This document is an excerpt from the EUR-Lex website
Document 32023D2898
Council Decision (EU) 2023/2898 of 19 December 2023 on the position to be taken on behalf of the European Union within the World Customs Organization (WCO) with regard to the adoption of Explanatory Notes, Classification Opinions or other advice on the interpretation of the Harmonized System and recommendations to secure uniformity in the interpretation of the Harmonized System under the HS Convention
Deċiżjoni tal-Kunsill (UE) 2023/2898 tad-19 ta’ Diċembru 2023 dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Dinjija Doganali (WCO) fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA
Deċiżjoni tal-Kunsill (UE) 2023/2898 tad-19 ta’ Diċembru 2023 dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Dinjija Doganali (WCO) fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA
ST/16197/2023/ADD/1
ĠU L, 2023/2898, 22.12.2023, ELI: http://data.europa.eu/eli/dec/2023/2898/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
![]() |
Il-Ġurnal Uffiċjali |
MT Serje L |
2023/2898 |
22.12.2023 |
DEĊIŻJONI TAL-KUNSILL (UE) 2023/2898
tad-19 ta’ Diċembru 2023
dwar il-pożizzjoni li għandha tittieħed f’isem l-Unjoni Ewropea fl-Organizzazzjoni Dinjija Doganali (WCO) fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 31, l-Artikolu 43(2) u l-Artikolu 207(4), l-ewwel subparagrafu, flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1) |
Permezz tad-Deċiżjoni tal-Kunsill 87/369/KEE (1) l-Unjoni approvat il-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti (2), u l-Protokoll li Jemendaha (3) (il-Konvenzjoni SA), li stabbiliet, inter alia, il-Kumitat tas-Sistema Armonizzata (HSC — Harmonized System Committee). |
(2) |
Skont l-Artikolu 7(1), il-punti (b) u (c), tal-Konvenzjoni SA, l-HSC huwa responsabbli għat-tħejjija tan-Noti ta’ Spjegazzjoni, tal-Opinjonijiet ta’ Klassifikazzjoni, pariri oħra bħala gwida għall-interpretazzjoni tas-Sistema Armonizzata u għat-tħejjija ta’ rakkomandazzjonijiet biex tiġi żgurata uniformità fl-interpretazzjoni u fl-applikazzjoni tas-Sistema Armonizzata. |
(3) |
Skont l-Artikolu 8(3) tal-Konvenzjoni SA, in-Noti ta’ Spjegazzjoni, l-Opinjonijiet ta’ Klassifikazzjoni, pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni u fl-applikazzjoni tas-Sistema Armonizzata, imħejjija matul sessjoni tal-HSC (“deċiżjonijiet tal-HSC”), għandhom jitqiesu li ġew approvati mill-Kunsill tal-Organizzazzjoni Dinjija Doganali (WCO — World Customs Organization) jekk, fit-tmiem tat-tieni xahar wara x-xahar li fih is-sessjoni li fiha ġew adottati ngħalqet, l-ebda Parti Kontraenti tal-Konvenzjoni SA ma innotifikat lis-Segretarju Ġenerali tad-WCO li ppreżentat talba għal eżami mill-ġdid mill-HSC jew konsultazzjoni lill-Kunsill tad-WCO. |
(4) |
Skont l-Artikolu 8(4) tal-Konvenzjoni SA, ladarba kwistjoni tkun ġiet riferuta lill-Kunsill tad-WCO skont id-dispożizzjonijiet tal-paragrafu 2 ta’ dak l-Artikolu, il-Kunsill tad-WCO għandu japprova dawn in-Noti ta’ Spjegazzjoni, l-Opinjonijiet ta’ Klassifikazzjoni, pariri jew rakkomandazzjonijiet oħra, sakemm kwalunkwe Membru tal-Kunsill tad-WCO li jkun Parti Kontraenti għall-Konvenzjoni SA ma jkunx talab li jkunu riferuti sħaħ jew parzjalment lill-HSC sabiex jiġu eżaminati mill-ġdid. |
(5) |
Jixraq li tiġi stabbilita l-pożizzjoni li għandha tittieħed f’isem l-Unjoni fid-WCO fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tal-Konvenzjoni SA, peress li d-deċiżjonijiet inkwistjoni mħejjija mill-HSC se jkunu kapaċi jinfluwenzaw b’mod deċiżiv il-kontenut tad-dritt tal-Unjoni, jiġifieri, ir-Regolament tal-Kunsill (KEE) Nru 2658/87 (4). |
(6) |
Huwa fl-interess tal-Unjoni li l-pożizzjonijiet espressi mill-Unjoni fl-HSC huma stabbiliti skont il-prinċipji, il-kriterji u l-orjentazzjonijiet li jirregolaw il-klassifikazzjoni tariffarja tal-oġġetti. Huwa wkoll fl-interess tal-Unjoni li dawn il-pożizzjonijiet jiġu stabbiliti b’mod rapidu sabiex l-Unjoni tkun tista’ teżerċita d-drittijiet tagħha fl-HSC. |
(7) |
Sabiex jiġu ppreservati d-drittijiet tal-Unjoni, il-Kummissjoni jenħtieġ li tkun tista’ wkoll titlob f’isem l-Unjoni li kwistjoni tiġi riferuta lill-Kunsill tad-WCO jew lill-HSC biex tiġi eżaminata mill-ġdid skont l-Artikolu 8(2) tal-Konvenzjoni SA, sabiex jiġi evitat li tiġi adottata deċiżjoni dwar kwistjoni li dwarha l-Kunsill tad-WCO jew ma jkunx jista’ jilħaq pożizzjoni qabel l-għeluq tal-iskadenza prevista fl-Artikolu 8(3) tal-Konvenzjoni SA jew ikun laħaq pożizzjoni li tkun differenti fis-sustanza mid-deċiżjoni li ġiet adottata mill-HSC. |
(8) |
Fid-dawl tan-natura dejjem tevolvi u teknika ħafna tal-klassifikazzjoni tal-oġġetti skont il-Konvenzjoni SA, il-volum għoli ta’ mistoqsijiet ittrattati fiż-żewġ laqgħat tal-HSC kull sena, u l-qafas ta’ żmien qasir disponibbli biex jitqiesu d-dokumenti maħruġa mis-Segretarjat tad-WCO u mill-Partijiet Kontraenti bi tħejjija għal-laqgħat tal-HSC u l-ħtieġa konsegwenti li l-pożizzjoni tal-Unjoni tqis l-informazzjoni ġdida ppreżentata qabel jew matul dawn il-laqgħat u li taġixxi fuqha b’mod effettiv, jenħtieġ li jiġu stabbiliti l-passi meħtieġa, f’konformità mal-prinċipju ta’ kooperazzjoni leali fost l-istituzzjonijiet tal-Unjoni stabbiliti fl-Artikolu 13(2) tat-Trattat dwar l-Unjoni Ewropea (TUE), għall-ispeċifikazzjoni tal-pożizzjoni tal-Unjoni. |
(9) |
Id-Deċiżjoni tal-Kunsill (UE) 2020/1707 (5) stabbiliet proċedura effiċjenti u mħaffa għall-istabbiliment tal-pożizzjoni li għandha tittieħed f’isem l-Unjoni dwar l-approvazzjoni tan-Noti ta’ Spjegazzjoni, tal-Opinjonijiet ta’ Klassifikazzjoni jew ta’ pariri oħra dwar l-interpretazzjoni tas-Sistema Armonizzata u ta’ rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA, u dwar it-tħejjija ta’ tali atti fid-WCO. Peress li din se tiskadi fl-31 ta’ Diċembru 2023, jixraq li tiġi sostitwita b’Deċiżjoni ġdida. |
(10) |
Fid-dawl tad-disponibbiltà ripetutament tard tad-dokumenti ta’ ħidma qabel il-laqgħat tal-HSC, u sabiex jiġu ppreservati d-drittijiet u l-interessi tal-Unjoni fi ħdan id-WCO, jenħtieġ li l-Kummissjoni tagħmel ħilitha biex titlob lis-Segretarjat tad-WCO jiżgura d-disponibbiltà tad-dokumenti ta’ ħidma f’konformità mar-regoli ta’ proċedura tal-HSC, sabiex tali dokumenti jintbagħtu mill-inqas 30 jum qabel il-ftuħ tas-sessjoni rilevanti. |
(11) |
Biex jiġi żgurat li l-Kunsill jkun jista’ jivvaluta u, fejn xieraq, jirrevedi l-politika f’din id-Deċiżjoni fuq bażi regolari, u fl-ispirtu tal-kooperazzjoni leali fost l-istituzzjonijiet tal-Unjoni minquxa fl-Artikolu 13(2) tat-TUE, il-validità ta’ din id-Deċiżjoni jenħtieġ li tkun limitata fiż-żmien. Bi tħejjija għal Reviżjoni Strateġika tas-Sistema Armonizzata, li hija ppjanata li tiġi diskussa fil-Kummissjoni Politika tad-WCO u l-Kunsill tad-WCO f’Ġunju 2024, il-perjodu ta’ validità ta’ din id-Deċiżjoni jista’ jitqassar qabel l-iskadenza tagħha, fuq proposta mill-Kummissjoni. |
(12) |
Sabiex tinżamm pożizzjoni tal-Unjoni dwar l-approvazzjoni ta' Noti ta' Spjegazzjoni, Opinjonijiet ta' Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA, u dwar it-tħejjija ta' tali atti fid-WCO wara l-iskadenza tad-Deċiżjoni (UE) 2020/1707 fil-31 ta’ Diċembru 2023, jenħtieġ li din id-Deċiżjoni tapplika mill-1 ta’ Jannar 2024 u għalhekk jenħtieġ li tidħol fis-seħħ b'urġenza, |
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni dwar l-approvazzjoni tan-Noti ta’ Spjegazzjoni, tal-Opinjonijiet ta’ Klassifikazzjoni jew ta’ pariri oħra dwar l-interpretazzjoni tas-Sistema Armonizzata u ta’ rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA, u dwar it-tħejjija ta’ tali atti fl-Organizzazzjoni Dinjija Doganali, għandha tiġi stabbilita f’konformità mal-prinċipji, l-kriterji u l-orjentazzjonijiet stabbiliti fit-Taqsima I tal-Anness ta’ din id-Deċiżjoni.
Artikolu 2
L-ispeċifikazzjoni tal-pożizzjoni tal-Unjoni li għandha tittieħed skont l-Artikolu 1 għandha titwettaq f’konformità mal-ispeċifikazzjoni stipulata fit-Taqsima II tal-Anness ta’ din id-Deċiżjoni.
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Hija għandha tiskadi fil-31 ta’ Diċembru 2026.
Magħmul fi Brussell, id-19 ta’ Diċembru 2023.
Għall-Kunsill
Il-President
T. RIBERA RODRÍGUEZ
(1) Id-Deċiżjoni tal-Kunsill 87/369/KEE tas-7 ta’ April 1987 dwar il-konklużjoni tal-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti u tal-Protokoll li Jemendaha (ĠU L 198, 20.7.1987, p. 1).
(2) ĠU L 198, 20.7.1987, p. 3.
(3) ĠU L 198, 20.7.1987, p. 11.
(4) Ir-Regolament tal-Kunsill (KEE) Nru 2658/87, tat-23 ta’ Lulju, 1987, dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU L 256, 7.9.1987, p. 1).
(5) Id-Deċiżjoni tal-Kunsill (UE) 2020/1707 tat-13 ta’ Novembru 2020 dwar il-pożizzjoni li għandha tittieħed f’isem l-Unjoni Ewropea fi ħdan l-Organizzazzjoni Dinjija Doganali fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA (ĠU L 385, 17.11.2020, p. 11).
ANNESS
I. Il-pożizzjoni li għandha tittieħed f’isem l-Unjoni Ewropea fl-Organizzazzjoni Dinjija Doganali fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA
1. PRINĊIPJI
Fil-qafas tal-Organizzazzjoni Dinjija Doganali (WCO), l-Unjoni għandha:
(a) |
tippromwovi, tikkontribwixxi u tiffaċilita l-klassifikazzjoni doganali tal-oġġetti u l-interpretazzjoni u l-applikazzjoni uniformi tas-Sistema Armonizzata (SA), u t-tnaqqis tal-għadd ta’ kawżi u tilwim li jikkonċernaw l-interpretazzjonijiet diverġenti tas-SA; |
(b) |
taħdem lejn l-involviment xieraq tal-partijiet ikkonċernati fil-fażi ta’ tħejjija għad-deċiżjonijiet tal-Kumitat tas-Sistema Armonizzata (KSA) u tiżgura li d-deċiżjonijiet adottati fid-WCO jkunu f’konformità mal-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti (Konvenzjoni SA) (1); |
(c) |
tiżgura li l-miżuri adottati fid-WCO jkunu konsistenti mar-regoli ġenerali għall-interpretazzjoni tas-SA; |
(d) |
tippromwovi pożizzjonijiet konsistenti mal-aħjar prattiki żviluppati mill-Unjoni fil-qasam ikkonċernat; |
(e) |
tippromwovi s-simplifikazzjoni u l-modernizzazzjoni tan-Nomenklatura tas-SA skont l-evoluzzjoni tal-ħtiġijiet tal-utenti u l-iżvilupp ta’ teknoloġiji ġodda; |
(f) |
tiżgura l-koerenza mal-politiki l-oħra tagħha, inkluż l-objettiv li tipproteġi l-interessi finanzjarji tal-Unjoni, u l-impenji internazzjonali sal-punt rilevanti fid-dawl tan-natura speċifika tal-klassifikazzjoni doganali. |
2. KRITERJI
Il-pożizzjonijiet li għandhom jittieħdu f’isem l-Unjoni fid-WCO:
(a) |
għandhom jiġu stabbiliti f’konformità mal-kriterji ġenerali li ġejjin:
|
(b) |
fejn applikabbli, għandhom iqisu l-kriterji speċifiċi li ġejjin:
|
3. ORJENTAZZJONIJIET
L-Unjoni għandha, fejn xieraq, tagħmel ħilitha sabiex tappoġġa l-adozzjoni tad-deċiżjonijiet li ġejjin fid-WCO, f’konformità mal-prinċipji u l-kriterji msemmija fil-punt 1 u 2:
(a) |
tipproponi u tħejji Noti ta’ Spjegazzjoni, Opinjonijiet ta’ Klassifikazzjoni jew pariri oħra bħala gwida għall-interpretazzjoni tas-SA; |
(b) |
tipprepara rakkomandazzjonijiet sabiex tiġi żgurata l-uniformità fl-interpretazzjoni u fl-applikazzjoni tas-SA; |
II. Speċifikazzjoni dwar il-pożizzjoni li għandha tittieħed f’isem l-Unjoni fi ħdan l-Organizzazzjoni Dinjija Doganali fir-rigward tal-adozzjoni ta’ Noti ta’ Spjegazzjoni, Opinjonijiet ta’ Klassifikazzjoni jew pariri oħra dwar l-interpretazzjoni tas-Sistema Armonizzata u rakkomandazzjonijiet biex tiġi żgurata uniformità fl-interpretazzjoni tas-Sistema Armonizzata skont il-Konvenzjoni SA
Qabel kull laqgħa tal-KSA li matulha l-KSA jintalab jadotta deċiżjonijiet li għandhom effetti legali fuq l-Unjoni, għandhom jittieħdu l-passi meħtieġa sabiex il-pożizzjoni li għandha tiġi espressa f’isem l-Unjoni tqis l-aktar informazzjoni teknika u informazzjoni rilevanti oħra riċenti trażmessa lill-Kummissjoni, f’konformità mal-prinċipji, il-kriterji u l-orjentazzjonijiet stabbiliti fit-taqsima I. Sabiex jiġu ppreservati d-drittijiet u l-interessi tal-Unjoni fi ħdan id-WCO, il-Kummissjoni għandha tagħti attenzjoni speċjali lid-disponibbiltà tad-dokumenti ta’ ħidma f’konformità mar-regoli tal-proċeduri tal-KSA.
Għal dan l-għan, u abbażi ta’ dik l-informazzjoni, il-Kummissjoni għandha tittrażmetti lill-Kunsill, fi żmien suffiċjenti qabel kull laqgħa tal-KSA msemmija fil-punt 1, dokument bil-miktub li jistabbilixxi d-dettalji tal-ispeċifikazzjoni proposta tal-pożizzjoni tal-Unjoni għal diskussjoni u approvazzjoni tad-dettalji tal-pożizzjoni li għandha tiġi espressa f’isem l-Unjoni. Il-Kunsill għandu jeżamina d-dokumenti tal-Kummissjoni fl-aħjar perjodu ta’ żmien possibbli.
Jekk il-Kunsill ma japprovax parti speċifika tal-proposta, il-Kummissjoni mhux ser tippreżenta pożizzjoni tal-Unjoni dwar dik il-parti fil-KSA.
F’każijiet fejn il-pożizzjoni tal-Unjoni tkun differenti fis-sustanza mid-deċiżjoni adottata mill-KSA, il-Kummissjoni għandha, fi żmien biżżejjed qabel l-iskadenza prevista fl-Artikolu 8(3) tal-Konvenzjoni SA, tibgħat lill-Kunsill għad-diskussjoni u għall-approvazzjoni, dokument bil-miktub li jistabbilixxi li d-deċiżjonijiet inkwistjoni jistgħu jiġu aċċettati jew li l-kwistjoni għandha tiġi riferuta lill-Kunsill tad-WCO u lill-KSA biex tiġi eżaminata mill-ġdid skont l-Artikolu 8(2) tal-Konvenzjoni SA.
Sabiex jiġu ppreservati d-drittijiet tal-Unjoni u jiġi evitat li tiġi adottata fid-WCO deċiżjoni dwar kwistjoni li dwarha l-Kunsill ma jkunx jista’ jilħaq pożizzjoni qabel l-iskadenza prevista fl-Artikolu 8(3) tal-Konvenzjoni SA, il-Kummissjoni għandha titlob f’isem l-Unjoni li l-kwistjoni tiġi riferuta lill-Kunsill tad-WCO jew lill-KSA biex tiġi eżaminata mill-ġdid skont l-Artikolu 8(2) tal-Konvenzjoni SA.
(1) ĠU L 198, 20.7.1987, p. 3.
(2) Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana, ĠU L 256, 7.9.1987, p. 9. 1.
ELI: http://data.europa.eu/eli/dec/2023/2898/oj
ISSN 1977-074X (electronic edition)