Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32023R0398

Regolament Delegat tal-Kummissjoni (UE) 2023/398 tal-14 ta’ Diċembru 2022 li jemenda r-Regolament Delegat (UE) 2015/2446 fir-rigward tal-estensjoni tal-possibbiltajiet biex id-dikjarazzjonijiet doganali bil-fomm jew permezz ta’ xi att ieħor jitqiesu bħala dikjarazzjoni doganali, tal-invalidazzjoni tad-dikjarazzjonijiet f’każijiet speċifiċi, u tal-ispeċifikazzjoni tal-iskambju tal-informazzjoni għad-dikjarazzjonijiet fil-qosor tad-dħul (Test b’rilevanza għaż-ŻEE)

C/2022/9254

ĠU L 54, 22.2.2023, p. 1–4 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_del/2023/398/oj

22.2.2023   

MT

Il-Ġurnal Uffiċjali tal-Unjoni Ewropea

L 54/1

REGOLAMENT DELEGAT TAL-KUMMISSJONI (UE) 2023/398

tal-14 ta’ Diċembru 2022

li jemenda r-Regolament Delegat (UE) 2015/2446 fir-rigward tal-estensjoni tal-possibbiltajiet biex id-dikjarazzjonijiet doganali bil-fomm jew permezz ta’ xi att ieħor jitqiesu bħala dikjarazzjoni doganali, tal-invalidazzjoni tad-dikjarazzjonijiet f’każijiet speċifiċi, u tal-ispeċifikazzjoni tal-iskambju tal-informazzjoni għad-dikjarazzjonijiet fil-qosor tad-dħul

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni (1), u b’mod partikolari l-Artikolu 131, il-punt (c) u l-Artikoli 160 u 175 tiegħu,

Billi:

(1)

L-implimentazzjoni prattika tar-Regolament (UE) Nru 952/2013 (“il-Kodiċi”) flimkien mar-Regolament Delegat tal-Kummissjoni (UE) 2015/2446 (2) uriet li jeħtieġ isiru xi emendi lil dak ir-Regolament Delegat sabiex jiġi aġġustat aħjar għall-ħtiġijiet tal-operaturi ekonomiċi u tal-awtoritajiet doganali kif ukoll biex jitqiesu l-iżviluppi rigward it-tnedija li ġejja tal-ħarġiet 2 u 3 tas-Sistema ta’ Kontroll tal-Importazzjoni (ICS2).

(2)

Sabiex jiġi ċċarat li fil-każ ta’ kunsinni postali trażbordati fl-Unjoni, f’ċerti sitwazzjonijiet l-obbligu li tiġi pprovduta d-data tad-dikjarazzjoni fil-qosor tad-dħul huwa tal-operatur postali f’pajjiż terz minn fejn il-merkanzija tkun intbagħtet, f’konformità mal-Artikolu 127(6) tar-Regolament (UE) Nru 952/2013, jeħtieġ li tiġi introdotta definizzjoni ġdida ta’ “operatur postali ta’ pajjiż terz”.

(3)

Mid-data stabbilita fl-Anness tad-Deċiżjoni ta’ Implimentazzjoni tal-Kummissjoni (UE) 2019/2151 (3) għat-tnedija tal-ħarġa 3 tal-ICS2, jeħtieġ ikun possibbli li persuni differenti involuti fil-proċess tat-trasport bil-ferrovija tal-merkanzija fit-territorju doganali tal-Unjoni, jippreżentaw partijiet mill-informazzjoni ta’ dikjarazzjoni fil-qosor tad-dħul, jiġifieri preżentazzjoni multipla. Għalhekk, jenħtieġ li jiżdied Artikolu 112a ġdid mar-Regolament Delegat (UE) 2015/2446 biex jipprevedi din il-possibbiltà.

(4)

Sabiex isir obbligatorju li l-operaturi postali ta’ pajjiż terz jippreżentaw id-dettalji tad-dikjarazzjoni fil-qosor tad-dħul għall-merkanzija trażbordata fit-territorju doganali tal-Unjoni, meta dak l-operatur postali ma jkunx ipprovda dawk id-dettalji lit-trasportatur, jenħtieġ li l-Artikolu 113a tar-Regolament Delegat (UE) 2015/2446 jiġi emendat.

(5)

Il-pakketti li jkollhom marka permanenti li tidentifika persuna, li jkunu importati temporanjament mimlija u riesportati mimlija jew vojta, jistgħu jiġu ddikjarati permezz ta’ dikjarazzjoni bil-fomm jew permezz ta’ kwalunkwe att ieħor imsemmi fl-Artikolu 141 tar-Regolament Delegat (UE) 2015/2446. Peress li dan jista’ jsir biss għall-pakketti importati minn persuni stabbiliti barra t-territorju doganali tal-Unjoni, jeħtieġ li tiġi estiża l-applikazzjoni ta’ dik il-formalità doganali simplifikata għall-pakketti importati vojta mill-persuni, irrispettivament minn fejn huma stabbiliti dawk il-persuni.

(6)

Il-possibbiltà ta’ ħlas lura tad-dazju fuq l-importazzjoni jenħtieġ li jiġi introdott f’sitwazzjonijiet speċifiċi fejn il-merkanzija tiġi kkonsenjata mingħajr ħlas lill-organizzazzjonijiet tal-karità jew filantropiċi. Dan jenħtieġ li jsir billi tiżdied raġuni ġdida għall-invalidazzjoni tad-dikjarazzjonijiet doganali wara r-rilaxx tal-merkanzija, li jagħmilha possibbli li jitħallas lura d-dazju fuq l-importazzjoni mħallas f’konformità mal-Artikolu 116(1) tal-Kodiċi.

(7)

Għaldaqstant jenħtieġ li r-Regolament Delegat (UE) 2015/2446 jiġi emendat skont dan,

ADOTTAT DAN IR-REGOLAMENT:

Artikolu 1

Ir-Regolament Delegat (UE) 2015/2446 huwa emendat kif ġej:

(1)

fl-Artikolu 1, tiżdied id-definizzjoni li ġejja:

“(54)   ‘operatur postali ta’ pajjiż terz’ tfisser operatur stabbilit f’pajjiż terz u deżinjat minnu biex jipprovdi s-servizzi internazzjonali rregolati mill-Konvenzjoni Postali Universali.”

;

(2)

fit-Titolu IV, il-Kapitolu 1, jiddaħħal l-Artikolu 112a li ġej:

“Artikolu 112a

Forniment tad-dettalji tad-dikjarazzjoni fil-qosor tad-dħul minn persuni oħra f’każijiet speċifiċi rigward it-trasport bil-ferrovija

(l-Artikolu 127(6) tal-Kodiċi)

1.   Meta, fil-każ ta’ trasport bil-ferrovija, għall-istess merkanzija, ikun ġie konkluż kuntratt addizzjonali wieħed jew iktar kopert minn nota ta’ kunsinna waħda jew iktar minn persuna waħda jew iktar għajr it-trasportatur, u l-persuna li toħroġ in-nota ta’ kunsinna ma tqegħidx id-dettalji meħtieġa għad-dikjarazzjoni fil-qosor tad-dħul għad-dispożizzjoni tas-sieħeb kuntrattwali tagħha li joħroġ nota ta’ kunsinna lilha jew lis-sieħeb kuntrattwali li miegħu kkonkludiet arranġament ta’ tagħbija kondiviża ta’ merkanzija, il-persuna li ma tqegħidx id-dettalji meħtieġa għad-dispożizzjoni għandha tipprovdi dawk id-dettalji lill-uffiċċju doganali tal-ewwel dħul f’konformità mal-Artikolu 127(6) tal-Kodiċi.

Meta d-destinatarju indikat fuq in-nota ta’ kunsinna, li ma jkollha ebda nota ta’ kunsinna sottostanti, ma jqegħidx id-dettalji meħtieġa għad-dikjarazzjoni fil-qosor tad-dħul għad-dispożizzjoni tal-persuna li toħroġ in-nota ta’ kunsinna, dan għandu jipprovdi dawk id-dettalji lill-uffiċċju doganali tal-ewwel dħul.

2.   Sad-data stabbilita f’konformità mal-Anness tad-Deċiżjoni ta’ Implimentazzjoni (UE) 2019/2151 għat-tnedija tal-ħarġa 3 tas-sistema msemmija fl-Artikolu 182(1) tar-Regolament ta’ Implimentazzjoni (UE) 2015/2447, il-paragrafu 1 ta’ dan l-Artikolu ma għandux japplika.”

;

(3)

fl-Artikolu 113a, jiżdied il-paragrafu 4 li ġej:

“4.   Mid-data stabbilita f’konformità mal-Anness tad-Deċiżjoni ta’ Implimentazzjoni (UE) 2019/2151 għat-tnedija tal-ħarġa 2 tas-sistema msemmija fl-Artikolu 182(1) tar-Regolament ta’ Implimentazzjoni (UE) 2015/2447, meta l-operatur postali ta’ pajjiż terz ma jqegħidx id-dettalji meħtieġa għad-dikjarazzjoni fil-qosor tad-dħul ta’ kunsinni postali għad-dispożizzjoni ta’ trasportatur li huwa obbligat li jirreġistra l-bqija tad-dettalji tad-dikjarazzjoni permezz ta’ dik is-sistema, l-operatur postali tal-pajjiż tad-dispaċċ, jekk il-merkanzija tiġi trażbordata fl-Unjoni, għandu jipprovdi dawk id-dettalji lill-uffiċċju doganali tal-ewwel dħul f’konformità mal-Artikolu 127(6) tal-Kodiċi.”

;

(4)

fl-Artikolu 136(1), il-punt (j) huwa sostitwit b’dan li ġej:

“(j)

pakketti importati mimlija jew vojta u maħsuba għar-riesportazzjoni, kemm jekk mimlija jew vojta, li jkollhom marki permanenti, li ma jitħassrux, li jidentifikaw persuna stabbilita barra t-territorju doganali tal-Unjoni jew fih;”;

(5)

fl-Artikolu 138, il-punt (c) huwa sostitwit b’dan li ġej:

“(c)

merkanzija kif imsemmija fl-Artikolu 136(1), il-punti (a) u (j), ta’ dan ir-Regolament li tibbenefika minn eżenzjoni mid-dazju fuq l-importazzjoni bħala merkanzija rritornata f’konformità mal-Artikolu 203 tal-Kodiċi;”.

(6)

fl-Artikolu 139, il-paragrafi 1 u 2 huma sostitwiti b’dan li ġej:

“1.   Meta ma tkunx iddikjarata permezz ta’ mezzi oħra, il-merkanzija msemmija fl-Artikolu 136(1), il-punti (a) sa (d), (h), (i) u (j), għandha titqies li tkun iddikjarata għal dħul temporanju f’konformità mal-Artikolu 141.

2.   Meta ma tkunx iddikjarata permezz ta’ mezzi oħra, il-merkanzija msemmija fl-Artikolu 136(1), il-punti (a) sa (d), (h), (i) u (j) għandha titqies li tkun iddikjarata għar-riesportazzjoni f’konformità mal-Artikolu 141 dwar ir-rilaxx tal-proċedura ta’ dħul temporanju.”

;

(7)

fl-Artikolu 141, il-paragrafu 1 huwa emendat kif ġej:

(a)

il-frażi introduttorja hija sostitwita b’dan li ġej:

“Fir-rigward tal-merkanzija kif imsemmija fl-Artikolu 138, il-punti (a) sa (d) u l-punt (h), l-Artikolu 139 u l-Artikolu 140(1), kwalunkwe mill-atti li ġejjin għandu jitqies bħala dikjarazzjoni doganali jew ta’ riesportazzjoni:”;

(b)

fil-punt (d), il-punti (iv) u (v) huma sostitwiti b’dan li ġej:

“(iv)

meta l-merkanzija kif imsemmija fl-Artikolu 136(1), il-punti (a) u (j) ta’ dan ir-Regolament, titqies li hija ddikjarata għal dħul temporanju f’konformità mal-Artikolu 139(1) ta’ dan ir-Regolament;

(v)

meta l-merkanzija kif imsemmija fl-Artikolu 136(1), il-punti (a) sa (j), ta’ dan ir-Regolament, li tikkonforma mal-kundizzjonijiet stabbiliti fl-Artikolu 203 tal-Kodiċi, titwassal fit-territorju doganali tal-Unjoni f’konformità mal-Artikolu 138, il-punt (c) ta’ dan ir-Regolament.”;

(8)

fl-Artikolu 148(4), jiżdied il-punt (f) li ġej:

“(f)

meta l-merkanzija tkun ġiet rilaxxata għal ċirkolazzjoni libera u tingħata evidenza li tissodisfa lill-awtoritajiet doganali li l-merkanzija ma ntużatx jew ma ġietx ikkunsmata fit-territorju doganali tal-Unjoni dment li:

(i)

l-applikazzjoni ssir fi żmien sena mid-data tal-aċċettazzjoni tad-dikjarazzjoni doganali;

(ii)

il-merkanzija ngħatat mingħajr ħlas lill-organizzazzjonijiet tal-karità jew filantropiċi li jwettqu l-attivitajiet tagħhom fit-territorju doganali tal-Unjoni, u fil-mument li tiġi aċċettata d-dikjarazzjoni doganali msemmija fil-punt (iii), il-merkanzija tkun eliġibbli għal eżenzjoni mid-dazju fuq l-importazzjoni jekk tiġi rilaxxata għal ċirkolazzjoni libera; kif ukoll

(iii)

dikjarazzjoni doganali għar-rilaxx għal ċirkolazzjoni libera b’eżenzjoni totali mid-dazju fuq l-importazzjoni għall-merkanzija inkwistjoni tkun ġiet irreġistrata minn dawk l-organizzazzjonijiet tal-karità jew filantropiċi jew f’isimhom fil-limitu ta’ żmien stabbilit fil-punt (i).”

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-14 ta’ Diċembru 2022.

Għall-Kummissjoni

Il-President

Ursula VON DER LEYEN

(1)   ĠU L 269, 10.10.2013, p. 1.

(2)  Ir-Regolament Delegat tal-Kummissjoni (UE) 2015/2446 tat-28 ta’ Lulju 2015 li jissupplimenta r-Regolament (UE) Nru 952/2013 tal-Parlament Ewropew u tal-Kunsill fir-rigward ta’ regoli dettaljati li jikkonċernaw uħud mid-dispożizzjonijiet tal-Kodiċi Doganali tal-Unjoni (ĠU L 343, 29.12.2015, p. 1).

(3)  Id-Deċiżjoni ta’ Implimentazzjoni tal-Kummissjoni (UE) 2019/2151 tat-13 ta’ Diċembru 2019 li tistabbilixxi l-programm ta’ ħidma relatat mal-iżvilupp u t-tnedija tas-sistemi elettroniċi previsti fil-Kodiċi Doganali tal-Unjoni (ĠU L 325, 16.12.2019, p. 168).

Top