(1)

L-ottimizzar u l-iffaċilitar tal-aċċess għal informazzjoni finanzjarja huwa meħtieġ għall-prevenzjoni, l-iskoperta, l-investigazzjoni u l-prosekuzzjoni ta’ reati serji, inkluż it-terroriżmu. B’mod partikolari, l-aċċess rapidu għall-informazzjoni finanzjarja huwa essenzjali għat-twettiq ta’ investigazzjonijiet kriminali effettivi u għat-traċċar b’suċċess u l-konfiska sussegwenti ta’ mezzi strumentali u rikavat tal-kriminalità, b’mod partikolari bħala parti minn investigazzjonijiet dwar il-kriminalità organizzata u ċ-ċiberkriminalità.

(2)

Id-Direttiva (UE) 2019/1153 tal-Parlament Ewropew u tal-Kunsill (2) tippermetti lill-awtoritajiet nnominati mill-Istati Membri fost l-awtoritajiet kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali biex jaċċessaw u jfittxu, soġġett għal ċerti salvagwardji u limitazzjonijiet, informazzjoni dwar il-kontijiet bankarji. Id-Direttiva (UE) 2019/1153 tiddefinixxi l-informazzjoni dwar il-kontijiet bankarji bħala ċerta informazzjoni li tinsab fil-mekkaniżmi awtomatizzati ċentralizzati li l-Istati Membri jistabbilixxu skont id-Direttiva (UE) 2015/849 tal-Parlament Ewropew u tal-Kunsill (3). Tali mekkaniżmi awtomatizzati ċentralizzati huma msemmija fid-Direttiva (UE) 2019/1153 bħala reġistri ċentrali tal-kontijiet bankarji.

(3)

L-awtoritajiet kompetenti nnominati skont id-Direttiva (UE) 2019/1153 għandhom jinkludu tal-inqas l-Uffiċċji għall-Irkupru tal-Assi u jistgħu jinkludu wkoll awtoritajiet tat-taxxa u aġenziji kontra l-korruzzjoni sal-punt li huma kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali skont il-liġi nazzjonali. Skont dik id-Direttiva, dawk l-awtoritajiet kompetenti għandhom is-setgħa li jaċċessaw direttament u jfittxu biss ir-reġistru ċentrali tal-kontijiet bankarji tal-Istat Membru li jkun innominahom.

(4)

Id-Direttiva (UE) 2024/1640 tal-Parlament Ewropew u tal-Kunsill (4), li tissostitwixxi d-Direttiva (UE) 2015/849 u żżomm il-karatteristiċi ewlenin tas-sistema stabbilita minn dik id-Direttiva, tipprevedi, barra minn hekk, li l-mekkaniżmi awtomatizzati ċentralizzati huma interkonnessi permezz ta’ sistema ta’ interkonnessjoni għar-reġistri tal-kontijiet bankarji (BARIS), li għandha tiġi żviluppata u operata mill-Kummissjoni. Madankollu, skont id-Direttiva (UE) 2024/1640, l-Unitajiet tal-Intelligence Finanzjarja (“FIUs”) biss għad għandhom aċċess dirett għall-mekkaniżmi awtomatizzati ċentralizzati, inkluż permezz tal-BARIS.

(5)

Meta titqies in-natura transfruntiera tal-kriminalità organizzata, tal-finanzjament tat-terroriżmu u tal-ħasil tal-flus, kif ukoll l-importanza ta’ informazzjoni finanzjarja rilevanti għall-finijiet tal-ġlieda kontra r-reati kriminali serji, inkluż, fejn possibbli u xieraq, permezz tal-intraċċar, l-iffriżar u l-konfiska malajr ta’ assi miksuba illegalment, l-awtoritajiet kompetenti nnominati skont id-Direttiva (UE) 2019/1153 jenħtieġ li jkunu jistgħu jaċċedu għal u jfittxu direttament ir-reġistri ċentrali tal-kontijiet tal-bank ta’ Stati Membri oħra permezz tal-BARIS.

(6)

Is-salvagwardji u l-limitazzjonijiet diġà stabbiliti mid-Direttiva (UE) 2019/1153 jenħtieġ li japplikaw ukoll għas-setgħa tal-aċċess u t-tiftix ta’ informazzjoni dwar il-kontijiet tal-bank permezz tal-BARIS. Dawk is-salvagwardji u l-limitazzjonijiet jikkonċernaw liema awtoritajiet ikollhom is-setgħa li jaċċessaw u jfittxu informazzjoni dwar il-kontijiet tal-bank, l-iskopijiet li għalihom jistgħu jitwettqu l-aċċess u t-tiftix, it-tipi ta’ informazzjoni li huma aċċessibbli u li jistgħu jiġu mfittxija, skont il-prinċipju ta’ minimizzazzjoni tad-data, ir-rekwiżiti applikabbli għall-persunal tal-awtoritajiet kompetenti nnominati skont id-Direttiva (UE) 2019/1153, is-sigurtà tad-data u r-reġistrazzjoni tal-aċċess u t-tiftix.

(7)

L-aċċess transfruntier mill-awtoritajiet kompetenti nnominati skont id-Direttiva (UE) 2019/1153 għall-informazzjoni dwar il-kontijiet bankarji permezz tal-BARIS huwa bbażat fuq il-fiduċja reċiproka fost l-Istati Membri dderivata mir-rispett tagħhom tad-drittijiet fundamentali u tal-prinċipji rikonoxxuti mill-Artikolu 6 tat-Trattat dwar l-Unjoni Ewropea (TUE) u mill-Karta tad-Drittijiet Fundamentali tal-Unjoni Ewropea (“il-Karta”), bħad-dritt għar-rispett għall-ħajja privata u għall-ħajja tal-familja, id-dritt għall-protezzjoni tad-data personali, u d-drittijiet proċedurali, inkluż id-dritt għal rimedju effettiv u għal proċess imparzjali, il-preżunzjoni ta’ innoċenza u d-dritt għad-difiża u l-prinċipji ta’ legalità u l-proporzjonalità ta’ reati kriminali u ta’ pieni, kif ukoll id-drittijiet fundamentali u l-prinċipji previsti fil-liġi internazzjonali u ftehimiet internazzjonali li għalihom l-Unjoni jew l-Istati Membri kollha huma partijiet, inkluż il-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali, u fil-kostituzzjonijiet tal-Istati Membri, fl-oqsma ta’ applikazzjoni rispettivi tagħhom.

(8)

Ir-rekords tat-tranżazzjonijiet jipprovdu informazzjoni kruċjali għall-investigazzjonijiet kriminali. Madankollu, l-investigazzjonijiet finanzjarji huma mxekkla mill-fatt li l-istituzzjonijiet finanzjarji u l-istituzzjonijiet ta’ kreditu, inklużi l-fornituri ta’ servizzi tal-kriptoassi, jipprovdu lill-awtoritajiet kompetenti għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali b’rekords tat-tranżazzjonijiet f’formati differenti, li mhumiex immedjatament lesti għall-analiżi. In-natura transfruntiera tal-biċċa l-kbira tal-investigazzjonijiet dwar reati kriminali serji, id-disparità tal-formati użati biex jiġu pprovduti rekords tat-tranżazzjonijiet u d-diffikultajiet fl-ipproċessar tar-rekords tat-tranżazzjonijiet ifixklu l-iskambju ta’ informazzjoni fost l-awtoritajiet kompetenti tal-Istati Membri u l-iżvilupp ta’ investigazzjonijiet finanzjarji transfruntiera. Sabiex tittejjeb il-kapaċità tal-awtoritajiet kompetenti li jwettqu investigazzjonijiet finanzjarji, din id-Direttiva tistabbilixxi miżuri li jiżguraw li l-istituzzjonijiet finanzjarji u l-istituzzjonijiet ta’ kreditu madwar l-Unjoni, inklużi l-fornituri ta’ servizzi tal-kriptoassi, jipprovdu rekords tat-tranżazzjonijiet f’format li jkun faċli għall-awtoritajiet kompetenti biex jipproċessa u janalizza.

(9)

Il-kundizzjonijiet u l-proċeduri li skont liema l-awtoritajiet kompetenti jistgħu jitolbu rekords tat-tranżazzjonijiet minn istituzzjonijiet finanzjarji u istituzzjonijiet ta’ kreditu huma rregolati minn regoli proċedurali stabbiliti mil-liġi nazzjonali. L-armonizzazzjoni tal-arranġamenti tekniċi għall-forniment ta’ rekords tat-tranżazzjonijiet minn istituzzjonijiet finanzjarji u istituzzjonijiet ta’ kreditu fuq talba tal-awtoritajiet kompetenti jenħtieġ li ma taffettwax ir-regoli u s-salvagwardji proċedurali nazzjonali skont liema l-awtoritajiet kompetenti jistgħu jitolbu rekords tat-tranżazzjonijiet.

(10)

Sabiex ikunu żgurati kundizzjonijiet uniformi għall-forniment tar-rekords ta’ tranżazzjonijiet minn istituzjonijiet finanzjarji u istituzzjonijiet ta’ kreditu lill-awtoritajiet kompetenti, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (5).

(11)

Meta jimplimentaw din id-Direttiva, l-Istati Membri jenħtieġ li jqisu n-natura, l-istatus organizzattiv, ir-rwol u l-prerogattivi tal-awtoritajiet u tal-korpi stabbiliti taħt il-liġi nazzjonali bħala responsabbli għall-prevenzjoni, l-identifikazzjoni, l-investigazzjoni jew il-prosekuzzjoni ta’ reati kriminali, inklużi l-mekkaniżmi eżistenti għall-protezzjoni tas-sistemi finanzjarji kontra l-ħasil tal-flus u l-finanzjament tat-terroriżmu.

(12)

Kwalunkwe pproċessar ta’ data personali mill-awtoritajiet kompetenti skont din id-Direttiva huwa soġġett għad-Direttiva (UE) 2016/680 tal-Parlament Ewropew u tal-Kunsill (6), li tistabbilixxi r-regoli relatati mal-protezzjoni ta’ persuni fiżiċi fir-rigward tal-ipproċessar ta’ data personali mill-awtoritajiet kompetenti għall-finijiet tal-prevenzjoni, l-investigazzjoni, l-identifikazzjoni jew il-prosekuzzjoni ta’ reati kriminali jew l-eżekuzzjoni ta’ pieni kriminali, f’konformità ma’ sett ta’ prinċipji relatati mal-ipproċessar ta’ data personali, b’mod partikolari l-legalità, il-ġustizzja u t-trasparenza, il-limitazzjoni tal-iskop, il-minimizzazzjoni tad-data, il-preċiżjoni, il-limitazzjoni tal-ħżin, l-integrità u l-kunfidenzjalità, u r-responsabbiltà. Din id-Direttiva tirrispetta d-drittijiet fundamentali u tosserva l-prinċipji rikonoxxuti mill-Artikolu 6 tat-TUE u mill-Karta, b’mod partikolari d-dritt għar-rispett tal-ħajja privata u tal-familja u d-dritt għall-protezzjoni tad-data personali.

(13)

Minħabba li l-objettivi ta’ din id-Direttiva, jiġifieri li tingħata s-setgħa lill-awtoritajiet kompetenti nnominati skont id-Direttiva (UE) 2019/1153 biex jaċċessaw u jfittxu r-reġistri ċentralizzati tal-kontijiet tal-bank ta’ Stati Membri oħra permezz tal-BARIS u biex jiġi ffaċilitat l-użu ta’ rekords ta’ tranżazzjonijiet mill-awtoritajiet kompetenti għall-prevenzjoni, l-identifikazzjoni jew il-prosekuzzjoni ta’ reati kriminali serji, ma jistgħux jinkisbu b’mod suffiċjenti mill-Istati Membri, iżda jistgħu pjuttost, minħabba l-iskala u l-effetti ta’ din id-Direttiva, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-TUE. F’konformità mal-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-objettivi.

(14)

F’konformità mal-Artikolu 3 u mal-Artikolu 4a(1) tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-TUE u mat-Trattat dwar il-Funzjonament tal-Unjoni Ewropea (TFUE), l-Irlanda nnotifikat, permezz ta’ ittra datata 25 ta’ Ottubru 2021, ix-xewqa tagħha li tieħu sehem fl-adozzjoni u fl-applikazzjoni ta’ din id-Direttiva.

(15)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhix qed tieħu sehem fl-adozzjoni ta’ din id-Direttiva u mhix marbuta biha jew suġġetta għall-applikazzjoni tagħha.

(16)

Id-Direttiva (UE) 2019/1153 għalhekk jenħtieġ li tiġi emendata skont dan.

(17)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (7) u ppreżenta l-kummenti tiegħu tas-6 ta’ Settembru 2021,

(1)

L-Artikolu 1 huwa emendat kif ġej:

(2)

L-Artikolu 2 huwa emendat kif ġej:

(3)

it-titolu tal-Kapitolu II huwa sostitwit b’dan li ġej:

“AĊĊESS MILL-AWTORITAJIET KOMPETENTI GĦALL-INFORMAZZJONI DWAR IL-KONTIJIET BANKARJI U L-FORMAT TAR-REKORDS TAT-TRANŻAZZJONIJIET”

(4)

fl-Artikolu 4, jiddaħħlu l-paragrafi li ġejjin:

(5)

L-Artikolu 5 huwa emendat kif ġej:

(6)

fl-Artikolu 6(1), l-ewwel sentenza hija sostitwita b’dan li ġej:

(7)

jiddaħħal l-Artikolu li ġej fil-Kapitolu II:

(8)

fl-Artikolu 12, jiżdied il-paragrafu li ġej:

(*6)  Ir-Regolament (UE) 2024/1620 tal-Parlament Ewropew u tal-Kunsill tal-31 ta’ Mejju 2024 li jistabbilixxi l-Awtorità għall-Ġlieda Kontra l-Ħasil tal-Flus u l-Finanzjament tat-Terroriżmu u li jemenda r-Regolamenti (UE) Nru 1093/2010, (UE) Nru 1094/2010 u (UE) Nru 1095/2010 (ĠU L, 2024/1620, 19.6.2024, ELI: http://data.europa.eu/eli/reg/2024/1620/oj).”;"

(9)

fl-Artikolu 22, jiżdied il-paragrafu li ġej: