(1)

F’Ottubru 2020, permezz tar-Regolament ta’ Implimentazzjoni (UE) 2020/1408 (2), il-Kummissjoni Ewropea (“il-Kummissjoni”) imponiet dazju anti-dumping definittiv fuq l-importazzjonijiet ta’ ċerti pjanċi u kojls tal-azzar inossidabbli llaminati bis-sħana (hot rolled stainless steel sheets and coils, “SSHR”) li joriġinaw mill-Indoneżja, mir-Repubblika tal-Poplu taċ-Ċina (“RPĊ”) u mit-Tajwan. Id-dazji anti-dumping fis-seħħ ivarjaw bejn id-9,2 % u d-19 % għall-importazzjonijiet li joriġinaw mir-RPĊ, bejn l-4,1 % u s-7,5 % għall-importazzjonijiet li joriġinaw mit-Tajwan u ġew stabbiliti għal 17,3 % għall-importazzjonijiet li joriġinaw mill-Indoneżja. L-investigazzjoni li wasslet għal dawn id-dazji (“l-investigazzjoni oriġinali”) inbdiet f’Awwissu 2019 (3).

(2)

Fis-17 ta’ Ġunju 2022, il-Kummissjoni rċeviet talba skont l-Artikoli 13(3) u 14(5) tar-Regolament bażiku, biex tinvestiga ċ-ċirkomvenzjoni possibbli tal-miżuri anti-dumping fis-seħħ u tagħmel l-importazzjonijiet ta’ SSHR ikkonsenjati mir-Repubblika tat-Turkija (“it-Turkija”), kemm jekk iddikjarati li joriġinaw mit-Turkija kif ukoll jekk le, soġġetti għal reġistrazzjoni.

(3)

It-talba ġiet ippreżentata mill-Assoċjazzjoni Ewropea tal-Azzar “EUROFER” (“l-applikant”).

(4)

It-talba kien fiha biżżejjed evidenza ta’ bidla fix-xejra tal-kummerċ li tinvolvi esportazzjonijiet mill-Indoneżja u mit-Turkija lejn l-Unjoni, li tkun seħħet wara li ġew imposti l-miżuri fuq l-SSHR. Id-data pprovduta fit-talba wriet bidla sinifikanti fix-xejra tal-kummerċ inkluża żieda sinifikanti fl-esportazzjonijiet ta’ ċangaturi tal-azzar inossidabbli, il-materja prima ewlenija għall-produzzjoni ta’ SSHR, mill-Indoneżja lejn it-Turkija u żieda sinifikanti fl-esportazzjonijiet ta’ SSHR mit-Turkija lejn l-Unjoni. Din il-bidla dehret li rriżultat mill-kunsinna ta’ SSHR mit-Turkija lill-Unjoni, wara li jkunu għaddew minn operazzjonijiet ta’ assemblaġġ jew ta’ kompletazzjoni fit-Turkija. L-evidenza wriet li tali operazzjonijiet ta’ assemblaġġ jew ta’ kompletazzjoni bdew fi żmien il-bidu tal-investigazzjoni anti-dumping li wasslet għad-dazji fis-seħħ, u li ma kienx hemm raġuni valida jew ġustifikazzjoni ekonomika suffiċjenti għajr l-impożizzjoni tad-dazju għall-prattika inkwistjoni.

(5)

Barra minn hekk, it-talba kien fiha biżżejjed evidenza li turi li ċ-ċangaturi tal-azzar inossidabbli li joriġinaw mill-Indoneżja kienu jikkostitwixxu aktar minn 60 % tal-valur totali tal-partijiet tal-SSHR, u li l-valur miżjud mal-partijiet matul l-operazzjonijiet ta’ assemblaġġ jew ta’ kompletazzjoni kien inqas minn 25 % tal-kost tal-manifattura.

(6)

Barra minn hekk, it-talba kien fiha biżżejjed evidenza li turi li l-prattika, il-proċess jew il-ħidma kienet qed timmina l-effetti ta’ rimedju tad-dazji anti-dumping fis-seħħ f’termini ta’ kwantità u prezzijiet. Deher li kienu daħlu volumi sinifikanti ta’ importazzjonijiet ta’ SSHR fis-suq tal-Unjoni. Barra minn hekk, kien hemm biżżejjed evidenza li għandha tendenza turi li l-importazzjonijiet ta’ SSHR saru bi prezzijiet dannużi.

(7)

Fl-aħħar nett, it-talba kien fiha biżżejjed evidenza li l-importazzjonijiet ta’ SSHR saru bi prezzijiet oġġett ta’ dumping fir-rigward tal-valur normali stabbilit qabel.

(8)

Il-prodott ikkonċernat miċ-ċirkomvenzjoni possibbli huwa prodotti tal-azzar inossidabbli llaminati ċatti, kemm jekk ikunu f’kojls kif ukoll jekk le (inklużi prodotti maqtugħa skont id-daqs u li jkunu strixxi dojoq), li ma jinħadmux aktar wara li jiġu llaminati bis-sħana u bl-esklużjoni ta’ prodotti, mhux f’kojls, b’wisa’ ta’ 600 mm jew aktar u bi ħxuna li taqbeż 10 mm, ikklassifikati fid-data tad-dħul fis-seħħ tar-Regolament ta’ Implimentazzjoni (UE) 2020/1408 skont il-kodiċijiet SA 7219 11, 7219 12, 7219 13, 7219 14, 7219 22, 7219 23, 7219 24, 7220 11 u 7220 12 u li joriġinaw mill-Indoneżja (“il-prodott ikkonċernat”). Dan huwa l-prodott li japplikaw għalih il-miżuri fis-seħħ bħalissa.

(9)

Il-prodott investigat huwa l-istess bħal dak definit fil-premessa preċedenti, li bħalissa jaqa’ taħt il-kodiċijiet SA 7219 11, 7219 12, 7219 13, 7219 14, 7219 22, 7219 23, 7219 24, 7220 11 u 7220 12, iżda kkonsenjat mit-Turkija, kemm jekk iddikjarat li joriġina mit-Turkija kif ukoll jekk le (il-kodiċijiet TARIC 7219110010, 7219121010, 7219129010, 7219131010, 7219139010, 7219141010, 7219149010, 7219221010, 7219229010, 7219230010, 7219240010, 7220110010 u 7220120010) (“il-prodott investigat”).

(10)

L-investigazzjoni wriet li l-SSHR esportati mill-Indoneżja lejn l-Unjoni u l-SSHR ikkonsenjati mit-Turkija, kemm jekk joriġinaw mit-Turkija kif ukoll jekk le, għandhom l-istess karatteristiċi fiżiċi u kimiċi bażiċi u l-istess użi, u għalhekk jitqiesu bħala prodotti simili skont it-tifsira tal-Artikolu 1(4) tar-Regolament bażiku.

(11)

Wara l-iżvelar, Marcegaglia Specialties S.P.A. (“Marcegaglia”), importatur u utent Ewropew tal-SSHR, affermat li l-importazzjonijiet ta’ SSHR Torok tagħha kollha magħmula minn ċangaturi Indoneżjani kienu kojls suwed tal-SSHR li għalihom ma kien hemm kważi l-ebda suq ħieles fl-Unjoni. Il-kumpanija għamlet distinzjoni bejn l-SSHR bojod u l-SSHR suwed fil-prodott ikkonċernat. Il-kojls suwed tal-SSHR jeħtieġ li jitnaddfu u jiġu ttemprati qabel l-ipproċessar ulterjuri, u b’hekk l-użu tagħhom jiġi limitat esklużivament għar-riromblaturi. Marcegaglia affermat li hija l-uniku riromblu indipendenti, mhux integrat vertikalment, fl-Unjoni. B’hekk, peress li l-prodott importat mit-Turkija kien limitat għal kojls suwed tal-SSHR, ma kien hemm l-ebda kompetizzjoni mal-SSHR bojod immanifatturati u mibjugħa mill-produtturi tal-Unjoni fis-suq ħieles.

(12)

Il-Kummissjoni fakkret li l-għan ta’ din l-investigazzjoni kien li jiġi determinat jekk kienx hemm ċirkomvenzjoni. Ma kien hemm l-ebda bażi ġuridika biex jiġi rivedut l-ambitu tal-prodott tal-miżuri fil-kuntest ta’ din l-investigazzjoni. L-ambitu tal-prodott ġie stabbilit fl-investigazzjoni oriġinali u ġew inklużi l-kojls tal-SSHR kollha fid-definizzjoni tal-prodott. B’mod speċifiku, fl-investigazzjoni oriġinali ġie konkluż li l-kojls suwed u l-kojls bojod għandhom l-istess karatteristiċi fiżiċi u kimiċi bażiċi, li huma interkambjabbli u jaqgħu fl-ambitu tal-prodott (4). Għalhekk, ġiet miċħuda l-affermazzjoni.

(13)

Wara l-iżvelar, Çolakoğlu Metalurji A.Ş. (“Çolakoğlu”), produttur esportatur Tork, u l-Gvern tar-Repubblika tat-Turkija affermaw li l-Kummissjoni missha estendiet l-ambitu tal-investigazzjoni biex tinkludi l-ipproċessar ta’ ċangaturi tal-azzar inossidabbli Indoneżjani f’SSHR fl-Unjoni.

(14)

Kif spjegat fil-premessa (31), il-Kummissjoni fakkret li, filwaqt li din il-prattika kienet barra mill-kamp ta’ applikazzjoni ta’ din l-investigazzjoni, ħadet nota tal-affermazzjoni u se tkompli tanalizza jekk jenħtieġ li din il-prattika, jekk ikkonfermata, tkunx teħtieġ azzjoni ulterjuri mill-Kummissjoni.

(15)

Billi, wara li infurmat lill-Istati Membri, iddeterminat li kienet teżisti biżżejjed evidenza għall-bidu ta’ investigazzjoni skont l-Artikolu 13(3) tar-Regolament bażiku, il-Kummissjoni bdiet l-investigazzjoni u għamlet l-importazzjonijiet ta’ SSHR ikkonsenjati mit-Turkija, kemm jekk iddikjarat li joriġina mit-Turkija kif ukoll jekk le, soġġetti għal reġistrazzjoni, permezz tar-Regolament ta’ Implimentazzjoni tal-Kummissjoni (UE) 2022/1310 (5) (“ir-Regolament tal-bidu”).

(16)

Çolakoğlu argumentat li l-bidu tal-investigazzjoni ma kienx iġġustifikat minħabba nuqqas ta’ evidenza suffiċjenti, u għalhekk jenħtieġ li tintemm l-investigazzjoni.

(17)

Çolakoğlu affermat li hemm nuqqas ta’ bidla fix-xejra tal-kummerċ peress li, fin-nuqqas ta’ tnaqqis fl-importazzjonijiet ta’ SSHR mill-Indoneżja, iż-żieda fl-importazzjonijiet ta’ SSHR mit-Turkija, fiha nnifisha, li ma setgħetx possibbilment tissostitwixxi l-importazzjonijiet mill-Indoneżja, ma wrietx l-eżistenza ta’ bidla fix-xejra tal-kummerċ.

(18)

Huwa argumenta wkoll li l-prattika, il-proċess jew il-ħidma li qed isseħħ fit-Turkija ma kienet taqa’ fl-ebda waħda mill-kategoriji tar-raba’ subparagrafu tal-Artikolu 13(1) tar-Regolament bażiku. B’mod partikolari, ma kien hemm l-ebda evidenza pożittiva li seħħet kunsinna ta’ SSHR li toriġina mill-Indoneżja permezz tat-Turkija lill-Unjoni, u lanqas evidenza ta’ riorganizzazzjoni tax-xejriet u l-kanali tal-bejgħ. Barra minn hekk, il-prattika, il-proċess jew il-ħidma ma tistax tiġi kkwalifikata bħala modifika żgħira, billi l-prodott investigat huwa prodott downstream u, bħala tali, prodott differenti mill-materjali ta’ input tiegħu jew operazzjoni ta’ assemblaġġ, b’mod partikolari peress li l-prodott investigat u ċ-ċangaturi tal-azzar inossidabbli mhumiex ikklassifikati taħt l-istess intestaturi tariffarji.

(19)

Çolakoğlu affermat li kien hemm ġustifikazzjoni ekonomika biex isir investiment f’kapaċitajiet ta’ produzzjoni tal-azzar inossidabbli minħabba d-domanda għal prodotti tal-azzar inossidabbli fit-Turkija.

(20)

Çolakoğlu argumentat ukoll in-nuqqas ta’ dannu u li l-effetti ta’ rimedju ma kinux qed jiddgħajfu peress li i) b’sehem mis-suq ta’ 1 %, l-importazzjonijiet Torok ma kinux sinifikanti biex idgħajfu l-effett ta’ rimedju tad-dazju u ii) jekk jiddgħajfu l-effetti ta’ rimedju tad-dazju, dan ma jkunx minħabba l-importazzjonijiet ta’ SSHR mit-Turkija iżda pjuttost minħabba l-importazzjonijiet ta’ SSHR mill-Indoneżja, li komplew wara l-impożizzjoni tal-miżuri, u l-SSHR ipproċessati mill-produtturi tal-Unjoni minn ċangaturi tal-azzar importati mill-Indoneżja.

(21)

Barra minn hekk, Çolakoğlu argumentat li l-estensjoni tal-miżuri għat-Turkija tmur kontra l-interess tal-Unjoni, peress li dan iwassal għal żieda ulterjuri fil-prezzijiet, li fl-aħħar mill-aħħar taffettwa b’mod negattiv lill-utenti finali u l-konsumaturi.

(22)

Fl-aħħar nett, Çolakoğlu affermat li l-produtturi tal-Unjoni wettqu l-istess operazzjonijiet, jiġifieri l-ipproċessar ta’ ċangaturi tal-azzar inossidabbli Indoneżjani f’SSHR fl-Unjoni, saħansitra b’mod aktar wiesa’ mill-operazzjonijiet li qed iseħħu fit-Turkija. Għalhekk, talab li tintemm l-investigazzjoni jew, alternattivament, li l-ambitu tal-investigazzjoni jiġi estiż biex jinkludi l-ipproċessar ta’ ċangaturi tal-azzar inossidabbli Indoneżjani f’SSHR fl-Unjoni.

(23)

Kummenti simili waslu minn Marcegaglia, u mill-Gvern tar-Repubblika tat-Turkija.

(24)

Barra minn hekk, Marcegaglia affermat li l-importazzjoni ta’ ċangaturi tal-azzar inossidabbli mill-Indoneżja għall-ipproċessar ulterjuri fit-Turkija kienet tikkostitwixxi operazzjoni ekonomikament iġġustifikata bil-għan li tiddiversifika s-sorsi ta’ provvista tagħha.

(25)

Il-Kummissjoni qieset li t-talba kien fiha biżżejjed evidenza li seħħet bidla fix-xejra tal-kummerċ li tinvolvi l-esportazzjonijiet mill-Indoneżja u mit-Turkija lejn l-Unjoni wara l-bidu tal-investigazzjoni oriġinali u l-impożizzjoni ta’ miżuri. B’mod speċifiku, it-talba kien fiha data li turi bidla fix-xejra tal-kummerċ li tinvolvi żieda sinifikanti fl-esportazzjonijiet ta’ ċangaturi tal-azzar inossidabbli, il-materja prima ewlenija għall-produzzjoni ta’ SSHR, mill-Indoneżja lejn it-Turkija u żieda sinifikanti fl-esportazzjonijiet ta’ SSHR mit-Turkija lejn l-Unjoni.

(26)

Fir-rigward tal-prattika, il-proċess jew il-ħidma li qed issir fit-Turkija, il-Kummissjoni qieset li t-talba kien fiha biżżejjed evidenza tal-eżistenza ta’ operazzjonijiet ta’ assemblaġġ/kompletazzjoni, waħda mill-prattiki speċifikament imsemmija fl-Artikolu 13(2) tar-Regolament bażiku, fit-Turkija, u li dawn l-operazzjonijiet kienu bbażati fuq l-użu ta’ ċangaturi tal-azzar inossidabbli, il-materjal ta’ input ewlieni, mill-Indoneżja. Il-klassifikazzjoni tariffarja tal-prodott investigat u tal-materjali ta’ input ewlenin tiegħu, jew il-bidla tagħhom, hija irrilevanti biex jiġi determinat jekk operazzjoni ta’ assemblaġġ/kompletazzjoni tikkostitwixxix ċirkomvenzjoni.

(27)

Barra minn hekk, it-talba pprovdiet biżżejjed evidenza rigward in-nuqqas apparenti ta’ ġustifikazzjoni ekonomika għajr l-impożizzjoni tad-dazji, b’mod partikolari billi l-operazzjonijiet wasslu għal żieda fil-kumplessità tal-kostijiet ta’ operazzjonijiet loġistiċi u ta’ tariffi tas-servizzi. L-affermazzjonijiet li saru minn Çolakoğlu u Marcegaglia ġew analizzati aktar matul l-investigazzjoni u indirizzati fit-taqsima 2.4 hawn taħt.

(28)

Il-Kummissjoni qieset li t-talba pprovdiet ukoll biżżejjed evidenza li tissuġġerixxi li minħabba dawn il-prattiki, l-effetti ta’ rimedju tal-miżuri anti-dumping eżistenti fuq l-SSHR kienu qed jiddgħajfu kemm f’termini ta’ kwantità kif ukoll ta’ prezzijiet. B’mod partikolari, it-talba pprovdiet biżżejjed evidenza li l-importazzjonijiet ta’ SSHR saru bi prezzijiet aktar baxxi mill-prezz mhux dannuż stabbilit fl-investigazzjoni oriġinali. Dawn l-affermazzjonijiet, inklużi l-argumenti dwar is-sehem tal-importazzjonijiet Torok, ġew analizzati aktar matul l-investigazzjoni.

(29)

Fir-rigward tal-affermazzjonijiet dwar l-interess tal-Unjoni, il-Kummissjoni fakkret li l-interess tal-Unjoni mhuwiex kunsiderazzjoni għal bidu skont l-Artikolu 13 tar-Regolament bażiku.

(30)

Fid-dawl ta’ dan ta’ hawn fuq, il-Kummissjoni ċaħdet l-affermazzjonijiet li t-talba ma kienx fiha biżżejjed evidenza biex tiġġustifika l-bidu tal-investigazzjoni.

(31)

Fir-rigward tal-kummenti ta’ Çolakoğlu li l-importazzjonijiet ta’ ċangaturi Indoneżjani fl-Unjoni jistgħu jiġu pproċessati f’SSHR fl-Unjoni, il-Kummissjoni nnotat li din il-prattika kienet taqa’ barra mill-ambitu ta’ din l-investigazzjoni. Fil-fatt, ir-Regolament tal-bidu limita l-investigazzjoni għall-importazzjonijiet ta’ SSHR fl-Unjoni mit-Turkija u għall-operazzjonijiet ta’ pproċessar li jseħħu fit-Turkija. Madankollu, il-Kummissjoni ħadet nota tal-affermazzjoni pprovduta minn Çolakoğlu, u se tkompli tanalizza jekk l-importazzjonijiet ta’ ċangaturi tal-azzar inossidabbli mill-Indoneżja fl-Unjoni jistgħux ikunu element ta’ prattiki ta’ ċirkomvenzjoni distinti. Il-Kummissjoni bdiet timmonitorja l-importazzjonijiet ta’ ċangaturi tal-azzar inossidabbli mill-Indoneżja fl-Unjoni u, skont l-Eurostat, dawn l-importazzjonijiet waqfu f’Ottubru 2022.

(32)

Wara l-iżvelar, Çolakoğlu affermat li l-Kummissjoni kisret id-dritt tiegħu tad-difiża skont l-Artikolu 6(7) tar-Regolament bażiku, l-Artikolu 296 TFUE kif ukoll id-dritt tagħha għal amministrazzjoni tajba f’konformità mal-Artikolu 41 tal-Karta tad-Drittijiet Fundamentali tal-Unjoni Ewropea, billi naqset milli tikkunsidra ħafna mill-argumenti li ġew ippreżentati matul l-investigazzjoni. B’mod partikolari, Çolakoğlu qieset li d-dritt tagħha għal amministrazzjoni tajba nkiser minħabba li l-Kummissjoni ma estendietx l-ambitu tal-investigazzjoni biex tinkludi ċ-ċangaturi tal-azzar inossidabbli mill-Indoneżja importati direttament fl-Unjoni.

(33)

Il-Kummissjoni fakkret li, fit-30 ta’ Jannar 2023, hija żvelat lill-partijiet interessati l-fatti u l-kunsiderazzjonijiet essenzjali li abbażi tagħhom ġew bbażati l-konklużjonijiet tagħha. Il-partijiet kollha ngħataw 15-il jum biex jikkummentaw. L-argumenti kollha magħmula minn Çolakoğlu u partijiet interessati oħra ġew ikkunsidrati, iżda dan ma jfissirx li kull argument ippreżentat kien jeħtieġ li jiġi indirizzat b’mod espliċitu fid-dokument ta’ żvelar (6). Jeħtieġ li l-Kummissjoni tiġġustifika u tispjega fid-dettall kif xieraq is-sejbiet u l-konklużjonijiet tagħha, kif għamlet fid-dokument ta’ żvelar. Wara l-iżvelar, Çolakoğlu ppreżentat il-kummenti u ngħatat seduta ta’ smigħ. Il-Kummissjoni qieset kif xieraq il-kummenti kollha li saru, kif speċifikat hawn taħt. Fir-rigward tal-importazzjonijiet ta’ ċangaturi tal-azzar inossidabbli Indoneżjani fl-Unjoni, il-Kummissjoni fakkret li hija spjegat kif xieraq fl-iżvelar, riflessi fil-premessa (31) hawn fuq, ir-raġunijiet għaliex din l-allegata prattika kienet taqa’ barra mill-ambitu tal-investigazzjoni inkwistjoni. Barra minn hekk, għall-kuntrarju ta’ dak li affermat Çolakoğlu, il-Kummissjoni ma eżerċitat l-ebda diskrezzjoni billi r-Regolament tal-bidu ppermettielha biss tinvestiga prattiki ta’ ċirkomvenzjoni possibbli oħra li jseħħu barra mill-Unjoni, b’mod partikolari fit-Turkija. Għalhekk, il-Kummissjoni qieset li d-drittijet tad-difiża ta’ Çolakoğlu ġew irrispettati bis-sħiħ u ċaħdet l-affermazzjoni.

(34)

Il-perjodu ta’ investigazzjoni kopra l-perjodu mill-1 ta’ Jannar 2018 sat-30 ta’ Ġunju 2022 (“il-perjodu ta’ investigazzjoni” jew “PI”). Inġabret data biex il-perjodu ta’ investigazzjoni jinvestiga, fost l-oħrajn, l-allegata bidla fix-xejra tal-kummerċ wara l-impożizzjoni ta’ miżuri fuq il-prodott ikkonċernat, u l-eżistenza ta’ prattika, proċess jew ħidma li għaliha ma kienx hemm raġuni valida jew ġustifikazzjoni ekonomika suffiċjenti għajr l-impożizzjoni tad-dazju. Inġabret data aktar dettaljata għall-perjodu mill-1 ta’ Lulju 2021 sat-30 ta’ Ġunju 2022 (“il-perjodu ta’ rappurtar” jew “PR”) sabiex jiġi eżaminat jekk l-importazzjonijiet kinux qed idgħajfu l-effett ta’ rimedju tal-miżuri fis-seħħ f’termini ta’ prezzijiet u/jew kwantitajiet u l-eżistenza tad-dumping.

(35)

Il-Kummissjoni infurmat uffiċjalment lill-awtoritajiet tal-Indoneżja u tat-Turkija, lill-produtturi esportaturi magħrufa f’dawk il-pajjiżi, lill-industrija tal-Unjoni u lill-President tal-Kunsill ta’ Assoċjazzjoni UE-Turkija dwar il-bidu tal-investigazzjoni.

(36)

Barra minn hekk, il-Kummissjoni talbet lill-Missjoni tat-Turkija għall-Unjoni Ewropea tipprovdiha l-ismijiet u l-indirizzi tal-produtturi esportaturi u/jew tal-assoċjazzjonijiet rappreżentattivi li jistgħu jkunu interessati jipparteċipaw fl-investigazzjoni flimkien mal-produtturi esportaturi Torok, li kienu ġew identifikati fit-talba mill-applikant.

(37)

Formoli ta’ talba għal eżenzjoni għall-produtturi/esportaturi fit-Turkija, kwestjonarji għall-produtturi/esportaturi fl-Indoneżja, u għall-importaturi fl-Unjoni kienu saru disponibbli fuq is-sit web tad-DĠ TRADE.

(38)

Ħames kumpaniji stabbiliti fit-Turkija ppreżentaw formoli ta’ talba għal eżenzjoni. Dawn kienu:

(39)

Barra minn hekk, importatur u utent tal-Unjoni, Marcegaglia, issottomettiet tweġiba għall-kwestjonarju.

(40)

Il-partijiet interessati ngħataw l-opportunità li jesprimu l-fehmiet tagħhom bil-miktub u li jitolbu seduta ta’ smigħ fil-limitu ta’ żmien stabbilit fir-Regolament tal-bidu. Il-partijiet kollha ġew informati li n-nuqqas ta’ preżentazzjoni tal-informazzjoni rilevanti kollha jew il-preżentazzjoni ta’ informazzjoni mhux kompluta, falza jew qarrieqa tista’ twassal għall-applikazzjoni tal-Artikolu 18 tar-Regolament bażiku u għal sejbiet li jkunu bbażati fuq il-fatti disponibbli.

(41)

Fl-4 ta’ Ottubru 2022, saret seduta ta’ smigħ ma’ Marcegaglia.

(42)

Wara l-iżvelar fit-30 ta’ Jannar 2023, saru seduti ta’ smigħ ma’ Marcegaglia fit-8 ta’ Frar 2023 u ma’ Çolakoğlu fl-10 ta’ Frar 2023.

(43)

F’konformità mal-Artikolu 13(1) tar-Regolament bażiku, jenħtieġ li jiġu analizzati l-elementi li ġejjin sabiex tiġi valutata ċirkomvenzjoni possibbli:

(44)

It-talba allegat il-kunsinna tal-prodott ikkonċernat mit-Turkija lill-Unjoni wara li jkun għadda minn operazzjonijiet ta’ assemblaġġ/kompletazzjoni fit-Turkija. F’dan ir-rigward, il-Kummissjoni analizzat speċifikament jekk il-kriterji stabbiliti fl-Artikolu 13(2) tar-Regolament bażiku ġewx issodisfati, b’mod partikolari:

(45)

Kif indikat fil-premessa (38), ħames kumpaniji stabbiliti fit-Turkija talbu li jiġu eżentati mill-miżuri, jekk jiġu estiżi għat-Turkija.

(46)

Tlieta minnhom, Saritas, UCAS u AST, tqiesu li ma kinux produtturi esportaturi. Wara l-analiżi tal-informazzjoni pprovduta fit-talbiet rispettivi tagħhom, il-Kummissjoni kkonkludiet li, filwaqt li l-kumpaniji kienu involuti fix-xiri u l-bejgħ mill-ġdid tal-prodott investigat, huma la pproduċewh u lanqas immanifatturawh. Il-prodott investigat inxtara minn entitajiet oħra, li kienu l-produtturi reali. Konsegwentement, dawn il-kumpaniji ma setgħux jiġu kklassifikati bħala produtturi. L-Artikolu 13(4) tar-Regolament bażiku jipprovdi l-possibbiltà għall-produtturi biss li japplikaw għal eżenzjoni mill-estensjoni tad-dazji anti-dumping. Dan ġie rifless fil-premessa (27) tar-Regolament tal-bidu, li espliċitament speċifika li l-eżenzjonijiet jistgħu jingħataw biss lill-produtturi tal-prodott investigat fit-Turkija. Peress li dawn il-kumpaniji nstabu li ma kinux produtturi, għalhekk ma kinux intitolati li japplikaw għal eżenzjoni.

(47)

Fir-rigward ta’ Poyraz, il-Kummissjoni rċeviet tweġiba insodisfaċenti ħafna b’partijiet kbar mill-formola ta’ talba għal eżenzjoni li twieġeb għall-kwestjonarju kompletament nieqsa jew mhux kompluti. Wara ittra ta’ defiċjenza, il-kumpanija ppreżentat tweġiba li fiha l-informazzjoni meħtieġa kienet għadha jew insodisfaċenti ħafna inkella nieqsa. Għalhekk, il-Kummissjoni infurmat lill-kumpanija li kien beħsiebha tapplika l-fatti disponibbli f’konformità mal-Artikolu 18(1) tar-Regolament bażiku meta tiddetermina jekk din il-kumpanija kinitx produttur skont it-tifsira tal-Artikolu 13(4) tar-Regolament bażiku. Fit-tweġiba tagħha, il-kumpanija spjegat għaliex ma pprovdietx informazzjoni aktar kompluta u stiednet lill-Kummissjoni tiġbor aktar data fil-bini tagħha. Il-kumpanija ma ppreżentat l-ebda informazzjoni ulterjuri li tirrettifika jew tikkompleta l-partijiet insodisfaċenti tat-tweġiba tagħha għall-kwestjonarju.

(48)

Minkejja li ma kinitx kompluta, it-tweġiba kkonfermat li Poyraz kienet qed tixtri kojls tal-SSHR b’mod predominanti fl-Indoneżja, u mbagħad tbigħhom mill-ġdid (possibbilment maqtugħa u ta’ daqs) parzjalment fis-suq tal-Unjoni. Filwaqt li l-kumpanija ma setgħetx tipprovdi lill-Kummissjoni l-kostijiet tat-trasformazzjoni, jekk kien hemm, jew lista dettaljata tal-bejgħ lill-Unjoni, jidher ċar mit-tweġiba li Poyraz kienet qed tixtri u tbigħ mill-ġdid il-prodott ikkonċernat. Billi Poyraz ma setgħatx titqies bħala produttur fit-tifsira tal-Artikolu 13(4) tar-Regolament bażiku u b’hekk ma setgħatx tibbenefika minn eżenzjoni. It-talba għal eżenzjoni għalhekk ġiet irrifjutata.

(49)

Çolakoğlu kkooperat matul l-investigazzjoni kollha billi ppreżentat il-formoli ta’ talba għal eżenzjoni u billi pprovdiet tweġibiet għall-ittri ta’ defiċjenza li ntbagħtulha. B’riżultat ta’ dan, il-livell ġenerali ta’ kooperazzjoni mill-produtturi esportaturi Torok kien relattivament għoli, billi l-volumi tal-esportazzjoni ta’ SSHR ta’ Çolakoğlu lejn l-Unjoni ammontaw għal [minn 88 % sa 93 %] tal-volumi totali tal-importazzjonijiet Torok matul il-perjodu ta’ rappurtar, kif irrappurtat fl-istatistika tal-importazzjoni tal-Eurostat.

(50)

Il-Kummissjoni wettqet żjara ta’ verifika fil-bini ta’ Çolakoğlu, skont l-Artikolu 16 tar-Regolament bażiku. Çolakoğlu importat kważi l-materjal ta’ input ewlieni kollu tagħha (ċangaturi tal-azzar inossidabbli) mill-Indoneżja.

(51)

L-importatur u l-utent tal-Unjoni Marcegaglia kkooperat ukoll u pprovdiet informazzjoni dwar ix-xiri ta’ ċangaturi tal-azzar inossidabbli Indoneżjani, l-ipproċessar sussegwenti fit-Turkija u l-importazzjonijiet ta’ SSHR fl-Unjoni. Marcegaglia talbet li tiġi ttrattata bħala produttur esportatur. Huwa ġġustifika t-talba tiegħu abbażi tan-natura tal-operazzjonijiet tiegħu peress li kien involut fix-xiri taċ-ċangaturi mill-Indoneżja, sussegwentement llamina bis-sħana dawn iċ-ċangaturi skont ftehim ta’ tolling ma’ Çolakoğlu fit-Turkija, u aktar tard importa l-kojls (SSHR) fl-Unjoni. Għaldaqstant, Marcegaglia kienet is-sid tal-materja prima (ċangaturi) u tal-prodott finali (SSHR) matul l-operazzjoni kollha, li ġie kkonfermat mill-investigazzjoni. Madankollu, minħabba li l-attivitajiet attwali ta’ produzzjoni/ipproċessar seħħew fil-bini ta’ Çolakoğlu (7) fit-Turkija, il-Kummissjoni kkonkludiet li Marcegaglia ma setgħetx titqies bħala produttur esportatur intitolat li jitlob eżenzjoni.

(52)

It-Tabella 1 ta’ hawn taħt turi l-iżvilupp tal-importazzjonijiet ta’ SSHR mill-Indoneżja u mit-Turkija fil-perjodu ta’ investigazzjoni.

Tabella 1

Importazzjonijiet ta’ SSHR fl-Unjoni fil-perjodu ta’ investigazzjoni (f’tunnellati)

(53)

It-Tabella 1 turi li l-volum tal-importazzjonijiet ta’ SSHR mit-Turkija fl-Unjoni żdied minn 1 611 tunnellata fl-2018 għal 50 015 tunnellata fil-perjodu ta’ rappurtar. L-aktar żieda sinifikanti fil-volum tal-importazzjonijiet seħħet mill-2019 sal-2020, meta l-volum immultiplika aktar minn għaxar darbiet, minn 2 137 tunnellata fl-2019 għal 21 500 tunnellata fl-2020. Din iż-żieda kkoinċidiet fiż-żmien mal-bidu tal-investigazzjoni oriġinali, f’Awwissu 2019, u l-impożizzjoni ta’ miżuri definittivi f’Ottubru 2020. Mill-2020, il-volum tal-importazzjonijiet mit-Turkija kompla jiżdied b’mod qawwi biex laħaq 50 015-il tunnellata matul il-perjodu ta’ rappurtar. B’mod ġenerali, il-volum tal-importazzjonijiet mit-Turkija żdied aktar minn 30 darba matul il-perjodu ta’ investigazzjoni.

(54)

Fl-istess ħin, il-volum tal-importazzjonijiet ta’ SSHR mill-Indoneżja żdied minn 44 647 tunnellata fl-2018 għal 128 191 tunnellata fil-perjodu ta’ rappurtar. Il-volum tal-importazzjonijiet żdied b’82 % mill-2018 għall-2019. Mill-2018 sal-2020, matul l-investigazzjoni oriġinali, il-volum tal-importazzjonijiet ta’ SSHR mill-Indoneżja naqas b’mod sinifikanti. Fl-2020, il-volum tal-importazzjonijiet naqas għal inqas minn wieħed minn kull għoxrin tal-volum tal-2019. Mill-2021 sal-perjodu ta’ rappurtar, il-volum tal-importazzjonijiet ta’ SSHR mill-Indoneżja rkupra u reġa’ beda jiżdied (b’aktar minn 50 %) meta mqabbel mal-livelli tal-2019. B’mod ġenerali, il-volum tal-importazzjonijiet ta’ SSHR mill-Indoneżja fl-Unjoni kważi ttrippla matul il-perjodu ta’ investigazzjoni, iżda dik iż-żieda kienet, f’termini relattivi, ferm inqas sinifikanti miż-żieda tal-importazzjonijiet mit-Turkija.

(55)

It-tabella 2 ta’ hawn taħt turi l-iżvilupp tal-volum tal-importazzjonijiet taċ-ċangaturi tal-azzar inossidabbli mill-Indoneżja fit-Turkija, abbażi tal-istatistika tal-importazzjoni Torka mill-bażi tad-data GTA (8).

Tabella 2

Importazzjonijiet ta’ ċangaturi tal-azzar inossidabbli mill-Indoneżja fit-Turkija fil-perjodu ta’ investigazzjoni (f’tunnellati)

(56)

Il-materjal ta’ input ewlieni għall-produzzjoni ta’ SSHR huwa ċ-ċangaturi tal-azzar inossidabbli. Dan il-materjal ta’ input imbagħad jiġi pproċessat ulterjorment, jiġifieri llaminat bis-sħana, biex jiġi prodott l-SSHR. L-evidenza disponibbli għall-Kummissjoni wriet li l-SSHR esportat lejn l-Unjoni mit-Turkija ġie prodott prinċipalment miċ-ċangaturi tal-azzar inossidabbli.

(57)

It-Tabella 2 turi li l-importazzjonijiet taċ-ċangaturi tal-azzar inossidabbli mill-Indoneżja fit-Turkija żdiedu sostanzjalment, minn żero fl-2018 għal 40 513 tunnellata fil-perjodu ta’ rappurtar. L-importazzjonijiet mill-Indoneżja rrappreżentaw madwar 99.9 % tal-volum totali tal-importazzjonijiet ta’ ċangaturi tal-azzar inossidabbli fit-Turkija kull sena fil-perjodu mill-2019 sal-perjodu ta’ rappurtar. Barra minn hekk, iż-żieda sinifikanti fl-importazzjonijiet ta’ ċangaturi tal-azzar inossidabbli mill-Indoneżja fit-Turkija kkoinċidiet ukoll fiż-żmien mal-bidu tal-provvista minn Çolakoğlu lill-klijent tiegħu tal-Unjoni (Marcegaglia) mill-2019 ’il quddiem, li wassal għal żieda fil-konsum ta’ ċangaturi tal-azzar inossidabbli fit-Turkija għall-produzzjoni ta’ SSHR. Barra minn hekk, il-Kummissjoni stabbiliet li t-totalità tal-importazzjonijiet ta’ ċangaturi tal-azzar inossidabbli mill-Indoneżja fit-Turkija waslet fil-bini ta’ Çolakoğlu.

(58)

Iż-żieda sinifikanti fil-volumi ta’ importazzjonijiet taċ-ċangaturi tal-azzar inossidabbli mill-Indoneżja fit-Turkija indikat żieda fid-domanda għal tali materjali ta’ input fit-Turkija, li tista’, fil-biċċa l-kbira, tiġi spjegata miż-żieda fil-produzzjoni u fl-esportazzjonijiet ta’ SSHR mit-Turkija matul il-perjodu ta’ rappurtar. Dan kien ikkorroborat ukoll mill-informazzjoni pprovduta mingħand Çolakoğlu.

(59)

Wara l-iżvelar, Çolakoğlu affermat li ma kien hemm l-ebda bidla fix-xejra tal-kummerċ, minħabba ż-żieda fl-importazzjonijiet Indoneżjani u n-nuqqas ta’ sostituzzjoni tal-importazzjonijiet ta’ SSHR Indoneżjani mill-importazzjonijiet ta’ SSHR Torok. Hija affermat ukoll li, fin-nuqqas ta’ sostituzzjoni tal-importazzjoni, il-Kummissjoni ddevjat mill-prattika normali tagħha fl-istabbiliment tal-eżistenza ta’ bidla fix-xejra tal-kummerċ.

(60)

Il-Kummissjoni nnotat li l-Artikolu 13 tar-Regolament bażiku ma jirrikjedix sostituzzjoni sħiħa tal-importazzjonijiet mill-pajjiż soġġett għal miżuri b’importazzjonijiet minn sorsi oħra sabiex tiġi stabbilita bidla fix-xejra tal-kummerċ. Barra minn hekk, il-konklużjoni tal-Kummissjoni dwar il-bidla fix-xejra tal-kummerċ ma ddevjatx mill-prattika normali tal-Kummissjoni, peress li f’xi każijiet preċedenti l-eżistenza ta’ bidla fix-xejra tal-kummerċ ġiet stabbilita wkoll, minkejja żieda fl-importazzjonijiet mill-pajjiż soġġett għall-miżuri anti-dumping (9).

(61)

Filwaqt li l-importazzjonijiet ta’ SSHR mit-Turkija ma ssostitwewx l-importazzjonijiet mill-Indoneżja, li esperjenzaw ukoll żieda, l-investigazzjoni stabbiliet li l-volumi sinifikanti ta’ ċangaturi tal-azzar inossidabbli importati mill-Indoneżja, komplew jiġu pproċessati f’SSHR fit-Turkija biex aktar tard jiġu esportati lejn l-Unjoni. Iż-żieda fl-esportazzjonijiet ta’ SSHR mit-Turkija lejn l-Unjoni li tidher fit-Tabella 1, flimkien maż-żieda sinifikanti fl-esportazzjonijiet ta’ ċangaturi tal-azzar inossidabbli mill-Indoneżja lejn it-Turkija fil-perjodu ta’ investigazzjoni, kif muri fit-Tabella 2, ikkostitwew bidla fix-xejra tal-kummerċ bejn l-Indoneżja, it-Turkija u l-Unjoni fit-tifsira tal-Artikolu 13(1) tar-Regolament bażiku.

(62)

L-investigazzjoni żvelat l-eżistenza ta’ ftehim ta’ tolling bejn Marcegaglia u Çolakoğlu li skontu Marcegaglia xtrat ċangaturi tal-azzar inossidabbli mill-Indoneżja, ittrasportathom lejn it-Turkija sabiex ikomplu jiġu pproċessati f’SSHR minn Çolakoğlu, biex imbagħad jiġu importati fl-Unjoni minn Marcegaglia. Dan il-ftehim ta’ tolling ġie nnegozjat fi tmiem l-2018, qabel il-bidu tal-investigazzjoni oriġinali.

(63)

It-tabella 3 turi l-evoluzzjoni tal-esportazzjonijiet ta’ Çolakoğlu ta’ SSHR lejn l-Unjoni skont il-ftehim ta’ tolling ma’ Marcegaglia.

Tabella 3

Esportazzjonijiet ta’ SSHR ta’ Çolakoğlu lejn l-Unjoni (f’tunnellati)

(64)

It-Tabella 3 turi li l-esportazzjonijiet ta’ Çolakoğlu żdiedu sostanzjalment, minn żero fl-2018 għal aktar minn 40 000 tunnellata fil-perjodu ta’ rappurtar.

(65)

L-investigazzjoni żvelat ukoll li kważi l-esportazzjonijiet kollha ta’ Çolakoğlu lejn l-Unjoni saru skont il-ftehim ta’ tolling ma’ Marcegaglia. Bl-istess mod, kważi t-totalità taċ-ċangaturi importati fit-Turkija mill-Indoneżja komplew jiġu ttrasformati f’SSHR minn Çolakoğlu skont il-ftehim ta’ tolling stabbilit bejn iż-żewġ kumpaniji.

(66)

Għalkemm seta’ kien hemm raġunijiet oħra biex tiġi stabbilita l-iskema għajr il-miżuri fis-seħħ, jiġifieri biex tiġi żgurata s-sigurtà tal-provvista għal Marcegaglia, u biex jiġi fornut is-suq tal-azzar inossidabbli fit-Turkija, elementi oħra jindikaw bil-qawwa konnessjoni mal-impożizzjoni tad-dazji:

(67)

Il-Kummissjoni nnotat li l-ftehim ta’ tolling ġie stabbilit bil-ħsieb li jforni s-suq tal-Unjoni u mhux is-suq domestiku Tork. Fil-fatt, Çolakoğlu biegħet inqas minn 2 % tal-SSHR, prodotti minn ċangaturi importati mill-Indoneżja, fis-suq domestiku Tork.

(68)

Il-Kummissjoni analizzat ukoll l-affermazzjoni ta’ Marcegaglia li l-ftehim ta’ tolling ġie stabbilit biex jiżgura s-sigurtà tal-provvista, minħabba li d-domanda żdiedet b’mod sinifikanti u ma setgħetx tiġi ssodisfata mill-industrija tal-Unjoni. F’dan ir-rigward, ġie stabbilit li l-operazzjonijiet ta’ assemblaġġ/kompletazzjoni fit-Turkija nbdew f’volumi sinifikanti biss wara l-bidu tal-investigazzjoni oriġinali kontra l-Indoneżja. Il-ftehim ma kienx jikkonċerna sempliċiment l-iżgurar ta’ provvista mit-Turkija, iżda minħabba n-natura ta’ tolling tiegħu, iffoka speċifikament fuq li jibbaża dik il-provvista fuq ċangaturi tal-azzar inossidabbli mill-Indoneżja — il-pajjiż taħt miżuri. Barra minn hekk, il-produttur Indoneżjan ta’ ċangaturi tal-azzar inossidabbli kien ukoll il-fornitur ta’ SSHR. Normalment, wieħed ma jitlax pass ’il fuq fil-katina tal-valur tal-fornitur integrat vertikalment tiegħu għal raġunijiet ta’ sigurtà tal-provvista. Sakemm, naturalment, it-theddid li qed jiġi indirizzat ma jkunx miżuri potenzjali li jaffettwaw il-pass aktar baxx f’dik il-katina tal-valur — f’dan il-każ id-dazju anti-dumping fuq l-importazzjonijiet ta’ SSHR mill-Indoneżja.

(69)

Wara l-iżvelar, Marcegaglia u Çolakoğlu affermaw li r-relazzjoni kummerċjali tagħhom ma kinitx dipendenti fuq l-eżistenza tad-dazju anti-dumping kontra l-importazzjonijiet ta’ SSHR mill-Indoneżja. Iż-żewġ kumpaniji argumentaw li l-ftehim ta’ tolling bejn Marcegaglia u Çolakoğlu ġie nnegozjat qabel il-bidu tal-investigazzjoni oriġinali, u li ż-żewġ kumpaniji kellhom relazzjoni kummerċjali fit-tul, li bdiet aktar minn għaxar snin ilu. Il-ftehim ta’ tolling tagħhom kien parti minn ftehim usa’, li permezz tiegħu Çolakoğlu tipproċessa kemm prodotti tal-azzar inossidabbli kif ukoll prodotti tal-azzar bil-karbonju.

(70)

Il-Kummissjoni nnotat li, anki meta jitqies li Marcegaglia u Çolakoğlu kellhom relazzjoni kummerċjali għal aktar minn għaxar snin u allegatament il-ftehim ta’ tolling tagħhom kien parti minn ftehim usa’, kif indikat ukoll fil-premessa (66) ta’ hawn fuq, il-prattika soġġetta għal din l-investigazzjoni, jiġifieri li jiġu pproċessati ċangaturi tal-azzar inossidabbli mill-Indoneżja għal SSHR fit-Turkija li sussegwentement ġew esportati lejn l-Unjoni, ma mmaterjalizzatx kompletament qabel il-bidu tal-investigazzjoni oriġinali. Il-prattika żdiedet wara l-bidu tal-investigazzjoni oriġinali u kompliet tiżdied b’mod sinifikanti wara l-impożizzjoni tal-miżuri definittivi. Fi kliem ieħor, il-bidu tal-prattika inkwistjoni, minkejja r-relazzjoni li ilha teżisti, ikkoinċida fiż-żmien mal-bidu tal-investigazzjonijiet oriġinali u l-impożizzjoni aktar tard ta’ miżuri, u ma mmaterjalizza fl-ebda stadju aktar bikri. Għalhekk, il-Kummissjoni rrifjutat din l-affermazzjoni.

(71)

Çolakoğlu affermat li hemm ġustifikazzjoni ekonomika b’rabta mal-eżistenza tad-domanda għal SSHR Torok, kemm fl-UE kif ukoll fit-Turkija. Din id-domanda tiġġustifika l-investimenti, li saru qabel il-bidu tal-investigazzjoni oriġinali, biex tiġi żviluppata l-produzzjoni ta’ SSHR fit-Turkija.

(72)

Il-Kummissjoni nnotat mill-bidu nett li l-prattika li nstabet li kienet qed tevita d-dazji anti-dumping fis-seħħ ma kinitx il-produzzjoni ta’ SSHR fit-Turkija bħala tali. Il-prattika li nstabet li kienet qed tevita kienet l-importazzjoni ta’ ċangaturi tal-azzar inossidabbli mill-Indoneżja fit-Turkija, il-laminazzjoni tagħhom f’SSHR u l-bejgħ tagħhom fis-suq tal-Unjoni. Għalhekk, jekk l-investimenti fl-iżvilupp tal-kapaċità ma kinux ekonomikament iġġustifikati kien immaterjali mill-perspettiva tas-sejbiet ta’ ċirkomvenzjoni tal-Kummissjoni. Barra minn hekk, il-Kummissjoni nnotat li, filwaqt li Çolakoğlu żviluppat il-kapaċità li tipproduċi ċ-ċangaturi tal-azzar inossidabbli tiegħu stess fit-Turkija, din il-produzzjoni kienet limitata ħafna. Fil-fatt, kif iddikjarat fil-premessa (91) ta’ hawn taħt, iċ-ċangaturi ta’ oriġini Torka kienu jammontaw, fil-perjodu ta’ rappurtar, għal inqas minn 0,5 % taċ-ċangaturi użati minn Çolakoğlu għall-produzzjoni ta’ SSHR esportati lejn l-Unjoni. Għalhekk, irrispettivament minn jekk kienx hemm raġunijiet għall-investimenti ta’ Çolakoğlu f’faċilitajiet ta’ produzzjoni tal-azzar inossidabbli għajr biex jiġu evitati l-miżuri, l-investimenti inkwistjoni ma ntużawx għall-provvista ta’ SSHR lill-Unjoni prodotti minn ċangaturi ta’ oriġini Torka peress li kważi l-esportazzjonijiet kollha ta’ Çolakoğlu kienu bbażati fuq SSHR prodotti minn ċangaturi Indoneżjani matul il-perjodu ta’ rappurtar. Għalhekk, ġiet miċħuda l-affermazzjoni.

(73)

Wara l-iżvelar, Marcegaglia affermat li kien hemm ġustifikazzjoni ekonomika minħabba l-mudell ta’ negozju tagħha, li kien ibbażat, l-ewwel nett, fuq id-diversifikazzjoni ta’ sorsi tal-provvista u, it-tieni, fuq il-ħtieġa ta’ flessibbiltà biex tlaħħaq mad-disponibbiltà ta’ SSHR fis-suq skont il-fluttwazzjonijiet tad-domanda għal prodotti downstream. Il-fatt li kien hemm disponibbiltà limitata ta’ SSHR suwed fis-suq tal-Unjoni, inkluż mill-importazzjonijiet minn pajjiżi terzi, allegatament iġġustifika l-istrateġija ta’ Marcegaglia li tixtri ċangaturi tal-azzar inossidabbli mill-Indoneżja biex jiġu pproċessati f’SSHR suwed permezz ta’ ftehimiet ta’ tolling. Barra minn hekk, Marcegaglia argumentat li l-Kummissjoni ma indirizzatx il-fatt li l-Indoneżja għandha l-akbar kapaċità ta’ ċangaturi tal-azzar inossidabbli fid-dinja u, għall-kuntrarju ta’ pajjiżi oħra, hija lesta li tipprovdi l-kwalità u l-kwantitajiet ta’ ċangaturi meħtieġa minn Marcegaglia. Allegatament, pajjiżi oħra jew jiffukaw fuq l-SSHR inkella għandhom domanda qawwija ta’ SSHR għal prodotti downstream.

(74)

Il-Kummissjoni nnotat li, filwaqt li qieset il-mudell ta’ negozju kif deskritt hawn fuq, din l-affermazzjoni ma rrendietx l-argumenti stabbiliti hawn fuq fil-premessi minn (66) sa (68) invalidi. Barra minn hekk, l-SSHR Indoneżjani kienu disponibbli fis-suq tal-Unjoni wara l-ħlas tad-dazji anti-dumping, li ntwera miż-żieda fl-importazzjonijiet mill-Indoneżja. Barra minn hekk, ma kien hemm l-ebda evidenza li l-allegati fluttwazzjonijiet tad-disponibbiltà ta’ prodotti downstream jaffettwaw biss id-disponibbiltà ta’ SSHR, iżda mhux l-input upstream immedjat tagħhom, iċ-ċangaturi tal-azzar inossidabbli, li jirriżulta f’abbundanza ta’ ċangaturi Indoneżjani u skarsezza tal-SSHR Indoneżjani. Barra minn hekk, l-allegazzjoni li l-pajjiżi l-oħra kollha, ħlief l-Indoneżja, ma setgħux jew ma kinux lesti li jipprovdu biżżejjed kwantitajiet ta’ ċangaturi ta’ kwalità lil Marcegaglia ma kienet sostnuta mill-ebda evidenza. Għalhekk, ġiet miċħuda din l-affermazzjoni.

(75)

Wara l-iżvelar, Marcegaglia argumentat li l-ġustifikazzjoni ekonomika tal-ftehim ta’ tolling ma’ Çolakoğlu ġiet ikkonfermata mill-investimenti sinifikanti reċenti magħmula minn Marcegaglia. F’Jannar 2023, Marcegaglia akkwistat mitħna tal-azzar fir-Renju Unit. Marcegaglia affermat li dan l-akkwist ta’ impjant għall-produzzjoni ta’ ċangaturi tal-azzar inossidabbli kien xprunat mill-ħtieġa li jiġi żgurat sors proprju affidabbli u stabbli tal-provvista ta’ SSHR. Madankollu, peress li l-mitħna tal-azzar akkwistata tipproduċi ċangaturi tal-azzar inossidabbli iżda ma għandhiex faċilitajiet għal-laminazzjoni fis-sħana, Marcegaglia argumentat li fil-futur ikollu bżonn is-sħubija ta’ impjant ieħor sabiex jipproċessa ċ-ċangaturi tal-azzar inossidabbli prodotti fir-Renju Unit f’SSHR, kemm fl-Unjoni kif ukoll barra minnha. F’dan ir-rigward, Çolakoğlu wriet li hija sieħeb affidabbli u effiċjenti li potenzjalment jista’ jintuża wkoll għall-ipproċessar ta’ ċangaturi prodotti fir-Renju Unit f’SSHR. Barra minn hekk, Marcegaglia indikat li, peress li dalwaqt tkun tista’ tissodisfa d-domanda tagħha ta’ ċangaturi tal-azzar inossidabbli permezz tal-produzzjoni ta’ ċangaturi fir-Renju Unit, l-ebda SSHR ieħor ta’ ċangaturi mill-Indoneżja ma tista’ tkun mistennija fil-futur.

(76)

Il-Kummissjoni qieset li dan l-iżvilupp reċenti jista’ jirriżulta f’bidla fis-sorsi tal-provvista ta’ ċangaturi tal-azzar inossidabbli fil-futur qrib. Madankollu, din l-akkwiżizzjoni seħħet f’Jannar 2023, jiġifieri wara l-perjodu ta’ rappurtar, u ma kien fiha l-ebda garanzija dwar jekk jew meta se tintemm il-prattika ta’ ċirkomvenzjoni stabbilita.

(77)

Fir-rigward tal-allegata bidla futura taċ-ċirkostanzi, il-Kummissjoni nnotat li, wara sena mill-estensjoni tal-miżuri, Marcegaglia jew Çolakoğlu setgħet titlob rieżami tal-miżura kontra ċ-ċirkomvenzjoni skont l-Artikolu 11(3) tar-Regolament bażiku, f’każ li l-bidla tkun ta’ natura dejjiema. Fil-fatt, tali bidla tista’ tkun marbuta max-xiri ta’ ċangaturi tal-azzar inossidabbli prodotti fir-Renju Unit li jissostitwixxu x-xiri ta’ ċangaturi tal-azzar inossidabbli mill-Indoneżja, dment li jkun jista’ jintwera li tali bidla tkun ta’ natura dejjiema.

(78)

Fid-dawl ta’ dawn l-elementi kollha, il-Kummissjoni kkonkludiet li ma kienx hemm raġuni valida jew ġustifikazzjoni ekonomika suffiċjenti għajr l-impożizzjoni tad-dazju, għall-operazzjoni ta’ kompletazzjoni minn Çolakoğlu. Il-bidla fix-xejra tal-kummerċ kienet riżultat tal-fatt li l-operazzjoni bdiet u mbagħad żdiedet sostanzjalment wara li ġew imposti l-miżuri oriġinali.

(79)

L-Artikolu 13(2)(a) tar-Regolament bażiku jirrikjedi li l-operazzjoni ta’ assemblaġġ jew ta’ kompletazzjoni tkun bdiet jew żdiedet sostanzjalment mill-bidu tal-investigazzjoni anti-dumping, jew eżatt qabilha, u l-partijiet ikkonċernati għandhom ikunu ġejjin prinċipalment mill-pajjiżi soġġetti għal miżuri anti-dumping.

(80)

Kif deskritt fit-taqsima 2.4 ta’ hawn fuq, Çolakoğlu żiedet sostanzjalment il-bejgħ tal-esportazzjoni tagħha matul il-perjodu ta’ investigazzjoni, u kważi x-xiri kollu tal-materjal ta’ input ewlieni, iċ-ċangaturi tal-azzar inossidabbli, ġew importati mill-Indoneżja.

(81)

Għalhekk, il-Kummissjoni kkonkludiet li l-operazzjoni ta’ assemblaġġ jew ta’ kompletazzjoni żdiedet sostanzjalment mill-bidu tal-investigazzjoni oriġinali, kif meħtieġ mill-Artikolu 13(2)(a) tar-Regolament bażiku.

(82)

L-Artikolu 13(2)(b) tar-Regolament bażiku jindika li, f’dak li għandu x’jaqsam mal-operazzjonijiet ta’ assemblaġġ jew ta’ kompletazzjoni, kundizzjoni biex tiġi stabbilita ċ-ċirkomvenzjoni hija li l-partijiet mill-pajjiżi soġġetti għal miżuri jikkostitwixxu 60 % jew aktar mill-valur totali tal-partijiet tal-prodott assemblat u li l-valur miżjud tal-partijiet miġjuba, matul l-operazzjoni ta’ assemblaġġ jew ta’ kompletazzjoni, ikun inqas minn 25 % tal-kost tal-manifattura.

(83)

Wara l-iżvelar, Çolakoğlu tenniet l-affermazzjoni tagħha li l-prattika, il-proċess jew il-ħidma ma taqax fit-tifsira tal-Artikoli 13(1) u 13(2) tar-Regolament bażiku peress li l-prodott investigat, l-SSHR, huwa prodott differenti mill-materjal ta’ input tiegħu, iċ-ċangaturi tal-azzar inossidabbli. Iċ-ċangaturi huma kklassifikati taħt intestaturi tariffarji differenti mill-SSHR billi l-operazzjonijiet ta’ pproċessar huma sostanzjali u jagħtu oriġini mhux preferenzjali Torka lill-SSHR. Barra minn hekk, Çolakoğlu argumentat li filwaqt li r-regoli tal-oriġini huma rregolati fil-livell tad-WTO, ma ntlaħaq l-ebda ftehim dwar iċ-ċirkomvenzjoni fil-livell tad-WTO. Għalhekk, deċiżjoni li jiġu estiżi l-miżuri eżistenti għall-importazzjonijiet ta’ SSHR mit-Turkija timmina l-pożizzjoni tal-Unjoni bħala proponent ewlieni tal-konverġenza kummerċjali globali. Barra minn hekk, Çolakoğlu rreferiet għall-kawża Steel Wire Ropes u Cables (l-Indja) (10), li fiha l-Kummissjoni kienet tal-fehma li r-regoli ta’ oriġini mhux preferenzjali kienu rilevanti biex jiġi ddeterminat jekk id-dazji antidumping kinux japplikaw jew le.

(84)

Il-Kummissjoni qieset li l-klassifikazzjoni tariffarja u l-oriġini tal-prodott investigat u tal-materjali ta’ input ewlenin tiegħu, jew il-bidla tagħhom, hija irrilevanti biex jiġi ddeterminat jekk operazzjoni ta’ assemblaġġ/kompletazzjoni tikkostitwixxix ċirkomvenzjoni. Il-bażi ġuridika għal investigazzjoni antiċirkomvenzjoni hija l-Artikolu 13 tar-Regolament bażiku, u mhux il-leġiżlazzjoni doganali dwar l-oriġini. Fil-fatt, il-Qorti tal-Ġustizzja tal-Unjoni Ewropea ddeċidiet li l-uniku għan ta’ Regolament li jestendi dazju anti-dumping huwa li jiżgura l-effettività ta’ dak id-dazju u jipprevjeni ċ-ċirkomvenzjoni tiegħu (11). Sabiex tivvaluta ċirkomvenzjoni possibbli, kif deskritta fil-premessa (82), il-Kummissjoni għalhekk analizzat jekk ġewx issodisfati l-kriterji stabbiliti fl-Artikolu 13(2)(b) tar-Regolament bażiku. B’mod partikolari jekk il-partijiet jikkostitwixxux 60 % jew aktar tal-valur totali tal-partijiet tal-prodott assemblat u jekk il-valur miżjud tal-partijiet miġjuba, matul l-operazzjoni ta’ assemblaġġ jew ta’ kompletazzjoni, kienx akbar minn 25 % tal-kostijiet tal-manifattura. Barra minn hekk, filwaqt li l-Membri tad-WTO rrikonoxxew b’mod espliċitu l-problema ta’ ċirkomvenzjoni tal-miżuri anti-dumping (12), ma hemm l-ebda regola uniformi dwar iċ-ċirkomvenzjoni fil-livell tad-WTO li tirrendi r-regoli tal-Unjoni f’dan ir-rigward inkompatibbli. Fl-aħħar nett, id-Deċiżjoni tal-Kummissjoni msemmija minn Çolakoğlu ma kinitx tikkonċerna l-applikazzjoni tal-Artikolu 13 bħala tali, iżda pjuttost il-ġbir ta’ dazji anti-dumping f’każ ta’ nuqqas ta’ konformità mat-termini ta’ impenn. Barra minn hekk, il-ġurisprudenza ċċarat li l-użu ta’ “minn” aktar milli “oriġina minn” fl-Artikolu 13 tar-Regolament bażiku jimplika li “l-leġiżlatur tal-UE għażel deliberatament li jiddistanzja ruħu mir-regoli tal-oriġini skont il-liġi doganali u li, għalhekk, il-kunċett ta’ “minn” […] jippossjedi tifsira awtonoma u distinta minn dik tal-kunċett ta’ “oriġini” taħt il-liġi doganali”  (13). Għalhekk ġiet miċħuda l-affermazzjoni.

(85)

Il-materjal ta’ input ewlieni għall-produzzjoni tal-SSHR huwa ċ-ċangaturi tal-azzar inossidabbli. Kważi 100 % taċ-ċangaturi tal-azzar inossidabbli pproċessati minn Çolakoğlu ġew importati mill-Indoneżja. Permezz tal-proċess ta’ laminazzjoni fis-sħana mwettaq, li kien operazzjoni ta’ kompletazzjoni fit-Turkija, dawn iċ-ċangaturi tal-azzar inossidabbli komplew jiġu pproċessati f’SSHR. Skont l-informazzjoni ppreżentata u vverifikata minn Çolakoğlu, iċ-ċangaturi tal-azzar inossidabbli kkostitwew kważi 100 % tal-valur totali tal-partijiet tal-prodott assemblat/kompletat skont it-tifsira tal-Artikolu 13(2)(b) tar-Regolament bażiku.

(86)

Wara l-iżvelar, Çolakoğlu tenniet l-affermazzjoni tagħha li l-manifattura ta’ SSHR minn ċangaturi tal-azzar inossidabbli ma tikkostitwixxix “assemblaġġ ta’ partijiet minn operazzjoni ta’ assemblaġġ” skont it-tifsira tal-Artikolu 13(2) tar-Regolament bażiku, peress li hemm biss parti waħda fil-produzzjoni ta’ SSHR. Huwa argumenta wkoll li r-referenza għal “kompletazzjoni tal-operazzjonijiet” fl-Artikolu 13(2) tar-Regolament bażiku jenħtieġ li tinqara fil-kuntest tal-valur miżjud wara li jkun ġie konkluż l-assemblaġġ. Għalhekk, u minħabba li l-operazzjonijiet imwettqa minn Çolakoğlu ma kinux jikkwalifikaw bħala operazzjoni ta’ assemblaġġ, ma ġewx issodisfati l-kundizzjonijiet stabbiliti fl-Artikoli 13(2)(a) u 13(2)(b) tar-Regolament bażiku, skont Çolakoğlu.

(87)

Il-Kummissjoni ċaħdet dawn l-affermazzjonijiet. Il-prattika deskritta fil-premessa (82) tqieset li hija operazzjoni ta’ kompletazzjoni li waqgħet fil-kunċett ta’ operazzjonijiet ta’ assemblaġġ skont l-Artikolu 13(2) tar-Regolament bażiku, kif imsemmi wkoll fil-premessa (44). Barra minn hekk, tqiesu elementi oħra, kif spjegat hawn taħt.

(88)

Ir-Regolament bażiku ma jiddefinixxix it-termini “operazzjoni ta’ assemblaġġ” jew “operazzjoni ta’ kompletazzjoni”. Madankollu, il-mod kif inhu mfassal l-Artikolu 13(2) tar-Regolament bażiku jiffavorixxi interpretazzjoni tat-terminu “operazzjoni ta’ assemblaġġ” billi, skont l-Artikolu 13(2)(b), dan huwa maħsub ukoll biex jinkorpora espliċitament “operazzjoni ta’ kompletazzjoni”. Minn dan isegwi li “operazzjoni ta’ assemblaġġ” skont it-tifsira tal-Artikolu 13(2) hija maħsuba tkopri mhux biss operazzjonijiet li jikkonsistu mill-assemblaġġ ta’ partijiet ta’ oġġett kompost, iżda tista’ tinvolvi wkoll ipproċessar ulterjuri, jiġifieri l-kompletazzjoni ta’ prodott.

(89)

Kif innotat fil-premessa (84), l-għan tal-investigazzjonijiet imwettqa f’konformità mal-Artikolu 13 tar-Regolament bażiku huwa li tiġi żgurata l-effettività tad-dazji anti-dumping u li tiġi evitata ċ-ċirkomvenzjoni tagħhom. Konsegwentement, l-għan tal-Artikolu 13(2) tar-Regolament bażiku huwa li jiġu identifikati l-prattiki, il-proċessi jew il-ħidmiet li jużaw b’mod predominanti partijiet mill-pajjiż li huwa soġġett għall-miżuri u li jarmahom jew ilestihom billi jżid valur limitat għal dawn il-partijiet.

(90)

Wara l-iżvelar, Çolakoğlu affermat li l-SSHR prodotti b’ċangaturi ta’ oriġini Torka jaqgħu barra mill-ambitu tal-investigazzjoni. Għalhekk, jenħtieġ li l-estensjoni tal-miżuri tkun relatata biss mal-SSHR prodotti minn ċangaturi Indoneżjani u mhux mal-SSHR prodotti minn ċangaturi ta’ oriġini Torka. Çolakoğlu affermat ukoll li l-oriġini tista’ tiġi vverifikata mill-awtoritajiet doganali nazzjonali minħabba l-eżistenza ta’ mod vijabbli u prattikabbli biex tiġi vverifikata l-oriġini Torka tagħha. B’mod speċifiku, jenħtieġ li l-kisba ta’ Ċertifikat EUR.1, li jagħti oriġini preferenzjali, tipprovdi assigurazzjoni b’garanziji suffiċjenti li l-SSHR li kienu relatati miegħu kienu pproċessati minn ċangaturi ta’ oriġini Torka.

(91)

L-Artikolu 13(1) tar-Regolament bażiku jipprevedi estensjoni tad-dazji għall-importazzjonijiet minn pajjiżi terzi tal-prodott simili, jekk jiġu ssodisfati l-kundizzjonijiet. Skont l-Artikolu 13(4), eżenzjonijiet mill-estensjoni tal-miżuri jistgħu jingħataw lill-produtturi tal-prodott ikkonċernat li jinstabu li mhumiex involuti fi prattiki ta’ ċirkomvenzjoni. Fl-analiżi tagħha, il-Kummissjoni kienet marbuta tqis il-bejgħ kollu lill-Unjoni tal-prodott investigat mill-produttur esportatur inkwistjoni, inklużi dawk manifatturati minn ċangaturi ta’ oriġini Torka, u mhux biss il-bejgħ tal-prodott manifatturat b’ċangaturi Indoneżjani. F’dan ir-rigward, l-investigazzjoni kkonfermat li Çolakoğlu esportat lejn l-Unjoni SSHR manifatturati b’mod predominanti b’ċangaturi Indoneżjani. B’mod speċifiku, l-investigazzjoni stabbiliet li matul il-perjodu ta’ rappurtar, mill-[40 000–50 000] tunnellata ta’ SSHR esportati minn Çolakoğlu lejn l-Unjoni, [20–200] tunnellata biss kienu SSHR prodotti b’ċangaturi ta’ oriġini Torka, li jammontaw għal-livell massimu tagħhom ta’ 0,5 % tal-partijiet. Għaldaqstant, il-partijiet, iċ-ċangaturi tal-azzar inossidabbli, importati mill-Indoneżja, kienu jammontaw fil-perjodu ta’ rappurtar għal aktar minn 99,5 % tal-partijiet kollha użati fil-produzzjoni totali ta’ SSHR. Konsegwentement, ġiet miċħuda l-affermazzjoni.

(92)

Wara l-iżvelar, Çolakoğlu argumentat li nkisru d-drittijiet tad-difiża tagħha, b’mod partikolari l-Artikolu 6(7) tar-Regolament bażiku u l-Artikolu 296 TFUE minħabba li t-talba għal eżenzjoni inizjali tagħha kienet tikkonċerna mhux biss l-SSHR prodotti b’ċangaturi Indoneżjani iżda wkoll, separatament, l-SSHR prodotti b’ċangaturi ta’ oriġini Torka. Dan l-element ma kienx indirizzat fl-iżvelar, skont Çolakoğlu.

(93)

Kif indikat fil-premessa (85) ta’ hawn fuq, skont l-Artikolu 13(1) tar-Regolament bażiku, l-estensjoni tikkonċerna importazzjonijiet minn pajjiżi terzi tal-prodott simili u l-Artikolu 13(4) jippermetti eżenzjonijiet għal “produtturi […] li jinstabu li mhumiex involuti fi prattiki ta’ ċirkomvenzjoni”. Il-Kummissjoni indikat fid-dokument ta’ żvelar li għall-fini tal-valutazzjoni tal-kriterju tas-60 %, hija qieset iċ-ċangaturi kollha pproċessati minn Çolakoğlu, u li kważi 100 % taċ-ċangaturi tal-azzar inossidabbli pproċessati minnu kienu importati mill-Indoneżja. B’hekk, dawk iċ-ċangaturi kkostitwixxew kważi 100 % tal-valur totali tal-partijiet tal-prodott assemblat/lest skont it-tifsira tal-Artikolu 13(2)(b) tar-Regolament bażiku. Abbażi ta’ din il-valutazzjoni, Çolakoğlu nstabet li kienet involuta fi prattiki ta’ ċirkomvenzjoni skont it-tifsira tal-Artikolu 13(4) tar-Regolament bażiku u b’hekk ma setgħetx tingħata eżenzjoni skont dik id-dispożizzjoni. Barra minn hekk, wara l-iżvelar, fil-premessa (91) ta’ hawn fuq, il-Kummissjoni kkonfermat li l-SSHR prodotti minn ċangaturi ta’ oriġini Torka kellhom jitqiesu fl-analiżi tagħha u ma setgħux jiġu esklużi mill-ambitu tal-investigazzjoni. Konsegwentement, il-Kummissjoni qieset li d-dritt tad-difiża ta’ Çolakoğlu ġie rrispettat bis-sħiħ u ċaħdet l-affermazzjoni.

(94)

Il-Kummissjoni għalhekk ikkonkludiet li ġie ssodisfat il-kriterju tas-60 % stabbilit fl-Artikolu 13(2)(b) tar-Regolament bażiku.

(95)

Il-valur miżjud medju stabbilit matul il-perjodu ta’ rappurtar instab li kien inqas minn 5 %, li huwa ħafna aktar baxx mill-limitu ta’ 25 % stabbilit mill-Artikolu 13(2)(b) tar-Regolament bażiku. Il-Kummissjoni għalhekk ikkonkludiet li l-valur miżjud mal-partijiet miġjuba, tul l-operazzjoni ta’ assemblaġġ jew ta’ kompletazzjoni, kien inqas minn 25 % tal-kost tal-manifattura, kif meħtieġ mill-Artikolu 13(2)(b) tar-Regolament bażiku biex dawn l-operazzjonijiet jikkostitwixxu ċirkomvenzjoni.

(96)

F’konformità mal-Artikolu 13(1) tar-Regolament bażiku, il-Kummissjoni eżaminat jekk l-importazzjonijiet tal-prodott investigat, kemm f’termini ta’ kwantitajiet kif ukoll ta’ prezzijiet, imminawx l-effetti ta’ rimedju tal-miżuri attwalment fis-seħħ.

(97)

Abbażi tad-data ppreżentata u vverifikata ta’ Çolakoğlu u ta’ Marcegaglia, Çolakoğlu esportat 40 000–50 000 tunnellata matul il-perjodu ta’ rappurtar. Fl-istess ħin, il-bejgħ ħieles tal-konsum tal-Unjoni ġie stmat mill-applikant li huwa madwar il-1 200 000 tunnellata għall-perjodu ta’ rappurtar. Għalhekk, is-sehem mis-suq tal-importazzjonijiet mit-Turkija kien jirrappreżenta madwar 4 % tal-bejgħ ħieles tal-konsum tal-Unjoni matul il-perjodu ta’ rappurtar u aktar minn 3 % tal-bejgħ ħieles tal-konsum tal-Unjoni stabbilit fil-perjodu ta’ investigazzjoni oriġinali. Barra minn hekk, billi l-Kummissjoni stabbiliet kapaċità ta’ riżerva sostantiva fil-mitħna tal-laminazzjoni fis-sħana ta’ Çolakoğlu, il-kumpanija setgħet iżżid b’mod sostanzjali l-volumi tal-esportazzjoni tagħha fil-futur.

(98)

Rigward il-prezzijiet, il-Kummissjoni qabblet il-prezz medju mhux dannuż, kif stabbilit fl-investigazzjoni oriġinali, mal-medja ponderata tal-prezzijiet tal-esportazzjoni CIF iddeterminata fuq il-bażi tal-istatistika tal-Eurostat, aġġustata kif dovut biex tinkludi l-kostijiet ta’ wara l-iżdoganar. Il-Kummissjoni użat l-istatistika tal-Eurostat peress li t-tranżazzjonijiet bejn Çolakoğlu u Marcegaglia kienu bbażati fuq ftehim ta’ tolling, u b’hekk kienu jikkostitwixxu tariffa tas-servizzi u ma jirriflettux prezz tas-suq. Dan it-tqabbil tal-prezzijiet wera li l-importazzjonijiet minn Çolakoğlu kienu inqas mill-prezzijiet tal-Unjoni b’aktar minn 13 %.

(99)

Wara l-iżvelar, Marcegaglia, Çolakoğlu u l-Gvern tar-Repubblika tat-Turkija affermaw li, minħabba ż-żieda fl-importazzjonijiet mill-Indoneżja, il-miżuri eżistenti fuq l-importazzjonijiet Indoneżjani ma kellhom l-ebda effett ta’ rimedju li jista’ potenzjalment jiġi mminat mill-importazzjonijiet mit-Turkija, li kienu konsiderevolment aktar baxxi f’termini assoluti.

(100)

Çolakoğlu affermat ukoll li, jekk xi importazzjonijiet ikunu qed jimminaw l-effetti ta’ rimedju, dawk ma jkunux l-importazzjonijiet mill-SSHR Torok, iżda pjuttost l-importazzjonijiet ta’ ċangaturi li allegatament jiġu pproċessati f’SSHR fl-Unjoni minħabba l-volumi sostanzjalment ogħla tagħhom.

(101)

Il-Kummissjoni fakkret li, filwaqt li l-importazzjonijiet ta’ ċangaturi mill-Indoneżja fl-Unjoni kienu fil-fatt akbar fil-volum mill-SSHR mit-Turkija, dan, madankollu, ma jbiddilx is-sejbiet tal-investigazzjoni li l-importazzjonijiet ta’ SSHR mit-Turkija mminaw l-effetti ta’ rimedju tal-miżuri, jiġifieri li dawn l-importazzjonijiet kienu jirrappreżentaw aktar minn 4 % tal-konsum totali tal-Unjoni matul il-perjodu ta’ rappurtar u kienu inqas mill-prezzijiet tal-Unjoni b’aktar minn 13 %. Barra minn hekk, il-kontinwazzjoni ta’ importazzjonijiet ta’ SSHR Indoneżjani ma implikatx li l-miżuri oriġinali kienu ineffiċjenti. Fil-fatt, l-għan tal-miżuri ma kienx li jitneħħew l-importazzjonijiet, iżda pjuttost li jkun hemm kundizzjonijiet ekwivalenti ta’ kompetizzjoni. L-importazzjonijiet ta’ SSHR Indoneżjani fl-Unjoni komplew u saħansitra żdiedu, iżda huma soġġetti għal dazju li huwa maħsub biex ineħħi l-effetti ta’ dumping dannuż.

(102)

Fir-rigward tal-importazzjonijiet taċ-ċangaturi Indoneżjani fl-Unjoni, il-Kummissjoni nnotat li jekk kienx hemm fatturi oħra li jistgħu jimminaw l-effett ta’ rimedju tal-miżuri kien irrilevanti għas-sejbiet fil-każ inkwistjoni. Barra minn hekk, l-Artikolu 13(1) tar-Regolament bażiku ma jirrikjedix li l-Kummissjoni tanalizza fatturi oħra, jekk ikun hemm, li jistgħu addizzjonalment ikunu qed jimminaw l-effetti ta’ rimedju tad-dazju.

(103)

Wara l-iżvelar, Marcegaglia affermat li, minħabba s-suq limitat tiegħu, l-importazzjonijiet ta’ SSHR suwed mit-Turkija ma mminawx l-effetti ta’ rimedju tal-miżuri fis-seħħ kontra l-importazzjonijiet ta’ SSHR Indoneżjani.

(104)

Kif indikat fil-premessa (12), il-Kummissjoni nnotat li fl-investigazzjoni oriġinali ġie konkluż li l-kojls suwed u bojod għandhom l-istess karatteristiċi fiżiċi u kimiċi bażiċi, huma f’kompetizzjoni ma’ xulxin u jaqgħu fl-ambitu tal-prodott. Għalhekk, l-affermazzjoni ġiet miċħuda.

(105)

Fid-dawl tal-kunsiderazzjonijiet ta’ hawn fuq, il-Kummissjoni kkonkludiet li l-miżuri eżistenti kienu imminati f’termini ta’ kwantitajiet u prezzijiet mill-importazzjonijiet mit-Turkija, soġġetti għal din l-investigazzjoni.

(106)

F’konformità mal-Artikolu 13(1) tar-Regolament bażiku, il-Kummissjoni eżaminat ukoll jekk kienx hemm evidenza ta’ dumping fir-rigward tal-valuri normali stabbiliti minn qabel għall-prodott simili.

(107)

Għal dan l-għan, il-Kummissjoni qabblet il-prezzijiet medji tal-esportazzjoni mit-Turkija, abbażi tal-istatistika tal-Eurostat, mal-valuri normali stabbiliti matul l-investigazzjoni oriġinali, aġġustati għaż-żieda fil-prezz tal-kojls SSHR fl-Indoneżja kif irrappurtat f’bażijiet tad-data pubbliċi (14). It-tqabbil tal-valuri normali u l-prezzijiet tal-esportazzjoni wera li l-SSHR ġew esportati bi prezzijiet oġġett ta’ dumping tul il-perjodu ta’ rappurtar.

(108)

Abbażi tas-sejbiet ta’ hawn fuq, il-Kummissjoni kkonkludiet li kienet qed issir ċirkomvenzjoni tad-dazju anti-dumping impost fuq l-importazzjonijiet ta’ SSHR li joriġinaw fl-Indoneżja minn importazzjonijiet tal-prodott investigat ikkonsenjat mit-Turkija minn Çolakoğlu.

(109)

Minħabba li l-livell ta’ kooperazzjoni kien għoli, billi l-bejgħ għall-esportazzjoni rrappurtat ta’ Çolakoğlu kien jirrappreżenta [minn 88 % sa 93 %] tal-volumi totali tal-importazzjoni mit-Turkija fl-Unjoni matul il-perjodu ta’ rappurtar, u li l-ebda produttur Tork ieħor skont it-tifsira tal-Artikolu 13(4) tar-Regolament bażiku ma ppreżenta ruħu biex jitlob eżenzjoni, il-Kummissjoni kkonkludiet li s-sejbiet ta’ prattiki ta’ ċirkomvenzjoni fir-rigward ta’ Çolakoğlu kienu rappreżentattivi fir-rigward tal-importazzjonijiet kollha mit-Turkija.

(110)

Għalhekk, f’konformità mal-Artikolu 13(1) tar-Regolament bażiku, il-miżuri anti-dumping fis-seħħ fuq l-importazzjonijiet ta’ SSHR li joriġinaw mill-Indoneżja jenħtieġ li jiġu estiżi għall-importazzjonijiet tal-prodott investigat.

(111)

Skont l-Artikolu 13(1), it-tieni paragrafu tar-Regolament bażiku, jenħtieġ li l-miżura li għandha tiġi estiża tkun dik stabbilita fl-Artikolu 1(2) tar-Regolament ta’ Implimentazzjoni (UE) 2020/1408 għall-“kumpaniji l-oħrajn kollha”, li hija dazju antidumping definittiv ta’ 17,3 % applikabbli għall-prezz nett, ħieles fil-fruntiera tal-Unjoni, qabel id-dazju doganali.

(112)

Skont l-Artikolu 13(3) tar-Regolament bażiku, li jipprevedi li kull miżura estiża jenħtieġ li tapplika għall-importazzjonijiet li daħlu fl-Unjoni taħt reġistrazzjoni imposta mir-Regolament tal-bidu, għandhom jinġabru dazji fuq dawk l-importazzjonijiet irreġistrati tal-prodott investigat.

(113)

Kif deskritt hawn fuq, instab li Çolakoğlu kienet involuta fi prattiki ta’ ċirkomvenzjoni. Għalhekk, ma setgħetx tingħata eżenzjoni, skont l-Artikolu 13(4) tar-Regolament bażiku, lil din il-kumpanija.

(114)

Kif imsemmi fit-taqsima 2.2 hawn fuq, Saritas, UCAS u AST tqiesu li ma kinux produtturi esportaturi, u għalhekk mhumiex intitolati japplikaw għal eżenzjoni. Bl-istess mod, minħabba t-tweġiba insodisfaċenti tagħha, il-Kummissjoni ma setgħetx tistabbilixxi jekk Poyraz kinitx produttur ġenwin u b’hekk eliġibbli għal eżenzjoni.

(115)

Fid-dawl ta’ dan ta’ hawn fuq, jenħtieġ li l-ebda waħda mill-kumpaniji ma tiġi eżentata mill-estensjoni tal-miżuri.

(116)

Fit-30 ta’ Jannar 2023, il-Kummissjoni żvelat lill-partijiet interessati kollha l-fatti u l-kunsiderazzjonijiet essenzjali li wasslu għall-konklużjonijiet ta’ hawn fuq u stednithom jikkummentaw. Waslu kummenti minn Çolakoğlu, Marcegaglia u l-Gvern tar-Repubblika tat-Turkija u ġew ikkunsidrati kif xieraq.

(117)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.