(1)

Ir-Regolament (UE) 2017/625 jistabbilixxi regoli ġenerali għall-kontrolli uffiċjali mwettqa mill-awtorità kompetenti għall-verifika tal-konformità mar-regoli f’għadd ta’ oqsma, inkluża s-saħħa tal-annimali, fuq bażi ta’ riskju u bi frekwenzi xierqa. Dak ir-Regolament jistabbilixxi wkoll metodi u tekniki għall-kontrolli uffiċjali, li jinkludu, fost l-oħrajn, spezzjonijiet ta’ bini, annimali u oġġetti taħt il-kontroll tal-operaturi.

(2)

Ir-Regolament (UE) 2017/625 jipprevedi arranġamenti prattiċi uniformi għat-twettiq ta’ kontrolli uffiċjali fir-rigward ta’ frekwenzi minimi uniformi ta’ kontrolli uffiċjali li għandhom jiġu stabbiliti, fejn dawn ikunu meħtieġa biex jirrispondu għal perikli u riskji speċifiċi għas-saħħa tal-annimali u biex jivverifikaw il-konformità mal-miżuri ta’ prevenzjoni u l-kontroll tal-mard.

(3)

Qabel id-dħul fis-seħħ tar-Regolament (UE) 2016/429 tal-Parlament Ewropew u tal-Kunsill (2), għadd ta’ atti legali dwar is-saħħa tal-annimali stabbilixxew regoli għall-frekwenzi minimi għall-kontrolli uffiċjali, b’mod partikolari l-ispezzjonijiet. Ir-Regolament (UE) 2016/429 iħassar dawk l-atti legali b’effett mill-21 ta’ April 2021.

(4)

Ir-Regolament Delegat tal-Kummissjoni (UE) 2019/2035 (3) jistabbilixxi r-rekwiżiti għall-approvazzjoni, fost l-oħrajn, tal-imfaqas u l-istabbilimenti li jżommu t-tjur, l-istabbilimenti għall-operazzjonijiet ta’ ġbir f’daqqa għall-ungulati u t-tjur, iċ-ċentri ta’ ġbir f’daqqa ta’ klieb, qtates u inmsa, is-santwarji tal-annimali għall-klieb, qtates u inmsa, il-postijiet ta’ kontroll, l-istabbilimenti tal-produzzjoni tan-naħal bagħli iżolati ambjentalment, l-istabbilimenti ta’ kwarantina u l-istabbilimenti konfinati għall-annimali terrestri.

(5)

Ir-Regolament Delegat tal-Kummissjoni (UE) 2020/686 (4) jistabbilixxi r-rekwiżiti għall-approvazzjoni ta’ stabbilimenti ta’ prodotti ġerminali għall-annimali bovini, porċini, ovini, kaprini u ekwini li minnhom il-prodotti ġerminali ta’ dawk l-annimali jistgħu jinġarru lejn Stat Membru ieħor.

(6)

Ir-Regolament Delegat tal-Kummissjoni (UE) 2020/691 (5) jistabbilixxi r-rekwiżiti għall-approvazzjoni ta’ ċerti stabbilimenti tal-akkwakultura u gruppi ta’ stabbilimenti tal-akkwakultura li jżommu annimali akkwatiċi li huma ta’ riskju sinifikanti għas-saħħa tal-annimali.

(7)

Huwa importanti li l-awtorità kompetenti tivverifika permezz ta’ kontrolli uffiċjali regolari, b’mod partikolari permezz ta’ spezzjonijiet imsemmija fl-Artikolu 14(b) tar-Regolament (UE) 2017/625, li l-annimali u l-prodotti ġerminali jibqgħu jinżammu u jiġu prodotti taħt kundizzjonijiet uniformi ta’ approvazzjoni għall-istabbilimenti, li huma maħsuba biex itaffu r-riskji u l-perikli assoċjati mal-mard elenkat fir-Regolament (UE) 2016/429 u ma’ mard emerġenti. Bħala rispons għal dawk il-perikli u r-riskji uniformi għas-saħħa tal-bniedem u tal-annimali kkawżati minn dak il-mard, f’dan ir-Regolament jenħtieġ jiġu stabbiliti frekwenzi minimi uniformi għall-ispezzjonijiet f’ċerti stabbilimenti approvati.

(8)

Għall-istabbilimenti tal-prodotti ġerminali approvati, kwalunkwe frekwenza minima uniformi għall-ispezzjonijiet jenħtieġ tqis in-natura mhux staġjonali tal-ġbir tas-semen tal-annimali bovini u porċini.

(9)

Jenħtieġ li kwalunkwe frekwenza minima uniformi għall-ispezzjonijiet f’ċerti stabbilimenti tal-akkwakultura approvati u fi gruppi approvati ta’ stabbilimenti tal-akkwakultura tqis il-klassifikazzjoni tar-riskju ta’ dak l-istabbiliment jew ta’ dak il-grupp ta’ stabbilimenti f’konformità mar-Regolament Delegat tal-Kummissjoni (UE) 2020/689 (6).

(10)

Fir-rigward tal-identifikazzjoni u r-reġistrazzjoni ta’ ċerti annimali, ir-Regolamenti tal-Kummissjoni (KE) Nru 1082/2003 (7) u r-Regolament tal-Kummissjoni (KE) Nru 1505/2006 (8) jistabbilixxu l-livell minimu ta’ kontrolli jew verifiki li għandhom jitwettqu fi stabbilimenti li jżommu annimali bovini, ovini u kaprini kull sena kif ukoll l-għadd ta’ annimali li għandhom jiġu spezzjonati f’kull wieħed minn dawk l-istabbilimenti.

(11)

Ir-Regolament Delegat (UE) 2019/2035 jistabbilixxi wkoll rekwiżiti dettaljati għall-identifikazzjoni u r-reġistrazzjoni ta’ annimali bovini, ovini u kaprini biex tiġi żgurata t-traċċabbiltà tagħhom.

(12)

L-annimali bovini, ovini jew kaprini li mhumiex identifikati jew irreġistrati f’konformità mar-rekwiżiti stabbiliti fir-Regolament Delegat (UE) 2019/2035 jista’ jkollhom rwol fit-tixrid tal-mard elenkat fir-Regolament (UE) 2016/429 u fil-mard emerġenti. Biex jiġi mmitigat dak il-periklu u r-riskju uniformi għas-saħħa tal-bniedem u tal-annimali, biex tiġi vverifikata b’mod regolari l-konformità tal-operaturi mar-rekwiżiti stabbiliti fir-Regolament Delegat (UE) 2019/2035 u biex tiġi żgurata l-implimentazzjoni uniformi tar-Regolament (UE) 2017/625, jenħtieġ li jiġu stabbiliti frekwenzi minimi uniformi għall-ispezzjonijiet matul it-twettiq tal-kontrolli uffiċjali fuq l-identifikazzjoni u r-reġistrazzjoni tal-annimali bovini, ovini u kaprini.

(13)

Ir-Regolament Delegat (UE) 2019/2035 ma ħassarx b’mod espliċitu r-Regolamenti (KE) Nru 1082/2003 u (KE) Nru 1505/2006. Sabiex tiġi żgurata ċ-ċertezza legali, dan ir-Regolament jenħtieġ li jħassar dawk ir-Regolamenti.

(14)

Ir-regoli stabbiliti f’dan ir-Regolament jenħtieġ li japplikaw għar-Renju Unit fir-rigward tal-Irlanda ta’ Fuq, f’konformità mal-Artikolu 5(4) tal-Protokoll dwar l-Irlanda/l-Irlanda ta’ Fuq għall-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika flimkien mal-Anness 2 ta’ dak il-Protokoll.

(15)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,