This document is an excerpt from the EUR-Lex website
Document 32023R0370
Commission Delegated Regulation (EU) 2023/370 of 13 December 2022 supplementing Regulation (EU) 2021/2115 of the European Parliament and of the Council with regard to procedures, time limits for submission by Member States of requests for amendments of CAP Strategic Plans, and further cases for which the maximum number of amendments of CAP Strategic Plans does not apply
Regolament Delegat tal-Kummissjoni (UE) 2023/370 tat-13 ta’ Diċembru 2022 li jissupplimenta r-Regolament (UE) 2021/2115 tal-Parlament Ewropew u tal-Kunsill fir-rigward ta’ proċeduri, limiti ta’ żmien għall-preżentazzjoni mill-Istati Membri ta’ talbiet għal emendi tal-Pjanijiet Strateġiċi tal-PAK, u każijiet oħra li għalihom ma japplikax l-għadd massimu ta’ emendi tal-Pjanijiet Strateġiċi tal-PAK
Regolament Delegat tal-Kummissjoni (UE) 2023/370 tat-13 ta’ Diċembru 2022 li jissupplimenta r-Regolament (UE) 2021/2115 tal-Parlament Ewropew u tal-Kunsill fir-rigward ta’ proċeduri, limiti ta’ żmien għall-preżentazzjoni mill-Istati Membri ta’ talbiet għal emendi tal-Pjanijiet Strateġiċi tal-PAK, u każijiet oħra li għalihom ma japplikax l-għadd massimu ta’ emendi tal-Pjanijiet Strateġiċi tal-PAK
C/2022/9111
ĠU L 51, 20.2.2023, p. 25–30
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
20.2.2023 |
MT |
Il-Ġurnal Uffiċjali tal-Unjoni Ewropea |
L 51/25 |
REGOLAMENT DELEGAT TAL-KUMMISSJONI (UE) 2023/370
tat-13 ta’ Diċembru 2022
li jissupplimenta r-Regolament (UE) 2021/2115 tal-Parlament Ewropew u tal-Kunsill fir-rigward ta’ proċeduri, limiti ta’ żmien għall-preżentazzjoni mill-Istati Membri ta’ talbiet għal emendi tal-Pjanijiet Strateġiċi tal-PAK, u każijiet oħra li għalihom ma japplikax l-għadd massimu ta’ emendi tal-Pjanijiet Strateġiċi tal-PAK
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2021/2115 tal-Parlament Ewropew u tal-Kunsill tat-2 ta’ Diċembru 2021 li jistabbilixxi regoli dwar l-appoġġ għall-pjanijiet strateġiċi li għandhom jitfasslu mill-Istati Membri skont il-Politika Agrikola Komuni (Pjanijiet Strateġiċi tal-PAK) u ffinanzjati mill-Fond Agrikolu Ewropew ta’ Garanzija (FAEG) u mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolamenti (UE) Nru 1305/2013 u (UE) Nru 1307/2013 (1), u b’mod partikolari l-Artikolu 122 tiegħu,
Billi:
(1) |
Ir-Regolament (UE) 2021/2115 jistabbilixxi r-regoli bażiċi li jirregolaw il-Pjanijiet Strateġiċi tal-Politika Agrikola Komuni (PAK), inklużi r-regoli dwar il-preżentazzjoni u l-approvazzjoni tal-emendi tal-Pjanijiet Strateġiċi tal-PAK stabbiliti fl-Artikolu 119 ta’ dak ir-Regolament. |
(2) |
Sabiex l-Istati Membri jkunu jistgħu jippreżentaw it-talbiet għal emendi tal-Pjanijiet Strateġiċi tal-PAK tagħhom, jeħtieġ li jiġu stabbiliti l-proċeduri u l-limiti ta’ żmien għall-preżentazzjoni tat-talbiet għal emenda. |
(3) |
Sabiex il-Kummissjoni tivvaluta b’mod korrett it-talba għal emenda tal-Pjan Strateġiku tal-PAK, jenħtieġ li t-talba jkun fiha, minbarra l-informazzjoni stabbilita fl-Artikolu 119(2) tar-Regolament (UE) 2021/2115, għal kull bidla tal-Pjan Strateġiku tal-PAK, ċerta informazzjoni li tispjega r-raġunijiet għall-bidla u li tispjega l-kontenut u l-effetti mistennija tagħha. |
(4) |
Biex jiġi żgurat li t-talba għal emenda tal-Pjan Strateġiku tal-PAK tkun kompluta u tintbagħat b’mod korrett lill-Kummissjoni, jenħtieġ li l-Istati Membri jippreżentawha permezz tas-sistema ta’ skambju elettroniku tad-data“SFC2021” imsemmija fl-Artikolu 3 tar-Regolament ta’ Implimentazzjoni tal-Kummissjoni (UE) 2021/2289 (2). |
(5) |
Sabiex tiġi żgurata valutazzjoni bir-reqqa tat-talba għal emenda ppreżentata għall-approvazzjoni mill-Kummissjoni, u b’mod partikolari tal-pjan finanzjarju emendat, u biex jiġi evitat ir-riskju ta’ żbalji minħabba diversi verżjonijiet tal-Pjan Strateġiku tal-PAK li jkunu għaddejjin minn valutazzjoni parallela, jenħtieġ li l-Istat Membru jippreżenta talba waħda biss għal emenda permezz tas-sistema ta’ skambju elettroniku tad-data“SFC2021” kull darba. Jenħtieġ li l-Istat Membru jissottometti talba ġdida għal emenda biss meta jkun irtira t-talba preċedenti jew meta l-Kummissjoni tkun innotifikat lill-Istat Membru bid-deċiżjoni tagħha dwar it-talba għal emenda ppreżentata qabel. Dan huwa meħtieġ b’mod partikolari biex tiġi żgurata ċ-ċertezza legali għall-benefiċjarji fir-rigward tal-verżjoni applikabbli tal-Pjan Strateġiku tal-PAK u r-rabta korretta tal-pagamenti u mal-pjan finanzjarju emendat applikabbli ġdid. |
(6) |
Jeħtieġ li jiġu stabbiliti regoli dettaljati dwar in-notifiki lill-Kummissjoni tal-bidliet li jikkonċernaw l-interventi skont it-Titolu III, il-Kapitolu IV, tar-Regolament (UE) 2021/2115, imsemmija fl-Artikolu 119(9) ta’ dak ir-Regolament, u dwar in-notifika lill-Kummissjoni tal-eżitu tal-valutazzjoni msemmija fl-Artikolu 120 ta’ dak ir-Regolament. |
(7) |
Jeħtieġ li jiġu stabbiliti l-limiti ta’ żmien għall-preżentazzjoni tat-talbiet għall-emendar tal-Pjanijiet Strateġiċi tal-PAK relatati mat-tipi ta’ intervent f’ċerti setturi msemmija fl-Artikolu 42 tar-Regolament (UE) 2021/2115 u relatati mat-tipi ta’ interventi msemmija fil-Kapitolu IV ta’ dak ir-Regolament sabiex jiġu żgurati l-ipproċessar u d-dħul fis-seħħ f’waqthom tal-emendi tal-Pjanijiet Strateġiċi tal-PAK qabel tmiem il-perjodu għall-eliġibbiltà tan-nefqa. |
(8) |
Jeħtieġ ukoll li jiġi stabbilit perjodu ta’ żmien għall-preżentazzjoni tat-talbiet għall-emendar tal-Pjan Strateġiku tal-PAK relatati mat-trasferiment ta’ ċerti allokazzjonijiet finanzjarji, sabiex jiġi żgurat dħul fis-seħħ f’waqtu tal-allokazzjonijiet finanzjarji għall-pagamenti diretti u għall-FAEŻR. |
(9) |
Sabiex jiġi żgurat l-ipproċessar effiċjenti tat-talbiet għall-emendar tal-Pjanijiet Strateġiċi tal-PAK, jenħtieġ li l-Istati Membri jħejju t-talbiet għall-emendar sabiex inaqqsu l-għadd ta’ talbiet għal emendi ppreżentati f’kull sena kalendarja, pereżempju billi jikkombinaw diversi bidliet fil-Pjanijiet Strateġiċi tal-PAK, f’talba waħda għal emenda. Sabiex tiġi żgurata ċ-ċertezza legali, jiġu protetti d-drittijiet tal-bdiewa u jiġi ggarantit funzjonament bla xkiel u effiċjenti tal-interventi kollha, jenħtieġ li l-Istati Membri jippreżentaw it-talbiet tagħhom għal emenda sabiex ikun hemm biżżejjed żmien għall-valutazzjoni tagħhom mill-Kummissjoni u biex jidħlu fis-seħħ fil-ħin f’konformità mal-Artikolu 119(8) tar-Regolament (UE) 2021/2115. |
(10) |
Biex tiġi żgurata l-flessibbiltà għall-Istati Membri f’każ ta’ emerġenzi minħabba diżastri naturali u avvenimenti katastrofiċi u miżuri oħra ta’ emerġenza, u biex jiġu indirizzati sitwazzjonijiet speċifiċi oħra, u fl-istess ħin, biex jiġu pproċessati b’mod effettiv u f’waqtu t-talbiet għall-emendar tal-Pjan Strateġiku tal-PAK mingħajr piż amministrattiv żejjed, jeħtieġ li jiġu definiti aktar każijiet li għalihom ma japplikax l-għadd massimu ta’ talbiet għal emenda stabbilit fl-Artikolu 119(7) tar-Regolament (UE) 2021/2115. Dawn il-każijiet jenħtieġ li jinkludu bidliet mhux previsti fil-qafas legali tal-Unjoni, obbligi legali, u fejn meħtieġ, diżimpenji awtomatiċi, u bidliet minħabba miżuri eċċezzjonali kontra disturbi fis-suq, mard tal-annimali u pesti tal-pjanti, kif ukoll modifiki ta’ strumenti finanzjarji li joperaw f’ambjent tas-suq dinamiku fejn jistgħu jkunu meħtieġa bidliet regolari għall-implimentazzjoni xierqa tagħhom. |
(11) |
Jeħtieġ li jiġi pprovdut limitu ta’ żmien għall-preżentazzjoni ta’ talbiet għal emendi li jikkonċernaw id-diżimpenn awtomatiku, sabiex tiġi żgurata l-konformità mal-limiti ta’ żmien stabbiliti fl-Artikolu 34 tar-Regolament (UE) 2021/2116 tal-Parlament Ewropew u tal-Kunsill (3) u fl-Artikolu 24 tar-Regolament ta’ Implimentazzjoni tal-Kummissjoni (UE) 2022/128 (4). |
(12) |
Wara li kkunsidrat l-Artikolu 104(1), it-tieni subparagrafu, u l-Artikolu 106 tar-Regolament (UE) 2021/2116 u meta jitqies li dan ir-Regolament jistabbilixxi regoli dwar il-limiti ta’ żmien għat-talbiet għall-emendar tal-Pjanijiet Strateġiċi tal-PAK u każijiet ulterjuri ta’ talbiet għal emenda tal-Pjanijiet Strateġiċi tal-PAK li ma jgħoddux fl-għadd massimu ta’ talbiet għal emenda tal-Pjanijiet Strateġiċi tal-PAK, jenħtieġ li dan ir-Regolament japplika mill-1 ta’ Jannar 2023, biex jiġu żgurati kundizzjonijiet ekwi u ċertezza legali għall-Istati Membri, il-bdiewa u l-partijiet ikkonċernati, |
ADOTTAT DAN IR-REGOLAMENT:
Artikolu 1
Kamp ta’ Applikazzjoni
Dan ir-Regolament jissupplimenta r-Regolament (UE) 2021/2115 rigward:
(a) |
il-proċeduri għall-preżentazzjoni ta’ talbiet għal emenda tal-Pjanijiet Strateġiċi tal-PAK; |
(b) |
il-limiti ta’ żmien għall-preżentazzjoni tat-talbiet għall-emendar tal-Pjanijiet Strateġiċi tal-PAK; |
(c) |
każijiet oħra li għalihom ma japplikax l-għadd massimu ta’ talbiet għal emenda tal-Pjanijiet Strateġiċi tal-PAK imsemmija fl-Artikolu 119(7) tar-Regolament (UE) 2021/2115. |
Artikolu 2
Regoli dwar il-proċedura għall-preżentazzjoni ta’ talbiet għal emenda tal-Pjan Strateġiku tal-PAK u dwar in-notifiki tal-emendi msemmija fl-Artikolu 119(9) tar-Regolament (UE) 2021/2115
1. Minbarra l-elementi msemmija fl-Artikolu 119(2) tar-Regolament (UE) 2021/2115, it-talba għal emenda tal-Pjan Strateġiku tal-PAK għandha tindika tip wieħed jew diversi tipi ta’ emendi, minn fost it-tipi ta’ emendi stabbiliti fl-Anness ta’ dan ir-Regolament u, għal kull bidla proposta tal-Pjan Strateġiku tal-PAK, għandu jkun fiha l-informazzjoni li ġejja:
(a) |
ir-raġunijiet li jiġġustifikaw il-bidla; |
(b) |
l-effetti mistennija tal-bidla; |
(c) |
l-impatt tal-bidla fuq il-miri u l-indikaturi; |
(d) |
l-impatt tal-bidla fuq il-pjan ta’ finanzjament. |
2. It-talba għal emenda tal-Pjan tal-PAK jista’ jkun fiha proposti għal bidla waħda jew aktar tal-Pjan Strateġiku tal-PAK.
3. Ir-rikjesta għal emenda tal-pjan strateġiku tal-PAK għandha tkun ippreżentata permezz tas-sistema ta’ skambju elettroniku tad-data“SFC2021” imsemmija fl-Artikolu 3 tar-Regolament ta’ Implimentazzjoni (UE) 2021/2289. L-informazzjoni msemmija fil-paragrafu 1 ta’ dan l-Artikolu u fl-Artikolu 119(2) tar-Regolament (UE) 2021/2115 għandha tiġi kkodifikata mill-Istat Membru fit-taqsima rispettiva tas-sistema tal-iskambju elettroniku tad-data“SFC2021” għal kull bidla proposta separatament.
4. L-Istati Membri jistgħu jippreżentaw talba waħda biss għal emenda tal-Pjan Strateġiku tal-PAK kull darba. L-Istat Membru jista’ jippreżenta talba ġdida għal emenda tal-Pjan Strateġiku tal-PAK biss wara li t-talba preċedenti tkun ġiet irtirata mill-Istat Membru jew wara li l-Kummissjoni tkun innotifikat lill-Istat Membru bid-deċiżjoni tagħha dwar it-talba preċedenti għal emenda msemmija fl-Artikolu 119(4) tar-Regolament (UE) 2021/2115.
5. Meta Stat Membru jirtira talba għal emenda tal-Pjan Strateġiku tal-PAK, talba ġdida għal emenda tista’ tiġi ppreżentata biss meta l-Kummissjoni tkun irrikonoxxiet l-irtirar tat-talba preċedenti permezz tas-sistema ta’ skambju elettroniku tad-data“SFC2021”.
6. L-Istati Membri għandhom jinnotifikaw lill-Kummissjoni bil-bidliet li jikkonċernaw l-interventi skont it-Titolu III, il-Kapitolu IV, tar-Regolament (UE) 2021/2115, imsemmija fl-Artikolu 119(9) ta’ dak ir-Regolament, permezz tas-sistema tal-iskambju elettroniku tad-data“SFC2021”. In-notifika għandu jkun fiha:
(a) |
is-suġġett tal-bidliet; |
(b) |
ġustifikazzjoni li tikkonferma li l-bidla ma taffettwax il-miri msemmija fl-Artikolu 109(1), il-punt (a), tar-Regolament (UE) 2021/2115; |
(c) |
id-data tad-dħul fis-seħħ tal-bidla fl-Istat Membru. |
7. L-Istati Membri għandhom jinnotifikaw lill-Kummissjoni dwar l-eżitu tal-valutazzjoni msemmija fl-Artikolu 120 tar-Regolament (UE) 2021/2115 permezz tas-sistema tal-iskambju elettroniku tad-data“SFC2021”. Jekk l-Istat Membru, b’riżultat tal-valutazzjoni stabbilita f’dak l-Artikolu, jippreżenta talba għal emenda tal-Pjan Strateġiku tal-PAK tiegħu, huwa għandu jipprovdi bħala parti mill-ġustifikazzjoni ta’ dik it-talba għal emenda, referenza għan-notifika u spjegazzjoni rigward ir-rabtiet bejn l-eżitu tal-valutazzjoni u l-bidliet proposti tal-Pjan Strateġiku tal-PAK.
Artikolu 3
Limiti ta’ żmien għall-preżentazzjoni tat-talbiet għall-emendar tal-Pjan Strateġiku tal-PAK
1. Il-perijodu ta’ tliet xhur imsemmi fl-Artikolu 119(6) tar-Regolament (UE) 2021/2115 għandu jiġi sospiż mid-data li fiha l-osservazzjonijiet tal-Kummissjoni għat-talba għal emenda jkunu ġew innotifikati lill-Istat Membru sad-data li fiha tkun ġiet ippreżentata verżjoni ġdida tal-Pjan Strateġiku tal-PAK permezz tas-sistema ta’ skambju elettroniku tad-data“SFC2021” li fiha l-osservazzjonijiet kollha tal-Kummissjoni jkunu ġew indirizzati bis-sħiħ mill-Istat Membru.
2. It-talbiet għal emendi relatati mat-tipi ta’ interventi msemmija fl-Artikolu 42 tar-Regolament (UE) 2021/2115 għandhom jiġu ppreżentati lill-Kummissjoni sa mhux aktar tard mit-30 ta’ Settembru 2028.
3. It-talbiet għal emendi relatati mat-tipi ta’ interventi msemmija fil-Kapitolu IV tar-Regolament (UE) 2021/2115 għandhom jiġu ppreżentati lill-Kummissjoni sa mhux aktar tard mit-30 ta’ Settembru 2029.
4. It-talbiet għal emendi relatati mat-trasferimenti msemmija fl-Artikolu 17(5), l-Artikolu 88(7) u l-Artikolu 103 tar-Regolament (UE) 2021/2115 għandhom jiġu ppreżentati lill-Kummissjoni matul il-perjodu bejn l-1 ta’ Jannar 2025 u l-31 ta’ Mejju 2025.
Artikolu 4
Każijiet ulterjuri ta’ talbiet għal emenda tal-Pjan Strateġiku tal-PAK
1. It-talbiet għal emenda tal-Pjan Strateġiku tal-PAK ma għandhomx jingħaddu fl-għadd massimu ta’ talbiet imsemmi fl-Artikolu 119(7) tar-Regolament (UE) 2021/2115 jekk ikunu relatati mal-każijiet li ġejjin:
(a) |
bidliet minħabba miżuri ta’ emerġenza meħtieġa biex jiġu indirizzati diżastri naturali, avvenimenti katastrofiċi jew avvenimenti klimatiċi avversi formalment rikonoxxuti bħala tali mill-awtorità pubblika nazzjonali kompetenti, jew modifiki minħabba bidla sinifikanti u f’daqqa fil-kundizzjonijiet soċjoekonomiċi tal-Istat Membru; |
(b) |
bidliet meħtieġa wara l-bidliet fil-leġiżlazzjoni tal-Unjoni, għajr dawk imsemmija fl-Artikolu 120 tar-Regolament (UE) 2021/2115 jew bidliet meħtieġa wara d-deċiżjonijiet tal-Qrati tal-Unjoni Ewropea; |
(c) |
bidliet wara miżuri eċċezzjonali adottati skont l-Artikoli 219, 220 jew 221 tar-Regolament (UE) Nru 1308/2013 tal-Parlament Ewropew u tal-Kunsill (5); |
(d) |
bidliet meħtieġa minħabba l-introduzzjoni tal-istrumenti finanzjarji msemmija fl-Artikolu 58 tar-Regolament (UE) 2021/1060 tal-Parlament Ewropew u tal-Kunsill (6) jew il-modifiki tagħhom; |
(e) |
bidliet minħabba diżimpenn awtomatiku għall-Pjanijiet Strateġiċi tal-PAK imsemmija fl-Artikolu 34 tar-Regolament (UE) 2021/2116; jew |
(f) |
bidliet li jappartjenu għall-interventi skont it-Titolu III, il-Kapitolu IV, tar-Regolament (UE) 2021/2115 imsemmi fl-Artikolu 119(9) ta’ dak ir-Regolament. |
2. It-talba għal emenda tal-Pjan Strateġiku tal-PAK fil-każ imsemmi fil-paragrafu 1, il-punt (e), għandha tiġi ppreżentata sat-30 ta’ Ġunju ta’ kull sena kalendarja.
3. Talba għal emenda li tikkombina l-bidliet fil-każijiet imsemmija fil-paragrafu 1 ma’ bidliet oħra fil-Pjan Strateġiku tal-PAK għandha tgħodd fin-numru massimu ta’ talbiet għal emenda stabbilit fl-Artikolu 119(7) tar-Regolament (UE) 2021/2115.
Artikolu 5
Dħul fis-seħħ u applikazzjoni
Dan ir-Regolament għandu jidħol fis-seħħ fis-seba’ jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandha tapplika mill-1 ta’ Jannar 2023.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-13 ta’ Diċembru 2022.
Għall-Kummissjoni
Il-President
Ursula VON DER LEYEN
(1) ĠU L 435, 6.12.2021, p. 1.
(2) Ir-Regolament ta’ Implimentazzjoni tal-Kummissjoni (UE) 2021/2289 tal-21 ta’ Diċembru 2021 li jistabbilixxi r-regoli għall-applikazzjoni tar-Regolament (UE) 2021/2115 tal-Parlament Ewropew u tal-Kunsill dwar il-preżentazzjoni tal-kontenut tal-Pjanijiet Strateġiċi tal-PAK u dwar is-sistema elettronika għall-iskambju sigur ta’ informazzjoni (ĠU L 458, 22.12.2021, p. 463).
(3) Ir-Regolament (UE) 2021/2116 tal-Parlament Ewropew u tal-Kunsill tat-2 ta’ Diċembru 2021 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolament (UE) Nru 1306/2013 (ĠU L 435, 6.12.2021, p. 187).
(4) Ir-Regolament ta’ Implimentazzjoni tal-Kummissjoni (UE) 2022/128 tal-21 ta’ Diċembru 2021 li jistabbilixxi regoli għall-applikazzjoni tar-Regolament (UE) 2021/2116 tal-Parlament Ewropew u tal-Kunsill dwar l-aġenziji tal-pagamenti u korpi oħra, il-ġestjoni finanzjarja, l-approvazzjoni tal-kontijiet, il-verifiki, il-garanziji u t-trasparenza (ĠU L 20, 31.1.2022, p. 131).
(5) Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671).
(6) Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil, il-Migrazzjoni u l-Integrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ĠU L 231, 30.6.2021, p. 159).
ANNESS
Tipi ta’ emendi tal-Pjan Strateġiku tal-PAK imsemmija fl-Artikolu 2(1):
1. |
Reviżjoni tal-outputs ippjanati jew iffissar/reviżjoni tal-koeffiċjenti ta’ tnaqqis imsemmija fl-Artikolu 11(5) tar-Regolament (UE) 2021/2115; |
2. |
Tibdiliet relatati mal-kundizzjonalità msemmija fl-Artikoli 12 u 13 tar-Regolament (UE) 2021/2115; |
3. |
Trasferiment relatat mad-digressività u l-limitu massimu msemmi fl-Artikolu 17(5) tar-Regolament (UE) 2021/2115; |
4. |
Bidliet relatati ma’ interventi f’ċerti setturi msemmija fl-Artikolu 42 tar-Regolament (UE) 2021/2115; |
5. |
Allokazzjoni ta’ ammont li għandu jingħata bħala kontribut lil InvestEU msemmi fl-Artikolu 81 tar-Regolament (UE) 2021/2115; |
6. |
Bidliet wara rieżami tad-deċiżjonijiet biex jintużaw l-allokazzjonijiet għall-pagamenti diretti għall-interventi f’ċerti setturi, imsemmija fl-Artikolu 88(7) tar-Regolament (UE) 2021/2115; |
7. |
Trasferimenti minħabba flessibbiltà bejn l-allokazzjonijiet ta’ pagamenti diretti u l-allokazzjonijiet tal-FAEŻR, imsemmija fl-Artikolu 103 tar-Regolament (UE) 2021/2115; |
8. |
Bidliet relatati mat-tipi ta’ intervent għall-pagamenti diretti stabbiliti fit-Titolu III, il-Kapitolu II, tar-Regolament (UE) 2021/2115; |
9. |
Żieda tal-elementi neqsin fi Pjan Strateġiku tal-PAK approvat imsemmi fl-Artikolu 118(5) tar-Regolament (UE) 2021/2115; |
10. |
Bidliet relatati mal-interventi għall-iżvilupp rurali stabbiliti fit-Titolu III, il-Kapitolu IV, tar-Regolament (UE) 2021/2115 għajr dawk imsemmija fl-Artikolu 119(9) ta’ dak ir-Regolament; |
11. |
Bidliet minħabba rieżami tal-Pjanijiet Strateġiċi tal-PAK imsemmija fl-Artikolu 120 tar-Regolament (UE) 2021/2115; |
12. |
Bidliet relatati mal-elementi msemmija fl-Artikolu 4(1) ta’ dan ir-Regolament; |
13. |
Bidliet relatati ma’ elementi oħra tal-Pjanijiet Strateġiċi tal-PAK għajr dawk stabbiliti fil-punti 1 sa 12. |