Deskrizzjoni tal-oġġetti

Klassifikazzjoni (Kodiċi NM)

Raġunijiet

(1)

(2)

(3)

Xedd is-saqajn bil-wiċċ magħmul minn drapp tessili (100 % tal-qoton). Strixxi (wesgħin madwar 5 mm) tal-istess drapp tessili huma meħjuta madwar il-ħobża tas-sieq u tul il-fetħa ta’ quddiem kif ukoll taħt l-anelli. Fuq ġewwa, il-ħjata ta’ dawn l-istrixxi tgħaqqad strixxa oħra li ssaħħaħ l-anelli. Fuq iż-żewġ ġnubijiet tax-xedd is-saqajn huma meħjuta żewġ strixxi vertikali (wesgħin madwar 5 mm) mal-materjal tal-wiċċ, mill-anelli sal-pett.

Ix-xedd is-saqajn għandu pett tal-lastiku (ħxuna ta’ madwar 2 cm). Il-parti tal-pett li tmiss mal-art għandha wiċċ li ma jiżloqx bi struttura uniformi. Strixxa tal-lastiku ta’ madwar 3 cm hija mwaħħla mal-ġenb tal-pett tal-lastiku u madwar 1 cm ta’ din l-istrixxa hija mrikkba fuq id-drapp tessili tal-wiċċ madwar ix-xedd is-saqajn kollu.

Ix-xedd is-saqajn jinqafel permezz tal-lazzijiet.

Ara l-istampi (*1).

6404 19 90

Il-klassifikazzjoni hija determinata mir-Regoli Ġenerali 1 u 6 għall-interpretazzjoni tan-Nomenklatura Magħquda, in-Nota 4(a) u (b) u n-Nota addizzjonali 1 tal-Kapitolu 64 tan-Nomenklatura Magħquda u mill-kliem tal-kodiċijiet NM 6404 , 6404 19 u 6404 19 90 .

Il-klassifikazzjoni taħt il-kodiċi NM 6404 11 00 bħala żraben tat-tennis, żraben tal-basketball, żraben tal-ġinnastika, żraben tat-training u żraben oħrajn ta’ dan it-tip hija eskluża peress li x-xedd is-saqajn la huwa maħsub għal xi waħda minn dawn l-attivitajiet sportivi u lanqas mhu maħsub għal xi attività sportiva simili għat-tennis, il-basketball, il-ġinnastika jew it-training. Dawn l-attivitajiet sportivi jeħtieġu ġiri, movimenti ta’ qbiż, tidwir malajr jew waqfiet f’daqqa. Għalhekk, il-pett tax-xedd is-saqajn maħsub għal dawn l-attivitajiet irid ikollu karatteristiċi li jassorbu x-xokkijiet li jirriżultaw mill-impatti ta’ dawk il-movimenti jew inkella jkun adattat għal attività sportiva speċifika. Dawn il-karatteristiċi jistgħu jkunu, fost l-oħrajn, pads tal-arja jew tal-gass, speċjalment fil-parti tal-għarqub tax-xedd is-saqajn biex jassorbu x-xokkijiet. Madankollu, il-pett tax-xedd is-saqajn ma għandux dawn il-karatteristiċi. Barra minn hekk, il-pett ta’ barra ma għandu l-ebda karatteristika biex tappoġġa movimenti speċifiċi għal ċerta attività sportiva. Pereżempju, il-pett ta’ barra ma għandux l-istruttura tipika (disinn tal-pett ta’ barra) taż-żraben tat-tennis li jappoġġaw movimenti ta’ tidwir tipiċi tat-tennis. Il-pett ta’ barra li ma jiżloqx huwa aktar maħsub għall-mixi. Barra minn hekk, il-wiċċ la huwa msaħħaħ u lanqas ikkuttunat biex jagħti stabbiltà lis-sieq u bilanċ meta jsir il-mixi, il-qbiż, it-tidwir jew il-waqfien f’daqqa. Iż-żewġ strixxi vertikali (wesgħin madwar 5 mm) meħjuta maż-żewġ ġnubijiet tax-xedd is-saqajn u l-parti tal-istrixxa tal-lastiku mrikkba fuq il-wiċċ qrib il-pett mhumiex qed isaħħu l-wiċċ biżżejjed.

Konsegwentement, minkejja l-lazzijiet u l-pett ta’ barra li ma jiżloqx, l-oġġett huwa maħsub bħala xedd is-saqajn tar-rikreazzjoni għall-mixi.

(Ara wkoll il-paragrafi 3 sa 7 tan-Noti ta’ Spjegazzjoni tan-Nomenklatura Magħquda għas-subintestatura 6404 11 00 ).

Għaldaqstant, l-oġġett għandu jiġi kklassifikat taħt il-kodiċi NM 6404 19 90 bħala xedd is-saqajn bil-pett ta’ barra tal-lastiku u bil-wiċċ magħmul minn materjali tessili oħrajn.