(1)

Id-Direttiva (UE) 2015/849 tal-Parlament Ewropew u tal-Kunsill (4) tikkostitwixxi l-istrument legali ewlieni fil-prevenzjoni tal-użu tas-sistema finanzjarja tal-Unjoni għall-finijiet ta’ ħasil tal-flus u ta’ finanzjament tat-terroriżmu. Dik id-Direttiva tistipula qafas legali komprensiv, li d-Direttiva (UE) 2018/843 tal-Parlament Ewropew u tal-Kunsill (5) kompliet issaħħaħ billi indirizzat ir-riskji emerġenti ta’ ħasil ta’ flus u finanzjament tat-terroriżmu u żiedet it-trasparenza tas-sjieda benefiċjarja. Minkejja l-kisbiet taħt dak il-qafas legali, l-esperjenza wriet li jenħtieġ li jiġi introdott aktar titjib sabiex jittaffew b’mod adegwat ir-riskji ta’ ħasil ta’ flus u finanzjament tat-terroriżmu u sabiex jiġu identifikati b’mod effettiv tentattivi kriminali ta’ użu ħażin tas-sistema finanzjarja tal-Unjoni għal finijiet kriminali.

(2)

L-isfida ewlenija identifikata fir-rigward tal-applikazzjoni tad-dispożizzjonijiet tad-Direttiva (UE) 2015/849 li jistabbilixxu l-obbligi għall- entitajiet marbutin b’obbligu, hija n-nuqqas ta’ applikabbiltà diretta tar-regoli stabbiliti f’dawk id-dispożizzjonijiet u approċċ frammentat skont il-linji nazzjonali. Għalkemm dawk ir-regoli kienu jeżistu u evolvew tul tliet deċennji, dawn għadhom implimentati b’mod li ma huwiex konsistenti bis-sħiħ mar-rekwiżiti ta’ suq intern integrat. Għalhekk, huwa neċessarju li r-regoli dwar kwistjonijiet attwalment koperti fid-Direttiva (UE) 2015/849 li jistgħu jkunu direttament applikabbli mill-entitajiet marbutin b’obbligu kkonċernati jiġu indirizzati f’Regolament sabiex tinkiseb l-uniformità mixtieqa tal-applikazzjoni.

(3)

Dan l-istrument il-ġdid huwa parti minn pakkett komprensiv li għandu l-għan li jsaħħaħ il-qafas tal-Unjoni għall-ġlieda kontra l-ħasil tal-flus u l-finanzjament tat-terroriżmu (“AML/CFT”). Flimkien, dan ir-Regolament, id-Direttiva (UE) 2024/1640 tal-Parlament Ewropew u tal-Kunsill (6) u r-Regolament (UE) 2023/1113 (7) u (UE) 2024/1620 (8) tal-Parlament Ewropew u tal-Kunsill ser jifformaw il-qafas legali li jirregola r-rekwiżiti dwar l-AML/CFT li għandhom jiġu ssodisfati mill-entitajiet marbutin b’obbligu u li huma l-bażi tal-qafas istituzzjonali AML/CFT tal-Unjoni, inkluż l-istabbiliment ta’ Awtorità għall-ġlieda kontra l-ħasil tal-flus u l-finanzjament tat-terroriżmu (“AMLA”).

(4)

Il-ħasil tal-flus u l-finanzjament tat-terroriżmu ta’ spiss jitwettqu f’kuntest internazzjonali. Miżuri adottati biss fil-livell tal-Unjoni, mingħajr ma jittieħed kont tal-koordinazzjoni u tal-kooperazzjoni internazzjonali, ikollhom effetti limitati ħafna. Għalhekk, jenħtieġ li l-miżuri adottati mill-Unjoni f’dak il-qasam ikunu kompatibbli ma’ azzjonijiet oħrajn imwettqin f’fora internazzjonali, u tal-anqas strinġenti daqshom. Jenħtieġ li l-azzjoni tal-Unjoni tkompli tieħu kont partikolari tar-Rakkomandazzjonijiet tat-Task Force ta’ Azzjoni Finanzjarja (FATF), u ta’ strumenti ta’ korpi internazzjonali oħrajn attivi fil-ġlieda kontra l-ħasil tal-flus u kontra l-finanzjament tat-terroriżmu. Bil-ħsieb li tissaħħaħ l-effikaċja tal-ġlieda kontra l-ħasil tal-flus u kontra l-finanzjament tat-terroriżmu, jenħtieġ li l-att leġiżlattivi rilevanti tal-Unjoni, fejn xieraq, ikunu allinjati mal-Istandards Internazzjonali dwar il-Ġlieda Kontra l-Ħasil tal-Flus u l-Finanzjament tat-Terroriżmu u l-Proliferazzjoni adottati mill-FATF fi Frar 2012 (ir-“Rakkomandazzjonijiet riveduti tal-FATF”) u mal-emendi sussegwenti għal dawn l-istandards.

(5)

Sa mill-adozzjoni tad-Direttiva (UE) 2015/849, l-iżviluppi reċenti fil-qafas tad-dritt penali tal-Unjoni kkontribwew għat-tisħiħ tal-prevenzjoni u tal-ġlieda kontra l-ħasil tal-flus, ir-reati predikati tagħha u l-finanzjament tat-terroriżmu. Id-Direttiva (UE) 2018/1673 tal-Parlament Ewropew u tal-Kunsill (9) wasslet għal fehim komuni dwar ir-reat tal-ħasil tal-flus u r-reati predikati tiegħu. Id-Direttiva (UE) 2017/1371 tal-Parlament Ewropew u tal-Kunsill (10) iddefiniet ir-reati finanzjarji li jaffettwaw l-interess finanzjarju tal-Unjoni, li jenħtieġ li jitqiesu wkoll bħala reati predikati għall-ħasil tal-flus. Id-Direttiva (UE) 2017/541 tal-Parlament Ewropew u tal-Kunsill (11) kisbet fehim komuni tar-reat ta’ finanzjament tat-terroriżmu. Peress li dawk il-kunċetti issa huma ċċarati fid-dritt penali tal-Unjoni, ma għaduxneċessarju li r-regoli tal-Unjoni dwar l-AML/CFT jiddefinixxu l-ħasil tal-flus, ir-reati predikati tiegħu jew il-finanzjament tat-terroriżmu. Minflok, jenħtieġ li l-qafas AML/CFT tal-Unjoni jkun kompletament koerenti mal-qafas tad-dritt penali tal-Unjoni.

(6)

L-armonizzazzjoni fil-qasam rilevanti tad-dritt penali tippermetti approċċ b’saħħtu u koerenti fil-livell tal-Unjoni għall-prevenzjoni u l-ġlieda kontra l-ħasil tal-flus u r-reati predikati tiegħu, inkluż il-korruzzjoni. Fl-istess ħin, approċċ bħal dan jiżgura li l-Istati Membri li adottaw approċċ usa’ għad-definizzjoni ta’ attivitajiet kriminali li jikkostitwixxu reati predikati għall-ħasil tal-flus ikunu jistgħu jkomplu japplikaw tali approċċ . Għal dik ir-raġuni, f’konformità mad-Direttiva (UE) 2018/1673, jenħtieġ li kwalunkwe tip ta’ involviment punibbli fit-twettiq ta’ reat predikat għall-ħasil tal-flus kif kriminalizzat f’konformità mad-dritt nazzjonali jitqies ukoll bħala attività kriminali għall-finijiet ta’ dik id-Direttiva u ta’ dan ir-Regolament.

(7)

It-teknoloġija tkompli tevolvi, toffri opportunitajiet lis-settur privat sabiex jiżviluppa prodotti u sistemi ġodda għall-iskambju ta’ fondi jew ta’ valur. Filwaqt li dan huwa fenomenu pożittiv, jista’ jiġġenera riskji ġodda ta’ ħasil tal-flus u ta’ finanzjament tat-terroriżmu, peress li l-kriminali kontinwament jimmaniġjaw sabiex isibu modi kif jisfruttaw il-vulnerabbiltajiet sabiex jaħbu u jmexxu fondi illeċiti madwar id-dinja. Il-fornituri ta’ servizzi tal-kriptoassi u l-pjattaformi ta’ finanzjament kollettiv huma esposti għall-użu ħażin ta’ kanali ġodda għall-moviment ta’ flus illeċiti u huma f’pożizzjoni tajba sabiex jidentifikaw tali movimenti u jtaffu r-riskji. Għalhekk, jenħtieġ li l-kamp ta’ applikazzjoni tal-leġiżlazzjoni tal-Unjoni jiġi estiż sabiex ikopri tali entitajiet, f’konformità malistandards tal-FATF fir-rigward tal-kriptoassi. Fl-istess ħin, l-avvanzi fl-innovazzjoni, bħall-iżvilupp tal-metavers, jipprovdu opportunitajiet ġodda għat-twettiq ta’ reati u għall-ħasil tar-rikavat tagħhom. Għalhekk huwa importanti li tiġi eżerċitata viġilanza fir-rigward tar-riskji assoċjati mal-forniment ta’ prodotti jew servizzi innovattivi, kemm fil-livell tal-Unjoni kif ukoll f’dak nazzjonali, jew fil-livell tal-entitajiet marbutin b’obbligu.

(8)

L-istituzzjonijiet u l-persuni koperti minn dan ir-Regolament għandhom rwol kruċjali bħala gwardjani tas-sistema finanzjarja tal-Unjoni u, għalhekk, jenħtieġ li jieħdu l-miżuri neċessarji kollha sabiex jimplimentaw ir-rekwiżiti ta’ dan ir-Regolament bl-għan li jipprevjenu lill-kriminali milli jaħslu r-rikavat mill-attivitajiet illegali tagħhom jew milli jiffinanzjaw it-terroriżmu. Jenħtieġ li jiġu stabbiliti wkoll miżuri sabiex jittaffa kwalunkwe riskju ta’ nuqqas ta’ implimentazzjoni jew ta’ evażjoni ta’ sanzjonijiet finanzjarji mmirati.

(9)

Id-definizzjoni ta’ intermedjarju tal-assigurazzjoni skont id-Direttiva (UE) 2016/97 tal-Parlament Ewropew u tal-Kunsill (12) tkopri firxa wiesgħa ta’ persuni fiżiċi jew ġuridiċi li jibdew jew iwettqu l-attività ta’ distribuzzjoni tal-assigurazzjoni. Xi intermedjarji tal-assigurazzjoni jistgħu jibdew attivitajiet ta’ distribuzzjoni tal-assigurazzjoni taħt ir-responsabbiltà sħiħa tal-impriżi jew l-intermedjarji tal-assigurazzjoni u jwettqu attivitajiet soġġetti għall-politiki u l-proċeduri tagħhom. Meta dawk l-intermedjarji ma jiġbrux primjums jew ammonti maħsuba għall-klijent, għad-detentur tal-polza jew għall-benefiċjarju tal-polza tal-assigurazzjoni, ma jkunux f’pożizzjoni li jwettqu diliġenza dovuta sinifikanti jew li jidentifikaw u jirrapportaw tranżazzjonijiet suspettużi. Fid-dawl ta’ dak ir-rwol limitat u tal-fatt li l-applikazzjoni sħiħa tar-rekwiżiti tal-AML/CFT hija żgurata mill-impriżi tal-assigurazzjoni jew l-intermedjarji li taħt ir-responsabbiltà tagħhom jipprovdu servizzi, jenħtieġ li l-intermedjarji li ma jittrattawx fondi kif definit fl-Artikolu 4, il-punt (25), tad-Direttiva (UE) 2015/2366 tal-Parlament Ewropew u tal-Kunsill (13) ma jitqisux bħala entitajiet marbutin b’obbligu għall-finijiet ta’ dan ir-Regolament.

(10)

Jenħtieġ li l-kumpaniji azzjonarji li jwettqu attivitajiet imħallta u li jkollhom mill-inqas sussidjarja waħda li tkun entità marbuta b’obbligu huma stess jiġu inklużi bħala entitajiet marbutin b’obbligu fil-kamp ta’ applikazzjoni ta’ dan ir-Regolament. Sabiex tiġi żgurata superviżjoni konsistenti mis-superviżuri finanzjarji, f’każijiet fejn is-sussidjarji ta’ kumpanija azzjonarja ta’ attività mħallta jinkludu mill-inqas istituzzjoni ta’ kreditu jew istituzzjoni finanzjarja waħda, jenħtieġ li l-kumpanija azzjonarja nnifisha tikkwalifika wkoll bħala istituzzjoni finanzjarja.

(11)

It-tranżazzjonijiet finanzjarji jistgħu jsiru wkoll fl-istess grupp bħala mod ta’ ġestjoni tal-finanzi tal-grupp. Madankollu, tranżazzjonijiet bħal dawn ma jitwettqux fir-rigward ta’ klijenti u ma jeħtiġux l-applikazzjoni ta’ miżuri tal-AML/CFT. Sabiex tiġi żgurata ċ-ċertezza legali, huwa neċessarju li jiġi rrikonoxxut li dan ir-Regolament ma japplikax għal attivitajiet finanzjarji jew għal servizzi finanzjarji oħrajn li jiġu pprovduti minn membri ta’ grupp lil membri oħrajn ta’ dak il-grupp.

(12)

Il-professjonisti legali indipendenti jenħtieġ li jkunu soġġetti għal dan ir-Regolament meta jipparteċipaw fi tranżazzjonijiet finanzjarji jew korporattivi, inkluż meta jagħtu pariri fiskali, għax hemm riskju li s-servizzi ta’ dawk il-professjonisti legali jintużaw ħażin għall-fini ta’ ħasil tar-rikavat minn attività kriminali jew għall-fini ta’ finanzjament tat-terroriżmu. Madankollu, jenħtieġ li jkun hemm eżenzjonijiet minn kwalunkwe obbligu ta’ rapportar ta’ informazzjoni miksuba qabel, matul jew wara proċedimenti ġudizzjarji, jew matul il-proċess sabiex tiġi aċċertata l-pożizzjoni legali ta’ klijent, peress li tali informazzjoni hija koperta mill-privileġġ i legali. Għaldaqstant, jenħtieġ li l-parir legali jibqa’ soġġett għall-obbligu tas-segretezza professjonali, ħlief meta l-professjonist legali jkun qed jieħu sehem fil-ħasil tal-flus jew fil-finanzjament tat-terroriżmu, il-parir legali jingħata għall-finijiet ta’ ħasil tal-flus jew ta’ finanzjament tat-terroriżmu jew meta l-professjonist legali jkun jaf li l-klijent qed ifittex parir legali għall-finijiet ta’ ħasil tal-flus jew ta’ finanzjament tat-terroriżmu. Tali -għarfien u l-iskop jista’ jiġi dedott minn ċirkostanzi fattwali oġġettivi. Peress li diġà jista’ jintalab parir legali fl-istadju tat-twettiq tal-attività kriminali li tiġġenera r-rikavat, huwa importanti li l-każijiet esklużi mill-privileġġ legali jestendu għal sitwazzjonijiet fejn jingħata parir legali fil-kuntest tar-reati predikati. Jenħtieġ li l-parir legali mitlub fir-rigward ta’ proċedimenti ġudizzjarji li jkunu għaddejjin ma jitqiesx li jikkostitwixxi parir legali għall-finijiet tal-ħasil tal-flus jew il-finanzjament tat-terroriżmu.

(13)

Sabiex jiġi żgurat li jiġu rrispettati d-drittijiet garantiti fil-Karta tad-Drittijiet Fundamentali tal-Unjoni Ewropea (il-“Karta”), fil-każ ta’ awdituri, ta’ kontabilisti esterni u ta’ konsulenti tat-taxxa li, f’xi Stati Membri, għandhom id-dritt li jiddefendu jew jirrappreżentaw klijent fil-kuntest ta’ proċedimenti legali jew li jaċċertaw il-pożizzjoni legali ta’ klijent, jenħtieġ li l-informazzjoni li huma jiksbu fit-twettiq ta’ dawk il-kompiti ma tkunx soġġetta għall-obbligi ta’ rapportar. Madankollu, jenħtieġ li l-istess eċċezzjonijiet li japplikaw għan-nutara u l-avukati japplikaw ukoll għal dawk il-professjonisti meta jaġixxu fl-eżerċizzju tad-dritt tad-difiża jew meta jaċċertaw il-pożizzjoni legali ta’ klijent.

(14)

Id-Direttiva (UE) 2018/843 kienet l-ewwel strument legali sabiex jiġu indirizzati r-riskji ta’ ħasil tal-flus u ta’ finanzjament tat-terroriżmu ppreżentati mill-kriptoassi fl-Unjoni. Estendiet il-kamp ta’ applikazzjoni tal-qafas AML/CFT għal żewġ tipi ta’ fornituri ta’ servizzi tal-kriptoassi: fornituri involuti f’servizzi ta’ skambju bejn muniti virtwali u muniti ta’ kors legali u fornituri ta’ kartieri ta’ kustodja. Minħabba l-iżviluppi teknoloġiċi rapidi u l-avvanz fl-istandards tal-FATF, huwa neċessarju li dak l-approċċ jiġi rrieżaminat. L-ewwel pass sabiex jitlesta u jiġi aġġornat il-qafas legali tal-Unjoni nkiseb permezz tar-Regolament (UE) 2023/1114 tal-Parlament Ewropew u tal-Kunsill (14), li stabbilixxa rekwiżiti għall-fornituri ta’ servizzi tal-kriptoassi li jkunu jixtiequ japplikaw għal awtorizzazzjoni sabiex jipprovdu s-servizzi tagħhom fis-suq intern. Introduċa wkoll definizzjoni tal-kriptoassi u ta’ fornituri ta’ servizz tal-kriptoassi li tkopri firxa usa’ ta’ attivitajiet. Barra minn hekk, ir-Regolament (UE) 2023/1113 estenda r-rekwiżiti ta’ traċċabilità għal trasferimenti ta’ kriptoassi mwettqa minn fornituri ta’ servizzi tal-kriptoassi koperti bir-Regolament (UE) 2023/1114, u emenda d-Direttiva (UE) 2015/849 sabiex teżiħi li l-Istati Membri jagħmlu dawk il- fornituri ta’ servizzi tal-kriptoassi entitajiet marbutin b’obbligu. Dawk il-fornituri ta’ servizzi tal-kriptoassi jenħtieġ li jkunu koperti wkoll minn dan ir-Regolament, sabiex jittaffa kwalunkwe riskju ta’ użu ħażin tal-kriptoassi għall-finijiet ta’ ħasil tal-flus jew ta’ finanzjament tat-terroriżmu.

(15)

Il-ħolqien ta’ swieq fi kriptoassi uniċi u mhux funġibbli għadu reċenti u ma rriżultax f’leġiżlazzjoni li tirregola l-funzjonament tagħhom. L-evoluzzjoni ta’ dawn is-swieq qed tiġi mmonitorjata u huwa importanti li ma tirriżultax f’riskji ġodda ta’ ħasil tal-flus u finanzjament tat-terroriżmu li ma jittaffewx kif xieraq. Sat-30 ta’ Diċembru 2024, il-Kummissjoni għandha tippreżenta rapport lill-Parlament Ewropew u lill-Kunsill dwar l-aħħar żviluppi fir-rigward tal-kriptoassi, inkluż valutazzjoni tal-iżvilupp tas-swieq fi kriptoassi uniċi u mhux funġibbli, it-trattament regolatorju xieraq ta’ tali kriptoassi, inkluż valutazzjoni tan-neċessità u l-fattibbiltà tar-regolamentazzjoni tal-fornituri ta’ servizzi relatati ma’ kriptoassi uniċi u mhux funġibbli. Jekk ikun xieraq, il-Kummissjoni għandha takkumpanja dak ir-rapport bi proposta leġiżlattiva.

(16)

Il-vulnerabbiltajiet tal-pjattaformi ta’ finanzjament kollettiv għar-riskji ta’ ħasil tal-flus u ta’ finanzjament tat-terroriżmu huma orizzontali u jaffettwaw is-suq intern kollu kemm hu. Sal-lum, tfaċċaw approċċi diverġenti madwar l-Istati Membri fir-rigward tal-maniġjar ta’ dawk ir-riskji. Filwaqt li r-Regolament (UE) 2020/1503 tal-Parlament Ewropew u tal-Kunsill (15) jarmonizza l-approċċ regolatorju għall-investiment kummerċjali u l-pjattaformi ta’ finanzjament kollettiv ibbażati fuq is-self madwar l-Unjoni u jintroduċi diversi salvagwardji biex jiġu indirizzati r-riskji potenzjali ta’ ħasil tal-flus u ta’ finanzjament tat-terroriżmu, bħad-diliġenza dovuta tal-pjattaformi ta’ finanzjament kollettiv fir-rigward tas-sidien tal-proġetti u fi ħdan il-proċeduri ta’ awtorizzazzjoni, in-nuqqas ta’ qafas legali armonizzat b’obbligi robusti tal-AML/CFT għall-pjattaformi ta’ finanzjament kollettiv joħloq lakuni u jdgħajjef is-salvagwardji tal-AML/CFT tal-Unjoni. Għalhekk, huwa neċessarju li jiġi żgurat li l-pjattaformi ta’ finanzjament kollettiv kollha, inkluż dawk li diġà huma liċenzjati skont ir-Regolament (UE) 2020/1503, huma soġġetti għal-leġiżlazzjoni tal-Unjoni dwar l-AML/CFT.

(17)

L-intermedjarji tal-finanzjament kollettiv, li joperaw pjattaforma diġitali sabiex iqabblu jew jiffaċilitaw it-tqabbil tal-finanzjaturi mas-sidien tal-proġetti bħal assoċjazzjonijiet jew individwi li jfittxu finanzjament, huma esposti għal riskji ta’ ħasil tal-flus u finanzjament tat-terroriżmu. L-impriżi li mhumiex liċenzjati skont ir-Regolament (UE) 2020/1503 bħalissa jew mhumiex regolati jew inkella huma soġġetti għal approċċi regolatorji diverġenti madwar l-Istati Membri, inkluż fir-rigward tar-regoli u tal-proċeduri sabiex jiġu indirizzati r-riskji ta’ ħasil tal-flus u ta’ finanzjament tat-terroriżmu. Għalhekk, jenħtieġ li tali intermedjarji jkunu soġġetti għall-obbligi ta’ dan ir-Regolament, b’mod partikolari biex tiġi evitata d-devjazzjoni ta’ fondi kif definit fl-Artikolu 4, il-punt (25), tad-Direttiva (UE) 2015/2366 jew ta’ kriptoassi miġbura għal finijiet illeċiti minn kriminali. Sabiex jittaffew tali riskji, dawk l-obbligi japplikaw għal firxa wiesgħa ta’ proġetti, inkluż, fost l-oħrajn, proġetti edukattivi jew kulturali u l-ġbir ta’ dawk il-fondi jew il-kriptoassi biex jiġu appoġġati kawżi aktar ġenerali, pereżempju fil-qasam umanitarju, jew biex jiġi organizzat jew iċċelebrat avveniment familjari jew soċjali.

(18)

Id-Direttiva (UE) 2015/849 kellha t-tir li ttaffi r-riskji ta’ ħasil tal-flus u ta’ finanzjament tat-terroriżmu kkawżati minn pagamenti kbar fi flus kontanti billi tinkludi persuni li jinnegozjaw f’oġġetti fost l-entitajiet marbutin b’obbligu meta jagħmlu jew jirċievu pagamenti fi flus kontanti ta’ aktar minn EUR 10 000, filwaqt li tippermetti lill-Istati Membri jintroduċu miżuri aktar stretti. Tali approċċ wera li ma huwiex effettiv fid-dawl tal-fehim u tal-applikazzjoni batuti tar-rekwiżiti dwar l-AML/CFT, tan-nuqqas ta’ superviżjoni u tan-numru limitat ta’ tranżazzjonijiet suspettużi rrapportati lill-Unità tal-Intelligence Finanzjarja (FIU). Sabiex jittaffew b’mod adegwat ir-riskji li jirriżultaw mill-użu ħażin ta’ somom kbar fi flus kontanti, jenħtieġ li jiġi stabbilit limitu għall-Unjoni kollha għal pagamenti kbar fi flus kontanti ta’ aktar minn EUR 10 000. B’konsegwenza ta’ dan, il-persuni li jinnegozjaw f’oġġetti ma għadhomx jeħtieġu li jkunu soġġetti għall-obbligi tal-AML/CFT, bl-eċċezzjoni ta’ persuni li jinnegozjaw f’metalli prezzjużi, ħaġar prezzjuż, oġġetti oħra ta’ valur għoli u oġġetti kulturali.

(19)

Xi kategoriji ta’ persuni li jinnegozjaw f’oġġetti huma partikolarment skoperti għar-riskji ta’ ħasil tal-flus u ta’ finanzjament tat-terroriżmu minħabba l-valur għoli tal-oġġetti li ħafna drabi jkunu żgħar u trasportabbli li jittrattaw. Għal dik ir-raġuni, jenħtieġ li l-persuni li jinnegozjaw f’metalli prezzjużi u ħaġar prezzjuż u oġġetti oħra ta’ valur għoli jkunu soġġetti għar-rekwiżiti tal-AML/CFT, fejn tali negozjar ikun attività professjonali regolari jew attività professjonali prinċipali.

(20)

Il-vetturi bil-mutur, l-inġenji tal-ilma u l-inġenji tal-ajru fis-segmenti ogħla tas-suq huma vulnerabbli għal riskji ta’ użu ħażin għall-ħasil tal-flus u l-finanzjament tat-terroriżmu minħabba l-valur għoli u t-trasportabbiltà tagħhom. Għalhekk, jenħtieġ li persuni li jinnegozjaw f’ tali oġġetti jkunu soġġetti għar-rekwiżiti tal-AML/CFT. In-natura trasportabbli ta’ dawk l-oġġetti hija partikolarment attraenti għall-finijiet tal-ħasil tal-flus u l-finanzjament tat-terroriżmu minħabba l-faċilità li biha tali oġġetti jistgħu jiġu trasportati lil hinn mill-fruntieri tal-Unjoni, u l-fatt li l-aċċess għall-informazzjoni dwar tali oġġetti meta jkunu rreġistrati f’pajjiżi terzi jista’ ma jkunx faċilment aċċessibbli għall-awtoritajiet kompetenti. Sabiex jittaffew ir-riskji li oġġetti ta’ valur għoli tal-Unjoni jistgħu jintużaw ħażin għal skopijiet kriminali u tiġi żgurata l-viżibbiltà fuq is-sjieda ta’ tali oġġetti, huwa meħtieġ li persuni li jinnegozjawf’ oġġetti ta’ valur għoli jintalbu jirrapportaw tranżazzjonijiet li jikkonċernaw il-bejgħ ta’ vetturi bil-mutur, inġenji tal-ilma u inġenji tal-ajru. L-istituzzjonijiet ta’ kreditu u l-istituzzjonijiet finanzjarji jipprovdu servizzi li huma essenzjali għall-konklużjoni tal-bejgħ jew it-trasferiment tas-sjieda ta’ tali oġġetti, u jenħtieġ li jkunu meħtieġa wkoll jirrapportaw dawk it-tranżazzjonijiet lill-FIU. Filwaqt li jenħtieġ li l-oġġetti maħsuba biss għat-twettiq ta’ attivitajiet kummerċjali ma jkunux soġġetti għal tali divulgazzjoni, jenħtieġ li l-bejgħ għall-użu privat u mhux kummerċjali ma jkunx limitat għal każijiet fejn il-klijent ikun persuna fiżika, iżda jenħtieġ li jkun relatat ukoll ma’ bejgħ lil entitajiet u arranġamenti ġuridiċi, b’mod partikolari fejn huma stabbiliti biex jamministraw il-ġid tas-sid benefiċjarju tagħhom

(21)

L-operaturi tal-migrazzjoni permezz ta’ investiment huma kumpaniji privati, korpi jew persuni li jaġixxu jew jinteraġixxu direttament mal-awtoritajiet nazzjonali kompetenti biex jagħtu drittjiet ta’ residenza f’isem ċittadini ta’ pajjiżi terzi jew li jipprovdu servizzi intermedjarji lil ċittadini ta’ pajjiżi terzi li jkunu qed ifittxu li jiksbu drittijiet ta’ residenza fi Stat Membru bi skambju għal kwalunkwe tip ta’ investiment, inkluż trasferimenti kapitali, xiri jew kiri ta’ proprjetà, investiment f’bonds tal-gvern, investiment f’entitajiet korporattivi, donazzjoni jew dotazzjoni ta’ attività li tikkontribwixxi għall-ġid pubbliku u kontribuzzjonijiet għall-baġit tal-istat. L-iskemi ta’ residenza għall-investituri jippreżentaw riskji u vulnerabbiltajiet fir-rigward tal-ħasil tal-flus, tal-korruzzjoni u tal-evażjoni tat-taxxa. Riskji bħal dawn huma aggravati mid-drittijiet transfruntiera assoċjati mar-residenza fi Stat Membru. Għalhekk, huwa neċessarju li l-operaturi tal-migrazzjoni permezz ta’ investiment ikunu soġġetti għal obbligi tal-AML/CFT. Jenħtieġ li r-Regolament ma japplikax għal skemi ta’ ċittadinanza għall-investituri, li jirriżultaw fil-kisba ta’ nazzjonalità bi skambju ma’ investiment bħal dawn, peress li skemi bħal dawn iridu jitqiesu li jxekklu l-istatus fundamentali taċ-ċittadinanza tal-Unjoni u l-kooperazzjoni sinċiera fost l-Istati Membri.

(22)

Filwaqt li l-kredituri għall-krediti ipotekarji u għall-konsumatur tipikament ikunu istituzzjonijiet ta’ kreditu jew istituzzjonijiet finanzjarji, hemm intermedjarji tal-kreditu għall-konsumatur u tal-kreditu ipotekarju li ma jikkwalifikawx bħala istituzzjonijiet ta’ kreditu jew istituzzjonijiet finanzjarji u li ma kinux soġġetti għar-rekwiżiti tal-AML/CFT fil-livell tal-Unjoni, iżda kienu soġġetti għal tali obbligi f’ċerti Stati Membri minħabba l-iskopertura tagħhom għar-riskji tal-ħasil tal-flus u tal-finanzjament tat-terroriżmu. Skont il-mudell tan-negozju tagħhom, dawn l-intermedjarji tal-kreditu għall-konsumatur u tal-kreditu ipotekarju u ipotekarji jistgħu jiġu skoperti għal riskji sinifikanti ta’ ħasil tal-flus u ta’ finanzjament tat-terroriżmu. Huwa importanti li jiġi żgurat li l-entitajiet li jwettqu attivitajiet simili li huma skoperti għal tali riskji jkunu koperti bir-rekwiżiti dwar l-AML/CFT, irrispettivament minn jekk jikkwalifikawx bħala istituzzjonijiet ta’ kreditu jew istituzzjonijiet finanzjarji. Għalhekk, huwa xieraq li jiġu inklużi intermedjarji tal-kreditu għall-konsumatur u tal-kreditu ipotekarju li ma humiex istituzzjonijiet ta’ kreditu jew istituzzjonijiet finanzjarji iżda li huma, bħala riżultat tal-attivitajiet tagħhom, skoperti għal riskji ta’ ħasil tal-flus u ta’ finanzjament tat-terroriżmu. F’ħafna każijiet, madankollu, l-intermedjarju tal-kreditu jkun qed jaġixxi f’isem l-istituzzjoni ta’ kreditu jew l-istituzzjoniji finanzjarja li tagħti u tipproċessa s-self. F’dawk il-każijiet, jenħtieġ li r-rekwiżiti tal-AML/CFT ma japplikawx għall-intermedjarji tal-kreditu għall-konsumatur u tal-kreditu ipotekarju,- iżda biss għall-istituzzjonijiet ta’ kreditu jew l-istituzzjonijiet finanzjarji.

(23)

Sabiex jiġi żgurat approċċ konsistenti, huwa neċessarju li jiġi ċċarat liema entitajiet fis-settur tal-investiment huma soġġetti għar-rekwiżiti dwar l-AML/CFT. Għalkemm l-impriżi ta’ investiment kollettiv diġà jaqgħu fi ħdan il-kamp ta’ applikazzjoni tad-Direttiva (UE) 2015/849, huwa neċessarju li t-terminoloġija rilevanti tiġi allinjata mal-leġiżlazzjoni attwali tal-Unjoni dwar il-fondi ta’ investiment, jiġifieri d-Direttivi 2009/65/KE (16) u 2011/61/UE (17) tal-Parlament Ewropew u tal-Kunsill Minħabba li l-fondi jistgħu jiġu kkostitwiti mingħajr personalità ġuridika, l-inklużjoni tal-maniġers tagħhom fil-kamp ta’ applikazzjoni ta’ dan ir-Regolament hija neċessarja wkoll. Jenħtieġ li r-rekwiżiti dwar l-AML/CFT japplikaw irrispettivament mill-forma li fiha l-unitajiet jew l-ishma f’fond isiru disponibbli għax-xiri fl-Unjoni, inkluż fejn l-unitajiet jew l-ishma jiġu offruti direttament jew indirettament lill-investituri stabbiliti fl-Unjoni jew jitqiegħdu ma’ tali investituri fuq l-inizjattiva tal-maniġer jew f’isem il-maniġer. Peress li kemm il-fondi kif ukoll il-maniġers ta’ fondi jaqgħu fl-ambitu tar-rekwiżiti tal-AML, huwa xieraq li jiġi ċċarat li jenħtieġ li tiġi evitata duplikazzjoni tal-isforzi. Għal dak l-għan, jenħtieġ li l-miżuri tal-AML/CFT meħuda fil-livell tal-fond u fil-livell tal-maniġer tiegħu ma jkunux l-istess, iżda jenħtieġ li jirriflettu l-allokazzjoni tal-kompiti bejn il-fond u l-maniġer tiegħu.

(24)

L-attivitajiet tal-klabbs tal-futbol professjonali u l-aġenti tal-futbol huma esposti għal riskji ta’ ħasil tal-flus u r-reati predikati tiegħu minħabba diversi fatturi inerenti għas-settur tal-futbol, bħall-popolarità globali tal-futbol, is-somom konsiderevoli, il-flussi tal-flus u l-interessi finanzjarji kbar involuti, il-prevalenza ta’ tranżazzjonijiet transfruntiera, u xi kultant strutturi ta’ sjieda opaki. Dawk il-fatturi kollha jesponu l-futbol għal abbuż possibbli mill-kriminali biex jilleġittimizzaw fondi illeċiti u b’hekk jagħmlu l-isport vulnerabbli għall-ħasil tal-flus u r-reati predikati tiegħu. Oqsma ewlenin ta’ riskju jinkludu, pereżempju, tranżazzjonijiet ma’ investituri u sponsors, inkluż dawk li jirreklamaw u t-trasferimenti ta’ plejers. Għalhekk, jenħtieġ li l-klabbs tal-futbol professjonali u l-aġenti tal-futbol jistabbilixxu miżuri robusti kontra l-ħasil tal-flus, inkluż it-twettiq tad-diliġenza dovuta fir-rigward tal-klijenti fuq l-investituri, l-isponsors, inkluż dawk li jirreklamaw, u sħab u kontropartijiet oħra li jagħmlu tranżazzjonijiet magħhom. Sabiex jiġi evitat kwalunkwe piż sproporzjonat fuq klabbs iżgħar li huma inqas esposti għal riskji ta’ użu ħażin kriminali, jenħtieġ li l-Istati Membri jkunu jistgħu, abbażi ta’ riskju aktar baxx ippruvat ta’ ħasil tal-flus, ir-reati predikati tiegħu u l-finanzjament tat-terroriżmu, jeżentaw ċerti klabbs tal-futbol professjonali mir-rekwiżiti ta’ dan ir-Regolament, kemm jekk b’mod sħiħ kif ukoll jekk parzjalment.

(25)

L-attivitajiet tal-klabbs tal-futbol professjonali li jikkompetu fl-ogħla diviżjonijiet tal-kampjonati tal-futbol nazzjonali tagħhom jagħmluhom aktar esposti għal riskji ogħla ta’ ħasil tal-flus u r-reati predikati tiegħu meta mqabbla ma’ klabbs tal-futbol li jipparteċipaw f’diviżjonijiet aktar baxxi. Pereżempju, il-klabbs tal-futbol tal-ogħla livell jinvolvu ruħhom fi tranżazzjonijiet finanzjarji aktar sostanzjali, bħal trasferimenti ta’ valur għoli ta’ plejers u ftehimiet ta’ sponsorizzazzjoni, jista’ jkollhom strutturi korporattivi aktar kumplessi b’diversi saffi ta’ sjieda u huma aktar probabbli li jinvolvu ruħhom fi tranżazzjonijiet transfruntiera. Dawk il-fatturi jagħmlu tali klabbs tal-ogħla livell aktar attraenti għall-kriminali u jipprovdu aktar opportunitajiet biex jinħbew fondi illeċiti. Għalhekk, jenħtieġ li l-Istati Membri jkunu jistgħu jeżentaw biss lill-klabbs tal-futbol professjonali li jipparteċipaw fl-ogħla diviżjoni f’każijiet ta’ riskju baxx ippruvat u dment tali klabbs ikollhom fatturat għal kull waħda mis-sentejn preċedenti ta’ inqas minn EUR 5 000 000 jew l-ekwivalenti f’ munita nazzjonali. . Madankollu, ir-riskju ta’ ħasil tal-flus mhuwiex iddeterminat biss mid-diviżjoni li fiha jikkompeti klabb tal-futbol. Il-klabbs ta’ diviżjoni aktar baxxa jistgħu jkunu esposti wkoll għal riskji sinifikanti ta’ ħasil tal-flus u r-reati predikati tiegħu. Għalhekk, jenħtieġ li l-Istati Membri jkunu jistgħu jeżentaw biss mir-rekwiżiti ta’ dan ir-Regolament il-klabbs tal-futbol f’diviżjonijiet aktar baxxi li huma assoċjati ma’ riskju baxx ippruvat ta’ ħasil tal-flus, ir-reati predikati tiegħu jew il-finanzjament tat-terroriżmu.

(26)

Dan ir-Regolament jarmonizza l-miżuri li għandhom jiġu stabbiliti għall-prevenzjoni tal-ħasil tal-flus, ir-reati predikati tiegħu u l-finanzjament tat-terroriżmu fil-livell tal-Unjoni. Fl-istess ħin, f’konformità mal-approċċ ibbażat fuq ir-riskju, jenħtieġ li l-Istati Membri jkunu jistgħu jimponu rekwiżiti addizzjonali f’każijiet limitati fejn jiffaċċjaw riskji speċifiċi. Sabiex jiġi żgurat li tali riskji jiġu mitigati b’mod adegwat, jenħtieġ li l-entitajiet marbutin b’obbligu li jkollhom l-uffiċċju prinċipali tagħhom li jinsabu fi Stat Membru ieħor japplikaw tali -rekwiżiti addizzjonali, kemm jekk joperaw f’dak l-Istat Membru l-ieħor permezz tal-libertà tal-istabbiliment kif ukoll jekk taħt il-libertà li jipprovdu servizzi, dment li jkollhom infrastruttura f’dak l-Istat Membru l-ieħor. Barra minn hekk, sabiex tiġi ċċarata r-relazzjoni bejn dawk il-libertajiet tas-suq intern, huwa importanti li jiġi ċċarat liema attivitajiet jammontaw għal stabbiliment.ü

(27)

B’mod konsistenti mal-ġurisprudenza tal-Qorti tal-Ġustizzja tal-Unjoni Ewropea, sakemm ma jkunx stipulat speċifikament fil-leġiżlazzjoni settorjali, stabbiliment ma għandux għalfejn jieħu l-forma ta’ sussidjarja, fergħa jew aġenzija, iżda jista’ jikkonsisti f’uffiċċju ġestit mill-persunal tal-entità marbuta b’obbligu stess jew minn persuna li tkun indipendenti iżda awtorizzata li taġixxi fuq bażi permanenti għall-entità marbuta b’obbligu. Skont dik id-definizzjoni li titlob it-twettiq attwali ta’ attività ekonomika fil-post ta’ stabbiliment ta’ fornitur ta’ servizz, sempliċi kaxxa postali ma tikkostitwixxix stabbiliment. Bl-istess mod, uffiċċji jew infrastruttura oħra użata għal attivitajiet ta’ appoġġ, bħal sempliċi operazzjonijiet tal-back office, ċentri tal-IT jew ċentri tad-data operati minn entitajiet marbutin b’obbligu, ma jikkostitwixxux stabbiliment. Min-naħa l-oħra, attivitajiet bħall-forniment ta’ servizzi tal-kriptoassi permezz tal-ATMs jikkostitwixxu stabbiliment li jqis it-tagħmir fiżiku limitat meħtieġ għall-operaturi li prinċipalment jagħtu servizz lill-klijenti tagħhom permezz tal-internet kif inhu l-każ għall-fornituri ta’ servizzi tal-kriptoassi.

(28)

Huwa importanti li r-rekwiżiti dwar l-AML/CFT japplikaw b’mod proporzjonat u li l-impożizzjoni ta’ kwalunkwe rekwiżit tkun proporzjonata għar-rwol li l-entitajiet marbutin b’obbligu jista’ jkunu kapaċi fil-prevenzjoni tal-ħasil tal-flus u tal-finanzjament tat-terroriżmu. Għal dak il-għan, jenħtieġ li jkun possibbli għall-Istati Membri f’konformità mal-approċċ ibbażat fuq ir-riskju ta’ dan ir-Regolament li jeżentaw ċerti operaturi mir-rekwiżiti dwar l-AML/CFT, fejn l-attivitajiet li jwettqu jippreżentaw riskji baxxi ta’ ħasil tal-flus u ta’ finanzjament tat-terroriżmu u fejn l-attivitajiet ikunu limitati fin-natura tagħhom. Sabiex tiġi żgurata applikazzjoni trasparenti u konsistenti ta’ tali eżenzjonijiet madwar l-Unjoni kollha, jenħtieġ li jiġi stabbilit mekkaniżmu li jippermetti lill-Kummissjoni tivverifika n-neċessità li jingħataw l-eżenzjonijiet. Jenħtieġ li l-Kummissjoni tippubblika wkoll tali eżenzjonijiet fuq bażi annwali f’Il-Ġurnal Uffiċjali tal-Unjoni Ewropea.

(29)

Sett konsistenti ta’ regoli dwar is-sistemi u l-kontrolli interni li japplikaw għall-entitajiet kollha marbutin b’obbligu li joperaw fis-suq intern isaħħaħ il-konformità mal-AML/CFT u jagħmel is-superviżjoni aktar effettiva. Sabiex tiġi żgurata mitigazzjoni adegwata tar-riskji ta’ ħasil tal-flus u ta’ finanzjament tat-terroriżmu, kif ukoll tar-riskji ta’ nuqqas ta’ implimentazzjoni jew ta’ evażjoni ta’ sanzjonijiet finanzjarji mmirati, jenħtieġ li l-entitajiet marbutin b’obbligu jkollhom fis-seħħ qafas ta’ kontroll intern li jikkonsisti f’politiki, fi proċeduri u kontrolli bbażati fuq ir-riskju u f’diviżjoni ċara tar-responsabbiltajiet fi ħdan l-organizzazzjoni. F’konformità mal-approċċ ibbażat fuq ir-riskju ta’ dan ir-Regolament, jenħtieġ li dawk il-politiki, il-proċeduri u l-kontrolli jkunu proporzjonati għan-natura tan-negozju, inkluż ir-riskji u l-kumplessità tiegħu, u d-daqs tal-entità marbuta b’obbligu u jirrispondu għar-riskji tal-ħasil tal-flus u tal-finanzjament tat-terroriżmu li l-entità tiffaċċa, inkluż, għall-fornituri ta’ servizzi tal-kriptoassi, tranżazzjonijiet b’kartieri awtoospitati.

(30)

Approċċ xieraq ibbażat fuq ir-riskju jeħtieġ li l-entitajiet marbutin b’obbligu jidentifikaw ir-riskji inerenti ta’ ħasil tal-flus u ta’ finanzjament tat-terroriżmu kif ukoll ir-riskji ta’ nuqqas ta’ implimentazzjoni jew ta’ evażjoni ta’ sanzjonijiet finanzjarji mmirati li jiffaċċjaw minħabba n-negozju tagħhom sabiex inaqqsuhom b’mod effettiv u sabiex jiżguraw li l-politiki, il-proċeduri u l-kontrolli interni tagħhom ikunu xierqa sabiex jindirizzaw dawk ir-riskji inerenti. Meta jagħmlu dan, jenħtieġ li l-entitajiet marbutin b’obbligu jqisu l-karatteristiċi tal-klijenti tagħhom, il-prodotti, is-servizzi jew it-tranżazzjonijiet offruti, inkluż għal fornituri ta’ servizzi tal-kriptoassi, tranżazzjonijiet b’indirizzi awtoospitati, il-pajjiżi jew iż-żoni ġeografiċi kkonċernati u l-kanali ta’ distribuzzjoni użati. Fid-dawl tan-natura li qed tevolvi tar-riskji, jenħtieġ li tali valutazzjoni tar-riskju tiġi aġġornata regolarment.

(31)

Bil-ħsieb li jiġi appoġġat approċċ konsistenti u effettiv għall-identifikazzjoni tar-riskji li jaffettwaw in-negozji tagħhom mill-entitajiet marbutin b’obbligu, jenħtieġ li l-AMLA toħroġ linji gwida dwar ir-rekwiżiti minimi għall-kontenut tal-valutazzjoni tar-riskju fil-livell tan-negozju kollu u sorsi addizzjonali ta’ informazzjoni li għandhom jitqiesu. Dawk is-sorsi jistgħu jinkludu informazzjoni minn dawk li jistabbilixxu l-istandards internazzjonali fil-qasam tal-AML/CFT, bħar-rapporti ta’ evalwazzjoni reċiproka tal-FATF, u sorsi kredibbli u affidabbli oħra li jipprovdu informazzjoni dwar tipoloġiji, riskji emerġenti u attività kriminali, inkluż il-korruzzjoni, bħal rapporti minn organizzazzjonijiet tas-soċjetà ċivili, il-media u d-dinja akkademika.

(32)

Huwa xieraq li jiġu kkunsidrati l-karatteristiċi u l-ħtiġijiet ta’ entitajiet iżgħar marbutin b’obbligu, u li jiġi żgurat trattament li jkun xieraq għall-ħtiġijiet speċifiċi tagħhom, u għan-natura tan-negozju. Dak jista’ jinkludi l-eżenzjoni ta’ ċerti entitajiet marbutin b’obbligu mit-twettiq ta’ valutazzjoni tar-riskju meta r-riskji involuti fis-settur li fih topera l-entità jkunu mifhumin sew.

(33)

L-FATF żviluppat standards għall-ġuriżdizzjonijiet sabiex jidentifikaw, u jivvalutaw ir-riskji ta’ nuqqas ta’ implimentazzjoni jew ta’ evażjoni potenzjali tas-sanzjonijiet finanzjarji mmirati relatati mal-finanzjament tal-proliferazzjoni, u sabiex jieħdu azzjoni bl-għan li jimmitigaw dawk ir-riskji. Dawk l-istandards il-ġodda introdotti mill-FATF ma jissostitwixxux u lanqas ma jxekklu r-rekwiżiti stretti eżistenti għall-pajjiżi sabiex jimplimentaw sanzjonijiet finanzjarji mmirati bl-għan li jikkonformaw mar-riżoluzzjonijiet rilevanti tal-Kunsill tas-Sigurtà tan-Nazzjonijiet Uniti (“KSNU”) relatati mal-prevenzjoni, mas-soppressjoni u mat-tfixkil tal-proliferazzjoni ta’ armi ta’ qerda massiva u l-finanzjament tagħhom. Dawk l-obbligi eżistenti, kif implimentati fil-livell tal-Unjoni bid-Deċiżjonijiet tal-Kunsill 2010/413/PESK (18) u (PESK) 2016/849 (19) kif ukoll bir-Regolamenti tal-Kunsill (UE) Nru 267/2012 (20) u (UE) 2017/1509 (21), għadhom jorbtu lill-persuni fiżiċi u ġuridiċi kollha fl-Unjoni. Minħabba r-riskji speċifiċi ta’ nuqqas ta’ implimentazzjoni u ta’ evażjoni ta’ sanzjonijiet finanzjarji mmirati li għalihom hija esposta l-Unjoni, huwa xieraq li l-valutazzjoni tar-riskji tiġi estiża biex tinkludi s-sanzjonijiet finanzjarji mmirati kollha adottati fil-livell tal-Unjoni. In-natura sensittiva għar-riskju tal-miżuri AML/CFT relatati ma’ sanzjonijiet finanzjarji mmirati ma tneħħix l-obbligu bbażat fiq ir-regoli li jaqa’ fuq il-persuni fiżiċi jew ġuridiċi kollha fl-Unjoni li jiffriżaw u li ma jagħmlux fondi jew assi oħra disponibbli, direttament jew indirettament, għal persuni jew entitajiet deżinjati

(34)

Sabiex jiġi żgurat li r-riskji ta’ nuqqas ta’ implimentazzjoni jew ta’ evażjoni ta’ sanzjonijiet finanzjarji mmirati jiġu mitigati b’mod xieraq, huwa importanti li jiġu stipulati miżuri li l-entitajiet marbutin b’obbligu huma meħtieġa jimplimentaw, inkluż miżuri biex tiġi vverifikata l-bażi tal-klijenti tagħhom kontra l-listi ta’ persuni jew entitajiet deżinjati taħt sanzjonijiet finanzjarji mmirati. Ir-rekwiżiti li jaqgħu fuq l-entitajiet marbutin b’obbligu skont dan ir-Regolament ma jneħħux l-obbligu bba#at fuq ir-regoli li jiġu ffriżati u li ma jagħmlux fondi u assi oħra disponibbli, direttament jew indirettament, għal individwi jew entitajiet soġġetti għal sanzjonijiet finanzjarji mmirati li japplikaw għall-persuni fiżiċi jew ġuridiċi kollha fl-Unjoni. Barra minn hekk, ir-rekwiżiti ta’ dan ir-Regolament mhumiex maħsuba biex jissostitwixxu l-obbligi rigward l-iskrinjar tal-klijenti għall-implimentazzjoni ta’ sanzjonijiet finanzjarji mmirati skont atti ġuridiċi oħra tal-Unjoni jew skont id-dritt nazzjonali.

(35)

Sabiex jiġu riflessi l-aħħar żviluppi fil-livell internazzjonali, permezz ta’ dan ir-Regolament għandu jiġi introdott rekwiżit sabiex jiġu identifikati, jinftiehmu, jiġu maniġati u mmitigati r-riskji ta’ nuqqas potenzjali ta’ implimentazzjoni jew ta’ evażjoni ta’ sanzjonijiet finanzjarji mmirati fil-livell tal-entitajiet marbutin b’obbligu.

(36)

L-elenkar jew id-deżinjazzjonijiet ta’ individwi jew entitajiet millKSNU jew mill-Kumitat tan-NU tas-Sanzjonijiet huma integrati fid-dritt tal-Unjoni permezz ta’ deċiżjonijiet u regolamenti adottati skont l-Artikolu 29 tat-Trattat dwar l-Unjoni Ewropea (TUE) u l-Artikolu 215 tat-Trattat dwar il-Funzjonament tal-Unjoni Ewropea (TFUE) rispettivament li jimponu sanzjonijiet finanzjarji mmirati fuq tali individwi u l-entitajiet. Il-proċess għall-adozzjoni ta’ tali atti fil-livell tal-Unjoni jirrikjedi verifika tal-konformità ta’ kwalunkwe deżinjazzjoni jew elenkar mad-drittijiet fundamentali mogħtija skont il-Karta. Bejn il-mument tal-pubblikazzjoni min-NU u l-mument tad-dħul fis-seħħ tal-atti tal-Unjoni li jittrasponu l-listi jew id-deżinjazzjonijiet tan-NU, sabiex tkun tista’ ssir l-applikazzjoni effettiva ta’ sanzjonijiet finanzjarji mmirati, jenħtieġ li l-entitajiet marbutin b’obbligu jżommu rekords tal-fondi jew assi oħra li jkollhom għall-klijenti elenkati jew deżinjati skont is-sanzjonijiet finanzjarji tan-NU, jew għall-klijenti li huma proprjetà ta’ individwi jew entitajiet elenkati jew deżinjati jew ikkontrollati minnhom, ta’ kwalunkwe tentattiv ta’ tranżazzjoni u ta’ tranżazzjonijiet imwettqa għall-klijent, bħal pereżempju għall-issodisfar tal-ħtiġijiet bażiċi tal-klijent.

(37)

Fil-valutazzjoni ta’ jekk klijent li huwa entità ġuridika huwiex proprjetà ta’ jew ikkontrollat minn individwi deżinjati taħt sanzjonijiet finanzjarji mmirati, jenħtieġ li l-entitajiet marbutin b’obbligu jqisu l-Linji Gwida tal-Kunsill dwar l-implimentazzjoni u l-evalwazzjoni ta’ miżuri restrittivi (sanzjonijiet) fil-qafas tal-politika estera u ta’ sigurtà komuni u l-Aħjar Prattiki tal-Unjoni għall-implimentazzjoni effettiva ta’ miżuri restrittivi.

(38)

Huwa importanti li l-entitajiet marbutin b’obbligu jieħdu l-miżuri kollha fil-livell tal-maniġment tagħhom sabiex jimplimentaw politiki, il-proċeduri u l-kontrolli interni u jimplimentaw rekwiżiti dwar l-AML/CFT. Filwaqt li jenħtieġ li membru tal-korp maniġerjali jiġi identifikat bħala responsabbli għall-implimentazzjoni tal-politiki, tal-proċeduri u tal-kontrolli interni tal-entità marbuta b’obbligu, jenħtieġ li r-responsabbiltà għall-konformità mar-rekwiżiti dwar l-AML/CFT fl-aħħar mill-aħħar tibqa’ tal-korp maniġerjali tal-entità. Jenħtieġ li dik l-attribuzzjoni ta’ responsabbiltà tkun mingħajr preġudizzju għad-dispożizzjonijiet nazzjonali dwar ir-responsabbiltà ċivili jew kriminali konġunta tal-korpi maniġerjali. Jenħtieġ li l-kompiti li jappartjenu għall-implimentazzjoni ta’ kuljum tal-politiki, tal-proċeduri u tal-kontrolli interni tal-AML/CFT tal-entità marbuta b’obbligu jiġu fdati lill-uffiċjal tal-konformità.

(39)

Għandu jkun possibbli għali kull Stat Membru li’ jistabbilixxi fid-dritt nazzjonali tiegħu li entità marbuta b’obbligu soġġetta għal regoli prudenzjali li jirrikjedu l-ħatra ta’ uffiċjal għall-konformità jew ta’ kap tal-funzjoni tal-awditjar intern tista’ tafda lil dawk il-persuni bil-funzjonijiet u r-responsabbiltajiet ta’ uffiċjal għall-konformità tal-AML/CFT u l-funzjoni tal-awditjar intern għall-finijiet tal-AML/CFT. F’każijiet ta’ riskji ogħla, jew meta jkun iġġustifikat minħabba d-daqs tal-entità marbuta b’obbligu, għandu jkun possibbli li r-responsabbiltajiet tal-kontrolli tal-konformità u tal-operat ta’ kuljum tal-politiki u l-proċeduri tal-AML/CFT tal-entità marbuta b’obbligu jiġuj fdati lil żewġ persuni differenti.

(40)

Għall-implimentazzjoni effettiva tal-miżuri tal-AML/CFT, huwa vitali wkoll li l-impjegati tal-entitajiet marbutin b’obbligu, kif ukoll l-aġenti u d-distributuri tagħhom, li jkollhom rwol f’dik l-implimentazzjoni jifhmu r-rekwiżiti u l-politiki, il-proċeduri u l-kontrolli interni fis-seħħ fl-entità. Jenħtieġ li l-entitajiet marbutin b’obbligu jistabbilixxu miżuri, inkluż programmi ta’ taħriġ, għal dan l-għan. Fejn meħtieġ, jenħtieġ li l-entitajiet marbutin b’obbligu jipprovdu taħriġ bażiku dwar il-miżuri tal-AML/CFT lil dawk kollha li għandhom rwol fl-implimentazzjoni ta’ tali miżuri. Dan jinkludi mhux biss l-impjegati ta’ entitajiet marbutin b’obbligu iżda wkoll l-aġenti u d-distributuri tagħhom.

(41)

Jenħtieġ li l-individwi fdati b’kompiti relatati mal-konformità ta’ entità marbuta b’obbligu mar-rekwiżiti dwar l-AML/CFT jgħaddu minn valutazzjoni tal-ħiliet, tal-għarfien, tal-għarfien espert, tal-integrità u tal-kondotta tagħhom. It-twettiq mill-impjegati ta’ kompiti relatati mal-konformità tal-entità marbuta b’obbligu mal-qafas AML/CFT fir-rigward tal-klijenti li magħhom ikollhom relazzjoni privata jew professjonali mill-qrib jista’ jwassal għal kunflitti ta’ interess u jxekkel l-integrità tas-sistema. Tali relazzjonijiet jistgħu jeżistu fiż-żmien tal-istabbiliment tar-relazzjoni tan-negozju iżda jistgħu jirriżultaw ukoll wara dan. Għalhekk, jenħtieġ li l-entitajiet marbutin b’obbligu jkollhom fis-seħħ proċessi biex jimmaniġġjaw u jindirizzaw il-kunflitti ta’ interess. Jenħtieġ li dawk il-proċessi jiżguraw li l-impjegati ma jitħallewx iwettqu kwalunkwe kompitu relatat mal-konformità tal-entità marbuta b’obbligu mal-qafas AML/CFT fir-rigward ta’ tali klijenti.

(42)

Jista’ jkun hemm sitwazzjonijiet fejn individwi li jikkwalifikaw bħala entitajiet marbutin b’obbligu jipprovdu s-servizzi tagħhom internament lil negozji li l-attivitajiet tagħhom ma jaqgħux fil-kamp ta’ applikazzjoni ta’ dan ir-Regolament. Peress li dawn in-negozji ma jaġixxux bħala gwardjani tas-sistema finanzjarja tal-Unjoni, huwa importanti li jiġi ċċarat li tali impjegati, per eżempju avukati interni, mhumiex koperti mir-rekwiżiti ta’ dan ir-Regolament. Bl-istess mod, jenħtieġ li l-individwi li jwettqu attivitajiet li jaqgħu fil-kamp ta’ applikazzjoni ta’ dan ir-Regolament ma jitqisux bħala entitajiet marbutin b’obbligu fihom infushom fejn dawk l-attivitajiet jitwettqu fil-kuntest tal-impjieg tagħhom ma’ entità marbuta b’obbligu, pereżempju fil-każ ta’ avukati jew kontabilisti impjegati ma’ ditta legali jew kontabilistika.

(43)

L-implimentazzjoni konsistenti tal-politiki u tal-proċeduri dwar l-AML/CFT fil-grupp kollu hija kruċjali għall-ġestjoni robusta u effettiva tar-riskji ta’ ħasil tal-flus u ta’ finanzjament tat-terroriżmu fi ħdan grupp. Għal dak l-għan, jenħtieġ li jiġu adottati u implimentati politiki, proċeduri u kontrolli għall-grupp kollu mill-impriża omm. Jenħtieġ li l-entitajiet fi ħdan grupp ikunu meħtieġa jiskambjaw informazzjoni fejn tali kondiviżjoni tkun rilevanti għall-prevenzjoni tal-ħasil tal-flus u tal-finanzjament tat-terroriżmu. Jenħtieġ li l-kondiviżjoni ta’ informazzjoni tkun soġġetta għal garanziji suffiċjenti f’termini ta’ kunfidenzjalità, ta’ protezzjoni tad-data u ta’ użu tal-informazzjoni. Jenħtieġ li l-AMLA jkollha l-kompitu li tfassal abbozzi ta’ standards regolatorji li jispeċifikaw ir-rekwiżiti minimi ta’ proċeduri u ta’ politiki għall-grupp kollu, inkluż standards minimi għall-kondiviżjoni ta’ informazzjoni fi ħdan grupp u l-kriterji għall-identifikazzjoni tal-impriżi omm għal gruppi li l-uffiċċju prinċipali tagħhom ikun jinsab barra mill-Unjoni.

(44)

Sabiex tiġi żgurata l-applikazzjoni effettiva tar-rekwiżiti tal-AML/CFT fejn diversi entitajiet marbutin b’obbligu huma direttament jew indirettament marbuta ma’ xulxin u li jikkostitwixxu, jew huma parti minn, grupp ta’ entitajiet, huwa meħtieġ li tiġi kkunsidrata l-aktar definizzjoni wiesgħa possibbli ta’ grupp. Għal dak l-għan, jenħtieġ li l-entitajiet marbutin b’obbligu jsegwu r-regoli kontabilistiċi applikabbli, li jippermettu li strutturi b’diversi tipi ta’ rabtiet ekonomiċi jitqiesu bħala gruppi. Filwaqt li grupp tradizzjonali jinkludi impriża omm u s-sussidjarji tagħha, tipi oħra ta’ strutturi ta’ grupp huma ugwalment rilevanti, pereżempju strutturi ta’ gruppi ta’ diversi entitajiet omm li jkollhom sussidjarja waħda, li jkunu msemmija bħala entitajiet affiljati b’mod permanenti ma’ korp ċentrali -Artikolu 10 tar-Regolament (UE) Nru 575/2013 tal-Parlament Ewropew u tal-Kunsill (22), jew istituzzjonijiet finanzjarji li huma membri tal-istess skema ta’ protezzjoni istituzzjonali msemmija fl-Artikolu 113(7) ta’ dak ir-Regolament. Dawk l-istrutturi huma kollha gruppi f’konformità mar-regoli tal-kontabilità u għalhekk jenħtieġ li jitqiesu bħala gruppi għall-finijiet ta’ dan ir-Regolament.

(45)

Minbarra l-gruppi, jeżistu strutturi oħrajn, bħal networks jew sħubijiet, li fihom l-entitajiet marbutin b’obbligu jistgħu jikkondividu l-kontrolli komuni tas-sjieda, tal-ġestjoni u tal-konformità. Sabiex jiġu żgurati kundizzjonijiet ekwi fis-setturi kollha filwaqt li jiġi evitat piż żejjed fuq dawk is-setturi, jenħtieġ li l-AMLA tidentifika dawk is-sitwazzjonijiet li fihom għandhom japplikaw politiki simili għall-grupp kollu għal dawk l-istrutturi, b’kont meħud tal-prinċipji tal-proporzjonalità.

(46)

Hemm ċirkostanzi li fihom il-fergħat u s-sussidjarji tal-entitajiet marbutin b’obbligu jkunu jinsabu f’pajjiżi terzi fejn ir-rekwiżiti minimi dwar l-AML/CFT, inkluż l-obbligi dwar il-protezzjoni tad-data, ikunu anqas stretti mill-qafas AML/CFT tal-Unjoni. F’sitwazzjonijiet bħal dawn, u sabiex jiġi evitat bis-sħiħ l-użu tas-sistema finanzjarja tal-Unjoni għall-finijiet ta’ ħasil tal-flus u ta’ finanzjament tat-terroriżmu u sabiex jiġi żgurat l-ogħla standard ta’ protezzjoni għad-data personali taċ-ċittadini tal-Unjoni, jenħtieġ li dawk il-fergħat u s-sussidjarji jikkonformaw mar-rekwiżiti dwar l-AML/CFT stabbiliti fil-livell tal-Unjoni. Meta l-liġi ta’ pajjiż terz ma tippermettix konformità ma’ dawk ir-rekwiżiti, pereżempju minħabba limitazzjonijiet għall-kapaċità tal-grupp li jaċċessa, jipproċessa jew jiskambja informazzjoni minħabba livell insuffiċjenti ta’ protezzjoni tad-data jew liġi dwar is-sigriet bankarju f’ dak il-pajjiż terz, jenħtieġ li l-entitajiet marbutin b’obbligu jieħdu miżuri addizzjonali sabiex jiżguraw li l-fergħat u s-sussidjarji li jkunu jinsabu f’dak il-pajjiż jittrattaw ir-riskji b’mod effettiv. Jenħtieġ li l-AMLA tingħata l-kompitu li tiżviluppa abbozzi ta’ standards tekniċi regolatorji li jispeċifikaw it-tip ta’ tali miżuri addizzjonali, b’kont meħud tal-prinċipju tal-proporzjonalità.

(47)

L-entitajiet marbutin b’obbligu jistgħu jesternalizzaw kompiti relatati mat-twettiq ta’ ċerti rekwiżiti tal-AML/CFT lil fornitur ta’ servizzi. Fil-każ ta’ relazzjonijiet ta’ esternalizzazzjoni fuq bażi kontrattwali bejn entitajiet marbutin b’obbligu u fornituri ta’ servizzi mhux koperti mir-rekwiżiti dwar l-AML/CFT, kwalunkwe obbligu tal-AML/CFT fuq dawk il-fornituri ta’ servizz jista’ jirriżulta biss mill-kuntratt bejn il-partijiet u mhux minn dan ir-Regolament. Għalhekk, jenħtieġ li r-responsabbiltà għall-konformità mar-rekwiżiti dwar l-AML/CFT tibqa’ kompletament mal-entità marbuta b’obbligu. Jenħtieġ li l-entità marbuta b’obbligu tiżgura b’mod partikolari li, meta fornitur ta’ servizzi ikun involut għall-finijiet ta’ identifikazzjoni mill-bogħod tal-klijent, jiġi rrispettat l-approċċ ibbażat fuq ir-riskju. Proċessi jew arranġamenti li jikkontribwixxu għat-twettiq ta’ rekwiżit skont dan ir-Regolament, iżda fejn it-twettiq tar-rekwiżit innifsu ma jitwettaqx minn fornitur ta’ servizzi, bħall-użu jew l-akkwist ta’ software ta’ parti terza jew l-aċċess għal bażijiet ta’ data jew servizzi ta’ skrinjar mill-entità marbuta b’obbligu, ma jitqisux bħala esternalizzazzjoni.

(48)

Il-possibbiltà li l-kompiti jiġu esternalizzati lil fornitur ta’ servizzi tippermetti lill-entitajiet marbutin b’obbligu jiddeċiedu dwar kif jallokaw ir-riżorsi tagħhom biex jikkonformaw ma’ dan ir-Regolament, iżda ma teħlishomx mill-obbligu tagħhom li jifhmu jekk il-miżuri li jieħdu, inkluż dawk esternalizzati lill-fornituri ta’ servizzi, itaffux ir-riskji ta’ ħasil tal-flus u ta’ finanzjament tat-terroriżmu identifikati u jekk tali miżuri humiex xierqa. Sabiex jiġi żgurat li tali fehim ikun fis-seħħ, jenħtieġ li d-deċiżjonijiet finali dwar miżuri li għandhom effett fuq l-implimentazzjoni tal-politiki, tal-proċeduri u tal-kontrolli dejjem ikunu tal-entità marbuta b’obbligu.

(49)

In-notifika tal-arranġamenti ta’ esternalizzazzjoni lis-superviżur ma timplikax aċċettazzjoni tal-arranġament ta’ esternalizzazzjoni. L-informazzjoni li tinsab f’dik in-notifika, b’mod partikolari meta l-funzjonijiet kritiċi jiġu esternalizzati jew meta l-entità marbuta b’obbligu sistematikament testernalizza l-funzjonijiet tagħha, tista’ madankollu titqies mis-superviżuri meta jivvalutaw is-sistemi u l-kontrolli tal-entità marbuta b’obbligu, u meta jiddeterminaw il-profil tar-riskju residwu jew bi tħejjija għall-ispezzjonijiet.

(50)

Sabiex ir-relazzjonijiet ta’ esternalizzazzjoni jiffunzjonaw b’mod effiċjenti, hija meħtieġa aktar ċarezza dwar il-kundizzjonijiet li skont dawn isseħħ l-esternalizzazzjoni. Jenħtieġ li l-AMLA jkollha l-kompitu li tiżviluppa linji gwida dwar il-kundizzjonijiet li fihom tista’ sseħħ l-esternalizzazzjoni, kif ukoll ir-rwoli u r-responsabbiltajiet tal-partijiet rispettivi. Sabiex jiġi aċċertat li tiġi żgurata sorveljanza konsistenti tal-prattiki ta’ esternalizzazzjoni fl-Unjoni kollha, jenħtieġ li l-linji gwida jipprovdu wkoll ċarezza dwar kif is-superviżuri għandhom iqisu tali prattiki u jivverifikaw il-konformità mar-rekwiżiti dwar l-AML/CFT meta l-entitajiet marbutin b’obbligu jirrikorru għal dawk il-prattiki.

(51)

Ir-rekwiżiti dwar id-diliġenza dovuta fir-rigward tal-klijenti huma essenzjali sabiex jiġi żgurat li l-entitajiet marbutin b’obbligu jidentifikaw, jivverifikaw u jimmonitorjaw ir-relazzjonijiet tan-negozju tagħhom mal-klijenti tagħhom, fir-rigward tar-riskji ta’ ħasil tal-flus u ta’ finanzjament tat-terroriżmu li joħolqu. L-identifikazzjoni u l-verifika preċiżi tad-data tal-klijenti prospettivi u eżistenti huma essenzjali sabiex jinftiehmu r-riskji ta’ ħasil tal-flus u ta’ finanzjament tat-terroriżmu assoċjati mal-klijenti, kemm jekk ikunu persuni fiżiċi kif ukoll jekk ikunu persuni ġuridiċi. Jenħtieġ li l-entitajiet marbutin b’obbligu jifhmu wkoll li f’ismu jew għall-benefiċċju ta’ min titwettaq tranżazzjoni, pereżempju f’sitwazzjonijiet fejn l-istituzzjonijiet ta’ kreditu jew l-istituzzjonijiet finanzjarji jipprovdu kontijiet lil professjonisti legali għall-finijiet li jirċievu jew iżommu l-fondi tal-klijent tagħhom kif definit fl-Artikolu 4, il-punt (25), tad-Direttiva (UE) 2015/2366. Fil-kuntest tad-diliġenza dovuta fir-rigward tal-klijenti, il-persuna li għall-benefiċċju tagħha titwettaq tranżazzjoni jew attività ma tirreferix għar-riċevitur jew il-benefiċjarju ta’ tranżazzjoni mwettqa mill-entità marbuta b’obbligu għall-klijent tagħhom.

(52)

Huwa neċessarju li jinkiseb standard uniformi u għoli ta’ diliġenza dovuta fir-rigward tal-klijenti fl-Unjoni, li jiddependi fuq rekwiżiti armonizzati għall-identifikazzjoni tal-klijenti u għall-verifika tal-identità tagħhom, u jnaqqas id-diverġenzi nazzjonali sabiex ikun hemm kundizzjonijiet ekwi fis-suq intern kollu u applikazzjoni konsistenti tad-dispożizzjonijiet madwar l-Unjoni kollha. Fl-istess ħin, huwa essenzjali li l-entitajiet marbutin b’obbligu japplikaw miżuri dwar id-diliġenza dovuta fir-rigward tal-klijenti b’mod ibbażat fuq ir-riskju. L-approċċ ibbażat fuq ir-riskju ma huwiex għażla permissiva bla bżonn għall-entitajiet marbutin b’obbligu. Jinvolvi l-użu tat-teħid ta’ deċiżjonijiet fuq il-bażi ta’ evidenza sabiex jiġu mmirati b’mod aktar effettiv ir-riskji ta’ ħasil tal-flus u ta’ finanzjament tat-terroriżmu li jiffaċċjaw l-Unjoni u dawk li joperaw fiha.

(53)

L-organizzazzjonijiet tas-soċjetà ċivili li jwettqu ħidma ta’ karità jew umanitarja f’pajjiżi terzi jikkontribwixxu għall-għanijiet tal-Unjoni li jinkisbu l-paċi, l-istabbiltà, id-demokrazija u l-prosperità. L-istituzzjonijiet ta’ kreditu u l-istituzzjonijiet finanzjarji għandhom rwol importanti fl-iżgurar li tali organizzazzjonijiet jistgħu jkomplu jwettqu xogħolhom, billi jipprovdu aċċess għas-sistema finanzjarja u servizzi finanzjarji importanti li jippermettu li l-finanzjament għall-iżvilupp u dak umanitarju jiġu diretti lejn żoni li qed jiżviluppaw jew f’żoni ta’ kunflitt. Filwaqt li jenħtieġ li l-entitajiet marbutin b’obbligu jkunu konxji li l-attivitajiet imwettqa f’ċerti ġuriżdizzjonijiet jesponuhom għal riskju ogħla ta’ ħasil tal-flus jew finanzjament tat-terroriżmu, jenħtieġ li l-operazzjoni tal-organizzazzjonijiet tas-soċjetà ċivili f’dawk il-ġuriżdizzjonijiet, waħedhom, ma jirriżultawx fir-rifjut li jiġu pprovduti servizzi finanzjarji jew fit-terminazzjoni ta’ tali servizzi, peress li l-approċċ ibbażat fuq ir-riskju jirrikjedi valutazzjoni olistika tar-riskji maħluqa minn relazzjonijiet tan-negozju individwali, u l-applikazzjoni ta’ miżuri adegwati biex jittaffew ir-riskji speċifiċi. Filwaqt li l-istituzzjonijiet ta’ kreditu u l-istituzzjonijiet finanzjarji jibqgħu liberi li jiddeċiedu ma’ min jinvolvu ruħhom f’relazzjonijiet kuntrattwali, jenħtieġ li jkunu konxji wkoll tar-rwol ċentrali tagħhom fil-funzjonament tas-sistema finanzjarja internazzjonali u fl-abilitazzjoni tal-moviment ta’ fondi kif definit fl-Artikolu 4, il-punt (25), tad-Direttiva (UE) 2015/2366 jew tal-kriptoassi għall-għanijiet importanti ta’ żvilupp u umanitarji li l-organizzazzjonijiet tas-soċjetà ċivili jsegwu. Għalhekk jenħtieġ li tali istituzzjonijiet jagħmlu użu mill-flessibbiltà permessa mill-approċċ ibbażat fuq ir-riskju biex itaffu r-riskji assoċjati mar-relazzjonijiet tan-negozju b’mod proporzjonat. Jenħtieġ li taħt l-ebda ċirkostanza ma jiġu invokati raġunijiet tal-AML/CFT biex jiġġustifikaw deċiżjonijiet kummerċjali fir-rigward ta’ klijenti prospettivi jew eżistenti.

(54)

Jenħtieġ li l-entitajiet marbutin b’obbligu jidentifikaw u jieħdu miżuri raġonevoli biex jivverifikaw l-identità tas-sid benefiċjarju bl-użu ta’ dokumenti u sorsi ta’ informazzjoni affidabbli. Jenħtieġ li l-konsultazzjoni tar-reġistri ċentrali ta’ informazzjoni dwar s-sjieda benefiċjarja (ir-“reġistri ċentrali”) tippermetti lill-entitajiet marbutin b’obbligu jiżguraw konsistenza mal-informazzjoni miksuba permezz tal-proċess ta’ verifika u ma tkunx is-sors primarju tal-entità marbuta b’obbligu għall-verifika. Fejn l-entitajiet marbutin b’obbligu jidentifikaw diskrepanzi bejn l-informazzjoni miżmuma fir-reġistri ċentrali u l-informazzjoni li jiksbu mill-klijent jew minn sorsi affidabbli oħra matul id-diliġenza dovuta fir-rigward tal-klijenti, jenħtieġ li jirrapportaw dawk id-diskrepanzi lill-entità inkarigata mir-reġistru ċentrali rilevanti sabiex ikunu jistgħu jittieħdu miżuri biex jiġu solvuti l-inkonsistenzi. Dak il-proċess jikkontribwixxi għall-kwalità u l-affidabbiltà tal-informazzjoni miżmuma f’dawk ir-reġistri, bħala parti minn approċċ b’diversi binarji biex jiġi żgurat li l-informazzjoni li tinsab fir-reġistri ċentrali tkun preċiża, adegwata u aġġornata. F’sitwazzjonijiet ta’ riskju baxx u fejn is-sidien benefiċjarji jkunu magħrufa mill-entità marbuta b’obbligu, jenħtieġ li jkun possibbli għall-entitajiet marbutin b’obbligu li jippermettu lill-klijent jirrapporta diskrepanzi fejn jiġu identifikati differenzi żgħar li jikkonsistu fi żbalji ta’ natura tipografika jew teknika simili.

(55)

Ir-riskji maħluqa minn entitajiet ġuridiċi barranin u arranġamenti ġuridiċi barranin jeħtieġ li jittaffew b’mod adegwat. Fejn entità ġuridika maħluqa barra mill-Unjoni jew trust espress jew arranġament ġuridiku simili amministrat barra mill-Unjoni, jew li t-trustee tiegħu jew il-persuna f’pożizzjoni ekwivalenti tirresjedi jew tkun barra mill-Unjoni, jkunu waslu biex jidħlu f’relazzjoni ta’ negozju ma’ entità marbuta b’obbligu, jenħtieġ li r-reġistrazzjoni tal-informazzjoni dwar is-sjieda benefiċjarja fir-reġistru ċentrali ta’ stat Membru tkun prekundizzjoni għad-dħul fir-relazzjoni tan-negozju. Madankollu, għal entitajiet ġuridiċi maħluqabarra mill-Unjoni, ir-rekwiżit għandu japplika biss fil-każ ta’ riskji medji-għoljin jew għoljin ta’ ħasil tal-flus, ir-reati predikati tiegħu jew il-finanzjament tat-terroriżmu assoċjati mal-kategorija ta’ entità ġuridika barranija, is-settur li topera fih l-entità ġuridika barranija, jew fil-każ ta’ riskji medji-għoljin jew għoljin ta’ ħasil tal-flus, ir-reati predikati tiegħu jew il-finanzjament tat-terroriżmu assoċjati mas-settur li fih topera l-entità marbuta b’obbligu. Jenħtieġ li r-reġistrazzjoni tal-informazzjoni dwar is-sjieda benefiċjarja tkun ukoll prekundizzjoni għall-kontinwazzjoni ta’ relazzjoni ta’ negozju ma’ entità ġuridika maħluqa barra mill-Unjoni f’sitwazzjoni fejn dik ir-relazzjoni ssir assoċjata ma’tali riskji medji-għoljin jew għoljin wara l-istabbiliment tagħha.

(56)

Il-proċess tal-istabbiliment ta’ relazzjoni ta’ negozju jew it-twettiq tal-passi meħtieġa biex titwettaq tranżazzjoni okkażjonali jiġi skattat meta l-klijent jesprimi interess li jakkwista prodott jew li jirċievi servizz minn entità marbuta b’obbligu. Is-servizzi offruti mill-aġenti tal-proprjetà immobbli jinkludu l-għajnuna lill-klijent biex isibu proprjetà għax-xiri, il-bejgħ, il-kiri jew il-lokazzjoni. Tali servizzi jibdew ikunu ta’ rilevanza għall-finijiet tal-AML/CFT meta jkun hemm indikazzjoni ċara li l-partijiet huma lesti li jipproċedu bix-xiri, il-bejgħ, il-kiri jew il-lokazzjoni jew bit-teħid tal-passi preparatorji meħtieġa. Dan jista’ jkun, pereżempju, il-mument meta ssir offerta għax-xiri jew għall-kiri tal-proprjetà u tiġi aċċettata mill-partijiet. Qabel dak il-mument, ma jkunx meħtieġ li titwettaq diliġenza dovuta fuq kwalunkwe klijent prospettiv. Bl-istess mod, ma jkunx proporzjonat li titwettaq diliġenza dovuta fir-rigward tal-klijenti fuq persuni li għadhom ma esprimewx interess li jkomplu bix-xiri jew bil-kiri ta’ proprjetà speċifika.

(57)

It-tranżazzjonijiet ta’ proprjetà immobbli huma esposti għal riskji ta’ ħasil tal-flus u ta’ finanzjament tat-terroriżmu. Sabiex jittaffew dawk ir-riskji, l-operaturi tal-proprjetà immobbli li jintermedjaw ix-xiri, il-bejgħ u l-kiri ta’ proprjetà immobbli jenħtieġ li jkunu soġġetti għar-rekwiżiti ta’ dan ir-Regolament, irrispettivament mid-deżinjazzjoni jew min-negozju jew il-professjoni prinċipali tagħhom, inkluż l-iżviluppaturi tal-proprjetà meta u sal-punt li jintermedjaw fix-xiri, il-bejgħ u l-kiri ta’ proprjetà immobbli.

(58)

L-anonimità assoċjata ma’ ċerti prodotti tal-flus elettroniċi tesponihom għal riskji ta’ ħasil tal-flus u ta’ finanzjament tat-terroriżmu. Madankollu, hemm differenzi sinifikanti fis-settur, u mhux il-prodotti kollha tal-flus elettroniċi għandhom l-istess livell ta’ riskju. Pereżempju, ċerti prodotti ta’ flus elettroniċi ta’ valur baxx, bħal kards ta’ rigal imħallsa minn qabel jew vawċers imħallsa minn qabel, jistgħu jippreżentaw riskji baxxi ta’ ħasil tal-flus jew finanzjament tat-terroriżmu. Sabiex jiġi żgurat li r-rekwiżiti imposti fuq is-settur ikunu proporzjonati mar-riskju tiegħu u ma jfixklux b’mod effettiv l-operat tiegħu, jenħtieġ li jkun possibbli, f’ċerti ċirkostanzi ppruvati ta’ riskju baxx u skont kundizzjonijiet stretti ta’ mitigazzjoni tar-riskju, li dawk il-prodotti jiġu eżentati minn ċerti miżuri ta’ diliġenza dovuta fir-rigward tal-klijenti, bħall-identifikazzjoni u l-verifika tal-klijent u tas-sid benefiċjarju, iżda mhux mill-monitoraġġ tat-tranżazzjonijiet jew tar-relazzjonijiet tan-negozju. Jenħtieġ li jkun possibbli għas-superviżuri biss li jagħtu tali eżenzjoni wara verifika tar-riskju baxx ippruvat filwaqt li jitqiesu l-fatturi ta’ riskju rilevanti li għandhom jiġu definiti mill-AMLA u b’mod li effettivament itaffi kwalunkwe riskju ta’ ħasil tal-flus jew finanzjament tat-terroriżmu u li jipprekludi ċ-ċirkomvenzjoni tar-regoli tal-AML/CFT. Fi kwalunkwe każ, kwalunkwe eżenzjoni jenħtieġ li tkun kundizzjonali fuq limiti stretti fir-rigward tal-valur massimu tal-prodott, l-użu esklużiv tiegħu għax-xiri ta’ oġġetti jew servizzi, u dment li l-ammont maħżun ma jkunx jista’ jiġi skambjat ma’ valur ieħor.

(59)

Jenħtieġ li l-entitajiet marbutin b’obbligu ma jkunux meħtieġa japplikaw miżuri ta’ diliġenza dovuta fuq klijenti li jwettqu tranżazzjonijiet okkażjonali jew konnessi taħt ċertu valur, sakemm ma jkunx hemm suspett ta’ ħasil tal-flus jew ta’ finanzjament tat-terroriżmu. Filwaqt li l-livell limitu ta’ EUR 10 000, jew l-ammont ekwivalenti f’munita nazzjonali japplika għall-biċċa l-kbira tat-tranżazzjonijiet okkażjonali, l-entitajiet marbutin b’obbligu li joperaw f’setturi jew iwettqu tranżazzjonijiet li jippreżentaw riskju ogħla ta’ ħasil tal-flus u ta’ finanzjament tat-terroriżmu jenħtieġ li jkunu meħtieġa japplikaw miżuri ta’ diliġenza dovuta fir-rigward tal-klijenti għal tranżazzjonijiet b’limiti aktar baxxi. Sabiex jiġu identifikati s-setturi jew it-tranżazzjonijiet kif ukoll il-livelli limitu adegwati għal dawk is-setturi jew it-tranżazzjonijiet, jenħtieġ li l-AMLA tiżviluppa abbozzi ddedikati ta’ standards tekniċi regolatorji.

(60)

Ikun hemm sitwazzjonijiet speċifiċi fejn għall-finijiet ta’ diliġenza dovuta fir-rigward tal-klijenti, il-klijent ma jkunx limitat għall-persuna li tagħmel tranżazzjonijiet mal-entità marbuta b’obbligu. Dak huwa l-każ, pereżempju, fejn nutar wieħed biss ikun involut fi tranżazzjoni ta’ proprjetà immobbli. F’każijiet bħal dawn, sabiex jiġi żgurat li jitwettqu kontrolli adegwati fuq it-tranżazzjoni biex jiġu identifikati każijiet possibbli ta’ ħasil tal-flus, ir-reati predikati tiegħu jew il-finanzjament tat-terroriżmu, l-entitajiet marbutin b’obbligu jenħtieġ li jqisu kemm ix-xerrej kif ukoll il-bejjiegħ bħala klijenti u japplikaw miżuri ta’ diliġenza dovuta fir-rigward tal-klijenti fuq iż-żewġ partijiet. Jenħtieġ li dan ir-Regolament jipprovdi lista ta’ sitwazzjonijiet bħal dawn fejn il-klijent ma jkunx, jew ma jkunx limitat għall-klijent dirett tal-entità marbuta b’obbligu. Jenħtieġ li tali lista tikkomplementa l-fehim ta’ min il-klijent jinsab f’sitwazzjonijiet tipiċi u jenħtieġ li ma tinftiehemx bħala li tinkludi interpretazzjoni eżawrjenti tat-terminu. Bl-istess mod, jenħtieġ li relazzjoni tan-negozju mhux dejjem tirrikjedi relazzjoni kuntrattwali jew involviment formali ieħor sakemm is-servizzi jiġu pprovduti ripetutament jew fuq perjodu ta’ żmien sabiex jinvolvu element ta’ durata. Fejn id-dritt nazzjonali jipprekludi lill-entitajiet marbutin b’obbligu li huma uffiċjali pubbliċi milli jidħlu f’relazzjonijiet kuntrattwali mal-klijenti, jenħtieġ li tali liġi nazzjonali ma tiġix interpretata li tipprojbixxi lil entitajiet marbutin b’obbligu li jittrattaw sensiela ta’ tranżazzjonijiet bħala relazzjoni ta’ negozju għall-finijiet tal-AML/CFT.

(61)

L-introduzzjoni ta’ livell limitu għall-Unjoni kollha għal pagamenti kbar fi flus kontanti tnaqqas ir-riskji assoċjati mal-użu ta’ tali pagamenti . Madankollu, l-entitajiet marbutin b’obbligu li jwettqu tranżazzjonijiet fi flus kontanti taħt dan l-ammont jibqgħu vulnerabbli għar-riskji tal-ħasil tal-flus u l-finanzjament tat-terroriżmu peress li jipprovdu punt ta’ dħul fis-sistema finanzjarja tal-Unjoni. Għalhekk, huwa meħtieġ li tintalab l-applikazzjoni ta’ miżuri ta’ diliġenza dovuta fir-rigward tal-klijenti biex jittaffew ir-riskji ta’ użu ħażin tal-flus kontanti. Sabiex jiġi żgurat li l-miżuri jkunu proporzjonati mar-riskji ppreżentati minn tranżazzjonijiet ta’ valur inqas minn EUR 10 000, tali miżuri jenħtieġ li jkunu limitati għall-identifikazzjoni u l-verifika tal-klijent u tas-sid benefiċjarju meta jwettqu tranżazzjonijiet okkażjonali fi flus kontanti ta’ mill-inqas EUR 3 000. Dik il-limitazzjoni ma teħlisx lill-entità marbuta b’obbligu milli tapplika l-miżuri kollha ta’ diliġenza dovuta fir-rigward tal-klijenti kull meta jkun hemm suspett ta’ ħasil tal-flus jew finanzjament tat-terroriżmu, jew milli tirrapporta tranżazzjonijiet suspettużi lill-FIU.

(62)

Xi mudelli tan-negozju huma bbażati fuq l-entità marbuta b’obbligu li jkollha relazzjoni tan-negozju ma’ negozjant sabiex toffri servizzi ta’ bidu ta’ pagament li permezz tagħhom in-negozjant jitħallas għall-provvista ta’ oġġetti jew ta’ servizzi, u mhux mal-klijent tan-negozjant, li jawtorizza s-servizz ta’ bidu ta’ pagament sabiex tinbeda tranżazzjoni waħda jew ta’ darba lin-negozjant. F’tali mudell ta’ negozju, il-klijent tal-entità marbuta b’obbligu għall-fini tar-regoli dwar l-AML/CFT huwa n-negozjant, u mhux il-klijent tan-negozjant. Għalhekk, fir-rigward tas-servizzi ta’ bidu ta’ pagament, jenħtieġ li l- miżuri ta’ diliġenza dovuta fir-rigward tal-klijenti jiġu applikati mill-entità marbuta b’obbligu vis-a-vis in-negozjant. Fir-rigward ta’ servizzi finanzjarji oħra li jaqgħu fil-kamp ta’ applikazzjoni ta’ dan ir-Regolament, inkluż fejn ipprovduti mill-istess operatur, id-determinazzjoni tal-klijent jenħtieġ li ssir b’kont meħud tas-servizzi pprovduti.

(63)

L-attivitajiet tal-logħob tal-azzard ivarjaw fin-natura, l-ambitu ġeografiku u r-riskji assoċjati. Sabiex tiġi żgurata applikazzjoni proporzjonata u bbażata fuq ir-riskju ta’ dan ir-Regolament, jenħtieġ li jkun possibbli għall-Istati Membri li jidentifikaw servizzi tal-logħob tal-azzard assoċjati ma’ riskji baxxi ta’ ħasil tal-flus u finanzjament tat-terroriżmu, bħal lotteriji tal-Istat jew privati, jew attivitajiet tal-logħob tal-azzard amministrati mill-Istat, u li jiddeċiedu li ma japplikawx għalihom ir-rekwiżiti kollha jew uħud minnhom ta’ dan ir-Regolament. Minħabba l-effetti transfruntiera potenzjali tal-eċċezzjonijiet nazzjonali, huwa meħtieġ li tiġi żgurata applikazzjoni konsistenti ta’ approċċ strett ibbażat fuq ir-riskju madwar l-Unjoni. Għal dak l-għan, jenħtieġ li l-Kummissjoni tkun tista’ tapprova d-deċiżjonijiet tal-Istati Membri, jew tirrifjutahom fejn l-eċċezzjoni ma tkunx ġustifikata minn riskju baxx ippruvat. Fi kwalunkwe każ, jenħtieġ li ma tingħata l-ebda eċċezzjoni fir-rigward ta’ attivitajiet assoċjati ma’ riskji ogħla. Dan huwa l-każ għal attivitajiet bħall-każinòs, il-logħob tal-azzard online u l-imħatri sportivi, iżda mhux il-każ fejn l-attivitajiet tal-logħob tal-azzard online huma amministrati mill-Istat, kemm permezz tal-forniment dirett ta’ dawk is-servizzi kif ukoll permezz tar-regolamentazzjoni tal-mod li bih dawk is-servizzi tal-logħob tal-azzard jiġu organizzati, operati u amministrati. Fid-dawl tar-riskji għas-saħħa pubblika jew ta’ attivitajiet kriminali li jistgħu jkunu assoċjati mal-logħob tal-azzard, il-miżuri nazzjonali li jirregolaw l-organizzazzjoni, l-operat u l-amministrazzjoni tal-logħob tal-azzard, fejn ġenwinament isegwu għanijiet ta’ politika pubblika, sigurtà pubblika jew saħħa pubblika, jikkontribwixxu għat-tnaqqis tar-riskji assoċjati ma’ dik l-attività.

(64)

Il-livell limitu ta’ EUR 2 000 jew l-ekwivalenti fil-munita nazzjonali, applikabbli għall-fornituri ta’ servizzi tal-logħob tal-azzard jintlaħaq irrispettivament minn jekk il-klijent iwettaqx tranżazzjoni waħda ta’ mill-inqas dak l-ammont jew diversi tranżazzjonijiet iżgħar li jammontaw għal dak l-ammont. Għal dak l-għan, jenħtieġ li l-fornituri tas-servizzi tal-logħob tal-azzard ikunu jistgħu jattribwixxu tranżazzjonijiet lil klijent partikolari anki jekk ikunu għadhom ma vverifikawx l-identità tal-klijent, biex ikunu f’pożizzjoni li jiddeterminaw jekk u meta dak il-livell limitu jkun intlaħaq. Għalhekk, jenħtieġ li l-fornituri ta’ servizzi tal-logħob tal-azzard ikollhom fis-seħħ sistemi li jippermettu l-attribuzzjoni u l-monitoraġġ tat-tranżazzjonijiet qabel l-applikazzjoni tar-rekwiżit li titwettaq id-diliġenza dovuta fir-rigward tal-klijenti. Fil-każ ta’ każinòs jew postijiet fiżiċi oħra tal-logħob tal-azzard, jista’ ma jkunx prattiku li tiġi vverifikata l-identità tal-klijent ma’ kull tranżazzjoni. F’każijiet bħal dawn, jenħtieġ li jkun possibbli li jiġi identifikat il-klijent u li tiġi vverifikata l-identità tal-klijent mad-dħul fil-bini tal-logħob tal-azzard, dment li jkun hemm fis-seħħ sistemi li jattribwixxu tranżazzjonijiet imwettqa fil-bini tal-logħob tal-azzard, inkluż ix-xiri jew l-iskambju ta’ ċipep tal-logħob tal-azzard, lil dak il-klijent.

(65)

Id-Direttiva (UE) 2015/849, minkejja li armonizzat ir-regoli tal-Istati Membri fil-qasam tal-obbligi ta’ identifikazzjoni tal-klijenti sa ċertu punt, ma stabbilietx regoli dettaljati fir-rigward tal-proċeduri li għandhom jiġu segwiti mill-entitajiet marbutin b’obbligu. Fid-dawl tal-importanza kruċjali ta’ dak l-aspett fil-prevenzjoni tal-ħasil tal-flus u tal-finanzjament tat-terroriżmu, huwa xieraq, f’konformità mal-approċċ ibbażat fuq ir-riskju, li jiġu introdotti dispożizzjonijiet aktar speċifiċi u dettaljati dwar l-identifikazzjoni tal-klijent u dwar il-verifika tal-identità tal-klijent, kemm jekk b’rabta ma’ persuni fiżiċi kif ukoll jekk ġuridiċi, arranġamenti ġuridiċi bħal trusts jew entitajiet li għandhom kapaċità legali skont il-liġi nazzjonali.

(66)

L-iżviluppi teknoloġiċi u l-progress fid-diġitalizzazzjoni jippermettu identifikazzjoni u verifika siguri mill-bogħod jew elettroniċi tal-klijenti prospettivi u eżistenti u jistgħu jiffaċilitaw it-twettiq mill-bogħod tad-diliġenza dovuta fir-rigward tal-klijenti. Is-soluzzjonijiet ta’ identifikazzjoni kif stabbiliti fir-Regolament (UE) Nru 910/2014 tal-Parlament Ewropew u tal-Kunsill (23) jippermettu mezzi siguri u affidabbli ta’ identifikazzjoni u ta’ verifika tal-klijenti kemm għall-klijenti prospettivi kif ukoll għall-klijenti eżistenti u jistgħu jiffaċilitaw it-twettiq mill-bogħod tad-diliġenza dovuta fir-rigward tal-klijenti. Jenħtieġ li l-identifikazzjoni elettronika kif stabbilita f’dak ir-Regolament titqies u tiġi aċċettata mill-entitajiet marbutin b’obbligu għall-proċess ta’ identifikazzjoni tal-klijent. L-użu ta’ tali mezzi ta’ identifikazzjoni jistgħujnaqqsu, fejn ikunu fis-seħħ miżuri xierqa ta’ mitigazzjoni tar-riskju, il-livell ta’ riskju għal wieħed standard jew saħansitra għal wieħed baxx. Meta tali identifikazzjoni elettronika ma tkunx disponibbli għal klijent, pereżempju minħabba n-natura tal-istatus ta’ residenza tiegħu fi Stat Membru partikolari jew ir-residenza tiegħu f’pajjiż terz, jenħtieġ li l-verifika ssir permezz ta’ servizzi fiduċjarji kwalifikati rilevanti.

(67)

Sabiex jiġi żgurat li l-qafas AML/CFT jipprevjeni d-dħul ta’ fondi illeċiti fis-sistema finanzjarja, jenħtieġ li l-entitajiet marbutin b’obbligu jwettqu diliġenza dovuta fir-rigward tal-klijenti qabel ma jidħlu f’relazzjonijiet tan-negozju ma’ klijenti prospettivi, f’konformità mal-approċċ ibbażat fuq ir-riskju. Madankollu, sabiex ma jdewmux bla bżonn il-kondotta normali tal-operazzjonijiet, jenħtieġ li l-entitajiet marbutin b’obbligu jkunu jistgħu jiġbru l-informazzjoni mingħu il-klijent prospettiv matul l-istabbiliment ta’ relazzjoni tan-negozju. Jenħtieġ li l-istituzzjonijiet ta’ kreditu u l-istituzzjonijiet finanzjarji jkunu jistgħu jiksbu l-informazzjoni neċessarja mill-klijenti prospettivi ladarba tiġi stabbilita r-relazzjoni, dment li t-tranżazzjonijiet ma jinbdewx qabel ma jitlesta b’suċċess il-proċess ta’ diliġenza dovuta fir-rigward tal-klijenti.

(68)

Il-proċess ta’ diliġenza dovuta fir-rigward tal-klijenti ma huwiex limitat għall-identifikazzjoni u għall-verifika tal-identità tal-klijent. Qabel ma jidħlu f’relazzjonijiet ta’ negozju jew iwettqu tranżazzjonijiet okkażjonali, jenħtieġ li l-entitajiet marbutin b’obbligu jivvalutaw ukoll l-iskop u n-natura ta’ relazzjoni tan-negozju jew tranżazzjoni okkażjonali. Informazzjoni prekuntrattwali jew informazzjoni oħra dwar il-prodott jew is-servizz propost li tiġi kkomunikata lill-klijent prospettiv tista’ tikkontribwixxi għall-fehim ta’ dak l-iskop. Jenħtieġ li l-entitajiet marbutin b’obbligu dejjem ikunu jistgħu jivvalutaw l-iskop u n-natura ta’ relazzjoni tan-negozju prospettiva jew tranżazzjoni okkażjonali b’mod mhux ambigwu. Meta s-servizz jew il-prodott offrut jippermetti lill-klijenti jwettqu diversi tipi ta’ tranżazzjonijiet jew ta’ attivitajiet, jenħtieġ li l-entitajiet marbutin b’obbligu jiksbu biżżejjed informazzjoni dwar l-intenzjoni tal-klijent rigward l-użu li għandu jsir minn dik ir-relazzjoni.

(69)

Sabiex tiġi żgurata l-effettività tal-qafas AML/CFT, jenħtieġ li l-entitajiet marbutin b’obbligu jirrieżaminaw b’mod regolari l-informazzjoni miksuba mill-klijenti tagħhom, f’konformità mal-approċċ ibbażat fuq ir-riskju. Ir-relazzjonijiet kummerċjali x’aktarx li jevolvu hekk kif iċ-ċirkostanzi tal-klijenti u l-attivitajiet li jwettqu permezz tar-relazzjoni tan-negozju jinbidlu maż-żmien. Sabiex jinżamm fehim komprensiv tal-profil tar-riskju tal-klijent u jitwettaq skrutinju sinifikanti tat-tranżazzjonijiet, jenħtieġ li l-entitajiet marbutin b’obbligu jirrieżaminaw regolarment l-informazzjoni miksuba mill-klijenti tagħhom, f’konformità mal-approċċ ibbażat fuq ir-riskju. Tali rieżamijiet jenħtieġ li jsiru fuq bażi perjodika iżda jenħtieġ li jiġu skattati wkoll minn bidliet fiċ-ċirkostanzi rilevanti tal-klijent, meta l-fatti u l-informazzjoni jindikaw bidla potenzjali fil-profil tar-riskju jew id-dettalji ta’ identifikazzjoni tal-klijent. Għal dak l-għan, jenħtieġ li l-entità marbuta b’obbligu tikkunsidra l-ħtieġa li tirrieżamina l-fajl tal-klijent bi tweġiba għal bidliet materjali, bħal bidla fil-ġuriżdizzjonijiet innegozjati, fil-valur jew fil-volum tat-tranżazzjonijiet, fuq talbiet għal prodotti jew servizzi ġodda li jkunu differenti b’mod sinifikanti f’termini ta’ riskju jew wara bidliet fis-sjieda benefiċjarja.

(70)

Fil-kuntest ta’ klijenti ripetuti li għalihom reċentement twettqu miżuri ta’ diliġenza dovuta, jenħtieġ li jkun possibbli li l-miżuri ta’ diliġenza dovuta fir-rigward tal-klijenti jiġu ssodisfati billi tinkiseb konferma mill-klijent li l-informazzjoni u d-dokumenti miżmuma fir-rekords ma nbidlux. Tali metodu jiffaċilita l-applikazzjoni tal-obbligi tal-AML/CFT f’sitwazzjonijiet fejn l-entità marbuta b’obbligu tkun kunfidenti li l-informazzjoni relatata mal-klijent ma tkunx inbidlet, peress li hija r-responsabbiltà tal-entitajiet marbutin b’obbligu li jiżguraw li jieħdu miżuri adegwati ta’ diliġenza dovuta fir-rigward tal-klijenti. Fil-każijiet kollha, jenħtieġ li jiġu rreġistrati l-konferma riċevuta mill-klijent, u kwalunkwe bidla fl-informazzjoni miżmuma fuq il-klijent.

(71)

L-entitajiet marbutin b’obbligu jistgħu jipprovdu aktar minn prodott jew servizz wieħed fil-kuntest ta’ relazzjoni tan-negozju. F’dawk iċ-ċirkustanzi, ir-rekwiżit li l-informazzjoni, id-data u d-dokumenti jiġu aġġornati f’intervalli regolari mhuwiex intiż li jimmira lejn il-prodott jew is-servizz individwali, iżda r-relazzjoni tan-negozju kollha kemm hi. Huwa f’idejn l-entitajiet marbutin b’obbligu li jivvalutaw, fil-firxa kollha ta’ prodotti jew servizzi pprovduti, meta jinbidlu ċ-ċirkostanzi rilevanti tal-klijent, jew meta jiġu ssodisfati kundizzjonijiet oħra li jiskattaw l-aġġornament tad-diliġenza dovuta fir-rigward tal-klijenti, u li jipproċedu biex jirrieżaminaw il-fajl tal-klijent fir-rigward tar-relazzjoni tan-negozju kollha.

(72)

Jenħtieġ li l-entitajiet marbutin b’obbligu jistabbilixxu wkoll sistema ta’ monitoraġġ sabiex jidentifikaw tranżazzjonijiet li jistgħu jqajmu suspetti ta’ ħasil tal-flus jew ta’ finanzjament tat-terroriżmu. Sabiex tiġi żgurata l-effettività tal-monitoraġġ tat-tranżazzjonijiet, jenħtieġ li l-attività ta’ monitoraġġ tal-entitajiet marbutin b’obbligu fil-prinċipju tkopri s-servizzi u l-prodotti kollha offruti lill-klijenti u t-tranżazzjonijiet kollha li jitwettqu f’isem il-klijent jew offruti lill-klijent mill-entità marbuta b’obbligu. Madankollu, mhux it-tranżazzjonijiet kollha jeħtieġ li jiġu skrutinizzati individwalment. Jenħtieġ li l-intensità tal-monitoraġġ tirrispetta l-approċċ ibbażat fuq ir-riskju u tkun imfassla fuq kriterji preċiżi u rilevanti, filwaqt li jitqiesu, b’mod partikolari, il-karatteristiċi tal-klijent u l-livell ta’ riskju assoċjat magħhom, il-prodotti u s-servizzi offruti, u l-pajjiżi jew iż-żoni ġeografiċi kkonċernati. Jenħtieġ li l-AMLA tiżviluppa linji gwida sabiex tiżgura li l-intensità tal-monitoraġġ tar-relazzjonijiet tan-negozju u tat-tranżazzjonijiet tkun adegwata u proporzjonata għal-livell ta’ riskju.

(73)

It-terminazzjoni tar-relazzjoni tan-negozju fejn il-miżuri ta’ diliġenza dovuta fir-rigward tal-klijenti ma jkunux jistgħu jiġu rrispettati tnaqqas l-iskopertura tal-entità marbuta b’obbligu għar-riskji maħluqa minn bidliet possibbli fil-profil tal-klijent. Madankollu, jista’ jkun hemm sitwazzjonijiet fejn it-terminazzjoni jenħtieġ li ma tiġix segwita minħabba għanijiet ta’ interess pubbliku. Dan huwa l-każ, pereżempju, fir-rigward ta’ kuntratti tal-assigurazzjoni tal-ħajja, fejn l-entitajiet marbutin b’obbligu jenħtieġ li, fejn meħtieġ, bħala alternattiva għat-terminazzjoni, jieħdu miżuri biex jiffriżaw ir-relazzjoni tan-negozju inkluż billi jipprojbixxu kwalunkwe servizz ulterjuri lil dak il-klijent u jżommu l-ħlas lill-benefiċjarji, sakemm ikun jista’ jkun hemm konformità mal-miżuri tad-diliġenza dovuta fir-rigward tal-klijenti. Barra minn hekk, ċerti prodotti u servizzi jirrikjedu li l-entità marbuta b’obbligu tkompli żżomm jew tirċievi l-fondi tal-klijent kif definit fl-Artikolu 4, il-punt (25) tad-Direttiva (UE) 2015/2366, pereżempju fil-kuntest ta’ self, kontijiet ta’ pagament jew it-teħid ta’ depożiti. Madankollu, jenħtieġ li dan ma jiġix ittrattati bħala impediment għar-rekwiżit li tiġi tterminata r-relazzjoni tan-negozju, li jista’ jinkiseb billi jiġi żgurat li ma titwettaq l-ebda tranżazzjoni jew attività għall-klijent.

(74)

Sabiex tiġi żgurata l-applikazzjoni konsistenti ta’ dan ir-Regolament, jenħtieġ li l-AMLA jkollha l-kompitu li tfassal abbozzi ta’ standards tekniċi regolatorji dwar id-diliġenza dovuta fir-rigward tal-klijenti. Jenħtieġ li dawk l-istandards tekniċi regolatorji jistabbilixxu s-sett minimu ta’ informazzjoni li għandha tinkiseb mill-entitajiet marbutin b’obbligu sabiex jidħlu f’relazzjonijiet ġodda tan-negozju ma’ klijenti jew jivvalutaw dawk li jkunu għaddejjin, skont il-livell ta’ riskju assoċjat ma’ kull klijent. Barra minn hekk, jenħtieġ li l-abbozzi ta’ standards tekniċi regolatorji jipprovdu biżżejjed ċarezza sabiex jippermettu lill-atturi tas-suq jiżviluppaw mezzi siguri, aċċessibbli u innovattivi għall-verifika tal-identità tal-klijenti u għat-twettiq tad-diliġenza dovuta fir-rigward tal-klijenti, inkluż mill-bogħod, filwaqt li jirrispettaw il-prinċipju tan-newtralità teknoloġika. Dawk il-kompiti speċifiċi huma konformi mar-rwol u r-responsabbiltajiet tal-AMLA kif previst fir-Regolament (UE) 2024/1620.

(75)

Jenħtieġ li l-armonizzazzjoni tal-miżuri ta’ diliġenza dovuta fir-rigward tal-klijenti ser tikkontribwixxi għall-kisba ta’ fehim konsistenti, u effettiv b’mod konsistenti, tar-riskji assoċjati ma’ klijent eżistenti jew prospettiv irrispettivament minn fejn tinfetaħ ir-relazzjoni tan-negozju fl-Unjoni. Jenħtieġ li dik l-armonizzazzjoni tiżgura wkoll li l-informazzjoni miksuba fit-twettiq tad-diliġenza dovuta fir-rigward tal-klijenti ma tintużax mill-entitajiet marbutin b’obbligu sabiex isegwu prattiki ta’ tneħħija tar-riskji li jistgħu jirriżultaw f’ċirkomvenzjoni ta’ obbligi legali oħrajn, b’mod partikolari dawk stabbiliti fid-Direttiva 2014/92/UE tal-Parlament Ewropew u tal-Kunsill (24) jew fid-Direttiva (UE) 2015/2366, mingħajr ma jintlaħqu l-objettivi tal-Unjoni fil-prevenzjoni tal-ħasil tal-flus u tal-finanzjament tat-terroriżmu. Sabiex tkun tista’ ssir is-superviżjoni xierqa tal-konformità mal-obbligi ta’ diliġenza dovuta fir-rigward tal-klijenti, huwa importanti li l-entitajiet marbutin b’obbligu jżommu rekord tal-azzjonijiet imwettqin u tal-informazzjoni miksuba matul il-proċess ta’ diliġenza dovuta fir-rigward tal-klijenti, irrispettivament minn jekk tiġix stabbilita relazzjoni tan-negozju ġdida magħhom u minn jekk dawn ikunux issottomettew rapport dwar tranżazzjonijiet suspettużi wara li jirrifjutaw li jistabbilixxu relazzjoni tan-negozju. Meta l-entità marbuta b’obbligu tieħu deċiżjoni li ma tidħolx f’relazzjoni tan-negozju ma’ klijent prospettiv, jew li tittermina relazzjoni ta’ negozju eżistenti, li tirrifjuta li twettaq tranżazzjoni okkażjonali, jew li tapplika miżuri alternattivi biex tittermina relazzjoni tan-negozju, jenħtieġ li r-rekords tad-diliġenza dovuta fir-rigward tal-klijenti jinkludu r-raġunijiet għal tali deċiżjoni. Dan jippermetti lill-awtoritajiet superviżorji jivvalutaw jekk l-entitajiet marbutin b’obbligu jkunux ikkalibraw kif xieraq il-prattiki ta’ diliġenza dovuta fir-rigward tal-klijenti tagħhom u kif tevolvi l-iskopertura għar-riskju tal-entità, kif ukoll jgħin biex tinbena evidenza statistika dwar l-applikazzjoni tar-regoli dwar id-diliġenza dovuta fir-rigward tal-klijenti mill-entitajiet marbutin b’obbligu fl-Unjoni kollha.

(76)

L-approċċ għar-rieżami ta’ klijenti eżistenti fil-qafas AML/CFT attwali diġà huwa bbażat fuq ir-riskju. Madankollu, b’kont meħud tar-riskju ogħla ta’ ħasil tal-flus, il-finanzjament tat-terroriżmu u reati predikati assoċjati li huma marbutin ma’ ċerti strutturi intermedjarji, dak l-approċċ jista’ ma jippermettix għad-detezzjoni fil-ħin u għall-valutazzjoni tar-riskji. Għalhekk, huwa importanti li jiġi żgurat li kategoriji speċifikati b’mod ċar ta’ klijenti eżistenti huma wkoll issorveljati fuq bażi regolari.

(77)

Ir-riskju nnifsu huwa varjabbli fin-natura, u l-varjabbli, waħedhom jew meta kkombinati, jistgħu jżidu jew inaqqsu r-riskju potenzjali maħluq, u b’hekk ikollhom impatt fil-livell xieraq ta’ miżuri preventivi, bħal miżuri ta’ diliġenza dovuta fir-rigward tal-klijenti.

(78)

F’sitwazzjonijiet ta’ riskju baxx, jenħtieġ li l-entitajiet marbutin b’obbligu jkunu jistgħu japplikaw miżuri simplifikati ta’ diliġenza dovuta. Dan ma jfissirx eżenzjoni jew nuqqas ta’ miżuri tad-diliġenza dovuta fir-rigward tal-klijenti. Minflok, jikkonsisti f’sett simplifikat jew imnaqqas ta’ miżuri ta’ skrutinju, li madankollu jenħtieġ li jindirizza l-komponenti kollha tal-proċedura standard ta’ diliġenza dovuta fir-rigward tal-klijent. F’konformità mal-approċċ ibbażat fuq ir-riskju, jenħtieġ li l-entitajiet marbutin b’obbligu xorta waħda jkunu jistgħu jnaqqsu l-frekwenza jew l-intensità tal-iskrutinju tal-klijenti jew tat-tranżazzjonijiet tagħhom, jew jiddependu fuq suppożizzjonijiet adegwati fir-rigward tal-fini tar-relazzjoni tan-negozju jew tal-użu ta’ prodotti sempliċi. Jenħtieġ li l-istandards tekniċi regolatorji dwar id-diliġenza dovuta fir-rigward tal-klijenti jistabbilixxu l-miżuri simplifikati speċifiċi li l-entitajiet marbutin b’obbligu jkunu jistgħu jimplimentaw fil-każ ta’ sitwazzjonijiet ta’ riskju aktar baxx identifikati fil-valutazzjoni tar-riskjifil-livell tal-Unjoni mwettqa mill-Kummissjoni. Meta jiġu żviluppati abbozzi ta’ standards tekniċi regolatorji, jenħtieġ li l-AMLA tqis kif xieraq il-preservazzjoni tal-inklużjoni soċjali u finanzjarja.

(79)

Jenħtieġ li jkun rikonoxxut li ċerti sitwazzjonijiet jippreżentaw riskju akbar ta’ ħasil tal-flus jew ta’ finanzjament tat-terroriżmu. Għalkemm l-identità u l-profil tan-negozju tal-klijenti kollha jenħtieġ li jkunu stabbiliti bl-applikazzjoni regolari tal-miżuri dwar id-diliġenza dovuta fir-rigward tal-klijenti, hemm każijiet li fihom ikunu meħtieġa proċeduri partikolarment rigorużi għall-identifikazzjoni u għall-verifika tal-klijent. Għalhekk, huwa neċessarju li jiġu stabbiliti regoli dettaljati dwar tali miżuri ta’ diliġenza dovuta msaħħa, inklużi miżuri speċifiċi ta’ diliġenza dovuta msaħħa għal relazzjonijiet korrispondenti transfruntiera.

(80)

Relazzjonijiet korrispondenti transfruntiera ma’ istituzzjoni rispondenti ta’ pajjiż terz huma kkaratterizzati min-natura kontinwa u ripetittiva tagħhom. Barra minn hekk, mhux is-servizzi bankarji korrispondenti transfruntiera kollha jippreżentaw l-istess livell ta’ riskji ta’ ħasil tal-flus u ta’ finanzjament tat-terroriżmu. Għalhekk, jenħtieġ li l-intensità tal-miżuri ta’ diliġenza dovuta msaħħa tiġi ddeterminata bl-applikazzjoni tal-prinċipji tal-approċċ ibbażat fuq ir-riskju. Madankollu, jenħtieġ li l-approċċ ibbażat fuq ir-riskju ma jiġix applikat meta jkun hemm interazzjoni ma’ istituzzjonijiet rispondenti ta’ pajjiż terz li ma jkollhom l-ebda preżenza fiżika fejn ikunu maħluqa, jew ma’ entitajiet mhux irreġistrati u mhux liċenzjati li jipprovdu servizzi tal-kriptoassi. Minħabba r-riskju għoli ta’ ħasil tal-flus u finanzjament tat-terroriżmu inerenti fl-istituzzjonijiet fantażma, jenħtieġ li l-istituzzjonijiet ta’ kreditu u l-istituzzjonijiet finanzjarji joqogħdu lura milli jkollhom kwalunkwe relazzjoni korrispondenti ma’ tali istituzzjonijiet fantażma, kif ukoll ma’ kontropartijiet f’pajjiżi terzi li jippermettu li l-kontijiet tagħhom jintużaw minn istituzzjonijiet fantażma. Sabiex jiġi evitat l-użu ħażin tas-sistema finanzjarja tal-Unjoni biex jiġu pprovduti servizzi mhux regolati, jenħtieġ li l-fornituri ta’ servizzi tal-kriptoassi jiżguraw ukoll li l-kontijiet tagħhom ma jintużawx minn skambji interni u jenħtieġ li jkollhom fis-seħħ politiki u proċeduri biex jidentifikaw kwalunkwe tentattiv bħal dan.

(81)

Fil-kuntest tat-twettiq tal-funzjoni ta’ sorveljanza tagħhom, is-superviżuri jistgħu jidentifikaw sitwazzjonijiet fejn ksur tar-rekwiżiti tal-AML/CFT minn istituzzjonijiet rispondenti ta’ pajjiżi terzi, jew dgħufijiet fl-implimentazzjoni tagħhom tar-rekwiżiti tal-AML/CFT, jikkawżaw riskji għas-sistema finanzjarja tal-Unjoni. Sabiex jittaffew dawk ir-riskji, jenħtieġ li jkun possibbli għall-AMLA li tindirizza rakkomandazzjonijiet lill-istituzzjonijiet ta’ kreditu u l-istituzzjonijiet finanzjarji fl-Unjoni sabiex tinfurmahom dwar il-fehmiet tagħha dwar in-nuqqasijiet ta’ dawk l-istituzzjonijiet rispondenti ta’ pajjiżi terzi. Jenħtieġ li dawk ir-rakkomandazzjonijiet jinħarġu meta l-AMLA u s-superviżuri finanzjarji fl-Unjoni jaqblu li l-ksur u d-dgħufijiet fis-seħħ fl-istituzzjonijiet rispondenti tal-pajjiż terz x’aktarx jaffettwaw l-iskopertura għar-riskju ta’ relazzjonijiet korrispondenti mill-istituzzjonijiet ta’ kreditu u l-istituzzjonijiet finanzjarji fl-Unjoni, u dment li l-istituzzjoni rispondenti tal-pajjiż terz u s-superviżur tagħha jkollhom l-opportunità li jipprovdu l-fehmiet tagħhom. Sabiex jiġi ppreservat il-funzjonament tajjeb tas-sistema finanzjarja tal-Unjoni, jenħtieġ li l-istituzzjonijiet ta’ kreditu u l-istituzzjonijiet finanzjarji jieħdu miżuri adegwati b’rispons għar-rakkomandazzjonijiet mill-AMLA, inkluż billi jastjenu milli jidħlu jew ikomplu relazzjoni korrispondenti sakemm ma jkunux jistgħu jistabbilixxu miżuri ta’ mitigazzjoni suffiċjenti biex jindirizzaw ir-riskji maħluqa mir-relazzjoni korrispondenti.

(82)

Fil-kuntest tal-miżuri ta’ diliġenza dovuta msaħħa, il-kisba ta’ approvazzjoni mill-maniġment superjuri għat-twaqqif ta’ relazzjonijiet tan-negozju ma għandhiex neċessarjament timplika, fil-każijiet kollha, il-kisba ta’ approvazzjoni mill-bord tad-diretturi. Jenħtieġ li jkun possibbli li tali approvazzjoni tinkiseb minn xi ħadd b’għarfien suffiċjenti dwar l-iskopertura għar-riskju ta’ ħasil tal-flus u ta’ finanzjament tat-terroriżmu tal-istituzzjoni u ta’ anzjanità suffiċjenti sabiex jieħu deċiżjonijiet li jaffettwaw l-iskopertura għar-riskju tagħha.

(83)

Sabiex jiġi protett il-funzjonament xieraq tas-sistema finanzjarja tal-Unjoni kontra l-ħasil tal-flus u l-finanzjament tat-terroriżmu, jenħtieġ li l-Kummissjoni tingħata s-setgħa li tadotta atti delegati bl-għan li tidentifika l-pajjiżi terzi li n-nuqqasijiet tagħhom fir-reġimi nazzjonali tagħhom dwar l-AML/CFT jirrappreżentaw theddida għall-integrità tas-suq intern tal-Unjoni. In-natura li dejjem tinbidel tat-theddid ta’ ħasil tal-flus u ta’ finanzjament tat-terroriżmu minn barra l-Unjoni, iffaċilitata minn evoluzzjoni kostanti tat-teknoloġija u tal-mezzi għad-dispożizzjoni tal-kriminali, teħtieġ li jitwettqu adattamenti rapidi u kontinwi tal-qafas legali fir-rigward tal-pajjiżi terzi sabiex jiġu indirizzati b’mod effiċjenti r-riskji eżistenti u jiġi impedit li jinqalgħu oħrajn ġodda. Jenħtieġ li l-Kummissjoni tqis, bħala linja bażi għall-valutazzjoni tagħha, l-informazzjoni minn organizzazzjonijiet internazzjonali u minn korpi tal-istabbiliment ta’ standards fil-qasam tal-AML/CFT, bħal stqarrijiet pubbliċi tal-FATF, rapporti ta’ evalwazzjoni reċiproka jew ta’ valutazzjoni dettaljata jew rapporti ta’ segwitu ppubblikati, u tadatta l-valutazzjonijiet tagħha għall-bidliet li jkun fihom, fejn xieraq. Jenħtieġ li l-Kummissjoni taġixxi fi żmien 20 jum minn meta taċċerta n-nuqqasijiet fir-reġim tal-AML/CFT ta’ pajjiż terz li joħolqu theddida għall-integrità tas-suq intern tal-Unjoni.

(84)

Pajjiżi terzi “li huma soġġetti għal sejħa għal azzjoni” mill-entità internazzjonali rilevanti li tistabbilixxi l-istandards, jiġifieri (l-FATF) jippreżentaw nuqqasijiet strateġiċi sinifikanti ta’ natura persistenti fl-oqfsa legali u istituzzjonali tagħhom tal-AML/CFT u fl-implimentazzjoni tagħhom li x’aktarx joħolqu riskju għoli għas-sistema finanzjarja tal-Unjoni. In-natura persistenti tan-nuqqasijiet strateġiċi sinifikanti, li jirriflettu n-nuqqas ta’ impenn jew in-nuqqas kontinwu mill-pajjiż terz li jindirizzahom, jindikaw livell ogħla ta’ theddid li jirriżulta minn dawk il-pajjiżi terzi, li jeħtieġ rispons ta’ mitigazzjoni effettiv, konsistenti u armonizzat fil-livell tal-Unjoni. Għalhekk, jenħtieġ li l-entitajiet marbutin b’obbligu jkunu meħtieġa japplikaw is-sett sħiħ ta’ miżuri ta’ diliġenza dovuta msaħħa disponibbli għal tranżazzjonijiet okkażjonali u għal relazzjonijiet tan-negozju li jinvolvu dawk il-pajjiżi terzi b’riskju għoli sabiex jimmaniġjaw u jimmitigaw ir-riskji sottostanti. Barra minn hekk, il-livell għoli ta’ riskju jiġġustifika l-applikazzjoni ta’ kontromiżuri speċifiċi addizzjonali, kemm jekk fil-livell tal-entitajiet marbutin b’obbligu kif ukoll jekk mill-Istati Membri. Approċċ bħal dan jevita d-diverġenza fid-determinazzjoni tal-kontromiżuri rilevanti, li jiskopru s-sistema finanzjarja kollha tal-Unjoni għar-riskji. Fejn l-Istati Membri jidentifikaw riskji speċifiċi li ma jiġux mitigati, jenħtieġ li huma jkunu jistgħu japplikaw kontromiżuri addizzjonali, u li f’dak il-każ jenħtieġ li jinnotifikaw lill-Kummissjoni b’dan. Fejn il-Kummissjoni tqis li dawk ir-riskji huma ta’ rilevanza għas-suq intern, jenħtieġ li hija tkun tista’ taġġorna l-att delegat rilevanti biex jinkludi l-kontromiżuri addizzjonali meħtieġa biex jittaffew dawk ir-riskji. Fejn il-Kummissjoni tqis li dawk il-kontromiżuri mhumiex meħtieġa u jimminaw il-funzjonament tajjeb tas-suq intern tal-Unjoni, jenħtieġ li tingħata s-setgħa li tiddeċiedi li l-Istat Membru jtemm il-kontromiżura speċifika. Qabel ma tiskatta l-proċedura għal dik id-deċiżjoni, jenħtieġ li l-Kummissjoni tipprovdi opportunità lill-Istat Membru kkonċernat biex jippreżenta l-fehmiet tiegħu dwar il-kunsiderazzjoni tal-Kummissjoni. Minħabba l-għarfien espert tekniku tiegħu, l-AMLA jista’ jipprovdi kontribut utli lill-Kummissjoni fl-identifikazzjoni tal-kontromiżuri xierqa.

(85)

Id-dgħufijiet fil-konformità kemm fil-qafas legali kif ukoll f’dak istituzzjonali tal-AML/CFT u fl-implimentazzjoni tiegħu f’pajjiżi terzi li huma soġġetti għal “monitoraġġ akbar” mill-FATF huma suxxettibbli li jiġu sfruttati mill-kriminali. Dan x’aktarx li jirrappreżenta riskju għas-sistema finanzjarja tal-Unjoni, u dak ir-riskju jeħtieġ li jiġi mmaniġġat u mmitigat. L-impenn ta’ dawk il-pajjiżi terzi sabiex jindirizzaw id-dgħufijiet identifikati, filwaqt li ma jeliminawx ir-riskju, jiġġustifika rispons ta’ mitigazzjoni anqas sever minn dak applikabbli għal pajjiżi terzi b’riskju għoli. Fejn tali pajjiżi terzi jimpenjaw ruħhom li jindirizzaw id-dgħufijiet identifikati, jenħtieġ li l-entitajiet marbutin b’obbligu japplikaw miżuri ta’ diliġenza dovuta msaħħa għal tranżazzjonijiet okkażjonali u għal relazzjonijiet tan-negozju meta jittrattaw ma’ persuni fiżiċi jew ma’ entitajiet ġuridiċi stabbiliti f’dawk il-pajjiżi terzi li huma mfasslin għan-nuqqasijiet speċifiċi identifikati f’kull pajjiż terz. Tali identifikazzjoni granulari tal-miżuri ta’ diliġenza dovuta msaħħa li għandhom jiġu applikati, f’konformità mal-approċċ ibbażat fuq ir-riskju, tiżgura wkoll li l-miżuri jkunu proporzjonati għal-livell ta’ riskju. Sabiex jiġi żgurat approċċ konsistenti u proporzjonat bħal dan, jenħtieġ li l-Kummissjoni tkun tista’ tidentifika liema miżuri speċifiċi ta’ diliġenza dovuta msaħħa jkunu meħtieġa sabiex jiġu mmitigati r-riskji speċifiċi għall-pajjiżi. Minħabba l-għarfien espert tekniku tal-AMLA, hija tista’ tipprovdi kontribut utli lill-Kummissjoni sabiex tidentifika l-miżuri mtejbin u xierqa ta’ diliġenza dovuta.

(86)

Pajjiżi li mhumiex identifikati pubblikament bħala suġġetti għal sejħiet għal azzjonijiet jew monitoraġġ akbar mill-FATF xorta jistgħu jkunu ta’ theddida speċifika u serja għall-integrità tas-sistema finanzjarja tal-Unjoni, li tista’ tkun dovuta jew għal nuqqasijiet ta’ konformità jew għal nuqqasijiet strateġiċi sinifikanti ta’ natura persistenti fir-reġim AML/CFT tagħhom. Sabiex jittaffew dawk ir-riskji speċifiċi, li ma jistgħux jittaffew permezz ta’ miżuri applikabbli għal pajjiżi b’nuqqasijiet strateġiċi jew pajjiżi b’dgħufijiet fil-konformità, jenħtieġ li jkun possibbli għall-Kummissjoni li tieħu azzjoni f’ċirkostanzi eċċezzjonali billi tidentifika tali pajjiżi terzi, abbażi ta’ sett ċar ta’ kriterji u bl-appoġġ tal-AMLA. Skont il-livell ta’ riskju ppreżentat għas-sistema finanzjarja tal-Unjoni, jenħtieġ li l-Kummissjoni tirrikjedi l-applikazzjoni jew tal-miżuri kollha ta’ diliġenza dovuta msaħħa u tal-kontromiżuri speċifiċi għall-pajjiżi, fir-rigward ta’ pajjiżi terzi b’riskju għoli, jew ta’ miżuri tad-diliġenza dovuta msaħħa speċifiċi għall-pajjiżi, fir-rigward ta’ pajjiżi terzi bi dgħufijiet fil-konformità.

(87)

Sabiex tiġi żgurata identifikazzjoni konsistenti ta’ pajjiżi terzi li joħolqu theddida speċifika u serja għas-sistema finanzjarja tal-Unjoni, filwaqt li ma jiġux identifikati pubblikament bħala soġġetti għal sejħiet għal azzjonijiet jew monitoraġġ akbar mil-FATF, jenħtieġ li l-Kummissjoni tkun tista’ tistabbilixxi, permezz ta’ at ta’ implimentazzjoni, il-metodoloġija għall-identifikazzjoni f’ċirkostanzi eċċezzjonali ta’ tali pajjiżi terzi. Jenħtieġ li dik il-metodoloġija tinkludi b’mod partikolari kif għandhom jiġu vvalutati l-kriterji u l-proċess għall-interazzjoni ma’tali pajjiżi terzi u għall-involviment tal-Istati Membri u tal-AMLA fl-istadji preparatorji ta’ tali identifikazzjoni.

(88)

Meta jitqies li jista’ jkun hemm bidliet fl-oqfsa AML/CFT tal-pajjiżi terzi identifikati skont dan ir-Regolament, jew fl-implimentazzjoni tagħhom, pereżempju bħala riżultat tal-impenn tal-pajjiż li jindirizza d-dgħufijiet identifikati jew tal-adozzjoni ta’ miżuri tal-AML/CFT rilevanti sabiex jindirizzahom, li jistgħu jbiddlu n-natura u l-livell tar-riskji li jirriżultaw minnhom, jenħtieġ li l-Kummissjoni tirrieżamina regolarment l-identifikazzjoni ta’ dawk il-miżuri mtejbin speċifiċi ta’ diliġenza dovuta sabiex tiżgura li jkunu għadhom proporzjonati u adegwati.

(89)

It-theddid estern potenzjali għas-sistema finanzjarja tal-Unjoni ma jiġix biss minn pajjiżi terzi, iżda jista’ jinħoloq ukoll fir-rigward ta’ fatturi speċifiċi ta’ riskju għall-klijent jew ta’ prodotti, ta’ servizzi, ta’ tranżazzjonijiet jew ta’ kanali ta’ konsenja li jiġu osservati fir-rigward ta’ żona ġeografika speċifika barra mill-Unjoni. Għalhekk, hemm bżonn li jiġu identifikati x-xejriet, ir-riskji u l-metodi tal-ħasil tal-flus u tal-finanzjament tat-terroriżmu li għalihom jistgħu jkunu skoperti l-entitajiet marbutin b’obbligu tal-Unjoni. L-AMLA tinsab fl-aħjar pożizzjoni sabiex tidentifika kwalunkwe tipoloġija emerġenti ta’ ħasil tal-flus u finanzjament tat-terroriżmu minn barra l-Unjoni, sabiex timmonitorja l-evoluzzjoni tagħhom bl-għan li tipprovdi gwida lill-entitajiet marbutin b’obbligu tal-Unjoni dwar il-ħtieġa li japplikaw miżuri ta’ diliġenza dovuta msaħħa mmirati lejn il-mitigazzjoni ta’ tali riskji.

(90)

Ir-relazzjonijiet ma’ individwi li għandhom jew li kellhom karigi pubbliċi importanti, fl-Unjoni jew internazzjonalment, u b’mod partikolari individwi minn pajjiżi fejn il-korruzzjoni hija mifruxa, jistgħu jiskopru lis-settur finanzjarju għal riskji reputazzjonali u legali sinifikanti. L-isforz internazzjonali għall-ġlieda kontra l-korruzzjoni jiġġustifika l-ħtieġa li tingħata attenzjoni partikolari għal tali persuni u li jiġu applikati miżuri msaħħa xierqa ta’ diliġenza dovuta fir-rigward ta’ persuni li jkollhom jew li kellhom karigi pubbliċi prominenti u fir-rigward ta’ persuni b’karigi ta’ livell għoli f’organizzazzjonijiet internazzjonali. Għalhekk, huwa neċessarju li jiġu speċifikati miżuri li l-entitajiet marbutin b’obbligu jenħtieġ li japplikaw fir-rigward ta’ tranżazzjonijiet jew ta’ relazzjonijiet tan-negozju ma’ persuni esposti politikament. Sabiex jiġi ffaċilitat l-approċċ ibbażat fuq ir-riskju, jenħtieġ li l-AMLA tingħata l-kompitu li toħroġ linji gwida dwar il-valutazzjoni tal-livell ta’ riskji assoċjati ma’ kategorija partikolari ta’ persuni esposti politikament, mal-membri tal-familja tagħhom jew ma’ persuni magħrufin bħala assoċjati mill-qrib.

(91)

Ir-riskji assoċjati ma’ persuni li huma jew li kienu fdati b’ funzjonijiet pubbliċi prominenti mhumiex limitati għal-livell nazzjonali iżda jistgħu jeżistu wkoll fil-livelli reġjonali /jew muniċipali. Dan huwa partikolarment minnu fil-livell lokali għal żoni b’densità għolja ta’ popolazzjoni, bħall-ibliet, li flimkien mal-livell reġjonali spiss jimmaniġġjaw fondi pubbliċi sinifikanti u aċċess għal servizzi jew permessi kritiċi, b’riskju li jirriżulta f’korruzzjoni u ħasil tal-flus assoċjat. Għalhekk, jeħtieġ li jiġu inklużi fil-kategorija ta’ persuni li huma jew li kienu fdati b’ funzjonijiet pubbliċi prominenti l-kapijiet tal-awtoritajiet reġjonali u lokali, inkluż gruppi ta’ muniċipalitajiet u reġjuni metropolitani, b’mill-inqas 50 000 abitant. Fl-istess ħin, jenħtieġ li jiġi rikonoxxut li l-ġeografija u l-organizzazzjoni amministrattiva tal-Istati Membri jvarjaw b’mod sinifikanti, u jenħtieġ li l-Istati Membri jkunu jistgħu, fejn xieraq, li jistabbilixxu livell limitu aktar baxx biex ikopri l-awtoritajiet lokali rilevanti abbażi tar-riskju. Fejn l-Istati Membri jiddeċiedu li jistabbilixxu livelli limitu aktar baxxi, jenħtieġ li jikkomunikaw dawk il-livelli limitu aktar baxxi lill-Kummissjoni.

(92)

Il-membri tal-korpi amministrattivi, maniġerjali jew superviżorji ta’ intrapriżi kkontrollati mill-istat jew mill-awtoritajiet reġjonali jew lokali jistgħu jkunu esposti wkoll għal riskji ta’ korruzzjoni u ħasil tal-flus assoċjat. Minħabba d-daqs tal-baġit ta’ tali intrapriżi u l-fondi mmaniġġjati, tali riskji huma partikolarment akuti fir-rigward ta’ membri eżekuttivi għolja f’intrapriżi kkontrollati mill-Istat. Ir-riskji jistgħu jinħolqu wkoll fir-rigward ta’ intrapriżi ta’ daqs sinifikanti kkontrollati mill-awtoritajiet reġjonali u lokali. B’riżultat ta’ dan, l-eżekuttivi superjuri f’intrapriżi kkontrollati minn awtoritajiet reġjonali jew lokali jenħtieġ li jitqiesu bħala persuni esposti politikament meta dawk l-intrapriżi jikkwalifikaw bħala impriżi jew gruppi ta’ daqs medju jew kbar kif definit fl-Artikolu 3 tad-Direttiva 2013/34/UE tal-Parlament Ewropew u tal-Kunsill (25). Madankollu, filwaqt li jirrikonoxxu d-differenzi organizzattivi ġeografiċi u amministrattivi, u s-setgħat u r-responsabbiltajiet assoċjati ma’ dawn l-intrapriżi u l-uffiċjali eżekuttivi għolja tagħhom, jenħtieġ li l-Istati Membri jkunu jistgħu jagħżlu li jistabbilixxu livell limitu tal-fatturat annwali aktar baxx abbażi tar-riskju. F’każ bħal dan, jenħtieġ li l-Istati Membri jinnotifikaw lill-Kummissjoni b’ dik id-deċiżjoni.

(93)

Sabiex jiġu identifikati l-persuni esposti politikament fl-Unjoni, jenħtieġ li jinħarġu listi mill-Istati Membri li jindikaw il-funzjonijiet speċifiċi li, f’konformità mal-liġijiet nazzjonali, mar-regolamenti u mad-dispożizzjonijiet amministrattivi, jikkwalifikaw bħala karigi pubbliċi prominenti. Jenħtieġ li l-Istati Membri jitolbu lil kull organizzazzjoni internazzjonali akkreditata fit-territorji tagħhom sabiex toħroġ u żżomm aġġornata lista ta’ karigi pubbliċi prominenti f’dik l-organizzazzjoni internazzjonali. Jenħtieġ li l-Kummissjoni tingħata l-kompitu li tiġbor u toħroġ lista, li jenħtieġ li tkun valida madwar l-Unjoni kollha, fir-rigward ta’ persuni fdati b’karigi pubbliċi prominenti fl-istituzzjonijiet jew fil-korpi tal-Unjoni. Sabiex jiġi żgurat approċċ armonizzat għall-identifikazzjoni u n-notifika ta’ funzjonijiet pubbliċi prominenti, jenħtieġ li l-Kummissjoni tkun tista’ tistabbilixxi, permezz ta’ att ta’ implimentazzjoni, il-format li għandu jintuża għan-notifiki tal-Istati Membri, u jenħtieġ li tingħata s-setgħa li tadotta atti delegati li jissupplimentaw il-kategoriji ta’ funzjonijiet pubbliċi prominenti identifikati minn dan ir-Regolament, meta dawn ikunu komuni fl-Istati Membri kollha.

(94)

Fejn il-klijenti ma jibqgħux fdati b’kariga pubblika prominenti, xorta jistgħu joħolqu riskju ogħla, pereżempju minħabba l-influwenza informali li xorta jistgħu jeżerċitaw, jew minħabba li l-funzjonijiet preċedenti u attwali tagħhom ikunu marbutin. Huwa essenzjali li l-entitajiet marbutin b’obbligu jqisu dawk ir-riskji kontinwi u japplikaw miżura waħda jew aktar ta’ diliġenza dovuta msaħħa sa dak iż-żmien li l-individwi jitqiesu li ma jippreżentaw l-ebda riskju ulterjuri, u fi kwalunkwe każ għal mhux anqas minn 12-il xahar minn meta jieqfu jokkupaw kariga pubblika prominenti.

(95)

Il-kumpaniji tal-assigurazzjoni spiss ma jkollhomx relazzjonijiet ma’ klijenti li jkunu benefiċjarji tal-poloz tal-assigurazzjoni. Madankollu, jenħtieġ li jkunu jistgħu jidentifikaw każijiet ta’ riskju ogħla, bħal meta r-rikavat tal-politika jkun ta’ benefiċċju għal persuna esposta politikament. Sabiex jiġi ddeterminat jekk dan ikunx il-każ, jenħtieġ li l-polza tal-assigurazzjoni tinkludi miżuri raġonevoli sabiex jiġi identifikat il-benefiċjarju, daqslikieku dik il-persuna kienet klijent ġdid. Jenħtieġ li jkun possibbli li tali miżuri jittieħdu fiż-żmien tal-iżborż jew fiż-żmien tal-assenjazzjoni tal-politika, iżda mhux aktar tard.

(96)

Relazzjonijiet privati u professjonali mill-qrib jistgħu jiġu abbużati għal finijiet ta’ ħasil tal-flus u ta’ finanzjament tat-terroriżmu. Għal dik ir-raġuni, jenħtieġ li l-miżuri li jikkonċernaw persuni esposti politikament japplikaw ukoll għall-membri tal-familja tagħhom u għall-persuni magħrufin bħala assoċjati mill-qrib. L-identifikazzjoni xierqa tal-membri tal-familja u tal-persuni magħrufin bħala assoċjati mill-qrib tista’ tiddependi fuq l-istruttura soċjoekonomika u kulturali tal-pajjiż tal-persuna esposta politikament. F’dan l-isfond, jenħtieġ li l-AMLA jkollha l-kompitu li toħroġ linji gwida dwar il-kriterji li għandhom jintużaw sabiex jiġu identifikati persuni li jenħtieġ li jitqiesu bħala assoċjati mill-qrib.

(97)

Ir-relazzjonijiet mal-membri tal-familja li jistgħu jiġu abbużati minn persuni esposti politikamentma jkoprux biss dawk mall-ġenituri u d-dixxendenti iżda jista’ jinkludi wkoll dawk mal-aħwa. Dan huwa partikolarment il-każ għal kategoriji ta’ persuni esposti politikament li għandhom pożizzjonijiet għolja tal-gvern ċentrali. Madankollu, b’rikonoxximent tal-istrutturi soċjoekonomiċi u kulturali differenti li jeżistu fil-livell nazzjonali, li jistgħu jinfluwenzaw il-potenzjal ta’ abbuż ta’ relazzjonijiet bejn aħwa, jenħtieġ li l-Istati Membri jkunu jistgħu japplikaw kamp ta’ applikazzjoni usa’ għall-ħatra ta’ aħwa bħala membri tal-familja ta’ persuni esposti politikament biex itaffu b’mod adegwat ir-riskji ta’ abbuż ta’ dawk ir-relazzjonijiet. Fejn l-Istati Membri jiddeċiedu li japplikaw kamp ta’ applikazzjoni usa’, jenħtieġ li jikkomunikaw id-dettalji ta’ dak il-kamp ta’ applikazzjoni usa’ lill-Kummissjoni.

(98)

Ir-rekwiżiti li jirrigwardaw persuni esposti politikament, il-membri tal-familja u l-persuni magħrufa li huma assoċjati mill-qrib tagħhom huma ta’ natura preventiva u mhux kriminali, u jenħtieġ li ma jiġux interpretati li jimplikaw li l-persuni politikament esposti, il-membri tal-familja tagħhom jew assoċjati mill-qrib huma involuti f’attività kriminali. Ir-rifjut ta’ relazzjoni tan-negozju ma’ persuna sempliċiment abbażi ta’ determinazzjoni li tkun persuna esposta politikament jew membri tal-familja jew persuna magħrufa li hija assoċjat mill-qrib ta’ persuna esposta politikament imur kontra l-kliem u l-ispirtu ta’ dan ir-Regolament.

(99)

Minħabba l-vulnerabbiltà tal-iskemi ta’ residenza b’investiment għall-ħasil tal-flus, għar-reati fiskali, għall-korruzzjoni u l-evażjoni tas-sanzjonijiet, kif ukoll it-theddid sinifikanti potenzjali assoċjat għas-sigurtà għall-Unjoni kollha kemm hi, huwa xieraq li l-entitajiet marbutin b’obbligu jwettqu, bħala minimu, diliġenza dovuta msaħħa speċifika fir-rigward tal-klijenti li huma ċittadini ta’ pajjiżi terzi li jkunu fil-proċess li japplikaw għal drittijiet ta’ residenza fi Stat Membru fil-qafas ta’ dawk l-iskemi.

(100)

Il-forniment ta’ servizzi ta’ ġestjoni tal-assi personalizzati lil individwi b’livell għoli ta’ ġid jista’ jesponi lill-istituzzjonijiet ta’ kreditu, l-istituzzjonijiet finanzjarji u lill-fornituri ta’ servizzi ta’ trusts jew kumpaniji għal riskji speċifiċi inkluż dawk li jirriżultaw min-natura kumplessa u spiss personalizzata ta’ tali servizzi. Għalhekk huwa meħtieġ li jiġi speċifikat sett ta’ miżuri ta’ diliġenza dovuta msaħħa li jenħtieġ li jiġu applikati, bħala minimu, fejn tali relazzjonijiet tan-negozju jitqiesu li joħolqu riskju għoli ta’ ħasil tal-flus, reati predikati tiegħu jew finanzjament tat-terroriżmu. Id-determinazzjoni li klijent ikollu assi b’valur ta’ mill-inqas EUR 50 000 000, jew l-ekwivalenti fil-munita nazzjonali jew f’munita barranija, tqis assi finanzjarju u investibbli inkluż flus kontanti u ekwivalenti ta’ flus kontanti, kemm jekk miżmuma bħala depożiti jew fi prodotti ta’ tfaddil, kif ukoll investimenti bħal stokks, bonds u fondi mutwi, anke meta jinżammu taħt ftehimiet fit-tul ma’ dik l-entità marbuta b’obbligu. Barra minn hekk, jenħtieġ li jitqies il-valur tal-assi ta’ proprjetà immobbli tal-klijent, bl-esklużjoni tar-residenza privata tiegħu. Għall-finijiet li ssir dik id-determinazzjoni, l-istituzzjonijiet ta’ kreditu, l-istituzzjonijiet finanzjarji u l-fornituri ta’ servizzi ta’ trusts jew kumpaniji ma għandhomx għalfejn iwettqu jew jitolbu kalkolu preċiż tal-ġid totali tal-klijent. Minflok, jenħtieġ li tali entitajiet jieħdu miżuri biex jistabbilixxu jekk klijent għandux assi b’valur ta’ mill-inqas EUR 50 000 000, jew l-ekwivalenti fil-munita nazzjonali jew f’munita barranija, f’assi finanzjarji, investibbli jew ta’ proprjetà immobbli.

(101)

Sabiex jiġu evitati proċeduri ripetuti ta’ identifikazzjoni tal-klijenti, huwa xieraq, soġġett għal salvagwardji xierqa, li l-entitajiet marbutin b’obbligu jitħallew jiddependu fuq l-informazzjoni dwar il-klijenti miġbura minn entitajiet marbutin b’obbligu oħrajn. Meta entità marbuta b’obbligu tibbaża fuq entità marbuta b’obbligu oħra, jenħtieġ li r-responsabbiltà aħħarija għad-diliġenza dovuta fir-rigward tal-klijenti tibqa’ tal-entità marbuta b’obbligu li tagħżel li tiddependi fuq id-diliġenza dovuta fir-rigward tal-klijenti imwettqa minn entità marbuta b’obbligu oħra. Jenħtieġ li l-entità marbuta b’obbligu li qagħdet fuqha żżomm ukoll ir-responsabbiltà tagħha stess għall-konformità mar-rekwiżiti dwar l-AML/CFT, inkluż ir-rekwiżit li tirrapporta tranżazzjonijiet suspettużi u żżomm rekords.

(102)

L-introduzzjoni ta’ rekwiżiti tal-AML/CFT armonizzati madwar l-Unjoni, inkluż fir-rigward ta’ politiki u proċeduri għall-grupp kollu, l-iskambju ta’ informazzjoni u d-dipendenza tippermetti lill-entitajiet marbutin b’obbligu li joperaw fi ħdan grupp jingranaw sal-massimu s-sistemi fis-seħħ fi ħdan dak il-grupp f’sitwazzjonijiet li jikkonċernaw lill-istess klijenti. Dawk ir-regoli ma jippermettux biss l-implimentazzjoni konsistenti u effiċjenti tar-regoli dwar l-AML/CFT fil-grupp kollu iżda jibbenefikaw ukoll minn ekonomiji ta’ skala fil-livell tal-grupp, pereżempju billi jagħmluha possibbli għall-entitajiet marbutin b’obbligu fil-grupp li jiddependu fuq l-eżiti tal-proċessi adottati minn entitajiet marbutin b’obbligu oħra fil-grupp biex jikkonformaw mar-rekwiżiti tagħhom ta’ identifikazzjoni u verifika tal-klijenti.

(103)

Sabiex id-dipendenza fuq miżuri mwettqa minn partij terza tjiffunzjona b’mod effiċjenti, hija meħtieġa aktar ċarezza dwar il-kundizzjonijiet li skont dawn isseħħ tali dipendenza. Jenħtieġ li l-AMLA jkollha l-kompitu li tiżviluppa linji gwida dwar il-kundizzjonijiet li fihom tista’ sseħħ id-dipendenza ta’ partijiet terzi, kif ukoll ir-rwoli u r-responsabbiltajiet tal-partijiet rispettivi. Sabiex jiġi aċċertat li tiġi żgurata sorveljanza konsistenti ta’ dipendenza fl-Unjoni kollha, jenħtieġ li dak il-linji gwida jipprovdu wkoll ċarezza dwar kif is-superviżuri jenħtieġ li jqisu tali prattiki u jivverifikaw il-konformità mar-rekwiżiti dwar l-AML/CFT fejn l-entitajiet marbutin b’obbligu jirrikorru għal dawk il-prattiki.

(104)

Il-kunċett ta’ sjieda benefiċjarja ġie introdott sabiex tiżdied it-trasparenza ta’ strutturi korporattivi kumplessi. Il-ħtieġa għall-aċċessar ta’ informazzjoni akkurata, aġġornata u adegwata dwar is-sid benefiċjarju hija fattur importanti fit-traċċar ta’ kriminali li, kieku, ikunu jistgħu jaħbu l-identità tagħhom wara strutturi opaki bħal dawn. L-Istati Membri bħalissa huma meħtieġa jiżguraw li l-entitajiet korporattivi u entitajiet ġuridiċi oħrajn, kif ukoll it-trusts espressi u arranġamenti ġuridiċi simili oħrajn, jiksbu u jżommu informazzjoni adegwata, akkurata u aġġornata dwar is-sjieda benefiċjarja tagħhom. Madankollu, il-grad ta’ trasparenza impost mill-Istati Membri jvarja. Ir-regoli huma soġġetti għal interpretazzjonijiet diverġenti, u dan jirriżulta f’metodi differenti sabiex jiġu identifikati s-sidien benefiċjarji ta’ entità ġuridika jew ta’ arranġament ġuridiku partikolari. Dan huwa dovut, fost l-oħrajn, għal metodi inkonsistenti ta’ kalkolu tas-sjieda indiretta ta’ entità ġuridika jew arranġament ġuridiku, u differenzi bejn is-sistemi legali tal-Istati Membri. Dan ifixkel it-trasparenza li kienet maħsuba li tinkiseb. Għalhekk, huwa neċessarju li jiġu ċċarati r-regoli sabiex tinkiseb definizzjoni konsistenti ta’ sid benefiċjarju u sabiex din tiġi applikata fis-suq intern kollu.

(105)

L-applikazzjoni tar-regoli għall-identifikazzjoni tas-sjieda benefiċjarja ta’ entitajiet ġuridiċi, kif ukoll ta’ arranġamenti ġuridiċi, tista’ tagħti lok għal mistoqsijiet ta’ implimentazzjoni meta l-partijiet interessati rilevanti jkunu kkonfrontati b’każijiet konkreti, speċjalment f’każijiet ta’ strutturi korporattivi kumplessi, fejn il-kriterji ta’ interess tas-sjieda u kontroll jikkoeżistu, jew għall-finijiet tad-determinazzjoni ta’ sjieda jew kontroll indirett. Sabiex tappoġġa l-applikazzjoni ta’ dawk ir-regoli minn entitajiet ġuridiċi, trustees jew persuni li għandhom pożizzjoni ekwivalenti f’arranġamenti ġuridiċi simili u entitajiet marbutin b’obbligu, u konsistenti mal-għan ta’ armonizzazzjoni ta’ dan ir-Regolament, jenħtieġ li jkun possibbli għall- Kummissjoni li tadotta linji gwida li jistabbilixxu kif jenħtieġ li jiġu applikati r-regoli għall-identifikazzjoni tas-sidien benefiċjarji f’xenarji differenti għandhom jiġu applikati, inkluż permezz tal-użu ta’ eżempji ta’ każijiet.

(106)

Identifikazzjoni sinifikattiva tas-sidien benefiċjarji teħtieġ determinazzjoni ta’ jekk il-kontroll ikunx eżerċitat permezz ta’ mezzi oħrajn. Id-determinazzjoni tal-eżistenza ta’ interess ta’ sjieda jew ta’ kontroll permezz ta’ interess ta’ sjieda hija neċessarja iżda ma hijiex biżżejjed u ma t teskludix il-ħtieġa ta’ kontrolli neċessarji sabiex jiġu determinati s-sidien benefiċjarji. It-test dwar jekk kwalunkwe persuna fiżika teżerċitax kontroll permezz ta’ mezzi oħrajn ma huwiex test sussegwenti li għandu jitwettaq biss fejn ma jkunx possibbli li jiġi ddeterminat interess ta’ sjieda. Iż-żewġ testijiet, jiġifieri dak tal-eżistenza ta’ interess ta’ sjieda jew ta’ kontroll permezz ta’ interess ta’ sjieda u dak tal-kontroll permezz ta’ mezzi oħrajn, jenħtieġ li jitwettqu b’mod parallel.

(107)

Sjieda ta’ 25 % jew aktar tal-ishma jew tad-drittijiet tal-vot jew ta’ interess ta’ sjieda ieħor b’mod ġenerali tistabbilixxi s-sjieda benefiċjarja ta’ entità korpotattiva. L-interess ta’ sjieda jenħtieġ li jinkludi kemm id-drittijiet ta’ kontroll kif ukoll id-drittijiet li huma sinifikanti f’termini ta’ riċeviment ta’ benefiċċju, bħal dritt għal sehem mill-profitti jew riżorsi interni oħra jew bilanċ ta’ likwidazzjoni. Madankollu, jista’ jkun hemm sitwazzjonijiet fejn ir-riskju li ċerti kategoriji ta’ entitajiet korporattivi jintużaw ħażin għal skopijiet ta’ ħasil tal-flus jew ta’ finanzjament tat-terroriżmu jkun ogħla, pereżempju minħabba s-setturi speċifiċi ta’ riskju ogħla li fihom joperaw dawk l-entitajiet korporattivi. F’sitwazzjonijiet bħal dawn, huma meħtieġa miżuri ta’ trasparenza msaħħa biex jiskoraġġixxu lill-kriminali milli jistabbilixxu jew jinfiltraw dawk l-entitajiet, jew permezz ta’ sjieda jew kontroll dirett jew indirett. Sabiex jiġi żgurat li l-Unjoni tkun tista’ timmitiga b’mod adegwat tali livelli differenti ta’ riskju, huwa meħtieġ li l-Kummissjoni tingħata s-setgħa li tidentifika dawk il-kategoriji ta’ entitajiet korporattivi li jenħtieġ li jkunu soġġetti għal livelli limitu ta’ trasparenza ta’ benefiċċju aktar baxxi. Għal dak l-għan, jenħtieġ li l-Istati Membri jinfurmaw lill-Kummissjoni fejn jidentifikaw kategoriji ta’ entitajiet korporattivi li huma esposti għal riskji ogħla ta’ ħasil tal-flus u ta’ finanzjament tat-terroriżmu. F’dawk in-notifiki, jenħtieġ li jkun possibbli għall-Istati Membri li jindikaw livelli limitu ta’ sjieda aktar baxx li huma jqisu li jista’ jtaffi dawk ir-riskji. Tali identifikazzjoni jenħtieġ li tkun kontinwa u jenħtieġ li tiddependi fuq ir-riżultati tal-valutazzjoni tar-riskju fil-livell tal-Unjoni u tal-valutazzjoni tar-riskju nazzjonali kif ukoll fuq analiżijiet u rapporti rilevanti prodotti mill-AMLA, mill-Europol jew minn korpi oħra tal-Unjoni li għandhom rwol fil-prevenzjoni, l-investigazzjoni u l-prosekuzzjoni tal-ħasil tal-flus u l-finanzjament tat-terroriżmu. Dak il-livell limitu aktar baxx jenħtieġ li jkun ta’ livell baxx biżżejjed biex itaffi r-riskji ogħla li entitajiet korporattivi jintużaw ħażin għal finijiet kriminali. Għal dak l-għan, jenħtieġ li b’mod ġenerali dak il-livell limitu aktar baxx ma jiġix stabbilit għal aktar minn 15 % tal-ishma jew tad-drittijiet tal-vot jew interess proprjetarju ieħor. Madankollu, jista’ jkun hemm każijiet li fihom, abbażi ta’ valutazzjoni sensittiva għar-riskju, livell limitu ogħla jkun aktar proporzjonat biex jiġu indirizzati r-riskji identifikati. F’dawk il-każijiet, jenħtieġ li jkun possibbli għall-Kummissjoni li tistabbilixxi l-livell limitu ta’ bejn 15 % u 25 % tal-interess proprjetarju.

(108)

Minħabba n-natura kumplessa tagħhom, is-sjieda b’diversi livelli u l-istrutturi ta’ kontroll jagħmlu l-identifikazzjoni ta’ sidien benefiċjarji aktar diffiċli. Il-kunċett ta’ “struttura ta’ sjieda jew kontroll” huwa maħsub biex jiddeskrivi l-mod li bih entità ġuridika tkun indirettament proprjetà ta’ jew ikkontrollata, jew li fih arranġament ġuridiku jkun ikkontrollat indirettament, bħala riżultat tar-relazzjonijiet li jeżistu bejn entitajiet ġuridiċi jew arranġamenti f’diversi saffi. Sabiex jiġi żgurat approċċ konsistenti fis-suq intern kollu, jeħtieġ li jiġu ċċarati r-regoli li japplikaw għal dawk is-sitwazzjonijiet. Għal dak l-għan, huwa meħtieġ li jiġi vvalutat simultanjament jekk kwalunkwe persuna fiżika għandhiex parteċipazzjoni azzjonarja diretta jew indiretta b’25 % jew aktar tal-ishma jew tad-drittijiet tal-vot jew interess proprjetarju ieħor, u jekk kwalunkwe persuna fiżika tikkontrollax l-azzjonist dirett b’25 % jew aktar tal-ishma jew tad-drittijiet tal-vot jew interess proprjetarju ieħor fl-entità korporattiva. Fil-każ ta’ parteċipazzjoni azzjonarja indiretta, jenħtieġ li s-sidien benefiċjarji jiġu identifikati billi jiġu mmultiplikati l-ishma fil-katina tas-sjieda. Għal dak l-għan, l-ishma kollha li huma direttament jew indirettament proprjetà tal-istess persuna fiżika jenħtieġ li jingħaddu flimkien. Dan jeħtieġ li titqies il-parteċipazzjoni azzjonarja f’kull livell ta’ sjieda. Meta 25 % tal-ishma jew tad-drittijiet tal-vot jew interess proprjetarju ieħor fl-entità korporattiva jkunu proprjetà ta’ azzjonist li jkun entità ġuridika għajr entità korporattiva, jenħtieġ li s-sjieda benefiċjarja tiġi ddeterminata b’kunsiderazzjoni tal-istruttura speċifika tal-azzjonist, inkluż jekk kwalunkwe persuna fiżika teżerċitax kontroll permezz ta’ mezzi oħra fuq azzjonist.

(109)

Id-determinazzjoni tas-sid benefiċjarju ta’ entità korporattiva f’sitwazzjonijiet fejn l-ishma tal-entità korporattiva jinżammu arranġament ġuridiku, jew meta jkunu miżmuma minn fondazzjoni jew entità ġuridika simili, tista’ tkun aktar diffiċli fid-dawl tan-natura u l-kriterji ta’ identifikazzjoni differenti tas-sjieda benefiċjarja bejn l-entitajiet ġuridiċi u l-arranġamenti ġuridiċi. Għalhekk huwa meħtieġ li jiġu stabbiliti regoli ċari biex jiġu indirizzati dawk is-sitwazzjonijiet ta’ struttura b’diversi livelli. F’każijiet bħal dawn, is-sidien benefiċjarji kollha tal-arranġament ġuridiku, jew ta’ entità ġuridika t simili bħal fondazzjoni, jenħtieġ li jkunu s-sidien benefiċjarji tal-entità korporattiva li l-ishma tagħha huma miżmuma fl-arranġament ġuridiku jew miżmuma mill-fondazzjoni.

(110)

Fehim komuni tal-kunċett ta’ kontroll u definizzjoni aktar preċiża tal-mezzi ta’ kontroll huma meħtieġa biex tiġi żgurata l-applikazzjoni konsistenti tar-regoli fis-suq intern kollu. Il-kontroll jenħtieġ li jinftiehem bħala l-kapaċità effettiva li wieħed jimponi r-rieda tiegħu fuq it-teħid tad-deċiżjonijiet tal-entità korporattiva dwar kwistjonijiet sostantivi. Il-mezz normali ta’ kontroll huwa sehem maġġoritarju tad-drittijiet tal-vot. Il-pożizzjoni tas-sid benefiċjarju tista’ tiġi stabbilita wkoll permezz ta’ kontroll permezz ta’ mezzi oħra mingħajr ma jkollha interess proprjetarju sinifikanti, jew kwalunkwe interess proprjetarju. Għal dik ir-raġuni, sabiex jiġu aċċertati l-individwi kollha li huma sidien benefiċjarji ta’ entità ġuridika, il-kontroll jenħtieġ li jiġi identifikat indipendentement mill-interess proprjetarju. Il-kontroll jista’ ġeneralment jiġi eżerċitat bi kwalunkwe mezz, inklużi mezzi legali u mhux legali. Dawk il-mezzi jistgħu jitqiesu għall-valutazzjoni ta’ jekk jiġix eżerċitat kontroll permezz ta’ mezzi oħra, skont is-sitwazzjoni speċifika ta’ kull entità ġuridika.

(111)

Is-sjieda jew il-kontroll indirett jista’ jiġi determinat minn diversi ħoloq f’katina jew minn diversi ktajjen individwali jew interkonnessi. Ħolqa f’katina tista’ tkun kwalunkwe persuna fiżika jew ġuridika jew arranġament ġuridiku. Ir-relazzjonijiet bejn ir-rabtiet jistgħu jikkonsistu f’interess proprjetarju jew drittijiet tal-vot jew mezzi oħra ta’ kontroll. F’każijiet bħal dawn, fejn l-interess proprjetarju u l-kontroll jeżistu flimkien fl-istruttura tas-sjieda, hija meħtieġa regoli speċifiki u dettaljati dwar l-identifikazzjoni tas-sjieda benefiċjarja biex jiġi appoġġat approċċ armonizzat għall-identifikazzjoni tas-sidien benefiċjarji.

(112)

Sabiex tiġi żgurata trasparenza effettiva, jenħtieġ li l-usa’ firxa possibbli ta’ entitajiet ġuridiċi u ta’ arranġamenti ġuridiċi maħluqin jew stabbiliti fit-territorju tal-Istati Membri tkun koperta b’regoli dwar is-sjieda benefiċjarja. Dak jinkludi entitajiet korporattivi, li huma karatterizzati mill-possibbiltà li jkollhom interess ta’ sjieda fihom, kif ukoll entitajiet ġuridiċi oħrajn u arranġamenti ġuridiċi simili għat-trusts espressi. Minħabba d-differenzi fl-ordinamenti ġuridiċi tal-Istati Membri, dawk il-kategoriji wisgħin jinkludu varjetà ta’ strutturi organizzazzjonali differenti. Jenħtieġ li l-Istati Membri jinnotifikaw lill-Kummissjoni lista tat-tipi ta’ entitajiet ġuridiċi fejn is-sidien benefiċjarji jiġu identifikati f’konformità mar-regoli għall-identifikazzjoni tas-sidien benefiċjarji kemm għall-entitajiet korporattivi kif ukoll entitajiet legali oħrajn.

(113)

In-natura speċifika ta’ ċerti entitajiet ġuridiċi, bħal assoċjazzjonijiet, trade unions, partiti politiċi jew knejjes, ma tirriżultax f’identifikazzjoni sinifikanti ta’ sidien benefiċjarji ibbażat fuq interessi ta’ sjieda jew sħubija. Madankollu, f’dawk il-każijiet, jista’ jkun il-każ li l-uffiċjali maniġerjali superjuri jeżerċitaw kontroll fuq l-entità ġuridika permezz ta’ mezzi oħra. F’dawk il-każijiet, jenħtieġ li tali uffiċjali jiġu rrapportati bħala s-sidien benefiċjarji.

(114)

Sabiex tiġi żgurata l-identifikazzjoni konsistenti tas-sidien benefiċjarji ta’ trusts espressi u ta’ entitajiet ġuridiċi simili, bħal fondazzjonijiet, jew arranġamenti ġuridiċi simili, huwa neċessarju li jiġu stabbiliti regoli armonizzati dwar is-sjieda benefiċjarja. Jenħtieġ li l-Istati Membri jkunu meħtieġa jinnotifikaw lill-Kummissjoni lista tat-tipi ta’ entitajiet ġuridiċi u ta’ arranġamenti ġuridiċi simili għat-trusts espressi fejn is-sidien benefiċjarji jiġu identifikati skont l-identifikazzjoni tas-sidien benefiċjarji għal trusts espressi u għal entitajiet jew għal arranġamenti ġuridiċi simili. Jenħtieġ li l-Kummissjoni tkun tista’ tadotta, permezz ta’ att ta’ implimentazzjoni, lista ta’ arranġamenti ġuridiċi u ta’ entitajiet ġuridiċi rregolati mil-liġi tal-Istati Membri, li jkollhom struttura jew funzjoni simili għat-trusts espressi.

(115)

It-trusts diskrezzjonarji jippermettu d-diskrezzjoni lill-fiduċjarjui tagħhom dwar l-allokazzjoni tal-assi fiduċjarji jew il-benefiċċji derivati minnhom. Bħala tali, l-ebda benefiċjarju jew klassi ta’ benefiċjarji ma jiġi ddeterminat mill-bidu nett, iżda pjuttost grupp ta’ persuni li minnhom it-trustees jistgħu jagħżlu l-benefiċjarji, jew persuni li jsiru benefiċjarji jekk it-trustees ma jeżerċitawx id-diskrezzjoni tagħhom. Kif rikonoxxut mir-reviżjoni reċenti tal-istandards tal-FATF rigward l-arranġamenti ġuridiċi, tali diskrezzjoni tista’ tintuża ħażin u tippermetti t-tfixkil tas-sidien benefiċjarji jekk ma jiġix impost livell minimu ta’ trasparenza għal trusts diskrezzjonarji, peress li t-trasparenza fuq il-benefiċjarji tinkiseb biss meta tiġi eżerċitata d-diskrezzjoni tat-trustees. Għalhekk, sabiex tiġi żgurata trasparenza adegwata u konsistenti għat-tipi kollha ta’ arranġamenti ġuridiċi, huwa importanti li fil-każ ta’ trusts diskrezzjonarji tinġabar ukoll informazzjoni dwar l-oġġetti ta’ setgħa ta’ fiduċjarju, u dwar ir-riċevituri awtomatiċi li jirċievu l-assi jew il-benefiċċji jekk it-trustees jonqsu milli jeżerċitaw id-diskrezzjoni tagħhom. Hemm sitwazzjonijiet fejn oġġetti ta’ setgħa jew riċevituri awtomatiċi jistgħu ma jiġux identifikati individwalment, iżda bħala klassi. F’dawk il-każijiet, jenħtieġ li tinġabar informazzjoni dwar il-klassi, kif ukoll informazzjoni dwar il-persuni individwali li jintgħażlu mill-klassi

(116)

Il-karatteristiċi ta’ trusts espressi u arranġamenti ġuridiċi simili fl-Istati Membri jvarjaw. Sabiex jiġi żgurat approċċ armonizzat, huwa xieraq li jiġu stabbiliti prinċipji komuni għall-identifikazzjoni ta’ tali arranġamenti. Trusts espressi huma trusts stabbiliti fuq l-inizjattiva tas-settlor. It-trusts stabbiliti bil-liġi jew li ma jirriżultawx mill-intenzjoni espliċita tas-settlor li jistabbilihom jenħtieġ li jiġu esklużi mill-kamp ta’ applikazzjoni ta’ dan ir-Regolament. Trust espressi normalment huma stabbiliti fil-forma ta’ dokument bħal att bil-miktub jew strument ta’ fiduċja bil-miktub u normalment tissodisfa ħtieġa ta’ negozju jew personali. Arranġamenti ġuridiċi simili għal trusts espressi huma arranġamenti mingħajr personalità ġuridika li huma simili fl-istruttura jew fil-funzjonijiet. Il-fattur determinanti mhuwiex id-deżinjazzjoni tat-tip ta’ arranġament ġuridiku, iżda l-issodisfar tal-karatteristiċi bażiċi tad-definizzjoni ta’ trust espress, jiġifieri l-intenzjoni tas-settlor li jqiegħed l-assi taħt l-amministrazzjoni u l-kontroll ta’ ċerta persuna għal skop speċifikat, normalment ta’ negozju jew ta’ natura personali, bħall-benefiċċju tal-benefiċjarji. Sabiex tiġi żgurata l-identifikazzjoni konsistenti tas-sidien benefiċjarji ta’ arranġamenti ġuridiċi simili għal trusts espressi, jenħtieġ li l-Istati Membri jinnotifikaw lill-Kummissjoni b’lista tat-tipi ta’ arranġamenti ġuridiċi simili għal trusts espressi. Tali notifika jenħtieġ li tkun akkumpanjata minn valutazzjoni li tiġġustifika l-identifikazzjoni ta’ ċerti arranġamenti ġuridiċi bħala simili għal trusts espressi kif ukoll tispjega għaliex arranġamenti ġuridiċi oħra tqiesu li mhumiex simili fl-istruttura jew fil-funzjoni għal trusts espressi. Fit-twettiq ta’ tali valutazzjoni, l-Istati Membri jenħtieġ li jqisu l-arranġamenti ġuridiċi kollha li huma rregolati skont il-liġi tagħhom.

(117)

F’xi każijiet ta’ ta’ xi tipi ta’entitajiet ġuridiċi, bħal fondazzjonijiet, trusts espressi u arranġamenti ġuridiċi simili, mhuwiex possibbli li jiġu identifikati benefiċjarji individwali għaliex għad iridu jiġu ddeterminati. F’tali każijiet, jenħtieġ li l-informazzjoni dwar is-sjieda benefiċjarja, minflok, tinkludi deskrizzjoni tal-klassi ta’ benefiċjarji u l-karatteristiċi tagħha. Malli jiġu ddeżinjati l-benefiċjarji fil-klassi, dawn ikunu sidien benefiċjarji. Barra minn hekk, hemm tipi speċifiċi ta’ persuni ġuridiċi u arranġamenti ġuridiċi fejn jeżistu l-benefiċjarji, iżda fejn il-piż tal-identifikazzjoni tagħhom mhuwiex proporzjonat għar-riskji tal-ħasil tal-flus u tal-finanzjament tat-terroriżmu assoċjati ma’ dawk il-persuni ġuridiċi jew arranġamenti ġuridiċi. Dan huwa l-każ fir-rigward ta’ prodotti regolati bħal skemi tal-pensjonijiet fil-kamp ta’ applikazzjoni tad-Direttiva (UE) 2016/2341 tal-Parlament Ewropew u tal-Kunsill (26), u jista’ jkun il-każ, pereżempju, fir-rigward ta’ skemi ta’ sjieda finanzjarja jew parteċipazzjoni tal-impjegati, jew entitajiet ġuridiċi jew arranġament ġuridiku mingħajr skop ta’ qligħ jew bi skop ta’ karità, dment li r-riskji assoċjati ma’ tali persuni ġuridiċi jew arranġamenti ġuridiċi jkunu baxxi. F’dawk il-każijiet, jenħtieġ li l-identifikazzjoni tal-klassi ta’ benefiċjarji tkun biżżejjed.

(118)

L-iskemi tal-pensjonijiet irregolati mid-Direttiva (UE) 2016/2341 huma prodotti regolati li huma soġġetti għal standards superviżorji stretti u li jippreżentaw riskji baxxi ta’ ħasil tal-flus u finanzjament tat-terroriżmu. Fejn jiġu stabbiliti tali skemi tal-pensjonijiet fil-forma ta’ arranġament ġuridiku, il-benefiċjarji tiegħu jkunu impjegati u ħaddiema li jiddependu fuq dawk il-prodotti, marbuta mal-kuntratti ta’ impjieg tagħhom, għall-ġestjoni tal-benefiċċji tal-irtirar tagħhom. Minħabba n-natura speċifika tal-benefiċċju tal-irtirar, li jġorr riskju baxx ta’ ħasil tal-flus u finanzjament tat-terroriżmu, ma jkunx proporzjonat li tintalab l-identifikazzjoni ta’ kull wieħed minn dawk il-benefiċjarji, u l-identifikazzjoni tal-klassi u l-karatteristika tagħha jenħtieġ li tkun biżżejjed biex jiġu ssodisfati l-obbligi ta’ trasparenza.

(119)

Sabiex tiġi żgurata l-identifikazzjoni konsistenti tas-sidien benefiċjarji ta’ impriżi ta’ investiment kollettiv, huwa neċessarju li jiġu stabbiliti regoli armonizzati dwar is-sjieda benefiċjarja. Irrispettivament minn jekk l-impriżi ta’ investiment kollettiv jeżistux fl-Istat Membru fil-forma ta’ entità ġuridika b’personalità ġuridika, bħala arranġament ġuridiku mingħajr personalità ġuridika, jew fi kwalunkwe forma oħra, jenħtieġ li l-approċċ għall-identifikazzjoni tas-sid benefiċjarju jkun konsistenti mal-iskop u l-funzjoni tagħhom.

(120)

Approċċ konsistenti għar-reġim tat-trasparenza tas-sjieda benefiċjarja jeħtieġ ukoll li jiġi żgurat li tinġabar l-istess informazzjoni dwar is-sidien benefiċjarji fis-suq intern kollu. Huwa xieraq li jiġu introdotti rekwiżiti preċiżi dwar l-informazzjoni li għandha tinġabar f’kull każ. Dik l-informazzjoni tinkludi sett minimu ta’ data personali rigward is-sid benefiċjarju, informazzjoni dwar in-natura u l-firxa tal-interess benefiċjarju miżmum fl-entità ġuridika jew fl-arranġament ġuridiku, u informazzjoni dwar l-entità ġuridika jew l-arranġament ġuridiku, meħtieġa biex tiġi żgurata l-identifikazzjoni xierqa tal-persuna fiżika li hija s-sid benefiċjarju u r-raġunijiet għaliex dik il-persuna fiżika ġiet identifikata bħala s-sid benefiċjarju.

(121)

Qafas effettiv ta’ trasparenza tas-sjieda benefiċjarja jirrikjedi li l-informazzjoni tinġabar permezz ta’ diversi mezzi. Tali approċċ fuq diversi binarji jinkludi l-informazzjoni miżmuma mill-entità ġuridika jew fiduċjarju ta’ trust espress jew persuni li għandhom pożizzjoni ekwivalenti arranġament ġuridikuarranġament ġuridiku simili huma stess, l-informazzjoni miksuba mill-entitajiet marbutin b’obbligu fil-kuntest tad-diliġenza dovuta fir-rigward tal-klijenti, u l-informazzjoni miżmuma fir-reġistri ċentrali. Il-kontroverifika tal-informazzjoni fost dawk il-pilastri tikkontribwixxi biex jiġi żgurat li kull pilastru jkollu informazzjoni adegwata, preċiża u aġġornata. Għal dak l-għan, u sabiex jiġu evitati diskrepanzi kkawżati minħabba approċċi differenti, huwa importanti li jiġu identifikati dawk il-kategoriji ta’ data li jenħtieġ li dejjem jinġabru sabiex jiġi żgurat li l-informazzjoni dwar is-sjieda benefiċjarja tkun adegwata. Din tinkludi informazzjoni bażika dwar l-entità ġuridika u l-arranġament ġuridiku, li hija l-prekundizzjoni li tippermetti lill-entità jew l-arranġament innifsu jifhem l-istruttura tiegħu, kemm jekk permezz ta’ sjieda kif ukoll permezz ta’ kontroll.

(122)

Fejn l-entitajiet ġuridiċi u l-arranġamenti ġuridiċi jkunu parti minn struttura kumplessa, iċ-ċarezza dwar is-sjieda jew l-istruttura ta’ kontroll tagħhom hija kritika sabiex jiġi aċċertat min huma s-sidien benefiċjarji tagħhom. Għal dak l-għan, huwa importanti li l-entitajiet ġuridiċi u l-arranġamenti ġuridiċi jifhmu b’mod ċar ir-relazzjonijiet li bihom huma indirettament taħt sjieda jew ikkontrollati, inkluż il-passi intermedjarji kollha bejn is-sidien benefiċjarji u l-entità ġuridika jew l-arranġament ġuridiku nnifsu, kemm jekk dawk ir-relazzjonijiet humiex fil-forma ta’ entitajiet ġuridiċi u arranġamenti ġuridiċi oħrajn jew ta’ relazzjonijiet ta’ persuni nominati. L-identifikazzjoni tal-istruttura tas-sjieda u tal-kontroll tippermetti li l-identifikazzjoni tal-modi li bihom hija stabbilita s-sjieda jew jista’ jiġi eżerċitat il-kontroll fuq entità ġuridika u għalhekk hija essenzjali għal fehim komprensiv tal-pożizzjoni tas-sid benefiċjarju. Għalhekk, jenħtieġ li l-informazzjoni dwar is-sid benefiċjarju dejjem tinkludi deskrizzjoni tal-istruttura tar-relazzjoni.

(123)

Il-bażi ta’ qafas effettiv dwar it-trasparenza tas-sjieda benefiċjarja hija l-għarfien minn entitajiet ġuridiċi tal-persuni fiżiċi li jkunu s-sidien benefiċjarji tagħhom. Għalhekk, jenħtieġ li l-entitajiet ġuridiċi kollha fl-Unjoni jiksbu u jżommu informazzjoni adegwata, akkurata u aġġornata dwar is-sjieda benefiċjarja. Jenħtieġ li dik l-informazzjoni tinżamm għal ħames snin u jenħtieġ li l-identità tal-persuna responsabbli għaż-żamma tal-informazzjoni tiġi rrapportata lir-reġistri ċentrali. Dak il-perjodu ta’ żamma huwa ekwivalenti għall-perjodu għaż-żamma tal-informazzjoni miksuba permezz tal-applikazzjoni tar-rekwiżiti dwar l-AML/CFT, bħall-miżuri ta’ diliġenza dovuta fir-rigward tal-klijenti. Sabiex tiġi żgurata l-possibbiltà li tiġi kontroverifikata u vverifikata l-informazzjoni, pereżempju permezz tal-mekkaniżmu tar-rapportar tad-diskrepanzi, huwa ġġustifikat li jiġi żgurat li jiġu allinjati l-perjodi rilevanti taż-żamma ta’ data.

(124)

Sabiex jiġi żgurat li l-informazzjoni dwar is-sjieda benefiċjarja tkun aġġornata, jenħtieġ li l-entità ġuridika taġġorna tali informazzjoni immedjatament wara kwalunkwe bidla u jenħtieġ li tivverifikaha perjodikament, pereżempju fil-ħin tas-sottomissjoni tad-dikjarazzjonijiet finanzjarji, jew fl-okkażjoni ta’ interazzjonijiet ripetittivi oħra mal-awtoritajiet pubbliċi. Jenħtieġ li l-iskadenza għall-aġġornament tal-informazzjoni jkun raġonevoli fid-dawl ta’ sitwazzjonijiet kumplessi possibbli.

(125)

Jenħtieġ li l-entitajiet ġuridiċi jieħdu l-miżuri neċessarji kollha sabiex jidentifikaw is-sidien benefiċjarji tagħhom. Madankollu, jista’ jkun hemm każijiet li fihom ma tkun identifikabbli l-ebda persuna fiżika li tkun is-sid finali jew li teżerċita kontroll fuq entità. F’każijiet eċċezzjonali bħal dawn, dment li l-mezzi kollha ta’ identifikazzjoni jiġu eżawriti, jenħtieġ li jkun possibbli li l-uffiċjali maniġerjali superjuri jiġu rrapportati minflok is-sidien benefiċjarji meta jipprovdu informazzjoni dwar is-sjieda benefiċjarja lill-entitajiet marbutin b’obbligu matul il-proċess ta’ diliġenza dovuta fir-rigward tal-klijenti jew meta jissottomettu l-informazzjoni lir-reġistru ċentrali. Għalkemm huma identifikati f’dawk is-sitwazzjonijiet, l-uffiċjali maniġerjali superjuri mhumiex is-sidien benefiċjarji. Jenħtieġ li l-entitajiet ġuridiċi jżommu rekords tal-azzjonijiet meħuda sabiex jidentifikaw is-sidien benefiċjarji tagħhom, speċjalment meta jiddependu fuq din il-miżura tal-aħħar istanza, li jenħtieġ li tkun iġġustifikata u ddokumentata kif xieraq.

(126)

Jenħtieġ li d-diffikultajiet fil-kisba tal-informazzjoni ma jkunux raġuni valida biex jiġi evitat l-isforz ta’ identifikazzjoni u jiġi rrapportat il-maniġment superjuri minflok. Għalhekk, jenħtieġ li l-entitajiet ġuridiċi jkunu jistgħu dejjem jissostanzjaw id-dubji tagħhom dwar il-veraċità tal-informazzjoni miġbura. Jenħtieġ li tali ġustifikazzjoni tkun proporzjonata għar-riskju tal-entità ġuridika u l-kumplessità tal-istruttura tas-sjieda tagħha. B’mod partikolari, jenħtieġ li r-rekord tal-azzjonijiet meħuda jiġi pprovdut minnufih lill-awtoritajiet kompetenti fejn ikun meħtieġ u, fuq bażi ta’ sensittività għar-riskji, jenħtieġ li jkun possibbli li dak ir-rekord jinkludi riżoluzzjonijiet tal-bord tad-diretturi u minuti tal-laqgħat tagħhom, ftehimiet ta’ sħubija, atti fiduċjarji, arranġamenti informali li jiddeterminaw setgħat ekwivalenti għal prokuri jew ftehimiet kuntrattwali u dokumentazzjoni oħra. F’każijiet fejn in-nuqqas ta’ sidien benefiċjarji jkun evidenti fir-rigward tal-forma u l-istruttura speċifiċi ta’ entità ġuridika, jenħtieġ li l-ġustifikazzjoni tinftiehem bħala referenza għal dan il-fatt, jiġifieri li l-entità ġuridika ma għandhiex sid benefiċjarju minħabba l-forma u l-istruttura speċifiċi tagħha. Tali assenza ta’ sidien benefiċjarji tista’ tinħoloq., fejn, pereżempju, ma jkun hemm l-ebda interess ta’ sjieda fl-entità ġuridika jew fejn l-entità ġuridika ma tistax, fl-aħħar mill-aħħar tiġi kkontrollata b’mezzi oħra.

(127)

Bil-ħsieb tal-fini tad-determinazzjoni tas-sjieda benefiċjarja, li hija li tiġi żgurata trasparenza effettiva tal-entitajiet ġuridiċi, huwa proporzjonat li ċerti entitajiet jiġu eżentati mill-obbligu li jidentifikaw is-sid benefiċjarju tagħhom. Tali reġim jista’ jiġi applikat biss għal entitajiet li għalihom l-identifikazzjoni u r-reġistrazzjoni tas-sidien benefiċjarji tagħhom ma jkunux utli u fejn il-livell simili ta’ trasparenza jinkiseb b’mezzi oħra għajr is-sjieda benefiċjarja. F’dak ir-rigward, jenħtieġ li l-korpi rregolati mil-liġi pubblika tal-Istat Membru ma jkunux obbligati jiddeterminaw is-sid benefiċjarju tagħhom. Id-Direttiva 2004/109/KE tal-Parlament Ewropew u tal-Kunsill (27) introduċiet rekwiżiti stretti ta’ trasparenza għall-kumpaniji li t-titoli tagħhom huma ammessi għall-kummerċ f’suq regolat. F’ċerti ċirkostanzi, dawk ir-rekwiżiti ta’ trasparenza jistgħu jiksbu reġim ta’ trasparenza ekwivalenti għar-regoli dwar it-trasparenza tas-sjieda benefiċjarja stipulati f’dan ir-Regolament. Dak huwa l-każ fejn il-kontroll fuq il-kumpanija jiġi eżerċitat permezz tad-drittijiet tal-vot, u s-sjieda jew l-istruttura ta’ kontroll tal-kumpanija tinkludi biss persuni fiżiċi. F’dawn iċ-ċirkustanzi, ma hemmx bżonn li jiġu applikati rekwiżiti ta’ sjieda benefiċjarja għal dawn il-kumpaniji kkwotati. Jenħtieġ li l-eżenzjoni għall-entitajiet ġuridiċi mill-obbligu li jiddeterminaw is-sid benefiċjarju tagħhom stess u li jirreġistrawha ma taffettwax l-obbligu tal-entitajiet marbutin b’obbligu li jidentifikaw is-sid benefiċjarju ta’ klijent meta jwettqu diliġenza dovuta fir-rigward tal-klijenti.

(128)

Hemm bżonn li jiġu żgurati kundizzjonijiet ekwi fost it-tipi differenti ta’ forom legali u li jiġi evitat l-użu ħażin ta’ trusts espressi u ta’ arranġamenti ġuridiċi, li spiss jitqiegħdu fi strutturi kumplessi sabiex tkompli tinħeba s-sjieda benefiċjarja. Għalhekk, jenħtieġ li t-trustees ta’ kwalunkwe trust espress amministrat fi Stat Membru, jew stabbilit jew li jirrisjedi fi Stat Membru jkunu responsabbli għall-kisba u ż-żamma ta’ informazzjoni adegwata, akkurata u aġġornata dwar is-sjieda benefiċjarja rigward it-trust espress, u għad-divulgazzjoni tal-istatus tagħhom u għall-għoti ta’ dik l-informazzjoni lill-entitajiet marbutin b’obbligu li jwettqu diliġenza dovuta fir-rigward tal-klijenti. Jenħtieġ li kwalunkwe sid benefiċjarju ieħor tat-trust espress jassisti lit-trustee fil-kisba ta’ tali informazzjoni.

(129)

In-natura tal-arranġamenti ġuridiċi u n-nuqqas ta’ pubbliċità dwar l-istrutturi u l-iskop tagħhom ipoġġu piż partikolari fuq it-trustee,s jew persuni f’pożizzjonijiet ekwivalenti f’arranġamenti ġuridiċi simili biex jiksbu u jżommu l-informazzjoni rilevanti kollha dwar l-arranġament, legali. Jenħtieġ li tali informazzjoni tippermetti identifikazzjoni tal-arranġament ġuridiku, l-assi mqiegħda fih jew amministrati permezz tiegħu, u kwalunkwe aġent jew fornitur ta’ servizzi lit-trust. Sabiex jiġu ffaċilitati l-attivitajiet tal-awtoritajiet kompetenti fil-prevenzjoni, id-detezzjoni u l-investigazzjoni tal-ħasil tal-flus, ir-reati predikati tiegħu u l-finanzjament tat-terroriżmu, huwa importanti li t-trustees iżommu dik l-informazzjoni aġġornata u li jżommuha għal ammont suffiċjenti ta’ żmien wara li jieqfu mir-rwol tagħhom bħala trustees jew ekwivalenti. L-għoti ta’ ammont bażiku ta’ informazzjoni dwar l-arranġament ġuridiku lill-entitajiet marbutin b’obbligu huwa meħtieġ ukoll biex ikunu jistgħu jaċċertaw bis-sħiħ l-iskop tar-relazzjoni tan-negozju jew tat-tranżazzjoni okkażjonali li tinvolvi l-arranġament ġuridiku, jivvalutaw b’mod adegwat ir-riskji assoċjati, u jimplimentaw miżuri proporzjonati biex itaffu dawk ir-riskji.

(130)

Fid-dawl tal-istruttura speċifika ta’ ċerti arranġamenti ġuridiċi, u l-ħtieġa li tiġi żgurata trasparenza suffiċjenti dwar is-sjieda benefiċjarja tagħhom, jenħtieġ li tali arranġamenti ġuridiċi simili għat-trusts espressi jkunu soġġetti għal rekwiżiti ta’ sjieda benefiċjarja ekwivalenti bħal dawk li japplikaw għal trusts espressi.

(131)

L-arranġamenti tal-persuni nominati jistgħu jippermettu l-ħabi tal-identità tas-sidien benefiċjarji, minħabba li persuna nominata tkun tista’ taġixxi bħala d-direttur jew l-azzjonist ta’ entità ġuridika filwaqt li n-nominatur mhux dejjem ikun divulgat. Dawk l-arranġamenti jistgħu jaħbu s-sjieda benefiċjarja u l-istruttura ta’ kontroll,jekk is-sidien benefiċjarji ma jkunux jixtiequ jiddivulgaw l-identità jew ir-rwol tagħhom fihom. Għalhekk, hemm bżonn li jiġu introdotti rekwiżiti dwar it-trasparenza sabiex jiġi evitat li tali arranġamenti jintużaw ħażin u sabiex il-kriminali ma jitħallewx jinħbew wara persuni li jaġixxu f’isimhom. Ir-relazzjoni bejn il-persuna nominata u n-nominatur mhijiex iddeterminata minn jekk għandhiex effett fuq il-pubbliku jew fuq partijiet terzi. Għalkemm l-azzjonisti nominati li isimhom jidher fir-rekords pubbliċi jew uffiċjali jkollhom formalment kontroll indipendenti fuq il-kumpanija, jenħtieġ li jkun meħtieġ li jiġi żvelat jekk humiex qed jaġixxu fuq l-istruzzjonijiet ta’ xi ħadd ieħor abbażi ta’ ftehim privat. Jenħtieġ li l-azzjonisti nominati u d-diretturi nominati ta’ entitajiet ġuridiċi jżommu biżżejjed informazzjoni dwar l-identità tan-nominatur tagħhom kif ukoll dwar kwalunkwe sid benefiċjarju tan-nominatur u jiddivulgaw lilhom kif ukoll l-istatus tagħhom lill-entitajiet ġuridiċi. Jenħtieġ li l-istess informazzjoni tiġi rrapportata wkoll minn entitajiet ġuridiċi lill-entitajiet marbutin b’obbligu meta jiġu applikati miżuri ta’ diliġenza dovuta fir-rigward tal-klijenti u lir-reġistri ċentrali.

(132)

Ir-riskji ppreżentati minn entitajiet ġuridiċi barranin u minn arranġamenti ġuridiċi barranin li jintużaw ħażin sabiex ir-rikavati mill-fondi jiġu diretti fis-sistema finanzjarja tal-Unjoni, jeħtieġ li jiġu mmitigati. Peress li l-istandards ta’ sjieda benefiċjarja fis-seħħ f’pajjiżi terzi jistgħu ma jkunux biżżejjed sabiex jippermettu l-istess livell ta’ trasparenza u ta’ disponibbiltà f’waqtha ta’ informazzjoni dwar is-sjieda benefiċjarja bħal fl-Unjoni, hemm bżonn li jiġu żgurati mezzi adegwati sabiex jiġu identifikati s-sidien benefiċjarji ta’ entitajiet ġuridiċi barranin jew arranġamenti ġuridiċi barranin f’ċirkostanzi speċifiċi. Għalhekk, jenħtieġ li l-entitajiet ġuridiċi maħluqa barra mill-Unjoni u t-trusts espressi jew arranġamenti ġuridiċi simili amministrati barra mill-Unjoni jew li t-trustees tagħhom jew il-persuni li jkollhom pożizzjoni ekwivalenti jirrisjedu jew ikunu stabbiliti barra mill-Unjoni jkunu meħtieġa jiddivulgaw lis-sidien benefiċjarji tagħhom fejn joperaw fl-Unjoni billi jidħlu f’relazzjoni tan-negozju ma’ entità marbuta b’obbligu tal-Unjoni, billi jakkwistaw proprjetà immobbli fl-Unjoni jew ċerti oġġetti ta’ valur għoli minn entitajiet marbutin b’obbligu li jinsabu fl-Unjoni jew billi jingħataw kuntratt wara proċedura ta’ akkwist pubbliku għal oġġetti jew servizzi, jew konċessjonijiet. Jista’ jkun hemm varjazzjonijiet fl-iskopertura għar-riskju madwar l-Istati Membri, inkluż skont il-kategorija jew it-tip ta’ attivitajiet imwettqa mill-entitajiet marbutin b’obbligu u l-attraenza għall-kriminali ta’ proprjetajiet immobbli fit-territorju tagħhom. Għalhekk, meta l-Istati Membri jidentifikaw każijiet ta’ riskju ogħla, jenħtieġ li jkunu jistgħu jieħdu miżuri addizzjonali li jtaffu biex jindirizzaw dawk ir-riskji.

(133)

Jenħtieġ li r-rekwiżiti tar-reġistrazzjoni għall-entitajiet ġuridiċi barranin u l-arranġamenti ġuridiċi barranin ikunu proporzjonati għar-riskji assoċjati mal-operazzjonijiet tagħhom fl-Unjoni. Minħabba n-natura miftuħa tas-suq intern tal-Unjoni, u l-użu li jsir minn entitajiet ġuridiċi barranin tas-servizzi offruti mill-entitajiet marbutin b’obbligu stabbiliti fl-Unjoni, li ħafna minnhom huma assoċjati ma’ riskji aktar baxxi ta’ ħasil tal-flus, ir-reati predikati tiegħu jew il-finanzjament tat-terroriżmu, huwa xieraq li r-rekwiżit ta’ reġistrazzjoni jiġi limitat għal entitajiet ġuridiċi li jappartjenu għal setturi ta’ riskju għoli jew li joperaw f’kategoriji ta’ riskju ogħla jew li jiksbu servizzi minn entitajiet marbutin b’obbligu li joperaw f’setturi assoċjati ma’ riskji ogħla. In-natura privata tal-arranġamenti ġuridiċi, u l-ostakli fl-aċċess għal informazzjoni dwar is-sjieda benefiċjarja fil-każ ta’ arranġamenti ġuridiċi barranin, jiġġustifikaw l-applikazzjoni ta’ rekwiżit ta’ reġistrazzjoni irrispettivament mil-livell ta’ riskju assoċjat mal-entità marbuta b’obbligu li tipprovdi servizzi lill-arranġament ġuridiku, jew, fejn rilevanti, mas-settur li fih jopera l-arranġament ġuridiku. Jenħtieġ li r-referenza għall-valutazzjoni tar-riskju fil-livell tal-Unjoni skont l-Artikolu 7 tad-Direttiva (UE) 2024/1640 tinftiehem li tirreferi għall-valutazzjoni tar-riskju maħruġa mill-Kummissjoni skont l-Artikolu 6 tad-Direttiva (UE) 2015/849 sal-ewwel ħruġ tar-rapport skont l-Artikolu 7 tad-Direttiva (UE) 2024/1640.

(134)

Sabiex titħeġġeġ il-konformità u tiġi żgurata trasparenza effettiva tas-sjieda benefiċjarja, jeħtieġ li jiġu infurzati r-rekwiżiti dwar is-sjieda benefiċjarja. Għal dak l-għan, jenħtieġ li l-Istati Membri japplikaw penali għall-ksur ta’ dawk ir-rekwiżiti. Jenħtieġ li dawk il-penali ikunu effettivi, proporzjonati u dissważivi, u li ma jmorrux lil hinn minn dak li jkun meħtieġ sabiex titħeġġeġ il-konformità. Jenħtieġ li l-penali introdotti mill-Istati Membri jkollhom effett ta’ deterrent ekwivalenti madwar l-Unjoni kollha rigward il-ksur tar-rekwiżiti dwar is-sjieda benefiċjarja. Jenħtieġ li jkun possibbli li l-penali jinkludu, pereżempju, multi għal entitajiet ġuridiċi u fuq trustees jew persuni li jkollhom pożizzjoni ekwivalenti arranġament ġuridikuarranġament ġuridiku simili impost għan-nuqqas li tinżamm informazzjoni preċiża adegwata jew aġġornata dwar is-sjieda benefiċjarja, it-tħassir ta’ entitajiet ġuridiċi li jonqsu milli jikkonformaw mal-obbligu li jżommu informazzjoni dwar is-sjieda benefiċjarja jew li jippreżentaw informazzjoni dwar is-sjieda benefiċjarja fi ħdan skadenza partikolari, multi għal sidien benefiċjarji u persuni oħra li jonqsu milli jikkooperaw ma’ entità ġuridika jew trustee ta’ trust espress jew persuna li jkollha pożizzjoni ekwivalenti arranġament ġuridikuarranġament ġuridikuġuridiku simili, multi għal azzjonisti nominati u diretturi nominati li jonqsu milli jikkonformaw mal-obbligu ta’ divulgazzjoni, jew konsegwenzi tad-dritt privat għal sidien benefiċjarji mhux divulgati bħala projbizzjoni tal-ħlas tal-profitti jew projbizzjoni tal-eżerċizzju tad-drittijiet tal-vot

(135)

Bil-ħsieb li jiġi żgurat approċċ konsistenti għall-infurzar tar-rekwiżiti tas-sjieda benefiċjarja fis-suq intern kollu, jenħtieġ li l-Kummissjoni tingħata s-setgħa li tadotta atti delegati biex tiddefinixxi l-kategoriji ta’ ksur soġġetti għal penali u l-persuni responsabbli għal tali ksur, kif ukoll indikaturi dwar il-livell ta’ gravità u l-kriterji biex jiġi ddeterminat il-livell ta’ penali. Barra minn hekk, sabiex tappoġġa d-determinazzjoni ta’ dak il-livell ta’ sanzjonijiet, u b’konsistenza mal-għan ta’ armonizzazzjoni ta’ dan ir-Regolament, jenħtieġ li jkun possibbli għall-Kummissjoni li tadotta linji gwida li jistabbilixxu l-ammonti bażi li japplikaw għal kull kategorija ta’ ksur.

(136)

Jenħtieġ li tranżazzjonijiet suspettużi, li jinkludu tentattivi ta’ tranżazzjonijiet, u informazzjoni oħra rilevanti għall-ħasil tal-flus, għar-reati predikati tiegħu u għall-finanzjament tat-terroriżmu, jiġu rrapportati lill-FIU, li jenħtieġ li sservi bħala unità ċentrali nazzjonali sabiex tirċievi u tanalizza suspetti rrapportati u tiddissemina r-riżultati tal-analiżijiet tagħha lill-awtoritajiet kompetenti. Jenħtieġ li t-tranżazzjonijiet suspettużi kollha, inkluż tentattivi ta’ tranżazzjonijiet, jiġu rrapportati, irrispettivament mill-ammont tat-tranżazzjoni, u jenħtieġ li r-referenza għal suspetti tiġi interpretata bħala li tinkludi tranżazzjonijiet, imġiba u xejriet ta’ tranżazzjonijiet suspettużi. L-informazzjoni rrapportata tista’ tinkludi wkoll informazzjoni fuq il-bażi ta’ livell limitu. Sabiex tappoġġa d-detezzjoni ta’ suspetti mill-entitajiet marbutin b’obbligu, jenħtieġ li l-AMLA toħroġ gwida dwar l-indikaturi ta’ attività jew imġiba suspettuża. Minħabba l-ambjent tar-riskju li qed jevolvi, jenħtieġ li dik il-gwida tiġi rieżaminata regolarment, u jenħtieġ li ma tippreġudikax il-ħruġ mill-FIUs ta’ gwida jew indikaturi dwar ir-riskji tal-ħasil tal-flus u l-finanzjament tat-terroriżmu u l-metodi identifikati fil-livell nazzjonali. Jenħtieġ li d-divulgazzjoni bona fide ta’ informazzjoni lill-FIU minn entità marbuta b’obbligu jew minn impjegat jew minn direttur ta’ tali entità ma tikkostitwixxix ksur ta’ xi restrizzjoni fuq id-divulgazzjoni ta’ informazzjoni u jenħtieġ li ma tinvolvix lill-entità marbuta b’obbligu jew lid-diretturi jew lill-impjegati tagħha f’responsabbiltà ta’ kwalunkwe tip.

(137)

Jenħtieġ li l-entitajiet marbutin b’obbligu jistabbilixxu reġimi ta’ rapportar komprensivi li jinkludu s-suspetti kollha, irrispettivament mill-valur jew mis-severità perċepita tal-attività kriminali assoċjata. Jenħtieġ li jkunu konxji tal-aspettattivi tal-FIUs u jenħtieġ li, sa fejn ikun possibbli, ifasslu s-sistemi ta’ detezzjoni u l-proċessi analitiċi tagħhom f għar-riskji ewlenin li jaffettwaw lill-Istat Membru li fih ikunu stabbiliti u, fejn meħtieġ, jipprijoritizzaw l-analiżi tagħhom lejn l-indirizzar ta’ dawk ir-riskji ewlenin.

(138)

Jenħtieġ li t-tranżazzjonijiet jiġu vvalutati abbażi ta’ informazzjoni magħrufa jew li tkun magħrufa mill-entità marbuta b’obbligu. Dan jinkludi informazzjoni rilevanti minn aġenti, distributuri u fornituri ta’ servizzi. Meta r-reat predikat sottostanti ma jkunx magħruf jew apparenti għall-entità marbuta b’obbligu, ir-rwol tal-identifikazzjoni u r-rapportar ta’ tranżazzjonijiet suspettużi jiġi ssodisfat b’mod aktar effiċjenti billi ssir enfasi fuq id-detezzjoni ta’ suspetti u s-sottomissjoni ta’ rapporti fil-pront. F’dawk il-każijiet, ir-reat predikat ma għandux għalfejn jiġi speċifikat mill-entità marbuta b’obbligu meta tirrapporta tranżazzjoni suspettuża lill-FIU, jekk ma jkunx magħruf minnhom. Meta dik l-informazzjoni tkun disponibbli, jenħtieġ li tiġi inkluża fir-rapport. Bħala gwardjani tas-sistema finanzjarja tal-Unjoni, jenħtieġ li l-entitajiet marbutin b’obbligu jkunu jistgħu jippreżentaw ukoll rapport meta jkunu jafu jew jissuspettaw li l-fondi ntużaw jew ser jintużaw biex jitwettqu attivitajiet kriminali, bħax-xiri ta’ oġġetti illeċiti, anke jekk l-informazzjoni disponibbli lilhom ma tindikax li l-fondi użati joriġinaw minn sorsi illeċiti.

(139)

Id-differenzi fl-obbligi ta’ rapportar ta’ tranżazzjonijiet suspettużi bejn l-Istati Membri jistgħu jaggravaw id-diffikultajiet fil-konformità mal-AML/CFT esperjenzati mill-entitajiet marbutin b’obbligu li għandhom preżenza jew operazzjonijiet transfruntieri. Barra minn hekk, l-istruttura u l-kontenut tar-rapporti dwar tranżazzjonijiet suspettużi għandhom impatt fuq il-kapaċità tal-FIU li jwettqu analiżi u fuq in-natura ta’ dik l-analiżi, u jaffettwaw ukoll il-kapaċitajiet tal-FIU li jikkooperaw u li jiskambjaw informazzjoni. Sabiex tiġi ffaċilitata l-konformità tal-entitajiet marbutin b’obbligi mal-obbligi ta’ rapportar tagħhom u sabiex ikun jista’ jsir funzjonament aktar effettiv tal-attivitajiet analitiċi u tal-kooperazzjoni tal-FIU, jenħtieġ li l-AMLA tiżviluppa abbozzi ta’ standards tekniċi ta’ implimentazzjoni li jispeċifikaw mudell komuni għar-rapportar ta’ tranżazzjonijiet suspettużi li għandhom jintużaw bħala bażi uniformi fl-Unjoni kollha.

(140)

Jenħtieġ li l-FIUs ikunu f’qagħda li jakkwistaw rapidament minn kwalunkwe entità marbuta b’obbligu l-informazzjoni neċessarja kollha relatata mal-funzjonijiet tagħhom. L-aċċess bla rbit u rapidu għall-informazzjoni tagħhom huwa essenzjali sabiex jiġi żgurat li l-flussi tal-flus ikunu jistgħu jiġu ttraċċati kif xieraq u li n-networks u l-flussi illegali jiġu skoperti fi stadju bikri. Il-bżonn li l-FIUs jiksbu informazzjoni addizzjonali minn entitajiet marbutin b’obbligu fuq il-bażi ta’ suspett ta’ ħasil tal-flus jew ta’ finanzjament tat-terroriżmu, jista’ jirriżulta minn rapport preċedenti dwar tranżazzjonijiet suspettużi rrapportat lill-FIUs, iżda jista’ jirriżulta wkoll b’mezzi oħrajn bħalma huma l-analiżi tal-FIU stess, l-intelligence pprovduta minn awtoritajiet kompetenti jew informazzjoni ta’ FIU oħra. Għalhekk, jenħtieġ li l-FIUs ikunu jistgħu, fil-kuntest tal-funzjonijiet tagħhom, jiksbu informazzjoni minn kwalunkwe entità marbuta b’obbligu, anki mingħajr ma jsir rapport minn qabel. B’mod partikolari, ir-rekords ta’ tranżazzjonijiet finanzjarji u trasferimenti mwettqa permezz ta’ kont bankarju, ta’ pagament jew tal-kriptoassi huma kritiċi għall-ħidma analitika tal-FIUs. Madankollu, minħabba n-nuqqas ta’ armonizzazzjoni, bħalissa l-istituzzjonijiet ta’ kreditu u l-istituzzjonijiet finanzjarji jipprovdu lill-FIUs b’rekords tat-tranżazzjonijiet f’formati differenti, li ma jistgħux jintużaw faċilment għall-analiżi. Meta titqies in-natura transfruntiera tal-attivitajiet analitiċi tal-FIUs, id-disparità tal-formati u d-diffikultajiet tal-ipproċessar tar-rekords ta’ tranżazzjonijiet ifixklu l-iskambju ta’ informazzjoni fost l-FIUs u l-iżvilupp ta’ analiżijiet finanzjarji transfruntieri. Għalhekk, jenħtieġ li l-AMLA tiżviluppa abbozz ta’ standards tekniċi ta’ implimentazzjoni li jispeċifikaw mudell komuni għall-forniment ta’ rekords tat-tranżazzjonijiet minn istituzzjonijiet ta’ kreditu u istituzzjonijiet finanzjarji lill-FIUs biex jintużaw bħala bażi uniformi fl-Unjoni kollha.

(141)

Jenħtieġ li l-entitajiet marbutin b’obbligu jwieġbu għal talba għal informazzjoni mill-FIU mill-aktar fis possibbli u, fi kwalunkwe każ, fi żmien ħamest ijiem ta’ xogħol mill-wasla tat-talba jew kwalunkwe skadenza iqsar jew itwal imposta mill-FIU. F’każijiet ġustifikati u urġenti, jenħtieġ li l-entità marbuta b’obbligu għandha twieġeb għat-talba tal-FIU fi żmien 24 siegħa. Dawk l-iskadenzi għandhom japplikaw għal talbiet għal informazzjoni abbażi ta’ kundizzjonijiet definiti b’mod suffiċjenti. Jenħtieġ ukoll li FIU tkun f’qagħda li tikseb tali informazzjoni wara talba magħmula minn FIU oħra tal-Unjoni kif ukoll li tiskambja l-informazzjoni mal-FIU rikjedenti. It-talbiet lill-entitajiet marbutin b’obbligu jvarjaw fin-natura tagħhom. Pereżempju, talbiet kumplessi jistgħu jeħtieġu aktar żmien u jeħtieġu skadenza estiża għar-rispons. Għal dak l-għan, jenħtieġ li l-FIUs ikunu jistgħu jagħtu skadenzi estiżi lill-entitajiet marbutin b’obbligu, dment li dan ma jkollux impatt negattiv fuq l-analiżi tal-FIU.

(142)

Għal ċerti entitajiet marbutin b’obbligu, jenħtieġ li l-Istati Membri jkollhom il-possibbiltà li jinnominaw korp awtoregolatorju xieraq li għandu jiġi informat fl-ewwel istanza minflok l-FIU. F’konformità mal-ġurisprudenza tal-Qorti Ewropea tad-Drittijiet tal-Bniedem, sistema ta’ rapportar tal-ewwel istanza lil korp awtoregolatorju xieraq tikkostitwixxi salvagwardja importanti għaż-żamma tal-protezzjoni tad-drittijiet fundamentali b’rabta mal-obbligi ta’ rapportar applikabbli għall-avukati. Jenħtieġ li l-Istati Membri jipprevedu l-mezzi u l-mod li bihom għandha tinkiseb il-protezzjoni tas-segretezza, il-kunfidenzjalità u l-privatezza professjonali.

(143)

Jenħtieġ li n-nutara, l-avukati, professjonisti legali independenti oħra, l-awdituri, il-kontabilisti u konsulenti tat-taxxa esterni ma jkunux obbligati jibagħtu lill-FIU jew lil korp awtoregolatorju xi informazzjoni li huma li jkunu rċevew mingħand, jew kisbu fir-rigward ta’, wieħed mill-klijenti tagħhom matul l-aċċertar tal-pożizzjoni legali ta’ dak il-klijent, jew fit-twettiq tal-kompitu li jiddefendu jew jirrappreżentaw lil dak il-klijent fi, jew dwar, proċedimenti ġudizzjarji, inkluż l-għoti ta’ pariri dwar il-bidu jew l-evitar ta’ tali proċedimenti, kemm jekk tali informazzjoni tkun riċevuta jew miksuba qabel, matul jew wara tali proċedimenti. Madankollu, jenħtieġ li tali eċċezzjoni ma tapplikax meta l-professjonist legali, l-awditur, il-kontabilist jew il-konsulent tat-taxxa estern ijkun qed jieħu sehem fil-ħasil tal-flus jew fil-finanzjament tat-terroriżmu, il-parir legali jingħata għall-finijiet ta’ ħasil tal-flus jew ta’ finanzjament tat-terroriżmu jew meta l-professjonist legali awditur, il-kontabilist jew il-konsulent tat-taxxa estern ikun jaf li l-klijent qed ifittex parir legali għall-finijiet ta’ ħasil tal-flus jew ta’ finanzjament tat-terroriżmu. Tali għarfien u skop jista’ jiġi dedott minn ċirkostanzi fattwali oġġettivi. Jenħtieġ li l-parir legali mitlub fir-rigward ta’ proċedimenti ġudizzjarji li jkunu għaddejjin ma jitqiesx li jikkostitwixxi parir legali għall-finijiet tal-ħasil tal-flus jew il-finanzjament tat-terroriżmu. F’konformità mal-approċċ ibbażat fuq ir-riskju, jenħtieġ li l-Istati Membri jkunu jistgħu jidentifikaw sitwazzjonijiet addizzjonali fejn, b’kont meħud tar-riskju għoli ta’ ħasil tal-flus, ir-reati predikati tiegħu jew il-finanzjament tat-terroriżmu assoċjat ma’ ċerti tipi ta’ tranżazzjonijiet, ma tapplikax l-eżenzjoni mir-rekwiżit ta’ rapportar. Meta jidentifikaw sitwazzjonijiet addizzjonali bħal dawn, l-Istati Membri għandhom jiżguraw il-konformità b’mod partikolari mal-Artikoli 7 u 47 tal-Karta.

(144)

Jenħtieġ li l-entitajiet marbutin b’obbligu jkunu jistgħu jwettqu tranżazzjonijiet suspettużi b’mod eċċezzjonali qabel ma jinformaw lill-FIU fejn in-nuqqas ta’ dan ikun impossibbli jew probabbli li jfixkel l-isforzi sabiex jiġu segwiti l-benefiċjarji ta’ operazzjoni suspettata ta’ ħasil tal-flus jew ta’ finanzjament tat-terroriżmu. Madankollu, jenħtieġ li dik l-eċċezzjoni ma tiġix invokata fir-rigward ta’ tranżazzjonijiet ikkonċernati minn kwalunkwe -obbligi internazzjonali aċċettati mill-Istati Membru tal-FIU li jiffriża mingħajr dewmien fondi jew assi oħrajn ta’ terroristi, ta’ organizzazzjonijiet terroristiċi jew ta’ dawk li jiffinanzjaw it-terroriżmu, f’konformità mar-riżoluzzjonijiet rilevantitall-KSNU.

(145)

Il-kunfidenzjalità fir-rigward tar-rapportar ta’ tranżazzjonijiet suspettużi u tal-għoti ta’ informazzjoni rilevanti oħra lill-FIUs hija essenzjali sabiex l-awtoritajiet kompetenti jkunu jistgħu jiffriżaw u jissekwestraw assi potenzjalment marbutin mal-ħasil tal-flus, mar-reati predikati tiegħu jew mal-finanzjament tat-terroriżmu. Tranżazzjoni suspettuża ma hijiex indikazzjoni ta’ attività kriminali. Id-divulgazzjoni li jkun ġie rrapportat suspett tista’ ttebba’ r-reputazzjoni tal-persuni involuti fit-tranżazzjoni u tipperikola t-twettiq ta’ analiżijiet u ta’ investigazzjonijiet. Għalhekk, jenħtieġ li l-entitajiet marbutin b’obbligu u d-diretturi u l-impjegati tagħhom, jew persuni f’pożizzjoni kumparabbli, inkluż aġenti u distributuri, ma jinformawx lill-klijent ikkonċernat jew lil parti terza li l-informazzjoni tkun qed tiġi, ser tiġi, jew ġiet sottomessa lill-FIU, kemm jekk direttament kif ukoll jekk permezz tal-korp awtoregolatorju, jew li tkun qed issir, tista’ ssir jew li tkun twettqet analiżi tal-ħasil tal-flus jew tal-finanzjament tat-terroriżmu. Jenħtieġ li l-projbizzjoni tad-divulgazzjoni ma tapplikax f’ċirkostanzi speċifiċi li jikkonċernaw, pereżempju, divulgazzjonijiet lill-awtoritajiet kompetenti u lill-korpi awtoregolatorji meta jwettqu funzjonijiet superviżorji, jew divulgazzjonijiet għal finijiet ta’ infurzar tal-liġi jew fejn d-divulgazzjonijiet isiru bejn entitajiet marbutin b’obbligu li jappartjenu għall-istess grupp.

(146)

Il-kriminali jmexxu r-rikavat illeċitu permezz ta’ diversi intermedjarji sabiex jevitaw id-detezzjoni. Għalhekk, huwa importanti li l-entitajiet marbutin b’obbligu jitħallew jiskambjaw informazzjoni mhux biss bejn il-membri tal-grupp, iżda wkoll f’ċerti każijiet bejn l-istituzzjonijiet ta’ kreditu u l-istituzzjonijiet finanzjarji u entitajiet oħrajn li joperaw fin-networks, b’kunsiderazzjoni xierqa għar-regoli dwar il-protezzjoni tad-data. Barra minn sħubija għall-kondiviżjoni tal-informazzjoni, jenħtieġ li d-divulgazzjoni permessa fost ċerti kategoriji ta’ entitajiet marbutin b’obbligu f’każijiet li jinvolvu l-istess tranżazzjoni sseħħ biss fir-rigward tat-tranżazzjoni speċifika li titwettaq bejn dawk l-entitajiet marbutin b’obbligu jew iffaċilitata minnhom, u mhux fir-rigward ta’ tranżazzjonijiet preċedenti jew sussegwenti konnessi.

(147)

L-iskambju ta’ informazzjoni fost l-entitajiet marbutin b’obbligu u, fejn applikabbli, l-awtoritajiet kompetenti, jista’ jżid il-possibbiltajiet ta’ detezzjoni ta’ flussi finanzjarji illeċiti li jikkonċernaw il-ħasil tal-flus, il-finanzjament tat-terroriżmu u rikavat mill-kriminalità. Għal dik ir-raġuni, jenħtieġ li l-entitajiet marbutin b’obbligu u l-awtoritajiet kompetenti jkunu jistgħu jiskambjaw informazzjoni fil-qafas ta’ sħubija għall-kondiviżjoni ta’ informazzjoni fejn iqisu li tali kondiviżjoni tkun meħtieġa għall-konformità mal-obbligi u l-kompiti tagħhom fil-qasam tal-AML/CFT. Jenħtieġ li l-kondiviżjoni ta’ informazzjoni tkun soġġetta għal salvagwardji robusti relatati mal-kunfidenzjalità, il-protezzjoni tad-data, l-użu tal-informazzjoni u l-proċedura kriminali. Jenħtieġ li l-entitajiet marbutin b’obbligu ma jiddependux biss fuq informazzjoni riċevuta permezz tal-iskambju ta’ informazzjoni biex jaslu għal konklużjonijiet dwar ir-riskju ta’ ħasil tal-flus u finanzjament tat-terroriżmu tal-klijent jew tat-tranżazzjoni jew biex jieħdu deċiżjonijiet dwar l-istabbiliment jew it-terminazzjoni ta’ relazzjoni tan-negozju jew it-twettiq ta’ tranżazzjoni. Kif rikonoxxut fid-Direttiva 2014/92/UE, il-funzjonament bla xkiel tas-suq intern u l-iżvilupp ta’ ekonomija moderna u soċjalment inklużiva jiddependu dejjem aktar fuq il-forniment universali ta’ servizzi ta’ pagament. Għalhekk, jenħtieġ li l-aċċess għal servizzi finanzjarji bażiċi ma jiġix miċħud abbażi tal-informazzjoni skambjata fost l-entitajiet marbutin b’obbligu jew bejn l-entitajiet marbutin b’obbligu u l-awtoritajiet kompetenti jew l-AMLA.

(148)

Il-konformità mar-rekwiżiti ta’ dan ir-Regolament hija soġġetta għal kontrolli mis-superviżuri. Meta l-entitajiet marbutin b’obbligu jiskambjaw informazzjoni fil-qafas ta’ sħubija għall-kondiviżjoni tal-informazzjoni, jenħtieġ li dawk il-kontrolli jinkludu wkoll il-konformità mal-kundizzjonijiet stabbilit f’dan ir-Regolament għal dawk l-iskambji ta’ informazzjoni. Filwaqt li jenħtieġ li l-kontrolli superviżorji jkunu bbażati fuq ir-riskju, jenħtieġ li dawn jitwettqu fi kwalunkwe każ qabel il-bidu tal-attivitajiet tas-sħubija għall-kondiviżjoni tal-informazzjoni. Sħubijiet għall-kondiviżjoni tal-informazzjoni li jinvolvu l-ipproċessar ta’ data personali jistgħu jirriżultaw f’riskju għoli għad-drittijiet u l-libertajiet tal-persuni fiżiċi. Għalhekk, jenħtieġ li titwettaq valutazzjoni tal-impatt fuq il-protezzjoni tad-data skont ir-Regolament (UE) 2016/679 tal-Parlament Ewropew u tal-Kunsill (28) qabel il-bidu tal-attivitajiet tas-sħubija. Fil-kuntest tal-kontrolli superviżorji, jenħtieġ li s-superviżuri jikkonsultaw, fejn rilevanti, lill-awtoritajiet tal-protezzjoni tad-data, li huma biss huma kompetenti għall-valutazzjoni tal-impatt fuq il-protezzjoni tad-data. Id-dispożizzjonijiet dwar il-protezzjoni tad-data u r-rekwiżiti kollha li jikkonċernaw il-kunfidenzjalità tal-informazzjoni dwar tranżazzjonijiet suspettużi li jinsabu f’dan ir-Regolament japplikaw għal informazzjoni kondiviża fil-qafas ta’ sħubija. B’mod konsistenti mar-Regolament (UE) 2016/679, jenħtieġ li l-Istati Membri jkunu jistgħu jżommu jew jintroduċu dispożizzjonijiet aktar speċifiċi biex jadattaw l-applikazzjoni ta’ dak ir-Regolament biex jipprovdu rekwiżiti aktar speċifiċi fir-rigward tal-ipproċessar ta’ data personali skambjata fil-qafas ta’ sħubija għall-kondiviżjoni tal-informazzjoni.

(149)

Filwaqt li s-sħubijijet għall-kondiviżjoni tal-informazzjoni jippermettu l-iskambju ta’ informazzjoni operazzjonali u data personali taħt salvagwardji stretti, jenħtieġ li dawk l-iskambji ma jissostitwixxux ir-rekwiżiti skont dan ir-Regolament biex jiġi rrapportat kwalunkwe suspett lill-FIU kompetenti. Għalhekk, meta l-entitajiet marbutin b’obbligu jidentifikaw attivitajiet suspettużi abbażi ta’ informazzjoni miksuba fil-kuntest ta’ sħubija għall-kondiviżjoni tal-informazzjoni, jenħtieġ li jirrapportaw dak is-suspett lill-FIU fl-Istat Membru fejn ikunu stabbiliti. L-informazzjoni li tindika attività suspettuża hija soġġetta għal regoli aktar stretti li jipprojbixxu d-divulgazzjoni tagħha u jenħtieġ li tiġi kondiviża biss fejn meħtieġa għall-finijiet tal-prevenzjoni u l-ġlieda kontra l-ħasil tal-flus, ir-reati predikati tiegħu u l-finanzjament tat-terroriżmu u soġġetta għal salvagwardji li jipproteġu d-drittijiet fundamentali, il-kunfidenzjalità tal-ħidma tal-FIU u l-integrità tal-investigazzjonijiet tal-infurzar tal-liġi.

(150)

Ir-Regolament (UE) 2016/679 japplika għall-ipproċessar ta’ data personali għall-finijiet ta’ dan ir-Regolament. Il-ġlieda kontra l-ħasil tal-flus u l-finanzjament tat-terroriżmu hija rikonoxxuta bħala raġuni importanti ta’ interess pubbliku mill-Istati Membri kollha. Jenħtieġ li l-entitajiet marbutin b’obbligu jagħtu attenzjoni partikolari għall-prinċipji li jirrikjedu li d-data personali pproċessata matul il-konformità mal-obbligi tal-AML/CFT tagħhom tkun preċiża, affidabbli u aġġornata. Għall-finijiet tal-konformità ma’ dan ir-Regolament, jenħtieġ li l-entitajiet marbutin b’obbligu jkunu jistgħu jadottaw proċessi li jippermettu t-teħid ta’ deċiżjonijiet individwali awtomatizzati, inkluż it-tfassil ta’ profili, kif stabbilit skont l-Artikolu 22 tar-Regolament (UE) 2016/679. Meta jsir dan, jenħtieġ li r-rekwiżiti stipulati f’dan ir-Regolament għas-salvagwardja tad-drittijiet tal-persuni soġġetti għal tali proċessi japplikaw flimkien ma’ kwalunkwe rekwiżit rilevanti ieħor stipulat fid-dritt tal-Unjoni dwar il-protezzjoni tad-data personali.

(151)

Huwa essenzjali li l-allinjament tal-qafas AML/CFT mar-Rakkomandazzjonijiet riveduti tal-FATF jitwettaq f’konformità sħiħa mad-dritt tal-Unjoni, partikolarment fir-rigward tal-liġi tal-Unjoni dwar il-protezzjoni tad-data u l-protezzjoni tad-drittijiet fundamentali kif stabbiliti fil-Karta. Ċerti aspetti tal-implimentazzjoni tal-qafas AML/CFT jinvolvu l-ġbir, l-analiżi, il-ħażna u l-kondiviżjoni ta’ data. Jenħtieġ li tali pproċessar ta’ data personali jkun permess filwaqt li jiġu rrispettati bis-sħiħ id-drittijiet fundamentali, biss għall-finijiet stipulati f’dan ir-Regolament, u għat-twettiq ta’ diliġenza dovuta fir-rigward tal-klijenti, għall-monitoraġġ kontinwu, għall-analiżi u għar-rapportar ta’ tranżazzjonijiet suspettużi, għall-identifikazzjoni tas-sid benefiċjarju ta’ persuna ġuridika jew ta’ arranġament ġuridiku, għall-identifikazzjoni ta’ persuna esposta politikament u għall-kondiviżjoni ta’ informazzjoni minn istituzzjonijiet ta’ kreditu u finanzjarji u minn entitajiet oħrajn marbutin b’obbligu. Jenħtieġ li l-ġbir u l-ipproċessar sussegwenti ta’ data personali mill-entitajiet marbutin b’obbligu jkunu limitati għal dak li jkun neċessarju għall-fini tal-konformità mar-rekwiżiti dwar l-AML/CFT u jenħtieġ li d-data personali ma tiġix ipproċessata ulterjorment b’mod li jkun inkompatibbli ma’ dik il-fini. B’mod partikolari, jenħtieġ li l-ipproċessar ulterjuri ta’ data personali għal raġunijiet kummerċjali jkun projbit b’mod strett.

(152)

L-ipproċessar ta’ ċerti kategoriji ta’ data sensittiva kif iddefinit fl-Artikolu 9 tar-Regolament (UE) 2016/679 jista’ jwassal għal riskji għad-drittijiet u l-libertajiet fundamentali tas-suġġetti ta’ dik id-data. Sabiex jiġu minimizzati r-riskji li l-ipproċessar ta’ tali data mill-entitajiet marbutin b’obbligu jirriżulta f’eżiti diskriminatorji jew preġudikati li jħallu impatt negattiv fuq il-klijent, bħat-terminazzjoni jew ir-rifjut li wieħed jidħol f’relazzjoni tan-negozju, jenħtieġ li l-entitajiet marbutin b’obbligu ma jiħdux deċiżjonijiet biss abbażi ta’ informazzjoni fil-pussess tagħhom dwar kategoriji speċjali ta’ data personali skont it-tifsira tar-Regolament (UE) 2016/679 meta dik l-informazzjoni ma jkollha l-ebda rilevanza għar-riskji ta’ ħasil tal-flus u finanzjament tat-terroriżmu maħluqa minn tranżazzjoni jew relazzjoni. Bl-istess mod, sabiex jiġi żgurat li l-intensità tad-diliġenza dovuta fir-rigward tal-klijenti tkun ibbażata fuq fehim olistiku tar-riskji assoċjati mal-klijent, jenħtieġ li l-entitajiet marbutin b’obbligu ma jibbażawx l-applikazzjoni ta’ livell ogħla jew aktar baxx ta’ miżuri ta’ diliġenza dovuta fir-rigward tal-klijenti biss abbażi ta’ data sensittiva li jkollhom fuq il-klijent.

(153)

Ir-Rakkomandazzjonijiet riveduti tal-FAFT juru li, sabiex ikunu jistgħu jikkooperaw b’mod sħiħ u jwieġbu malajr għat-talbiet għal informazzjoni mill-awtoritajiet kompetenti għall-finijiet tal-prevenzjoni, tad-detezzjoni jew tal-investigazzjoni tal-ħasil tal-flus u tal-finanzjament tat-terroriżmu, jenħtieġ li l-entitajiet marbutin b’obbligu jżommu, għal tal-anqas ħames snin, l-informazzjoni neċessarja miksuba permezz ta’ miżuri tad-diliġenza dovuta fir-rigward tal-klijenti u r-rekords dwar it-tranżazzjonijiet. Sabiex jiġu evitati approċċi differenti u sabiex jiġu ssodisfati r-rekwiżiti li jirrigwardaw il-protezzjoni ta’ data personali u ċ-ċertezza legali, jenħtieġ li dak il-perjodu taż-żamma jiġi stabbilit għal ħames snin wara li tintemm ir-relazzjoni tan-negozju jew tranżazzjoni okkażjonali. Jista’ jkun hemm sitwazzjonijiet fejn il-funzjonijiet tal-awtoritajiet kompetenti ma jkunux jistgħu jitwettqu b’mod effettiv jekk l-informazzjoni rilevanti miżmuma mill-entitajiet marbutin b’obbligu titħassar skont l-iskadenza tal-perjodu taż-żamma. F’każijiet bħal dawn, jenħtieġ li l-awtoritajiet kompetenti jkunu jistgħu jitolbu lill-entitajiet marbutin b’obbligu jżommu informazzjoni fuq bażi ta’ każ b’każ għal perjodu itwal, li jenħtieġ li ma jaqbiżx il-ħames snin.

(154)

Fejn il-kunċett ta’ awtoritajiet kompetenti jirreferi għall-awtoritajiet ta’ investigazzjoni u ta’ prosekuzzjoni, jenħtieġ li dan jiġi interpretat li jinkludi l-Uffiċċju tal-Prosekutur Pubbliku Ewropew (UPPE) fir-rigward tal-Istati Membri li jipparteċipaw fil-kooperazzjoni msaħħa dwar l-istabbiliment tal-UPPE.

(155)

Id-disseminazzjonijiet mill-FIUs jaqdu rwol kruċjali fid-detezzjoni ta’ attivitajiet kriminali possibbli taħt il-kompetenza tal-UPPE jew, l-Uffiċċju Ewropew ta’ Kontra l-Frodi (OLAF), jew li fir-rigward tagħhom l-Europol u l-Eurojust ikunu kapaċi jipprovdu appoġġ operazzjonali fi stadju bikri f’konformità mal-mandati rispettivi tagħhom, u u jappoġġaw investigazzjonijiet u prosekuzzjonijiet fil-pront u effettivi. Jenħtieġ li l-informazzjoni kondiviża mal-UPPE u l-OLAF mill-FIUs tinkludi raġunijiet għas-suspett li jista’ jitwettaq jew ikun twettaq reat taħt il-kompetenzi rispettivi tal-UPPE u tal-OLAF, u tkun akkumpanjata mill-informazzjoni rilevanti kollha li għandha l-FIU u li tista’ tappoġġa azzjoni, inkluż informazzjoni finanzjarja u amministrattiva rilevanti. Fejn l-UPPE u l-OLAF jitolbu informazzjoni mill-FIUs, huwa daqstant importanti li l-FIUs ikunu jistgħu jikkondividu l-informazzjoni kollha li jkollhom fir-rigward tal-każ. F’konformità mad-dispożizzjonijiet applikabbli fl-istrumenti legali fundaturi tagħhom, jenħtieġ li l-UPPE u l-OLAF jinfurmaw lill-FIUs dwar il-passi meħuda fir-rigward tal-informazzjoni li tkun ġiet disseminata u kwalunkwe eżitu rilevanti.

(156)

Għall-finijiet li tiġi żgurata l-amministrazzjoni adatta u effiċjenti tal-ġustizzja matul il-perjodu bejn id-dħul fis-seħħ u l-applikazzjoni ta’ dan ir-Regolament, u sabiex l-interazzjoni tiegħu mal-liġijiet proċedurali nazzjonali tkun bla xkiel, jenħtieġ li l-informazzjoni u d-dokumenti pertinenti għall-proċedimenti legali li jinsabu għaddejjin għall-fini tal-prevenzjoni, tad-detezzjoni jew tal-investigazzjoni tal-ħasil tal-flus jew il-finanzjament tat-terroriżmu possibbli, l fejn dawk il-proċedimenti jkunu pendenti fl-Istati Membri fid-data tad-dħul fis-seħħ ta’ dan ir-Regolament, jinżammu għal perjodu ta’ ħames snin wara dik id-data, u jenħtieġ li jkun possibbli li dak il-perjodu jiġi estiż għal ħames snin oħrajn.

(157)

Id-drittijiet ta’ aċċess għad-data mis-suġġett tad-data huma applikabbli għad-data personali pproċessata għall-fini ta’ dan ir-Regolament. Madankollu, l-aċċess mis-suġġett tad-data għal kwalunkwe informazzjoni relatata ma’ rapport dwar tranżazzjonijiet suspettużi jxekkel serjament l-effettività tal-ġlieda kontra l-ħasil tal-flus u l-finanzjament tat-terroriżmu. Għalhekk, l-eċċezzjonijiet għal u r-restrizzjonijiet ta’ dak id-dritt f’konformità mal-Artikolu 23 tar-Regolament (UE) 2016/679 jistgħu jkunu ġustifikati. Is-suġġett tad-data għandu d-dritt jitlob li awtorità msemmija fl-Artikolu 51 tar-Regolament (UE) 2016/679 tivverifika l-legalità tal-ipproċessar, u jkollha d-dritt li tfittex rimedju ġudizzjarju msemmi fl-Artikolu 79 ta’ dak ir-Regolament. Dik l-awtorità tista’ taġixxi wkoll fuq bażi ex officio fejn previst fir-Regolament (UE) 2016/679. Mingħajr preġudizzju għar-restrizzjonijiet għad-dritt tal-aċċess, jenħtieġ li l-awtorità superviżorja tkun tista’ tinforma lis-suġġett tad-data li jkunu seħħew il-verifiki neċessarji kollha mill-awtorità superviżorja, u dwar ir-riżultat fir-rigward tal-legalità tal-ipproċessar inkwistjoni.

(158)

L-entitajiet marbutin b’obbligu jistgħu jirrikorru għas-servizzi ta’ operaturi privati oħrajn. Madankollu, jenħtieġ li l-qafas AML/CFT japplika għall-entitajiet marbutin b’obbligu biss, u jenħtieġ li l-entitajiet marbutin b’obbligu jżommu responsabbiltà sħiħa għall-konformità mar-rekwiżiti dwar l-AML/CFT. Sabiex tiġi żgurata ċ-ċertezza legali u sabiex jiġi evitat li xi servizzi jiddaħħlu b’mod involontarju fil-kamp ta’ applikazzjoni ta’ dan ir-Regolament, huwa neċessarju li jiġi ċċarat li l-persuni li sempliċiment jaqilbu d-dokumenti stampati f’data elettronika u li jkunu qed jaġixxu taħt kuntratt ma’ entità marbuta b’obbligu, u l-persuni li jipprovdu lill-istituzzjonijiet ta’ kreditu jew lill-istituzzjonijiet finanzjarji biss b’sistemi ta’ messaġġi jew b’sistemi oħrajn ta’ appoġġ għat-trażmissjoni ta’ fondi kif definiti fl-Artikolu 4, il-punt (25), tad-Direttiva (UE) 2015/2366 jew b’sistemi ta’ kklerjar u ta’ saldu ma jaqgħux taħt il-kamp ta’ applikazzjoni ta’ dan ir-Regolament.

(159)

Jenħtieġ li l-entitajiet marbutin b’obbligu jiksbu u jżommu informazzjoni adegwata u akkurata dwar is-sjieda benefiċjarja u l-kontroll ta’ persuni ġuridiċi. Peress li l-ishma tal-portaturi jagħtu s-sjieda lill-persuna li jkollha ċ-ċertifikat tal-ishma tal-portaturi, huma jippermettu lis-sid benefiċjarju jibqa’ anonimu. Sabiex jiġi żgurat li tali ishma ma jintużawx ħażin għal finijiet ta’ ħasil tal-flus jew ta’ finanzjament tat-terroriżmu, jenħtieġ li l-kumpaniji – għajr dawk b’titoli elenkati f’suq regolat jew li l-ishma tagħhom jinħarġu bħala titoli intermedjati – jikkonvertu l-ishma tal-portaturi eżistenti kollha f’ishma reġistrati jimmobilizzawhom jew jiddepożitawhom ma’ istituzzjoni finanzjarja. Barra minn hekk, jenħtieġ li ċ-ċertifikati ta’ ishma tal-portaturi jkunu permessi biss f’forma intermedjata.

(160)

L-anonimità tal-kriptoassi tesponihom għal riskji ta’ użu ħażin għal finijiet kriminali. Il-kontijiet anonimi tal-kriptoassi, kif ukoll strumenti anonimizzati oħra, ma jippermettux it-traċċabbiltà tat-trasferimenti tal-kriptoassi, u jagħmluha diffiċli li jiġu identifikati tranżazzjonijiet konnessi li jistgħu jqajmu suspett jew li jiġi applikat livell adegwat ta’ diliġenza dovuta fir-rigward tal-klijenti. Sabiex tiġi żgurata l-applikazzjoni effettiva tar-rekwiżiti dwar l-AML/CFT għall-kriptoassi, huwa neċessarju li jiġu pprojbiti l-forniment u l-kustodja ta’ kontijiet anonimi tal-kriptoassi jew kontijiet li jippermettu l-oskurament dejjem akbar ta’ tranżazzjonijiet mill-fornituri ta’ servizzi tal-kriptoassi, inkluż permezz ta’ muniti li jżidu l-anonimità. Dik il-projbizzjoni ma tapplikax għall-fornituri ta’ hardware u software jew għall-fornituri ta’ kartieri awtoospitati sakemm ma jkollhomx aċċess għal dawk il-kartieri tal-kriptoassi jew kontroll fuqhom.

(161)

L-użu ta’ pagamenti kbar fi flus kontanti huwa vulnerabbli ħafna għall-ħasil tal-flus u għall-finanzjament tat-terroriżmu, u dik il-vulnerabbiltà ma ġietx imtaffa biżżejjed mir-rekwiżit li l-persuni li jinnegozjaw f’ oġġetti jkunu soġġetti għal regoli kontra l-ħasil tal-flus meta jsiru jew jiġu riċevuti pagamenti fi flus kontanti ta’ EUR 10 000 jew aktar. Fl-istess ħin, id-differenzi fl-approċċi fost l-Istati Membri xekklu l-kundizzjonijiet ekwi fis-suq intern għad-detriment tan-negozji li jinsabu fl-Istati Membri b’kontrolli aktar stretti. Għalhekk, huwa neċessarju li jiġi introdott limitu għall-Unjoni kollha għal pagamenti kbar fi flus kontanti ta’ EUR 10 000. Jenħtieġ li l-Istati Membri ikunu jistgħu jadottaw livelli limitu aktar baxxi u dispożizzjonijiet aktar stretti sa fejn jindirizzaw objettivi leġittimi fl-interess pubbliku. Minħabba li l-qafas tal-AML/CFT huwa bbażat fuq ir-regolamentazzjoni tal-ekonomija tan-negozju, jenħtieġ li l-limitu ma japplikax għal pagamenti bejn persuni fiżiċi li ma jkunux qed jaġixxu f’kapaċità professjonali. Barra minn hekk, sabiex jiġi żgurat li l-limitu għall-Unjoni kollha ma joħloqx ostakli b’mod mhux intenzjonat għall-persuni li ma jużawx jew m’għandhomx aċċess għal servizzi bankarji biex jagħmlu pagamenti, jew biex in-negozji jiddepożitaw l-introjtu mill-attivitajiet tagħhom fil-kontijiet tagħhom, jenħtieġ li l-pagamenti jew id-depożiti li jsiru fil-bini tal-istituzzjonijiet ta’ kreditu, l-istituzzjonijiet ta’ pagament jew l-istituzzjonijiet tal-flus elettroniċi jiġu eżentati wkoll mill-applikazzjoni tal-limitu.

(162)

Jenħtieġ li l-pagamenti fi flus kontanti jew id-depożiti li jsiru fil-bini tal-istituzzjonijiet ta’ kreditu, tal-fornituri ta’ servizzi ta’ pagament u tal-fornituri tal-flus elettroniċi li jaqbżu l-livell limitu għal pagamenti kbar fi flus kontanti ma jitqisux, b’mod awtomatiku, bħala indikatur jew suspett ta’ ħasil tal-flus, ir-reati predikati tiegħu jew il-finanzjament tat-terroriżmu. Ir-rapportar ta’ tali tranżazzjonijiet jippermetti lill-FIU tivvaluta u tidentifika xejriet li jikkonċernaw il-moviment ta’ flus kontanti u filwaqt li tali informazzjoni tikkontribwixxi għall-analiżijiet operazzjonali jew strateġiċi tal-FIU, in-natura tad-divulgazzjonijiet ibbażati fuq il-livelli limitu tagħmilhom distinti minn rapporti ta’ tranżazzjonijiet suspettużi. Għal dak l-għan, divulgazzjonijiet ibbażati fuq il-livelli limitu ma jissostitwixxux ir-rekwiżit li jiġu rrapportati tranżazzjonijiet suspettużi jew li jiġu applikati miżuri ta’ diliġenza dovuta msaħħa f’każijiet ta’ riskju ogħla. Jenħtieġ li jkun possibbli għall- FIUs j li jirrikjedu li r-rapporti jsiru fi skadenza speċifika, li tista’ tinkludi s-sottomissjoni perjodika fuq bażi aggregata.

(163)

Jista’ jkun hemm każijiet fejn raġunijiet ta’ force majeure, bħal dawk ikkawżati minn katastrofi naturali, jirriżultaw f’telf mifrux ta’ aċċess għal mekkaniżmi ta’ pagament għajr flus kontanti. F’dawk it-talikażijiet, jenħtieġ li l-Istati Membri jkunu jistgħu jissospendu l-applikazzjoni tal-limitu fuq pagamenti kbar fi flus kontanti. Tali sospensjoni hija miżura straordinarja u jenħtieġ li tiġi applikata biss fejn meħtieġ bħala rispons għal sitwazzjonijiet eċċezzjonali u debitament ġustifikati. Impossibbiltà ta’ aċċess għas-servizzi finanzjarji ma tikkostitwixxix raġuni valida għas-sospensjoni tal-limitu fejn tkun attribwibbli għan-nuqqas ta’ Stat Membru li jiggarantixxi li l-konsumaturi jkollhom aċċess għall-infrastruttura finanzjarja fit-territorju kollu tiegħu.

(164)

Jenħtieġ li l-Kummissjoni tivvaluta l-kostijiet, il-benefiċċji u l-impatti tal-aġġustament tal-limitu għal pagamenti kbar fi flus kontanti fil-livell tal-Unjoni bl-għan li jiġu llivellati aktar il-kundizzjonijiet ekwi għan-negozji u jitnaqqsu l-opportunitajiet għall-kriminali sabiex jużaw flus kontanti għall-ħasil tal-flus. Jenħtieġ li dik il-valutazzjoni tqis b’mod partikolari l-aktar livell xieraq għal limitu armonizzat għall-pagamenti fi flus kontanti fil-livell tal-Unjoni b’kunsiderazzjoni tal-limiti eżistenti kurrenti għall-pagamenti fi flus kontanti fis-seħħ f’numru kbir ta’ Stati Membri, l-infurzabbiltà ta’ tali limitu fil-livell tal-Unjoni u l-effetti ta’ tali limitu fuq il-valuta legali tal-euro.

(165)

Jenħtieġ li l-Kummissjoni tivvaluta wkoll il-kostijiet, il-benefiċċji u l-impatti tat-tnaqqis tal-livell limitu ta’ 25 % għall-identifikazzjoni tas-sidien benefiċjarji fejn l-kontroll jiġi eżerċitat permezz ta’ interess proprjetarju. Jenħtieġ li dik il-valutazzjoni tqis b’mod partikolari t-tagħlimiet meħuda mill-Istati Membri jew mill-pajjiżi terzi li introduċew livelli limitu aktar baxxi.

(166)

Ir-riskji assoċjati ma’ oġġetti ta’ valur għoli jistgħu jestendu wkoll għal oġġetti oħra li jistgħu jinġarru faċilment, bħal ħwejjeġ u aċċessorji tal-ħwejjeġ. Għalhekk, jenħtieġ li l-Kummissjoni tivvaluta l-ħtieġa li testendi l-kamp ta’ applikazzjoni tal-entitajiet marbutin b’obbligu biex jinkludu persuni li jinnegozjaw f’ tali oġġetti ta’ valur għoli. Barra minn hekk, minħabba li dan ir-Regolament jintroduċi għall-ewwel darba fil-livell tal-Unjoni divulgazzjonijiet obbligatorji bbażati fuq il-livelli limitu fir-rigward ta’ ċerti oġġetti ta’ valur għoli, jenħtieġ li l-Kummissjoni tivvaluta, abbażi tal-esperjenza miksuba fir-rigward tal-implimentazzjoni ta’ dan ir-Regolament, il-ħtieġa li jiġi estiż il-kamp ta’ applikazzjoni tal-oġġetti soġġetti għal divulgazzjonijiet ibbażati fuq il-livelli limitu, u li l-format għal tali divulgazzjonijiet jiġi armonizzat fid-dawl tal-użu ta’ żvelar ibbażat fuq limiti li jsir mill-FIUs. Fl-aħħar nett, minħabba r-riskji assoċjati ma’ oġġetti ta’ valur għoli f’żoni ta’ kummerċ ħieles, jenħtieġ li l-Kummissjoni tivvaluta l-ħtieġa li jitwessa’ l-kamp ta’ applikazzjoni tal-informazzjoni li għandha tiġi rrapportata mill-operaturi li jinnegozjaw u jaħżnu oġġetti ta’ valur għoli f’tali żoni ta’ kummerċ ħieles.

(167)

Sabiex tiġi żgurata l-applikazzjoni konsistenti tar-rekwiżiti dwar l-AML/CFT, jenħtieġ li l-Kummissjoni tingħata s-setgħa li tadotta atti f’konformità mal-Artikolu 290 TFUE fir-rigward l-identifikazzjoni ta’ pajjiżi terzi b’riskju għoli, pajjiżi terzi bi dgħufijiet fil-konformità u pajjiżi terzi li jippreżentaw theddida speċifika u serja għas-sistema finanzjarja tal-Unjoni kif ukoll kontromiżuri kew miżuri speċifiċi msaġġa ta’ diliġenza dovuta li jtaffuriskji li joriġinaw minn tali pajjiżi terzi; l-identifikazzjoni ta’ każijiet addizzjonali ta’ riskju ogħla li jaffetwaw l-Unjoni u miżuri assoċjati ta’ diliġenza dovuta msaħħa; l-identifikazzjoni tal-kategoriji addizzjonali komuni ta’ funzjonijiet pubbliċi prominenti; l-identifikazzjoni tal-kategoriji ta’ entitajiet korporattivi assoċjati ma’ riskji ogħla u l-livelli limitu aktar baxxi assoċjati għall-finijiet tal-identifikazzjoni tas-sjieda benefiċjarja permezz tal-interess ta’ sjieda; id-definizzjonital-kategoriji ta’ ksur tar-rekwiżiti ta’ trasparenza tas-sjieda benefiċjarja li huma soġġetti għal penali u l-persuni responsabbli għalihom, l-indikaturi biex jiġi klassifikat il-livell ta’ gravità ta’ dak il-ksur u l-kriterji li għandhom jitqiesu meta jiġi stabbilit il-livell tal-penali, ,Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (29). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom għandhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(168)

Jenħtieġ li l-Kummissjoni tingħata s-setgħa li tadotta listandards tekniċi regolatorji żviluppati minn AMLA li jispeċifikaw r-rekwiżiti minimi ta’ politiki, iproċeduri u l-kontrolli għall-grupp kollu, inkluż l-istandards minimi għall-kondiviżjoni tal-informazzjoni, il-kriterji għall-identifikazzjoni tal-impriża omm u il-kundizzjonijiet li skonthom l-istrutturi li jikkondividu sjieda, ġestjoni jew kontrolli tal-konformità komuni huma meħtieġa japplikaw politiki, proċeduri u kontrolli għall-grupp kollu; li jispeċifikaw it-tip ta’ miżuri addizzjonali, inkluż l-azzjoni minima li għandha tittieħed minn gruppi fejn il-liġi ta’ pajjiżi terzi ma tippermettix l-implimentazzjoni ta’ politiki, ta’proċeduri u ta’ kontrolli għall-grupp kollu u azzjonijiet superviżorji addizzjonali; li jispeċifikaw l-entitajiet marbutin b’obbligu, is-setturi u t-tranżazzjonijiet assoċjati ma’ riskju ogħla u li jwettqu tranżazzjonijiet okkażjonali ta’ valur baxx, il-valuri relatati, il-kriterji biex jiġu identifikati t-tranżazzjonijiet okkażjonali u -relazzjoni ta’ negozju u l-kriterji biex jiġu identifikati t-tranżazzjonijiet konnessi għall-fini tat-twettiq tad-diliġenza dovuta fir-rigward tal-klijenti; u li jispeċifikaw l-informazzjoni neċessarja għat-twettiq tad-diliġenza dovuta fir-rigward tal-klijenti. Jenħtieġ li l-Kumissjoni tadotta dawk l-istandards tekniċi regolatorji permezz ta’ atti delegati skont l-Artikolu 290 TFUE u f’konformità mal-Artikolu 49 tar-Regolament (UE) 2024/1620.

(169)

Sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li l-Kummissjoni tingħata setgħat ta’ implimentazzjoni sabiex tiddeċiedi dwar is-sospensjoni tal-kontromiżuri nazzjonali, tistipula l-metodoloġija għall-identifikazzjoni ta’ pajjiżi terzi li jippreżentaw theddida speċifika u serja għas-sistema finanzjarja tal-Unjoni, tistipula l-format għall-istabbiliment u l-komunikazzjoni tal-listi tal-Istati Membri ta’ funzjonijiet pubbliċi prominenti u tidentifika t-tipi ta’ entitajiet ġuridiċi u t-tipi ta’ arranġamenti ġuridiċi simili għat-trusts espressi regolati bil-liġi tal-Istati Membri. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill. (30). Jenħtieġ li l-Kummissjoni tingħata wkoll setgħat ta’ implimentazzjoni sabiex tiddeċiedi dwar it-tmiem ta’ kontomiżuri nazzjonali speċifiċi addizzjonali.

(170)

Jenħtieġ li l-Kummissjoni tingħata s-setgħat tadotta standards tekniċi ta’ implimentazzjoni żviluppati minn Amla li jispeċifikaw il-format li għandu jintuża għar-rapportar ta’ suspetti u għall-għoti ta’ rekords tat-tranżazzjonijiet, u l-format li għandu jintuża mill-FIUs għar-rapportar ta’ informazzjoni lill-UPPE. Jenħtieġ li l-Kummissjoni tadotta dawk l-istandards tekniċi ta’ implimentazzjoni permezz ta’ atti ta’ implimentazzjoni skont l-Artikolu 291 TFUE u f’konformità mal-Artikolu 53 tar-Regolament (UE) 2024/1620,

(171)

Dan ir-Regolament jirrispetta d-drittijiet fundamentali u josserva l-prinċipji rikonoxxuti fil-Karta, b’mod partikolari d-dritt għar-rispett għall-ħajja privata u tal-familja, id-dritt għall-protezzjoni tad-data personali u l-libertà ta’ intrapriża.

(172)

F’konformità mal-Artikolu 21 tal-Karta, li jipprojbixxi d-diskriminazzjoni abbażi ta’ kwalunkwe raġuni, jenħtieġ li l-entitajiet marbutin b’obbligu jwettqu valutazzjonijiet tar-riskju fil-kuntest tad-diliġenza dovuta fir-rigward tal-klijenti mingħajr diskriminazzjoni.

(173)

Meta tfassal rapport ta’ valutazzjoni tal-implimentazzjoni ta’ dan ir-Regolament, jenħtieġ li l-Kummissjoni tagħti l-attenzjoni dovuta fir-rigward tar-rispett tad-drittijiet fundamentali u tal-prinċipji rikonoxxuti mill-Karta.

(174)

Billi l-objettiv ta’ dan ir-Regolament, jiġifieri l-prevenzjoni tal-użu tas-sistema finanzjarja tal-Unjoni għall-finijiet ta’ ħasil tal-flus u ta’ finanzjament tat-terroriżmu, ma jistax jintlaħaq biżżejjed mill-Istati Membri u, minflok, minħabba l-iskala u l-effetti tal-azzjoni, jista’ jintlaħaq aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 TUE. F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa neċessarju sabiex jintlaħaq dak l-objettiv.

(175)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fi t-22 ta’ Settembru 2021 (31),