This document is an excerpt from the EUR-Lex website
Document 32023D0694
Commission Implementing Decision (EU) 2023/694 of 22 March 2023 on the request for registration, pursuant to Regulation (EU) 2019/788 of the European Parliament and of the Council, of the European citizens’ initiative entitled ‘End The Horse Slaughter Age’ (notified under document C(2023) 1839) (Only the English text is authentic)
Deċiżjoni ta’ Implimentazzjoni tal-Kummissjoni (UE) 2023/694 tat-22 ta’ Marzu 2023 dwar it-talba għar-reġistrazzjoni, skont ir-Regolament (UE) 2019/788 tal-Parlament Ewropew u tal-Kunsill, tal-inizjattiva taċ-ċittadini Ewropej intitolata “End The Horse Slaughter Age” (notifikata bid-dokument C(2023) 1839) (It-test bl-Ingliż biss huwa awtentiku)
Deċiżjoni ta’ Implimentazzjoni tal-Kummissjoni (UE) 2023/694 tat-22 ta’ Marzu 2023 dwar it-talba għar-reġistrazzjoni, skont ir-Regolament (UE) 2019/788 tal-Parlament Ewropew u tal-Kunsill, tal-inizjattiva taċ-ċittadini Ewropej intitolata “End The Horse Slaughter Age” (notifikata bid-dokument C(2023) 1839) (It-test bl-Ingliż biss huwa awtentiku)
C/2023/1839
ĠU L 91, 29.3.2023, p. 15–16
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
29.3.2023 |
MT |
Il-Ġurnal Uffiċjali tal-Unjoni Ewropea |
L 91/15 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2023/694
tat-22 ta’ Marzu 2023
dwar it-talba għar-reġistrazzjoni, skont ir-Regolament (UE) 2019/788 tal-Parlament Ewropew u tal-Kunsill, tal-inizjattiva taċ-ċittadini Ewropej intitolata “End The Horse Slaughter Age”
(notifikata bid-dokument C(2023) 1839)
(It-test bl-Ingliż biss huwa awtentiku)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2019/788 tal-Parlament Ewropew u tal-Kunsill tas-17 ta’ April 2019 dwar l-inizjattiva taċ-ċittadini Ewropej (1), u b’mod partikolari l-Artikolu 6(2) u (3) tiegħu,
Billi:
(1) |
Fil-31 ta’ Jannar 2023 il-Kummissjoni ġiet ippreżentata talba dwar ir-reġistrazzjoni ta’ inizjattiva taċ-ċittadini Ewropej intitolata “End The Horse Slaughter Age”. |
(2) |
L-għanijiet tal-inizjattiva kif ġew spjegati mill-organizzaturi huma: “L-inizjattiva taċ-Ċittadini Ewropej End The Horse Slaughter Age titlob liġi li tipprojbixxi l-qtil taż-żwiemel, inkluż fil-projbizzjoni wkoll it-tgħammir u l-esportazzjoni tagħhom għall-produzzjoni tal-pil, il-ġilda, il-laħam jew għall-manifattura ta’ mediċini jew sustanzi oħra. L-inizjattiva taċ-Ċittadini Ewropej End The Horse Slaughter Age titlob ukoll liġi li twaqqaf it-trasport fuq distanzi twal ta’ żwiemel madwar l-Ewropa għall-qatla u regolament li jipproteġi ż-żwiemel milli jkunu mġiegħla jagħmlu xogħol żejjed jew taħriġ iebes.” |
(3) |
L-inizjattiva tinkludi anness li jipprovdi aktar dettalji dwar is-suġġett, l-objettivi u l-isfond. L-organizzaturi jsostnu li l-qtil taż-żwiemel għall-konsum mill-bniedem huwa prattika krudili, xprunata mid-domanda għal-laħam taż-żiemel, li mhuwiex sikur għall-konsum mill-bniedem. Bil-projbizzjoni tal-qtil taż-żwiemel jixtiequ jġibu l-leġiżlazzjoni dwar iż-żwiemel konformi mal-leġiżlazzjoni għall-klieb u l-qtates. |
(4) |
Dokument addizzjonali b’xi dettalji ulterjuri dwar l-objettivi tal-inizjattiva taċ-ċittadini proposta u abbozz ta’ att legali li jesprimi l-għanijiet ewlenin tal-inizjattiva ġew ippreżentati wkoll mill-grupp ta’ organizzaturi bħala parti mit-talba għar-reġistrazzjoni tagħhom. |
(5) |
Il-Kummissjoni tqis li l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati. L-Artikolu 43(2) tat-Trattat jipprovdi lill-Kummissjoni, inter alia, bis-setgħa li tipproponi leġiżlazzjoni li tistabbilixxi standards minimi għall-protezzjoni tal-annimali miżmuma għal skopijiet ta’ biedja. L-Artikoli 114 u 207 tat-Trattat jipprovdu lill-Kummissjoni bis-setgħa li tipproponi leġiżlazzjoni li tipprojbixxi t-tqegħid fis-suq u l-esportazzjoni taż-żwiemel għall-produzzjoni tal-pil, tal-ġilda, tal-laħam jew għall-manifattura ta’ mediċini jew sustanzi oħra. |
(6) |
Din il-konklużjoni hija mingħajr preġudizzju għall-valutazzjoni ta’ jekk il-kundizzjonijiet sostantivi konkreti meħtieġa biex il-Kummissjoni taġixxi, inklużi l-konformità mal-prinċipji tal-proporzjonalità u tas-sussidjarjetà u l-kompatibbiltà mad-drittijiet fundamentali, ikunux issodisfati f’dan il-każ. |
(7) |
Il-grupp ta’ organizzaturi pprovda evidenza xierqa li huwa jissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt f’konformità mal-Artikolu 5(3), l-ewwel subparagrafu, ta’ dak ir-Regolament. |
(8) |
L-inizjattiva la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea jew kontra d-drittijiet minquxin fil-Karta tad-Drittijiet Fundamentali tal-Unjoni Ewropea. |
(9) |
Għaldaqstant jenħtieġ li l-inizjattiva intitolata “End The Horse Slaughter Age” tiġi rreġistrata. |
(10) |
Il-konklużjoni li l-kundizzjonijiet għar-reġistrazzjoni skont l-Artikolu 6(3) tar-Regolament (UE) 2019/788 huma ssodisfati ma timplikax li l-Kummissjoni b’xi mod jew ieħor tikkonferma l-korrettezza fattwali tal-kontenut tal-inizjattiva, li hija r-responsabbiltà unika tal-grupp ta’ organizzaturi tal-inizjattiva. Il-kontenut tal-inizjattiva jesprimi biss il-fehmiet tal-grupp ta’ organizzaturi, u bl-ebda mod ma jista’ jitqies li jirrifletti l-fehmiet tal-Kummissjoni, |
ADOTTAT DIN ID-DEĊIŻJONI:
Artikolu 1
L-inizjattiva taċ-ċittadini Ewropej intitolata “End The Horse Slaughter Age” għandha tiġi rreġistrata.
Artikolu 2
Din id-Deċiżjoni hija indirizzata lill-grupp ta’ organizzaturi tal-inizjattiva taċ-ċittadini intitolata “End The Horse Slaughter Age”, irrappreżentat mis-Sinjura Paola SGARBAZZINI u mis-Sinjura Nora PAGLIONICO li jaġixxu bħala persuni ta’ kuntatt.
Magħmul fi Brussell, it-22 ta’ Marzu 2023.
Għall-Kummissjoni
Věra JOUROVÁ
Viċi President