(1)

Il-kooperazzjoni transkonfinali fl-infurzar tal-liġi hija essenzjali biex jiġi indirizzat it-theddid għas-sigurtà u biex jiġi żgurat il-funzjonament tajjeb taż-żona Schengen. Huwa essenzjali li persuni ma jitħallewx jaħarbu mill-awtoritajiet tal-infurzar tal-liġi sempliċiment billi jiċċaqalqu minn Stat Membru għal ieħor. Kooperazzjoni transkonfinali msaħħa fl-infurzar tal-liġi bejn l-awtoritajiet kollha tal-infurzar tal-liġi tal-Istati Membri ser tgħin biex jittejbu l-prevenzjoni, il-kxif u l-investigazzjoni ta' reati kriminali fl-Unjoni. Din il-kooperazzjoni msaħħa tkopri azzjonijiet transkonfinali bejn żewġ Stati Membri jew aktar, bħal insegwimenti transkonfinali u sorveljanza transkonfinali, u azzjonijiet tranżnazzjonali, bħal operazzjonijiet konġunti, li jinvolvu l-iskjerament ta' uffiċjali tal-infurzar tal-liġi fi Stati Membri oħra.

(2)

Insegwimenti transkonfinali u sorveljanza transkonfinali huma strumenti indispensabbli ta' kooperazzjoni operazzjonali fl-infurzar tal-liġi li mingħajrhom xi persuni jistgħu jaħarbu mill-awtoritajiet tal-infurzar tal-liġi billi jaqsmu l-fruntiera biex jieħdu vantaġġ mill-bidla tal-ġuriżdizzjoni u n-nuqqas ta' kontinwità tal-azzjoni tal-infurzar tal-liġi. Jenħtieġ li jkun rakkomandat li l-Istati Membri jindirizzaw il-limitazzjonijiet eżistenti li xi wħud mill-istati Membri stabbilew, peress li joħolqu ostakli li jxekklu t-twettiq ta’ tali azzjonijiet fit-territorju tagħhom. Huwa wkoll neċessarju li, filwaqt li jiġu rispettati l-kompetenzi tal-awtoritajiet ġudizzjarji ta' kull Stat Membru, ċerti regoli ta' involviment f'operazzjonijiet transkonfinali tal-infurzar tal-liġi jiġu aġġustati biex jiġu mmonitorjati u detenuti persuni taħt sorveljanza transkonfinali, f’insegwimenti transkonfinali u waqt operazzjonijiet konġunti.

(3)

L-istabbiliment ta' viġilanzi konġunti permanenti u ta' mezzi oħra ta' operazzjonijiet konġunti huwa neċessarju biex jiġu indirizzati attivitajiet kriminali u l-isfidi għall-kooperazzjoni operazzjonali fl-infurzar tal-liġi li ġġib magħha l-mobbiltà permanenti u dejjem akbar tal-persuni, tal-merkanzija u tas-servizzi fl-Unjoni. Bl-iskambju ta' informazzjoni, l-istrutturi eżistenti, bħaċ-Ċentri ta' Kooperazzjoni tal-Pulizija u tad-Dwana (PCCC), għandhom rwol ewlieni fil-ġlieda kontra l-kriminalità transkonfinali. Fejn rilevanti, jenħtieġ li l-PCCC ikunu jistgħu jappoġġaw il-viġilanzi konġunti u operazzjonijiet konġunti oħra bbażati fuq analiżi kondiviża tar-riskji u valutazzjoni tal-ħtiġijiet, f'konformità mar-rekwiżiti legali applikabbli, sabiex jipprevjenu u jikxfu reati transkonfinali mwettqa f'żoni ta' fruntieri interni tal-Unjoni u jappoġġaw investigazzjonijiet f’dawk ir-reati transkonfinali.

(4)

Sabiex l-Istati Membri, il-Kunsill u l-Kummissjoni jiksbu stampa kwantitattiva akkurata tas-sitwazzjoni attwali tal-implimentazzjoni tal-attivitajiet ta' kooperazzjoni transkonfinali fl-infurzar tal-liġi fl-Unjoni, jenħtieġ li jkun rakkomandat li l-Istati Membri, fuq bażi annwali, jiġbru data u jirrappurtaw dik l-istatistika. Dik l-istatistika tista’ tipprovdi għarfien dettaljat u fehim aktar fil-fond tal-ħtiġijiet tal-Istati Membri u ta’ kwalunkwe kwistjoni potenzjali li jenħtieġ tiġi indirizzata fil-livell tal-Unjoni.

(5)

In-networks kriminali jieħdu vantaġġ min-nuqqas ta' kontrolli fuq il-fruntieri interni tal-Unjoni biex ikomplu bl-attivitajiet kriminali tagħhom. Il-viġilanzi konġunti u operazzjonijiet konġunti oħra huma għodod siewja biex jiġi miġġieled kull tip ta' kriminalità transkonfinali.

(6)

Fejn rilevanti u xieraq, jenħtieġ li jkun possibbli li l-Istati Membri jimplimentaw ir-rakkomandazzjonijiet dwar il-kooperazzjoni operazzjonali transkonfinali fl-infurzar tal-liġi fil-kuntest tal-Pjattaforma Multidixxiplinari Ewropea Kontra t-Theddid Kriminali (EMPACT) biex jiġu indirizzati t-theddidiet identifikati u prijoritarji kkawżati mill-kriminalità internazzjonali serja u organizzata. Pereżempju, il-viġilanzi konġunti mmirati huma strument flessibbli bbażat fuq attivitajiet tal-pulizija mmexxija mill-intelligence li jistgħu jiġu inizjalati mill-awtoritajiet rilevanti tal-infurzar tal-liġi. Il-viġilanzi konġunti mmirati jistgħu jiġu użati wkoll mill-Istati Membri flimkien ma’ azzjonijiet operazzjonali oħra fil-pjanijiet ta' azzjoni operazzjonali (OAPs) tal-EMPACT biex jiġu indirizzati oqsma speċifiċi ta' kriminalità prijoritarji.

(7)

Id-disponibbiltà limitata tal-uffiċjali tal-infurzar tal-liġi li l-Istati Membri jistgħu jiskjeraw barra mill-pajjiż u n-nuqqas ta' skjerament koordinat abbażi ta' analiżi konġunta minn qabel jistgħu jneħħu l-effettività tal-iskjerament tal-infurzar tal-liġi fi Stati Membri oħra. Biex tiġi ssimplifikata l-ġestjoni amministrattiva u loġistika tal-viġilanzi konġunti u operazzjonijiet konġunti oħra, jenħtieġ li jkun rakomandat li tiġi stabbilita pjattaforma ta' appoġġ b'dimensjoni pan-Ewropea. Permezz ta' tali pjattaforma ta' appoġġ, l-Istati Membri jistgħu jiskambjaw informazzjoni dwar il-ħtiġijiet tagħhom u jiffaċilitaw l-iskjerament effiċjenti u effettiv ta' viġilanzi konġunti u operazzjonijiet konġunti oħra sabiex iżommu u jsaħħu l-ordni u s-sikurezza pubbliċi, jipprevjenu reati kriminali, u jgħinu biex jiġu indirizzati mewġiet speċifiċi ta' kriminalità f'postijiet ewlenin, f'mumenti speċifiċi u f'sitwazzjonijiet speċifiċi. Fejn xieraq, il-pjattaforma ta’ appoġġ tista' tibbenefika minn finanzjament tal-Unjoni, u appoġġ amministrattiv u loġistiku mill-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) stabbilita bir-Regolament (UE) 2016/794 tal-Parlament Ewropew u tal-Kunsill (1).

(8)

Il-komunikazzjoni u l-aċċess għall-informazzjoni disponibbli huma kritiċi għas-suċċess tal-kooperazzjoni operazzjonali tal-infurzar tal-liġi transkonfinali. Jenħtieġ li jkun rakkomandat li l-Istati Membri jippermettu li l-uffiċjali tal-infurzar tal-liġi li jaġixxu fi Stat Membru ieħor ikollhom aċċess f'ħin reali għal informazzjoni miżmuma fis-sistemi ta' informazzjoni tal-Unjoni permezz tal-Portal Ewropew ta' Tfittxija (ESP) u għall-bażijiet tad-data nazzjonali rilevanti tagħhom permezz ta' soluzzjonijiet mobbli, bħal apparati portabbli jew kompjuters tal-infurzar tal-liġi mmuntati fil-karozza, f'konformità mad-drittijiet ta' aċċess applikabbli u mal-liġi applikabbli tal-Unjoni u dik nazzjonali. Jenħtieġ li jkun rakkomandat li l-informazzjoni pprovduta lill-awtoritajiet tal-infurzar tal-liġi ta’ Stat Membru ieħor tkun limitata għal dik meħtieġa mill-uffiċjali tal-infurzar tal-liġi għat-twettiq ta' dmirijiethom matul il-kooperazzjoni transkonfinali fl-infurzar tal-liġi. Jenħtieġ ukoll li jkun rakkomandat li l-uffiċjali tal-infurzar tal-liġi li jaġixxu fi Stat Membru ieħor ikunu mgħammra b'mezzi ta' komunikazzjoni mobbli affidabbli u siguri, kapaċi jikkonnettjaw f'ħin reali, bħal għodod ta' messaġġi istantanji, li jiffunzjonaw bejn il-fruntieri sabiex jikkomunikaw direttament mal-awtoritajiet tagħhom u mal-awtoritajiet tal-Istat Membru ospitanti. Huwa neċessarju li tiġi żgurata l-interkonnettività ta' mezzi ta' komunikazzjoni siguri bejn il-fruntieri li, bħala minimu, jippermettu l-użu sigur ta' mezzi ta' komunikazzjoni mobbli f'ħin reali, kif ukoll il-ġeolokalizzazzjoni tal-vetturi tal-infurzar tal-liġi użati mill-uffiċjali tal-infurzar tal-liġi, pereżempju permezz ta' traċċar bil-GPS jew droni, matul operazzjoni transkonfinali tal-infurzar tal-liġi.

Għalhekk, jenħtieġ li jkun rakkomandat li l-Istati Membri, skont il-ħtiġijiet speċifiċi tagħhom, jagħmlu użu mis-soluzzjonijiet tekniċi li jiġu pprovduti, pereżempju, mill-Europol fuq il-parir b'mod partikolari tal-laboratorju tal-innovazzjoni tagħha, kif ukoll abbażi tal-ħidma u l-proġetti rilevanti taċ-Ċentru ta' Innovazzjoni Ewropew għas-sigurtà interna, minn gruppi ta' esperti apposta bħall-Grupp Ewlieni dwar Komunikazzjonijiet Sikuri u n-Network Ewropew għas-Servizzi Teknoloġiċi tal-Infurzar tal-Liġi (ENLETS), kif ukoll minn proġetti bħall-proġett BroadWay. L-Istati Membri jistgħu wkoll jiżguraw din il-konnettività billi s-sistemi miruta jiġu interkonnessi ma’ Stati Membri ġirien.

(9)

Kooperazzjoni operazzjonali transkonfinali effettiva fl-infurzar tal-liġi tinneċessita li nimxu lejn kultura komuni tal-Unjoni tal-infurzar tal-liġi. L-istabbiliment ta' korsijiet ta’ taħriġ inizjali konġunt, bħal dawk stabbiliti minn Spanja u Franza f'Valdemoro, ta' programmi ta' skambju bejn il-kadetti tal-infurzar tal-liġi dwar kwistjonijiet relatati ma' dik il-kooperazzjoni u korsijiet ta' żvilupp kontinwu dwar dawk il-kwistjonijiet għall-uffiċjali tal-infurzar tal-liġi u għall-investigaturi tal-kriminalità huwa strumentali fil-konsolidazzjoni tal-ħiliet, tal-għarfien u tal-fiduċja. Huwa importanti li l-Istati Membri jinkludu, fi ħdan il-korisijiet ta‘ taħriġ inizjali nazzjonali tagħhom għall-kadetti tal-infurzar tal-liġi, il-possibbiltà ta’ kors dwar il-kooperazzjoni operazzjonali transkonfinali fl-infurzar tal-liġi. Huwa importanti wkoll li l-Istati Membri jfittxu li jfasslu jew jaġġustaw, f'kooperazzjoni mal-Aġenzija tal-Unjoni Ewropea għat-Taħriġ fl-Infurzar tal-Liġi (CEPOL) stabbilita bir-Regolament (UE) 2015/2219 tal-Parlament Ewropew u tal-Kunsill (2), il-korsijiet dwar il-kooperazzjoni operazzjonali transkonfinali fl-infurzar tal-liġi, u li l-Istati Membri jipprovdu taħriġ lingwistiku li jintuża għat-taħriġ nazzjonali kontinwu tal-uffiċjali.

Jistgħu jiġu previsti perkorsi tal-karriera għall-kadetti tal-infurzar tal-liġi u l-uffiċjali li jikkompletaw tali korsijiet ta’ taħriġ. Jenħtieġ li jkun rakkomandat li l-Istati Membri jkomplu jagħmlu wkoll l-aħjar użu mis-CEPOL billi jinfurmaw lis-CEPOL bil-ħtiġijiet ta' taħriġ tagħhom, jappoġġaw l-attivitajiet tas-CEPOL u jikkontribwixxu għall-allinjament tal-portafoll ta' taħriġ tagħhom mal-prijoritajiet relatati mal-kooperazzjoni transkonfinali fl-infurzar tal-liġi stabbiliti fil-Valutazzjonijiet Strateġiċi tal-Ħtiġijiet ta' Taħriġ tal-UE (EU-STNA). Jenħtieġ li jkun rakkomandat li l-Istati Membri jirriflettu dwar il-possibbiltà li jinħolqu programmi ta' taħriġ u skambju konġunti pan-Ewropej fuq skala kbira u fit-tul għall-kadetti tal-infurzar tal-liġi u għall-uffiċjali fil-qasam tal-kooperazzjoni operazzjonali transkonfinali fl-infurzar tal-liġi.

(10)

Minħabba l-importanza tal-koordinazzjoni u l-kooperazzjoni fir-rigward tal-kwistjonijiet indirizzati f'din ir-Rakkomandazzjoni, u b'mod partikolari l-implimentazzjoni tagħha, jenħtieġ li jkun hemm punt ta' diskussjoni permanenti dwar il-kooperazzjoni operazzjonali transkonfinali fl-infurzar tal-liġi fil-grupp ta' ħidma rilevanti tal-Kunsill. Dak il-grupp ta' ħidma jista’ jservi bħala forum permanenti għall-Istati Membri biex jiddiskutu dawk il-kwistjonijiet, inkluż il-konverġenza tar-regoli u l-ftehimiet tagħhom, miżuri oħra biex jiġu indirizzati l-ostakoli għall-effettività u l-effiċjenza tal-operazzjonijiet ta' kooperazzjoni transkonfinali fl-infurzar tal-liġi, ir-rapportar dwar il-progress li jkun sar, kif ukoll kwistjonijiet relatati mal-gwida u l-prattiki tajbin neċessarji.

(11)

Jenħtieġ li jkun rakkomandat li jingħata effett lil din ir-Rakkomandazzjoni fi żmien raġonevoli. Jenħtieġ ukoll li jkun rakkomandat li l-Istati Membri, hekk kif ikun raġonevolment possibbli, jibdew proċess biex jirrevedu fejn rilevanti u xieraq, ir-regoli nazzjonali u l-ftehimiet bilaterali u multilaterali ma' Stati Membri oħra sabiex jagħtu effett lil din ir-Rakkomandazzjoni.

(12)

Din ir-Rakkomandazzjoni ma taffettwax ir-regoli dwar il-ġarr u l-użu ta' armi tas-servizz, inkluż f'sitwazzjonijiet ta' difiża ta' oħrajn, l-użu ta' privileġġi tat-traffiku fit-toroq, l-użu ta' mezzi tekniċi biex jitwettqu sorveljanzi transkonfinali jew jitwettqu kontrolli tal-identità u d-detenzjoni ta' persuni li jippruvaw jevitaw tali kontrolli. Bl-istess mod, ir-regoli dwar l-istabbiliment ta’ dak li jaqa' fl-ambitu tal-kooperazzjoni ġudizzjarja jew dak li jeħtieġ awtorizzazzjoni minn awtorità ġudizzjarja jenħtieġ li lanqas ma jiġu affettwati.

(13)

Sabiex tiġi żgurata l-konsistenza, id-definizzjonijiet u l-garanziji li jinsabu f'din ir-Rakkomandazzjoni jenħtieġ li, fejn rilevanti, ikunu bbażati fuq il-liġi applikabbli tal-Unjoni u interpretati f'konformità magħhom, b'mod partikolari l-Konvenzjoni li timplimenta l-Ftehim ta' Schengen tal-14 ta' Ġunju 1985 bejn il-Gvernijiet tal-Istati tal-Unjoni Ekonomika tal-Benelux, ir-Repubblika Federali tal-Ġermanja u r-Repubblika Franċiża dwar it-tneħħija bil-mod ta' kontrolli fil-fruntieri komuni tagħhom (3) (KIFS), b’mod partikolari l-Artikoli 39 sa 46 tagħha, u d-Deċiżjonijiet tal-Kunsill 2008/615/ĠAI (4) u 2008/616/ĠAI (5) (d-"Deċiżjonijiet ta' Prüm"), b’mod partikolari l-Artikoli 17 sa 19 tad-Deċiżjoni 2008/615/ĠAI. L-istess japplika għar-referenzi għall-ħtieġa li tiġi rispettata l-liġi nazzjonali fejn il-liġi tal-Unjoni diġà tirreferi għall-istandards nazzjonali.

(14)

Il-progress li sar biex jingħata effett lil din ir-Rakkomandazzjoni jenħtieġ li jiġi rieżaminat wara ċertu perjodu ta' żmien. Għalhekk, mhux aktar tard minn sentejn wara l-adozzjoni ta' din ir-Rakkomandazzjoni , jenħtieġ li l-Kummissjoni tivvaluta l-progress li jkun sar u tippreżenta rapport wara li tkun ikkonsultat lill-Istati Membri. Dak ir-rapport jenħtieġ li jiġi diskuss fil-Kunsill bil-ħsieb fost l-oħrajn li l-Kummissjoni tipproponi atti legalment vinkolanti tal-liġi tal-Unjoni jekk tali atti jkunu neċessarji fil-qasam tal-kooperazzjoni operazzjonali fl-infurzar tal-liġi.

(15)

F'konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea (TUE) u mat-Trattat dwar il-Funzjonament tal-Unjoni Ewropea (TFUE), id-Danimarka mhijiex qed tieħu sehem fl-adozzjoni ta' din ir-Rakkomandazzjoni u mhijiex marbuta biha jew soġġetta għall-applikazzjoni tagħha. Peress li din ir-Rakkomandazzjoni tibni fuq l-acquis ta' Schengen, id-Danimarka, f'konformità mal-Artikolu 4 ta' dak il-Protokoll, jenħtieġ li tiddeċiedi, fi żmien sitt xhur wara li l-Kunsill ikun iddeċieda dwar din ir-Rakkomandazzjoni, jekk tkunx ser timplimentaha fil-liġi nazzjonali tagħha.

(16)

Din ir-Rakkomandazzjoni, bl-eċċezzjoni għat-taqsimiet 2.1, 2.2 u 2.3, tikkostitwixxi żvilupp tad-dispożizzjonijiet tal-acquis ta' Schengen li fih l-Irlanda tieħu sehem, f'konformità mal-Artikolu 5(1) tal-Protokoll Nru 19 dwar l-acquis ta' Schengen integrat fil-qafas tal-Unjoni Ewropea, anness mat-TUE u mat-TFUE, u l-Artikolu 6(2) tad-Deċiżjoni tal-Kunsill 2002/192/KE (6); l-Irlanda għalhekk qed tieħu sehem fl-adozzjoni ta' din ir-Rakkomandazzjoni.

(17)

Fir-rigward tal-Iżlanda u n-Norveġja, din ir-Rakkomandazzjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Ftehim konkluż mill-Kunsill tal-Unjoni Ewropea u mir-Repubblika tal-Iżlanda u mir-Renju tan-Norveġja dwar l-assoċjazzjoni ta' dawn tal-aħħar mal-implimentazzjoni, l-applikazzjoni u l-iżvilupp tal-acquis ta' Schengen (7) fil-qasam imsemmi fl-Artikolu 1, punt H tad-Deċiżjoni tal-Kunsill 1999/437/KE (8).

(18)

Fir-rigward tal-Iżvizzera, din ir-Rakkomandazzjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta' Schengen (9) fil-qasam imsemmi fl-Artikolu 1, punt H tad-Deċiżjoni 1999/437/KE moqri b'mod konġunt mal-Artikolu 3 tad-Deċiżjoni tal-Kunsill 2008/146/KE (10) u mal-Artikolu 3 tad-Deċiżjoni tal-Kunsill 2008/149/ĠAI (11).

(19)

Fir-rigward tal-Liechtenstein, din ir-Rakkomandazzjoni tikkostitwixxi żvilupp tad-dispożizzjonijiet tal-acquis ta' Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein għall-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta' Schengen (12) fil-qasam imsemmi fl-Artikolu 1, punt H tad-Deċiżjoni 1999/437/KE moqri b'mod konġunt mal-Artikolu 3 tad-Deċiżjoni tal-Kunsill 2011/350/UE (13) u mal-Artikolu 3 tad-Deċiżjoni tal-Kunsill 2011/349/UE (14).

(20)

Fir-rigward ta' Ċipru, it-taqsimiet 2.1 u 2.2 ta' din ir-Rakkomandazzjoni jikkostitwixxu att li jibni fuq jew li huwa relatat mal-acquis ta' Schengen fis-sens tal-Artikolu 3(2) tal-Att tal-Adeżjoni tal-2003.

(21)

Fir-rigward tal-Bulgarija u r-Rumanija, it-taqsimiet 2.1 u 2.2 ta' din ir-Rakkomandazzjoni jikkostitwixxu att li jibni fuq jew li huwa relatat mal-acquis ta' Schengen fis-sens tal-Artikolu 4(2) tal-Att tal-Adeżjoni tal-2005.

(22)

Fir-rigward tal-Kroazja, it-taqsimiet 2.1 u 2.2 ta' din ir-Rakkomandazzjoni jikkostitwixxi att li jibni fuq jew li huwa relatat mal-acquis ta' Schengen fis-sens tal-Artikolu 4(2) tal-Att tal-Adeżjoni tal-2011,