(1)

In-nikil huwa komponent mifrux tal-qoxra tad-Dinja u jinsab kullimkien fil-bijosfera. Il-preżenza tiegħu fl-ikel tista’ tirriżulta kemm minn sorsi naturali kif ukoll minn sorsi antropoġeniċi.

(2)

Fl-2015, l-Awtorità Ewropea dwar is-Sigurtà fl-Ikel (“l-Awtorità”) adottat l-opinjoni xjentifika tagħha dwar ir-riskji għas-saħħa pubblika relatati mal-preżenza tan-nikil fl-ikel u fl-ilma tax-xorb (1). L-opinjoni identifikat it-tossiċità riproduttiva u tal-iżvilupp bħala l-effett kritiku għall-karatterizzazzjoni tar-riskju tal-esponiment orali kroniku għan-nikil. F’persuni sensittivi għan-nikil instab li esponiment orali akut għan-nikil iwassal, bħala effett kritiku, għal reazzjonijiet ta’ intensifikazzjoni tal-ekżema u għal reazzjonijiet allerġiċi li jmorru għall-agħar.

(3)

Id-data relatata mal-okkorrenza tan-nikil fl-ikel u fl-ilma tax-xorb kienet disponibbli fi 15-il Stat Membru tal-Unjoni. Madankollu, minħabba l-fatt li 80 % tad-data kollha miġbura nġabret fi Stat Membru wieħed, l-Awtorità kkonkludiet li se jkun meħtieġ sett ta’ data ġeografikament iktar diversifikat għall-verifika tal-okkorrenza tan-nikil fl-ikel madwar l-Unjoni.

(4)

Sabiex tinġabar aktar data dwar l-okkorrenzi għan-nikil fl-ikel, permezz tar-Rakkomandazzjoni tal-Kummissjoni (UE) 2016/1111 (2), l-Istati Membri ġew rakkomandati jwettqu monitoraġġ dwar il-preżenza tan-nikil fl-ikel fl-2016, fl-2017 u fl-2018.

(5)

Filwaqt li qieset din id-data ġdida dwar l-okkorrenzi kif ukoll informazzjoni xjentifika ġdida, fl-24 ta’ Settembru 2020 l-Awtorità adottat aġġornament tal-valutazzjoni tar-riskju tan-nikil fl-ikel u fl-ilma tax-xorb (3).

(6)

L-Awtorità kkonkludiet li n-nikil jista’ jikkawża effetti kemm kroniċi kif ukoll akuti. Abbażi tal-effett kroniku kritiku tat-telf tat-tqala, ġiet stabbilita doża tollerabbli ta’ kuljum (TDI) ta’ 13 μg/kg ta’ piż tal-ġisem u l-Awtorità kkonkludiet li din it-TDI nqabżet fit-trabi li telqu jimxu, fit-tfal ta’ bejn is-36 xahar u l-10 snin kif ukoll, f’xi każijiet, fit-trabi. Għalkemm it-telf tat-tqala mhuwiex effett rilevanti għall-gruppi ta’ età żgħira, it-TDI hija wkoll protettiva għal effetti oħra li huma rilevanti għall-gruppi ta’ età iżgħar, bħall-effetti newrotossiċi. Għalhekk, l-Awtorità kkonkludiet li meta jinqabeż it-TDI jistgħu jqumu dubji jekk dan jaffettwax is-saħħa ta’ dawn il-gruppi ta’ età żgħira wkoll. L-awtorità kkonfermat li l-effetti akuti kritiċi huma reazzjonijiet ta’ intensifikazzjoni tal-ekżema fil-ġilda li jseħħu fi bnedmin sensitizzati għan-nikil, xi ħaġa li tolqot madwar 15 % tal-popolazzjoni. L-Awtorità kkonkludiet li l-inqas livell ta’ effett avvers osservat għal dan l-effett huwa 4,3 μg ta’ nikil/kg bw u li huwa meħtieġ marġni ta’ esponiment (MOE) ta’ 30 jew aktar bħala protezzjoni kontra dan l-effett. Dan l-MOE ta’ 30 ma jintlaħaqx fl-esponiment medju u tal-95 perċentil, u dan iqajjem tħassib dwar is-saħħa għall-individwi sensitizzati għan-nikil.

(7)

Filwaqt li tqieset id-data disponibbli dwar l-okkorrenzi, ġew stabbiliti livelli massimi għan-nikil f’diversi oġġetti tal-ikel fir-Regolament tal-Kummissjoni (UE) 2023/915 (4).

(8)

Madankollu, għal xi tipi ta’ ikel, li huma kontributuri rilevanti għall-esponiment għan-nikil, ma kienx hemm biżżejjed data disponibbli dwar l-okkorrenzi biex ikunu jistgħu jiġu ddeterminati l-livelli massimi xierqa. Għalhekk, għandha tinġabar aktar data dwar l-okkorrenzi għal dawk it-tipi ta’ ikel. B’mod partikolari, sabiex jiġi stabbilit il-kontribut ta’ speċijiet differenti ta’ ħut u frott tal-baħar ieħor għall-kontenut tan-nikil fl-ikel tat-trabi, il-ħut u l-frott tal-baħar ieħor użat għall-manifattura ta’ tali ikel għandu jiġi mmonitorjat.

(9)

Sabiex jiġi żgurat li l-kampjuni jkunu rappreżentattivi tal-lott li ttieħed kampjun minnu u li r-riżultati analitiċi jkunu affidabbli u komparabbli, għandu jiġi segwit ir-Regolament tal-Kummissjoni (KE) Nru 333/2007 (5),