(1)

F’Lulju 2005, permezz tar-Regolament tal-Kunsill (KE) Nru 1174/2005 (2), il-Kunsill impona dazju anti-dumping definittiv fuq importazzjonijiet ta’ pallet trucks tal-idejn u l-partijiet essenzjali tagħhom li joriġinaw mir-Repubblika tal-Poplu taċ-Ċina (“iċ-Ċina” jew “il-RPĊ”). Il-miżuri kienu jikkonsistu f’dazju anti-dumping ad valorem li jvarja bejn 7,6 % u 46,7 % (“il-miżuri oriġinali”).

(2)

F’Lulju 2008, permezz tar-Regolament tal-Kunsill (KE) Nru 684/2008 (3) u wara rieżami interim parzjali ex officio skont l-Artikolu 11(3) tar-Regolament anti-dumping bażiku (“ir-Regolament bażiku”), il-Kunsill iċċara l-ambitu tal-miżuri u eskluda mill-miżuri anti-dumping oriġinali ċerti prodotti, jiġifieri lifters għoljin, stackers, scissor lifts u trakkijiet tal-użin, li jistgħu jitmexxew waħedhom jew jiġu mċaqilqa manwalment u jintużaw biex jiċċaqalqu u jerfgħu t-tagħbijiet, jgħinu fil-ħażna ta’ tagħbijiet, jistivaw pallet wieħed fuq l-ieħor, jerfgħu t-tagħbija għal livell ta’ ħidma jew jerfgħu u jiżnu t-tagħbijiet, li nstabu li huma distinti minn pallet trucks tal-idejn minħabba l-karatteristiċi u l-funzjonijiet speċifiċi u l-użi finali tagħhom.

(3)

F’Ġunju 2009, permezz tar-Regolament (KE) Nru 499/2009 (4), il-Kunsill, wara investigazzjoni antiċirkomvenzjoni skont l-Artikolu 13 tar-Regolament bażiku, estenda d-dazju anti-dumping definittiv applikabbli “għall-kumpaniji l-oħrajn kollha” impost mir-Regolament (KE) Nru 1174/2005 għal pallet trucks tal-idejn ikkonsenjati mit-Tajlandja, kemm jekk ġew iddikjarati li joriġinaw fit-Tajlandja, kif ukoll jekk le.

(4)

F’Ottubru 2011, permezz tar-Regolament ta’ Implimentazzjoni (UE) Nru 1008/2011 (5), il-Kunsill, wara rieżami ta’ skadenza skont l-Artikolu 11(2) tar-Regolament bażiku, tawwal l-applikazzjoni tad-dazju anti-dumping eżistenti fuq l-importazzjonijiet ta’ pallet trucks tal-idejn li joriġinaw miċ-Ċina.

(5)

F’April 2013, permezz tar-Regolament ta’ Implimentazzjoni (UE) Nru 372/2013 (6), il-Kunsill, wara rieżami interim skont l-Artikolu 11(3) tar-Regolament bażiku, emenda r-Regolament (UE) Nru 1008/2011, u mmodifika l-firxa oriġinali tad-dazji anti-dumping u impona rata ta’ dazju ta’ 70,8 % applikabbli għall-importazzjonijiet kollha fl-Unjoni ta’ pallet trucks tal-idejn li joriġinaw miċ-Ċina.

(6)

F’Settembru 2014, permezz tar-Regolament ta’ Implimentazzjoni (UE) Nru 946/2014 (7), il-Kummissjoni Ewropea (“il-Kummissjoni”), wara rieżami ta’ esportatur ġdid skont l-Artikolu 11(4) tar-Regolament bażiku, emendat ir-Regolament (UE) Nru 1008/2011, u imponiet rata’ ta’ dazju individwali ta’ 54,1 % fuq l-importazzjonijiet ta’ pallet trucks tal-idejn minn Ningbo Logitrans Handling Equipment Co.

(7)

F’Awwissu 2016, permezz tar-Regolament ta’ Implimentazzjoni (UE) 2016/1346 (8), il-Kummissjoni, wara investigazzjoni antiċirkomvenzjoni skont l-Artikolu 13 tar-Regolament bażiku, estendiet id-dazju anti-dumping definittiv stabbilit għal importazzjonijiet ta’ pallet trucks tal-idejn kemxejn modifikati li jinkorporaw sistema ta’ indikazzjoni tal-piż mhux integrata fix-xażi (il-frieket) li joriġinaw miċ-Ċina.

(8)

F’Novembru 2017, permezz tar-Regolament ta’ Implimentazzjoni (UE) 2017/2206 (9), il-Kummissjoni, skont l-Artikolu 11(2) tar-Regolament bażiku wara rieżami ta’ skadenza imponiet mill-ġdid il-miżuri anti-dumping definittivi fuq l-importazzjonijiet ta’ pallet trucks tal-idejn li joriġinaw miċ-Ċina (ir-“rieżami ta’ skadenza preċedenti”).

(9)

Id-dazji anti-dumping li bħalissa huma stabbiliti huma dazji ad valorem stabbiliti b’rata ta’ 70,8 %. Rata ta’ dazju individwali ta’ 54,1 % tapplika għal Ningbo Logitrans Handling Equipment Co., Ltd. (10)

(10)

Wara l-pubblikazzjoni ta’ notifika tal-iskadenza imminenti f’ Il-Ġurnal Uffiċjali tal-Unjoni Ewropea (11), il-Kummissjoni rċeviet talba għal rieżami skont l-Artikolu 11(2) tar-Regolament bażiku. It-talba għal rieżami ġiet sottomessa fid-29 ta’ Awwissu 2022 minn Toyota Material Handling Europe u PR Industrial S.r.l. (“l-applikanti”) f’isem l-industrija tal-Unjoni tal-pallet trucks tal-idejn, fis-sens tal-Artikolu 5(4) tar-Regolament bażiku.

(11)

It-talba għal rieżami kienet ibbażata fuq il-bażi li l-iskadenza tal-miżuri x’aktarx twassal għal kontinwazzjoni ta’ dumping u għal rikorrenza ta’ dannu għall-industrija tal-Unjoni.

(12)

Wara li kkonsultat lill-Kumitat stabbilit bl-Artikolu 15(1) tar-Regolament bażiku, u ddeterminat li kienet teżisti biżżejjed evidenza biex jinbeda r-rieżami ta’ skadenza, fid-29 ta’ Novembru 2022, il-Kummissjoni bdiet rieżami ta’ skadenza fir-rigward tal-importazzjonijiet fl-Unjoni ta’ pallet trucks tal-idejn li joriġinaw mir-Repubblika tal-Poplu taċ-Ċina u mir-Renju tat-Tajlandja abbażi tal-Artikolu 11(2) tar-Regolament bażiku. Din ippubblikat Notifika tal-Bidu f’Il-Ġurnal Uffiċjali tal-Unjoni Ewropea (“in-Notifika tal-Bidu”) (12).

(13)

L-investigazzjoni tal-probabbiltà tal-kontinwazzjoni tad-dumping kopriet il-perjodu mill-1 ta’ Ottubru 2021 sat-30 ta’ Settembru 2022 (“il-perjodu tal-investigazzjoni tar-rieżami” jew ir-“RIP”). L-eżaminazzjoni tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza tad-dannu kopriet il-perjodu mill-1 ta’ Jannar 2019 sa tmiem il-perjodu ta’ investigazzjoni tar-rieżami (“il-perjodu taħt kunsiderazzjoni”).

(14)

Fin-Notifika tal-Bidu, il-partijiet interessati ġew mistiedna jikkuntattjaw lill-Kummissjoni biex jieħdu sehem fl-investigazzjoni. Barra minn hekk, il-Kummissjoni għarrfet speċifikament lill-applikanti, lill-produtturi l-oħrajn magħrufa tal-Unjoni, lill-produtturi esportaturi magħrufa, lill-awtoritajiet Ċiniżi, lill-importaturi u lill-utenti magħrufa dwar il-bidu tar-rieżami ta’ skadenza u stednithom jipparteċipaw.

(15)

Il-partijiet interessati kellhom l-opportunità li jikkummentaw dwar il-bidu tar-rieżami ta’ skadenza u li jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(16)

Fin-Notifika tal-Bidu, il-Kummissjoni ddikjarat li tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(17)

Fin-Notifika tal-Bidu, il-Kummissjoni ddikjarat li kienet għażlet kampjun tal-produtturi tal-Unjoni b’mod provviżorju.

(18)

F’konformità mal-Artikolu 17(1) tar-Regolament bażiku, il-Kummissjoni għażlet il-kampjun abbażi tal-akbar volum rappreżentattiv tal-produzzjoni u tal-bejgħ tal-pallet trucks tal-idejn fil-perjodu ta’ investigazzjoni tar-rieżami, li jista’ jiġi investigat b’mod raġonevoli fiż-żmien disponibbli. Dan il-kampjun kien jikkonsisti minn żewġ produtturi tal-Unjoni.

(19)

Iż-żewġ produtturi tal-Unjoni inklużi fil-kampjun kienu jirrappreżentaw aktar minn 75 % tal-produzzjoni u aktar minn 70 % tal-kapaċità tal-produzzjoni tal-industrija tal-Unjoni fil-perjodu ta’ investigazzjoni tar-rieżami. F’konformità mal-Artikolu 17(2) tar-Regolament bażiku, il-Kummissjoni stiednet lill-partijiet interessati jikkummentaw dwar il-kampjun provviżorju.

(20)

Ma wasal l-ebda kumment u, għalhekk, il-kampjun provviżorju kien ikkonfermat. Il-kampjun huwa rappreżentattiv tal-industrija tal-Unjoni.

(21)

Biex tiddeċiedi jekk kienx hemm bżonn li jittieħed kampjun u, jekk iva, biex tagħżel kampjun, il-Kummissjoni talbet lill-importaturi mhux relatati magħrufa kollha biex jipprovdu l-informazzjoni speċifikata fin-Notifika tal-Bidu. L-ebda importatur mhux relatat ma ppreżenta ruħu u pprovda l-informazzjoni mitluba.

(22)

Fin-Notifika ta’ Bidu tal-investigazzjoni tar-rieżami ta’ skadenza, il-Kummissjoni ddikjarat li setgħet tieħu kampjun tal-produtturi esportaturi f’konformità mal-Artikolu 17(2) tar-Regolament bażiku.

(23)

Biex tiddeċiedi jekk il-kampjunar huwiex meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi fiċ-Ċina biex jipprovdu l-informazzjoni speċifikata fin-Notifika tal-Bidu. Madankollu, ebda produttur esportatur fil-pajjiż ikkonċernat ma pprovda l-informazzjoni mitluba fil-perjodu ta’ żmien definit fin-Notifika tal-Bidu.

(24)

Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni. Ma ngħatat l-ebda tweġiba.

(25)

Fid-dawl ta’ dan ta’ hawn fuq, ma kien hemm l-ebda kooperazzjoni mill-produtturi Ċiniżi u l-Kummissjoni ddeċidiet li l-kampjunar ma kienx meħtieġ, u infurmat lill-Missjoni tar-Repubblika tal-Poplu taċ-Ċina għall-Unjoni Ewropea kif xieraq. Ma sar l-ebda kumment.

(26)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fiċ-Ċina skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”). Ma waslet l-ebda tweġiba għall-kwestjonarju.

(27)

Il-Kummissjoni bagħtet kwestjonarji lill-produtturi esportaturi, lill-produtturi tal-Unjoni fil-kampjun„ lill-utenti u lill-importaturi. L-istess kwestjonarji kienu wkoll disponibbli online fil-jum tal-bidu (13).

(28)

Iż-żewġ produtturi tal-Unjoni fil-kampjun wieġbu l-kwestjonarji. Madankollu, il-produtturi esportaturi, l-importaturi mhux relatati, u l-utenti ma weġbux.

(29)

Minħabba li ma kien hemm l-ebda kooperazzjoni mill-produtturi esportaturi Ċiniżi jew mill-GTĊ, is-sejbiet rigward id-dumping u d-dannu saru abbażi tal-fatti disponibbli skont l-Artikolu 18 tar-Regolament bażiku. Il-Missjoni tar-Repubblika tal-Poplu taċ-Ċina lill-Unjoni Ewropea ġiet informata dwar dan. Ma wasal l-ebda kumment.

(30)

Il-Kummissjoni fittxet u vverifikat l-informazzjoni kollha meqjusa meħtieġa għad-determinazzjoni tal-probabbiltà ta’ kontinwazzjoni jew ta’ rikorrenza ta’ dumping u dannu u tal-interess tal-Unjoni.

(31)

Iż-żjarat ta’ verifika skont l-Artikolu 16 tar-Regolament bażiku twettqu fil-bini tal-produtturi tal-Unjoni li ġejjin:

(32)

Il-Kummissjoni vverifikat id-data makroekonomika pprovduta mill-industrija tal-Unjoni fil-bini tar-rappreżentant legali tagħhom, White & Case, fi Brussell.

(33)

Il-prodott taħt rieżami huwa l-istess bħal fir-rieżami ta’ skadenza preċedenti, jiġifieri l-pallet trucks tal-idejn u l-partijiet essenzjali tagħhom, jiġifieri, ix-xażi u l-idrawlika, li bħalissa jaqgħu taħt il-kodiċijiet NM ex 8427 90 00 (il-kodiċijiet TARIC 8427900011 u 8427900019) u ex 8431 20 00 (il-kodiċijiet TARIC 8431200011, u 8431200019).

(34)

Fl-2008, il-Kummissjoni wettqet rieżami interim u ċċarat li l-miżuri stabbiliti ma jkoprux ċerti kategoriji ta’ prodotti, jiġifieri lifters għoljin, stackers, scissor lifts u trakkijiet tal-piż, li jistgħu jitħaddmu waħidhom jew jiġu mċaqilqa manwalment u jintużaw biex imexxu u jerfgħu t-tagħbijiet, jgħinu fil-ħżin ta’ tagħbijiet, jistivaw pallet fuq oħra, jerfgħu t-tagħbija għal-livell li fih isir ix-xogħol jew biex jerfgħu u jiżnu t-tagħbijiet.

(35)

Il-prodott ikkonċernat minn din l-investigazzjoni huwa l-prodott taħt rieżami li joriġina fiċ-Ċina.

(36)

Kif ġie stabbilit fl-investigazzjoni oriġinali li wasslet għall-impożizzjoni tal-miżuri, kif ukoll fir-rieżami ta’ skadenza preċedenti, din l-investigazzjoni tar-rieżami ta’ skadenza kkonfermat li dawn il-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll użi bażiċi simili:

(37)

Għalhekk, dawn il-prodotti huma kkunsidrati bħala prodotti simili skont it-tifsira tal-Artikolu 1(4) tar-Regolament bażiku.

(38)

Biex tiddetermina l-kwantità u l-prezz ta’ pallet trucks tal-idejn importati fl-Unjoni, il-Kummissjoni tiddependi fuq l-istatistika tal-importazzjoni. Id-data uffiċjali għal dawn l-importazzjonijiet hija rreġistrata kemm f’kilogrammi kif ukoll f’unitajiet (biċċiet).

(39)

Madankollu, is-sorsi statistiċi kollha disponibbli (Comext, Surveillance 3 u l-bażi tad-data bbażata fuq l-Artikolu 14(6) tar-Regolament bażiku) urew data inkonsistenti dwar il-volum ta’ pallet trucks tal-idejn importati fl-Unjoni.

(40)

Il-piż għal kull pallet truck tal-idejn importat wera fluttwazzjonijiet inspjegabbli. Dan kien inkonsistenti kemm mal-evidenza miġbura f’din l-investigazzjoni kif ukoll mal-istatistika dwar l-importazzjoni użata fl-investigazzjoni oriġinali u fir-rieżamijiet ta’ skadenza preċedenti, li wrew li l-piż għal kull pallet truck tal-idejn huwa bażikament kostanti u ma jvarjax maż-żmien jew bejn l-Istati Membri.

(41)

Għalhekk, il-Kummissjoni kkuntattjat lill-Eurostat, li informat li d-data dwar il-volumi tal-importazzjonijiet f’żewġ Stati Membri tidher li ma ġietx irrapportata b’mod korrett, u li l-kilogrammi u l-biċċiet irrapportati ma tqisux bħala affidabbli fid-dawl tal-valur irrapportat tagħhom. Id-data tal-importazzjoni fl-Unjoni mingħajr importazzjonijiet f’dawn iż-żewġ Stati Membri nstabet koerenti madwar l-Istati Membri u konsistenti mal-istatistika preċedenti.

(42)

Għalhekk, il-Kummissjoni aġġustat is-sett tad-data dwar l-importazzjoni tal-Eurostat għall-perjodu taħt kunsiderazzjoni billi ħadet il-prezz għal kull biċċa mill-importazzjonijiet kollha lejn l-Unjoni minbarra dawk lejn iż-żewġ Stati Membri msemmija fil-premessa (41) u billi applikat dak il-proporzjon tal-prezz għal kull biċċa għall-valur irrapportat tal-importazzjonijiet f’dawn iż-żewġ Stati Membri l-Istati sabiex tiddetermina l-volum ikkoreġut ta’ dawn l-importazzjonijiet f’biċċiet.

(43)

Dan l-aġġustament imbagħad ipprovda sett ta’ data għall-importazzjonijiet fl-Unjoni fejn l-għadd ta’ biċċiet importati u l-valur tagħhom għal kull biċċa kienu koerenti madwar l-Istati Membri.

(44)

Dan is-sett ta’ data aġġustat intuża biex jiġi kkalkolat id-dumping fin-nuqqas ta’ kooperazzjoni mill-produtturi esportaturi Ċiniżi u wkoll għal diversi indikaturi tad-dannu kif stabbilit hawn taħt fit-Tabelli 2, 3 4 u 5 ta’ hawn taħt.

(45)

F’konformità mal-Artikolu 11(2) tar-Regolament bażiku, il-Kummissjoni eżaminat jekk l-iskadenza tal-miżuri stabbiliti tkunx probabbli li twassal għal kontinwazzjoni tad-dumping.

(46)

Kif issemma fil-premessa (25), l-ebda produttur esportatur miċ-Ċina ma kkoopera fl-investigazzjoni. Għalhekk, il-Kummissjoni informat lill-GTĊ li minħabba n-nuqqas ta’ kooperazzjoni, il-Kummissjoni tista’ tapplika l-Artikolu 18 tar-Regolament bażiku. Il-Kummissjoni ma rċeviet l-ebda kumment jew talba għal intervent tal-Uffiċjal tas-Seduta f’dan ir-rigward.

(47)

Abbażi ta’ dan, f’konformità mal-Artikolu 18(1) tar-Regolament bażiku, is-sejbiet fir-rigward tal-eżistenza tad-dumping u tal-probabbiltà ta’ kontinwazzjoni jew ta’ rikorrenza ta’ dumping stabbiliti hawn taħt kienu bbażati fuq il-fatti disponibbli, b’mod partikolari:

(48)

Barra minn hekk, sabiex jinbena l-valur normali f’konformità mal-Artikolu 2(6a)(a) tar-Regolament bażiku, il-Kummissjoni użat id-data disponibbli fil-pajjiż rappreżentattiv kif spjegat fit-Taqsima 4.2.4 hawn taħt.

(49)

Minħabba li l-evidenza suffiċjenti disponibbli fil-bidu tal-investigazzjoni kellha t-tendenza li turi, fir-rigward taċ-Ċina, l-eżistenza ta’ distorsjonijiet sinifikanti skont it-tifsiratal-Artikolu 2(6a), il-punt (b) tar-Regolament bażiku, il-Kummissjoni bdiet l-investigazzjoni abbażi tal-Artikolu 2(6a) tar-Regolament bażiku.

(50)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, kif imsemmi fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea.

(51)

Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku sal-iskadenza.

(52)

Sussegwentement, il-Kummissjoni informat lill-GTĊ li kienet se tuża l-fatti disponibbli skont it-tifsira tal-Artikolu 18 tar-Regolament bażiku sabiex tiddetermina l-eżistenza tad-distorsjonijiet sinifikanti fiċ-Ċina. Ma tqajjem l-ebda kumment mill-GTĊ f’dan ir-rigward.

(53)

Fil-punt 5.3.2 tan-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku għall-fini li tiddetermina l-valur normali abbażi ta’ prezzijiet jew ta’ valuri referenzjarji mingħajr distorsjoni. Speċifikat ukoll li pajjiż terz rappreżentattiv possibbli għar-RPĊ f’dan il-każ kien il-Brażil, iżda li kienet se teżamina pajjiżi oħrajn possibbilment xierqa f’konformità mal-kriterji stabbiliti fl-Artikolu 2(6a)(a), l-ewwel inċiż, tar-Regolament bażiku.

(54)

Fit-3 ta’ April 2023, il-Kummissjoni informat lill-partijiet interessati permezz ta’ nota dwar is-sorsi rilevanti li kienet beħsiebha tuża għad-determinazzjoni tal-valur normali (“Nota dwar is-sorsi”).

(55)

Fin-Nota dwar is-sorsi, il-Kummissjoni informat lill-partijiet interessati li fin-nuqqas ta’ kooperazzjoni, ikollha tiddependi fuq il-fatti disponibbli skont l-Artikolu 18 tar-Regolament bażiku. Għalhekk, il-Kummissjoni kellha l-ħsieb li tuża l-informazzjoni li tinsab fit-talba għal rieżami ta’ skadenza, flimkien ma’ sorsi oħrajn ta’ informazzjoni meqjusa xierqa skont il-kriterji rilevanti stabbiliti fl-Artikolu 2(6a) tar-Regolament bażiku f’konformità mal-Artikolu 18(5) tar-Regolament bażiku.

(56)

Fin-Nota dwar is-sorsi, il-Kummissjoni informat ukoll lill-partijiet interessati li kienet beħsiebha tuża lill-Brażil bħala pajjiż rappreżentattiv, u dwar is-sorsi rilevanti li kienet beħsiebha tuża għad-determinazzjoni tal-valur normali bil-Brażil bħala l-pajjiż rappreżentattiv. Il-Kummissjoni stiednet lill-partijiet interessati biex jikkummentaw dwar is-sorsi u l-adegwatezza tal-Brażil bħala pajjiż rappreżentattiv u jissuġġerixxu wkoll pajjiżi oħrajn, dment li dawn jissottomettu biżżejjed informazzjoni dwar il-kriterji rilevanti.

(57)

Infurmat ukoll lill-partijiet interessati li kienet se tistabbilixxi l-kostijiet tal-bejgħ, ġenerali u amministrattivi (“SG&A”) u l-profitt abbażi tal-informazzjoni disponibbli għall-kumpanija Paletrans Equipamentos Ltda, produttur fil-pajjiż rappreżentattiv. Ma wasal l-ebda kumment.

(58)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(59)

Madankollu, skont l-Artikolu 2(6a)(a) tar-Regolament bażiku, “fil-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”.

(60)

Kif spjegat ulterjorment hawn taħt, fl-investigazzjoni preżenti l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi esportaturi, l-applikazzjoni tal-Artikolu 2(6a) tar-Regolament bażiku kienet xierqa.

(61)

F’investigazzjonijiet reċenti dwar is-settur tal-azzar fir-RPĊ (14), il-Kummissjoni sabet li kien hemm distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku.

(62)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (15). B’mod partikolari, il-Kummissjoni kkonkludiet li fis-settur tal-azzar – l-azzar li huwa l-materja prima ewlenija għall-produzzjoni tal-prodott taħt rieżami – mhux biss għad hemm grad sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż, tar-Regolament bażiku (16), iżda l-GTĊ huwa wkoll f’pożizzjoni li jinterferixxi mal-prezzijiet u mal-kostijiet permezz tal-preżenza tal-Istat fid-ditti fis-sens tal-Artikolu 2(6a)(b), it-tieni inċiż, tar-Regolament bażiku (17).

(63)

Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (18).

(64)

Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tal-Artikolu 2(6a)(b), ir-raba’ inċiż, tar-Regolament bażiku, u b’hekk jiġu ġġenerati distorsjonijiet meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fir-RPĊ (19).

(65)

Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-azzar fis-sens tal-Artikolu 2(6a)(b), il-ħames inċiż, tar-Regolament bażiku (20), kif ukoll distorsjonijiet fis-swieq finanzjarji fis-sens tal-Artikolu 2(6a)(b), is-sitt inċiż, tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (21).

(66)

Bħal fl-investigazzjonijiet preċedenti dwar is-settur tal-azzar fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku.

(67)

Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fit-talba, kif ukoll fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-RPĊ għall-Finijiet tal-Investigazzjonijiet għad-Difiża tal-Kummerċ (“ir-Rapport”), li jibbaża fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali mill-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-pallet trucks tal-idejn.

(68)

Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(69)

It-talba għal rieżami allegat li l-ekonomija Ċiniża hija influwenzata b’mod wiesa’ minn interventi mill-GTĊ jew minn awtoritajiet pubbliċi oħra. Dawn l-interventi jaffettwaw diversi livelli tal-gvern u tas-suq. It-talba elenkat id-distorsjonijiet ġenerali li jaffettwaw is-suq tal-HPT, abbażi tas-sejbiet fir-Rapport, iżda elenkat ukoll diversi każijiet addizzjonali ta’ intervent mill-Istat fis-settur tal-azzar.

(70)

L-ewwel nett, it-talba indikat is-sussidji stabbiliti fl-investigazzjoni tal-Kummissjoni dwar is-sussidji preżenti fis-settur tal-HRFS (22), filwaqt li enfasizzat li l-HRFS huwa l-materja prima ewlenija għall-produzzjoni tal-HPT. It-talba tispjega ulterjorment li minbarra l-għotjiet diretti ta’ flus offruti lill-kumpaniji, l-istat Ċiniż jintervjeni wkoll fl-ipprezzar tal-materja prima kruċjali f’dan is-settur, bħall-mineral tal-ħadid u l-faħam. It-talba indikat li l-iżgurar tal-provvista tal-materja prima lill-industrija domestika tal-azzar huwa prijorità waħda tal-14-il Pjan ta’ Ħames Snin (“FYP”) Ċiniż.

(71)

Biex ibaxxi l-prezzijiet tal-materja prima, l-istat Ċiniż għandu diversi strumenti: kwoti tal-esportazzjoni, taxxi tal-esportazzjoni, liċenzji tal-esportazzjoni. It-talba spjegat ukoll li f’Ġunju 2021, id-Dipartiment tal-Ipprezzar tal-Kummissjoni Nazzjonali għall-Iżvilupp u r-Riforma u l-Amministratur tal-Istat għar-Regolamentazzjoni tas-Suq nedew inkjesta fin-negozjar spot tal-mineral tal-ħadid. Kien hemm ukoll investigazzjoni dwar il-prezzijiet tal-faħam. Dawk il-kontrolli huma intervent dirett tal-Istat Ċiniż fl-ipprezzar tal-materja prima użata għall-produzzjoni tal-HPT.

(72)

Minbarra l-interventi ta’ hawn fuq tal-Istat Ċiniż fl-industrija tal-azzar, it-talba affermat ukoll li mod ieħor il-gvern ipprovda appoġġ indirett lis-settur tal-azzar kien billi ma nfurzax b’mod strett ir-regolamenti dwar il-protezzjoni ambjentali, speċjalment fil-livell lokali.

(73)

Fl-aħħar nett, it-talba semmiet li l-GTĊ qiegħed juża infużjonijiet u konverżjonijiet ta’ ekwità biex jappoġġa lill-intrapriżi li jipproduċu l-azzar. Pereżempju, il-gvern tal-belt ta’ Tianjin ippjana li jirristruttura d-dejn ta’ CNY 92 biljun ta’ Bohai Steel Group billi jqiegħed l-aktar assi profittabbli tiegħu f’kumpanija ġdida u jikkonverti porzjon tal-obbligazzjonijiet f’bonds.

(74)

Il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali pprovduta mill-applikanti, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(75)

Fis-settur tal-azzar — l-azzar huwa l-materja prima ewlenija għall-manifattura tal-prodott taħt rieżami (ara l-premessa (110)) — jippersisti grad sostanzjali ta’ sjieda mill-GTĊ fis-sens tal-Artikolu 2(6a)(b), l-ewwel inċiż tar-Regolament bażiku. Billi ma kien hemm l-ebda kooperazzjoni mill-esportaturi Ċiniżi tal-prodott taħt investigazzjoni, il-proporzjon eżatt tal-produtturi privati u tal-Istat ma setax jiġi ddeterminat. L-investigazzjoni kkonfermat li s-settur tal-HPT huwa frammentat ħafna b’bosta produtturi żgħar preżenti fis-suq.

(76)

Barra minn hekk, minħabba li l-interventi tal-Partit Komunista Ċiniż (“CCP” jew “il-Partit”) fit-teħid ta’ deċiżjonijiet operazzjonali saru n-norma anke f’kumpaniji privati, bis-CCP li jafferma t-tmexxija fuq kważi kull aspett tal-ekonomija tal-pajjiż, l-influwenza tal-Istat permezz ta’ strutturi tas-CCP fi ħdan il-kumpaniji effettivament tirriżulta f’sitwazzjoni li fiha l-operaturi ekonomiċi jkunu taħt kontroll u taħt superviżjoni politika tal-gvern, fid-dawl ta’ kif l-istrutturi tal-Istat u tal-Partit kibru flimkien fir-RPĊ.

(77)

L-organizzazzjoni li tirrappreżenta l-interessi tal-produtturi tal-HPT fiċ-Ċina hija l-Assoċjazzjoni tat-Trakkijiet Industrijali taċ-Ċina (“CITA”) (23), li hija sussidjarja tal-Assoċjazzjoni tal-Makkinarju tal-Kostruzzjoni taċ-Ċina (“CCMA”) (24). Id-dispożizzjonijiet tal-Artikoli ta’ Assoċjazzjoni (“AoA”) tas-CCMA jindikaw b’mod ċar influwenza qawwija tal-partijiet. Fl-Artikolu 2, l-AoA tiddeskrivi r-rwol tagħha bil-mod li ġej: “taqdi lill-gvern, lill-industrija, lill-membri u lill-utenti” u aktar: “l-Assoċjazzjoni timxi mal-Kostituzzjoni, mal-liġijiet, mar-regolamenti u mal-politiki nazzjonali, timplimenta l-valuri ewlenin tas-soċjaliżmu, tippromwovi l-ispirtu ta’ patrijottiżmu, timxi mal-moralità soċjali, u ssaħħaħ b’mod konxju l-kostruzzjoni tal-integrità u l-awtodixxiplina.”

(78)

L-Artikolu 3 tal-AoA tas-CCMA jissottolinja r-rwol tal-gvern/tal-partit fl-organizzazzjoni: “L-assoċjazzjoni taderixxi mat-tmexxija ġenerali tal-Partit Komunista taċ-Ċina. F’konformità mad-dispożizzjonijiet tal-Kostituzzjoni tal-Partit Komunista taċ-Ċina, huwa jistabbilixxi organizzazzjoni tal-Partit Komunista taċ-Ċina, iwettaq attivitajiet tal-Partit, u jipprovdi l-kundizzjonijiet meħtieġa għall-attivitajiet tal-organizzazzjoni tal-Partit. L-entità li tieħu ħsieb ir-reġistrazzjoni u l-ġestjoni tal-Assoċjazzjoni hija l-Ministeru tal-Affarijiet Ċivili tar-Repubblika tal-Poplu taċ-Ċina, u l-entità li tieħu ħsieb il-bini tal-Partit hija l-Kumitat tal-Partit tas-Superviżjoni tal-Assi tal-Istat u l-Kummissjoni tal-Amministrazzjoni tal-Kunsill tal-Istat (SASAC). L-Assoċjazzjoni taċċetta l-gwida, is-superviżjoni u l-ġestjoni tan-negozju mill-entità li tieħu ħsieb ir-reġistrazzjoni u l-ġestjoni, l-entitajiet li jieħdu ħsieb il-bini tal-Partit, u mid-dipartimenti amministrattivi rilevanti li jieħdu ħsieb il-ġestjoni tal-industrija” (25).

(79)

Il-preżenza tal-partijiet tidher ukoll fil-livell tal-Assoċjazzjoni tal-Ħadid u l-Azzar taċ-Ċina (“CISA”). Skont l-Artikolu 3 tal-Istatut ta’ Assoċjazzjoni tagħha, is-CISA “taderixxi mat-tmexxija ġenerali tal-Partit Komunista taċ-Ċina” u “taċċetta l-gwida, is-superviżjoni u l-ġestjoni tan-negozju mill-entitajiet responsabbli għar-reġistrazzjoni u l-ġestjoni, mill-entitajiet responsabbli għall-bini tal-partit, kif ukoll mid-dipartimenti amministrattivi rilevanti responsabbli għall-ġestjoni tal-industrija”.

(80)

Kemm l-intrapriżi pubbliċi kif ukoll dawk privati fis-settur tal-azzar huma soġġetti għal superviżjoni u gwida tal-politika. L-aktar dokumenti ta’ politika Ċiniżi reċenti dwar is-settur tal-azzar jikkonfermaw l-importanza kontinwa li l-GTĊ jattribwixxi lis-settur, inkluża l-intenzjoni li jintervjeni fis-settur sabiex jifformah f’konformità mal-politiki tal-gvern.

(81)

Dan huwa eżemplifikat mill-Opinjoni Gwida tal-2022 tal-Ministeru għall-Industrija u t-Teknoloġija tal-Informazzjoni dwar it-Trawwim ta’ Żvilupp ta’ Kwalità Għolja tal-Industrija tal-Ħadid u l-Azzar (26), li titlob konsolidazzjoni ulterjuri tal-pedament industrijali u titjib sinifikanti fil-livell ta’ modernizzazzjoni tal-katina industrijali, mill-14-il FYP dwar l-Iżvilupp tal-Industrija tal-Materja Prima (27) li skontu, is-settur se “jaderixxi mal-kombinazzjoni tat-tmexxija tas-suq u l-promozzjoni tal-gvern” u se “jikkultiva grupp ta’ kumpaniji ewlenin bi tmexxija ekoloġika u b’kompetittività ewlenija”, jew mill-14-il FYP dwar l-Iżvilupp tal-Industrija tar-Ruttam tal-Metall li l-objettivi ewlenin tiegħu huma li “jiżdied kontinwament il-proporzjon tal-applikazzjoni tar-ruttam tal-metall, u sa tmiem l-14-il FYP, il-proporzjon komprensiv tar-ruttam tal-produzzjoni nazzjonali tal-azzar se jilħaq it-30 %”.

(82)

Fir-rigward b’mod aktar speċifiku tal-prodott taħt rieżami, il-provinċji ta’ Shandong u Jiangsu ħarġu l-14-il FYP rispettiv tagħhom dwar l-iżvilupp tal-bini tal-bastimenti u tat-tagħmir tal-inġinerija tal-baħar, li jippromwovu b’mod espliċitu s-settur tal-bini tal-bastimenti u l-produzzjoni relatata tal-azzar, bħall-HPT.

(83)

Eżempji simili tal-intenzjoni tal-awtoritajiet Ċiniżi li jissorveljaw u jiggwidaw l-iżviluppi tas-settur tal-azzar jistgħu jidhru wkoll fi provinċji oħrajn, bħal f’Hebei li qed jippjana li “jimplimenta b’mod kostanti l-iżvilupp tal-grupp ta’ organizzazzjonijiet, jaċċellera r-riforma tas-sjieda mħallta ta’ intrapriżi tal-Istat, jiffoka fuq il-promozzjoni tal-fużjoni u r-riorganizzazzjoni interreġjonali talintrapriżi privati tal-ħadid u tal-azzar, u jistinka biex jistabbilixxi minn wieħed (1) sa żewġ (2) gruppi kbar ta’ klassi dinjija, minn tlieta (3) sa ħames (5) gruppi kbar b’influwenza domestika bħala appoġġ” u li “jespandi aktar il-kanali tar-riċiklaġġ u taċ-ċirkolazzjoni tar-ruttam tal-metall, u jsaħħaħ l-iskrinjar u l-klassifikazzjoni tar-ruttam tal-metall”.

(84)

L-influwenza tal-Istat tista’ tinstab ukoll fuq livell muniċipali, bħal fil-Pjan ta’ Azzjoni għall-2022 1 + 3 tal-Ħadid u l-Azzar tal-Muniċipalità Hebei Tangshan, li fih entitajiet muniċipali differenti għandhom il-kompitu li “jrawmu alleanzi u riorganizzazzjoni ta’ impriżi bi prodotti simili fir-reġjun”, bħaż-żewġ gruppi l-kbar tal-azzar Shougang (Jingtang, Qiangang) u Tangsteel New District, “jfittxu u jiggwidaw lill istituzzjonijiet finanzjarji biex jipprovdu lil impriżi tal-ħadid u l-azzar b’self b’interessi baxxi biex jippermettilhom jaqilbu għal industriji ġodda, u fl-istess ħin jipprovdu sussidji fil-forma ta’ skont firrata ta’ interess” kif ukoll “jappoġġaw l-ottimizzazzjoni tal-istruttura tal-prodotti” billi jagħtu lil “intrapriżi li jimmanifatturaw ta’ kwalità għolja u prodotti ta’ kwalità għolja godda, u fuq livell nazzjonali RMB 1 miljun u RMB 500 000 rispettivament, u lil intrapriżi li jimmanifatturaw ta’ kwalità għolja u prodotti ta’ kwalita għolja godda, u fuq livell provinċjali RBM 300 000 u RMB 100 000 rispettivament”.

(85)

Bl-istess mod, il-Pjan ta’ Implimentazzjoni ta’ Henan għat-Trasformazzjoni u l-Aġġornament tal-Industrija tal-Azzar matul l-14-il FYP jipprevedi l-“kostruzzjoni ta’ bażijiet speċifiċi għall-produzzjoni tal-azzar” jiġifieri “l-bini ta’ sitt (6) bażijiet karatteristiċi għall-produzzjoni tal-azzar f’Anyang, Jiyuan, Pingdingshan, Xinyang, Shangqiu, Zhouou, eċċ., u t-titjib tad-daqs, l-intensifikazzjoni, u l-ispeċjalizzazzjoni tal-industrija. Fosthom, sal-2025, il-kapaċità tal-produzzjoni tal-ħadid mhux maħdum f’Anyang se tkun ikkontrollata f’livell ta’ inqas minn 14-il miljun tunnellata, u l-kapaċità tal-produzzjoni tal-azzar mhux maħdum se tkun ikkontrollata f’livell ta’ inqas minn 15-il miljun tunnellata”.

(86)

L-investigazzjoni kkonfermat ukoll li l-GTĊ qed jinterferixxi fil-prezzijiet u l-kostijiet permezz tal-preżenza tal-Istat f’ditti fis-sens tal-Artikolu 2(6a)(b), it-tieni inċiż tar-Regolament bażiku, li jistabbilixxi l-eżistenza ta’ konnessjonijiet personali bejn il-produtturi tal-HPT u s-CCP. Matul l-investigazzjoni kien impossibbli li tinstab informazzjoni dwar produtturi individwali, peress li dawn huma fil-biċċa l-kbira intrapriżi żgħar ħafna. Madankollu, l-investigazzjoni żvelat li rwol importanti tas-CCP fl-assoċjazzjoni li tirrappreżenta l-produtturi tal-HPT, jiġifieri s-CCMA, li għandha kumitat attiv tal-Partit (28). Il-President tas-CITA huwa wkoll membru tas-CCP (29).

(87)

Barra minn hekk, fis-settur tal-prodott li qiegħed jiġi investigat hemm stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż, tar-Regolament bażiku. L-investigazzjoni identifikat dokumenti ta’ politika li juru li l-industrija tibbenefika minn gwida u intervent tal-gvern fil-prodott li qiegħed jiġi investigat bħala parti mis-settur tal-azzar.

(88)

L-industrija tal-azzar tibqa’ titqies bħala industrija essenzjali mill-GTĊ. Dan huwa kkonfermat fil-bosta pjanijiet, direttivi u dokumenti oħrajn iffokati fuq l-azzar, li jinħarġu fil-livell nazzjonali, reġjonali u muniċipali. Skont l-14-il FYC, il-GTĊ immarka lill-industrija tal-azzar għat-trasformazzjoni u għall-aġġornament, kif ukoll għall-ottimizzazzjoni u għall-aġġustament strutturali. B’mod simili, l-14-il FYP dwar l-Iżvilupp tal-Industrija tal-Materja Prima, applikabbli wkoll għall-industrija tal-azzar, jelenka s-settur bħala l-“pedament tal-ekonomija reali” u “qasam ewlieni li jsawwar il-vantaġġ kompetittiv internazzjonali taċ-Ċina” u jistabbilixxi għadd ta’ objettivi u metodi ta’ ħidma li jixprunaw l-iżvilupp tas-settur tal-azzar fil-perjodu ta’ żmien mill-2021 sal-2025, bħal aġġornament teknoloġiku, it-titjib tal-istruttura tas-settur (mhux l-anqas permezz ta’ konċentrazzjonijiet korporattivi ulterjuri) jew it-trasformazzjoni diġitali.

(89)

Il-materja prima importanti użata għall-produzzjoni tal-prodott taħt investigazzjoni hija l-mineral tal-ħadid. Il-mineral tal-ħadid jissemma wkoll fl-14-il FYP dwar l-Iżvilupp tal-Industrija tal-Materja Prima, li fih l-Istat qed jippjana li “jiżviluppa b’mod razzjonali r-riżorsi minerali domestiċi. Isaħħaħ l-esplorazzjoni tal-mineral tal-ħadid, jimplimenta politiki tat-taxxa preferenzjali, jinkoraġġixxi l-adozzjoni ta’ teknoloġija u tagħmir avvanzati biex titnaqqas il-ġenerazzjoni ta’ skart solidu mill-minjieri”.

(90)

Fil-provinċji, bħal Hebei, l-awtoritajiet jipprevedu dan li ġej għas-settur: “sussidju bi skont fuq l-investiment għal proġett ġdid, jiġu esplorati u tingħata gwida lill-istituzzjonijiet finanzjarji biex jipprovdu self b’imgħax baxx lill-intrapriżi tal-ħadid u tal-azzar biex jaqilbu għal industriji ġodda, u fl-istess ħin, il-gvern se jipprovdi sussidji ta’ skont”. Fil-qosor, il-GTĊ għandu miżuri stabbiliti biex iħeġġeġ lill-operaturi jikkonformaw mal-objettivi tal-politika pubblika li jingħata appoġġ lill-industriji mħeġġa, inkluża l-produzzjoni ta’ materja prima prinċipali użata fil-manifattura tas-HPT. Dawn il-miżuri jimpedixxu l-forzi tas-suq milli joperaw b’mod ħieles.

(91)

L-investigazzjoni attwali ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà skont l-Artikolu 2(6a)(b), ir-raba’ inċiż tar-Regolament bażiku fis-settur tal-prodott taħt investigazzjoni ma jaffettwawx lill-manifatturi tal-prodott taħt investigazzjoni.

(92)

Is-settur tal-HPT huwa affettwat ukoll mid-distorsjonijiet tal-kostijiet tal-pagi fis-sens tal-Artikolu 2(6a)(b), il-ħames inċiż tar-Regolament bażiku. Dawk id-distorsjonijiet jaffettwaw lis-settur kemm direttament (waqt il-produzzjoni tal-HPT jew tal-inputs prinċipali), kif ukoll indirettament (meta jkun hemm aċċess għall-inputs minn kumpaniji soġġetti għall-istess sistema tal-manodopera fir-RPĊ).

(93)

Barra minn hekk, ma ġiet sottomessa l-ebda evidenza fl-investigazzjoni attwali li turi li s-settur tal-prodott taħt investigazzjoni ma huwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż tar-Regolament bażiku. Għalhekk, l-intervent sostanzjali tal-gvern fis-sistema finanzjarja jwassal sabiex il-kundizzjonijiet tas-suq jiġu affettwati b’mod serju fil-livelli kollha.

(94)

Fl-aħħar nett, huma meħtieġa diversi inputs għall-produzzjoni tal-HPT. Meta l-produtturi tat-HPT jixtru/jikkuntrattaw dawn l-inputs, il-prezzijiet li jħallsu (u li jiġu rreġistrati bħala l-kostijiet tagħhom) jiġu esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li tkun soġġetta għad-distorsjonijiet. Huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(95)

Għalhekk, mhux biss il-prezzijiet tal-bejgħ domestiku tat-HPT ma humiex xierqa għall-użu fis-sens tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali min-naħa tal-gvern, kif deskritt fil-Partijiet I u II tar-Rapport. Fil-fatt, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li, ġie prodott fir-RPĊ bil-kombinazzjoni ta’ firxa ta’ fatturi ta’ produzzjoni, jiġi espost għal distorsjonijiet sinifikanti. L-istess japplika għall-input tal-input u l-bqija.

(96)

L-ebda evidenza jew argument għall-kuntrarju ma tressqu mill-GTĊ f’din l-investigazzjoni. Fil-qosor, l-evidenza disponibbli wriet li l-prezzijiet jew il-kostijiet tal-prodott taħt rieżami, inklużi l-kostijiet tal-materja prima, tal-enerġija u tal-manodopera, ma humiex ir-riżultat ta’ forzi tas-suq ħielsa minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku kif muri mill-impatt reali jew potenzjali ta’ wieħed jew aktar mill-elementi rilevanti elenkati fih.

(97)

Abbażi ta’ dan, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ. Konsegwentement, il-Kummissjoni proċediet biex tikkalkola l-valur normali esklużivament abbażi tal-kostijiet tal-produzzjoni u l-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u l-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif diskuss fit-taqsima li ġejja.

(98)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(99)

Kif spjegat fil-premessa (54), fit-3 ta’ April 2023, il-Kummissjoni ħarġet Nota dwar is-sorsi għad-determinazzjoni tal-valur normali. Din in-nota ddeskriviet il-fatti disponibbli u l-evidenza bażi tal-kriterji relevanti, kif ukoll informat lill-partijiet interessati bl-intenzjoni tal-Kummissjoni li tqis lill-Brażil bħala pajjiż rappreżentattiv xieraq f’dan il-każ, jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi konfermata.

(100)

Fin-Nota dwar is-sorsi, il-Kummissjoni spjegat li, minħabba n-nuqqas ta’ kooperazzjoni sinifikanti, hija jkollha tibbaża fuq il-fatti disponibbli skont l-Artikolu 18 tar-Regolament bażiku. L-għażla tal-pajjiż rappreżentattiv kienet ibbażata fuq l-informazzjoni li tinsab fit-talba għal rieżami ta’ skadenza, flimkien ma’ sorsi oħrajn ta’ informazzjoni meqjusa xierqa skont il-kriterji rilevanti stabbiliti fl-Artikolu 2(6a) tar-Regolament bażiku, f’konformità mal-Artikolu 18(5) tar-Regolament bażiku, inkluża l-istatistika dwar l-importazzjoni, l-istatistika nazzjonali tal-pajjiż rappreżentattiv, is-sorsi tal-għarfien tas-swieq, it-tariffi mitluba mill-fornituri tal-utilitajiet fil-pajjiż rappreżentattiv, u l-informazzjoni finanzjarja tal-produtturi fil-pajjiż rappreżentattiv.

(101)

F’konformità mal-kriterji elenkati fl-Artikolu 2(6a) tar-Regolament bażiku, fin-Nota dwar is-sorsi, il-Kummissjoni identifikat lill-Brażil bħala pajjiż b’livell simili ta’ żvilupp ekonomiku bħaċ-Ċina. Il-Brażil huwa kklassifikat mill-Bank Dinji bħala pajjiż b’“introjtu medju superjuri” fuq bażi tal-introjtu nazzjonali gross. Barra minn hekk, il-Brażil ġie identifikat bħala pajjiż fejn il-prodott taħt rieżami qiegħed jiġi prodott f’volumi sinifikanti f’suq kompetittiv kemm reġjonali kif ukoll globalment, u permezz ta’ proċess tal-produzzjoni simili. Il-Brażil ġie identifikat ukoll bħala pajjiż fejn id-data rilevanti hija disponibbli faċilment.

(102)

Il-partijiet interessati ma ssottomettew l-ebda kumment dwar in-Nota dwar is-sorsi.

(103)

Finalment, minħabba n-nuqqas ta’ kooperazzjoni u wara li ġie stabbilit li l-Brażil kien pajjiż rappreżentattiv xieraq, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-Artikolu 2(6a)(a), l-ewwel inċiż, l-aħħar sentenza tar-Regolament bażiku.

(104)

Għaldaqstant, fin-nuqqas ta’ kooperazzjoni, kif propost fit-talba għal rieżami ta’ skadenza u minħabba li l-Brażil issodisfa l-kriterji stabbiliti fl-Artikolu 2(6a)(a) l-ewwel inċiż tar-Regolament bażiku, il-Kummissjoni għażlet lill-Brażil bħala l-pajjiż rappreżentattiv xieraq.

(105)

Fin-Nota dwar is-sorsi, il-Kummissjoni elenkat il-fatturi ta’ produzzjoni bħall-materjali, l-enerġija u l-manodopera użati fil-produzzjoni tal-prodott taħt rieżami mill-produtturi esportaturi.

(106)

Il-Kummissjoni ddikjarat ukoll li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, tuża l-Atlas tal-Kummerċ Globali biex tistabbilixxi l-kost mhux imxekkel tal-biċċa l-kbira tal-fatturi ta’ produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża l-ILO, id-data tal-Ministeru tal-Minjieri u l-Enerġija tal-Brażil, u l-Istitut Brażiljan tal-Ġeografija u l-Istatistika biex tistabbilixxi l-kostijiet mingħajr distorsjoni tal-manodopera u tal-enerġija.

(107)

Finalment, il-Kummissjoni ddikjarat li sabiex tistabbilixxi l-kostijiet SG&A u l-profitt, tuża Orbis Bureau van Dijk u d-data finanzjarja minn produttur Brażiljan tal-prodott ikkonċernat, kif stabbilit fil-premessa (54) hawn fuq.

(108)

Permezz tan-Nota dwar il-fatturi ta’ produzzjoni, il-Kummissjoni fittxet li tistabbilixxi lista ta’ fatturi ta’ produzzjoni u ta’ sorsi maħsuba sabiex jintużaw għall-istabbiliment ta’ lista sħiħa tal-inputs bħal materjali, enerġija u l-manodopera użati fil-manifattura tal-prodott taħt rieżami mill-produtturi fiċ-Ċina. Il-Kummissjoni ma rċeviet l-ebda kumment dwar il-lista ta’ fatturi ta’ produzzjoni.

(109)

Fin-nuqqas ta’ kooperazzjoni mill-produtturi esportaturi Ċiniżi, il-Kummissjoni kellha tibbaża fuq l-informazzjoni pprovduta mill-applikanti biex tistabbilixxi l-fatturi ta’ produzzjoni użati fil-produzzjoni tal-HPTs.

(110)

Meta titqies l-informazzjoni kollha li hemm fit-talba u l-informazzjoni sussegwenti sottomessa mill-applikant, ġew identifikati l-fatturi ta’ produzzjoni li ġejjin u s-sorsi tagħhom biex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni ta’ pallet trucks tal-idejn

(111)

Sabiex jiġi stabbilit il-prezz mingħajr distorsjoni tal-materja prima kif ikkonsenjata sal-fabbrika ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat ta’ importazzjoni fil-pajjiż rappreżentattiv kif irrapportat fil-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet tal-unità tal-importazzjonijiet mill-pajjiżi terzi kollha, minbarra ċ-Ċina u l-pajjiżi li ma humiex membri tad-WTO, elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (33).

(112)

Il-Kummissjoni ddeċidiet li teskludi l-importazzjonijiet miċ-Ċina lejn il-pajjiż rappreżentattiv peress li fit-taqsima 4.2.2 ikkonkludiet li ma huwiex xieraq li jintużaw il-prezzijiet u l-kostijiet domestiċi fiċ-Ċina minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsuba għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Wara li ġew esklużi l-importazzjonijiet miċ-Ċina lejn il-pajjiż rappreżentattiv, il-volum tal-importazzjonijiet minn pajjiżi terzi oħrajn baqa’ rappreżentattiv.

(113)

Normalment, mal-prezzijiet referenzjarji jenħtieġ li jiżdiedu wkoll il-kostijiet tat-trasport domestiku. Madankollu, l-objettiv ta’ rieżami ta’ skadenza huwa li jiġi ddeterminat jekk id-dumping kompliex matul il-perjodu ta’ investigazzjoni tar-rieżami jew jistax jerġa’ jseħħ, aktar milli jinstab id-daqs eżatt tiegħu. Għalhekk, il-Kummissjoni ddeċidiet li l-aġġustamenti għat-trasport domestiku ma kinux meħtieġa peress li jirriżultaw biss fiż-żieda tal-valur normali u għalhekk tal-marġni tad-dumping.

(114)

Biex tistabbilixxi l-parametru referenzjarju għall-manodopera, il-Kummissjoni użat statistika dwar il-kostijiet mill-Istitut Brażiljan tal-Ġeografija u l-Istatistika (“Instituto Brasileiro de Geografia e Estatística) (34) biex tiddetermina l-pagi fil-Brażil. Is-sit web tal-Istitut jipprovdi informazzjoni dettaljata dwar il-kostijiet lavorattivi annwali totali f’setturi ekonomiċi differenti u l-Kummissjoni użat il-pagi statutorji, fil-ġimgħa, is-sigħat tax-xogħol, u fix-xahar tal-impjegati fis-settur tal-manifattura u s-sigħat fil-ġimgħa medji maħduma fil-Brażil għall-2021. Fuq din il-bażi, ġiet ikkalkulata rata fis-siegħa ta’ 61,32 CNY/siegħa.

(115)

Il-prezz tal-elettriku għall-kumpaniji (l-utenti industrijali) fil-Brażil huwa ppubblikat mill-Ministeru tal-Minjieri u l-Enerġija (35). Il-Kummissjoni użat id-data dwar il-prezzijiet tal-elettriku industrijali minn Ottubru 2021 sa Settembru 2022 u stabbiliet prezz fil-livell ta’ 0,944 CNY/kWh (li jkopri l-perjodu ta’ investigazzjoni tar-rieżami).

(116)

Il-prezz tal-gass naturali għall-kumpaniji (l-utenti industrijali) fil-Brażil huwa pubblikat mill-fornitur tad-data tas-suq globalpetrolprices.com (36). Il-Kummissjoni użat l-ipprezzar korrispondenti għall-utenti industrijali li jkopri l-perjodu ta’ investigazzjoni tar-rieżami.

(117)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont mingħajr distorsjoni u raġonevoli għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(118)

Sabiex tistabbilixxi l-SG&A u l-profitt, il-Kummissjoni użat id-data finanzjarja tal-produttur Brażiljan Paletrans Equipamentos Ltda kif irrapportat fil-bażi tad-data tal-Orbis għas-sena 2021. Il-Kummissjoni l-ewwel iddeterminat il-perċentwal tal-kostijiet SG&A u ta’ kostijiet oħrajn tal-kumpanija, li kienu jammontaw għal 11,37 % tal-kost tal-oġġetti mibjugħa u mbagħad ikkalkulat il-profitti miksuba minn Paletrans Equipamentos Ltda, li kienu jammontaw għal 14,38 % tal-kost tal-oġġetti mibjugħa.

(119)

Abbażi ta’ dak ta’ hawn fuq, il-Kummissjoni ħadmet il-valur normali fuq bażi ex-works f’konformità mal-Artikolu 2(6a)(a) tar-Regolament bażiku.

(120)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Fin-nuqqas ta’ kooperazzjoni mill-produtturi esportaturi, il-Kummissjoni bbażat fuq l-informazzjoni pprovduta mill-applikanti fit-talba għal rieżami dwar l-użu ta’ kull fattur (il-materjali u l-manodopera) għall-produzzjoni tal-prodott taħt rieżami. Dawn il-volumi tal-konsum ġew immultiplikati bil-kostijiet mingħajr distorsjoni għal kull unità stabbiliti fil-Brażil, kif deskritt fit-Taqsima 4.2.5. Bl-istess mod, skont l-istess metodoloġija, il-Kummissjoni stabbiliet il-valur mhux imxekkel tal-iskart u tar-ruttam u naqqsitu mill-kostijiet tal-manifattura mingħajr distorsjoni stabbiliti hawn fuq.

(121)

Ladarba ġie stabbilit il-kost tal-materja prima, il-Kummissjoni żiedet il-kostijiet lavorattivi, kif innotat fil-premessa (114), u l-kost għall-elettriku u għall-gass naturali, kif innotat fil-premessi (115) u (116). Il-kost lavorattiv kien jinkludi wkoll porzjon tal-kost tax-xogħol indirett, li skont l-applikant kien jirrappreżenta l-ispejjeż ġenerali tal-manifattura.

(122)

Il-Kummissjoni mbagħad żiedet l-SG&A u l-profitt fil-Brażil, li ġie espress bħala perċentwal tal-kost tal-oġġetti mibjugħa u applikat għall-kostijiet tal-produzzjoni mingħajr distorsjoni, u ammonta għal 11,37 % u 14,38 % rispettivament, kif spjegat fil-premessa (118).

(123)

Abbażi ta’ dan, il-Kummissjoni ħadmet il-valur normali fuq bażi ex-works f’konformità mal-Artikolu 2(6a)(a) tar-Regolament bażiku.

(124)

Fin-nuqqas ta’ kooperazzjoni mill-produtturi esportaturi miċ-Ċina, il-prezz tal-esportazzjoni għall-importazzjonijiet li saru lejn l-Unjoni matul il-perjodu ta’ investigazzjoni tar-rieżami ġie ddeterminat skont l-Artikolu 18 tar-Regolament bażiku, abbażi tal-istatistika tal-Eurostat. Il-prezz CIF għal kull HPT tnaqqas mill-merkanzija bil-baħar (EUR 31,79 għal kull HPT) u l-ispejjeż tat-trasport intern (EUR 5,86 għal kull HPT). Dawn il-kostijiet kienu bbażati fuq data pprovduta mill-applikanti fit-talba għal rieżami (37).

(125)

Il-Kummissjoni qabblet il-valur normali maħdum stabbilit f’konformità mal-Artikolu 2(6a)(a) tar-Regolament bażiku u l-prezz tal-esportazzjoni kif stabbilit hawn fuq.

(126)

Abbażi ta’ dan, il-marġni tad-dumping, espress bћala perċentwali tal-prezz CIF fil-fruntiera tal-Unjoni, bid-dazju mhux imħallas, kien 82,5 %. Għalhekk ġie konkluż li d-dumping tkompla matul il-perjodu ta’ investigazzjoni tar-rieżami.

(127)

B’segwitu għas-sejbiet tal-eżistenza ta’ dumping matul il-perjodu ta’ investigazzjoni tar-rieżami, f’konformità mal-Artikolu 11(2) tar-Regolament bażiku, il-Kummissjoni investigat il-probabbiltà ta’ kontinwazzjoni tad-dumping, jekk il-miżuri jiġu revokati. Ġew analizzati l-elementi addizzjonali li ġejjin: il-kapaċità tal-produzzjoni u l-kapaċità ta’ riżerva fiċ-Ċina, ir-relazzjoni bejn il-prezzijiet tal-esportazzjoni lejn il-pajjiżi terzi u lejn l-Unjoni, l-attraenza tas-suq tal-Unjoni u l-prattiki ta’ ċirkomvenzjoni.

(128)

Kif imsemmi fil-premessa (25), la l-produtturi esportaturi Ċiniżi u lanqas il-GTĊ ma kooperaw f’din l-investigazzjoni. Għalhekk, il-Kummissjoni infurmat lill-awtoritajiet Ċiniżi li, f’konformità mal-Artikolu 18 tar-Regolament bażiku, il-fatti disponibbli jistgħu jintużaw biex jiġi ddeterminat jekk kienx qiegħed iseħħ dumping u biex tiġi ddeterminata l-probabbiltà li jitkompla d-dumping. B’mod partikolari:

(129)

Il-Kummissjoni ma rċeviet l-ebda kumment jew talba għal intervent tal-Uffiċjal tas-Seduta mingħand l-awtoritajiet Ċiniżi f’dan ir-rigward.

(130)

Fir-rigward tal-produzzjoni u l-kapaċità tal-produzzjoni fiċ-Ċina, fin-nuqqas ta’ sorsi oħra ta’ informazzjoni, l-analiżi saret fuq il-bażi tad-data sottomessa matul l-investigazzjoni mill-applikanti.

(131)

L-investigazzjoni wriet li hemm kapaċità żejda ġenerali tal-HPTs fiċ-Ċina għall-perjodu tal-investigazzjoni ta’ rieżami.

(132)

Skont l-analiżi tas-suq tal-applikanti, il-kapaċità tal-produzzjoni ddikjarata mill-assoċjazzjoni Ċiniża tal-HPTs fl-2021 kienet tammonta għal 3 miljun biċċa, bi produzzjoni reali ta’ 1,7 miljun biċċa.

(133)

B’riżultat ta’ dan, il-kapaċità ta’ riżerva Ċiniża kienet stmata li hija madwar 1,3 miljun biċċa jew aktar minn 40 % (38). Madankollu, din hija stima konservattiva peress li skont l-applikanti bosta produtturi iżgħar tal-HPT fiċ-Ċina ma humiex parti mill-assoċjazzjoni u għalhekk in-numru totali tal-produzzjoni tal-HPT fiċ-Ċina huwa tal-inqas 10–15 % ogħla miċ-ċifri rrapportati tal-assoċjazzjoni.

(134)

Abbażi ta’ dan ta’ hawn fuq, il-Kummissjoni kkonkludiet li l-produtturi esportaturi Ċiniżi għandhom kapaċità ta’ riżerva sinifikanti, li tammonta tal-inqas għal 40 % tal-kapaċità tal-produzzjoni, li tista’ tintuża għall-esportazzjonijiet fl-Unjoni jekk jiskadu l-miżuri.

(135)

Rigward l-imġiba tal-esportazzjoni taċ-Ċina lejn pajjiżi terzi oħrajn, ma hemm l-ebda statistika disponibbli dwar il-prezzijiet tal-esportazzjoni tal-prodott taħt rieżami. Il-kodiċijiet rilevanti tal-prodotti Ċiniżi jinkludu wkoll prodotti oħrajn jiġifieri “Trakkijiet mgħammra b’tagħmir għall-irfigħ jew għat-tqandil, mhux motorizzati”, li għandhom prezz unitarju ogħla mill-pallet trucks tal-idejn, li jżid il-prezz tal-esportazzjoni medju. Barra minn hekk, it-talba għal rieżami ma tipprovdix data.

(136)

Il-bażi tad-data tal-GTA tista’ tintuża bħala indikatur biex tipprovdi indikazzjoni approssimattiva tax-xejriet tal-volumi tal-esportazzjoni. Sabiex jiġi stabbilit l-iżvilupp possibbli tal-importazzjonijiet f’każ li jitħassru l-miżuri, il-Kummissjoni analizzat il-prezzijiet tal-esportazzjonijiet Ċiniżi lejn is-suq tal-Unjoni. Il-Kummissjoni mbagħad qabblithom mad-data dwar l-esportazzjoni dinjija miċ-Ċina matul il-perjodu ta’ investigazzjoni tar-rieżami.

(137)

Id-data tal-GTA wriet li s-suq tal-Unjoni huwa t-tieni l-akbar destinazzjoni għall-kwantitajiet ta’ importazzjoni tal-HPTs miċ-Ċina. Barra minn hekk, id-data tal-Eurostat uriet li l-prezz medju tal-bejgħ lill-Unjoni kien ta’ EUR 212 għal kull biċċa, filwaqt li d-data tal-GTA wriet li dan kien jammonta biss għal EUR 168 lill-Istati Uniti, li huwa l-aktar suq tal-esportazzjoni importanti u għal EUR 179 fuq l-aktar sitt (6) swieq tal-esportazzjoni importanti l-oħrajn (ir-Russja, l-Indja, it-Turkija, il-Korea t’Isfel, il-Messiku u l-Awstralja).

(138)

Għall-istess raġunijiet kif deskritti hawn fuq fil-premessa (135), huwa għalhekk konkluż li l-prezz tal-esportazzjoni lejn pajjiżi terzi oħrajn huwa saħansitra aktar baxx.

(139)

Id-data tindika b’mod ċar li l-prezzijiet tal-esportazzjoni Ċiniżi għall-HPTs lejn is-suq tal-Unjoni kienu ogħla minn sħab oħrajn, inklużi l-Istati Uniti. Dan jissuġġerixxi li jekk jiskadu l-miżuri, il-produtturi Ċiniżi x’aktarx ibiddlu l-esportazzjonijiet tagħhom lejn is-suq tal-Unjoni.

(140)

L-applikanti ssuġġerew li l-produtturi esportaturi Ċiniżi diġà qegħdin jassorbu parzjalment id-dazji anti-dumping biex iżommu s-sehem mis-suq tagħhom fl-Unjoni. Dan huwa dedott mit-tqabbil tal-prezzijiet tal-esportazzjoni Ċiniżi (39) lejn l-Unjoni mal-prezzijiet ta’ importazzjonijiet oħrajn fl-Unjoni u mal-prezzijiet tal-esportazzjoni Ċiniżi lejn swieq oħrajn. Minkejja l-limitazzjonijiet enfasizzati fil-premessa (135), dan jimplika li mingħajr miżuri, il-pallet trucks tal-idejn Ċiniżi se jegħrqu fis-suq tal-Unjoni bi prezzijiet baxxi.

(141)

Bl-istess mod, kif uriet it-talba, instab li matul l-ewwel għaxar snin tat-tul tal-miżuri, l-esportaturi Ċiniżi implimentaw diversi modi biex jevitaw id-dazji anti-dumping stabbiliti. L-ewwel nett, huma bdew jevitaw id-dazji permezz ta’ operazzjonijiet ta’ trażbord u assemblaġġ fit-Tajlandja (il-premessa (3)). Imbagħad, l-esportaturi Ċiniżi bdew jevitaw il-miżuri billi żiedu apparat tal-użin fuq it-trakkijiet tagħhom u billi jużaw klassifikazzjoni doganali falza (il-premessa (7)). Il-prattiki ta’ ċirkomvenzjoni juru l-interess tal-produtturi esportaturi Ċiniżi fl-aċċess għas-suq tal-Unjoni mingħajr restrizzjonijiet u, b’hekk, l-attraenza tas-suq tal-Unjoni għall-esportazzjonijiet Ċiniżi.

(142)

Fid-dawl tas-sejbiet tagħha dwar il-kontinwazzjoni tad-dumping matul l-RIP u dwar l-iżvilupp probabbli tal-esportazzjonijiet jekk il-miżuri jiskadu, il-Kummissjoni kkonkludiet li hemm probabbiltà kbira li l-iskadenza tal-miżuri anti-dumping fuq l-importazzjonijiet tal-prodott taħt rieżami miċ-Ċina tirriżulta fil-kontinwazzjoni tad-dumping.

(143)

Il-prodott simili kien manifatturat minn seba’ produtturi magħrufa fl-Unjoni matul il-perjodu taħt kunsiderazzjoni, li sitta minnhom appoġġaw it-talba u kkooperaw fl-investigazzjoni billi pprovdew data makroekonomika. Dawn jikkostitwixxu l-industrija tal-Unjoni fis-sens tal-Artikolu 4(1) tar-Regolament bażiku.

(144)

Il-produzzjoni totali tal-Unjoni matul il-perjodu ta’ investigazzjoni tar-rieżami kienet stabbilita għal madwar 230 000 tunnellata. Il-Kummissjoni stabbiliet iċ-ċifra abbażi tat-tweġibiet għall-kwestjonarju mill-industrija tal-Unjoni. Intgħażlu żewġ produtturi tal-Unjoni fil-kampjun li kienu jirrappreżentaw aktar minn 75 % tal-produzzjoni totali fl-Unjoni tal-prodott simili.

(145)

Il-Kummissjoni stabbiliet il-konsum tal-Unjoni abbażi tal-kwantitajiet tal-bejgħ tal-produtturi tal-Unjoni u d-data dwar l-importazzjoni ta’ pallet trucks tal-idejn f’biċċiet mill-Eurostat.

(146)

Il-konsum tal-Unjoni żviluppa kif ġej:

Tabella 2

Konsum tal-Unjoni tal-HPT (biċċiet)

(147)

Il-konsum fl-Unjoni żdied mill-2019 għal tmiem l-RIP b’24 % bi tnaqqis fl-2020 matul il-pandemija tal-COVID-19. Il-konsum tal-Unjoni naqas fl-2020 iżda reġa’ lura għal-livelli ta’ qabel il-pandemija fl-2021 u żdied sa tmiem il-perjodu ta’ investigazzjoni tar-rieżami.

(148)

Il-pallet trucks tal-idejn huma assi u jinxtraw biss għas-sostituzzjoni tal-assi eżistenti jew għall-espansjoni tal-attività. Is-sena 2020 rat pawża fuq kwalunkwe espansjoni tas-setturi li jirrikjedu pallet trucks tal-idejn minħabba l-pandemija, li jispjega t-tnaqqis temporanju fil-konsum matul dak il-perjodu.

(149)

Il-Kummissjoni stabbiliet il-kwantità tal-importazzjonijiet u tal-ishma mis-suq abbażi tad-data dwar l-importazzjoni f’euro u f’biċċiet.

(150)

L-importazzjonijiet fl-Unjoni miċ-Ċina żviluppaw kif ġej:

Tabella 3

Kwantità tal-importazzjoni (biċċiet) u sehem mis-suq

(151)

L-importazzjonijiet miċ-Ċina komplew matul il-perjodu taħt kunsiderazzjoni fi kwantitajiet li jvarjaw f’medda ta’ bejn 45 000 biċċa u 70 000 biċċa. B’mod ġenerali, fil-perjodu taħt kunsiderazzjoni, il-volumi tal-importazzjoni miċ-Ċina naqsu b’31 %.

(152)

Is-sehem mis-suq tal-importazzjonijiet Ċiniżi baqa’ stabbli għal 11-12 % mill-2019 sal-2021 iżda naqas għal 6 % fir-RIP.

(153)

Il-Kummissjoni stabbiliet il-prezzijiet tal-importazzjonijiet abbażi tad-data dwar l-importazzjoni. It-twaqqigħ tal-prezz tal-importazzjonijiet ġie stabbilit abbażi ta’ tqabbil ta’ din id-data dwar l-importazzjoni mal-prezzijiet tal-produtturi tal-Unjoni inklużi fil-kampjun.

(154)

Il-prezz medju ponderat tal-importazzjonijiet mill-pajjiż ikkonċernat lejn l-Unjoni żviluppa kif ġej:

Tabella 4

Prezzijiet tal-importazzjoni (EUR/unità)

(155)

Il-prezzijiet tal-importazzjonijiet tal-HPT miċ-Ċina żdiedu bejn l-2021 u l-PIR, b’żieda ta’ 38 % matul il-perjodu kkunsidrat. Fin-nuqqas ta’ kwalunkwe kooperazzjoni mill-produtturi esportaturi Ċiniżi, iż-żidiet fil-prezzijiet jistgħu jiġu attribwiti għall-kundizzjonijiet ekonomiċi, iż-żieda fil-prezzijiet tal-materja prima u l-inflazzjoni dinjija wara l-pandemija fl-2020.

(156)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni tar-rieżami billi qabblet:

(157)

Meta wieħed iqabbel il-prezz tal-importazzjoni tal-pallet trucks tal-idejn miċ-Ċina, inklużi d-dazji stabbiliti, mal-prezzijiet tal-industrija tal-Unjoni, il-prezzijiet tal-importazzjoni ma kinux qegħdin iwaqqgħu l-prezzijiet tal-industrija tal-Unjoni.

(158)

L-importazzjonijiet ta’ pallet trucks tal-idejn minn pajjiżi terzi minbarra ċ-Ċina kienu prinċipalment mill-Malażja u mill-Vjetnam.

(159)

Il-kwantità tal-importazzjonijiet fl-Unjoni, kif ukoll is-sehem mis-suq u x-xejriet fil-prezzijiet għall-importazzjonijiet ta’ pallet trucks tal-idejn minn pajjiżi terzi oħrajn żviluppaw kif ġej:

Tabella 5

Importazzjonijiet minn pajjiżi terzi

(160)

L-importazzjonijiet fl-Unjoni minbarra miċ-Ċina kienu kważi esklużivament mill-Malażja u mill-Vjetnam matul il-perjodu taħt kunsiderazzjoni.

(161)

Il-kwantità tal-importazzjonijiet mill-Malażja baqgħet stabbli, filwaqt li s-sehem mis-suq tagħhom naqas bi tmien (8) punti perċentwali f’suq li qiegħed jikber.

(162)

L-importazzjonijiet mill-Vjetnam żdiedu drastikament matul il-perjodu taħt kunsiderazzjoni, bil-kwantitajiet jiżdiedu sa tmiem l-RIP għal aktar mid-doppju tal-kwantità fl-2019. Is-sehem mis-suq tagħhom żdied bi 15-il punt perċentwali għal 35 % fl-RIP.

(163)

Il-prezz ġenerali tal-importazzjonijiet żdied ukoll matul il-perjodu taħt kunsiderazzjoni bi 30 %.

(164)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu taħt kunsiderazzjoni.

(165)

Kif imsemmi fil-premessi (17) sa (20), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(166)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data fornuta mill-industrija tal-Unjoni. Id-data kienet relatata mal-produtturi kollha tal-Unjoni.

(167)

Il-Kummissjoni evalwat l-indikaturi makroekonomiċi abbażi ta’ data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun. Id-data kienet relatata mal-produtturi tal-Unjoni inklużi fil-kampjun. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(168)

L-indikaturi makroekonomiċi huma l-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(169)

L-indikaturi mikroekonomiċi huma l-prezzijiet medji tal-bejgħ, il-kostijiet unitarji, il-kostijiet lavorattivi, l-inventarji, il-profitabbiltà, il-fluss ta’ flus, l-investimenti, ir-redditu fuq l-investimenti, u l-kapaċità li jinġabar kapital.

(170)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Il-produzzjoni, il-kapaċità tal-produzzjoni u l-użu tal-kapaċità

(171)

Bejn l-2019 u tmiem l-RIP il-produzzjoni tal-Unjoni żdiedet b’9 % kif ukoll il-kapaċità tal-produzzjoni li żdiedet b’29 %.

(172)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu taħt kunsiderazzjoni:

Tabella 7

Kwantità tal-bejgħ u sehem mis-suq (biċċiet)

(173)

Matul il-perjodu taħt kunsiderazzjoni, il-kwantità tal-bejgħ tal-industrija tal-Unjoni lil klijenti mhux relatati fl-Unjoni żdiedet b’seba’ (7) punti perċentwali. Il-bejgħ naqas fl-2020 iżda rkupra wara l-pandemija.

(174)

L-industrija tal-Unjoni kienet kapaċi wkoll iżżomm is-sehem mis-suq tagħha relattivament stabbli bejn l-2019 u l-2021 iżda s-sehem mis-suq tagħha naqas fl-RIP. B’mod ġenerali, bejn, l-2019 u l-RIP, is-sehem mis-suq tal-industrija tal-Unjoni naqas minn 30 % għal 26 %.

(175)

Kif stabbilit hawn fuq, kemm il-konsum fl-Unjoni kif ukoll il-kwantitajiet tal-bejgħ tal-industrija tal-Unjoni żdiedu bejn l-2019 u tmiem l-RIP. Irrispettivament minn din ix-xejra dejjem tikber, l-industrija tal-Unjoni tilfet 4 % tas-sehem mis-suq matul il-perjodu taħt kunsiderazzjoni. Dan juri li l-industrija tal-Unjoni ma setgħetx tibbenefika minn suq li qed jikber u lanqas ma setgħet iżżomm is-sehem mis-suq tagħha.

(176)

Il-Kummissjoni tinnota wkoll iż-żieda fis-sehem mis-suq tal-importazzjonijiet mill-Vjetnam matul il-perjodu taħt kunsiderazzjoni għad-detriment tal-atturi l-oħrajn kollha fis-suq tal-Unjoni.

(177)

L-impjiegi u l-produttività żviluppaw kif ġej matul il-perjodu taħt kunsiderazzjoni:

Tabella 8

Impjiegi u produttività

(178)

L-għadd ta’ impjegati tal-industrija tal-Unjoni żdied b’10 % matul il-perjodu taħt kunsiderazzjoni. Il-produttività baqgħet relattivament stabbli mill-2019 sa tmiem l-RIP.

(179)

Din l-investigazzjoni stabbiliet marġni tad-dumping ta’ 82,5 %. L-effett tad-daqs tal-marġni attwali tad-dumping fuq l-industrija tal-Unjoni seta’ ġie ffaċilitat mill-miżuri anti-dumping stabbiliti, madankollu l-industrija tal-Unjoni xorta ma setgħetx iżżomm is-sehem mis-suq tagħha, li naqas b’erba’ punti perċentwali.

(180)

Għalkemm il-prezzijiet tal-industrija tal-Unjoni żdiedu matul il-perjodu taħt kunsiderazzjoni b’9 %, il-kostijiet unitarji korrispondenti tal-produzzjoni żdiedu b’25 %.

(181)

L-industrija tal-Unjoni ma setgħetx iżżid il-prezzijiet ulterjorment minħabba l-pressjoni tal-prezzijiet baxxi tal-importazzjoni u fid-dawl ta’ żidiet kbar fil-prezzijiet tal-azzar u tal-elettriku u pressjonijiet inflazzjonarji fuq kostijiet oħrajn inkluż il-manodopera.

(182)

Fir-rieżami ta’ skadenza preċedenti, il-Kummissjoni setgħet tara li l-industrija tal-Unjoni kienet bdiet tirkupra mill-effett ta’ dumping dannuż fil-passat. Kemm il-kwantitajiet tal-bejgħ kif ukoll l-ishma mis-suq żdiedu b’mod sinifikanti, u s-sitwazzjoni finanzjarja tagħhom tjiebet b’mod sinifikanti.

(183)

Madankollu matul dan il-perjodu taħt kunsiderazzjoni, is-sitwazzjoni tal-industrija tal-Unjoni reġgħet iddeterjorat sal-punt fejn l-industrija reġgħet ġarrbet dannu.

(184)

L-indikaturi mikroekonomiċi huma ppreżentati hawn taħt f’indiċijiet u wkoll f’firxiet. Dan sar biex tiġi protetta l-kunfidenzjalità taż-żewġ produtturi tal-Unjoni inklużi fil-kampjun, peress li d-divulgazzjoni tad-data eżatta tirrilaxxa d-data ta’ produttur wieħed lill-ieħor.

(185)

L-indiċijiet huma pprovduti biex juru x-xejra tal-indikatur maż-żmien, b’2019 f’100. Huma pprovduti wkoll firxiet biex juru d-daqs tal-indikatur.

(186)

Il-prezzijiet medji ponderati ta’ bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 9

Prezzijiet tal-bejgħ u kost tal-produzzjoni fl-Unjoni (EUR/biċċa)

(187)

Il-prezzijiet tal-bejgħ tal-produtturi tal-Unjoni inklużi fil-kampjun fis-suq tal-Unjoni baqgħu relattivament stabbli sal-perjodu ta’ investigazzjoni tar-rieżami. Il-pallet trucks tal-idejn huma assi li, ladarba jinxtraw, jistgħu jibqgħu fis-servizz għal snin jekk mhux għexieren ta’ snin. Il-prodott huwa wkoll, skont il-ħtieġa, wieħed standard, peress li l-pallet truck baqa’ tal-istess disinn sabiex ikun jista’ jissodisfa l-pallet standard. Għalhekk ma huwiex rari li l-prezzijiet jinżammu stabbli matul il-perjodu meħud f’kunsiderazzjoni.

(188)

Madankollu, il-produtturi tal-Unjoni inklużi fil-kampjun raw żieda fil-prezzijiet ta’ 10 punti perċentwali bejn l-2021 u l-RIP.

(189)

Il-kost tal-manifattura ta’ pallet truck tal-idejn jiddependi essenzjalment fuq żewġ affarijiet, il-prezz tal-azzar u l-prezz tal-enerġija. Iż-żewġ kostijiet żdiedu b’mod rapidu fl-2021 u fl-RIP, u żiedu l-kost tal-manifattura b’mod sinifikanti, bi 19-il punt perċentwali bejn l-2021 u l-RIP.

(190)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 10

Kostijiet lavorattivi medji għal kull impjegat

(191)

Il-kostijiet lavorattivi żdiedu bi 32 % bejn l-2019 u t-tmiem tal-perjodu taħt kunsiderazzjoni, f’konformità maż-żidiet fil-pagi madwar l-ekonomija tal-Unjoni bħala rispons għall-pressjonijiet inflazzjonarji.

(192)

Il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 11

Stokkijiet

(193)

Għalkemm l-istokkijiet tal-għeluq tal-industrija tal-Unjoni żdiedu bi 38 % matul il-perjodu taħt kunsiderazzjoni, dawn kienu baxxi meta mqabbla mal-kwantità totali prodotta, u l-istokk tal-għeluq bħala perċentwal tal-produzzjoni baqa’ stabbli matul il-perjodu taħt kunsiderazzjoni.

(194)

Il-profittabilità, il-fluss ta’ flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 12

Il-profittabbiltà, il-fluss tal-flus, l-investimenti u r-redditu fuq l-investimenti

(195)

Il-Kummissjoni stabbiliet il-profittabilità tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ.

(196)

Billi l-kostijiet tal-produzzjoni żdiedu l-ewwel bejn l-2019 u l-2020 u komplew jiżdiedu bejn l-2021 u tmiem l-RIP, il-produtturi tal-Unjoni inklużi fil-kampjun ma setgħux jirkupraw il-kostijiet totali tagħhom, u l-profitti li setgħu jagħmlu fl-2019 ma setgħux jinkisbu fl-2020. Fl-2021 u fl-RIP, l-industrija tal-Unjoni kienet qiegħda tagħmel it-telf.

(197)

Il-fluss ta’ flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom stess. Ix-xejra fil-fluss ta’ flus nett żviluppat f’konformità mal-inabbiltà tagħha li tagħmel profitt matul it-tmiem tal-perjodu taħt kunsiderazzjoni.

(198)

L-investimenti, u r-redditu fuq l-investimenti, juru wkoll l-istess xejra, peress li huma marbuta mal-profittabbiltà tal-kumpaniji u l-kapaċità tagħhom li jżidu l-kapital biex jiffinanzjaw l-investimenti. It-tmiem tal-perjodu taħt kunsiderazzjoni wera wkoll żidiet kemm fl-inflazzjoni kif ukoll fir-rati tal-imgħax fuq is-self.

(199)

Ir-rieżami ta’ skadenza preċedenti sab li kien hemm irkupru fraġli għall-industrija tal-Unjoni minn dumping tal-passat. Fl-investigazzjoni attwali, l-industrija tal-Unjoni reġgħet ġarrbet dannu matul il-perjodu kkunsidrat, b’mod partikolari fl-2021 u l-PIR.

(200)

Tali dannu jista’ jitqies fit-telf li sar mill-industrija u l-ħtieġa li wieħed jikkompeti mal-importazzjonijiet miċ-Ċina, mill-Vjetnam u mill-Malażja abbażi tal-prezz, minħabba n-natura standard tal-prodott innifsu.

(201)

Abbażi ta’ dan ta’ hawn fuq, il-Kummissjoni kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(1) tar-Regolament bażiku matul il-perjodu tal-investigazzjoni ta’ rieżami.

(202)

Madankollu, il-Kummissjoni tinnota li dan id-dannu jiġi fi żmien meta l-importazzjonijiet Ċiniżi tal-HPT ma kinux qegħdin iwaqqgħu l-prezzijiet tal-industrija tal-Unjoni.

(203)

Għalhekk, il-Kummissjoni kkonkludiet li d-dannu materjali mġarrab mill-industrija tal-Unjoni ma setax kien ikkawżat mill-importazzjonijiet oġġett ta’ dumping miċ-Ċina.

(204)

Il-Kummissjoni kkonkludiet fil-premessa (201) li l-industrija tal-Unjoni ġarrbet dannu materjali matul il-perjodu ta’ investigazzjoni tar-rieżami. Madankollu, il-Kummissjoni ma setgħetx tikkonkludi li dan id-dannu kien marbut mal-importazzjonijiet oġġett ta’ dumping miċ-Ċina.

(205)

Għalhekk, il-Kummissjoni vvalutat, f’konformità mal-Artikolu 11(2) tar-Regolament bażiku, jekk ikunx hemm probabbiltà ta’ rikorrenza ta’ dannu kkawżat mill-importazzjonijiet oġġett ta’ dumping miċ-Ċina jekk il-miżuri jitħallew jiskadu.

(206)

F’dan ir-rigward, ġew analizzati l-elementi li ġejjin mill-Kummissjoni:

(207)

Kif stabbilit fil-premessi (130) sa (134), hemm kapaċità ta’ produzzjoni u kapaċità ta’ riżerva sostanzjali fiċ-Ċina biex jiżdiedu l-esportazzjonijiet lejn is-suq tal-Unjoni malajr f’każ li l-miżuri anti-dumping jitħallew jiskadu. Kif stabbilit fil-premessa (131), il-kapaċità ta’ riżerva kienet stmata li hija madwar 1,3 miljun biċċa li hija kważi d-doppju tal-konsum tal-Unjoni. Ebda parti oħra ma kkontestat din id-data u lanqas ma pprovdiet xi kumment ieħor.

(208)

L-użu tal-kapaċità kien ta’ madwar 60 %, kif stabbilit fil-premessa (131), li jindika li l-kapaċità Ċiniża hija ferm ogħla mill-ħtiġijiet domestiċi. Il-kapaċità ta’ riżerva fiċ-Ċina ma tistax tiġi assorbita mis-suq Ċiniż, meta titqies kwalunkwe aspettattiva raġonevoli tat-tkabbir tagħha. Għalhekk, hemm inċentivi qawwija għall-produtturi Ċiniżi biex jesportaw, b’mod partikolari lejn is-suq tal-Unjoni, aktar u aktar jekk il-miżuri jitħallew jiskadu.

(209)

It-talba għal rieżami pprovdiet data dwar il-prezzijiet tal-esportazzjoni tal-HPT miċ-Ċina lejn pajjiżi oħrajn, b’mod partikolari s-suq kbir tal-esportazzjoni tal-Istati Uniti. Din id-data turi li l-esportazzjonijiet komplew fi kwantitajiet kbar u bi prezzijiet aktar baxxi minn dawk tal-Unjoni.

(210)

Din id-data ġiet ikkonfermata mill-analiżi tal-Kummissjoni stess li ġiet stabbilita fil-premessa (135) sa (139) hawn fuq.

(211)

Il-Kummissjoni qieset id-data fit-talba għal rieżami u l-analiżi tagħha stess li t-tnejn urew il-prezzijiet li bihom iċ-Ċina tista’ tesporta lejn swieq kbar ta’ pajjiżi terzi, inklużi l-Istati Uniti.

(212)

Dawn il-prezzijiet baxxi jissuġġerixxu li, jekk il-miżuri jiskadu, il-prezzijiet tal-importazzjoni miċ-Ċina lejn l-UE jonqsu għal dawn il-livelli. Kif muri fit-Tabella 4, il-prezzijiet tal-importazzjoni miċ-Ċina matul il-perjodu tal-investigazzjoni tar-rieżami kienu 204 EUR/biċċa, li huwa materjalment aktar baxx mill-prezz medju tal-bejgħ tal-industrija tal-Unjoni ta’ [310-330] EUR/biċċa muri fit-Tabella 9, u wkoll inqas mill-kost tal-produzzjoni tagħha [340-370 EUR/biċċa.

(213)

Għalhekk, huwa probabbli li mingħajr dazji anti-dumping, l-importazzjonijiet Ċiniżi jbaxxu materjalment il-prezzijiet tal-Unjoni.

(214)

Il-Kummissjoni tinnota fil-premessa (141) li l-investigazzjonijiet preċedenti wrew ċirkomvenzjoni tal-miżuri stabbiliti.

(215)

L-ewwel nett, instab li l-miżuri ġew evitati permezz tar-Renju tat-Tajlandja u l-miżuri jibqgħu estiżi għall-importazzjonijiet ikkonsenjati mit-Tajlandja, kemm jekk joriġinaw mit-Tajlandja kif ukoll jekk le.

(216)

It-tieni, l-esportaturi Ċiniżi evitaw ukoll il-miżuri billi żiedu l-hekk imsejħa “sistema ta’ indikazzjoni tal-piż” fuq il-pallet trucks tal-idejn tagħhom – iżda mhux integrati fix-xażi – u b’hekk jikklassifikaw il-prodotti b’mod li jevita l-ħlas tad-dazju.

(217)

Din l-evidenza ta’ ċirkomvenzjoni turi li l-produtturi Ċiniżi kienu lesti jevitaw il-miżuri biex jaċċessaw is-suq tal-Unjoni mingħajr ħlas ta’ dazji, u dan juri l-attraenza tas-suq tal-Unjoni għal dawn il-produtturi Ċiniżi.

(218)

Fid-dawl ta’ dan ta’ hawn fuq, il-Kummissjoni kkonkludiet li jekk il-miżuri jiskadu, x’aktarx li dan jirriżulta f’żieda sinifikanti ta’ importazzjonijiet li huma l-oġġett ta’ dumping miċ-Ċina f’livelli ta’ prezzijiet dannużi, u għalhekk jaggrava ulterjorment il-ħsara mġarrba mill-industrija tal-Unjoni.

(219)

F’konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq apprezzament tad-diversi interessi kollha involuti, inklużi dawk tal-industrija, tal-importaturi u tal-utenti finali tal-Unjoni.

(220)

Il-produtturi magħrufa kollha ta’ pallet trucks tal-idejn ikkooperaw mal-investigazzjoni. Żewġ kumpaniji ġew inklużi fil-kampjun u nżaru matul l-investigazzjoni u l-bqija tal-kumpaniji pprovdew informazzjoni għall-indikaturi makroekonomiċi permezz tal-avukati li jaġixxu f’isem l-industrija tal-Unjoni.

(221)

Il-Kummissjoni tikkonkludi li minħabba d-dannu mġarrab mill-industrija tal-Unjoni matul il-perjodu taħt kunsiderazzjoni, jekk il-miżuri jiskadu, dan id-dannu jkompli u s-sitwazzjoni ekonomika tal-industrija tal-Unjoni tkompli tiddeterjora aktar.

(222)

Il-miżuri huma b’mod ċar fl-interess tal-industrija tal-Unjoni.

(223)

L-ebda importatur jew utent ma kkoopera mal-investigazzjoni.

(224)

Fl-investigazzjoniijiet kollha ta’ qabel, il-Kummissjoni kkonkludiet li l-miżuri ma kellhomx effett serju fuq l-importaturi jew l-utenti ta’ pallet trucks tal-idejn.

(225)

Fin-nuqqas ta’ evidenza ġdida, il-Kummissjoni għalhekk tkompli tikkonkludi li l-kontinwazzjoni tal-miżuri mhux se taffettwa lill-importaturi jew lill-utenti b’xi mod sinifikanti.

(226)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti dwar l-importazzjonijiet tal-pallet trucks li joriġinaw miċ-Ċina.

(227)

Il-partijiet interessati kollha ġew informati bil-fatti u bil-kunsiderazzjonijiet essenzjali li abbażi tagħhom kien maħsub li jiġi rakkomandat li jinżammu l-miżuri eżistenti. Huma ngħataw ukoll perjodu biex jagħmlu rappreżentazzjonijiet wara din id-divulgazzjoni.

(228)

Ma wasal l-ebda kumment.

(229)

Abbażi tal-konklużjonijiet li laħqet il-Kummissjoni dwar il-probabbiltà ta’ kontinwazzjoni ta’ dumping, il-probabbiltà ta’ rikorrenza ta’ dannu u l-interess tal-Unjoni, il-miżuri anti-dumping fuq il-pallet trucks tal-idejn li joriġinaw miċ-Ċina jenħtieġ li jinżammu.

(230)

Ir-rati tad-dazju anti-dumping tal-kumpaniji individwali speċifikati f’dan ir-Regolament japplikaw esklużivament għall-importazzjonijiet tal-prodott taħt rieżami li joriġina miċ-Ċina u manifatturat mill-entitajiet legali msemmijin. L-importazzjonijiet tal-prodott taħt rieżami manifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi l-entitajiet relatati ma’ dawk imsemmija speċifikament, jenħtieġ li jkunu soġġetti għar-rata ta’ dazju applikabbli għall-kumpaniji l-oħrajn kollha. Dawn jenħtieġ li ma jkunu soġġetti għall-ebda waħda mir-rati tad-dazju anti-dumping individwali.

(231)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk hija sussegwentement tbiddel l-isem tal-entità tagħha. It-talba trid tiġi indirizzata lill-Kummissjoni (40). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(232)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (41) meta jkollu jiġi rrimborżat ammont wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament prinċipali tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(233)

Il-miżuri previsti f’dan ir-regolament huma f’konformità mal-opinjoni tal-Kumitat stabbilit mill-Artikolu 15(1) tar-Regolament (UE) 2016/1036.