This document is an excerpt from the EUR-Lex website
Document 32023A0508(01)
Commission Opinion of 5 May 2023 relating to the modified plan for the disposal of radioactive waste arising from the Loviisa low and intermediate level waste repository located at the Loviisa site in Finland (Only the Finnish and Swedish texts are authentic) 2023/C 163/01
Opinjoni tal-Kummissjoni tal-5 ta' Mejju 2023 dwar il-pjan modifikat għar-rimi tal-iskart radjuattiv li jirriżulta mir-repożitorju tal-iskart ta’ livell baxx u intermedju ta’ Loviisa li hemm fis-sit ta’ Loviisa fil-Finlandja (It-testi bil-Finlandiż u bl-Iżvediż biss huma awtentiċi) 2023/C 163/01
Opinjoni tal-Kummissjoni tal-5 ta' Mejju 2023 dwar il-pjan modifikat għar-rimi tal-iskart radjuattiv li jirriżulta mir-repożitorju tal-iskart ta’ livell baxx u intermedju ta’ Loviisa li hemm fis-sit ta’ Loviisa fil-Finlandja (It-testi bil-Finlandiż u bl-Iżvediż biss huma awtentiċi) 2023/C 163/01
C/2023/2855
ĠU C 163, 8.5.2023, p. 1–2
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
8.5.2023 |
MT |
Il-Ġurnal Uffiċjali tal-Unjoni Ewropea |
C 163/1 |
OPINJONI TAL-KUMMISSJONI
tal-5 ta' Mejju 2023
dwar il-pjan modifikat għar-rimi tal-iskart radjuattiv li jirriżulta mir-repożitorju tal-iskart ta’ livell baxx u intermedju ta’ Loviisa li hemm fis-sit ta’ Loviisa fil-Finlandja
(It-testi bil-Finlandiż u bl-Iżvediż biss huma awtentiċi)
(2023/C 163/01)
Il-valutazzjoni ta’ hawn taħt saret skont id-dispożizzjonijiet tal-Art 37 tat-Trattat Euratom, mingħajr preġudizzju għal valutazzjonijiet oħra li jridu jsiru skont it-Trattat dwar il-Funzjonament tal-Unjoni Ewropea u l-obbligi li joħorġu minnu u mil-leġiżlazzjoni sekondarja (1).
Fit-3 ta’ Ottubru 2022, il-Kummissjoni Ewropea rċeviet Data Ġenerali mingħand il-Gvern Franċiż, skont l-Artikolu 37 tat-Trattat tal-Euratom, rigward il-pjan modifikat għar-rimi tal-iskart radjuattiv (2) li jirriżulta mir-repożitorju tal-iskart ta’ livell baxx u intermedju ta’ Loviisa. Is-sottomissjoni tinkludi l-kostruzzjoni l-ġdida fir-repożitorju għar-rimi tal-iskart tad-dekummissjonar mill-impjant tal-enerġija ta’ Loviisa, u ammonti żgħar ta’ skart radjuattiv iġġenerat band’oħra fil-Finlandja.
Abbażi ta’ din id-data u tal-informazzjoni addizzjonali li l-Kummissjoni talbet fit-8 ta’ Diċembru 2022 u l-awtoritajiet Franċiżi pprovdew fl-1 ta’ Frar 2023, u wara konsultazzjoni mal-Grupp ta’ Esperti, il-Kummissjoni fasslet l-opinjoni li ġejja:
1. |
Id-distanza mis-sit sal-eqreb fruntiera ta’ Stat Membru ieħor, f’dan il-każ l-Estonja hi 58km. Id-distanza sal-Federazzjoni Russa hi 45km. |
2. |
Tul il-perjodu operazzjonali tal-faċilità tar-rimi: Il-pjan modifikat għadu jipprevedi li l-iskart radjuattiv se jitqiegħed mingħajr l-intenzjoni ta’ rkupru. F’kundizzjonijiet normali tal-operat, ir-repożitorju la jirrilaxxa effluwenti radjuattivi fl-arja u lanqas likwidi. F’każ ta’ rilaxxi mhux ippjanati ta’ effluwenti radjuattivi li jistgħu jiġru wara aċċident tat-tip u d-daqs ikkunsidrati fil-pjan modifikat, dawn ir-rilaxxi aktarx ma jikkaġunawx kontaminazzjoni radjuattiva tal-ilma, tal-ħamrija jew tal-ispazju tal-ajru ta’ Stat Membru ieħor jew ta’ pajjiż ġar li tkun sinifikanti mil-lat tas-saħħa, f’konformità mad-dispożizzjonijiet tad-Direttiva dwar l-Istandards Bażiċi tas-Sikurezza (3). |
3. |
Wara l-perjodu operazzjonali tal-faċilità tar-rimi: Il-miżuri previsti, fil-pjan modifikat, għall-għeluq finali tar-repożitorju kif deskritt fid-Data Ġenerali, jipprovdu assigurazzjoni li l-konklużjonijiet skont il-punt 2 ta’ hawn fuq se jibqgħu validi fit-tul. Bħala konklużjoni, il-Kummissjoni hi tal-fehma li l-implimentazzjoni tal-pjan modifikat għar-rimi tal-iskart radjuattiv fi kwalunkwe għamla li jirriżulta mir-repożitorju tal-iskart ta’ livell baxx u intermedju ta’ Loviisa, li hemm fis-sit ta’ Loviisa fil-Finlandja, waqt il-ħajja operazzjonali tiegħu u anki wara l-għeluq finali tiegħu, kif ukoll fil-każ ta’ aċċidenti tat-tip u d-daqs ikkunsidrat fid-Data Ġenerali, mhix mistennija tikkaġuna kontaminazzjoni radjuattiva tal-ilma, tal-ħamrija jew tal-ispazju tal-ajru ta’ Stat Membru ieħor li tkun sinifikanti mil-lat tas-saħħa, fir-rigward tad-dispożizzjonijiet stabbiliti fl-Istandards Bażiċi tas-Sikurezza. |
Magħmul fi Brussell, 5 ta' Mejju 2023.
Għall-Kummissjoni
Kadri SIMSON
Membru tal-Kummissjoni
(1) Pereżempju, skont it-Trattat dwar il-Funzjonament tal-Unjoni Ewropea, l-aspetti ambjentali jenħtieġ li jiġu vvalutati f’aktar dettall. B’mod indikattiv, il-Kummissjoni tixtieq tiġbed l-attenzjoni għad-dispożizzjonijiet tad-Direttiva 2011/92/UE dwar l-istima tal-effetti ta’ ċerti proġetti pubbliċi u privati fuq l-ambjent, kif emendata bid-Direttiva 2014/52/UE; tad-Direttiva 2001/42/KE dwar l-istima tal-effetti ta’ ċerti pjanijiet u programmi fuq l-ambjent, tad-Direttiva 92/43/KEE dwar il-konservazzjoni tal-ħabitat naturali u tal-fawna u l-flora selvaġġa, u tad-Direttiva 2000/60/KE li tistabbilixxi qafas għal azzjoni Komunitarja fil-qasam tal-politika tal-ilma.
(2) Ir-rimi tal-iskart radjuattiv skont it-tifsira tal-punt 1 tar-Rakkomandazzjoni tal-Kummissjoni 2010/635/Euratom tal-11 ta’ Ottubru 2010 dwar l-applikazzjoni tal-Artikolu 37 tat-Trattat Euratom (ĠU L 279, 23.10.2010, p. 36).
(3) Id-Direttiva tal-Kunsill 2013/59/Euratom tal-5 ta’ Diċembru 2013 li tistabbilixxi standards bażiċi ta’ sikurezza għal protezzjoni kontra l-perikli li jirriżultaw minn esponiment għal radjazzjoni jonizzanti, u li tħassar id-Direttivi 89/618/Euratom, 90/641/Euratom, 96/29/Euratom, 97/43/Euratom u 2003/122/Euratom (ĠU L 13, 17.1.2014, p. 1).