—

Il-mitigazzjoni tax-xejriet reġjonali tal-proliferazzjoni tal-AQM.

—

L-inkoraġġiment ta' arranġamenti għas-sigurtà reġjonali u l-kontroll tal-armi, in-nonproliferazzjoni, u n-normi u l-proċessi għad-diżarm.

—

L-iżvilupp ta' fehim aktar fil-fond tar-relazzjoni bejn iż-ŻĦAQM LN u l-iżviluppi reġjonali u internazzjonali attwali, u

—

Il-promozzjoni ta' ŻĦAQM LN effettiva, verifikabbli, inklużiva u sostenibbli.

—

Linja ta' ħidma 1: Approfondiment tal-fehim u l-apprezzament tal-kawżi, il-motivazzjonijiet, u r-riskji assoċjati mal-proliferazzjoni reġjonali tal-AQM biex jiġu identifikati soluzzjonijiet biex tissaħħaħ is-sigurtà reġjonali u jiġu promossi soluzzjonijiet reġjonali għall-proliferazzjoni tal-AQM fil-Lvant Nofsani. Il-linja ta' ħidma 1 għandha l-għan li żżid is-sensibilizzazzjoni u l-fehim tal-fatturi li jixprunaw it-tixrid tal-AQM fir-reġjun tal-Lvant Nofsani. L-għan huwa li jiġu identifikati l-kawżi għeruq tal-proliferazzjoni tal-AQM, inkluż motivazzjonijiet strateġiċi, politiċi, jew oħrajn, kif ukoll ir-riskji u l-konsegwenzi assoċjati. L-objettiv ġenerali aħħari ta' din il-linja ta' ħidma huwa li jiġu identifikati soluzzjonijiet prattiċi biex tissaħħaħ is-sigurtà reġjonali u tiġi evitata l-proliferazzjoni tal-AQM fil-Lvant Nofsani. Dan jinkludi l-promozzjoni ta' proċessi ta' sigurtà reġjonali li għaddejjin bħalissa u dawk ġodda kif ukoll l-inizjattiva taż-ŻĦAQM LN, li tipprojbixxi l-pussess, il-produzzjoni, u l-użu ta' AQM fir-reġjun u tippromwovi l-isforzi għad-diżarm u n-nonproliferazzjoni. Billi tapprofondixxi l-fehim tal-isfidi u tesplora soluzzjonijiet potenzjali, il-Linja ta' Ħidma 1 għandha l-għan li tappoġġa l-iżvilupp ta' Lvant Nofsani aktar sigur u stabbli.

—

Linja ta' ħidma 2: It-tisħiħ tal-kapaċitajiet reġjonali biex jittejjeb il-fehim tal-problemi u l-kapaċità li jiġu identifikati soluzzjonijiet relatati man-negozjati u l-implimentazzjoni taż-ŻĦAQM LN. L-objettiv ta' din il-Linja ta' Ħidma 2 huwa li tiżdied il-kapaċità tal-pajjiżi tal-Lvant Nofsani biex jinvolvu ruħhom b'mod effettiv fin-negozjati u fl-implimentazzjoni tal-proċessi ta' sigurtà reġjonali b'mod ġenerali, u b'mod partikolari, iż-ŻĦAQM LN. Dan jinkludi t-tisħiħ tal-kapaċità ta' atturi reġjonali li jifhmu l-kumplessitajiet tal-problema tal-proliferazzjoni tal-AQM, kif ukoll l-iżvilupp tal-kapaċità tagħhom li jidentifikaw u jimplimentaw soluzzjonijiet prattiċi. L-attivitajiet f'din il-linja ta' ħidma ser jinvolvu l-għoti ta' taħriġ u programmi ta' tisħiħ tal-kapaċitajiet għal uffiċjali tal-gvern, esperti, u partijiet ikkonċernati rilevanti oħra, kif ukoll appoġġ għall-espansjoni tal-udjenza fil-mira fir-reġjun. L-għan ġenerali huwa li tinħoloq komunità reġjonali aktar infurmata u impenjata li tkun mgħammra aħjar biex tindirizza l-isfidi tal-proliferazzjoni tal-AQM u tippromwovi sigurtà reġjonali. Permezz tat-tisħiħ tal-kapaċitajiet reġjonali u t-titjib tal-fehim tal-kwistjonijiet, din il-linja ta' ħidma għandha l-għan li tappoġġa n-negozjar u l-implimentazzjoni effettivi tal-proċess ta' sigurtà reġjonali li għaddej u dak ġdid, inkluż iż-ŻĦAQM LN, u b'estensjoni ta' dan, tinkoraġġixxi arranġamenti reġjonali oħra ta' sigurtà u kontroll tal-armi, nonproliferazzjoni, u proċessi ta' diżarm.

—

Linja ta' ħidma 3: L-appoġġ ta' ŻĦAQM LN effettiva, verifikabbli, inklużiva u sostenibbli. Sabiex jiġi żgurat li ż-ŻĦAQM LN tkun komprensiva, effettiva u verifikabbli, il-linja ta' ħidma 3 ser tiffoka wkoll fuq l-appoġġ ta' aspetti tekniċi u legali relatati man-negozjati u l-implimentazzjoni taż-żona. Fl-aħħar mill-aħħar, l-għan ta' din il-linja ta' ħidma huwa li tippromwovi ŻĦAQM LN li tista' tinkiseb u li tkun sostenibbli, jiġifieri li tista' tinkiseb u tkun dejjiema u tkompli sservi bħala għodda ewlenija għat-tisħiħ tas-sigurtà reġjonali u l-prevenzjoni tal-proliferazzjoni tal-AQM fil-Lvant Nofsani.

—

Ilaqqa' żewġ diskussjonijiet madwar mejda jew aktar biex jiġu diskussi żviluppi reġjonali u internazzjonali attwali u l-impatt tagħhom fuq il-perċezzjonijiet ta' theddid reġjonali. Dan ser jinvolvi t-tlaqqigħ ta' esperti, uffiċjali tal-gvern, u partijiet ikkonċernati rilevanti oħra biex jiskambjaw fehmiet u perspettivi dwar l-isfidi tas-sigurtà reġjonali u biex jiddiskutu modi kif jistgħu jissaħħu l-kooperazzjoni u l-istabbiltà reġjonali.

—

Iwettaq riċerka li timmappja l-perċezzjonijiet ta' theddid reġjonali, filwaqt li jeżamina s-sett ta' għodod għall-kisba tal-kontroll tal-armi, in-nonproliferazzjoni u d-diżarm u s-sigurtà reġjonali, u jidentifika kif il-proċessi ta' sigurtà reġjonali kif ukoll iż-ŻĦAQM LN jistgħu jindirizzaw dawn l-isfidi. Din ir-riċerka ser tinvolvi analiżi komprensiva tal-fatturi li jixprunaw il-proliferazzjoni tal-AQM fir-reġjun, kif ukoll eżami tal-qawwiet u d-dgħufijiet tal-proċessi u l-mekkaniżmi ta' sigurtà reġjonali eżistenti.

—

Jippubblika dokument li jiġbor fil-qosor is-sejbiet tar-riċerka u jidentifika modi kif jittaffew il-kawżi, il-motivazzjonijiet u r-riskji assoċjati mal-proliferazzjoni reġjonali tal-AQM. Dan id-dokument ser jipprovdi punti politiċi għat-tisħiħ tal-proċessi ta' sigurtà reġjonali u l-promozzjoni taż-ŻĦAQM LN bħala waħda mill-għodod ewlenin għall-prevenzjoni tat-tixrid tal-AQM fil-Lvant Nofsani.

—

Joħloq networks ta' individwi u istituzzjonijiet li jaħdmu fuq is-sigurtà reġjonali u jippromwovuha, inkluż iż-ŻĦAQM LN, biex isaħħu l-fehim tal-kwistjonijiet bl-objettiv li dawn l-individwi u istituzzjonijiet ikunu jistgħu jinfurmaw il-politiki nazzjonali tagħhom u jinvolvu ruħhom f'diskussjonijiet li għaddejjin u dawk futuri. Dan ser jinvolvi l-ħolqien ta' sħubijiet ma' organizzazzjonijiet u inizjattivi eżistenti, kif ukoll l-appoġġ għall-iżvilupp ta' networks u alleanzi ġodda ddedikati għall-promozzjoni taż-ŻĦAQM LN. L-għan huwa li jiġu stabbiliti, imsaħħa u integrati l-isforzi eżistenti għall-promozzjoni taż-ŻĦAQM LN u li jiġi massimizzat l-impatt tagħha fuq is-sigurtà reġjonali.

—

Jorganizza mill-inqas żewġ sessjonijiet ta' ħidma għat-tisħiħ tal-kapaċitajiet għal uffiċjali u esperti reġjonali biex jissaħħaħ il-fehim ta' kwistjonijiet relatati mas-sigurtà reġjonali, il-proliferazzjoni tal-AQM u l-isforzi biex dawn jiġu indirizzati, inkluż dwar in-negozjati u l-implimentazzjoni taż-ŻĦAQM LN. Dawn is-sessjonijiet ta' ħidma ser jipprovdu opportunitajiet ta' taħriġ u edukazzjoni biex il-parteċipanti japprofondixxu l-għarfien u l-ħiliet tagħhom u jiżviluppaw soluzzjonijiet prattiċi ta' negozjar u implimentazzjoni.

—

Iżomm u jtejjeb l-għodod online taż-ŻĦAQM LN fuq is-sit web tal-UNIDIR. Dan ser jinvolvi l-aġġornament tar-riżorsi u l-materjali eżistenti, kif ukoll l-iżvilupp ta' għodod u riżorsi online ġodda biex jappoġġaw il-promozzjoni u l-implimentazzjoni taż-ŻĦAQM LN.

—

Jittraduċi mill-inqas tliet pubblikazzjonijiet b'lingwi reġjonali. Dan ser jgħin l-iżvilupp ta' terminoloġija bil-lingwi lokali u b'estensjoni ta' dan il-fehim minn esperti reġjonali attwali u futuri, iżid l-aċċess għall-informazzjoni u r-riżorsi relatati maż-ŻĦAQM LN fost l-udjenzi reġjonali u jippromwovi l-viżibbiltà u l-fehim tagħha fir-reġjun.

—

Il-pubblikazzjoni ta' mill-inqas tliet dokumenti ta' politika li jindirizzaw kwistjonijiet li qed joħolqu diffikultajiet fin-negozjati u/jew fl-implimentazzjoni taż-ŻĦAQM LN. Dawn id-dokumenti ser jindirizzaw firxa ta' kwistjonijiet relatati mas-sigurtà reġjonali, id-diżarm, u n-nonproliferazzjoni, u ser jipprovdu implikazzjonijiet u opzjonijiet biex jiġu indirizzati dawn l-isfidi. Ser jipprovdu analiżi komprensiva u infurmata tal-isfidi ewlenin li qed tiffaċċa ż-ŻĦAQM LN u jikkontribwixxu għan-negozjar u l-implimentazzjoni b'suċċess tagħha.

—

L-organizzazzjoni ta' mill-inqas żewġ avvenimenti pubbliċi biex jiġu diskussi kwistjonijiet pertinenti għan-negozjati u l-implimentazzjoni taż-ŻĦAQM LN. Dawn l-avvenimenti ser ilaqqgħu esperti, uffiċjali tal-gvern, u partijiet ikkonċernati rilevanti oħra biex jiddiskutu u jiskambjaw il-fehmiet dwar l-isfidi u l-opportunitajiet relatati maż-ŻĦAQM LN.

—

L-għoti ta' informazzjoni u l-offerta ta' appoġġ għall-isforzi li għaddejjin taż-ŻĦAQM LN relatati mal-implimentazzjoni tagħha u ma' proċessi ta' sigurtà reġjonali oħra. Dan ser jinvolvi l-għoti ta' appoġġ u parir lill-partijiet ikkonċernati rilevanti.

—

Dawk li jfasslu l-politika u d-diplomatiċi fir-reġjun li jaħdmu fuq il-kontroll tal-armi, id-diżarm, u n-nonproliferazzjoni kif ukoll fuq kwistjonijiet ta' sigurtà reġjonali. Dan jinkludi wkoll uffiċjali u esperti reġjonali, u dawk li jaħdmu f'fora reġjonali u multilaterali, inkluż it-TNP, is-CWC, il-Konferenzi ta' Reviżjoni tal-BWC, u l-Konferenza dwar iż-ŻĦAQM LN. Ser tingħata attenzjoni speċjali biex jintlaħqu gruppi inqas rappreżentati bħal żgħażagħ li jfasslu l-politika, esperti, nisa, u xjentisti mir-reġjun li spiss ikunu neqsin mill-konverżazzjonijiet.

—

Dawk li jfasslu l-politika ta' sigurtà internazzjonali, diplomatiċi, u riċerkaturi, b'mod partikolari dawk li jiffukaw fuq il-kontroll tal-armi, id-diżarm, u n-nonproliferazzjoni ta' armi nukleari, kimiċi u bijoloġiċi u s-sistemi ta' kunsinna tagħhom fil-Lvant Nofsani kif ukoll iż-ŻĦAQM LN u s-sigurtà reġjonali, jew teknoloġiji emerġenti.

—

Akkademiċi u prattikanti tal-Lvant Nofsani li jippruvaw isegwu u jifhmu d-dinamiki li qed jinbidlu b'mod rapidu fir-reġjun, l-Istati Membri tar-reġjun u l-popolazzjonijiet tiegħu, l-implikazzjonijiet tat-tibdil fl-alleanzi u fil-kapaċitajiet fuq is-sigurtà reġjonali u l-prospetti tal-prevenzjoni u l-mitigazzjoni ta' sorsi attwali u futuri ta' tensjoni, kunflitti, u proliferazzjoni.