Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32024R0434

    Regolament ta’ Implimentazzjoni tal-Kummissjoni (UE) 2024/434 tal-5 ta’ Frar 2024 dwar miżuri għall-prevenzjoni tal-istabbiliment u tat-tixrid tal-Agrilus planipennis Fairmaire fit-territorju tal-Unjoni

    C/2024/583

    ĠU L, 2024/434, 6.2.2024, ELI: http://data.europa.eu/eli/reg_impl/2024/434/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

    Legal status of the document In force

    ELI: http://data.europa.eu/eli/reg_impl/2024/434/oj

    European flag

    Il-Ġurnal Uffiċjali
    ta'l-Unjoni Ewropea

    MT

    Serje L

    2024/434

    6.2.2024

    REGOLAMENT TA’ IMPLIMENTAZZJONI TAL-KUMMISSJONI (UE) 2024/434

    tal-5 ta’ Frar 2024

    dwar miżuri għall-prevenzjoni tal-istabbiliment u tat-tixrid tal-Agrilus planipennis Fairmaire fit-territorju tal-Unjoni

    IL-KUMMISSJONI EWROPEA,

    Wara li kkunsidrat it-Trattat dwar il-Funzjonament tal-Unjoni Ewropea,

    Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b’mod partikolari l-Artikolu 28(1), il-punti (d) sa (i), tiegħu,

    Billi:

    (1)

    It-tifqigħat reċenti tal-Agrilus planipennis Fairmaire (“il-pest speċifikat”) f’pajjiżi terzi qrib il-fruntieri tal-Unjoni jirrikjedu l-introduzzjoni ta’ miżuri għall-prevenzjoni tal-istabbiliment u tat-tixrid tal-pest speċifikat fit-territorju tal-Unjoni f’każ li jinstab li jkun preżenti hemmhekk.

    (2)

    Il-pest speċifikat huwa elenkat bħala pest ta’ prijorità skont ir-Regolament Delegat tal-Kummissjoni (UE) 2019/1702 (2).

    (3)

    Abbażi tal-evidenza xjentifika u teknika disponibbli li tikkonċerna l-pest speċifikat, jenħtieġ li l-miżuri fir-rigward tal-pest speċifikat jittieħdu biss għall-pjanti tal-Chionanthus virginicus L. u tal-Fraxinus L. (“il-pjanti speċifikati”) u għall-injam, għall-qoxra iżolata u għal oġġetti oħra magħmula mill-qoxra, tal-Chionanthus virginicus L. u tal-Fraxinus L (“l-injam u l-qoxra tas-siġar speċifikati”).

    (4)

    Sabiex tiġi żgurata l-assenza tal-pest speċifikat fit-territorju tal-Unjoni, jenħtieġ li l-Istati Membri jwettqu stħarriġiet annwali intensivi għall-preżenza tal-pest speċifikat u jużaw metodi konformi mal-iktar informazzjoni xjentifika u teknika reċenti.

    (5)

    Sabiex jiġi pprevenut l-istabbiliment tal-pest speċifikat u t-tixrid tiegħu fit-territorju tal-Unjoni, jenħtieġ li l-Istati Membri jistabbilixxu żoni demarkati li jikkonsistu minn żona infestata u minn żona ta’ lqugħ, u jenħtieġ li japplikaw miżuri ta’ eradikazzjoni.

    (6)

    Abbażi tal-bijoloġija tal-pest speċifikat, iż-żona infestata jenħtieġ li tinkludi l-pjanti infestati u l-pjanti speċifikati kollha li x’aktarx isiru infestati f’raġġ ta’ mill-inqas 100 m madwar il-pjanti infestati. Fuq l-istess bażi, jenħtieġ li l-wisa’ taż-żona ta’ lqugħ tkun ta’ 10 km lil hinn mill-konfini taż-żona infestata, u dan huwa xieraq għall-kapaċità tat-tixrid tal-pest speċifikat.

    (7)

    Madankollu, f’każijiet ta’ sejbiet iżolati tal-pest speċifikat, jenħtieġ li l-istabbiliment ta’ żona demarkata ma jkunx meħtieġ jekk il-pest speċifikat ikun jista’ jiġi eliminat minn dawk il-pjanti, u jekk ikun hemm evidenza li dawk il-pjanti kienu infestati qabel l-introduzzjoni tagħhom fiż-żona, jew jekk tkun sejba iżolata li mhux mistennija twassal għal stabbiliment. Dan huwa l-iktar approċċ proporzjonat diment li l-istħarriġiet imwettqa fiż-żona kkonċernata jikkonfermaw l-assenza tal-pest speċifikat.

    (8)

    Sabiex tiġi żgurata t-tneħħija immedjata tal-pjanti infestati u jiġi evitat iktar tixrid tal-pest speċifikat fil-bqija tat-territorju tal-Unjoni, jenħtieġ li l-monitoraġġ taż-żoni demarkati jitwettaq kull sena fl-iktar żmien xieraq tas-sena u b’biżżejjed intensità.

    (9)

    Sabiex jiġi żgurat approċċ proporzjonat għar-riskju fitosanitarju li jinħoloq mill-pest speċifikat, jenħtieġ li l-Istati Membri jitħallew ineħħu d-demarkazzjoni meta, abbażi tal-istħarriġiet, dak il-pest ma jiġix identifikat fiż-żona demarkata għal mill-inqas 4 snin konsekuttivi.

    (10)

    Jenħtieġ li jiġu stabbiliti miżuri ta’ eradikazzjoni għall-eliminazzjoni tal-pest speċifikat jekk jinstab preżenti fit-territorju tal-Unjoni. Dawk il-miżuri jenħtieġ li jkunu xierqa għall-bijoloġija tal-pest speċifikat u bbażati fuq l-informazzjoni xjentifika u teknika disponibbli.

    (11)

    F’konformità mar-Regolament (UE) 2016/2031, kull Stat Membru għandu jfassal u jżomm aġġornat pjan ta’ kontinġenza għal kull pest ta’ prijorità. Abbażi tal-esperjenza minn tifqigħat preċedenti, jeħtieġ li jiġu adottati regoli speċifiċi li jimplimentaw l-Artikolu 25 tar-Regolament (UE) 2016/2031 sabiex jiġi żgurat pjan ta’ kontinġenza komprensiv f’każ ta’ kwalunkwe sejba tal-pest speċifikat fl-Unjoni.

    (12)

    Id-dispożizzjonijiet li jikkonċernaw it-twettiq ta’ stħarriġiet f’żoni ħielsa mill-pest abbażi tal-Linji Gwida tal-Awtorità Ewropea dwar is-Sigurtà fl-Ikel għal stħarriġiet statistikament sodi u bbażati fuq ir-riskju tal-Agrilus planipennis (3) jenħtieġ li japplikaw mill-1 ta’ Jannar 2027, sabiex l-awtoritajiet kompetenti jkunu jistgħu jippjanaw, iħejju t-tfassil u jallokaw biżżejjed riżorsi għal tali stħarriġiet.

    (13)

    Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

    ADOTTAT DAN IR-REGOLAMENT:

    Artikolu 1

    Definizzjonijiet

    Għall-finijiet ta’ dan ir-Regolament, japplikaw id-definizzjonijiet li ġejjin:

    (1)

    “pest speċifikat” tfisser Agrilus planipennis Fairmaire;

    (2)

    “pjanti speċifikati” tfisser pjanti tal-Chionanthus virginicus L. u tal-Fraxinus L., għajr il-frott, iż-żrieragħ, it-trab tad-dakra u l-pjanti fil-kultura tat-tessuti;

    (3)

    “stħarriġ tad-delimitazzjoni” tfisser proċedura iterattiva li tintuża biex jiġu stabbiliti l-konfini ta’ żona kkunsidrata bħala infestata minn pest jew ħielsa minnu;

    (4)

    “injam u qoxra tas-siġar speċifikati” tfisser l-injam, il-qoxra iżolata u oġġetti oħra magħmula mill-injam u mill-qoxra, tal-Chionanthus virginicus L. u tal-Fraxinus L.;

    (5)

    “siġar tal-insib” tfisser pjanti speċifikati li jkunu mħażżma u li jintużaw biex jappoġġaw id-detezzjoni bikrija tal-pest speċifikat.

    Artikolu 2

    Stħarriġiet tat-territorju tal-Unjoni f’konformità mal-Artikolu 24 tar-Regolament (UE) 2016/2031

    1.   L-Istati Membri għandhom iwettqu stħarriġiet ibbażati fuq ir-riskju għall-preżenza tal-pest speċifikat kull sena fiż-żoni tat-territorji tagħhom, fejn ma jkunx magħruf li jokkorri.

    2.   L-iskema tat-tfassil u tal-kampjunar ta’ dawk l-istħarriġiet għandha tippermetti d-detezzjoni, fl-Istat Membru kkonċernat, b’livell għoli suffiċjenti ta’ fiduċja, livell baxx ta’ preżenza tal-pest speċifikat fuq il-pjanti infestati. Dawn għandhom ikunu bbażati fuq il-Linji Gwida tal-Awtorità Ewropea dwar is-Sigurtà fl-Ikel (“l-Awtorità”) għal stħarriġiet statistikament sodi u bbażati fuq ir-riskju tal-Agrilus planipennis u għandhom iqisu r-riskju tat-tixrid naturali tal-pest speċifikat.

    3.   L-istħarriġiet għandhom jitwettqu:

    (a)

    fil-beraħ, f’żoni naturali u urbani, f’waqfiet tul it-toroq ewlenin, fil-linji ferrovjarji u f’mogħdijiet oħra tat-trasport, kif ukoll f’mixtliet, f’ċentri tal-ġonna, f’ċentri kummerċjali għall-pjanti speċifikati, għall-injam u għall-qoxra tas-siġar, f’impjanti tal-isserrar tal-injam iebes, u f’siti rilevanti oħra, kif ikun xieraq;

    (b)

    fi żminijiet xierqa matul is-sena fir-rigward tal-possibbiltà ta’ detezzjoni tal-pest speċifikat, filwaqt li titqies il-bijoloġija ta’ dak il-pest, il-preżenza u l-bijoloġija tal-pjanti speċifikati, kif ukoll l-informazzjoni xjentifika u teknika msemmija fil-Karta tal-Istħarriġ tal-Pesti tal-Awtorità dwar l-Agrilus planipennis (4).

    4.   L-istħarriġiet għandhom jikkonsistu minn:

    (a)

    l-insib tal-pest speċifikat, li jista’ jinkludi l-użu tas-siġar tal-insib;

    (b)

    fejn ikun xieraq, eżamijiet viżwali tal-pjanti speċifikati;

    (c)

    f’każ ta’ suspett, il-kampjunar u l-ittestjar tal-pjanti speċifikati u tal-injam speċifikat, inkluż il-friegħi maqtugħin, u l-materjal tal-injam għall-imballaġġ; u

    (d)

    fejn ikun xieraq, l-użu ta’ klieb tat-tfittxija mħarrġa speċifikament.

    Artikolu 3

    Stabbiliment ta’ żoni demarkati

    1.   Fejn il-preżenza tal-pest speċifikat tkun ġiet ikkonfermata uffiċjalment, l-Istat Membru kkonċernat, mingħajr dewmien, għandu jistabbilixxi żona demarkata li tikkonsisti minn:

    (a)

    żona infestata f’raġġ ta’ mill-inqas 100 m madwar il-pjanti infestati, inkluż il-pjanti infestati u l-pjanti speċifikati kollha li x’aktarx isiru infestati (“żona infestata”);

    (b)

    żona ta’ lqugħ b’wisa’ ta’ mill-inqas 10 km lil hinn mill-konfini taż-żona infestata.

    2.   Id-delimitazzjoni taż-żona demarkata għandha tqis il-prinċipji xjentifiċi, il-bijoloġija tal-pest speċifikat, il-livell ta’ infestazzjoni, id-distribuzzjoni partikolari tal-pjanti speċifikati fiż-żona kkonċernata, u l-evidenza għall-istabbiliment tal-pest speċifikat.

    Id-demarkazzjoni inizjali taż-żona infestata għandha tiġi segwita minnufih minn stħarriġ tad-delimitazzjoni, bi skema tat-tfassil u tal-kampjunar li tippermetti d-detezzjoni tal-preżenza tal-pjanti infestati ta’ 1 %, b’livell ta’ fiduċja ta’ 95 %.

    L-istħarriġ tad-delimitazzjoni għandu:

    (a)

    ikun ibbażat fuq il-Linji gwida tal-Awtorità għal stħarriġiet statistikament sodi u bbażati fuq ir-riskju tal-Agrilus planipennis; u

    (b)

    jinkludi l-kampjunar tal-friegħi jew metodi adattati oħra, li kapaċi jwasslu għad-detezzjoni tal-pest qabel ma jitfaċċa.

    3.   Fiż-żoni demarkati, l-awtoritajiet kompetenti għandhom irawmu sensibilizzazzjoni pubblika rigward it-theddida tal-pest speċifikat u rigward il-miżuri adottati għall-prevenzjoni tat-tixrid ulterjuri tiegħu barra minn dawk iż-żoni.

    Għandhom jiżguraw li l-operaturi professjonali u l-pubbliku ġenerali jkunu konxji tad-delimitazzjoni taż-żoni demarkati.

    4.   L-awtoritajiet kompetenti jistgħu jiddeċiedu li jnaqqsu r-raġġ taż-żona ta’ lqugħ, abbażi tal-informazzjoni dwar id-daqs tal-infestazzjoni, id-densità tal-pjanti speċifikati, kif ukoll l-oriġini u l-età tat-tifqigħa. F’tali każ, għandhom immedjatament jirrapportaw dak it-tnaqqis lill-Kummissjoni u lill-Istati Membri l-oħra, u r-raġunijiet li jkunu wasslu għalih.

    Artikolu 4

    Derogi mill-istabbiliment ta’ żoni demarkati

    1.   B’deroga mill-Artikolu 3, l-awtoritajiet kompetenti jistgħu jagħżlu li ma jistabbilixxux żona demarkata jekk jiġu ssodisfati l-kundizzjonijiet li ġejjin:

    (a)

    ikun hemm evidenza li l-pest speċifikat ikun ġie introdott fiż-żona mal-pjanti jew il-materjal tal-pjanti li jkun instab fuqhom, u li dawk il-pjanti jkunu ġew infestati qabel l-introduzzjoni tagħhom fiż-żona kkonċernata u ma jkunx hemm okkorrenza ta’ multiplikazzjoni tal-pest speċifikat jew ikun hemm evidenza li tkun sejba iżolata, li ma tkunx mistennija li twassal għall-istabbiliment tal-pest speċifikat;

    (b)

    jiġi aċċertat li ma hemm l-ebda stabbiliment tal-pest speċifikat, u li t-tixrid u t-tnissil b’suċċess tal-pest speċifikat ma jkunux possibbli minħabba l-bijoloġija tiegħu, abbażi tar-riżultati ta’ investigazzjoni speċifika u l-miżuri ta’ eradikazzjoni meħuda.

    2.   Meta l-awtorità kompetenti tapplika d-deroga prevista fil-paragrafu 1, hija għandha:

    (a)

    tieħu miżuri biex tiżgura l-eradikazzjoni fil-pront tal-pest speċifikat u biex teskludi r-riskju tat-tixrid tiegħu;

    (b)

    fejn ikun xieraq, iżżid minnufih l-għadd ta’ nases u l-frekwenza li biha n-nases jiġu kkontrollati f’dik iż-żona;

    (c)

    tintensifika minnufih l-eżamijiet viżwali għall-preżenza tal-adulti, flimkien mal-kampjunar tal-friegħi, jew metodi adattati oħra tad-detezzjoni, li kapaċi jwasslu għad-detezzjoni tal-pest speċifikat qabel ma jitfaċċa;

    (d)

    matul mill-inqas ċiklu wieħed tal-ħajja tal-pest speċifikat flimkien ma’ sena addizzjonali, twettaq stħarriġ ta’ żona b’wisa’ ta’ mill-inqas 1 km madwar il-pjanti infestati, jew il-post fejn ikun instab il-pest speċifikat, regolarment u b’mod intensiv matul il-perjodu tat-titjir tal-pest speċifikat;

    (e)

    tinvestiga l-oriġini tal-pest speċifikat bit-traċċar lura tal-pjanti, tal-injam, tal-qoxra tas-siġar u ta’ oġġetti oħra assoċjati mal-pest speċifikat, u twettaq eżami tagħhom għal kwalunkwe sinjal ta’ infestazzjoni, inkluż il-kampjunar tal-friegħi u l-kampjunar distruttiv immirat;

    (f)

    trawwem sensibilizzazzjoni pubblika dwar it-theddida tal-pest speċifikat; u

    (g)

    tieħu kwalunkwe miżura oħra, li tista’ tgħin l-eradikazzjoni tal-pest speċifikat, filwaqt li tqis l-ISPM Nru 9 (5) u tapplika approċċ integrat f’konformità mal-prinċipji stabbiliti fl-ISPM Nru 14 (6).

    Artikolu 5

    Stħarriġ annwali fiż-żoni demarkati

    Fiż-żoni demarkati, l-awtoritajiet kompetenti għandhom iwettqu stħarriġiet annwali intensivi, kif imsemmi fl-Artikolu 19(1) tar-Regolament (UE) 2016/2031, għad-detezzjoni tal-preżenza tal-pest speċifikat, filwaqt li jqisu l-informazzjoni msemmija fil-karta tal-istħarriġ tal-pesti tal-Awtorità.

    It-tfassil tal-istħarriġ għandu jqis il-Linji Gwida għal stħarriġiet statistikament sodi u bbażati fuq ir-riskju tal-Agrilus planipennis. L-iskema tat-tfassil u tal-kampjunar tal-istħarriġ li tintuża għall-istħarriġiet tad-detezzjoni għandha tkun kapaċi tidentifika livell ta’ preżenza tal-pest speċifikat ta’ 1 %, b’livell ta’ fiduċja ta’ mill-inqas 95 %.

    L-istħarriġiet annwali għandhom jitwettqu f’konformità mal-Artikolu 2(3) u (4) fiż-żoni ta’ lqugħ għad-detezzjoni tal-preżenza tal-pest speċifikat, u fiż-żoni infestati għall-monitoraġġ tal-preżenza tiegħu hemmhekk.

    Artikolu 6

    Tneħħija tad-demarkazzjoni

    Id-demarkazzjoni tista’ titneħħa meta, abbażi tal-istħarriġiet imsemmija fl-Artikolu 5, ma jkunx hemm detezzjoni tal-pest speċifikat fiż-żona demarkata għal mill-inqas 4 snin konsekuttivi.

    Artikolu 7

    Miżuri ta’ eradikazzjoni

    1.   Wara d-demarkazzjoni inizjali taż-żona, u b’mod parallel mal-istħarriġiet tad-delimitazzjoni, l-awtoritajiet kompetenti għandhom jieħdu l-miżuri kollha li ġejjin:

    (a)

    it-tqaċċit minnufih fil-livell tal-art tal-pjanti infestati u tal-pjanti kollha li jkun hemm suspett li jkunu infestati;

    (b)

    it-tqaċċit minnufih fil-livell tal-art tal-pjanti speċifikati kollha f’raġġ ta’ mill-inqas 100 m madwar il-pjanti infestati u eżami bir-reqqa ta’ dawk il-pjanti speċifikati għal kwalunkwe sinjal ta’ infestazzjoni, għajr f’każijiet meta l-pjanti infestati jkunu nstabu barra mill-perjodu tat-titjir tal-pest speċifikat; f’dak il-każ, it-tqaċċit u t-tneħħija tal-pjanti speċifikati għandhom jitwettqu fiż-żmien qabel il-bidu tal-perjodu tat-titjir li jkun imiss;

    (c)

    it-tneħħija, l-eżami u r-rimi b’mod sikur tal-pjanti mqaċċtin f’konformità mal-punti (a) u (b), filwaqt li jittieħdu l-prekawzjonijiet kollha meħtieġa biex jiġi evitat it-tixrid tal-pest speċifikat matul u wara t-tqaċċit;

    (d)

    l-eżami u r-rimi b’mod sikur tal-injam u tal-qoxra tas-siġar assoċjati mal-infestazzjoni, filwaqt li jittieħdu l-prekawzjonijiet kollha meħtieġa biex jiġi evitat it-tixrid tal-pest speċifikat;

    (e)

    il-projbizzjoni ta’ kwalunkwe moviment tal-pjanti speċifikati, tal-injam u tal-qoxra tas-siġar barra miż-żona demarkata;

    (f)

    l-investigazzjoni tal-oriġini tal-infestazzjoni bit-traċċar lura tal-pjanti, tal-injam, tal-qoxra tas-siġar u ta’ oġġetti oħra assoċjati mal-infestazzjoni, u l-eżami tagħhom għal kwalunkwe sinjal ta’ infestazzjoni, inkluż il-kampjunar tal-friegħi u l-kampjunar distruttiv immirat;

    (g)

    is-sostituzzjoni ta’ pjanti speċifikati bi speċijiet oħrajn ta’ pjanti mhux suxxettibbli, fejn xieraq;

    (h)

    il-projbizzjoni tal-preżenza ta’ pjanti speċifikati ġodda fil-beraħ, fiż-żona msemmija fil-punt (b), bl-eċċezzjoni tal-preżenza tas-siġar tal-insib;

    (i)

    f’każ li jintużaw is-siġar tal-insib, dawk għandhom ikunu soġġetti għal spezzjonijiet regolari, u għandhom jinqerdu u jiġu eżaminati qabel il-perjodu tat-titjir li jkun imiss;

    (j)

    it-trawwim tas-sensibilizzazzjoni pubblika dwar it-theddida tal-pest speċifikat u l-miżuri adottati għall-prevenzjoni tal-introduzzjoni u tat-tixrid tiegħu fit-territorju tal-Unjoni, inkluż il-kundizzjonijiet rigward il-moviment tal-pjanti speċifikati, tal-injam u tal-qoxra tas-siġar miż-żona demarkata;

    (k)

    fejn ikun meħtieġ, miżuri speċifiċi li jindirizzaw kwalunkwe partikolarità jew kumplikazzjoni li tista’ tkun mistennija li tipprevjeni, ixxekkel jew iddewwem l-eradikazzjoni, b’mod partikolari dawk relatati mal-aċċessibbiltà u l-eradikazzjoni adegwata tal-pjanti kollha li jkunu infestati jew li jkun hemm suspett li jkunu infestati, irrispettivament mill-post fejn jinsabu, mis-sjieda pubblika jew privata, jew mill-persuna jew mill-entità responsabbli għalihom; u

    (l)

    kwalunkwe miżura oħra li tista’ tikkontribwixxi għall-eradikazzjoni tal-pest speċifikat, f’konformità mal-Istandard Internazzjonali għall-Miżura Fitosanitarja (“ISPM”) Nru 9 u għall-applikazzjoni ta’ approċċ ta’ sistemi f’konformità mal-prinċipji stabbiliti fl-ISPM Nru 14.

    2.   L-awtoritajiet kompetenti jistgħu jiddeċiedu li jestendu r-raġġ imsemmi fil-paragrafu 1, il-punt (b), abbażi tal-informazzjoni dwar id-daqs tal-infestazzjoni, id-densità tal-pjanti speċifikati, kif ukoll l-oriġini u/jew l-età tat-tifqigħa.

    3.   B’deroga mill-paragrafu 1, il-punt (b), meta l-awtorità kompetenti tikkonkludi li t-tqaċċit ma jkunx xieraq għal għadd limitat ta’ pjanti individwali, minħabba l-valur soċjali, kulturali jew ambjentali partikolari tagħhom, dawk il-pjanti individwali għandhom ikunu soġġetti għal eżami individwali kull xahar għal kwalunkwe sinjal ta’ infestazzjoni. F’tali każijiet għandhom jittieħdu miżuri alternattivi għat-tqaċċit li jiżguraw livell għoli ta’ protezzjoni għall-prevenzjoni ta’ kwalunkwe tixrid possibbli tal-pest speċifikat minn dawk il-pjanti.

    Ir-raġunijiet għal tali konklużjoni u l-miżuri meħuda bħala riżultat tagħha għandhom jiġu kkomunikati lill-Kummissjoni fir-rapport skont l-Artikolu 9.

    4.   Jekk ir-riżultati tal-istħarriġ tad-delimitazzjoni msemmi fl-Artikolu 3(2) juru sejba oħra tal-pest speċifikat, l-awtorità kompetenti għandha tapplika l-miżuri kollha msemmija fil-paragrafu 1 u għandha tkompli bl-istħarriġ tad-delimitazzjoni.

    Artikolu 8

    Pjanijiet ta’ kontinġenza

    1.   Flimkien mal-elementi elenkati fl-Artikolu 25(2) tar-Regolament (UE) 2016/2031, l-Istati Membri għandhom jipprevedu dawn li ġejjin fil-pjanijiet ta’ kontinġenza tagħhom:

    (a)

    l-azzjonijiet għall-eradikazzjoni tal-pest speċifikat, kif stabbilit fl-Artikolu 7;

    (b)

    il-miżuri ta’ prekawzjoni relatati mal-movimenti tal-pjanti speċifikati, tal-injam u tal-qoxra tas-siġar fit-territorju tal-Unjoni, kif stabbilit fl-Anness VIII tar-Regolament ta’ Implimentazzjoni tal-Kummissjoni (UE) 2019/2072 (7);

    (c)

    l-ispezzjonijiet uffiċjali li għandhom jitwettqu fuq il-movimenti tal-pjanti speċifikati, tal-injam u tal-qoxra tas-siġar fit-territorju tal-Unjoni;

    (d)

    ir-riżorsi minimi li għandhom ikunu disponibbli, u l-proċeduri biex dawk ir-riżorsi addizzjonali jsiru disponibbli, f’każ ta’ preżenza kkonfermata jew issuspettata tal-pest speċifikat;

    (e)

    il-proċeduri għall-identifikazzjoni tas-sidien tal-pjanti, tal-injam u tal-qoxra tas-siġar li għandhom jinqerdu, għan-notifika tal-ordni tat-tneħħija u għall-aċċess tal-proprjetajiet privati.

    2.   L-Istati Membri għandhom jaġġornaw il-pjanijiet ta’ kontinġenza tagħhom, kif ikun xieraq, sal-31 ta’ Diċembru ta’ kull sena.

    Artikolu 9

    Rapportar annwali

    Skont l-Artikoli 2 sa 8, sat-30 ta’ April ta’ kull sena, l-Istati Membri għandhom jippreżentaw rapport dwar il-miżuri meħuda matul is-sena kalendarja preċedenti u dwar ir-riżultati tagħhom lill-Kummissjoni u lill-Istati Membri l-oħra.

    Ir-riżultati tal-istħarriġiet imwettqa skont l-Artikolu 5 għandhom jiġu ppreżentati lill-Kummissjoni bl-użu tal-mudell imsemmi fl-Anness.

    Artikolu 10

    Dħul fis-seħħ

    Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

    L-Artikolu 2(2) għandu japplika mill-1 ta’ Jannar 2027.

    Dan ir-Regolament għandu jorbot fl-intier tiegħu u japplika direttament fl-Istati Membri kollha.

    Magħmul fi Brussell, il-5 ta’ Frar 2024.

    Għall-Kummissjoni

    Il-President

    Ursula VON DER LEYEN

    (1)   ĠU L 317, 23.11.2016, p. 4.

    (2)  Ir-Regolament Delegat tal-Kummissjoni (UE) 2019/1702 tal-1 ta’ Awwissu 2019 li jissupplimenta r-Regolament (UE) 2016/2031 tal-Parlament Ewropew u tal-Kunsill billi jistabbilixxi l-lista ta’ pesti ta’ prijorità (ĠU L 260, 11.10.2019, p. 8).

    (3)  L-EFSA, Guidelines for statistically sound and risk-based surveys of Agrilus planipennis (Linji gwida għal stħarriġiet statistikament sodi u bbażati fuq ir-riskju tal-Agrilus planipennis), is-17 ta’ Diċembru 2020, https://doi.org/10.2903/sp.efsa.2020.EN-1983.

    (4)  L-EFSA (l-Awtorità Ewropea dwar is-Sigurtà fl-Ikel), 2020. Story map for survey of Agrilus planipennis (Mappa tal-istorja għall-istħarriġ dwar l-Agrilus planipennis). Pubblikazzjoni ta’ sostenn tal-EFSA tal-2020: EN-1945. https://arcg.is/09S94u.

    (5)  Guidelines for pest eradication programmes — Reference Standard ISPM No 9 by the Secretariat of the International Plant Protection Convention (Linji gwida għal programmi ta’ eradikazzjoni tal-pesti — Standard Referenzjali tal-ISPM Nru 9 tas-Segretarjat tal-Konvenzjoni Internazzjonali għall-Protezzjoni tal-Pjanti), Ruma. https://www.fao.org/3/x2981e/x2981e.pdf.

    (6)  The use of integrated measures in a systems approach for pest risk management — Reference Standard ISPM No 14 by the Secretariat of the International Plant Protection Convention (L-użu ta’ miżuri integrati f’approċċ ta’ sistemi għall-ġestjoni tar-riskju ta’ pesti — Standard Referenzjali tal-ISPM Nru 14 tas-Segretarjat tal-Konvenzjoni Internazzjonali għall-Protezzjoni tal-Pjanti), Ruma. https://www.ippc.int/en/publications/607/

    (7)  Ir-Regolament ta’ Implimentazzjoni tal-Kummissjoni (UE) 2019/2072 tat-28 ta’ Novembru 2019 li jistabbilixxi l-kundizzjonijiet uniformi għall-implimentazzjoni tar-Regolament (UE) 2016/2031 tal-Parlament Ewropew u tal-Kunsill rigward il-miżuri protettivi kontra l-pesti tal-pjanti, u li jħassar ir-Regolament tal-Kummissjoni (KE) Nru 690/2008 u jemenda r-Regolament ta’ Implimentazzjoni tal-Kummissjoni (UE) 2018/2019 (ĠU L 319, 10.12.2019, p. 1).

    ANNESS

    1.   Mudell għar-rapportar tar-riżultati tal-istħarriġiet annwali fiż-żoni demarkati, bl-użu ta’ approċċ ibbażat fuq l-istatistika

    1.

    Deskrizzjoni taż-Żona Demarkata (ŻD)

    2.

    Daqs inizjali taż-ŻD (ettari)

    3.

    Daqs aġġornat taż-ŻD (ettari)

    4.

    Approċċ

    5.

    Żona

    6.

    Siti ta’ stħarriġ

    7.

    Twaqqit

    A.

    Definizzjoni tal-istħarriġ (parametri tal-input għal RiBESS+)

    B.

    Sforz tal-kampjunar

    C.

    Riżultati tal-istħarriġ

    25.

    Kummenti

    8.

    Popolazzjoni fil-mira

    9.

    Unitajiet epidemjoloġiċi

    10.

    Metodi tad-detezzjoni

    11.

    Effettività tal-kampjunar

    12.

    Sensittività tal-metodu

    13.

    Fatturi ta’ riskju (attivitajiet, postijiet u żoni)

    14.

    Nru ta’ unitajiet epidemjoloġiċi spezzjonati

    15.

    Nru ta’ eżamijiet viżwali

    16.

    Nru ta’ kampjuni

    17.

    Nru ta’ nases

    18.

    Nru ta’ siti tal-insib

    19.

    Nru ta’ testijiet

    20.

    Nru ta’ miżuri oħra

    21.

    Riżultati

    22.

    Numru tan-notifika tat-tifqigħat innotifikati, kif ikun applikabbli, f’konformità mar-Regolament ta’ Implimentazzjoni (UE) 2019/1715

    23

    Livell ta’ fiduċja miksub

    24.

    Prevalenza tat-tfassil

    Isem

    Data tal-istabbiliment

    Deskrizzjoni

    Numru

    Speċijiet ospitanti

    Żona (ettari jew unità oħra iktar rilevanti)

    Unitajiet tal-ispezzjoni

    Deskrizzjoni

    Unitajiet

    Testijiet viżwali

    Insib

    Ittestjar

    Metodi oħra

    Fattur ta’ riskju

    Livelli ta’ riskju

    Nru ta’ postijiet

    Riskji relattivi

    Proporzjon tal-popolazzjoni ospitanti

    Pożittiv

    Negattiv

    Mhux determinat

    Numru

    Data

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

     

    2.   Struzzjonijiet dwar kif timla l-mudell

    Spjega s-suppożizzjonijiet sottostanti għat-tfassil tal-istħarriġ għal kull pest. Iġbor fil-qosor u ġġustifika:

    —

    il-popolazzjoni fil-mira, l-unità epidemjoloġika u l-unitajiet tal-ispezzjoni;

    —

    il-metodu tad-detezzjoni u s-sensittività tal-metodu;

    —

    il-fattur(i) ta’ riskju, u indika l-livelli ta’ riskju u r-riskji u l-proporzjonijiet relattivi korrispondenti tal-popolazzjoni tal-pjanti ospitanti.

    Għall-kolonna 1:

    Indika l-isem taż-żona ġeografika, in-numru tat-tifqigħa jew kwalunkwe informazzjoni li tippermetti l-identifikazzjoni ta’ din iż-żona demarkata (ŻD) u d-data meta ġiet stabbilita.

    Għall-kolonna 2:

    Indika d-daqs taż-ŻD qabel il-bidu tal-istħarriġ.

    Għall-kolonna 3:

    Indika d-daqs taż-ŻD wara l-istħarriġ.

    Għall-kolonna 4:

    Indika l-approċċ: Eradikazzjoni jew Trażżin. Jekk jogħġbok inkludi r-ringieli kollha li hemm bżonn, skont in-numru ta’ ŻD għal kull pest u l-approċċi li dawn iż-żoni jkunu soġġetti għalihom.

    Għall-kolonna 5:

    Indika ż-żona taż-ŻD fejn twettaq l-istħarriġ, u inkludi r-ringieli kollha li hemm bżonn: Żona infestata (ŻI) jew żona ta’ lqugħ (ŻL) billi tuża ringieli separati. Meta applikabbli, indika l-erja taż-ŻI fejn twettaq l-istħarriġ (eż. l-aħħar 20 km ħdejn iż-ŻL, madwar il-mixtliet, eċċ.) f’ringieli differenti.

    Għall-kolonna 6:

    Indika n-numru u d-deskrizzjoni tas-siti ta’ stħarriġ, billi tagħżel waħda mill-entrati li ġejjin għad-deskrizzjoni:

    1.

    Fil-beraħ (żona tal-produzzjoni): 1.1 għalqa (li tista’ tinħadem, mergħa); 1.2. għalqa bis-siġar tal-frott/vinja; 1.3. mixtla; 1.4. foresta;

    2.

    Fil-beraħ (oħrajn): 2.1. ġonna privati; 2.2. siti pubbliċi; 2.3. żona ta’ konservazzjoni; 2.4. pjanti selvaġġi f’żoni għajr żoni ta’ konservazzjoni; 2.5. oħrajn, bi speċifikazzjoni tal-każ partikolari (eż. ċentru tal-ġonna, siti kummerċjali li jużaw materjal tal-imballaġġ magħmul mill-injam, industrija tal-injam, artijiet mistagħdra, network tal-irrigazzjoni u tad-drenaġġ, eċċ.);

    3.

    Kundizzjonijiet magħluqa fiżikament: 3.1. serra; 3.2. sit privat, għajr serra; 3.3. sit pubbliku, għajr serra; 3.4. oħrajn, bi speċifikazzjoni tal-każ partikolari (eż. ċentru tal-ġonna, siti kummerċjali li jużaw materjal tal-imballaġġ magħmul mill-injam, industrija tal-injam).

    Għall-kolonna 7:

    Indika x-xhur tas-sena meta twettqu l-istħarriġiet.

    Għall-kolonna 8:

    Indika l-popolazzjoni fil-mira magħżula billi tipprovdi kif ikun xieraq il-lista tal-ispeċijiet/ġeneri ospitanti u ż-żona koperta. Il-popolazzjoni fil-mira hija definita bħala l-ġabra ta’ unitajiet tal-ispezzjoni. Id-daqs tagħha huwa definit tipikament għal żoni agrikoli bl-ettari, iżda jista’ jkun lottijiet, għelieqi, serer, eċċ. Jekk jogħġbok iġġustifika l-għażla li saret fis-suppożizzjonijiet sottostanti. Indika l-unitajiet tal-ispezzjoni li ġew mistħarrġa. “Unità tal-ispezzjoni” tfisser pjanti, partijiet ta’ pjanti, prodotti bażiċi, materjali, vetturi ta’ pesti li ġew eżaminati bir-reqqa għall-identifikazzjoni u għad-detezzjoni tal-pesti.

    Għall-kolonna 9:

    Indika l-unitajiet epidemjoloġiċi mistħarrġa, filwaqt li tindika d-deskrizzjoni u l-unità ta’ kejl tagħhom. “Unità epidemjoloġika” tfisser żona omoġenja fejn l-interazzjonijiet bejn il-pest, il-pjanti ospitanti u l-fatturi u l-kundizzjonijiet abijotiċi u bijotiċi jirriżultaw fl-istess epidemjoloġija, jekk il-pest ikun preżenti. L-unitajiet epidemjoloġiċi huma suddiviżjoni tal-popolazzjoni fil-mira li tkun omoġenja f’termini tal-epidemjoloġija b’mill-inqas pjanta ospitanti waħda. F’xi każijiet il-popolazzjoni ospitanti kollha f’reġjun/żona/pajjiż tista’ tiġi definita bħala unità epidemjoloġika. Dawn jistgħu jkunu reġjuni tal-klassifikazzjoni komuni ta’ unitajiet territorjali għall-istatistika (NUTS), żoni urbani, foresti, ġonna tal-ward jew irziezet, jew ettari. L-għażla tal-unitajiet epidemjoloġiċi għandha tiġi ġġustifikata fis-suppożizzjonijiet sottostanti.

    Għall-kolonna 10:

    Indika l-metodi li ntużaw matul l-istħarriġ inkluż in-numru ta’ attivitajiet f’kull każ, skont ir-rekwiżiti legali speċifiċi ta’ kull pest. Indika M/D meta l-informazzjoni għal ċerta kolonna ma tkunx disponibbli.

    Għall-kolonna 11:

    Indika stima tal-effettività tal-kampjunar. L-effettività tal-kampjunar tfisser il-probabbiltà li jintgħażlu partijiet ta’ pjanti infettati minn pjanta infettata. Għall-vetturi, hija l-effettività tal-metodu li jinqabad vettur pożittiv meta jkun preżenti fiż-żona ta’ stħarriġ. Għall-ħamrija, hija l-effettività tal-għażla ta’ kampjun tal-ħamrija li jkun fih il-pest meta l-pest ikun preżenti fiż-żona ta’ stħarriġ.

    Għall-kolonna 12:

    “Sensittività tal-metodu” tfisser il-probabbiltà li metodu jwassal għad-detezzjoni korretta tal-preżenza ta’ pest. Is-sensittività tal-metodu hija definita bħala l-probabbiltà li pjanti ospitanti tassew pożittivi jirriżultaw pożittivi meta jiġu ttestjati. Hija l-multiplikazzjoni tal-effettività tal-kampjunar (jiġifieri l-probabbiltà li jintgħażlu partijiet tal-pjanti infettati minn pjanta infettata) mis-sensittività dijanjostika (ikkaratterizzata mill-ispezzjoni viżwali u/jew it-test tal-laboratorju li jintuża fil-proċess tal-identifikazzjoni).

    Għall-kolonna 13:

    Ipprovdi l-fatturi ta’ riskju f’kolonni differenti, billi tuża r-ringieli kollha li hemm bżonn. Għal kull fattur ta’ riskju indika l-livell ta’ riskju u r-riskju u l-proporzjon relattivi korrispondenti tal-popolazzjoni ospitanti.

    Għall-kolonna B:

    Indika d-dettalji tal-istħarriġ, skont ir-rekwiżiti legali speċifiċi għal kull pest. Indika M/A meta l-informazzjoni ta’ ċerta kolonna ma tkunx applikabbli. L-informazzjoni li għandha tiġi pprovduta f’dawn il-kolonni hija relatata mal-informazzjoni inkluża fil-kolonna 10 “Metodi tad-detezzjoni”.

    Għall-kolonna 18:

    Indika n-numru ta’ siti tal-insib f’każ li dan in-numru jkun differenti min-numru ta’ nases (il-kolonna 17) (eż. l-istess nassa tintuża f’postijiet differenti).

    Għall-kolonna 21:

    Indika n-numru ta’ kampjuni li nstabu pożittivi, negattivi jew mhux determinati. “Mhux determinati” huma dawk il-kampjuni analizzati li għalihom ma nkiseb l-ebda riżultat minħabba fatturi differenti (eż. taħt il-livell tad-detezzjoni, kampjun mhux ipproċessat mhux identifikat, antik).

    Għall-kolonna 22:

    Indika n-notifiki tat-tifqigħat tas-sena meta twettaq l-istħarriġ. In-numru tan-notifika tat-tifqigħat ma hemmx għalfejn jiġi inkluż meta l-awtorità kompetenti tkun iddeċidiet li s-sejba hija waħda mill-każijiet imsemmija fl-Artikolu 14(2), fl-Artikolu 15(2) jew fl-Artikolu 16 tar-Regolament (UE) 2016/2031. F’dan il-każ, indika r-raġuni għaliex ma pprovdejtx din l-informazzjoni fil-kolonna 25 (“Kummenti”).

    Għall-kolonna 23:

    Indika s-sensittività tal-istħarriġ, kif definit fl-Istandard Internazzjonali għall-Miżura Fitosanitarja (ISPM) Nru 31. Dan il-valur tal-livell ta’ fiduċja miksub tal-ħelsien mill-pesti jiġi kkalkulat abbażi tal-eżamijiet (u/jew il-kampjuni) imwettqa minħabba s-sensittività tal-metodu u l-prevalenza tat-tfassil.

    Għall-kolonna 24:

    Indika l-prevalenza tat-tfassil ibbażata fuq stima ta’ qabel l-istħarriġ tal-probabbiltà ta’ prevalenza reali tal-pest fl-għalqa. Il-prevalenza tat-tfassil tiġi stabbilita bħala għan tal-istħarriġ u tikkorrispondi mal-kompromess li jagħmlu l-maniġers tar-riskju bejn ir-riskju li jkollhom il-pest u r-riżorsi disponibbli għall-istħarriġ. Tipikament, għal stħarriġ tad-detezzjoni jiġi stabbilit valur ta’ 1 %.

    ELI: http://data.europa.eu/eli/reg_impl/2024/434/oj

    ISSN 1977-074X (electronic edition)

    Top