(1)

Is-suq tal-inbid tal-Unjoni qed jesperjenza disturbi minħabba t-tnaqqis fil-konsum domestiku u fl-esportazzjonijiet lejn il-pajjiżi terzi ta’ ċerti kategoriji tal-inbid, b’mod partikolari l-inbejjed ħomor f’ċerti reġjuni tal-produzzjoni. Fir-reġjuni tal-produzzjoni tal-inbid ikkonċernati, dan qed joħloq sitwazzjonijiet rikorrenti ta’ provvisti żejda u akkumulazzjoni ta’ stokkijiet. Fl-2023 (2), l-Unjoni adottat miżuri eċċezzjonali biex tneħħi mis-suq parti mill-istokkijiet akkumulati fl-aktar reġjuni affettwati. Iżda l-inċertezzi tas-suq għadhom fostna u d-domanda għadha dgħajfa. Minkejja l-ħsad komparattivament moderat fl-2023, l-istokkijiet ta’ ċerti kategoriji tal-inbid għadhom qed jakkumulaw f’ċerti reġjuni u l-prospettiva għas-snin li ġejjin hija inċerta u allura dan id-disturb fis-suq aktarx li jissokta jew imur għall-agħar.

(2)

Il-vitikulturi li għandhom awtorizzazzjonijiet biex iħawlu d-dwieli qed jiffaċċjaw ir-riskju ta’ sanzjonijiet jekk ma jużawhomx biex iħawlu l-vinji korrispondenti. Għalhekk, il-penali u l-perjodu qasir tal-validità tal-awtorizzazzjonijiet qed iġiegħlu lill-vitikulturi jkomplu għaddejjin bit-tħawwil. It-tneħħija tal-penali u l-estensjoni tal-perjodu tal-validità fir-reġjuni produtturi b’disturbi fis-suq itaffu din il-pressjoni fuq il-vitikulturi u b’hekk tiċkien iż-żona mħawla bil-vinji u tiġi limitata l-introduzzjoni ta’ vinji produttivi addizzjonali f’suq diġà saturat. B’dawn il-miżuri, il-vitikulturi li għandhom awtorizzazzjonijiet biex iħawlu d-dwieli jkunu jistgħu jikkunsidraw mill-ġdid id-deċiżjonijiet tagħhom dwar it-tħawwil u jirbħu aktar żmien biex jidentifikaw l-aktar varjetajiet tal-għeneb u tipi tal-inbid li jaqblu mad-domandi tas-suq u l-kundizzjonijiet klimatiċi reġjonali li dejjem jevolvu. Għalhekk, biex din is-sena u fis-snin li ġejjin tiġi limitata ż-żona tal-art imħawla fl-aktar reġjuni affettwati mid-disturbi fis-suq, il-validità tal-awtorizzazzjonijiet għat-tħawwil tad-dwieli li jiskadu fl-2024 jew fl-2025 u li jkunu għadhom ma ntużawx sad-dħul fis-seħħ ta’ dan ir-Regolament, jenħtieġ li tiġi estiża bi tliet snin.

(3)

Biex jitħeġġeġ it-tnaqqis fiż-żona tal-vinji, jixraq li d-detenturi tal-awtorizzazzjonijiet għat-tħawwil tad-dwieli jingħataw iċ-ċans jirrinunzjaw l-awtorizzazzjonijiet tagħhom għall-2024 u l-2025 mingħajr ma jkunu soġġetti għall-penali amministrattivi msemmija fl-Artikolu 62(3) tar-Regolament (UE) Nru 1308/2013. Għal dak il-għan, dawn jenħtieġ li jinfurmaw lill-awtoritajiet kompetenti bl-intenzjoni tagħhom li ma jużawx l-awtorizzazzjonijiet tagħhom u jibbenefikaw mill-estensjoni tal-validità tagħhom.

(4)

L-Istati Membri jenħtieġ li jinfurmaw lill-Kummissjoni dwar l-implimentazzjoni ta’ dan ir-Regolament, biex l-Unjoni tkun tista’ timmonitorja l-effiċjenza tal-miżura introdotta fih.

(5)

Minħabba l-awtorizzazzjonijiet għat-tħawwil tad-dwieli li diġà ngħataw, jidher li l-miżuri l-oħra disponibbli skont ir-Regolament (UE) Nru 1308/2013 mhumiex biżżejjed jew adegwati biex iwaqqfu t-tkabbir taż-żona tal-vinji, u għalhekk biex jevitaw eċċess addizzjonali fis-suq tal-inbid.

(6)

Fid-dawl tad-disturb kontinwu fis-suq, u ż-żmien qasir disponibbli biex il-vitikulturi jibbenefikaw mill-estensjoni tal-validità prevista f’dan ir-Regolament, jeħtieġ tittieħed azzjoni immedjata. Għalhekk, dan ir-Regolament jeħtieġ jiġi adottat bil-proċedura ta’ urġenza stabbilita fl-Artikolu 228 tar-Regolament (UE) Nru 1308/2013.

(7)

Fid-dawl tal-ħtieġa li tittieħed azzjoni immedjata, dan ir-Regolament jenħtieġ li jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea,