(1)

Ir-Regolament (UE) 2016/429 fost l-oħrajn jistipula r-rekwiżiti tas-saħħa tal-annimali għad-dħul fl-Unjoni tal-konsenji ta’ annimali, prodotti ġerminali u prodotti ta’ oriġini mill-annimali, u ilu japplika mill-21 ta’ April 2021. Wieħed minn dawk ir-rekwiżiti dwar is-saħħa tal-annimali hu li dawk il-konsenji jridu jkunu ġejjin minn pajjiż terz jew territorju, jew żona jew kompartiment tiegħu, elenkat f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jissupplimenta r-Regolament (UE) 2016/429 rigward ir-rekwiżiti tas-saħħa tal-annimali għad-dħul fl-Unjoni tal-konsenji ta’ ċerti speċijiet u kategoriji ta’ annimali, prodotti ġerminali u prodotti li joriġinaw mill-annimali minn pajjiżi terzi jew territorji, jew żoni jew kompartimenti tagħhom. Ir-Regolament Delegat (UE) 2020/692 jipprevedi li l-konsenji ta’ annimali, prodotti ġerminali u prodotti li joriġinaw mill-annimali li jidħlu fil-kamp ta’ applikazzjoni tiegħu għandhom jingħataw permess jidħlu fl-Unjoni jekk jiġu minn pajjiż terz jew territorju, jew żona jew kompartiment tiegħu, li jkun elenkat għall-ispeċijiet u l-kategoriji partikolari ta’ annimali, prodotti ġerminali u prodotti li joriġinaw mill-annimali, f’konformità mar-rekwiżiti tas-saħħa tal-annimali stabbiliti f’dak ir-Regolament Delegat.

(3)

Ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi ta’ pajjiżi terzi jew territorji, jew żoni jew kompartimenti tagħhom, li minnhom għandu jkun permess id-dħul fl-Unjoni tal-konsenji ta’ dawk l-ispeċijiet u l-kategoriji ta’ annimali, prodotti ġerminali u prodotti li joriġinaw mill-annimali li jidħlu fil-kamp ta’ applikazzjoni tar-Regolament Delegat (UE) 2020/692. Il-listi u ċerti regoli ġenerali li jikkonċernaw il-listi huma stabbiliti fl-Annessi I sa XXII ta’ dak ir-Regolament Delegat.

(4)

L-Annessi II u III tar-Regolament ta’ Implimentazzjoni (UE) 2021/404 jistabbilixxu rispettivament il-lista ta’ pajjiżi terzi, territorji jew żoni tagħhom awtorizzati għad-dħul fl-Unjoni tal-konsenji ta’ ungulati, għajr annimali ekwini, u ta’ ungulati maħsuba għal stabbilimenti konfinati, u kundizzjonijiet speċifiċi għad-dħul fl-Unjoni ta’ tali ungulati. L-Artikolu 21(5) tar-Regolament Delegat (UE) 2020/692, introdott bir-Regolament Delegat tal-Kummissjoni (UE) 2023/119 (4), jipprevedi deroga mill-Artikolu 21(1), il-punt (b) tiegħu, u jippermetti d-dħul fl-Unjoni tal-ungulati, għajr l-annimali ekwini, identifikati b’mezz fisiku ta’ identifikazzjoni li juri l-kodiċi tal-pajjiż esportatur li huwa differenti mill-kodiċi li jikkonforma mal-istandard ISO 3166, ibbażat fuq talba minn pajjiż terz jew territorju tal-oriġini lill-Kummissjoni u soġġett għall-qbil mill-Kummissjoni. Għalhekk, jenħtieġ li fit-tabelli fil-Parti 3 tal-Annessi II u III tar-Regolament ta’ Implimentazzjoni (UE) 2021/404 tiżdied kundizzjoni speċifika “ID” li tirrifletti dik id-deroga.

(5)

Barra minn hekk, ir-Renju Unit ippreżenta talba sostanzjata lill-Kummissjoni biex jiġi elenkat għad-dħul fl-Unjoni tal-annimali bovini, ovini u kaprini li joriġinaw minn dak il-pajjiż terz u d-Dipendenzi tal-Kuruna tiegħu ta’ Isle of Man, Guernsey u Jersey bil-kundizzjoni speċifika “ID”. Għalhekk, fl-entrati għaż-żoni GB-1 u GB-2 fir-Renju Unit u d-Dipendenzi tal-Kuruna tiegħu ta’ Guernsey, Isle of Man u Jersey, il-kolonna 6 tat-tabella fil-Parti 1 tal-Anness II tar-Regolament ta’ Implimentazzjoni (UE) 2021/404 jenħtieġ li tiġi emendata biex tinkludi dik il-kundizzjoni speċifikata.

(6)

Għaldaqstant, jenħtieġ li l-Annessi II u III tar-Regolament ta’ Implimentazzjoni (UE) 2021/404 jiġu emendati skont dan.

(7)

It-Tabella fil-Parti 1 tal-Anness XIII tar-Regolament ta’ Implimentazzjoni (UE) 2021/404 tistabbilixxi l-lista ta’ pajjiżi terzi, territorji jew żoni tagħhom awtorizzati għad-dħul fl-Unjoni tal-konsenji ta’ laħam frisk tal-ungulati, u tinkludi l-kolonna 7 li tistabbilixxi “data tal-għeluq” għall-konsenji u l-kolonna 8 li tistabbilixxi “data tal-ftuħ” għall-konsenji. Fil-kolonna 8 ta’ dik it-tabella, fl-entrata għaż-żona BW-4 fil-Botswana, għal raġunijiet ta’ ċarezza u fid-dawl tan-nota (1) f’qiegħ il-paġna fl-intestatura tal-kolonna 7, id-data tal-ftuħ indikata fil-kolonna 8 jenħtieġ li titħassar.

(8)

Barra minn hekk, fit-tabella fil-Parti 2 tal-Anness XIII tar-Regolament ta’ Implimentazzjoni (UE) 2021/404, abbażi tal-informazzjoni mogħtija lill-Kummissjoni mill-Botswana, iż-żoni ta’ kontroll tal-mard 18 u 14 jenħtieġ li jitħassru mid-deskrizzjonijiet taż-żoni BW-1 u BW-2 fil-Botswana rispettivament. Jenħtieġ għalhekk li t-tabelli fil-Partijiet 1 u 2 tal-Anness XIII tar-Regolament ta’ Implimentazzjoni (UE) 2021/404 jiġu emendati skont dan.

(9)

Għaldaqstant, jenħtieġ li r-Regolament ta’ Implimentazzjoni (UE) 2021/404 jiġi emendat skont dan.

(10)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,