(1)

Il-Konvenzjoni Riveduta għan-Navigazzjoni fuq ir-Renu tas-17 ta’ Ottubru 1868, kif emendata bil-Konvenzjoni li temenda l-Konvenzjoni Riveduta għan-Navigazzjoni fuq ir-Renu, iffirmata fi Strasburgu fl-20 ta’ Novembru 1963 (il-“Konvenzjoni”), daħlet fis-seħħ fl-14 ta’ April 1967. Il-Konvenzjoni żżomm lill-Kummissjoni Ċentrali għan-Navigazzjoni fuq ir-Renu (“CCNR”) u r-reġim għan-navigazzjoni interna tar-Renu stabbilit fl-1815.

(2)

Il-Kumitat Ewropew għat-tfassil ta’ standards fil-qasam tan-navigazzjoni interna (“CESNI”) twaqqaf fit-3 ta’ Ġunju 2015 fil-qafas tas-CCNR biex jiżviluppa standards tekniċi għall-passaġġi fuq l-ilma interni f’diversi oqsma, b’mod partikolari fir-rigward tal-bastimenti, it-teknoloġija tal-informazzjoni u l-ekwipaġġ.

(3)

L-adozzjoni ta’ standards mis-CESNI ma għandhiex effett legali dirett, iżda d-Direttiva (UE) 2017/2397 tal-Parlament Ewropew u tal-Kunsill (1) teżiġi li ssir referenza għall-istandards tas-CESNI l-aktar reċenti dwar il-kwalifiki professjonali, jiġifieri l-Istandards Ewropej għall-Kwalifiki fin-Navigazzjoni Interna (“ES-QIN”). Is-CCNR tirreferi wkoll għall-istandards l-aktar reċenti fir-Regolamenti tagħha għall-Persunal tan-Navigazzjoni fuq ir-Renu (“RPN”). Skont l-Artikoli 17 u 46 tal-Konvenzjoni, is-CCNR tista’ tadotta riżoluzzjonijiet vinkolanti li jistabbilixxu rekwiżiti għall-kwalifiki professjonali fin-navigazzjoni interna tar-Renu.

(4)

Is-CESNI ser jadotta Standard Ewropew aġġornat għall-Kwalifiki fin-Navigazzjoni Interna 2024/1 (ES-QIN 2024/1) matul is-sessjoni tiegħu tal-11 ta’ April 2024. Wara dik l-adozzjoni, is-CCNR biħsiebha tadotta riżoluzzjoni li temenda l-RPN biex tirreferi għall-ES-QIN 2024/1, fis-sessjoni plenarja tagħha tat-13 ta’ Ġunju 2024. L-ES-QIN 2024/1 jissostitwixxi l-ES-QIN 2019.

(5)

L-ES-QIN 2024/1 ser jipprovdi aġġornament għall-istandards Ewropej armonizzati minimi li hemm bżonn biex tiġi ffaċilitata l-mobbiltà, tkun żgurata s-sikurezza tan-navigazzjoni u tkun żgurata l-protezzjoni tal-ħajja umana u tal-ambjent. Dawk l-istandards issa ser jiġu aġġornati f’termini ta’ rekwiżiti għat-tbaħħir f’ilmijiet b’karattru marittimu. L-ES-QIN 2024/1 jinkludi wkoll referenzi aġġornati għall-Istandard Ewropew li jistabbilixxi r-Rekwiżiti Tekniċi għall-bastimenti tan-Navigazzjoni Interna u għall- Istandard Ewropew għas-Servizzi tal-Informazzjoni tax-Xmajjar. Fl-aħħar nett, gser iisiru kjarifiki editorjali li jżidu ċ-ċertezza legali.

(6)

Jixraq li l-pożizzjoni li għandha tittieħed f’isem l-Unjoni fi ħdan is-CESNI u fi ħdan is-CCNR tiġi stabbilita, billi l-ES-QIN 2024/1 ser ikun kapaċi jinfluwenza b’mod deċiżiv il-kontenut tal-liġi tal-Unjoni. L-Artikoli 32 u 34 tad-Direttiva (UE) 2017/2397 jirrikjedu li l-Kummissjoni tadotta atti delegati u atti ta’ implimentazzjoni li jirreferu għall-verżjoni l-aktar reċenti tal-istandards tas-CESNI fir-rigward ta’ kwalifiki professjonali, dment li dawk l-istandards ikunu disponibbli u aġġornati u jikkonformaw mar-rekwiżiti stabbiliti fl-Annessi ta’ dik id-Direttiva, u dment li l-interessi tal-Unjoni ma jiġux kompromessi minn bidliet fil-proċess tat-teħid tad-deċiżjonijiet tas-CESNI. Barra minn hekk, l-Artikolu 10 ta’ dik id-Direttiva jipprevedi r-rikonoxximent ta’ dokumenti maħruġa skont l-RPN li jistabbilixxu rekwiżiti li huma identiċi għal dawk ta’ dik id-Direttiva.

(7)

Biex tiġi ffaċilitata l-mobbiltà, tkun żgurata s-sikurezza tan-navigazzjoni u tkun żgurata l-protezzjoni tal-ħajja umana u tal-ambjent, huwa importanti li r-rekwiżiti tekniċi għal membri tal-ekwipaġġ ikunu kemm jista’ jkun armonizzati skont id-diversi reġimi legali fl-Ewropa. B’mod partikolari, jenħtieġ li l-Istati Membri li huma ukoll membri tas-CCNR ikunu awtorizzati jappoġġaw deċiżjonijiet li jarmonizzaw ir-regoli tas-CCNR mar-regoli applikati fl-Unjoni.

(8)

L-Unjoni la hija membru tas-CCNR u lanqas tas-CESNI. Għalhekk jenħtieġ li l-pożizzjoni tal-Unjoni tiġi espressa mill-Istati Membri li huma membri ta’ dawk il-korpi, filwaqt li jaġixxu b’mod konġunt fl-interess tal-Unjoni,