(1)

F’konformità mal-Artikolu 50 tar-Regolament (UE) Nru 1151/2012, il-Kummissjoni eżaminat l-applikazzjoni għar-reġistrazzjoni tal-isem “Сонгоύогогтвортнооолύand Mongol Togtvortoi Nooluur” bħala Indikazzjoni Ġeografika Protetta (PGI-MN-02885), imressqa fit-22 ta’ Diċembru 2022 mill-MNFPUGs Sustainable Cashmere Srl li tirrappreżenta l-Unjoni tal-Mongolian National Federation of Pasture User Groups of Herders (MNFPUG) u hija kkontrollata minnha.

(2)

Wara l-iskrutinju, il-Kummissjoni bagħtet ittra ta’ rifjut fil-5 ta’ April 2023 fejn indikat li l-applikazzjoni ma tissodisfax ir-rekwiżiti tar-Regolament (UE) Nru 1151/2012. F’konformità mal-Artikolu 2(1) tar-Regolament (UE) Nru 1151/2012, il-kamp ta’ applikazzjoni tar-Regolament huwa definit b’referenza għall-Anness I tat-Trattat dwar il-Funzjonament tal-Unjoni Ewropea u l-Anness I tar-Regolament (UE) Nru 1151/2012. Il-kategorija tal-prodott “cashmere” mhi inkluża fl-ebda wieħed minn dawn l-annessi u konsegwentement ma taqax fil-kamp ta’ applikazzjoni ta’ dak ir-Regolament.

(3)

Barra minn hekk, minħabba li l-applikazzjoni mressqa kklassifikat il-prodott bħala suf (l-Anness XI tar-Regolament (UE) Nru 668/2014: klassi 2.15.), il-Kummissjoni spjegat li skont ir-Regolament (UE) Nru 1151/2012, il-kaxmer ma jistax jiġi interpretat bħala suf, minħabba li l-kaxmer u s-suf jirrappreżentaw żewġ prodotti distinti.

(4)

Il-Kummissjoni ċċarat li l-Anness I tat-Trattat, li huwa trasferiment tal-klassifikazzjoni rilevanti fin-nomenklatura ta’ Brussell, juża l-klassifikazzjoni f’termini ta’ kodiċijiet NM mill-Anness I tar-Regolament tal-Kunsill (KEE) Nru 2658/87 (2) biex jiddetermina liema prodott aktar speċifiku jaqa’ taħt kull kategorija elenkata fl-Anness I tat-Trattat. Dan l-istess approċċ huwa applikat biex jiġi ddeterminat il-prodott speċifiku li jaqa’ taħt kull klassi ta’ prodott imsemmi fl-Anness I tar-Regolament (UE) Nru 1151/2012.

(5)

Skont in-Nota ta’ Spjegazzjoni 1 tal-Kapitolu 51 tal-Anness I tar-Regolament (KEE) Nru 2658/87, “suf” u “xagħar fin jew aħrax tal-annimali tal-Kashmir jew mogħoż simili” huma żewġ oġġetti distinti, fejn “suf” tfisser il-fibra naturali mkabbra min-nagħaġ jew mill-ħrief, filwaqt li “xagħar fin tal-annimali” hija kategorija separata li tinkludi ċerti speċijiet ta’ xagħar tal-mogħoż (iżda mhux tal-mogħoż komuni), u li fosthom il-“mogħża tal-Kashmir” hija elenkata speċifikament.

(6)

Barra minn hekk, id-distinzjoni hija evidenti wkoll fil-livell tal-kodiċijiet NM fil-Kapitolu 51 tat-Taqsima XI fit-Tieni Parti tal-Anness I tar-Regolament (KEE) Nru 2658/87, fejn “suf” huwa kklassifikat bħala “Kodiċi NM 5101 — Suf, mhux mimxut jew imqardex” u l-kashmere huwa inkluż taħt “Kodiċi NM 5102 — Xagħar fin jew aħrax ta’ annimali, mhux mimxut jew imqardex”. Għalhekk, minkejja l-applikazzjoni mressqa li tiddeskrivi l-prodott bħala “tip ta’ suf”, huwa kruċjali li wieħed jinnota li “suf” skont it-tifsira tal-kodiċi NM 5101 jenħtieġ li ma jiġix interpretat li jinkludi prodotti taħt il-kodiċi NM 5102. Għaldaqstant, skont ir-Regolament (UE) Nru 1151/2012, “kaxmer” ma jistax jitqies bħala subkategorija ta’ “suf”.

(7)

Abbażi tal-informazzjoni pprovduta fl-applikazzjoni, il-Kummissjoni kkonkludiet li l-applikazzjoni ma tissodisfax ir-rekwiżiti tar-Regolament (UE) Nru 1151/2012. L-applikant ġie infurmat li jekk ma tasal l-ebda osservazzjoni fi żmien xahrejn minn meta tasal l-ittra (datata l-5 ta’ April 2023), il-Kummissjoni kellha l-ħsieb li tniedi l-proċedura għall-adozzjoni ta’ deċiżjoni formali tal-Kummissjoni li tirrifjuta l-applikazzjoni.

(8)

Fir-risposta ppreżentata lill-Kummissjoni fl-20 ta’ April 2023, l-applikant qajjem diversi osservazzjonijiet, li primarjament jikkontestaw l-użu tar-Regolament (KEE) Nru 2658/87 fl-interpretazzjoni tar-Regolament (UE) Nru 1151/2012. L-applikant isostni li anke jekk ir-Regolament (KEE) Nru 2658/87 jintuża biex jiġi ddeterminat il-kamp ta’ applikazzjoni tar-Regolament (UE) Nru 1151/2012, kemm is-suf kif ukoll il-kaxmer huma inklużi fil-Kapitolu 51 ta’ dan ir-Regolament. Il-Kummissjoni tinnota li, peress li s-suf biss huwa inkluż fl-Anness I tar-Regolament (UE) Nru 1151/2012, u mhux il-kaxmer, u dan it-terminu mhuwiex definit fl-Anness I tar-Regolament (UE) Nru 1151/2012, jeħtieġ infittxu t-tifsira tiegħu f’leġiżlazzjoni oħra tal-UE. Il-Kummissjoni tuża l-klassifikazzjoni doganali bħala l-bażi għad-determinazzjoni tal-kamp ta’ applikazzjoni ta’ prodott, sakemm ma jkunx hemm leġiżlazzjoni speċjalizzata oħra. F’dan il-każ, ma jeżisti xejn.

(9)

L-applikant jindika wkoll fl-osservazzjonijiet tiegħu li regolamenti u direttivi rilevanti oħra tal-Unjoni jirreferu għal “suf tal-kaxmer” jew jassoċjaw il-kaxmer mas-suf. L-applikant jikkwota b’mod partikolari r-Regolament (UE) Nru 1007/2011 tal-Parlament Ewropew u tal-Kunsill (3) u d-Direttiva 2008/121/KE tal-Parlament Ewropew u tal-Kunsill (4).

(10)

Il-Kummissjoni tinnota li l-ebda wieħed minn dawn l-atti leġiżlattivi ma jiddefinixxi l-kaxmer bħala suf. L-Anness I tar-Regolament (UE) Nru 1007/2011 fih il-lista tal-ismijiet tal-fibri tat-tessuti u, skont it-Tabella 1 f’dan l-Anness, minbarra fibra mis-suf tan-nagħaġ jew tal-ħrief, it-terminu “suf” jista’ jintuża wkoll għal “taħlita ta’ fibri mis-suf tan-nagħaġ jew tal-ħrief u x-xagħar tal-annimali elenkati fin-numru 2”. Il-kaxmer huwa elenkat fin-numru 2. B’hekk, f’konformità mal-Artikolu 5(2) tar-Regolament (UE) Nru 1007/2011, tessut li jkun fih fibri tal-kaxmer jista’ jiġi ttikkettat biss bħala “suf” jekk ikun taħlita ta’ fibri tas-suf u tal-kaxmer. Dan ifisser li tessut magħmul esklussivament minn fibri tal-kaxmer ma jistax jissejjaħ “suf” għall-finijiet tar-Regolament (UE) Nru 1007/2011 u jkollu jiġi ttikkettat bħala “kaxmer” jew “suf tal-kaxmer” jew “xagħar tal-kaxmer” skont ir-regoli stabbiliti fin-numru 2 tat-Tabella 1. Peress li dawn l-ismijiet huma inklużi taħt numru differenti fit-tabella, mhumiex sottokategoriji ta’ “suf” iżda ismijiet distinti. Fir-rigward tad-Direttiva 2008/121/KE, din ma għadhiex fis-seħħ peress li tħassret bir-Regolament (UE) Nru 1007/2011 imsemmi hawn fuq.

(11)

Barra minn hekk, l-applikant ippreżenta diversi definizzjonijiet ta’ kaxmer u suf minn diversi sorsi, primarjament mill-pubblikazzjoni “Wool Notes” tal-Organizzazzjoni Internazzjonali tat-Tessuti tas-Suf (IWTO); L-istandard DIN 60001-1, l-Istitut Ġermaniż għall-istandardizzazzjoni; L-att Ġermaniż dwar it-tikkettar tat-tessuti; Titolu 15 tal-Kodiċi tal-Istati Uniti § 68 B u Wikipedia. Il-Kummissjoni tinnota li għall-applikazzjoni ta’ Regolament tal-Unjoni t-terminu “suf” jista’ jiġi ddeterminat biss bl-użu tal-leġiżlazzjoni tal-Unjoni u, għalhekk, id-diversi dokumenti indikati mill-applikant mhumiex applikabbli f’dan il-kuntest. Barra minn hekk, is-sorsi indikati jirreferu prinċipalment għas-“suf tal-kaxmer” f’konformità mad-dispożizzjonijiet stabbiliti fir-Regolament (UE) Nru 1007/2011.

(12)

Barra minn hekk, l-applikant irrefera għall-avviż ta’ informazzjoni — il-konsultazzjoni pubblika dwar l-indikazzjonijiet ġeografiċi tar-Repubblika tal-Poplu taċ-Ċina (5), ippubblikat mill-Kummissjoni Ewropea, li jinkludi l-isem “Alxa Cashmere”, li wassal lill-applikant biex jaħseb li l-kaxmer jista’ jiġi protett skont ir-Regolament (UE) Nru 1151/2012. F’dan il-każ, il-protezzjoni mitluba għall-“Alxa Cashmere” hija għal-laħam frisk tal-mogħża tal-kaxmer u mhux għax-xagħar fin ta’ dawn il-mogħoż.

(13)

Fid-dawl ta’ dak li ntqal hawn fuq, il-Kummissjoni tqis li l-applikazzjoni għar-reġistrazzjoni ta’ “Монгол Тогтвортой ноолуур/Mongol Togtvortoi Nooluur” bħala IĠP ma tissodisfax ir-rekwiżiti tar-Regolament (UE) Nru 1151/2012 peress li tikkonċerna prodott li l-kategorija tiegħu ma taqax fil-kamp ta’ applikazzjoni tar-Regolament (UE) Nru 1151/2012.

(14)

Għalhekk, jenħtieġ li tiġi miċħuda l-applikazzjoni għall-protezzjoni tal-isem “Монгол Тогтвортой ноолуур/Mongol Togtvortoi Nooluur” bħala Indikazzjoni Ġeografika Protetta.

(15)

Il-miżuri previsti f’din id-Deċiżjoni huma f’konformità mal-opinjoni tal-Kumitat tal-Politika dwar il-Kwalità tal-Prodotti,

MNFPUGs Sustainable Cashmere Srl

Via Borgovico 223

22100 Como CO

L-Italja