(1)

L-ewwel subparagrafu tal-Artikolu 12(1) tar-Regoli ta’ Proċedura tal-Kunsill (1) jipprevedi li l-atti tal-Kunsill dwar kwistjoni urġenti jistgħu jiġu adottati b’vot bil-miktub meta l-Kunsill jew il-Kumitat tar-Rappreżentanti Permanenti tal-Gvernijiet tal-Istati Membri (Coreper) jiddeċiedi b’mod unanimu li juża dik il-proċedura.

(2)

Bil-ħsieb li tiġi żgurata l-kontinwità tat-teħid ta’ deċiżjonijiet tal-Kunsill fiċ-ċirkostanzi eċċezzjonali kkawżati mill-pandemija tal-COVID-19 fejn il-laqgħat tal-Kunsill ma setgħux isiru regolarment, il-Kunsill adotta d-Deċiżjoni (UE) 2020/430 (2) li introduċiet deroga temporanja li tiġġedded mill-ewwel subparagrafu tal-Artikolu 12(1) tar-Regoli ta’ Proċedura tal-Kunsill fir-rigward ta’ deċiżjonijiet biex tintuża l-proċedura ordinarja bil-miktub, fejn dawk id-deċiżjonijiet jittieħdu mill-Coreper. Matul il-perjodu ta’ applikazzjoni tad-Deċiżjoni (UE) 2020/430, deċiżjoni mill-Coreper biex tintuża l-proċedura ordinarja bil-miktub kellha tittieħed f’konformità mar-regola ta’ votazzjoni applikabbli għall-adozzjoni tal-att tal-Kunsill ikkonċernat. Dik id-deroga ġiet estiża mill-Kunsill tnax-il darba, ġustifikata mill-kontinwazzjoni taċ-ċirkostanzi eċċezzjonali kkawżati mill-pandemija tal-COVID-19. L-estensjoni l-aktar reċenti, introdotta bid-Deċiżjoni tal-Kunsill (UE) 2022/321 (3), skadiet fit-30 ta’ Ġunju 2022.

(3)

Minkejja t-titjib tas-sitwazzjoni ġenerali fir-rigward tal-pandemija tal-COVID-19, l-użu li sar mid-deroga mill-ewwel subparagrafu tal-Artikolu 12(1) tar-Regoli ta’ Proċedura tal-Kunsill matul l-aħħar sentejn, u l-avvenimenti internazzjonali reċenti li kienu jeħtieġu azzjoni urġenti, juru li huwa importanti li l-Kunsill ikun jista’ jkompli juża tali għodda fil-futur.

(4)

Għalhekk, filwaqt li nibnu fuq l-esperjenza miksuba fl-iżgurar b’suċċess tal-kontinwità tat-teħid ta’ deċiżjonijiet tal-Kunsill matul il-pandemija tal-COVID-19 b’mod effiċjenti, filwaqt li nqisu l-probabbiltà għolja li fil-futur iseħħu sitwazzjonijiet li jkunu jeħtieġu azzjoni urġenti, u b’mod konsistenti mar-rwol tal-Coreper fit-tħejjija tal-ħidma fil-Kunsill u fl-iżgurar tal-konsistenza tal-politiki u l-azzjonijiet tal-Unjoni, huwa xieraq li jiġi previst li d-deċiżjonijiet biex tintuża l-proċedura ordinarja bil-miktub, fejn dawk id-deċiżjonijiet jittieħdu mill-Coreper, jenħtieġ li jittieħdu f’konformità mar-regola tal-votazzjoni applikabbli għall-adozzjoni tal-att tal-Kunsill ikkonċernat.

(5)

Il-proċedura ordinarja bil-miktub deċiża mill-Coreper jenħtieġ li tintuża biss f’ċirkostanzi li jeħtieġu azzjoni urġenti u jenħtieġ li din tkun preċeduta dejjem minn tħejjija bir-reqqa fil-Coreper, sabiex jiġu żgurati kemm jista’ jkun possibbli, fost l-oħrajn, il-koordinazzjoni nazzjonali, it-trasparenza pubblika, u l-involviment tal-parlamenti nazzjonali f’konformità mal-prattiki tal-Istati Membri.

(6)

Għaldaqstant, jenħtieġ li r-Regoli ta’ Proċedura tal-Kunsill jiġu emendati, f’konformità mal-Artikolu 240(3) tat-Trattat dwar il-Funzjonament tal-Unjoni Ewropea (TFUE).

(7)

F’konformità mal-Artikolu 106a tat-Trattat li jistabbilixxi l-Komunità Ewropea tal-Enerġija Atomika, l-Artikolu 240 TFUE japplika għall-Komunità Ewropea tal-Enerġija Atomika,