This document is an excerpt from the EUR-Lex website
Document 32023R2783
Commission Implementing Regulation (EU) 2023/2783 of 14 December 2023 laying down the methods of sampling and analysis for the control of the levels of plant toxins in food and repealing Regulation (EU) 2015/705
Regolament ta’ Implimentazzjoni tal-Kummissjoni (UE) 2023/2783 tal-14 ta’ Diċembru 2023 li jistabbilixxi l-metodi ta’ kampjunar u l-analiżi għall-kontroll tal-livelli tat-tossini tal-pjanti fl-ikel u li jħassar ir-Regolament (UE) 2015/705
Regolament ta’ Implimentazzjoni tal-Kummissjoni (UE) 2023/2783 tal-14 ta’ Diċembru 2023 li jistabbilixxi l-metodi ta’ kampjunar u l-analiżi għall-kontroll tal-livelli tat-tossini tal-pjanti fl-ikel u li jħassar ir-Regolament (UE) 2015/705
C/2023/8642
ĠU L, 2023/2783, 15.12.2023, ELI: http://data.europa.eu/eli/reg_impl/2023/2783/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
Il-Ġurnal Uffiċjali |
MT Serje L |
2023/2783 |
15.12.2023 |
REGOLAMENT TA’ IMPLIMENTAZZJONI TAL-KUMMISSJONI (UE) 2023/2783
tal-14 ta’ Diċembru 2023
li jistabbilixxi l-metodi ta’ kampjunar u l-analiżi għall-kontroll tal-livelli tat-tossini tal-pjanti fl-ikel u li jħassar ir-Regolament (UE) 2015/705
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2017/625 tal-Parlament Ewropew u tal-Kunsill tal-15 ta’ Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta’ regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (1), u b’mod partikolari l-Artikolu 34(6) tiegħu,
Billi:
(1) |
Ir-Regolament tal-Kummissjoni (UE) 2023/915 (2) jistabbilixxi l-livelli massimi għal ċerti kontaminanti fl-ikel. |
(2) |
Il-kampjunar jaqdi rwol kruċjali fil-preċiżjoni tad-determinazzjoni tal-livelli ta’ tossini fil-pjanti f’ċertu lott peress li t-tossini tal-pjanti f’lott jistgħu jitqassmu b’mod eteroġenu. Għalhekk jixraq li jiġu stabbiliti metodi ta’ kampjunar għall-kontroll uffiċjali tal-livelli tat-tossini tal-pjanti fl-ikel. |
(3) |
Ir-Regolament ta’ Implimentazzjoni tal-Kummissjoni (UE) 2023/2782 (3) jistabbilixxi l-metodi ta’ kampjunar u l-analiżi li jridu jintużaw għall-kontroll uffiċjali tal-livelli ta’mikotossini fl-ikel. Minħabba li kemm it-tossini tal-pjanti kif ukoll il-mikotossini huma distribwiti b’mod eteroġenu fil-lottijiet, jixraq li jiġu applikati dawk il-metodi ta’ kampjunar ukoll fir-rigward tat-tossini tal-pjanti. |
(4) |
Jistgħu jitwettqu kontrolli uffiċjali fuq l-ikel li għalih ma ġie stabbilit l-ebda livell massimu speċifiku għat-tossini tal-pjanti u li għalih ma ġiet stabbilita l-ebda proċedura speċifika ta’ kampjunar. Għalhekk jixraq li jiġu pprovduti kriterji sabiex jiġi ddeterminat liema proċedura ta’ kampjunar jenħtieġ li tiġi applikata f’tali każijiet. |
(5) |
Huwa wkoll neċessarju li jiġu stabbiliti kriterji ġenerali tal-prestazzjoni li magħhom jenħtieġ li jikkonforma l-metodu ta’ analiżi sabiex ikun żgurat li l-laboratorji ta’ kontroll jużaw il-metodi ta’ analiżi b’livelli ta’ prestazzjoni komparabbli. Billi l-Laboratorju ta’ Referenza tal-Unjoni Ewropea dwar il-mikotossini u t-tossini tal-pjanti ddetermina l-kriterji tal-prestazzjoni analitika għall-analiżi tat-tossini tal-pjanti fl-ikel abbażi tal-aħjar informazzjoni xjentifika disponibbli, jixraq li dawk il-kriterji jiġu stabbiliti f’dan ir-Regolament. |
(6) |
Ir-Regolament tal-Kummissjoni (UE) 2015/705 (4) jistabbilixxi il-metodi ta’ kampjunar u l-kriterji ta’ prestazzjoni għall-metodi ta’ analiżi għall-kontroll uffiċjali tal-livelli ta’ aċidu eruċiku fl-oġġetti tal-ikel. Peress li l-metodi ta’ kampjunar u l-kriterji tal-prestazzjoni analitika stabbiliti f’dan ir-Regolament huma adegwati wkoll għall-kontroll tat-tossina tal-pjanti aċidu eruċiku fl-ikel, jixraq li fl-interess tas-simplifikazzjoni jitħassar ir-Regolament (UE) 2015/705. |
(7) |
Huwa meħtieġ li jingħata żmien biżżejjed lil-laboratorji ta’ kontroll sabiex ikunu jistgħu jissodisfaw ir-rekwiżiti l-ġodda introdotti b’dan ir-Regolament. Għalhekk, jixraq li jiġi previst żmien raġonevoli sakemm japplika dan ir-Regolament. |
(8) |
Sabiex tiġi żgurata l-kontinwità fit-twettiq tal-kontrolli uffiċjali u attivitajiet regolatorji oħrajn fuq il-livelli massimi tat-tossini tal-pjanti u sabiex ikun hemm biżżejjed żmien sabiex il-metodi ta’ analiżi jiġu vvalidati mill-ġdid, jixraq li jiġi previst li l-metodi ta’ analiżi li jkunu ġew ivvalidati qabel id-data tal-applikazzjoni ta’ dan ir-Regolament ikunu jistgħu jibqgħu jintużaw għal perjodu definit. |
(9) |
Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Għall-finijiet ta’ dan ir-Regolament, għandhom japplikaw id-definizzjonijiet stabbiliti fl-Artikolu 1 tar-Regolament ta’ Implimentazzjoni tal-Kummissjoni (UE) 2023/2782.
Artikolu 2
(1) Il-kampjunar għall-kontroll tal-livelli ta’ tossini tal-pjanti fl-ikel għandu jsir f’konformità mal-metodi stabbiliti fl-Anness I.
(2) Fil-każ ta’ ikel li ma jistax jiġi kklassifikat f’kategorija tal-ikel li għalih ġiet stabbilita proċedura ta’ kampjunar fl-Anness I, il-proċedura tal-kampjunar għandha tiġi ddeterminata billi jitqies id-daqs tal-partikoli ta’ dak l-ikel jew ix-xebh ta’ dak l-ikel ma’ prodott li jista’ jiġi kklassifikat f’waħda mill-kategoriji tal-ikel fl-Anness I.
(3) Fil-każ ta’ ikel li ma jistax jiġi kklassifikat fi kwalunkwe kategorija tal-ikel elenkata fl-Anness I u sakemm ikun hemm evidenza li t-tossina tal-pjanti tiġi distribwita b’mod omoġenu f’tali ikel, għandu jittieħed kampjun tal-ikel permezz tal-metodu ta’ kampjunar stabbilit fil-Parti B tal-Anness tar-Regolament tal-Kummissjoni (KE) Nru 333/2007 (5).
Artikolu 3
It-tħejjija tal-kampjuni u l-metodi ta’ analiżi użati għall-kontroll tal-livelli ta’ tossini tal-pjanti fl-oġġetti tal-ikel għandhom jikkonformaw mal-kriterji stabbiliti fl-Anness II.
Artikolu 4
Ir-Regolament (UE) 2015/705 b’dan jitħassar. Ir-referenzi għar-Regolament imħassar għandhom jinftiehmu bħala referenzi għal dan ir-Regolament ta’ Implimentazzjoni.
Artikolu 5
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ April 2024. Madankollu, il-metodi ta’ analiżi li ġew ivvalidati qabel ma jibda japplika dan ir-Regolament jistgħu jibqgħu jintużaw sal-1 ta’ Lulju 2028, anki jekk ma jikkonformawx mar-rekwiżiti speċifiċi kollha previsti fil-punt 4.2 fl-Anness II ta’ dan ir-Regolament.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-14 ta’ Diċembru 2023.
Għall-Kummissjoni
Il-President
Ursula VON DER LEYEN
(2) Ir-Regolament tal-Kummissjoni (UE) 2023/915 tal-25 ta’ April 2023 dwar il-livelli massimi għal ċerti kontaminanti fl-ikel u li jħassar ir-Regolament (KE) Nru 1881/2006 (ĠU L 119, 5.5.2023, p. 103).
(3) Ir-Regolament ta’ Implimentazzjoni tal-Kummissjoni (UE) 2023/2782 tal-14 ta’ Diċembru 2023 li jistabbilixxi l-metodi ta’ kampjunar u analiżi għall-kontroll tal-livelli ta’ mikotossini fl-ikel u li jħassar ir-Regolament (KE) Nru 401/2006 (ĠU L, 2023/2782, 15.12.2023, ELI: http://data.europa.eu/eli/reg_impl/2023/2782/oj).
(4) Ir-Regolament tal-Kummissjoni (UE) 2015/705 tat-30 ta’ April 2015 li jistabbilixxi metodi ta’ teħid tal-kampjuni u kriterji ta’ rendiment għall-metodi ta’ analiżi għall-kontroll uffiċjali tal-livelli ta’ aċidu eruċiku f’oġġetti tal-ikel u li jħassar id-Direttiva 80/891/KEE (ĠU L 113, 1.5.2015, p. 29).
(5) Ir-Regolament tal-Kummissjoni (KE) Nru 333/2007 tat-28 ta’ Marzu 2007 li jistabbilixxi l-metodi tat-teħid ta’ kampjuni u ta’ analiżi għall-kontroll uffiċjali tal-livelli ta’ mikroelementi u ta’ kontaminanti tal-ipproċessar fl-oġġetti tal-ikel (ĠU L 88, 29.3.2007, p. 29).
ANNESS I
Metodi ta’ kampjunar għall-kontroll tal-livelli ta’ tossini tal-pjanti fl-ikel
PARTI I
DISPOŻIZZJONIJIET ĠENERALI
A.1. Dispożizzjonijiet ġenerali
A.1.1. Persunal
Il-kampjunar għandu jitwettaq minn persuna maħtura mill-awtorità kompetenti tal-Istat Membru.
A.1.2. Materjal li minnu se jittieħdu l-kampjuni
Kull lott li se jiġi eżaminat għandu jittieħed kampjun minnu separatament. F’konformità mad-dispożizzjonijiet speċifiċi tal-kampjunar għat-tossini tal-pjanti differenti, il-lottijiet kbar għandhom jiġu suddiviżi f’sublottijiet li minnhom se jittieħdu l-kampjuni separatament.
A.1.3. Prekawzjonijiet li jridu jittieħdu
Waqt il-kampjunar u t-tħejjija tal-kampjuni, għandhom jittieħdu prekawzjonijiet biex tiġi evitata kwalunkwe bidla, li:
— |
taffettwa l-kontenut tat-tossini tal-pjanti, taffettwa b’mod negattiv id-determinazzjoni analitika jew li tagħmel lill-kampjuni aggregati mhux rappreżentattivi; |
— |
taffettwa s-sikurezza alimentari tal-lottijiet li minnhom se jittieħdu l-kampjuni. |
Għandhom jittieħdu wkoll il-miżuri kollha meħtieġa biex tiġi żgurata s-sikurezza tal-persuni li qegħdin jieħdu l-kampjuni.
A.1.4. Kampjuni inkrementali
Sa fejn huwa possibbli għandhom jittieħdu kampjuni inkrementali minn postijiet differenti mqassma mal-lott jew mas-sublott kollu. Kwalunkwe devjazzjoni minn tali proċedura għandha tiġi rreġistrata fir-rekord kif previst fil-parti A.1.8. ta’ dan l-Anness.
A.1.5. Tħejjija tal-kampjun aggregat
Il-kampjun aggregat għandu jkun magħmul billi jingħaqdu flimkien il-kampjuni inkrementali.
A.1.6. Kampjuni replikati
Il-kampjuni replikati għall-finijiet ta’ infurzar, difiża u referenza għandhom jittieħdu mill-kampjun aggregat omoġenizzat, sakemm tali proċedura ma tkunx kontra r-regoli tal-Istati Membri fir-rigward tad-drittijiet tal-operatur tan-negozju tal-ikel.
A.1.7. Imballaġġ u trażmissjoni tal-kampjuni
Kull kampjun għandu jitpoġġa f’kontenitur nadif u inerti li joffri ħarsien adegwat mill-kontaminazzjoni u mill-ħsara waqt il-vjaġġ. Għandhom jittieħdu l-prekawzjonijiet kollha meħtieġa biex tiġi evitata kwalunkwe bidla fil-kompożizzjoni tal-kampjun, li tista’ sseħħ waqt it-trasport jew il-ħżin.
A.1.8. Issiġillar u tikkettar tal-kampjuni
Kull kampjun meħud għal użu uffiċjali għandu jkun issiġillat fil-post tal-kampjunar u għandu jiġi identifikat skont ir-regoli tal-Istat Membru.
Għandu jinżamm rekord ta’ kull kampjunar, ħalli kull lott ikun jista’ jiġi identifikat mingħajr ambigwità u fejn jingħataw id-data u l-post tal-kampjunar flimkien ma’ kwalunkwe informazzjoni addizzjonali li tista’ tkun ta’ għajnuna għall-analista.
A.2. Tipi differenti ta’ lottijiet
Il-komoditajiet tal-ikel jistgħu jiġu nnegozjati bl-ingrossa, f’kontenituri, jew f’pakketti individwali, bħal xkejjer, boroż, pakketti għall-bejgħ bl-imnut/individwali. Il-metodu ta’ kampjunar jista’ jiġi applikat għall-komoditajiet introdotti fis-suq bl-ingrossa, f’kontenituri, jew f’pakketti individwali, bħal xkejjer, boroż, pakketti għall-bejgħ bl-imnut/individwali jew kwalunkwe forma oħra differenti.
Mingħajr preġudizzju għad-dispożizzjonijiet speċifiċi tal-kampjunar li ġew stabbiliti f’partijiet oħrajn ta’ dan l-Anness, il-formula li ġejja għandha tintuża bħala gwida għall-kalkolu tal-frekwenza tal-kampjunar ta’ lottijiet introdotti fis-suq f’pakketti individwali, bħal xkejjer, boroż, pakketti għall-bejgħ bl-imnut/individwali.
Frekwenza tal-kampjunar (SF) n = |
Piż tal-lott x piż tal-kampjun inkrementali |
Piż tal-kampjun aggregat x piż tal-pakkett individwali |
— |
piż: f’kg |
— |
frekwenza tal-kampjunar (SF): kull pakkett individwali indefinit li minnu għandu jittieħed kampjun inkrementali (iċ-ċifri deċimali għandhom jitqarrbu għall-eqreb numru sħiħ). |
A.3. Kampjunar ta’ komoditajiet bi proporzjon għoli ta’ volum/piż
Bl-eċċezzjoni tal-komoditajiet tal-ikel li jaqgħu fil-parti L u M tal-parti II tal-Anness I tar-Regolament ta’ Implimentazzjoni (UE) 2023/2782, fil-każ ta’ kampjunar ta’ komoditajiet tal-ikel li għandhom volum għoli meta mqabbla mal-piż tagħhom (jiġifieri volum (dm3)/piż (kg) > 5) ir-rekwiżiti tal-piż jistgħu jiġu sostitwiti b’rekwiżit ta’ volum ekwivalenti (jiġifieri 1 kg sostitwit b’1 dm3).
PARTI II
METODI TA’ KAMPJUNAR
Għandhom japplikaw il-metodi ta’ kampjunar stabbiliti fil-parti II tal-Anness I tar-Regolament ta’ Implimentazzjoni (UE) 2023/2782.
Madankollu, għall-kampjunar tal-patata u tal-prodotti tal-patata (glikoalkalojdi) u tal-għasel (alkalojdi pirroliżidiniċi) għandha tapplika l-parti B tal-Anness tar-Regolament (KE) Nru 333/2007.
ANNESS II
Kriterji għat-tħejjija tal-kampjuni u għall-metodi ta’ analiżi użati għall-kontrol tal-livelli ta’ tossini tal-pjanti fl-ikel
1. INTRODUZZJONI Prekawzjonijiet
Minħabba li ġeneralment id-distribuzzjoni tat-tossini tal-pjanti mhijiex omoġenja, il-kampjuni għandhom jitħejjew, u jiġu omoġenizzati b’mod speċjali, b’attenzjoni kbira.
Il-kampjun komplut, kif jasal fil-laboratorju, għandu jiġi omoġenizzat, f’każ li l-omoġenizzazzjoni titwettaq mil-laboratorju.
2. TRATTAMENT TAL-KAMPJUN KIF JASAL FIL-LABORATORJU
Kull kampjun tal-laboratorju għandu jitħallat sew bl-użu ta’ proċess, inkluż tħin fin jekk ikun meħtieġ, li jkun intwera li jikseb omoġenizzazzjoni sħiħa
F’każ li l-livell massimu japplika għall-materja xotta, il-kontenut ta’ materja xotta tal-prodott għandu jiġi ddeterminat fuq parti mill-kampjun omoġenizzat, billi jintuża metodu li diġà ntwera li jiddetermina b’mod akkurat il-kontenut ta’ materja xotta.
3. KAMPJUNI REPLIKATI
Il-kampjuni replikati għal finijiet ta’ infurzar, difiża u referenza, għandhom jittieħdu mill-materjal omoġenizzat, sakemm tali proċedura ma tmurx kontra r-regoli tal-Istati Membru fir-rigward tad-drittijiet tal-operatur tan-negozju tal-ikel.
4. METODU TA’ ANALIŻI LI JRID JINTUŻA MIL-LABORATORJU U R-REKWIŻITI TA’ KONTROLL TAL-LABORATORJU
4.1. Rekwiżiti ġenerali
Il-metodi ta’ konferma ta’ analiżi li jintużaw għal finijiet ta’ kontroll tal-ikel għandhom ikunu konformi mad-dispożizzjonijiet tal-punti 1 u 2 tal-Anness III tar-Regolament (UE) 2017/625.
Kull meta jkun possibbli, il-verità tal-metodu għandha tiġi vverifikata permezz ta’ analiżi ta’ materjal ta’ referenza ċċertifikat u/jew parteċipazzjoni b’suċċess f’testijiet tal-profiċjenza fuq bażi regolari.
4.2. Rekwiżiti speċifiċi
4.2.1. Rekwiżiti speċifiċi għall-metodi ta’ konferma
4.2.1.1. Kriterji tal-prestazzjoni
Għall-metodi ta’ konferma japplikaw il-kriterji tal-prestazzjoni li ġejjin:
Irkupru: l-irkupru medju għandu jkun ta’ bejn 70 u 120 %.
L-irkupru medju huwa l-valur medju mir-replikati miksubin matul il-validazzjoni meta jiġu ddeterminati l-parametri ta’ preċiżjoni RSDr u RSDwR. Il-kriterju japplika għall-konċentrazzjonijiet kollha u għat-tossini individwali kollha.
F’każijiet eċċezzjonali, l-irkupri medji barra mill-medda ta’ hawn fuq jistgħu jkunu aċċettabbli iżda għandhom ikunu fil-firxa ta’ bejn 50-130 %, u biss meta jiġu ssodisfati l-kriterji ta’ preċiżjoni għall-RSDr u għall-RSDwR.
Preċiżjoni
L-RSDs għandha tkun ≤ 20 %.
L-RSDwR għandha tkun ≤ 20 %.
L-RSDR għandha tkun ≤ 25 %.
Dawn il-kriterji japplikaw għall-konċentrazzjonijiet kollha.
F’każ li laboratorju jipprovdi l-evidenza li l-kriterju tal-RSDwR huwa ssodisfat, ma hemmx bżonn li tiġi pprovduta dik l-evidenza għall-kriterju tal-RSDr peress li l-konformità mal-RSDwR tiggarantixxi l-konformità mal-kriterju tal-RSDr.
F’każ li l-livell massimu japplika għal somma ta’ tossini, il-kriterji għall-preċiżjoni japplikaw kemm għas-somma kif ukoll għat-tossini individwali.
Limitu ta’ kwantifikazzjoni
Meta jkun ġie stabbilit rekwiżit speċifiku għal-LOQ ta’ tossina tal-pjanti fit-Tabella 1 ta’ hawn taħt, il-metodu għandu jkollu LOQ ta’ dan il-valur jew inqas.
Tabella 1
Rekwiżiti tal-LOQ għal ċerti tossini tal-pjanti
Tossina tal-pjanti |
Kummenti |
Ikel |
Rekwiżit tal-LOQ (μg/kg) jew (μg/l) |
Alkalojdi pirroliżidiniċi |
Rekwiżit tal-LOQ għall-alkalojdi pirroliżidiniċi individwali |
Prodott imnixxef Prodott likwidu |
≤ 10 ≤ 0,15 |
Alkalojdi tropaniċi |
Rekwiżit tal-LOQ għall-atropina u għall-iskopolamina separatament |
Ikel ipproċessat ibbażat fuq iċ-ċereali għat-trabi u għat-tfal żgħar Ċereali u prodotti taċ-ċereali Infużjonijiet erbali (imnixxfa) Infużjonijiet erbali (likwidi) |
≤ 1 ≤ 2 ≤ 5 ≤ 0,05 |
Alkalojdi tal-loppju |
Rekwiżit tal-LOQ għall-morfina u għall-kodeina separatament |
Prodotti tal-forn |
≤ 500 |
Fil-każijiet l-oħrajn kollha, japplika dan li ġej:
LOQ: għandu jkun ta’ ≤ 0,5*ML u preferibbilment għandu jkun inqas (≤ 0,2*ML).
F’każ li l-livell massimu japplika għal somma ta’ tossini, l-LOQ tat-tossini individwali għandu jkun ta’ ≤ 0,5*ML/n, b’n li jkun l-għadd ta’ tossini inklużi fid-definizzjoni ta’ ML.
Identifikazzjoni
Għall-identifikazzjoni, għandhom jiġu applikati l-kriterji kif stabbiliti fid-Dokument ta’ gwida dwar l-identifikazzjoni tal-mikotossini u t-tossini tal-pjanti fl-ikel u fl-għalf (1).
4.2.1.2. Twessigħ tal-ambitu tal-metodu
4.2.1.2.1. Estensjoni tal-ambitu għal tossini tal-pjanti oħrajn:
Meta mikotossini oħra jiżdiedu mal-ambitu ta’ metodu ta’ konferma eżistenti, tkun meħtieġa validazzjoni sħiħa biex tintwera l-adegwatezza tal-metodu.
4.2.1.2.2. Estensjoni għal komoditajiet oħrajn:
Jekk il-metodu ta’ konferma huwa magħruf jew mistenni li jkun applikabbli għal komoditajiet oħrajn, il-validità għal dawn il-komoditajiet l-oħrajn għandha tiġi vverifikata. Sakemm il-komodità il-ġdida tkun tappartjeni għal grupp ta’ komoditajiet (ara t-Tabella 2 f’dan l-Anness) li għaliha tkun diġà saret validazzjoni inizjali, validazzjoni addizzjonali limitata hija biżżejjed.
4.2.2. Rekwiżiti speċifiċi għall-metodi ta’ skrinjar semikwantitattivi
4.2.2.1. Ambitu
Din it-taqsima tapplika għall-metodi bijoanalitiċi bbażati fuq l-immunorikonoxximent jew l-irbit tar-riċetturi (bħal ELISA, dipsticks, apparati ta’ fluss laterali, immunosensuri) u l-metodi fiżikokimiċi bbażati fuq kromatografija jew detezzjoni diretta bl-ispettrometrija tal-massa (eż. MS ambjentali). Metodi oħrajn (eż. kromatografija ta’ saff irqiq) mhumiex esklużi sakemm is-sinjali ġġenerati jirreferu direttament għat-tossini tal-pjanti ta’ interess u jippermettu li l-prinċipju deskritt hawn taħt ikun applikabbli.
Ir-rekwiżiti speċifiċi japplikaw għall-metodi li r-riżultat tal-kejl tagħhom huwa valur numeriku, pereżempju reazzjoni (relattiva) minn qarrej tad-dip-stick, sinjal minn LC-MS, eċċ., u li tapplika l-istatistika normali.
Ir-rekwiżiti ma japplikawx għall-metodi li ma jagħtux valuri numeriċi (eż. linja li tkun hemm jew le biss), li jirrikjedu approċċi ta’ validazzjoni differenti. Ir-rekwiżiti speċifiċi għal dawn il-metodi huma pprovduti fil-punt 4.2.3.
Dan id-dokument jiddeskrivi l-proċeduri għall-validazzjoni tal-metodi ta’ skrinjar permezz ta’ validazzjoni interlaboratorja, il-verifika tal-prestazzjoni ta’ metodu vvalidat permezz ta’ eżerċizzju interlaboratorju u l-validazzjoni minn laboratorju wieħed ta’ metodu ta’ skrinjar.
4.2.2.2. Proċedura ta’ validazzjoni
L-għan tal-validazzjoni huwa li turi kemm il-metodu ta’ skrinjar huwa adegwat għall-użu. Dan isir billi jiġi stabbilit il-valur ta’ limitu u d-determinazzjoni tar-rata ta’ negattivi foloz u suspetti foloz. F’dawn iż-żewġ parametri, jiġu integrati karatteristiċi tal-prestazzjoni bħall-kapaċità ta’ detezzjoni, is-selettività u l-preċiżjoni.
Il-metodi ta’ skrinjar jistgħu jiġu vvalidati minn validazzjoni interlaboratorja jew minn laboratorju wieħed. Jekk id-data ta’ validazzjoni interlaboratorja diġà tkun disponibbli għal ċerta kombinazzjoni ta’ tossini tal-pjanti/matriċi/STC, verifika ta’ prestazzjoni tal-metodu hija suffiċjenti f’laboratorju li jimplimenta l-metodu.
4.2.2.2.1. Validazzjoni inizjali permezz ta’ validazzjoni unika fil-laboratorju
Tossini tal-pjanti:
Il-validazzjoni għandha ssir għal kull tossini tal-pjanti individwali fl-ambitu. Fil-każ ta’ metodi bijoanalitiċi li jagħtu rispons ikkombinat għal ċertu grupp ta’ tossini tal-pjanti (eż. l-alkalojdi pirroliżidiniċi), għandha tintwera l-applikabbiltà u jissemmew il-limitazzjonijiet tat-test fl-ambitu tal-metodu. Ir-reattività inkroċjata mhux mixtieqa ma titqiesx li żżid ir-rata ta’ negattivi foloz tat-tossini tal-pjanti fil-mira, iżda tista’ żżid ir-rata ta’ suspetti foloz. Din iż-żieda mhux mixtieqa għandha titnaqqas permezz tal-analiżi ta’ konferma għall-identifikazzjoni mhux ambigwa u l-kwantifikazzjoni tat-tossini tal-pjanti.
Matriċi:
Għandha titwettaq validazzjoni inizjali għal kull komodità, jew, meta jsir magħruf li l-metodu huwa applikabbli għal bosta komoditajiet, għal kull grupp ta’ komoditajiet. Fil-każ tal-aħħar, għandhom jintgħażlu rappreżentant wieħed u komodità rilevanti minn dak il-grupp (ara t-Tabella 2).
Kampjun stabbilit:
L-għadd minimu ta’ kampjuni differenti meħtieġa għall-validazzjoni huwa ta’ 20 kampjun ta’ kontroll negattiv omoġenju u ta’ 20 kampjun ta’ kontroll pożittiv omoġenju li fihom it-tossini tal-pjanti fl-STC, analizzati taħt kundizzjonijiet ta’ riproduċibbiltà intralaboratorju (RSDwR) mifruxa fuq 5 ijiem differenti. Settijiet addizzjonali ta’ 20 kampjun li fihom f’livelli oħrajn it-tossini tal-pjanti jistgħu jiżdiedu mas-sett ta’ validazzjoni stabbilita biex jinkiseb għarfien dwar sa fejn il-metodu jista’ jiddistingwi bejn konċentrazzjonijiet ta’ tossini tal-pjanti differenti.
Konċentrazzjoni:
Għal kull STC li tintuża f’applikazzjoni ta’ rutina, għandha titwettaq validazzjoni.
4.2.2.2.2. Validazzjoni inizjali permezz ta’ provi kollaborattivi
Il-validazzjoni permezz ta’ provi kollaborattivi għandha ssir f’konformità mal-ISO 5725:1994 jew mal-Protokoll Internazzjonali Armonizzat tal-IUPAC jew ma’ protokoll rikonoxxut internazzjonalment ieħor dwar il-provi kollaborattivi li jirrikjedi l-inklużjoni ta’ data valida minn tal-inqas tmien laboratorji differenti. L-unika differenza mqabbla ma’ validazzjonijiet ta’ laboratorju wieħed għandha tkun li ≥ 20 kampjun għal kull komodità/livell jistgħu jitqassmu b’mod ugwali fil-laboratorji parteċipanti, b’minimu ta’ żewġ kampjuni għal kull laboratorju.
4.2.2.3. Determinazzjoni tal-valur ta’ limitu u rata ta’ riżultati suspettati foloz ta’ kampjuni inbjank
It-tweġibiet (relattivi) għall-kontroll negattiv u l-kampjuni ta’ kontroll pożittiv għandhom jittieħdu bħala bażi għall-kalkolu tal-parametri meħtieġa.
Metodi ta’ skrinjar b’rispons proporzjonali għall-konċentrazzjoni ta’ tossini tal-pjanti
Għal metodi ta’ skrinjar b’rispons proporzjonali mal-konċentrazzjoni ta’ tossini tal-pjanti japplika dan li ġej:
Valur ta’ limitu = RSTC - valur t0,05 *SDSTC
RSTC |
= |
rispons medju tal-kampjuni ta’ kontroll pożittiv (fl-STC) |
valur t: valur t b’denb wieħed għal rata ta’ riżultati negattivi foloz ta’ 5 % (ara t-Tabella 3)
SDSTC |
= |
devjazzjoni standard |
Metodi ta’ skrinjar b’rispons inversament proporzjonali għall-konċentrazzjoni ta’ tossini tal-pjanti
Bl-istess mod, għall-metodi ta’ skrinjar b’rispons inversament proporzjonali għall-konċentrazzjoni ta’ tossini tal-pjanti, il-valur ta’ limitu jiġi ddeterminat bħala:
Valur ta’ limitu = RSTC + valur t0,05 *SDSTC
Bl-użu ta’ dan il-valur t speċifiku biex jiġi determinat il-valur ta’ limitu, ir-rata ta’ riżultati negattivi foloz tkun awtomatikament stabbilita għal 5 %.
Adegwatezza għall-użu ta’ valutazzjoni
Ir-riżultati mill-kampjuni ta’ kontroll negattivi jintużaw biex issir stima tar-rata korrispondenti ta’ riżultati suspetti foloz. Il-valur t jiġi kkalkulat b’mod li jikkorrispondi għas-sitwazzjoni fejn ir-riżultat ta’ kampjun ta’ kontroll negattiv ikun ogħla mill-valur ta’ limitu, u għalhekk jiġi kklassifikat bħala suspett bi żball.
valur t |
= |
(valur ta’ limitu - medjainbjank)/SDinbjank |
għall-metodi ta’ skrinjar b’rispons proporzjonali għall-konċentrazzjoni ta’ tossini tal-pjanti
jew
valur t |
= |
(medjainbjank - valur ta’ limitu)/SDinbjank |
għall-metodi ta’ skrinjar b’rispons inversament proporzjonali għall-konċentrazzjoni ta’ tossini tal-pjanti
Mill-valur t miksub, abbażi tal-gradi ta’ libertà ikkalkolati mill-għadd ta’ esperimenti, il-probabbiltà ta’ kampjuni suspetti foloz għal distribuzzjoni b’denb wieħed tista’ jew tiġi kkalkolata (eż. il-funzjoni ta’ spread sheet “TDIST”) jew tittieħed minn Tabella għad-distribuzzjoni t (ara t-Tabella 3).
Il-valur korrispondenti tad-distribuzzjoni t b’denb wieħed jispeċifika r-rata ta’ riżultati suspetti foloz.
Dan il-kunċett huwa deskritt fid-dettall b’eżempju f’Kimika Analitika u Bijoanalitika DOI 10.1007/s00216 -013-6922-1.
4.2.2.4. Twessigħ tal-ambitu tal-metodu
4.2.2.4.1. Estensjoni tal-ambitu għal tossini tal-pjanti oħrajn:
Meta tossini tal-pjanti ġodda jiżdiedu mal-ambitu ta’ metodu ta’ skrinjar eżistenti, għandha tkun meħtieġa validazzjoni sħiħa biex tintwera l-adegwatezza tal-metodu.
4.2.2.4.2. Estensjoni għal komoditajiet oħrajn:
Jekk il-metodu ta’ skrinjar huwa magħruf jew mistenni li jkun applikabbli għal komoditajiet oħrajn, il-validità għal dawn il-komoditajiet l-oħrajn għandha tiġi vverifikata. Sakemm il-komodità il-ġdida tkun tappartjeni għal grupp ta’ komoditajiet (ara t-Tabella 2 f’dan l-Anness) li għaliha tkun diġà saret validazzjoni inizjali, validazzjoni addizzjonali limitata hija biżżejjed. Għal dan, minimu ta’ 10 kampjuni ta’ kontroll negattiv omoġenju u 10 kampjuni ta’ kontroll pożittiv omoġenju (fl-STC) għandhom jiġu analizzati f’kundizzjonijiet ta’ riproduċibbiltà intralaboratorju. Il-kampjuni ta’ kontroll pożittiv għandhom jkunu kollha ogħla mill-valur ta’ limitu. F’każ li dan il-kriterju ma jiġix issodisfat, tkun meħtieġa validazzjoni sħiħa.
4.2.2.5. Verifika tal-metodi diġà vvalidati permezz ta’ provi kollaborattivi
Għall-metodi ta’ skrinjar li diġà ġew ivvalidati b’suċċess permezz ta’ prova kollaborattiva fil-laboratorju, għandha tiġi vverifikata l-prestazzjoni tal-metodu. Għal dan għandhom jiġu analizzati minimu ta’ sitt kampjuni ta’ kontroll negattiv u sitta ta’ kontroll pożittiv (fl-STC). Il-kampjuni ta’ kontroll pożittiv għandhom jkunu kollha ogħla mill-valur ta’ limitu. F’każ li dan il-kriterju ma jiġix issodisfat, il-laboratorju irid iwettaq analiżi tal-kawża ewlenija biex jidentifika r-raġuni għaliex ma jistax jissodisfa l-ispeċifikazzjoni kif miksuba fil-prova kollaborattiva. Huwa biss wara t-teħid ta’ azzjoni korrettiva li għandha tiġi vverifikata mill-ġdid il-prestazzjoni tal-metodu fil-laboratorju tiegħu. F’każ li l-laboratorju ma jkunx kapaċi jivverifika r-riżultati mill-prova kollaborattiva, ikollu jiddetermina l-valur ta’ limitu tiegħu f’validazzjoni waħdanija kompleta fil-laboratorju.
4.2.2.6. Verifika kontinwa tal-metodu/verifika tal-metodu li għadha għaddejja
Wara validazzjoni inizjali, tkun meħtieġa data ta’ validazzjoni addizzjonali billi jiġu inklużi tal-inqas żewġ kampjuni ta’ kontroll pożittivi f’kull lott ta’ kampjuni skrinjati. Kampjun ta’ kontroll pożittiv wieħed għandu jkun kampjun magħruf (eż. dak użat waqt validazzjoni inizjali), u l-ieħor għandu jkun komodità differenti mill-istess grupp ta’ komoditajiet (f’każ li komodità waħda biss tiġi analizzata, jintuża biss kampjun ta’ dik il-komodità minflok). L-inklużjoni ta’ kampjun ta’ kontroll negattiv hija fakultattiva. Ir-riżultati miksuba għaż-żewġ kampjuni ta’ kontroll pożittivi jiżdiedu mas-sett ta’ validazzjoni eżistenti.
Tal-inqas darba fis-sena l-valur ta’ limitu jiġi determinat mill-ġdid u l-validità tal-metodu tiġi vvalutata mill-ġdid (evalwazzjoni mill-ġdid tad-data disponibbli tal-QA/QC miksuba fl-aħħar sena). Il-verifika kontinwa tal-metodu għandha diversi skopijiet, inkluż:
— |
il-kontroll tal-kwalità tal-lott ta’ kampjuni skrinjati; |
— |
tipprovdi informazzjoni dwar ir-robustezza tal-metodu f’kundizzjonijiet fil-laboratorju li japplika l-metodu |
— |
ġustifikazzjoni tal-applikabbiltà tal-metodu għal komoditajiet differenti |
— |
tippermetti li l-valuri ta’ limitu jiġu aġġustati f’każ ta’ tifrix gradwali matul iż-żmien. |
4.2.2.7. Rapport ta’ validazzjoni
Ir-rapport ta’ validazzjoni għandu jkun fih:
— |
dikjarazzjoni dwar l-STC |
— |
dikjarazzjoni dwar il-valur ta’ limitu determinat.
|
— |
dikjarazzjoni dwar ir-rata kkalkulata ta’ suspetti foloz |
— |
dikjarazzjoni dwar kif ġiet iġġenerata r-rata ta’ suspetti foloz.
Tabella 2 Gruppi ta’ komoditajiet għall-validazzjoni tal-metodi ta’ konferma u skrinjar
Tabella 3 Valur t b’denb wieħed għal rata ta’ negattivi foloz ta’ 5 %
|
4.2.3. Rekwiżiti għall-metodi ta’ skrinjar kwalitattivi (metodi li ma jagħtux valuri numeriċi)
L-iżvilupp ta’ linji gwida ta’ validazzjoni għall-metodi ta’ ttestjar binarju bħalissa jitwettaq minn diversi korpi ta’ standardizzazzjoni (eż. AOAC, ISO). L-AOAC abbozza linja gwida dwar il-validazzjoni tal-metodi ta’ ttestjar binarju. Dan id-dokument jista’ jitqies bħala l-qagħda kurrenti tal-ogħla livell ta’ żvilupp tekniku fil-qasam tal-validazzjoni tal-metodi ta’ ttestjar binarju. Għalhekk, il-metodi li jagħtu riżultati binarji (eż. spezzjoni viżwali tat-testijiet tad-dip-stick) għandhom jiġu vvalidati skont il-Linji Gwida Internazzjonali tal-AOAC għall-Validazzjoni tal-Metodi Kwalitattivi Binarji tal-Kimika (2)
Madankollu, jistgħu jintużaw linji gwida ta’ validazzjoni oħrajn rikonoxxuti bħall-approċċ previst fl-ISO/TS 23758:2021 | IDF/RM 251 Linji gwida għall-validazzjoni tal-metodi ta’ skrinjar kwalitattivi għad-detezzjoni ta’ residwi ta’ mediċini veterinarji fil-ħalib u fil-prodotti tal-ħalib.
4.3. Stima tal-inċertezza tal-kejl, tal-kalkolu tal-irkupru u tar-rapportar tar-riżultati (3)
4.3.1. Metodi ta’ konferma
Ir-riżultat analitiku għandu jiġi rappurtat kif ġej:
(a) |
Ikkoreġut għall-irkupru, meta xieraq u rilevanti, u meta jiġi kkoreġut għandu jiġi ddikjarat. Ir-rata ta’ rkupru għandha tiġi kkwotata sakemm il-korrezzjoni intrinsika għall-bias ma tkunx parti mill-proċedura. Il-korrezzjoni għall-irkupru mhijiex meħtieġ meta r-rata ta’ rkupru tkun bejn 90 u 110 %. |
(b) |
Bħala x +/– U fejn x hija r-riżultat analitiku u U hija l-inċertezza tal-kejl analitiku estiża, billi jintuża fattur ta’ kopertura ta’ tnejn li jagħti livell ta’ fiduċja ta’ madwar 95 %. |
Bħala possibbiltà, tista’ tiġi rrapportata inċertezza tal-kejl estiża prestabbilita ta’ 50 %, sakemm il-laboratorju jissodisfa r-rekwiżiti ta’ preċiżjoni kollha speċifikati fil-punt 4.2. Laboratorju individwali jista’ juri li billi jikseb il-kriterji għar-ripetibbiltà (RSDr), u r-riproduċibbiltà intralaboratorju (RSDwR), issupplimentati bil-parteċipazzjoni b’suċċess fi programmi ta’ ttestjar tal-profiċjenza (sakemm ma jkunx disponibbli programm ta’ ttestjar tal-profiċjenza xieraq), bħala punteġġ z medju ta’ |z| ≤ 2 turi li r-riproduċibilità meħtieġa (RSDR) hija ssodisfata (abbażi ta’ devjazzjoni standard immirata ta’ 25 %).
F’każ li l-livell massimu jkun ġie stabbilit għas-somma tat-tossini, għandhom jiġu rrapportati r-riżultati analitiċi tat-tossini individwali kollha.
Il-korrezzjoni tal-irkupru, jekk applikabbli, għandha ssir għal kull waħda mit-tossini individwali qabel l-addizzjoni tal-konċentrazzjonijiet.
Għall-verifika tal-konformità mas-somma-ML, għandu jiġi applikat approċċ ta’ livell aktar baxx li jfisser li r-riżultati għat-tossini individwali li huma ta’ <LOQ għandhom jiġu sostitwiti b’żero għall-kalkolu tas-somma.
Ir-regoli ta’ interpretazzjoni attwali tar-riżultat analitiku fid-dawl tal-aċċettazzjoni jew ir-rifjut tal-lott japplikaw għar-riżultat analitiku miksub tal-kampjun għall-kontroll uffiċjali. F’każ ta’ analiżi għall-finijiet ta’ difiża jew referenza, japplikaw ir-regoli nazzjonali. B’mod partikolari, jekk:
ir-riżultat analitiku tal-kampjun ta’ kontroll uffiċjali jindika nuqqas ta’ konformità mingħajr l-ebda dubju raġonevoli, filwaqt li titqies l-inċertezza tal-kejl estiża u
r-riżultat analitiku tal-kampjun tad-difiża jindika nuqqas ta’ konformità iżda mingħajr l-ebda dubju raġonevoli b’inċertezza akbar fil-kejl minn dik tal-kontroll uffiċjali,
imbagħad, ir-riżultat analitiku tal-kampjun tad-difiża ma jistax jissostitwixxi n-nuqqas ta’ konformità stabbilit għall-kampjun ta’ kontroll uffiċjali.
4.3.2. Metodi ta’ skrinjar
Ir-riżultat tal-iskrinjar għandu jiġi espress bħala konformi jew suspettat li mhuwiex konformi.
“Suspettat li mhuwiex konformi” tfisser li l-kampjun jaqbeż il-livell tal-valur ta’ limitu u jista’ jkun fih it-tossina tal-pjanti f’livell ogħla mill-STC. Kull riżultat ta’ suspett jixpruna analiżi ta’ konferma għall-identifikazzjoni mhux ambigwa u l-kwantifikazzjoni tat-tossina tal-pjanti.
“Konformi” tfisser li l-kontenut ta’ tossini tal-pjanti fil-kampjun huwa < STC b’livell ta’ fiduċja ta’ 95 % (jiġifieri hemm probabbiltà ta’ 5 % li l-kampjuni jiġu rrapportati b’mod inkorrett bħala negattivi). Ir-riżultat analitiku huwa rrapportat bħala “< livell ta’ STC” mal-livell ta’ STC speċifikat.
4.4. Standards ta’ kwalità tal-laboratorju
Laboratorju għandu jikkonforma mad-dispożizzjonijiet tal-Artikolu 37(4) u (5) tar-Regolament (UE) 2017/625.
(1) disponibbli fuq: https://food.ec.europa.eu/system/files/2023-10/cs_contaminants_sampling_guid-doc-ident-mycotoxins.pdf
(*1) Jekk jintuża buffer biex jistabbilizza l-bidliet fil-pH fl-istadju tal-estrazzjoni, imbagħad dan il-grupp ta’ komoditajiet jista’ jingħaqad fi grupp ta’ komoditajiet wieħed “Kontenut għoli ta’ ilma”.
(*2) Il-“Komoditajiet diffiċli jew uniċi” iridu jkunu ivvalidati kompletament jekk dawn jiġu analizzati ta’ spiss biss. Jekk jiġu analizzati biss ta’ kultant, il-validazzjoni tista’ titnaqqas għall-verifika tal-livelli ta’ rapportar bl-użu ta’ estratti inbjank spiked.
(2) Disponibbli hawn: https://academic.oup.com/jaoac/article-pdf/97/5/1492/32425003/jaoac1492.pdf
(3) Aktar dettalji dwar il-proċeduri għall-istima tal-inċertezza tal-kejl u dwar il-proċeduri għall-valutazzjoni tal-irkupru jistgħu jinstabu fir-rapport “Rapport dwar ir-relazzjoni bejn ir-riżultati analitiċi, l-inċertezza tal-kejl, fatturi ta’ rkupru u d-dispożizzjonijiet tal-leġiżlazzjoni tal-UE dwar l-ikel u l-għalf”
https://food.ec.europa.eu/system/files/2016-10/cs_contaminants_sampling_analysis-report_2004_en.pdf
ELI: http://data.europa.eu/eli/reg_impl/2023/2783/oj
ISSN 1977-074X (electronic edition)