(1)

Il-Kummissjoni identifikat xi żbalji fir-Regolament ta’ Implimentazzjoni (UE) 2024/1475 tagħha (2). Ir-Regolament ta’ Implimentazzjoni (UE) 2024/1475 jeħtieġ li jiġi kkoreġut sabiex jipprovdi ċarezza u ċertezza legali lill-operaturi tan-negozju u lill-awtoritajiet doganali tal-Istati Membri, u b’hekk tiġi żgurata implimentazzjoni xierqa ta’ dak l-att. L-iżbalji soġġetti għal korrezzjoni jikkonċernaw b’mod partikolari raġunament imtejjeb dwar l-impatt tal-volum tal-importazzjonijiet oġġett ta’ dumping fuq l-industrija tal-Unjoni u l-inklużjoni ta’ tliet kodiċijiet NM neqsin u tliet kodiċijiet TARIC neqsin fl-Artikolu 1 tal-parti operattiva.

(2)

Permezz tar-Regolament ta’ Implimentazzjoni (UE) 2019/159 (3) tagħha, il-Kummissjoni imponiet miżura ta’ salvagwardja fir-rigward ta’ ċerti prodotti tal-azzar għal perjodu ta’ 3 snin. Permezz tar-Regolament ta’ Implimentazzjoni tal-Kummissjoni (UE) 2021/1029 (4), il-miżura ta’ salvagwardja ġiet estiża sat-30 ta’ Ġunju 2024. Permezz tar-Regolament ta’ Implimentazzjoni tal-Kummissjoni (UE) 2024/1782 (5), il-miżura ta’ salvagwardja ġiet estiża sat-30 ta’ Ġunju 2026. Il-prodott taħt rieżami fir-Regolament ta’ Implimentazzjoni (UE) 2024/1475 huwa waħda mill-kategoriji ta’ prodotti koperti mill-miżura ta’ salvagwardja. Konsegwentement, ladarba jinqabżu l-kwoti tariffarji stabbiliti taħt il-miżura ta’ salvagwardja, kemm id-dazju tariffarju ’l fuq mill-kwota kif ukoll id-dazju anti-dumping isiru pagabbli fuq l-istess importazzjonijiet. Peress li din l-akkumulazzjoni ta’ miżuri anti-dumping ma’ miżuri ta’ salvagwardja tista’ twassal għal effett fuq il-kummerċ akbar milli mixtieq, huwa neċessarju li tiġi evitata l-applikazzjoni simultanja tad-dazju anti-dumping mad-dazju tariffarju ’l fuq mill-kwota għall-prodott taħt rieżami għad-durata tal-impożizzjoni tad-dazju ta’ salvagwardja.

(3)

Għaldaqstant, meta d-dazju tariffarju ’l fuq mill-kwota msemmi fl-Artikolu 1(6) tar-Regolament ta’ Implimentazzjoni (UE) 2019/159 jsir applikabbli għall-prodott taħt rieżami u jaqbeż il-livell tad-dazji anti-dumping skont ir-Regolament ta’ Implimentazzjoni (UE) 2024/1475, jenħtieġ li jinġabar biss id-dazju tariffarju ’l fuq mill-kwota msemmi fl-Artikolu 1(6) tar-Regolament ta’ Implimentazzjoni (UE) 2019/159. Matul il-perjodu ta’ applikazzjoni simultanja tad-dazji ta’ salvagwardja u anti-dumping, il-ġbir tad-dazji imposti skont ir-Regolament ta’ Implimentazzjoni (UE) 2024/1475 jenħtieġ li jiġi sospiż. Meta d-dazju tariffarju ’l fuq mill-kwota msemmi fl-Artikolu 1(6) tar-Regolament ta’ Implimentazzjoni (UE) 2019/159 jsir applikabbli għall-prodott taħt rieżami u jiġi stabbilit f’livell aktar baxx mil-livell tad-dazji anti-dumping fir-Regolament ta’ Implimentazzjoni (UE) 2024/1475, id-dazju tariffarju ’l fuq mill-kwota msemmi fl-Artikolu 1(6) tar-Regolament ta’ Implimentazzjoni (UE) 2019/159 jenħtieġ li jinġabar flimkien mad-differenza bejn dak id-dazju u d-dazji anti-dumping ogħla imposti skont ir-Regolament ta’ Implimentazzjoni (UE) 2024/1475. Il-parti tal-ammont ta’ dazji anti-dumping mhux miġbura jenħtieġ li tiġi sospiża.

(4)

Għaldaqstant jenħtieġ li r-Regolament ta’ Implimentazzjoni (UE) 2024/1475 jiġi kkoreġut u emendat kif xieraq.

(5)

Sabiex jiġi minimizzat il-perjodu ta’ inċertezza legali, jenħtieġ li dan ir-Regolament jidħol fis-seħħ b’urġenza. Jenħtieġ li japplika b’effett mid-data tal-applikazzjoni tar-Regolament ta’ Implimentazzjoni (UE) 2024/1475, sabiex tiġi żgurata l-applikazzjoni ta’ dak ir-Regolament ta’ Implimentazzjoni għat-tipi kollha ta’ prodotti li kienu koperti mir-rieżami ta’ skadenza u tiġi żgurata l-applikazzjoni korretta tal-miżuri ta’ salvagwardja. L-applikazzjoni ta’ dan ir-Regolament b’effett mid-data tal-applikazzjoni tar-Regolament ta’ Implimentazzjoni (UE) 2024/1475 ma tipproduċi l-ebda konsegwenza sfavorevoli għal dawk ikkonċernati fid-dawl tal-fatt li l-korrezzjonijiet u l-emendi ma jikkonċernawx bidliet fis-sustanza u ma jestendux il-kamp ta’ applikazzjoni tal-miżuri.

(6)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit permezz tal-Artikolu 15(1) tar-Regolament (UE) 2016/1036,

(1)

il-premessa 147 hija sostitwita b’dan li ġej:

(2)

Fl-Artikolu 1, il-paragrafu 1 huwa sostitwit b’dan li ġej: