EUR-Lex Access to European Union law
This document is an excerpt from the EUR-Lex website
Document 32023R1182
Regulation (EU) 2023/1182 of the European Parliament and of the Council of 14 June 2023 on specific rules relating to medicinal products for human use intended to be placed on the market in Northern Ireland and amending Directive 2001/83/EC (Text with EEA relevance)
Regolament (UE) 2023/1182 tal-Parlament Ewropew u tal-Kunsill tal-14 ta’ Ġunju 2023 dwar regoli speċifiċi relatati ma’ prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq u li jemenda d-Direttiva 2001/83/KE (Test b’rilevanza għaż-ŻEE)
Regolament (UE) 2023/1182 tal-Parlament Ewropew u tal-Kunsill tal-14 ta’ Ġunju 2023 dwar regoli speċifiċi relatati ma’ prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq u li jemenda d-Direttiva 2001/83/KE (Test b’rilevanza għaż-ŻEE)
PE/20/2023/REV/2
ĠU L 157, 20.6.2023, p. 1–7
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
20.6.2023 |
MT |
Il-Ġurnal Uffiċjali tal-Unjoni Ewropea |
L 157/1 |
REGOLAMENT (UE) 2023/1182 TAL-PARLAMENT EWROPEW U TAL-KUNSILL
tal-14 ta’ Ġunju 2023
dwar regoli speċifiċi relatati ma’ prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq u li jemenda d-Direttiva 2001/83/KE
(Test b’rilevanza għaż-ŻEE)
Il-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 114 u l-Artikolu 168(4), il-punt (c), tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew (1),
Wara li kkonsultaw lill-Kumitat tar-Reġjuni,
Filwaqt li jaġixxu skont il-proċedura leġiżlattiva ordinarja (2),
Billi:
(1) |
Il-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (il-“Ftehim dwar il-Ħruġ”) ġie konkluż f’isem l-Unjoni permezz tad-Deċiżjoni tal-Kunsill (UE) 2020/135 (3) u daħal fis-seħħ fl-1 ta’ Frar 2020. Il-perjodu ta’ tranżizzjoni msemmi fl-Artikolu 126 tal-Ftehim dwar il-Ħruġ, li matulu l-liġi tal-Unjoni baqgħet tapplika għar-Renju Unit u fir-Renju Unit f’konformità mal-Artikolu 127 tal-Ftehim dwar il-Ħruġ, intemm fil-31 ta’ Diċembru 2020. |
(2) |
Il-Protokoll dwar l-Irlanda/l-Irlanda ta’ Fuq (il-“Protokoll”) jifforma parti integrali mill-Ftehim dwar il-Ħruġ. |
(3) |
Id-dispożizzjonijiet tal-liġi tal-Unjoni elenkati fl-Anness 2 tal-Protokoll japplikaw, bil-kundizzjonijiet stabbiliti f’dak l-Anness, għar-Renju Unit u fir-Renju Unit fir-rigward tal-Irlanda ta’ Fuq. Dik il-lista tinkludi d-Direttiva 2001/83/KE tal-Parlament Ewropew u tal-Kunsill (4) u r-Regolament (KE) Nru 726/2004 tal-Parlament Ewropew u tal-Kunsill (5). Għalhekk, il-prodotti mediċinali introdotti fis-suq fl-Irlanda ta’ Fuq iridu jikkonformaw ma’ dawk id-dispożizzjonijiet tal-liġi tal-Unjoni. |
(4) |
Id-Direttiva 2001/83/KE tistabbilixxi regoli għall-prodotti mediċinali għall-użu mill-bniedem u r-Regolament (KE) Nru 726/2004 jistabbilixxi l-proċeduri tal-Unjoni għall-awtorizzazzjoni ta’ prodotti mediċinali għall-użu mill-bniedem. |
(5) |
Sabiex titqies is-sitwazzjoni speċifika tal-Irlanda ta’ Fuq, huwa xieraq li jiġu adottati regoli speċifiċi relatati mal-introduzzjoni fis-suq fl-Irlanda ta’ Fuq ta’ prodotti mediċinali għall-użu mill-bniedem. |
(6) |
Huwa xieraq li jiġi ċċarat li d-dispożizzjonijiet tal-liġi tal-Unjoni elenkati fl-Anness 2 tal-Protokoll jenħtieġ li japplikaw fir-rigward tal-prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq, sakemm ma jiġux stabbiliti regoli speċifiċi f’dan ir-Regolament. Fejn japplikaw regoli speċifiċi ta’ dan ir-Regolament, u teżisti xi inkonsistenza bejn dawk ir-regoli speċifiċi ta’ dan ir-Regolament u d-dispożizzjonijiet tal-liġi tal-Unjoni elenkati fl-Anness 2 tal-Protokoll, jenħtieġ li jieħdu preċedenza dawk ir-regoli speċifiċi ta’ dan ir-Regolament. |
(7) |
Barra minn hekk, huwa importanti li jiġi żgurat li l-applikazzjoni tar-regoli speċifiċi stabbiliti f’dan ir-Regolament ma twassalx għal riskju akbar għas-saħħa pubblika fis-suq intern. |
(8) |
Ir-regoli speċifiċi jenħtieġ li jinkludu projbizzjoni kontra l-wiri tal-karatteristiċi ta’ sigurtà msemmija fid-Direttiva 2001/83/KE fuq l-imballaġġ ta’ barra jew, fejn ma jkun hemm l-ebda imballaġġ ta’ barra, fuq l-imballaġġ immedjat tal-prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq, u projbizzjoni kontra l-introduzzjoni fis-suq fl-Irlanda ta’ Fuq ta’ prodotti mediċinali ġodda u innovattivi li jkunu ngħataw awtorizzazzjoni għall-"marketing" f’konformità mar-Regolament (KE) Nru 726/2004. Barra minn hekk, ir-regoli speċifiċi jenħtieġ li jinkludu ċerti rekwiżiti ta’ tikkettar għall-prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq. B’konsegwenza ta’ dan, jenħtieġ li r-Regolament Delegat tal-Kummissjoni (UE) 2016/161 (6) ma japplikax għall-prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq. |
(9) |
Fir-rigward ta’ prodotti mediċinali ġodda u innovattivi, jenħtieġ li l-awtoritajiet kompetenti tar-Renju Unit ikunu jistgħu jawtorizzaw l-introduzzjoni fis-suq ta’ dawk il-prodotti mediċinali fl-Irlanda ta’ Fuq dment li jiġu ssodisfati ċerti kundizzjonijiet, jiġifieri li l-awtorizzazzjoni tingħata f’konformità mal-liġi tar-Renju Unit u li l-prodotti mediċinali jiġu introdotti fis-suq fl-Irlanda ta’ Fuq skont it-termini tal-awtorizzazzjoni mogħtija mill-awtoritajiet kompetenti tar-Renju Unit, li dawk il-prodotti mediċinali jikkonformaw ma’ ċerti rekwiżiti ta’ tikkettar, u li garanziji bil-miktub ikunu ġew ipprovduti mir-Renju Unit lill-Kummissjoni. |
(10) |
Barra minn hekk, jenħtieġ li jiġu stabbiliti salvagwardji xierqa għall-Unjoni sabiex jiġi żgurat li l-applikazzjoni tar-regoli speċifiċi ma żżidx ir-riskji għas-saħħa pubblika fis-suq intern. Jenħtieġ li tali salvagwardji jinkludu monitoraġġ kontinwu mill-awtorità kompetenti tar-Renju Unit dwar l-introduzzjoni fis-suq fl-Irlanda ta’ Fuq ta’ prodotti mediċinali għall-użu mill-bniedem soġġetti għal regoli speċifiċi stabbiliti f’dan ir-Regolament u projbizzjoni totali kontra l-ġarr lejn jew l-introduzzjoni fis-suq fi Stat Membru ta’ prodotti mediċinali soġġetti għar-regoli speċifiċi stabbiliti f’dan ir-Regolament. |
(11) |
Jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tas-sospensjoni tal-applikazzjoni ta’ wħud mir-regoli speċifiċi jew tar-regoli speċifiċi kollha stabbiliti f’dan ir-Regolament fejn ikun hemm evidenza li r-Renju Unit mhux qed jieħu miżuri xierqa biex jindirizza ksur serju jew ripetut ta’ dawk ir-regoli speċifiċi. F’każ bħal dan, huwa xieraq li jiġi previst mekkaniżmu formali ta’ informazzjoni u ta’ konsultazzjoni b’limiti ta’ żmien ċari li fihom il-Kummissjoni jenħtieġ li taġixxi. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (7). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati. |
(12) |
Fejn ir-regoli speċifiċi għall-introduzzjoni fis-suq fl-Irlanda ta’ Fuq ta’ prodotti mediċinali għall-użu mill-bniedem huma sospiżi, id-dispożizzjonijiet rilevanti tal-liġi tal-Unjoni elenkati fl-Anness 2 tal-Protokoll jenħtieġ li jerġgħu japplikaw għal tali prodotti mediċinali. |
(13) |
Sabiex tiġi żgurata reazzjoni effettiva u rapida għal kwalunkwe riskju akbar għas-saħħa pubblika, jenħtieġ li dan ir-Regolament jipprevedi l-possibbiltà li l-Kummissjoni tadotta atti delegati f’konformità ma’ proċedura ta’ urġenza. |
(14) |
Minħabba li l-objettivi ta’ dan ir-Regolament ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba raġuni ta’ skala jew effetti tal-azzjoni, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l- objettivi. |
(15) |
Huwa xieraq li jiġi previst perjodu ta’ tranżizzjoni għall-applikazzjoni tar-regoli speċifiċi stabbiliti f’dan ir-Regolament għall-prodotti mediċinali għall-użu mill-bniedem li diġà jinsabu fis-suq fl-Irlanda ta’ Fuq. |
(16) |
Bħala konsegwenza tal-adozzjoni ta’ dan ir-Regolament, id-Direttiva 2001/83/KE jenħtieġ li tiġi emendata skont dan, |
ADOTTAW DAN IR-REGOLAMENT:
Artikolu 1
Suġġett u kamp ta’ applikazzjoni
1. Dan ir-Regolament jistabbilixxi regoli speċifiċi relatati mal-prodotti mediċinali għall-użu mill-bniedem maħsuba biex jiġu introdotti fis-suq fl-Irlanda ta’ Fuq f’konformità mal-Artikolu 6 tad-Direttiva 2001/83/KE.
2. Dan ir-Regolament jistabbilixxi wkoll regoli dwar is-sospensjoni tal-applikazzjoni tar-regoli speċifiċi stabbiliti f’dan ir-Regolament.
3. Id-dispożizzjonijiet tal-liġi tal-Unjoni elenkati fl-Anness 2 tal-Protokoll dwar l-Irlanda/l-Irlanda ta’ Fuq (il-“Protokoll”) għandhom japplikaw fir-rigward tal-introduzzjoni fis-suq fl-Irlanda ta’ Fuq ta’ prodotti mediċinali kif imsemmi fil-paragrafu 1 ta’ dan l-Artikolu, sakemm ma jkunux stabbiliti regoli speċifiċi f’dan ir-Regolament.
Artikolu 2
Definizzjonijiet
Għall-finijiet ta’ dan ir-Regolament, japplikaw id-definizzjonijiet stabbiliti fl-Artikolu 2 tar-Regolament (KE) Nru 726/2004, inklużi d-definizzjonijiet stabbiliti fl-Artikolu 1 tad-Direttiva 2001/83/KE.
Artikolu 3
Regoli speċifiċi għall-prodotti mediċinali kif imsemmi fl-Artikolu 1(1)
1. L-awtoritajiet kompetenti tar-Renju Unit fir-rigward tal-Irlanda ta’ Fuq jistgħu jippermettu li l-prodotti mediċinali kif imsemmi fl-Artikolu 1(1) ta’ dan ir-Regolament jiġu importati fl-Irlanda ta’ Fuq minn partijiet oħra tar-Renju Unit minn detenturi ta’ awtorizzazzjoni għad-distribuzzjoni bl-ingrossa li ma jkollhomx fil-pussess tagħhom awtorizzazzjoni tal-manifattura rilevanti, dment li jiġu ssodisfati l-kundizzjonijiet stabbiliti fl-Artikolu 40(1a), l-ewwel subparagrafu, il-punti (a) sa (d), tad-Direttiva 2001/83/KE.
2. Il-karatteristiċi ta’ sigurtà msemmija fl-Artikolu 54, il-punt (o), tad-Direttiva 2001/83/KE ma għandhomx jidhru fuq l-imballaġġ ta’ barra jew, fejn ma jkun hemm l-ebda imballaġġ ta’ barra, fuq l-imballaġġ immedjat tal-prodotti mediċinali kif imsemmi fl-Artikolu 1(1) ta’ dan ir-Regolament.
3. Meta prodott mediċinali kif imsemmi fl-Artikolu 1(1) ta’ dan ir-Regolament ikollu l-karatteristiċi ta’ sigurtà msemmija fl-Artikolu 54, il-punt (o), tad-Direttiva 2001/83/KE, dawk il-karatteristiċi għandhom jitneħħew kompletament jew jitgħattew.
4. Il-persuna kwalifikata msemmija fl-Artikolu 48 tad-Direttiva 2001/83/KE għandha, fil-każ ta’ prodott mediċinali kif imsemmi fl-Artikolu 1(1) ta’ dan ir-Regolament, tiżgura li l-karatteristiċi ta’ sigurtà msemmija fl-Artikolu 54, il-punt (o), ta’ dik Direttiva ma jkunux twaħħlu fuq l-imballaġġ tal-prodott mediċinali.
5. Id-detenturi ta’ awtorizzazzjoni għad-distribuzzjoni bl-ingrossa ma għandhomx ikunu meħtieġa li:
(a) |
jivverifikaw il-prodotti mediċinali kif imsemmi fl-Artikolu 1(1) ta’ dan ir-Regolament f’konformità mal-Artikolu 80, l-ewwel paragrafu, il-punt (ca), tad-Direttiva 2001/83/KE; |
(b) |
iżommu rekords fir-rigward tal-informazzjoni msemmija fl-Artikolu 80, l-ewwel paragrafu, il-punt (e), l-aħħar inċiż, tad-Direttiva 2001/83/KE. |
6. Għall-forniment kollu tal-prodotti mediċinali kif imsemmi fl-Artikolu 1(1) ta’ dan ir-Regolament lil persuna awtorizzata jew intitolata li tipprovdi l-prodotti mediċinali lill-pubbliku, kif imsemmi fl-Artikolu 82 tad-Direttiva 2001/83/KE, fir-rigward tar-Renju Unit fir-rigward tal-Irlanda ta’ Fuq, il-grossist awtorizzat ma għandux ikun meħtieġ li jehmeż dokument li jagħmilha possibbli li jiġi aċċertat in-numru tal-lott tal-prodotti mediċinali f’konformità mal-Artikolu 82, l-ewwel paragrafu, l-aħħar inċiż, ta’ dik id-Direttiva.
Artikolu 4
Regoli speċifiċi għall-prodotti mediċinali kif imsemmi fl-Artikolu 1(1) ta’ dan ir-Regolament li jappartjenu għall-kategoriji msemmija fl-Artikolu 3(1) u (2) tar-Regolament (KE) Nru 726/2004
1. Prodott mediċinali kif imsemmi fl-Artikolu 1(1) ta’ dan ir-Regolament li jappartjeni għall-kategoriji msemmija fl-Artikolu 3(1) u (2) tar-Regolament (KE) Nru 726/2004 li jkun ingħata awtorizzazzjoni għall-"marketing" f’konformità mal-Artikolu 10 ta’ dak ir-Regolament ma għandux jiġi introdott fis-suq fl-Irlanda ta’ Fuq.
2. Minkejja l-paragrafu 1 ta’ dan l-Artikolu, prodott mediċinali kif imsemmi fl-Artikolu 1(1) ta’ dan ir-Regolament li jappartjeni għall-kategoriji msemmija fl-Artikolu 3(1) u (2) tar-Regolament (KE) Nru 726/2004 jista’ jiġi introdott fis-suq fl-Irlanda ta’ Fuq dment li jiġu ssodisfati l-kundizzjonijiet kollha li ġejjin:
(a) |
l-awtoritajiet kompetenti tar-Renju Unit ikunu awtorizzaw l-introduzzjoni fis-suq tal-prodott mediċinali f’konformità mal-liġi tar-Renju Unit u skont it-termini tal-awtorizzazzjoni mogħtija minnhom; |
(b) |
il-prodott mediċinali kkonċernat ikun ittikkettat f’konformità mal-Artikolu 5 ta’ dan ir-Regolament; |
(c) |
ir-Renju Unit jipprovdi garanziji bil-miktub lill-Kummissjoni f’konformità mal-Artikolu 8 ta’ dan ir-Regolament. |
Artikolu 5
Regoli speċifiċi għat-tikkettar tal-prodotti mediċinali kif imsemmi fl-Artikolu 1(1)
Il-prodotti mediċinali kif imsemmi fl-Artikolu 1(1) għandu jkollhom tikketta individwali li tikkonforma mar-rekwiżiti li ġejjin:
(a) |
għandha titwaħħal mal-imballaġġ tal-prodott mediċinali f’post li jidher b’tali mod li tidher faċilment, tinqara b’mod ċar, u ma titħassarx; ma għandhiex tkun bl-ebda mod moħbija, mgħottija, imnaqqsa jew imfixkla b’xi kitba oħra jew stampi jew xi materjal ieħor li jintervjeni; |
(b) |
għandha tgħid il-kliem “UK only”. |
Artikolu 6
Monitoraġġ ta’ prodotti mediċinali kif imsemmi fl-Artikolu 1(1)
L-awtorità kompetenti tar-Renju Unit għandha timmonitorja kontinwament l-introduzzjoni fis-suq fl-Irlanda ta’ Fuq ta’ prodotti mediċinali kif imsemmi fl-Artikolu 1(1) u l-infurzar effettiv tar-regoli speċifiċi stabbiliti fl-Artikoli 3, 4 u 5.
Artikolu 7
Projbizzjoni kontra l-ġarr lejn Stat Membru jew l-introduzzjoni fis-suq ta’ Stat Membru ta’ prodotti mediċinali kif imsemmi fl-Artikolu 1(1)
1. Il-prodotti mediċinali kif imsemmi fl-Artikolu 1(1) ma għandhomx jinġarru mill-Irlanda ta’ Fuq lejn Stat Membru jew jiġu introdotti fis-suq ta’ Stat Membru.
2. L-Istati Membri għandhom japplikaw penali effettivi, proporzjonati u dissważivi fil-każ ta’ nuqqas ta’ konformità mar-regoli speċifiċi stabbiliti f’dan ir-Regolament.
Artikolu 8
Garanziji bil-miktub ipprovduti mir-Renju Unit lill-Kummissjoni
Ir-Renju Unit għandu jipprovdi garanziji bil-miktub lill-Kummissjoni li l-introduzzjoni fis-suq ta’ prodotti mediċinali kif imsemmi fl-Artikolu 1(1) ma jżidx ir-riskju għas-saħħa pubblika fis-suq intern u li tali prodotti mediċinali mhumiex ser jinġarru lejn Stat Membru, inklużi garanziji fis-sens li:
(a) |
l-operaturi ekonomiċi jikkonformaw mar-rekwiżiti tat-tikkettar stabbiliti fl-Artikolu 5; |
(b) |
ikun hemm fis-seħħ u jitwettqu monitoraġġ, infurzar u kontrolli effettivi tar-regoli speċifiċi stabbiliti fl-Artikoli 3, 4 u 5, permezz ta’, fost l-oħrajn, spezzjonijiet u awditi. |
Artikolu 9
Sospensjoni tar-regoli speċifiċi stabbiliti fl-Artikoli 3, 4 u 5
1. Il-Kummissjoni għandha timmonitorja kontinwament l-applikazzjoni mir-Renju Unit tar-regoli speċifiċi stabbiliti fl-Artikoli 3, 4 u 5.
2. Fejn ikun hemm evidenza li r-Renju Unit mhux qed jieħu miżuri xierqa biex jindirizza ksur serju jew ksur ripetut tar-regoli speċifiċi stabbiliti fl-Artikoli 3, 4 u 5, il-Kummissjoni għandha tinforma lir-Renju Unit permezz ta’ notifika bil-miktub.
Għal perjodu ta’ tliet xhur mid-data tan-notifika bil-miktub imsemmija fl-ewwel subparagrafu, il-Kummissjoni għandha tidħol f’konsultazzjonijiet mar-Renju Unit bil-għan li tirrimedja s-sitwazzjoni li wasslet għal dik in-notifika bil-miktub. F’każijiet ġustifikati, il-Kummissjoni tista’ testendi dak il-perjodu bi tliet xhur oħra.
3. Jekk is-sitwazzjoni li twassal għan-notifika bil-miktub imsemmija fil-paragrafu 2, l-ewwel subparagrafu, ta’ dan l-Artikolu ma tiġix rimedjata fil-perjodu msemmi fil-paragrafu 2, it-tieni subparagrafu, ta’ dan l-Artikolu, il-Kummissjoni għandha s-setgħa li tadotta att delegat f’konformità mal-Artikoli 10 u 11 biex jissupplimenta dan ir-Regolament billi jispeċifika r-regoli speċifiċi fost dawk imsemmija fil-paragrafu 1 ta’ dan l-Artikolu, li l-applikazzjoni tagħhom għandha tiġi sospiża b’mod temporanju jew permanenti.
4. Meta jkun ġie adottat att delegat f’konformità mal-paragrafu 3 ta’ dan l-Artikolu, ir-regoli speċifiċi tal-Artikoli 3, 4 u 5 kif speċifikat f’dak l-att delegat, għandhom jieqfu japplikaw fl-ewwel jum tax-xahar wara d-dħul fis-seħħ ta’ dak l-att delegat.
5. Meta s-sitwazzjoni li twassal għall-adozzjoni tal-att delegat f’konformità mal-paragrafu 3 ta’ dan l-Artikolu tkun ġiet rimedjata, il-Kummissjoni għandha tadotta att delegat konformità mal-Artikoli 10 u 11 biex jissupplimenta dan ir-Regolament billi jispeċifika dawk ir-regoli speċifiċi sospiżi tal-Artikoli 3, 4 u 5 li jkunu jerġgħu japplikaw.
6. Fejn att delegat ġie adottat konformità mal-paragrafu 5 ta’ dan l-Artikolu,ir-regoli speċifiċi tal-Artikoli 3, 4 u 5 kif speċifikat f’dak l-att delegat għandhom jerġgħu japplikaw fl-ewwel jum tax-xahar wara d-dħul fis-seħħ ta’ dak l-att delegat.
Artikolu 10
Eżerċizzju tad-delega
1. Is-setgħa ta’ adozzjoni ta’ atti delegati hija mogħtija lill-Kummissjoni suġġett għall-kundizzjonijiet stabbiliti f’dan l-Artikolu.
2. Is-setgħa ta’ adozzjoni ta’ atti delegati msemmija fl-Artikolu 9 għandha tingħata lill-Kummissjoni għal perjodu ta’ 5 snin mid-data tal-applikazzjoni msemmija fl-Artikolu 14. Il-Kummissjoni għandha tfassal rapport fir-rigward tad-delega ta’ setgħa mhux aktar tard minn disa’ xhur qabel it-tmiem tal-perjodu ta’ ħames snin. Id-delega ta’ setgħa għandha tiġi estiża awtomatikament għal perjodi ta’ żmien identiċi ħlief jekk il-Parlament Ewropew jew il-Kunsill joġġezzjonaw għal tali estensjoni mhux iktar tard minn tliet xhur qabel it-tmiem ta’ kull perjodu.
3. Id-delega tas-setgħa msemmija fl-Artikolu 9 tista’ tiġi revokata fi kwalunkwe mument mill-Parlament Ewropew jew mill-Kunsill. Deċiżjoni li tirrevoka għandha ttemm id-delega ta’ setgħa speċifikata f’dik id-deċiżjoni. Din għandha ssir effettiva fil-jum wara l-pubblikazzjoni tad-deċiżjoni f’Il-Ġurnal Uffiċjali tal-Unjoni Ewropea jew f’data aktar tard speċifikata fih. Ma għandha taffettwa l-validità tal-ebda att delegat li jkun diġà fis-seħħ.
4. Qabel ma tadotta att delegat, il-Kummissjoni għandha tikkonsulta esperti nnominati minn kull Stat Membru skont il-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet.
5. Hekk kif tadotta att delegat, il-Kummissjoni għandha tinnotifikah simultanjament lill-Parlament Ewropew u lill-Kunsill.
6. Att delegat adottat skont l-Artikolu 9 għandu jidħol fis-seħħ biss jekk ma tiġix espressa oġġezzjoni mill-Parlament Ewropew jew mill-Kunsill fi żmien xahrejn min-notifika ta’ dak l-att lill-Parlament Ewropew u lill-Kunsill jew jekk, qabel ma jiskadi dak il-perjodu, il-Parlament Ewropew u l-Kunsill ikunu t-tnejn infurmaw lill-Kummissjoni li mhumiex sejrin joġġezzjonaw. Dak il-perjodu għandu jiġi estiż b’xahrejn fuq inizjattiva tal-Parlament Ewropew jew tal-Kunsill.
Artikolu 11
Proċedura ta’ urġenza
1. L-atti delegati adottati taħt dan l-Artikolu għandhom jidħlu fis-seħħ mingħajr dewmien u għandhom japplikaw sakemm ma tkun ġiet espressa l-ebda oġġezzjoni skont il-paragrafu 2. In-notifika ta’ att delegat lill-Parlament Ewropew u lill-Kunsill għandha tagħti r-raġunijiet li għalihom tkun intużat il-proċedura ta’ urġenza.
2. Il-Parlament Ewropew jew il-Kunsill jistgħu joġġezzjonaw għal att delegat skont il-proċedura msemmija fl-Artikolu 10(6). F’dak il-każ, il-Kummissjoni għandha tħassar l-att minnufih wara n-notifika tad-deċiżjoni ta’ oġġezzjoni mill-Parlament Ewropew jew mill-Kunsill.
Artikolu 12
Dispożizzjonijiet tranżizzjonali għar-rekwiżiti ta’ salvagwardja
Il-prodotti mediċinali li jkunu ġew introdotti fis-suq b’mod legali fl-Irlanda ta’ Fuq qabel id-data tal-applikazzjoni msemmija fl-Artikolu 14, u li ma jkunux ippakkjati mill-ġdid jew ittikkettati mill-ġdid wara dik id-data, jistgħu jibqgħu disponibbli fis-suq fl-Irlanda ta’ Fuq sad-data tal-iskadenza tagħhom mingħajr ma jkunu meħtieġa jikkonformaw mar-regoli speċifiċi stabbiliti fl-Artikoli 3, 4 u 5.
Artikolu 13
Emenda għad-Direttiva 2001/83/KE
L-Artikolu 5a tad-Direttiva 2001/83/KE jitħassar b’effett mid-data ta’ applikazzjoni msemmija fl-Artikolu 14 ta’ dan ir-Regolament.
Artikolu 14
Dħul fis-seħħ u applikazzjoni
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Jannar 2025, dment li r-Renju Unit ikun ipprovda l-garanziji bil-miktub imsemmija fl-Artikolu 8 u li l-Kummissjoni tkun ippubblikat qabel dik id-data l-avviż imsemmi fil-ħames paragrafu ta’ dan l-Artikolu.
Fil-każ li dawk il-garanziji bil-miktub jingħataw qabel l-1 ta’ Jannar 2025 jew aktar tard minn dik id-data, dan ir-Regolament għandu japplika mill-ewwel jum tax-xahar wara x-xahar li matulu r-Renju Unit jipprovdi dawk il-garanziji bil-miktub.
Fi żmien xahar minn meta tirċievi dawk il-garanziji bil-miktub, il-Kummissjoni għandha tipprovdi rapport lill-Parlament Ewropew u lill-Kunsill bil-valutazzjoni tagħha ta’ dawk il-garanziji bil-miktub.
Il-Kummissjoni għandha tippubblika avviż f’Il-Ġurnal Uffiċjali tal-Unjoni Ewropea li jindika d-data minn meta jibda japplika dan ir-Regolament.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Strasburgu, l-14 ta’ Ġunju 2023.
Għall-Parlament Ewropew
Il-President
R. METSOLA
Għall-Kunsill
Il-President
J. ROSWALL
(1) Opinjoni tas-27 ta’ April 2023 (għadha ma ġietx ippubblikata fil-Ġurnal Uffiċjali).
(2) Il-Pożizzjoni tal-Parlament Ewropew tad-9 ta’ Mejju 2023 (għadha ma ġietx ippubblikata fil-Ġurnal Uffiċjali) u d-Deċiżjoni tal-Kunsill tat-30 ta’ Mejju 2023.
(3) Id-Deċiżjoni tal-Kunsill (UE) 2020/135 tat-30 ta’ Jannar 2020 dwar il-konklużjoni tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (ĠU L 29, 31.1.2020, p. 1).
(4) Id-Direttiva 2001/83/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità li għandu x’jaqsam ma’ prodotti mediċinali għall-użu mill-bniedem (ĠU L 311, 28.11.2001, p. 67).
(5) Ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri tal-Unjoni għall-awtorizzazzjoni u s-sorveljanza ta’ prodotti mediċinali għall-użu mill-bniedem u li jistabbilixxi l-Aġenzija Ewropea għall-Mediċini (ĠU L 136, 30.4.2004, p. 1).
(6) Ir-Regolament Delegat tal-Kummissjoni (UE) 2016/161 tat-2 ta’ Ottubru 2015 li jissupplimenta lid-Direttiva 2001/83/KE tal-Parlament Ewropew u tal-Kunsill billi jistabbilixxi r-regoli dettaljati dwar il-karatteristiki tas-sigurtà li jkunu jidhru fuq il-pakketti tal-prodotti mediċinali għall-użu mill-bniedem (ĠU L 32, 9.2.2016, p. 1).