ta’ industrija (172). Il-Kummissjoni kkonfermat li l-industrija għamlet sforz biex iżżomm l-istokks baxxi iżda dan ma huwiex dejjem il-każ meta l-importazzjonijiet Ċiniżi jkunu waslu bi prezzijiet baxxi ħafna. Innotat ukoll li, minħabba li l-prodott taħt investigazzjoni jinbiegħ bl-ingrossa, kunsinna waħda tista’ tinkludi volum sinifikanti ta’ aktar minn 10 000 tunnellata li jista’ jkollha impatt sinifikanti fuq il-livell tal-istokkijiet, skont id-data preċiża tat-tranżazzjoni.

(356)

Il-profittabbiltà, il-fluss ta’ flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 11

Profittabbiltà, fluss ta’ flus, investimenti u redditu fuq l-investimenti

(357)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ. Il-profittabbiltà tal-industrija tal-Unjoni kienet f’livelli baxxi ħafna matul il-perjodu taħt kunsiderazzjoni u naqset għal punt ta’ ekwilibriju fil-perjodu ta’ investigazzjoni. L-akbar tnaqqis fil-profittabbiltà kien bejn l-2022 u l-perjodu ta’ investigazzjoni, meta l-importazzjonijiet Ċiniżi żdiedu b’45 % u l-profitt tal-industrija tal-Unjoni naqas b’1,7 punti perċentwali għal kważi laħaq il-punt ta’ ekwilibriju meta mqabbel mal-2022.

(358)

Il-fluss ta’ flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom stess. Ix-xejra fil-fluss tal-flus nett iddeterjorat ħafna matul il-perjodu taħt kunsiderazzjoni u kienet negattiva ħafna mill-2021.

(359)

L-investimenti fil-kumpaniji inklużi fil-kampjun varjaw matul il-perjodu taħt kunsiderazzjoni. B’mod ġenerali, l-investimenti huma approvati snin qabel l-implimentazzjoni tagħhom. L-investimenti fl-aħħar parti tal-perjodu taħt kunsiderazzjoni kienu proġetti previsti minn żmien twil qabel u kienu jikkonċernaw biss żewġ kumpaniji.

(360)

Ir-redditu fuq l-investimenti huwa l-profitt f’perċentwal tal-valur kontabilistiku nett tal-investimenti. Dan żviluppa b’mod negattiv, f’konformità mal-profittabbiltà, u kien baxx ħafna matul il-perjodu kollu kkunsidrat u f’1,3 % biss fil-perjodu ta’ investigazzjoni minħabba, b’mod partikolari, il-livell baxx ħafna ta’ profittabbiltà.

(361)

Il-valutazzjoni ta’ hawn fuq tal-makroindikaturi u tal-mikroindikaturi ekonomiċi turi li l-industrija tal-Unjoni kienet qed iġġarrab dannu materjali fil-perjodu ta’ investigazzjoni, minħabba li tilfet sehem sinifikanti mis-suq u ż-żieda fil-prezzijiet tal-bejgħ tagħha ma kinitx biżżejjed biex tgħaddi ż-żieda qawwija fil-kostijiet tal-produzzjoni tagħha, li rriżulta fit-tnaqqis tal-profittabbiltà tagħha, li affettwa b’mod negattiv ir-redditu fuq l-investimenti u l-fluss tal-flus. Il-fatt li ftit indikaturi (il-kapaċità tal-produzzjoni, in-numru ta’ impjegati) ma ddeterjorawx ma jimminax is-sejba ta’ dannu.

(362)

Abbażi ta’ dak li ntqal hawn fuq, il-Kummissjoni kkonkludiet f’dan l-istadju li l-industrija tal-Unjoni ġarrbet dannu materjali skont it-tifsira tal-Artikolu 3(5) tar-Regolament bażiku.

(363)

F’konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. F’konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufa oħrajn setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi għajr l-importazzjonijiet li huma l-oġġett ta’ dumping mill-pajjiż ikkonċernat ma kienx attribwit għall-importazzjonijiet oġġett ta’ dumping. Dawn il-fatturi huma: l-importazzjonijiet minn pajjiżi terzi, prestazzjoni tal-esportazzjoni tal-industrija tal-Unjoni u ż-żidiet tal-kost ta’ produzzjoni.

(364)

Il-volumi tal-importazzjonijiet mir-RPĊ żdiedu b’60 %, kif muri fit-Tabella 3, filwaqt li l-konsum żdied b’madwar 7 % (Tabella 2). Dan irriżulta f’żieda fis-sehem mis-suq tal-importazzjonijiet mir-RPĊ b’2,6 punti perċentwali minn 5,4 għal 8 %, filwaqt li s-sehem mis-suq tal-industrija tal-Unjoni naqas bi kważi 10 punti perċentwali biex laħaq 64,8 % fil-perjodu ta’ investigazzjoni.

(365)

Il-prezzijiet tal-importazzjonijiet Ċiniżi waqqgħu l-prezzijiet tal-industrija tal-Unjoni fil-perjodu ta’ investigazzjoni b’minn 5,3 % sa 13,8 %. Prezzijiet baxxi bħal dawn irriżultaw f’soppressjoni tal-prezzijiet fis-suq tal-Unjoni, li b’riżultat tagħhom, l-industrija tal-Unjoni ma setgħetx tagħmel profitti tajbin. Fil-perjodu ta’ investigazzjoni, il-prezzijiet tal-bejgħ tal-industrija tal-Unjoni kienu biss marġinalment ogħla mill-kost tal-produzzjoni tagħha.

(366)

L-industrija tal-Unjoni, li kienet għadha kif bdiet tirkupra minn sussidjar dannuż tal-bijodiżil fl-imgħoddi mill-Arġentina u mill-Indoneżja, immedjatament esperjenzat l-impatt negattiv taż-żieda fil-volum tal-importazzjonijiet tal-bijodiżil mir-RPĊ bi prezzijiet baxxi. Dawk l-importazzjonijiet kellhom impatt negattiv ċar fuq is-sitwazzjoni finanzjarja tal-industrija tal-Unjoni.

(367)

Abbażi ta’ dak li ntqal hawn fuq, il-Kummissjoni kkonkludiet li l-importazzjonijiet miċ-Ċina kkawżaw dannu materjali lill-industrija tal-Unjoni. Dan id-dannu kellu effetti kemm fuq il-volum kif ukoll fuq il-prezz.

(368)

Il-volum tal-importazzjonijiet minn pajjiżi terzi oħrajn żviluppa kif ġej matul il-perjodu taħt kunsiderazzjoni:

Tabella 12

Importazzjonijiet minn pajjiżi terzi

(369)

Matul il-perjodu ta’ investigazzjoni, il-prezz medju tal-importazzjoni mill-importazzjonijiet l-oħrajn kollha kien aktar baxx mill-prezz tal-importazzjoni miċ-Ċina. Madankollu, il-prezzijiet tal-importazzjonijiet mhumiex direttament komparabbli.

(370)

B’mod partikolari, il-bijodiżil Ċiniż juża materja prima differenti minn sorsi oħra ta’ importazzjoni u l-importazzjonijiet Ċiniżi huma ta’ tip ta’ bijodiżil li jattira primjum tal-għadd doppju skont id-Direttivi RED kif spjegat hawn fuq, u konsegwentement prezz ogħla fis-suq tal-UE. Għalhekk, għalkemm il-prezzijiet tal-importazzjonijiet minn pajjiżi għajr iċ-Ċina xi drabi huma aktar baxxi minn dawk miċ-Ċina, dan ma jfissirx li għandhom l-istess impatt negattiv fuq l-industrija tal-Unjoni.

(371)

Is-CCCMC enfasizzat li l-industrija tal-bijodiżil tal-Unjoni tilfet sehem mis-suq għall-importazzjonijiet ta’ pajjiżi terzi. Fil-fatt, b’mod partikolari r-Renju Unit u Singapore żiedu wkoll il-volumi tal-bejgħ u s-sehem mis-suq tagħhom matul il-perjodu taħt kunsiderazzjoni. Madankollu, ma tista’ tinstilet l-ebda konklużjoni dwar l-effetti dannużi ta’ dawn l-importazzjonijiet. L-ewwel nett, l-importazzjonijiet mir-Renju Unit baqgħu pjuttost stabbli mill-2021, u żdiedu biss b’0,4 punti perċentwali fil-perjodu ta’ investigazzjoni meta mqabbla mal-2021. Is-sehem mis-suq tal-importazzjonijiet minn Singapore żdied b’żewġ punti perċentwali, li huwa aktar baxx miż-żieda fis-sehem mis-suq tal-importazzjonijiet Ċiniżi iżda xorta waħda sinifikanti. Madankollu, il-Kummissjoni sabet li l-importazzjonijiet Ċiniżi huma tipi ta’ prodotti tal-bijodiżil li jattiraw primjum (tal-għadd doppju) u għalhekk, anki jekk isiru bi prezzijiet medji tal-importazzjoni ogħla mill-prezz medju tal-bejgħ tal-bijodiżil tal-industrija tal-Unjoni, dawn jistgħu jkunu dannużi u orħos. Ma setgħet tinsilet l-ebda konklużjoni bħal din fir-rigward tal-importazzjonijiet minn pajjiżi oħra, fin-nuqqas ta’ informazzjoni dwar il-materja prima ta’ tali importazzjonijiet u l-kanali tal-bejgħ rilevanti.

(372)

Fid-dawl ta’ dan ta’ hawn fuq, il-Kummissjoni kkonkludiet b’mod provviżorju li l-importazzjonijiet minn pajjiżi terzi oħrajn setgħu kkontribwew għad-dannu mġarrab mill-industrija tal-Unjoni iżda sa ċertu punt limitat biss, għalhekk, dawn ma naqqsux ir-rabta kawżali bejn id-dannu mġarrab mill-industrija tal-Unjoni u l-importazzjonijiet Ċiniżi oġġett ta’ dumping.

(373)

Il-volum tal-esportazzjonijiet tal-produtturi tal-Unjoni żviluppa kif ġej matul il-perjodu taħt kunsiderazzjoni:

Tabella 13

Prestazzjoni tal-esportazzjoni tal-produtturi tal-Unjoni (inklużi fil-kampjun)

(374)

Il-volumi tal-bejgħ tal-esportazzjoni tal-industrija tal-Unjoni ammontaw għal 11 % tal-produzzjoni tal-Unjoni fl-2020, 6 % tal-produzzjoni tal-Unjoni fl-2021 u fl-2022, u 9 % tal-produzzjoni tal-Unjoni fil-perjodu ta’ investigazzjoni. B’mod ġenerali, dawn għalhekk kienu jirrappreżentaw parti relattivament żgħira mill-fatturat tal-industrija tal-Unjoni u kellhom, meta mqabbla mal-bejgħ tal-Unjoni, effett limitat fuq il-prestazzjoni tal-industrija kollha kemm hi.

(375)

Il-bejgħ tal-esportazzjoni tal-partijiet fil-kampjun kien ġeneralment baxx u varja ħafna b’mod inkonsistenti, filwaqt li l-produtturi fil-kampjun immanifatturaw tipi differenti ta’ prodotti. Għalhekk, il-Kummissjoni ma setgħetx tistabbilixxi prezzijiet medji rappreżentattivi tal-bejgħ għall-esportazzjoni mill-kampjun. Minflok, hija stabbiliet il-prezzijiet tal-esportazzjoni tal-industrija tal-Unjoni fuq l-istess bażi li kien għamel l-ilmentatur għall-volumi bl-użu tal-GTA, jiġifieri billi ħadet il-bejgħ għall-esportazzjoni taħt il-kodiċi NM 3826 00 biss. Fuq dik il-bażi, il-prezzijiet tal-bejgħ għall-esportazzjoni tal-industrija tal-Unjoni matul il-perjodu kkunsidrat żviluppaw ftit aktar pożittivi mill-prezzijiet tal-bejgħ tagħha fis-suq tal-Unjoni u b’livelli ogħla ta’ prezzijiet.

(376)

Is-CCCMC indikat prestazzjoni ħażina tal-esportazzjoni mill-industrija tal-Unjoni bħala sors ta’ dannu, jiġifieri fir-rigward tal-użu tal-kapaċità tagħha. Madankollu, il-Kummissjoni nnotat li l-industrija tal-Unjoni tat spinta lill-bejgħ tal-esportazzjoni tagħha fil-perjodu ta’ investigazzjoni li llimita t-tnaqqis fl-użu tal-kapaċità, peress li kienet ikkonfrontata b’telf sinifikanti kontinwu tas-sehem mis-suq fis-suq tal-Unjoni. Il-bejgħ tal-esportazzjoni li jirrappreżenta madwar 10 % tal-bejgħ tal-industrija tal-Unjoni matul il-perjodu taħt kunsiderazzjoni, il-Kummissjoni kkonkludiet, fuq dik il-bażi, li l-prestazzjoni tal-esportazzjoni tal-produtturi tal-Unjoni setgħet ikkontribwiet għad-dannu sa ċertu punt limitat, jekk xejn. L-affermazzjoni tas-CCCMC ġiet miċħuda.

(377)

Is-CCCMC sostniet li ż-żieda fil-kost tal-produzzjoni kienet kawża potenzjali ta’ dannu għall-industrija tal-Unjoni. Kif irrapportat fit-Tabella 8 hawn fuq, il-kost tal-produzzjoni żdied bi 72 % matul il-perjodu taħt kunsiderazzjoni li huwa aktar miż-żieda fil-prezzijiet tal-bejgħ, b’69 %, matul l-istess perjodu. Għal dak l-argument, il-Kummissjoni nnotat, l-ewwel nett, li fis-sena tal-bidu tal-perjodu taħt kunsiderazzjoni, l-2020, l-industrija tal-Unjoni kienet diġà bi profitti baxxi ħafna peress li kienet għadha kemm bdiet tirkupra mid-dannu kkawżat mill-importazzjonijiet mill-Arġentina u mill-Indoneżja, li fuqhom ġew imposti dazji kumpensatorji fl-2019. Il-Kummissjoni nnotat ukoll li f’kundizzjonijiet ekwi, l-industrija tista’ tirrifletti ż-żidiet fil-kostijiet (tal-materja prima) kompletament fil-prezzijiet tal-bejgħ tagħha. Madankollu, f’dan il-każ, il-produtturi tal-Unjoni ma setgħux isarrfu kompletament iż-żieda fil-kost tal-produzzjoni fil-prezzijiet tal-bejgħ tagħhom, b’mod partikolari fil-perjodu ta’ investigazzjoni, wisq anqas milli jżidu l-prezzijiet tal-bejgħ tagħhom għal livelli aktar sostenibbli, minħabba l-pressjoni fuq il-prezzijiet eżerċitata mill-importazzjonijiet Ċiniżi oġġett ta’ dumping. Għalhekk, iż-żieda fil-kostijiet ġenerali tal-produzzjoni ma tistax titqies bħala kawża ta’ dannu għall-industrija.

(378)

L-analiżi ta’ hawn fuq turi li kien hemm żieda drammatika fil-volum u fis-sehem mis-suq tal-importazzjonijiet li joriġinaw miċ-Ċina matul it-tieni nofs tal-perjodu taħt kunsiderazzjoni. Il-prezzijiet baxxi tal-importazzjonijiet Ċiniżi li huma l-oġġett ta’ dumping impedew lill-industrija tal-Unjoni milli żżid il-prezzijiet tagħha għal livelli sostenibbli meħtieġa biex jinkisbu marġnijiet ta’ profitt raġonevoli, li rriżultaw f’sitwazzjoni qrib il-punt ta’ ekwilibriju fil-perjodu ta’ investigazzjoni. L-industrija tal-Unjoni tilfet ukoll sehem sinifikanti mis-suq. Għalhekk, il-Kummissjoni stabbiliet rabta kawżali bejn l-importazzjonijiet miċ-Ċina li huma l-oġġett ta’ dumping u d-dannu mġarrab mill-industrija tal-Unjoni.

(379)

Il-Kummissjoni ddistingwiet u sseparat l-effetti tal-fatturi kollha magħrufa fuq is-sitwazzjoni tal-industrija tal-Unjoni mill-effetti dannużi tal-importazzjonijiet li huma l-oġġett ta’ dumping. L-importazzjonijiet minn pajjiżi terzi kisbu sehem sinifikanti mis-suq, iżda l-Kummissjoni ma setgħetx tistabbilixxi d-dannu fil-prezzijiet ikkawżat minn dawn l-importazzjonijiet. Il-bejgħ tal-esportazzjoni mill-industrija tal-Unjoni kien relattivament stabbli matul il-perjodu kkunsidrat u ogħla mill-prezzijiet tal-bejgħ tal-Unjoni. Fid-dawl tas-sehem baxx tagħhom fil-bejgħ totali, it-tnaqqis żgħir fil-volumi tal-bejgħ għall-esportazzjoni matul il-perjodu kkunsidrat ikkontribwixxa biss għad-dannu sa ċertu punt limitat. Ġew analizzati wkoll kawżi possibbli oħrajn ta’ dannu iżda nstab li kkontribwew għad-dannu biss sa ċertu punt, jew xejn.

(380)

Abbażi ta’ dan ta’ hawn fuq, il-Kummissjoni kkonkludiet f’dan l-istadju li l-importazzjonijiet li huma l-oġġett ta’ dumping mill-pajjiż ikkonċernat ikkawżaw dannu materjali lill-industrija tal-Unjoni u li l-fatturi l-oħrajn, meqjusa b’mod individwali jew b’mod kollettiv, ma naqqsux ir-rabta kawżali bejn l-importazzjonijiet li huma l-oġġett ta’ dumping u d-dannu materjali. Id-dannu huwa ċar, b’mod partikolari fir-rigward tal-volum tal-bejgħ fis-suq tal-Unjoni, is-sehem mis-suq, il-profittabbiltà, il-fluss tal-flus u r-redditu fuq l-investimenti.

(381)

Biex tiddetermina l-livell tal-miżuri, il-Kummissjoni eżaminat jekk dazju aktar baxx mill-marġni tad-dumping ikunx biżżejjed sabiex jitneħħa d-dannu kkawżat mill-importazzjonijiet li huma l-oġġett ta’ dumping lill-industrija tal-Unjoni.

(382)

Id-dannu jitneħħa jekk l-industrija tal-Unjoni tkun tista’ tikseb profitt fil-mira billi tbigħ bi prezz fil-mira fis-sens tal-Artikolu 7(2c) u l-Artikolu 7(2d) tar-Regolament bażiku.

(383)

F’konformità mal-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabbiltà qabel iż-żieda fl-importazzjonijiet mill-pajjiż li qiegħed jiġi investigat, il-livell ta’ profittabbiltà meħtieġ sabiex ikopri l-kostijiet u l-investimenti kollha, ir-riċerka u l-iżvilupp (R&Ż) u l-innovazzjoni, u l-livell ta’ profittabbiltà li wieħed għandu jistenna f’kundizzjonijiet normali ta’ kompetizzjoni. Jenħtieġ li dan il-marġni ta’ profitt ma jkunx anqas minn 6 %.

(384)

Il-Kummissjoni ma setgħetx tistabbilixxi marġni ta’ profitt fuq il-bażi tas-snin ta’ qabel iż-żieda tal-importazzjonijiet miċ-Ċina, billi l-industrija tal-Unjoni sofriet influss ta’ importazzjonijiet li huma l-oġġett ta’ dumping/sussidjati minn oriġini oħrajn għal snin, kif innotat f’taqsima 4.5.2.5, u għalhekk l-ebda perjodu ta’ snin jew kwalunkwe sena ma setgħet tikkwalifika bħala perjodu/sena b’sitwazzjoni kompetittiva normali fis-suq tal-Unjoni. Konsegwentement, il-Kummissjoni rrikorriet għall-profitt stabbilit għal din it-tip ta’ industrija f’investigazzjonijiet preċedenti. Il-profitt bażiku ġie stabbilit għal 11 %. (175)

(385)

Produtturi tal-Unjoni inklużi fil-kampjun ma għamlu l-ebda dikjarazzjoni ssostanzjata li l-livell tagħhom ta’ investimenti, riċerka u żvilupp (R&D) u innovazzjoni matul il-perjodu taħt kunsiderazzjoni kienu jkunu ogħla f’kundizzjonijiet normali ta’ kompetizzjoni.

(386)

F’konformità mal-Artikolu 7(2d) tar-Regolament bażiku, bħala pass finali, il-Kummissjoni vvalutat il-kostijiet futuri li jirriżultaw mill-Ftehimiet Ambjentali Multilaterali, u l-protokolli tagħhom, li l-Unjoni hija parti minnhom, u tal-Konvenzjonijiet tal-ILO elenkati fl-Anness Ia li l-industrija tal-Unjoni se ġġarrab matul il-perjodu ta’ applikazzjoni tal-miżura skont l-Artikolu 11(2). Abbażi tal-evidenza disponibbli, li kienet appoġġata mill-għodod u mit-tbassir tar-rapportar tal-kumpaniji, il-Kummissjoni stabbiliet kost addizzjonali ta’ bejn [1-8] u [15-20] EUR/tunnellata, skont il-produttur. Din id-differenza żdiedet mal-prezz mhux dannuż imsemmi fil-premessa (387).

(387)

Fuq din il-bażi, il-Kummissjoni kkalkolat prezz mhux dannuż ta’ EUR 2 209/tunnellata bħala medja għall-prodott simili tal-industrija tal-Unjoni billi applikat il-marġni ta’ profitt fil-mira msemmi hawn fuq għall-kost tal-produzzjoni tal-produtturi tal-Unjoni inklużi fil-kampjun matul il-perjodu ta’ investigazzjoni u mbagħad żiedet l-aġġustamenti skont l-Artikolu 7(2d) fuq bażi ta’ tip b’tip.

(388)

Il-Kummissjoni mbagħad iddeterminat il-livell ta’ marġni tad-dannu abbażi ta’ tqabbil tal-prezz medju ponderat tal-importazzjoni tal-produtturi esportaturi li kkooperaw inklużi fil-kampjun, kif stabbilit għall-kalkoli ta’ twaqqigħ tal-prezz, mal-prezz medju ponderat mhux dannuż tal-prodott simili mibjugħ mill-produtturi tal-Unjoni inklużi fil-kampjun fis-suq tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala perċentwal tal-valur CIF medju ponderat tal-importazzjonijiet.

(389)

Il-livell ta’ eliminazzjoni tad-dannu għal “kumpaniji oħrajn li kkooperaw” u għall-“kumpaniji l-oħrajn kollha” huwa ddefinit bl-istess mod bħall-marġini tad-dumping għal dawn il-kumpaniji (ara l-premessi (302) sa (303)).

(390)

Wara l-valutazzjoni ta’ hawn fuq, id-dazji anti-dumping provviżorji jenħtieġ li jiġu stabbiliti kif ġej f’konformità mal-Artikolu 7(2) tar-Regolament bażiku: