(1)

It-treġġigħ lura tal-vijabilità fit-tul tal-kontroparti ċentrali (CCP) wara l-applikazzjoni tal-għodod ta’ riżoluzzjoni rilevanti, jitqies li jkun inkiseb meta, sa mhux aktar tard minn tmiem il-perjodu ta’ riorganizzazzjoni tan-negozju, is-CCP tkun kapaċi tissodisfa r-rekwiżiti prudenzjali rilevanti kollha u rekwiżiti regolatorji oħrajn fuq bażi progressiva, u jkollha mudell ta’ negozju vijabbli li jkun ukoll sostenibbli fit-tul.

(2)

Jenħtieġ li pjan ta’ riorganizzazzjoni tan-negozju jqis l-event li wassal biex l-awtorità ta’ riżoluzzjoni tieħu azzjoni ta’ riżoluzzjoni skont l-Artikolu 22(1) tar-Regolament (UE) 2021/23 (“event skattatur”). Il-pjan ta’ riorganizzazzjoni tan-negozju għandu jinkludi analiżi dettaljata tal-fatturi u ċ-ċirkostanzi li wasslu għal dak l-event, li huma varjabbli importanti għat-tfassil tal-pjan ta’ riorganizzazzjoni tan-negozju u għall-identifikazzjoni ta’ miżuri xierqa ta’ riorganizzazzjoni tan-negozju.

(3)

Pjan ta’ riorganizzazzjoni tan-negozju għandu jistabbilixxi l-miżuri previsti biex titreġġa’ lura l-vijabilità fit-tul tas-CCP. Sabiex jiġi massimizzat iċ-ċans tagħhom li jilħqu l-objettivi tagħhom, jenħtieġ li dawn ikunu adatti għas-servizzi tal-ikklirjar tas-CCP, iqisu l-kondizzjonijiet ekonomiċi u finanzjarji tas-suq li fihom se topera s-CCP, jikkunsidraw kwalunkwe effett fuq il-partijiet ikkonċernati rilevanti tas-CCP, u jenħtieġ li jiżguraw kemm il-kontinwità tal-funzjonijiet kritiċi tas-CCP kif ukoll il-konformità mar-rekwiżiti regolatorji. Sabiex pjan ta’ riorganizzazzjoni tan-negozju jitqies kredibbli mill-awtorità ta’ riżoluzzjoni u mill-awtorità kompetenti, jenħtieġ li dan ireġġa’ lura l-vijabilità fit-tul tas-CCP abbażi ta’ suppożizzjonijiet realistiċi u jispjega r-raġunijiet għaliex xi miżuri alternattivi ġew imwarrba mill-pjan ta’ riorganizzazzjoni tan-negozju.

(4)

Bħar-riorganizzazzjoni tan-negozju, l-ippjanar għall-irkupru għandu l-għan li jtejjeb il-prestazzjoni ta’ entità li tkun qed tiffaċċja diffikultajiet ekonomiċi billi jidentifika u jindirizza l-kawżi ta’ dawk id-diffikultajiet. Għalhekk, sabiex is-sinerġiji bejn iż-żewġ tipi ta’ ppjanar jiġu sfruttati kif xieraq, meta jikkunsidra t-treġġigħ lura tal-vijabilità u l-kontinwità tas-servizzi tal-ikklirjar tas-CCP, jenħtieġ li l-pjan ta’ riorganizzazzjoni tan-negozju juża l-informazzjoni li tinsab fil-pjan ta’ rkupru, sa fejn tali informazzjoni tkun rilevanti għat-treġġigħ lura tal-vijabilità fit-tul tas-CCP.

(5)

Pjan ta’ riorganizzazzjoni tan-negozju jista’ jinkludi, fejn rilevanti, miżuri għar-riorganizzazzjoni u r-ristrutturar tal-attivitajiet tas-CCP, bidliet fis-sistema operattiva u fl-infrastruttura tas-CCP, jew bidliet fil-ġestjoni tar-riskju tas-CCP. Sabiex tiġi żgurata r-rilevanza ta’ kull miżura, jenħtieġ li l-pjan ta’ riorganizzazzjoni tan-negozju jinkludi preżentazzjoni dettaljata, li tqis l-impatt tal-miżuri proposti fuq l-attivitajiet tas-CCP, il-membri tal-ikklirjar u l-fornituri terzi, u li turi kif dik il-miżura se treġġa’ lura l-vijabilità fit-tul tas-CCP. B’mod partikolari, sabiex juri li s-CCP se tibqa’ konformi mar-rekwiżiti organizzazzjonali u prudenzjali stabbiliti fit-Titolu IV tar-Regolament (UE) Nru 648/2012 tal-Parlament Ewropew u tal-Kunsill (2), jenħtieġ li kwalunkwe bidla fil-ġestjoni tar-riskju tas-CCP tiġi dettaljata u vvalutata fil-pjan ta’ riorganizzazzjoni tan-negozju.

(6)

Pjan ta’ riorganizzazzjoni tan-negozju jista’ jinkludi miżuri għall-bejgħ jew l-istralċ ta’ xi wħud mill-assi jew mil-linji tan-negozju tas-CCP. Sabiex tiġi żgurata l-effiċjenza tagħhom, jenħtieġ li dawn il-miżuri jkunu appoġġati minn deskrizzjoni dettaljata tal-linji tan-negozju jew l-assi kkunsidrati għall-bejgħ, kif dak il-bejgħ ireġġa’ lura l-vijabilità fit-tul tas-CCP, u kwalunkwe impatt fuq il-kontinwità tal-operazzjonijiet tas-CCP.

(7)

Sabiex tiġi żgurata implimentazzjoni kredibbli tal-pjan ta’ riorganizzazzjoni tan-negozju, jenħtieġ li dan jinkludi skeda ta’ żmien indikattiva għall-implimentazzjoni tal-miżuri kollha previsti. Jenħtieġ li l-iskeda ta’ żmien tgħin fl-identifikazzjoni tal-istadji importanti ewlenin tal-pjan, inklużi l-passi ta’ komunikazzjoni mal-partijiet ikkonċernati esterni.

(8)

Meta jivvalutaw jekk il-pjan ta’ riorganizzazzjoni tan-negozju jreġġax lura l-vijabilità fit-tul tas-CCP, jenħtieġ li l-awtorità kompetenti u l-awtorità ta’ riżoluzzjoni jqisu kemm il-kriterji tal-prestazzjoni tal-vijabilità kif ukoll il-kriterji tal-prestazzjoni finanzjarja, li huma komplementari għal xulxin. Jenħtieġ li l-kriterji tal-prestazzjoni tal-vijabilità jgħinu biex jiġi vverifikat li l-pjan ta’ riorganizzazzjoni tan-negozju huwa konsistenti mar-regoli u r-regolamenti interni tas-CCP, u li permezz tiegħu s-CCP tkun tista’ tkompli topera mingħajr ma toħloq riskji sinifikanti għas-sistema finanzjarja, filwaqt li tibqa’ konformi mar-rekwiżiti prudenzjali u organizzazzjonali applikabbli kollha. Jenħtieġ li l-kriterji tal-prestazzjoni finanzjarja jgħinu biex jiġi vverifikat li l-pjan ta’ riorganizzazzjoni tan-negozju se jiggarantixxi l-vijabilità finanzjarja fit-tul tas-CCP, kemm mil-lat operazzjonali kif ukoll minn dak ekonomiku, wara r-riorganizzazzjoni.

(9)

Il-fluttwazzjonijiet huma parti inerenti miċ-ċiklu ekonomiku. Jenħtieġ li kwalunkwe pjan ta’ riorganizzazzjoni tan-negozju jinkludi analiżi ta’ xenarji alternattivi, b’bidliet xierqa fis-suppożizzjonijiet sottostanti ewlenin biex jiġu inklużi s-suppożizzjonijiet tal-agħar u l-aħjar xenarji possibli. Sabiex tiġi żgurata l-kredibbiltà tal-pjan ta’ riorganizzazzjoni tan-negozju, jenħtieġ li meta l-awtorità kompetenti u l-awtorità ta’ riżoluzzjoni jivvalutaw il-pjan, jivverifikaw li dan jiddependi fuq sett ta’ xenarji komprensivi u realistiċi, li jirriflettu b’mod preċiż l-ambjent tas-suq tas-CCP, u r-restrizzjonijiet operazzjonali u legali tagħha.

(10)

Sabiex tiġi żgurata implimentazzjoni kredibbli tal-pjan ta’ riorganizzazzjoni tan-negozju, jenħtieġ li meta l-awtorità kompetenti u l-awtorità tar-riżoluzzjoni jivvalutaw dak il-pjan, jiżguraw li kemm il-maniġment superjuri kif ukoll il-partijiet ikkonċernati ewlenin ikollhom għarfien suffiċjenti tal-pjan ta’ riorganizzazzjoni tan-negozju. Peress li l-partijiet ikkonċernati ewlenin huma essenzjali jew kritiċi għas-CCP fl-għoti tas-servizzi tal-ikklirjar, jenħtieġ li jinkludu membri tal-ikklirjar u fornituri ta’ servizzi kritiċi inklużi l-fornituri tas-servizzi ta’ saldu, u l-fornituri tal-pjattaformi.

(11)

Sabiex tiġi żgurata l-adegwatezza tal-pjan ta’ riorganizzazzjoni tan-negozju, jenħtieġ li meta l-awtorità kompetenti u l-awtorità ta’ riżoluzzjoni jivvalutaw il-pjan, jivverifikaw li dan jippreserva l-funzjonijiet kritiċi tas-CCP, u jqis il-karatteristiċi speċifiċi tas-CCP, inklużi n-natura tal-attivitajiet tal-ikklirjar tagħha, l-istruttura tas-suq tal-ikklirjar, u l-interdipendenzi ma’ partijiet ikkonċernati oħra inklużi l-membri tal-ikklirjar, iċ-ċentri tan-negozjar jew il-fornituri ta’ servizzi kritiċi. Filwaqt li tiżgura li jiġu inklużi d-dettalji kollha meħtieġa, jenħtieġ li l-awtorità ta’ riżoluzzjoni tivvaluta wkoll li l-pjan ta’ riorganizzazzjoni tan-negozju huwa konċiż u ċar biżżejjed biex ikun jista’ jiġi implimentat malajr.

(12)

Sabiex tiġi żgurata l-konsistenza tal-pjan ta’ riorganizzazzjoni tan-negozju, jenħtieġ li meta l-awtorità kompetenti u l-awtorità ta’ riżoluzzjoni jivvalutaw il-pjan, iqabblu l-pjan ta’ riorganizzazzjoni tan-negozju mal-pjanijiet tan-negozju preċedenti tas-CCPs, mħejjija jew skont is-suppożizzjonijiet tagħhom stess ta’ “żamma tal-istatus quo” jew fejn meħtieġ minn obbligi regolatorji jew legali.

(13)

Id-dispożizzjonijiet f’dan ir-Regolament huma marbuta mill-qrib ma’ xulxin, peress li jittrattaw il-pjan ta’ riorganizzazzjoni tan-negozju li s-CCPs taħt riżoluzzjoni huma meħtieġa jippreżentaw wara l-applikazzjoni tal-għodda ta’ valutazzjoni negattiva u ta’ konverżjoni. Sabiex tiġi żgurata l-koerenza bejn dawk id-dispożizzjonijiet, li jenħtieġ li jidħlu fis-seħħ fl-istess ħin, hemm il-ħtieġa li s-CCPs u l-awtoritajiet ta’ riżoluzzjoni jkollhom perspettiva komprensiva u aċċess kumpatt għall-obbligi u d-drittijiet tagħhom marbuta ma’ tali pjanijiet ta’ riorganizzazzjoni tan-negozju. Għalhekk, huwa xieraq li l-istandards tekniċi regolatorji rilevanti meħtieġa mill-Artikoli 37(4) u 38(4) tar-Regolament (UE) 2021/23 jiġu inklużi f’Regolament wieħed.

(14)

Dan ir-Regolament huwa bbażat fuq l-abbozzi tal-istandards tekniċi regolatorji ppreżentati lill-Kummissjoni mill-Awtorità Ewropea tat-Titoli u s-Swieq.

(15)

L-Awtorità Ewropea tat-Titoli u s-Swieq wettqet konsultazzjonijiet pubbliċi miftuħa dwar l-abbozzi tal-istandards tekniċi regolatorji li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Konċernati tat-Titoli u s-Swieq stabbilit mill-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3),

(a)

is-CCP għandha tkun tista’, f’konformità mar-regoli u r-regolamenti interni tagħha, twettaq il-miżuri stabbiliti fil-pjan ta’ riorganizzazzjoni tan-negozju;

(b)

is-CCP, bl-implimentazzjoni tal-pjan ta’ riorganizzazzjoni tan-negozju, għandha tkun tista’, fi żmien raġonevoli, treġġa’ lura l-vijabilità fit-tul u tkompli tipprovdi servizzi tal-ikklirjar f’konformità mar-Regolament (UE) Nru 648/2012 bil-mod li ġej:

(c)

il-pjan ta’ riorganizzazzjoni tan-negozju għandu jinkludi deskrizzjoni tal-metodu għad-determinazzjoni tal-valur u l-kummerċjabbiltà tal-funzjonijiet u l-assi kritiċi tas-CCP, b’enfasi fuq aspetti li jista’ jkollhom impatt fuq il-valwazzjoni, inkluża l-volatilità fis-suq, l-inaċċessibbiltà jew l-inċertezza tal-prezzijiet tas-suq, ir-restrizzjonijiet tal-ħin u l-aspetti legali;

(d)

il-valwazzjonijiet skont il-pjan ta’ riorganizzazzjoni tan-negozju għandhom ikopru kemm l-assi kif ukoll il-linji tan-negozju tas-CCP li għandhom jiġu stralċati jew mibjugħa, u l-assi u l-linji tan-negozju li għandhom jibqgħu fis-CCP;

(e)

kwalunkwe rikavat miċ-ċessjoni ta’ assi, jew ta’ linji tan-negozju previsti mill-pjan ta’ riorganizzazzjoni tan-negozju għandu jiġi kkalkolat b’mod prudenti u b’referenza għal punt ta’ referenza jew għal valwazzjoni, inkluża valwazzjoni esperta, eżerċizzju ta’ sondaġġ tas-suq, jew il-valur ta’ assi jew linji tan-negozju simili;

(f)

is-CCP, bl-implimentazzjoni tal-pjan ta’ riorganizzazzjoni tan-negozju, għandha tkun kapaċi tissodisfa r-rekwiżiti prudenzjali u rekwiżiti regolatorji oħra applikabbli kollha fuq bażi progressiva, b’mod partikolari:

(g)

meta flimkien mar-riżoluzzjoni għandu jkun hemm sostituzzjoni tal-maniġment u fejn tali ristrutturar għandu jinkiseb permezz tal-implimentazzjoni ta’ pjan ta’ riorganizzazzjoni tan-negozju, il-pjan ta’ riorganizzazzjoni tan-negozju għandu jindirizza ristrutturar li jinkludi s-sostituzzjoni tal-maniġment;

(h)

sa fejn taf is-CCP, l-implimentazzjoni tal-miżuri stabbiliti fir-riorganizzazzjoni tan-negozju ma għandu jkollha l-ebda effett negattiv materjali fuq l-istabbiltà tas-suq u dik finanzjarja;

(i)

is-CCP ma identifikatx kwistjonijiet relatati mal-liġi tal-kompetizzjoni tal-Unjoni jew nazzjonali li jistgħu jinqalgħu mill-implimentazzjoni tal-pjan ta’ riorganizzazzjoni tan-negozju.

(a)

is-CCP għandha tkun identifikat ir-rekwiżiti ta’ finanzjament skont il-pjan ta’ riorganizzazzjoni tan-negozju u tkun żgurat is-sorsi ta’ tali finanzjament, filwaqt li tiżgura, b’mod partikolari, li l-partijiet li jaqblu li jipprovdu riżorsi finanzjarji impenjati, inkluża l-impriża omm, il-membri tal-ikklirjar, l-azzjonisti jew il-fornituri tal-likwidità tas-CCP, ikunu jistgħu jittrasferixxu l-ammonti impenjati lis-CCP fil-perjodu ta’ żmien meħtieġ f’konformità mat-termini u l-kondizzjonijiet maqbula minn tali partijiet;

(b)

is-CCP għandha tkun identifikat u inkludiet fil-pjan ta’ riorganizzazzjoni tan-negozju modi biex iżżomm ir-reżiljenza finanzjarja tagħha;

(c)

is-CCP għandha tkun tista’ topera u tkopri l-pożizzjonijiet finanzjarji kollha tagħha, kif muri minn karta tal-bilanċ ta’ wara r-riorganizzazzjoni li tipprovdi dettalji dwar l-istruttura l-ġdida tad-dejn u tal-kapital u dwar l-effetti tal-għodod ta’ valutazzjoni negattiva u konverżjoni bbażati fuq il-valwazzjoni mwettqa skont l-Artikolu 24(3) u l-Artikolu 61(1) tar-Regolament (UE) 2021/23 sa fejn tali valwazzjoni tkun ġiet iffinalizzata fiż-żmien tal-istabbiliment tal-pjan ta’ riorganizzazzjoni tan-negozju;

(d)

is-CCP għandha tkun identifikat u mmitigat kwalunkwe impediment finanzjarju, inkluż meta s-CCP tkun parti minn litigazzjoni jew tilwima li tkun għaddejja li tista’ taffettwa b’mod negattiv il-pożizzjoni finanzjarja tagħha.

(a)

il-maniġment superjuri u l-membri tal-bord tas-CCP għandhom jirrikonoxxu bil-miktub li huma konxji u impenjati għal dan li ġej:

(b)

l-għarfien, l-impenn, il-kooperazzjoni u l-appoġġ tal-partijiet ikkonċernati interni u esterni ewlenin li ġejjin għall-pjan ta’ riorganizzazzjoni tan-negozju għandhom ikunu dokumentati bil-miktub: